3	GEN 1:3	Kɔ Kanu kəloku: «Pəwaŋkəra peyi!» Kɔ pəwaŋkəra peyi.
5	GEN 1:5	Kɔ Kanu kəwe pəwaŋkəra «dɔsɔk», kɔ kəwe kubump «pibi.» Kɔ dɔfɔy deyi, kɔ bət-bət beyi, kɔ tɔyɔnɛ dɔsɔk dɔcɔkɔ-cɔkɔ.
6	GEN 1:6	Kɔ Kanu kəloku sɔ: «Pəkuymɛ peyi, ntɛ tɔŋsɔŋɛ domun deyersɛnɛ mɔ!»
8	GEN 1:8	Kɔ Kanu kəwe pəkuymɛ mpɛ «kɔm.» Kɔ dɔfɔy deyi kɔ bət-bət beyi, kɔ tɔyɔnɛ dɔsɔk da mɛrəŋ.
9	GEN 1:9	Kɔ Kanu kəloku: «Domun ndɛ deyi kɔm tantɔf mɔ, doloŋkanɛ tofo tin, pəwosu peyi, pəwur, pəyi takəroŋ!» Kɔ teyi tatɔkɔ.
10	GEN 1:10	Kɔ Kanu kəwe tofo towosu «antɔf,» kɔ kəwe mofo mmɛ mɛla domun mɔ «cəba.» Kɔ Kanu kənəŋk fɔ tentesɛ tatɔkɔ.
11	GEN 1:11	Kɔ Kanu kəloku sɔ: «Antɔf ŋopoŋ pubuk, yika ŋa defet, kɔ tɔk yokom nyɛ yende yoc-kom antɔf kəroŋ taciŋa mɔ! Yɔyɔ sɔ defet dakayi!» Kɔ teyi tatɔkɔ.
14	GEN 1:14	Kɔ Kanu kəloku sɔ: «Yomotər-motər yeyi dəpəkuymɛ, ntɛ tɔŋsɔŋɛ dɔsɔk dɛgbɛyɛnɛ kɔ pibi mɔ! Kɔ tɔyɔnɛ mɛgbɛkərɛ ma tɛm, dɔsɔk kɔ meren.
15	GEN 1:15	Yɔyɔnɛ yomotər-motər ya pəkuymɛ nyɛ yende yɔc-sɔŋ antɔf pəwaŋkəra mɔ!» Kɔ teyi tatɔkɔ.
20	GEN 1:20	Kɔ Kanu kəloku sɔ: «Yeŋesəm ya dəkəba yɛc-sɛp dəromun. Bɛmp yɛc-fɛlər-fɛlər kɔm tantɔf!»
22	GEN 1:22	Kɔ Kanu kəmpocɛ yi pətɔt, kɔ kəloku: «Nəyɔnɛ akombəra, nəla, nəlas domun da dəkəba, kɔ bɛmp, yɛla antɔf kəroŋ!»
24	GEN 1:24	Kɔ Kanu kəloku sɔ: «Antɔf ŋɔyɔ yeŋesəm dokom dokom, sɛm yɔcɔl, yeliŋɛ-liŋɛ, kɔ sɛm ya dəkulum, fəp fa yi kɔ dokom da yi!» Kɔ teyi tatɔkɔ.
26	GEN 1:26	Kɔ Kanu kəloku: «Awa, palompəs fum teyi tosu, wəwurɛnɛ kosu, nwɛ endetasərnɛ lop ya dəkəba, bɛmp ya dareŋc, yɔcɔl kɔ yeliŋɛ-liŋɛ ya dəntɔf fəp mɔ!»
28	GEN 1:28	Kɔ Kanu kəmpocɛ ŋa pətɔt, kɔ kəloku: «Nəyɔnɛ akombəra, nəla, nəlas antɔf, nəboc antɔf tɛfaŋ tonu! Nətasərnɛ lop ya dəkəba, bɛmp nyɛ yɛŋfɛlər dareŋc mɔ, sɛm kɔ yeliŋɛ-liŋɛ ya dəntɔf fəp.»
29	GEN 1:29	Kɔ Kanu kəloku: «Isɔŋ nu yika nyɛ yɔyɔ defet dakayi mɔ, kɔ yokom ya tɔk. Yɔyɔnɛ nu yeri.
30	GEN 1:30	Sɛm ya dəntɔf, bɛmp ya dareŋc, yɛfɛlər-fɛlər ya dareŋc, kɔ yeliŋɛ-liŋɛ ya dəntɔf, ca fəp nyɛ yeŋesəm mɔ, isɔŋ yi dəmnɛ yika yobuk yɔyɔnɛ yi yeri.» Kɔ teyi sɔ tatɔkɔ.
42	GEN 2:11	Kəca kəcɔkɔ-cɔkɔ k'aŋc-we «Pisɔŋ», ki kənɔŋkər atɔf ŋa Hawila fəp, nde kɛma kəyi mɔ.
44	GEN 2:13	Kəca ka mɛrəŋ k'aŋwe «Kihɔŋ», ki kənɔŋkər atɔf ŋa Kus.
45	GEN 2:14	K'aŋwe kəŋgbɔkɔ ka maas «Tikər», ki kəcepər kəca nkɛ dec dɛmpɛ dare da Asur mɔ. Kəŋgbɔkɔ ka maŋkəlɛ kəyɔnɛ «Efərat.»
47	GEN 2:16	Kɔ Kanu Kəpɔŋ kətiŋtiŋ fum: «Məntam kədi yeri ya dalɛ dandɛ fəp.
48	GEN 2:17	Mba ta mədi pokom pa kətɔk ka kəcərɛnɛ pətɔt kɔ pəlɛc de! Bawo dɔsɔk ndɛ məndedi pokom pa ki mɔ, məŋfi!»
49	GEN 2:18	Kɔ Kanu Kəpɔŋ kəloku: «Pəmar fɛ wərkun pəyi sona! Indelompəs wəmarəs kɔn, ntɛ tɔŋsɔŋɛ ŋayi mɛrəŋ mɔ.»
54	GEN 2:23	Kɔ wərkun oŋkulɛ: «Apayo!» «Wəkawɛ taŋ, kəbɛnt ka bɛnt yem, tɛsɛm ta sɛm yem.» Wəkawɛ andewe «wəran» wənɛŋcɛnɛ ka wərkun, bawo nnɔ dis dem d' awurɛ kɔ.
57	GEN 3:1	Abok ŋɛnacərɛ mes ŋɛtas sɛm ya dalɛ fəp nyɛ Kanu Kəpɔŋ kənawurɛ mɔ. K'abok ŋeyif wəran: «Kanu kəloku nu yati: ‹A ta nədi yokom ya tɔk ya dalɛ dandɛ?›»
58	GEN 3:2	Kɔ wəran oloku abok: «Səndi yokom ya tɔk ya dalɛ dandɛ yati.
59	GEN 3:3	Mba kətɔk nkɛ kəyi dalɛ dacɔ mɔ, Kanu kəloku: ‹Ta nədi yokom ya ki, ta nəgbuŋɛnɛ ŋaŋ ki! Kɔ nəyɔ ti-ɛ, nəŋfi.›»
60	GEN 3:4	K'abok ŋoloku wəran: «Nəfɔfi!
61	GEN 3:5	Bawo Kanu kəŋcərɛ, a dɔsɔk ndɛ nəndi yi mɔ, fɔr yonu yeŋmepɛ, nəyi pəmɔ Kanu nkɛ kəŋcərɛ pətɔt kɔ pəlɛc mɔ.»
65	GEN 3:9	Kɔ Kanu Kəpɔŋ kəwe wərkun kɔ kəyif kɔ: «Deke məyi-ɛ?»
66	GEN 3:10	Kɔ wərkun oloku Kanu: «Dim d' in' am dalɛ disrɛ, k'inesɛ, bawo iwur kəsɔkər, ti t' iŋgbɔpnɛnɛ.»
67	GEN 3:11	Kɔ Kanu Kəpɔŋ kəyif kɔ sɔ: «Anɔ 'mentər əm a kəsɔkər kɔ məwur-ɛ? Cepɔ məndi pokom pa kətɔk kəŋkɔ inamɔn' am mɔ ba?»
