23214	MAT 1:1	Ena moba Sisas God Gisfu Fwahag Elni simbianingam suwigig. Ehe Devitna simbianinga afa Devit Abrahamna simbianinga.
23215	MAT 1:2	Abrahamna leg Aisak. Aisakna leg Jekop. Jekopna leg Juda afa heafna nilite.
23216	MAT 1:3	Judana legnigi Peres i Sera i. Ehenigina afag Tamar. Peresna leg Hesron. Hesronna leg Ram.
23217	MAT 1:4	Ramna leg Aminadap. Aminadapna leg Nason. Nasonna leg Salmon.
23218	MAT 1:5	Salmonna leg Boas. Heafna afag Rahap. Boasna leg Obet. Heafna afag Rut. Obetna leg Jesi.
23219	MAT 1:6	Jesina leg Devit eba misog el. Devitna leg Solomon. Autunam heafna afag eba Uriana angwag.
23220	MAT 1:7	Solomonna leg Rehoboam. Rehoboamna leg Abiya. Abiyana leg Asa.
23221	MAT 1:8	Asana leg Jehosafat. Jehosafatna leg Jehoram. Jehoramna leg Aisaia.
23222	MAT 1:9	Aisaiana leg Jotam. Jotamna leg Ahas. Ahasna leg Hesekia.
23223	MAT 1:10	Hesekiana leg Manase. Manasena leg Emon. Emonna leg Josaia.
23224	MAT 1:11	Josaiana leg Jekonia afa heafna nilite. Enanam Babilon el Israel elim wanafunam heafgelni bite la lasani.
23225	MAT 1:12	Maia lasanibi Jekoniana leg Sealtiel. Sealtielna leg Serubabel.
23226	MAT 1:13	Serubabelna leg Abiut. Abiutna leg Eliakim. Eliakimna leg Eso.
23227	MAT 1:14	Esona leg Sadok. Sadokna leg Akim. Akimna leg Eliut.
23228	MAT 1:15	Eliutna leg Elieser. Elieserna leg Matan. Matanna leg Jekop.
23229	MAT 1:16	Jekopna leg Josep. Josep Mariana alagag. Afa Maria Sisasim wanigana. Sisasba seflig Krais God Gisfu Fwahag El.
23230	MAT 1:17	Afa Abrahamna simbianinga gohugum ikag Devit nai yi pugug eba 14 la gohug. Afa Devitna simbianinga afohianam enanam Babilon Israel elim ambe wanafuna eba 14 la gohug. Ena nai yi gofenaba God Gisfu Fwahag Elbi gohna eba gwenaig eseg 14.
23231	MAT 1:18	Sisas Krais, God Gisfu Fwahag El, gohug mo enaig eseg ehena afag Maria ati Josepim eso fwahini og ma Josepnai yi gai. Afa mas ika gana mo, afa nangunibi Maria Godna Sungwabug ati afnialigni fena.
23232	MAT 1:19	Ehena alagag Josep eba suialag el. Ehe ogna ehem flagim fwaha. Ehe mo ambala sihiagim oksina afa sa mas Mariam afwanef mo faina mo.
23233	MAT 1:20	Josep enam onigkafnaba afa itila Godna oflanai el blona ehem puguna. Enag oflanai el esona og, “Josep Devitna simbianinga nofeka Mariam flagiba embefe. Sa hig enaba afnialigni wanigiahba el mas enaig eseg mo eba Godna Sungwabug ehe faig enag luwalba.
23234	MAT 1:21	Enaba fagonai luwal wanigafe. Afa ne ehena unehlagimba Sisasim unehlig asa mungwali heafna elni amtakwalig mo huguflaitinam afa ehefum lambfe asa God ehengelim mas mungwa faifi.”
23236	MAT 1:23	“Higim, angwafig mungu angwaming alagagla ga fwainig afnialigni afa fagonai luwal foklafe. Afa unehlagba Emanuelim seflife.” Enag mog unehlaba ‘God bigim wanga.’
23237	MAT 1:24	Josep ginim buihianam asa gwenaig esena Ainiyagna oflanai el asa sihinagenaba asa ehe enag angwafigbi flana.
23238	MAT 1:25	Angwafigbi flanam mas mungua kifela ahginimo awai esug afena afa asa luwal fagona waniganaba. Afa asa ehe Sisasim unehlana.
23239	MAT 2:1	Maria Sisasim Betlehemla wanigana, ena provins Judia. Enanam Herot misog el gofnaba. Afa enanam osu puguglanai anwena el, ambena Jerusalem la apukenam.
23240	MAT 2:2	Afa sahini og, “Hanai yi luwalba gohug eba Ju elni misog el? Ehena bagnofut osu puguag la ka nangugum nasa ka ambe gohug koka ehena unehlagim figifi.”
