23240	MAT 2:2	―¿La nde yaꞌ ndiꞌin kuwiꞌ nu ngula nu ngwa xkanꞌ ti a? ―ndukwin neꞌ―. Ree ꞌwan neꞌ judío lka kuwiꞌ kanꞌ ―ndukwin neꞌ―. Wa naꞌan ba kwii kulasiin tlyu nu tka ndukwi ti niꞌ kwan chaꞌ ꞌin kuwiꞌ kanꞌ, kanꞌ chaꞌ mdiyan ba nde re chaꞌ kuꞌni tnun ba ꞌin kuwiꞌ.
23243	MAT 2:5	―Kala Ni nde kichen Belén nde lo yuu ꞌin Judea re ―ndukwin neꞌ ꞌin ree―. Nde ndiya chaꞌ nu ndukwa lo kityi ꞌin Ndiose:
23251	MAT 2:13	Bra nu wa mdoꞌo neꞌ tiya kanꞌ ndyaa neꞌ kichen tyi neꞌ, bra kanꞌ ykwiꞌ sla Se. Mdoꞌo tukwa ska angajle laja sla yu, ykwiꞌ loꞌo yu bra kanꞌ: ―Xaa tiiꞌ ―ndukwin angajle kanꞌ ꞌin Se―. Tyituun, xnaan lyaa ―ndukwin―, tsaa loꞌoo ꞌin jyaꞌan kuwiꞌ tijyuꞌ la lo yuu ꞌin Egipto. Tyiꞌin wan nde kwa sa ñaꞌan bra nu katsaǎnꞌ ꞌiin chaꞌ ka tyaan wan nde nasiyun re xiyaꞌ. Tlá ꞌa ree Herodes kanꞌ; wa kan ti yu kichen re chaꞌ kunaan yu ꞌin kuwiꞌ ꞌwan, chaꞌ kujwi yu ꞌin kuwiꞌ ꞌwan, nchka tiꞌ yu.
23263	MAT 3:2	―Ka jyuꞌu tiꞌ wan ―ndukwin Xuwa ꞌin neꞌ―, kulaa yaꞌ wan chaꞌ kuxi nu ngiꞌni wan ―ndukwin yu―. Wa tyisnan ti chaꞌ ka Ndiose ndloo la niꞌ kasiya ꞌin nten chalyuu.
23268	MAT 3:7	Ngwa ska tsan naꞌan Xuwa ꞌin tyun neꞌ fariseo loꞌo neꞌ saduceo bra kanꞌ; kti ꞌa ngiꞌni neꞌ kanꞌ loꞌo Ndiose, nxkeꞌ tiꞌ neꞌ, lye ꞌa ngiꞌni siyeꞌ neꞌ loꞌo taꞌa nten neꞌ. Loꞌo chinꞌ neꞌ kanꞌ mdiyan neꞌ chaꞌ tukwatya Xuwa ꞌin neꞌ, loꞌo ja ndiya tiꞌ Xuwa chaꞌ ngwañaꞌan ngiꞌni neꞌ kanꞌ. ―Sa ñaꞌan lka kunan tlá, kwiꞌ ngwañaꞌan lka wan ―ndukwin Xuwa ꞌin neꞌ kanꞌ―. ¿Ta wa mxitsen neꞌ ꞌwan sikwa a? ¿Ti ka nu ndukwin ra ꞌwan chaꞌ lyaa wan ꞌin nu tiꞌí nu ndijyan xa nu tyii chalyuu a? ―ndukwin yu―.
23278	MAT 3:17	Ynen ykwiꞌ Ndiose nde seꞌen ndiꞌin Ni nde niꞌ kwan bra kanꞌ. Nde ñaꞌan ndukwin Ni: ―Nu nde lka Sñiěnꞌ ―ndukwin Ni―. Ndiya ꞌa tiǎnꞌ ꞌin yu, chaꞌ suꞌwe ꞌa nsuꞌwi tiyeěn ñaꞌaǎn ꞌin yu.
23282	MAT 4:4	Mxkwen Jesús ꞌin kuneꞌ xaꞌan bra kanꞌ: ―Ndukwa ska chaꞌ lo kityi ꞌin Ndiose ―ndukwin Jesús ꞌin yu―. Nde ñaꞌan nchkwiꞌ chaꞌ kanꞌ: “Siꞌi nan kuꞌu nten chalyuu chaꞌ nchku neꞌ tyaja ti; xa nu kunan neꞌ nchga chaꞌ nu nchkwiꞌ Ndiose, kanꞌ chañi chaꞌ tyiꞌin suꞌwe neꞌ.” Ngwañaꞌan nchkwiꞌ chaꞌ nu ndukwa lo kityi.
23284	MAT 4:6	―¿Ta chañi chaꞌ nuꞌwin lkaa ska ti nu lka Sñiꞌ Ndiose a? ―ndukwin kuneꞌ xaꞌan ꞌin Jesús―. Suꞌwe si xtyuu loo lo yuu sikwa, chaꞌ ndukwa ska chaꞌ lo kityi ꞌin Ndiose nu nchkwiꞌ: Kulo Ndiose tñan ꞌin angajle ꞌin Ni chaꞌ ñaꞌansiin ꞌiin, ndukwin kityi. Kwiꞌ ngwañaꞌan ndukwa xka chaꞌ: Loꞌo yaꞌ ti angajle ꞌin Ni xituun ꞌiin, chaꞌ ja ka tiꞌí kiyaaꞌ seꞌen tyukwa kee kiyaaꞌ. Ngwañaꞌan ndukwa chaꞌ lo kityi ―ndukwin kuneꞌ xaꞌan.
23288	MAT 4:10	Loꞌo mxkwen Jesús ꞌin kuneꞌ xaꞌan bra kanꞌ: ―Tyoꞌo tsuuꞌ seꞌen ndiꞌiǐn, Satanás ―ndukwin Jesús―. Yaa lyaa, chunꞌ ndukwa ska chaꞌ lo kityi ꞌin Ndiose nu nchkwiꞌ: “Ska ti Ndiose nu lka Xꞌnan wan kuꞌni tnun wan ꞌin Ni, siyaꞌ ti kunan wan chaꞌ nu nchkwiꞌ Ndiose xa nu ndiꞌin wan lo chalyuu” ndukwin kityi.
23297	MAT 4:19	Loꞌo bra kanꞌ ykwiꞌ Jesús loꞌo taꞌa tyukwaa yu kiꞌyu kanꞌ: ―Tsaa wan loꞌoǔn ni ―ndukwin Jesús ꞌin neꞌ kanꞌ―. Sa ñaꞌan mjwi kula ꞌwan xa nu mdaꞌan wan kuta kula, ngwañaꞌan kaja xka tñan ꞌwan ni chabiyaꞌ ꞌñaǎn; kwaꞌuǔn ꞌwan sa ñaꞌan nu tsaa naan wan ꞌin nten chalyuu re nu ja ya kunan chaꞌ suꞌwe, chaꞌ ka neꞌ nten ꞌñaǎn.
23306	MAT 5:3	―Ka suꞌwe nka tiye nten si jlyo tiꞌ neꞌ chaꞌ ja ka ꞌin neꞌ kuꞌni neꞌ ska chaꞌ suꞌwe, si ja loꞌo Ndiose ―ndukwin Jesús―. Ka Ndiose ndloo la niꞌ kasiya ꞌin neꞌ kanꞌ bra kanꞌ.
23417	MAT 8:3	Kanꞌ mstya yaꞌ Jesús chunꞌ yu tiꞌí kanꞌ, mstya yaꞌ seꞌen mtsuꞌ kunaꞌ yu. ―Kuꞌniǐn joꞌó ꞌiin ―ndukwin Jesús ꞌin yu tiꞌí kanꞌ―. Kanun luwi kunaaꞌ ni ―ndukwin bra kanꞌ. Bra ti nchkaa yu tiꞌí kanꞌ, ngwa luwi kunaꞌ yu.