68	GEN 3:12	Kɔ wərkun oloku: «Wəran nwɛ məsɔŋ im mɔ, nkɔn ɔsɔŋ im pi k'ina sɔ indi.»
69	GEN 3:13	Kɔ Kanu kəyif wəran: «Ta ake tɔ məyɔnɛ tantɛ-ɛ?» Kɔ wəran oloku Kanu: «Abok ŋetiŋkər im, k'indi pokom pampɛ.»
70	GEN 3:14	Kɔ Kanu Kəpɔŋ kəloku abok: «Bawo məsɔŋɛ wəran kəciya, kəsɔŋ əm kənder pəlɛc sɛm yɔcɔl, kɔ sɛm ya dop fəp dacɔ. Kor kɔ mənde məcliŋɛnɛ, məcdi kəbof mataka ma kiyi kam doru fəp.
71	GEN 3:15	Kəbɛrs əm k'inder dacɔ kɔ wəran, kəyɛfɛ nəna haŋ awut a wəran kəbəp awut a məna, Abok! Wəran ende pəc-putək əm domp, məna, Abok, məc-ŋaŋ kɔ dəmnɛ atek.»
72	GEN 3:16	Kɔ Kanu kəloku wəran: «Indeyɔ kəbɛkəs kam kəc-cu'm. Pəcuca pɔ mənde məc-kom. Mɛfaŋ mam məndekɔ nda wos əm. Mba endetasərn' am.»
73	GEN 3:17	Kɔ Kanu kəloku wərkun: «Bawo, məŋcəŋkəl dim da wəran kam, kɔ məndi pokom pa kətɔk nkɛ inamɔn' am kədi mɔ, Indesɔŋ antɔf pəlɛc tetam: Pəcuca pɔ mənde məcsɔtər ŋi yeri yam dɔsɔk o dɔsɔk kiyi kam doru fəp.
75	GEN 3:19	Kawonɛ ka tobu tam kəndesɔŋ' am kəc-sɔm kəcom haŋ tɛm ntɛ məndelukus dəntɔf nde məyɛfɛ mɔ. Bawo kəbof kɔ məyɔnɛ, dəkəbof məndesɔ-lukus.»
76	GEN 3:20	Kɔ wərkun ɔsɔŋ wəran kɔn tewe ta «Hawa», bawo nkɔn Hawa ɔyɔnɛ iya wəka afum a doru fəp.
78	GEN 3:22	Kɔ Kanu Kəpɔŋ kəloku: «Ah! Ntɛ fum ende pəyi oŋ pəmɔ səna mɔ, pəcərɛ pəlɛc kɔ pətɔt, səkɛmbərnɛ ta pətɛŋc kəca pəlɛk sɔ pokom pa kətɔk kəyinɛ wəyeŋ, pədeyi oŋ doru katina.»
81	GEN 4:1	K'Adama ŋambəpɛnɛ kɔ wəran kɔn Hawa, kɔ Hawa ɛmbɛkəs, k'oŋkom Kayin. Kɔ Hawa oloku: «Isɔtɔ wan wərkun kəmar ka Kanu disrɛ.»
86	GEN 4:6	Kɔ Kanu kəyif Kayin: «Ta ake tɔ pəntɛlɛn' am-ɛ, ta ake tɔ məŋɛyɛ kəro-ɛ?
87	GEN 4:7	Kɔ məŋkɔt bel-bel-ɛ, məndesel. Kɔ kɔ məŋkɔt pəlɛc-ɛ, kiciya kəy' əm dəkusuŋka kɔ mɛfaŋ ma ki mey' əm. Mba məsɛp mətasərnɛ ki.»
89	GEN 4:9	Kɔ Kanu kəyif Kayin: «Deke wɛŋc əm Abɛl eyi-ɛ?» Kɔ Kayin oloku fɔ: «Iŋcərɛ fɛ. Cepɔ wəkɛkəs kɔn iyɔnɛ ba?»
90	GEN 4:10	Kɔ Kanu kəloku Kayin: «Cəke cɔ məyɔ wɛŋc əm-ɛ? Dim da mecir ma wɛŋc əm deyi kəkulɛ-kulɛ kəyɛfɛ dəntɔf haŋ nnɔ iyi mɔ.
92	GEN 4:12	Kɔ mənde məcbəc antɔf-ɛ, ŋɔfɔde ŋɔcsɔŋ əm pəbotu pa ŋi. Ti tɔ pənde pəctɛlɛn' am məc-cepɛ-cepɛ dəkəbəc.»
93	GEN 4:13	Kɔ Kayin oloku Kanu: «Pəlel pa kiciya kem pɛmbɛk kəsarɛ.
94	GEN 4:14	Məmbɛləs im mɔkɔ nnɔ antɔf ŋam ŋebi ŋeyi mɔ. Pənamar im kəgbɔpən' am, kɔ kəcepɛ-cepɛ dəntɔf, kɔ fum ɛmbəp im dənda-ɛ, pədif im.»
95	GEN 4:15	Mba, kɔ Kanu Kəpɔŋ kəloku kɔ: «Kɔ fum endif Kayin-ɛ, aŋluksɛ ayɛk ŋɔn camət-mɛrəŋ.» Kɔ Kanu kəŋgbesi Kayin ntɛ tɔŋsɔŋɛ aŋɛ ŋambəp kɔ mɔ, ta ŋasut kɔ ŋadif.
99	GEN 4:19	Kɔ Lɛmɛk ɛlɛk aran mɛrəŋ, pacwe wəkin «Ada,» kɔ wəka mɛrəŋ «Cila.»
103	GEN 4:23	Kɔ Lɛmɛk oloku aran ɔn: «Ada kɔ Sila nəcəŋkəl dim dem! Aran a Lemɛk nəsu ləŋəs nəcəŋkəl moloku mem. K'asut im-ɛ, indif fum. K'ambopər im-ɛ, indif wanfɛt.
104	GEN 4:24	Kɔ pəyɔnɛ fɔ padif afum camət-mɛrəŋ kəluksɛ ayɛk ŋa Kayin-ɛ, andedif afum 77, a pacluksɛ ayɛk ŋa Lemɛk.»
105	GEN 4:25	Adama kɔ Hawa ŋasɔtɔ sɔ wan. Kɔ Hawa ewe kɔ «Sɛt», ti tɔ tatɔkɔ «Kanu kəsɔŋ im sɔ wəlɔma kədeyɔn' em Abɛl wəkɔ Kayin endif mɔ.»
