23215	MAT 1:2	Ayman Abraham kanꞌ ngwa sti Isaac; loꞌo ayman Isaac kanꞌ ngwa sti Jacob; loꞌo ayman Jacob kanꞌ ngwa sti Juda loꞌo nchga taꞌa ngula yu;
23216	MAT 1:3	loꞌo ayman Juda kanꞌ ngwa sti Fares loꞌo Zara, loꞌo Tamar ngwa naan jyaꞌan neꞌ kanꞌ bra kanꞌ. Loꞌo ayman Fares kanꞌ ngwa sti Esrom; loꞌo ayman Esrom kanꞌ ngwa sti Aram;
23217	MAT 1:4	loꞌo ayman Aram kanꞌ ngwa sti Aminadab; loꞌo ayman Aminadab kanꞌ ngwa sti Naasón; loꞌo ayman Naasón kanꞌ ngwa sti Salmón;
23218	MAT 1:5	loꞌo ayman Salmón kanꞌ ngwa sti Booz, loꞌo Rahab ngwa naan jyaꞌan Booz kanꞌ bra kanꞌ. Loꞌo ayman Booz kanꞌ ngwa sti Obed, loꞌo Rut ngwa naan jyaꞌan Obed kanꞌ bra kanꞌ. Loꞌo ayman Obed kanꞌ ngwa sti Isaí;
23219	MAT 1:6	loꞌo ayman Isaí kanꞌ ngwa sti ree David; loꞌo ayman ree David ngwa sti Salomón, loꞌo jyaꞌan Salomón kanꞌ ngwa nu kunaꞌan nu ngwa kwilyoꞌo ayman Urías ti kulo la bra kanꞌ.
23220	MAT 1:7	Loꞌo ayman Salomón kanꞌ ngwa sti Roboam; loꞌo ayman Roboam kanꞌ ngwa sti Abías; loꞌo ayman Abías kanꞌ ngwa sti Asa;
23221	MAT 1:8	loꞌo ayman Asa kanꞌ ngwa sti Josafat; loꞌo ayman Josafat kanꞌ ngwa sti Joram; loꞌo ayman Joram kanꞌ ngwa sti Uzías;
23222	MAT 1:9	loꞌo ayman Uzías kanꞌ ngwa sti Jotam; loꞌo ayman Jotam kanꞌ ngwa sti Acaz; loꞌo ayman Acaz kanꞌ ngwa sti Ezequías;
23223	MAT 1:10	loꞌo ayman Ezequías kanꞌ ngwa sti Manasés; loꞌo ayman Manasés kanꞌ ngwa sti Amón; loꞌo ayman Amón kanꞌ ngwa sti Josías;
23224	MAT 1:11	loꞌo ayman Josías kanꞌ ngwa sti Jeconías loꞌo taꞌa ngula yu bra kanꞌ. Kanꞌ ndyaa loꞌo neꞌ Babilonia ꞌin neꞌ Israel presu la kichen tyi neꞌ tijyuꞌ; niꞌ ñaꞌan chkwan ꞌin neꞌ Babilonia ndyaa kaꞌan ꞌa neꞌ Israel bra kanꞌ.
23225	MAT 1:12	Nde kichen tijyuꞌ kanꞌ ngula Salatiel sñiꞌ ayman Jeconías kanꞌ bra kanꞌ; loꞌo ayman Salatiel kanꞌ ngwa sti Zorobabel;
23226	MAT 1:13	loꞌo ayman Zorobabel kanꞌ ngwa sti Abiud; loꞌo ayman Abiud kanꞌ ngwa sti Eliaquim; loꞌo ayman Eliaquim kanꞌ ngwa sti Azor;
23227	MAT 1:14	loꞌo ayman Azor kanꞌ ngwa sti Sadoc; loꞌo ayman Sadoc kanꞌ ngwa sti Aquim; loꞌo ayman Aquim kanꞌ ngwa sti Eliud;
23228	MAT 1:15	loꞌo ayman Eliud kanꞌ ngwa sti Eleazar; loꞌo ayman Eleazar kanꞌ ngwa sti Matán; loꞌo ayman Matán kanꞌ ngwa sti Jacob.
23231	MAT 1:18	Nde ndaꞌaǎn sa ñaꞌan ngwa bra nu ngula Jesucristo. Wa mskanꞌ chaꞌ ꞌin Liya kanꞌ, chaꞌ kaja kwilyoꞌo loꞌo Se nu lka sñiꞌ Jacob kanꞌ. Ja ya tyiꞌin Liya seꞌen ndiꞌin Se loꞌo mgii tiꞌ Liya kanꞌ, chaꞌ wa nsuꞌwi sñiꞌ; kanꞌ lka tñan nu wa yꞌni Tyiꞌi Ndiose ykwiꞌ, chaꞌ ngwa tnan Liya kanꞌ.
23232	MAT 1:19	Se kanꞌ ni, tꞌnan tiꞌ yu ꞌin Liya, chañi chaꞌ nsuꞌwi tiye yu ꞌin nu kunaꞌan kanꞌ. Bra wa ynan yu chaꞌ kanꞌ, ja ngwa tiꞌ yu ta yu chaꞌ jyuꞌu ꞌin Liya, ni siya ja kaja kwilyoꞌo yu loꞌo siꞌya sñiꞌ, mdaꞌan chaꞌ tiye yu; tyii chaꞌ ꞌin yu loꞌo ngwañaꞌan ti, nka tiye yu, chaꞌ ja ngwa tiꞌ yu xtya yu kiꞌya ꞌin nu kunaꞌan kanꞌ tuꞌ naꞌan tñan.
23236	MAT 1:23	Ka tnan ska nu kunaꞌan kuneꞌ nu ti ji xuꞌwi kiꞌyu ꞌin, loꞌo bra kanꞌ tyiꞌin ska kuwiꞌ kiꞌyu ꞌin; Emanuel chkwiꞌ neꞌ ꞌin kuwiꞌ kanꞌ. Ngwañaꞌan ndukwa chaꞌ lo kityi, kanꞌ chaꞌ ngwañaꞌan ngwa ꞌin Liya bra kanꞌ. Nu nchkwiꞌ neꞌ Emanuel ni, nde lka chaꞌ kanꞌ chaꞌtñan: Suꞌwa ndiꞌin Ndiose loꞌoan.
23239	MAT 2:1	Ti kwiꞌ bra nu ngula Jesús nde kichen Belén, ska yu kula nu naan Herodes ngwa ndloo la ꞌin nasiyun kanꞌ. La lo yuu ꞌin Judea, la kanꞌ ndiꞌin kichen Belén kanꞌ. Loꞌo mdiyan chinꞌ nten nu tiya ꞌa nde Judea kanꞌ; mdoꞌo neꞌ tiya kanꞌ nde kichen tijyuꞌ, nde seꞌen ndyoꞌo tukwa kwichaa, mdiyan neꞌ kichen Jerusalén bra kanꞌ. Ykwiꞌ neꞌ tiya kanꞌ loꞌo nten nu ndyukwa taꞌa neꞌ tuwiin:
23249	MAT 2:11	Yten neꞌ niꞌ ñaꞌan kanꞌ bra kanꞌ, naꞌan neꞌ kuwiꞌ loꞌo Liya jyaꞌan kuwiꞌ. Bra ti mduun xtyinꞌ neꞌ tiya kanꞌ seꞌen nskwa kuwiꞌ chaꞌ kuꞌni tnun neꞌ ꞌin. Loꞌo mxtiꞌ neꞌ yuꞌwa ꞌin neꞌ chaꞌ ta neꞌ lomstan ꞌin kuwiꞌ kanꞌ; mda neꞌ oro ꞌin kuwiꞌ kanꞌ, mda neꞌ ynan nu kaꞌan ꞌa ngaꞌan, loꞌo mda neꞌ mirra nu lka sete xi tyiꞌi ꞌin kuwiꞌ kanꞌ.
