Wildebeest analysis examples for:   bqp-bqp   .    February 24, 2023 at 23:46    Script wb_pprint_html.py   by Ulf Hermjakob

1  GEN 1:1  Zaa káaku Luda musu kũ zĩtɛoo kɛ̀.
2  GEN 1:2  Gu da pãmɛ à kɛkɛnaro, gusira mɛ́ à da ísirala, akũ Luda Nini tɛn yàa kɛ í pìla.
3  GEN 1:3  Akũ Luda pì: Gupura kũ! Akũ gupura kũ̀.
4  GEN 1:4  À è gupura pìi kɛ̀ mana, akũ à gupura kɛ̃̀kɔ̃a kũ gusirao.
5  GEN 1:5  À tɔ́ kpà gupuranɛ fãnantɛ̃, gusira sɔ̃ gwãani. Gu sì gu dɔ̀, a gɔrɔ káakun gwe.
6  GEN 1:6  Akũ Luda pì: Sarapura gɔ̃ kú ínɔ dagura de à í pìnɔ kɛ̃kɔ̃a.
7  GEN 1:7  Akũ à sarapura kɛ̀ lɛ, à í kũ à kú sarapura gbáru kɛ̃̀kɔ̃a kũ í kũ à kú a musuo.
8  GEN 1:8  Akũ à tɔ́ kpà sarapura pìinɛ ludambɛ. Gu sì gu dɔ̀, a gɔrɔ pladen gwe.
9  GEN 1:9  Akũ Luda pì: Í kũ à kú zĩtɛ kakara gu dokɔ̃nɔ, gukori bo. Akũ à kɛ̀.
10  GEN 1:10  À tɔ́ kpà gukori pìinɛ zĩtɛ, akũ a tɔ́ kpà í kũ à kàkaranɛ ísira. Akũ à è à kɛ̀ mana.
11  GEN 1:11  Akũ Luda pì: Lánɔ bɔtɛ zĩtɛ kũ sɛ̃̀ wɛ́denɔ kũ lí nɛ́denɔ, baadi kũ a burio. Akũ à kɛ̀ lɛ,
12  GEN 1:12  lánɔ bɔ̀tɛ zĩtɛ kũ sɛ̃̀ wɛ́denɔ kũ lí nɛ́denɔ, baadi kũ a burio. Akũ Luda è à kɛ̀ mana.
13  GEN 1:13  Gu sì gu dɔ̀, a gɔrɔ aakɔ̃den gwe.
14  GEN 1:14  Akũ Luda pì: Pɔ́ gupurakũrinɔ gɔ̃ kú musu ògɔ̃ fãnantɛ̃ kɛ̃kɔ̃a kũ gwãanio, ògɔ̃ wɛ̃̀ sèedanɔ kũ gɔrɔnɔ kũ wɛ̃̀nɔ mɔńnɛ.
15  GEN 1:15  Ògɔ̃ kú pɔ́ gupurakũrinɔ ũ musu de ògɔ̃ andunia pura. Akũ à kɛ̀.
16  GEN 1:16  À pɔ́ gupurakũri zɔ̃kɔ̃nɔ kɛ̀ mɛ̀n pla, a kũ à gbãna dìgɔ̃ kí ble fãnantɛ̃, a kũ à busɛ dìgɔ̃ kí ble gwãani. À susunɛnɔ kɛ̀.
18  GEN 1:18  ògɔ̃ kí ble fãnantɛ̃ kũ gwãanio, ògɔ̃ gupura kɛ̃kɔ̃a kũ gusirao. Akũ à è à kɛ̀ mana.
19  GEN 1:19  Gu sì gu dɔ̀, a gɔrɔ siikɔ̃den gwe.
20  GEN 1:20  Akũ Luda pì: Pɔ wɛ̃̀ndidenɔ í pa yɛ́rɛrɛ, bãnɔ dagula musu ògɔ̃ vura sarapuran.
21  GEN 1:21  Akũ à pɔ́ wɛ̃̀ndide kũ òdi í panɔ kɛ̀ kũ kpɔ̀ gbɛ̃̀ntɛ̃nɔ pínki, baadi kũ a burio. À bãnɔ kɛ̀ pínki dɔ, baadi kũ a burio. Akũ à è à kɛ̀ mana.
