23240	MAT 2:2	itsanlatinue: —Fechi tobi chuto uyan quiran tsaboca quiralaquiyoe tilatinue. Junni jun tsaboca quirato, in tobi na manca nainueque miilaiyoe. Ya nari israelítalachi miya jono joe latinue. Junni junca miito ya náca se tibi jalainayoe latinue.
23243	MAT 2:5	Junni israelita mantaminlanan itsanlatinue: —In tobinan naino joe latinue Belén pueblobi. Meráde! Matute Diosichi mantate pamin tsachi itsanque pila chuteca joe tilatinue:
23258	MAT 2:20	itsantinue: —Náca totechi timinlari numa puyaca jolajoe tinue. Junni nuri cupato, nabe yachi ayanbeca mancato, israelítalachi toca mantanjide! tinue.
23262	MAT 3:1	Aman matu mate manca Diosichi mantate pamin tsachi jominue Isaías mumun. Yari itsanque pila chuteca jominue: Tsachi manca niyanlanantiya chutunun postote sonba pato, tsachilaca itsanque payichunaeque chuteca jominue: Miya jano jonun tenchi jera manseilainade! tichunae tinue. Miya jano jonun tenchi minuca mansenun cuwenta, jun tsanquenan nulachi tencabinan manseilainade! tichunae tinue. Isaías tsanque pila chuteca jominue. Junni Jesús Galilea tobi chusanan, tsachi manca jun tsanhinue Mumunmin Juan tinun. Judea tobi niyanlanantiya chutunun postote chubi jica jominue. Junni junbinan tsachila merábi janaminlaca payinaminue. Junni Juan payinato itsantinue: —Moora jamochi chumin Diosiri ya mantananun tsachi bolon suwachinae tinue. Jun tenchi jutsa quinunca telaquepoto casan tala tenca mancalaquede! tinue.
23268	MAT 3:7	Junni aman Juan mumunnasanan, fariséolabe saduséolabe yachica jalainue. Aman man bolon israelítalari man quiraque Diosica tenca camin jominlaca fariseo tinun jominlanue. Man bolon mantimini man quiraque Diosica tenca camin jominlaca saduseo tinun jominlanue. Junni Juanni duque fariséolabe saduséolabe jalainaminca quirato, itsantinue: —Nulari seiton pini cuwenta jolajoe. ¿Nulari niya jonan tenfelainayun casticaquino mate casticaituchique? ¿Mo nulaca tsanhisa micarin? tinue.
23272	MAT 3:11	Junni Juan tsantitobi, aman tsachilabe itsantinue: —Nula jutsa quinunca telaquepoto casan tala tenca mancaminlaca la mumunmin joyoe tinue. Juntonan lari pibiri mumunnayoe. Junni laca benechi manca tsachi jachunae. Laca fécari mantá tan jochunae tinue. Yari tsaracari sen jonan, lari yachi sapatocari leyanto tanjito cuwanotiya sen itoyoe tinue seri sen jotonan. Yari wari pibiri mumuntumin jochunae. Yari Diosichi Tencachi mumunmin jochunae tinue ninchi casimin cuwenta.
23276	MAT 3:15	Junni Jesuri beco tulanto itsantinue: —Diosi mantanue tsachila mumunhilaisa. Junni lacanan mumunniquede! tinue. Jesús tsantinan, Juan yaca mumunniquinue.
23278	MAT 3:17	jamochi nechi fiqui mera jominue. Itsantinue: —In lachi duque munatinun Naoe tinue. Ya tenchi duque son joyoe tinue.
23281	MAT 4:3	Junni yucan yaca seiton quisa carichi tide janue. Junni yucan yabe itsantinue: —Nuri Diosichi Nao jotori, in suca bibu suwade! tinue.
23284	MAT 4:6	itsantinue: —Nu Diosichi Nao jotori, inte nechi supatiniide! tinue yape tsachila wepanato quiralaquisa. Diosichi Pilabi itsanque chuteca joe tinue: Anjelilaca erechunae yape cuidailaisa. Nuca amanle canilaquichunaeque chuteca joe tinue yape nuchi nede subi icatusa.
23285	MAT 4:7	Junni Jesunan itsantinue: —Man fiquinan cachuteca joe tinue. La seiton quinasatiya Diosi laca cuidainiichunae tilatitunaque chuteca joe tinue.
23287	MAT 4:9	Juncanan Jesuca quirawoto itsantinue: —Lachi cale telenhito, laca se tide! Tsanquinari jerale toca mantasa cariyanae tinue.