23250	MAT 2:12	Bra nu ndyaa yijaꞌ neꞌ, ykwiꞌ sla neꞌ bra kanꞌ; ykwiꞌ Ndiose loꞌo neꞌ chaꞌ ja tsaa ꞌa neꞌ seꞌen ndiꞌin ree Herodes kanꞌ xiyaꞌ, chaꞌ kwiñi ꞌa yu. Kanꞌ chaꞌ msñi neꞌ xka tuwiin chaꞌ ndyaan neꞌ kichen tyi neꞌ xiyaꞌ.
23251	MAT 2:13	Bra nu wa mdoꞌo neꞌ tiya kanꞌ ndyaa neꞌ kichen tyi neꞌ, bra kanꞌ ykwiꞌ sla Se. Mdoꞌo tukwa ska angajle laja sla yu, ykwiꞌ loꞌo yu bra kanꞌ: ―Xaa tiiꞌ ―ndukwin angajle kanꞌ ꞌin Se―. Tyituun, xnaan lyaa ―ndukwin―, tsaa loꞌoo ꞌin jyaꞌan kuwiꞌ tijyuꞌ la lo yuu ꞌin Egipto. Tyiꞌin wan nde kwa sa ñaꞌan bra nu katsaǎnꞌ ꞌiin chaꞌ ka tyaan wan nde nasiyun re xiyaꞌ. Tlá ꞌa ree Herodes kanꞌ; wa kan ti yu kichen re chaꞌ kunaan yu ꞌin kuwiꞌ ꞌwan, chaꞌ kujwi yu ꞌin kuwiꞌ ꞌwan, nchka tiꞌ yu.
23252	MAT 2:14	Bra ti mxaa tiꞌ Se, ndyaa loꞌo ꞌin kuwiꞌ loꞌo jyaꞌan kuwiꞌ xa nu ti tla; ndyaa neꞌ nde Egipto bra kanꞌ.
23254	MAT 2:16	Loꞌo ree Herodes kanꞌ ni, msinꞌ ꞌa tiꞌ yu bra nu mgii tiꞌ yu chaꞌ ja mdijin ꞌa neꞌ tiya kanꞌ xiyaꞌ seꞌen ndiꞌin yu. Ngulo ree kanꞌ tñan ꞌin msu ꞌin yu bra kanꞌ, chaꞌ tsaa neꞌ kujwi neꞌ ꞌin nchga kuwiꞌ kiꞌyu nu nsuꞌwi kichen Belén, nchga kuwiꞌ nu ja ya tyii snan yijan; kwiꞌ kujwi neꞌ ꞌin nchga kuwiꞌ kiꞌyu nu ndiꞌin kichen xuwe kwiꞌ seꞌen ti. Wa jlyo tiꞌ ree chaꞌ kuwiꞌ kanꞌ ja ya tyii snan yijan, chaꞌ wa ytsaꞌ neꞌ tiya kanꞌ chaꞌ sa kwa bra naꞌan neꞌ kwii kulasiin kanꞌ.
23256	MAT 2:18	Lye ꞌa ngiꞌni xiꞌin nten kichen Rama; msiꞌya ꞌa neꞌ, nganan ꞌa neꞌ, chaꞌ ngujwi sñiꞌ Raquel. Nganan ꞌa nu kunaꞌan kanꞌ, chaꞌ wa ngujwi sñiꞌ neꞌ. Loꞌo ja tukwin ꞌa ngwa kuꞌni chaꞌ ka tiin chaꞌ nganan nu kunaꞌan kanꞌ. Ngwañaꞌan lka chaꞌ ngwaꞌan yu kanꞌ lo kityi sꞌni, ni siya ja ya ka chaꞌ kanꞌ nu ti luꞌu ayman kanꞌ. Kanꞌ chaꞌ ngwañaꞌan ngwa ꞌin neꞌ Belén, nganan ꞌa neꞌ chaꞌ ngujwi sñiꞌ neꞌ.
23260	MAT 2:22	Kanꞌ ynan yu chaꞌ sñiꞌ ayman Herodes ngulo tñan nde Judea, ti kwiꞌ sñiꞌ yu nu naan Arquelao lka yu kanꞌ; kanꞌ chaꞌ ytsen chinꞌ Se bra kanꞌ. Xiyaꞌ ykwiꞌ sla yu sa ñaꞌan kuꞌni yu, kanꞌ chaꞌ ndyaa neꞌ nde lo yuu ꞌin Galilea,
23262	MAT 3:1	Wa mdiya yaꞌ mdyisnan Xuwa ngwaꞌu yu ꞌin nten nu mdaꞌan seꞌen ndiꞌin yu ska ti yu niꞌ kixinꞌ; mdukwatya yu ꞌin neꞌ bra kanꞌ. Ti kwiꞌ lo yuu ꞌin Judea ndiꞌin yu; wtyi ꞌa yuu seꞌen ndiꞌin Xuwa kanꞌ, ndiꞌin ꞌa kee, loꞌo ja tukwin ndiꞌin nde kwa.
23265	MAT 3:4	Loꞌo Xuwa kanꞌ ni, lkuꞌ yu ska teꞌ kichanꞌ camello, loꞌo nchkanꞌ kijin siꞌ yu; nchku yu skuꞌ loꞌo kwiñaꞌ kwitun.
23266	MAT 3:5	Loꞌo bra kanꞌ ndyoꞌ tiꞌin kaꞌan nten seꞌen ndiꞌin yu; mdiyan neꞌ kichen Jerusalén nde kwa, loꞌo neꞌ nchga kichen xuwe nu kwenta ꞌin Judea kanꞌ, loꞌo neꞌ nu ndiꞌin kwiꞌ seꞌen ti tuꞌwa chku Jordán, taꞌa neꞌ mdiyan neꞌ seꞌen ndiꞌin yu.
23268	MAT 3:7	Ngwa ska tsan naꞌan Xuwa ꞌin tyun neꞌ fariseo loꞌo neꞌ saduceo bra kanꞌ; kti ꞌa ngiꞌni neꞌ kanꞌ loꞌo Ndiose, nxkeꞌ tiꞌ neꞌ, lye ꞌa ngiꞌni siyeꞌ neꞌ loꞌo taꞌa nten neꞌ. Loꞌo chinꞌ neꞌ kanꞌ mdiyan neꞌ chaꞌ tukwatya Xuwa ꞌin neꞌ, loꞌo ja ndiya tiꞌ Xuwa chaꞌ ngwañaꞌan ngiꞌni neꞌ kanꞌ. ―Sa ñaꞌan lka kunan tlá, kwiꞌ ngwañaꞌan lka wan ―ndukwin Xuwa ꞌin neꞌ kanꞌ―. ¿Ta wa mxitsen neꞌ ꞌwan sikwa a? ¿Ti ka nu ndukwin ra ꞌwan chaꞌ lyaa wan ꞌin nu tiꞌí nu ndijyan xa nu tyii chalyuu a? ―ndukwin yu―.