108	GEN 5:2	wərkun kɔ wəran k'ɛsɛl ŋa, k'ompocɛ ŋa pətɔt, k'ewe ŋa tewe ta «fum,» tɛm ntɛ ɛŋc-sɛl ŋa mɔ.
135	GEN 5:29	Kɔ Lɛmɛk ewe wan wəkakɔ «Nuha.» K'oloku: «Wəkawɛ ende pəcyaməsɛ-yaməsɛ su, kəcɛm-cɛmnɛ ka pucuy mpɛ yɛbəc yocuca nyɛ waca womboc antɔf nyɛ, Kanu Kəpɔŋ kənasɔŋ pəlɛc te tosu mɔ.»
141	GEN 6:3	Kɔ Kanu kəloku: «Ifaŋ fɛ kəsak afum ŋayinɛ kifir kəyinɛ doru nkɛ inasɔŋ ŋa mɔ, bawo fum sɛm dəm yɔ. Kəyi kɔn doru kəfɔde kəc-cepər sɔ meren 120.»
145	GEN 6:7	Kɔ Kanu kəloku: «Kənim k'inder afum aŋɛ inasɛl mɔ, kəyɛfɛ afum, kəbəp sɛm, kəkɔ ka yeliŋɛ-liŋɛ haŋ bɛmp ya dareŋc, bawo iŋaŋnɛ tɛlər kəsɛl kəŋan.»
151	GEN 6:13	Ti t' ɛnasɔŋɛ Kanu kəloku Nuha: «Iŋcɛm-cɛmnɛ kəmələk yeŋesəm ya doru fəp, bawo tes taŋan tɔsɔŋɛ kɔ doru dɛla kədəkətɛrɛnɛ, kənim ŋa k'inder doru.
159	GEN 6:21	Awa, mətɛn yeri fəp, məmɛŋkərnɛ yi ntɛ tɔŋsɔŋɛ nəde nəc-sɔtɔ yedi nəna kɔ yi mɔ.»
161	GEN 7:1	Kɔ Kanu kəloku Nuha: «Məbɛrɛ abil disrɛ, məna k'afum am fəp, bawo iŋkɔkcɛ a məna sona gboŋ (mən' olomp) mən' ɛcɛps' em darəŋ anapa am fəp dacɔ.
164	GEN 7:4	Pəŋcəmɛ mata camət-mɛrəŋ, itorɛ wəcafən mata 40 kɔ pibi 40 camcam. Tɛm tatɔkɔ indefɛŋ nnɔ doru afum aŋɛ inasɛl mɔ fəp.»
195	GEN 8:11	K'antantoriya ŋoluksərnɛ dec dɔrɔfɔy ŋɛgbəm tɔbɔpər tɛcaŋk ta kətɔk nkɛ aŋwe «olif» mɔ. Kɔ Nuha ɛŋcərɛ katina a domun dɛŋcɛsɛ.
200	GEN 8:16	«Məwur abil disrɛ, məna kɔ wəran kam, awut am k'aran aŋan.
201	GEN 8:17	Məwurɛnɛ sɔ sɛm yɛləpəs nyɛ yeyi abil disrɛ kɔ məna mɔ. Kɔ bɛmp dokom fəp, sɛm yɛfɛt kɔ yɔpɔŋ, yɛsam doru yokom.»
205	GEN 8:21	Kɔ Kanu Kəpɔŋ kəmbaŋ ambɔŋc ŋobotu ŋa kəloŋnɛ, kɔ kəlokunɛ dɛbəkəc, «Ifɔsɔsɔŋ antɔf pəlɛc teta fum. Kaŋce kɔ, bawo afum mɛcɛm-cɛmnɛ mɛlɛc meyi ŋa dəbəkəc kəyɛfɛ dowut daŋan, mba ifɔsɔləsər ca nyɛ yeŋesəm doru pəmɔ ntɛ intɛp ti kəcyɔ mɔ.»
206	GEN 8:22	«Kəwon ka antɔf doru fəp, kəbɔf kɔ kətɛl, pəwonu kɔ pəcaŋki, kətən kɔ dɛrəŋ, dɔsɔk kɔ pibi, yɔfɔdelip.»
207	GEN 9:1	Kɔ Kanu kəmpocɛ Nuha pətɔt k'awut ɔn, kɔ kəloku ŋa: «Nəyɔnɛ akombəra, nəkom pəlarəm, nəlas antɔf.
211	GEN 9:5	Indeyif nu teta mecir monu, mmɛ mɔyɔnɛ kəyi doru konu mɔ. Indeyif sɔ ti sɛm fəp nyɛ yendedif fum mɔ. Pəmɔ ntɛ indeyif ti fum nwɛ endedif wɛŋc mɔ.»
212	GEN 9:6	«Nwɛ endif fum mɔ, pəmar padif sɔ (məna wəkayi), bawo Kanu kəlompəs fum pəwurɛnɛ kɔ nkɔn sərka.
213	GEN 9:7	Kɔ nəna, nəyɔnɛ akombəra, nəkom pəlarəm, nəsaməsər doru.»
215	GEN 9:9	«K'ina, isɔŋ nu temer kəsek ka danapa kɔ nəna, kəbəp k'awut-sɔ anu kɔ nəna nəŋcepər-ɛ
217	GEN 9:11	Isɔŋ nu temer, ntɛ t' indeyɔ: Domun dɔfɔdesɔdi antɔf, wəcafən ɔfɔdesɔyi nwɛ endeləsər antɔf mɔ.»
218	GEN 9:12	Kɔ Kanu kəndeŋər: «Paka pa danapa dosu pɛmpɛ mpɛ pendeyi su dacɔ kɔ nəna, kəbəp ka ca yeŋesəm doru o doru mɔ.
222	GEN 9:16	K'Iŋc-kɔna-nəŋk asiŋki-ɛ, iŋcɛm-cɛmnɛ temer ta doru o doru ntɛ inasɔŋ' un, kɔ ca fəp nyɛ yeŋesəm doru mɔ.»
223	GEN 9:17	Kɔ Kanu kəŋgbɔkərɛnɛ sɔ moloku mamɛ Nuha: «Asiŋki ŋementər temer ntɛ isɔŋ nu kɔ ca ya doru nyɛ yeŋesəm mɔ.»
231	GEN 9:25	Kɔ Nuha oloku: «Intolanɛ Kanahan pəlɛc! Kanahan pəyɔnɛ wəcar ka acar a awɛŋc aŋa!»
232	GEN 9:26	Kɔ Nuha oloku sɔ: «Intola Kanu Kəpɔŋ, Kanu ka Semy, Kanahan pəyɔnɛ wəcar kəŋan!
233	GEN 9:27	Kanu kəyac Yafɛt! Yafɛt pəyi abal ŋa Semy disrɛ, Kanahan nkɔn pəyɔnɛ wəcar kəŋan!»
244	GEN 10:9	Nimrodu ɛnayɔnɛ wəpɛn korgba nde fɔr ya Kanu Kəpɔŋ kiriŋ. Ti tɔ alokɛnɛ: «Pəmɔ Nimrod, korgba kəpɛn nde fɔr ya Kanu Kəpɔŋ kiriŋ.»
270	GEN 11:3	Kɔ ŋalokɛnɛ: «Pasut birik, pacɔf bi!» Kɔ birik bɔcɔf babɔkɔ bɔyɔnɛ ŋa masar, kɔ kɔrtal kəyɔnɛ ŋa dos.
271	GEN 11:4	Kɔ ŋaloku sɔ: «Paŋkɔn, pacəmbər dare kɔ kəlɔ nkɛ domp da ki dendekɔ haŋ dɔsɔ kɔm mɔ. Ntɛ tɔŋsɔŋɛ pasɔtɔ tewe mɔ, tɔsɔŋɛ su sɔ kətɔsaməsər doru.»
