1	GEN 1:1	Dəkəcop, kɔ Kanu kəwurɛ kɔm k'antɔf.
2	GEN 1:2	Tɛm tatɔkɔ antɔf ŋɛnayɔ fɛ teyi, kubump kənayi kəba kəroŋ. Mba Derkifin da Kanu dɛnayi sɔ domun kəroŋ doc-bum yi.
5	GEN 1:5	Kɔ Kanu kəwe pəwaŋkəra «dɔsɔk», kɔ kəwe kubump «pibi.» Kɔ dɔfɔy deyi, kɔ bət-bət beyi, kɔ tɔyɔnɛ dɔsɔk dɔcɔkɔ-cɔkɔ.
6	GEN 1:6	Kɔ Kanu kəloku sɔ: «Pəkuymɛ peyi, ntɛ tɔŋsɔŋɛ domun deyersɛnɛ mɔ!»
7	GEN 1:7	Kɔ Kanu kəyɔ kɔ pəkuymɛ peyi kɔ pɛŋgbɛy domun d'antɔf kɔ dakəroŋ, kɔ teyi tatɔkɔ.
8	GEN 1:8	Kɔ Kanu kəwe pəkuymɛ mpɛ «kɔm.» Kɔ dɔfɔy deyi kɔ bət-bət beyi, kɔ tɔyɔnɛ dɔsɔk da mɛrəŋ.
9	GEN 1:9	Kɔ Kanu kəloku: «Domun ndɛ deyi kɔm tantɔf mɔ, doloŋkanɛ tofo tin, pəwosu peyi, pəwur, pəyi takəroŋ!» Kɔ teyi tatɔkɔ.
10	GEN 1:10	Kɔ Kanu kəwe tofo towosu «antɔf,» kɔ kəwe mofo mmɛ mɛla domun mɔ «cəba.» Kɔ Kanu kənəŋk fɔ tentesɛ tatɔkɔ.
11	GEN 1:11	Kɔ Kanu kəloku sɔ: «Antɔf ŋopoŋ pubuk, yika ŋa defet, kɔ tɔk yokom nyɛ yende yoc-kom antɔf kəroŋ taciŋa mɔ! Yɔyɔ sɔ defet dakayi!» Kɔ teyi tatɔkɔ.
12	GEN 1:12	K'antɔf ŋompoŋ pəbuk, kɔ yika yɔyɔ defet, kɔ tɔk yokom yɔyɔ defet dakayi. Kɔ Kanu kənəŋk sɔ fɔ tentesɛ.
13	GEN 1:13	Kɔ dɔfɔy deyi kɔ bət-bət beyi, kɔ tɔyɔnɛ tataka ta maas.
14	GEN 1:14	Kɔ Kanu kəloku sɔ: «Yomotər-motər yeyi dəpəkuymɛ, ntɛ tɔŋsɔŋɛ dɔsɔk dɛgbɛyɛnɛ kɔ pibi mɔ! Kɔ tɔyɔnɛ mɛgbɛkərɛ ma tɛm, dɔsɔk kɔ meren.
16	GEN 1:16	Kɔ Kanu kəwurɛ yomotər-motər mɛrəŋ kɔ kəndɛt yi . Pomot pɔpɔŋ pɛtasərnɛ dɔsɔk, kɔ pomot pɛfɛt pɛtasərnɛ pibi. Kɔ Kanu kəwurɛ cɔs kɔ kəndɛt.
18	GEN 1:18	Pomot pɔpɔŋ pɛtasərnɛ dɔsɔk, pomot pɛfɛt kɔ cɔs yɛtasərnɛ pibi, tɔsɔŋɛ pəwaŋkəra pɛgbɛyɛnɛ kɔ kubump. Kɔ Kanu kənəŋk fɔ tentesɛ.