23295	MAT 4:17	Junni aman Jesuri Capernaum pueblobi chubi jitobi, micarinaminue. Micarinato, itsantinue: —Moora jamochi chumin Diosi ya mantananun tsachi bolon suwachinae tinue. Jun tenchi nulari jutsa quinanunca telaquepoto casan tala tenca mancalaquede! tinue.
23297	MAT 4:19	Junni Jesuri yalaca quirato, itsantinue: —Labe penenalarana! Lari nulaca watsa canique cuwenta, tsachilaca layato labe cayaisa carimin suwanae tinue.
23306	MAT 5:3	—Diosi ayudaitunari podeitiyoeque tenhiminlari duque son tinola joe tie. Nula tsanque tenhiminla Diosi mantananun tsachi bolonbi pejolajochunae tie.
23316	MAT 5:13	Junni Jesús junbi camicarinato itsantie: —Nulari jerale Diosica tennatumin tsachilabe sen joto quirawonola joe. Tsan joto, pinba cuwenta jolajochunae tie. Junni sen pinba jolajona! Pinba sen jomin epeban inari, niyan quinatotiya saruba mansuwano podeilaituchunae. Epe jochunae. Minubi quepontsan jochunae tie.
23320	MAT 5:17	Junni Jesuri man fiquicaman micarinato itsantie: —Matu to Diosichi mantate paminlacanan, matu to Moisécanan, tenca calaquede! Yalachi fiquica telaqueposa caribi jatucayoe; yalachi fiquica nanni fe tuca micaribiri jacayoe tie.
23328	MAT 5:25	Junni Jesús tsantitobi, man fiquinan pae: —Tsachi manca nulaca culpa quinari, nulaca culpa quiminbe wewe amico manhilaina! Comisariochica parejo jinaminnan amico manhilaina! Tsanhitunari, pansile nulaca comisariochi cuwapochunae. Junni comisariori nulaca polisialachi cuwapochunae tie yape dolaquisa.
23334	MAT 5:31	Junni Jesuri camicarinato itsantie: —Matu tote in fiquicanan micarica jominue: Sonalaca puratori, diborsio pila yalachi cuwanola joe tica jominue tie.
23352	MAT 6:1	Junni Jesuri camicarinato itsanque micarie: —Weyan tsachilari titiya seque quinatori, uyanla quirasari quiminla joe yape sen jolajoe tilatisa. Junni nulachi Apa Diosi mantimini nulachi premio tsanca natiya cuwatuchunae tsanque jamoleri seque quiminla jonun tenchi.
23356	MAT 6:5	Junsi Jesuri itsanque micarie: —Tencachique fe sen joyoe timinlari tsachila quiralaquisari Diosibe rocaiminla joe. Diosichi fiqui miinun yabi, o cayete tiletiya Diosibe rocainiiminlae yape jeralela yalaca quirato sen jolajoe tilatisa. Meralaquinade! Yalari sen jolajoe tinaminlaca meráchique tsantiminla joe. Junni yalari senla joe tinanunca meránunberi polelaichunae. Yala cachi tinun premioca numa cayala jonan, Diosi yalachi nantari cuwatuchunae. Nula mantimini yala cuwenta itolajona!
23365	MAT 6:14	Jesús tsanque Diosibe rocaino joeque micaritobi itsantie: —Nula uyanlaca perdonailainari, nulachi Apa Diosinan nulacanan perdonaichunae.
23367	MAT 6:16	Junsi Jesús camicarinato itsantie: —Fe sen joyoe timinlari Diosichi tenchi ano fitunca itori, epenan tsanhiminla joe. Yalachi caforo duque laquinan quiran iminlae yape uyanlari yalaca quirato miilaisa ano fitunca ilainaeque. Tsanhiminlari Diosichi tenchi tsanhituminlae. Tsachila quirasari tsanhiminlae yape yalaca quirato sen jolajoe tilatisa. Meralaquede! Yalari sen jolajoe tinaminlaca meráchique tsanhiminla joe. Junni sen jolajoe tinanunca meránunberi polelaichunae. Yala cachi tinun premioca numa cayala jonan, Diosi yalachi nantari cuwatuchunae tie. Nula mantimini yala cuwenta itolajona! tie.
23376	MAT 6:25	Junto Jesús man fiquiman itsanque micarie: —Jun tenchi nulaca itsanque payichinayoe tie: Wepanalaituna! tie. Finoca, o cuchinoca, o panuca niyaque cano jonunca natiya wepanalaituna! tie. Niyaque sonnano jonunca tenca canato, anocari tenca canola itochunae tie. O panube seito nenanocari, tenca cato nenatuntsan joe tie.
