23216	MAT 1:3	loꞌo ayman Juda kanꞌ ngwa sti Fares loꞌo Zara, loꞌo Tamar ngwa naan jyaꞌan neꞌ kanꞌ bra kanꞌ. Loꞌo ayman Fares kanꞌ ngwa sti Esrom; loꞌo ayman Esrom kanꞌ ngwa sti Aram;
23231	MAT 1:18	Nde ndaꞌaǎn sa ñaꞌan ngwa bra nu ngula Jesucristo. Wa mskanꞌ chaꞌ ꞌin Liya kanꞌ, chaꞌ kaja kwilyoꞌo loꞌo Se nu lka sñiꞌ Jacob kanꞌ. Ja ya tyiꞌin Liya seꞌen ndiꞌin Se loꞌo mgii tiꞌ Liya kanꞌ, chaꞌ wa nsuꞌwi sñiꞌ; kanꞌ lka tñan nu wa yꞌni Tyiꞌi Ndiose ykwiꞌ, chaꞌ ngwa tnan Liya kanꞌ.
23233	MAT 1:20	Bra nu mdaꞌan chaꞌ tiye yu, ni chaꞌ ngwa ngwañaꞌan, bra kanꞌ mdoꞌo tukwa ska angajle seꞌen ndiꞌin yu, ykwiꞌ sla yu bra kanꞌ. Ykwiꞌ angajle kanꞌ loꞌo yu: ―Se ―ndukwin angajle kanꞌ ꞌin yu―, neꞌ taꞌa ayman David lka nuꞌwin ―ndukwin―. Ja kutseen kaja kwilyoꞌoo loꞌo Liya, chaꞌ kan Liya tyiꞌin naꞌan tyii. Siꞌi tñan kuxi yꞌni Liya siyaꞌ ti, tñan nu yꞌni Tyiꞌi Ndiose lka chaꞌ tyiꞌin sñiꞌ Liya ni.
23239	MAT 2:1	Ti kwiꞌ bra nu ngula Jesús nde kichen Belén, ska yu kula nu naan Herodes ngwa ndloo la ꞌin nasiyun kanꞌ. La lo yuu ꞌin Judea, la kanꞌ ndiꞌin kichen Belén kanꞌ. Loꞌo mdiyan chinꞌ nten nu tiya ꞌa nde Judea kanꞌ; mdoꞌo neꞌ tiya kanꞌ nde kichen tijyuꞌ, nde seꞌen ndyoꞌo tukwa kwichaa, mdiyan neꞌ kichen Jerusalén bra kanꞌ. Ykwiꞌ neꞌ tiya kanꞌ loꞌo nten nu ndyukwa taꞌa neꞌ tuwiin:
23251	MAT 2:13	Bra nu wa mdoꞌo neꞌ tiya kanꞌ ndyaa neꞌ kichen tyi neꞌ, bra kanꞌ ykwiꞌ sla Se. Mdoꞌo tukwa ska angajle laja sla yu, ykwiꞌ loꞌo yu bra kanꞌ: ―Xaa tiiꞌ ―ndukwin angajle kanꞌ ꞌin Se―. Tyituun, xnaan lyaa ―ndukwin―, tsaa loꞌoo ꞌin jyaꞌan kuwiꞌ tijyuꞌ la lo yuu ꞌin Egipto. Tyiꞌin wan nde kwa sa ñaꞌan bra nu katsaǎnꞌ ꞌiin chaꞌ ka tyaan wan nde nasiyun re xiyaꞌ. Tlá ꞌa ree Herodes kanꞌ; wa kan ti yu kichen re chaꞌ kunaan yu ꞌin kuwiꞌ ꞌwan, chaꞌ kujwi yu ꞌin kuwiꞌ ꞌwan, nchka tiꞌ yu.
23255	MAT 2:17	Ti kwiꞌ ti chaꞌ ykwiꞌ ayman Jeremías nu ykwiꞌ loꞌo nten chaꞌ ꞌin Ndiose nu ngwa sꞌni. Nde ndiya chaꞌ ngwaꞌan yu lo kityi:
23261	MAT 2:23	ngala neꞌ kichen Nazaret bra kanꞌ. Ti kwiꞌ ti chaꞌ ykwiꞌ ayman nu ykwiꞌ loꞌo nten chaꞌ ꞌin Ndiose nu ngwa sꞌni, bra nu ykwiꞌ neꞌ chaꞌ neꞌ Nazaret ka nu lka Krixtu. Ngwañaꞌan ykwiꞌ ayman kanꞌ nu ngwa sꞌni, kanꞌ chaꞌ ngwañaꞌan yꞌni neꞌ loꞌo Jesús bra kanꞌ.
23262	MAT 3:1	Wa mdiya yaꞌ mdyisnan Xuwa ngwaꞌu yu ꞌin nten nu mdaꞌan seꞌen ndiꞌin yu ska ti yu niꞌ kixinꞌ; mdukwatya yu ꞌin neꞌ bra kanꞌ. Ti kwiꞌ lo yuu ꞌin Judea ndiꞌin yu; wtyi ꞌa yuu seꞌen ndiꞌin Xuwa kanꞌ, ndiꞌin ꞌa kee, loꞌo ja tukwin ndiꞌin nde kwa.
23268	MAT 3:7	Ngwa ska tsan naꞌan Xuwa ꞌin tyun neꞌ fariseo loꞌo neꞌ saduceo bra kanꞌ; kti ꞌa ngiꞌni neꞌ kanꞌ loꞌo Ndiose, nxkeꞌ tiꞌ neꞌ, lye ꞌa ngiꞌni siyeꞌ neꞌ loꞌo taꞌa nten neꞌ. Loꞌo chinꞌ neꞌ kanꞌ mdiyan neꞌ chaꞌ tukwatya Xuwa ꞌin neꞌ, loꞌo ja ndiya tiꞌ Xuwa chaꞌ ngwañaꞌan ngiꞌni neꞌ kanꞌ. ―Sa ñaꞌan lka kunan tlá, kwiꞌ ngwañaꞌan lka wan ―ndukwin Xuwa ꞌin neꞌ kanꞌ―. ¿Ta wa mxitsen neꞌ ꞌwan sikwa a? ¿Ti ka nu ndukwin ra ꞌwan chaꞌ lyaa wan ꞌin nu tiꞌí nu ndijyan xa nu tyii chalyuu a? ―ndukwin yu―.
23272	MAT 3:11	Loꞌoǔn ni, ndukwatyaǎn ꞌwan loꞌo tyiꞌa chku re, si chañi chaꞌ wa ngwa jyuꞌu tiꞌ wan ꞌin kiꞌya nu ndukwi wan; loꞌo wa kan ti xka nu tnun la chaꞌ nchka ꞌin ke naꞌ. Loꞌoǔn, kuꞌni tnuǔn ꞌin yu kanꞌ; suꞌwe ꞌa ka tiyeěn, ni siya xtiǐnꞌ tiǎn ti ndukwa snan yu kanꞌ. Loꞌo yu kanꞌ ni, ja tukwatya yu ꞌin nten loꞌo tyiꞌa ti; kuꞌni yu chaꞌ kanun Tyiꞌi Ndiose niꞌ kasiya ꞌin nten xa nu tukwatya yu ꞌin neꞌ. Kwiꞌ ngwañaꞌan, kuꞌni luwi yu kasiya ꞌin neꞌ loꞌo xaa ꞌin yu.
