23216	MAT 1:3	loꞌo ayman Juda kanꞌ ngwa sti Fares loꞌo Zara, loꞌo Tamar ngwa naan jyaꞌan neꞌ kanꞌ bra kanꞌ. Loꞌo ayman Fares kanꞌ ngwa sti Esrom; loꞌo ayman Esrom kanꞌ ngwa sti Aram;
23218	MAT 1:5	loꞌo ayman Salmón kanꞌ ngwa sti Booz, loꞌo Rahab ngwa naan jyaꞌan Booz kanꞌ bra kanꞌ. Loꞌo ayman Booz kanꞌ ngwa sti Obed, loꞌo Rut ngwa naan jyaꞌan Obed kanꞌ bra kanꞌ. Loꞌo ayman Obed kanꞌ ngwa sti Isaí;
23220	MAT 1:7	Loꞌo ayman Salomón kanꞌ ngwa sti Roboam; loꞌo ayman Roboam kanꞌ ngwa sti Abías; loꞌo ayman Abías kanꞌ ngwa sti Asa;
23229	MAT 1:16	Loꞌo sñiꞌ ayman Jacob ni, kanꞌ ngwa Se nu ngwa kwilyoꞌo Liya jyaꞌan Jesús bra kanꞌ. Kwiꞌ ngwañaꞌan, Krixtu naan Jesús kanꞌ.
23230	MAT 1:17	Ngwañaꞌan naan ayman kanꞌ, tii lkwa ta nten wa mdijin neꞌ xa nu ti luꞌu Abraham sa ñaꞌan bra nu ngula ayman David. Loꞌo xka tyii lkwa ta nten mdijin neꞌ xa nu ti luꞌu ayman David, sa ñaꞌan bra nu yaa loꞌo neꞌ xka laꞌa tsuꞌ ꞌin neꞌ Israel nde kichen tyi neꞌ, msuꞌwa neꞌ kanꞌ ꞌin neꞌ Israel niꞌ ñaꞌan chkwan nde kichen Babilonia bra kanꞌ. Loꞌo mdijin xka tyii lkwa ta nten, kanꞌ ngula nu lka Krixtu bra kanꞌ.
23231	MAT 1:18	Nde ndaꞌaǎn sa ñaꞌan ngwa bra nu ngula Jesucristo. Wa mskanꞌ chaꞌ ꞌin Liya kanꞌ, chaꞌ kaja kwilyoꞌo loꞌo Se nu lka sñiꞌ Jacob kanꞌ. Ja ya tyiꞌin Liya seꞌen ndiꞌin Se loꞌo mgii tiꞌ Liya kanꞌ, chaꞌ wa nsuꞌwi sñiꞌ; kanꞌ lka tñan nu wa yꞌni Tyiꞌi Ndiose ykwiꞌ, chaꞌ ngwa tnan Liya kanꞌ.
23232	MAT 1:19	Se kanꞌ ni, tꞌnan tiꞌ yu ꞌin Liya, chañi chaꞌ nsuꞌwi tiye yu ꞌin nu kunaꞌan kanꞌ. Bra wa ynan yu chaꞌ kanꞌ, ja ngwa tiꞌ yu ta yu chaꞌ jyuꞌu ꞌin Liya, ni siya ja kaja kwilyoꞌo yu loꞌo siꞌya sñiꞌ, mdaꞌan chaꞌ tiye yu; tyii chaꞌ ꞌin yu loꞌo ngwañaꞌan ti, nka tiye yu, chaꞌ ja ngwa tiꞌ yu xtya yu kiꞌya ꞌin nu kunaꞌan kanꞌ tuꞌ naꞌan tñan.
23233	MAT 1:20	Bra nu mdaꞌan chaꞌ tiye yu, ni chaꞌ ngwa ngwañaꞌan, bra kanꞌ mdoꞌo tukwa ska angajle seꞌen ndiꞌin yu, ykwiꞌ sla yu bra kanꞌ. Ykwiꞌ angajle kanꞌ loꞌo yu: ―Se ―ndukwin angajle kanꞌ ꞌin yu―, neꞌ taꞌa ayman David lka nuꞌwin ―ndukwin―. Ja kutseen kaja kwilyoꞌoo loꞌo Liya, chaꞌ kan Liya tyiꞌin naꞌan tyii. Siꞌi tñan kuxi yꞌni Liya siyaꞌ ti, tñan nu yꞌni Tyiꞌi Ndiose lka chaꞌ tyiꞌin sñiꞌ Liya ni.
23234	MAT 1:21	Bra nu kala sñiꞌ nu kunaꞌan kanꞌ, kuwiꞌ kiꞌyu kala ꞌin. Loꞌo xa nu tyijin nin kuwiꞌ kanꞌ, bra kanꞌ ka naan kuwiꞌ Jesús. Loꞌo Jesús ni, kanꞌ lka nu kulaa ꞌin nten chalyuu nu ndiꞌin chaꞌ ꞌin loꞌo Ndiose, chaꞌ ka katin kiꞌya nu ndukwi neꞌ kanꞌ.
23235	MAT 1:22	Kwiꞌ ngwañaꞌan ngwa chaꞌ kanꞌ, sa ñaꞌan nu wa ykwiꞌ Ndiose loꞌo nten nu ngwa ti sꞌni sa ñaꞌan ka chaꞌ kanꞌ. Sꞌni kanꞌ ayman nu ykwiꞌ chaꞌ ꞌin Ndiose loꞌo nten, ngwaꞌan neꞌ chaꞌ kanꞌ lo kityi. Loꞌo nde lka chaꞌ nu ngwaꞌan neꞌ:
23236	MAT 1:23	Ka tnan ska nu kunaꞌan kuneꞌ nu ti ji xuꞌwi kiꞌyu ꞌin, loꞌo bra kanꞌ tyiꞌin ska kuwiꞌ kiꞌyu ꞌin; Emanuel chkwiꞌ neꞌ ꞌin kuwiꞌ kanꞌ. Ngwañaꞌan ndukwa chaꞌ lo kityi, kanꞌ chaꞌ ngwañaꞌan ngwa ꞌin Liya bra kanꞌ. Nu nchkwiꞌ neꞌ Emanuel ni, nde lka chaꞌ kanꞌ chaꞌtñan: Suꞌwa ndiꞌin Ndiose loꞌoan.
23237	MAT 1:24	Bra nu mxaa tiꞌ Se, mdoꞌo yu ndyaa yu seꞌen ndiꞌin Liya chaꞌ kaja kwilyoꞌo yu loꞌo, sa ñaꞌan nu wa ykwiꞌ angajle kanꞌ loꞌo yu. Bra kanꞌ mdiyan loꞌo yu ꞌin Liya naꞌan tyi yu,
23239	MAT 2:1	Ti kwiꞌ bra nu ngula Jesús nde kichen Belén, ska yu kula nu naan Herodes ngwa ndloo la ꞌin nasiyun kanꞌ. La lo yuu ꞌin Judea, la kanꞌ ndiꞌin kichen Belén kanꞌ. Loꞌo mdiyan chinꞌ nten nu tiya ꞌa nde Judea kanꞌ; mdoꞌo neꞌ tiya kanꞌ nde kichen tijyuꞌ, nde seꞌen ndyoꞌo tukwa kwichaa, mdiyan neꞌ kichen Jerusalén bra kanꞌ. Ykwiꞌ neꞌ tiya kanꞌ loꞌo nten nu ndyukwa taꞌa neꞌ tuwiin:
23240	MAT 2:2	―¿La nde yaꞌ ndiꞌin kuwiꞌ nu ngula nu ngwa xkanꞌ ti a? ―ndukwin neꞌ―. Ree ꞌwan neꞌ judío lka kuwiꞌ kanꞌ ―ndukwin neꞌ―. Wa naꞌan ba kwii kulasiin tlyu nu tka ndukwi ti niꞌ kwan chaꞌ ꞌin kuwiꞌ kanꞌ, kanꞌ chaꞌ mdiyan ba nde re chaꞌ kuꞌni tnun ba ꞌin kuwiꞌ.
