1	GEN 1:1	Sanam mɛ Gusunɔ u handunia torua, u wɔllu ka tem taka kua.
2	GEN 1:2	Tem daa wãawa bitam. Gãanu kun wãa mɛ sɔɔ. Mɛn temɔ wɔru bɔkɔwa ɡa wãa mi, ma yam wɔ̃kura ɡu wukiri. Ma nim mu tɛrie tem mɛn wɔllu ɡia. Nim mɛn wɔllɔwa Gusunɔn Hunde ra n bɛllimɔ.
3	GEN 1:3	Yera Gusunɔ u nɛɛ, yam bururam mu kooro. Ye u ɡerua mɛ, ma mu koora.
4	GEN 1:4	Ma yam bururam mɛ, mu nùn wɛ̃re. Saa yera u mu wunana ka yam wɔ̃kuru.
5	GEN 1:5	Ma u yam bururam soka sɔ̃ɔ sɔɔ, yam wɔ̃kuru maa wɔ̃kuru. Ma sɔ̃ɔ sɔɔ ɡe ka wɔ̃ku te, n swĩina ma n kua tɔ̃ɔ ɡbiikiru.
6	GEN 1:6	Ma Gusunɔ u nɛɛ, ɡãanu nu tɛrio wɔllɔ nɡe ɡɔna kpa mu n nim bɔnu sãa.
7	GEN 1:7	Ye u ɡerua mɛ, ma wom mu tɛria mu nim mɛ bɔnu kua. Sukum wãa nim wɔllɔ, sukum maa wãa temɔ.
8	GEN 1:8	Ma u ɡãa ni soka wɔllu. Saa ye u yeba mɔ̀, sɔ̃ɔ sɔɔ ka wɔ̃kuru n swĩina ma n kua tɔ̃ru yiruse.
9	GEN 1:9	Ma Gusunɔ u nɛɛ, nim mɛ mu wãa wom dirum temɔ mu subenu koowo kpa tem ɡbebum mu tera. Ye u ɡerua mɛ, ma n koora.
10	GEN 1:10	Ma u tem ɡbebum mɛ soka tem, ma u maa nim sube nin baatere soka nim wɔ̃ku. Ma n nùn wɛ̃re.
11	GEN 1:11	Yera u nɛɛ, tem mu ɡãa dabinu kpiiyo, ka yaka si su ko n binu marumɔ ka dãa binuɡii bwese bweseka ni nu nin bweseru mɔ nin marum sɔɔ. Ye u ɡerua mɛ, ma n koora.
12	GEN 1:12	Tem mu ɡãa dabinu kpia, ka yaka bwese bweseka si su binu marumɔ, ka dãa binuɡii bwese bweseka ni nu bweseru mɔ nin marum sɔɔ. Ma n nùn wɛ̃re.
13	GEN 1:13	Ye u yeba mɔ̀, sɔ̃ɔ sɔɔ ka wɔ̃kuru n swĩina ma n kua tɔ̃ru itase.
14	GEN 1:14	Ma Gusunɔ u nɛɛ, fitilanu nu kooro wom dirum sɔɔ kpa nu sɔ̃ɔ sɔɔ ka wɔ̃kuru wunana, kpa nu n sɔ̃ɔsimɔ saa ye wɔ̃su ka tɔ̃ɔ bakanu koo tore.
15	GEN 1:15	Kpa nu n sãa fitilanu wom dirum sɔɔ nu ka tem yam bururasia. Ye u ɡerua mɛ, ma n koora.
16	GEN 1:16	U fitila bakanu yiru kua, niya sɔ̃ɔ ka suru. U maa kperi kua. U sɔ̃ɔ kuawa u n ka bandu dii sɔ̃ɔ sɔɔ, ma u suru kua u n ka bandu dii wɔ̃kuru.
