23214	MAT 1:1	Nde ndaꞌaǎn sa ñaꞌan nin nchga nten nu ngwa ayman ꞌin Jesucristo, chaꞌ nten taꞌa ayman David lka yu. Kwiꞌ ngwañaꞌan lka yu nten taꞌa ayman Abraham, ni siya sꞌni ꞌa mdiꞌin yu kula kanꞌ.
23231	MAT 1:18	Nde ndaꞌaǎn sa ñaꞌan ngwa bra nu ngula Jesucristo. Wa mskanꞌ chaꞌ ꞌin Liya kanꞌ, chaꞌ kaja kwilyoꞌo loꞌo Se nu lka sñiꞌ Jacob kanꞌ. Ja ya tyiꞌin Liya seꞌen ndiꞌin Se loꞌo mgii tiꞌ Liya kanꞌ, chaꞌ wa nsuꞌwi sñiꞌ; kanꞌ lka tñan nu wa yꞌni Tyiꞌi Ndiose ykwiꞌ, chaꞌ ngwa tnan Liya kanꞌ.
23244	MAT 2:6	Kichen xuwe ti lka Belén nu ndiya seꞌen ndlo Judea tñan, ndukwin Ndiose. Kichen tyi ska nten nu tnun ꞌa chaꞌ ka ꞌin, ka kichen kanꞌ, ni siya kichen xuwe ti lka ni, ndukwin Ni. Ka yu kiꞌyu kanꞌ ska nu tyuun loo la ti, loꞌo ñaꞌansiin yu ꞌin neꞌ Israel ꞌñaǎn. Ngwañaꞌan ndukwa chaꞌ lo kityi kanꞌ.
23246	MAT 2:8	Bra wa ytsaꞌ neꞌ chaꞌ kanꞌ ꞌin ree, bra kanꞌ ykwiꞌ ree loꞌo neꞌ chaꞌ tsaa neꞌ nde kichen Belén. ―Yaa lya wan ―ndukwin ree ꞌin neꞌ tiya kanꞌ―, yaa naꞌan wan nde ndukwa naꞌan tyi sti kuwiꞌ kanꞌ ―ndukwin―. Bra nu tyija naꞌan kanꞌ ꞌwan, bra kanꞌ tyaan wan seꞌen ndiꞌiǐn xiyaꞌ chaꞌ ka biyaꞌ tiǎnꞌ la nde yaꞌ ndiya kuwiꞌ kanꞌ. Loꞌoǔn tsaꞌaǎn kuꞌni tnuǔn ꞌin kuwiꞌ kanꞌ, lka tiyeěn.
23251	MAT 2:13	Bra nu wa mdoꞌo neꞌ tiya kanꞌ ndyaa neꞌ kichen tyi neꞌ, bra kanꞌ ykwiꞌ sla Se. Mdoꞌo tukwa ska angajle laja sla yu, ykwiꞌ loꞌo yu bra kanꞌ: ―Xaa tiiꞌ ―ndukwin angajle kanꞌ ꞌin Se―. Tyituun, xnaan lyaa ―ndukwin―, tsaa loꞌoo ꞌin jyaꞌan kuwiꞌ tijyuꞌ la lo yuu ꞌin Egipto. Tyiꞌin wan nde kwa sa ñaꞌan bra nu katsaǎnꞌ ꞌiin chaꞌ ka tyaan wan nde nasiyun re xiyaꞌ. Tlá ꞌa ree Herodes kanꞌ; wa kan ti yu kichen re chaꞌ kunaan yu ꞌin kuwiꞌ ꞌwan, chaꞌ kujwi yu ꞌin kuwiꞌ ꞌwan, nchka tiꞌ yu.
23253	MAT 2:15	Nganun neꞌ la kanꞌ sa ñaꞌan bra nu ngujwi Herodes, nu ree tlá kanꞌ. Loꞌo nde lka ti kwiꞌ chaꞌ nu wa ykwiꞌ ayman kula loꞌo nten chabiyaꞌ ꞌin Ndiose nu ngwa sꞌni: “Siꞌyaǎn ꞌin Sñiěnꞌ chaꞌ tyoꞌo lo yuu nu kwenta ꞌin Egipto, chaꞌ tyaan yu kichen tyi yu xiyaꞌ” ndukwin Ndiose nu nka Xꞌnaan. Kanꞌ chaꞌ ngwañaꞌan ngwa ꞌin neꞌ bra kanꞌ, chaꞌ ndyaa neꞌ nde Egipto.
