13944	PSA 1:1	Tijicña jini quixtyañu machꞌʌ baꞌan miꞌ chaꞌlen xʌmbal yicꞌot simaroñoꞌ bʌ chaꞌan miꞌ jacꞌbeñob i tꞌan, Jini machꞌʌ baꞌan mi waꞌtyʌl tiꞌ bijlel xmulilob, Jini machꞌʌ baꞌan mi buchtyʌl yicꞌot xwajleyajob.
13951	PSA 2:2	Jini yumʌlob ti pañimil miꞌ chajpañob i bʌ. Jini yumʌlob miꞌ lajob i tꞌan Chaꞌan miꞌ contrajiñob lac Yum, Yicꞌot jini Rey yajcʌbil bʌ i chaꞌan.
13952	PSA 2:3	Mi yʌlob: Laꞌ lac tsꞌocben i lazojlel muꞌ bʌ i cꞌʌn i cʌchonla yubil. Laꞌ lac junyajlel choc jini lazo tyac chaꞌan mi laj cojlel tiꞌ pꞌʌtyʌlel Dios, cheꞌob.
13955	PSA 2:6	Lac Yum mi quejel i yʌl: Yaꞌ ti Jerusalén, jini chꞌujul bʌ c lum, Tsaꞌix c waꞌchoco c Rey, jini yajcʌbil bʌ c chaꞌan, cheꞌen.
13958	PSA 2:9	Mi quejel a jisan quixtyañujob yubil ti bara melel bʌ ti tsucul tyaqꞌuin. Mi quejel a bicꞌtisan lajal bajcheꞌ mi tyojpꞌel pꞌejt melel bʌ ti lum. Cheꞌ tiꞌ subeyon c Yum, cheꞌen.
13959	PSA 2:10	Jin chaꞌan laꞌ ocꞌac laꞌ ñaꞌtyʌbal, reyet bʌ la. Yom mi laꞌ jacꞌ laꞌ cʌntisʌntyel, jatyetla am bʌ laꞌ weꞌtyel ti mulawil.
14023	PSA 8:2	Lojon c Yum Dios, ñoj ñuc a cꞌabaꞌ ti pejtyelel mulawil. Tsaꞌix a pʌsʌ a ñuclel ti chan.
14025	PSA 8:4	Cheꞌ mij qꞌuel jini chan tsaꞌ bʌ a mele ti yal a cꞌʌb Yicꞌot jini uw yicꞌot ecꞌ tyac tsaꞌ bʌ a mele,
14030	PSA 8:9	Yicꞌot xmaꞌtyeꞌ mut yicꞌot chʌy, yicꞌot pejtyelel chʌ bʌ tyac muꞌ bʌ ti xʌmbal ti colem jaꞌ.
14031	PSA 8:10	Lojon c Yum Dios, ñoj ñuc a cꞌabaꞌ ti pejtyelel mulawil.
14183	PSA 19:2	Jini chan miꞌ tsictisan i ñuclel Dios, Miꞌ tsictisan i melbal i cꞌʌb.
14185	PSA 19:4	Aunque maꞌix chʌ bʌ mi yʌl, maꞌix i tꞌan Pero miꞌ tsictisan i ñuclel Dios.
14188	PSA 19:7	Mi pasel qꞌuin tiꞌ junxejlel chan, Mi ñumel cꞌʌlʌ ti yambʌ junxejlel chan. Maꞌan majch chꞌujbi i putsꞌtyan i ticwʌlel.
14196	PSA 19:15	Qꞌuele ti wen jini tꞌan chʌncol bʌ c subeñet. Yicꞌot jini chʌncol bʌ c pensalin tic pusicꞌal. C Yum, pꞌʌtyʌlet bʌ xajolel c chaꞌan, caj cotyayajet.
14222	PSA 22:2	C Dios, c Dios, ¿chucoch ti a cʌyʌyon? ¿Chucoch ñajt añet chaꞌan machꞌʌ baꞌan maꞌ cotyañon? ¿Chucoch machꞌʌ baꞌan maꞌ wubiñon cheꞌ ajacñayon?
14223	PSA 22:3	C Dios, cꞌam mic pejcañet ti qꞌuinil yicꞌot ti acꞌbʌlel, Machꞌan maꞌ jacꞌbeñon. Machꞌan ñʌchꞌʌl c pusicꞌal.