273	GEN 11:6	Kɔ Kanu kəloku, «Nəmɔmən afum aŋɛ! Fəp faŋan kusu kin kɔ ŋaŋcɔp. Nəmɔmən sɔ ntɛ ŋaŋcop kəyɔ mɔ. Tɔlɔm o tɔlɔm teyi fɛ ntɛ tɔŋmɔnɛ ŋa kəyɔ ka tɛfaŋ taŋan mɔ.
274	GEN 11:7	Paŋkɔn, pator, panɔŋkəl-nɔŋkəl kusu kəŋan ntɛ tɔŋsɔŋɛ ta ŋanenɛnɛ sɔ mɔ.»
300	GEN 12:1	Kɔ Kanu Kəpɔŋ kəloku Abram: «Məwur atɔf ŋam, dəŋkom dam, kəlɔ ka papa kam, məkɔ atɔf nŋɛ indementər əm mɔ.
302	GEN 12:3	Indesɔŋ pətɔt aŋɛ ŋandetolan' am pətɔt mɔ. Indesɔŋ pəlɛc aŋɛ ŋandetolan' am pəlɛc mɔ. Tetam tɔ indesɔŋɛnɛ cusuŋka ca doru fəp pətɔt.»
306	GEN 12:7	Kɔ Kanu Kəpɔŋ kəwurər Abram kɔ kəloku kɔ: «Indesɔŋ atɔf ŋaŋɛ yuruya yam.» K'Abram olompəs dəkəloŋnɛ da Kanu Kəpɔŋ nkɛ kənawurər kɔ dəndo mɔ.
310	GEN 12:11	Ntɛ ɔlɔtərnɛ kəbɛrɛ Misira mɔ, k'oloku wəran kɔn Saray: «Məcəŋkəl im, iŋcərɛ fɔ wəran wətɔt teyi məyɔnɛ.
311	GEN 12:12	K'aka Misira ŋaŋdekɔ-nəŋk əm-ɛ, ŋandekɔ-loku: ‹Wəran kɔn ɔfɔ!› Tɛm tatɔkɔ ŋandekɔ-dif im, ŋasak məna.
312	GEN 12:13	Mədekɔ məloku ŋa a wəkirɛ kem məyɔnɛ. Ntɛ tɔŋsɔŋɛ ŋasumpər im bel-bel tetam mɔ, tetam tendekɔ-sɔŋɛ, ta ifi-ɛ.»
317	GEN 12:18	Kɔ Firawona ewe Abram, k'eyif kɔ: «Cəke cɔ məyɔ em ntɛ? Ake'sɔŋɛ ntɛ məntɔlok' im a wəran kam ɔfɔ mɔ?
318	GEN 12:19	T'ake tɔ məlokɛ a wəkirɛ kam ɔfɔ-ɛ? Məsɔŋ' em kəlɛk kɔ pəyɔnɛ wəran kem. Ndɛkəl oŋ, wəran kam ɛwɛ. Məlɛk kɔ! Məkɔ!»
319	GEN 12:20	Kɔ Firawona oloku afum ɔn, «Nəsak kɔ pəkɔ nkɔn, kɔ wəran kɔn kɔ ca nyɛ yɔyɔnɛ yɔn mɔ.»
327	GEN 13:8	K'Abram oloku Lɔt: «Pəmar fɛ akɛk a yɔcɔl yam ŋacɔp k'akɛk a yɔcɔl yem. Səna sɔ pəmar fɛ su ti, bawo dɛwɛŋca dɔ səyɔnɛnɛ.
328	GEN 13:9	Antɔf fəp ŋɔ ŋaŋɛ ŋey' əm fɔr kiriŋ mɔ. Kɔ məŋkɔ kəca kətɔt-ɛ, iŋkɔ kəmeriya. Kɔ məŋkɔ kəmeriya, iŋkɔ kətɔt, mba məwosɛ səgbɛyɛnɛ.»
333	GEN 13:14	Kɔ Kanu Kəpɔŋ kəloku Abram, ntɛ ŋasakɛnɛ oŋ kɔ Lɔt mɔ: «Məyekti fɔr kəyɛfɛ dənda məyi mɔ, məmɔmən kəca kətɔt, kəmeriya nde dec dɛmpɛ kɔ nde dɛŋkalɛ mɔ.
336	GEN 13:17	Məyɛfɛ məkɔt atɔf ŋaŋɛ dobolu kɔ dowokəlu da ŋi, bawo indesɔŋ əm ŋi.»
354	GEN 14:17	Ntɛ Abram osut Kədɔr-Lahomɛr k'amarɛnɛ ɔn mɔ, kɔ wəbɛ wəka Sodom owur kədefaynɛ kɔ nde aranta ŋa Sawe, nde pəyɔnɛ «Aranta ŋa Wəbɛ» mɔ.
356	GEN 14:19	Kɔ Melkisedek ontolanɛ Abram, k'oloku: «Məna Abram, Kanu nkɛ kəyi fəp kəroŋ mɔ, Wəbɛ wəka dəntɔf kɔ dareŋc, kəpoc' am pətɔt.
357	GEN 14:20	Ileləs Kanu nkɛ kəyi fəp kəroŋ mɔ, nkɛ kəlɛk ayɛfərɛnɛ am kɔ kəmbɛr əm dəwaca mɔ!» Kɔ Abram ɔsɔŋ kɔ farilɛ fa ca yɔkɔ ŋanasɔtɔ dəkəwan mɔ fəp.
358	GEN 14:21	Kɔ wəbɛ wəka Sodom oloku Abram: «Məsɔŋ im afum, məlɛk ca yayɛ fəp yam.»
359	GEN 14:22	Kɔ Abram oluksɛ wəbɛ wəka Sodom mɔcɔp: «Indot kəca nnɔ Kanu Kəpɔŋ nkɛ kəyi afum fəp kəroŋ mɔ, nkɛ kəyɔnɛ wəbɛ wəka dareŋc kɔ dəntɔf mɔ.
360	GEN 14:23	Ifɔlɛk ali paka pin ca yam dacɔ. Ali debeŋa kɔ pəyi fɛ ti-ɛ pɛpətərɛ pa kɔfta kam. Ti tɔ məntɔtam kəloku: ‹In' ɔsɔŋɛ Abram kəyɔ daka.›
361	GEN 14:24	Ifɔlɛk daka o daka, mɛnɛ yeri nyɛ afum em ŋandi mɔ, kɔ kəyer nkɛ atemp em Esekol, Haner, kɔ Mamrɛ ŋasɔtɔ mɔ, bawo pəmar ŋasɔtɔ kəyer.»
362	GEN 15:1	Ntɛ mes mamɔkɔ meŋcepər mɔ, kɔ Kanu Kəpɔŋ kəwurər Abram dəmere kɔ kəloku kɔ ntɛ: «Ta mənesɛ, Abram! Ina yati indeyɔn' am aca. Indeluks' am kəway pəpɔŋ.»
363	GEN 15:2	Kɔ Abram eyif Kanu: «Kanu Wəbɛ Wəpɔŋ, ake məndesɔŋ im-ɛ? Intas ta iyɔ wan-ɛ, wədelɛk kɛ kem ɔyɔnɛ Elihɛsɛr wəka Damas.»
