1	GEN 1:1	À káaku Luda musu kɔ̃n tɔɔtɛo kɛ̀.
2	GEN 1:2	Guu da pãmɛ à kɛkɛnaro, gusiaa bé à da ísiaala, ben Luda Ninii e yàa paa í pìla.
3	GEN 1:3	Ben Luda bè: Guu pu! Ben guu pù.
4	GEN 1:4	À è gupuraa pì maa, ben à gupuraa kɛ̃̀kɔ̃a kɔ̃n gusiaao.
5	GEN 1:5	À tɔ́ kpà gupuraanɛ fãantɛ̃, gusiaa sɔ̃ gwãavĩ. Guu sì guu dɔ̀, à gurɔ káakun gwe.
6	GEN 1:6	Ben Luda bè: Bàtuma gɔ̃ kú ínɔ dagura lɛ à í pìnɔ kɛ̃kɔ̃a.
7	GEN 1:7	Ben à bàtuma kɛ̀ lɛ, à í kɛ̀ kú bàtuma gĩzĩ kɛ̃̀kɔ̃a kɔ̃n í kɛ̀ kú à musuo.
8	GEN 1:8	Ben à tɔ́ kpà bàtuma pìnɛ ludambɛ. Guu sì guu dɔ̀, à gurɔ plaadeen gwe.
9	GEN 1:9	Ben Luda bè: Í kɛ̀ kú gĩzĩ kakɔ̃a gu dɔ̃nkɔ̃n, gukori bɔ. Ben à kɛ̀ lɛ.
10	GEN 1:10	À tɔ́ kpà gukori pìnɛ tɔɔtɛ, ben à tɔ́ kpà í kɛ̀ kàkɔ̃aanɛ ísiaa. Ben à è à kɛ̀ maa.
11	GEN 1:11	Ben Luda bè: Lánɔ bɔɛ tɔɔtɛ kɔ̃n sɛ̃̀ wɛ́ɛdeenɔ kɔ̃n lí nɛ́deenɔ, baade kɔ̃n a boriio. Ben à kɛ̀ lɛ,
12	GEN 1:12	lánɔ bɔ̀ɛ tɔɔtɛ kɔ̃n sɛ̃̀ wɛ́ɛdeenɔ kɔ̃n lí nɛ́deenɔ, baade kɔ̃n a boriio. Ben Ludaa è à kɛ̀ maa.
13	GEN 1:13	Guu sì guu dɔ̀, à gurɔ aagɔ̃deen gwe.
14	GEN 1:14	Ben Luda bè: Pɔ́ gupurinɔ gɔ̃ kú musu aɔ̃gɔ̃ fãantɛ̃ kɛ̃ɛkɔ̃a kɔ̃n gwãavĩo, aɔ̃gɔ̃ wɛ̃̀ sèedanɔ kɔ̃n gurɔɔnɔ kɔ̃n wɛ̃̀nɔ ɔdɔańnɛ.
15	GEN 1:15	Aɔ̃gɔ̃ dɛ pɔ́ gupurinɔ ũ musu lɛ wàgɔ̃ anduna puu. Ben à kɛ̀ lɛ.
16	GEN 1:16	À pɔ́ gupuri ìsinɔ kɛ̀ mɛ̀n plaa, à kɛ̀ gbãaa ègɔ̃ kí blee fãantɛ̃, à kɛ̀ busɛ ègɔ̃ kí blee gwãavĩ. À sɔsɔnɛnɔ kɛ̀ dɔ.
17	GEN 1:17	À ń pɛ́pɛ musu lɛ aɔ̃gɔ̃ anduna puu
18	GEN 1:18	aɔ̃gɔ̃ kí blee fãantɛ̃ kɔ̃n gwãavĩo, aɔ̃gɔ̃ gupura kɛ̃ɛkɔ̃a kɔ̃n gusiaao. Ben à è à kɛ̀ maa.
19	GEN 1:19	Guu sì guu dɔ̀, à gurɔ siigɔ̃deen gwe.
20	GEN 1:20	Ben Luda bè: Pɔ́ wɛ̃̀ndideenɔ í pa yɛ́lɛlɛ, bãanɔ dagula musu aɔ̃gɔ̃ vĩaa bàtumaa.
21	GEN 1:21	Ben à pɔ́ wɛ̃̀ndidee kɛ̀ aɔ̃è lili o í guunɔ kɛ̀ kɔ̃n kpɔ̀ gbɛ̃̀ntɛ̃nɔ píngi, baade kɔ̃n a boriio. À bãanɔ kɛ̀ píngi dɔ, baade kɔ̃n a boriio. Ben à è à kɛ̀ maa.
