5	GEN 1:5	Ma u yam bururam soka sɔ̃ɔ sɔɔ, yam wɔ̃kuru maa wɔ̃kuru. Ma sɔ̃ɔ sɔɔ ɡe ka wɔ̃ku te, n swĩina ma n kua tɔ̃ɔ ɡbiikiru.
8	GEN 1:8	Ma u ɡãa ni soka wɔllu. Saa ye u yeba mɔ̀, sɔ̃ɔ sɔɔ ka wɔ̃kuru n swĩina ma n kua tɔ̃ru yiruse.
13	GEN 1:13	Ye u yeba mɔ̀, sɔ̃ɔ sɔɔ ka wɔ̃kuru n swĩina ma n kua tɔ̃ru itase.
19	GEN 1:19	Saa ye u yeba mɔ̀, sɔ̃ɔ sɔɔ ka wɔ̃kuru n swĩina ma n kua tɔ̃ru nnɛse.
21	GEN 1:21	Yera u swɛ̃ɛ bɛkɛ taka kua ka yɛɛ kpuro yi yi sĩimɔ yi yiba nim mɛ sɔɔ bwese bweseka. U maa ɡunɔsu kua bwese bweseka. Ma n nùn wɛ̃re.
23	GEN 1:23	Saa ye u yeba mɔ̀, sɔ̃ɔ sɔɔ ka wɔ̃kuru n swĩina ma n kua tɔ̃ru nɔɔbuse.
28	GEN 1:28	Ma u bu domaru kua u nɛɛ, i maruro i dabia i handunia yibu ya n sãa bɛɛɡia kpa i n yɛɛ kpuro nɔma sikerenɛ. Yiya swɛ̃ɛ ka ɡunɔsu ka yɛɛ yi yi sĩimɔ temɔ kpuro.
30	GEN 1:30	Ma u maa handunian yɛɛ kpuro yi yi hunde mɔ yi sĩimɔ temɔ ka ɡunɔsu kpuro sɔ̃ɔwa u nɛɛ, na bɛɛ yakɔ beku baaɡere wɛ̃ i n da di. Ye u ɡerua mɛ, ma n koora.
31	GEN 1:31	Yera u mɛɛra kpuro ye u kua, ma n nùn wɛ̃re ɡem ɡem. Saa ye u yeba mɔ̀, sɔ̃ɔ sɔɔ ka wɔ̃kuru n swĩina ma n kua tɔ̃ru nɔɔba tiase.
42	GEN 2:11	Gbiikaan yĩsira Pisoni. Yeya ya tem mɛ ba mɔ̀ Hafila sikerenɛ.
44	GEN 2:13	Kɛra yirusen yĩsira maa Gihoni. Yeya ya tem mɛ ba mɔ̀ Kusi sikerenɛ.
47	GEN 2:16	Ma u nùn wooda yeni wɛ̃ u nɛɛ, kaa kpĩ a ɡbaa ten dãnu kpuron binu di.
49	GEN 2:18	Ka tema Yinni Gusunɔ u ɡbeeku yɛɛ kpuro kua ka ɡunɔsu kpuro, ma u ka ye kpuro na tɔnu win mi, u ka wa mɛ u koo ye yĩsiru kɛ̃. Ma tɔnu wi, u yaa sabenu kpuro ka ɡunɔsu ka ɡbeeku yɛɛ kpuro yĩsa kã. Yĩsi te tɔnu wi, u maa yaa baayere kã teya ba ka ye sokumɔ. Adama ye kpuro sɔɔ, sari ye ya ka nùn weenɛ ye ya koo nùn somi. Yen sɔ̃na Yinni Gusunɔ u nɛɛ, n ǹ wã tɔnu u n wãa wi turo. Kon nùn ɡoo kua u n sãa nɡe wi, wi u koo nùn somi.
62	GEN 3:6	Ma kurɔ wi, u wa dãa te, ta ka dii dobu weenɛ ta waabu wã, ta koo maa kpĩ tu nùn ko bwisiɡii. Ma u ten bii ni sɔra u di. U maa win durɔ wɛ̃ ka wi ba wãasinɛ, ma wi, u maa di.