23386	MAT 7:1	Junsi Jesuri man fiquiman micarito itsantie: —Uyanlaca culpa quitulajona! yape Diosi nulacanan culpa quitusa.
23391	MAT 7:6	Junsi Jesús itsantie: —Diosichi jonuncari susuchi cuwatuntsan jochunae. Susuri tenhituchunae tie sen joeque. Junni susu tenca itoto, ya cuwamincanan paito jalichi tichunae tie. Junsi cuchinan tenca iton jochunae tie. Junni cuchichi cale mica winca quepolaquinari, mica joeque tenhituto pipabi tereniquichunae tie. Aman seiton tsachilanan jun tsanquenan tenhituminla jochunae tie. Diosichi sen cosaca sen joeque tenhilaituchunae tie. Jesús tsanque micarie.
23392	MAT 7:7	Junsi Jesús itsantie: —Nula ticatiya munaralaratori, Diosibe panhalaquina! tie. Panhalaquinari, Diosi cuwachunae tie. Junsi titiya canola jotori, neyalaquina! Neyalaquinari, Diosi fesa carichunae tie. Junsi nunchitiya winola jotori, tamolante otilatina! Otilatinari, Diosi lasichunae tie.
23398	MAT 7:13	Junsi Jesús micarinato itsantie: —Yucanchica jinun minu wa foron minu joe tie. Jun minuse jichun ayan foron tamolanse poleno joe tie. Natiya tenfe itoe. Jun tenchi duque tsachila junchi jiminla joe tie. Aman Diosibe sonnano jun minuri na foron minu joe tie. Jun minuse jichun, na foron tamolanse poleno joe tie. Tenfe joe. Jun tenchi narin tsachila jun minuse jiminla joe tie. Aman nulari jun na foron tamolanse wilaide! tie. Jesús tsanque micarie.
23406	MAT 7:21	Junni Jesuri capánato itsantie: —Weyan tsachila laca Miya timinla jotonan, Diosi mantananun bolon tsachilabe peitolajochunae to yucapiyarino mate. Jamochi chumin Apa Diosichi mantaca merántsan jochunae. Lachi Diosichi mantaca meráminlasiri yachi bolonbi pejolajochunae tie.
23409	MAT 7:24	Junto Jesús cacuenta quinato itsantie: —La mantananunca seque meráminlari tenca tanla jochunae tie. Wa subi ya quimin tsachi cuwenta jolajochunae.
23424	MAT 8:10	Junni capitan tsantinunca meráto, Jesuri wepanae. Wepanato meráto, jerale yabe pejaca junlabe itsantie: —Nulabe tsarasica pachinayoe tie. In capitan israelita itotonan, israelítalaca fécari Diosica tennamin joe tie.
23433	MAT 8:19	Junni jilaichinasanan, israelítala tala mantaca micarimin tsachi jato, Jesube itsantie: —Nu seque micarimin jonan, nube penenamin ino muquee tie. Nunchitiya nube pejinoyoe tie.
23434	MAT 8:20	Jesuri beco manpato itsantie: —Soronantiya foro tamanhe tie catsochun. Pichunan tasen tamanhe tie. La mantimini tsachi ica jun joto, tilenantiya chuno itoyoe tie. Junni labe penenano muquinari, casale duque tenca cano joe tie.
23436	MAT 8:22	Jesús mantimini yabe itsantie: —Yala puyaca cuwenta junlari yala tala menailaichunae tie. Nuri junca tennatuto labe penenana! tie.
23445	MAT 8:31	Junni yucanchi ocola Jesube rocainato itsanlatinue: —Chiquilaca sularitori, ja cuchilachi fecáriri erede! tilatinue.
23450	MAT 9:2	Junni tsachilari wecaino podeiton tsachi mancaca Jesúchica tanjalainue jali cuyanbi poto nanato. Jesuri yaca tennaminla jonunca miito, ya quiyanpunbe itsantinue: —Lachi nao, son tenca ide! Nuchi jutsaca piyarinayoe tinue.
23460	MAT 9:12	Junni Jesuri junca meráto, fariséolabenan itsantie: —Diosichi Pilabi itsanque chuteca joe tie: Laquirasa munajaeque chuteca joe. Diosichi yabi ticatiya epe cuwanacaca tennatiyoeque chuteca joe. Diosi yachi pilabi tsantica joe tie. Junni tíca tsantica jonunca nula miilaina! tie. Juntonan doctorilaca tenca calaquede! tie. Quiyanpun itonlari doctorilaca munaralaratuchunae tie. Quiyanpunlari doctorilaca munaralarachunae tie. Junni la doctor cuwenta joyoe tie. Junni sen joyoe timinlachi tenchi jatucayoe tie. Jutsa quiminlachi tenchi jacayoe tie.
