2	GEN 1:2	Gu da pãmɛ à kɛkɛnaro, gusira mɛ́ à da ísirala, akũ Luda Nini tɛn yàa kɛ í pìla.
6	GEN 1:6	Akũ Luda pì: Sarapura gɔ̃ kú ínɔ dagura de à í pìnɔ kɛ̃kɔ̃a.
7	GEN 1:7	Akũ à sarapura kɛ̀ lɛ, à í kũ à kú sarapura gbáru kɛ̃̀kɔ̃a kũ í kũ à kú a musuo.
10	GEN 1:10	À tɔ́ kpà gukori pìinɛ zĩtɛ, akũ a tɔ́ kpà í kũ à kàkaranɛ ísira. Akũ à è à kɛ̀ mana.
11	GEN 1:11	Akũ Luda pì: Lánɔ bɔtɛ zĩtɛ kũ sɛ̃̀ wɛ́denɔ kũ lí nɛ́denɔ, baadi kũ a burio. Akũ à kɛ̀ lɛ,
12	GEN 1:12	lánɔ bɔ̀tɛ zĩtɛ kũ sɛ̃̀ wɛ́denɔ kũ lí nɛ́denɔ, baadi kũ a burio. Akũ Luda è à kɛ̀ mana.
16	GEN 1:16	À pɔ́ gupurakũri zɔ̃kɔ̃nɔ kɛ̀ mɛ̀n pla, a kũ à gbãna dìgɔ̃ kí ble fãnantɛ̃, a kũ à busɛ dìgɔ̃ kí ble gwãani. À susunɛnɔ kɛ̀ dɔ.
18	GEN 1:18	ògɔ̃ kí ble fãnantɛ̃ kũ gwãanio, ògɔ̃ gupura kɛ̃kɔ̃a kũ gusirao. Akũ à è à kɛ̀ mana.
20	GEN 1:20	Akũ Luda pì: Pɔ wɛ̃̀ndidenɔ í pa yɛ́rɛrɛ, bãnɔ dagula musu ògɔ̃ vura sarapuran.
21	GEN 1:21	Akũ à pɔ́ wɛ̃̀ndide kũ òdi í panɔ kɛ̀ kũ kpɔ̀ gbɛ̃̀ntɛ̃nɔ pínki, baadi kũ a burio. À bãnɔ kɛ̀ pínki dɔ, baadi kũ a burio. Akũ à è à kɛ̀ mana.
22	GEN 1:22	À arubarikaa dàńgu à pì, ògɔ̃ nɛ́ i ògɔ̃ kɛ dasi, kpɔ̀nɔ ísira pa, bãnɔ kɛ dasi zĩtɛ.
26	GEN 1:26	Akũ Luda pì: Ò bisãsiri kɛ ó taka ũ, ògɔ̃ de lán ó bà, ògɔ̃ kí ble kpɔ̀nɔa kũ bãnɔ kũ bɛ pɔ́kãdenɔ kũ nɔ̀bɔsɛ̃ntɛnɔ kũ pɔ́ kũ òdi táa o kũ kùaonɔ pínki.
28	GEN 1:28	À arubarikaa dàńgu à pìńnɛ: Àgɔ̃ nɛ́ i àgɔ̃ kɛ dasi àgɔ̃ andunia pa àgɔ̃ gbãna blea. Àgɔ̃ kí ble kpɔ̀nɔa kũ bãnɔ kũ pɔ́ wɛ̃̀ndide kũ òdi táa o zĩtɛnɔ pínki.
29	GEN 1:29	Akũ Luda pì: Pɔ́ wɛ́de kũ ò kú zĩtɛnɔn ma kpàáwa á pɔ́ble ũ pínki kũ lí nɛ́denɔ pínki.
30	GEN 1:30	Ma sɛ̃̀nɔ kũ lánɔ kpà pɔ́ wɛ̃̀ndidenɔa pínki ń pɔ́ble ũ, nɔ̀bɔnɔ kũ bãnɔ kũ pɔ́ kũ òdi táa o kũ kùaonɔ pínki. Akũ à kɛ̀ lɛ.