18	GEN 1:18	kpa nu n sãa sɔ̃ɔ sɔɔ ka wɔ̃kurun sunɔ, kpa nu n yam bururam ka yam wɔ̃kuru wunanɛ. Ma n nùn wɛ̃re.
19	GEN 1:19	Saa ye u yeba mɔ̀, sɔ̃ɔ sɔɔ ka wɔ̃kuru n swĩina ma n kua tɔ̃ru nnɛse.
20	GEN 1:20	Ma Gusunɔ u nɛɛ, nim mu de hunde koniba dabi dabinu nu koora mɛ sɔɔ, kpa ɡunɔsu su n yɔ̃ɔmɔ wom dirum sɔɔ.
21	GEN 1:21	Yera u swɛ̃ɛ bɛkɛ taka kua ka yɛɛ kpuro yi yi sĩimɔ yi yiba nim mɛ sɔɔ bwese bweseka. U maa ɡunɔsu kua bwese bweseka. Ma n nùn wɛ̃re.
22	GEN 1:22	Yen biru u yi domaru kua u nɛɛ, yi kɔwaro yi dabia yi yibu nim wɔ̃kun nim sɔɔ kpa ɡunɔsu su dabia handunia sɔɔ.
23	GEN 1:23	Saa ye u yeba mɔ̀, sɔ̃ɔ sɔɔ ka wɔ̃kuru n swĩina ma n kua tɔ̃ru nɔɔbuse.
24	GEN 1:24	Ma Gusunɔ u nɛɛ, yɛɛ bwese bweseka yi maruro tem sɔɔ. Yiya kpaaku yɛɛ ka ɡbeeku yɛɛ ka yɛɛ yi yi ra kabiri, yi kpuro bwese bweseka. Ye u ɡerua mɛ, ma n koora.
25	GEN 1:25	U ɡbeeku yɛɛ kua bwese bweseka ka kpaaku yɛɛ ka yɛɛ yi yi ra kabiri. Ma n nùn wɛ̃re.
26	GEN 1:26	Yen biru Gusunɔ u nɛɛ, kon tɔnu taka ko u n sãa nɛn weenasii mam mam, kpa u n sãa ye na taka kua kpuron wiruɡii. Yeya tem kpuro ka swɛ̃ɛ ka ɡunɔsu ka kpaaku yɛɛ ka yɛɛ yi yi ra kabiri temɔ kpuro.
27	GEN 1:27	Ye u ɡerua mɛ, ma u tɔnu taka kua u ka nùn weenɛ mam mam. U bu kuawa durɔ ka kurɔ.
28	GEN 1:28	Ma u bu domaru kua u nɛɛ, i maruro i dabia i handunia yibu ya n sãa bɛɛɡia kpa i n yɛɛ kpuro nɔma sikerenɛ. Yiya swɛ̃ɛ ka ɡunɔsu ka yɛɛ yi yi sĩimɔ temɔ kpuro.
29	GEN 1:29	U maa nɛɛ, wee ye i ko n da di. Yeya yakɔ bweseru baatere tem sɔɔ kpuro te ta ra binu ma, ka dãa binuɡiru baatere te ta ten bweseru mɔ ten marum sɔɔ.
30	GEN 1:30	Ma u maa handunian yɛɛ kpuro yi yi hunde mɔ yi sĩimɔ temɔ ka ɡunɔsu kpuro sɔ̃ɔwa u nɛɛ, na bɛɛ yakɔ beku baaɡere wɛ̃ i n da di. Ye u ɡerua mɛ, ma n koora.
31	GEN 1:31	Yera u mɛɛra kpuro ye u kua, ma n nùn wɛ̃re ɡem ɡem. Saa ye u yeba mɔ̀, sɔ̃ɔ sɔɔ ka wɔ̃kuru n swĩina ma n kua tɔ̃ru nɔɔba tiase.
32	GEN 2:1	Nɡe mɛya Gusunɔ u ka wɔllu ka tem ka kpuro ye ya wãa sɔɔ taka kua u wiru ɡo.
33	GEN 2:2	Tɔ̃ru nɔɔba tiase sɔɔra u win sɔma ye u kua kpuro wiru ɡo ma u wɛ̃ra tɔ̃ru nɔɔba yiruse.
34	GEN 2:3	Ma u nɔɔba yiruse te yi nɛnɛm win sɔ̃, u tu domaru kua yèn sɔ̃ te sɔɔra u wɛ̃ra ye u kpuro taka kua u kpa.
36	GEN 2:5	dãru ɡara kun ɡina kpia tem sɔɔ, yakasu ɡasu kun maa kpia domi Yinni Gusunɔ kun ɡina ɡura nɛɛsie sanam mɛ. Tɔnu maa sari wi u koo tem mɛ wuku.