19	GEN 1:19	Kɔ dɔfɔy deyi, kɔ bət-bət beyi, kɔ tɔyɔnɛ tataka ta maŋkəlɛ.
21	GEN 1:21	Kɔ Kanu kəwurɛ sɛm yɔpɔŋ ya dəromun dokom dokom, kɔ yɛŋɛrəŋ-ŋɛrəŋ ya dəromun, kɔ domun doŋcop kəsɛp. Kɔ Kanu kəwurɛ sɔ bɛmp dokom dokom. Kɔ Kanu kənəŋk fɔ tentesɛ.
22	GEN 1:22	Kɔ Kanu kəmpocɛ yi pətɔt, kɔ kəloku: «Nəyɔnɛ akombəra, nəla, nəlas domun da dəkəba, kɔ bɛmp, yɛla antɔf kəroŋ!»
23	GEN 1:23	Kɔ dɔfɔy deyi kɔ bət-bət beyi, kɔ tɔyɔnɛ tataka ta kəcamət.
24	GEN 1:24	Kɔ Kanu kəloku sɔ: «Antɔf ŋɔyɔ yeŋesəm dokom dokom, sɛm yɔcɔl, yeliŋɛ-liŋɛ, kɔ sɛm ya dəkulum, fəp fa yi kɔ dokom da yi!» Kɔ teyi tatɔkɔ.
25	GEN 1:25	Kɔ Kanu kəwurɛ sɛm ya dəkulum dokom dokom, yɔcɔl dokom dokom kɔ yeliŋɛ-liŋɛ fəp dokom dokom. Kɔ Kanu kənəŋk fɔ tentesɛ.
26	GEN 1:26	Kɔ Kanu kəloku: «Awa, palompəs fum teyi tosu, wəwurɛnɛ kosu, nwɛ endetasərnɛ lop ya dəkəba, bɛmp ya dareŋc, yɔcɔl kɔ yeliŋɛ-liŋɛ ya dəntɔf fəp mɔ!»
27	GEN 1:27	Kɔ Kanu kəlompəs fum pəwurɛnɛ kɔ nkɔn Kanu, kɔ kəlompəs ŋa ŋawurɛnɛ kɔ nkɔn Kanu, wərkun kɔ wəran.
28	GEN 1:28	Kɔ Kanu kəmpocɛ ŋa pətɔt, kɔ kəloku: «Nəyɔnɛ akombəra, nəla, nəlas antɔf, nəboc antɔf tɛfaŋ tonu! Nətasərnɛ lop ya dəkəba, bɛmp nyɛ yɛŋfɛlər dareŋc mɔ, sɛm kɔ yeliŋɛ-liŋɛ ya dəntɔf fəp.»
29	GEN 1:29	Kɔ Kanu kəloku: «Isɔŋ nu yika nyɛ yɔyɔ defet dakayi mɔ, kɔ yokom ya tɔk. Yɔyɔnɛ nu yeri.
30	GEN 1:30	Sɛm ya dəntɔf, bɛmp ya dareŋc, yɛfɛlər-fɛlər ya dareŋc, kɔ yeliŋɛ-liŋɛ ya dəntɔf, ca fəp nyɛ yeŋesəm mɔ, isɔŋ yi dəmnɛ yika yobuk yɔyɔnɛ yi yeri.» Kɔ teyi sɔ tatɔkɔ.
31	GEN 1:31	Kɔ Kanu kənəŋk fɔ mes mɔkɔ ɛnayɔ mɔ fəp, mɔtɔt dəm mɛnayi. Kɔ dɔfɔy deyi kɔ bət-bət beyi, kɔ tɔyɔnɛ tataka ta camət-tin.
32	GEN 2:1	Dɔsɔk da camət-tin dadɔkɔ, di d' analəpəs kɔm, antɔf kɔ ca yɛləpəs nyɛ.
33	GEN 2:2	Tataka ta camət-mɛrəŋ, kɔ yolompəs ya Kanu fəp yelip, k'ɛsak, k'eŋesəm tataka ta camət-mɛrəŋ ta yɛbəc yɔn.
34	GEN 2:3	Kɔ Kanu kəsɔŋ tataka ta camət-mɛrəŋ pəleli. K'eleləs pi, bawo dɔsɔk dadɔkɔ dɔ Kanu kəsak yɛbəc ya kəlompəs yɔkɔ ɛnayi mɔ.