23423	MAT 8:9	Xꞌnan sndaru lkaǎn, naꞌ lkaǎn ndloo ꞌin ska siyentu sndaru; kwiꞌ ngwañaꞌan, ndiya nu lka ndloo la ꞌñaǎn. Si kuloǔn tñan re ꞌin ska sndaru ꞌñaǎn: “Yaa lyaa”, bra ti tsaa yu, chaꞌ nchka tiǎnꞌ chaꞌ tsaa yu. Ngwañaꞌan si chkwiǐnꞌ loꞌo xka yu: “Kaan nde re”, bra ti kan yu seꞌen ndiꞌiǐn bra kanꞌ. Ngwañaꞌan si kuloǔn tñan ꞌin msu ꞌñaǎn: “Kuꞌnii tñan re ꞌñaǎn”, chkwiǐnꞌ loꞌo yu, bra ti kuꞌni yu tñan kanꞌ ꞌñaǎn ―ndukwin capitán ꞌin Jesús―. Kanꞌ chaꞌ ni, jlyo tiǎnꞌ chaꞌ ka ꞌiin kuloo tñan chaꞌ katin kicha kanꞌ ꞌin msu kanꞌ ꞌñaǎn.
23424	MAT 8:10	Nduwe ꞌa tiꞌ Jesús bra nu ynan chaꞌ nu ykwiꞌ capitán kanꞌ. Bra kanꞌ ykwiꞌ Jesús loꞌo nchga nten nu ndaꞌan ñaꞌan ꞌin: ―Chañi ꞌa chaꞌ nchkwiǐnꞌ loꞌo wan ni ―ndukwin Jesús ꞌin neꞌ―. Ja ya ñaꞌaǎn ska nten nu suꞌwe la ndyaa ñaꞌan tiꞌ ꞌin Ndiose, sa ñaꞌan nu ndyaa ñaꞌan tiꞌ capitán re; ñaꞌaan nasiyun Israel re, ja nsuꞌwi nten nu ndyaa ñaꞌan tiꞌ ꞌin Ndiose ngwañaꞌan.
23427	MAT 8:13	Xiyaꞌ ykwiꞌ Jesús loꞌo capitán bra kanꞌ: ―Yaa lyaa naꞌan tyii sikwa ―ndukwin Jesús―. Wa ndyaa ñaꞌan tiiꞌ ꞌñaǎn, kanꞌ chaꞌ nchkaa yu ni; ngwa tiin kicha kanꞌ ꞌin yu ―ndukwin Jesús ꞌin capitán. Ti kwiꞌ bra kanꞌ nchkaa msu kanꞌ.
23436	MAT 8:22	Kanꞌ mxkwen Jesús ꞌin yu: ―Suꞌwe la kaan ñaꞌaan ꞌñaǎn bra ti ―ndukwin Jesús ꞌin yu―. Ti ndiya chinꞌ xka la nten taꞌa wan nu ka kutsiꞌ ꞌin nten ꞌiin nu wa ngujwi.
23440	MAT 8:26	Loꞌo mxkwen Jesús ꞌin neꞌ kanꞌ bra kanꞌ: ―¿Ni chaꞌ ngitsen ꞌa wan? ―ndukwin ꞌin neꞌ―. ¡Chinꞌ ꞌa ndyuꞌwi tiꞌ wan ꞌin Ndiose, chunꞌ ja ndyaa ñaꞌan tiꞌ wan ꞌin Ni chaꞌ ka kulaa Ni ꞌñaan! Kanꞌ mdyituun Jesús, ykwiꞌ loꞌo kwiꞌin loꞌo kulooꞌ chaꞌ ka tiin ran; bra ti ngwa tiin ran bra kanꞌ.
23441	MAT 8:27	Yuwe ꞌa tiꞌ neꞌ kanꞌ bra kanꞌ, chunꞌ ngwa tiin kulooꞌ loꞌo kwiꞌin siyaꞌ ti. ―¿Ti lka ra yu kula re? ―ndukwin neꞌ ꞌin taꞌa neꞌ―. Ynan kulooꞌ chaꞌ nu ykwiꞌ yu, kwiꞌ ngwañaꞌan ynan kwiꞌin chaꞌ nu ykwiꞌ yu kula re loꞌo ran.
23443	MAT 8:29	Loꞌo yꞌni kwiꞌin xaꞌan kanꞌ, chaꞌ kwen ꞌa nxiꞌya yu tiꞌí kanꞌ: ―Jesús, ¿ni chaꞌ ndaꞌaan seꞌen ndiꞌin ba? ―ndukwin yu tiꞌí kanꞌ―. Nuꞌwin lkaa ska ti nu lka Sñiꞌ Ndiose. ¿Ta taa nu tiꞌí ꞌwa, nchka tiiꞌ a? Ja ya tiya bra tiyan nu tiꞌí ꞌwa.
23445	MAT 8:31	Loꞌo yꞌni kwiꞌin xaꞌan kanꞌ, chaꞌ mjñan yu tiꞌí chabiyaꞌ ꞌin Jesús chaꞌ ꞌin kwiꞌin kanꞌ: ―Jlyo tiꞌ ba chaꞌ nchka tiiꞌ kuloo kwiꞌin nu nsuꞌwi ꞌwa, chaꞌ kuꞌni joꞌó ꞌwa ―ndukwin neꞌ kanꞌ ꞌin Jesús―. Kanꞌ chaꞌ taa chinꞌ chabiyaꞌ ꞌin kwiꞌin chaꞌ tsaa ran xuꞌwi ran ꞌin kuweꞌ nu ndaꞌan kwa.
23450	MAT 9:2	Bra nu ngala yu kichen kanꞌ, bra kanꞌ mdiyan loꞌo nten ꞌin ska nu tiꞌí nu nchkunꞌ ñaꞌaan tyukwin yu; ndijyan neꞌ seꞌen ndiꞌin Jesús chaꞌ kuꞌni yu joꞌó ꞌin yu tiꞌí kanꞌ. Nsu yu tiꞌí kanꞌ ska niꞌ katan. Jlyo tiꞌ Jesús chaꞌ ndyaa ñaꞌan tiꞌ neꞌ kanꞌ ꞌin, kanꞌ chaꞌ ykwiꞌ yu loꞌo yu tiꞌí kanꞌ: ―Chkaa suꞌwee, sñiěnꞌ ―ndukwin Jesús ꞌin yu tiꞌí―. Wa yꞌniǐn chaꞌ tlyu tiꞌ ꞌin kiꞌya nu ndukwii.
23452	MAT 9:4	Loꞌo mgii tiꞌ Jesús nchga loo chaꞌ nu ndaꞌan tiye neꞌ kanꞌ. ―¿Ni chaꞌ kuxi ꞌa ndaꞌan chaꞌ tiye wan loꞌoǔn ni? ―ndukwin Jesús ꞌin mstru kanꞌ―.
23453	MAT 9:5	Ja ndiya tiꞌ wan chaꞌ nu ykwiǐnꞌ loꞌo yu tiꞌí re: “Wa yꞌniǐn chaꞌ tlyu tiꞌ ꞌin kiꞌya nu ndukwii.” ¿Ta chkwiǐnꞌ loꞌo yu tiꞌí: “Tyituun, tyoꞌoo taꞌaan ni” suꞌwe la sikwa a? ―ndukwin Jesús―.
23460	MAT 9:12	Ynan Jesús chaꞌ nu nchkwiꞌ neꞌ kanꞌ loꞌo taꞌa nchku yu, kanꞌ chaꞌ ykwiꞌ yu loꞌo neꞌ fariseo bra kanꞌ: ―Nten nu ja tiꞌí ni, ja ndiꞌin chaꞌ ka joꞌó ꞌin ―ndukwin Jesús ꞌin neꞌ―. Nu tiꞌí ndiꞌin chaꞌ ka joꞌó ꞌin.
23463	MAT 9:15	Mxkwen Jesús ꞌin neꞌ kanꞌ bra kanꞌ: ―Bra nu kaja kwilyoꞌo nten, nchku neꞌ nu ndaꞌan loꞌo yu kiꞌyu; ja xiꞌin tiꞌ neꞌ tsan nu ndiꞌin neꞌ loꞌo nu kiꞌyu nu mjwi kwilyoꞌo kanꞌ ―ndukwin Jesús ꞌin neꞌ bra kanꞌ―. Bra nu tiya tsan chaꞌ tyaa loꞌo nten ꞌin yu kiꞌyu kanꞌ, kuꞌni kuꞌnan neꞌ nu taꞌa suꞌwe nsuꞌwi yu kiꞌyu kanꞌ, chaꞌ ka xiꞌin tiꞌ neꞌ bra kanꞌ. Kwiꞌ ngwañaꞌan, suꞌwe nka tiye taꞌa suꞌwe nsuꞌwiǐn ni, loꞌo ka xiꞌin tiꞌ neꞌ chunꞌ ndiꞌin la ―ndukwin Jesús.