23270	MAT 3:9	Ja xkeꞌ ꞌa tiꞌ wan chaꞌ ka suꞌwe ꞌwan tloo Ndiose si xkwiꞌ ndyuꞌwi tiꞌ wan ꞌin ayman kula ꞌwan, ñaꞌan tiꞌ ayman kula Abraham kanꞌ. Ja talo Ndiose ꞌin chaꞌ kuxi nu ngiꞌni wan siyaꞌ ti, ni siya nten taꞌa ayman Abraham lka wan, nchkwiꞌ wan. Nan kwiñi wan. Si nchka tiꞌ Ndiose, ka ꞌin Ni kwiñan Ni xka ta nten loꞌo kee ndiꞌin tuꞌwa chku re, chaꞌ ka neꞌ taꞌa ayman Abraham; ka ꞌin Ni si nchka tiꞌ Ni. Loꞌo ja tukwa Ndiose chaꞌ ꞌwan bra kanꞌ.
23271	MAT 3:10	Sa ñaꞌan nduun ska nten loꞌo chkwan yka ꞌin yu chaꞌ suwi yu lo yka kwiñii ꞌin yu, ngwañaꞌan lka Ndiose; siꞌyu yu kanꞌ ꞌin nchga yka nu ja nda nan suꞌwe, chaꞌ tikin yu ꞌin ran lo kiiꞌ, kwiꞌ ngwañaꞌan ta Ndiose nu tiꞌí ꞌin nten nu ja xlyaa kulaa yaꞌ chaꞌ kuxi nu ngiꞌni neꞌ.
23272	MAT 3:11	Loꞌoǔn ni, ndukwatyaǎn ꞌwan loꞌo tyiꞌa chku re, si chañi chaꞌ wa ngwa jyuꞌu tiꞌ wan ꞌin kiꞌya nu ndukwi wan; loꞌo wa kan ti xka nu tnun la chaꞌ nchka ꞌin ke naꞌ. Loꞌoǔn, kuꞌni tnuǔn ꞌin yu kanꞌ; suꞌwe ꞌa ka tiyeěn, ni siya xtiǐnꞌ tiǎn ti ndukwa snan yu kanꞌ. Loꞌo yu kanꞌ ni, ja tukwatya yu ꞌin nten loꞌo tyiꞌa ti; kuꞌni yu chaꞌ kanun Tyiꞌi Ndiose niꞌ kasiya ꞌin nten xa nu tukwatya yu ꞌin neꞌ. Kwiꞌ ngwañaꞌan, kuꞌni luwi yu kasiya ꞌin neꞌ loꞌo xaa ꞌin yu.
23277	MAT 3:16	Xa wa ngwa chaꞌ kanꞌ, mdoꞌo Jesús lo tyiꞌa, kanꞌ ngalaa nde niꞌ kwan. Loꞌo bra kanꞌ naꞌan Jesús chaꞌ ngwiꞌya Tyiꞌi Ndiose chunꞌ yu; sa ñaꞌan ndiꞌya ska kiñi cha kuun lo yuu, ngwañaꞌan ngwiꞌya Tyiꞌi Ndiose chunꞌ Jesús.
23282	MAT 4:4	Mxkwen Jesús ꞌin kuneꞌ xaꞌan bra kanꞌ: ―Ndukwa ska chaꞌ lo kityi ꞌin Ndiose ―ndukwin Jesús ꞌin yu―. Nde ñaꞌan nchkwiꞌ chaꞌ kanꞌ: “Siꞌi nan kuꞌu nten chalyuu chaꞌ nchku neꞌ tyaja ti; xa nu kunan neꞌ nchga chaꞌ nu nchkwiꞌ Ndiose, kanꞌ chañi chaꞌ tyiꞌin suꞌwe neꞌ.” Ngwañaꞌan nchkwiꞌ chaꞌ nu ndukwa lo kityi.
23283	MAT 4:5	Loꞌo bra kanꞌ ndyaa loꞌo kuneꞌ xaꞌan ꞌin Jesús nde kichen Jerusalén, ti kwiꞌ kichen nu ndiya ꞌa tiꞌ Ndiose; mchkwen neꞌ ndyaa neꞌ la ke laa tnun ꞌin kichen kanꞌ, kwan ꞌa mduun neꞌ bra kanꞌ.
23290	MAT 4:12	Chunꞌ ndiꞌin la mdoꞌo Jesús ndyaa, chaꞌ wa ynan yu chaꞌ wa msñi neꞌ ꞌin Xuwa; wa ndyaa loꞌo neꞌ ꞌin Xuwa kanꞌ niꞌ ñaꞌan chkwan. Bra kanꞌ ndyaan Jesús nde lo yuu ꞌin Galilea xiyaꞌ, ndyaan yu kichen Nazaret.
23291	MAT 4:13	Loꞌo ja nganun yu kichen Nazaret kanꞌ; mxaꞌan yu seꞌen ndiꞌin yu, ndyaa yu kichen Capernaum tuꞌwa tiyuꞌ. Ndiꞌin kichen kanꞌ laja lo yuu ꞌin Zabulón loꞌo yuu ꞌin Neftalí.
23293	MAT 4:15	Yuu nu ndiꞌin kwenta ꞌin Zabulón loꞌo yuu nu kwenta ꞌin Neftalí nde xka laꞌa tsuꞌ chku Jordán, tyijian lo yuu kanꞌ, kalaan tuꞌwa tujoꞌo bra kanꞌ; kanꞌ lka yuu ꞌin Galilea, seꞌen ndiꞌin nten nu ja lka judío.
23294	MAT 4:16	Wa yten ska xaa tlyu niꞌ kasiya ꞌin neꞌ kanꞌ; nu ngwa xkanꞌ xiꞌin ꞌa tiꞌ neꞌ, ntsen neꞌ si kaja neꞌ, lye ꞌa ngwa tla niꞌ kasiya ꞌin neꞌ kanꞌ bra kanꞌ, siꞌya chaꞌ kuxi. Bra ni wa ndiꞌin xaa niꞌ kasiya ꞌin neꞌ kanꞌ, wa kaja ti chalyuu nu ja tsaa tii ꞌa ꞌin neꞌ kanꞌ. Ngwañaꞌan ykwiꞌ ayman kanꞌ, kanꞌ chaꞌ lo yuu kanꞌ mdiꞌin Jesús bra kanꞌ.
23297	MAT 4:19	Loꞌo bra kanꞌ ykwiꞌ Jesús loꞌo taꞌa tyukwaa yu kiꞌyu kanꞌ: ―Tsaa wan loꞌoǔn ni ―ndukwin Jesús ꞌin neꞌ kanꞌ―. Sa ñaꞌan mjwi kula ꞌwan xa nu mdaꞌan wan kuta kula, ngwañaꞌan kaja xka tñan ꞌwan ni chabiyaꞌ ꞌñaǎn; kwaꞌuǔn ꞌwan sa ñaꞌan nu tsaa naan wan ꞌin nten chalyuu re nu ja ya kunan chaꞌ suꞌwe, chaꞌ ka neꞌ nten ꞌñaǎn.
23299	MAT 4:21	Nde loo la chinꞌ naꞌan Jesús ꞌin Santiago sñiꞌ Zebedeo loꞌo Xuwa taꞌa ngula yu; ndukwa neꞌ niꞌ yka naꞌan xuwe ꞌin neꞌ loꞌo sti neꞌ, nxuꞌwa neꞌ katan ꞌin neꞌ bra kanꞌ. Kanꞌ msiꞌya Jesús ꞌin neꞌ kanꞌ, chaꞌ tsaa neꞌ loꞌo.