14224	PSA 22:4	Pero chꞌujulet. Buchulet yaꞌ baꞌ maꞌ chaꞌlen yumʌl, Miꞌ subob a ñuclel jini israelob.
14228	PSA 22:8	Pejtyel muꞌ bʌ i qꞌuelon miꞌ tseꞌtyañon. Miꞌ wajleñoñob, miꞌ pʌntsꞌuñob i jol.
14229	PSA 22:9	Mi yʌlob: Tiꞌ chꞌujbi lac Yum chaꞌan mi quej i bej cotyan. Laꞌ i cotyan wale iliyi, laꞌ i col loqꞌuel ti wocol mi chʌncol i pꞌuntyan, cheꞌob.
14238	PSA 22:18	Chꞌujbi c tsic pejtyel c bʌquel tyac chaꞌan luꞌ loqꞌuem tiꞌ pꞌac. Miꞌ chꞌuj qꞌueloñob, miꞌ tseꞌtyañoñob.
14240	PSA 22:20	C Yum, mach yom maꞌ cʌyon. Jatyet, c pꞌʌtyʌlel, laꞌ ti ora chaꞌan maꞌ cotyañon.
14241	PSA 22:21	Cotyañon chaꞌan machꞌan miꞌ tyajon espada, Ame i tsʌnsañoñob simaron bʌ quixtyañujob.
14242	PSA 22:22	Cotyañon loqꞌuel tiꞌ cꞌʌb simaron bʌ winicob cheꞌ bajcheꞌ ti tiꞌ chʌc bajlʌm, Cheꞌ bajcheꞌ tiꞌ xulub simaron bʌ tyat wacax.
14244	PSA 22:24	Subula i ñuclel jatyetla muꞌ bʌ laꞌ qꞌuel ti ñuc lac Yum, Pejtyel i jiñʌjlelet bʌ la Jacob, subula i ñuclel. Qꞌuelela ti ñuc lac Yum, pejtyel israelet bʌ la.
14247	PSA 22:27	Jini pꞌumpꞌuñoꞌ bʌ mi quejelob ti uchꞌel. Mi quejel i ñajꞌañob. Jini muꞌ bʌ i sajcañob lac Yum, mi quejel i chꞌujutisañob. Laꞌ ajnicob ti pejtyel ora jini muꞌ bʌ i sajcañob.
14250	PSA 22:30	Pejtyel quixtyañujob yujiloꞌ bʌ sajtyel, jini wen chumulob bʌ yicꞌot jini pꞌumpꞌuñoꞌ bʌ jeꞌel, Mi quejel i wersa chꞌujutisañob lac Yum.
14258	PSA 23:6	Melel, machꞌan mi quej a cʌy a pꞌuntyañon. Mux a bej pꞌuntyañon ti beleꞌ ora cheꞌ cuxulon tyo. Yaꞌ ti a wotyot, c Yum, mi quejel c chumtyʌl ti beleꞌ ora.
14417	PSA 34:10	Qꞌuelela ti ñuc lac Yum, jatyetla i chaꞌañet bʌ la, Como maꞌan chʌ bʌ tyo yom i chaꞌañob muꞌ bʌ i qꞌuelob ti ñuc lac Yum.
14419	PSA 34:12	Laꞌla, calobiletla, ubibeñonla c tꞌan. Mi quej j cʌntisañetla bajcheꞌ yom laꞌ bʌcꞌñan lac Yum.
14422	PSA 34:15	Cʌyʌ simaronlel, mele chʌ bʌ wen. Jopꞌo a wajñel ti ñʌchꞌtyʌlel a pusicꞌal.
14430	PSA 34:23	Lac Yum mi quej i mʌñob loqꞌuel ti mulil i yajtoñelob chaꞌan mi yʌcꞌob ti cojlel, Machꞌan mi quej i yʌjqꞌuelob ti xotꞌ mulil jini muꞌ bʌ i tyajob i cotyʌntyel ti lac Yum.
14474	PSA 37:3	Chꞌujbin lac Yum ti a pusicꞌal, mele chʌ bʌ wen. Cheꞌ jini jasʌl mi quejel laꞌ wʌqꞌuentyel chʌ bʌ yom a chaꞌan cheꞌ mi quej a chumtyʌl ti jini lum.
14485	PSA 37:14	Jini simaroñoꞌ bʌ miꞌ locꞌsañob i yespada tiꞌ yotyot. Miꞌ sʌtsꞌob i wʌn tyeꞌ, Chaꞌan i jisañob jini pꞌumpꞌun bʌ, Chaꞌan i tsʌnsañob jini tyojoꞌ bʌ.
14491	PSA 37:20	Pero jini simaroñoꞌ bʌ mi quej i jilelob. I contrajob lac Yum mi quej i jilelob cheꞌ bajcheꞌ tyʌquinix bʌ pimel. Mi quejelob ti pulel, mi qujelob ti jilel cheꞌ bajcheꞌ butsꞌ.