364	GEN 15:3	Kɔ Abram ɔnɔcər: «Məsɔŋ f' em awut, nwɛ aŋkom nde kəlɔ kem disrɛ mɔ, nkɔn endelɛk kɛ kem.»
365	GEN 15:4	Kɔ Kanu Kəpɔŋ kəloku kɔ, «Ala, bafɔ nkɔn endeyɔnɛ wəlɛk ka kɛ kam, mba wan kam wəkom nwɛ endewur əm dəris mɔ yati.»
366	GEN 15:5	Kɔ Kanu kəwurɛnɛ Abram abal ŋɔn disrɛ, kɔ kəloku kɔ: «Məgbətnɛ kɔm. Məlɔm cɔs cacɔkɔ, kɔ məntam-ɛ.» Kɔ kənɔcər: «Pəmɔ cɔs cacɔkɔ, yuruya yam afɔde pactam kəlɔm ŋa fəp.»
368	GEN 15:7	Kɔ Kanu kəloku kɔ: «In' ɔyɔnɛ Kanu Kəpɔŋ nkɛ kənawur' am Ur ŋa aKaldi kədesɔŋ əm atɔf ŋaŋɛ, məde məlɛk ŋi kɛ.»
369	GEN 15:8	Kɔ Abram eyif Kanu, «Kanu Wəbɛ Wəpɔŋ, cəke cɔ indetam kəcərɛ a indesɔtɔ atɔf ŋaŋɛ kɛ-ɛ?»
370	GEN 15:9	Kɔ Kanu kəloku kɔ: «Məkɛr' em wana weyecəra win, wir wɛran win, kɔ aŋkesiya ŋorkun ŋin fəp fayi ya meren maas maas, tɔpay tin kɔ topokpoka tin.»
374	GEN 15:13	Kɔ Kanu kəloku Abram: «Məcərɛ a yuruya yam yendeyɔnɛ acikəra atɔf ŋocuru nŋɛ ŋɔntɔyɔnɛ ŋaŋan mɔ. Ŋandekɔ-yɔnɛ di acar, andekɔ-tɔrəs ŋa di haŋ meren 400.
377	GEN 15:16	Yuruya yam yendeluksərnɛ nnɔ mɛnɛ tɛm ta danapa da maŋkəlɛ, bawo 'Amɔr ŋantacepərər fɛ kiciya kəŋan a idebɛləs ŋa.»
379	GEN 15:18	Dɔsɔk dadɔkɔ dɔ Kanu Kəpɔŋ kəŋcaŋəs kiyi kəŋan tes tin kɔ Abram. Kɔ Kanu kəloku Abram: «Isɔŋ yuruya yam kəyɛfɛ ka kəŋgbɔkɔ ka Misira haŋ Efərat, kəŋgbɔkɔ kəpɔŋ:
382	GEN 15:21	ŋa 'Amɔr, aKanahan, aKirkas, kɔ aYebus.»
384	GEN 16:2	Kɔ Saray oloku Abram: «Mənəŋk, Kanu Kəpɔŋ kəyaməsər im kəsɔtɔ ka wan. Məfəntərɛ kɔ wəcar kem, tɔlɔma intam kəsɔtər kɔ wan wərkun.» Kɔ Abram ɛŋcəŋkəl dim da Saray.
387	GEN 16:5	Kɔ Saray oloku Abram: «Mən' endesarɛ pəcuy pa mɔlɔməs mmɛ ɔlɔməs im mɔ! Ina yati, in' ɛlɛk wəcar kem k'imbɛr əm kɔ dəwaca, mba ntɛ ɛnəŋknɛ oŋ pəbɛkəs mɔ, k'ɛyɛfɛ kəfərfərəs im. Mba Kanu Kəpɔŋ kəmboc su kiti dacɔ (kəyi su dacɔ), ina kɔ məna!»
388	GEN 16:6	Kɔ Abram oluksɛ Saray moloku: «Wəcar kam ey' əm dəwaca. Məyɔ kɔ tɔkɔ tentes' am mɔ.» Awa, kɔ Saray ɔntɔrəs Hakar haŋ kɔ Hakar ɛyɛksər kɔ, k'ɔŋkɔ pəbɔlɛ.
390	GEN 16:8	Kɔ mɛlɛkɛ mmɛ meyif: «Hakar, wəcar ka Saray, deke məyɛfɛ-ɛ? Deke məŋkɔ-ɛ?» Kɔ Hakar oluksɛ mi moloku: «Wəbɛra kem Saray, iyɛksər.»
391	GEN 16:9	Kɔ mɛlɛkɛ ma Kanu Kəpɔŋ moloku, «Məluksərnɛ ndena wəbɛra kam, məkɔ məfəntərɛ kɔ dəntɔf.»
392	GEN 16:10	Kɔ mɛlɛkɛ ma Kanu Kəpɔŋ moloku kɔ: «Indesɔŋɛ yuruya yam yɛla haŋ ta antam kəlɔm ŋa-ɛ.»
393	GEN 16:11	Kɔ mɛlɛkɛ ma Kanu Kəpɔŋ moloku kɔ: «Məmbɛkəs tantɛ, wan wərkun məndekom, wan nwɛ məndesɔŋ tewe ta Səmayila mɔ, bawo Kanu kəne kəkulɛ-kulɛ ka pəcuy pam.
394	GEN 16:12	Wan kam endeyi pəmɔ sɔfale sa dop. Ende pəc-caŋ afum fəp kəyɛfərɛnɛ, fəp fəc-yɛfərɛnɛ kɔ nkɔn. Sona s' endendɛ pəbɔlɛnɛ afum aləpəs aŋɛ.»
395	GEN 16:13	Kɔ Hakar ɔsɔŋ tewe a Kanu Kəpɔŋ nkɛ kənalok-lokər kɔ mɔ, «Ata-Ɛl-Roy,» ti tɔ tatɔkɔ: «Inəŋk nnɔ Kanu nkɛ kənəŋk im mɔ.»
399	GEN 17:1	Ntɛ Abram ɔsɔtɔ meren 99 mɔ, kɔ Kanu Kəpɔŋ kəwurər kɔ, kəc-loku kɔ: «In' ɔyɔnɛ Kanu nkɛ kəntam mes ma doru fəp mɔ, məkɔt fɔr yem kiriŋ, məcəmɛ pəlompu darəŋ.
400	GEN 17:2	Indecaŋəs danapa dosu, ina kɔ məna dacɔ, isɔŋ əm yuruya yɛlarəm.»
402	GEN 17:4	«Ta ina, danapa dem dɛndɛ kɔ məna dacɔ: Məndeyɔnɛ kas ka afum a tɔf yɛlarəm.
406	GEN 17:8	Indesɔŋ əm kɔ yuruya yam atɔf ŋa Kanahan ŋaŋɛ məntɛp kəc-bɛrɛ mɔ fəp, ŋendeyɔnɛ ŋaŋan doru o doru, iyɔnɛ Kanu kəŋan.»