23274	MAT 3:13	Ti mdiꞌin Xuwa tuꞌwa chku Jordán, bra kanꞌ mdoꞌo Jesús lo yuu ꞌin Galilea mdiyan seꞌen ndiꞌin Xuwa, chaꞌ loꞌo Jesús nchka tiꞌ chaꞌ tukwatya Xuwa ꞌin.
23277	MAT 3:16	Xa wa ngwa chaꞌ kanꞌ, mdoꞌo Jesús lo tyiꞌa, kanꞌ ngalaa nde niꞌ kwan. Loꞌo bra kanꞌ naꞌan Jesús chaꞌ ngwiꞌya Tyiꞌi Ndiose chunꞌ yu; sa ñaꞌan ndiꞌya ska kiñi cha kuun lo yuu, ngwañaꞌan ngwiꞌya Tyiꞌi Ndiose chunꞌ Jesús.
23279	MAT 4:1	Loꞌo bra kanꞌ ndyaa loꞌo Tyiꞌi Ndiose ꞌin Jesús niꞌ kixinꞌ seꞌen wtyi ꞌa yuu, seꞌen ja ndiꞌin nten, chaꞌ tyukwa taꞌa yu loꞌo kuneꞌ xaꞌan nde kanꞌ. Ngwa tiꞌ yu kanꞌ tyijin lyo ꞌin Jesús.
23280	MAT 4:2	Tuꞌwa tsan tuꞌwa tla ja yku Jesús siyaꞌ ti, ngiteꞌ ꞌa tiꞌ yu bra kanꞌ.
23284	MAT 4:6	―¿Ta chañi chaꞌ nuꞌwin lkaa ska ti nu lka Sñiꞌ Ndiose a? ―ndukwin kuneꞌ xaꞌan ꞌin Jesús―. Suꞌwe si xtyuu loo lo yuu sikwa, chaꞌ ndukwa ska chaꞌ lo kityi ꞌin Ndiose nu nchkwiꞌ: Kulo Ndiose tñan ꞌin angajle ꞌin Ni chaꞌ ñaꞌansiin ꞌiin, ndukwin kityi. Kwiꞌ ngwañaꞌan ndukwa xka chaꞌ: Loꞌo yaꞌ ti angajle ꞌin Ni xituun ꞌiin, chaꞌ ja ka tiꞌí kiyaaꞌ seꞌen tyukwa kee kiyaaꞌ. Ngwañaꞌan ndukwa chaꞌ lo kityi ―ndukwin kuneꞌ xaꞌan.
23287	MAT 4:9	Ykwiꞌ biyaꞌ kuneꞌ xaꞌan kanꞌ loꞌo Jesús xiyaꞌ bra kanꞌ: ―Taǎn chabiyaꞌ kaa ndloo la ꞌin nchga chalyuu nu ñaꞌaan nde kwa ―ndukwin kuneꞌ xaꞌan ꞌin Jesús―, ska ti si tyuun xtyiinꞌ tloǔn, si kuꞌnii tnun ꞌñaǎn, kaa ndloo la bra kanꞌ.
23288	MAT 4:10	Loꞌo mxkwen Jesús ꞌin kuneꞌ xaꞌan bra kanꞌ: ―Tyoꞌo tsuuꞌ seꞌen ndiꞌiǐn, Satanás ―ndukwin Jesús―. Yaa lyaa, chunꞌ ndukwa ska chaꞌ lo kityi ꞌin Ndiose nu nchkwiꞌ: “Ska ti Ndiose nu lka Xꞌnan wan kuꞌni tnun wan ꞌin Ni, siyaꞌ ti kunan wan chaꞌ nu nchkwiꞌ Ndiose xa nu ndiꞌin wan lo chalyuu” ndukwin kityi.
23292	MAT 4:14	Ti kwiꞌ ti chaꞌ mdaꞌan ayman kula Isaías nu ykwiꞌ loꞌo nten chaꞌ ꞌin Ndiose nu ngwa sꞌni:
23296	MAT 4:18	La xka tsan ndaꞌan Jesús tuꞌwa tiyuꞌ Galilea kanꞌ, naꞌan yu ꞌin Simón loꞌo Ndre taꞌa ngula Simón bra kanꞌ, nduguun neꞌ katan lo tyiꞌa chaꞌ xñi neꞌ kula, chaꞌ kanꞌ lka tñan nu ngiꞌni neꞌ kanꞌ nchga tsan. Ti kwiꞌ Simón kanꞌ lka nu mstya Jesús xka nin chaꞌ ka naan yu Tyu.
23297	MAT 4:19	Loꞌo bra kanꞌ ykwiꞌ Jesús loꞌo taꞌa tyukwaa yu kiꞌyu kanꞌ: ―Tsaa wan loꞌoǔn ni ―ndukwin Jesús ꞌin neꞌ kanꞌ―. Sa ñaꞌan mjwi kula ꞌwan xa nu mdaꞌan wan kuta kula, ngwañaꞌan kaja xka tñan ꞌwan ni chabiyaꞌ ꞌñaǎn; kwaꞌuǔn ꞌwan sa ñaꞌan nu tsaa naan wan ꞌin nten chalyuu re nu ja ya kunan chaꞌ suꞌwe, chaꞌ ka neꞌ nten ꞌñaǎn.
23322	MAT 5:19	Kanꞌ chaꞌ ni, ja ta Ndiose seꞌen tyiꞌin nten loꞌo Ni, xa nu ja tukwa neꞌ nchga tñan nu ngulo Ndiose ꞌin neꞌ chaꞌ kuꞌni neꞌ, xa nu loꞌo kwaꞌu neꞌ ꞌin taꞌa nten neꞌ chaꞌ ja ndiꞌin chaꞌ tukwa neꞌ tñan kanꞌ. Ta Ndiose seꞌen tyiꞌin nten loꞌo Ni xa nu tukwa neꞌ nchga chaꞌ nu nchkwiꞌ Ni, xa nu loꞌo kwaꞌu neꞌ tñan kanꞌ ꞌin taꞌa nten neꞌ.
23325	MAT 5:22	Loꞌo ni, kaꞌan la chaꞌ chkwiǐnꞌ loꞌo wan: Ni siya naꞌan tiꞌí ti neꞌ ꞌin taꞌa nten neꞌ, ndiꞌin chaꞌ tyijin neꞌ nu tiꞌí bra kanꞌ; ni siya chkwiꞌ neꞌ ska chaꞌ kuxi ꞌin taꞌa nten neꞌ, bra kanꞌ ndiꞌin chaꞌ tsaa neꞌ nde seꞌen ndukwa nu lka ndloo la nde kichen Jerusalén, chaꞌ ka biyaꞌ chaꞌ ꞌin neꞌ nde kwa bra kanꞌ. Kwiꞌ ngwañaꞌan, bra nu msinꞌ ꞌa tiꞌ neꞌ nchkwiꞌ neꞌ loꞌo taꞌa nten neꞌ: ¡Tintu ꞌa nuꞌwin!, ja chan tsaa neꞌ kanꞌ lo jwlyaa, seꞌen ja tsaa tii ꞌa chaꞌ nchkin kiiꞌ bra kanꞌ.
