27005	ACT 1:13	Iyo꞉ Ya꞉lusalem fa꞉la꞉dowa꞉sa꞉ga꞉yo꞉, ilo꞉ sa꞉sen galale wa꞉l amio꞉ a꞉na tiane. Kalu i a꞉namilo꞉ seno꞉ we, Bida, Yon, Yemes, Andulu, Filib, Tomas, Batolomiyu, Madiyu, Yemes Alofiusa꞉ inso꞉, Saimon Sa꞉la꞉t kalu, a꞉la꞉ta꞉ga꞉ Yuda꞉s, Yemesa꞉ inso꞉.
27027	ACT 2:9	Nio꞉ heno꞉ ko꞉li ko꞉lilo꞉wa a꞉la꞉ga꞉ga꞉ mio꞉. Nolo꞉ Patia, Midia, Elam. Nowo꞉ Yudia, Kabadosia, Pontus, Esia, Filigia, Bafilia, Isib, a꞉la꞉ta꞉ga꞉ Libia hen anibamilo꞉ Salini amisa꞉n a꞉namilo꞉ sa꞉seno꞉ a꞉no꞉ ko꞉lo꞉ mio꞉, a꞉la꞉ta꞉ga꞉ nolo꞉ Lom a꞉na a꞉la꞉ta꞉ga꞉ ya꞉sio꞉.
27162	ACT 5:34	Ko꞉sega Fa꞉lisi kalu nowo꞉, ene wiyo꞉ Gamaliel, e elelo꞉ asulo꞉ kalu ko꞉lo꞉ Yu kaluka꞉isale iyo꞉ man elo꞉wo꞉ nafale ba꞉da꞉sen. O꞉g a꞉namio꞉ Gamaliel e, misa꞉ kalu o꞉lia꞉ sen ko꞉lo꞉, e dasila꞉sa꞉ga꞉, kalu nolbo꞉wo꞉ “Iliga꞉felo꞉ kaluwo꞉ ha꞉la꞉ya o꞉tililia꞉ hamana” a꞉la꞉sa꞉la꞉sa꞉ga꞉, Yu misa꞉ kalu imo꞉wo꞉ a꞉la꞉sio꞉, “Isolael kalu giliyo꞉, kelego꞉ nowo꞉ kalu i wemo꞉wo꞉ dimidama꞉no꞉lalega, giliyo꞉ dinafa asula꞉bi.
27175	ACT 6:5	Iliyo꞉ a꞉la꞉sa꞉labiki, tilidabu kaluka꞉isale iliyo꞉ to sa꞉lab a꞉no꞉ da꞉da꞉sa꞉ga꞉ tambo sagalaki, iliyo꞉ kalu nolo꞉ da꞉feyo꞉. Da꞉feyo꞉ kaluwo꞉ nowo꞉ Sitifen. E tilidabu alan a꞉la꞉ta꞉ga꞉ Godeya꞉ Mamayo꞉ e amio꞉ wa꞉lifo꞉. Da꞉feyo꞉ kalu nowo꞉ we, Filib, Bolokolus, Nikanol, Timon, Balmenas, a꞉la꞉ta꞉ga꞉ nowo꞉ Nikolas, e Antio꞉g amisa꞉n kalu ko꞉lo꞉ e tamin amio꞉ Yu kaluwa꞉lo꞉ tilidabu a꞉no꞉ elo꞉ kudu ane.
27194	ACT 7:9	“Nili ma꞉mu, Yekoba꞉ insisa꞉i nolba꞉yo꞉ Yosa꞉bo꞉wo꞉ keleasula꞉sa꞉ga꞉, e Isib kaluwa꞉ da꞉ibo꞉ kalu doma꞉ki, moleya꞉ kilili. Ko꞉sega Godeya꞉yo꞉ Yosa꞉b e hida꞉yo꞉ ba꞉dab a꞉namio꞉, e o꞉lia꞉ dofo꞉liki asufa꞉ ko꞉loemo꞉wo꞉ asulo꞉ alan dimiabiki, Isib misa꞉ kalu, Felo꞉wa꞉ siwa꞉l amio꞉ Yosa꞉b ene mano꞉ nafa ba꞉da꞉sa꞉ga꞉, Felo꞉ e sagalaki, Isib hen o꞉lia꞉ ene a o꞉lia꞉yo꞉ Yosa꞉b emo꞉ bo꞉fo꞉melea꞉ki ta꞉fo꞉.
27198	ACT 7:13	Iyo꞉ andeb ane amio꞉, Yosa꞉b e ao imo꞉wo꞉ eneno꞉ a꞉na wida꞉sa꞉ga꞉ dowabiki, Felo e Yosa꞉ba꞉ so꞉lo꞉wo꞉ welo꞉b a꞉la꞉bo꞉ a꞉na asulo꞉.
27250	ACT 8:5	Filibo꞉ Samalia amisa꞉n a꞉na tina꞉sa꞉ga꞉, Godeya꞉lo꞉ Da꞉feyo꞉ Kalu Ya꞉suwo꞉ weka꞉ a꞉la꞉liki fanda wido꞉.
27251	ACT 8:6	Kaluka꞉isale kegeo꞉ a꞉namilo꞉ sen a꞉ma꞉yo꞉ Filiba꞉ to widakilo꞉ molo ha꞉na꞉no꞉ dimidab a꞉no꞉ ba꞉dakiyo꞉, iliyo꞉ elo꞉ to sa꞉lab a꞉no꞉ dinafa dabu.
27252	ACT 8:7	Filib eyo꞉ kaluka꞉isale amio꞉ mama mogago꞉ dosdo꞉ a꞉no꞉ e o꞉luga꞉felabi ha꞉na꞉siakiyo꞉, iyo꞉ ganafoda꞉liki ane. A꞉la꞉ta꞉ga꞉ giliga꞉sen kaluka꞉isale o꞉lia꞉ kogoneli kalukeisale o꞉lia꞉ yo꞉ modo꞉ ko꞉lo꞉ falele alifelo꞉.
27257	ACT 8:12	Ko꞉sega Filib eyo꞉ Godeya꞉ ene kaluka꞉isale ko꞉lo꞉ bo꞉fo꞉lab man nafa o꞉lia꞉, Ya꞉su Kelisowa꞉ wi a꞉no꞉lia꞉yo꞉ wido꞉ amio꞉, kaluka꞉isaleyo꞉ tilida꞉dabiki, iyo꞉ ho꞉na to꞉lolo꞉.
27258	ACT 8:13	A꞉la꞉ta꞉ga꞉ Saimon elo꞉ tilida꞉da꞉sa꞉ga꞉ dowabi, ho꞉na to꞉lolo꞉ ko꞉lo꞉ e Filib o꞉lia꞉ kudu sia꞉la꞉ga꞉, Filib elo꞉ molo ha꞉na꞉no꞉ dimidab a꞉no꞉ ba꞉da꞉ga꞉yo꞉, e molo asulo꞉.
27271	ACT 8:26	A꞉la꞉fo꞉ko꞉lo꞉ Godeya꞉ ma꞉mul kaluwa꞉yo꞉ Filibo꞉wo꞉ a꞉la꞉sio꞉, “Ge dimidalia꞉ga꞉, kalalili hen a꞉namio꞉, tog nowo꞉ Ya꞉lusalem a꞉la꞉ta꞉ga꞉ Gasa amisa꞉n a꞉na ha꞉na꞉sen a꞉lab ko꞉lo꞉ ge a꞉na tiha꞉na꞉bi.”