23241	MAT 2:3	Loꞌo ree Herodes ni, ytsen ꞌa yu bra nu ynan yu chaꞌ nu ykwiꞌ neꞌ tiya kanꞌ, chaꞌ kuꞌni tnun neꞌ ꞌin xka ree, mskeꞌ tiꞌ yu. Kwiꞌ ngwañaꞌan nchga neꞌ kichen Jerusalén, ytsen ꞌa neꞌ sa ñaꞌan kuꞌni ree Herodes bra kanꞌ.
23242	MAT 2:4	Loꞌo kanꞌ msiꞌya ree Herodes kanꞌ ꞌin nchga sti joꞌo nu lka ndloo la, loꞌo ꞌin mstru nu nduꞌu chaꞌ joꞌo niꞌ lyaa, chaꞌ kan neꞌ seꞌen ndiꞌin yu. Mnichaꞌ ree kanꞌ ꞌin neꞌ bra kanꞌ: ―¿Ja jlyo tiꞌ wan la nde nchkwiꞌ kityi chaꞌ kala Krixtu a? ―ndukwin ree ꞌin neꞌ.
23246	MAT 2:8	Bra wa ytsaꞌ neꞌ chaꞌ kanꞌ ꞌin ree, bra kanꞌ ykwiꞌ ree loꞌo neꞌ chaꞌ tsaa neꞌ nde kichen Belén. ―Yaa lya wan ―ndukwin ree ꞌin neꞌ tiya kanꞌ―, yaa naꞌan wan nde ndukwa naꞌan tyi sti kuwiꞌ kanꞌ ―ndukwin―. Bra nu tyija naꞌan kanꞌ ꞌwan, bra kanꞌ tyaan wan seꞌen ndiꞌiǐn xiyaꞌ chaꞌ ka biyaꞌ tiǎnꞌ la nde yaꞌ ndiya kuwiꞌ kanꞌ. Loꞌoǔn tsaꞌaǎn kuꞌni tnuǔn ꞌin kuwiꞌ kanꞌ, lka tiyeěn.
23249	MAT 2:11	Yten neꞌ niꞌ ñaꞌan kanꞌ bra kanꞌ, naꞌan neꞌ kuwiꞌ loꞌo Liya jyaꞌan kuwiꞌ. Bra ti mduun xtyinꞌ neꞌ tiya kanꞌ seꞌen nskwa kuwiꞌ chaꞌ kuꞌni tnun neꞌ ꞌin. Loꞌo mxtiꞌ neꞌ yuꞌwa ꞌin neꞌ chaꞌ ta neꞌ lomstan ꞌin kuwiꞌ kanꞌ; mda neꞌ oro ꞌin kuwiꞌ kanꞌ, mda neꞌ ynan nu kaꞌan ꞌa ngaꞌan, loꞌo mda neꞌ mirra nu lka sete xi tyiꞌi ꞌin kuwiꞌ kanꞌ.
23253	MAT 2:15	Nganun neꞌ la kanꞌ sa ñaꞌan bra nu ngujwi Herodes, nu ree tlá kanꞌ. Loꞌo nde lka ti kwiꞌ chaꞌ nu wa ykwiꞌ ayman kula loꞌo nten chabiyaꞌ ꞌin Ndiose nu ngwa sꞌni: “Siꞌyaǎn ꞌin Sñiěnꞌ chaꞌ tyoꞌo lo yuu nu kwenta ꞌin Egipto, chaꞌ tyaan yu kichen tyi yu xiyaꞌ” ndukwin Ndiose nu nka Xꞌnaan. Kanꞌ chaꞌ ngwañaꞌan ngwa ꞌin neꞌ bra kanꞌ, chaꞌ ndyaa neꞌ nde Egipto.
23254	MAT 2:16	Loꞌo ree Herodes kanꞌ ni, msinꞌ ꞌa tiꞌ yu bra nu mgii tiꞌ yu chaꞌ ja mdijin ꞌa neꞌ tiya kanꞌ xiyaꞌ seꞌen ndiꞌin yu. Ngulo ree kanꞌ tñan ꞌin msu ꞌin yu bra kanꞌ, chaꞌ tsaa neꞌ kujwi neꞌ ꞌin nchga kuwiꞌ kiꞌyu nu nsuꞌwi kichen Belén, nchga kuwiꞌ nu ja ya tyii snan yijan; kwiꞌ kujwi neꞌ ꞌin nchga kuwiꞌ kiꞌyu nu ndiꞌin kichen xuwe kwiꞌ seꞌen ti. Wa jlyo tiꞌ ree chaꞌ kuwiꞌ kanꞌ ja ya tyii snan yijan, chaꞌ wa ytsaꞌ neꞌ tiya kanꞌ chaꞌ sa kwa bra naꞌan neꞌ kwii kulasiin kanꞌ.
23256	MAT 2:18	Lye ꞌa ngiꞌni xiꞌin nten kichen Rama; msiꞌya ꞌa neꞌ, nganan ꞌa neꞌ, chaꞌ ngujwi sñiꞌ Raquel. Nganan ꞌa nu kunaꞌan kanꞌ, chaꞌ wa ngujwi sñiꞌ neꞌ. Loꞌo ja tukwin ꞌa ngwa kuꞌni chaꞌ ka tiin chaꞌ nganan nu kunaꞌan kanꞌ. Ngwañaꞌan lka chaꞌ ngwaꞌan yu kanꞌ lo kityi sꞌni, ni siya ja ya ka chaꞌ kanꞌ nu ti luꞌu ayman kanꞌ. Kanꞌ chaꞌ ngwañaꞌan ngwa ꞌin neꞌ Belén, nganan ꞌa neꞌ chaꞌ ngujwi sñiꞌ neꞌ.
23264	MAT 3:3	Loꞌo Xuwa, lka yu ska nten nu wa ykwiꞌ ayman kula Isaías sꞌni chaꞌ ꞌin. Nde ndiya chaꞌ nu ngwaꞌan yu kula lo kityi: Kwen xiꞌya ska nten niꞌ kixinꞌ: “Slaa lya wan ska tuwiin seꞌen kan nu nka Xꞌnaan, xñi suꞌwe wan tuwiin seꞌen tyijin yu” ndukwin nten kanꞌ. Ngwañaꞌan ngwaꞌan ayman kanꞌ chaꞌ ꞌin Xuwa.
23265	MAT 3:4	Loꞌo Xuwa kanꞌ ni, lkuꞌ yu ska teꞌ kichanꞌ camello, loꞌo nchkanꞌ kijin siꞌ yu; nchku yu skuꞌ loꞌo kwiñaꞌ kwitun.
23266	MAT 3:5	Loꞌo bra kanꞌ ndyoꞌ tiꞌin kaꞌan nten seꞌen ndiꞌin yu; mdiyan neꞌ kichen Jerusalén nde kwa, loꞌo neꞌ nchga kichen xuwe nu kwenta ꞌin Judea kanꞌ, loꞌo neꞌ nu ndiꞌin kwiꞌ seꞌen ti tuꞌwa chku Jordán, taꞌa neꞌ mdiyan neꞌ seꞌen ndiꞌin yu.