22	GEN 1:22	À aubarika dàńgu à bè, aɔ̃gɔ̃ nɛ́ ii aɔ̃gɔ̃ kɔ̃ɔ, kpɔ̀nɔ ísiaa pa, bãanɔ kɔ̃ tɔɔtɛ.
23	GEN 1:23	Guu sì guu dɔ̀, à gurɔ sɔɔrodeen gwe.
24	GEN 1:24	Ben Luda bè: Pɔ́ wɛ̃̀ndideenɔ bɔɛ tɔɔtɛa, pɔ́kãdeenɔ kɔ̃n pɔ́taa'onkusɛanɔ kɔ̃n nɔ̀bɔsɛ̃tɛnɔ, baade kɔ̃n a boriio. Ben à kɛ̀ lɛ.
25	GEN 1:25	Luda nɔ̀bɔsɛ̃tɛnɔ kɛ̀ baade kɔ̃n a boriio. À pɔ́kãdeenɔ kɛ̀ baade kɔ̃n a boriio. À pɔ́taa'onkusɛanɔ kɛ̀ baade kɔ̃n a boriio. Ben à è à kɛ̀ maa.
26	GEN 1:26	Ben Luda bè: Wà gbɛ̃ntee kɛ wa taka ũ, aɔ̃gɔ̃ dɛ wa bà, aɔ̃gɔ̃ kí blee kpɔ̀nɔa kɔ̃n bãanɔ kɔ̃n pɔ́kãdeenɔ kɔ̃n nɔ̀bɔsɛ̃tɛnɔ kɔ̃n pɔ́taa'onkusɛanɔ píngi.
27	GEN 1:27	Ben Luda gbɛ̃ntee kɛ̀ a zĩnda taka ũ. À zĩnda takan à ń kɛ́ à ũ. À ń kɛ́ gɔ̃gbɛ̃ kɔ̃n nɔgbɛ̃o.
28	GEN 1:28	À aubarika dàńgu à bèńnɛ: Àgɔ̃ nɛ́ ii àgɔ̃ kɔ̃ɔ à anduna pa àgɔ̃ gbãaa bleea. Àgɔ̃ kí blee kpɔ̀nɔa kɔ̃n bãanɔ kɔ̃n pɔ́ wɛ̃̀ndidee kɛ̀ aɔ̃è táa o tɔɔtɛanɔ píngi.
29	GEN 1:29	Ben Luda bè: Ma pɔ́ wɛ́ɛdee kɛ̀ kú tɔɔtɛanɔ kpàawa a pɔ́blee ũ píngi kɔ̃n lí nɛ́deenɔ píngi.
30	GEN 1:30	Ma sɛ̃̀nɔ kɔ̃n lánɔ kpà pɔ́ wɛ̃̀ndideenɔa píngi ń pɔ́blee ũ, nɔ̀bɔnɔ kɔ̃n bãanɔ kɔ̃n pɔ́taa'onkusɛanɔ píngi. Ben à kɛ̀ lɛ.
31	GEN 1:31	Luda pɔ́ kɛ̀ à kɛ̀nɔ è píngi, à kɛ̀ maa wásawasa. Guu sì guu dɔ̀, à gurɔ swɛɛdodeen gwe.
32	GEN 2:1	Lɛn Luda musu kɔ̃n tɔɔtɛo kɛ̀ lɛ kɔ̃n ń pɔ́nɔ píngi.
33	GEN 2:2	Ai à gurɔ swɛɛplaadee zĩ gɔ̃ ká, à zĩi kɛ̀ èe kɛɛ pì yã̀a. À gurɔ swɛɛplaadee pìn à kámma bò kɔ̃n zĩi kɛ̀ à kɛ̀nɔ píngi.