31	GEN 1:31	Luda pɔ́ kũ à kɛ̀nɔ è pínki, à kɛ̀ mana swáswa. Gu sì gu dɔ̀, a gɔrɔ suddoden gwe.
32	GEN 2:1	Lɛn Luda musu kũ zĩtɛo kɛ̀ lɛ kũ a pɔ́nɔ pínki.
33	GEN 2:2	Ari a gɔrɔ supplade zĩ gɔ̃ ká, à zĩ kũ àtɛn kɛ pìi làka. A gɔrɔ supplade pì zĩ à kámma bò kũ zĩ kũ a kɛ̀nɔ pínki.
34	GEN 2:3	Akũ à arubarikaa dà gɔrɔ supplade pìn à dìtɛ a pɔ́ ũ, kũ gɔrɔ bire à kámma bò kũ zĩ kũ a kɛ̀nɔ pínki yãi.
35	GEN 2:4	Musu kũ zĩtɛo naana yãn dí. Gɔrɔ kũ Dikiri Luda zĩtɛ kũ musuoo kɛ̀,
36	GEN 2:5	pɔ́wɛ ke dí butɛ zĩtɛ kɔ̀ro, bee sɛ̃̀ɛ, zaakũ Dikiri Luda dí tó legũ màro, akũsɔ̃ gbɛ̃ke kun à bura zĩ kɛro.
37	GEN 2:6	Suka mɛ́ àdi kpá andunia gũn, akũ àdi mɔtɔ pisi zĩtɛa pínki.
38	GEN 2:7	Dikiri Luda gɔ̃gbɛ̃ í kàsa kũ bùsutitio, akũ à ĩa wɛ̃̀ndide vù a yĩn, akũ gɔ̃gbɛ̃ pìi gɔ̃̀ gbɛ̃ bɛ̃nɛ ũ.
40	GEN 2:9	Dikiri Luda tò lí buri sĩnda pínki bùtɛ zĩtɛ. Lí pìnɔ kɛ̀ mana, akũsɔ̃ ń nɛ́ blena nna. Lí wɛ̃̀ndide kú dàkoo pìi dagura. Lí kũ àdi dɔ̃na mana kũ a vãnio ińnɛ kú gwe dɔ.
42	GEN 2:11	A káaku tɔ́n Pisɔ̃, àkũ mɛ́ à lika Avila bùsuui pínki. Wura kú bùsuu pìi gũn,
44	GEN 2:13	Swa pì ɔnɛ plade tɔ́n Giɔ̃, à lika Kusu bùsuui pínki.
47	GEN 2:16	Akũ à yã dìtɛnɛ à pì: Ĩni fɔ̃ ǹ dàkoo pì lí nɛ́nɔ ble pínki,
48	GEN 2:17	ama ǹsun lí kũ àdi dɔ̃na mana kũ a vãnio ińnɛ nɛ́ blero. Tó n blè, ĩni gamɛ.
50	GEN 2:19	Akũ Dikiri Luda bùsuu sɛ̀ à nɔ̀bɔnɔ kɛ̀o pínki kũ bãnɔ pínki, akũ à sù kũńwo gɔ̃gbɛ̃ pì kĩnaa de à e deran ani tɔ́ kpáńnɛ nà. Tɔ́ kũ gɔ̃gbɛ̃ pìi kpà pɔ́ wɛ̃̀ndide pìnɔnɛ pínki gɔ̃̀ ń tɔ́ ũ.
51	GEN 2:20	Gɔ̃gbɛ̃ pì tɔ́ kpà bɛ pɔ́kãdenɔnɛ pínki kũ bãnɔ kũ nɔ̀bɔsɛ̃ntɛnɔ pínki, ama adi kpanyĩri e ń tɛ́ a gbɛ̃ndo ũro.
54	GEN 2:23	Akũ gɔ̃gbɛ̃ pìi pì: Adikĩna wá bò ma wá gũmmɛ, a mɛ̀ sɔ̃ à bò ma mɛ̀ɛ gũmmɛ. Oni a sísi nɔgbɛ̃, kũ Luda a bò gɔ̃gbɛ̃ gũn yãi.