23462	MAT 9:14	Junni aman Mumunmin Juanbe penenaminla Jesúchica jato yabe panhato itsanlatie: —Chiquila israelítalachi mite nenato, pansile ano fitunca iminlayoe. Fariséolanan jun tsannan iminlae latie. Aman nube penenaminla mantimini finiquiminla joe latie. ¿Niyaito yalari finiquiminla jun? tilatie.
23463	MAT 9:15	Junni Jesuri yalachi fiquica meráto beconan itsantie: —La casalainamin cuwenta joyoe tie. Junni casalainanun fiestaca quirabi jaminlari duque son tinato, natiya ano fitunca ilaituchunae. Casalaino jun tsachi yalabe parejo cajosanan, yalari son tito ano fitunca ilaituchunae tie. Jun tenchi lari lachi tsachilabe penenasanan, ano fitunca ituminla joe tie. Junni manca mate mantimini la itoanae tie. Laca josolelaquichunae. Junnunbi labe penenaminla weyante ano fitunca ilaichunae tie.
23466	MAT 9:18	Junni Jesuri cuenta caquinasanan, mantamin tsachiri jato Jesuchi cale telenhito yachi namachi tenchi rocainato itsantie: —Lachi nama tsaina puyanue tie. Junni jiniisa! tie. Nu tedechi tale quinari, mansonhichunae tie.
23477	MAT 9:29	Tsantinunca meráto, Jesuri yalachi cacaca taquirato itsantie: —Podeino joeque quereinun tenchi nula manquirano podeilaichunae tie.
23481	MAT 9:33	Tsan jonan Jesús yucanchi ococa sularinunsi, ya tsachiri cuenta manquiniquee. Junni yaca cuenta manquinaminca quirato, uyan tsachilari wepanato itsanlatie: —Chiquilachi tobi numanan tsanque seque quinanunca quiratumin jominlayoe latie.
23485	MAT 9:37	Junto chiquilabe itsantie: —Nula ya tsachilaca quiralaquede! tie. Wita cuwenta jolajoe tie. Jun witabi manbaleno ma faca joe tie. Junni nula jun witabi narin peyunla cuwenta jolajoe tie.
23491	MAT 10:5	Jesús chiquila chunca palucaca yachi mantate erechinato itsantie: —Israelita itonlachica jitulajona! tie. Samaria to pueblobinan witulajona! tie.
23507	MAT 10:21	Junni Jesús camicarinato itsantie: —Tsachila duque seiton ilaichunae tie. Acola tala mantaminlachi cuwapocaalaquichunae tie yape totelaquisa. Apalanan yalachi nalalacanan mantaminlachi cuwapolaquichunae tie yape totelaquisa. Nalalanan apabe ayanbeca paito, totesa carilaquichunae tie.
23510	MAT 10:24	Junsi Jesús chiquilaca erechun capánato itsantie: —Peyunla yalachi patronlaca fécari mantá tanla itochunae tie. Patron tsansinan jolajonari, ya michi jochunae tie. O miiminlanan yalaca micariminlaca fécari minla itochunae tie. Micarimin tsansinan jolajonari, ya michi jochunae tie. Junni jun tsanquenan nulanan laca fe itolajochunae. Seitonlari laca yucan ticala jotori, nulacanan nantanancari seitonque palaquichunae tie.
23518	MAT 10:32	Junsi Jesús ereno junlaca camicarinato itsantie: —Junni tsachilaca jeleratuto, la tenchi natiya luratulajona! tie. Tsachilachi cale lachi tsachi joyoe tinilatina! tie. Tsantiminlaca lanan lachi tsachila jolajoe tiyanae tie lachi Apa Diosichi cale.
23520	MAT 10:34	Junsi Jesús chiquilaca erechinato capánato, itsanque micarie: —Jeralelaca man parejori tenca casa caribi jatucayoe tie. Tsan josa caribi jaca joeque tenca catulajona! tie. La janunbi, tsachilari uyan tala uyan tala tenca calaquichunae tie.
23526	MAT 10:40	Junsi Jesús capánato itsantie: —Nulaca facariminlari lacanan facarimin cuwenta jolajochunae tie. Junni laca facariminlari laca mantamincanan facarimin cuwenta jolajochunae.
23531	MAT 11:3	Junni Jesúchica jalaito itsantilatinue: —Juan nuca panhato, nu Diosi ereno jomin tsachi joyunque panhana! tie tilatinue. Nu itotori, paniquisa tie tilatinue uyanca neyalaquichun.