407	GEN 17:9	Kɔ Kanu kəloku Abraham: «Məna kɔ yuruya yam, dɛtɛmp dɛtɛmp nəleləs danapa ndɛ səŋcaŋəs mɔ.
412	GEN 17:14	Wərkun nwɛ o nwɛ antɔkəŋc mɔ, aŋwurɛ wəkayi afum ɔn dacɔ, tɛm tatɔkɔ danapa dem delip nnɔ nkɔn eyi mɔ.»
413	GEN 17:15	Kɔ Kanu kəloku sɔ Abraham: «Ntɛ tɔyɔnɛ ta wəran kam Saray mɔ, ta məwe kɔ sɔ Saray, kəyɛfɛ mɔkɔ Sara s' ande pac-we kɔ.
414	GEN 17:16	Kəpocɛ kɔ k'inder, ipocɛ sɔ məna wan nwɛ endekom' am mɔ. Indepocɛ kɔ pətɔt, nkɔn endeyɔnɛ kɛrɛ ka tɔf yɛlarəm. Abɛ a tɔf yɛlarəm ŋandewur kɔ dəris.»
415	GEN 17:17	Kɔ Abraham ɛŋcəp kəro dəntɔf kəsel, k'olokunɛ dɛbəkəc: «Wərkun wəka meren 100 ɛntam kəkom ba? Kɔ Sara ɔsɔtɔ meren 90 endekom ba?»
416	GEN 17:18	Kɔ Abraham oloku Kanu: «Məgbətənɛ Səmayila doru!»
417	GEN 17:19	Kɔ Kanu kəloku: «Ala! Wəran kam Sara endekom' am wan nwɛ məndewe Isiyaka mɔ. Indecəmɛ danapa dosu darəŋ kɔ nkɔn, iyɛfɛ sɔ icəmɛ di darəŋ kɔ yuruya yɔn kɔ nkɔn eŋcepər-ɛ danapa da doru o doru dɔ.
419	GEN 17:21	Mba ntɛ tɔyɔnɛ ta danapa dem mɔ, Sara oŋkom' am tɛm tantɛ dok.»
428	GEN 18:3	Kɔ Abraham oloku wəkin ŋa dacɔ: «Wəbɛ, ilɛtsɛn' am intam kəsɔtər əm kəwosɛn' em kəcəmɛ ka nnɔna wacar kam?
430	GEN 18:5	Indesɔŋ nu sɔ peri, ntɛ tɔŋsɔŋɛ nu kəsɔtɔ sɔ fənɔntər mɔ, a nədekɔ tɛm tatɔkɔ nəfɔdecepər nnɔ nderem kifəli, iyi kiyi konu.» Kɔ acikəra ŋaloku: «Tentesɛ! Məyɔ tɔkɔ məloku mɔ.»
431	GEN 18:6	Kɔ Abraham ɔŋkɔ katəna-katəna abal ŋɔn disrɛ nde Sara eyi mɔ, k'oloku kɔ: «Məkufɛ məlɛk farin fədɛsdɛs tafala kəmaas məgbɛntɛ akaŋɛ cəcom.»
434	GEN 18:9	Ntɛ ŋalip kədi yeri mɔ, kɔ ŋayif Abraham: «Deke wəran kam Sara eyi-ɛ?» Kɔ Abraham oloku ŋa, «Eyi nde abal disrɛ.»
435	GEN 18:10	Kɔ wəcikəra wəkin oloku: «Inder nnɔ ndaram dok tɛm tantɛ wəran kam Sara endekom wan wərkun.» Sara ɛnacəmɛ dəkusuŋka Abraham tadarəŋ pəc-cəŋkəl.
437	GEN 18:12	Kɔ Sara eselərnɛ pəc-loku: «Ndɛkəl ntɛ isikər oŋ mɔ, pəbotu pendey' im sɔ ba? Wos im sɔ, esikər.»
438	GEN 18:13	Kɔ Kanu Kəpɔŋ kəyif Abraham «Ta ake tɔ Sara eselɛ-ɛ a pəc-loku: ‹Mba kaŋce kɔ, indetam kəsɔtɔ wan nnɔ isikər mɔ ba?›
439	GEN 18:14	Tes teyi ntɛ tɛntambər Kanu Kəpɔŋ mɔ ba? Dok tɛm tantɛ imboŋcər əm mɔ, inder nnɔ ndaram, Sara endesɔtɔ wan wərkun.»
440	GEN 18:15	Kɔ Sara eyemɛ, k'ombupərɛ «Isel fɛ,» bawo ɛnanesɛ. Kɔ Kanu Kəpɔŋ kəŋgbɔkərɛ: «Ala, məsel!»
442	GEN 18:17	Kɔ Kanu Kəpɔŋ kəyifnɛ: «Imɛŋkər Abraham ntɛ ifaŋ kəyɔ mɔ ba?
444	GEN 18:19	Bawo inasom kɔ pəloku awut ɔn kɔ afum ɔn, a ŋacəmɛ dɔpɔ da ina, Kanu Kəpɔŋ darəŋ, ŋacəmɛ pəlompu darəŋ kɔ sariyɛ ntɛ tɔŋsɔŋɛ ina Kanu ilasɛ Abraham dim ndɛ ɛnasɔŋ tetɔn mɔ.»
445	GEN 18:20	Kɔ Kanu Kəpɔŋ kəloku Abraham: «Mes mmɛ amboŋcɛ Sodom kɔ Komora mɔ, mɛmbɛk kɔ kiciya kayi kəyɔ wɛy-wɛy.
446	GEN 18:21	Kətor k'inder dəntɔf idemɔmən kɔ pəyɔnɛ fɔ ntɛ aŋloku taŋan mɔ kaŋce kɔ-ɛ, kɔ pəntɔyɔnɛ ti-ɛ, ina sɔ icərɛ ti.»
448	GEN 18:23	Kɔ Abraham ɔlɔtərnɛ k'eyif Kanu: «Məndekɔ-tɔrsɛnɛ sɔ fum wəlompu pəmɔ wəlɛc ba?
449	GEN 18:24	Tɔlɔma afum atɔt 50 ŋayi afum aka dare dadɔkɔ dacɔ, məndekɔ-ləsər sɔ dare dadɔkɔ ba? Məfɔtam kəŋaŋnɛnɛ ŋa teta afum alompu akaŋɛ 50 aŋɛ ŋayi ŋa dacɔ mɔ?»
450	GEN 18:25	«Tɔbɔl' am məna kəyɔ ka tantɛ! Məfɔdedifɛnɛ fum wəlompu kɔ wətɔlomp, tɛm tatɔkɔ wətɔdəkət pəsɔtɔ pəcuy pin payi kɔ wədəkət. Tɔbɔl' am məna nwɛ məyɔnɛ wəboc kiti ka doru fəp mɔ, məfɔdeyi ta məleləs sariyɛ!»
451	GEN 18:26	Kɔ Kanu Kəpɔŋ kəloku: «K'imbəp nde dare da Sodom disrɛ afum alompu 50-ɛ, iŋaŋnɛnɛ aləpəs akɔ te taŋan.»
452	GEN 18:27	Kɔ Abraham ɔŋgbɔkərɛ k'oloku: «Nəmɔmən ntɛ iyeŋk abəkəc kəlok-lokər Kanu Wəbɛ mɔ, ina nwɛ iyɔnɛ kəbof ka dəntɔf kɔ ka dənɛŋc dəm mɔ.
453	GEN 18:28	Tɔlɔma afum alompu akaŋɛ 50 ŋandekɔ-but afum kəcamət paləsər oŋ dare fəp ba?» Kɔ Kanu kəloku: «Ifɔləsər di k'imbəp di afum alompu 40 kɔ kəcamət-ɛ.»
