26993	ACT 1:1	Tiofela꞉s ge, Ya꞉suwa꞉lo꞉ tamin amilo꞉ mo꞉mo꞉da wido꞉wo꞉lo꞉, dimido꞉wo꞉lo꞉, a꞉la꞉ta꞉ga꞉ Hebenelo꞉ a꞉ma꞉la꞉do꞉ ane a꞉no꞉, Lug ne tamin amio꞉ gemo꞉ sa꞉sa꞉liga꞉fo꞉. Godeya꞉yo꞉ Ya꞉suwo꞉ Hebene halonamio꞉ semo꞉ tililia꞉ ha꞉naki, Eyo꞉ Enedo꞉ iliga꞉felema꞉no꞉ kaluwo꞉ da꞉fea꞉sa꞉ga꞉, imo꞉wo꞉ asuluma꞉no꞉ to nowo꞉ Mamaya꞉ halaido꞉ a꞉ma꞉yo꞉ sio꞉.
27003	ACT 1:11	Kalu a꞉la꞉ma꞉yo꞉ imo꞉wo꞉ a꞉la꞉sio꞉, “Ga꞉lili kalu gio꞉, madali akin amio꞉ alolo bo꞉fo꞉leko꞉ mo꞉wo꞉ ha꞉? Ya꞉su gi o꞉lia꞉lo꞉ elen ko꞉lo꞉ Godeya꞉ Hebenelo꞉ tilia꞉gane a꞉no꞉, E a꞉ma꞉la꞉ yalikiyo꞉, E Hebenelo꞉ ha꞉nabikilo꞉ ba꞉dab o꞉leaum a꞉ma꞉la꞉yo꞉lo꞉ a꞉la꞉ka mia꞉ib.”
27007	ACT 1:15	Ho꞉len a꞉namio꞉ Ya꞉su amilo꞉ tilidabu kaluka꞉isale agelo꞉wo꞉, do꞉la꞉lowo꞉wo꞉ do꞉la꞉fo꞉ a꞉la꞉ta꞉ga꞉ do꞉la꞉fo꞉ a꞉la꞉. Iyo꞉ kegeneliabiki, Bidayo꞉ usa dasilia꞉ga꞉ kagafo꞉liki, towo꞉ imo꞉wo꞉ a꞉la꞉sio꞉,
27012	ACT 1:20	Bida eyo꞉ towo꞉ wa꞉ka a꞉kudu sa꞉laki, “Gisalo꞉ bugo꞉ amio꞉ a꞉la꞉ dinali sio꞉, ‘Hen elo꞉ a꞉namio꞉ kelego꞉wo꞉ aundo꞉ma doma꞉ib ko꞉lo꞉, kalu imilig nowo꞉lo꞉ a꞉namio꞉ mada mo꞉doma꞉ib.’ A꞉la꞉ta꞉ga꞉ Gisalo꞉ bugo꞉ amio꞉ to nowo꞉ a꞉la꞉sio꞉, ‘Kalu noma꞉yo꞉ nanog elo꞉ dia꞉sen a꞉no꞉ o꞉lika dia꞉ib.’
27013	ACT 1:21	A꞉la꞉fo꞉ko꞉lo꞉ kalu imilig nowo꞉ ni o꞉lia꞉ gasayaki, Ya꞉su a꞉ma꞉la꞉do꞉ dasi a꞉no꞉ eyo꞉ walama꞉ki, niliyo꞉ da꞉fema꞉nigo꞉l. Kalu a꞉no꞉ negeledo꞉ Ya꞉su o꞉lia꞉lo꞉ sia꞉sen a꞉no꞉, Yon elo꞉ ho꞉n amio꞉ to꞉lolo꞉ a꞉la꞉ta꞉ga꞉ mio꞉wo꞉, Ya꞉su elo꞉ Hebenelo꞉ a꞉ma꞉la꞉ anelo꞉ ba꞉ba꞉ a꞉no꞉ ko꞉lo꞉ da꞉fema꞉no꞉” Bida a꞉la꞉sio꞉.
27023	ACT 2:5	Ho꞉len a꞉namio꞉ Yuwa꞉ mando꞉ kudu ha꞉nan kalu nolo꞉ hen ko꞉li ko꞉lilo꞉wa a꞉la꞉ta꞉ga꞉ ya꞉sa꞉ga꞉, Ya꞉lusalem a꞉na sen.
27036	ACT 2:18	Ho꞉len a꞉namio꞉, madali nanogdo꞉ dian kaluka꞉isale i a꞉namio꞉lo꞉ Ni Mamayo꞉ ko꞉go꞉lu alifelema꞉no꞉ ko꞉lo꞉ iyo꞉lo꞉ dinali sa꞉lan kaluwa꞉lo꞉ widan o꞉ngo꞉ doma꞉ib.
27037	ACT 2:19	Niyo꞉ akin halonamio꞉ molo ha꞉na꞉no꞉wo꞉ dimidama꞉no꞉. A꞉la꞉ta꞉ga꞉ henfelo꞉ wiyo꞉lo꞉ a꞉la꞉dimidama꞉no꞉. Ho꞉bo꞉ o꞉lia꞉ de o꞉lia꞉ a꞉la꞉ta꞉ga꞉ de ho꞉mo꞉n alan fa꞉la꞉doma꞉ki dimidama꞉no꞉.
27039	ACT 2:21	Ho꞉len a꞉namio꞉ kaluka꞉isale abeyo꞉ Godeya꞉lo꞉ asuwa꞉foma꞉kilo꞉ tolo꞉ dulugu sa꞉la꞉lab a꞉no꞉, iyo꞉ wa꞉lo꞉ mo꞉diaki, ga꞉li mesea꞉ki ta꞉fa꞉no꞉.”’
27043	ACT 2:25	Taminde amio꞉ Debidiya꞉yo꞉ Ya꞉su amilo꞉ fa꞉la꞉doma꞉ibo꞉ ko꞉lo꞉ asulaki, towo꞉ a꞉la꞉sio꞉, “‘Ho꞉leno꞉ tambowo꞉ Alan E ne o꞉lia꞉ elena ba꞉ba꞉. E ni dagi ililiba iliki, ni asuwa꞉fa꞉ib ko꞉lo꞉ ne mada mo꞉tagima꞉no꞉.
27052	ACT 2:34	Debidi e Hebeneyo꞉ halona mo꞉ane ko꞉sega eyo꞉ a꞉la꞉sio꞉, “‘Godeya꞉yo꞉ ni Alanbo꞉wo꞉ a꞉la꞉sio꞉, Niyo꞉ gis kalu gilo꞉wo꞉ gi ha꞉g amio꞉ semo꞉ dia꞉talikiyo꞉, ge ni dagi ililiba siliki, ne o꞉lia꞉ bo꞉fo꞉lubi.’
27060	ACT 2:42	Ho꞉gi tilidabu kaluka꞉isale iliyo꞉ Iliga꞉felo꞉ kaluwa꞉lo꞉ widab a꞉no꞉ tilida꞉dakiyo꞉, egele dowa꞉sen. A꞉la꞉ta꞉ga꞉ ma꞉no꞉wo꞉ ua sagana꞉likiyo꞉, Yesuwa꞉ asulo꞉ ma꞉no꞉wo꞉lo꞉ ua nakiyo꞉, Godemo꞉ dulugu sa꞉la꞉sen. Iyo꞉ a꞉no꞉ ko꞉lo꞉ dimidakiyo꞉, halaido꞉ dimida꞉len.