27272	ACT 8:27	A꞉la꞉sa꞉labiki, Filib e tog a꞉na ha꞉na꞉lena, Itiobia kalu nowo꞉ a꞉na yabiki ba꞉ba꞉. Kalu a꞉ma꞉ ito꞉wo꞉ dugula꞉. Kalu a꞉no꞉ Itiobiaya꞉ misa꞉ ka꞉isale, Kandasiya꞉ ene nanogdo꞉ dian kalu alan nowo꞉ e. E Kandasiya꞉ moleyo꞉ a꞉la꞉ta꞉ga꞉ kelego꞉ nafalelo꞉ tambo bo꞉fo꞉lowano꞉ e. E Godeyo꞉ wabuluma꞉niki, Ya꞉lusalem ane ko꞉lo꞉ a꞉ma꞉la꞉ ya꞉lena ba꞉ba꞉.
27273	ACT 8:28	E hos amilo꞉ i fofodo꞉ wa꞉la siliki, dinali sa꞉lan kalu, Aisaya bugo꞉ a꞉no꞉ halale agela꞉liki mio꞉ ko꞉lo꞉, Godeya꞉ Mamaya꞉yo꞉ Filibo꞉wo꞉ a꞉la꞉sio꞉, “Ge elo꞉ yab anidoba꞉da꞉, e o꞉lia꞉ ha꞉na꞉ga꞉ ha꞉nani hamana.”
27275	ACT 8:30	A꞉la꞉sa꞉labiki, Filib e nai ha꞉na꞉sa꞉ga꞉, i fofodo꞉ ha꞉nab anib a꞉na fa꞉la꞉dowakiyo꞉, kalu a꞉ma꞉lo꞉ dinali sa꞉lan Aisaya bugo꞉ agela꞉i ha꞉nab a꞉no꞉, e dabu. A꞉la꞉fo꞉ko꞉lo꞉ Filib eyo꞉ kalu o꞉mo꞉wo꞉ a꞉la꞉dabuba꞉ba꞉, “To gilo꞉ agelo꞉ a꞉no꞉, ge ha꞉go꞉ fanda asulaya?”
27276	ACT 8:31	A꞉la꞉dabuba꞉dabiki, kalu a꞉ma꞉yo꞉ a꞉ma꞉la꞉bo꞉ a꞉la꞉sio꞉, “Kalu noma꞉yo꞉ nemo꞉wo꞉ mo꞉fanda sa꞉lalega, ne mada mo꞉fanda asuluma꞉ib.” A꞉la꞉sata꞉ga꞉, Filibo꞉ elo꞉ sab i fofodo꞉ anib wa꞉l a꞉na mesa꞉ mena a꞉la꞉sio꞉.
27279	ACT 8:34	Itiobia kaluwa꞉yo꞉ a꞉na agela꞉sa꞉ga꞉yo꞉, Filibo꞉wo꞉ a꞉la꞉dabuba꞉ba꞉, “Dinali sa꞉lan a꞉la꞉do꞉ sa꞉lab we, o꞉b ko꞉lo꞉ sa꞉laigabele? Eneno꞉ ko꞉lo꞉ sa꞉labele? O꞉ kalu nowo꞉ ko꞉lo꞉ sa꞉labele?”
27280	ACT 8:35	A꞉la꞉dabuba꞉dabiki, Filib eyo꞉ Godeya꞉ to a꞉no꞉ mo꞉mo꞉da widakiyo꞉, Ya꞉suwa꞉ to nafa a꞉no꞉ ko꞉lo꞉ wido꞉.
27282	ACT 8:37	Filib eyo꞉ a꞉la꞉sio꞉, “Ge asulo꞉wo꞉ amio꞉ hendele tilida꞉dalega, ge ho꞉n amio꞉ o꞉li to꞉loma꞉nigo꞉l.” A꞉la꞉sa꞉labiki, Itiobia kalu eyo꞉ a꞉la꞉sio꞉, “Ya꞉su E Godeya꞉ Inso꞉ a꞉la꞉bo꞉ ne tili asulo꞉l.”
27283	ACT 8:38	A꞉la꞉sa꞉la꞉sa꞉ga꞉ e i fofodo꞉ a꞉no꞉ kagafoma꞉ki sio꞉ ko꞉lo꞉ kagayabikiyo꞉, a꞉la꞉yo꞉ ho꞉na tina꞉sa꞉ga꞉, Filib eyo꞉ kalu a꞉no꞉ ho꞉na to꞉lolo꞉.
27284	ACT 8:39	A꞉la꞉yo꞉ ho꞉na a꞉la꞉ta꞉ga꞉ ha꞉laya fa꞉la꞉dowabikiyo꞉, Godeya꞉ Mamaya꞉yo꞉ Filibo꞉ wigibole a꞉naka dia꞉gane ko꞉lo꞉ Itiobia kalu eyo꞉ wa꞉kabiyo꞉ mada mo꞉ba꞉dabiki, e sagala꞉liki ane.
27285	ACT 8:40	Ko꞉sega Filib e wigibo Asdot amisa꞉n a꞉naka handalowo꞉ ko꞉lo꞉, e Ya꞉suwa꞉ to nafayo꞉ wida꞉liki, amisa꞉n nolo꞉ ililita꞉ga꞉ aneyo꞉, Sesalia amisa꞉n a꞉na fa꞉la꞉dowo꞉.
27395	ACT 11:19	Sitifendo꞉ sa꞉ndab ho꞉len a꞉namio꞉, hida꞉yo꞉ alan fa꞉la꞉dowo꞉ a꞉ma꞉ ilikiyo꞉, tilidabu kaluka꞉isaleyo꞉ dalalelia꞉ga꞉, nolo꞉ Fonisia hen a꞉na, nolo꞉ Saibulus hen a꞉na, a꞉la꞉ta꞉ga꞉ nolo꞉ Antio꞉g amisa꞉n a꞉na ane. Iyo꞉ ha꞉na꞉siakiyo꞉, Godeya꞉ to nafayo꞉ Yu kaluka꞉isalemo꞉ ka wida꞉i ane.
27440	ACT 13:9	A꞉la꞉go꞉ko꞉lo꞉ So꞉l, e wiyo꞉ nowo꞉ Fol, Godeya꞉ Mamayo꞉ e amio꞉ wa꞉lifo꞉liki, Elimas eko꞉ sikudu bo꞉fo꞉liki towo꞉ a꞉la꞉sio꞉,
27444	ACT 13:13	Fol o꞉lia꞉ kalu a꞉la꞉ e o꞉lia꞉lo꞉ mio꞉ a꞉no꞉, Bafos amisa꞉no꞉ ta꞉ta꞉ga꞉, ho꞉n ko꞉suwa disa꞉la꞉sa꞉ga꞉, Bafilia hena ha꞉na꞉sa꞉ga꞉, Bega amisa꞉na fa꞉la꞉dowo꞉. Amisa꞉n a꞉na dota꞉ga꞉yo꞉, Yon Mago꞉ a꞉la꞉yo꞉ ta꞉ta꞉ga꞉, a꞉ma꞉la꞉ Ya꞉lusalem ane.