23272	MAT 3:11	Loꞌoǔn ni, ndukwatyaǎn ꞌwan loꞌo tyiꞌa chku re, si chañi chaꞌ wa ngwa jyuꞌu tiꞌ wan ꞌin kiꞌya nu ndukwi wan; loꞌo wa kan ti xka nu tnun la chaꞌ nchka ꞌin ke naꞌ. Loꞌoǔn, kuꞌni tnuǔn ꞌin yu kanꞌ; suꞌwe ꞌa ka tiyeěn, ni siya xtiǐnꞌ tiǎn ti ndukwa snan yu kanꞌ. Loꞌo yu kanꞌ ni, ja tukwatya yu ꞌin nten loꞌo tyiꞌa ti; kuꞌni yu chaꞌ kanun Tyiꞌi Ndiose niꞌ kasiya ꞌin nten xa nu tukwatya yu ꞌin neꞌ. Kwiꞌ ngwañaꞌan, kuꞌni luwi yu kasiya ꞌin neꞌ loꞌo xaa ꞌin yu.
23275	MAT 3:14	Loꞌo ngwa tiꞌ Xuwa chaꞌ ja tukwatya yu ꞌin Jesús. ―Ja suꞌwe tukwatyaǎn ꞌiin. Suꞌwe la nuꞌwin tukwatyaa ꞌñaǎn ―ndukwin Xuwa ꞌin Jesús.
23276	MAT 3:15	Ykwiꞌ Jesús loꞌo yu bra kanꞌ: ―Suꞌwe tukwatyaa ꞌñaǎn ni ―ndukwin Jesús ꞌin Xuwa―, chaꞌ ngwañaꞌan suꞌwe kuꞌnian nchga tñan nu nchka tiꞌ Ndiose chaꞌ kuꞌnian. Bra nu ynan Xuwa chaꞌ nu ykwiꞌ Jesús loꞌo yu, mdukwatya yu ꞌin Jesús bra kanꞌ.
23278	MAT 3:17	Ynen ykwiꞌ Ndiose nde seꞌen ndiꞌin Ni nde niꞌ kwan bra kanꞌ. Nde ñaꞌan ndukwin Ni: ―Nu nde lka Sñiěnꞌ ―ndukwin Ni―. Ndiya ꞌa tiǎnꞌ ꞌin yu, chaꞌ suꞌwe ꞌa nsuꞌwi tiyeěn ñaꞌaǎn ꞌin yu.
23287	MAT 4:9	Ykwiꞌ biyaꞌ kuneꞌ xaꞌan kanꞌ loꞌo Jesús xiyaꞌ bra kanꞌ: ―Taǎn chabiyaꞌ kaa ndloo la ꞌin nchga chalyuu nu ñaꞌaan nde kwa ―ndukwin kuneꞌ xaꞌan ꞌin Jesús―, ska ti si tyuun xtyiinꞌ tloǔn, si kuꞌnii tnun ꞌñaǎn, kaa ndloo la bra kanꞌ.
23297	MAT 4:19	Loꞌo bra kanꞌ ykwiꞌ Jesús loꞌo taꞌa tyukwaa yu kiꞌyu kanꞌ: ―Tsaa wan loꞌoǔn ni ―ndukwin Jesús ꞌin neꞌ kanꞌ―. Sa ñaꞌan mjwi kula ꞌwan xa nu mdaꞌan wan kuta kula, ngwañaꞌan kaja xka tñan ꞌwan ni chabiyaꞌ ꞌñaǎn; kwaꞌuǔn ꞌwan sa ñaꞌan nu tsaa naan wan ꞌin nten chalyuu re nu ja ya kunan chaꞌ suꞌwe, chaꞌ ka neꞌ nten ꞌñaǎn.
23314	MAT 5:11	’Kwiꞌ ngwañaꞌan, ka suꞌwe nka tiye wan ni siya xtyi lyoꞌo neꞌ ꞌwan chunꞌ ndyaa ñaꞌan tiꞌ wan ꞌñaǎn, ni siya kuꞌni liyeꞌ tiꞌ neꞌ ꞌwan, ni siya kwiñi lyoꞌo neꞌ ꞌwan, ni siya chkwiꞌ ꞌa neꞌ kwentu ꞌwan siꞌya chaꞌ ꞌñaǎn.
23320	MAT 5:17	’Ja tyaꞌan chaꞌ tiye wan chaꞌ ndijyaǎn lo chalyuu re chaꞌ kuꞌni tyiǐn chaꞌ kula ꞌñaan; ni siya nchga chaꞌ nu ykwiꞌ Ndiose loꞌo ayman Moisés, ni siya nchga chaꞌ nu ngwaꞌan ayman nu ykwiꞌ loꞌo nten chaꞌ ꞌin Ndiose nu ngwa sꞌni, ja kuꞌni tyiǐn chaꞌ kanꞌ. Wa ndijyaǎn chaꞌ nu kwaꞌuǔn ñi ꞌin nten sa ñaꞌan lka nchga chaꞌ nu ndukwa lo kityi kula kanꞌ.
23406	MAT 7:21	’Nsuꞌwi ꞌa nten nu nchkwiꞌ loꞌoǔn: “Xꞌnaǎn, Xꞌnaǎn” ndukwin neꞌ ꞌñaǎn; siꞌi nchga neꞌ kanꞌ nu sten seꞌen lka Ndiose ndloo la. Nten nu kunan chaꞌ nu nchkwiꞌ Stiǐn nu ndiꞌin nde niꞌ kwan, sa kanꞌ ti nten lka nu sten seꞌen nu lka Ndiose ndloo la.