27064	ACT 2:46	Ho꞉leno꞉ tambowo꞉ iyo꞉ asulo꞉wo꞉ imilig dia꞉taki, Godeya꞉ malilo꞉ aya kegea꞉sen. Iyo꞉ Yesu asulo꞉ ma꞉no꞉ naki o꞉lia꞉ ma꞉no꞉le nakiyo꞉lo꞉, noma꞉ aya kegea꞉liki a꞉lakiyo꞉, iyo꞉ mo꞉kanulu naki, ma꞉no꞉wo꞉ tambowo꞉ sagala꞉liki na꞉sen.
27065	ACT 2:47	Iliyo꞉ Godeyo꞉ wabuda꞉len a꞉la꞉ta꞉ga꞉ kaluka꞉isale tambowa꞉yo꞉ iyo꞉ nafa dowab a꞉la꞉asulo꞉. Ho꞉leno꞉ tambowo꞉ Godeya꞉yo꞉ tilidabu kalu ho꞉gi nolo꞉ i a꞉na gasalita꞉sen.
27066	ACT 3:1	Ho꞉len no amio꞉, dulugu sa꞉la꞉seno꞉ ofa꞉siyo꞉ asola dowabiki, Bida o꞉lia꞉ Yon o꞉lia꞉yo꞉ Godeya꞉ malilo꞉ aya ha꞉na꞉ni ane.
27086	ACT 3:21	O꞉go꞉ Ya꞉su E Hebeneya ilikiyo꞉, Godeya꞉lo꞉ kelego꞉wo꞉ tambo ho꞉gi fa꞉la꞉doma꞉nigab ho꞉len a꞉no꞉ ko꞉lo꞉ yasisab. Ho꞉len a꞉no꞉ tamin amio꞉ Godeya꞉yo꞉ Enedo꞉ dinali sa꞉lan kaluwa꞉ sama꞉ki, towo꞉ imo꞉ salifa꞉.
27116	ACT 4:25	Nili ma꞉mu Debidi e Gi nanogdo꞉ dian kalu ko꞉lo꞉ Godeya꞉ Mamaya꞉ ene halaido꞉ emo꞉ dimiabiki, Gi to we a꞉na sa꞉sa꞉lo꞉, “‘Henfelo꞉ kaluka꞉isaleyo꞉ waga mada kulufa꞉yabele? Iliyo꞉ Gode o꞉lia꞉ madalilo꞉ babuma꞉no꞉ saitab we, waga nenelabele?
27117	ACT 4:26	Henfelo꞉ amilo꞉ misa꞉ kaluwo꞉ kegea꞉sa꞉ga꞉, Gode o꞉lia꞉ Enedo꞉ Da꞉feyo꞉ Kalu o꞉lia꞉yo꞉ babuma꞉ni dimidaliab.’
27118	ACT 4:27	Go꞉no꞉n towo꞉ bugo꞉ amio꞉ a꞉la꞉sa꞉sa꞉lo꞉ ko꞉lo꞉ o꞉g a꞉namio꞉ Helot o꞉lia꞉ Bontius Bailat o꞉lia꞉ Yuma kalu o꞉lia꞉ Isolael kalu o꞉lia꞉yo꞉ Ya꞉lusalem wena kegea꞉sa꞉ga꞉, Ya꞉su, Gili nanogdo꞉ digalelo꞉ dian kalu e sana soma꞉no꞉wo꞉ togo꞉ kedo꞉. Ya꞉su E Go꞉no꞉n Da꞉feyo꞉ Kalu ko꞉lo꞉ ililo꞉ kegeasa꞉ga꞉lo꞉ dimido꞉ a꞉no꞉ tambo, mo꞉luwo꞉ Go꞉no꞉n asulo꞉ o꞉lia꞉ Go꞉no꞉n halaido꞉ o꞉lia꞉ma꞉ saefa꞉ ko꞉lo꞉ fa꞉la꞉dowo꞉.
27141	ACT 5:13	Ha꞉la꞉ kaluka꞉isale nol a꞉ma꞉yo꞉ iyo꞉ mada nafale a꞉la꞉asulo꞉ ko꞉sega ha꞉la꞉ kaluka꞉isale i a꞉no꞉ tagilaki, i o꞉lia꞉ mo꞉ gasa kegea꞉sen.
27171	ACT 6:1	Ho꞉len a꞉namio꞉ Gode amilo꞉ tilidabu kaluwo꞉ modo꞉ fa꞉la꞉dosdo꞉ ko꞉lo꞉ i us a꞉namio꞉ Gilik tolo꞉ sa꞉lan kaluwa꞉yo꞉, Alam tolo꞉ sa꞉lan kalumo꞉wo꞉ a꞉la꞉sio꞉, “Giliyo꞉ ma꞉no꞉ sagakiyo꞉, ka꞉isale sa꞉ba꞉lo꞉ nilido꞉ a꞉lab a꞉no꞉ mo꞉mia꞉sen” a꞉la꞉sa꞉laki, iyo꞉ towa꞉yo꞉ kego꞉.
27187	ACT 7:2	To elo꞉ dabu ba꞉dab a꞉na, a꞉ma꞉la꞉ sa꞉lakiyo꞉ a꞉la꞉sio꞉, “Nao i, do i, gio꞉ dabuma! Nili ma꞉mu A꞉bla꞉ham eyo꞉ Halan amisa꞉n semo꞉ ane amio꞉, Mesobotemia hena sen amio꞉, halaido꞉ Gode a꞉no꞉ elo꞉wa fa꞉la꞉dowakiyo꞉, emo꞉wo꞉ a꞉la꞉sio꞉, ‘Ge go꞉no꞉n mo꞉mio꞉ o꞉lia꞉, go꞉no꞉n hen o꞉lia꞉ ta꞉taki, hen ko꞉li nilo꞉ gemo꞉lo꞉ walama꞉no꞉ a꞉no꞉, ge a꞉na mesa꞉no꞉ hamana.’
27189	ACT 7:4	A꞉la꞉sa꞉labikiyo꞉, A꞉bla꞉ham e Kaldean hen a꞉no꞉ kata꞉ta꞉sa꞉ga꞉, Halan amisa꞉n a꞉na ha꞉na꞉sa꞉ga꞉ sen. A꞉na sen ami, iyayo꞉ sowabikiyo꞉, Godeya꞉yo꞉ e a꞉na a꞉la꞉ta꞉ga꞉ tililia꞉ga꞉, o꞉go꞉do꞉ gilo꞉ sab hen wena tililia꞉mio꞉.
27190	ACT 7:5	Ho꞉len a꞉namio꞉, emo꞉wo꞉ ene hendeyo꞉ mo꞉dimiaki, ha꞉lugo꞉wo꞉lo꞉ emo꞉wo꞉ bo꞉fo꞉melea꞉kiyo꞉ mo꞉dimi. Ko꞉sega Godeya꞉ emo꞉ dinali sa꞉laki a꞉la꞉sio꞉, ‘Niyo꞉ hen we tambo ge o꞉lia꞉ gilo꞉ so꞉wa sa꞉la꞉la꞉i ha꞉nab o꞉lia꞉mo꞉wo꞉ dimia꞉no꞉.’ A꞉bla꞉ham e so꞉walo꞉ma dowo꞉ ko꞉sega Godeya꞉yo꞉ emo꞉wo꞉ a꞉la꞉dinali salifa꞉.