23339	MAT 5:36	Ti kwiꞌ ti chaꞌ, ja skanꞌ wan chaꞌ loꞌo nten bra nu nchkwiꞌ wan chaꞌ ꞌin ke wan ti ykwiꞌ ti wan, chaꞌ ska ti Ndiose ngwiñan Ni ꞌwan, loꞌo ja ka ꞌwan kuꞌni wan chaꞌ ka kichanꞌ ke wan, ni siya kichanꞌ ngata, ni siya kichanꞌ ngaten. Ja suꞌwe nka tiye Ndiose siyaꞌ ti chaꞌ chkwiꞌ wan ska chaꞌ laja ti bra nu skanꞌ tsaa wan chaꞌ loꞌo nten.
23349	MAT 5:46	Ti kwiꞌ ti chaꞌ, ja suꞌwe si xkwiꞌ suꞌwe nsuꞌwi tiye wan loꞌo nten taꞌa suꞌwe ndiꞌin wan. Siꞌi nan suꞌwe la kunan Ndiose chaꞌ nchkwiꞌ wan si ngwañaꞌan ngiꞌni wan, chaꞌ kwiꞌ ngwañaꞌan ngiꞌni ya ñaꞌan ti nten; ni siya nten suꞌwe, ni siya nten xaꞌan, loꞌo neꞌ nu ndlo tñi ꞌwan chaꞌ ꞌin neꞌ xka laꞌa tsuꞌ, nchga nten kanꞌ ngiꞌni suꞌwe neꞌ loꞌo taꞌa suꞌwe ndiꞌin neꞌ.
23350	MAT 5:47	Bra nu chkwiꞌ suꞌwe wan ska ti loꞌo taꞌa suꞌwe nsuꞌwi wan, ja suꞌwe kanꞌ, chaꞌ kwiꞌ ngwañaꞌan ngiꞌni nchga nten; loꞌo nten nu ja ndiꞌin chaꞌ ꞌin loꞌo Ndiose, loꞌo nten kanꞌ nchkwiꞌ suꞌwe loꞌo taꞌa suꞌwe ndiꞌin neꞌ. Ti kaꞌan la chaꞌ suꞌwe kuꞌni wan, nchka tiꞌ Ndiose.
23362	MAT 6:11	Taa nan ku ba tsan ni.
23374	MAT 6:23	Xa nu tiꞌí kiloan, ja ka kuꞌnian tñan, chaꞌ ja ndyukwi ꞌa xaa ꞌñaan bra kanꞌ. Kwiꞌ ngwañaꞌan ka niꞌ kasiya ꞌwan, bra nu ja ndyukwi xaa ꞌwan chunꞌ ndiꞌin chaꞌ kuxi ꞌwan, ¡siyaꞌ ti ja ka ꞌa xuꞌwi xaa niꞌ kasiya ꞌwan bra kanꞌ! Tla ꞌa kanun tyukwi ñaꞌaan wan loꞌo kasiya ꞌwan bra kanꞌ.
23377	MAT 6:26	Tyaꞌan chinꞌ chaꞌ tiye wan sa ñaꞌan nchka ꞌin kiñi nu ndukwi kwan: ja ntya iꞌ nskwaꞌ, ja nxtun iꞌ tya, ja nñan iꞌ juꞌwa seꞌen xoꞌ tiꞌin iꞌ nan ku iꞌ; Stian Ndiose nu ndiꞌin nde niꞌ kwan, nda Ni nan ku iꞌ ngwa ti ñaꞌan. Loꞌo ꞌwan ni, ¿ta chinꞌ la nsuꞌwi lyo wan ke ska kiñi seꞌen ndiꞌin Ndiose a? ¡Siꞌi! Kaꞌan la nsuꞌwi lyo wan chaꞌ ꞌin Ndiose.
23379	MAT 6:28	’Kwiꞌ ngwañaꞌan steꞌ wan, ¿ni chaꞌ ndyaꞌan ꞌa chaꞌ tiye wan chaꞌ ꞌin ran? Tyaꞌan chinꞌ chaꞌ tiye wan xa nu ñaꞌan wan keé nu ndukwa laja kixinꞌ kwa. Suꞌwe ti ngaluu ran, ja ngiꞌni ran tñan, ja nchka ꞌin ran kwiñan teꞌ kuꞌ ran.
23389	MAT 7:4	¿Ni chaꞌ lka tnun ꞌa tiye wan chaꞌ chkwiꞌ wan chaꞌ re loꞌo nten kanꞌ: “Taa chabiyaꞌ kuloǔn yuu nu nsuꞌwi kiloo” a? Ngwañaꞌan nchkwiꞌ wan loꞌo nten kanꞌ, loꞌo ja ñaꞌan wan mti nu nsuꞌwi kiloo ykwiꞌ wan.
23391	MAT 7:6	’Chaꞌ suꞌwe nu ykwiꞌ Ndiose ni, ja suꞌwe si tsaa chkwiꞌ wan chaꞌ suꞌwe kanꞌ loꞌo nten xaꞌan nu ja nchka tiꞌ kunan chaꞌ kanꞌ siyaꞌ ti, chaꞌ ñaꞌan tiꞌ xneꞌ, ngwañaꞌan nchka tiꞌ nten kanꞌ. Ta wan chaꞌ kasinꞌ tiꞌ ꞌin neꞌ xaꞌan kanꞌ, ka liyeꞌ tiꞌ neꞌ ꞌwan bra kanꞌ. Kwiꞌ ngwañaꞌan, ja suꞌwe xtya wan ska kee xaa nu kaꞌan ꞌa nsuꞌwi lyo ꞌwan seꞌen ndiꞌin kuweꞌ, chaꞌ bra ti lyoꞌo suꞌwa iꞌ ꞌin nan suꞌwe kanꞌ.
23394	MAT 7:9	’Ja ska wan ta wan ska kee ku sñiꞌ wan bra nu jñan nu xuwe jaxlya ku. ¿Ta ta wan kee ku a?
23395	MAT 7:10	Ja nsuꞌwi nten nu ta ska kunan ku sñiꞌ bra nu jñan nu xuwe kula ku. ¿Ta kuꞌni wan ngwañaꞌan a?
23397	MAT 7:12	’Ndiꞌin chaꞌ kuꞌni wan chaꞌ suꞌwe loꞌo xka la nten si nchka tiꞌ wan chaꞌ suꞌwe ti kuꞌni neꞌ loꞌo wan. Ti kwiꞌ tñan kanꞌ ngulo Ndiose lo kityi nu ngwaꞌan ayman Moisés, ti kwiꞌ ti chaꞌ ngwaꞌan xka la ayman nu ykwiꞌ chaꞌ ꞌin Ndiose loꞌo nten nu ngwa sꞌni; ska ñaꞌan ndyoꞌo ti chaꞌ nu ykwiꞌ nchga neꞌ kanꞌ lo kityi.