23407	MAT 7:22	Bra nu tiya bra chaꞌ kuꞌni biyaꞌ Ni ꞌin nchga nten chalyuu, bra kanꞌ tyoꞌo tukwa kaꞌan nten nu chkwiꞌ loꞌoǔn: “Xꞌnaǎn, Xꞌnaǎn” nchkwin neꞌ ꞌñaǎn, “loꞌo ba re, wa ykwiꞌ ba loꞌo nten chabiyaꞌ ꞌiin. Chabiyaꞌ ꞌiin wa ngulo ba ꞌin kwiꞌin kuxi nu msñi ꞌin nten, loꞌo wa yꞌni ba xka la chaꞌ tnun chabiyaꞌ ꞌiin” nchkwin neꞌ kanꞌ ꞌñaǎn.
23416	MAT 8:2	Loꞌo bra kanꞌ mdoꞌo tukwa ska yu tiꞌí seꞌen ndiꞌin Jesús. Mduun xtyinꞌ yu seꞌen ndiꞌin Jesús, chaꞌ nchka tiꞌ yu jñan yu ꞌin Jesús chaꞌ kuꞌni joꞌó ꞌin yu, chaꞌ nu msñi kicha mtsuꞌ kunaꞌ yu kanꞌ. ―Xꞌnaǎn ―ndukwin yu tiꞌí kanꞌ ꞌin Jesús―, kuꞌnii joꞌó ꞌñaǎn. Jlyo tiǎnꞌ chaꞌ nchka ꞌiin kuꞌnii chaꞌ ka luwi kunaǎnꞌ.
23420	MAT 8:6	―Xꞌnaǎn ―ndukwin capitán kanꞌ ꞌin Jesús―, tiꞌí ꞌa msu ꞌñaǎn. Nan nskwa ti yu naꞌan tyiǐn chaꞌ nchkunꞌ ñaꞌaan tyukwin nsuꞌwi ꞌin yu, tiꞌí ꞌa yu kwa ni.
23421	MAT 8:7	Ykwiꞌ Jesús loꞌo yu bra kanꞌ: ―Tsaꞌaǎn. Kuꞌniǐn chaꞌ chkaa yu ―ndukwin Jesús ꞌin yu capitán kanꞌ.
23422	MAT 8:8	Bra ti mxkwen capitán ꞌin Jesús bra kanꞌ: ―Xꞌnaǎn ―ndukwin capitán ꞌin Jesús―, ja suꞌwe tsaa nde naꞌan tyiǐn, chaꞌ siꞌi nten suꞌwe lkaǎn. Sa kanꞌ ti chaꞌ nchka tiǎnꞌ, chaꞌ kuloo tñan chaꞌ katin kicha ꞌin yu; jlyo tiǎnꞌ chaꞌ chkaa msu ꞌñaǎn bra kanꞌ, ni siya tijyuꞌ ti tyuun chkwiiꞌ.
23423	MAT 8:9	Xꞌnan sndaru lkaǎn, naꞌ lkaǎn ndloo ꞌin ska siyentu sndaru; kwiꞌ ngwañaꞌan, ndiya nu lka ndloo la ꞌñaǎn. Si kuloǔn tñan re ꞌin ska sndaru ꞌñaǎn: “Yaa lyaa”, bra ti tsaa yu, chaꞌ nchka tiǎnꞌ chaꞌ tsaa yu. Ngwañaꞌan si chkwiǐnꞌ loꞌo xka yu: “Kaan nde re”, bra ti kan yu seꞌen ndiꞌiǐn bra kanꞌ. Ngwañaꞌan si kuloǔn tñan ꞌin msu ꞌñaǎn: “Kuꞌnii tñan re ꞌñaǎn”, chkwiǐnꞌ loꞌo yu, bra ti kuꞌni yu tñan kanꞌ ꞌñaǎn ―ndukwin capitán ꞌin Jesús―. Kanꞌ chaꞌ ni, jlyo tiǎnꞌ chaꞌ ka ꞌiin kuloo tñan chaꞌ katin kicha kanꞌ ꞌin msu kanꞌ ꞌñaǎn.
23424	MAT 8:10	Nduwe ꞌa tiꞌ Jesús bra nu ynan chaꞌ nu ykwiꞌ capitán kanꞌ. Bra kanꞌ ykwiꞌ Jesús loꞌo nchga nten nu ndaꞌan ñaꞌan ꞌin: ―Chañi ꞌa chaꞌ nchkwiǐnꞌ loꞌo wan ni ―ndukwin Jesús ꞌin neꞌ―. Ja ya ñaꞌaǎn ska nten nu suꞌwe la ndyaa ñaꞌan tiꞌ ꞌin Ndiose, sa ñaꞌan nu ndyaa ñaꞌan tiꞌ capitán re; ñaꞌaan nasiyun Israel re, ja nsuꞌwi nten nu ndyaa ñaꞌan tiꞌ ꞌin Ndiose ngwañaꞌan.