23241	MAT 2:3	Misog el Herot ena mom hignam olug fingifena afa Jerusalem lanai el gwenaig esini.
23244	MAT 2:6	Nofeka enaig onigi Betlehem Judanai eba mingnag suialag Judana kembig sumifenig. Asa enag kembig misog el pugufe eba ehe Israel, kana elim, nangwahiagefe.”
23245	MAT 2:7	Herot enag afwambanai anwena elim efkwek moaini fasahtigifiage na og ansi bagnofutni ombusugbi puguna.
23246	MAT 2:8	Herot sahinigenam asa Betlehemgam ningitigina og, “Afunam yisigiafuhun, nangunim asa kam ambe sihini. Ka sa ikanam mongkogini kwakwagenam ehena unehlam figefuku.”
23247	MAT 2:9	Afa ehengel ena mom higinim asa afuna afa bagnofna ombusug ilawana asa osu puguiag la nangunibi enag esena ika sisi gofna enanai yi sa luwal gifni.
23248	MAT 2:10	Afa maia bagnofutim nangunim asa ehengel fwina sifakalini.
23249	MAT 2:11	Asa afu lala saiyegim afa ehena afag Maria enam nangwaginim afa apaiyena mongkogini kwakwaginim asa luwalna unehlagim figifugwalina afa wula pigaginim afa gawig lambinagin lambwaini. Gawigba enaba gol i, paura i, sanda i enag lambwaini.
23250	MAT 2:12	Itila God blo sihini og, “Nofe ne pese Herot nangum afu.” Asa ehengel wahgifini ming minagam heafgelni kembigamba afuna.
23251	MAT 2:13	Ainiyagna oflanai el blona Josepim itila sihinagena og, “Pugu wanka Isipgim ikanam eyi wanafim ka ma nem sihinaiba asa Herot luwalim oyisgi og ka tigefaka.”
23252	MAT 2:14	Josep buihianam pugu wankana sinaini Isipgim.
23253	MAT 2:15	Josep Isipi yi wanafiba asa Herotba lahafe. Enaba Ainiyag mo fla sihiule elni mengig la ati sihi fwahana. Ehe esona og; Ka kikiafena luwalim unenaiba asa Isipim fwahanam blofe.
23254	MAT 2:16	Herot nengeawan afa mas anwena el ambe ehem apukena mo, heafa kam mwakwalinig. Asa olug kakagenam afa mingnag elim ningitigina Betlehemgam og ma luwalim mungwali kwaskofeafui. Luwalba ninganai enaba sambaga yia enaig og masa kwaskofeafui.
23255	MAT 2:17	Enaigba esiniba eba God mo fla sihiule el Jeremaiana mengig la ati sihi fwahana. Enaig esinibi asa nufunam puguna. Ehe og;
23256	MAT 2:18	Afa Rama nai el higni Resel ati heafna luwaligim weonafena. Elbi haig kwenifini mo, awai. Eba ehena luwalig mungwali awaiena mas amban mo gafena mo.
23257	MAT 2:19	Afa maia Herotim lahanaba, Ainiyagna oflanai el Isipi yi Josepim itila pugu sihinagena.
23258	MAT 2:20	Ehe og, “Ese pese Israelgam angwafigni luwalnam wanika. Ati elbi pigig ogna ehem tigi kumohli.”
23259	MAT 2:21	Afa sa Josep buihia wankana Israelgam.
23260	MAT 2:22	Afa ika higinaba Arkelaus Herotna leg puguna Judiana misog el gofna. Josep esim ikagim embefena. Afa itila God sihina Josepim, nasa Josep Galili provins gam wankana.
23261	MAT 2:23	Afa wankanam ming kembig la Nasaret la wanafna, enaigba esenaba mo fla sihiule elni moaihla og elbi enaba seflig eba Nasaret lanai el.
23262	MAT 3:1	Enanam Jon bula laitiaule el pugunam el fwainig la Judiana kembigla mo sihiagekana.
23263	MAT 3:2	Enaig esona og, “Olug waikefi. Godna bog meg ati blog afa Godna sawieg la big saiyenam asa heafna luwalig afohie.”
23264	MAT 3:3	Autunam Aisaia mo fla sihiule el ati sihi fwahana, el enaig esona. Jon eba enaig el. Aisaiana mo enaig esona og; El fwainig la el mungu pugu mo sihiagafe enaig esofe, Ainiyagna mina numwehiagi, heafna mina, mina suf faki.
23265	MAT 3:4	Jonba tata lag lofug fatinam. Ena tata lagba eba kamel. Afa afiai kigifena afa fane negba sanglik i afa ihif suwig i enag neakafna.
