23217	MAT 1:4	Ri ralkꞌoꞌal ri Aram, Aminadab rubꞌiꞌ; ri ralkꞌoꞌal ri Aminadab, Naasón rubꞌiꞌ; ri ralkꞌoꞌal ri Naasón, Salmón rubꞌiꞌ.
23253	MAT 2:15	Chilaꞌ kꞌut xekꞌojiꞌ wi kꞌa che rukamik ri Herodes. Xuꞌan kꞌu waꞌ chaꞌ e kuꞌana rubꞌiꞌim lo ri Dios ruma ri qꞌalajisanel echiriꞌ jewaꞌ xubꞌiꞌij: «Kꞌa chilaꞌ Egipto xinsikꞌij wi lo ri Nukꞌajol» xchaꞌ.
23261	MAT 2:23	Echiriꞌ xebꞌopon chilaꞌ, xeꞌjeqela pa ri tinamit Nazaret, chaꞌ e xuꞌana ri xkibꞌiꞌij ri qꞌalajisanelabꞌ chwi ri Jesús: “Rire kabꞌiꞌx che aj Nazaret.”
23272	MAT 3:11	»Riꞌin paqatzij wi kanya ri bautismo che alaq rukꞌ yaꞌ, kꞌutubꞌal re tzelem chi tzij alaq chwach ri Dios. Noꞌj kꞌu ri Jun katajin lo chwij riꞌin, kꞌo puqꞌabꞌ kuya ri bautismo che alaq rukꞌ ri Santowilaj Ruxlabꞌixel ri Dios y rukꞌ aqꞌ. Rire más kꞌo uchuqꞌabꞌ chinuwach riꞌin; na taqal tane chwe tobꞌ xa kanmolej ruxajabꞌ.
23278	MAT 3:17	Ekꞌuchiriꞌ, xchꞌaw lo Jun chilaꞌ chikaj, jewaꞌ xubꞌiꞌij: «E Nukꞌajol waꞌ ri lik kꞌax kannaꞌo y lik kinkiꞌkot che» xcha ri Dios.
23282	MAT 4:4	Ri Jesús xukꞌul uwach: —Jewaꞌ tzꞌibꞌital kan chupa Rutzij Upixabꞌ ri Dios: Na xew ta ruma ri wa e kꞌas ri tikawex, ma e kꞌaslik ruma ronoje taq chꞌaꞌtem kel lo puchiꞌ ri Dios —xchaꞌ.
23291	MAT 4:13	Xel bꞌi pa ri tinamit Nazaret y xeꞌjeqela pa ri tinamit Capernaúm. Waꞌ jun tinamit kꞌo chuchiꞌ ri mar pa ri luwar re Zabulón y re Neftalí.
23293	MAT 4:15	Pa ri luwar re Zabulón y re Neftalí, ri kꞌo pa rubꞌeyal ri mar, chꞌaqa yaꞌ che ri nimayaꞌ Jordán, pa taq ri luwar re Galilea pa ejeqel wi ukꞌiyal winaq na e ta aj judiꞌabꞌ;
23306	MAT 5:3	«Nim kiqꞌij kalaxik ri kaketaꞌmaj lik chirajawaxik ri Ruxlabꞌixel ri Dios chike, ma rutaqanik ri Dios petinaq chilaꞌ chikaj kuꞌana ke.
23307	MAT 5:4	Nim kiqꞌij kalaxik ri kebꞌoqꞌik, ma ri Dios e kabꞌochiꞌin kikꞌuꞌx.
23308	MAT 5:5	Nim kiqꞌij kalaxik ri kiꞌanom chꞌutiꞌn che kibꞌ chwach ri Dios, ma kayaꞌ na chike, ri luwar ubꞌiꞌtisim chi ri Dios.
23309	MAT 5:6	Nim kiqꞌij kalaxik ri lik kacha kikꞌuꞌx che utzuquxik ri jusukꞌ bꞌinik silabꞌik chwach ri Dios, ma ri Dios e kayaꞌw waꞌ chike.
23310	MAT 5:7	Nim kiqꞌij kalaxik ri kakikꞌut ri kꞌaxnaꞌbꞌal kikꞌuꞌx chike jujun chik, ma ri Dios kukꞌut ri kꞌaxnaꞌbꞌal ukꞌuꞌx chike rike.