27447	ACT 13:16	Fol e dasilia꞉sa꞉ga꞉ kagayakiyo꞉, iyo꞉ ha꞉sa mesea꞉ki, dagiya꞉ da꞉fea꞉sa꞉ga꞉ hela꞉tabikiyo꞉, imo꞉wo꞉ a꞉la꞉sio꞉, “Isolael kalu o꞉lia꞉ Yu kaluma Godelo꞉ wabuda꞉len a꞉no꞉lia꞉yo꞉ gio꞉ to we dabuma!
27472	ACT 13:41	Dinali sa꞉lan kaluwa꞉yo꞉ Godeya꞉ towo꞉ dia꞉sa꞉ga꞉yo꞉ a꞉la꞉sa꞉sa꞉lo꞉, “‘Dabuma! Gio꞉ Ni man sa꞉labo꞉ mogagi dio꞉ge sa꞉labdo꞉ a꞉no꞉ gio꞉ molo asula꞉sa꞉ga꞉yo꞉ soma꞉ib. Mo꞉wo꞉ o꞉g ho꞉len gilo꞉ sab wenamio꞉, niyo꞉ nanog ko꞉li dimida꞉ma꞉no꞉ ko꞉lo꞉ kalu nolba꞉yo꞉ gemo꞉wo꞉ malolo꞉ mealega, giyo꞉ to a꞉no꞉ mo꞉ tilida꞉babe.’” Fol eyo꞉ a꞉la꞉sio꞉.
27473	ACT 13:42	Fol dia꞉ Banabas dia꞉yo꞉ towo꞉ sa꞉la꞉sa꞉ga꞉ ha꞉na꞉nigab amio꞉, kalu kegeo꞉ a꞉ma꞉yo꞉, a꞉la꞉yo꞉ Ha꞉fo꞉lo꞉ Dowan ho꞉len no amio꞉ tamin amilo꞉ man wido꞉ a꞉no꞉ wa꞉ka walama꞉ki, dabu ba꞉ba꞉.
27474	ACT 13:43	Fol dia꞉ Banabas dia꞉yo꞉ tolo꞉ wida꞉sen aya ta꞉ta꞉ga꞉ ha꞉nakiyo꞉, Yu kaluka꞉isale o꞉lia꞉ Yu kaluma Godelo꞉ wabuda꞉len a꞉no꞉lia꞉ egele tola꞉i ha꞉nakiyo꞉, imo꞉wo꞉ a꞉la꞉sio꞉, “Godeya꞉yo꞉ asuwa꞉fa꞉ib ko꞉lo꞉ gio꞉ E ko꞉lo꞉ dinafa kudu ha꞉na꞉bi” a꞉la꞉sio꞉.
27476	ACT 13:45	A꞉la꞉gabikiyo꞉, Yu kaluwa꞉yo꞉ kegeo꞉ a꞉no꞉ ba꞉da꞉ga꞉, a꞉la꞉mo꞉wo꞉ kulufa꞉yaki, Fol elo꞉ to widab a꞉no꞉ madali dikili sa꞉lab a꞉la꞉likiyo꞉, a꞉la꞉mo꞉wo꞉ dio꞉ge sio꞉.
27477	ACT 13:46	Ko꞉sega Fol dia꞉ Banabas dia꞉yo꞉ a꞉ma꞉la꞉bo꞉ halale a꞉la꞉sio꞉, “Na꞉no꞉ Yu kalu gimo꞉wo꞉ Godeya꞉ to mano꞉ gi ko꞉le wido꞉ a꞉la꞉bo꞉ Godeya꞉ sio꞉, ko꞉sega gio꞉ to a꞉no꞉ gola ba꞉dakiyo꞉, mela꞉no꞉ mela꞉no꞉ a꞉no꞉ giliyo꞉ dio꞉l a꞉la꞉bo꞉ mo꞉egab a꞉la꞉sulo꞉ ko꞉lo꞉ na꞉no꞉ o꞉go꞉ Yu kaluka꞉isalema o꞉lo꞉wa ha꞉na꞉sa꞉ga꞉ walama꞉no꞉.
27482	ACT 13:51	A꞉la꞉dimidabiki, Fol dia꞉ Banabas dia꞉ma꞉yo꞉ a꞉la꞉ma꞉ gido꞉fo꞉ amilo꞉ hena꞉mu a꞉no꞉ fifi alita꞉sa꞉ga꞉yo꞉, a꞉la꞉yo꞉ Aikonium amisa꞉na ane.
27484	ACT 14:1	Fol dia꞉ Banabas dia꞉yo꞉ Aikonium amisa꞉n a꞉namio꞉ Yu kaluwa꞉lo꞉ tolo꞉ wida꞉sen aya tina꞉sa꞉ga꞉, Godeya꞉ to man nafayo꞉, a꞉la꞉ma꞉lo꞉ Antio꞉gdo꞉ wida꞉len o꞉leaum, halale widabiki, Yu kaluka꞉isale o꞉lia꞉ Yu kaluka꞉isalema o꞉lia꞉yo꞉ asugo꞉ modo꞉ ko꞉lo꞉ nodolo꞉.
27486	ACT 14:3	A꞉la꞉fo꞉ko꞉lo꞉ Fol dia꞉ Banabas dia꞉yo꞉ amisa꞉n a꞉namio꞉ ho꞉leno꞉ modo꞉ siliki, Alana꞉ wiya iliki, to mano꞉ halale wida꞉len. A꞉la꞉ma꞉lo꞉ Godeya꞉lo꞉ kanulu alifa꞉ tolo꞉ widab a꞉no꞉ nolba꞉yo꞉ hendelelo꞉b a꞉la꞉bo꞉ba꞉kiyo꞉, Alana꞉yo꞉ a꞉la꞉mo꞉wo꞉ halaido꞉wo꞉ dimiabiki, a꞉la꞉ma꞉yo꞉ molo ha꞉na꞉no꞉wo꞉ ko꞉li ko꞉lilo꞉ dimido꞉.
27488	ACT 14:5	A꞉la꞉ta꞉ga꞉ Yu kalu nol o꞉lia꞉ Yu kaluma nol o꞉lia꞉ a꞉la꞉ta꞉ga꞉ ini misa꞉ kalu o꞉lia꞉yo꞉ kegenefo꞉liki nenelo꞉ ko꞉lo꞉, iliyo꞉ Fol dia꞉ Banabas dia꞉yo꞉ hida꞉yo꞉ ko꞉li ko꞉lilo꞉ dimia꞉no꞉ a꞉laki, uwa꞉ agoda꞉sa꞉ga꞉ sana soma꞉no꞉ saefa꞉.
27492	ACT 14:9	Kalu a꞉no꞉ Fol elo꞉ Godeya꞉ to man widab a꞉no꞉ dinafa da꞉dabiki, Fol eyo꞉ e sikudu ba꞉da꞉ga꞉, kalu e amio꞉ tilidabuwo꞉ alabo꞉lo꞉b a꞉la꞉asula꞉sa꞉ga꞉, kalu o꞉mo꞉wo꞉ ogolo ho꞉le sa꞉laki, “Ge dasi kagama!” A꞉la꞉sa꞉labiki kalu giliga꞉sen a꞉no꞉ tiyabala꞉sa꞉ga꞉, sia꞉len.