72	GEN 3:16	Yera u maa kurɔ wi sɔ̃ɔwa u nɛɛ, kon wunɛn ɡuran wahala sosi. Kaa n da mawa ka nɔni swãaru. Wunɛn kĩru kpuro ta ko n wãawa wunɛn durɔ sɔɔ, wiya ko n maa sãa wunɛn wiruɡii.
73	GEN 3:17	U maa durɔ wi sɔ̃ɔwa u nɛɛ, yèn sɔ̃ a wunɛn kurɔn ɡari wura, ma a dãa ten binu di te na nɛɛ, a ku di, na tem bɔ̃rusi wunɛn sɔ̃. Sãkunu ka awĩiya mu koo nun kpiiya, wunɛn wãaru kpuro sɔɔ, nɔwiawa kaa n da ko kpa a wɛnya a sere wunɛn dĩanu wa ɡberɔ. Yen biru kaa ɡbi kpa bu nun sike temɔ, domi tema na ka nun kua. Kaa maa wura a ko tem mɛ.
76	GEN 3:20	Ma Adamu u win kurɔ yĩsiru kã Efa, domi wiya u sãa tɔmbu kpuron mɛro.
80	GEN 3:24	Nɡe mɛya u ka Adamu ɡira ma u wɔllun kɔ̃sobu doke Edɛnin ɡbaa ten kɔnnɔwɔ, ɡe ɡa wãa sɔ̃ɔ yari yerun bera ɡia. Ba takobi nɛni ba ye fĩamɔ ma ya ballimɔ sɔ̃ɔ sɔɔ nɡe dɔ̃ɔ yara, ba ka dãa tèn binu nu koo tɔnu wãaru wɛ̃ kɔ̃su.
83	GEN 4:3	Sɔ̃ɔ mɛɛrun biru, Kaɛni u ka win kɛ̃ru na Yinni Gusunɔn mi, te ta sãa win ɡberun dĩanu.
87	GEN 4:7	Geema, à n ɡea mɔ̀, wunɛn bwɛ̃ra ko n kpĩ. Ǹ n maa kɔ̃san na a mɔ̀, durum ya kpĩ wunɛn dii kɔnnɔwɔ nɡe yaa ɡɔba ya nun mara. Adama a de a ye kamia.
92	GEN 4:12	À n tem mɛ wuka, mu ǹ maa nun dĩanu kuammɛ sãa sãa. Kaa n sãawa kpiko ka yaayaare kowo handunia sɔɔ.
95	GEN 4:15	Adama Yinni Gusunɔ u nùn sɔ̃ɔwa u nɛɛ, aawo, n ǹ mɛ. Goo ù n nun ɡo, kon yɛ̃ro mɔru kɔsiawa tia tian nɔn nɔɔba yiru. Ma u Kaɛni yĩreru koosi, wi u nùn wa u ku ka nùn ɡon sɔ̃.
96	GEN 4:16	Ma Kaɛni u doona n toma Yinni Gusunɔn min di, u da u sina Edɛnin sɔ̃ɔ yari yerun bera ɡia, Nɔduɔ. Yĩsi ten tubusiana yaayaaren tem.
97	GEN 4:17	Yen biru Kaɛni ka win kurɔ ba mɛnna ma kurɔ wi, u ɡura sua u Enɔku mara. Ma Kaɛni u wuu ɡaɡu bana u ɡu soka Enɔku nɡe win biin yĩsiru.
99	GEN 4:19	Lemɛki wi, u kurɔbu yiru sua. Turon yĩsira Ada, turoɡira maa Sila.
101	GEN 4:21	Win wɔnɔn yĩsira Yubali. Wiya maa sãa be ba ra mɔrɔkunu ka ɡuunu so kpuron baaba.
102	GEN 4:22	Sila wi maa, u Tubali Kaɛni mara wi u ra dendi yãnu kpuro seku ye n sãa sisu ka sii ɡandu. Win sesun yĩsira Naama.
105	GEN 4:25	Adamu ka win kurɔ Efa ba mɛnna kpam, ma Efa u ɡura sua u bii tɔn durɔ mara u nùn yĩsiru kã Sɛti. U nɛɛ, domi Yinni Gusunɔ u kpam man bii tɔn durɔ kã u kua Abɛlin kɔsire, wi Kaɛni u ɡo.