23311	MAT 5:8	Nim kiqꞌij kalaxik ri uꞌanom chom ri kanimaꞌ chwach ri Dios, ma rike kakil na uwach ri Dios.
23312	MAT 5:9	Nim kiqꞌij kalaxik ri kakitzukuj utzil chomal chikiwach, ma kabꞌiꞌx chike rike e ralkꞌoꞌal ri Dios.
23313	MAT 5:10	Nim kiqꞌij kalaxik ri keternabꞌex rukꞌ kꞌaxkꞌobꞌik ruma ri kakiꞌan ri jusukꞌ chwach ri Dios, ma rutaqanik ri Dios petinaq chilaꞌ chikaj kuꞌana ke.
23314	MAT 5:11	»Nim iqꞌij iwalaxik riꞌix echiriꞌ wuma riꞌin kixternabꞌex rukꞌ kꞌax, kakꞌaq bꞌi iqꞌij y kabꞌiꞌx ronoje ri na utz taj chiwij yey waꞌ xa raqꞌubꞌal.
23323	MAT 5:20	»Paqatzij wi kambꞌiꞌij chiwe: Xew kixok riꞌix chupa wa taqanik petinaq chilaꞌ chikaj, we ribꞌinik isilabꞌik e más jusukꞌ chwa ri kibꞌinik raj kꞌutunel re ri tzijpixabꞌ y ri fariseos. Noꞌj we na je ta laꞌ, riꞌ na taqal ta chiwe.
23325	MAT 5:22	»Noꞌj riꞌin kambꞌiꞌij chiwe: China ri kape royowal chirij juna ratz-uchaqꞌ, riꞌ kaqꞌat tzij puwiꞌ. China kꞌu ri kukꞌaq bꞌi uqꞌij ri ratz-uchaqꞌ, riꞌ kakꞌam bꞌi chwach ri qꞌatbꞌal tzij re ri tinamit. Yey china ri kubꞌiꞌij che juna ratz-uchaqꞌ: “¡Na jinta kꞌana achak!”, riꞌ katewun puwiꞌ keꞌek pa aqꞌ chi xibꞌalbꞌaꞌ re tijbꞌal kꞌax.
23329	MAT 5:26	Paqatzij wi kambꞌiꞌij chawe: Na katel tana lo pa ri cárcel we na xatoj ta kan ronoje ramak.
23331	MAT 5:28	»Noꞌj riꞌin kambꞌiꞌij chiwe: We kꞌo junoq karil juna ixoq y kurayij uwach re kamakun rukꞌ, riꞌ ya xmakun rukꞌ pa ranimaꞌ.
23335	MAT 5:32	»Noꞌj riꞌin kambꞌiꞌij: We rachi kuya bꞌi ruwujil re jachbꞌal ibꞌ che ri rixoqil tobꞌ rixoq na makuninaq ta chirij ri kꞌulanikil, riꞌ e kumin ri rixoqil pa ri mak. Ma we rixoq jachom bꞌi kukꞌam jun chik achi, kamakun kꞌu riꞌ chirij ri kꞌulanikil. Yey e rachi kakꞌuliꞌ rukꞌ rixoq jachom bꞌi, riꞌ jenelaꞌ kamakun chirij ri kꞌulanikil.
23337	MAT 5:34	»Noꞌj riꞌin kambꞌiꞌij chiwe: Lik makꞌo mijikibꞌaꞌ uwach pubꞌiꞌ junoq. Makꞌo ne mijikibꞌaꞌ uwach pa rubꞌiꞌ ri kaj, ma ri chilaꞌ chikaj e tzꞌulibꞌal pa kataqan wi ri Dios.
23338	MAT 5:35	Makꞌo mijikibꞌaꞌ uwach pubꞌiꞌ ruwa ulew, ma ruwa ulew e utakꞌalibꞌal ri raqan ri Dios. Makꞌo ne mijikibꞌaꞌ uwach pubꞌiꞌ ri tinamit Jerusalem, ma waꞌ e utinamit ri Nimalaj Taqanel Dios.