27494	ACT 14:11	Kalu kegeo꞉ a꞉ma꞉yo꞉ Fol elo꞉ dimidab a꞉no꞉ ba꞉da꞉sa꞉ga꞉, Likonia to egele nenelaki sagalaki ho꞉le sio꞉, “Gode a꞉la꞉ nowo꞉, kalu do꞉mo꞉le fa꞉la꞉dota꞉ga꞉, nilo꞉ us wena mio꞉ ko꞉lo꞉lab!” a꞉la꞉sio꞉.
27495	ACT 14:12	A꞉la꞉fo꞉ko꞉lo꞉ iliyo꞉ Banabaso꞉ “Sus” wikilo꞉ a꞉la꞉ta꞉ga꞉ Fol e towo꞉ wala sa꞉lab ko꞉lo꞉ e “Ha꞉mis” wikilo꞉.
27496	ACT 14:13	Sus gulugulula꞉sen a a꞉no꞉, amisa꞉n a꞉no꞉ ilif tolo꞉ ha꞉la꞉ya elen ko꞉lo꞉ Sus godemo꞉lo꞉ bobalo꞉ so꞉mia꞉sen kalu a꞉ma꞉yo꞉, kao de o꞉lia꞉ mamo o꞉lia꞉yo꞉ dia꞉ya꞉ga꞉, amisa꞉n toga difa꞉. Mo꞉wo꞉ iliyo꞉ Fol dia꞉ Banabas dia꞉ma꞉ wi wabudaki, somia꞉no꞉ asulaki go꞉.
27497	ACT 14:14	Ko꞉sega Fol dia꞉ Banabas dia꞉yo꞉ ililo꞉ dimidama꞉nigab a꞉no꞉ da꞉da꞉sa꞉ga꞉, iliyo꞉ ka ta꞉foma꞉kiyo꞉, a꞉la꞉ma꞉yo꞉ so꞉g ko꞉lo꞉ a꞉no꞉ bidila꞉sa꞉ga꞉, kalu kegeo꞉lab us a꞉na nai ha꞉na꞉ga꞉, a꞉na halale sio꞉,
27500	ACT 14:17	Ko꞉sega kaluka꞉isaleyo꞉ e hendele alabo꞉lo꞉b a꞉la꞉bo꞉ asuluma꞉kiyo꞉, eyo꞉ man nafale dimida꞉len. Eyo꞉ ho꞉no꞉ timina꞉ki dimia꞉sen a꞉la꞉ta꞉ga꞉ egelo꞉ amio꞉ fowo꞉ ho꞉len enedo꞉leya helema꞉ki dimia꞉sen. A꞉la꞉ta꞉ga꞉ giliyo꞉ dia꞉sa꞉ga꞉ nab amio꞉, gio꞉ sagalo꞉wo꞉ alan doma꞉ki ta꞉fo꞉len.” Fol eyo꞉ a꞉la꞉sio꞉.
27502	ACT 14:19	Tif amio꞉, Yu kalu Aikoniumdo꞉ seno꞉ a꞉la꞉ta꞉ga꞉ Antio꞉gdo꞉ seno꞉ ya꞉sia꞉sa꞉ga꞉, Lista a꞉na fa꞉la꞉dota꞉ga꞉yo꞉, kaluka꞉isale kegeo꞉ a꞉no꞉ digene alitabiki, iyo꞉ Fol emo꞉wo꞉ gadia꞉sa꞉ga꞉, uwa꞉ agodo꞉ ko꞉lo꞉ e sowab a꞉la꞉asulaki, do꞉mo꞉wo꞉ susululia꞉ga꞉, amisa꞉n ha꞉la꞉ya sandifo꞉.
27503	ACT 14:20	Ko꞉sega tilidabu kaluka꞉isale iyo꞉ ya꞉sa꞉ga꞉, e banagalilia꞉tabiki, Fol e a꞉ma꞉la꞉ dasilia꞉ga꞉, amisa꞉n usa a꞉ma꞉la꞉ ane. A꞉la꞉ta꞉ga꞉ o꞉g a꞉no꞉ a꞉naka alita꞉ga꞉, a꞉la꞉yo꞉ amisa꞉n a꞉no꞉ ta꞉ta꞉sa꞉ga꞉, Debe amisa꞉na ha꞉na꞉ni ane.
27506	ACT 14:23	Amisa꞉n a꞉la꞉lo꞉ ane a꞉namio꞉, Fol dia꞉ Banabas dia꞉yo꞉ tilidabu kaluka꞉isalelo꞉ bo꞉fo꞉mela꞉no꞉wo꞉ misa꞉ kalu a꞉na da꞉fe alifa꞉ ko꞉lo꞉ Alana꞉do꞉ tilidabu kaluka꞉isale a꞉no꞉ Alana꞉yo꞉ bo꞉fo꞉melea꞉ki, ma꞉no꞉ mo꞉naki, Godemo꞉ dulugu salifa꞉.
27512	ACT 15:1	Fol dia꞉ Banabas dia꞉yo꞉ Antio꞉g a꞉na sen amio꞉, Yudia kalu nolo꞉ ya꞉sa꞉ga꞉, tilidabu kaluka꞉isale o꞉mo꞉wo꞉ a꞉la꞉walasio꞉, “Mosesa꞉ ele saefa꞉ a꞉no꞉ mo꞉kuduha꞉naki, do꞉go꞉fo꞉ mo꞉hege gedealega, Godeya꞉yo꞉ giyo꞉ a꞉ma꞉la꞉bo꞉ mo꞉gasilia꞉ib,” a꞉la꞉liki wido꞉.
27513	ACT 15:2	Fol dia꞉ Banabas dia꞉yo꞉ to a꞉no꞉ dabu amio꞉, mo꞉sagalabiki, egelebo꞉ towa꞉yo꞉ kega꞉la꞉ga꞉, halaido꞉ nenelo꞉. A꞉la꞉fo꞉ko꞉lo꞉ sa꞉s amilo꞉ tilidabu kaluka꞉isale iyo꞉ Fol dia꞉ Banabas dia꞉yo꞉ a꞉la꞉ta꞉ga꞉ tilidabu kalu nolo꞉lo꞉ Ya꞉lusalem ha꞉na꞉ga꞉, iliga꞉felo꞉ kalu o꞉lia꞉ sa꞉sdo꞉ bo꞉fo꞉lowan kalu nol o꞉lia꞉yo꞉, hida꞉yo꞉ a꞉no꞉ dinafama꞉ hamana꞉ki, a꞉na da꞉feyo꞉.
27514	ACT 15:3	Tilidabu kaluka꞉isale a꞉ma꞉yo꞉ iyo꞉ Ya꞉lusalem a꞉na iliga꞉tabiki ha꞉nakiyo꞉, iyo꞉ Fonisia hen o꞉lia꞉ Samalia hen o꞉lia꞉ a꞉na tinia꞉li ha꞉naki, iliyo꞉ tilidabu kaluka꞉isale nol o꞉mo꞉wo꞉ Yu kaluka꞉isalema iyo꞉ asugo꞉ ho꞉gi nodola꞉sa꞉ga꞉, Ya꞉su amilo꞉ tilidabu a꞉no꞉ imo꞉wo꞉ wida꞉li ane ko꞉lo꞉ to a꞉no꞉ da꞉da꞉sa꞉ga꞉ sagalo꞉ alan dowo꞉.