23466	MAT 9:18	Bra nu ti nchkwiꞌ Jesús loꞌo neꞌ, kanꞌ mdiyan ska neꞌ judío nu lka ndloo la; mduun xtyinꞌ yu kula tloo Jesús, chaꞌ jñan ska chaꞌ tlyu tiꞌ ꞌin yu bra kanꞌ: ―Tka ngujwi ti ska nu kunaꞌan lyuꞌ ti, sñiěnꞌ ―ndukwin yu kula kanꞌ ꞌin Jesús―. ¿Ja tsaa chinꞌ seꞌen ndiꞌiǐn chaꞌ xtyaa yaaꞌ chunꞌ nu lyuꞌ ti kanꞌ a? ―ndukwin―. Jlyo tiǎnꞌ chaꞌ ka ꞌiin kuꞌnii chaꞌ tyuꞌu nu lyuꞌ ti kanꞌ xiyaꞌ.
23470	MAT 9:22	Kanꞌ mxituun Jesús, naꞌan ꞌin nu kunaꞌan kanꞌ: ―Kuꞌnii xuꞌwee tiyee, sñiěnꞌ ―ndukwin Jesús―. Ndyaa ñaꞌan tiiꞌ ꞌñaǎn, kanꞌ chaꞌ nchkaa ni. Loꞌo bra ti nchkaa neꞌ kula kanꞌ bra kanꞌ.
23481	MAT 9:33	Bra nu ngulo Jesús kwiꞌin kuxi ꞌin yu tiꞌí kanꞌ, ngwa ykwiꞌ yu tiꞌí bra kanꞌ, ni siya tsan ti kuꞌun yu. Yuwe ꞌa tiꞌ nchga nten nu mduun nde kwa bra kanꞌ. ―Ja ya ñaꞌaan ska chaꞌ tnun ngwañaꞌan ―ndukwin neꞌ ꞌin taꞌa neꞌ―. Ja nsuꞌwi nten tyukwi ñaꞌaan nasiyun Israel re nu ka kuꞌni joꞌó ngwañaꞌan ―ndukwin neꞌ.
23485	MAT 9:37	Bra kanꞌ ykwiꞌ Jesús loꞌo neꞌ nu ngiꞌni xaꞌan chaꞌ ꞌin yu, ytsaꞌ yu ska chaꞌ ꞌin neꞌ chaꞌ ꞌin nten kaꞌan kanꞌ. Ykwiꞌ yu chaꞌ ja ya kunan suꞌwe nten kanꞌ chaꞌ ꞌin Ndiose, chaꞌ ñaꞌan tiꞌ ska jyan nu suꞌwe ꞌa ngutsi chaꞌ wa ndla ti kuꞌni neꞌ kwa ꞌin ran, ngwañaꞌan lka nten kanꞌ. ―Chañi chaꞌ nsuꞌwi ꞌa tñan re chaꞌ chkwianꞌ loꞌo nten chaꞌ sten neꞌ chaꞌ ꞌñaǎn ―ndukwin Jesús ꞌin neꞌ kanꞌ―. Loꞌo chinꞌ ti nten ndiya nu ka kuꞌni tñan re.
23491	MAT 10:5	Ngulo Jesús tñan re ꞌin tii tyukwa neꞌ kanꞌ: ―Ja tsaa wan tuwiin nde xka laꞌa tsuꞌ seꞌen ndiꞌin nten nu ja ndiꞌin chaꞌ ꞌin loꞌo Ndiose siyaꞌ ti, loꞌo ja tsaa wan kichen tyi neꞌ Samaria ―ndukwin Jesús ꞌin neꞌ kanꞌ―.
23531	MAT 11:3	chaꞌ kunichaꞌ neꞌ kanꞌ chaꞌ re ꞌin Jesús chaꞌ ꞌin Xuwa: ―¿Ta chañi chaꞌ nuꞌwin lkaa ti kwiꞌ nu wa kan ti a? ―ndukwin neꞌ kanꞌ ꞌin Jesús bra kanꞌ―. ¿Ta kan la xka nu ka Krixtu ykwiꞌ a?
23532	MAT 11:4	Mxkwen Jesús ꞌin neꞌ kanꞌ bra kanꞌ: ―Yaa wan katsaꞌ wan ꞌin Xuwa nchga loo chaꞌ nu ynan wan seꞌen ndiꞌiǐn, nchga chaꞌ nu naꞌan wan seꞌen ndiꞌiǐn ―ndukwin Jesús ꞌin neꞌ―.
23535	MAT 11:7	Bra wa ndyaa neꞌ kanꞌ, mdyisnan Jesús ykwiꞌ yu chaꞌ ꞌin Xuwa kanꞌ loꞌo nten kaꞌan nu ndiꞌin loꞌo yu nde kwa: ―Bra nu yaa wan niꞌ kixinꞌ seꞌen mdiꞌin Xuwa, ¿ni sa ñaꞌan lka yu, mskeꞌ tiꞌ wan, xa wa naꞌan wan ꞌin yu nde kwa a? ―ndukwin Jesús ꞌin neꞌ bra kanꞌ―. ¿Ta mskeꞌ tiꞌ wan chaꞌ ngwa yu ñaꞌan tiꞌ ska yka kii nu mxkii tuun kwiꞌin ꞌin a? ¿Ta ngwañaꞌan mskeꞌ tiꞌ wan a?
23549	MAT 11:21	―¡Tꞌnan ꞌa wan neꞌ kichen Corazín! ―ndukwin Jesús―. ¡Tꞌnan ꞌa wan neꞌ kichen Betsaida! ―ndukwin―. Kaꞌan ꞌa chaꞌ tnun wa naꞌan wan, loꞌo ja mjyuꞌu tiꞌ wan siyaꞌ ti ꞌin chaꞌ kuxi nu ngiꞌni wan, ja ngulaa yaꞌ wan chaꞌ kanꞌ. Kwiꞌ ngwañaꞌan ti sꞌni, xaꞌan ꞌa neꞌ kichen Tiro loꞌo neꞌ kichen Sidón, neꞌ xka laꞌa tsuꞌ ngwa neꞌ kanꞌ. Loꞌo ja mjwi ñaꞌan ka jyuꞌu tiꞌ neꞌ kanꞌ ꞌin chaꞌ kuxi nu wa yꞌni neꞌ. Ja ngulaa yaꞌ neꞌ chaꞌ kuxi kanꞌ, chunꞌ ja ya ñaꞌan neꞌ kanꞌ chaꞌ tnun sa ñaꞌan nu naꞌan wan, ꞌwan neꞌ Israel; kanꞌ chaꞌ ja ngwa xiꞌin tiꞌ neꞌ kanꞌ, kanꞌ chaꞌ ja ykuꞌ neꞌ teꞌ ngata, ja msuꞌwa neꞌ jii ke neꞌ sa ñaꞌan nu ngiꞌni nten seꞌen nskwa ayman.
23553	MAT 11:25	Chunꞌ ndiꞌin la ykwiꞌ Jesús loꞌo Ndiose Sti yu: ―Kuꞌni tnuǔn ꞌiin, Stiǐn; nuꞌwin lkaa Xꞌnan ba, loꞌo nde niꞌ kwan, loꞌo lo chalyuu ―ndukwin Jesús ꞌin Ndiose―. Ngwa xuꞌwe ꞌiin chaꞌ wa yꞌnii chaꞌ ngwa biyaꞌ tiꞌ nten nu ja jlyo suꞌwe tiꞌ nu ngwa sꞌni la. Xka ta nten nu tiya la tiꞌ, loꞌo nten nu nchka ꞌa ꞌin, loꞌo nten nu jlyo ꞌa tiꞌ nchga chaꞌ ꞌiin, nxkeꞌ tiꞌ neꞌ, loꞌo neꞌ kanꞌ ja nchka biyaꞌ la tiꞌ neꞌ kanꞌ.