35	GEN 2:4	Dəkəyɛfɛ da kɔm k'antɔf dɔ dadɔkɔ, ntɛ awurɛ yi mɔ. Ntɛ Mariki Kanu owurɛ antɔf kɔ kɔm mɔ,
36	GEN 2:5	ali tɔtɔk pa dalɛ pin pɛnayi fɛ antɔf kəroŋ, ali ayika ŋa dalɛ ŋin ŋɛnapoŋ fɛ tɛm tatɔkɔ. Bawo Mariki Kanu ɛnatorɛ fɛ wəcafən dəntɔf, fum ɛnayi fɛ sɔ, nwɛ ɛmbəc antɔf mɔ.
37	GEN 2:6	Mba kifir kəŋc-pɛ dəntɔf, nkɛ kəŋc-dəməs antɔf fəp mɔ.
38	GEN 2:7	Kɔ Kanu Kəpɔŋ kəsɛlɛ fum kəbof ka dəntɔf. Kɔ Kanu kəfurup kɔ dololəm kifir ka kəyinɛ doru, kɔ fum ɔyɔnɛ paka peŋesəm.
39	GEN 2:8	Kɔ Kanu Kəpɔŋ kəmbɔf tɔk yokom nde dalɛ da Edeŋ, kəca nkɛ dec dɛmpɛ mɔ, k'ɛmbɛrsɛ di fum nwɛ ɛnasɛl mɔ.
40	GEN 2:9	Kɔ Kanu Kəpɔŋ kəsɔŋɛ kɔ tɔk yokom yɔbɔt kədi yompoŋəs-poŋəs fəp, kəlɛkɛnɛ kətɔk ka kəyinɛ wəyeŋ katina nkɛ kənacəmɛ nde dalɛ dacɔ mɔ, kɔ kətɔk ka kəcərɛnɛ pətɔt kɔ pəlɛc.
41	GEN 2:10	Kɔ kəŋgbɔkɔ kəwur Edeŋ, nkɛ kəŋc-dəməs dalɛ mɔ. Kɔ kəŋgbɔkɔ kaŋkɔ kəŋkɔ kəyerənɛ dalɛ disrɛ waca maŋkəlɛ.
42	GEN 2:11	Kəca kəcɔkɔ-cɔkɔ k'aŋc-we «Pisɔŋ», ki kənɔŋkər atɔf ŋa Hawila fəp, nde kɛma kəyi mɔ.
43	GEN 2:12	(Nde ambəp kɛma kəsoku pɛs mɔ, ŋcɛmcɛm yobotu ambɔŋc, kɔ masar momotər-motər .)
44	GEN 2:13	Kəca ka mɛrəŋ k'aŋwe «Kihɔŋ», ki kənɔŋkər atɔf ŋa Kus.
45	GEN 2:14	K'aŋwe kəŋgbɔkɔ ka maas «Tikər», ki kəcepər kəca nkɛ dec dɛmpɛ dare da Asur mɔ. Kəŋgbɔkɔ ka maŋkəlɛ kəyɔnɛ «Efərat.»
46	GEN 2:15	Kɔ Kanu Kəpɔŋ kəlɛk fum, kɔ kəmbɛrsɛ kɔ dalɛ da Edeŋ disrɛ, a pəbɔfət ca, pəbumɛnɛ sɔ di.
48	GEN 2:17	Mba ta mədi pokom pa kətɔk ka kəcərɛnɛ pətɔt kɔ pəlɛc de! Bawo dɔsɔk ndɛ məndedi pokom pa ki mɔ, məŋfi!»
49	GEN 2:18	Kɔ Kanu Kəpɔŋ kəloku: «Pəmar fɛ wərkun pəyi sona! Indelompəs wəmarəs kɔn, ntɛ tɔŋsɔŋɛ ŋayi mɛrəŋ mɔ.»
50	GEN 2:19	Kɔ Kanu Kəpɔŋ kəŋkɛrɛ fum sɛm ya dalɛ kɔ bɛmp ya dareŋc nyɛ kənawurɛ dəntɔf mɔ, kədemɔmən ntɛ ende pəcwe yi mɔ. Ntɛ tɔŋsɔŋɛ yowurɛ yɔn fəp yɔyɔ mewe mmɛ fum ende pəcwe yi mɔ.