27516	ACT 15:5	To a꞉no꞉ da꞉da꞉sa꞉ga꞉, Fa꞉lisi amilo꞉ Ya꞉su tilidabu kalu nolo꞉ dasila꞉sa꞉ga꞉ a꞉la꞉sio꞉, “Yu kaluka꞉isalema tilida꞉dab a꞉ma꞉yo꞉ Mosesa꞉ ele saefa꞉ a꞉no꞉ kudu ha꞉na꞉sa꞉ga꞉, iyo꞉ do꞉go꞉fo꞉ hege gedea꞉bi.”
27523	ACT 15:12	Kaluka꞉isale kegeo꞉ a꞉no꞉ tambo hela꞉ta꞉ga꞉, da꞉da꞉li sabikiyo꞉, Fol dia꞉ Banabas dia꞉yo꞉, Yu kaluka꞉isalema usamio꞉ Godeya꞉lo꞉ molo ha꞉na꞉no꞉ a꞉la꞉mo꞉lo꞉ dimidama꞉kilo꞉ dimi a꞉no꞉ a꞉la꞉ma꞉yo꞉ dimido꞉ ko꞉lo꞉ imo꞉ malolo꞉ me.
27533	ACT 15:22	To a꞉no꞉ nenela꞉sa꞉ga꞉ saitakiyo꞉, iliga꞉felo꞉ kaluwo꞉lo꞉, sa꞉sdo꞉ bo꞉fo꞉lowan kaluwo꞉lo꞉, sa꞉s kaluka꞉isale tambo kegeo꞉ iliyo꞉, Fol dia꞉ Banabas dia꞉lo꞉ Antio꞉gdo꞉ ha꞉na꞉no꞉wo꞉, kalu nolo꞉ da꞉feyo꞉. Kalu nowo꞉ Yuda꞉s Basabas, nowo꞉ Sailas ko꞉lo꞉ kalu a꞉la꞉ we, tilidabu kaluka꞉isalelo꞉ bo꞉fo꞉lowan ko꞉lo꞉ elen.
27536	ACT 15:25	A꞉la꞉fo꞉ko꞉lo꞉ nio꞉ kegea꞉sa꞉ga꞉, towo꞉ imilig dia꞉ta꞉ga꞉, ni o꞉lia꞉lo꞉ ha꞉fo꞉lo꞉ disa꞉ kaluwo꞉ Fol dia꞉ Banabas dia꞉yo꞉ da꞉feyo꞉. A꞉la꞉ta꞉ga꞉ kalu nolo꞉ a꞉la꞉ gasa mena꞉ki da꞉fea꞉sa꞉ga꞉, gilo꞉wa iliga꞉to꞉l.
27546	ACT 15:35	Ko꞉sega Fol dia꞉ Banabas dia꞉yo꞉ a꞉naka o꞉siliki, a꞉la꞉ o꞉lia꞉ kalu nol o꞉lia꞉ma꞉yo꞉ Alana꞉ to mano꞉ wida꞉len.
27547	ACT 15:36	Ho꞉len nolo꞉ ta꞉ta꞉sa꞉ga꞉yo꞉, Fol eyo꞉ Banabasbo꞉wo꞉ a꞉la꞉sio꞉, “Na꞉no꞉ a꞉ma꞉la꞉ amisa꞉n ko꞉li ko꞉lilo꞉ Alana꞉ to mando꞉ wida꞉i anelo꞉ a꞉namio꞉ ha꞉na꞉ga꞉, iyo꞉ waga dimida꞉li sabele a꞉la꞉liki ba꞉da꞉i ha꞉na꞉nigo꞉l” a꞉la꞉sio꞉.
27548	ACT 15:37	A꞉la꞉sa꞉labiki, Banabas eyo꞉ Yon Mago꞉ tililia꞉ga꞉ ha꞉na꞉no꞉ asulo꞉ ko꞉sega, Fol eyo꞉ Mag e tililiha꞉na꞉no꞉ a꞉la꞉bo꞉ mo꞉asulo꞉, mo꞉wo꞉ tamin amio꞉ ililo꞉ wida꞉i ane amio꞉, Mag e Bafilia hen a꞉namio꞉ a꞉la꞉yo꞉ ta꞉ta꞉ga꞉, nanogo꞉ elo꞉ dia꞉i ha꞉na꞉len a꞉no꞉ kata꞉fo꞉.
27551	ACT 15:40	Ko꞉sega Fol eyo꞉ Sailaso꞉ tililia꞉ga꞉, ha꞉nabikiyo꞉, tilidabu kaluka꞉isaleya꞉yo꞉ a꞉la꞉mo꞉wo꞉ Godeya꞉yo꞉ asuwa꞉foma꞉kiyo꞉ dulugu sa꞉la꞉sa꞉ga꞉, a꞉la꞉yo꞉ ane.
27555	ACT 16:3	Fol eyo꞉ Timotiyo꞉ e tililia꞉ sia꞉mela꞉no꞉ asulo꞉ ko꞉lo꞉ ene do꞉go꞉fo꞉ hege gede alifa꞉. Mo꞉wo꞉ Yu kaluka꞉isale amisa꞉n a꞉namilo꞉ sen a꞉ma꞉yo꞉ Timotiya꞉ iyayo꞉ Gilig kalu a꞉la꞉asulo꞉.
27558	ACT 16:6	Godeya꞉ Mamaya꞉yo꞉ Fol o꞉lia꞉ e o꞉lia꞉lo꞉ sia꞉sen kalu iyo꞉ Esia hen amio꞉ mano꞉ walama꞉no꞉wo꞉ ka꞉laki go꞉. A꞉la꞉fo꞉ko꞉lo꞉ iyo꞉ ha꞉na꞉siakiyo꞉, Filigia hen o꞉lia꞉ Galesia hen us a꞉namio꞉ tigini ane.
27561	ACT 16:9	A꞉na silikiyo꞉, nulu amio꞉ Fol eyo꞉ ho꞉le ba꞉dakiyo꞉, Masedonia kalu nowo꞉ ene hena kagafo꞉liki, Fol e mena꞉ki a꞉la꞉sio꞉, “Ge Masedonia ya꞉sa꞉ga꞉, nio꞉ asuwa꞉fa꞉ni mena” a꞉la꞉liki susiabiki ba꞉ba꞉.
27562	ACT 16:10	Fol elo꞉ ho꞉le ba꞉dab a꞉no꞉ nimo꞉wo꞉ sa꞉labikiyo꞉, Godeya꞉ mano꞉ nio꞉ a꞉na walama꞉ki sa꞉lab a꞉la꞉ asulakiyo꞉, nio꞉ Masedonia ha꞉na꞉niki, wigibo a꞉naka dimadali.
27564	ACT 16:12	Nio꞉ a꞉na fa꞉la꞉dota꞉ga꞉, hena ha꞉na꞉la꞉ga꞉, Filibai a꞉na fa꞉la꞉dowo꞉. Filibai a꞉no꞉ Masedonia hen amilo꞉ amisa꞉n alano꞉ e. Tamin amio꞉ Lom kaluwa꞉ amisa꞉n a꞉no꞉ bo꞉fo꞉len. Nio꞉ ho꞉len nowo꞉ a꞉na sen.