27201	ACT 7:16	Tif amio꞉ ini ki a꞉no꞉ a꞉ma꞉la꞉ dia꞉ya꞉sa꞉ga꞉, Sekem hen a꞉namio꞉, Hamol insisa꞉ma꞉ heno꞉ A꞉bla꞉hama꞉ tamina moleya꞉ kilili ko꞉lo꞉ ini kiyo꞉ a꞉na daido꞉.
27205	ACT 7:20	“Ho꞉len a꞉namio꞉, Moseso꞉ a꞉na sa꞉la꞉li. E mada gesego꞉ ko꞉lo꞉ ele otalen dowabiki, iyaya꞉ aya siliki bo꞉fo꞉len.
27211	ACT 7:26	Ho꞉len no amio꞉, Moses e Isolael kalu a꞉la꞉ nowo꞉ buba꞉lena ba꞉ba꞉. E ba꞉da꞉ga꞉, a꞉la꞉yo꞉ ha꞉fo꞉ disa꞉ma꞉ki sagale alitakiyo꞉, towo꞉ a꞉la꞉sio꞉, ‘Gao gaino꞉, waga bubadi?’
27218	ACT 7:33	“A꞉la꞉ta꞉ga꞉ Godeya꞉yo꞉ emo꞉wo꞉ a꞉la꞉sio꞉, ‘Hen gelo꞉ kagafo꞉lab we mada malilo꞉ hen ko꞉lo꞉ gi gido꞉fo꞉ amilo꞉ budi sa꞉ga꞉lo꞉ko꞉, dugulema!
27226	ACT 7:41	Ho꞉len a꞉namio꞉ iliyo꞉ madali godeyo꞉, kao inso꞉ o꞉ngo꞉ a꞉na dimida꞉sa꞉ga꞉ ta꞉fo꞉liki, iliyo꞉ o꞉mo꞉ boba somiaki gulugulula꞉len. Iliyo꞉ ini dagiya꞉lo꞉ dimido꞉ gode a꞉no꞉ wabudakiyo꞉, ma꞉no꞉wo꞉ naki sagalo꞉ alan dowo꞉.
27229	ACT 7:44	“Nili ma꞉muwa꞉yo꞉ helebeso꞉g a a꞉no꞉ Godeyo꞉ a꞉labka꞉ a꞉la꞉widakiyo꞉, kalalili hen a꞉namio꞉ dia꞉liki sia꞉len. Helebeso꞉g a a꞉no꞉ dia꞉no꞉wo꞉, Godeya꞉yo꞉ Mosesbo꞉ wido꞉ ko꞉lo꞉ iyo꞉ a꞉la꞉dimido꞉.
27234	ACT 7:49	“‘Hebenelo꞉ halo nelo꞉ mesa꞉no꞉ i fofodo꞉wo꞉ o꞉m, a꞉la꞉ta꞉ga꞉ henfelo꞉ we Ni gido꞉fo꞉lo꞉ wa꞉lo꞉fo꞉mela꞉no꞉wo꞉ o꞉m. A꞉la꞉fo꞉ko꞉lo꞉ a Nilo꞉ mesa꞉no꞉ o꞉li o꞉ngo꞉wo꞉ gio꞉ waga dia꞉no꞉wo꞉? Nelo꞉ mesa꞉no꞉wo꞉ ayo꞉ mada mo꞉dialifa꞉ib.
27240	ACT 7:55	Ko꞉sega Sitifen e Godeya꞉ Mamayo꞉ e amio꞉ wa꞉lifo꞉ ko꞉lo꞉, eyo꞉ Hebene alolo ba꞉ba꞉ amio꞉, Godeya꞉ Ene halaido꞉ malilo꞉wo꞉ ba꞉da꞉ga꞉yo꞉, Ya꞉suwo꞉ Godeya꞉ ene dagi ililiba kagayabi ba꞉ba꞉.
27241	ACT 7:56	A꞉la꞉ta꞉ga꞉ eyo꞉ a꞉la꞉sio꞉, “Gio꞉ bo꞉ba! Ne Hebeneyo꞉ kolaitabiki ba꞉ba꞉ amio꞉, Kalule Dowo꞉ E Godeya꞉ ene dagi ililiba kagayabiki bo꞉do꞉l.”
27254	ACT 8:9	Amisa꞉n a꞉namio꞉ kalu imilise nowo꞉ ene wiyo꞉ Saimon ko꞉lo꞉ a꞉na sen. Eyo꞉ fofa ko꞉li ko꞉lilo꞉ dimida꞉labiki, amisa꞉n kaluka꞉isaleyo꞉ molo asula꞉len. E ene wiyo꞉ duluda꞉liki, misa꞉ kaluwo꞉lo꞉, wa꞉feyo꞉ kaluwo꞉lo꞉ tambo elo꞉ to sa꞉lab a꞉no꞉ tilida꞉dakiyo꞉, “Halaido꞉ Alano꞉ Godeya꞉lo꞉wa a꞉la꞉ta꞉ga꞉lo꞉ mio꞉ a꞉no꞉ e amio꞉ a꞉lab” a꞉la꞉sio꞉.
27281	ACT 8:36	A꞉la꞉yo꞉ toga ha꞉na꞉la꞉ga꞉, hondo꞉wa fa꞉la꞉dowaki, Itiobia kaluwa꞉yo꞉ a꞉la꞉sio꞉, “Bo꞉ba! Ho꞉no꞉ we ko꞉lo꞉, gio꞉ ne ho꞉na to꞉loma꞉no꞉wo꞉ o꞉liyo꞉?”
27288	ACT 9:3	Mo꞉fo꞉s a꞉no꞉ dia꞉sa꞉ga꞉, Damaskas amisa꞉no꞉ ko꞉na꞉ma fa꞉la꞉doma꞉no꞉ dowab amio꞉, wigibole a꞉naka ho꞉ nowo꞉ wabeleg o꞉ngo꞉ ko꞉lo꞉ Hebene halona a꞉la꞉ta꞉ga꞉ so꞉so꞉lilia꞉ga꞉ tindaki, So꞉l e a꞉ma꞉ hegelia꞉ga꞉ difa꞉.
27300	ACT 9:15	Ko꞉sega Alana꞉yo꞉ emo꞉wo꞉ a꞉la꞉sio꞉, “Ha꞉la꞉ kaluwo꞉ a꞉la꞉ta꞉ga꞉ ene misa꞉ kaluwo꞉, a꞉la꞉ta꞉ga꞉ Isolael kalu o꞉lia꞉yo꞉ tambo No꞉no꞉n wiyo꞉ walama꞉ki, kalu we No꞉no꞉n da꞉fe alifa꞉ ko꞉lo꞉ ge elo꞉wa hamana.
27304	ACT 9:19	E ma꞉no꞉ na꞉sa꞉ga꞉yo꞉, halaido꞉wo꞉ o꞉li a꞉dowo꞉. Ho꞉len nolo꞉ So꞉l e tilidabu kalu nol o꞉lia꞉ Damaskas amisa꞉n a꞉na sen.
27309	ACT 9:24	Ko꞉sega So꞉l eyo꞉ ililo꞉ saefa꞉ a꞉no꞉ dabu. Ho꞉len o꞉lia꞉ nulu o꞉lia꞉ amio꞉, iliyo꞉ amisa꞉n amilo꞉ tog ha꞉na꞉sen a꞉namio꞉ e ta꞉lia꞉sa꞉ga꞉ sana soma꞉no꞉ a꞉la꞉liki yasila꞉len.