454	GEN 18:29	Kɔ Abraham ɛŋcəmɛ kɔ darəŋ kəloku kɔ toloku ntɛ: «Tɔlɔma alompu 40 ŋ' andekɔ-bəp di?» Kɔ Kanu kəloku: «Ifɔləsər, k'imbəp di alompu 40-ɛ.»
455	GEN 18:30	Kɔ Abraham oloku: «Ilɔktərn' am, Kanu Wəbɛ! Ta pətɛl' am k'ilok-loku sɔ-ɛ! Tɔlɔma alompu 30 ŋ' andekɔ-bəp di?» Kɔ Kanu kəloku Abraham: «Ifɔləsər di k'imbəp dɔtɔf afum alompu 30-ɛ.»
456	GEN 18:31	Kɔ Abraham oloku: «Kanu Wəbɛ, məŋaŋnɛnɛ mɔcɔp mem. Tɔlɔma alompu wəco mɛrəŋ ŋ' andekɔ-bəp di?» Kɔ Kanu kəloku Abraham: «Ifɔləsər di teta afum akakɔ wəco mɛrəŋ.»
457	GEN 18:32	Kɔ Abraham oloku: «Ilɛtsɛn' am, Wəbɛ kem! Ta pətɛl' am, tɛləpəs t' indelok-lokər əm. Tɔlɔma alompu wəco ŋayi di.» Kɔ Kanu kəloku sɔ Abraham, «Ifɔləsər di teta afum akakɔ wəco.»
460	GEN 19:2	Kɔ Lɔt oloku ŋa: «Ilɛtsɛnɛ nu, nəna abɛ em, nəder nnɔ kəlɔ ka wəcar konu. Nəcepərɛnɛ dɛ pibi, nəbikɛnɛ wɛcək, nədena nəyɛfɛ bət-bətana suy, nəsumpər sɔ dɔpɔ donu, nəkɔ.» Kɔ mɛlɛke ŋaloku kɔ: «Ala, nnɔ tofo tantɛ tɔ səndecepərɛnɛ pibi!»
463	GEN 19:5	Kɔ ŋawe Lɔt kɔ ŋayif kɔ: «Deke afum akɔ ŋayi-ɛ, aŋɛ ŋambɛrɛ nnɔ ndaram nnɔ pibi pampɛ mɔ? Məwurɛnɛ ŋa nnɔ səyi mɔ, ntɛ tɔŋsɔŋɛ səfəntərər ŋa mɔ.»
465	GEN 19:7	K'oloku ŋa: «Ala, Anapa, Ilɛtsɛnɛ nu ta nəyɔ pəlɛc pampɛ!
466	GEN 19:8	Ilɛtsɛnɛ nu! Iyɔ ayecəra mɛrəŋ atɔcərɛ arkun, ilɛtsɛnɛ nu ikɛrɛ nu ŋa nnɔ dabaŋka, nəyɔ ŋa mɛfaŋ monu. Mba ta nəyɔ acikəra em ntɛ o ntɛ, bawo kiyi kem kɔ ŋayinɛ dɛ!»
467	GEN 19:9	K'afum a Sodom ŋaloku kɔ: «Məbɔlɛ day! Məna wəcikəra məfaŋ kəbocər səna dɔpɔ ndɛ səndekɔt mɔ, kɔ məntɔwurɛnɛ ŋa-ɛ, tɔkɔ səndedeŋər məna mɔ tendecepər taŋan!» Kɔ ŋawɛn Lɔt pəpɔŋ kɔ ŋalɔtərnɛ kumba kəkɔ-ləsər ki.
470	GEN 19:12	Kɔ mɛlɛke ŋayif Lɔt: «An' ɔ məyɔ sɔ nnɔ fum-ɛ? Arkun aŋɛ məsɔŋ aran mɔ, awut am arkun kɔ aran, kɔ afum am fəp, akɔ məyɔ dare dandɛ mɔ fəp, məwurɛnɛ ŋa nnɔ dare dandɛ.
471	GEN 19:13	Kələsər kɔ sənder tofo tantɛ, bawo Kanu Kəpɔŋ fɔr kiriŋ, ntɛ aŋlokɛ afum a dare dandɛ mɔ, tɛmbɛk. Kanu Kəpɔŋ kəsom su kədeləsər dare dandɛ.»
472	GEN 19:14	Kɔ Lɔt ɔŋkɔ pəbəp arkun aŋɛ ŋananɛŋcɛ awut ɔn mɔ, k'oloku ŋa: «Nəkufɛ nəyɛfɛ dɛ! Bawo Kanu Kəpɔŋ kənderer kələsər dare dandɛ.» Mba, kɔ arkun akaŋɛ ŋaŋcɛm-cɛmənɛ a kəwoləs kɔ Lɔt ɛndɛ.
473	GEN 19:15	Pəndeyi dɔsɔka dɛləpəs kɔ mɛlɛke ŋaloku Lɔt: «Məroknɛ məyɛfɛ dɛ, məlɛk wəran kam, kɔ awut am ayecəra aŋɛ ŋayi nnɔ mɔ, ta pəlɛc pedesɔtɔ ŋa kɔ dare dandɛ deŋciya mɔ.»
475	GEN 19:17	Ntɛ mɛlɛke ŋawurɛnɛ ŋa dare disrɛ mɔ, kɔ mɛlɛkɛ min moloku Lɔt: «Məyɛksɛ ntɛ tɔŋsɔŋɛ ta məfi mɔ! Ta məmɔmən tadarəŋ, ta məcəmbərəs tofo o tofo nnɔ aranta ŋaŋɛ! Məkɔ məndɛ məyacnɛ nde dətɔrɔ, ta mədefi.»
476	GEN 19:18	Kɔ Lɔt oloku ŋa: «Ala, wəbɛ kem! Tɔfɔtam kəyi.
478	GEN 19:20	Ilɛtsɛn' am məŋnəŋk dare dɔkɔ, dɔlɔtərn' em k'iyɛksɛ ibɛrɛ di kɔ dɛfɛtɛ sɔ. Məc' em ikɔ indɛ iyacnɛ di, dɛfɛtɛ fɛ ba? Intam di kəbɛrɛ, tɔsɔŋ' em kəyi doru!»
479	GEN 19:21	Kɔ mɛlɛkɛ moloku kɔ: «Awa, kətola kam kankɛ disrɛ, ifɔləsər dare dadɔkɔ məŋle mɔ.
480	GEN 19:22	Awa, məroknɛ məkɔ, bawo ifɔtam kəyɔ tɔlɔm o tɔlɔm ta məntabɛrɛ di-ɛ.» Ti t' ɔsɔŋɛ ntɛ awenɛ dare dadɔkɔ Cohar mɔ.
489	GEN 19:31	Kɔ wan wəran wəcɔkɔ-cɔkɔ wəka Lɔt oloku wələpəs: «Papa kosu ɔyɔnɛ wətem, fum eyi fɛ dɔtɔf nwɛ endeder su mɔ, pəmɔ ntɛ mes mosu mokur moloku ti mɔ.
490	GEN 19:32	Məder səsɔŋɛ kɔ kəmun member ntɛ tɔŋsɔŋɛ pəfəntərər su, tɔŋsɔŋɛ səsɔtɔnɛ kɔ yuruya mɔ.»
492	GEN 19:34	Dɔckɔsɔk k'oloku wəfɛtəra kɔn: «Ifəntərɛna nnɔ pibi kɔ papa. Pasɔŋɛ kɔ sɔ kəmun member nnɔ pibi, ntɛ tɔŋsɔŋɛ məna sɔ nəkɔ nəfəntərɛ kɔ nkɔn mɔ tɔsɔŋɛ pasɔtɔnɛ kɔ yuruya mɔ.»