23398	MAT 7:13	’Xka chaꞌ ni: Ndiꞌin chaꞌ tyijin wan tu loꞌoo luꞌwi ti. Tnun ꞌa tu loꞌoo, kwiꞌ xiin ꞌa tuwiin seꞌen tsaa neꞌ lo jwlyaa. Suꞌwe ꞌa ñaꞌan tuwiin kanꞌ, nxkeꞌ tiꞌ neꞌ, kanꞌ chaꞌ kaꞌan ꞌa nten ndaꞌan tuwiin kanꞌ.
23421	MAT 8:7	Ykwiꞌ Jesús loꞌo yu bra kanꞌ: ―Tsaꞌaǎn. Kuꞌniǐn chaꞌ chkaa yu ―ndukwin Jesús ꞌin yu capitán kanꞌ.
23427	MAT 8:13	Xiyaꞌ ykwiꞌ Jesús loꞌo capitán bra kanꞌ: ―Yaa lyaa naꞌan tyii sikwa ―ndukwin Jesús―. Wa ndyaa ñaꞌan tiiꞌ ꞌñaǎn, kanꞌ chaꞌ nchkaa yu ni; ngwa tiin kicha kanꞌ ꞌin yu ―ndukwin Jesús ꞌin capitán. Ti kwiꞌ bra kanꞌ nchkaa msu kanꞌ.
23428	MAT 8:14	Chunꞌ ndiꞌin la ndyaa Jesús nde naꞌan tyi Tyu. Loꞌo naꞌan Jesús chaꞌ nskwa ti jyaꞌan laa Tyu lo kiꞌyan, chaꞌ lye ꞌa nsuꞌwi tikeeꞌ ꞌin bra kanꞌ.
23435	MAT 8:21	Loꞌo kanꞌ ykwiꞌ xka yu kiꞌyu nu mdaꞌan loꞌo Jesús: ―Yu kula ―ndukwin yu ꞌin Jesús―, taa chinꞌ chabiyaꞌ ꞌñaǎn chaꞌ nu tyaꞌaǎn tuꞌwa naꞌan tyiǐn, tyaꞌaǎn chaꞌ kuꞌniǐn kwentaǎn ꞌin stiǐn sa ñaꞌan yaꞌ kaja stiǐn, chaꞌ tsaa ytsiǐnꞌ ꞌin stiǐn kulo ndukwa. Tsaꞌaǎn loꞌoo bra kanꞌ.
23436	MAT 8:22	Kanꞌ mxkwen Jesús ꞌin yu: ―Suꞌwe la kaan ñaꞌaan ꞌñaǎn bra ti ―ndukwin Jesús ꞌin yu―. Ti ndiya chinꞌ xka la nten taꞌa wan nu ka kutsiꞌ ꞌin nten ꞌiin nu wa ngujwi.
23441	MAT 8:27	Yuwe ꞌa tiꞌ neꞌ kanꞌ bra kanꞌ, chunꞌ ngwa tiin kulooꞌ loꞌo kwiꞌin siyaꞌ ti. ―¿Ti lka ra yu kula re? ―ndukwin neꞌ ꞌin taꞌa neꞌ―. Ynan kulooꞌ chaꞌ nu ykwiꞌ yu, kwiꞌ ngwañaꞌan ynan kwiꞌin chaꞌ nu ykwiꞌ yu kula re loꞌo ran.
23443	MAT 8:29	Loꞌo yꞌni kwiꞌin xaꞌan kanꞌ, chaꞌ kwen ꞌa nxiꞌya yu tiꞌí kanꞌ: ―Jesús, ¿ni chaꞌ ndaꞌaan seꞌen ndiꞌin ba? ―ndukwin yu tiꞌí kanꞌ―. Nuꞌwin lkaa ska ti nu lka Sñiꞌ Ndiose. ¿Ta taa nu tiꞌí ꞌwa, nchka tiiꞌ a? Ja ya tiya bra tiyan nu tiꞌí ꞌwa.
23453	MAT 9:5	Ja ndiya tiꞌ wan chaꞌ nu ykwiǐnꞌ loꞌo yu tiꞌí re: “Wa yꞌniǐn chaꞌ tlyu tiꞌ ꞌin kiꞌya nu ndukwii.” ¿Ta chkwiǐnꞌ loꞌo yu tiꞌí: “Tyituun, tyoꞌoo taꞌaan ni” suꞌwe la sikwa a? ―ndukwin Jesús―.
23454	MAT 9:6	Ndiꞌin chaꞌ ka biyaꞌ tiꞌ wan chaꞌ nda Ndiose chabiyaꞌ ꞌñaǎn chaꞌ kuꞌniǐn chaꞌ tlyu tiꞌ ꞌin kiꞌya nu ndukwi nten chalyuu, chaꞌ wa msuꞌwa Ndiose ꞌñaǎn ndijyaǎn chaꞌ kaǎn nten. Ka biyaꞌ tiꞌ wan bra nu ñaꞌan wan chaꞌ chkaa yu tiꞌí re. Bra kanꞌ xiyaꞌ ykwiꞌ Jesús loꞌo yu tiꞌí kanꞌ: ―Tyituun ―ndukwin Jesús ꞌin yu―, chkwaan katan ꞌiin, chaꞌ tyaa loꞌoo ꞌin ran nde naꞌan tyii.
23457	MAT 9:9	Mdoꞌo Jesús ndyaa, loꞌo wa tyijin ti yu tuꞌwa naꞌan seꞌen ndukwa Mateo nu ndlo tñi ꞌin neꞌ chaꞌ ꞌin neꞌ xka laꞌa tsuꞌ. Ykwiꞌ Jesús loꞌo Mateo kanꞌ bra kanꞌ: ―Tyoꞌoo ñaꞌaan ꞌñaǎn ―ndukwin Jesús ꞌin yu. Bra ti mdyituun Mateo, ngulaa tiꞌin yu tñan ꞌin yu, ndyaa ñaꞌan yu ꞌin Jesús bra kanꞌ.
23465	MAT 9:17	Ti kwiꞌ ti chaꞌ, ja xuꞌwi neꞌ xalyu nu tka mdoꞌo ti niꞌ chkaꞌ kula. Bra nu suꞌwa neꞌ ꞌin ran niꞌ chkaꞌ kula, ndla ti katsu siꞌ chkaꞌ kanꞌ; tyii chkaꞌ kanꞌ lyaꞌa bra kanꞌ, tyii xalyu kalu bra kanꞌ. Niꞌ chkaꞌ tiji xuꞌwi xalyu nu tka mdoꞌo ti; ngwañaꞌan talo taꞌa tyukwaa nan, loꞌo xalyu loꞌo chkaꞌ bra kanꞌ. (Ngwañaꞌan ngwaꞌu Jesús ꞌin neꞌ chaꞌ ka biyaꞌ tiꞌ neꞌ chaꞌ ja suꞌwe xtiyaaꞌ neꞌ chaꞌ kwi nu nduꞌu yu chaꞌ ꞌin Ndiose loꞌo chaꞌ kula nu mxnun ayman kula chaꞌ kuꞌni neꞌ.)