23268	MAT 3:7	Ngwa ska tsan naꞌan Xuwa ꞌin tyun neꞌ fariseo loꞌo neꞌ saduceo bra kanꞌ; kti ꞌa ngiꞌni neꞌ kanꞌ loꞌo Ndiose, nxkeꞌ tiꞌ neꞌ, lye ꞌa ngiꞌni siyeꞌ neꞌ loꞌo taꞌa nten neꞌ. Loꞌo chinꞌ neꞌ kanꞌ mdiyan neꞌ chaꞌ tukwatya Xuwa ꞌin neꞌ, loꞌo ja ndiya tiꞌ Xuwa chaꞌ ngwañaꞌan ngiꞌni neꞌ kanꞌ. ―Sa ñaꞌan lka kunan tlá, kwiꞌ ngwañaꞌan lka wan ―ndukwin Xuwa ꞌin neꞌ kanꞌ―. ¿Ta wa mxitsen neꞌ ꞌwan sikwa a? ¿Ti ka nu ndukwin ra ꞌwan chaꞌ lyaa wan ꞌin nu tiꞌí nu ndijyan xa nu tyii chalyuu a? ―ndukwin yu―.
23270	MAT 3:9	Ja xkeꞌ ꞌa tiꞌ wan chaꞌ ka suꞌwe ꞌwan tloo Ndiose si xkwiꞌ ndyuꞌwi tiꞌ wan ꞌin ayman kula ꞌwan, ñaꞌan tiꞌ ayman kula Abraham kanꞌ. Ja talo Ndiose ꞌin chaꞌ kuxi nu ngiꞌni wan siyaꞌ ti, ni siya nten taꞌa ayman Abraham lka wan, nchkwiꞌ wan. Nan kwiñi wan. Si nchka tiꞌ Ndiose, ka ꞌin Ni kwiñan Ni xka ta nten loꞌo kee ndiꞌin tuꞌwa chku re, chaꞌ ka neꞌ taꞌa ayman Abraham; ka ꞌin Ni si nchka tiꞌ Ni. Loꞌo ja tukwa Ndiose chaꞌ ꞌwan bra kanꞌ.
23272	MAT 3:11	Loꞌoǔn ni, ndukwatyaǎn ꞌwan loꞌo tyiꞌa chku re, si chañi chaꞌ wa ngwa jyuꞌu tiꞌ wan ꞌin kiꞌya nu ndukwi wan; loꞌo wa kan ti xka nu tnun la chaꞌ nchka ꞌin ke naꞌ. Loꞌoǔn, kuꞌni tnuǔn ꞌin yu kanꞌ; suꞌwe ꞌa ka tiyeěn, ni siya xtiǐnꞌ tiǎn ti ndukwa snan yu kanꞌ. Loꞌo yu kanꞌ ni, ja tukwatya yu ꞌin nten loꞌo tyiꞌa ti; kuꞌni yu chaꞌ kanun Tyiꞌi Ndiose niꞌ kasiya ꞌin nten xa nu tukwatya yu ꞌin neꞌ. Kwiꞌ ngwañaꞌan, kuꞌni luwi yu kasiya ꞌin neꞌ loꞌo xaa ꞌin yu.
23275	MAT 3:14	Loꞌo ngwa tiꞌ Xuwa chaꞌ ja tukwatya yu ꞌin Jesús. ―Ja suꞌwe tukwatyaǎn ꞌiin. Suꞌwe la nuꞌwin tukwatyaa ꞌñaǎn ―ndukwin Xuwa ꞌin Jesús.
23277	MAT 3:16	Xa wa ngwa chaꞌ kanꞌ, mdoꞌo Jesús lo tyiꞌa, kanꞌ ngalaa nde niꞌ kwan. Loꞌo bra kanꞌ naꞌan Jesús chaꞌ ngwiꞌya Tyiꞌi Ndiose chunꞌ yu; sa ñaꞌan ndiꞌya ska kiñi cha kuun lo yuu, ngwañaꞌan ngwiꞌya Tyiꞌi Ndiose chunꞌ Jesús.
23279	MAT 4:1	Loꞌo bra kanꞌ ndyaa loꞌo Tyiꞌi Ndiose ꞌin Jesús niꞌ kixinꞌ seꞌen wtyi ꞌa yuu, seꞌen ja ndiꞌin nten, chaꞌ tyukwa taꞌa yu loꞌo kuneꞌ xaꞌan nde kanꞌ. Ngwa tiꞌ yu kanꞌ tyijin lyo ꞌin Jesús.
23281	MAT 4:3	Loꞌo bra kanꞌ mdoꞌo tukwa kuneꞌ xaꞌan kanꞌ, chaꞌ kwiñi lyoꞌo ꞌin Jesús: ―Si chañi chaꞌ lkaa ska ti nu lka Sñiꞌ Ndiose ―ndukwin kuneꞌ xaꞌan ꞌin Jesús―, xñii ska kee re sikwa, chaꞌ kwiñaan tyaja loꞌo ran chaꞌ kuan.
23283	MAT 4:5	Loꞌo bra kanꞌ ndyaa loꞌo kuneꞌ xaꞌan ꞌin Jesús nde kichen Jerusalén, ti kwiꞌ kichen nu ndiya ꞌa tiꞌ Ndiose; mchkwen neꞌ ndyaa neꞌ la ke laa tnun ꞌin kichen kanꞌ, kwan ꞌa mduun neꞌ bra kanꞌ.
23284	MAT 4:6	―¿Ta chañi chaꞌ nuꞌwin lkaa ska ti nu lka Sñiꞌ Ndiose a? ―ndukwin kuneꞌ xaꞌan ꞌin Jesús―. Suꞌwe si xtyuu loo lo yuu sikwa, chaꞌ ndukwa ska chaꞌ lo kityi ꞌin Ndiose nu nchkwiꞌ: Kulo Ndiose tñan ꞌin angajle ꞌin Ni chaꞌ ñaꞌansiin ꞌiin, ndukwin kityi. Kwiꞌ ngwañaꞌan ndukwa xka chaꞌ: Loꞌo yaꞌ ti angajle ꞌin Ni xituun ꞌiin, chaꞌ ja ka tiꞌí kiyaaꞌ seꞌen tyukwa kee kiyaaꞌ. Ngwañaꞌan ndukwa chaꞌ lo kityi ―ndukwin kuneꞌ xaꞌan.
23288	MAT 4:10	Loꞌo mxkwen Jesús ꞌin kuneꞌ xaꞌan bra kanꞌ: ―Tyoꞌo tsuuꞌ seꞌen ndiꞌiǐn, Satanás ―ndukwin Jesús―. Yaa lyaa, chunꞌ ndukwa ska chaꞌ lo kityi ꞌin Ndiose nu nchkwiꞌ: “Ska ti Ndiose nu lka Xꞌnan wan kuꞌni tnun wan ꞌin Ni, siyaꞌ ti kunan wan chaꞌ nu nchkwiꞌ Ndiose xa nu ndiꞌin wan lo chalyuu” ndukwin kityi.
23291	MAT 4:13	Loꞌo ja nganun yu kichen Nazaret kanꞌ; mxaꞌan yu seꞌen ndiꞌin yu, ndyaa yu kichen Capernaum tuꞌwa tiyuꞌ. Ndiꞌin kichen kanꞌ laja lo yuu ꞌin Zabulón loꞌo yuu ꞌin Neftalí.
23295	MAT 4:17	Loꞌo mdyisnan ykwiꞌ Jesús loꞌo neꞌ nu ndaꞌan seꞌen ndiꞌin yu bra kanꞌ: ―Ka jyuꞌu tiꞌ wan ―ndukwin Jesús ꞌin neꞌ―, kulaa yaꞌ wan nchga chaꞌ kuxi nu ngiꞌni wan, chaꞌ wa tiya ti bra chaꞌ ka Ndiose ndloo niꞌ kasiya ꞌwan.