37	GEN 2:6	Adama kakoru ɡaru ta ra se tem di tu tem mɛ nikererasia kpuro.
38	GEN 2:7	Yen biruwa Yinni Gusunɔ u tɔnu mɔma ka tem u nùn wãarun wom wɛ̃sie win wɛ̃rɔ, ma tɔnu kua waso.
39	GEN 2:8	Ma Yinni Gusunɔ u ɡbaaru kua Edɛniɔ sɔ̃ɔ yari yerun bera, ma u tɔnu wi u kua mi sua u doke sɔɔ.
40	GEN 2:9	Ma u dãa bwese bweseka kpiisia te sɔɔ, ni nu waabu wã ka ni nu dim do, ka sere dãa tèn binu nu koo tɔnu wãaru wɛ̃, ka maa tèn binu nu koo tɔnu ɡea ka kɔ̃sa ɡiasia. Dãnu yiru ye, nu wãawa ɡbaa ten suunu sɔɔ.
41	GEN 2:10	Daaru ɡara wãa ɡbaa te sɔɔ, te ta tu nike nikeru sãa. Min diya ta yara ma ta kɛri kua nnɛ.
42	GEN 2:11	Gbiikaan yĩsira Pisoni. Yeya ya tem mɛ ba mɔ̀ Hafila sikerenɛ.
43	GEN 2:12	Tem mɛ sɔɔra wura ɡea wãa. Turare nubu duroruɡia maa wãa mi, ka kpee ɡobiɡinu.
44	GEN 2:13	Kɛra yirusen yĩsira maa Gihoni. Yeya ya tem mɛ ba mɔ̀ Kusi sikerenɛ.
45	GEN 2:14	Kɛra itasewa maa Tiɡiri. Yeya ya kokumɔ tem mɛ ba mɔ̀ Asirin sɔ̃ɔ yari yeru ɡia. Kɛra nnɛsewa maa Efarati.
46	GEN 2:15	Ye Yinni Gusunɔ u ɡbaa te sɔɔru kua u kpa Edɛniɔ, yera u tɔnu wi sua u doke sɔɔ u ka tu wuku kpa u n tu kɔ̃su.
47	GEN 2:16	Ma u nùn wooda yeni wɛ̃ u nɛɛ, kaa kpĩ a ɡbaa ten dãnu kpuron binu di.
48	GEN 2:17	Adama dãa tèn binu nu koo tɔnu ɡea ka kɔ̃sa ɡiasia, a ku ra ten binu di, domi dɔma te a nu di, kaa ɡbiwa.
49	GEN 2:18	Ka tema Yinni Gusunɔ u ɡbeeku yɛɛ kpuro kua ka ɡunɔsu kpuro, ma u ka ye kpuro na tɔnu win mi, u ka wa mɛ u koo ye yĩsiru kɛ̃. Ma tɔnu wi, u yaa sabenu kpuro ka ɡunɔsu ka ɡbeeku yɛɛ kpuro yĩsa kã. Yĩsi te tɔnu wi, u maa yaa baayere kã teya ba ka ye sokumɔ. Adama ye kpuro sɔɔ, sari ye ya ka nùn weenɛ ye ya koo nùn somi. Yen sɔ̃na Yinni Gusunɔ u nɛɛ, n ǹ wã tɔnu u n wãa wi turo. Kon nùn ɡoo kua u n sãa nɡe wi, wi u koo nùn somi.
52	GEN 2:21	Yera Yinni Gusunɔ u tɔnu wi dom mɔn bakaru kpɛ̃ɛ u dweeya. Ma u win yɛ̃san kuku teeru wuna ma u yɛ̃sa ye kɔrua ka yaa baasi.
53	GEN 2:22	Ma u tɔn kurɔ taka kua ka tɔn durɔn kuku te, te u wuna. Ma u ka nùn na tɔn durɔ win mi.
54	GEN 2:23	Yera durɔ wi, u nɛɛ, wee tɛ̃, wini u wasi mɔ nɡe nɛɡii mam mam. Ba koo nùn sokuwa tɔn kurɔ, domi tɔn durɔn min diya u yara.