23560	MAT 12:2	Naꞌan neꞌ fariseo chaꞌ ngiꞌni neꞌ ngwañaꞌan, ykwiꞌ neꞌ fariseo kanꞌ loꞌo Jesús bra kanꞌ: ―¿Ja jlyo tiꞌ wan chaꞌ ja ndiya chabiyaꞌ kuꞌnian tñan ni, chaꞌ tsan nu nxitñaanꞌ lka a? ―ndukwin neꞌ fariseo ꞌin Jesús―. Neꞌ kwa nu ngiꞌni xaꞌan chaꞌ ꞌiin ni, ¿ni chaꞌ lka ngiꞌni neꞌ tñan kanꞌ ni sikwa?
23561	MAT 12:3	Mxkwen Jesús ꞌin neꞌ fariseo bra kanꞌ: ―¿Ja ya chkwiꞌ wan lo kityi ꞌin Ndiose seꞌen nu ndukwa chaꞌ sa ñaꞌan nu yꞌni ayman David sꞌni a? ―ndukwin Jesús ꞌin neꞌ―. Ngwa ska tsan ngiteꞌ ꞌa tiꞌ yu, loꞌo ngiteꞌ ꞌa tiꞌ nchga taꞌa ndaꞌan yu bra kanꞌ.
23563	MAT 12:5	Loꞌo ndiya xka chaꞌ nu ngwaꞌan ayman Moisés lo kityi, chaꞌ sti joꞌo ni, ja nxitñaꞌ neꞌ niꞌ lyaa tnun xa nu ndiya tsan nu nxitñaꞌ nten; nsuꞌwi tñan nu ngiꞌni sti joꞌo kanꞌ. Ti kwiꞌ ti chaꞌ, ja ndiꞌin kiꞌya ꞌin neꞌ kanꞌ chaꞌ ꞌin Ndiose, chaꞌ ngiꞌni neꞌ tñan kanꞌ―ndukwin Jesús ꞌin neꞌ fariseo kanꞌ―.
23569	MAT 12:11	Kanꞌ mxkwen yu ꞌin neꞌ: ―¿Ta ja tlyo wan ꞌin ska slyaꞌ ꞌwan xa wa mdiyuu iꞌ ska niꞌ tiyuu a? ―ndukwin Jesús ꞌin neꞌ―. Ja chan tlyo wan ꞌin iꞌ, ni siya tsan taꞌa lka bra kanꞌ.
23583	MAT 12:25	Mgii tiꞌ Jesús sa ñaꞌan chaꞌ kuxi ndaꞌan chaꞌ tiye neꞌ, kanꞌ chaꞌ ykwiꞌ yu loꞌo neꞌ kanꞌ bra kanꞌ: ―Si xuun ꞌa neꞌ nu lka ndloo la ska nasiyun, suꞌwe taꞌa nten nasiyun kanꞌ, tyii chaꞌ ꞌin neꞌ kanꞌ wa ñaꞌan ti bra kanꞌ ―ndukwin Jesús ꞌin neꞌ―. Kwiꞌ ngwañaꞌan, si lye ꞌa xuun taꞌa neꞌ ska kichen, tyii chaꞌ ꞌin neꞌ kanꞌ wa ñaꞌan ti; ni siya xuun taꞌa neꞌ nu ndiꞌin ska naꞌan ti, ti kwiꞌ ti chaꞌ ka, tyii chaꞌ ꞌin neꞌ kanꞌ loꞌo taꞌa neꞌ, tyaa neꞌ bra kanꞌ.
23597	MAT 12:39	Mxkwen Jesús ꞌin neꞌ bra kanꞌ: ―Xaꞌan ꞌa taꞌa wan, chaꞌ xkwiꞌ njñan wan ꞌñaǎn chaꞌ kuꞌniǐn ska chaꞌ tnun chaꞌ ñaꞌan kwiꞌya wan ꞌin ran; lka wan nten nu ja ndyaa ñaꞌan tiꞌ ꞌin Ndiose siyaꞌ ti ―ndukwin Jesús ꞌin neꞌ―. Ja ska chaꞌ tnun kuꞌniǐn ngwañaꞌan. Ndiꞌin chaꞌ tyaa yuꞌwi tiꞌ wan nan lka ngwa ꞌin ayman Jona nu ykwiꞌ chaꞌ ꞌin Ndiose loꞌo neꞌ Nínive nu ngwa sꞌni.
23605	MAT 12:47	Ytsaꞌ ska nten ꞌin Jesús bra kanꞌ: ―Jyaꞌaan loꞌo taꞌaa, nduun neꞌ chunꞌ naꞌan re ―ndukwin ꞌin Jesús―. Nchka tiꞌ neꞌ chkwiꞌ neꞌ loꞌoo.
23606	MAT 12:48	Mxkwen Jesús ꞌin yu kiꞌyu kanꞌ bra kanꞌ: ―¿Ti ka nu chañi lka jyaꞌaǎn a? ―ndukwin Jesús ꞌin neꞌ―. ¿Ti ka nu chañi lka taꞌaǎn a?
23607	MAT 12:49	Kanꞌ nguaꞌu yaꞌ yu ꞌin neꞌ nu ngiꞌni xaꞌan chaꞌ ꞌin yu bra kanꞌ: ―Neꞌ re ni, suꞌwa ndloo ꞌa neꞌ re ꞌñaǎn sa ñaꞌan ndloo ꞌa jyaꞌaǎn ꞌñaǎn, sa ñaꞌan ndloo ꞌa taꞌaǎn ꞌñaǎn ―ndukwin Jesús―.
23611	MAT 13:3	Kanꞌ nguaꞌu Jesús tyun chaꞌ tiya ꞌin neꞌ, chaꞌ kuꞌni xaꞌan la neꞌ chaꞌ ꞌin Ndiose. Nde ndiya chaꞌ nu ykwiꞌ yu: ―Ngwa ska tsan ndyaa ska nten kata mta trigu ―ndukwin Jesús―.
23632	MAT 13:24	Chunꞌ ndiꞌin la ngwaꞌu Jesús xka chaꞌ tiya ꞌin neꞌ: ―Chkwiǐnꞌ xka chaꞌ loꞌo wan, chaꞌ ka biyaꞌ tiꞌ wan sa ñaꞌan ka xa nu lka Ndiose ndloo niꞌ kasiya ꞌin nten ―ndukwin Jesús ꞌin neꞌ―. Sa ñaꞌan lka ska nten nu yta xkwiꞌ mta suꞌwe lo jyan trigu ꞌin yu, ngwañaꞌan lka Ndiose.
23639	MAT 13:31	Kwiꞌ ngwañaꞌan ngwaꞌu Jesús xka chaꞌ tiya, ñaꞌan tiꞌ ska nkwin ti: ―Xka chaꞌ chkwiǐnꞌ loꞌo wan, sa ñaꞌan ka xa nu lka Ndiose ndloo la niꞌ kasiya ꞌin nten ―ndukwin Jesús ꞌin neꞌ―. Sa ñaꞌan lka ska mta xuwe ꞌa nu yta ska nten niꞌ lyoꞌoo ꞌin yu, ngwañaꞌan ka chaꞌ kanꞌ.
23641	MAT 13:33	Kwiꞌ ngwañaꞌan ngwaꞌu Jesús xka chaꞌ tiya ꞌin neꞌ: ―Xka chaꞌ chkwiǐnꞌ loꞌo wan, sa ñaꞌan ka bra nu lka Ndiose ndloo la niꞌ kasiya ꞌin nten ―ndukwin Jesús ꞌin neꞌ―. Ñaꞌan tiꞌ ska nguluꞌ jyaꞌan skwan, nu xñi ska nu kunaꞌan chaꞌ suꞌwa ꞌin ran lo snan skaꞌ kata jaxlya; xtiyaaꞌ ꞌin ran bra kanꞌ, chaꞌ sa tlyu ti skwen nchga skwan kanꞌ, ngwañaꞌan ka tñan ꞌin Ndiose bra kanꞌ.
23645	MAT 13:37	―Suꞌwe ―ndukwin Jesús ꞌin neꞌ―. Naꞌ nu wa msuꞌwa Ndiose ꞌñaǎn ndijyaǎn chaꞌ kaǎn nten, xa nu nduꞌuǔn ꞌin nten ni, sa ñaꞌan lka si kataǎn mta suꞌwe lo jyan ꞌñaǎn, ngwañaꞌan ngiꞌniǐn.