51	GEN 2:20	Kɔ fum ɔsɔŋ sɛm yɔcɔl fəp mewe, kɔ bɛmp ya dareŋc kɔ fum ɔsɔŋ sɔ sɛm ya dəkulum fəp mewe. Mba ta fum taŋ, ɔsɔtɔ fɛ nwɛ endetam kəcmar kɔ mɔ.
52	GEN 2:21	Kɔ Kanu Kəpɔŋ kəsɔŋ wərkun mere mɔpɔŋ, k'endirɛ. Kɔ Kanu kəwurɛ wərkun kəbɛnt kəkəsək ka dɛbəkəc. Kɔ kəluksərnɛ sɔ, kɔ kəntaməs dənda.
53	GEN 2:22	Kɔ Kanu Kəpɔŋ kəlompəsɛ wəran kəbɛnt kəkəsək nkɛ ɛnawurɛ wərkun mɔ, k'eŋkenɛ wərkun wəran nwɛ.
54	GEN 2:23	Kɔ wərkun oŋkulɛ: «Apayo!» «Wəkawɛ taŋ, kəbɛnt ka bɛnt yem, tɛsɛm ta sɛm yem.» Wəkawɛ andewe «wəran» wənɛŋcɛnɛ ka wərkun, bawo nnɔ dis dem d' awurɛ kɔ.
56	GEN 2:25	Wərkun kɔ wəran kɔn fəp faŋan kəsɔkər kɔ ŋanayi, ta ŋaŋlapərɛnɛ-ɛ.
59	GEN 3:3	Mba kətɔk nkɛ kəyi dalɛ dacɔ mɔ, Kanu kəloku: ‹Ta nədi yokom ya ki, ta nəgbuŋɛnɛ ŋaŋ ki! Kɔ nəyɔ ti-ɛ, nəŋfi.›»
61	GEN 3:5	Bawo Kanu kəŋcərɛ, a dɔsɔk ndɛ nəndi yi mɔ, fɔr yonu yeŋmepɛ, nəyi pəmɔ Kanu nkɛ kəŋcərɛ pətɔt kɔ pəlɛc mɔ.»
62	GEN 3:6	Kɔ wəran ɛnəŋk a pokom pa kətɔk pɔmbɔt kədi, pɔmbɔt kəmɔmən, pentam kəsɔŋ kəcərɛ pətɔt kɔ pəlɛc. Kɔ wəran oŋgbotu pokom k'endi. K'ɔsɔŋ wos wəkɔ ŋanasol mɔ, kɔ wəkakɔ sɔ endi.
63	GEN 3:7	Kɔ ŋamepɛ fɔr, kɔ ŋaŋcərɛnɛ a kəsɔkər kɔ ŋawur. Kɔ ŋaŋgbotu bɔpər ya kətɔk ka cəpɔp, kɔ ŋasɔt maŋkara kɔ ŋambɛrnɛ mi.
64	GEN 3:8	Dec dɔrɔfɔy, ntɛ tefef towur mɔ, wərkun kɔ wəran ŋane dim da Kanu Kəpɔŋ, nkɛ kəŋckɔtəs mɔ. wərkun kɔ wəran kɔ ŋaŋkɔ ŋagbɔpnɛ ŋabɔlɛ Kanu fɔr kiriŋ, tɔk ya dalɛ dadɔkɔ dacɔ.