27566	ACT 16:14	To nililo꞉ widabdo꞉ da꞉da꞉len ka꞉isale nowo꞉ wiyo꞉ Lidia. Ka꞉isale we Taiataila amisa꞉n ga ko꞉lo꞉ helebeso꞉g ho꞉mo꞉solo꞉ nafalelo꞉ kililia꞉seno꞉ o꞉m ko꞉lo꞉ e Godeya꞉ wilo꞉ wabulu sa꞉la꞉seno꞉ e. Alana꞉yo꞉ ga a꞉ma꞉ asugo꞉ kolaitabikiyo꞉, Fol elo꞉ to widab a꞉no꞉ tilidabu.
27569	ACT 16:17	Ga we Foldo꞉ ni kudu ya꞉ga꞉ yakiyo꞉, towo꞉ halale sa꞉laki, “Kalu i we, Gode Iwalulo꞉ a꞉laba꞉ Ene nanog dian kalu wema꞉yo꞉, gilo꞉ a꞉ma꞉la꞉do꞉ gasilia꞉b man a꞉no꞉ ko꞉lo꞉ wida꞉i yab” a꞉la꞉sio꞉.
27570	ACT 16:18	Ga a꞉ma꞉yo꞉ ho꞉len modo꞉ amio꞉ a꞉la꞉sa꞉la꞉li ya꞉len ko꞉lo꞉, Fol e mo꞉bea꞉sa꞉ga꞉, nodolakiyo꞉ mama mogago꞉mo꞉wo꞉ towo꞉ a꞉la꞉sio꞉, “Niyo꞉ Ya꞉su Kelisowa꞉ wi halaido꞉ a꞉na ilikiyo꞉, ge ga we ta꞉fo꞉ hamana!” A꞉la꞉sa꞉labikiyo꞉, wigibo a꞉naka mama mogago꞉ e amilo꞉ elen a꞉no꞉ ta꞉fo꞉gane.
27571	ACT 16:19	Madali nanogdo꞉ dian ga o꞉lo꞉ biso꞉ a꞉ma꞉yo꞉ wa꞉kabiyo꞉ iliyo꞉ moleyo꞉ mo꞉dia꞉nigo꞉bo꞉lo꞉b a꞉la꞉asulaki, iliyo꞉ Fol dia꞉ Sailas dia꞉yo꞉ ta꞉lia꞉sa꞉ga꞉, amisa꞉n kalulo꞉ kegea꞉sen a꞉na susululia꞉ga꞉, Loma꞉ mo꞉walilabdo꞉ da꞉dan kalulo꞉wa ta꞉takiyo꞉ a꞉la꞉sio꞉, “Kalu a꞉la꞉ we Yu kalu ko꞉lo꞉ nili amisa꞉n wenamio꞉ mogago꞉ dimida꞉lab.
27577	ACT 16:25	Nulu us amio꞉, Fol dia꞉ Sailas dia꞉yo꞉ Godemo꞉ dulugu sa꞉la꞉liki, gisalo꞉wo꞉ mola꞉labiki, dibolo kalu nolo꞉ da꞉da꞉li sen.
27579	ACT 16:27	Bo꞉fo꞉lowan kaluwo꞉ si kagayaki ba꞉ba꞉ amio꞉, dibolo ayo꞉ togo꞉ kolalifelo꞉wa ba꞉da꞉ga꞉, eyo꞉ dibolo kalu tambo dalaido꞉wele a꞉la꞉asulakiyo꞉ e helebesiyo꞉ dia꞉sa꞉ga꞉, enena꞉ma꞉la꞉ sana soma꞉nigabiki, Fol eyo꞉ towo꞉ halale sa꞉lakiyo꞉, “Nio꞉ tambo o꞉so꞉l ko꞉lo꞉, ge go꞉no꞉n a꞉ma꞉la꞉yo꞉ mogagila꞉so꞉bo!”
27581	ACT 16:29	Dibolo alo꞉ bo꞉fo꞉lowan kaluwa꞉yo꞉ deyo꞉ dolia꞉ mena꞉ki ho꞉ida꞉sa꞉ga꞉yo꞉, e bo꞉i ha꞉na꞉sa꞉ga꞉ Fol dia꞉ Sailas dia꞉lo꞉wa bibisoda꞉liki tulu ali.
27584	ACT 16:32	A꞉la꞉fo꞉ko꞉lo꞉ Fol dia꞉ Sailas dia꞉ma꞉yo꞉ Ya꞉su Alana꞉ mano꞉ e o꞉lia꞉, e ayamilo꞉ sa꞉sen tambo o꞉lia꞉mo꞉wo꞉ wido꞉.
27588	ACT 16:36	A꞉la꞉fo꞉ko꞉lo꞉ dibolo alo꞉ bo꞉fo꞉lowan kaluwa꞉yo꞉ Fo꞉lbo꞉wo꞉ towo꞉ saga꞉takiyo꞉ a꞉la꞉sio꞉, “Ga꞉go꞉ sili alita꞉bika꞉ a꞉la꞉li saga꞉fo꞉ ko꞉lo꞉ ga꞉go꞉ sagala꞉liki hamana.”
27589	ACT 16:37	Ko꞉sega Fola꞉yo꞉ a꞉ma꞉la꞉bo꞉ a꞉la꞉sio꞉, “Na꞉no꞉ Lom kalu ko꞉sega iliyo꞉ mo꞉mo꞉walilaki, na꞉no꞉ kaluka꞉isale siwa꞉la yame tanda꞉ya꞉sa꞉ga꞉, dibolowa to꞉lolo꞉ ko꞉lo꞉ o꞉go꞉ na꞉no꞉ iliyo꞉ wo꞉no꞉le sili alifa꞉no꞉ asulab ko꞉sega na꞉no꞉ a꞉la꞉bo꞉ mo꞉dimidama꞉no꞉. Inino꞉ ya꞉sa꞉ga꞉, na꞉no꞉ ha꞉sa tililia꞉ga꞉ ha꞉la꞉ ta꞉talega, na꞉no꞉ a꞉na ha꞉na꞉no꞉.”
27590	ACT 16:38	Da꞉la꞉di kaluwa꞉yo꞉ ha꞉na꞉sa꞉ga꞉, Fol elo꞉ to sa꞉lab a꞉no꞉ Loma꞉ mo꞉walilabdo꞉ da꞉dan kalu imo꞉wo꞉ sa꞉labikiyo꞉, a꞉la꞉yo꞉ Lom kaluka꞉ a꞉la꞉do꞉ sio꞉ a꞉no꞉ iyo꞉ da꞉da꞉sa꞉ga꞉, tagi dowo꞉.