27322	ACT 9:37	Ho꞉len a꞉namio꞉, e walaf ba꞉la꞉sa꞉ga꞉ sowo꞉ ko꞉lo꞉ ene do꞉mo꞉wo꞉ ho꞉no꞉ mulu alita꞉sa꞉ga꞉, galale wa꞉l amilo꞉wa dia꞉folen.
27331	ACT 10:3	Ho꞉len no amio꞉, ofa꞉si ga꞉lo asola dowabiki, e ho꞉le ba꞉dakiyo꞉, Godeya꞉ ma꞉mula꞉ kaluwo꞉ elo꞉wa ya꞉sa꞉ga꞉ a꞉la꞉sio꞉, “Konilius!”
27337	ACT 10:9	Ho꞉len no amio꞉ iyo꞉ ha꞉na꞉la꞉ga꞉yo꞉, amisa꞉no꞉ ko꞉na꞉ma fa꞉la꞉doma꞉niki disi dowabikiyo꞉, Bida e Godemo꞉ sa꞉ma꞉ni, a fa꞉sa wa꞉la fa꞉la꞉ ane.
27339	ACT 10:11	Eyo꞉ ho꞉le ba꞉dakiyo꞉, Hebeneyo꞉ kolaita꞉sa꞉ga꞉, kelego꞉ nowo꞉ helebeso꞉g alan o꞉ngo꞉ ko꞉lo꞉ migif fa꞉la꞉da꞉in amio꞉ ta꞉lidota꞉ga꞉, ololo to꞉lo꞉lo꞉ ko꞉lo꞉ tindabi ba꞉ba꞉.
27340	ACT 10:12	Helebeso꞉g us amio꞉ no꞉ ko꞉li ko꞉lilo꞉ a꞉la꞉ta꞉ga꞉ sowa꞉ a꞉la꞉ta꞉ga꞉ o꞉ba꞉ ko꞉li ko꞉lilo꞉, Godeya꞉lo꞉ na꞉so꞉boka꞉ a꞉la꞉likilo꞉ saefa꞉ a꞉no꞉lo꞉ a꞉na delena ba꞉ba꞉.
27344	ACT 10:16	A꞉la꞉dimida꞉lowo꞉wo꞉ otalen fa꞉la꞉dota꞉ga꞉, wigibo a꞉na꞉ka kelego꞉ a꞉no꞉ a꞉ma꞉la꞉ Hebene dia꞉gane.
27352	ACT 10:24	Ho꞉len imiligo꞉ alita꞉ga꞉yo꞉, Sesalia amisa꞉na fa꞉la꞉dowo꞉. Konilius eyo꞉ i a꞉no꞉ mia꞉ib a꞉la꞉bo꞉ asula꞉sa꞉ga꞉, eyo꞉ ene so꞉lo꞉ o꞉lia꞉ ene milileyo꞉ elo꞉wa kegenefo꞉liki yasilo꞉.
27380	ACT 11:4	A꞉la꞉sa꞉labiki, Bida eyo꞉ dimido꞉ fa꞉la꞉dowo꞉ o꞉leaumbo꞉ kalu imo꞉wo꞉ tambo fanda sa꞉laki a꞉la꞉sio꞉, “Ne Yoba amisa꞉na siliki, dulugu sa꞉la꞉len amio꞉, ne ho꞉le ba꞉dakiyo꞉, Hebene kolaita꞉sa꞉ga꞉, kelego꞉ nowo꞉ helebeso꞉g alano꞉ o꞉ngo꞉ ko꞉lo꞉ migif fa꞉la꞉da꞉in ami ta꞉lidota꞉ga꞉, ololo to꞉lola꞉i tindabi ba꞉ba꞉.
27382	ACT 11:6	Helebeso꞉g us amio꞉ no꞉ ko꞉li ko꞉lilo꞉ a꞉la꞉ta꞉ga꞉ sowa꞉yo꞉ a꞉la꞉ta꞉ga꞉ o꞉ba꞉ ko꞉li ko꞉lilo꞉, Godeya꞉lo꞉ na꞉so꞉boka꞉ a꞉la꞉likilo꞉ saefa꞉ a꞉no꞉lo꞉ a꞉na delena ba꞉ba꞉.
27386	ACT 11:10	A꞉la꞉dimida꞉leno꞉ otalen fa꞉la꞉dota꞉ga꞉ wigibo a꞉naka kelego꞉ a꞉no꞉ a꞉ma꞉la꞉ Hebene ane.
27403	ACT 11:27	Ho꞉len a꞉ma꞉ imilib amio꞉, Godeya꞉ dinali sa꞉lan kalu nolo꞉ Ya꞉lusalem a꞉na a꞉la꞉ta꞉ga꞉ Antio꞉g a꞉na ane.
27404	ACT 11:28	Kalu i a꞉no꞉, nowo꞉ wiyo꞉ Agabus ko꞉lo꞉ e Godeya꞉ Mamaya꞉ halaido꞉wo꞉ eya iliki, ho꞉le ba꞉dabikiyo꞉, e kalu kegeo꞉ siwa꞉la kagayaki a꞉la꞉sio꞉, “Henfelo꞉ wenamio꞉ maiyo꞉wo꞉ alan fa꞉la꞉doma꞉ib” a꞉la꞉sio꞉. (Kolodius e Lom hen bo꞉fo꞉lab ho꞉len a꞉namio꞉, dinali sio꞉ a꞉no꞉ hendele fa꞉la꞉dowakiyo꞉, maiyo꞉wo꞉ alan dowo꞉.)
27407	ACT 12:1	O꞉g ho꞉len a꞉namio꞉, Misa꞉ kalu Helo꞉d eyo꞉ tilidabu kaluka꞉isale nolo꞉ mogagima꞉no꞉ a꞉la꞉likiyo꞉, to sa꞉ifa꞉ ko꞉lo꞉ iyo꞉ ta꞉lia꞉sa꞉ga꞉ dibolo aya disa꞉.
27409	ACT 12:3	Ma꞉n moso dowo꞉fa꞉lo꞉ na꞉sen ho꞉len a꞉no꞉ fa꞉la꞉dowabikiyo꞉, Helo꞉d elo꞉ dimido꞉ a꞉no꞉ Yu kalu iyo꞉ da꞉da꞉ki sagaolo꞉ ko꞉lo꞉, Helo꞉d sagalab a꞉no꞉ eyo꞉ ba꞉da꞉sa꞉ga꞉yo꞉, Bida elo꞉ a꞉na ta꞉li.
27410	ACT 12:4	Bida e ta꞉lia꞉sa꞉ga꞉, dibolo aya to꞉lo alita꞉ga꞉yo꞉, e bo꞉fo꞉melea꞉ki, da꞉la꞉di kalu do꞉la꞉ta꞉ga꞉ do꞉go꞉fela꞉fo꞉ da꞉fea꞉sa꞉ga꞉, kalu fa꞉la꞉da꞉in fa꞉la꞉da꞉in yasilima꞉ ya꞉melea꞉ki, aloba꞉da꞉sa꞉ga꞉ ta꞉fo꞉. Tinio꞉ Asulo꞉ Ma꞉no꞉lo꞉ ma꞉no꞉ ho꞉len a꞉no꞉ edabikiyo꞉, Helo꞉da꞉yo꞉ Bida e a꞉na sili alitaki, kaluka꞉isale siwa꞉la mo꞉walilima꞉no꞉ asulo꞉.