66	GEN 3:10	Kɔ wərkun oloku Kanu: «Dim d' in' am dalɛ disrɛ, k'inesɛ, bawo iwur kəsɔkər, ti t' iŋgbɔpnɛnɛ.»
68	GEN 3:12	Kɔ wərkun oloku: «Wəran nwɛ məsɔŋ im mɔ, nkɔn ɔsɔŋ im pi k'ina sɔ indi.»
69	GEN 3:13	Kɔ Kanu kəyif wəran: «Ta ake tɔ məyɔnɛ tantɛ-ɛ?» Kɔ wəran oloku Kanu: «Abok ŋetiŋkər im, k'indi pokom pampɛ.»
70	GEN 3:14	Kɔ Kanu Kəpɔŋ kəloku abok: «Bawo məsɔŋɛ wəran kəciya, kəsɔŋ əm kənder pəlɛc sɛm yɔcɔl, kɔ sɛm ya dop fəp dacɔ. Kor kɔ mənde məcliŋɛnɛ, məcdi kəbof mataka ma kiyi kam doru fəp.
71	GEN 3:15	Kəbɛrs əm k'inder dacɔ kɔ wəran, kəyɛfɛ nəna haŋ awut a wəran kəbəp awut a məna, Abok! Wəran ende pəc-putək əm domp, məna, Abok, məc-ŋaŋ kɔ dəmnɛ atek.»
73	GEN 3:17	Kɔ Kanu kəloku wərkun: «Bawo, məŋcəŋkəl dim da wəran kam, kɔ məndi pokom pa kətɔk nkɛ inamɔn' am kədi mɔ, Indesɔŋ antɔf pəlɛc tetam: Pəcuca pɔ mənde məcsɔtər ŋi yeri yam dɔsɔk o dɔsɔk kiyi kam doru fəp.
75	GEN 3:19	Kawonɛ ka tobu tam kəndesɔŋ' am kəc-sɔm kəcom haŋ tɛm ntɛ məndelukus dəntɔf nde məyɛfɛ mɔ. Bawo kəbof kɔ məyɔnɛ, dəkəbof məndesɔ-lukus.»
76	GEN 3:20	Kɔ wərkun ɔsɔŋ wəran kɔn tewe ta «Hawa», bawo nkɔn Hawa ɔyɔnɛ iya wəka afum a doru fəp.
77	GEN 3:21	Kɔ Kanu Kəpɔŋ kəlompsɛ Adama kɔ wəran kɔn, Hawa, yamos ya akata, k'ɛmbɛr ŋa yi.
78	GEN 3:22	Kɔ Kanu Kəpɔŋ kəloku: «Ah! Ntɛ fum ende pəyi oŋ pəmɔ səna mɔ, pəcərɛ pəlɛc kɔ pətɔt, səkɛmbərnɛ ta pətɛŋc kəca pəlɛk sɔ pokom pa kətɔk kəyinɛ wəyeŋ, pədeyi oŋ doru katina.»
79	GEN 3:23	Kɔ Kanu Kəpɔŋ kəwurɛnɛ kɔ dalɛ da Edeŋ disrɛ, pəkɔbəc antɔf nyɛ kənasɛlɛ kɔ mɔ.
80	GEN 3:24	Ntɛ Kanu kəwurɛnɛ fum dalɛ da Edeŋ mɔ, kɔ kəŋcəmbər mɛlɛke ntende dec dɛmpɛ dalɛ da Edeŋ, kɔ dakma ndɛ deŋcfikəlɛ dɛc-cɛsəŋɛ nɛŋc, ntɛ tɔŋsɔŋɛ ta alɔtərnɛ kətɔk ka kəyinɛ wəyeŋ mɔ.
81	GEN 4:1	K'Adama ŋambəpɛnɛ kɔ wəran kɔn Hawa, kɔ Hawa ɛmbɛkəs, k'oŋkom Kayin. Kɔ Hawa oloku: «Isɔtɔ wan wərkun kəmar ka Kanu disrɛ.»