34	GEN 2:3	Ben à aubarika dà gurɔ swɛɛplaadee pìn à dìɛ a pɔ́ ũ, kɛ̀ zĩ beeen à kámma bò kɔ̃n zĩi kɛ̀ à kɛ̀nɔ píngi yãnzi.
35	GEN 2:4	Musu kɔ̃n tɔɔtɛo naana yãn yɛ̀. Gurɔɔ kɛ̀ Dii Luda tɔɔtɛ kɔ̃n musuo kɛ̀,
36	GEN 2:5	bura pɔ́kee e bɔɛ tɔɔtɛa kɔ̀ro, baa sɛ̃̀, zaakɛ Dii Ludaa e tó lou màro, bensɔ̃ gbɛ̃kee kuu à tɔɔtɛ zĩi kɛro.
37	GEN 2:6	Sukaa bé è kpá andunala, ben è mɔdɔ pisi tɔɔtɛa píngi.
38	GEN 2:7	Dii Luda gɔ̃gbɛ̃ í kàsa kɔ̃n bùsutio, ben à ĩa wɛ̃̀ndidee vù à yĩn, ben gɔ̃gbɛ̃ pì gɔ̃̀ gbɛ̃ bɛ̃ɛ ũ.
39	GEN 2:8	Dii Luda swadako dìɛ ɔfãntɛ̃bɔɛ kpa kɛ̀ wè be Ɛdɛni, ben à gɔ̃gbɛ̃ kɛ̀ à kɛ̀ pì dà gwe.
40	GEN 2:9	Dii Luda tò lí bori píngi bɔ̀ɛ tɔɔtɛa. Lí pìnɔɔ maa, bensɔ̃ ń bɛ blena nna. Lí wɛ̃̀ndide kú dàko pì gura. Lí kɛ̀ è dɔ̃na maa kɔ̃n à zaaao ińnɛ kú gwe dɔ.
41	GEN 2:10	Swaa kú Ɛdɛni ègɔ̃ mɔdɔ pisi dàko pìa. Bɔna gwe à ɔnɛ kɛ̀ siigɔ̃.
42	GEN 2:11	À káaku tɔ́n Pisɔ̃, àmbe à liga Avila bùsuzi píngi. Vura kú bùsu pì guu,
43	GEN 2:12	vura pì maa. Gbɛ̀ bɛ̀ɛdeenɔɔ kú gwe dɔ.
44	GEN 2:13	Swaa pì ɔnɛ plaade tɔ́n Giɔ̃, à liga Kusu bùsuzi píngi.
45	GEN 2:14	À ɔnɛ aagɔ̃de tɔ́n Tigiri, à dɔ̀rɔ tà Asiria bùsu ɔfãntɛ̃bɔɛ kpa. Swaa pì ɔnɛ siigɔ̃de tɔ́n Yuflati.
46	GEN 2:15	Dii Luda gɔ̃gbɛ̃ pì dìɛ Ɛdɛni dàko pì guu lɛ àgɔ̃ à zĩi kɛ àgɔ̃ gwaa.
47	GEN 2:16	Ben à yã dìɛnɛ à bè: Nɛ́ fɔ̃ ǹ dàko pì lí píngi bɛɛ ble,
48	GEN 2:17	mɔde ǹton lí kɛ̀ è dɔ̃na maa kɔ̃n à zaaao ińnɛ bɛɛ blero. Tó ń blè, n gamɛ.
49	GEN 2:18	Dii Luda bè: Gɔ̃gbɛ̃ kuuna adoo maaro. Mɛ́ dɔnlɛri kɛnɛ à gbɛ̃ndoo ũ.
50	GEN 2:19	Ben Dii Luda bùsu kɔ̀ à nɔ̀bɔnɔ kɛ̀o píngi kɔ̃n bãanɔ píngi, ben à mɔ̀ńyo gɔ̃gbɛ̃ pì kiia lɛ à e dian eé tɔ́ kpáńnɛ nà. Tɔ́ kɛ̀ gɔ̃gbɛ̃ pì kpà pɔ́ wɛ̃̀ndidee pìnɔnɛ píngi gɔ̃̀ ń tɔ́ ũ.