23532	MAT 11:4	Junni Jesús yalabe tulanto itsantinue: —La ticatiya quinanunca nula quiralaquinae tinue. Junto tenca calaquede! Quirano podeitonlaca, jancanlaca, lepra bichi chunlaca, meráno podeitonlaca mansenayoe tinue. Poperelaca Diosichi sen fiquica micarinayoe tinue. Junni nulari junca jera quirato, aman Juánchibi manfeto yabe jera cuenta quilaquina! tinue. Juanbe cuenta quito itsanlatina! tinue: Laca tennanunca peleituna! tinae tilatina! tinue.
23544	MAT 11:16	Junto Jesuri Juanca tsantitobi, tsachilabe itsantinue: —In mate tsachilari uyan quiraque tenca tanla joe tinue. Epelesiri paiminla joe tensaamin nalala cuwenta.
23549	MAT 11:21	Itsanque payinue: —Corazín pueblobi chuminla, nula duque padeseilaichunae. Betsaida pueblobi chuminla, nulanan tsanquenan duque padeseilaichunae tinue. Tiro tinun pueblobi chuminlabe Sidón tinun pueblobi chuminlabe seitonla jotonan, nulaca fe sen jolajoe tinue. Nulachibi duque wepanato quirantsancari seque quinaminca quiraminla jotonan, jutsa quinunca telaquepotucala joe. Junni aman jun pueblolabi tsanque wepanato quirantsancari quica jomanpari, yalachi jutsa tenchi duque laquiito, jutsa quinunca jera telaquepono jominla jonhoe.
23555	MAT 11:27	Junni Jesuri yachi Apa Diosibe tsantitobi, tsachilabe itsantinue: —Lachi Apa Diosiri lachi jera cuwaca joe. Yasiri laca tsa mirae tinue. Junsi lasiri yachi Nao joto Apa Diosica tsa mirayoe tinue. Junto uyanlari la entendeisa caritunari, Diosica miino podeilaituchunae tinue.
23560	MAT 12:2	Junni fariséolari chiquilaca quirato, Jesube itsantilatie: —Jasaino mate trabajaquinola itoe latie. Tsan josanan nube penenaminlari ya tricoca balecato lachilaquinae latie. ¿Niyaito mantaca merátuto tsanlaquinan? latie.
23561	MAT 12:3	Junni Jesuri yalaca meráto itsantie: —Matu to miya Davica pila chutecaca mantenhilaide! tie. Davibe yachi tsachilabe epe tsachila fitunun bibuca finilaquinue tie. Ya bibu Diosichi cuwaca jun bibu jonan, patelelasiri fino jominlanue. Tsan josanan, Davílari ano mochi pasainato, Diosichi yabi wito, ya bibuca cato finilaquinue tie. Tsanquicala josanan, nula yalaca culpa quituminla joe tie.
23563	MAT 12:5	Junni Jesús fariséolabe itsantinue: —Tenca calaquede! tie. Diosi yachi pilabi itsantinue: Epe cuwanunca munaratiyoe tinue tie; laquiralarasa munarayoe tinue tie. ¿Nula fariséola Diosi tíca tsantinanunca miralarayun? tie. Te, miitolajoe. Nula miralaramanpari, labe penenaminlaca epele culpa quino itono jominla jonhoe. O patelelaca Diosichi Pilabi chutecaca mantenhilaide! tie. Patelela Diosichi yabiri trabajaquinato, jasaino mate trabajaquilaquitonan culpa itolajoe. Junni nula Diosichi yaca tsanque respetaiminla jotori, laca fécari respetainola joe tie.
23569	MAT 12:11	Junni Jesuri yalaca meráto itsantie: —Nulachi opisa manca jasaino mate forochi queereinari, ¿niyan quilaquinoyun? tie. Wari manlarilaquichunae tie.
23571	MAT 12:13	Jesuri tsantisi tede encon tsachibe itsantie: —Tedeca mantuquede! tie. Junni tede mantuquesi manseie manca tede tsannan.
23582	MAT 12:24	Fariséola mantimini yalachi fiquica meráto, palapochique Jesuca itsanlatie: —Jesús tenca mánta yucanchi ocolaca natiya mansularitumin joe latie. Beelzebú tinunchi mantateri yucanchi ocolaca mansularino podeimin joe latie. (Yalachi miteri yucanca Beelzebú tinun jominue.)