23301	MAT 4:23	Ndyaa neꞌ nchga kichen nde lo yuu ꞌin Galilea loꞌo Jesús bra kanꞌ. Nchga kichen seꞌen mdaꞌan yu ngwaꞌu yu ꞌin nten niꞌ lyaa ꞌin neꞌ judío; ykwiꞌ yu loꞌo neꞌ sa ñaꞌan lka chaꞌ suꞌwe ꞌin Ndiose, chaꞌ wa ndla ti ka Ndiose ndloo la niꞌ kasiya ꞌin neꞌ. Kwiꞌ ngwañaꞌan, yꞌni yu joꞌó ꞌin nchga nu tiꞌí, nchga kicha nu ndiꞌin ꞌin neꞌ yꞌni Jesús chaꞌ nchkaa neꞌ.
23302	MAT 4:24	Bra kanꞌ ynen chaꞌ ꞌin Jesús nchga kichen nde lo yuu ꞌin Siria; kanꞌ chaꞌ mdiyan loꞌo neꞌ ꞌin nchga nu tiꞌí seꞌen ndiꞌin yu, chaꞌ kuꞌni yu joꞌó ꞌin neꞌ. Ndijyan loꞌo neꞌ ꞌin nu tiꞌí, loꞌo nu nsuꞌwi kicha ꞌin; loꞌo nu nsuꞌwi kwiꞌin kuxi ꞌin, loꞌo nu nꞌni lyoꞌo kwiꞌin ꞌin, loꞌo nu nchkunꞌ ñaꞌaan tyukwin nsuꞌwi, loꞌo nu mtyi ska laꞌa yaꞌ, yꞌni Jesús chaꞌ nchkaa nchga nu tiꞌí kanꞌ.
23307	MAT 5:4	’Kwiꞌ ngwañaꞌan, ka suꞌwe nka tiye nten ni siya xiꞌin tiꞌ neꞌ ni, siꞌya kiꞌya nu ndiꞌin ꞌin neꞌ; kuꞌni Ndiose chaꞌ ka suꞌwe ka tiye neꞌ kanꞌ chunꞌ ndiꞌin la.
23309	MAT 5:6	’Kwiꞌ ngwañaꞌan, ka suꞌwe nka tiye nten nu xlyaa kuꞌni nchga chaꞌ suꞌwe, nchga chaꞌ nu ñi; tayaꞌ Ndiose ꞌin nten kanꞌ, chaꞌ ka kuꞌni neꞌ nchga tñan nu nchka tiꞌ Ni.
23316	MAT 5:13	’Sa ñaꞌan nu nnanjoꞌo ꞌa tejeꞌ ꞌñaan chaꞌ tiyenꞌ ran, chaꞌ kuꞌni xunꞌ ran skwa, ngwañaꞌan lka wan lo chalyuu; nnanjoꞌo ꞌa wan ꞌin Ndiose chaꞌ kuꞌni wan tñan ꞌin Ni. Si wa mnuꞌun tejeꞌ ꞌñaan, ja ka ꞌa kunanjoꞌo ran ꞌñaan bra kanꞌ; suꞌwe la si xkwaan ꞌin tejeꞌ kanꞌ tuꞌwa tuwiin seꞌen ndijin nten bra kanꞌ. Ja nꞌni chaꞌ ni siya lyoꞌo suꞌwa nten chunꞌ tejeꞌ mnuꞌun kanꞌ. Sa ñaꞌan ngiꞌni nten loꞌo tejeꞌ mnuꞌun kanꞌ, ngwañaꞌan ngiꞌni Ndiose loꞌo nten nu ja nnan chaꞌ nchkwiꞌ Ni.
23317	MAT 5:14	’Sa ñaꞌan lka ska xaa, ngwañaꞌan lka wan, chaꞌ ka kwaꞌu wan tuwiin ꞌin Ndiose ꞌin nchga nten chalyuu. Ska kichen nu ndiꞌin lo kiꞌya ni, ja ka tyiꞌin kanꞌ mnan ti; ñaꞌan nchga nten ꞌin kichen kanꞌ.
23318	MAT 5:15	Kwiꞌ ngwañaꞌan, bra nu mxkin neꞌ ska kiiꞌ kityee, ja suꞌwa kutsiꞌ neꞌ ꞌin kiiꞌ kanꞌ niꞌ kajun bra kanꞌ; kwan xtya neꞌ kityee kanꞌ, chaꞌ kiꞌni xaa ñaꞌaan niꞌ ñaꞌan kanꞌ.
23320	MAT 5:17	’Ja tyaꞌan chaꞌ tiye wan chaꞌ ndijyaǎn lo chalyuu re chaꞌ kuꞌni tyiǐn chaꞌ kula ꞌñaan; ni siya nchga chaꞌ nu ykwiꞌ Ndiose loꞌo ayman Moisés, ni siya nchga chaꞌ nu ngwaꞌan ayman nu ykwiꞌ loꞌo nten chaꞌ ꞌin Ndiose nu ngwa sꞌni, ja kuꞌni tyiǐn chaꞌ kanꞌ. Wa ndijyaǎn chaꞌ nu kwaꞌuǔn ñi ꞌin nten sa ñaꞌan lka nchga chaꞌ nu ndukwa lo kityi kula kanꞌ.
23321	MAT 5:18	Chañi chaꞌ nchkwiǐnꞌ loꞌo wan ni, chaꞌ ja ska chaꞌ nu ngwaꞌan ayman sꞌni chaꞌ ꞌin Ndiose, ja ka kuꞌni tyii nten chaꞌ kanꞌ sa ñaꞌan bra nu tsaa tii chalyuu; chañi chaꞌ ka nchga chaꞌ nu ndukwa lo kityi ꞌin Ndiose nu ngwa sꞌni.
23325	MAT 5:22	Loꞌo ni, kaꞌan la chaꞌ chkwiǐnꞌ loꞌo wan: Ni siya naꞌan tiꞌí ti neꞌ ꞌin taꞌa nten neꞌ, ndiꞌin chaꞌ tyijin neꞌ nu tiꞌí bra kanꞌ; ni siya chkwiꞌ neꞌ ska chaꞌ kuxi ꞌin taꞌa nten neꞌ, bra kanꞌ ndiꞌin chaꞌ tsaa neꞌ nde seꞌen ndukwa nu lka ndloo la nde kichen Jerusalén, chaꞌ ka biyaꞌ chaꞌ ꞌin neꞌ nde kwa bra kanꞌ. Kwiꞌ ngwañaꞌan, bra nu msinꞌ ꞌa tiꞌ neꞌ nchkwiꞌ neꞌ loꞌo taꞌa nten neꞌ: ¡Tintu ꞌa nuꞌwin!, ja chan tsaa neꞌ kanꞌ lo jwlyaa, seꞌen ja tsaa tii ꞌa chaꞌ nchkin kiiꞌ bra kanꞌ.
23332	MAT 5:29	’Bra nu ndiya ska chaꞌ kuxi nu ñaꞌan wan loꞌo kiloo wan, loꞌo ndiya ꞌa tiꞌ wan chaꞌ kuxi kanꞌ, ndiꞌin chaꞌ kulaa yaꞌ wan chaꞌ kuxi kanꞌ bra ti. Ñaꞌan tiꞌ si kulo wan ska laꞌa kiloo wan, kanun kwityiinꞌ wan bra kanꞌ, ja tyukwi wan bra kanꞌ; ngwañaꞌan ka kasiya ꞌwan ni, ka luwi kasiya ꞌwan si kulaa yaꞌ wan chaꞌ kuxi kanꞌ, ni siya xiꞌin tiꞌ wan ti chinꞌ. Chunꞌ ndiꞌin la ja tsaa wan lo jwlyaa siꞌya chaꞌ kuxi kanꞌ ꞌwan, seꞌen lye nchkin kiiꞌ bra kanꞌ.
