1	GEN 1:1	Asĩnizĩ Lua musu ń zĩ́lɛo kɛ̀.
2	GEN 1:2	Gu da pãɛ, a kɛkɛao, gusia mɛ́ da ísiaa, ɔ̃ Lua Nisĩna lɛ́ yàakpa ípia.
3	GEN 1:3	Ɔ̃ Lua mɛ̀: Gu pu! Ɔ̃ gu pù.
4	GEN 1:4	A è gupuapi maa, ɔ̃ à gupua kɛ̃̀aa ń gusiao.
5	GEN 1:5	À tɔkpà gupuaɛ fãanɛ, gusia sɔ̃ gwãasĩna. Gu sì, gu dɔ̀, a gɔɔ sɛ̃́ian we.
6	GEN 1:6	Ɔ̃ Lua mɛ̀: Bàluma àɔ ku íɔ zãnguo, kɛ́ à ípiɔ kɛ̃kɔ̃wa.
7	GEN 1:7	Ɔ̃ à bàluma kɛ̀ màa, à í pɔ́ kú bàluma zíɛ kɛ̃̀kɔ̃wa ń í pɔ́ kú a musuo.
8	GEN 1:8	Ɔ̃ à tɔkpà bàlumapiɛ luabɛ. Gu sì, gu dɔ̀, a gɔɔ plaaden we.
9	GEN 1:9	Ɔ̃ Lua mɛ̀: Í pɔ́ kú zĩ́lɛ kãaa gudoũ, gugii bɔ. Ɔ̃ à kɛ̀ màa.
10	GEN 1:10	À tɔkpà gugiipiɛ tɔɔlɛ, ɔ̃ à tɔkpà í pɔ́ kã̀aaɛ ísia. Ɔ̃ a è à kɛ̀ maa.
11	GEN 1:11	Ɔ̃ Lua mɛ̀: Láɔ bɔlɛ tɔɔlɛ ń sɛ̃̀ wɛdeɔ ń lí nɛdeɔ, baade ń a buio. Ɔ̃ à kɛ̀ màa,
12	GEN 1:12	láɔ bɔ̀lɛ tɔɔlɛ ń sɛ̃̀ wɛdeɔ ń lí nɛdeɔ, baade ń a buio. Ɔ̃ Lua è à kɛ̀ maa.
13	GEN 1:13	Gu sì, gu dɔ̀, a gɔɔ àaɔ̃den we.
14	GEN 1:14	Ɔ̃ Lua mɛ̀: Pɔgupunaɔ aaɔ ku musu, aaɔ fãanɛ kɛ̃́kɔ̃wa ń gwã́o, aaɔ dikpɛɔ ń gɔɔɔ ń wɛ̃ɔ ɔlɔnɛ́.
15	GEN 1:15	Aaɔ dɛ pɔgupunaɔ ũ musu, kɛ́ aaɔ dṹnia pu. Ɔ̃ à kɛ̀ màa.
16	GEN 1:16	À pɔgupuna zɔ̃ɔɔ kɛ̀ mɛ̀n pla, a pɔ́ pɔ́ gbãa ìɔ kible fãanɛ, a pɔ́ pɔ́ busɛ ìɔ kible gwã́. À saanaɔ kɛ̀ lɔ.
17	GEN 1:17	À ń pɛpɛ musu aaɔ dṹnia pu,
18	GEN 1:18	aaɔ kible fãanɛ ń gwãasĩnao, aaɔ gupua kɛ̃kɔ̃wa ń gusiao. Ɔ̃ a è à kɛ̀ maa.
19	GEN 1:19	Gu sì, gu dɔ̀, a gɔɔ síiɔ̃den we.
20	GEN 1:20	Ɔ̃ Lua mɛ̀: Pɔ́ wɛ̃nideɔ í pa yɔ̃̀ɛyɔ̃ɛ, bãɔ ligua musu, aaɔ vua bàlumau.
21	GEN 1:21	Ɔ̃ à pɔ́ wɛ̃nide pɔ́ kú íu yɔ̃̀ɛyɔ̃ɛɔ kɛ̀ ń kpɔ̀ gbɛ̃̀nɛɔ píi baade ń a buio. À bãɔ kɛ̀ píi lɔ baade ń a buio. Ɔ̃ a è à kɛ̀ maa.