23466	MAT 9:18	Bra nu ti nchkwiꞌ Jesús loꞌo neꞌ, kanꞌ mdiyan ska neꞌ judío nu lka ndloo la; mduun xtyinꞌ yu kula tloo Jesús, chaꞌ jñan ska chaꞌ tlyu tiꞌ ꞌin yu bra kanꞌ: ―Tka ngujwi ti ska nu kunaꞌan lyuꞌ ti, sñiěnꞌ ―ndukwin yu kula kanꞌ ꞌin Jesús―. ¿Ja tsaa chinꞌ seꞌen ndiꞌiǐn chaꞌ xtyaa yaaꞌ chunꞌ nu lyuꞌ ti kanꞌ a? ―ndukwin―. Jlyo tiǎnꞌ chaꞌ ka ꞌiin kuꞌnii chaꞌ tyuꞌu nu lyuꞌ ti kanꞌ xiyaꞌ.
23468	MAT 9:20	Tuwiin seꞌen ndyaa neꞌ ndyukwa ska nu kunaꞌan tiꞌí ꞌin Jesús, mdiyan nde chunꞌ yu chaꞌ kalaꞌ kiyaꞌ steꞌ yu; wa tii tyukwa yijan tiꞌí nu kunaꞌan kanꞌ, chaꞌ ngalu tnen neꞌ kula kanꞌ.
23472	MAT 9:24	Ykwiꞌ Jesús loꞌo neꞌ bra kanꞌ: ―Tyaa wan suꞌwe la ―ndukwin―. Nan lajaꞌ ti nu lyuꞌ re, siꞌi nan ngujwi re. Mstyi lyoꞌo ꞌa neꞌ ꞌin Jesús bra kanꞌ.
23476	MAT 9:28	Bra wa mdiyan Jesús niꞌ ñaꞌan, loꞌo yu kwityiinꞌ kanꞌ mdiyan neꞌ seꞌen ndiꞌin yu. Ykwiꞌ Jesús loꞌo neꞌ bra kanꞌ: ―¿Ta ndyaa ñaꞌan tiꞌ wan chaꞌ ka ꞌñaǎn kuꞌniǐn chaꞌ chkaa wan a? ―ndukwin yu ꞌin neꞌ. ―Ndyaa ñaꞌan tiꞌ ba ꞌiin, yu kula ―ndukwin yu kwityiinꞌ kanꞌ ꞌin yu.
23480	MAT 9:32	Ti kwiꞌ bra nu wa tyoꞌo ti neꞌ kanꞌ tyaa neꞌ, bra kanꞌ mdiyan xka ta nten, yan loꞌo neꞌ ꞌin ska yu kuꞌun; nan kuꞌun yu siꞌya kwiꞌin kuxi nu nsuꞌwi ꞌin yu.
23488	MAT 10:2	Nde ndaꞌaǎn nin taꞌa tii tyukwa neꞌ nu ngulo suwi Jesús: kulo ngulo suwi yu ꞌin Simón, nu mstya Jesús xka nin chaꞌ ka naan yu Tyu, loꞌo Ndre taꞌa ngula Simón kanꞌ; kanꞌ ngulo suwi yu ꞌin Santiago, loꞌo Xuwa taꞌa ngula Santiago, nu lka sñiꞌ Zebedeo;
23489	MAT 10:3	loꞌo ngulo suwi yu ꞌin Lpe, loꞌo Bartolomé, loꞌo Toma, loꞌo Mateo nu ngulo tñi ꞌin nten chaꞌ ꞌin neꞌ xka laꞌa tsuꞌ ti kulo; loꞌo ngulo suwi yu ꞌin Santiago sñiꞌ Alfeo, loꞌo Tadeo;
23496	MAT 10:10	ja loꞌo kisu tyaja kwiꞌya wan tsaa wan. Kwiꞌ ngwañaꞌan, ja kwiꞌya loꞌo wan xka ykanꞌ, ja loꞌo xka snan wan, ja loꞌo yka skan kwiꞌya wan tsaa wan. Tloo ti wan tsaa wan. Bra nu ndayaꞌ wan ꞌin nten, ndiꞌin chaꞌ xku neꞌ ꞌwan.
23501	MAT 10:15	Chañi chaꞌ nchkwiǐnꞌ loꞌo wan, chaꞌ xa nu tiya tsan nu kuꞌni biyaꞌ Ndiose ꞌin nchga nten, bra kanꞌ lye ꞌa ta Ndiose nu tiꞌí ꞌin neꞌ kichen seꞌen ja xlyaa neꞌ kunan neꞌ chaꞌ nu kwaꞌu wan ꞌin neꞌ. Tsan kanꞌ ka suꞌwe la chaꞌ ꞌin neꞌ xaꞌan nu mdiꞌin kichen Sodoma, nu mdiꞌin kichen Gomorra nu ngwa sꞌni.
23506	MAT 10:20	chaꞌ siꞌi chaꞌ ꞌwan ti nu chkwiꞌ wan bra kanꞌ; chaꞌ ꞌin Tyiꞌi Ndiose nu lka Stian, kanꞌ ka chaꞌ nu chkwiꞌ wan loꞌo neꞌ kanꞌ.
23515	MAT 10:29	’Wa jlyo tiꞌ wan chaꞌ xꞌnan ꞌa ngaꞌan kiñi xuwe nu ndujwiꞌ nten, tukwa kiñi xuwe kaja ꞌwan ska ti tñi. Ti kwiꞌ Stiǐn nu lka ndloo la ti, nchga chaꞌ jlyo tiꞌ Ni; ni siya ska ti kiñi xuwe kaja iꞌ, wa jlyo tiꞌ Ni chaꞌ kanꞌ.
23530	MAT 11:2	Ti nsuꞌwi Xuwa kanꞌ niꞌ ñaꞌan chkwan, wa ynan yu chaꞌ ꞌin nchga tñan nu ngiꞌni Jesús nu nka Krixtu; kanꞌ chaꞌ ngulo Xuwa tñan ꞌin neꞌ nu ngiꞌni xaꞌan chaꞌ ꞌin yu, chaꞌ tsaa neꞌ kanꞌ seꞌen ndiꞌin Jesús,
23531	MAT 11:3	chaꞌ kunichaꞌ neꞌ kanꞌ chaꞌ re ꞌin Jesús chaꞌ ꞌin Xuwa: ―¿Ta chañi chaꞌ nuꞌwin lkaa ti kwiꞌ nu wa kan ti a? ―ndukwin neꞌ kanꞌ ꞌin Jesús bra kanꞌ―. ¿Ta kan la xka nu ka Krixtu ykwiꞌ a?