23296	MAT 4:18	La xka tsan ndaꞌan Jesús tuꞌwa tiyuꞌ Galilea kanꞌ, naꞌan yu ꞌin Simón loꞌo Ndre taꞌa ngula Simón bra kanꞌ, nduguun neꞌ katan lo tyiꞌa chaꞌ xñi neꞌ kula, chaꞌ kanꞌ lka tñan nu ngiꞌni neꞌ kanꞌ nchga tsan. Ti kwiꞌ Simón kanꞌ lka nu mstya Jesús xka nin chaꞌ ka naan yu Tyu.
23297	MAT 4:19	Loꞌo bra kanꞌ ykwiꞌ Jesús loꞌo taꞌa tyukwaa yu kiꞌyu kanꞌ: ―Tsaa wan loꞌoǔn ni ―ndukwin Jesús ꞌin neꞌ kanꞌ―. Sa ñaꞌan mjwi kula ꞌwan xa nu mdaꞌan wan kuta kula, ngwañaꞌan kaja xka tñan ꞌwan ni chabiyaꞌ ꞌñaǎn; kwaꞌuǔn ꞌwan sa ñaꞌan nu tsaa naan wan ꞌin nten chalyuu re nu ja ya kunan chaꞌ suꞌwe, chaꞌ ka neꞌ nten ꞌñaǎn.
23304	MAT 5:1	Naꞌan Jesús chaꞌ kaꞌan ꞌa nten ndijyan seꞌen ndiꞌin yu, kanꞌ chaꞌ mskwen yu ndyaa la yu nde siꞌ kiꞌya, ndyaa tukwa yu chinꞌ nde kanꞌ. Loꞌo ndyoꞌ tiꞌin neꞌ nu ngiꞌni xaꞌan chaꞌ ꞌin yu nde seꞌen ndiꞌin yu.
23325	MAT 5:22	Loꞌo ni, kaꞌan la chaꞌ chkwiǐnꞌ loꞌo wan: Ni siya naꞌan tiꞌí ti neꞌ ꞌin taꞌa nten neꞌ, ndiꞌin chaꞌ tyijin neꞌ nu tiꞌí bra kanꞌ; ni siya chkwiꞌ neꞌ ska chaꞌ kuxi ꞌin taꞌa nten neꞌ, bra kanꞌ ndiꞌin chaꞌ tsaa neꞌ nde seꞌen ndukwa nu lka ndloo la nde kichen Jerusalén, chaꞌ ka biyaꞌ chaꞌ ꞌin neꞌ nde kwa bra kanꞌ. Kwiꞌ ngwañaꞌan, bra nu msinꞌ ꞌa tiꞌ neꞌ nchkwiꞌ neꞌ loꞌo taꞌa nten neꞌ: ¡Tintu ꞌa nuꞌwin!, ja chan tsaa neꞌ kanꞌ lo jwlyaa, seꞌen ja tsaa tii ꞌa chaꞌ nchkin kiiꞌ bra kanꞌ.
23331	MAT 5:28	Loꞌo ni, kaꞌan la chaꞌ chkwiǐnꞌ loꞌo wan: Ni siya ñaꞌan kwiꞌya ska yu kiꞌyu ꞌin ska nu kunaꞌan, loꞌo bra kanꞌ xitukwi tiꞌ yu ꞌin nu kunaꞌan kanꞌ, suꞌwa ndiꞌin chaꞌ kanꞌ loꞌo yu sa ñaꞌan si wa lka yꞌni yu ska chaꞌ nu kuxi loꞌo nu kunaꞌan kanꞌ, ni siya tiye ti yu nsuꞌwi chaꞌ kuxi kanꞌ.
23335	MAT 5:32	Loꞌo ni, kaꞌan la chaꞌ chkwiǐnꞌ loꞌo wan: Chaꞌ kuxi ngiꞌni ska yu kiꞌyu loꞌo kwilyoꞌo yu bra nu kulaa tiꞌin yu ꞌin kwilyoꞌo yu, loꞌo ja ndukwi nu kunaꞌan kanꞌ kiꞌya. Chunꞌ ndiꞌin bra nu kaja kwilyoꞌo nu kunaꞌan kanꞌ loꞌo xka nten, ngiꞌni yu kanꞌ chaꞌ ndukwi nu ngwa kunaꞌan ꞌin yu kiꞌya bra kanꞌ. Kwiꞌ ngwañaꞌan, loꞌo xka nten kanꞌ ndukwi kiꞌya, chaꞌ kwilyoꞌo xka yu kiꞌyu kanꞌ lka nu kunaꞌan kanꞌ, ni siya tlyu la kiꞌya ndukwi yu kiꞌyu kanꞌ nu ngwa kwilyoꞌo ti kulo.
23341	MAT 5:38	’Loꞌo wa ynan wan chaꞌ re nu ykwiꞌ ayman sꞌni: “Ska nten xaꞌan ni, bra nu mchu yu kiloo taꞌa yu, ndiꞌin chaꞌ kulo neꞌ wsiya kiloo ykwiꞌ yu chaꞌ ka tiin kiꞌya ꞌin yu bra kanꞌ. Kwiꞌ ngwañaꞌan, bra nu mstun yu ska liꞌya taꞌa yu, bra kanꞌ ndiꞌin chaꞌ kulo neꞌ wsiya liꞌya ykwiꞌ yu, chaꞌ ka tiin kiꞌya nu ndukwi yu.” Ngwañaꞌan ykwiꞌ neꞌ nu ngwa sꞌni.
23342	MAT 5:39	Loꞌo ni, kaꞌan la chaꞌ chkwiǐnꞌ loꞌo wan, chaꞌ ja xuun taꞌa wan loꞌo nten nu yꞌni chaꞌ kuxi loꞌo wan. Bra nu jwiꞌin neꞌ ndukunꞌ neꞌ tloo wan laꞌa seꞌen kwin, ta wan chabiyaꞌ jwiꞌin neꞌ ndukunꞌ xka laꞌa tloo wan bra kanꞌ, si nchka tiꞌ neꞌ.
23347	MAT 5:44	Loꞌo ni, kaꞌan la chaꞌ chkwiǐnꞌ loꞌo wan: Suꞌwe ꞌa xuꞌwi tiye wan ñaꞌan wan ꞌin nu tiꞌí tiꞌ ꞌwan; kwiꞌ ngwañaꞌan, suꞌwe chkwiꞌ wan loꞌo nten nu suꞌwa kwentu ꞌwan, suꞌwe kuꞌni wan loꞌo nten nu liyeꞌ tiꞌ ꞌwan; chkwiꞌ wan loꞌo Ndiose chaꞌ ꞌin neꞌ kanꞌ, ni siya naꞌan tiꞌí neꞌ ꞌwan, ni siya nxtyi lyoꞌo neꞌ ꞌwan.
23354	MAT 6:3	Loꞌo ꞌwan ni, bra nu ta wan ska xuꞌwe ꞌin neꞌ tiꞌi, ta wan ran mnan ti, chaꞌ ja ka biyaꞌ tiꞌ xka la nten; ni siya neꞌ taꞌa wan, ja ka biyaꞌ tiꞌ neꞌ sa ñaꞌan tñan ngiꞌni wan.
23357	MAT 6:6	Loꞌo ꞌwan ni, bra nu chkwiꞌ wan loꞌo Ndiose, tsaa wan ska seꞌen nu ka tyiꞌin wan ska ti wan. Nu ndiꞌin wan niꞌ ñaꞌan bra kanꞌ, tukunꞌ wan tunaꞌan, chaꞌ ngwañaꞌan kuꞌni tnun wan ska ti wan ꞌin Stian Ndiose bra kanꞌ; ndiꞌin Ni ti kwiꞌ seꞌen ndiꞌin wan, ni siya ja ndiꞌin xka la nten seꞌen ndiꞌin wan. Ska ti Stian Ndiose nchka biyaꞌ tiꞌ Ni sa ñaꞌan chaꞌ suꞌwe nu ngiꞌni wan ska ti wan, kanꞌ nu ta chaꞌ suꞌwe ꞌwan nde loo la.