27414	ACT 12:8	A꞉la꞉ta꞉ga꞉ ma꞉mula꞉ kaluwa꞉yo꞉ emo꞉wo꞉ a꞉la꞉sio꞉, “Ge go꞉no꞉n yafuwo꞉ ba꞉la꞉sa꞉ga꞉, butiyo꞉ sa꞉ga꞉lema.” A꞉la꞉sa꞉labiki Bidayo꞉ a꞉la꞉dimida꞉sa꞉ga꞉, ma꞉mula꞉ kaluwa꞉yo꞉ wa꞉ka a꞉la꞉sio꞉, “Hido꞉ so꞉go꞉ sa꞉ga꞉la꞉sa꞉ga꞉, ne kudu mena” a꞉la꞉sio꞉.
27417	ACT 12:11	Ma꞉mul kalu e kelege dowabikiyo꞉, Bida eyamilo꞉ dimido꞉ a꞉no꞉ asulakiyo꞉ a꞉la꞉sio꞉, “Dimido꞉ we mada hendelo꞉b a꞉la꞉ asulo꞉l. Helo꞉da꞉ ene halaido꞉ Yu kaluwa꞉yo꞉lo꞉ nemo꞉lo꞉ dimidama꞉no꞉ a꞉no꞉lo꞉ kata꞉foma꞉ki, Alana꞉ ene ma꞉mula꞉ kaluwo꞉ nelo꞉wa iliga꞉fo꞉ ko꞉lo꞉ eyo꞉ ne sili alifa꞉.”
27425	ACT 12:19	Helo꞉da꞉ ene nanog dian kaluwo꞉ Bidayo꞉ kelema꞉ni hamana꞉ki sio꞉ ko꞉sega, iliyo꞉ mo꞉galili ko꞉lo꞉, Helo꞉d eyo꞉ da꞉la꞉di kalu Bidalo꞉ bo꞉fo꞉len o꞉mo꞉wo꞉ wa꞉ka dabu ba꞉da꞉sa꞉ga꞉, iyo꞉ yasala꞉ma꞉no꞉ saefa꞉. A꞉la꞉ta꞉ga꞉ Helo꞉d e Yudia hena ta꞉ta꞉sa꞉ga꞉, Sesalia amisa꞉na mesa꞉ni ane.
27426	ACT 12:20	Helo꞉d eyo꞉ Taya kaluka꞉isale o꞉lia꞉ Saido꞉n kaluka꞉isale o꞉lia꞉mo꞉wo꞉ gadio꞉ alan dowa꞉sen. Ko꞉sega ili ma꞉no꞉wo꞉ Helo꞉da꞉ hena a꞉la꞉ta꞉ga꞉ dia꞉sen ko꞉lo꞉ Helo꞉d o꞉lia꞉ giso꞉ mo꞉dia꞉li mesa꞉no꞉ a꞉la꞉asulaki, iyo꞉ kegea꞉sa꞉ga꞉ Helo꞉d o꞉lia꞉ nenelema꞉no꞉ a꞉la꞉liki togo꞉ kedo꞉. A꞉la꞉go꞉ko꞉lo꞉ Balastus e Helo꞉da꞉ ene nanog dian kalu digalo꞉le nowo꞉ e ko꞉lo꞉ e i o꞉lia꞉ ko꞉le nenela꞉la꞉ga꞉, e o꞉lia꞉yo꞉ asugo꞉ imilise dowabiki, iyo꞉ asuwa꞉fa꞉no꞉ a꞉la꞉li saefa꞉.
27427	ACT 12:21	Tolo꞉ nenelema꞉no꞉lo꞉ saefa꞉ ho꞉len a꞉namio꞉, Helo꞉d e misa꞉ kaluwa꞉ so꞉go꞉ ka꞉la꞉sa꞉ga꞉, i fofodo꞉ nafa a꞉na asifo꞉liki, kalu kegeo꞉ o꞉mo꞉wo꞉ towo꞉ halaido꞉ sio꞉.
27429	ACT 12:23	A꞉la꞉sa꞉labiki, Helo꞉d e Godeya꞉ wiyo꞉ mo꞉dulugu sa꞉labiki, wigibole a꞉naka Godeya꞉ ma꞉mula꞉ kaluwa꞉yo꞉ e walaf mogago꞉ dima꞉ki golo꞉ ko꞉lo꞉ e fesa꞉ na꞉i ha꞉na꞉la꞉ga꞉ sowo꞉.
27432	ACT 13:1	Antio꞉g sa꞉s a꞉namio꞉, dinali sa꞉lan kalu nol o꞉lia꞉ a꞉la꞉ta꞉ga꞉ widan kalu nol o꞉lia꞉yo꞉ a꞉na elen. Kalu i a꞉no꞉ nowo꞉ wiyo꞉ Banabas, nowo꞉ Simeon ene wiyo꞉ nowo꞉ Nigel, nowo꞉ Lusius e Salini kalu, nowo꞉ So꞉l, nowo꞉ Manain e so꞉wa silikiyo꞉, gamani misa꞉ Helo꞉d o꞉lia꞉ anayo꞉.
27437	ACT 13:6	Iyo꞉ hen ho꞉na꞉lo꞉ hegefa꞉ us a꞉na sia꞉la꞉ga꞉, Bafos amisa꞉n a꞉na fa꞉la꞉dowo꞉ amio꞉, Yu amilo꞉ madalilo꞉ dinali sa꞉lan kalu nowo꞉ Ba-Ya꞉su e a꞉na galili. E madalilo꞉ fo꞉falo꞉ dimida꞉seno꞉ e ko꞉lo꞉ Gilig to amio꞉, kalu a꞉no꞉ Elimas a꞉la꞉wikilo꞉, mo꞉wo꞉ Gilig to amilo꞉ Elimas a꞉la꞉do꞉ sa꞉lab a꞉ma꞉ ha꞉go꞉, fo꞉falo꞉ dimidan kalu. Hen a꞉namilo꞉ gamani misa꞉ kalu, Segius Bauluso꞉, e asulo꞉ di kalu ko꞉lo꞉ e Godeya꞉ towo꞉ da꞉ba꞉no꞉ asulabiki, Banabas o꞉lia꞉ So꞉l o꞉lia꞉yo꞉ elo꞉wa walama꞉ mena꞉ki saga꞉fo꞉. Ko꞉sega fo꞉falo꞉ dimida꞉sen kalu a꞉ma꞉yo꞉, e mili ko꞉lo꞉, Banabas dia꞉ So꞉l dia꞉mo꞉wo꞉ gis dowaki, misa꞉ kaluwo꞉ asugo꞉ mo꞉nodoma꞉ki, man walama꞉no꞉wo꞉, e ko꞉lo꞉.
27445	ACT 13:14	Kalu a꞉la꞉yo꞉ Bega ta꞉ta꞉ga꞉ aneyo꞉, Bisidia hen amio꞉ Antio꞉g amisa꞉n a꞉na fa꞉la꞉dowa꞉sa꞉ga꞉, Ha꞉fo꞉lo꞉ Dowan ho꞉leno꞉ dowabiki, Yu kaluwa꞉lo꞉ tolo꞉ wida꞉sen aya tina꞉ga꞉ sen.
27452	ACT 13:21	Ho꞉len a꞉namio꞉, iliyo꞉ misa꞉ kalu ilo꞉ bo꞉fo꞉mela꞉no꞉wo꞉ nowo꞉ doma꞉ki asulaki, Godemo꞉ ha꞉iyabiki, Godeya꞉yo꞉ Bensamina꞉ e ma꞉mui us a꞉namio꞉ nowo꞉ Kisa꞉ inso꞉wo꞉ So꞉lo꞉ a꞉na da꞉feyo꞉ ko꞉lo꞉ elo꞉ bo꞉fo꞉leno꞉ donayo꞉ do꞉la꞉fo꞉ fa꞉la꞉da꞉in dowo꞉.