23333	MAT 5:30	Bra nu ndiya ska chaꞌ kuxi nu ngiꞌni wan loꞌo yaꞌ wan, loꞌo ndiya ꞌa tiꞌ wan chaꞌ kuxi kanꞌ, ndiꞌin chaꞌ kulo chunꞌ wan chaꞌ kuxi kanꞌ bra ti. Ñaꞌan tiꞌ si siꞌyu wan ska laꞌa skun wan, kanun chkuꞌ yaꞌ wan bra kanꞌ, ja tyukwi wan bra kanꞌ; ngwañaꞌan ka kasiya ꞌwan ni, ka luwi kasiya ꞌwan si kulaa yaꞌ wan chaꞌ kuxi kanꞌ, ni siya xiꞌin tiꞌ wan ti chinꞌ. Chunꞌ ndiꞌin la ja tsaa wan lo jwlyaa siꞌya chaꞌ kuxi kanꞌ ꞌwan, seꞌen lye nchkin kiiꞌ bra kanꞌ.
23337	MAT 5:34	Ni ni, kaꞌan la chaꞌ chkwiǐnꞌ loꞌo wan: Ja suꞌwe siyaꞌ ti skanꞌ wan ska chaꞌ loꞌo nten chaꞌ nchkwiꞌ wan ska chaꞌ nu tnun ꞌa; ni siya chkwiꞌ wan chaꞌ ꞌin nchga nan nu nsuꞌwi niꞌ kwan, ja skanꞌ wan chaꞌ loꞌo nten ngwañaꞌan, chaꞌ la kanꞌ ndiꞌin Ndiose ykwiꞌ;
23338	MAT 5:35	ni siya chkwiꞌ wan chaꞌ ꞌin nan nu nsuꞌwi lo chalyuu re, ja chkwiꞌ wan chaꞌ nu tnun ꞌa ngwañaꞌan, chaꞌ chaꞌ ꞌin Ndiose lka chalyuu re; ni siya chkwiꞌ wan chaꞌ ꞌin kichen Jerusalén, ja chkwiꞌ wan chaꞌ nu tnun ꞌa ngwañaꞌan, chaꞌ la kanꞌ lka Ndiose ndloo la.
23340	MAT 5:37	Sa kanꞌ ti chaꞌ chkwiꞌ wan “Chañi”, si chaꞌ nu ñi lka; kwiꞌ ngwañaꞌan chkwiꞌ wan “Siꞌi”, si chaꞌ kwiñi lka. Nchga la chaꞌ nu chkwiꞌ wan xa nu nchkwiꞌ wan ska chaꞌ tnun, chaꞌ ꞌin kuneꞌ xaꞌan lka kanꞌ.
23343	MAT 5:40	Bra nu nchka tiꞌ ska nten xaꞌan kulaa ykanꞌ ꞌwan, bra ti ta wan ran ꞌin yu bra kanꞌ; loꞌo ta wan chinꞌ xka la teꞌ ꞌin yu, chaꞌ kanun suꞌwe ka tiye yu bra kanꞌ.
23344	MAT 5:41	Kwiꞌ ngwañaꞌan, ska yu nu lka ndloo la, si kulo yu tñan ꞌwan chaꞌ tsaa loꞌo wan yuꞌwa ꞌin yu ska seꞌen, bra ti tsaa loꞌo wan yuꞌwa kanꞌ ꞌin yu; suꞌwe ti ka tiye wan tsaa loꞌo wan ꞌin ran la tijyuꞌ la chinꞌ, si ngwañaꞌan nchka tiꞌ yu.
23345	MAT 5:42	Bra nu jñan ska nten ya ñaꞌan ti nan ꞌwan, ta wan nan kanꞌ ꞌin yu; kwiꞌ ngwañaꞌan, si jñan neꞌ ska nan jñiꞌ ti ꞌwan, suꞌwe ti chkwiꞌ wan loꞌo neꞌ bra kanꞌ.
23347	MAT 5:44	Loꞌo ni, kaꞌan la chaꞌ chkwiǐnꞌ loꞌo wan: Suꞌwe ꞌa xuꞌwi tiye wan ñaꞌan wan ꞌin nu tiꞌí tiꞌ ꞌwan; kwiꞌ ngwañaꞌan, suꞌwe chkwiꞌ wan loꞌo nten nu suꞌwa kwentu ꞌwan, suꞌwe kuꞌni wan loꞌo nten nu liyeꞌ tiꞌ ꞌwan; chkwiꞌ wan loꞌo Ndiose chaꞌ ꞌin neꞌ kanꞌ, ni siya naꞌan tiꞌí neꞌ ꞌwan, ni siya nxtyi lyoꞌo neꞌ ꞌwan.
23348	MAT 5:45	Ka xuꞌwi lyo nten ꞌwan chaꞌ lka wan sñiꞌ Ndiose nu ndiꞌin niꞌ kwan bra kanꞌ. Suꞌwa nda Ndiose xaa kwan loꞌo seꞌen ndiꞌin nten kuxi, loꞌo seꞌen ndiꞌin nten suꞌwe; suꞌwa nda Ndiose tyoo kiꞌya seꞌen ndiꞌin nten suꞌwe loꞌo seꞌen ndiꞌin nten xaꞌan. Kanꞌ chaꞌ suꞌwe la bra nu suꞌwa kuꞌni wan chaꞌ suꞌwe loꞌo nchga nten.
23349	MAT 5:46	Ti kwiꞌ ti chaꞌ, ja suꞌwe si xkwiꞌ suꞌwe nsuꞌwi tiye wan loꞌo nten taꞌa suꞌwe ndiꞌin wan. Siꞌi nan suꞌwe la kunan Ndiose chaꞌ nchkwiꞌ wan si ngwañaꞌan ngiꞌni wan, chaꞌ kwiꞌ ngwañaꞌan ngiꞌni ya ñaꞌan ti nten; ni siya nten suꞌwe, ni siya nten xaꞌan, loꞌo neꞌ nu ndlo tñi ꞌwan chaꞌ ꞌin neꞌ xka laꞌa tsuꞌ, nchga nten kanꞌ ngiꞌni suꞌwe neꞌ loꞌo taꞌa suꞌwe ndiꞌin neꞌ.
23350	MAT 5:47	Bra nu chkwiꞌ suꞌwe wan ska ti loꞌo taꞌa suꞌwe nsuꞌwi wan, ja suꞌwe kanꞌ, chaꞌ kwiꞌ ngwañaꞌan ngiꞌni nchga nten; loꞌo nten nu ja ndiꞌin chaꞌ ꞌin loꞌo Ndiose, loꞌo nten kanꞌ nchkwiꞌ suꞌwe loꞌo taꞌa suꞌwe ndiꞌin neꞌ. Ti kaꞌan la chaꞌ suꞌwe kuꞌni wan, nchka tiꞌ Ndiose.
23353	MAT 6:2	Bra nu tayaꞌ wan ꞌin neꞌ tiꞌi, ja ndiꞌin chaꞌ katsaꞌ wan chaꞌ kanꞌ ꞌin xka la nten. Ja kuꞌni wan sa ñaꞌan nu ngiꞌni nten nu tukwa chaꞌ nsuꞌwi tiye neꞌ, nu nchka ꞌa tiꞌ chaꞌ ñaꞌan xka la nten ꞌin neꞌ; bra nu tayaꞌ neꞌ kanꞌ ꞌin neꞌ tiꞌi, ni siya niꞌ lyaa ꞌin neꞌ judío taꞌaan, ni siya tuꞌwa tuwiin ti, ska ti chaꞌ nchka tiꞌ neꞌ kanꞌ, chaꞌ suꞌwe ꞌa chkwiꞌ nten chaꞌ ꞌin neꞌ, ti ykwiꞌ ti neꞌ. Ja kuꞌni wan ngwañaꞌan. Chañi chaꞌ nchkwiǐnꞌ loꞌo wan: Nchga chaꞌ suꞌwe nu kaja ꞌin neꞌ kanꞌ nde loo la seꞌen ndiꞌin Ndiose, wa lka mjwi chaꞌ kanꞌ ꞌin neꞌ kanꞌ, chaꞌ wa naꞌan xka la nten ꞌin neꞌ.