27593	ACT 17:1	Fol dia꞉ Sailas dia꞉yo꞉ ha꞉nakiyo꞉, Amfibolis amisa꞉n o꞉lia꞉ Abolonia amisa꞉n a꞉no꞉lo꞉ tinia꞉li ha꞉na꞉ga꞉, Tesalonaika amisa꞉n a꞉na fa꞉la꞉dowo꞉. Amisa꞉n a꞉namio꞉, Yu kaluwa꞉lo꞉ tolo꞉ wida꞉sen ayo꞉ elen ko꞉lo꞉, Fol elo꞉ dimidan o꞉leaumbo꞉, e a꞉na ha꞉na꞉sa꞉ga꞉, Godeya꞉ towo꞉ wida꞉len. So꞉go꞉ agelo꞉ otalen a꞉namilo꞉, Ha꞉fo꞉lo꞉ Dowa꞉sen ho꞉len a꞉no꞉ tambo eyo꞉ Yu kaluwa꞉lo꞉ tolo꞉ wida꞉sen ayamio꞉ ha꞉na꞉sa꞉ga꞉, Godeya꞉ to tamin amilo꞉ sa꞉sa꞉lo꞉ a꞉no꞉ e a꞉fanda wido꞉.
27595	ACT 17:3	Tamin amilo꞉ dinali sa꞉lan ililo꞉ sa꞉sa꞉lo꞉ a꞉namio꞉ Godeya꞉lo꞉ Da꞉feyo꞉ Kalu e mada nagalo꞉ dia꞉la꞉ga꞉ soma꞉ib ko꞉sega e a꞉ma꞉la꞉ dasima꞉ib a꞉la꞉sa꞉sa꞉lo꞉ ko꞉lo꞉ wido꞉. A꞉la꞉fo꞉ko꞉lo꞉ kalu nilo꞉ mando꞉ wido꞉l Ya꞉su we, Godeya꞉lo꞉ Da꞉feyo꞉ Kaluwo꞉ e. Fol eyo꞉ a꞉la꞉wido꞉.
27596	ACT 17:4	Fol elo꞉ to sa꞉lab a꞉no꞉ da꞉da꞉sa꞉ga꞉, Yu kalu nolo꞉ a꞉la꞉ta꞉ga꞉ Gilik kalu Godemo꞉lo꞉ wabuda꞉sen modo꞉le, a꞉la꞉ta꞉ga꞉ amisa꞉n misa꞉ ka꞉isale modo꞉ ko꞉lo꞉ iyo꞉ asulo꞉ nodola꞉sa꞉ga꞉, a꞉la꞉ o꞉lia꞉ a꞉dowo꞉.
27597	ACT 17:5	Ko꞉sega Yu misa꞉ kalu iliyo꞉ Fol dia꞉ Sailas dia꞉mo꞉wo꞉ alan mobeaki gadia꞉sa꞉ga꞉, iyo꞉ amisa꞉ndo꞉ kegea꞉sen henamilo꞉ kalu bo꞉bo꞉gedo gadia꞉sen a꞉no꞉ kegea꞉sa꞉ga꞉ gadima꞉kiyo꞉, towo꞉ digini sio꞉. Iliyo꞉ to a꞉no꞉ iligi dabu ko꞉lo꞉, Fol dia꞉ Sailas dia꞉yo꞉ ta꞉lia꞉niki, Yesan aya ane.
27598	ACT 17:6	Ko꞉sega kalu a꞉la꞉ a꞉no꞉ mo꞉ba꞉dabikiyo꞉, iliyo꞉ Yesan o꞉lia꞉ tilidabu kalu nol a꞉namilo꞉ elen a꞉no꞉ susulu sa꞉la꞉la꞉sa꞉ga꞉, gumiti kalu imo꞉ mo꞉walilima꞉ki tililia꞉ yakiyo꞉, a꞉la꞉sio꞉, “Fol dia꞉ Sailas dia꞉yo꞉ amisa꞉n tambo amio꞉ mogago꞉wo꞉ dimida꞉li sia꞉len ko꞉lo꞉, o꞉go꞉ a꞉la꞉yo꞉ amisa꞉n wena fa꞉la꞉dowabi, Yesan e aya tililia꞉gane ko꞉lo꞉ sab. I a꞉no꞉ tambo Ya꞉su e misa꞉ kalu a꞉la꞉liki sa꞉lakiyo꞉, Loma꞉ misa꞉ alan Sisaya꞉ ene ele difa꞉yo꞉ iyo꞉ tambo o꞉go꞉so꞉.”
27602	ACT 17:10	O꞉g nulu a꞉namio꞉, tilidabu kalu iyo꞉ Fol dia꞉ Sailas dia꞉yo꞉ Belia a꞉na iliga꞉tabiki, a꞉la꞉yo꞉ ha꞉na꞉sa꞉ga꞉ Belia amisa꞉na fa꞉la꞉dowa꞉ta꞉ga꞉yo꞉, Yu kaluwa꞉lo꞉ tolo꞉ wida꞉sen a a꞉na ane.
27603	ACT 17:11	Belia kaluka꞉isale iyo꞉, Tesalonaika kaluka꞉isale i o꞉le o꞉ngo꞉ma ko꞉lo꞉ Belia kaluka꞉isaleya꞉ kufa꞉ uso꞉ kolaifa꞉ ko꞉lo꞉ iyo꞉ Fola꞉ to sa꞉lab a꞉no꞉ sagalo꞉ da꞉dabiki, iliyo꞉ Fol e towo꞉ hendele sa꞉labele a꞉la꞉li, Godeya꞉ towo꞉ ho꞉leno꞉ tambo agelaliki, dinafa alobana asulo꞉.
27605	ACT 17:13	Ko꞉sega Yu kalu Tesalonaikalo꞉ sen a꞉ma꞉yo꞉, Fol eyo꞉ Godeya꞉ towo꞉ Belia a꞉na widab a꞉la꞉ asulaki, iyo꞉ a꞉na ya꞉sa꞉ga꞉, amisa꞉n kaluka꞉isaleyo꞉ Fol dia꞉mo꞉wo꞉ kulufema꞉ki towo꞉ ko꞉li ko꞉lilo꞉ digini me.
27606	ACT 17:14	Wigibo a꞉namio꞉, tilidabu kaluka꞉isale iliyo꞉ Folo꞉ so꞉lu ho꞉n aniba iliga꞉fo꞉, ko꞉sega Sailas dia꞉ Timoti dia꞉yo꞉ mo꞉hanaki, ka sen.
27607	ACT 17:15	Kalu nol Fol elo꞉ tililia꞉ga꞉lo꞉ Atens a꞉namilo꞉ ane a꞉no꞉, a꞉ma꞉la꞉ yabi, eyo꞉ Sailas dia꞉ Timoti dia꞉yo꞉ elo꞉ amio꞉ mada bo꞉bo꞉ge mena꞉ki saga꞉fo꞉.
27608	ACT 17:16	Fol e a꞉la꞉yo꞉ yasila꞉liki, Atens a꞉na silikiyo꞉, e amisa꞉n usamilo꞉ madali gode dimido꞉ a꞉no꞉ modo꞉ ba꞉da꞉sa꞉ga꞉, kele asulakiyo꞉ hida꞉yo꞉ alan dowo꞉.