55	GEN 2:24	Yen sɔ̃na durɔ u koo win tundo ka win mɛro deri kpa wi ka win kurɔ ba n maninɛ, kpa be yiru kpuro bu ko wasi tee.
56	GEN 2:25	Saa ye sɔɔ, durɔ wi ka win kurɔ terera ba wãa. Sekura kun maa ben ɡoo mɔ̀.
57	GEN 3:1	N deema waa ya bwisi bo ɡbeeku yɛɛ kpuro sɔɔ yi Yinni Gusunɔ u taka kua. Yera ya na kurɔ win mi, ya nùn bikia ya nɛɛ, ka ɡem Gusunɔ u nɛɛ, i ku ɡbaa tenin dãa binu kpuro di?
59	GEN 3:3	ma n kun mɔ te ta wãa suunu sɔɔ. Tera u nɛɛ, su ku mam ten binu baba su sere di su ku ka ɡbin sɔ̃.
61	GEN 3:5	Domi Gusunɔ u yɛ̃ dɔma te i ten binu di, bɛɛn nɔni koo wukiarawa kpa i n sãa nɡe win tii, i n ɡea ka kɔ̃sa yɛ̃.
62	GEN 3:6	Ma kurɔ wi, u wa dãa te, ta ka dii dobu weenɛ ta waabu wã, ta koo maa kpĩ tu nùn ko bwisiɡii. Ma u ten bii ni sɔra u di. U maa win durɔ wɛ̃ ka wi ba wãasinɛ, ma wi, u maa di.
63	GEN 3:7	Yera be yiru kpuron nɔni wukiara ba ɡia ma terera ba wãa. Ma ba da ba dãa te ba mɔ̀ fiɡien wuru bakasu bura ba swɛɛna ba ka tii ɡandi.
64	GEN 3:8	Ye ba Yinni Gusunɔn nɔɔ nua u bɔsu ɡbaa te sɔɔ yoka, yera ba da ba nùn kukue ɡbaa ten dãnun suunu sɔɔ.
65	GEN 3:9	Adama Yinni Gusunɔ u durɔ wi soka u nɛɛ, mana a wãa.
66	GEN 3:10	Durɔ wi, u wisa u nɛɛ, ye na wunɛn nɔɔ nua ɡbaaru sɔɔ, bɛrum man mwa domi terera na wãa, ma na kukua.
67	GEN 3:11	Gusunɔ u nɛɛ, wara nun sɔ̃ɔwa ma terera a wãa. Nɡe a dãa ten binu diwa te na nɛɛ, a ku di.
68	GEN 3:12	Durɔ wi, u nɛɛ, kurɔ wi a man wɛ̃ u n ka man wãa wiya man dãa ten binu wɛ̃ ma na di.
69	GEN 3:13	Ma Yinni Gusunɔ u kurɔ wi bikia u nɛɛ, mban sɔ̃na a kua mɛ. Ma u wisa u nɛɛ, waa ya man kɔkura na ka di.
70	GEN 3:14	Yinni Gusunɔ u waa ye sɔ̃ɔwa u nɛɛ, yèn sɔ̃ a kua mɛ, a kua bɔ̃rura n yɛɛ kpuro kere. Wunɛn nukura kaa n da ka kabiri. Tema kaa n da di sere ka wunɛn wãarun nɔrɔ.
71	GEN 3:15	Na kon maa yibɛrɛ tɛɛru doke wunɛ ka kurɔ win baa sɔɔ, ka maa wunɛn bweseru ka win bweserun baa sɔɔ. Win bweserun ɡoo u koo nun wiru kɔra, kaa maa win naa tokuru mɛɛra ko.
72	GEN 3:16	Yera u maa kurɔ wi sɔ̃ɔwa u nɛɛ, kon wunɛn ɡuran wahala sosi. Kaa n da mawa ka nɔni swãaru. Wunɛn kĩru kpuro ta ko n wãawa wunɛn durɔ sɔɔ, wiya ko n maa sãa wunɛn wiruɡii.