23340	MAT 5:37	E chibꞌiꞌij ri jusukꞌ. We lik qatzij, xew chibꞌiꞌij: “Qatzij.” We na qatzij taj, xew chibꞌiꞌij: “Na qatzij taj.” Ma ri kakojiꞌ uwiꞌ ri kabꞌiꞌxik, waꞌ rukꞌ ritzel winaq petinaq wi.
23342	MAT 5:39	»Noꞌj riꞌin kambꞌiꞌij chiwe: Miꞌan ukꞌaxel che ri kuꞌan ri na utz taj chiwe. We kꞌo kꞌu junoq kupachꞌ qꞌabꞌ xeꞌ aweꞌ pawikiqꞌabꞌ, chayaꞌa luwar che kupachꞌ ri pa mox.
23347	MAT 5:44	»Noꞌj riꞌin kambꞌiꞌij chiwe: Kꞌax chebꞌinaꞌa ri e aj retzelal kꞌuꞌx chiwij. Chitzꞌonoj ri rutzil ukꞌuꞌx ri Dios pakiwi ri kakitzꞌonoj ri na utz taj piwi riꞌix. Chiꞌana ri utz chike ri tzel kebꞌilow iwe. Chiꞌana kꞌu orar pakiwi janipa ri kakikꞌaq bꞌi iqꞌij y ri kixkiternabꞌej rukꞌ kꞌaxkꞌobꞌik
23353	MAT 6:2	E uwariꞌche, echiriꞌ kiya limoxna che juna nibꞌaꞌ, mitzijoj chike ri tikawex, pachaꞌ ri kakiꞌan ri xa kebꞌ kipalaj pa taq sinagogas y pa taq bꞌe. Ma rike jelaꞌ kakiꞌano xew chaꞌ kayak kiqꞌij. Noꞌj riꞌin paqatzij wi kambꞌiꞌij chiwe: Rukꞌ kꞌu wa yakbꞌal kiqꞌij, ya e laꞌ xkikꞌul ri rajil ukꞌaxel ri xkiꞌano.
23356	MAT 6:5	»Echiriꞌ kixchꞌaꞌt rukꞌ ri Dios, miꞌan iweꞌix pachaꞌ ri kakiꞌan ri xa kebꞌ kipalaj. Ma rike lik kukꞌul kikꞌuꞌx ri kakibꞌololej oración e laꞌ e takꞌal pa taq sinagogas y pa taq jachbꞌal bꞌe chaꞌ jelaꞌ kebꞌilitaj kuma ri tikawex. Noꞌj riꞌin paqatzij wi kambꞌiꞌij chiwe: Rukꞌ kꞌu wa yakbꞌal kiqꞌij, ya e laꞌ xkikꞌul ri rajil ukꞌaxel ri xkiꞌano.
23357	MAT 6:6	Noꞌj riꞌix echiriꞌ kixchꞌaꞌt rukꞌ ri Dios, chixok pa ja, chitzꞌapij lo ri puerta y chixchꞌaꞌt rukꞌ Riqaw Dios xa itukel; jekꞌulaꞌ Riqaw Dios karil ri kiꞌan xa itukel y kuya na kꞌu ri rajil ukꞌaxel chiwe chiwachil.
23366	MAT 6:15	Noꞌj we riꞌix na kikuy ta kimak taq ri tikawex, jekꞌulaꞌ riꞌ kuꞌan ri Qaqaw Dios, na kukuy ta imak riꞌix.
23368	MAT 6:17	Noꞌj riꞌix echiriꞌ kiꞌan ayuno, chichꞌaja ripalaj y chixiya riwiꞌ chi utz.
23374	MAT 6:23	Noꞌj we ri qawach na utz taj, ronoje ri qacuerpo kꞌo pa qꞌequꞌm. Jekꞌulaꞌ, we ri qꞌijsaq kꞌo qukꞌ uꞌanom junam rukꞌ ri qꞌequꞌm, ¡koꞌl chi lo qꞌequꞌmalil riꞌ oj kꞌo wi!