22  GEN 1:22  À arubarikaa dàńgu à pì, ògɔ̃ nɛ́ i ògɔ̃ kɛ dasi, kpɔ̀nɔ ísira pa, bãnɔ kɛ dasi zĩtɛ.
23  GEN 1:23  Gu sì gu dɔ̀, a gɔrɔ sɔɔroden gwe.
24  GEN 1:24  Akũ Luda pì: Pɔ́ wɛ̃̀ndidenɔ bɔtɛ zĩtɛ, bɛ pɔ́kãdenɔ kũ pɔ́ kũ òdi táa o kũ kùaonɔ kũ nɔ̀bɔsɛ̃ntɛnɔ, baadi kũ a burio. Akũ à kɛ̀.
25  GEN 1:25  Luda nɔ̀bɔsɛ̃ntɛnɔ kɛ̀ baadi kũ a burio. À bɛ pɔ́kãdenɔ kɛ̀ baadi kũ a burio. À pɔ́ kũ òdi táa o kũ kùaonɔ kɛ̀ baadi kũ a burio. Akũ à è à kɛ̀ mana.
26  GEN 1:26  Akũ Luda pì: Ò bisãsiri kɛ ó taka ũ, ògɔ̃ de lán ó bà, ògɔ̃ kí ble kpɔ̀nɔa kũ bãnɔ kũ bɛ pɔ́kãdenɔ kũ nɔ̀bɔsɛ̃ntɛnɔ kũ pɔ́ kũ òdi táa o kũ kùaonɔ pínki.
27  GEN 1:27  Akũ Luda bisãsiri kɛ̀ a zĩda taka ũ. A zĩda takan à ń kɛ́ a ũ. À ń kɛ́ gɔ̃gbɛ̃ kũ nɔgbɛ̃o.
28  GEN 1:28  À arubarikaa dàńgu à pìńnɛ: Àgɔ̃ nɛ́ i àgɔ̃ kɛ dasi àgɔ̃ andunia pa àgɔ̃ gbãna blea. Àgɔ̃ kí ble kpɔ̀nɔa kũ bãnɔ kũ pɔ́ wɛ̃̀ndide kũ òdi táa o zĩtɛnɔ pínki.
29  GEN 1:29  Akũ Luda pì: Pɔ́ wɛ́de kũ ò kú zĩtɛnɔn ma kpàáwa á pɔ́ble ũ pínki kũ lí nɛ́denɔ pínki.
30  GEN 1:30  Ma sɛ̃̀nɔ kũ lánɔ kpà pɔ́ wɛ̃̀ndidenɔa pínki ń pɔ́ble ũ, nɔ̀bɔnɔ kũ bãnɔ kũ pɔ́ kũ òdi táa o kũ kùaonɔ pínki. Akũ à kɛ̀.
31  GEN 1:31  Luda pɔ́ kũ à kɛ̀nɔ è pínki, à kɛ̀ mana swáswa. Gu sì gu dɔ̀, a gɔrɔ suddoden gwe.
32  GEN 2:1  Lɛn Luda musu kũ zĩtɛo kɛ̀ lɛ kũ a pɔ́nɔ pínki.
33  GEN 2:2  Ari a gɔrɔ supplade zĩ gɔ̃ ká, à zĩ kũ àtɛn kɛ pìi làka. A gɔrɔ supplade pì zĩ à kámma bò kũ zĩ kũ a kɛ̀nɔ pínki.
34  GEN 2:3  Akũ à arubarikaa dà gɔrɔ supplade pìn à dìtɛ a pɔ́ ũ, kũ gɔrɔ bire à kámma bò kũ zĩ kũ a kɛ̀nɔ pínki yãi.
35  GEN 2:4  Musu kũ zĩtɛo naana yãn. Gɔrɔ kũ Dikiri Luda zĩtɛ kũ musuoo kɛ̀,
36  GEN 2:5  pɔ́wɛ ke dí butɛ zĩtɛ kɔ̀ro, bee sɛ̃̀ɛ, zaakũ Dikiri Luda dí tó legũ màro, akũsɔ̃ gbɛ̃ke kun à bura zĩ kɛro.