23369	MAT 6:18	chaꞌ ja ka biyaꞌ tiꞌ xka la nten chaꞌ ja yku wan tsan kanꞌ. Ska ti Stian Ndiose nchka biyaꞌ tiꞌ Ni sa ñaꞌan chaꞌ suꞌwe nu ngiꞌni wan ska ti wan. Loꞌo bra kanꞌ xnun Ni chaꞌ suꞌwe nu kaja ꞌwan nde loo la.
23377	MAT 6:26	Tyaꞌan chinꞌ chaꞌ tiye wan sa ñaꞌan nchka ꞌin kiñi nu ndukwi kwan: ja ntya iꞌ nskwaꞌ, ja nxtun iꞌ tya, ja nñan iꞌ juꞌwa seꞌen xoꞌ tiꞌin iꞌ nan ku iꞌ; Stian Ndiose nu ndiꞌin nde niꞌ kwan, nda Ni nan ku iꞌ ngwa ti ñaꞌan. Loꞌo ꞌwan ni, ¿ta chinꞌ la nsuꞌwi lyo wan ke ska kiñi seꞌen ndiꞌin Ndiose a? ¡Siꞌi! Kaꞌan la nsuꞌwi lyo wan chaꞌ ꞌin Ndiose.
23378	MAT 6:27	Loꞌo xka chaꞌ ꞌwan, ja ka kaluu la wan sa jluꞌwe metro kwan la, ni siya kaꞌan ꞌa chaꞌ tyaꞌan tiye wan.
23382	MAT 6:31	Kanꞌ chaꞌ ja ndiꞌin chaꞌ tyaꞌan ꞌa chaꞌ tiye wan sa ñaꞌan chaꞌ kuxi nu tyukwa wan nde loo la. Ja chkwiꞌ lye wan: “¿La nde kaja nan ku ba a?” Ja chkwiꞌ wan: “¿La nde kaja tyiꞌa koꞌo ba a?” Ja chkwiꞌ wan: “¿La nde kaja steꞌ ba a?”
23399	MAT 7:14	Luꞌwi ꞌa tu loꞌoo, lti ti tuwiin seꞌen tsaa neꞌ nu mjwi chalyuu nu ja tsaa tii ꞌa ꞌin neꞌ; chinꞌ ti nten ndyija lyo tuwiin kanꞌ ꞌin neꞌ.
23402	MAT 7:17	Lo nchga yka kwiñi ndyoꞌo nan nu kunanjoꞌo ꞌñaan; yka nu tlá ni, ja ka kuan nan nu ndyoꞌo lo ran.
23408	MAT 7:23	Loꞌo bra kanꞌ nde lka chaꞌ nu ndiꞌin chaꞌ xkweěn ꞌin neꞌ kanꞌ: “Ja nsuꞌwi lyoǔn ꞌwan siyaꞌ ti. ¡Yaa lya wan chaꞌ neꞌ xaꞌan lka wan!”
23410	MAT 7:25	Loꞌo kanꞌ ngwiꞌya ꞌa tyoo, sa ñaꞌan yaꞌ nu ndiya tyiꞌa yuu la kiyaꞌ naꞌan nu ndukwa chunꞌ kee kanꞌ. Kwiꞌ lye ꞌa ngwa kwiꞌin, loꞌo ja mlyuu naꞌan kanꞌ, chaꞌ suꞌwe ꞌa seꞌen ndukwa ran chunꞌ kee kanꞌ.
23412	MAT 7:27	Ngwiꞌya ꞌa tyoo bra kanꞌ, sa ñaꞌan yaꞌ mxlyuu tyiꞌa yuu ꞌin naꞌan kanꞌ, loꞌo lye ꞌa ngwa kwiꞌin. Ja mdalo naꞌan kanꞌ bra kanꞌ, mlyuu ran bra kanꞌ. ¡Mdyii ran nguꞌun ran bra kanꞌ! Loꞌo nten nu ja xlyaa kunan chaꞌ nu nchkwiǐn, ¡tyii chaꞌ ꞌin neꞌ kanꞌ siyaꞌ ti!
23416	MAT 8:2	Loꞌo bra kanꞌ mdoꞌo tukwa ska yu tiꞌí seꞌen ndiꞌin Jesús. Mduun xtyinꞌ yu seꞌen ndiꞌin Jesús, chaꞌ nchka tiꞌ yu jñan yu ꞌin Jesús chaꞌ kuꞌni joꞌó ꞌin yu, chaꞌ nu msñi kicha mtsuꞌ kunaꞌ yu kanꞌ. ―Xꞌnaǎn ―ndukwin yu tiꞌí kanꞌ ꞌin Jesús―, kuꞌnii joꞌó ꞌñaǎn. Jlyo tiǎnꞌ chaꞌ nchka ꞌiin kuꞌnii chaꞌ ka luwi kunaǎnꞌ.
23419	MAT 8:5	Loꞌo mdiyan Jesús tuꞌwa kichen Capernaum bra kanꞌ. Kichen kanꞌ ndyukwa taꞌa yu loꞌo ska capitán ꞌin sndaru romano, kwiꞌ nu mjñan ꞌin Jesús chaꞌ kuꞌni joꞌó ꞌin ska nu tiꞌí:
23428	MAT 8:14	Chunꞌ ndiꞌin la ndyaa Jesús nde naꞌan tyi Tyu. Loꞌo naꞌan Jesús chaꞌ nskwa ti jyaꞌan laa Tyu lo kiꞌyan, chaꞌ lye ꞌa nsuꞌwi tikeeꞌ ꞌin bra kanꞌ.
23433	MAT 8:19	La wa tsaa ti neꞌ, bra kanꞌ mdiyan ska mstru nu nduꞌu chaꞌ joꞌo chaꞌ chkwiꞌ loꞌo Jesús: ―Mstru ―ndukwin mstru kanꞌ ꞌin Jesús―, loꞌoǔn nchka tiǎnꞌ tyaꞌaǎn loꞌoo nchga seꞌen tsaa.
23434	MAT 8:20	Mxkwen Jesús ꞌin mstru kanꞌ bra kanꞌ: ―Nu lka kutaꞌ ni, niꞌ tukee ꞌin iꞌ xuꞌwi iꞌ; kwiꞌ ngwañaꞌan kiñi xuwe, ndiya seꞌen xkwa iꞌ. Loꞌo naꞌ ni, wa msuꞌwa Ndiose ꞌñaǎn ndijyaǎn lo chalyuu re chaꞌ kaǎn nten, loꞌo ja ndiya seꞌen kajaǎnꞌ, ja ndiya seꞌen tyukwaǎn xitñaǎnꞌ.
23435	MAT 8:21	Loꞌo kanꞌ ykwiꞌ xka yu kiꞌyu nu mdaꞌan loꞌo Jesús: ―Yu kula ―ndukwin yu ꞌin Jesús―, taa chinꞌ chabiyaꞌ ꞌñaǎn chaꞌ nu tyaꞌaǎn tuꞌwa naꞌan tyiǐn, tyaꞌaǎn chaꞌ kuꞌniǐn kwentaǎn ꞌin stiǐn sa ñaꞌan yaꞌ kaja stiǐn, chaꞌ tsaa ytsiǐnꞌ ꞌin stiǐn kulo ndukwa. Tsaꞌaǎn loꞌoo bra kanꞌ.
23438	MAT 8:24	Kanꞌ lye ꞌa ngwa kwiꞌin, lye ꞌa ngatsa tyiꞌa lo tiyuꞌ, wa sten ti yka naꞌan kanꞌ niꞌ tyiꞌa siꞌya kulooꞌ. Lajaꞌ Jesús nsuꞌwi niꞌ yka naꞌan kanꞌ bra kanꞌ.