23655	MAT 13:47	―Loꞌo xka chaꞌ chkwiǐnꞌ loꞌo wan ni, sa ñaꞌan ka xa nu lka Ndiose ndloo niꞌ kasiya ꞌin nten ―ndukwin Jesús―. Sa ñaꞌan lka ska katan tnun nu nduguun nten lo tyiꞌa tujoꞌo chaꞌ xñi kula, chaꞌ kanun nchga loo kula niꞌ katan kanꞌ, ngwañaꞌan lka chaꞌ kanꞌ.
23662	MAT 13:54	Chunꞌ ndiꞌin la mdiyan yu kichen tyi jyaꞌan yu, yten yu niꞌ lyaa ꞌin neꞌ kwa, ngwaꞌu yu chinꞌ ꞌin nten nu ndiꞌin niꞌ lyaa kanꞌ bra kanꞌ. Yuwe ꞌa tiꞌ neꞌ ñaꞌan neꞌ ꞌin yu bra kanꞌ: ―¿La nde yaꞌ yꞌni xaꞌan yu kiꞌyu re nchga chaꞌ nu nchkwiꞌ yu? ―ndukwin neꞌ ꞌin taꞌa neꞌ―. ¿Ni sa ñaꞌan ngwa ꞌin yu chaꞌ nchka ꞌin yu ngiꞌni yu chaꞌ tnun?
23665	MAT 13:57	Ngwañaꞌan ngwa chaꞌ chen nka tiye neꞌ ñaꞌan neꞌ ꞌin Jesús, kanꞌ chaꞌ ykwiꞌ Jesús loꞌo neꞌ xiyaꞌ bra kanꞌ: ―Nchga seꞌen ngiꞌni tnun neꞌ ꞌin ska nten nu nchkwiꞌ chaꞌ ꞌin Ndiose loꞌo nten ―ndukwin Jesús ꞌin neꞌ―. Ska ti kichen tyi yu, ja nnan neꞌ chaꞌ nu nchkwiꞌ yu siyaꞌ ti; loꞌo taꞌa yu, ja ndukwa ꞌa neꞌ chaꞌ nu nchkwiꞌ yu.
23668	MAT 14:2	Kanꞌ chaꞌ ykwiꞌ yu kula kanꞌ loꞌo msu ꞌin yu: ―Ti kwiꞌ ayman Xuwa nu ndukwatya ꞌin neꞌ, ti kwiꞌ kanꞌ lka nu kiꞌyu kanꞌ ―ndukwin Herodes―. Wa ngujwi yu, loꞌo ndyuꞌu yu xiyaꞌ, nxkeꞌ tiǎnꞌ, kanꞌ chaꞌ nchka ꞌin yu kuꞌni yu chaꞌ tnun nu ngwañaꞌan.
23674	MAT 14:8	Tiꞌí ꞌa tiꞌ Herodías jyaꞌan nu kunaꞌan kuneꞌ ꞌin Xuwa, ngwa tiꞌ kujwi ꞌin Xuwa, kanꞌ chaꞌ ytsaꞌ ꞌin sñiꞌ ni ñaꞌan nan nu jñan ꞌin Herodes bra kanꞌ. ―Ke Xuwa nu ndukwatya ꞌin nten, nchka tiǎnꞌ ―ndukwin nu kunaꞌan kuneꞌ kanꞌ ꞌin Herodes bra kanꞌ―. Kan loꞌo neꞌ ꞌin ke yu ska niꞌ siꞌyuu ―ndukwin.
23681	MAT 14:15	Tyukwi tsan mdiꞌin neꞌ. Bra wa msiin ykwiꞌ neꞌ nu ngiꞌni xaꞌan chaꞌ ꞌin Jesús loꞌo yu: ―Niꞌ kixinꞌ ꞌa ndiꞌian re. Ja tukwin ndiꞌin kwiꞌ seꞌen ti nde ―ndukwin neꞌ ꞌin Jesús―. Kwiꞌ ngwañaꞌan msiin ꞌa ni. Suꞌwe la kuloo tñan ꞌin nten kaꞌan kwa chaꞌ tsaa neꞌ nchga kichen nu ndiꞌin lo yuu kwa, chaꞌ xiꞌi neꞌ nan ku neꞌ.
23682	MAT 14:16	―ꞌWan, ta wan nan ku neꞌ nde ti ―ndukwin Jesús―. Ja ndiꞌin chaꞌ tyaa neꞌ.
23693	MAT 14:27	Bra ti ykwiꞌ Jesús loꞌo neꞌ: ―¡Kuꞌni tnun tiye wan! ―ndukwin Jesús ꞌin neꞌ―. Naꞌ lkaǎn, ¡ja kutsen ꞌa wan!
23694	MAT 14:28	Mxkwen Tyu ꞌin yu bra kanꞌ: ―¿Ta chañi chaꞌ nuꞌwin lkaa a?, yu kula ―ndukwin Tyu ꞌin Jesús―. Si chañi chaꞌ nuꞌwin lkaa, kuloo tñan ꞌñaǎn sikwa, chaꞌ loꞌoǔn tyaꞌaǎn lo tyiꞌa chaꞌ kalaǎn seꞌen ndiꞌiin.
23704	MAT 15:2	―¿Ni chaꞌ ja suꞌwe ngiꞌni neꞌ nu ngiꞌni xaꞌan chaꞌ ꞌiin? ―ndukwin neꞌ kanꞌ ꞌin Jesús―. Ja suꞌwa ngiꞌni neꞌ kwa loꞌo chaꞌ nu wa ykwiꞌ ayman kula loꞌoan nu ngwa sꞌni, chaꞌ katen suꞌwe yaanꞌ bra nu tiya yaꞌ kuan. Loꞌo neꞌ nu ngiꞌni xaꞌan chaꞌ ꞌiin ni, ja ngiꞌni neꞌ ngwañaꞌan ―ndukwin neꞌ bra kanꞌ.
23715	MAT 15:13	―Stiǐn Ndiose nu ndiꞌin nde niꞌ kwan, xkwan Ni nchga kixinꞌ nu siꞌi nan kwiñii nu yta Ni, chaꞌ ja suꞌwe kixinꞌ kanꞌ ―ndukwin Jesús ꞌin neꞌ―.
23716	MAT 15:14	Kwiꞌ ngwañaꞌan, ja suꞌwe neꞌ fariseo kanꞌ chaꞌ ꞌin Ndiose, kanꞌ chaꞌ ndiꞌin chaꞌ tyoꞌo tsuꞌ wan ꞌin neꞌ kanꞌ, chaꞌ ñaꞌan tiꞌ nu kwityiinꞌ, ngwañaꞌan lka neꞌ fariseo kanꞌ ―ndukwin Jesús―. Si kwaꞌu ska nu kwityiinꞌ tuwiin ꞌin xka yu taꞌa kwityiinꞌ ti yu, tiyuu taꞌa tyukwaa neꞌ kanꞌ ska tuꞌwa yuu bra kanꞌ, chaꞌ tyukwaa neꞌ kanꞌ ja ngwa ñaꞌan neꞌ tuwiin seꞌen ndijyan neꞌ bra kanꞌ.
23718	MAT 15:16	―¿Loꞌo ꞌwan, ja ngwa biyaꞌ tiꞌ wan chaꞌ kanꞌ a? ―ndukwin Jesús ꞌin neꞌ kanꞌ bra kanꞌ―.
23724	MAT 15:22	Ngwa ska tsan mdiyan ska nu kunaꞌan ngwa tyi seꞌen ndiꞌin Jesús, msiꞌya ꞌa nu kunaꞌan kanꞌ ꞌin Jesús bra kanꞌ: ―¡Chka tꞌnan tiiꞌ ꞌñaǎn, Xꞌnaǎn! ―ndukwin nu kunaꞌan kanꞌ ꞌin Jesús―. Nuꞌwin lkaa ti kwiꞌ nu lka taꞌa ayman David, kanꞌ chaꞌ kuꞌnii ska chaꞌ suꞌwe loꞌoǔn. Tiꞌí ꞌa sñiěnꞌ, nxlyuu ꞌa kwiꞌin ꞌin sñiěnꞌ lyuu.