106	GEN 4:26	Sɛtin tii, u bii tɔn durɔ mara ma u nùn yĩsiru kã Enɔsi. Sanam mɛ sɔɔra tɔmba Yinni Gusunɔ sãaru torua.
107	GEN 5:1	Wee nɡe mɛ ba Adamun bweserun yĩsa yorua. Dɔma te Gusunɔ u tɔn durɔ ka tɔn kurɔ taka kua u bu kuawa win weenasibu.
109	GEN 5:3	Ye Adamu u kua wɔ̃ɔ wunaa teeru ka wɔkuru (130) u bii tɔn durɔ mara wi u ka nùn weenɛ mam mam. Ma u nùn yĩsiru kã Sɛti.
128	GEN 5:22	Mɛtuselan marubun biru Enɔku wi, u ka Gusunɔ swĩina. U bii tɔn durɔbu ka tɔn kurɔbu marumɔ sere n ka kua wɔ̃ɔ ɡooba wunɔbu (300).
130	GEN 5:24	U ka Gusunɔ swĩina, yen biru u doona wɔllɔ, domi Gusunɔ u nùn suawa wasiru.
135	GEN 5:29	Ma u nùn yĩsiru kã Nɔwɛ, u nɛɛ, winiwa koo sun somi bɛsɛn wasiraru ka bɛsɛn sɔm sɛ̃sɔɡia sɔɔ ye sa mɔ̀ yèn sɔ̃ Yinni Gusunɔ u tem bɔ̃rusi.
141	GEN 6:3	Ma ba ka bu mɛnna ba bibu mara. Bii beya ba kua durɔ ɡbebunu handunia sɔɔ, ni nu raa yĩsiru yara yellu. Ma Yinni Gusunɔ u nɛɛ, nɛn hunde kun ko n wãa tɔmbu sɔɔ ka baadommaɔ domi ba sãawa be ba koo ɡbi. Ka mɛ, kon de ba n ɡina wãa wɔ̃ɔ wunaa teeru.
145	GEN 6:7	Ma u nɛɛ, wi, u koo kpuro kpeerasiawa handunia sɔɔn di, saa tɔnun min di n ka ɡirari yɛɛyɔ yi yi ra sĩ ka yi yi ra kabiri ka ɡunɔsu. Domi win nukura sankira yèn sɔ̃ u yeba kpuro taka kua.
147	GEN 6:9	domi u win woodaba mɛm nɔɔwa. U ǹ taarɛ mɔ win waati ye sɔɔ, ma u ka Gusunɔ swĩina. Bii tɔn durɔbu itawa u mara. Ben yĩsa wee, Sɛmu ka Kamu ka Yafɛti.
152	GEN 6:14	Adama wunɛ Nɔwɛ, a tii kpakoro bakaru kuo ka dãa damɡia, ta n dii sɔsu mɔ, kpa a tu dãa fĩifĩinu tɛɛni ten sɔɔwɔ ka tɔɔwɔ.
159	GEN 6:21	A maa dĩa ni ba ra di kpuro mɛnnɔ a yi kpa nu ko wunɛ ka yɛɛ yin dĩanu.
177	GEN 7:17	Gura nɛmɔ ma nim mu kpɛ̃amɔ tem sɔɔ sere sɔ̃ɔ weeru, mu tɛriamɔ mu kpakoro te yĩiya ma ta seewa tem di ta ɡɛrua mɛn wɔllɔ.
209	GEN 9:3	Ye ya sĩimɔ ya wasi kpuro, ya ko n sãawa bɛɛn dĩanu nɡe mɛ na raa bɛɛ dãa binu ka yaka bii wɛ̃, mɛya na maa bɛɛ ye kpuro wɛ̃ɛmɔ.