23440	MAT 8:26	Loꞌo mxkwen Jesús ꞌin neꞌ kanꞌ bra kanꞌ: ―¿Ni chaꞌ ngitsen ꞌa wan? ―ndukwin ꞌin neꞌ―. ¡Chinꞌ ꞌa ndyuꞌwi tiꞌ wan ꞌin Ndiose, chunꞌ ja ndyaa ñaꞌan tiꞌ wan ꞌin Ni chaꞌ ka kulaa Ni ꞌñaan! Kanꞌ mdyituun Jesús, ykwiꞌ loꞌo kwiꞌin loꞌo kulooꞌ chaꞌ ka tiin ran; bra ti ngwa tiin ran bra kanꞌ.
23443	MAT 8:29	Loꞌo yꞌni kwiꞌin xaꞌan kanꞌ, chaꞌ kwen ꞌa nxiꞌya yu tiꞌí kanꞌ: ―Jesús, ¿ni chaꞌ ndaꞌaan seꞌen ndiꞌin ba? ―ndukwin yu tiꞌí kanꞌ―. Nuꞌwin lkaa ska ti nu lka Sñiꞌ Ndiose. ¿Ta taa nu tiꞌí ꞌwa, nchka tiiꞌ a? Ja ya tiya bra tiyan nu tiꞌí ꞌwa.
23445	MAT 8:31	Loꞌo yꞌni kwiꞌin xaꞌan kanꞌ, chaꞌ mjñan yu tiꞌí chabiyaꞌ ꞌin Jesús chaꞌ ꞌin kwiꞌin kanꞌ: ―Jlyo tiꞌ ba chaꞌ nchka tiiꞌ kuloo kwiꞌin nu nsuꞌwi ꞌwa, chaꞌ kuꞌni joꞌó ꞌwa ―ndukwin neꞌ kanꞌ ꞌin Jesús―. Kanꞌ chaꞌ taa chinꞌ chabiyaꞌ ꞌin kwiꞌin chaꞌ tsaa ran xuꞌwi ran ꞌin kuweꞌ nu ndaꞌan kwa.
23451	MAT 9:3	Loꞌo ni, mdaꞌan ꞌa chaꞌ tiye mstru nu nduꞌu chaꞌ joꞌo nu nduun kwiꞌ seꞌen ti: “Chaꞌ kuxi nchkwiꞌ yu kiꞌyu re chaꞌ ꞌin Ndiose” mskeꞌ tiꞌ neꞌ.
23452	MAT 9:4	Loꞌo mgii tiꞌ Jesús nchga loo chaꞌ nu ndaꞌan tiye neꞌ kanꞌ. ―¿Ni chaꞌ kuxi ꞌa ndaꞌan chaꞌ tiye wan loꞌoǔn ni? ―ndukwin Jesús ꞌin mstru kanꞌ―.
23458	MAT 9:10	Chunꞌ ndiꞌin la mdiꞌin Jesús naꞌan tyi Mateo, ndukwa yu tuꞌwa msaa chaꞌ nchku yu bra kanꞌ. Loꞌo mdiyan kaꞌan ꞌa nten seꞌen ndiꞌin Mateo chaꞌ ku neꞌ loꞌo yu. Ndiꞌin neꞌ taꞌa ngiꞌni tñan loꞌo Mateo, loꞌo xka ta nten nu ndukwin neꞌ kichen ꞌin chaꞌ ja suꞌwe nten kanꞌ, loꞌo neꞌ nu ngiꞌni xaꞌan chaꞌ ꞌin Jesús; suꞌwa ti nchku nchga neꞌ kanꞌ loꞌo bra kanꞌ.
23461	MAT 9:13	Yaa lya wan kunan suꞌwe wan chaꞌ re nu ngwaꞌan ayman lo kityi sꞌni: “Nchka la tiǎnꞌ chaꞌ chka tꞌnan tiꞌ wan ꞌin taꞌa nten wan, ndukwin Ndiose. Kanꞌ nu suꞌwe la, ni siya ja ta wan kaꞌan ꞌa lomstan ꞌñaǎn; kwiꞌ ngwañaꞌan, ja ndiꞌin chaꞌ ta wan ꞌni skunꞌ wan chaꞌ ka lomstan ꞌñaǎn.” Ngwañaꞌan ndukwa chaꞌ lo kityi. Loꞌo naꞌ ni, ja ndijyaǎn lo chalyuu chaꞌ chkwiǐnꞌ loꞌo nten nu suꞌwe ꞌa ti ykwiꞌ ti, nxkeꞌ tiꞌ neꞌ; wa ndijyaǎn lo chalyuu chaꞌ chkwiǐnꞌ loꞌo nten nu jlyo tiꞌ chaꞌ ndiya chaꞌ kuxi tiye neꞌ, chaꞌ ka jyuꞌu tiꞌ neꞌ bra kanꞌ. Kulaa yaꞌ neꞌ chaꞌ kuxi kanꞌ bra kanꞌ.
23470	MAT 9:22	Kanꞌ mxituun Jesús, naꞌan ꞌin nu kunaꞌan kanꞌ: ―Kuꞌnii xuꞌwee tiyee, sñiěnꞌ ―ndukwin Jesús―. Ndyaa ñaꞌan tiiꞌ ꞌñaǎn, kanꞌ chaꞌ nchkaa ni. Loꞌo bra ti nchkaa neꞌ kula kanꞌ bra kanꞌ.
23473	MAT 9:25	Ngulo Jesús ꞌin neꞌ chaꞌ kaja seꞌen sten ykwiꞌ yu niꞌ ñaꞌan seꞌen nskwa nu lyuꞌ ti nu ngujwi kanꞌ. Loꞌo msñi yu yaꞌ nu lyuꞌ ti kanꞌ, mxituun yu nu lyuꞌ ti bra kanꞌ.
23483	MAT 9:35	Chunꞌ ndiꞌin la ndyaa Jesús nchga kichen xuwe, nchga kichen tnun, chaꞌ kwaꞌu yu ꞌin neꞌ niꞌ lyaa ꞌin neꞌ judío. Kaꞌan ꞌa chaꞌ ykwiꞌ Jesús loꞌo nten ni ñaꞌan ka suꞌwe chaꞌ, xa nu ka Ndiose ndloo niꞌ kasiya ꞌin neꞌ. Loꞌo yꞌni yu joꞌó ꞌin nchga nu tiꞌí loꞌo nchga nten nu naꞌan ꞌa tiꞌ.
23485	MAT 9:37	Bra kanꞌ ykwiꞌ Jesús loꞌo neꞌ nu ngiꞌni xaꞌan chaꞌ ꞌin yu, ytsaꞌ yu ska chaꞌ ꞌin neꞌ chaꞌ ꞌin nten kaꞌan kanꞌ. Ykwiꞌ yu chaꞌ ja ya kunan suꞌwe nten kanꞌ chaꞌ ꞌin Ndiose, chaꞌ ñaꞌan tiꞌ ska jyan nu suꞌwe ꞌa ngutsi chaꞌ wa ndla ti kuꞌni neꞌ kwa ꞌin ran, ngwañaꞌan lka nten kanꞌ. ―Chañi chaꞌ nsuꞌwi ꞌa tñan re chaꞌ chkwianꞌ loꞌo nten chaꞌ sten neꞌ chaꞌ ꞌñaǎn ―ndukwin Jesús ꞌin neꞌ kanꞌ―. Loꞌo chinꞌ ti nten ndiya nu ka kuꞌni tñan re.