27458	ACT 13:27	Ya꞉luselam kaluka꞉isale o꞉lia꞉ ene misa꞉ kalu o꞉lia꞉yo꞉ Ya꞉su e a꞉ma꞉la꞉do꞉ gasilia꞉no꞉ kalulo꞉b a꞉la꞉bo꞉ mo꞉fanda asulo꞉. A꞉la꞉ta꞉ga꞉ iliyo꞉ Ha꞉fo꞉lo꞉ Dowan ho꞉len tambo a꞉namio꞉, dinali sa꞉lan kaluwa꞉lo꞉ to sa꞉sa꞉lo꞉ a꞉no꞉ agela꞉likiyo꞉, to a꞉ma꞉ ha꞉go꞉lo꞉ mo꞉dinafa asulo꞉. Ko꞉sega Yu iliyo꞉ Ya꞉su e sana sowo꞉ a꞉namio꞉, dinali sa꞉lan kaluwa꞉lo꞉ to sa꞉sa꞉lo꞉ a꞉no꞉ a꞉na ilili alifa꞉.
27473	ACT 13:42	Fol dia꞉ Banabas dia꞉yo꞉ towo꞉ sa꞉la꞉sa꞉ga꞉ ha꞉na꞉nigab amio꞉, kalu kegeo꞉ a꞉ma꞉yo꞉, a꞉la꞉yo꞉ Ha꞉fo꞉lo꞉ Dowan ho꞉len no amio꞉ tamin amilo꞉ man wido꞉ a꞉no꞉ wa꞉ka walama꞉ki, dabu ba꞉ba꞉.
27475	ACT 13:44	Ha꞉fo꞉lo꞉ Dowan ho꞉len nowo꞉ fa꞉la꞉dowabikiyo꞉, amisa꞉n kaluka꞉isale nolo꞉ tambo Alana꞉ to man a꞉no꞉ da꞉ba꞉no꞉ a꞉la꞉ta꞉ga꞉ kegeo꞉
27495	ACT 14:12	A꞉la꞉fo꞉ko꞉lo꞉ iliyo꞉ Banabaso꞉ “Sus” wikilo꞉ a꞉la꞉ta꞉ga꞉ Fol e towo꞉ wala sa꞉lab ko꞉lo꞉ e “Ha꞉mis” wikilo꞉.
27498	ACT 14:15	“Kaluka꞉isale gililo꞉ dimidab we, waga asulabiki dimidaya? Na꞉no꞉lo꞉ henfelo꞉ kalule, ge o꞉ngo꞉ mio꞉ ko꞉lo꞉ gililo꞉ madali godemo꞉lo꞉ duluda꞉lab a꞉no꞉ kata꞉ta꞉sa꞉ga꞉, Gode mela꞉no꞉lo꞉ a꞉lab a꞉no꞉, Hebeneyo꞉lo꞉, henfelo꞉wo꞉lo꞉, so꞉lu ho꞉no꞉ o꞉lia꞉ kelego꞉ a꞉namio꞉lo꞉ da꞉labdo꞉ dimido꞉ a꞉no꞉ ko꞉lo꞉ duluguma꞉ki, walama꞉ni mio꞉.
27532	ACT 15:21	Mo꞉wo꞉ Mosesa꞉ ele saefa꞉ a꞉no꞉, ma꞉muima꞉ ma꞉lu a꞉la꞉ta꞉ga꞉ da꞉da꞉i mio꞉wo꞉, amisa꞉no꞉ tambo wida꞉la꞉ga꞉ ililitakiyo꞉, Yu kaluwa꞉lo꞉ tolo꞉ wida꞉sen a a꞉namio꞉lo꞉, Ha꞉fo꞉ Dowan ho꞉leno꞉ tambo wida꞉i mio꞉.” Yemesa꞉ a꞉la꞉sio꞉.
27547	ACT 15:36	Ho꞉len nolo꞉ ta꞉ta꞉sa꞉ga꞉yo꞉, Fol eyo꞉ Banabasbo꞉wo꞉ a꞉la꞉sio꞉, “Na꞉no꞉ a꞉ma꞉la꞉ amisa꞉n ko꞉li ko꞉lilo꞉ Alana꞉ to mando꞉ wida꞉i anelo꞉ a꞉namio꞉ ha꞉na꞉ga꞉, iyo꞉ waga dimida꞉li sabele a꞉la꞉liki ba꞉da꞉i ha꞉na꞉nigo꞉l” a꞉la꞉sio꞉.
27565	ACT 16:13	Ha꞉fo꞉lo꞉ Dowan ho꞉leno꞉ fa꞉la꞉dowabiki, nio꞉ Yu kaluwa꞉lo꞉ dulugu sa꞉la꞉sen hen a꞉no꞉ keda꞉i ha꞉nakiyo꞉, amisa꞉no꞉ ta꞉ta꞉ga꞉, ho꞉na꞉ aniba ka꞉isale nolo꞉ a꞉namilo꞉ kegenefo꞉len a꞉no꞉lia꞉ siliki, towo꞉ imo꞉wo꞉ wido꞉.
27568	ACT 16:16	Ho꞉len no amio꞉, nio꞉ tolo꞉ dulugu sa꞉la꞉sen hena ha꞉na꞉no꞉ ha꞉na꞉len amio꞉, madalilo꞉ nanog dian ga nowo꞉ toga gido꞉. Ga e amio꞉ mama mogago꞉wo꞉ dofo꞉liki, tif amilo꞉ dimidama꞉nigabo꞉ e ho꞉le ba꞉da꞉sa꞉ga꞉, dinali sa꞉la꞉sen. A꞉la꞉fo꞉ko꞉lo꞉, ga o꞉lo꞉ biso꞉wa꞉yo꞉ moleyo꞉ modo꞉ ko꞉lo꞉ dia꞉sen.
27593	ACT 17:1	Fol dia꞉ Sailas dia꞉yo꞉ ha꞉nakiyo꞉, Amfibolis amisa꞉n o꞉lia꞉ Abolonia amisa꞉n a꞉no꞉lo꞉ tinia꞉li ha꞉na꞉ga꞉, Tesalonaika amisa꞉n a꞉na fa꞉la꞉dowo꞉. Amisa꞉n a꞉namio꞉, Yu kaluwa꞉lo꞉ tolo꞉ wida꞉sen ayo꞉ elen ko꞉lo꞉, Fol elo꞉ dimidan o꞉leaumbo꞉, e a꞉na ha꞉na꞉sa꞉ga꞉, Godeya꞉ towo꞉ wida꞉len. So꞉go꞉ agelo꞉ otalen a꞉namilo꞉, Ha꞉fo꞉lo꞉ Dowa꞉sen ho꞉len a꞉no꞉ tambo eyo꞉ Yu kaluwa꞉lo꞉ tolo꞉ wida꞉sen ayamio꞉ ha꞉na꞉sa꞉ga꞉, Godeya꞉ to tamin amilo꞉ sa꞉sa꞉lo꞉ a꞉no꞉ e a꞉fanda wido꞉.
27619	ACT 17:27	Henfelo꞉ kaluka꞉sale tambowa꞉yo꞉ Gode e kelelia꞉ga꞉yo꞉, fa꞉la꞉doma꞉ki, kaluwo꞉ a꞉na dimido꞉. A꞉la꞉fo꞉ ko꞉sega, Gode e ni o꞉lia꞉yo꞉ ko꞉na꞉lo꞉ mo꞉a꞉lab.