218	GEN 9:12	Arukawani ye na wure na bɔkumɔ ka bɛɛ ka hunde koni baayere sere ka baadommaɔ, yen yĩreru wee.
223	GEN 9:17	Nɛn arukawani yen yĩrera mi.
229	GEN 9:23	Yera ba na ba kumbooro sua ba sɔndi ben senɔ ba ka birum birum sĩa ba ben tundon tereru wukiri. Ba ǹ tu wa yèn sɔ̃ ba ben wuswaa sĩiyɛ.
257	GEN 10:22	Ben yĩsa wee, Elamu ka Asuri ka Aapasadi ka Ludi ka Aramu.
260	GEN 10:25	Ma Heberu u bii tɔn durɔbu yiru mara. Turowa ba sokumɔ Pelɛɡi, yèn sɔ̃ win waati sɔɔra duniaɡiba tem bɔnu kua. Win wɔnɔn yĩsira maa Yokutani.
271	GEN 11:4	Ba kpam nɛɛ, i de su wuu swĩi kpa su ɡidambisa bani yèn wii kpiira koo wɔllu ɡirari, kpa su yĩsiru yari kpa su ku yarina handunia kpuro sɔɔ.
296	GEN 11:29	Aburamu ka Nakori ba kurɔbu sua. Aburamun kurɔn yĩsira Saarai, Nakoriɡiin yĩsira maa Milika. Wi ka Yisika ba sãawa Haranin bibu.
297	GEN 11:30	Saarai u sãawa wĩro, u ǹ bii mara.
301	GEN 12:2	Wunɛn min diya kon de bwese bakaru tu yari. Kon nun domaru kua kpa wunɛn yĩsiru tu kpɛ̃a kpa a ko domarun nuuru.
324	GEN 13:5	N deema Lɔtu u maa yãanu mɔ ka nɛɛ ka dii bekuruɡinu u ka Aburamu swĩi.
335	GEN 13:16	Kon wunɛn bibun bweseru dabiasia nɡe yanim. Wi u koo kpĩ u yanim ɡari wiya u koo maa kpĩ u wunɛn bibun bweseru ɡari.
348	GEN 14:11	Be ba bu tabu di, ba Sodomu ka Gomɔraɡibun dukia ɡura ka ben dĩanu kpuro ba ka doona.
352	GEN 14:15	Ma u win tɔmbu bɔnu kua u ka bu wɔri wɔ̃kuru, wi ka win sɔm kowobu. U bu tabu di ma u bu naa swĩi sere Kobaɔ, ye ya wãa Damasin sɔ̃ɔ yɛ̃san nɔm ɡeu ɡia.
359	GEN 14:22	Aburamu u Sodomun sunɔ wisa u nɛɛ, na nɔmu sua wɔllɔ na bɔ̃rua ka Gusunɔn yĩsiru, wi, wi u kpuro kere u maa wɔllu ka tem taka kua,
366	GEN 15:5	Ma Gusunɔ u ka nùn da tɔɔwɔ u nɛɛ, a wɔllu mɛɛrio kpa a kperi ɡari, à n kaa kpĩ. Nɡe mɛya wunɛn bwesera koo dabiru nɛra.
378	GEN 15:17	Ye sɔ̃ɔ kpa yam tĩra niki niki, yera Gusunɔ u kurama yaa bɛsi yin kpoo kpooka sɔɔ. U sãa nɡe dɔ̃ɔ bokon wiisu ka dɔ̃ɔ yari.
383	GEN 16:1	Aburamu ka win kurɔ Saarai ba ǹ bii mara. Wee Saarai wi, u yoo tɔn kurɔ ɡoo mɔ wi u sãa Eɡibitiɡii. Win yĩsira Aɡaa.
384	GEN 16:2	Ma Saarai u win durɔ sɔ̃ɔwa u nɛɛ, wee, Yinni Gusunɔ u man kua wĩro. Na nun kanamɔ, a ka nɛn yoo duo. Sɔrɔkudo kon bibu wa saa win min di. M a Aburamu u win kurɔn ɡari wura.
388	GEN 16:6	Aburamu u Saarai wisa u nɛɛ, wuna a wunɛn yoo mɔ, a ka nùn koowo nɡe mɛ a kĩ. Saa yera u Aɡaa nɔni mɛni ma Aɡaa u duka sua win min di.