37  GEN 2:6  Suka mɛ́ àdi kpá andunia gũn, akũ àdi mɔtɔ pisi zĩtɛa pínki.
38  GEN 2:7  Dikiri Luda gɔ̃gbɛ̃ í kàsa kũ bùsutitio, akũ à ĩa wɛ̃̀ndide vù a yĩn, akũ gɔ̃gbɛ̃ pìi gɔ̃̀ gbɛ̃ bɛ̃nɛ ũ.
39  GEN 2:8  Dikiri Luda swadakoo kɛ̀kɛ ifãboki kpa gu kũ òdi pi Ɛdɛni, akũ à gɔ̃gbɛ̃ kũ à kɛ̀ɛ pìi dà gwe.
40  GEN 2:9  Dikiri Luda tò lí buri sĩnda pínki bùtɛ zĩtɛ. Lí pìnɔ kɛ̀ mana, akũsɔ̃ ń nɛ́ blena nna. Lí wɛ̃̀ndide kú dàkoo pìi dagura. Lí kũ àdi dɔ̃na mana kũ a vãnio ińnɛ kú gwe.
41  GEN 2:10  Swa kú Ɛdɛni àdigɔ̃ mɔtɔ pisi dàkoo pìia. Bona gwe à ɔnɛ kɛ̀ siikɔ̃.
42  GEN 2:11  A káaku tɔ́n Pisɔ̃, àkũ mɛ́ à lika Avila bùsuui pínki. Wura kú bùsuu pìi gũn,
43  GEN 2:12  wuraa pì mana. Gbɛ̀ bɛ̀ɛrɛdenɔn kú gwe.
44  GEN 2:13  Swa pì ɔnɛ plade tɔ́n Giɔ̃, à lika Kusu bùsuui pínki.
45  GEN 2:14  A ɔnɛ aakɔ̃de tɔ́n Tigiri, a dɔ̀rɔɔ tà Asiria bùsu ifãboki kpa. Swa pì ɔnɛ siikɔ̃de tɔ́n Yuflati.
46  GEN 2:15  Dikiri Luda gɔ̃gbɛ̃ pìi dìtɛ Ɛdɛni dàkoo pìi gũn de àgɔ̃ a zĩ kɛ àgɔ̃ gwa.
48  GEN 2:17  ama ǹsun lí kũ àdi dɔ̃na mana kũ a vãnio ińnɛ nɛ́ blero. Tó n blè, ĩni gamɛ.
49  GEN 2:18  Dikiri Luda pì: Gɔ̃gbɛ̃ kunna ado manaro. Mani kpanyĩri kɛnɛ a gbɛ̃ndo ũ.
50  GEN 2:19  Akũ Dikiri Luda bùsuu sɛ̀ à nɔ̀bɔnɔ kɛ̀o pínki kũ bãnɔ pínki, akũ à sù kũńwo gɔ̃gbɛ̃ pì kĩnaa de à e deran ani tɔ́ kpáńnɛ. Tɔ́ kũ gɔ̃gbɛ̃ pìi kpà pɔ́ wɛ̃̀ndide pìnɔnɛ pínki gɔ̃̀ ń tɔ́ ũ.
51  GEN 2:20  Gɔ̃gbɛ̃ pì tɔ́ kpà bɛ pɔ́kãdenɔnɛ pínki kũ bãnɔ kũ nɔ̀bɔsɛ̃ntɛnɔ pínki, ama adi kpanyĩri e ń tɛ́ a gbɛ̃ndo ũro.
52  GEN 2:21  Akũ Dikiri Luda i zɔ̃kɔ̃ɔ dà gɔ̃gbɛ̃ pìla. Kũ àtɛn i o, akũ à a gbã̀ntɛrɛwa mɛ̀n do bò, akũ à a mɛ̀baasi tàta a gbɛ̀n.