23489	MAT 10:3	loꞌo ngulo suwi yu ꞌin Lpe, loꞌo Bartolomé, loꞌo Toma, loꞌo Mateo nu ngulo tñi ꞌin nten chaꞌ ꞌin neꞌ xka laꞌa tsuꞌ ti kulo; loꞌo ngulo suwi yu ꞌin Santiago sñiꞌ Alfeo, loꞌo Tadeo;
23507	MAT 10:21	’Ndii ti tiꞌ wan tyiꞌin wan lo chalyuu sikwa, chaꞌ loꞌo taꞌa ngula wan tsaa loꞌo ꞌwan chaꞌ kwiñi ti xtya kiꞌya ꞌwan tloo nten kuxi kanꞌ. Loꞌo sti wan kujwiꞌ xuꞌwa ꞌwan. Loꞌo ti kwiꞌ sñiꞌ wan, kujwiꞌ xuꞌwa ꞌwan tloo nten kuxi kanꞌ; kujwi neꞌ ꞌwan, nka tiye neꞌ kuneꞌ kanꞌ.
23517	MAT 10:31	Loꞌo ꞌwan ni, kaꞌan la nsuꞌwi lyo wan nde seꞌen ndiꞌin Ndiose; ni siya kaꞌan ꞌa kiñi xuwe, ja suꞌwa nsuꞌwi lyo iꞌ loꞌo wan. Kanꞌ chaꞌ ja ndiꞌin chaꞌ kutsen wan ꞌin nten.
23518	MAT 10:32	’Loꞌo xka chaꞌ ni: Nchga nten nu ndiꞌin chaꞌ ꞌin loꞌoǔn, nu nchkwiꞌ chaꞌ ꞌñaǎn loꞌo nten, naꞌ chkwiǐnꞌ loꞌo Stiǐn Ndiose nu ndiꞌin nde niꞌ kwan chaꞌ taꞌa suꞌwe nsuꞌwiǐn lka nten kanꞌ.
23519	MAT 10:33	Loꞌo nchga nten nu nchkwiꞌ loꞌo taꞌa nten chaꞌ ja ndiꞌin chaꞌ ꞌin loꞌoǔn, naꞌ chkwiǐnꞌ loꞌo Stiǐn nu ndiꞌin nde niꞌ kwan chaꞌ siꞌi taꞌa suꞌwe nsuꞌwiǐn lka nten kanꞌ.
23520	MAT 10:34	’Ja xkeꞌ tiꞌ wan chaꞌ tiin ti tyiꞌin nten chalyuu chaꞌ ꞌñaǎn, chaꞌ wa ndijyaǎn. Ja ka ngwañaꞌan. Lye la xuun taꞌa neꞌ chaꞌ ꞌñaǎn;
23525	MAT 10:39	Ja kaja chalyuu kwi nu ja tsaa tii ꞌa ꞌin neꞌ nu lye la nka tiye neꞌ ꞌin neꞌ ti ykwiꞌ ti neꞌ, kwiꞌ nu ja nda ꞌa bra chaꞌ kujwi nten ꞌin neꞌ chaꞌ ꞌñaǎn. Loꞌo kaja chalyuu nu ja tsaa tii ꞌa ꞌin neꞌ si kujwi nten ꞌin neꞌ chunꞌ msñi neꞌ chaꞌ ꞌñaǎn.
23527	MAT 10:41	Loꞌo xa nu ta neꞌ seꞌen tyiꞌin ska nten nu nchkwiꞌ chaꞌ ꞌin Ndiose loꞌo neꞌ, chaꞌ ndyaꞌan nten kanꞌ lo tñan ꞌin Ndiose, suꞌwe ꞌa ka ꞌin neꞌ nde loo la. Kanꞌ kaja ska chaꞌ suꞌwe nu ta Ndiose ꞌin neꞌ kanꞌ; suꞌwa ti ka ꞌin neꞌ kanꞌ loꞌo nten nu nchkwiꞌ chaꞌ ꞌin Ndiose bra kanꞌ. Kwiꞌ ngwañaꞌan, bra nu ta neꞌ seꞌen tyiꞌin ska nten nu suꞌwe ꞌa tiye chunꞌ ndukwa yu chaꞌ nchkwiꞌ Ndiose, suꞌwa ka ꞌin neꞌ kanꞌ loꞌo nten nu suꞌwe ꞌa tiye kanꞌ, chaꞌ ta Ndiose ska chaꞌ suꞌwe ꞌin neꞌ kanꞌ nde seꞌen ndiꞌin Ni.
23541	MAT 11:13	Nchga chaꞌ nu ngwaꞌan ayman Moisés lo kityi, sa ñaꞌan lka tñan nu ngulo Ndiose ꞌin nten, kwiꞌ nchga chaꞌ ꞌin Ndiose nu ykwiꞌ ayman kula ꞌñaan loꞌo nten sꞌni, suꞌwa ykwiꞌ ayman kanꞌ sa ñaꞌan ka chaꞌ bra nu tyisnan ka Ndiose ndloo niꞌ kasiya ꞌin nten. Loꞌo ni, wa mdiyan Xuwa.
23547	MAT 11:19	Chunꞌ ndiꞌin la mdiyaǎn nu wa msuꞌwa Ndiose ꞌñaǎn chaꞌ kaǎn nten. Nchkuǔn nchga lo nan loꞌo wan, ndiꞌyoǔn nchga lo nan loꞌo wan, loꞌo nchkwiꞌ wan chaꞌ ꞌñaǎn: “¡Ñaꞌan wan sa ñaꞌan ngiꞌni yu kwa! Nchku ꞌa yu kwa, loꞌo kuꞌwi ꞌa yu” ndukwin wan ꞌin taꞌa wan. “Ja suꞌwe yu kwa chaꞌ taꞌa suꞌwe yu loꞌo neꞌ nu ndlo kaꞌan tñi chaꞌ ꞌin neꞌ xka laꞌa tsuꞌ. Loꞌo xka la nten kuxi lka taꞌa suꞌwe nsuꞌwi yu” ndukwin wan ꞌñaǎn. Kwiꞌ nchkwiꞌ wan chaꞌ ja suꞌwe chaꞌ nu nchkwiǐnꞌ, nxkeꞌ tiꞌ wan. Suꞌwe sikwa, ka biyaꞌ tiꞌ wan nde loo la chaꞌ nu ñi ꞌa nchkwiꞌ nten chaꞌ ndaꞌaǎn chabiyaꞌ ꞌin Ndiose.
23548	MAT 11:20	Lye ꞌa ykwiꞌ Jesús chaꞌ ꞌin neꞌ kichen seꞌen taꞌa ti ndaꞌan yu, chaꞌ kaꞌan ꞌa chaꞌ tnun wa yꞌni yu seꞌen ndiꞌin neꞌ kichen kanꞌ, loꞌo ja mjyuꞌu tiꞌ neꞌ ꞌin chaꞌ kuxi nu ndiꞌin niꞌ kasiya ꞌin neꞌ; ja ngulaa yaꞌ neꞌ chaꞌ kuxi kanꞌ.
23549	MAT 11:21	―¡Tꞌnan ꞌa wan neꞌ kichen Corazín! ―ndukwin Jesús―. ¡Tꞌnan ꞌa wan neꞌ kichen Betsaida! ―ndukwin―. Kaꞌan ꞌa chaꞌ tnun wa naꞌan wan, loꞌo ja mjyuꞌu tiꞌ wan siyaꞌ ti ꞌin chaꞌ kuxi nu ngiꞌni wan, ja ngulaa yaꞌ wan chaꞌ kanꞌ. Kwiꞌ ngwañaꞌan ti sꞌni, xaꞌan ꞌa neꞌ kichen Tiro loꞌo neꞌ kichen Sidón, neꞌ xka laꞌa tsuꞌ ngwa neꞌ kanꞌ. Loꞌo ja mjwi ñaꞌan ka jyuꞌu tiꞌ neꞌ kanꞌ ꞌin chaꞌ kuxi nu wa yꞌni neꞌ. Ja ngulaa yaꞌ neꞌ chaꞌ kuxi kanꞌ, chunꞌ ja ya ñaꞌan neꞌ kanꞌ chaꞌ tnun sa ñaꞌan nu naꞌan wan, ꞌwan neꞌ Israel; kanꞌ chaꞌ ja ngwa xiꞌin tiꞌ neꞌ kanꞌ, kanꞌ chaꞌ ja ykuꞌ neꞌ teꞌ ngata, ja msuꞌwa neꞌ jii ke neꞌ sa ñaꞌan nu ngiꞌni nten seꞌen nskwa ayman.