23730	MAT 15:28	―Chañi chaꞌ ndyaa ñaꞌan tiiꞌ ꞌñaǎn ―ndukwin Jesús ꞌin―. Ka chaꞌ nu nchka tiiꞌ sikwa ―ndukwin. Bra ti nchkaa sñiꞌ nu kunaꞌan kanꞌ bra kanꞌ.
23734	MAT 15:32	Loꞌo msiꞌya Jesús ꞌin neꞌ nu ngiꞌni xaꞌan chaꞌ ꞌin yu chaꞌ kan neꞌ seꞌen ndiꞌin yu. Ykwiꞌ yu loꞌo neꞌ bra kanꞌ: ―Tꞌnan ꞌa tiǎnꞌ ꞌin nten kaꞌan kwa ―ndukwin Jesús ꞌin neꞌ kanꞌ―. Wa snan tsan mdaꞌan neꞌ loꞌoǔn ni, loꞌo ja ndiya ꞌa nan ku neꞌ. Ja suꞌwe kuloǔn tñan ꞌin neꞌ kwa chaꞌ tyaa neꞌ ñaꞌan ngiteꞌ ti tiꞌ neꞌ, chaꞌ ja talo neꞌ tuwiin ngwañaꞌan.
23735	MAT 15:33	Kanꞌ ykwiꞌ neꞌ nu ngiꞌni xaꞌan chaꞌ ꞌin yu loꞌo yu: ―¿La nde yaꞌ kaja nan ku neꞌ ꞌñaan a? Niꞌ kixinꞌ ꞌa ndiꞌian re, seꞌen ja ndiꞌin nten ―ndukwin neꞌ ꞌin Jesús―. Kwiꞌ kaꞌan ꞌa nten ndaꞌan loꞌoan re.
23745	MAT 16:4	Nan xaꞌan ꞌa tiye wan loꞌo taꞌa wan, chaꞌ xkwiꞌ nchka tiꞌ wan chaꞌ kuꞌniǐn ska chaꞌ tnun chaꞌ ñaꞌan kwiꞌya wan ꞌin ran; lka wan nten nu ja ndyaa ñaꞌan tiꞌ ꞌin Ndiose siyaꞌ ti ―ndukwin Jesús ꞌin neꞌ―. Loꞌo ja kuꞌniǐn chaꞌ tnun ngwañaꞌan. Ndiꞌin chaꞌ tyaa yuꞌwi tiꞌ wan nan lka nu ngwa ꞌin ayman Jona nu ykwiꞌ chaꞌ ꞌin Ndiose loꞌo nten nu ngwa sꞌni. Ja ykwiꞌ ꞌa Jesús loꞌo neꞌ kanꞌ, mdoꞌo yu ndyaa yu bra kanꞌ.
23747	MAT 16:6	Kanꞌ ykwiꞌ Jesús loꞌo neꞌ: ―Chaꞌ tiya ti tiꞌ wan tyiꞌin wan ―ndukwin Jesús ꞌin neꞌ―. Kiꞌya wan kwenta ni sa ñaꞌan ngiꞌni skwan tiyeꞌ nu nda neꞌ fariseo loꞌo neꞌ saduceo ꞌwan ―ndukwin.
23749	MAT 16:8	Jlyo tiꞌ Jesús chaꞌ ja ngwa biyaꞌ tiꞌ neꞌ chaꞌ kanꞌ. ―¿Ni chaꞌ nduwe tiꞌ wan chaꞌ ja loꞌo jaxlya tejeꞌ ꞌwan ndijyan wan? ―ndukwin yu ꞌin neꞌ―. Chinꞌ ti chaꞌ ndyaa ñaꞌan tiꞌ wan ꞌin Ndiose.
23755	MAT 16:14	―Ndiya nten nu nchkwiꞌ chaꞌ nuꞌwin lkaa ayman Xuwa nu mdukwatya ꞌin nten nu ngwa xkanꞌ ―ndukwin neꞌ ꞌin Jesús―. Loꞌo ndiya nten nu nchkwiꞌ chaꞌ ayman Elías lkaa. Loꞌo ndiya nten nu nchkwiꞌ chaꞌ ayman Jeremías lkaa. Loꞌo ndiya nten nu nchkwiꞌ chaꞌ wa ndyuꞌu xka ayman xiyaꞌ nu ykwiꞌ chaꞌ ꞌin Ndiose loꞌo nten nu ngwa sꞌni; ti kwiꞌ kanꞌ lka nuꞌwin, ndukwin neꞌ.
23758	MAT 16:17	―Suꞌwe nka tiye nuꞌwin Simón, sñiꞌ Jona ―ndukwin Jesús ꞌin yu bra kanꞌ―. Siꞌi nten chalyuu ti nu ngwaꞌu chaꞌ kanꞌ ꞌiin; Stiǐn Ndiose nu ndiꞌin nde niꞌ kwan, kanꞌ nu ytsaꞌ chaꞌ kanꞌ ꞌiin.
23764	MAT 16:23	Bra ti mxinaꞌan Jesús tloo Tyu bra kanꞌ. ―¡Tyoꞌo tsuuꞌ, Satanás! ¡Ja chkwiiꞌ loꞌoǔn ngwañaꞌan, chaꞌ siꞌi ran! ―ndukwin Jesús ꞌin yu―. Ja nka tiye nuꞌwin sa ñaꞌan nka tiye Ndiose, sa ñaꞌan nka tiye nten chalyuu ti nka tiye nuꞌwin ni.
23774	MAT 17:5	Bra nu ykwiꞌ Tyu mdoꞌo tukwa ska ko nu ngaten ꞌa, nu nduwi ꞌa, nu ndyuꞌwi ñaꞌaan seꞌen nduun neꞌ. Ynen ykwiꞌ ska nten bra kanꞌ. Bra ti ngwa biyaꞌ tiꞌ neꞌ kanꞌ, chaꞌ nchkwiꞌ Ndiose loꞌo neꞌ laja ko kanꞌ: ―Yu re lka yu Sñiěnꞌ, ndiya ꞌa tiǎnꞌ ꞌin yu ―ndukwin Ni―. Suꞌwe ꞌa nka tiyeěn naꞌaǎn ꞌin yu. Kunan suꞌwe wan nchga chaꞌ nu chkwiꞌ Sñiěnꞌ re loꞌo wan.
23778	MAT 17:9	Bra nu ngwiꞌya neꞌ siꞌ kiꞌya kanꞌ, ngulo Jesús tñan ꞌin neꞌ nu ngiꞌni xaꞌan chaꞌ ꞌin yu bra kanꞌ: ―Ja katsaꞌ ꞌa wan ꞌin nten ni sa ñaꞌan nan nu wa naꞌan wan lo kiꞌya kwa tsan ―ndukwin Jesús ꞌin neꞌ kanꞌ―. Sa ñaꞌan bra nu kajaǎn, naꞌ nu wa msuꞌwa Ndiose ꞌñaǎn ndijyaǎn chaꞌ kaǎn nten, sa ñaꞌan bra nu ndyuꞌuǔn xiyaꞌ, kanꞌ ka katsaꞌ wan chaꞌ kanꞌ ꞌin nten bra kanꞌ.
23780	MAT 17:11	―Chañi chaꞌ kan Elías kulo, chaꞌ kuꞌni xuꞌwe yu ꞌin nchga lo nan ―ndukwin Jesús―.
23784	MAT 17:15	―Chka tꞌnan tiiꞌ ꞌin sñiěnꞌ, yu kula ―ndukwin yu kanꞌ ꞌin Jesús―. Tiꞌí ꞌa sñiěnꞌ chaꞌ taꞌa ti nxlyuu kwiꞌin kuxi ꞌin yu; ngiꞌni kwiꞌin kanꞌ chaꞌ bra ti ndlyuu yu lo kiiꞌ, taꞌa ti nxtyuu ꞌin yu lo tyiꞌa.
23786	MAT 17:17	―¡Ja ndyaa ñaꞌan tiꞌ wan ꞌin Ndiose siyaꞌ ti! ―ndukwin Jesús ꞌin neꞌ kanꞌ―. ¡Kuxi ꞌa kasiya ꞌwan! Ja suꞌwe kanuǔn seꞌen ndiꞌin wan, ja taloǔn ꞌwan siyaꞌ ti. Kan loꞌo wan ꞌin yu tiꞌí kwa seꞌen ndiꞌiǐn ni.