73	GEN 3:17	U maa durɔ wi sɔ̃ɔwa u nɛɛ, yèn sɔ̃ a wunɛn kurɔn ɡari wura, ma a dãa ten binu di te na nɛɛ, a ku di, na tem bɔ̃rusi wunɛn sɔ̃. Sãkunu ka awĩiya mu koo nun kpiiya, wunɛn wãaru kpuro sɔɔ, nɔwiawa kaa n da ko kpa a wɛnya a sere wunɛn dĩanu wa ɡberɔ. Yen biru kaa ɡbi kpa bu nun sike temɔ, domi tema na ka nun kua. Kaa maa wura a ko tem mɛ.
76	GEN 3:20	Ma Adamu u win kurɔ yĩsiru kã Efa, domi wiya u sãa tɔmbu kpuron mɛro.
77	GEN 3:21	Ma Yinni Gusunɔ u Adamu ka win kurɔ yaa ɡɔnan yabenu kua u bu sebusia.
78	GEN 3:22	Ma Yinni Gusunɔ u nɛɛ, wee tɔnu wi, u kua nɡe mɛ na sãa, u ɡea ka kɔ̃sa ɡia. Tɛ̃ na ǹ kon de u dãa bii ni nu koo nùn wãaru wɛ̃ sɔri u di u n ka wãa ka baadommaɔ.
79	GEN 3:23	Yera u nùn ɡira Edɛnin ɡbaa ten min di u da u tem wuku mɛ u ka nùn mɔma.
80	GEN 3:24	Nɡe mɛya u ka Adamu ɡira ma u wɔllun kɔ̃sobu doke Edɛnin ɡbaa ten kɔnnɔwɔ, ɡe ɡa wãa sɔ̃ɔ yari yerun bera ɡia. Ba takobi nɛni ba ye fĩamɔ ma ya ballimɔ sɔ̃ɔ sɔɔ nɡe dɔ̃ɔ yara, ba ka dãa tèn binu nu koo tɔnu wãaru wɛ̃ kɔ̃su.
81	GEN 4:1	Yen biru Adamu ka win kurɔ Efa ba mɛnna ma Efa u ɡura sua u Kaɛni mara. Ma u nɛɛ, ka Yinni Gusunɔn somira na tɔnu taka kua.
82	GEN 4:2	Ma u maa ɡura sua u Abɛli, Kaɛnin wɔnɔ mara. Abɛli wiya u ra yãanu kpare, Kaɛni maa kua ɡbee wuko.
83	GEN 4:3	Sɔ̃ɔ mɛɛrun biru, Kaɛni u ka win kɛ̃ru na Yinni Gusunɔn mi, te ta sãa win ɡberun dĩanu.
84	GEN 4:4	Ma Abɛli maa ka wiɡiru na te u ɡɔsa saa win yaa sabenun bii ɡbiikinun di ni nu bɔɔru. Yinni Gusunɔ u ka Abɛli nɔni ɡeu mɛɛra ma u win kɛ̃ru mwa.
85	GEN 4:5	Adama u ǹ ka Kaɛni nɔnu ɡeu mɛɛra, u ǹ maa win kɛ̃ru mwɛ. Ma Kaɛni u mɔru bara sere win wuswaa burisina.
86	GEN 4:6	Yera Yinni Gusunɔ u Kaɛni bikia u nɛɛ, mban sɔ̃na a mɔru bare, mban sɔ̃na wunɛn wuswaa burisinɛ.
87	GEN 4:7	Geema, à n ɡea mɔ̀, wunɛn bwɛ̃ra ko n kpĩ. Ǹ n maa kɔ̃san na a mɔ̀, durum ya kpĩ wunɛn dii kɔnnɔwɔ nɡe yaa ɡɔba ya nun mara. Adama a de a ye kamia.
88	GEN 4:8	Sɔ̃ɔ teeru Kaɛni u win wɔnɔ Abɛli sɔ̃ɔwa u nɛɛ, su da ɡberɔ. Sanam mɛ ba wãa mi, yera u win wɔnɔ wi sɛ̃re u ɡo.
89	GEN 4:9	Ma Yinni Gusunɔ u da Kaɛnin mi, u nùn bikia u nɛɛ, mana wunɛn wɔnɔ Abɛli u wãa. U wisa u nɛɛ, na yɛ̃ ro? Nɛna na nɛn wɔnɔn kɔ̃so?