23354	MAT 6:3	Loꞌo ꞌwan ni, bra nu ta wan ska xuꞌwe ꞌin neꞌ tiꞌi, ta wan ran mnan ti, chaꞌ ja ka biyaꞌ tiꞌ xka la nten; ni siya neꞌ taꞌa wan, ja ka biyaꞌ tiꞌ neꞌ sa ñaꞌan tñan ngiꞌni wan.
23356	MAT 6:5	’Xka chaꞌ ni: Bra nu chkwiꞌ wan loꞌo Ndiose, ja kuꞌni wan sa ñaꞌan nu ngiꞌni nten nu tukwa chaꞌ nsuꞌwi tiye. Nduun neꞌ kwiñi kanꞌ seꞌen ndiꞌin nten niꞌ lyaa ꞌin neꞌ judío taꞌaan, chaꞌ nchka tiꞌ neꞌ chkwiꞌ neꞌ loꞌo Ndiose bra nu ñaꞌan nten ꞌin neꞌ; ti kwiꞌ ti chaꞌ, nduun neꞌ jluꞌwe tuwiin chaꞌ chkwiꞌ neꞌ loꞌo Ndiose. Chañi chaꞌ nchkwiǐnꞌ loꞌo wan: Nchga chaꞌ suꞌwe nu kaja ꞌin neꞌ kanꞌ nde loo la seꞌen ndiꞌin Ndiose, wa lka mjwi chaꞌ kanꞌ ꞌin neꞌ lo chalyuu ni, chaꞌ wa naꞌan nten chalyuu ꞌin neꞌ.
23357	MAT 6:6	Loꞌo ꞌwan ni, bra nu chkwiꞌ wan loꞌo Ndiose, tsaa wan ska seꞌen nu ka tyiꞌin wan ska ti wan. Nu ndiꞌin wan niꞌ ñaꞌan bra kanꞌ, tukunꞌ wan tunaꞌan, chaꞌ ngwañaꞌan kuꞌni tnun wan ska ti wan ꞌin Stian Ndiose bra kanꞌ; ndiꞌin Ni ti kwiꞌ seꞌen ndiꞌin wan, ni siya ja ndiꞌin xka la nten seꞌen ndiꞌin wan. Ska ti Stian Ndiose nchka biyaꞌ tiꞌ Ni sa ñaꞌan chaꞌ suꞌwe nu ngiꞌni wan ska ti wan, kanꞌ nu ta chaꞌ suꞌwe ꞌwan nde loo la.
23361	MAT 6:10	Kan nuꞌwin lo chalyuu re chaꞌ ka ndloo la ꞌwa. Kuꞌnii chaꞌ ka nchga chaꞌ nu nchka tiiꞌ chaꞌ ka lo chalyuu re; sa ñaꞌan nu ngiꞌnii nde seꞌen ndiꞌiin nde niꞌ kwan, ngwañaꞌan ka lo yuu re bra kanꞌ.
23364	MAT 6:13	Ja taa chabiyaꞌ chaꞌ jwakii chaꞌ kuxi ꞌwa, kuloo ꞌwa yaꞌ kuneꞌ xaꞌan bra kanꞌ. Nuꞌwin ndloo tñan nchga chaꞌ; nchga chabiyaꞌ nu nsuꞌwi lo chalyuu, nchga chabiyaꞌ nu nsuꞌwi nde niꞌ kwan, nuꞌwin ndiya nchga chabiyaꞌ kanꞌ ꞌiin. Ja tsaa tii ꞌa chaꞌ tlyu la ti nuꞌwin. Ngwañaꞌan ka chaꞌ. Ngwañaꞌan chkwiꞌ wan loꞌo Ndiose.
23365	MAT 6:14	’Bra nu kuꞌni wan chaꞌ tlyu tiꞌ ꞌin xka la nten nu wa yꞌni chaꞌ kuxi loꞌo wan, loꞌo Stian nu ndiꞌin nde niꞌ kwan, kuꞌni Ni chaꞌ tlyu tiꞌ ꞌwan bra kanꞌ;
23370	MAT 6:19	’Xka chaꞌ ni: Ja xoꞌ tiꞌin wan kaꞌan ꞌa chaꞌ suꞌwe chaꞌ ꞌwan ti ykwiꞌ ti wan xa nu ndiꞌin wan lo chalyuu re. Ndla ti ñuꞌun chaꞌ suꞌwe kanꞌ ngwa ti ñaꞌan; ndiya bra nchku tñaꞌ ꞌin ran, ta nchku kusunꞌ ꞌin ran, kuꞌni ñuꞌun iꞌ ꞌin ran bra kanꞌ. Kwiꞌ ngwañaꞌan, kuꞌni neꞌ kunan chaꞌ suꞌwe nu nsuꞌwi ꞌwan, kanaꞌ chaꞌ kanꞌ ꞌwan bra kanꞌ.
23371	MAT 6:20	Suꞌwe la chaꞌ ta Ndiose chaꞌ suꞌwe nu tnun chinꞌ ꞌwan nde seꞌen ndiꞌin Ni; ja ku tñaꞌ chaꞌ suꞌwe kanꞌ, ja ka ñuꞌun ran, loꞌo ja ka kuꞌni neꞌ kunan chaꞌ suꞌwe kanꞌ.
23376	MAT 6:25	’Nduwe ꞌa tiꞌ Ndiose ꞌwan, kanꞌ chaꞌ ja ndiꞌin chaꞌ tyaꞌan ꞌa chaꞌ tiye wan sa ñaꞌan ka kuꞌu wan lo chalyuu, nan ka ku wan, nan ka koꞌo wan seꞌen ndiꞌin wan. Ja tyaꞌan ꞌa chaꞌ tiye wan la nde kaja steꞌ wan. Yaꞌ la ni chaꞌ luꞌuun tian, ni siya ja kaꞌan ꞌa nan kuan; yaꞌ la ni chaꞌ suꞌwe ti tyukwi ñaꞌaan, ni siya ja suꞌwe ꞌa steanꞌ.
23377	MAT 6:26	Tyaꞌan chinꞌ chaꞌ tiye wan sa ñaꞌan nchka ꞌin kiñi nu ndukwi kwan: ja ntya iꞌ nskwaꞌ, ja nxtun iꞌ tya, ja nñan iꞌ juꞌwa seꞌen xoꞌ tiꞌin iꞌ nan ku iꞌ; Stian Ndiose nu ndiꞌin nde niꞌ kwan, nda Ni nan ku iꞌ ngwa ti ñaꞌan. Loꞌo ꞌwan ni, ¿ta chinꞌ la nsuꞌwi lyo wan ke ska kiñi seꞌen ndiꞌin Ndiose a? ¡Siꞌi! Kaꞌan la nsuꞌwi lyo wan chaꞌ ꞌin Ndiose.
23380	MAT 6:29	Ayman Salomón nu ngwa ree kuliyaꞌ ꞌa nu ngwa sꞌni ni, suꞌwe ꞌa ñaꞌan steꞌ yu kula kanꞌ; loꞌo ja suꞌwa ñaꞌan steꞌ yu loꞌo keé kwa, chaꞌ suꞌwe la ñaꞌan keé kwa siyaꞌ ti.