23427	MAT 8:13	Xiyaꞌ ykwiꞌ Jesús loꞌo capitán bra kanꞌ: ―Yaa lyaa naꞌan tyii sikwa ―ndukwin Jesús―. Wa ndyaa ñaꞌan tiiꞌ ꞌñaǎn, kanꞌ chaꞌ nchkaa yu ni; ngwa tiin kicha kanꞌ ꞌin yu ―ndukwin Jesús ꞌin capitán. Ti kwiꞌ bra kanꞌ nchkaa msu kanꞌ.
23433	MAT 8:19	La wa tsaa ti neꞌ, bra kanꞌ mdiyan ska mstru nu nduꞌu chaꞌ joꞌo chaꞌ chkwiꞌ loꞌo Jesús: ―Mstru ―ndukwin mstru kanꞌ ꞌin Jesús―, loꞌoǔn nchka tiǎnꞌ tyaꞌaǎn loꞌoo nchga seꞌen tsaa.
23434	MAT 8:20	Mxkwen Jesús ꞌin mstru kanꞌ bra kanꞌ: ―Nu lka kutaꞌ ni, niꞌ tukee ꞌin iꞌ xuꞌwi iꞌ; kwiꞌ ngwañaꞌan kiñi xuwe, ndiya seꞌen xkwa iꞌ. Loꞌo naꞌ ni, wa msuꞌwa Ndiose ꞌñaǎn ndijyaǎn lo chalyuu re chaꞌ kaǎn nten, loꞌo ja ndiya seꞌen kajaǎnꞌ, ja ndiya seꞌen tyukwaǎn xitñaǎnꞌ.
23435	MAT 8:21	Loꞌo kanꞌ ykwiꞌ xka yu kiꞌyu nu mdaꞌan loꞌo Jesús: ―Yu kula ―ndukwin yu ꞌin Jesús―, taa chinꞌ chabiyaꞌ ꞌñaǎn chaꞌ nu tyaꞌaǎn tuꞌwa naꞌan tyiǐn, tyaꞌaǎn chaꞌ kuꞌniǐn kwentaǎn ꞌin stiǐn sa ñaꞌan yaꞌ kaja stiǐn, chaꞌ tsaa ytsiǐnꞌ ꞌin stiǐn kulo ndukwa. Tsaꞌaǎn loꞌoo bra kanꞌ.
23436	MAT 8:22	Kanꞌ mxkwen Jesús ꞌin yu: ―Suꞌwe la kaan ñaꞌaan ꞌñaǎn bra ti ―ndukwin Jesús ꞌin yu―. Ti ndiya chinꞌ xka la nten taꞌa wan nu ka kutsiꞌ ꞌin nten ꞌiin nu wa ngujwi.
23454	MAT 9:6	Ndiꞌin chaꞌ ka biyaꞌ tiꞌ wan chaꞌ nda Ndiose chabiyaꞌ ꞌñaǎn chaꞌ kuꞌniǐn chaꞌ tlyu tiꞌ ꞌin kiꞌya nu ndukwi nten chalyuu, chaꞌ wa msuꞌwa Ndiose ꞌñaǎn ndijyaǎn chaꞌ kaǎn nten. Ka biyaꞌ tiꞌ wan bra nu ñaꞌan wan chaꞌ chkaa yu tiꞌí re. Bra kanꞌ xiyaꞌ ykwiꞌ Jesús loꞌo yu tiꞌí kanꞌ: ―Tyituun ―ndukwin Jesús ꞌin yu―, chkwaan katan ꞌiin, chaꞌ tyaa loꞌoo ꞌin ran nde naꞌan tyii.
23457	MAT 9:9	Mdoꞌo Jesús ndyaa, loꞌo wa tyijin ti yu tuꞌwa naꞌan seꞌen ndukwa Mateo nu ndlo tñi ꞌin neꞌ chaꞌ ꞌin neꞌ xka laꞌa tsuꞌ. Ykwiꞌ Jesús loꞌo Mateo kanꞌ bra kanꞌ: ―Tyoꞌoo ñaꞌaan ꞌñaǎn ―ndukwin Jesús ꞌin yu. Bra ti mdyituun Mateo, ngulaa tiꞌin yu tñan ꞌin yu, ndyaa ñaꞌan yu ꞌin Jesús bra kanꞌ.