23266	MAT 3:5	Enanam Jerusalem el i Judia el i afa Jordan bula auguiakana enag mungwali ambe gohna Jon nangum.
23267	MAT 3:6	Ambena heafgelni amtakwaligim sihiagini afa sa Jon Jordan bula laitina.
23268	MAT 3:7	Afa farisi el i Sadyusi el i ambe ona bula apaiye, Jon nangwagnam afa esoni og, “Nengelbi gihiana luwalig, amban ne sihinigbi ma Godba ma nem amtakwali gihiagefe asa ne embemba afuofe.
23269	MAT 3:8	Sa ne suialag nihe fi asa ma el anwenafi ne ati nufunam olug waikefig.
23270	MAT 3:9	Nofeka enaig onigwagi Abraham kagelni simbianinga asa ka gafa suialag el. Ka nem sihinig God ehe eseba hwa funba Abrahamna simbianingag apuke gofe.
23271	MAT 3:10	Mal ati li mog la gi. Li fug suialag lugwag fwainigba, eba higfihinim suwi la laitife.
23272	MAT 3:11	Ka nem bulaba laitigba eba enaig eseg ati ne olug waikefig. Afa el sumi yi obloba ehena kigmogba kana kigmogim filafeg. Kaba suialag elmo naka ehena mong lofugba flaukuna. Eba nem bulaba Godna Sungwabugni afa suwina laitfe.
23273	MAT 3:12	Elbi enaba obloba forkba ningana flagim ogna fungisge mungwali lambuhiage witinai. Ogna wit agoguli heafna wit lala fwaha afa fungisge mo lambinam suwi la laitife.”
23274	MAT 3:13	Afa enanam Sisas Galili fwahanam Jordan la pugunam blona Jon nangum og ma kam Jon bula fati.
23275	MAT 3:14	Afa Jon ehem gwenam afa esona og, “Nemble he kam bula fati. Haig esegba nane ka nanguba blog?”
23276	MAT 3:15	Afa Sisas mungwag ehem sihina og, “Sese, ati ka nem sihinag. Enaig big sahfeba eba ati big Godna sawieg la big sahofe.” Afa sa Jon ehena mom patalukuna.
23277	MAT 3:16	Afa Sisas bula penam afa puguna ikana gofnaba ikagna of bafuna afa nangunaba Godna Sungwabug gamp lofug peblona Sisas nai yi gahlana.
23278	MAT 3:17	Afa mengig hevenla lagofna og, “Sona elbi eba kana leg, ka ehem fwina membenag. Ka olug ehem suialafenag.”
23279	MAT 4:1	Godna Sungwabug Sisasim el fwainigam wanikina og ma Satan yuhnai.
23280	MAT 4:2	Afa 40 osuna Sisas mas fane nenamo, maia 40 osuna awaienaba ehem fwina bini lahana.
23281	MAT 4:3	Afa Satan blona ehem puguna afa sihina og, “Afa ne Godna leg fegba eba sane funim esoiba sama amba lofei.”
23282	MAT 4:4	Afa Sisas esona og, “Godna moba enaig esog og, ‘Amba mungu mas elim nofkenagagba fai. Godna mo munguhe eba sa elimba nofkenagagba fai.’”
23283	MAT 4:5	Maia Sisas enaig sihifenaba Satan Sisasim sulflanam Jerusalem gam wanikina. Wanikina Godna kwania lala wofugug sisia nemug la lasuwona.
23284	MAT 4:6	Afa Sisasim sihina og, “Afa ne Godna leg fegba eba sa ne puso pekai eba ati Godna mo sihig; Eba heafna oflanai elim sihiniba oflanai el ambe nem ningana kehli apaiyeufufe eba mas nem fun sig mong yi pifi.”
23285	MAT 4:7	Sisas sihina og, “Godna mo enaig esog, ‘Nofeka Ainiyagim nimbiafna Godim yuhna.’”
23286	MAT 4:8	Satan Sisasim mungwanam mug gam fuko wanikinam afa sa mungwali bite i afa suialag gawig i ogfunagena.
23287	MAT 4:9	Afa Sisasim sihina og, “Ma ne kam mongkogini kwakwagenam kana unehlagim fingi feiba, ka sa nem bite i gawig i mungwali faife.”
23288	MAT 4:10	Afa Sisas sihina og, “Satan, esimika Godna mo enaig esog, ‘Godim ahnai skaufenam afa sa heafna unehlagim mungu fingife.’”
23289	MAT 4:11	Afa sa Satan Sisasim fwahanamba. Afa oflanai el ambe Sisasim kwefuni.
23290	MAT 4:12	Sisas enaig higina og ati Jonimba kalabusig asa Galili provins gam pese ikana.
23291	MAT 4:13	Afa ehe Nasaret mo fwahanam ika Kaperneam la mo gafena. Kaperneam Galili bu megim gifni muhla Sebulun Naptali elni bite la.