51	GEN 2:20	Gɔ̃gbɛ̃ pì tɔ́ kpà pɔ́kãdeenɔnɛ píngi kɔ̃n bãanɔ kɔ̃n nɔ̀bɔsɛ̃tɛnɔ píngi, mɔde èe dɔnlɛri e ń tɛ́ a gbɛ̃ndoo ũro.
52	GEN 2:21	Ben Dii Luda i ìsi dà gɔ̃gbɛ̃ pìla. Kɛ̀ èe ii oo, ben à à gbã̀ntɛ̃wa mɛ̀n doo bɔ̀, ben à à mɛ̀baasi tàta a gbɛ̀n.
53	GEN 2:22	Ben à gɔ̃gbɛ̃ gbã̀ntɛ̃wa kɛ̀ à bɔ̀ pì lìɛ nɔgbɛ̃ ũ, ben à gàao à kiia.
54	GEN 2:23	Ben gɔ̃gbɛ̃ pì bè: Kɛ̀ki wá bɔ̀ ma wá guumɛ, à mɛ̀ sɔ̃ bɔ̀ ma mɛ̀ guumɛ. Weé à sísi nɔgbɛ̃, kɛ̀ Luda à bɔ̀ gɔ̃gbɛ̃ guu yãnzi.
55	GEN 2:24	Beee yãnzin gɔ̃gbɛ̃ è a de kɔ̃n a dao tó, aɔ̃è nakɔ̃a kɔ̃n a naɔ̃o wà gɔ̃ mɛ̀ doo ũ.
56	GEN 2:25	Gɔ̃gbɛ̃ kɔ̃n a naɔ̃o kú bũu ń plaa ń píngi, wí sɔ̃ è ń kũro.
57	GEN 3:1	Mlɛ̃̀ bé à mɔnafiki vĩ dɛ pɔ́ kɛ̀ Dii Ludaa kɛ̀nɔla píngi, ben à nɔgbɛ̃ là à bè: Luda bè àton dàko pì lí ke bɛɛ blenloo?
58	GEN 3:2	Ben nɔgbɛ̃ wè mlɛ̃̀ pìla à bè: Wé fɔ̃ wà dàko pì líbɛɛ ble,
59	GEN 3:3	mɔde lí kɛ̀ kú dàko pì gura súusu, Luda bè wàton à bɛɛ blero wàton ɔ kɛa sero, lɛ wàton garo yãnzi.
60	GEN 3:4	Ben mlɛ̃̀ bènɛ: É ga sero!
61	GEN 3:5	Zaakɛ Ludaa dɔ̃ kɛ̀ tó á blè, a wɛ́ɛ é kɛ̃ é gɔ̃ lán a bà, égɔ̃ à maaa dɔ̃ kɔ̃n à zaaao.
62	GEN 3:6	Kɛ̀ nɔgbɛ̃ è lí pì bɛɛ maa, bensɔ̃ à blena égɔ̃ nna eé tó gbɛ̃ wɛ́ɛ kɛ̃, ben à à bɛɛ wò à blè. À kpà a zãa sɔ̃, ben à blè.