391	GEN 16:9	Ma ɡɔrado wi, u nùn sɔ̃ɔwa u nɛɛ, a ɡɔsiro wunɛn yinnin mi, kpa a nùn wiru kpĩiya.
393	GEN 16:11	Wee a ɡura mɔ, kaa bii tɔn durɔ ma kpa a nùn yĩsiru kɛ̃ Isimɛɛli. Domi Yinni Gusunɔ u wunɛn nɔɔ nua nɔni swãa te sɔɔ.
395	GEN 16:13	Ye Yinni Gusunɔ u ka Aɡaa ɡari yi kua u kpa, ma Aɡaa u nùn yĩsiru kã u nɛɛ, wuna Yinni wi u waamɔ. Domi u tii bikia u nɛɛ, ka ɡem na Gusunɔ wa ka nɔni, ma na wãa na ǹ ɡu?
397	GEN 16:15	Yen biru Aɡaa u Aburamu bii tɔn durɔ marua, ma Aburamu u bii wi yĩsiru kã Isimɛɛli.
399	GEN 17:1	Ye Aburamu kua wɔ̃ɔ wunɔbu tia sari yera Yinni Gusunɔ u nùn kure u nɛɛ, nɛna na Gusunɔ Dam kpuroɡii. A n sĩimɔ nɛn wuswaaɔ kpa a kun taarɛ mɔ.
409	GEN 17:11	Kpa ya n sãa arukawani yen yĩreru ye ya wãa nɛ ka bɛɛn suunu sɔɔ.
411	GEN 17:13	I ko be kpuro banɡo kuawa kpa nɛn arukawani yen yĩreru ta n wãa bɛɛn wasi sɔɔ sere ka baadommaɔ.
417	GEN 17:19	Ma Gusunɔ u nɛɛ, aawo, wunɛn kurɔ Saaraawa koo nun bii tɔn durɔ marua kam kam, kpa a nùn yĩsiru kɛ̃ Isaki. Wiya kon wure n ka nɛn arukawani bɔke ye ya ǹ kpeemɔ win bweserɔ.
430	GEN 18:5	Kon da n dĩanu tama fiiko kpa i di i ka dam wa. Yen biru kpa i sere swaa wɔri i doona. Bɛɛn naa te, ta bɛɛrɛ kua. Yen sɔ̃, i de i nɛn yaarɛ di. Ma ba nɛɛ, a koowo nɡe mɛ a ɡerua.
437	GEN 18:12	Ma u tii yɛ̃ɛ u nɛɛ, tɛ̃ ye na tɔkɔ kua na kpa, nɛn durɔn tii maa tɔkɔ kua, yera sa ko maa kpĩ su mɛnnabun nuku dobu wa?
441	GEN 18:16	Ma tɔn be, ba seewa ba doonɔ. Ba wuswaa tĩi Sodomun bera ɡia. Ma Aburahamu u bu swaa yɔ̃ra.
444	GEN 18:19	Domi wiya na ɡɔsa u ka win bibu ka ben bweseru wooda wɛ̃ bu nɛn swaa swĩi kpa ba n sĩimɔ dee dee ba n nɛn kĩru mɔ̀, kpa n nɛn nɔɔ mwɛɛnu yibia ni na nùn kua.
449	GEN 18:24	Sɔrɔkudo tɔn ɡeobu weeraakuru ba ko n wãa wuu ɡe sɔɔ, be ba wunɛn kĩru mɔ̀. Ǹ n man na, kaa maa bu ɡowa? A ǹ wuu ɡen tɔmbu suuru kuammɛ tɔmbu weeraaku ten sɔ̃?
467	GEN 19:9	Ba nɛɛ, wunɛ sɔɔwa, ma a kĩ a sun siri? A tii ɡawo min di, ǹ kun mɛ, ye sa ko nun kua ya koo beɡia kera. Ma ba Lɔtu bɔrikia ka dam sere ba kĩ bu win ɡambo kɔra.
475	GEN 19:17	Ye ba bu yara ba kpa ben turo u nɛɛ, a ka wunɛn hunde dukao, a ku ra sĩira, a ku ra maa yɔ̃ra batuma mi. A duka doo ɡuunun bera ɡia kpa a ku ra kam ko.