23461	MAT 9:13	Yaa lya wan kunan suꞌwe wan chaꞌ re nu ngwaꞌan ayman lo kityi sꞌni: “Nchka la tiǎnꞌ chaꞌ chka tꞌnan tiꞌ wan ꞌin taꞌa nten wan, ndukwin Ndiose. Kanꞌ nu suꞌwe la, ni siya ja ta wan kaꞌan ꞌa lomstan ꞌñaǎn; kwiꞌ ngwañaꞌan, ja ndiꞌin chaꞌ ta wan ꞌni skunꞌ wan chaꞌ ka lomstan ꞌñaǎn.” Ngwañaꞌan ndukwa chaꞌ lo kityi. Loꞌo naꞌ ni, ja ndijyaǎn lo chalyuu chaꞌ chkwiǐnꞌ loꞌo nten nu suꞌwe ꞌa ti ykwiꞌ ti, nxkeꞌ tiꞌ neꞌ; wa ndijyaǎn lo chalyuu chaꞌ chkwiǐnꞌ loꞌo nten nu jlyo tiꞌ chaꞌ ndiya chaꞌ kuxi tiye neꞌ, chaꞌ ka jyuꞌu tiꞌ neꞌ bra kanꞌ. Kulaa yaꞌ neꞌ chaꞌ kuxi kanꞌ bra kanꞌ.
23466	MAT 9:18	Bra nu ti nchkwiꞌ Jesús loꞌo neꞌ, kanꞌ mdiyan ska neꞌ judío nu lka ndloo la; mduun xtyinꞌ yu kula tloo Jesús, chaꞌ jñan ska chaꞌ tlyu tiꞌ ꞌin yu bra kanꞌ: ―Tka ngujwi ti ska nu kunaꞌan lyuꞌ ti, sñiěnꞌ ―ndukwin yu kula kanꞌ ꞌin Jesús―. ¿Ja tsaa chinꞌ seꞌen ndiꞌiǐn chaꞌ xtyaa yaaꞌ chunꞌ nu lyuꞌ ti kanꞌ a? ―ndukwin―. Jlyo tiǎnꞌ chaꞌ ka ꞌiin kuꞌnii chaꞌ tyuꞌu nu lyuꞌ ti kanꞌ xiyaꞌ.
23469	MAT 9:21	“Nu kalaǎnꞌ tiǎn steꞌ Jesús, bra kanꞌ chkaǎn.” Ngwañaꞌan mdaꞌan chaꞌ tiye neꞌ kula kanꞌ.
23470	MAT 9:22	Kanꞌ mxituun Jesús, naꞌan ꞌin nu kunaꞌan kanꞌ: ―Kuꞌnii xuꞌwee tiyee, sñiěnꞌ ―ndukwin Jesús―. Ndyaa ñaꞌan tiiꞌ ꞌñaǎn, kanꞌ chaꞌ nchkaa ni. Loꞌo bra ti nchkaa neꞌ kula kanꞌ bra kanꞌ.
23476	MAT 9:28	Bra wa mdiyan Jesús niꞌ ñaꞌan, loꞌo yu kwityiinꞌ kanꞌ mdiyan neꞌ seꞌen ndiꞌin yu. Ykwiꞌ Jesús loꞌo neꞌ bra kanꞌ: ―¿Ta ndyaa ñaꞌan tiꞌ wan chaꞌ ka ꞌñaǎn kuꞌniǐn chaꞌ chkaa wan a? ―ndukwin yu ꞌin neꞌ. ―Ndyaa ñaꞌan tiꞌ ba ꞌiin, yu kula ―ndukwin yu kwityiinꞌ kanꞌ ꞌin yu.
23477	MAT 9:29	Kanꞌ ylaꞌ Jesús kiloo taꞌa tyukwaa yu kwityiinꞌ kanꞌ. ―Chkaa wan sikwa. Ngwañaꞌan ka ꞌwan chaꞌ ndyaa ñaꞌan tiꞌ wan ꞌñaǎn ―ndukwin Jesús ꞌin yu kwityiinꞌ kanꞌ bra kanꞌ.
23485	MAT 9:37	Bra kanꞌ ykwiꞌ Jesús loꞌo neꞌ nu ngiꞌni xaꞌan chaꞌ ꞌin yu, ytsaꞌ yu ska chaꞌ ꞌin neꞌ chaꞌ ꞌin nten kaꞌan kanꞌ. Ykwiꞌ yu chaꞌ ja ya kunan suꞌwe nten kanꞌ chaꞌ ꞌin Ndiose, chaꞌ ñaꞌan tiꞌ ska jyan nu suꞌwe ꞌa ngutsi chaꞌ wa ndla ti kuꞌni neꞌ kwa ꞌin ran, ngwañaꞌan lka nten kanꞌ. ―Chañi chaꞌ nsuꞌwi ꞌa tñan re chaꞌ chkwianꞌ loꞌo nten chaꞌ sten neꞌ chaꞌ ꞌñaǎn ―ndukwin Jesús ꞌin neꞌ kanꞌ―. Loꞌo chinꞌ ti nten ndiya nu ka kuꞌni tñan re.