27630	ACT 18:4	Ha꞉fo꞉lo꞉ Dowan ho꞉leno꞉ tambo amio꞉, Fol eyo꞉ Yu kaluwa꞉lo꞉ tolo꞉ wida꞉sen aya ha꞉na꞉sa꞉ga꞉, Yu kalu o꞉lia꞉ Gilig kalu o꞉lia꞉yo꞉ asugo꞉ nodoma꞉kiyo꞉, towo꞉ wido꞉.
27649	ACT 18:23	Ho꞉len nolo꞉ Antio꞉g a꞉na sa꞉ga꞉yo꞉, e Galesia o꞉lia꞉ Filigia hen a꞉namio꞉, amisa꞉n nowa, amisa꞉n nowa a꞉la꞉sia꞉likiyo꞉, tilidabu kaluka꞉isaleya꞉ asulo꞉wo꞉ halalema꞉ki, wida꞉li sia꞉len.
27677	ACT 19:23	Ho꞉len a꞉namio꞉ Alana꞉ man o꞉lo꞉ kudu ha꞉na꞉lab a꞉no꞉lia꞉yo꞉ kego꞉wo꞉ mada alan fa꞉la꞉dowo꞉.
27709	ACT 20:15	Ho꞉len no amio꞉, Kios hen aniba ha꞉na꞉la꞉ga꞉ alita꞉ga꞉yo꞉, Samos hen a꞉na fa꞉la꞉dowo꞉. Ho꞉len a꞉ma꞉ fa꞉s amio꞉, nio꞉ ha꞉na꞉la꞉ga꞉, Miletus a꞉na fa꞉la꞉dowo꞉.
27733	ACT 21:1	Nio꞉ Efesa꞉s sa꞉sdo꞉ bo꞉fo꞉lowan kalumo꞉wo꞉ ta꞉biyo꞉ a꞉la꞉bo꞉ sa꞉la꞉sa꞉ga꞉, ho꞉n ko꞉suwa disa꞉la꞉sa꞉ga꞉, ho꞉na꞉lo꞉ hegefa꞉ hen, Ko꞉s a꞉na tigini ane. Ho꞉len a꞉ma꞉ fas amio꞉ nio꞉ ha꞉na꞉sa꞉ga꞉ Lodes a꞉na fa꞉la꞉dowo꞉. A꞉la꞉ta꞉ga꞉ ho꞉len a꞉ma꞉ fa꞉s amio꞉ nio꞉ Batala a꞉na fa꞉la꞉dowa꞉ta꞉ga꞉yo꞉, ho꞉n ko꞉su nowo꞉, Fonisia hena ha꞉nabiki, nio꞉lo꞉ a꞉na disa꞉la꞉sa꞉ga꞉ ane.
27750	ACT 21:18	Ho꞉len a꞉ma꞉ fa꞉s amio꞉, nio꞉ Yemeso꞉ ba꞉ba꞉niki, Foldo꞉ nio꞉ tambo a꞉na ane amio꞉, sa꞉sdo꞉ bo꞉fo꞉lowan kaluwo꞉ tambo a꞉na sena ba꞉ba꞉.
27778	ACT 22:6	Ofo꞉ disi dowabikiyo꞉, ne Damaskas ko꞉na꞉ma fa꞉la꞉doma꞉no꞉ dota꞉sen amio꞉, wigibole a꞉naka ho꞉ nowo꞉ wabeleg o꞉ngo꞉ ko꞉lo꞉ Hebene halona a꞉la꞉ta꞉ga꞉ so꞉so꞉lilia꞉ga꞉ tindakiyo꞉, ne ho꞉ a꞉ma꞉ hegelia꞉ga꞉ difa꞉.
27836	ACT 23:34	Gamani misa꞉ kaluwa꞉yo꞉ mo꞉fo꞉s sa꞉sa꞉lo꞉ a꞉no꞉ agela꞉sa꞉ga꞉, Fol emo꞉wo꞉, “Gi heno꞉ o꞉ba?” a꞉la꞉dabu ba꞉ba꞉ ko꞉lo꞉ misa꞉ kaluwa꞉yo꞉ Folo꞉ Silisia kalulo꞉b a꞉la꞉asulakiyo꞉, emo꞉wo꞉ a꞉la꞉sio꞉, “Gemo꞉lo꞉ diga꞉li sio꞉ kalu a꞉no꞉ wena fa꞉la꞉dowalikiyo꞉, ge nio꞉ a꞉na mo꞉walili da꞉ba꞉no꞉.” A꞉la꞉sa꞉la꞉sa꞉ga꞉yo꞉, Fol e Helo꞉da꞉ a alan a꞉namilo꞉ dibolo a a꞉na disalifoliki, bo꞉fo꞉melea꞉ki ta꞉fo꞉.
27838	ACT 24:1	Ho꞉len bila꞉fo꞉wo꞉ ta꞉ta꞉ga꞉yo꞉, Bobalo꞉ so꞉mia꞉sen misa꞉ kalu, Ananaiaso꞉ a꞉la꞉ta꞉ga꞉ Yu ko꞉go꞉do꞉ kalu nolo꞉ a꞉la꞉ta꞉ga꞉ mo꞉walilabdo꞉ asuwa꞉ta꞉sen kalu Tetuluso꞉, iyo꞉ Sesalia ha꞉na꞉sa꞉ga꞉, gamani misa꞉ kalu si wa꞉l amio꞉ Fol elo꞉ hala dimido꞉ diga꞉li sio꞉ a꞉no꞉ fanda sio꞉.
27848	ACT 24:11	Ho꞉len kugula꞉fo꞉ us a꞉namio꞉, ne Ya꞉lusalem ha꞉na꞉sa꞉ga꞉, Godemo꞉ wabulu sa꞉ma꞉ni ane ko꞉lo꞉ giyo꞉ nilo꞉ sa꞉labo꞉ hendelelo꞉b a꞉la꞉likilo꞉, kalu nolbo꞉lo꞉ dabu kelema꞉no꞉wo꞉ halaido꞉ma.
27856	ACT 24:19	Ho꞉len a꞉namio꞉, Yu kalu nolo꞉ Asia hen a꞉la꞉ta꞉ga꞉ mio꞉ a꞉no꞉ a꞉na sen ko꞉lo꞉ i a꞉ma꞉yo꞉ nemo꞉wo꞉ diga꞉li sa꞉lakilo꞉ mo꞉walilima꞉no꞉wo꞉ dowo꞉lalega, kalu i a꞉no꞉ gi siwa꞉la kagafo꞉liki ne a꞉na mo꞉walilima꞉no꞉ o꞉li.
27861	ACT 24:24	Ho꞉len nolo꞉ ta꞉ta꞉sa꞉ga꞉yo꞉, Fela꞉ksa꞉ inga Dulusia, e Yu ka꞉isale ko꞉lo꞉ a꞉la꞉yo꞉ Folo꞉ disalifo꞉labdo꞉ a꞉na ha꞉na꞉ga꞉yo꞉, Folo꞉ ho꞉lelia꞉sa꞉ga꞉, Fol elo꞉ Ya꞉su Keliso tilidabu a꞉no꞉ malolabiki, a꞉la꞉yo꞉ da꞉da꞉len.