83	GEN 4:3	Kɔ tɛm tɔlɔma tende tɛbəp mɔ, kɔ Kayin ɛlɛk yokom ya dəntɔf, k'ɛŋkɛrɛ yi Kanu kədeloŋnɛ.
84	GEN 4:4	K'Abɛl nkɔn sɔ, ɛŋkɛrɛ yokom yɔcɔkɔ-cɔkɔ ya yɔcɔl yɔn kɔ moro ma yi. Kɔ Kanu Kəpɔŋ kəmɔmənɛ Abɛl kɔ kəloŋnɛ kɔn fɔr yɔtɔt.
85	GEN 4:5	Mba Kanu kəmɔmənɛ fɛ Kayin kɔ kəloŋnɛ kɔn fɔr yɔtɔt. Kɔ pəntɛlɛ Kayin, k'ɛŋɛy kəro.
86	GEN 4:6	Kɔ Kanu kəyif Kayin: «Ta ake tɔ pəntɛlɛn' am-ɛ, ta ake tɔ məŋɛyɛ kəro-ɛ?
87	GEN 4:7	Kɔ məŋkɔt bel-bel-ɛ, məndesel. Kɔ kɔ məŋkɔt pəlɛc-ɛ, kiciya kəy' əm dəkusuŋka kɔ mɛfaŋ ma ki mey' əm. Mba məsɛp mətasərnɛ ki.»
88	GEN 4:8	Kɔ Kayin ɔŋcɔpər wɛŋc Abɛl. Mba ntɛ ŋanayi dalɛ mɔ, kɔ Kayin ɛyɛfər wɛŋc Abɛl kəsutɛnɛ, k'endif kɔ.
91	GEN 4:11	Ndɛkəl oŋ, kətolan' am k'antɔf ŋender pəlɛc, nŋɛ ŋɛwani kusu kɔ məsɔŋɛ ŋi kəmerəs mecir ma wɛŋc əm mɔ.
92	GEN 4:12	Kɔ mənde məcbəc antɔf-ɛ, ŋɔfɔde ŋɔcsɔŋ əm pəbotu pa ŋi. Ti tɔ pənde pəctɛlɛn' am məc-cepɛ-cepɛ dəkəbəc.»
94	GEN 4:14	Məmbɛləs im mɔkɔ nnɔ antɔf ŋam ŋebi ŋeyi mɔ. Pənamar im kəgbɔpən' am, kɔ kəcepɛ-cepɛ dəntɔf, kɔ fum ɛmbəp im dənda-ɛ, pədif im.»
95	GEN 4:15	Mba, kɔ Kanu Kəpɔŋ kəloku kɔ: «Kɔ fum endif Kayin-ɛ, aŋluksɛ ayɛk ŋɔn camət-mɛrəŋ.» Kɔ Kanu kəŋgbesi Kayin ntɛ tɔŋsɔŋɛ aŋɛ ŋambəp kɔ mɔ, ta ŋasut kɔ ŋadif.
96	GEN 4:16	Kɔ Kayin owur fɔr ya Kanu kiriŋ dalɛ da Edeŋ, k'ɔŋkɔ pəyi atɔf ŋa Nɔdu nde dec dɛmpɛ dalɛ da Edeŋ mɔ.
98	GEN 4:18	Kɔ Henok oŋkom Iradu, k'Iradu oŋkom Mehuyayɛl, kɔ Mehuyayɛl oŋkom Metusayɛl, kɔ Metusayɛl oŋkom Lɛmɛk.
99	GEN 4:19	Kɔ Lɛmɛk ɛlɛk aran mɛrəŋ, pacwe wəkin «Ada,» kɔ wəka mɛrəŋ «Cila.»
100	GEN 4:20	K'Ada oŋkom Yabal, nkɔn ɔyɔnɛ wətem ka akɛk yɔcɔl acepɛ-cepɛ.
102	GEN 4:22	Kɔ Cila nkɔn sɔ dəmnɛ oŋkom Tubal-Kayin, nwɛ ɛŋcgbɛc ca fəp ya kɔpər kɔ ya fɛc mɔ. Wəkirɛ kɔn aŋcwe Nahama.
103	GEN 4:23	Kɔ Lɛmɛk oloku aran ɔn: «Ada kɔ Sila nəcəŋkəl dim dem! Aran a Lemɛk nəsu ləŋəs nəcəŋkəl moloku mem. K'asut im-ɛ, indif fum. K'ambopər im-ɛ, indif wanfɛt.