23376	MAT 6:25	»E uwariꞌche kambꞌiꞌij chiwe riꞌix: Mubꞌisoj ikꞌuꞌx rikꞌaslem; mubꞌisoj ne ikꞌuꞌx saꞌ riwa y rimiqꞌinaꞌ kitijo o saꞌ riqꞌuꞌ kikojo. ¿Na e ta nebꞌa más kꞌo uwach rikꞌaslem riꞌix chwach ri kitijo? ¿Yey na e ta nebꞌa más kꞌo uwach ri cuerpo chwach riqꞌuꞌ kikojo?
23377	MAT 6:26	»Chebꞌiwilape ri tzꞌikin kexikꞌikꞌ che ruwa kaj. Rike na ketikoꞌnaj taj, na kakiꞌan tane kimolonik y na jinta ne pa kakikꞌol wi ri kimolonik. Na rukꞌ ta kꞌu riꞌ, Riqaw Dios kꞌo chilaꞌ chikaj kebꞌutzuqu. ¡Makꞌuwariꞌ riꞌix, ri Dios kixuchajij, ma e más kꞌo iwach riꞌix chikiwa ri tzꞌikin!
23378	MAT 6:27	»¿Kꞌo nebꞌa junoq chiwe riꞌix kuriq kunajtirisaj jun chik qꞌij che rukꞌaslem wara che ruwachulew? Na jinta junoq, tobꞌ ne lik kutij uqꞌij che.
23383	MAT 6:32	Ma jenelaꞌ kakiꞌan ri winaq na ketaꞌam ta uwach ri Dios, e kubꞌisoj kikꞌuꞌx taq waꞌ. Noꞌj riꞌix kꞌo jun Iqaw chilaꞌ chikaj lik retaꞌam kajawax ronoje taq waꞌ chiwe.
23389	MAT 7:4	Y we qꞌebꞌel la jun cheꞌ chupa rawach riꞌat, ¿utz nawi kabꞌiꞌij che rawatz-achaqꞌ: “Chayaꞌa luwar chwe kanwesaj la jun ukꞌaj cheꞌ kꞌo chupa rawach”? ¡Na utz taj!
23390	MAT 7:5	¡Xa kebꞌ apalaj! Nabꞌe na chawesaj lo la cheꞌ qꞌebꞌel chupa rawach riꞌat, y jelaꞌ kat-tzuꞌn chi utz chaꞌ katoꞌ rawatz-achaqꞌ che resaxik lo rukꞌaj cheꞌ kꞌo chupa ruwach rire.
23395	MAT 7:10	o we kutzꞌonoj kar, kumatz ri kuya che? ¡Na jinta junoq!
23399	MAT 7:14	Noꞌj ri okibꞌal y ri bꞌe keꞌek chi kꞌaslemal na jinta utaqexik, lik chꞌutiꞌn uwach, yey na e ta kꞌi ri kebꞌok bꞌi chiriꞌ.
23406	MAT 7:21	»Na konoje ta ri kakibꞌiꞌij chwe “Qajawal, Qajawal” kebꞌok chilaꞌ chikaj pa rutaqanik ri Dios, ma xew kebꞌok ri kakiꞌan ri rajawal ukꞌuꞌx ri Nuqaw kꞌo chilaꞌ chikaj.
23408	MAT 7:23	Ekꞌuchiriꞌ, riꞌin jewaꞌ kambꞌiꞌij chike: “Na xinwetaꞌmaj ta kꞌana iwach, chixela wukꞌ; ma riꞌix xew ix ꞌanal re ri lik itzel uwach.”
23411	MAT 7:26	Noꞌj kꞌu ri kuta ri nutzij yey na kuꞌan ta janipa ri kambꞌiꞌij, kanjunimaj rukꞌ jun achi na jinta unaꞌoj, ma xuꞌan ri rocho pa sanyebꞌ.
23424	MAT 8:10	Ri Jesús echiriꞌ xuta waꞌ, lik xkam ranimaꞌ che y jewaꞌ xubꞌiꞌij chike ri eteran chirij: —Paqatzij wi kambꞌiꞌij chiwe: Na nuriqom tane chikixoꞌl raj Israel junoq lik kꞌo unimal kubꞌulibꞌal ukꞌuꞌx pachaꞌ wa jun achi.