23551	MAT 11:23	Loꞌo ꞌwan, neꞌ Capernaum ni, ¿ta suꞌwe la kichen tyi wan, nxkeꞌ tiꞌ wan a? ¿Ta lka kichen tyi wan ndloo la ꞌin xka la kichen, nxkeꞌ tiꞌ wan a? Nde loo la ñuꞌun siyaꞌ ti kichen tyi wan, loꞌo ykwiꞌ wan tyaa wan nde lo jwlyaa bra kanꞌ. Kaꞌan ꞌa chaꞌ tnun yꞌniǐn seꞌen ndiꞌin wan, loꞌo ja yaa ñaꞌan tiꞌ wan ꞌñaǎn siyaꞌ ti. Kwiꞌ ngwañaꞌan nu ngwa sꞌni, xaꞌan ꞌa ngwa neꞌ kichen Sodoma; loꞌo ja naꞌan ayman kanꞌ chaꞌ tnun sa ñaꞌan nu wa naꞌan wan, ꞌwan neꞌ Capernaum. Si wa naꞌan neꞌ chaꞌ kanꞌ, ja chan wa mjyuꞌu tiꞌ neꞌ ꞌin chaꞌ kuxi nu wa yꞌni neꞌ bra kanꞌ, wa ngulaa yaꞌ neꞌ chaꞌ kuxi kanꞌ; ja chan ti ndukwa kichen tyi neꞌ kanꞌ sa bra ni.
23563	MAT 12:5	Loꞌo ndiya xka chaꞌ nu ngwaꞌan ayman Moisés lo kityi, chaꞌ sti joꞌo ni, ja nxitñaꞌ neꞌ niꞌ lyaa tnun xa nu ndiya tsan nu nxitñaꞌ nten; nsuꞌwi tñan nu ngiꞌni sti joꞌo kanꞌ. Ti kwiꞌ ti chaꞌ, ja ndiꞌin kiꞌya ꞌin neꞌ kanꞌ chaꞌ ꞌin Ndiose, chaꞌ ngiꞌni neꞌ tñan kanꞌ―ndukwin Jesús ꞌin neꞌ fariseo kanꞌ―.
23566	MAT 12:8	Loꞌo ndiya xka chaꞌ nu chkwiǐnꞌ loꞌo wan, chaꞌ naꞌ nu wa msuꞌwa Ndiose ꞌñaǎn ndijyaǎn chaꞌ kaǎn nten, naꞌ lkaǎn ndloo la, ni siya tsan nu nxitñaꞌ neꞌ.
23568	MAT 12:10	Naꞌan yu chaꞌ ndiꞌin ska yu kiꞌyu nu tiꞌí yaꞌ, chaꞌ wa nchkunꞌ tyukwin ska laꞌa yaꞌ yu. Loꞌo mnichaꞌ neꞌ judío kanꞌ ꞌin Jesús bra kanꞌ: ―¿Ta ndiya chabiyaꞌ ꞌñaan chaꞌ kuꞌnian joꞌó ꞌin nu tiꞌí tsan taꞌa a?, xa nu ndiꞌin chaꞌ xitñaanꞌ ―ndukwin neꞌ ꞌin Jesús. Nchka ꞌa tiꞌ neꞌ kanꞌ xtya neꞌ kiꞌya ꞌin Jesús.
23570	MAT 12:12	Loꞌo taꞌa nten wan ni, ndloo la chaꞌ ꞌin neꞌ ke ꞌin ska slyaꞌ, kanꞌ chaꞌ ndiya chabiyaꞌ ꞌñaǎn tayaǎnꞌ ꞌin nten, ni siya tsan nu kti ꞌa ꞌñaan, nu ja ndiya chabiyaꞌ chaꞌ kuꞌnian xka lo tñan.
23573	MAT 12:15	Loꞌo Jesús ni, ngwa biyaꞌ tiꞌ yu nchga chaꞌ kuxi nu ndaꞌan chaꞌ tiye neꞌ fariseo, kanꞌ chaꞌ mdoꞌo yu ndyaa yu xka seꞌen. Kaꞌan ꞌa nten mdoꞌo ñaꞌan ꞌin yu, loꞌo yꞌni yu chaꞌ nchkaa nchga nu tiꞌí.
23599	MAT 12:41	Bra nu tiya tsan nu kuꞌni biyaꞌ Ndiose ꞌin nchga nten, xtya ayman neꞌ Nínive kiꞌya ꞌwan nu ndiꞌin wan lo chalyuu ni bra kanꞌ. Katsaꞌ ayman kanꞌ nchga chaꞌ nu wa ynan neꞌ, xa nu ykwiꞌ ayman Jona loꞌo neꞌ nu ngwa sꞌni, loꞌo bra kanꞌ mjyuꞌu tiꞌ neꞌ ꞌin nchga chaꞌ kuxi nu yꞌni neꞌ; ngulaa yaꞌ neꞌ chaꞌ kuxi kanꞌ chunꞌ wa yten neꞌ chaꞌ ꞌin Ndiose. Loꞌo ja suꞌwa chaꞌ nu ngwaꞌu ayman Jona kanꞌ ꞌin neꞌ sꞌni loꞌo chaꞌ nu nduꞌuǔn ꞌwan ni; tlyu la chaꞌ ꞌin Ndiose lka nu nduꞌuǔn ꞌwan ni, loꞌo ja nnan ꞌa wan chaꞌ re siyaꞌ ti.
23600	MAT 12:42	Loꞌo ayman reina nu ngwa ndloo la ꞌin neꞌ nde Sur, tyituun nu kunaꞌan kanꞌ tloo Ndiose tsan nu kuꞌni biyaꞌ Ni ꞌin nten chalyuu. Xtya nu kunaꞌan kanꞌ kiꞌya ꞌwan nu ndiꞌin wan lo chalyuu ni bra kanꞌ. Chkwiꞌ neꞌ kula kanꞌ sa ñaꞌan ngwa bra nu yaa seꞌen mdiꞌin ayman ree Salomón. Tijyuꞌ ꞌa kichen tyi reina kanꞌ; wa ynan neꞌ kula chaꞌ tiya ꞌa Salomón kanꞌ, chaꞌ suꞌwe ꞌa chaꞌ tiya nu nchkwiꞌ yu. Kanꞌ chaꞌ yaa neꞌ kula kanꞌ seꞌen mdiꞌin ree chaꞌ kunan ni sa ñaꞌan chaꞌ tiya nu nsuꞌwi ꞌin yu kula kanꞌ. Loꞌo chinꞌ la chaꞌ ngwaꞌu ayman Salomón ke chaꞌ nu nduꞌuǔn ꞌwan ni; tnun la chaꞌ ꞌin Ndiose lka nu nduꞌuǔn ꞌwan ni, loꞌo ja nnan wan siyaꞌ ti.
23610	MAT 13:2	Loꞌo ndyoꞌ tiꞌin kaꞌan ꞌa Nten seꞌen ndiꞌin Jesús, kanꞌ chaꞌ yten yu niꞌ yka naꞌan xuwe, mdukwa yu chinꞌ bra kanꞌ; nganun nten kaꞌan kanꞌ tuꞌwa tyiꞌa ti.