23535	MAT 11:7	Bra wa ndyaa neꞌ kanꞌ, mdyisnan Jesús ykwiꞌ yu chaꞌ ꞌin Xuwa kanꞌ loꞌo nten kaꞌan nu ndiꞌin loꞌo yu nde kwa: ―Bra nu yaa wan niꞌ kixinꞌ seꞌen mdiꞌin Xuwa, ¿ni sa ñaꞌan lka yu, mskeꞌ tiꞌ wan, xa wa naꞌan wan ꞌin yu nde kwa a? ―ndukwin Jesús ꞌin neꞌ bra kanꞌ―. ¿Ta mskeꞌ tiꞌ wan chaꞌ ngwa yu ñaꞌan tiꞌ ska yka kii nu mxkii tuun kwiꞌin ꞌin a? ¿Ta ngwañaꞌan mskeꞌ tiꞌ wan a?
23536	MAT 11:8	¿Ni chaꞌ lka yaa naꞌan wan ꞌin yu nde kwa sikwa? ¿Ta mskeꞌ tiꞌ wan chaꞌ ngwa yu ñaꞌan tiꞌ ska yu kiꞌyu nu siyeꞌ ꞌa a? ¿Ta kanꞌ chaꞌ yaa naꞌan wan ꞌin yu a? Nten nu suꞌwe ñaꞌan steꞌ, kanꞌ ndiꞌin seꞌen ndiꞌin neꞌ kuliyaꞌ nu lka ree.
23540	MAT 11:12	’Ti bra nu yan Xuwa kanꞌ ti kulo, loꞌo bra ni, kaꞌan ꞌa chaꞌ nchkwiꞌ nten, chaꞌ nsuꞌwi ꞌa nten nu nchka tiꞌ chaꞌ ka Ndiose ndloo ꞌin neꞌ. Kwiꞌ ngwañaꞌan, nsuꞌwi ꞌa nten nu lye ꞌa ngiꞌni jwersa chaꞌ kala neꞌ seꞌen ndiꞌin Ndiose, ykwiꞌ ti neꞌ.
23542	MAT 11:14	Ti kwiꞌ yu kanꞌ lka ñaꞌan tiꞌ Elías nu ngwa sꞌni, nu ykwiꞌ chaꞌ ꞌin Ndiose loꞌo nten. Wa sꞌni ndukwa chaꞌ tyaan Elías kanꞌ xiyaꞌ, si xlyaa wan xñi wan chaꞌ kanꞌ.
23545	MAT 11:17	“¿Ni chaꞌ ja xlyaa wan kula kiyaꞌ wan? Nan ngala ba jiin loꞌo kuwi kii chaꞌ ꞌwan” ndukwin nu xuwe ꞌin taꞌa ndiꞌin jya. “¿Ni chaꞌ ja xlyaa wan ka xiꞌin tiꞌ wan loꞌo ba? Nan ngala ba jiin xiꞌin, nan nganan ba ndiꞌin ba.” Ti kwiꞌ ngwañaꞌan ngiꞌni wan lo chalyuu re ni, chunꞌ xkwiꞌ ndaja tiꞌ wan; ja suꞌwe lka tiye wan siyaꞌ ti ñaꞌan wan ꞌin taꞌa nten wan.
23549	MAT 11:21	―¡Tꞌnan ꞌa wan neꞌ kichen Corazín! ―ndukwin Jesús―. ¡Tꞌnan ꞌa wan neꞌ kichen Betsaida! ―ndukwin―. Kaꞌan ꞌa chaꞌ tnun wa naꞌan wan, loꞌo ja mjyuꞌu tiꞌ wan siyaꞌ ti ꞌin chaꞌ kuxi nu ngiꞌni wan, ja ngulaa yaꞌ wan chaꞌ kanꞌ. Kwiꞌ ngwañaꞌan ti sꞌni, xaꞌan ꞌa neꞌ kichen Tiro loꞌo neꞌ kichen Sidón, neꞌ xka laꞌa tsuꞌ ngwa neꞌ kanꞌ. Loꞌo ja mjwi ñaꞌan ka jyuꞌu tiꞌ neꞌ kanꞌ ꞌin chaꞌ kuxi nu wa yꞌni neꞌ. Ja ngulaa yaꞌ neꞌ chaꞌ kuxi kanꞌ, chunꞌ ja ya ñaꞌan neꞌ kanꞌ chaꞌ tnun sa ñaꞌan nu naꞌan wan, ꞌwan neꞌ Israel; kanꞌ chaꞌ ja ngwa xiꞌin tiꞌ neꞌ kanꞌ, kanꞌ chaꞌ ja ykuꞌ neꞌ teꞌ ngata, ja msuꞌwa neꞌ jii ke neꞌ sa ñaꞌan nu ngiꞌni nten seꞌen nskwa ayman.
23550	MAT 11:22	Ñi katsaǎnꞌ ꞌwan, chaꞌ ka suꞌwe la chaꞌ ꞌin ayman neꞌ Tiro loꞌo ayman neꞌ Sidón, loꞌo lye la kaja nu tiꞌí ꞌwan bra nu tiya tsan tnun chaꞌ kuꞌni biyaꞌ Ndiose ꞌin nten chalyuu bra kanꞌ.
23551	MAT 11:23	Loꞌo ꞌwan, neꞌ Capernaum ni, ¿ta suꞌwe la kichen tyi wan, nxkeꞌ tiꞌ wan a? ¿Ta lka kichen tyi wan ndloo la ꞌin xka la kichen, nxkeꞌ tiꞌ wan a? Nde loo la ñuꞌun siyaꞌ ti kichen tyi wan, loꞌo ykwiꞌ wan tyaa wan nde lo jwlyaa bra kanꞌ. Kaꞌan ꞌa chaꞌ tnun yꞌniǐn seꞌen ndiꞌin wan, loꞌo ja yaa ñaꞌan tiꞌ wan ꞌñaǎn siyaꞌ ti. Kwiꞌ ngwañaꞌan nu ngwa sꞌni, xaꞌan ꞌa ngwa neꞌ kichen Sodoma; loꞌo ja naꞌan ayman kanꞌ chaꞌ tnun sa ñaꞌan nu wa naꞌan wan, ꞌwan neꞌ Capernaum. Si wa naꞌan neꞌ chaꞌ kanꞌ, ja chan wa mjyuꞌu tiꞌ neꞌ ꞌin chaꞌ kuxi nu wa yꞌni neꞌ bra kanꞌ, wa ngulaa yaꞌ neꞌ chaꞌ kuxi kanꞌ; ja chan ti ndukwa kichen tyi neꞌ kanꞌ sa bra ni.
23555	MAT 11:27	Ti ngwaꞌu la Jesús ꞌin neꞌ bra kanꞌ: ―Nchga chabiyaꞌ ꞌin Stiǐn Ndiose nganun ꞌñaǎn. Ja tukwin jlyo tiꞌ sa ñaꞌan lka chaꞌ nu nsuꞌwi niꞌ kasiya ꞌñaǎn, chaꞌ naꞌ lkaǎn ska ti nu lka Sñiꞌ Ndiose; ska ti Stiǐn Ndiose jlyo tiꞌ Ni sa ñaꞌan lka chaꞌ nu nsuꞌwi niꞌ kasiya ꞌñaǎn. Kwiꞌ ngwañaꞌan, ja tukwin jlyo tiꞌ sa ñaꞌan chaꞌ nu nsuꞌwi niꞌ kasiya ꞌin Stiǐn; skaǎn tiǎn nu lkaǎn Sñiꞌ Ni jlyo tiǎnꞌ, loꞌo kwaꞌuǔn chaꞌ kanꞌ ꞌin nten nu kuloǔn suwiǐn ꞌin chaꞌ kuꞌni xaꞌan neꞌ chaꞌ ꞌñaǎn.