23426	MAT 8:12	Noꞌj taq kꞌu ri kakichꞌobꞌo taqal chike kakikꞌul rutaqanik ri Dios ruma e ratz-uchaqꞌ kan ri Abraham, riꞌ kebꞌesax bꞌi y kekꞌaq bꞌi pa ri qꞌequꞌm; chiriꞌ kꞌu riꞌ kebꞌoqꞌ wi y kaqichꞌichꞌ ruwi keꞌ —xchaꞌ.
23452	MAT 9:4	Noꞌj ri Jesús xunaꞌbꞌej saꞌ ri kakichꞌobꞌo; ruma kꞌu riꞌ, xubꞌiꞌij chike: —¿Suꞌchak kachꞌobꞌ alaq ri na utz taj?
23463	MAT 9:15	Ri Jesús xukꞌul uwach: —¿Utz nebꞌa kekꞌojiꞌ pa bꞌis ri esikꞌim pa kꞌulanikil we kꞌa kꞌo rala kakꞌuliꞌik chikixoꞌl? Na utz taj. Noꞌj kopon na ri qꞌij echiriꞌ kesax bꞌi rala chikixoꞌl; kꞌa ekꞌuchiriꞌ kakiꞌan ayuno.
23464	MAT 9:16	Na jinta junoq kukꞌojoj ruqꞌuꞌ qꞌeꞌl rukꞌ kꞌojobꞌal kꞌasaq, ma ri kꞌojobꞌal kꞌasaq, we xkꞌolotaj upa, e kujekꞌ ri kꞌul qꞌeꞌl y más ne kurichꞌij bꞌi.
23479	MAT 9:31	Noꞌj rike xew xebꞌel bꞌi, xkijeq kakitzijoj pa ronoje taq laꞌ la luwar ri xuꞌan ri Jesús.
23481	MAT 9:33	Ekꞌuchiriꞌ ri Jesús xresaj bꞌi ri itzel uxlabꞌixel che, ri meꞌt xkunutajik y xujeq kachꞌaꞌtik. E taq kꞌu ri winaq lik xkam kanimaꞌ che waꞌ y xkibꞌiꞌij chikiwach: «Na qilom ta kꞌana waꞌ wara Israel pachaꞌ wa xqil woꞌora» xechaꞌ.
23482	MAT 9:34	Noꞌj ri fariseos xkibꞌiꞌij: «Laꞌ la Jesús kebꞌeresaj bꞌi itzel uxlabꞌixel ruma ruchuqꞌabꞌ ri kajawal ri itzel uxlabꞌixel» xechaꞌ.
23488	MAT 10:2	E kibꞌiꞌ taq waꞌ wa kabꞌlajuj e taqoꞌn: Nabꞌe e Simón ri kabꞌiꞌx Pedro che y ruchaqꞌ Andrés, Jacobo y ruchaqꞌ Juan (wa kaꞌibꞌ e ukꞌajol ri Zebedeo),
23499	MAT 10:13	We kixkikꞌul kꞌu ri e kꞌo pa ri ja, kakanaj ri utzil chomal itzꞌonom kan pakiwiꞌ. Noꞌj we rike na kixkikꞌul taj, ri utzil chomal katzelej tanchi lo iwukꞌ.
23510	MAT 10:24	»Na jinta juna tijoꞌn más kꞌo uwach chwa rutijonel y na jinta ne juna aj chak más kꞌo uwach chwa ri rajaw.
23515	MAT 10:29	»Iwetaꞌam, kaꞌibꞌ raltaq ko tzꞌikin kekꞌayix xa chwa jun ralko meyo. Na rukꞌ ta kꞌu riꞌ, na katzaq tane junoq chike pulew we ri Qaqaw na kuya ta luwar.
23518	MAT 10:32	»E junoq kuqꞌalajisaj chikiwach ri winaq, kubꞌiꞌij: “In tijoꞌn re ri Jesús”; jekꞌuriꞌlaꞌ kanꞌan riꞌin che rire, kambꞌiꞌij chwach ri Nuqaw kꞌo chilaꞌ chikaj: “Qatzij, wa jun e nutijoꞌn” kinchaꞌ.
23519	MAT 10:33	»Noꞌj kꞌu ri kubꞌiꞌij chikiwach ri winaq: “Riꞌin na in ta tijoꞌn re ri Jesús.” Jekꞌuriꞌlaꞌ kanꞌan riꞌin che rire, kambꞌiꞌij chwach ri Nuqaw kꞌo chilaꞌ chikaj: “Qatzij, wa jun na nutijoꞌn taj” kinchaꞌ.