23789	MAT 17:20	Mxkwen Jesús ꞌin neꞌ kanꞌ bra kanꞌ: ―Chinꞌ ti yaꞌ ndyaa ñaꞌan tiꞌ wan ꞌin Ndiose, kanꞌ chaꞌ ja ngwa ꞌwan ―ndukwin Jesús ꞌin neꞌ kanꞌ―. Chañi chaꞌ re nu nchkwiǐnꞌ loꞌo wan: Ñaꞌan tiꞌ ska mta yka nu xuwe ꞌa, ni siya ngwañaꞌan ti tsaa ñaꞌan tiꞌ wan ꞌin Stiǐn Ndiose, bra kanꞌ ka chkwiꞌ wan loꞌo kiꞌya kwan kwa: “Tyoꞌo tsuuꞌ, tyaa xka seꞌen nde kwa la” nchkwin wan ꞌin ran, loꞌo kunan kiꞌya kanꞌ chaꞌ nu chkwiꞌ wan loꞌo ran. Kanꞌ tyoꞌo tsuꞌ kiꞌya kanꞌ, tsaa xka seꞌen bra kanꞌ. Ja ndiya tñan nu ja ka kuꞌni wan bra nu chañi ka chaꞌ ndyaa ñaꞌan tiꞌ wan ꞌñaǎn.
23794	MAT 17:25	―Nda yu ―ndukwin Tyu ꞌin neꞌ bra kanꞌ. Bra nu ngula Tyu tu naꞌan xiyaꞌ, ykwiꞌ Jesús loꞌo yu bra kanꞌ: ―Simón, ¿ni sa ñaꞌan nxkeꞌ tiiꞌ a? ―ndukwin Jesús ꞌin Tyu―. ¿Ti ka lka nu nda tñi ꞌin neꞌ nu ndloo tñi kanꞌ? ¿Ta ndlo neꞌ tñi ꞌin sñiꞌ neꞌ, nxkeꞌ tiiꞌ a? ¿Ta siꞌi ꞌin xka nten ndlo neꞌ tñi a?
23795	MAT 17:26	―Ndlo neꞌ kanꞌ tñi ꞌin xka ta nten, ja ndlo neꞌ ran ꞌin sñiꞌ neꞌ ―ndukwin Tyu bra kanꞌ. ―Chañi chaꞌ ꞌiin. Ja loꞌo sñiꞌ neꞌ nda liyaꞌ ꞌin chaꞌ kanꞌ sikwa ―ndukwin Jesús ꞌin Tyu―.
23818	MAT 18:22	Mxkwen Jesús ꞌin Tyu bra kanꞌ: ―Ja chkwiǐnꞌ chaꞌ kati ti yaꞌ ―ndukwin Jesús―. Suꞌwe kuꞌni wan chaꞌ tlyu tiꞌ ꞌin taꞌa wan ni siya snan yla nsuꞌwi tiꞌyun tyukwa yaꞌ ―ndukwin.
23835	MAT 19:4	―¿Ta ja ya chkwiꞌ wan lo kityi chaꞌ ꞌin Ndiose a? ―mxkwen Jesús ꞌin neꞌ kanꞌ―. “Ti kulo mñan Ni nten, ska yu kiꞌyu loꞌo ska nu kunaꞌan” ngwañaꞌan ndukwa chaꞌ lo kityi kanꞌ.
23839	MAT 19:8	Xiyaꞌ mxkwen Jesús ꞌin neꞌ kanꞌ bra kanꞌ: ―Ja nnan wan chaꞌ nchkwiꞌ Ndiose siyaꞌ ti, kanꞌ chaꞌ mda ayman Moisés chabiyaꞌ ꞌwan chaꞌ kulaa tiꞌin wan ꞌin kwilyoꞌo wan loꞌo ska kityi ti ―ndukwin Jesús ꞌin neꞌ―. Siꞌi ngwañaꞌan ngwa tiꞌ Ndiose ti bra nu mñan Ni chalyuu.
23842	MAT 19:11	―Ndiya ꞌa nu kiꞌyu nu ja talo yu chaꞌ tyiꞌin yu ska ti yu ―ndukwin Jesús ꞌin neꞌ nu ngiꞌni xaꞌan chaꞌ ꞌin yu bra kanꞌ―. Ska ti si kulo Ndiose tñan ꞌin ska nten chaꞌ ja kaja kwilyoꞌo, bra kanꞌ ka talo yu chaꞌ ja kalaꞌ yu ꞌin ska nu kunaꞌan siyaꞌ ti, bra nu tayaꞌ Ndiose ꞌin yu kanꞌ.
23845	MAT 19:14	Bra ti ykwiꞌ Jesús loꞌo yu kuneꞌ kanꞌ: ―Ta wan chabiyaꞌ ꞌin nu xuwe ti chaꞌ kan neꞌ seꞌen ndiꞌiǐn ―ndukwin Jesús ꞌin yu kanꞌ―. Ja tukunꞌ ꞌa wan chaꞌ ꞌin nu xuwe, chaꞌ ja kan neꞌ. Sa ñaꞌan lka bra nu ndyaa ñaꞌan tiꞌ nu xuwe ꞌin sti neꞌ, ngwañaꞌan ndiꞌin chaꞌ tsaa ñaꞌan tiꞌ nten ꞌin Ndiose chaꞌ ka Ndiose ndloo niꞌ kasiya ꞌin neꞌ.
23847	MAT 19:16	Ngwa ska tsan mdiyan ska nu kiꞌyu kuneꞌ seꞌen ndiꞌin Jesús. ―Mstru, nuꞌwin suꞌwe ꞌa ngiꞌnii nchga tsan ―ndukwin yu ꞌin Jesús―. Kuꞌnii chaꞌ suꞌwe katsaaꞌ ꞌñaǎn, ¿ni sa ñaꞌan chaꞌ suꞌwe kuꞌniǐn chaꞌ kaja chalyuu nu ja tsaa tii ꞌa ꞌñaǎn? ―ndukwin yu.
23848	MAT 19:17	Ykwiꞌ Jesús loꞌo yu bra kanꞌ: ―¿Ni chaꞌ nchkwiiꞌ chaꞌ suꞌwe ꞌa ngiꞌniǐn? ―ndukwin Jesús ꞌin yu kanꞌ―. Ska ti Ndiose nu chañi chaꞌ suꞌwe ꞌa ngiꞌni. Kunaan nchga tñan nu ngulo Ndiose ꞌin nten, si nchka tiiꞌ kaja chalyuu nu ja tsaa tii ꞌa ꞌiin.
23851	MAT 19:20	Mxkwen yu kuneꞌ ꞌin Jesús bra kanꞌ: ―Ti kuneěnꞌ wa ndukwaǎn nchga tñan kanꞌ nchga tsan ―ndukwin yu kuneꞌ kanꞌ ꞌin Jesús―. ¿Ta ndiya la chaꞌ nu ti ji kuꞌniǐn sikwa a? ―ndukwin.
23852	MAT 19:21	―¿Ta chañi chaꞌ nchka tiiꞌ chaꞌ ka luwi kasiya ꞌiin a? ¿Ta nchka tiiꞌ kaja chalyuu kwi nu ja tsaa tii ꞌa ꞌiin a? ―ndukwin Jesús ꞌin yu kuneꞌ kanꞌ―. Si chañi chaꞌ nu nchkwiiꞌ, yaa lyaa kujwiiꞌ nchga chaꞌ suꞌwe nu nsuꞌwi ꞌiin; tyoꞌo tñi chaꞌ taa ꞌin nu tiꞌi bra kanꞌ. Loꞌo ta Ndiose chaꞌ suꞌwe ꞌiin seꞌen ndiꞌin Ni nde loo la. Bra wa yꞌnii chaꞌ kanꞌ, kaan seꞌen ndiꞌiǐn chaꞌ tyaꞌaan loꞌoǔn bra kanꞌ.