56	GEN 2:25	Gɔ̃gbɛ̃ kũ a nanɔo kú pótompo ń pla ń pínki, wé'i sɔ̃ àdi ń kũro.
57	GEN 3:1	Mlɛ̃̀ mɛ́ à manafiki vĩ de pɔ́ kũ Dikiri Luda kɛ̀nɔla pínki, akũ à nɔgbɛ̃ là à pì: Luda pì àsun dàkoo pì lí ke nɛ́ blenloo?
58	GEN 3:2	Akũ nɔgbɛ̃ wè mlɛ̃̀ɛ pìia à pì: Óni fɔ̃ ò dàkoo pì línɛ ble,
59	GEN 3:3	ama lí kũ à kú dàkoo pìi guragura, Luda pì òsun a nɛ́ blero òsun ɔ naa sero, de òsun garo yãi.
62	GEN 3:6	Kũ nɔgbɛ̃ è lí pì nɛ́ mana, akũsɔ̃ a blena nigɔ̃ nna ani tó gbɛ̃ wɛ́ kɛ̃, akũ à a nɛ́ kɛ̃̀ à blè. À kpà a zãa dɔ, akũ à blè se.
63	GEN 3:7	Ń pla ń pínki ń wɛ́ kɛ̃̀, akũ ò dɔ̃̀ sà kũ ò kun pótompo. Akũ ò gboroda lá nàbi ò yĩ̀ḿma.
67	GEN 3:11	Akũ Dikiri Luda a là à pì: Dí mɛ́ à ònnɛ ń kun pótompoo? Lí kũ ma ginnɛ ǹ a nɛ́ ble, n blèn yá?
68	GEN 3:12	À wèa à pì: Nɔgbɛ̃ kũ n kpàma àgɔ̃ kú kũmao mɛ́ à lí pì nɛ́ kpàma ma blè.
70	GEN 3:14	Akũ Dikiri Luda pì mlɛ̃̀ɛnɛ: Kũ n kɛ̀ lɛ, ĩnigɔ̃ láaribona pɔ́ ũ de bɛ pɔ́kãdenɔ kũ nɔ̀bɔsɛ̃ntɛnɔla pínki, ĩnigɔ̃ táa o n kùua, bùsutitin ĩnigɔ̃ ble ari n wɛ̃̀ndi lɛ́n.
71	GEN 3:15	Mani ibɛrɛ da mɔkɔ̃n kũ nɔgbɛ̃o dagura, n buri kũ a burio dagura. A buri ni n mì wí, ĩni a gbátoki kĩnna.
72	GEN 3:16	Akũ à pì nɔgbɛ̃nɛ: Mani n nɔ̀sinaa wari karannɛ, ĩnigɔ̃ nɛ́ i kũ wãwão. N zã ni nigɔ̃ kúmmamɛ, anigɔ̃ kí ble n musu.
73	GEN 3:17	Akũ à pì gɔ̃gbɛ̃nɛ: Lákũ n n nanɔ yã mà nà, lí kũ ma ginnɛ ǹ a nɛ́ ble n blè, ma láari bò zĩtɛa n yãi, ɔsi kũ ɔsioon ĩnigɔ̃ pɔ́ble en ari n wɛ̃̀ndi lɛ́n.
76	GEN 3:20	Adamu tɔ́ kpà a nanɔnɛ Awau, zaakũ gbɛ̃ pínki daimɛ.
78	GEN 3:22	Akũ à pì: Bisãsiri a mana kũ a vãnio dɔ̃̀ sà, à gɔ̃̀ lán ó bà. Óni gínɛ à lí wɛ̃̀ndide nɛ́ kɛ̃ à ble de àsungɔ̃ kun gɔrɔ sĩnda pínkiro yãi.
80	GEN 3:24	Kũ Dikiri Luda pɛ̀a, akũ à kɛrubunɔ kàtɛ Ɛdɛni dàko ifãboki kpa, de ògɔ̃ lí wɛ̃̀ndide zɛ́ dãkpã kũ fɛ̃nɛda kũ àtɛn tɛ́ kɛ àtɛn litɛlitɛo.