23520	MAT 10:34	»Michꞌobꞌo we ri nukꞌunik che ruwachulew kukꞌam lo utzil chomal. Na e ta riꞌ, ma e kukꞌam lo chꞌaꞌoj chikixoꞌl taq ri tikawex.
23534	MAT 11:6	Nim uqꞌij ralaxik kꞌu riꞌ ri na kasach ta ri kubꞌulibꞌal ukꞌuꞌx wukꞌ —xchaꞌ.
23536	MAT 11:8	¿Saꞌ ri xeꞌila alaq? ¿Xeꞌila nebꞌa alaq jun achi uwiqom ribꞌ rukꞌ chomilaj kꞌul? Na e ta riꞌ, ma etaꞌam alaq ri lik kewiqiqik, riꞌ pa kocho e aj wach ejeqel wi.
23539	MAT 11:11	»Paqatzij wi kambꞌiꞌij che alaq: Na jinta junoq chike ri tikawex ebꞌalaxinaq wara che ruwachulew más kꞌo uwach chwa ri Juan Aj Yaꞌl Bautismo. Pero chwi kꞌu riꞌ waꞌ wa keꞌek, china ri kok chupa rutaqanik ri Dios petinaq chilaꞌ chikaj, tobꞌ na jinta uwach, más nim uqꞌij ralaxik chwa ri Juan.
23540	MAT 11:12	»Rukꞌ ri Juan Aj Yaꞌl Bautismo xjeq lo utzijoxik ri Utzilaj Tzij puwi rutaqanik ri Dios petinaq chilaꞌ chikaj, y waꞌ kꞌa katajin utzijoxik waqꞌij ora, tobꞌ e kꞌo ri kakitij uqꞌij kakiqꞌatej waꞌ. Na rukꞌ ta kꞌu riꞌ, e ri lik kakitij uqꞌij kakitzukuj wa taqanik, kayaꞌtaj chike kebꞌok chupa.
23547	MAT 11:19	»Xkꞌun kꞌu lo Ralaxel Chikixoꞌl Tikawex. Rire kutij ronoje ri kayaꞌ chwach, yey taq ri winaq kakibꞌiꞌij: “Waꞌ wa jun achi lik japjatel y qꞌabꞌaꞌrel, kachbꞌiꞌil raj tzꞌonol puaq re tojonik y raj makibꞌ” kechaꞌ. Noꞌj kaqꞌalajin na kꞌut china taq ri lik kꞌo runaꞌoj ri Dios kukꞌ ruma ri kiꞌanom» xcha ri Jesús.
23553	MAT 11:25	Ekꞌu laꞌ la joqꞌotaj ri Jesús xuꞌan orar chwach Ruqaw, jewaꞌ xubꞌiꞌij: «Nuqaw, kanyak qꞌij la, Lal Rajaw ruwa kaj y ruwachulew, ma ri qꞌalajisam la chike ri lik kakiꞌan chꞌutiꞌn che kibꞌ, waꞌ ewam la chikiwach ri lik kꞌo kinaꞌoj y lik kꞌo kimajom.
23554	MAT 11:26	Jelaꞌ xꞌan la, Nuqaw, ma e xꞌaj la riꞌ» xchaꞌ.
23555	MAT 11:27	Tekꞌuchiriꞌ, xubꞌiꞌij chike ri tikawex: «Ronoje taq ri kꞌolik yaꞌtal lo panuqꞌabꞌ ruma ri Nuqaw. Na jinta kꞌu junoq lik umajom usukꞌ chi utz saꞌ ruwach Rukꞌajol ri Dios, xew ri Qaqaw Dios etaꞌmayom re. Y na jinta ne junoq umajom usukꞌ chi utz saꞌ ruwach ri Qaqaw Dios, xew Rukꞌajol ri Dios etaꞌmayom re; yey puqꞌabꞌ kꞌu riꞌ Rukꞌajol kꞌo wi china chike karaj kuqꞌalajisaj wi waꞌ.