104	GEN 4:24	Kɔ pəyɔnɛ fɔ padif afum camət-mɛrəŋ kəluksɛ ayɛk ŋa Kayin-ɛ, andedif afum 77, a pacluksɛ ayɛk ŋa Lemɛk.»
105	GEN 4:25	Adama kɔ Hawa ŋasɔtɔ sɔ wan. Kɔ Hawa ewe kɔ «Sɛt», ti tɔ tatɔkɔ «Kanu kəsɔŋ im sɔ wəlɔma kədeyɔn' em Abɛl wəkɔ Kayin endif mɔ.»
107	GEN 5:1	Buk ba dokombəra da Adama bɔ bambɛ. Dɔsɔk ndɛ Kanu kəsɛl Adama mɔ, k'ɛsɛl kɔ, pəwurɛnɛ kɔ nkɔn Kanu.
108	GEN 5:2	wərkun kɔ wəran k'ɛsɛl ŋa, k'ompocɛ ŋa pətɔt, k'ewe ŋa tewe ta «fum,» tɛm ntɛ ɛŋc-sɛl ŋa mɔ.
109	GEN 5:3	Adama endesɔtɔ meren 130, k'ɔsɔtɔ wan wəwurɛnɛ kɔ nkɔn, pəmɔ tɔkɔ eyi mɔ, k'ɔsɔŋ kɔ tewe ta Sɛt.
110	GEN 5:4	Ntɛ Adama oŋkom Sɛt mɔ, k'eyi sɔ doru meren 800, mmɛ ɛnasɔtɔ sɔ awut arkun k'awut aran mɔ.
111	GEN 5:5	Kəwon ka Adama doru kənasɔtɔ meren 930, a k'endefi.
112	GEN 5:6	Sɛt ɛnasɔtɔ meren 105, a k'endekom Enɔs.
113	GEN 5:7	Ntɛ Sɛt oŋkom Enɔs mɔ, k'eyi sɔ doru meren 807, mmɛ ɛnakom sɔ awut arkun k'awut aran alɔma mɔ.
114	GEN 5:8	Kəwon ka Sɛt doru kənasɔtɔ meren 912, k'efi.
116	GEN 5:10	Ntɛ Enɔs oŋkom Kenaŋ mɔ, k'eyi sɔ doru meren 815, mmɛ ɛnakom sɔ awut arkun k'awut aran alɔma mɔ.
117	GEN 5:11	Kəwon ka Enɔs doru fəp kənasɔtɔ meren 905, k'efi.
119	GEN 5:13	Ntɛ oŋkom Mahalalel mɔ, kɔ Kenaŋ eyi sɔ doru meren 840, mmɛ ɛnakom sɔ awut arkun k'awut aran alɔma mɔ.
120	GEN 5:14	Kəwon ka Kenaŋ doru fəp kənasɔtɔ meren 910, k'efi.
122	GEN 5:16	Ntɛ Mahalalel oŋkom Yɛrɛdu mɔ, k'eyi sɔ doru meren 830, mmɛ ɛnakom sɔ awut arkun k'awut aran alɔma mɔ.
123	GEN 5:17	Kəwon ka Mahalalel doru fəp, kənasɔtɔ meren 895, k'efi.
125	GEN 5:19	Ntɛ Yɛrɛdu oŋkom Henok mɔ, k'eyi sɔ doru meren 800, mmɛ ɛnakom sɔ awut arkun k'awut aran alɔma mɔ.