23587	MAT 12:29	Junni Jesús tsantisi, yucanca man fiquiman pato itsantie: —Yucan sonban tsachi cuwenta joe tie. Junni sonban tsachichi yabi wito, ya tanunca josolechun casale yaca fe loto teleno jochunae. Lari wari yucanca fe lotumanpari, yachi ocolaca mansularino podeituno jomin joinhie tie.
23589	MAT 12:31	Junni Jesús Diosichi Tencachi mantate quinaminca yucanchi mantate quinae tituntsan joeque itsantinue: —Diosichi Tencaca seitonque paminlaca perdonaituntsan jochunae tie. Ti uyan jutsacatiya Diosi perdonaino podeichunae. Ti seiton fiquicatiya Diosi perdonaino podeichunae tie. Laca tsachi ica junca seitonque paminlacanan perdonaino podeichunae tie. Juntonan Diosichi Tencaca seitonque paminlacari numatotiya ya jutsaca perdonaituntsan jochunae tie. Casonnaminca o numa puyaca jominca, numanan perdonaituchunae tie. Jesús yaca yucanchi joe timinlabe tsanque cuenta quee.
23591	MAT 12:33	Junsi Jesús ya fariséolabe cacuenta quinato itsantie: —Jana sen pelebi sen puca ichunae. Pele yucapiyacabi seiton puca ichunae. Junto pucaca quirato miintsan jochunae tie nun pele sen jonunca, nun pele seiton jonunca.
23596	MAT 12:38	Junni israelita mantá tanlari Jesúchica jalaie. Weyanlari yala tala mantaca micariminla, weyanlari fariséola jolajominue. Junni yalari itsanlatie: —Nu micarimin jotori, wepanato quirantsancari quede! tilatie nu Diosichi mantá tan tsachi joeque miilaichun.
23601	MAT 12:43	Junto Jesús itsanque cuenta polarie: —Yucanchi oco tsachichi tencabi nechi loto epele nenachunae tie tile jasaino jonunca neyato. Junni jasaino podeituto
23603	MAT 12:45	Junca quirato manjito, weyan sieteca yucanchi ocolaca cato, ya tsachichi tencabi petanwichunae tie yape junbi pechularasa. Junni jun sietecala ya mancaca fe seiton jolajochunae. Junni ya tsachiri casale mancari yucanchi oco posari, yucapiyaca tsachi jomin jochunae. Nanni wanbile mantimini nantanancari yucanchi ocola winunbi, nantanancari yucapiyachunae tie. Jesús tsanque cuenta polarisi yaca meráminlabe itsantie: —In mate sonnamin tsachila seitonla joto, ya yucanchi oco wica jun tsachi cuwenta ilaichunae tie.
23605	MAT 12:47	Junni tsachi manca Jesube itsantie: —Nuchi ayan, nuchi acola urachi wiruralarae tie nube cuenta quechique.
23606	MAT 12:48	Jesuri tsantinaminbe beconan itsantie: —Junte wiruraminla lachi tsa ayan, tsa acola josanan, yalacari ayan, aco titumanyoe tie.
23607	MAT 12:49	Junto yabe penenaminlaca tedechi micuwato itsantie: —Inlaca lachi ayan, lachi acola timanyoe tie.
23611	MAT 13:3	Junni Jesús yalabe duque micarinun cuenta polarinato itsantie: —Tsachi manca ni aralebi jichunae tie.
23617	MAT 13:9	Aman Jesús tsanque cuenta polarisi, itsantie: —Nula punqui chunla jotori, seque meralaquede! tie.
23618	MAT 13:10	Junni Jesús jun cuentaca micarinunbi, yabe penenaminlari yachica jito itsantilatiyoe: —Tsachilaca micarinato, ¿niyaito cuenta quicachisiri micarimin joyun? latiyoe.
23619	MAT 13:11	Junni Jesús chiquilaca meráto beconan itsantie: —Duque taminlachi fe cuwanan, nantanancari duque talarachunae. Itonlachica mantimini nasiri tanuncatiya josolenan, natiya iton ilaichunae tie. Jun tsanquenan nulari miraminla joto, fécari miilaichunae. Diosi nulachi mi cuwachunae. Uyanlachi mantimini mi cuwatue.