63	GEN 3:7	Aɔ̃ plaa ń píngi wɛ́ɛ kɛ̃̀, ben aɔ̃ɔ dɔ̃̀ sa kɛ̀ aɔ̃ɔ kú bũu. Ben aɔ̃ gooda lá nàbi wà nàńzi.
64	GEN 3:8	Kɛ̀ gɔ̃gbɛ̃ kɔ̃n a naɔ̃o Dii Luda kĩi mà èe táa oo dàko pì guu uusiɛ, ben aɔ̃ ùtɛnɛ dàko pì lán.
65	GEN 3:9	Ben Dii Luda lɛ́ zù gɔ̃gbɛ̃zi à bè: Ń kú mámɛ?
66	GEN 3:10	À wèàla à bè: Kɛ̀ ma n kĩi mà, ben vĩa ma kũ kɛ̀ má kú bũu yãnzi, ben ma utɛ.
67	GEN 3:11	Ben Dii Luda à là à bè: Dé bé à ònnɛ ń kú bũuu? Lí kɛ̀ ma ginnɛ ǹ à bɛɛ ble, ń blèn yɔ́?
68	GEN 3:12	À wèàla à bè: Nɔgbɛ̃ kɛ̀ ń kpàma àgɔ̃ kúmao bé à lí pì bɛɛ kpàma má blè.
69	GEN 3:13	Ben Dii Luda nɔgbɛ̃ là à bè: Bɔ́yãnzi ń kɛ̀ lɛzi? À wèàla à bè: Mlɛ̃̀ bé à ma kɛkɛ, ben má blè.
70	GEN 3:14	Ben Dii Luda bè mlɛ̃̀nɛ: Kɛ̀ ń kɛ̀ lɛ, nɛ́gɔ̃ dɛ láari pɔ́ ũ pɔ́kãdeenɔ kɔ̃n nɔ̀bɔsɛ̃tɛnɔ tɛ́ píngi, n gbɛɛɛn nɛ́gɔ̃ gáɛɛ, bùsutin nɛ́gɔ̃ blee ai n wɛ̃̀ndi lɛ́n.
71	GEN 3:15	Mɛ́ íbɛtɛ da mpi kɔ̃n nɔgbɛ̃o dagura, n bori kɔ̃n à boriio dagura. À borii é n mì wí, nɛ́ à gbátoge kɛ̃nna.
72	GEN 3:16	Ben à bè nɔgbɛ̃nɛ: Mɛ́ n nɔ̀sina wãwãa kaarannɛ, nɛ́gɔ̃ nɛ́ ii wãwãao. N zã nii égɔ̃ kúmmamɛ, eégɔ̃ gbãa vĩ n musu.
73	GEN 3:17	Ben à bè gɔ̃gbɛ̃nɛ: Lán n n naɔ̃ yã mà nà, lí kɛ̀ ma ginnɛ ǹ à bɛɛ blee ń blè, tɔɔtɛ gɔ̃̀ láari pɔ́ ũ n yãnzi, ɔsi kɔ̃n ɔsiion nɛ́gɔ̃ pɔ́blee en ai n wɛ̃̀ndi lɛ́n.
74	GEN 3:18	Eé lɛ̀nɔ kɔ̃n lá ũkãdeenɔ bɔɛnnɛ, gbasa ǹ bura pɔ́nɔ ble.
75	GEN 3:19	Ísimmagaakpana guun nɛ́ pɔ́blee en ai ǹ liara ǹ gɛ̃ bùsu guu, zaakɛ gwen ma n bɔn. Bùsutin n ũ, nɛ́ liara ǹ gɔ̃ bùsuti pì ũmɛ.
76	GEN 3:20	Adamu tɔ́ kpà a naɔ̃nɛ Awau, zaakɛ gbɛ̃ píngi dazimɛ.
77	GEN 3:21	Dii Luda báa uta kɛ̀ Adamunɛ kɔ̃n à naɔ̃o, ben à dàńnɛ.
78	GEN 3:22	Ben à bè: Gbɛ̃ntee à maa kɔ̃n à zaaao dɔ̃̀ sa, à gɔ̃̀ lán wa bà. Wé gínɛ à lí wɛ̃̀ndide bɛɛ wo à ble, lɛ àtongɔ̃ kuu gurɔ píngiro yãnzi.
79	GEN 3:23	Ben Dii Luda pɛ̀a à à bɔ̀ Ɛdɛni dàko pì guu. Ben Adamu gàa à tɔɔtɛ kɛ̀ Luda à bɔ̀n zĩi kɛ.
80	GEN 3:24	Kɛ̀ Dii Luda pɛ̀a, ben à kɛrubunɔ kàɛ Ɛdɛni dàko ɔfãntɛ̃bɔɛ kpa, lɛ aɔ̃gɔ̃ lí wɛ̃̀ndide zɛ́ dãkpaa kɔ̃n fɛ̃ɛdaa kɛ̀ èe tɛ́ kɛɛ èe liɛliɛɛo.