23488	MAT 10:2	Nde ndaꞌaǎn nin taꞌa tii tyukwa neꞌ nu ngulo suwi Jesús: kulo ngulo suwi yu ꞌin Simón, nu mstya Jesús xka nin chaꞌ ka naan yu Tyu, loꞌo Ndre taꞌa ngula Simón kanꞌ; kanꞌ ngulo suwi yu ꞌin Santiago, loꞌo Xuwa taꞌa ngula Santiago, nu lka sñiꞌ Zebedeo;
23494	MAT 10:8	Kuꞌni wan chaꞌ chkaa neꞌ tiꞌí, kuꞌni wan chaꞌ tyuꞌu neꞌ xiyaꞌ bra nu wa ngujwi neꞌ; kuꞌni wan joꞌó ꞌin neꞌ nu ngatsuꞌ kunaꞌ, chaꞌ ka luwi kunaꞌ neꞌ tiꞌí kanꞌ xiyaꞌ; kulo wan kwiꞌin kuxi nu nsuꞌwi ꞌin nten. Ja msñiǐn tñi chaꞌ ndaǎn chabiyaꞌ ꞌwan chaꞌ kuꞌni wan joꞌó ꞌin neꞌ tiꞌí, kanꞌ chaꞌ ja xñi wan tñi chaꞌ kuꞌni wan joꞌó ꞌin neꞌ kanꞌ.
23502	MAT 10:16	’Kunan suꞌwe wan chaꞌ nchkwiǐnꞌ: Suꞌwaǎn ꞌwan chaꞌ tsaa wan xka kichen ñaꞌan tiꞌ si lka wan slyaꞌ nu ndaꞌan laja nguoꞌo tlá; kanꞌ chaꞌ, chaꞌ tiya ti tiꞌ tyiꞌin wan laja nten, sa ñaꞌan ndaꞌan kunan nu tiya ꞌa tiꞌ. Suꞌwe ti tyiꞌin wan, ja kuꞌni tlá wan ꞌin nten siyaꞌ ti. Ka wan ñaꞌan tiꞌ kiñi cha kuun, chaꞌ msu ꞌa iꞌ, ja tlá iꞌ siyaꞌ ti.
23504	MAT 10:18	Ndiya nten nu tsaa loꞌo ꞌwan seꞌen ndiꞌin neꞌ nu lka ndloo la chaꞌ tiꞌí ti tiꞌ neꞌ ꞌwan, loꞌo tsaa loꞌo neꞌ ꞌwan tloo ykwiꞌ ree. Xa nu ta neꞌ nu tiꞌí ꞌwan chunꞌ ndyaa ñaꞌan tiꞌ wan ꞌñaǎn, kaja chinꞌ bra ꞌwan chaꞌ chkwiꞌ wan chinꞌ chaꞌ ꞌñaǎn loꞌo neꞌ kanꞌ, loꞌo neꞌ xka laꞌa tsuꞌ bra kanꞌ.
23508	MAT 10:22	Kwiꞌ ngwañaꞌan kuꞌni liyeꞌ tiꞌ nchga nten ꞌwan chunꞌ ndyaa ñaꞌan tiꞌ wan ꞌñaǎn. Nten nu talo chaꞌ tyijin nchga chaꞌ kuxi kanꞌ, suꞌwe ti tyoꞌo neꞌ kanꞌ, kaja chalyuu kwi nu ja tsaa tii ꞌa ꞌin neꞌ kanꞌ bra kanꞌ.
23509	MAT 10:23	Suꞌwe la xnan wan xka kichen xa nu lye ꞌa ngiꞌni liyeꞌ tiꞌ neꞌ ꞌwan. Chañi chaꞌ nchkwiǐnꞌ loꞌo wan ni: Ja ya chkwiꞌ wan chaꞌ ꞌñaǎn loꞌo neꞌ Israel nchga kichen tyi neꞌ bra nu kaǎn lo chalyuu xiyaꞌ, naꞌ nu wa msuꞌwa Ndiose ꞌñaǎn ndijyaǎn chaꞌ kaǎn nten.
23511	MAT 10:25	Ska ti biyaꞌ tyijin neꞌ kuneꞌ kanꞌ nu tiꞌí bra kanꞌ, sa ñaꞌan nu nchka ꞌin mstru ꞌin neꞌ; ska ti biyaꞌ ka tñan tukwi ꞌin msu kanꞌ bra kanꞌ, sa ñaꞌan nu nchka ꞌin xꞌnan neꞌ. Wa ykwiꞌ neꞌ chaꞌ lkaǎn Beelzebú, kwiꞌ nu lka xꞌnan kuneꞌ xaꞌan, kanꞌ chaꞌ ka biyaꞌ tiꞌ wan chaꞌ tiꞌí ꞌa chkwiꞌ neꞌ ꞌwan nu ndiꞌin chaꞌ ꞌwan loꞌoǔn, chaꞌ naꞌ lkaǎn Xꞌnan wan.