23561	MAT 12:3	Ekꞌu ri Jesús xukꞌul uwach: —¿Na ajilam ta nebꞌa alaq ri xuꞌan ri David julaj echiriꞌ rire kukꞌ ri rachbꞌiꞌil xenumik?
23563	MAT 12:5	»¿Na iwajilam ta nebꞌa ri tzꞌibꞌital kan ruma ri Moisés chupa ri Tzij Pixabꞌ? Ma kubꞌiꞌij e raj chakunel pa Rocho Dios na kebꞌuxlan ta chupa ri qꞌij re uxlanibꞌal; na rukꞌ ta kꞌu riꞌ, waꞌ na mak ta chike.
23577	MAT 12:19	Na rukꞌ ta yaj, na rukꞌ ta sikꞌ kuꞌan waꞌ; Na jinta kꞌu junoq riꞌ kataw re kayajanik o kasikꞌin pa taq bꞌe.
23590	MAT 12:32	China ri tzel kachꞌaꞌt chirij Ralaxel Chikixoꞌl Tikawex, riꞌ kakuytaj umak we kutzelej utzij. Noꞌj ri tzel kachꞌaꞌt chirij ri Santowilaj Ruxlabꞌixel ri Dios, riꞌ na kakuytaj ta kꞌana umak che waꞌ wa qꞌij oj kꞌo wi y na kakuytaj tane kꞌana umak tobꞌ ne che ruqꞌijol ri kꞌaslemal katajin loq.
23597	MAT 12:39	Ri Jesús xukꞌul uwach: —Ri kakitzꞌonoj kꞌutubꞌal re ruchuqꞌabꞌ ri Dios e ri winaq re waqꞌij ora, ri itzel kikꞌuꞌx y na jusukꞌ ta ri kanimaꞌ chwach ri Dios. Noꞌj na kayaꞌtaj ta kꞌu waꞌ chike, ma xew kayaꞌtaj ri kꞌutubꞌal xꞌaniꞌ ojertan rukꞌ ri qꞌalajisanel Jonás.
23599	MAT 12:41	»Ri winaq aj Nínive re ojertan keyaktaj chupa ri qꞌij re qꞌatbꞌal tzij y kakikoj kimak ri tikawex re waqꞌij ora. Ma rike xkitzelej kitzij chwach ri Dios ruma ri tzijonik xuꞌan ri Jonás chikiwach. Noꞌj ri tikawex re waqꞌij ora, kꞌo jun chikixoꞌl más kꞌo uwach chwa ri Jonás, yey na kebꞌok tane il che.
23600	MAT 12:42	»Jekꞌulaꞌ echiriꞌ kopon ri qꞌij re ri qꞌatbꞌal tzij, kayaktaj lo ri reina re pa sur y kukoj kimak ri tikawex re waqꞌij ora. Ma rojertan lik naj petinaq wi rire chaꞌ koluꞌxikinaj runaꞌoj ri rey Salomón. Noꞌj ri tikawex re waqꞌij ora, kꞌo jun chikixoꞌl más kꞌo uwach chwa ri Salomón, yey na kebꞌok tane il che.
23608	MAT 12:50	Ma china ri kuꞌan janipa ri karaj ri Nuqaw kꞌo chilaꞌ chikaj, waꞌ e nuchaqꞌ, e wanabꞌ y e nuchu riꞌ —xchaꞌ.
23616	MAT 13:8	»Noꞌj kꞌo ijaꞌ xtzaq kan pa chomilaj ulew. Ekꞌu riꞌ waꞌ lik xuꞌan reqaꞌn. Kꞌo ne jujun raqan xuya jun ciento, kꞌo jujun chik xuya sesenta y kꞌo xuya treinta.
23620	MAT 13:12	Ma china ri kꞌo umajom chik, riꞌ kayaꞌtaj ne che chaꞌ más kꞌo kumajo. Noꞌj china ri na jinta kꞌo umajom, kamaj ne che ri kuchꞌobꞌo umajom chik.