53  GEN 2:22  Akũ à gɔ̃gbɛ̃ gbã̀ntɛrɛwa kũ à bòo pìi lìtɛ nɔgbɛ̃ ũ, akũ à gɛ̀ɛ kãao a kĩnaa.
54  GEN 2:23  Akũ gɔ̃gbɛ̃ pìi pì: Adikĩna wá bò ma wá gũmmɛ, a mɛ̀ sɔ̃ à bò ma mɛ̀ɛ gũmmɛ. Oni a sísi nɔgbɛ̃, kũ Luda a bò gɔ̃gbɛ̃ gũn yãi.
55  GEN 2:24  A yã mɛ́ à tò gɔ̃gbɛ̃ dì bo a de kũ a dao bɛa, àdi nakɔ̃a kũ a nanɔo ò gɔ̃ mɛ̀ do ũ.
56  GEN 2:25  Gɔ̃gbɛ̃ kũ a nanɔo kú pótompo ń pla ń pínki, wé'i sɔ̃ àdi ń kũro.
59  GEN 3:3  ama lí kũ à kú dàkoo pìi guragura, Luda pì òsun a nɛ́ blero òsun ɔ naa sero, de òsun garo yãi.
61  GEN 3:5  Zaakũ Luda dɔ̃ tó a blè, á wɛ́ ni kɛ̃ áni gɔ̃ lán a bà, ánigɔ̃ a mana dɔ̃ kũ a vãnio.
62  GEN 3:6  Kũ nɔgbɛ̃ è lí pì nɛ́ mana, akũsɔ̃ a blena nigɔ̃ nna ani tó gbɛ̃ wɛ́ kɛ̃, akũ à a nɛ́ kɛ̃̀ à blè. À kpà a zãa dɔ, akũ à blè se.
63  GEN 3:7  Ń pla ń pínki ń wɛ́ kɛ̃̀, akũ ò dɔ̃̀ sà kũ ò kun pótompo. Akũ ò gboroda lá nàbi ò yĩ̀ḿma.
64  GEN 3:8  Kũ gɔ̃gbɛ̃ kũ a nanɔo Dikiri Luda kĩni mà àtɛn kure dàkoo pìi gũn ɔkɔsi, akũ ò ùtɛnɛ dàkoo pì lán.
66  GEN 3:10  À wèa à pì: Kũ ma n kĩni mà, akũ vĩna ma kũ kũ má kun pótompo yãi, akũ ma utɛ.
68  GEN 3:12  À wèa à pì: Nɔgbɛ̃ kũ n kpàma àgɔ̃ kú kũmao mɛ́ à lí pì nɛ́ kpàma ma blè.
69  GEN 3:13  Akũ Dikiri Luda nɔgbɛ̃ là à pì: Bɔ́yãi n kɛ̀ lɛɛ? À wèa à pì: Mlɛ̃̀ mɛ́ à ma kɛkɛ, akũ ma blè.
70  GEN 3:14  Akũ Dikiri Luda pì mlɛ̃̀ɛnɛ: Kũ n kɛ̀ lɛ, ĩnigɔ̃ láaribona pɔ́ ũ de bɛ pɔ́kãdenɔ kũ nɔ̀bɔsɛ̃ntɛnɔla pínki, ĩnigɔ̃ táa o n kùua, bùsutitin ĩnigɔ̃ ble ari n wɛ̃̀ndi lɛ́n.
71  GEN 3:15  Mani ibɛrɛ da mɔkɔ̃n kũ nɔgbɛ̃o dagura, n buri kũ a burio dagura. A buri ni n mì wí, ĩni a gbátoki kĩnna.
72  GEN 3:16  Akũ à pì nɔgbɛ̃nɛ: Mani n nɔ̀sinaa wari karannɛ, ĩnigɔ̃ nɛ́ i kũ wãwão. N zã ni nigɔ̃ kúmmamɛ, anigɔ̃ kí ble n musu.
73  GEN 3:17  Akũ à pì gɔ̃gbɛ̃nɛ: Lákũ n n nanɔ yã mà nà, lí kũ ma ginnɛ ǹ a nɛ́ ble n blè, ma láari bò zĩtɛa n yãi, ɔsi kũ ɔsioon ĩnigɔ̃ pɔ́ble en ari n wɛ̃̀ndi lɛ́n.