81	GEN 4:1	Adamu a naɔ̃ Awau dɔ̃̀ nɔgbɛ̃ ũ, ben à nɔ̀ sì à Kaini ì. Ben à bè: Ma gɔ̃gbɛ̃ ì kɔ̃n Dii gbãaao.
82	GEN 4:2	Ben à à dãaro Abila ì dɔ. Abila kɛ̀ sãdãri ũ, Kaini sɔ̃ kɛ̀ búbari ũ.
83	GEN 4:3	Zĩkea Kaini mɔ̀ kɔ̃n a bura pɔ́nɔo gbaa ũ Diinɛ.
84	GEN 4:4	Abila sɔ̃ mɔ̀ kɔ̃n a sãnɛ káaku mɛ̀kpanao. Abila yã kà Diinɛ, ben à à gbaa sì.
85	GEN 4:5	Kaini sɔ̃ yã e ká Diinɛro, ben èe à gba síro. Ben Kaini pɔ fɛ̃̀ maamaa à uu yàkɔ̃tɛ.
86	GEN 4:6	Ben Dii bè Kaininɛ: Bɔ́yãnzi n pɔ fɛ̃̀zi? À kɛ̀ dia n uu yàkɔ̃tɛɛ?
87	GEN 4:7	Tó n yã maaa kɛ̀, mɛ́ n síroo? Tó nɛ́ɛ yã maaa kɛ sɔ̃ro, durun naɛnnɛ n kpɛɛlɛ. N nii e à dɛɛ, séde ǹ zĩ̀ blea.
88	GEN 4:8	Ben Kaini bè a dãaro Abilanɛ: Wà gá sɛ̃̀n. Kɛ̀ aɔ̃ kà gwe, ben à fɛ̀ɛ a dãarozi à à dɛ̀.
89	GEN 4:9	Dii Kaini là à bè: Mán n dãaro Abila kún? À wèàla à bè: Má dɔ̃ro. Ma dãaro dãkparin ma ũɔ́?
90	GEN 4:10	Ben Dii bè: Bɔ ń kɛ̀? N dãaro aru e lɛ́ zuumazi zaa tɔɔtɛ.
91	GEN 4:11	Tia sa nɛ́gɔ̃ láari pɔ́ ũmɛ, nɛ́gɔ̃ zã̀ kɔ̃n tɔɔtɛ kɛ̀ n dãaro aru mì n ɔzĩo.
92	GEN 4:12	Tó n bú bà, tɔɔtɛ é àre kɛnnɛro. Nɛ́gɔ̃ sɔ̃ki kpákpaa ǹgɔ̃ likɔ̃aa zɔ̃ɔ anduna guu.
93	GEN 4:13	Ben Kaini bè Diinɛ: Ĩadamma beee gbãa dɛmala, mɛ́ fɔ̃ro.
94	GEN 4:14	Nɛ́ɛ pɛɛma tɔɔtɛ kɛ̀a gbã̀amɛ sa. Mɛ́ kɛ̃kɔ̃anyo sa. Mɛ́gɔ̃ sɔ̃ki kpákpaa màgɔ̃ likɔ̃aa zɔ̃ɔ anduna guu, gbɛ̃ kɛ̀ kpàkũmao é ma dɛ.
95	GEN 4:15	Ben Dii bènɛ: Lɛnlo! Tó gbɛ̃ n dɛ, weé gɛ̃ɛ bonnɛ gɛ̃̀n swɛɛplaamɛ. Ben Dii wɛ̃zã ke kɛ̀ Kainia, lɛ gbɛ̃ kɛ̀ kpàkũo tón à dɛro yãnzi.
96	GEN 4:16	Ben Kaini dà zɛ́n à kɛ̃̀ Diia. À gàa à vɛ̃̀ɛ Nɔdu bùsun Ɛdɛni ɔfãntɛ̃bɔɛ kpa.
97	GEN 4:17	Kaini dàɛ kɔ̃n a naɔ̃o, ben à nɔ̀ sì à Ɛnɔku ì. À gbɛra Kaini wɛ́tɛ kàɛ, ben à a nɛ́ pì tɔ́ kpà wɛ́tɛ pìnɛ.
98	GEN 4:18	Ɛnɔku Irada ì, Irada Mɛuyaɛli ì, Mɛuyaɛli Mɛtusaɛli ì, Mɛtusaɛli Lamɛki ì.
99	GEN 4:19	Lamɛki nɔɔ sɛ̀ mɛ̀n plaa, à doo tɔ́n Ada, à doo sɔ̃ Zila.
100	GEN 4:20	Ada Yabala ì. Àmbe pɔ́dãri kɛ̀ aɔ̃ègɔ̃ kú bisakutaa guunɔ dezi káaku ũ.