85	GEN 4:5	Kainu sɔ̃ a yã dí kɛ Dikirinɛro, akũ adi a gba síro. Akũ Kainu pɔ fɛ̃̀ manamana a ãnn sìsi.
87	GEN 4:7	Tó n yã mana kɛ̀, mani n síroo? Tó ńdi yã mana kɛ sɔ̃ro, durunna natɛnnɛ n kpɛ́lɛlɛa. N ni tɛni a dɛ, séde ǹ zĩ̀ blea.
102	GEN 4:22	Zila sɔ̃, akũ mɛ́ à Tubala Kainu ì. Siaamɛ a ũ. Àdi pɔ pínki pi kũ mɔ̀sio kũ mɔ̀gotɛ̃o. A dãre tɔ́n Naama.
106	GEN 4:26	Sɛti sɔ̃ à nɛ́gɔ̃gbɛ̃ ì, akũ à tɔ́ kpànɛ Ɛnɔsu. Zaa zĩ birean ò nà Dikiri sísinaaa.
107	GEN 5:1	Adamu burinɔ yãn dí. Gɔrɔ kũ Luda bisãsirinɔ kɛ̀, à ń kɛ́ lán a bàmɛ.
141	GEN 6:3	Akũ Dikiri pì: Ma Nini nigɔ̃ kú bisãsirinɔ gũn gɔrɔ sĩnda pínkiro, zaakũ mɛ̀barademɛ. Ń gɔrɔnɔ nigɔ̃ wɛ̃̀ basuddomɛ.
143	GEN 6:5	Dikiri è kũ bisãsirinɔ yã vãni kɛna dasi andunia gũn. Gɔrɔ sĩnda pínki yã bɛ̃̀nɛ laasunn òdigɔ̃ lɛ́ ado,
147	GEN 6:9	Nuhu burinɔ yãn dí. Nuhu bi gbɛ̃ manamɛ. Kũ à kun, a mɛ̀n do mɛ́ à taari vĩro à táa ò kũ Ludao.
149	GEN 6:11	Luda è andunia gbɛ̃nɔ yàka ń pínki, taarikɛna andunia pà.
150	GEN 6:12	Kũ Luda andunia gwà, à è à yàka, zaakũ gbɛ̃ sĩnda pínki zã̀ zɛ́a.
151	GEN 6:13	Akũ Luda pì Nuhunɛ: Mani gbɛ̃ sĩnda pínki kakatɛ, kũ ń yãin taarikɛna dà anduniala. Mani ń kakatɛ lɛɛlɛ kũ anduniaomɛ.
152	GEN 6:14	Ǹ gó'itɛ kɛkɛ kũ lí lɛ̀kɛtɛɛo ǹ kpɛ́nɛnɔ kɛ a gũn ǹ ɔ̀da maa a gũn kũ a kpɛo.
153	GEN 6:15	Ĩni gó pì kɛ lán dí bà. A gbã̀na gã̀sãkuru wàa do kpɛ́ basɔɔro, a yàasa gã̀sãkuru bupla akuri, a lei sɔ̃ gã̀sãkuru baraakuri.
155	GEN 6:17	Makũ sɔ̃ mani tó í da anduniala, de mà pɔ́ wɛ̃̀ndide kũ òdi wesa bonɔ kakatɛ ń pínki. Pɔ́ kũ ò kú andunia gũnnɔ ni gaga pínki.
157	GEN 6:19	Ĩni pɔ́ wɛ̃̀ndide pínki sɛ́ ǹ gɛ̃ kũńwo mɛ̀n plapla de onigɔ̃ kun kũ wɛ̃̀ndiio.
158	GEN 6:20	Bã burinɔ kũ nɔ̀bɔ burinɔ kũ pɔ́ kũ òdi táa o kũ kùao burinɔ pínki oni su n kĩnaa mɛ̀n plapla de ògɔ̃ kun.
159	GEN 6:21	Ǹ pɔ́ble kũ òdi ble sĩnda pínki sɛ́tɛ ǹ kakara á zàna ũ, ákɔ̃nɔ kũ pɔ́ pìnɔ.
160	GEN 6:22	Akũ Nuhu kɛ̀ lɛ à yã kũ Luda ònɛɛ kɛ̀ pínki.
163	GEN 7:3	Ǹ bãnɔ sɛ́ ǹ gɛ̃ kũńwo dɔ da kũ a sàao mɛ̀n supplapla de ń burinɔ gɔ̃ kú andunia gu sĩnda pínkia.
164	GEN 7:4	Zaakũ gɔrɔ suppla gbɛra mani tó legũ ma zĩtɛ ari gɔrɔ bupla fãnantɛ̃ kũ gwãanio, de mà pɔ́ wɛ̃̀ndide kũ ma kɛ̀nɔ wara zĩtɛ pínki.