23518	MAT 10:32	’Loꞌo xka chaꞌ ni: Nchga nten nu ndiꞌin chaꞌ ꞌin loꞌoǔn, nu nchkwiꞌ chaꞌ ꞌñaǎn loꞌo nten, naꞌ chkwiǐnꞌ loꞌo Stiǐn Ndiose nu ndiꞌin nde niꞌ kwan chaꞌ taꞌa suꞌwe nsuꞌwiǐn lka nten kanꞌ.
23520	MAT 10:34	’Ja xkeꞌ tiꞌ wan chaꞌ tiin ti tyiꞌin nten chalyuu chaꞌ ꞌñaǎn, chaꞌ wa ndijyaǎn. Ja ka ngwañaꞌan. Lye la xuun taꞌa neꞌ chaꞌ ꞌñaǎn;
23521	MAT 10:35	xuun ska nten loꞌo sti yu chaꞌ ꞌñaǎn, xuun ska nu kunaꞌan loꞌo jyaꞌan chaꞌ ꞌñaǎn, xuun sñiꞌ xiin neꞌ loꞌo jyaꞌan laa neꞌ chaꞌ ꞌñaǎn.
23524	MAT 10:38	Ja ka chkwiꞌ nten chaꞌ naꞌ lkaǎn Xꞌnan neꞌ, bra nu ja nchka tiꞌ neꞌ kanꞌ tyaꞌan neꞌ loꞌoǔn tuwiin nu kwaꞌuǔn ꞌin neꞌ chaꞌ tsaa neꞌ. Ndiꞌin chaꞌ xñi neꞌ tuwiin kanꞌ, ni siya kujwi xka la nten ꞌin neꞌ kanꞌ chunꞌ msñi neꞌ chaꞌ ꞌñaǎn.
23525	MAT 10:39	Ja kaja chalyuu kwi nu ja tsaa tii ꞌa ꞌin neꞌ nu lye la nka tiye neꞌ ꞌin neꞌ ti ykwiꞌ ti neꞌ, kwiꞌ nu ja nda ꞌa bra chaꞌ kujwi nten ꞌin neꞌ chaꞌ ꞌñaǎn. Loꞌo kaja chalyuu nu ja tsaa tii ꞌa ꞌin neꞌ si kujwi nten ꞌin neꞌ chunꞌ msñi neꞌ chaꞌ ꞌñaǎn.
23526	MAT 10:40	’Xka chaꞌ ni: Xa nu ta nten seꞌen tyiꞌin wan naꞌan tyi neꞌ, suꞌwa lka chaꞌ kanꞌ sa ñaꞌan si wa nda neꞌ seꞌen tyiꞌiǐn naꞌan tyi neꞌ. Kwiꞌ ngwañaꞌan, xa nu ta neꞌ seꞌen tyiꞌiǐn loꞌo neꞌ, suꞌwa lka chaꞌ kanꞌ sa ñaꞌan si wa nda neꞌ seꞌen tyiꞌin Ndiose loꞌo neꞌ, chaꞌ ti kwiꞌ Ndiose lka nu wa msuꞌwa ꞌñaǎn ndijyaǎn nde re.
23528	MAT 10:42	Kwiꞌ ngwañaꞌan, bra nu ta neꞌ ska skaꞌ tyiꞌa koꞌo neꞌ kuneꞌ re chunꞌ ngiꞌni xaꞌan neꞌ chaꞌ ꞌñaǎn, chañi chaꞌ ta Ndiose ska chaꞌ suꞌwe ꞌin neꞌ kanꞌ nde loo la.
23534	MAT 11:6	Suꞌwe ꞌa ka tiye nten nu ti ndyaa ñaꞌan tiꞌ ꞌñaǎn, kwiꞌ nu ja kulaa yaꞌ ꞌñaǎn chunꞌ nchka jyuꞌu tiꞌ.
23538	MAT 11:10	Nde ndiya chaꞌ nu ngwaꞌan ayman kula sꞌni chaꞌ ꞌin tñan nu kuꞌni Xuwa: Kuloǔn tñan ꞌin ska msu ꞌñaǎn chaꞌ tsaa yu nde loo la ꞌiin, chaꞌ slaa yu tuwiin seꞌen tsaa, ndukwin Ndiose ꞌin Krixtu.
23539	MAT 11:11	Chañi chaꞌ nchkwiǐnꞌ loꞌo wan chaꞌ ꞌin Xuwa nu ndukwatya ꞌin nten: Ja ya kala ska nten chalyuu nu kuꞌni tñan nu tnun la, sa ñaꞌan lka tñan nu mjwi ꞌin Xuwa kanꞌ. Naꞌ wa ndijyaǎn chaꞌ kaǎn ndloo la niꞌ kasiya ꞌin nten; loꞌo ni, nchga nten nu sten chaꞌ ꞌñaǎn, tlyu la chaꞌ nsuꞌwi ꞌin neꞌ kanꞌ ke Xuwa, ni siya tiꞌi neꞌ, ni siya kuneꞌ neꞌ.