22	GEN 1:22	À báaadàńgu à mɛ̀, aaɔ nɛ'i, aaiɔ kɔ̃́, kpɔɔ i ísia pa, bãɔ i kɔ̃ tɔɔlɛ.
23	GEN 1:23	Gu sì, gu dɔ̀, a gɔɔ sɔoden we.
24	GEN 1:24	Ɔ̃ Lua mɛ̀: Pɔ́ wɛ̃nideɔ aaɔ ku tɔɔlɛ, pɔtuoɔ ń pɔ́taa'onkuawaɔ ń sɛ̃̀anɔbɔɔ baade ń a buio. Ɔ̃ à kɛ̀ màa.
25	GEN 1:25	Lua sɛ̃̀anɔbɔɔ kɛ̀ baade ń a buio. À pɔtuoɔ kɛ̀ baade ń a buio. À pɔ́taa'onkuawaɔ kɛ̀ baade ń a buio. Ɔ̃ a è à kɛ̀ maa.
26	GEN 1:26	Ɔ̃ Lua mɛ̀: Wà gbɛ̃nazĩnaɔ kɛ wá taa ũ, aaiɔ dɛwáwa, aaiɔ iko vĩ kpɔɔwa ń bãɔ ń pɔtuoɔ ń sɛ̃̀anɔbɔɔ ń pɔ́taa'onkuawaɔ píi.
27	GEN 1:27	Ɔ̃ Lua gbɛ̃nazĩnaɔ kɛ̀ azĩa taa ũ. Aà zĩa taa ɔ̃ à ń kɛ́ a ũ. À ń kɛ́ gɔ̃ɛ ń nɔɛoɛ.
28	GEN 1:28	À báaadàńgu a ònɛ́: Àɔ nɛ'i, íɔ kɔ̃́, í dṹnia pa, íɔ gbãablewà. Àɔ iko vĩ kpɔɔwa ń bãɔ ń pɔ́ wɛ̃nide pɔ́ ì táa'o tɔɔlɛwaɔ píi.
29	GEN 1:29	Ɔ̃ Lua mɛ̀: Ma pɔ́ wɛ́nade pɔ́ kú tɔɔlɛwaɔ kpàwá á pɔblea ũ píiɛ ń lí nɛdeɔ píi.
30	GEN 1:30	Ma blɛ pɔ́ ì bɔlɛ tɔɔlɛwa kpà pɔ́ wɛ̃nideɔwa píi an blɛ ũɛ, nɔ̀bɔɔ ń bãɔ ń pɔ́taa'onkuawaɔ píi. Ɔ̃ à kɛ̀ màa.
31	GEN 1:31	Lua pɔ́ pɔ́ á kɛ̀ɔ è píi, à kɛ̀ maa wásawasa. Gu sì, gu dɔ̀, a gɔɔ sooloden we.
32	GEN 2:1	Màa Lua musu ń zĩ́lɛo kɛ̀ ń ń pɔ́ɔ píi.
34	GEN 2:3	Ɔ̃ à báaadà gɔɔ sopladepiu a dìlɛ a pɔ́ ũ, kɛ́ zĩbeezĩ à kã́mabò ń zĩ pɔ́ á kɛ̀o píi yã́i.
35	GEN 2:4	Musu ń zĩ́lɛo kɛa yã́n kɛ: Gɔɔ pɔ́ Dii Lua zĩ́lɛ ń musuo kɛ̀,
36	GEN 2:5	bua pɔe i bɔlɛ tɔɔlɛwa yãao, baa sɛ̃, asa Dii Lua i to lou mào, mɛ́ gbɛ̃e ku à tɔɔlɛ zĩkɛo.
37	GEN 2:6	Sua mɛ́ ì kpa dṹniau, ɔ̃ ì mɔ̀sɛpisi tɔɔlɛwa píi.
38	GEN 2:7	Dii Lua gɔ̃ɛ ikàsa ń bùsutio. Kɛ́ à ĩ́an wɛ̃nide pɛ̀ aà níu, ɔ̃ gɔ̃ɛpi gɔ̃̀ gbɛ̃́ bɛ̃́ɛ ũ.
39	GEN 2:8	Dii Lua lu kɛ̀kɛ gukpɛ oi gu pɔ́ wì mɛ Edɛni, ɔ̃ à gɔ̃ɛ pɔ́ á kɛ̀pi dàu we.