23621	MAT 13:13	Isaías matu mate yalaca panue. Diosichi mantate pánato yalaca itsanque pila chutenue: Ya tsachilari Diosichi fiquica meránatonan, numanan seque miilaituchunaeque chuteca joe. Quiranatonan, numanan seque quiralaquituchunaeque chuteca joe. Punqui don cuwenta ilainue merátuchique. Caca cuniicala cuwenta ilainueque chuteca joe quiratuchique. Yala pele tenca ilainueque chuteca joe miituchique. Miituto uyan tenca ituchi timinla joeque chuteca joe yape yalaca se larino podeitusa. Isaías tsanque pila quica joe Diosichi Pilabi. Junto Isaíachi fiquica manpolaritobi, Jesuri itsantie: —Amana merátuchi timin tsachila Isaías paca junla cuwentanan jolajoe tie. Quiranatonan seque quiratuminlae tie. Meránatonan miituminlae. Tenhituminlae. Jun tenchi yalaca cuenta quicachisiri micarimin joyoe tie.
23627	MAT 13:19	Junsi itsantie: —Diosichi fiqui ni cuwenta joe. Junni weyan tsachila Diosichi fiquica meranatonan natiya entendeituminlae. Yalari minubi arajica ni cuwenta jolajoe tie. Yucan yalachica jato, fiqui arajicaca manjosoleniquichunae.
23632	MAT 13:24	Junto Jesús camicarinato itsanque cuenta polarie: —Diosi jamochi mantamin cuwenta tobinan ya mantananun tsachi bolon serawonae. Junni yalaca serawonato, wita tsacumin cuwenta jochunae tie. Ya wita tsacumin sen trico nica yachi witabi waca jochunae tie.
23639	MAT 13:31	Junto Jesús micarinato, in cuentacanan polarie. Itsantie: —Mostasa tinun niri fe tsanini ni jotonan, witabi waquenari, duque jelelen imanhe tie. Jerale tapelaca fe uwaito, chide pele tsansi imanhe. Pichula titiya tasen quintsan imanhe. Junni Diosi ya mantananun tsachi bolonca serawonato, jun tsannan quichunae tie.
23641	MAT 13:33	Jesús jun cuenta polarisi, manaman cuenta manpolarie bibu quiminca. Itsantie: —Sona manca bibu quichunae tie. Man arowa tsansi arina cato, lebaduracanan pochunae yape bibu ayancaisa. Junsi tsarasi palachunae tie yape lebadura jeralete palaisa. Junni Diosi ya mantananun tsachi bolonca jerale tote serawonato, jun tsannan quichunae. Jesús tsanque cuenta polarie.
23645	MAT 13:37	Junni Jesús itsantie: —La tsachi ica jun joto, ya sen nica aralemin cuwenta joyoe tie.
23652	MAT 13:44	Junni aman Jesús tsachilabe cuenta caquinato, manca cuentacaman meralaquede! tie. Junto itsantie: —Tsachi manca duque mica jonunca fechunae tie. Uyanlachi tobi menaraminca fechunae. Junto son tito, mica jonunca nosa mandoto, jun toca calachi cachun duque tenfechunae. Ticatiya tanunca yape josa! tito jera osito, jun toca caniquichunae tie mica jonuncanan tsacumin ichun. Junni Diosi mantananun tsachi bolonbi wichun jun tsanquenan duque tenfentsan joe tie.
23653	MAT 13:45	Junni Jesús jun cuenta polaritobi, manca cuentacaman polarito itsantie: —Tsachi manca perla cato manhosimin jochunae tie. Junni perla neyato nenaminnan, duque sen perla manca quirachunae uyanlachica. Junto jun perlaca cachun duque tenfechunae tie. Ticatiya tanunca jera yape josa! tito osito, jun perlaca caniquichunae tie. Junni Diosi mantananun tsachi bolonbi wichun jun tsanquenan duque tenfentsan joe tie.
23655	MAT 13:47	Junni Jesús jun cuenta polaritobi manca cuentacaman itsanque polarie: —Watsa caminlari wa pipilubi dada quepolaquichunae tie. Dadabi ti watsatiya iniichunae tie weyan fitunun watsa, weyan finun watsa. Junni dada quidile inan, manlarito chudito, watsalaca wentelaquichunae. Finuncari tsalabi pocan, fitununca quepon, quito wentelaquichunae tie. Junni Diosi mantananun tsachi bolonbi jun cuwenta jochunae tie.
23660	MAT 13:52	Junni Jesuri chiquilabe itsantie: —Duque tanla duranun tamochi nechi ticatiya larilaquichunae tie. Numari tanuncanan, casancanan larilaquichunae tie. Junni Diosichi fiquica micariminlari Diosi mantananun tsachi bolonca miitori, jun cuwenta jolajochunae tie. Labe casan fiquica miilaichunae tie. Junni lachi casan fiquicanan, Diosichi matu pilacanan micarilaquichunae tie.