23624	MAT 13:16	»Noꞌj riꞌix lik nim iqꞌij iwalaxik, ma ri Dios kuya chiwe kiwilo y kita janipa ri kuꞌan Rire wuma riꞌin.
23631	MAT 13:23	»Noꞌj rijaꞌ xtzaq kan pa chomilaj ulew e pachaꞌ ri tikawex kakita Ruchꞌaꞌtem ri Dios, lik kakimaj usukꞌ y lik kꞌo kꞌu kijiqꞌobꞌalil kilitaj che ri kibꞌinik. E jelaꞌ pachaꞌ rijaꞌ lik xuꞌan reqaꞌn; kꞌo ne jujun raqan xuya jun ciento, kꞌo jujun chik xuya sesenta y kꞌo xuya treinta —xcha ri Jesús.
23637	MAT 13:29	»Ekꞌu ri rajaw ri tikoꞌn xubꞌiꞌij chike: “Na kiꞌmichꞌa taj; ma we ximichꞌ raqꞌes, kꞌaxtaj kimichꞌ ri trigo rukꞌ.
23651	MAT 13:43	Noꞌj ri jusukꞌ kibꞌinik kisilabꞌik e jelaꞌ pachaꞌ ri qꞌij kewon chilaꞌ pa kataqan wi ri kiqaw Dios. China kꞌu ri kꞌo utanibꞌal che utayik, ¡chuta kꞌu riꞌ! —xchaꞌ.
23663	MAT 13:55	¿Na e ta nebꞌa ukꞌajol waꞌ ri jun carpintero yey ralabꞌ ri María? ¿Na e ta nebꞌa katzixel ri Jacobo, ri José, ri Simón y ri Judas?
23664	MAT 13:56	¿Na ejeqel ta nebꞌa ri ranabꞌ wara chiqaxoꞌl? ¿Pa kꞌu xuꞌmaja wi ronoje taq riꞌ wa kuꞌano? —xechaꞌ.
23665	MAT 13:57	Ewi lik e kꞌi tzel xkita ri xubꞌiꞌij. Noꞌj ri Jesús xubꞌiꞌij chike: —Chupa ronoje luwar kayak uqꞌij juna qꞌalajisanel; noꞌj chupa rutinamit o chikiwach ri ratz-uchaqꞌ, na kayak ta uqꞌij —xchaꞌ.
23675	MAT 14:9	Ri rey lik xbꞌisonik ruma ri xtzꞌonox che. Noꞌj ruma kꞌu ri xujikibꞌaꞌ uwach che rali chikiwach konoje ri e kꞌo rukꞌ pa ri waꞌim, xtaqan kꞌu che chaꞌ kayaꞌiꞌ na che rali ri kutzꞌonoj.
23682	MAT 14:16	Noꞌj ri Jesús xubꞌiꞌij chike: —Na kajawax taj kebꞌek; chebꞌitzuqu riꞌix —xchaꞌ.
23683	MAT 14:17	Rike xkibꞌiꞌij che ri Jesús: —Na kꞌi ta ri waꞌim qukꞌaꞌam, xew woꞌobꞌ pam y kaꞌibꞌ kar kꞌo qukꞌ —xechaꞌ.
23697	MAT 14:31	Na jampatana ri Jesús xuchapalaꞌ pan che ruqꞌabꞌ y xubꞌiꞌij che: —Pedro, ¡na nim ta kꞌana ri kubꞌulibꞌal akꞌuꞌx wukꞌ! ¿Suꞌbꞌe xuxiꞌij ribꞌ akꞌuꞌx? —xchaꞌ.
23707	MAT 15:5	»Noꞌj ralaq kabꞌiꞌij alaq: “Utz we junoq kubꞌiꞌij chike ruchu-uqaw: Na utz taj kantoꞌ alaq, ma ri toꞌbꞌal kajawax che alaq, nubꞌiꞌtisim chik re nuqasaꞌn chwach ri Dios.”
23711	MAT 15:9	Na jinta kꞌana kutiqoj kakiloqꞌoj nuqꞌij, ma ri kꞌutunik kakiꞌano xa taqanik ke achijabꞌ —xchaꞌ.
23715	MAT 15:13	Ri Jesús xukꞌul uwach: —Waꞌ waꞌchijabꞌ na jinta runaꞌoj ri Dios kukꞌ, pachaꞌ e tikoꞌn na e ta tikom ruma ri Nuqaw kꞌo chilaꞌ chikaj; ruma kꞌu riꞌ, kamichꞌ bꞌi kꞌa pa ratzꞌayaq.