90	GEN 4:10	Ma Yinni Gusunɔ u kpam nɛɛ, mba a kua mi. Wunɛn wɔnɔn yɛm mɛ mu yari temɔ, mu nɛn laakari seeye.
91	GEN 4:11	Tɛ̃ kaa ko bɔ̃ruro n kere tem mɛ a dera mu wunɛn wɔnɔ win yɛm nɔra.
92	GEN 4:12	À n tem mɛ wuka, mu ǹ maa nun dĩanu kuammɛ sãa sãa. Kaa n sãawa kpiko ka yaayaare kowo handunia sɔɔ.
93	GEN 4:13	Yera Kaɛni u Yinni Gusunɔ sɔ̃ɔwa u nɛɛ, wee, a man sɛɛyasiamɔ bi bu man kere.
94	GEN 4:14	A man ɡire ɡisɔ tem mɛn di. Na dɔɔ na n kukua mi n toma wunɛn min di, kpa na n sãa kpiko na n yaayaare mɔ̀ handunia sɔɔ. Wi u man wa kpuro, kpa u man ɡo.
95	GEN 4:15	Adama Yinni Gusunɔ u nùn sɔ̃ɔwa u nɛɛ, aawo, n ǹ mɛ. Goo ù n nun ɡo, kon yɛ̃ro mɔru kɔsiawa tia tian nɔn nɔɔba yiru. Ma u Kaɛni yĩreru koosi, wi u nùn wa u ku ka nùn ɡon sɔ̃.
96	GEN 4:16	Ma Kaɛni u doona n toma Yinni Gusunɔn min di, u da u sina Edɛnin sɔ̃ɔ yari yerun bera ɡia, Nɔduɔ. Yĩsi ten tubusiana yaayaaren tem.
97	GEN 4:17	Yen biru Kaɛni ka win kurɔ ba mɛnna ma kurɔ wi, u ɡura sua u Enɔku mara. Ma Kaɛni u wuu ɡaɡu bana u ɡu soka Enɔku nɡe win biin yĩsiru.
98	GEN 4:18	Enɔku wi, u Iradi mara, Iradi maa Mɛhuyaɛli mara. Mɛhuyaɛli u Mɛtusaɛli mara ma Mɛtusaɛli u Lemɛki mara.
99	GEN 4:19	Lemɛki wi, u kurɔbu yiru sua. Turon yĩsira Ada, turoɡira maa Sila.
100	GEN 4:20	Ada u Yabali mara. Wiya u sãa be ba wãa kunɔ ba yaa sabenu kparamɔn baaba.
101	GEN 4:21	Win wɔnɔn yĩsira Yubali. Wiya maa sãa be ba ra mɔrɔkunu ka ɡuunu so kpuron baaba.
102	GEN 4:22	Sila wi maa, u Tubali Kaɛni mara wi u ra dendi yãnu kpuro seku ye n sãa sisu ka sii ɡandu. Win sesun yĩsira Naama.
103	GEN 4:23	Yera Lemɛki u win kurɔbu sɔ̃ɔwa u nɛɛ, i man swaa dakio, bɛɛ nɛn kurɔbu, Ada ka Sila. Na tɔnu ɡo bɛɛn sɔ̃ yèn sɔ̃ u man mɛɛra kua.
104	GEN 4:24	Bà n wi u Kaɛni ɡo mɔru kɔsia nɔn nɔɔba yiru, ba koo nɛ Lemɛki mɔru kɔsia nɔn wata ka wɔkura nɔɔbu ka yiru.
105	GEN 4:25	Adamu ka win kurɔ Efa ba mɛnna kpam, ma Efa u ɡura sua u bii tɔn durɔ mara u nùn yĩsiru kã Sɛti. U nɛɛ, domi Yinni Gusunɔ u kpam man bii tɔn durɔ kã u kua Abɛlin kɔsire, wi Kaɛni u ɡo.
106	GEN 4:26	Sɛtin tii, u bii tɔn durɔ mara ma u nùn yĩsiru kã Enɔsi. Sanam mɛ sɔɔra tɔmba Yinni Gusunɔ sãaru torua.
107	GEN 5:1	Wee nɡe mɛ ba Adamun bweserun yĩsa yorua. Dɔma te Gusunɔ u tɔn durɔ ka tɔn kurɔ taka kua u bu kuawa win weenasibu.
108	GEN 5:2	U bu soka tɔmbu ma u bu domaru kua.