23381	MAT 6:30	Suꞌwe ꞌa ngwiñan Ndiose keé kwa, chaꞌ nda Ni ska lo chaꞌ ndiꞌya ꞌin keé kanꞌ, ni siya ska ti tsan talo keé kwa, kanꞌ nchkin ran ndiꞌin bra; kwiꞌ ngwañaꞌan, ta Ndiose teꞌ kuꞌ wan, ni siya chinꞌ ꞌa ndyaa ñaꞌan tiꞌ wan ꞌin Ni.
23384	MAT 6:33	kanꞌ chaꞌ siꞌi chaꞌ kanꞌ tsaa naan wan. Suꞌwe la si ta wan chabiyaꞌ ꞌin Ndiose chaꞌ ka Ni ndloo niꞌ kasiya ꞌwan, suꞌwe la si kuꞌni wan nchga chaꞌ nu nchka tiꞌ Ndiose chaꞌ kuꞌni wan lo chalyuu re; bra kanꞌ ta Ni nchga nan nu lyiji chinꞌ ꞌwan.
23392	MAT 7:7	’Xka chaꞌ ni: Jñan wan ska chaꞌ ꞌin Ndiose, loꞌo ta Ni chaꞌ kanꞌ ꞌwan bra kanꞌ; tsaa naan wan ꞌin Ndiose, loꞌo tyija lyo Ni ꞌwan bra kanꞌ; tyukwi ti tiye wan chkwiꞌ wan loꞌo Ndiose, kunan Ni chaꞌ nu chkwiꞌ wan loꞌo Ni bra kanꞌ.
23393	MAT 7:8	Nchga nten nu jñan ska chaꞌ ꞌin Ndiose, kaja chaꞌ kanꞌ ꞌin neꞌ bra kanꞌ; nchga nten nu tsaa naan ꞌin Ndiose, tyija lyo Ni ꞌin neꞌ bra kanꞌ; kwiꞌ ngwañaꞌan, nchga nten nu tyukwi ti tiye neꞌ chkwiꞌ neꞌ loꞌo Ndiose, kunan Ni chaꞌ nu chkwiꞌ neꞌ loꞌo Ni bra kanꞌ.
23397	MAT 7:12	’Ndiꞌin chaꞌ kuꞌni wan chaꞌ suꞌwe loꞌo xka la nten si nchka tiꞌ wan chaꞌ suꞌwe ti kuꞌni neꞌ loꞌo wan. Ti kwiꞌ tñan kanꞌ ngulo Ndiose lo kityi nu ngwaꞌan ayman Moisés, ti kwiꞌ ti chaꞌ ngwaꞌan xka la ayman nu ykwiꞌ chaꞌ ꞌin Ndiose loꞌo nten nu ngwa sꞌni; ska ñaꞌan ndyoꞌo ti chaꞌ nu ykwiꞌ nchga neꞌ kanꞌ lo kityi.
23399	MAT 7:14	Luꞌwi ꞌa tu loꞌoo, lti ti tuwiin seꞌen tsaa neꞌ nu mjwi chalyuu nu ja tsaa tii ꞌa ꞌin neꞌ; chinꞌ ti nten ndyija lyo tuwiin kanꞌ ꞌin neꞌ.
23400	MAT 7:15	’Xka chaꞌ ni: Chaꞌ tiya ti tiꞌ wan kuꞌni wan loꞌo nten nu kwiñi, nu nchkwiꞌ chaꞌ chabiyaꞌ ꞌin Ndiose nduꞌu neꞌ ꞌwan, nchkwiꞌ neꞌ. Ska ꞌni suꞌwe lka slyaꞌ, ja tlá iꞌ; loꞌo neꞌ kwiñi kanꞌ, nchka tiꞌ neꞌ kwiñi lyoꞌo neꞌ ꞌwan chaꞌ nten suꞌwe lka neꞌ, chaꞌ lka neꞌ ñaꞌan tiꞌ slyaꞌ. Suꞌwe ꞌa ngiꞌni neꞌ loꞌo wan, loꞌo nde niꞌ kasiya ꞌin neꞌ kanꞌ, xaꞌan ꞌa neꞌ. Kwiñi ꞌa neꞌ kanꞌ. Ja lka neꞌ kanꞌ ñaꞌan tiꞌ slyaꞌ; ñaꞌan tiꞌ nguoꞌo nu tlá ꞌa, ngwañaꞌan lka neꞌ kanꞌ.
23402	MAT 7:17	Lo nchga yka kwiñi ndyoꞌo nan nu kunanjoꞌo ꞌñaan; yka nu tlá ni, ja ka kuan nan nu ndyoꞌo lo ran.
23403	MAT 7:18	Ja tyoꞌo nan nu ja suꞌwe nchku ꞌin ska yka kwiñii; ngwañaꞌan ska yka nu tlá, ja suꞌwe nan nu ndyoꞌo lo ran.
23404	MAT 7:19	Siꞌyu neꞌ yka nu tlá kanꞌ, chaꞌ ja ka kunanjoꞌo ran ꞌñaan; tikin neꞌ yka kanꞌ bra kanꞌ.
23405	MAT 7:20	Nchka biyaꞌ tiꞌ wan sa ñaꞌan lka ska yka bra nu ñaꞌan wan nan nu ndyoꞌo lo ran; kwiꞌ ngwañaꞌan, ka biyaꞌ tiꞌ wan si kwiñi neꞌ kanꞌ bra nu ñaꞌan wan sa ñaꞌan tñan nu ngiꞌni neꞌ.
23406	MAT 7:21	’Nsuꞌwi ꞌa nten nu nchkwiꞌ loꞌoǔn: “Xꞌnaǎn, Xꞌnaǎn” ndukwin neꞌ ꞌñaǎn; siꞌi nchga neꞌ kanꞌ nu sten seꞌen lka Ndiose ndloo la. Nten nu kunan chaꞌ nu nchkwiꞌ Stiǐn nu ndiꞌin nde niꞌ kwan, sa kanꞌ ti nten lka nu sten seꞌen nu lka Ndiose ndloo la.
23422	MAT 8:8	Bra ti mxkwen capitán ꞌin Jesús bra kanꞌ: ―Xꞌnaǎn ―ndukwin capitán ꞌin Jesús―, ja suꞌwe tsaa nde naꞌan tyiǐn, chaꞌ siꞌi nten suꞌwe lkaǎn. Sa kanꞌ ti chaꞌ nchka tiǎnꞌ, chaꞌ kuloo tñan chaꞌ katin kicha ꞌin yu; jlyo tiǎnꞌ chaꞌ chkaa msu ꞌñaǎn bra kanꞌ, ni siya tijyuꞌ ti tyuun chkwiiꞌ.
23423	MAT 8:9	Xꞌnan sndaru lkaǎn, naꞌ lkaǎn ndloo ꞌin ska siyentu sndaru; kwiꞌ ngwañaꞌan, ndiya nu lka ndloo la ꞌñaǎn. Si kuloǔn tñan re ꞌin ska sndaru ꞌñaǎn: “Yaa lyaa”, bra ti tsaa yu, chaꞌ nchka tiǎnꞌ chaꞌ tsaa yu. Ngwañaꞌan si chkwiǐnꞌ loꞌo xka yu: “Kaan nde re”, bra ti kan yu seꞌen ndiꞌiǐn bra kanꞌ. Ngwañaꞌan si kuloǔn tñan ꞌin msu ꞌñaǎn: “Kuꞌnii tñan re ꞌñaǎn”, chkwiǐnꞌ loꞌo yu, bra ti kuꞌni yu tñan kanꞌ ꞌñaǎn ―ndukwin capitán ꞌin Jesús―. Kanꞌ chaꞌ ni, jlyo tiǎnꞌ chaꞌ ka ꞌiin kuloo tñan chaꞌ katin kicha kanꞌ ꞌin msu kanꞌ ꞌñaǎn.