74  GEN 3:18  Ani lɛ̀nɔ kũ lá ũkãdenɔ butɛnnɛ, gbasa ǹ burapɔnɔ ble.
75  GEN 3:19  Ísimmawaranaa gũnn ĩni pɔ́ble en ari ǹ ɛra ǹ gɛ̃o bùsun, zaakũ gwen ma n bon. Bùsutitimɛ n ũ, ĩni ɛra ǹ gɔ̃ bùsutiti pìi ũmɛ.
76  GEN 3:20  Adamu tɔ́ kpà a nanɔnɛ Awau, zaakũ gbɛ̃ pínki daimɛ.
77  GEN 3:21  Dikiri Luda bára uta kɛ̀ Adamunɛ kũ a nanɔo, akũ à dàńnɛ.
78  GEN 3:22  Akũ à pì: Bisãsiri a mana kũ a vãnio dɔ̃̀ sà, à gɔ̃̀ lán ó. Óni gínɛ à lí wɛ̃̀ndide nɛ́ kɛ̃ à ble de àsungɔ̃ kun gɔrɔ sĩnda pínkiro yãi.
79  GEN 3:23  Akũ Dikiri Luda pɛ̀a à a bò Ɛdɛni dàkoo pìi gũn. Akũ Adamu gɛ̀ɛ à zĩtɛ kũ Luda a bòn zĩ.
80  GEN 3:24  Kũ Dikiri Luda pɛ̀a, akũ à kɛrubunɔ kàtɛ Ɛdɛni dàko ifãboki kpa, de ògɔ̃ lí wɛ̃̀ndide zɛ́ dãkpã kũ fɛ̃nɛda kũ àtɛn tɛ́ kɛ àtɛn litɛlitɛo.
81  GEN 4:1  Adamu a nanɔ Awau dɔ̃̀ nɔgbɛ̃ ũ, akũ à nɔ̀ɔ sì à Kainu ì. Akũ à pì: Ma gɔ̃gbɛ̃ ì kũ Dikiri gbãnao.
82  GEN 4:2  Akũ à a dakũna Habila ì. Habila kɛ̀ sãdãri ũ, Kainu sɔ̃ à kɛ̀ búbari ũ.
83  GEN 4:3  Zĩkea Kainu sù kũ a burapɔnɔo gba ũ Dikirinɛ.
84  GEN 4:4  Habila sɔ̃ à sù kũ a sãnɛ káaku mɛ̀kpanaao. Habila yã kà Dikirigu, akũ à a gba.
85  GEN 4:5  Kainu sɔ̃ a yã dí kɛ Dikirinɛro, akũ adi a gba síro. Akũ Kainu pɔ fɛ̃̀ manamana a ãnn sìsi.
87  GEN 4:7  Tó n yã mana kɛ̀, mani n síroo? Tó ńdi yã mana kɛ sɔ̃ro, durunna natɛnnɛ n kpɛ́lɛlɛa. N ni tɛni a dɛ, séde ǹ zĩ̀ blea.
88  GEN 4:8  Akũ Kainu pì a dakũna Habilanɛ: Ò gɛ́ sɛ̃̀n. Kũ ò kà gwe, akũ à fùtɛ a dakũnai à a dɛ̀.
89  GEN 4:9  Dikiri Kainu là à pì: Mán n dakũna Habila kunn? À wèa à pì: Má dɔ̃ro. Ma dakũna dãkpãriin ma ũ yá?
90  GEN 4:10  Akũ Dikiri pì: Bɔ́n n kɛ̀ɛ? N dakũna aru tɛn lɛ́ zumai zaa zĩtɛ gũn mà zɛ kãao.
91  GEN 4:11  Tera sà ĩnigɔ̃ láari pɔ́ ũmɛ, ĩnigɔ̃ zã̀ kũ zĩtɛ kũ à n dakũna aru mì n ɔĩo.
92  GEN 4:12  Tó n bú bà, zĩtɛ ni kararo. Ĩnigɔ̃ sɔ̃sɔ̃ gu kũ guo ǹgɔ̃ likara andunia gũn.
93  GEN 4:13  Akũ Kainu pì Dikirinɛ: Wari bire gbãna demala, mani fɔ̃ro.
94  GEN 4:14  Ntɛn pɛ́ma zĩtɛ la gbãramɛ. Mani kɛ̃kɔ̃a kũnwo. Manigɔ̃ sɔ̃sɔ̃ gu kũ guo màgɔ̃ likara andunia gũn, gbɛ̃ kũ à kpàkũn kũmao ni ma.