27877	ACT 25:13	Ho꞉len nolo꞉ ta꞉ta꞉sa꞉ga꞉yo꞉, misa꞉ kalu Agiliba o꞉lia꞉ ado Benaisi o꞉lia꞉yo꞉ Festuso꞉ ba꞉ba꞉ni ya꞉sa꞉ga꞉, Sesalia a꞉na fa꞉la꞉dowo꞉.
27887	ACT 25:23	Ho꞉len a꞉ma꞉ fas amio꞉ Agiliba o꞉lia꞉ Benaisi o꞉lia꞉yo꞉ ya꞉ga꞉ yakiyo꞉, kaluka꞉isaleyo꞉ a꞉la꞉ma꞉ wiyo꞉ wabulu sio꞉ ko꞉lo꞉, kegea꞉sen aya tinakiyo꞉, da꞉la꞉di misa꞉ kalu i o꞉lia꞉ ko꞉go꞉do꞉ kalu o꞉lia꞉yo꞉ egele ti ane. Festus eyo꞉ Folo꞉ tililia꞉ mena꞉ki sio꞉ ko꞉lo꞉, Folo꞉ tililia꞉ fa꞉la꞉dowabiki,
27903	ACT 26:12	“Ho꞉len imilise no amio꞉, nanog a꞉no꞉ ko꞉lo꞉ dimidama꞉kiyo꞉, bobalo꞉ so꞉mia꞉sen misa꞉ kalu iliyo꞉ halaido꞉ nemo꞉ dimiabiki, Damaskas amisa꞉na ha꞉na꞉ni ane.
27904	ACT 26:13	Misa꞉ kalu, Agiliba ge da꞉da꞉ melea. Ne tog a꞉na ha꞉na꞉len amio꞉ disi dowabikiyo꞉, ho꞉wo꞉ mada alan, ofa꞉siyo꞉ o꞉ngo꞉ma ko꞉lo꞉ Hebene halona a꞉la꞉ta꞉ga꞉ so꞉solelia꞉ga꞉ tindakiyo꞉, ne o꞉lia꞉lo꞉ ane kalu a꞉no꞉lo꞉ tambo ho꞉lelia꞉ga꞉ dia꞉tabiki ba꞉ba꞉.
27919	ACT 26:28	A꞉la꞉sa꞉labiki, Agiliba eyo꞉ Folbo꞉wo꞉ a꞉la꞉dabu ba꞉ba꞉, “Ho꞉len abolda꞉su wenaka, ne asulo꞉ nodola꞉sa꞉ga꞉, Kelisowa tilidabuma꞉ki sa꞉layele?”
27920	ACT 26:29	A꞉la꞉sa꞉labiki, Fol eyo꞉ a꞉ma꞉la꞉bo꞉ a꞉la꞉sio꞉, “Ho꞉len o꞉g wenakabiyo꞉lo꞉ o꞉ ho꞉len sambo dowa꞉i ha꞉na꞉ga꞉lalikiyo꞉lo꞉, gelo꞉ a꞉la꞉ta꞉ga꞉ kaluka꞉isale nilo꞉ sa꞉labdo꞉ da꞉da꞉likilo꞉ sab we tambo, ne o꞉ngo꞉ doma꞉ki, Godemo꞉ dulugu so꞉lo꞉l. Ko꞉sega sa꞉ni wema꞉yo꞉ giyo꞉lo꞉ galolo꞉ma꞉kiyo꞉ mo꞉asulo꞉.”
27924	ACT 27:1	Iliyo꞉ nio꞉ ho꞉n ko꞉suwa disa꞉la꞉sa꞉ga꞉, Itali hen a꞉na ha꞉na꞉no꞉ a꞉la꞉saefa꞉ ko꞉lo꞉ Folo꞉ a꞉la꞉ta꞉ga꞉ dibolo kalu nolo꞉ tililia꞉sa꞉ga꞉, da꞉la꞉di fudo꞉ otalen bo꞉fo꞉lowan kalu nowo꞉, Yulius ko꞉lo꞉ emo꞉ tililia꞉ hamana꞉ki ta꞉fo꞉. Yulius eyo꞉ Loma꞉ misa꞉ kalu alan ene ami us a꞉na nanogo꞉ dimida꞉sen. Ho꞉n ko꞉su nowo꞉, Adamitium a꞉la꞉ta꞉ga꞉lo꞉ mio꞉ a꞉no꞉ Esia hen a꞉namida꞉ amisa꞉n ko꞉li ko꞉lilo꞉wa fa꞉la꞉dowa꞉li a꞉la꞉liki ha꞉na꞉nigabiki, nio꞉ a꞉na disa꞉la꞉sa꞉ga꞉ ane. Masedonia hena, Tesalonaika amisa꞉n kalu nowo꞉, Alistakus e ni o꞉lia꞉ disa꞉la꞉sa꞉ga꞉ ane.
27930	ACT 27:7	Ho꞉len nolo꞉ nio꞉ ho꞉n ko꞉su a꞉no꞉ ha꞉sa ha꞉na꞉ga꞉ ha꞉nakiyo꞉, Nidus amisa꞉n anib a꞉na fa꞉la꞉dowo꞉ ko꞉sega, fufayo꞉ nilo꞉ ha꞉na꞉no꞉lo꞉ doba꞉da꞉ yab ko꞉lo꞉, tigini ha꞉na꞉no꞉wo꞉ mo꞉dowabi, nio꞉ nodota꞉ga꞉ Kilit hen a꞉namida꞉ ha꞉na꞉no꞉ ha꞉nakiyo꞉, hen ko꞉lo꞉ bofiya꞉, Salmone a꞉na ta꞉ta꞉ga꞉yo꞉ Kilit ho꞉na꞉lo꞉ hegefa꞉ anib fufalo꞉ mo꞉ba꞉ma꞉no꞉ doba꞉da꞉ ane.
27943	ACT 27:20	Ho꞉len modo꞉ sen a꞉namio꞉, of o꞉lia꞉ tamin o꞉lia꞉ mo꞉ba꞉daki, fufayo꞉ alan o꞉ya꞉lab a꞉ma꞉yo꞉, nili asulo꞉wo꞉ kelegelaki, nio꞉ soma꞉nigo꞉bo꞉lo꞉b a꞉la꞉asulo꞉.
27944	ACT 27:21	Ho꞉leno꞉ modo꞉ sen a꞉namio꞉, kalu i a꞉no꞉ ma꞉no꞉lo꞉ mo꞉mo꞉no꞉ dowa꞉i mio꞉ a꞉no꞉ ba꞉da꞉sa꞉ga꞉, Fol eyo꞉ dasilia꞉ga꞉ a꞉la꞉sio꞉, “Kalu gio꞉, gio꞉ Kilit hen a꞉na mo꞉ta꞉fo꞉ mia꞉no꞉ a꞉la꞉likiyo꞉, nilo꞉ gimo꞉lo꞉ hagugu to sio꞉ a꞉no꞉ kudu ane kibo꞉bowo꞉, hida꞉yo꞉ we gio꞉ mo꞉ba꞉daki, kelego꞉wo꞉ mo꞉walemo꞉lo.
27945	ACT 27:22	Ko꞉sega o꞉go꞉ niyo꞉ gimo꞉wo꞉ a꞉la꞉so꞉lo꞉l. Gio꞉ imilig nowo꞉ ho꞉na꞉yo꞉ mo꞉kanda soma꞉ib, ko꞉lo꞉ gio꞉ mo꞉tagilaki, halaido꞉ doma. Ho꞉n ko꞉su wenako꞉ mada mogagima꞉ib.