23547	MAT 11:19	Chunꞌ ndiꞌin la mdiyaǎn nu wa msuꞌwa Ndiose ꞌñaǎn chaꞌ kaǎn nten. Nchkuǔn nchga lo nan loꞌo wan, ndiꞌyoǔn nchga lo nan loꞌo wan, loꞌo nchkwiꞌ wan chaꞌ ꞌñaǎn: “¡Ñaꞌan wan sa ñaꞌan ngiꞌni yu kwa! Nchku ꞌa yu kwa, loꞌo kuꞌwi ꞌa yu” ndukwin wan ꞌin taꞌa wan. “Ja suꞌwe yu kwa chaꞌ taꞌa suꞌwe yu loꞌo neꞌ nu ndlo kaꞌan tñi chaꞌ ꞌin neꞌ xka laꞌa tsuꞌ. Loꞌo xka la nten kuxi lka taꞌa suꞌwe nsuꞌwi yu” ndukwin wan ꞌñaǎn. Kwiꞌ nchkwiꞌ wan chaꞌ ja suꞌwe chaꞌ nu nchkwiǐnꞌ, nxkeꞌ tiꞌ wan. Suꞌwe sikwa, ka biyaꞌ tiꞌ wan nde loo la chaꞌ nu ñi ꞌa nchkwiꞌ nten chaꞌ ndaꞌaǎn chabiyaꞌ ꞌin Ndiose.
23550	MAT 11:22	Ñi katsaǎnꞌ ꞌwan, chaꞌ ka suꞌwe la chaꞌ ꞌin ayman neꞌ Tiro loꞌo ayman neꞌ Sidón, loꞌo lye la kaja nu tiꞌí ꞌwan bra nu tiya tsan tnun chaꞌ kuꞌni biyaꞌ Ndiose ꞌin nten chalyuu bra kanꞌ.
23551	MAT 11:23	Loꞌo ꞌwan, neꞌ Capernaum ni, ¿ta suꞌwe la kichen tyi wan, nxkeꞌ tiꞌ wan a? ¿Ta lka kichen tyi wan ndloo la ꞌin xka la kichen, nxkeꞌ tiꞌ wan a? Nde loo la ñuꞌun siyaꞌ ti kichen tyi wan, loꞌo ykwiꞌ wan tyaa wan nde lo jwlyaa bra kanꞌ. Kaꞌan ꞌa chaꞌ tnun yꞌniǐn seꞌen ndiꞌin wan, loꞌo ja yaa ñaꞌan tiꞌ wan ꞌñaǎn siyaꞌ ti. Kwiꞌ ngwañaꞌan nu ngwa sꞌni, xaꞌan ꞌa ngwa neꞌ kichen Sodoma; loꞌo ja naꞌan ayman kanꞌ chaꞌ tnun sa ñaꞌan nu wa naꞌan wan, ꞌwan neꞌ Capernaum. Si wa naꞌan neꞌ chaꞌ kanꞌ, ja chan wa mjyuꞌu tiꞌ neꞌ ꞌin chaꞌ kuxi nu wa yꞌni neꞌ bra kanꞌ, wa ngulaa yaꞌ neꞌ chaꞌ kuxi kanꞌ; ja chan ti ndukwa kichen tyi neꞌ kanꞌ sa bra ni.
23552	MAT 11:24	Ñi katsaǎnꞌ ꞌwan, chaꞌ ka suꞌwe la chaꞌ ꞌin ayman neꞌ Sodoma kanꞌ, loꞌo lye la kaja nu tiꞌí ꞌwan tsan tlyu nu kuꞌni biyaꞌ Ndiose ꞌin nten chalyuu.
23555	MAT 11:27	Ti ngwaꞌu la Jesús ꞌin neꞌ bra kanꞌ: ―Nchga chabiyaꞌ ꞌin Stiǐn Ndiose nganun ꞌñaǎn. Ja tukwin jlyo tiꞌ sa ñaꞌan lka chaꞌ nu nsuꞌwi niꞌ kasiya ꞌñaǎn, chaꞌ naꞌ lkaǎn ska ti nu lka Sñiꞌ Ndiose; ska ti Stiǐn Ndiose jlyo tiꞌ Ni sa ñaꞌan lka chaꞌ nu nsuꞌwi niꞌ kasiya ꞌñaǎn. Kwiꞌ ngwañaꞌan, ja tukwin jlyo tiꞌ sa ñaꞌan chaꞌ nu nsuꞌwi niꞌ kasiya ꞌin Stiǐn; skaǎn tiǎn nu lkaǎn Sñiꞌ Ni jlyo tiǎnꞌ, loꞌo kwaꞌuǔn chaꞌ kanꞌ ꞌin nten nu kuloǔn suwiǐn ꞌin chaꞌ kuꞌni xaꞌan neꞌ chaꞌ ꞌñaǎn.