165	GEN 7:5	Nuhu yã kũ Dikiri ònɛɛ kɛ̀ pínki.
166	GEN 7:6	Gɔrɔ kũ í dà anduniala, Nuhu kun wɛ̃̀ wàa aakɔ̃mɛ.
167	GEN 7:7	À gɛ̃̀ gó'itɛ gũn kũ a nɛ́nɔ kũ a nanɔo kũ a nɛ́nɔ nɔnɔo de ò bo í pì yãn.
170	GEN 7:10	Gɔrɔ suppla gbɛra í da pìi dà anduniala.
171	GEN 7:11	Nuhu wɛ̃̀ wàa aakɔ̃de gũn a mɔ plade gɔrɔ gɛ̃ro awɛɛplade zĩ, akũ í kũ à kú zĩtɛ gbárunɔ pũ̀tã pínki, akũ ludambɛ guforonɔ fɔ̃̀.
174	GEN 7:14	kũ nɔ̀bɔsɛ̃ntɛnɔ pínki ń buria kũ bɛ pɔ́kãdenɔ pínki ń buria kũ pɔ́ kũ òdi táa o kũ kùaonɔ pínki ń buria kũ pɔ́ vurananɔ pínki ń buria, bãnɔ kũ pɔ́ dɛ̀mbɛrɛdenɔ pínki.
176	GEN 7:16	Pɔ wɛ̃̀ndidenɔ buri pínki gɛ̃̀ da kũ a sàao lákũ Luda dìtɛnɛ nà. Akũ Dikiri gbà tàtańlɛ.
177	GEN 7:17	Legũ mà ari gɔrɔ bupla. Kũ í tɛn kara, akũ à gó pìi sɛ̀ zĩtɛla.
178	GEN 7:18	Í fùtɛ à kàra manamana à dà zĩtɛla, akũ gó pì fù íla.
179	GEN 7:19	Í kàra à dà zĩtɛla lái, à dà kpi lei kũ ò kú andunia gũnnɔla míɔmiɔ.
181	GEN 7:21	Pɔ́ wɛ̃̀ndide kũ òdi táa o zĩtɛnɔ gàga pínki, bãnɔ kũ bɛ pɔ́kãdenɔ kũ nɔ̀bɔsɛ̃ntɛnɔ kũ pɔ́ kũ òdi táa o kũ kùaonɔ kũ bisãsirinɔ ń pínki.
182	GEN 7:22	Pɔ́ kũ òdi wesa bo kũ ò kú sĩ̀sĩanɔ gàga pínki.
183	GEN 7:23	Luda pɔ́ wɛ̃̀ndide kũ ò kú sĩ̀sĩanɔ kàkatɛ pínki. À bisãsirinɔ kũ nɔ̀bɔnɔ kũ pɔ́ kũ òdi táa o kũ kùaonɔ kũ bãnɔ kàkatɛ andunia gũn. Nuhu mɛ́ à bò ado kũ pɔ́ kũ ò kú kãao gó gũnnɔ.
184	GEN 7:24	Akũ í gɔ̃̀ da anduniala ari gɔrɔ basuppla akuri.
185	GEN 8:1	Nuhu kũ nɔ̀bɔsɛ̃ntɛnɔ kũ bɛ pɔ́kãde kũ ò kú kãao gó gũnnɔ pínki yã dɔ̀ Ludan. Kũ à ĩa gbàrɛ zĩtɛa, akũ í nà babanaaa.
191	GEN 8:7	akũ à kãakãanna gbàrɛ. Àtɛn vura àtɛn gɛ́ àtɛn su ari í bàba zĩtɛa.