480	GEN 19:22	A hania koowo a da a kuke mi, domi na ǹ kpɛ̃ n ɡãanu ɡanu ko ma n kun mɔ a tura mi. Yen sɔ̃na ba wuu ɡe yĩsiru kã Soari. Yen tubusiana wuu piibu.
484	GEN 19:26	Adama suaru sɔɔ Lɔtun kurɔ u sĩira, ma u ɡɔsira bɔɔ kperu.
492	GEN 19:34	Yen sisiru yeruma wi, u win wɔnɔ sɔ̃ɔwa u nɛɛ, wee, ɡĩa wɔ̃kuru na dera bɛsɛn tundo ka man kpuna. Su kpam nùn tam nɔrusia wɔ̃ku te, kpa wunɛ a maa da u ka nun kpuna kpa win bweseru tu ku ɡbi.
495	GEN 19:37	Bii yeruma wi, u mara tɔn durɔ ma u nùn yĩsiru kã Mɔabu. Yen tubusiana nɛn tundon bii. Win min diya Mɔabuban bwesera yara.
496	GEN 19:38	Wɔnɔ wi, u maa mara tɔn durɔ, ma u nùn yĩsiru kã Bɛni Ami. Yen tubusiana nɛn dusin bii. Win min diya Amɔniban bwesera maa yara.
511	GEN 20:15	Ma u nùn sɔ̃ɔwa u nɛɛ, nɛna na tem mɛ mɔ. A ɡɔsio mɛ sɔɔ, bera mi a kĩ a n wãa.
513	GEN 20:17	N deema Gusunɔ u raa Abimɛlɛki ka win kurɔ ka win yobu bararu kpɛ̃ɛ te ta ǹ derimɔ bu ma, ye u ka Saaraa mwan sɔ̃. Yen sɔ̃na ye u Saaraa wesia, Aburahamu u Gusunɔ kana, ma u bu bɛkia bu ka kpĩ bu ma.
517	GEN 21:3	Aburahamu u bii wi yĩsiru kã Isaki.
528	GEN 21:14	Ye n kua sisiru Aburahamu u seewa buru buru yellu u dĩanu ka nim bwãaru sua u Aɡaa wɛ̃. U maa nùn bii wi nɔmu bɛria u nɛɛ, bu doo. Ma ba doona ba da ba tora ɡbaburɔ te ba ra soku Beri Seba.
530	GEN 21:16	Ma u da u sina n dɛsire n tura mi bà n sɛ̃u toba ɡa koo wen saka. Domi u nɛɛ, u ǹ kpɛ̃ u n win bii mɛɛra u n ɡbimɔ. Mi u sɔ̃ mi, ma u wura takana u swĩ.
537	GEN 21:23	Yen sɔ̃, a bɔ̃ruo ka win yĩsiru ma a ǹ nɛ ka nɛn bibu ka nɛn debuminu bɔrɔ kɔ̃ɔ kom kuammɛ, kpa a nɛ ka nɛn tem mɛɡibu durom kua nɡe mɛ na nun kua.
545	GEN 21:31	Yen sɔ̃na ba yam mi soka Beri Seba domi miya ba arukawani bɔkua ka bɔ̃ri. Yĩsi ten tubusiana dɔkɔ yèn nuurɔ ba bɔ̃rua.
550	GEN 22:2	Ma u nɛɛ, a Isaki wunɛn bii teere te suo wi a kĩ mi, a ka da Mɔriyan temɔ kpa a ka nùn yãku dɔ̃ɔ mwaararuɡiru ko ɡuuru ɡarun wɔllɔ te kon nun sɔ̃ɔsi.
554	GEN 22:6	Ma Aburahamu u yãku dãa ye sua u win bii Isaki sɔbi. Win tii u dɔ̃ɔ ka woburu sua u nɛni ma be yiru ba swĩinɛ.
557	GEN 22:9	Ye ba tura mi Gusunɔ u raa nùn yĩreru kua, Aburahamu u yãku yeru kua u yãku dãa ye tɛria ten wɔllɔ, ma u win bii Isaki bɔkua u sɔndi mi.