23424	MAT 8:10	Nduwe ꞌa tiꞌ Jesús bra nu ynan chaꞌ nu ykwiꞌ capitán kanꞌ. Bra kanꞌ ykwiꞌ Jesús loꞌo nchga nten nu ndaꞌan ñaꞌan ꞌin: ―Chañi ꞌa chaꞌ nchkwiǐnꞌ loꞌo wan ni ―ndukwin Jesús ꞌin neꞌ―. Ja ya ñaꞌaǎn ska nten nu suꞌwe la ndyaa ñaꞌan tiꞌ ꞌin Ndiose, sa ñaꞌan nu ndyaa ñaꞌan tiꞌ capitán re; ñaꞌaan nasiyun Israel re, ja nsuꞌwi nten nu ndyaa ñaꞌan tiꞌ ꞌin Ndiose ngwañaꞌan.
23425	MAT 8:11	Chañi chaꞌ nde loo la kala kaꞌan ꞌa nten tijyuꞌ, loꞌo nten lo yuu nde seꞌen ndyoꞌo tukwa kwichaa, loꞌo nten lo yuu nde seꞌen ndyaa kwichaa, tsaa neꞌ chaꞌ tyukwa neꞌ tuꞌwa msaa seꞌen lka Ndiose ndloo niꞌ kwan; suꞌwa ti tyitukwa neꞌ tuꞌwa msaa kanꞌ loꞌo ayman Abraham loꞌo ayman Isaac loꞌo ayman Jacob.
23426	MAT 8:12	Kwiꞌ ngwañaꞌan, ndiya xka ta nten nu lka sñiꞌ Ndiose, ndukwin neꞌ, loꞌo ja kala ꞌa neꞌ kanꞌ seꞌen ndiꞌin Ndiose. Kulo Ndiose tñan ꞌin angajle ꞌin Ni chaꞌ tsaa xkwaan ꞌin neꞌ kanꞌ nde seꞌen ndiꞌin tla; kanan ꞌa neꞌ kanꞌ la kanꞌ, kasinꞌ ꞌa tiꞌ neꞌ sa ñaꞌan yaꞌ ku liꞌya neꞌ chaꞌ msinꞌ tiꞌ neꞌ.
23427	MAT 8:13	Xiyaꞌ ykwiꞌ Jesús loꞌo capitán bra kanꞌ: ―Yaa lyaa naꞌan tyii sikwa ―ndukwin Jesús―. Wa ndyaa ñaꞌan tiiꞌ ꞌñaǎn, kanꞌ chaꞌ nchkaa yu ni; ngwa tiin kicha kanꞌ ꞌin yu ―ndukwin Jesús ꞌin capitán. Ti kwiꞌ bra kanꞌ nchkaa msu kanꞌ.
23429	MAT 8:15	Mstya yaꞌ Jesús chunꞌ yaꞌ neꞌ kula kanꞌ. Bra ti mdoꞌo tikeeꞌ ꞌin; mdyituun neꞌ kula kanꞌ bra kanꞌ, yꞌni kuwe tiꞌ chaꞌ keeꞌ chinꞌ nan ku Jesús loꞌo taꞌa ndaꞌan.
23430	MAT 8:16	Bra wa msiin, mdiyan kaꞌan ꞌa nten seꞌen ndiꞌin Jesús, mdiyan loꞌo neꞌ ꞌin neꞌ kicha nu nsuꞌwi kwiꞌin kuxi ꞌin bra kanꞌ. Kanꞌ ngulo Jesús tñan ꞌin kwiꞌin kuxi kanꞌ, chaꞌ tyoꞌo tsuꞌ ran ꞌin neꞌ tiꞌí kanꞌ; nchkaa neꞌ kanꞌ bra kanꞌ. Kwiꞌ ngwañaꞌan, yꞌni Jesús joꞌó ꞌin nchga neꞌ tiꞌí nu mdiyan seꞌen ndiꞌin yu.
23431	MAT 8:17	Ngwañaꞌan ngwa, chaꞌ mdoꞌo tukwa ti kwiꞌ ti chaꞌ nu ngwaꞌan ayman Isaías lo kityi nu ngwa sꞌni. Nde lka chaꞌ nu nchkwiꞌ kityi kanꞌ: “Wa jlyo tiꞌ Ndiose nchga seꞌen tiꞌí ꞌñaan, jlyo tiꞌ Ni sa ñaꞌan kicha nu nsuꞌwi ꞌñaan kwenta skaan; yꞌni tyii Ndiose nchga kicha kanꞌ, nchkaan bra kanꞌ.” Ngwañaꞌan ndukwa chaꞌ lo kityi, kanꞌ chaꞌ ngiꞌni Jesús joꞌó ꞌin nten nu tiꞌí.
23434	MAT 8:20	Mxkwen Jesús ꞌin mstru kanꞌ bra kanꞌ: ―Nu lka kutaꞌ ni, niꞌ tukee ꞌin iꞌ xuꞌwi iꞌ; kwiꞌ ngwañaꞌan kiñi xuwe, ndiya seꞌen xkwa iꞌ. Loꞌo naꞌ ni, wa msuꞌwa Ndiose ꞌñaǎn ndijyaǎn lo chalyuu re chaꞌ kaǎn nten, loꞌo ja ndiya seꞌen kajaǎnꞌ, ja ndiya seꞌen tyukwaǎn xitñaǎnꞌ.
23440	MAT 8:26	Loꞌo mxkwen Jesús ꞌin neꞌ kanꞌ bra kanꞌ: ―¿Ni chaꞌ ngitsen ꞌa wan? ―ndukwin ꞌin neꞌ―. ¡Chinꞌ ꞌa ndyuꞌwi tiꞌ wan ꞌin Ndiose, chunꞌ ja ndyaa ñaꞌan tiꞌ wan ꞌin Ni chaꞌ ka kulaa Ni ꞌñaan! Kanꞌ mdyituun Jesús, ykwiꞌ loꞌo kwiꞌin loꞌo kulooꞌ chaꞌ ka tiin ran; bra ti ngwa tiin ran bra kanꞌ.
23442	MAT 8:28	Chunꞌ ndiꞌin la mdiꞌin neꞌ la xka laꞌa tsuꞌ tiyuꞌ nde lo yuu ꞌin neꞌ Gadara. Kanꞌ ndyukwa taꞌa Jesús loꞌo tukwa yu tiꞌí; nsuꞌwi kwiꞌin xaꞌan ꞌin taꞌa tyukwaa neꞌ kanꞌ, kanꞌ chaꞌ tlá ꞌa yu tiꞌí kanꞌ. Ndiꞌin neꞌ niꞌ lyoꞌoo ꞌin jyoꞌo, loꞌo ja nda neꞌ chabiyaꞌ tyijin xka la nten tuwiin kanꞌ bra kanꞌ.
23448	MAT 8:34	Bra wa ynan neꞌ kichen chaꞌ kanꞌ, mdoꞌo neꞌ ndyaa neꞌ seꞌen ndiꞌin Jesús. Bra nu ndyukwa taꞌa neꞌ loꞌo Jesús, bra kanꞌ lye ꞌa mjñan neꞌ kanꞌ ꞌin yu chaꞌ ja kanun ꞌa yu lo yuu ꞌin kichen tyi neꞌ; tyaa yu xka seꞌen, nchka tiꞌ neꞌ bra kanꞌ.