23556	MAT 11:28	Nchga wan nu ja talo wan chaꞌ tiꞌin ꞌa tñan nsuꞌwi ꞌwan lo chalyuu, nxkeꞌ tiꞌ wan, kan wan tyiꞌin chaꞌ ꞌwan loꞌoǔn ni. Taǎn chabiyaꞌ chaꞌ tiin ti tyiꞌin wan bra kanꞌ.
23563	MAT 12:5	Loꞌo ndiya xka chaꞌ nu ngwaꞌan ayman Moisés lo kityi, chaꞌ sti joꞌo ni, ja nxitñaꞌ neꞌ niꞌ lyaa tnun xa nu ndiya tsan nu nxitñaꞌ nten; nsuꞌwi tñan nu ngiꞌni sti joꞌo kanꞌ. Ti kwiꞌ ti chaꞌ, ja ndiꞌin kiꞌya ꞌin neꞌ kanꞌ chaꞌ ꞌin Ndiose, chaꞌ ngiꞌni neꞌ tñan kanꞌ―ndukwin Jesús ꞌin neꞌ fariseo kanꞌ―.
23568	MAT 12:10	Naꞌan yu chaꞌ ndiꞌin ska yu kiꞌyu nu tiꞌí yaꞌ, chaꞌ wa nchkunꞌ tyukwin ska laꞌa yaꞌ yu. Loꞌo mnichaꞌ neꞌ judío kanꞌ ꞌin Jesús bra kanꞌ: ―¿Ta ndiya chabiyaꞌ ꞌñaan chaꞌ kuꞌnian joꞌó ꞌin nu tiꞌí tsan taꞌa a?, xa nu ndiꞌin chaꞌ xitñaanꞌ ―ndukwin neꞌ ꞌin Jesús. Nchka ꞌa tiꞌ neꞌ kanꞌ xtya neꞌ kiꞌya ꞌin Jesús.
23569	MAT 12:11	Kanꞌ mxkwen yu ꞌin neꞌ: ―¿Ta ja tlyo wan ꞌin ska slyaꞌ ꞌwan xa wa mdiyuu iꞌ ska niꞌ tiyuu a? ―ndukwin Jesús ꞌin neꞌ―. Ja chan tlyo wan ꞌin iꞌ, ni siya tsan taꞌa lka bra kanꞌ.
23575	MAT 12:17	Ti sꞌni ytsaꞌ Ndiose ska chaꞌ ꞌin ayman Isaías chaꞌ ꞌin Krixtu. Nde ndukwa chaꞌ kanꞌ lo kityi:
23576	MAT 12:18	Nde ndiya msu ꞌñaǎn nu wa ngulo suwiǐn ꞌin, ndukwin Ndiose. Ndiya ꞌa tiǎnꞌ ꞌin yu, loꞌo suꞌwe ꞌa nka tiyeěn ñaꞌaǎn ꞌin yu kanꞌ. Kuꞌniǐn chaꞌ kiꞌya Tyiꞌiǐn ykwiǐnꞌ chunꞌ yu, chaꞌ chkwiꞌ yu loꞌo nchga nten, loꞌo nten nu ja lka judío. Kwaꞌu yu ꞌin neꞌ sa ñaꞌan nu ñi ꞌa ngiꞌniǐn biyaǎnꞌ ꞌin nten chalyuu, ndukwin Ni.
23581	MAT 12:23	Nduwe ꞌa tiꞌ nchga nten nu naꞌan chaꞌ kanꞌ bra kanꞌ. ―¿Ta ti kwiꞌ yu taꞌa ayman David kanꞌ lka yu kiꞌyu re a? ―ndukwin neꞌ ꞌin taꞌa neꞌ.
23585	MAT 12:27	¿Ta chañi nchkwiꞌ wan sikwa, xa nu nchkwiꞌ wan chaꞌ chabiyaꞌ ꞌin Beelzebú ndloǔn ꞌin kwiꞌin kuxi a? Ja ñi nchkwiꞌ wan siyaꞌ ti, chaꞌ loꞌo neꞌ nu ngiꞌni xaꞌan chaꞌ ꞌwan, ndlo neꞌ ꞌin kwiꞌin kuxi chabiyaꞌ ꞌin Ndiose, ndukwin neꞌ. Chunꞌ nu ngiꞌni neꞌ kanꞌ ngwañaꞌan ka biyaꞌ tiꞌ wan sikwa, si chañi chaꞌ nchkwiꞌ wan, si chaꞌ kwiñi ti nchkwiꞌ wan.
23586	MAT 12:28	Chabiyaꞌ ꞌin Tyiꞌi Ndiose ndloǔn ꞌin kwiꞌin kuxi, kanꞌ chaꞌ ka ka biyaꞌ tiꞌ wan chaꞌ wa mdyisnan chaꞌ lka Ndiose ndloo niꞌ kasiya ꞌin nten.
23589	MAT 12:31	’Kanꞌ chaꞌ katsaǎnꞌ ꞌwan ni, chaꞌ ka kuꞌni Ndiose chaꞌ tlyu tiꞌ ꞌin nten nchga kiꞌya nu ndukwi neꞌ, ni siya kuxi ꞌa nchkwiꞌ neꞌ ꞌin Ndiose; siyaꞌ ti bra nu nchkwiꞌ neꞌ chaꞌ kuxi ꞌin tñan nu ngiꞌni Tyiꞌi Ndiose, kanꞌ ja kuꞌni ꞌa Ndiose chaꞌ tlyu tiꞌ ꞌin neꞌ kanꞌ bra kanꞌ.
23590	MAT 12:32	Kuꞌni Ndiose chaꞌ tlyu tiꞌ ꞌin nten nu nchkwiꞌ chaꞌ kuxi ꞌñaǎn nu wa msuꞌwa Ndiose ꞌñaǎn ndijyaǎn chaꞌ kaǎn nten; siyaꞌ ti bra nu chkwiꞌ neꞌ chaꞌ kuxi ꞌin tñan nu ngiꞌni Tyiꞌi Ndiose, kanꞌ ja kuꞌni Ndiose chaꞌ tlyu tiꞌ ꞌin neꞌ kanꞌ nchga tsan nu tyiꞌin neꞌ lo chalyuu, nchga bra nde loo la bra kanꞌ.