23292	MAT 4:14	Enamba Godna mo fla sihiule el Aisaia ati sihi fwahana. Enaig esona og;
23293	MAT 4:15	Sebulun i Naptali i nengelni bite gifni bu wagieg mina ikagla gwesim Jordan gohfba eba Galili kaksag afwambanai el auguia.
23294	MAT 4:16	Enag elbi sikuleg la auguia, ati kwania ombusug pugunig asa nangug. Afa amban el sikuleg pigieg la afohiafiba asa ombusenife.
23295	MAT 4:17	Enanam Sisas mo sihiagena og, “Godna bog meg ati blog sa ne olug waikefinim saiye afu.”
23296	MAT 4:18	Sisas Galili bu blugmini ikan sambaganigi etesuminegim nangwagna Saimon Pita mi Andru mi. Sambaganigi fufwalana sawagim kigiag hofefna. Sambaganigiba sawag gafuga ahfegofna.
23297	MAT 4:19	Sisas sihini og, “Au, kam ahpatal blu ka nem elim ahlambigim ogfunige.”
23298	MAT 4:20	Sambaganigi ikagna fufwala ahfwahnam ahkana Sisasim ahpatalkuna.
23299	MAT 4:21	Sisas wankan afa ming etesuminegim nangwagna Sebedini legnigim Jems mi Jon mi afa heafningina alag bot la auguiafenaba fufwala kokohiag kwelwagia flafna. Sisas uneni.
23300	MAT 4:22	Sambaganigi heafningina bot na afa alag na ahfwatinam ahkana Sisasim ahpatalkuna.
23301	MAT 4:23	Sisas mungwali Galili yi wagiakana ikafnam laskuhlag lala seifofnam saglag angwafigim ogfunigiafna afa Godna bog meg mom sihinigiafna afa mungwali haig haig gihna elim suiala feiti feafna.
23302	MAT 4:24	Afa mungwali el ena mo higwaginim sihiagenim asa Sirianai el haig haig gihna elim lambifini. Elig susuna, mwaifig simbigahlagulem, nilagini, afa mong lihlina Sisas suiala fetifeafna.
23303	MAT 4:25	Afa kaksag Galilinai afa Dekapolisinai Jerusalem lanai afa Judianai afa Jordan bu magigi nai el enag mungwali Sisasim patalfuia gohna.
23304	MAT 5:1	Sisas el kaksagim nangwagnam afa sa mug gam fukukana. Mug la fuko gafenaba afa heafna patalfuiag el ehem nigi afuna.
23306	MAT 5:3	Ambangel asa enaig onigife, kaba suialag el mo God sa kam kweafui, afa enag el sa ma sifakalifi afa sa ma Godna bog megam saiyefoi.
23307	MAT 5:4	Ambangel sa wewatini auguia enamba sa ma sifakalifi eba God ehengelim olug enesieg faifi.
23308	MAT 5:5	El sa heafgelni unehlam pigapaiyegohug enaba sa ma sifakalifi afa mungwali bite eba ehengelni.
23309	MAT 5:6	El sa suialag nihem membigim patalfug, enaig elbi ofe enaiba sa fane i bu i bini pigig eba sa ma sifkalifi eba God ihla fenugefe.
23310	MAT 5:7	El sa mingnag elim aflafegonug enaba sa ma sifakalifi eba God ehengelim aflafenife.
23311	MAT 5:8	Elni olug sa afsug gohon enaba sa ma sifakalifi eba Godim nangufe.
23312	MAT 5:9	El sa ninimum tigeflakig enaba sa ma sifakalifi eba enaig seflififi Godna luwalig.
23313	MAT 5:10	El sa suialag nihem patalfugum asa kinig flig enaba sa ma sifakalifi eba sa ma Godna bog meg saiyefoi.
23314	MAT 5:11	“Afa sa nem nangwagfi ne kana mungu afufufe eba nem amtakwalig mo sihigonifi afa kokwaitififi asa haig haig mo nem mwakwal hiagifi enaba sa ne sifakalifi.
23315	MAT 5:12	Sa ne olug enesieg na afohiefiba afa sifakalifi mungwag nem kwania faifi, eba heven la nem nengeniawo. Afa gwenaig esini el mo fli sihiaule elim ati gofgam amtakwalinagini.”
23316	MAT 5:13	“Nengelbi bite na sol. Afa solba mileakaba awaieba sa ne haig esibi, sa ma pese mileaklafei? Enaig solba sa mas gafugafei eba el kokofe fatigim afa mongni pigageg.
23317	MAT 5:14	Nengelbi bitena ombusugug. Kembig sisi yi mug la gi enag mas meagam seaifoi.