27610	ACT 17:18	Fol eyo꞉ Ya꞉su ko꞉lo꞉ sowa꞉sa꞉ga꞉lo꞉ a꞉ma꞉lo꞉ dasi a꞉no꞉ ko꞉lo꞉ wida꞉len amio꞉, widan kalu nolo꞉ Ebikuli man a꞉no꞉ kuduha꞉na꞉sen a꞉la꞉ta꞉ga꞉ nolo꞉ Sitoig man o꞉lo꞉ kuduha꞉na꞉sen ko꞉lo꞉ kalu iyo꞉ ya꞉sa꞉ga꞉, Fol o꞉lia꞉yo꞉ towo꞉ kego꞉. A꞉la꞉ta꞉ga꞉ nolba꞉yo꞉ a꞉la꞉dabuba꞉ba꞉, “Kalu we o꞉ngo꞉malo꞉ o꞉ngo꞉ to sa꞉lab ko꞉lo꞉, to o꞉bo꞉ngo꞉ ko꞉lo꞉ sa꞉laba?” A꞉la꞉ta꞉ga꞉ kalu nolba꞉yo꞉, “E ho꞉gi godeya꞉ mano꞉ nowo꞉ a꞉dia꞉yaki widab” a꞉la꞉sio꞉.
27611	ACT 17:19	Iliyo꞉ Fol e tililia꞉ ha꞉na꞉sa꞉ga꞉, Aleobagus hen a꞉namio꞉, kaunsil kalulo꞉ kegeab us a꞉na tililia꞉ tina꞉ga꞉, emo꞉wo꞉ a꞉la꞉dabu ba꞉ba꞉, “Gilo꞉ man ho꞉gi wido꞉ a꞉no꞉ nimo꞉wo꞉ walama꞉nigaya?
27614	ACT 17:22	A꞉la꞉fo꞉ko꞉lo꞉ Fol e kaunsil ili tolo꞉ nenela꞉lab usa dasilia꞉ga꞉ kagayaki a꞉la꞉sio꞉, “Atens kalu giyo꞉, ni ba꞉ba꞉ amio꞉, gulugululan gililo꞉wo꞉ ko꞉li ko꞉lilo꞉ ko꞉lo꞉lab.
27624	ACT 17:32	Iyo꞉ kalu sowo꞉ a꞉ma꞉la꞉ dasi a꞉la꞉do꞉ sa꞉lab a꞉no꞉ da꞉dakiyo꞉, nolba꞉yo꞉ Folo꞉ dio꞉ge sio꞉ ko꞉sega nolba꞉yo꞉ “To a꞉no꞉ nio꞉ a꞉da꞉ba꞉no꞉ ko꞉lo꞉ wa꞉ka sama” a꞉la꞉sio꞉.
27625	ACT 17:33	A꞉la꞉ dimida꞉sa꞉ga꞉, Fol e Aleobagus kanisolo꞉ kegea꞉sen hen a꞉no꞉ a꞉na ta꞉fo꞉gane.
27626	ACT 17:34	Fol elo꞉ to wido꞉ a꞉no꞉ kalu nolo꞉ tilidabu ko꞉lo꞉ Ya꞉su kudu ane. Tilidabu kalu nowo꞉ Dionisius, Aleobagus kaunsil kalu nowo꞉ e. A꞉la꞉ta꞉ga꞉ nowo꞉ ga Damalis, a꞉la꞉ta꞉ga꞉ kaluka꞉isale nolo꞉lo꞉ tilidabu.
27627	ACT 18:1	Tif amio꞉, Fol e Atens amisa꞉no꞉ ta꞉ta꞉ga꞉, Kolin amisa꞉na ane.
27629	ACT 18:3	A꞉la꞉yo꞉ helebeso꞉g alo꞉ diano꞉ a꞉la꞉ma꞉ dubia꞉sen a꞉la꞉ta꞉ga꞉ Fol elo꞉ nanogo꞉ o꞉leo꞉ngo꞉ dian kalu ko꞉lo꞉ e a꞉la꞉ o꞉lia꞉ siliki, nanog a꞉no꞉ ko꞉lo꞉ dia꞉len.
27630	ACT 18:4	Ha꞉fo꞉lo꞉ Dowan ho꞉leno꞉ tambo amio꞉, Fol eyo꞉ Yu kaluwa꞉lo꞉ tolo꞉ wida꞉sen aya ha꞉na꞉sa꞉ga꞉, Yu kalu o꞉lia꞉ Gilig kalu o꞉lia꞉yo꞉ asugo꞉ nodoma꞉kiyo꞉, towo꞉ wido꞉.
27631	ACT 18:5	Sailas dia꞉ Timoti dia꞉yo꞉ Masedonia hena a꞉la꞉ta꞉ga꞉ Fol elo꞉wa fa꞉la꞉dowabikiyo꞉, e nanog nowo꞉ mo꞉diaki, ho꞉leno꞉ tambo Yu kaluka꞉isalemo꞉wo꞉ man wida꞉likiyo꞉, Godeya꞉lo꞉ Da꞉feyo꞉ kaluwo꞉, Ya꞉su Keliso eka꞉ a꞉la꞉liki wida꞉len.
27632	ACT 18:6	Ko꞉sega Yu kalu iyo꞉ to elo꞉ wido꞉ a꞉no꞉ gola ba꞉daki, e dio꞉ge sa꞉labikiyo꞉, Fol eyo꞉ so꞉g sa꞉ga꞉lo꞉ enedo꞉ a꞉no꞉ duda꞉sa꞉ga꞉ hena꞉mu ko꞉lo꞉ babedo꞉ a꞉no꞉ fifilaki a꞉la꞉sio꞉, “Gio꞉ falasilalega, ginido꞉ hala dimido꞉ a꞉na auma꞉ib. Ne amio꞉ halayo꞉ aundo꞉ma ko꞉lo꞉ ne ga꞉li doma꞉no꞉. O꞉g wena a꞉la꞉ta꞉ga꞉yo꞉, ne Yu kaluka꞉isalema imo꞉wo꞉ towo꞉ walama꞉ ha꞉na꞉nigo꞉l.”
27633	ACT 18:7	A꞉la꞉sa꞉la꞉sa꞉ga꞉yo꞉, Fol e tolo꞉ wida꞉sen ayo꞉ ta꞉ta꞉sa꞉ga꞉, a anib amilo꞉ Titius Yastus ene aya ti ane. Kalu a꞉no꞉ Godeya꞉ wiyo꞉ dulugu sa꞉la꞉sen ko꞉lo꞉ Folo꞉ e o꞉lia꞉ sen.
27635	ACT 18:9	Nulu no amio꞉, Fol e ho꞉le badakiyo꞉, Alana꞉yo꞉ emo꞉wo꞉ a꞉la꞉sio꞉, “Ge mano꞉ walama꞉no꞉wo꞉, tagilakiyo꞉ eda꞉so꞉bo. Walafo꞉ ko꞉ dofo꞉lubi.
27637	ACT 18:11	A꞉la꞉fo꞉ko꞉lo꞉ Fol e donayo꞉ imilig a꞉la꞉ta꞉ga꞉ ele do꞉go꞉fela꞉fo꞉wo꞉ Kolin amisa꞉n a꞉naka siliki, Godeya꞉ mano꞉ imo꞉wo꞉ a꞉na wida꞉len.
27638	ACT 18:12	Galio e Akaya hen a꞉namio꞉ gamani kalu dowakiyo꞉, Yu kalu nolo꞉ kegeakiyo꞉, Fol e ta꞉lia꞉sa꞉ga꞉, mo꞉walilima꞉ni ane.