23600	MAT 12:42	Loꞌo ayman reina nu ngwa ndloo la ꞌin neꞌ nde Sur, tyituun nu kunaꞌan kanꞌ tloo Ndiose tsan nu kuꞌni biyaꞌ Ni ꞌin nten chalyuu. Xtya nu kunaꞌan kanꞌ kiꞌya ꞌwan nu ndiꞌin wan lo chalyuu ni bra kanꞌ. Chkwiꞌ neꞌ kula kanꞌ sa ñaꞌan ngwa bra nu yaa seꞌen mdiꞌin ayman ree Salomón. Tijyuꞌ ꞌa kichen tyi reina kanꞌ; wa ynan neꞌ kula chaꞌ tiya ꞌa Salomón kanꞌ, chaꞌ suꞌwe ꞌa chaꞌ tiya nu nchkwiꞌ yu. Kanꞌ chaꞌ yaa neꞌ kula kanꞌ seꞌen mdiꞌin ree chaꞌ kunan ni sa ñaꞌan chaꞌ tiya nu nsuꞌwi ꞌin yu kula kanꞌ. Loꞌo chinꞌ la chaꞌ ngwaꞌu ayman Salomón ke chaꞌ nu nduꞌuǔn ꞌwan ni; tnun la chaꞌ ꞌin Ndiose lka nu nduꞌuǔn ꞌwan ni, loꞌo ja nnan wan siyaꞌ ti.
23602	MAT 12:44	bra kanꞌ chkwiꞌ kwiꞌin kuxi kanꞌ: “Tyaꞌaǎn xiyaꞌ seꞌen mdiꞌiǐn ti kulo.” Ngwañaꞌan xkeꞌ tiꞌ kwiꞌin kuxi kanꞌ. Bra nu kala kwiꞌin kuxi kanꞌ seꞌen ndiꞌin neꞌ kanꞌ, bra ti ñaꞌan kwiꞌin chaꞌ ti ndiꞌin laja ti kasiya ꞌin nten seꞌen mdiꞌin nu ngwa xkanꞌ; ja ya chkaa nten kanꞌ.
23604	MAT 12:46	Ti nchkwiꞌ la Jesús loꞌo nten, loꞌo mdiyan jyaꞌan loꞌo taꞌa Jesús, mduun neꞌ chunꞌ naꞌan seꞌen ndiꞌin yu chaꞌ nchka tiꞌ neꞌ chkwiꞌ neꞌ loꞌo yu.
23606	MAT 12:48	Mxkwen Jesús ꞌin yu kiꞌyu kanꞌ bra kanꞌ: ―¿Ti ka nu chañi lka jyaꞌaǎn a? ―ndukwin Jesús ꞌin neꞌ―. ¿Ti ka nu chañi lka taꞌaǎn a?
23608	MAT 12:50	Taꞌaǎn lka nchga nten nu ngiꞌni sa ñaꞌan nu nchka tiꞌ Stiǐn Ndiose nu ndiꞌin niꞌ kwan; nten kanꞌ lka sa ñaꞌan lka jyaꞌaǎn, sa ñaꞌan lka taꞌaǎn, ni siya kiꞌyu neꞌ, ni siya kunaꞌan neꞌ.
23609	MAT 13:1	Ti kwiꞌ tsan kanꞌ mdoꞌo Jesús naꞌan kanꞌ, ndyaa yu tuꞌwa tiyuꞌ, ndukwa yu chinꞌ nde kwa.
23636	MAT 13:28	Kanꞌ mxkwen xꞌnan jyan ꞌin msu kanꞌ bra kanꞌ: “Ti kwiꞌ nu nka kontra ꞌñaǎn yꞌni ñuꞌun ꞌin kala kwa ꞌñaǎn sikwa” ndukwin xꞌnan jyan ꞌin neꞌ. “¿Ta nchka tiiꞌ chaꞌ tsaa ba xkwaan ba kixinꞌ kwa a?, yu kula” ndukwin msu ꞌin xꞌnan jyan bra kanꞌ.
23647	MAT 13:39	chaꞌ ti kwiꞌ kuneꞌ xaꞌan lka nu nxuun loꞌoǔn, loꞌo kanꞌ lka nu msnen mta kixinꞌ kanꞌ lo jyan ꞌñaǎn. Tsan nu tyisnan siꞌyu neꞌ jyan ni, kanꞌ lka tsan nu tlyu ꞌa bra nu tsaa tii chalyuu; loꞌo nten nu siꞌyu kixinꞌ lo jyan kanꞌ ni, kanꞌ lka angajle ꞌin Ndiose.
23649	MAT 13:41	Tsan kanꞌ, naꞌ nu wa ndijyaǎn chaꞌ kaǎn nten, suꞌwaǎn ꞌin angajle ꞌñaǎn chaꞌ xoꞌ tiꞌin ꞌin nchga nten nu ngwaꞌu ꞌin taꞌa nten chaꞌ kuꞌni neꞌ chaꞌ kuxi; tyoꞌ tiꞌin nchga nten nu kuxi ka tiye kanꞌ, chaꞌ ja ndiꞌin chabiyaꞌ kanun neꞌ kanꞌ seꞌen lka Stiǐn Ndiose ndloo.
23668	MAT 14:2	Kanꞌ chaꞌ ykwiꞌ yu kula kanꞌ loꞌo msu ꞌin yu: ―Ti kwiꞌ ayman Xuwa nu ndukwatya ꞌin neꞌ, ti kwiꞌ kanꞌ lka nu kiꞌyu kanꞌ ―ndukwin Herodes―. Wa ngujwi yu, loꞌo ndyuꞌu yu xiyaꞌ, nxkeꞌ tiǎnꞌ, kanꞌ chaꞌ nchka ꞌin yu kuꞌni yu chaꞌ tnun nu ngwañaꞌan.
23674	MAT 14:8	Tiꞌí ꞌa tiꞌ Herodías jyaꞌan nu kunaꞌan kuneꞌ ꞌin Xuwa, ngwa tiꞌ kujwi ꞌin Xuwa, kanꞌ chaꞌ ytsaꞌ ꞌin sñiꞌ ni ñaꞌan nan nu jñan ꞌin Herodes bra kanꞌ. ―Ke Xuwa nu ndukwatya ꞌin nten, nchka tiǎnꞌ ―ndukwin nu kunaꞌan kuneꞌ kanꞌ ꞌin Herodes bra kanꞌ―. Kan loꞌo neꞌ ꞌin ke yu ska niꞌ siꞌyuu ―ndukwin.
23681	MAT 14:15	Tyukwi tsan mdiꞌin neꞌ. Bra wa msiin ykwiꞌ neꞌ nu ngiꞌni xaꞌan chaꞌ ꞌin Jesús loꞌo yu: ―Niꞌ kixinꞌ ꞌa ndiꞌian re. Ja tukwin ndiꞌin kwiꞌ seꞌen ti nde ―ndukwin neꞌ ꞌin Jesús―. Kwiꞌ ngwañaꞌan msiin ꞌa ni. Suꞌwe la kuloo tñan ꞌin nten kaꞌan kwa chaꞌ tsaa neꞌ nchga kichen nu ndiꞌin lo yuu kwa, chaꞌ xiꞌi neꞌ nan ku neꞌ.
23690	MAT 14:24	Ti kwiꞌ ti bra kanꞌ tijyuꞌ ndaꞌan yka naꞌan kanꞌ lo tiyuꞌ. Keeꞌ ti ndyaꞌan yka naꞌan lo tyiꞌa siꞌya kwiꞌin, chaꞌ lye ꞌa nskwa kwiꞌin, lye ꞌa ngutsa tyiꞌa lo tiyuꞌ.