23665	MAT 13:57	Junto Jesuca quereituchi tito pailaie. Jesús mantimini yalabe itsantie: —Diosichi mantate paminlaca piyanlete respetailaichunae tie. Tencachique pueblobisiri, o tencachique yabisiri yalaca natiya respetailaituchunae tie.
23668	MAT 14:2	Herodes junca meráto yachi tsachilabe itsantinue: —In Jesús tinun tsachi Mumunmin Juan jonhoe tinue. Juan puyato mansonhito, wepanato quirantsancari seque quimin ica jonhoe tinue.
23673	MAT 14:7	yabe itsantinue: —Nu tica panhanatiya, la cuwaniqueyanae tinue. Juraquito pánayoe tito tsantinue.
23674	MAT 14:8	Junni ya namari yachi ayanbe panhanue. Junni yachi ayanbe panhato, Heródechica manjito, itsantinue: —Mumunmin Juanchi misuca wa nidabi cuwade! tinue.
23681	MAT 14:15	Junni quebi inasa Jesube penenaminlari yachica jato, itsanlatiyoe: —Inte niyanlanantiya chutunun posto joe tilatiyoe. Quebi inae tilatiyoe. Junto tsachilaca manherede! tilatiyoe yape quelole puebloca jito ano cato filaquisa.
23682	MAT 14:16	Junni Jesuri chiquilabe beco manpato itsantie: —Tsachilaca manheretuntsan joe. Nulari yalachi ano cufilaquede! tie.
23688	MAT 14:22	Junni jeralela ano fitobi, Jesuri yabe penenaminlabe itsantie: —Nulari canoabi wito, laca caquenan wa pipiluca polelainade! Junnasa lari tsachilaca manherechinayoe tie.
23693	MAT 14:27	Junnasaleri Jesuri pato itsantie: —Sonban tenca ilaide! tie. Lanan joyoe; jeleratulajode! tie.
23697	MAT 14:31	Jesús mantimini yaca tedechi we mancato itsantie: —Nu tennatumin joe. ¿Niyaito tennano peleiyun? tie.
23705	MAT 15:3	Junni Jesuri manpato itsantie: —Nulari wari matu to israelítalachi miteri nenalarachique Diosi mantaca junca telaquepominla joe tie. Meralaquede! Diosi chiquilaca mantanue apacanan, ayancanan seque respetailaisa. Apaca o ayanca seitonque paminlaca niya josatiya totenonan joeque chuteca joe tie. Juntonan nulari itsantiminla joe: Apachi o ayanchi tenchi seque quino muquetunari, nulachi calaca Diosichi jera cuwacayoe tintsan joe timinlae tie. Tsantiminlari apabe ayanbeca ayudaitusanan, se jonijochunae timinlae tie. Junto nulachi mantaca meráchun, Diosichi mantaca telaqueponiquiminla joe. Seitoe. ¿Niyaito tsanquiminla joyun? tie.
23712	MAT 15:10	Junni Jesús tsachilaca jera layasuwato, itsanque micarie: —Sele quereito meralaquede! tie.
23714	MAT 15:12	Junni Jesube penenaminla yachica jato itsanlatiyoe: —Fariséola nuchi fiquica meráto paicala joe tilatiyoe. ¿Yaca tenhiyun? tilatiyoe.
23715	MAT 15:13	Jesuri chiquilabe tulanto itsantie: —Fariséolaca tennatulajona! tie. Yalari epe tape cuwenta jolajoe. Junni ti tapetiya lachi Apa Diosi waqueca jun itotori, jera muraichunae.
23724	MAT 15:22	Junni junte chumin cananea sona chiquilachica jato, sonba pato itsantie: —Chiquechi namachibi yucanchi oco wito, duque padeseisa carinae. Nuri matu to miya Davichi alica joto, chiqueca laquirato yucanchi ococa mansularide! tie.
23725	MAT 15:23	Jesús mantimini yabe jun órari natiya patue. Junni Jesube penenaminlari Jesuchi cale jato itsanlatiyoe: —In sonaca ayudaito manherede! tilatiyoe. Chiquilaca bene jato otito pasuwanae tilatiyoe.
23726	MAT 15:24	Junni Jesús jun sonabe itsantie: —Diosi laca israelítalachi tenchisiri ereca joe tie. Yala Diosi wenteca tsachila jotonan, topiyato nenamin opisa cuwenta jolajoe tie.
23728	MAT 15:26	Junni Jesuri beco pato itsantie: —Israelítalari Diosichi nalala cuwenta josanan, nuri israelita itoe. Junni nuca ayudaitori, nalalachi anoca josoleto susuchi cuwamin cuwenta patino joichunae tie. Tsantuntsan joe tie.