496	GEN 19:38	Kɔ wan ka Lɔt wəran wəfɛt oŋkom wan wərkun, k'ewe kɔ «Bɛn-Ammi.» Nkɔn ɔyɔnɛ papa ka 'Amɔŋ ŋayi doru haŋ mɔkɔ.
498	GEN 20:2	Abraham oŋc-loku afum aka di teta wəran kɔn Sara: «Wəkirɛ kem ɔfɔ.» Kɔ Abimɛlɛk, wəbɛ wəka Kerar, ɛmbaŋ Sara.
499	GEN 20:3	Awa, kɔ Kanu kənder Abimɛlɛk dəmere ma pibi kɔ kəloku kɔ: «Kəfi kɔ mənder teta wəran wəkɔ məsumpər mɔ, bawo wəran wəlɔ ɔfɔ!»
500	GEN 20:4	Abimɛlɛk nwɛ ɛnatɔgbuŋɛnɛ wəran nwɛ mɔ, k'eyif: «Kanu cəke cɔ pəyi-ɛ, kədif kɔ mənder atɔf ŋin ali ŋayɔnɛ afum alompu?
501	GEN 20:5	Nkɔn Abraham yati olok' im: ‹Wəkirɛ kem ɔfɔ,› kɔ wəran yati nkɔn sɔ oloku: ‹Wɛŋc im wərkun ɔfɔ?› Abəkəc ŋosoku ŋ' inayɔ, ali pəlɛc iyɔ fɛ.»
502	GEN 20:6	Kɔ Kanu kəloku kɔ dəmere: «Iŋcərɛ bel-bel ina sɔ, a abəkəc ŋosoku ŋɔ mənayɔ ntɛ məcyɔ tantɛ mɔ. Ina yati in' ɛyaməs am kədəktər im, ti t' inatɔwos' am a məgbuŋɛnɛ kɔ.
503	GEN 20:7	Ndɛkəl, məluksɛ wəran wəkawɛ wos. Bawo wədəŋk wəka Kanu ɔ ɔyɔnɛ, endetolan' am məyi doru. Kɔ məntɔluksɛ kɔ-ɛ, məcərɛ a kəfi kɔ mənder kɔ ca yɔkɔ məyɔ mɔ fəp.»
505	GEN 20:9	Kɔ Abimɛlɛk ewe Abraham k'eyif kɔ: «Cəke cɔ məyɔ su tantɛ-ɛ? Kɔ kiciya kəre k'iŋciy' am-ɛ, ntɛ məsɔŋɛ su, ina k'atɔf ŋem kəciya pəpɔŋ mɔ? Məyɔ em mɔyɔ mmɛ pəntɔmar məyɔ em mɔ.»
506	GEN 20:10	Kɔ Abimɛlɛk eyif Abraham: «Cəke cɔ mənafaŋ ntɛ məyɔ tantɛ mɔ?»
507	GEN 20:11	Kɔ Abraham oloku: «Inacɛm-cɛmnɛ a kənesɛ Kanu kəyi fɛ nnɔ, a andedif im teta wəran kem.
509	GEN 20:13	Ntɛ Kanu kəsɔŋ' em kəyɛfɛ kəlɔ ka papa wəkem mɔ, ti t' inaloku Sara: ‹Məlɛk' em layidi kəca nkɛ o nkɛ səŋkɔ mɔ, mədekɔ məcloku a wɛŋc əm wərkun iyɔnɛ.›»
511	GEN 20:15	Kɔ Abimɛlɛk oloku: «Atɔf ŋem ŋɔ ŋaŋɛ nnɔ fɔr yam kiriŋ, məndɛ nnɔ pəndebɔt əm mɔ.»
512	GEN 20:16	K'oloku Sara: «Isɔŋ wɛŋc əm wərkun mɛŋcəmbəl ma gbeti wul win, bɔyɔn' am aca nnɔ afum ŋayi mɔ, kəmentər fɔ məŋcərɛ fɛ tɔlɔm o tɔlɔm tes tantɛ disrɛ.»
517	GEN 21:3	Kɔ Abraham ewe wan wərkun nwɛ Sara oŋkomɛ kɔ mɔ «Isiyaka.»
520	GEN 21:6	Kɔ Sara oloku: «Kanu kəsɔŋ' em kəselsər. Nwɛ o nwɛ ene kəkom kem Isiyaka mɔ, tɔŋyɔ kɔ mesel.»
521	GEN 21:7	K'endeŋər: «An' ɛnatam kəsɔŋɛ Abraham kəlaŋ a Sara endemɛsər awut-ɛ? Mba iŋkomɛ kɔ wan wərkun detem dɔn disrɛ.»
524	GEN 21:10	Kɔ Sara oloku Abraham: «Məbɛləs wan wəran wəcar nwɛ kɔ wan kɔn wərkun. Bawo wan ka wəcar wəkawɛ ŋafɔdepaŋnɛ kɛ kɔ wan kem.»
526	GEN 21:12	Mba kɔ Kanu kəloku Abraham: «Ta tɛtɛl' am teta wan kam wərkun kɔ kɛrɛ, wəcar kam. Məwosɛnɛ Sara ntɛ o ntɛ ɛŋfaŋər əm mɔ. Bawo nnɔ Isiyaka eyi mɔ, məndesɔtɔ yuruya nyɛ yendetɔmpər tewe tam mɔ.
527	GEN 21:13	Indeyɔnɛ sɔ wan ka wəcar kam atɔf. Bawo nkɔn sɔ yuruya yam y' ɔyɔnɛ.»
530	GEN 21:16	K'ɛŋkafələr k'ɔŋkɔ pəndɛ kəsək pəc-cɔpəsnɛ: «Ifaŋ fɛ kəgbətənɛ wan kem pəc-fi.» K'ɔŋkɔ pəndɛ pəbɔlɛnɛ kɔ dobolu da kələm ka ambəŋcəran katin pətɛfərnɛ kɔ, pəc-bok.
531	GEN 21:17	Kɔ Kanu kəne wan dim, kɔ mɛlɛkɛ ma Kanu mewe Hakar dareŋc kɔ meyif kɔ: «Ak' ɔyɔ əm-ɛ Hakar? Ta mənesɛ! Bawo Kanu kəne wan kam dim nde eyi mɔ.
532	GEN 21:18	Məyɛfɛ məlɛk wan, məsumpər kɔ waca mɛrəŋ, bawo afum alarəm ŋ' indesɔŋ kɔ.»
536	GEN 21:22	Tɛm tatɔkɔ, Abimɛlɛk ŋasol kɔ Pikɔl, wəbɛ wəka asɔdar ɔn, k'ende pəloku Abraham: «Kanu kəsol am mes mmɛ məŋyɔ mɔ fəp.
537	GEN 21:23	Mədɛrəm' em oŋ ma nnɔ, məckornɛ Kanu a məfɔdetiŋkər im, məfɔdesɔtiŋkər awut em, məfɔtiŋkər awut-sɔ em, kɔ məndetɔmpər em kɔ atɔf nŋɛ məyi mɔ abəkəc ŋosoku, pəmɔ layidi ndɛ intɔmpər' am mɔ.»