95  GEN 4:15  Akũ Dikiri pìnɛ: Lɛnlo! Tó gbɛ̃ n dɛ, oni mɔra káa gɛ̃̀n supplamɛ. Akũ Dikiri wãnzãn ke kɛ̃̀ Kainua, de gbɛ̃ kũ à kpàkũn kãao sún a dɛro yãi.
96  GEN 4:16  Akũ Kainu dà zɛ́n à kɛ̃̀ Dikiria. À gɛ̀ɛ à vùtɛ Nɔdu bùsun Ɛdɛni ifãboki kpa.
97  GEN 4:17  Kainu wùtɛ kũ a nanɔo, akũ à nɔ̀ɔ sì à Ɛnɔku ì. A gbɛra Kainu wɛ̃tɛ kàtɛ, akũ à a nɛ́ pì tɔ́ kpà wɛ̃tɛ pìinɛ.
98  GEN 4:18  Ɛnɔku Irada ì, Irada Mɛuyaɛli ì, Mɛuyaɛli Mɛtusaɛli ì, Mɛtusaɛli Lamɛki ì.
99  GEN 4:19  Lamɛki nɔ sɛ̀ mɛ̀n pla, a do tɔ́n Ada, a do Zila.
100  GEN 4:20  Ada Yabala ì. Àkũmɛ pɔ́dãri kũ òdigɔ̃ kú bizakuta gũnnɔ dizi káaku ũ.
101  GEN 4:21  A dakũna tɔ́n Yubala. Àkũmɛ mɔrɔlɛrinɔ kũ úrapɛrinɔ dizi káaku ũ.
102  GEN 4:22  Zila sɔ̃, akũ mɛ́ à Tubala Kainu ì. Siaamɛ a ũ. Àdi pɔ pínki pi kũ mɔ̀sio kũ mɔ̀gotɛ̃o. A dãre tɔ́n Naama.
103  GEN 4:23  Akũ Lamɛki pì a nɔnɔnɛ: Ada kũ Zilao, à ma yã ma, ma nɔnɔ, à sã kpá ma yãi. Gbɛ̃ke ma kĩnna, akũ ma a dɛ̀, kɛfɛnna pì ma lɛmɛ, akũ ma a wɛ̃̀ndii.
104  GEN 4:24  Tó oni Kainu fĩna bonɛ gɛ̃̀n suppla, makũ Lamɛki ma pɔ́ sɔ̃, gɛ̃̀n baaakɔ̃ akuri awɛɛsupplamɛ.
105  GEN 4:25  Adamu wùtɛ kũ a nanɔo dɔ, akũ à nɛ́gɔ̃gbɛ̃ ì. À tɔ́ kpànɛ Sɛti à pì, Luda a gba nɛ́ pãnde Habila kũ Kainu a dɛ̀ gɛ̃nɛ ũmɛ.
106  GEN 4:26  Sɛti sɔ̃ à nɛ́gɔ̃gbɛ̃ ì, akũ à tɔ́ kpànɛ Ɛnɔsu. Zaa zĩ birean ò nà Dikiri sísinaaa.
107  GEN 5:1  Adamu burinɔ yãn. Gɔrɔ kũ Luda bisãsirinɔ kɛ̀, à ń kɛ́ lán a bàmɛ.
108  GEN 5:2  À ń kɛ́ gɔ̃gbɛ̃ kũ nɔgbɛ̃o, akũ à arubarikaa dàńnɛ. À tɔ́ kpàńnɛ bisãsiri.