23858	MAT 19:27	Ykwiꞌ Tyu loꞌo Jesús bra kanꞌ: ―Loꞌo bare ni, wa ngulaa tiꞌin ba nchga nan nu nsuꞌwi ꞌwa chaꞌ tyaꞌan ba loꞌo nuꞌwin, sa ñaꞌan yaꞌ nu ndukwiin chaꞌ kuꞌni ba ―ndukwin Tyu ꞌin Jesús―. ¿Nan ka kaja ꞌwa nde loo la bra kanꞌ a?
23877	MAT 20:16	Loꞌo ni, nten nu tyoꞌo tukwa xa wa tyii ti chaꞌ, kanꞌ lka nu ka nde loo la; loꞌo nten nu mdoꞌo tukwa ti kulo, kanꞌ lka nu kanun nde chunꞌ la ―ndukwin Jesús―. Wa mniěn ꞌin kaꞌan ꞌa nten chaꞌ kunan suꞌwe neꞌ sa ñaꞌan chaꞌ nu nduꞌuǔn ꞌin neꞌ, loꞌo wa lka ti nten ngulo suwiǐn ꞌin chaꞌ ka neꞌ nten ꞌñaǎn.
23879	MAT 20:18	―Jlyo tiꞌ wan chaꞌ wa skwen tian tuwiin nde lo kiꞌya ni, chaꞌ wa tsaan tian Jerusalén ―ndukwin Jesús ꞌin yu kanꞌ―. Loꞌo naꞌ, ni siya wa msuꞌwa Ndiose ꞌñaǎn ndijyaǎn chaꞌ kaǎn nten, xñi neꞌ kwa ꞌñaǎn chaꞌ tsaa loꞌo neꞌ ꞌñaǎn tloo sti joꞌo nu lka ndloo la, tloo mstru nu nduꞌu chaꞌ joꞌo niꞌ lyaa. Kuꞌni biyaꞌ neꞌ kanꞌ ꞌñaǎn bra kanꞌ; chkwiꞌ neꞌ chaꞌ ndiꞌin kiꞌya ꞌñaǎn, chaꞌ ndiꞌin chaꞌ kajaǎn siꞌya kiꞌya kanꞌ.
23882	MAT 20:21	Kanꞌ mnichaꞌ Jesús ꞌin nu kunaꞌan kanꞌ: ―¿Nan lka nchka tiꞌ wan a? ―ndukwin Jesús. ―Kuꞌnii chaꞌ suꞌwe taa chabiyaꞌ chaꞌ suꞌwa ti tyukwa sñiěnꞌ re loꞌoo, seꞌen ka nuꞌwin ndloo la ti nde loo la ―ndukwin nu kunaꞌan kanꞌ―. Kuloo tñan chaꞌ tyukwa ska yu laꞌa seꞌen kwin ꞌiin, xka yu kanꞌ tyukwa yu laꞌa seꞌen ka ꞌiin ―ndukwin nu kunaꞌan kanꞌ.
23883	MAT 20:22	Loꞌo ykwiꞌ Jesús loꞌo taꞌa tyukwaa yu kiꞌyu kanꞌ bra kanꞌ: ―Ja nchka biyaꞌ tiꞌ wan sa ñaꞌan lka chaꞌ nu njñan wan ꞌñaǎn ni ―ndukwin Jesús ꞌin neꞌ―. Sa ñaꞌan ka si ta neꞌ ska rmiyu tlyaaꞌ ꞌa chaꞌ koꞌoǔn, ngwañaꞌan ka nu tiꞌí nu ta neꞌ ꞌñaǎn. ¿Ta talo wan si ta neꞌ nu tiꞌí ꞌwan sa ñaꞌan nu ndiꞌin chaꞌ ta neꞌ nu tiꞌí ꞌñaǎn, bra nu kujwi neꞌ ꞌñaǎn a? ―Talo ba ―ndukwin neꞌ kanꞌ bra kanꞌ.
23884	MAT 20:23	―Chañi chaꞌ loꞌo wan koꞌo wan rmiyu tlyaaꞌ kanꞌ nu ndiꞌin chaꞌ koꞌoǔn, kwiꞌ tyijin wan nu tiꞌí sa ñaꞌan nu tyijiǐn nu tiꞌí ―ndukwin Jesús ꞌin neꞌ―. Loꞌo ni, ja ndiya chabiyaꞌ ꞌñaǎn chaꞌ taǎn ska seꞌen nde siǐnꞌ seꞌen tyukwa wan nde loo la, chaꞌ wa lka ngulo suwi Stiǐn Ndiose ꞌin nten nu tyukwa nde siǐnꞌ bra kanꞌ.
23886	MAT 20:25	Kanꞌ msiꞌya Jesús ꞌin nchga yu kuneꞌ kanꞌ, chaꞌ tyoꞌ tiꞌin tloo yu. ―Jlyo tiꞌ wan chaꞌ nu lka ndloo la ꞌin neꞌ xka laꞌa tsuꞌ ni, tlá ꞌa neꞌ kanꞌ ―ndukwin Jesús ꞌin neꞌ nu ngiꞌni xaꞌan chaꞌ ꞌin yu―. Lye ꞌa ndlo neꞌ nu lka ndloo la kanꞌ tñan ꞌin taꞌa kichen tyi neꞌ;
23897	MAT 21:2	―Yaa wan lo kichen kwa ―ndukwin yu―. Ndla ti tyija ska buru nu nduun nchkanꞌ ꞌwan; nduun iꞌ loꞌo sñiꞌ iꞌ. Xtiꞌ wan ꞌin iꞌ chaꞌ kan loꞌo wan ꞌin iꞌ nde re.
23904	MAT 21:9	Loꞌo nchga nten msiꞌya ꞌa neꞌ chaꞌ suꞌwe ꞌa nka tiye neꞌ, loꞌo neꞌ nu ndyaa nde loo la, loꞌo neꞌ nu ndijyan nde chunꞌ la, suꞌwe ꞌa nka tiye nchga neꞌ kanꞌ. ―¡Kuꞌni tnun ba ꞌiin! Nuꞌwin lkaa ti kwiꞌ taꞌa ayman ree David nu ndiꞌin chaꞌ kan ―ndukwin neꞌ ꞌin Jesús―. ¡Suꞌwe ꞌa kuꞌni Ndiose loꞌoo chaꞌ ndijyaan chabiyaꞌ ꞌin Ni nu nka Xꞌnaan! ¡Kuꞌni tnuan ꞌin Ndiose ni! ―ndukwin neꞌ.
23911	MAT 21:16	Bra ti ykwiꞌ neꞌ tnun nchka kanꞌ loꞌo Jesús: ―¿Ta ja nnaan chaꞌ kwiñi nu nchkwiꞌ nu xuwe ti re chaꞌ ꞌiin a? ―ndukwin neꞌ kanꞌ ꞌin Jesús. ―Wa ynaǎn ―ndukwin Jesús bra kanꞌ―. Loꞌo siꞌi chaꞌ kwiñi nchkwiꞌ nu xuwe re. ¿Ja ya chkwiꞌ wan lo kityi seꞌen ndukwa chaꞌ re a?: Ngala tuꞌwa kuwiꞌ, ngala tuꞌwa nu xuwe kuneꞌ; chañi chaꞌ ngiꞌni tnun neꞌ kanꞌ ꞌin Ndiose.
23916	MAT 21:21	Mxkwen Jesús ꞌin neꞌ kanꞌ bra kanꞌ: ―Chañi chaꞌ nu nchkwiǐnꞌ loꞌo wan ni ―ndukwin yu―. Bra nu chañi chaꞌ ndyaa ñaꞌan tiꞌ wan ꞌin Ndiose, loꞌo ja lka tukwa chaꞌ nsuꞌwi tiye wan nchkwiꞌ wan loꞌo Ni, loꞌo ꞌwan, ka ꞌwan kuꞌni wan ska chaꞌ tnun ngwañaꞌan. Siꞌi chaꞌ kityi ska yka ti chkwiꞌ wan loꞌo Ndiose bra kanꞌ, loꞌo ka chkwiꞌ wan chaꞌ re loꞌo kiꞌya kwa: “Tyoꞌo tsuuꞌ, yaa tukwaa lo tyiꞌa tujoꞌo” nchkwin wan ꞌin kiꞌya kwa. Loꞌo tyoꞌo tsuꞌ kiꞌya kwa bra kanꞌ.