14495	PSA 37:24	Cheꞌ mi yajlel, machꞌan mi junyajlel cʌytyʌl. Como lac Yum miꞌ chucben i cꞌʌb.
14507	PSA 37:36	Qꞌuele awilan, majlemix. Maꞌix chʌc tsiquil. Tic sʌclʌ jini winic, Machꞌan tic tyaja.
14508	PSA 37:37	Qꞌuele jini xucꞌul bʌ quixtyañu, jini tyoj bʌ. Ñʌchꞌʌl mi quejel i yajñel jini tyoj bʌ quixtyañu. Ñoj wen mi quejel i yujtyel yicꞌot.
14553	PSA 40:5	Tijicña jini quixtyañu muꞌ bʌ i chꞌujbin lac Yum tiꞌ pusicꞌal. Machꞌan miꞌ tsʌclen majlel jini muꞌ bʌ i chanꞌisan i bʌ, muꞌ bʌ i cʌyob jini melel bʌ tꞌan.
14554	PSA 40:6	C Yum Dios, wen cabʌl jini ñuc tyac bʌ a chaꞌlibal tsaꞌix bʌ a chaꞌle. Chʌncol a chʌc ñaꞌtyañon lojon. Maꞌan yambʌ bajcheꞌet. Muqꞌuic c sub a chaꞌlibal Mach chꞌujbi tsicol a melbal.
14556	PSA 40:8	Tic subeyet: Tyalon, choꞌon. Tsꞌijbubil chaꞌañon ti a jun:
14557	PSA 40:9	C Dios, cꞌajacña coj mic mel chʌ bʌ jach a wom. Lotyol a mandar tic pusicꞌal.
14558	PSA 40:10	Tic subu jini wen bʌ tꞌan baꞌ muchꞌquibilob cabʌl quixtyañujob. C Yum, mic wen sub a tꞌan. Wen a wujil maꞌ mʌcʌl c tiꞌ.
14560	PSA 40:12	C Yum, maꞌ maꞌ chʌquibeñon a pꞌuntyaya. Cʌñʌtyañon chaꞌan ti a pꞌuntyaya yicꞌot ti melel bʌ a tꞌan.
14562	PSA 40:14	Awocolic c Yum, locꞌsañon ti ili wocol ti yutslel a pusicꞌal. C Yum, cotyañon ti ora.
14564	PSA 40:16	Laꞌ i yubin ñoj bʌbʌqꞌuen bʌ tiꞌ pusicꞌal muꞌ bʌ i subeñon: Jajaja, cheꞌob, mi yʌlob ti caj c wocol. Laꞌ i chaꞌleñob quisin chaꞌan i mul.
14565	PSA 40:17	Laꞌ i yubiñob cꞌajacña bʌ i yoj ti pejtyelel muꞌ bʌ i sajcañet. Laꞌ i yʌlob ti beleꞌ ora ti pejtyelel muꞌ bʌ i pꞌuntyañetyob chʌncol bʌ i pijtyañob i cotyʌntyel ti a tyojlel: Ñoj ñucʌch lac Yum, cheꞌob.
14566	PSA 40:18	Pero joñon, pꞌumpꞌuñon. An tyo yom c wenlel, pero lac Yum miꞌ cꞌajtisañon: C Yum, ajcʌñʌtyajet c chaꞌan, laꞌ baꞌ añon ti ora. Ajcotyayajet c chaꞌan, C Dios, mach yom a jal pijtyan, choꞌon.
14645	PSA 46:3	Jin chaꞌan aunque jini mulawil mi nijcʌyel maꞌan lac bʌqꞌuen. Aunque mi nijcʌyel ochel wits ti xinil colem mar,
14646	PSA 46:4	Aunque wen cꞌam miꞌ chaꞌlen tꞌan jini witsꞌlaw bʌ jaꞌ, Aunque mi nijcʌyel wits chaꞌan ti jini jaꞌ, Machꞌan mi quejel lac chaꞌlen bʌqꞌuen.
14647	PSA 46:5	Jini río loqꞌuem bʌ baꞌan Dios Mi yʌqꞌuen cꞌajacña bʌ i yoj jini añoꞌ bʌ ti lum i chaꞌan bʌ Dios, Jini Chꞌujul bʌ Ajnibʌl i chaꞌañʌch jini Ñoj Ñuc bʌ.
14652	PSA 46:10	Miꞌ lajmisan guerra tyac cꞌʌlʌ ti pejtyel mulawil. Miꞌ bicꞌti xul jini wʌn tyeꞌ, miꞌ xul jini lanza tyac: Miꞌ pulbeñob i carreta tyac muꞌ bʌ i cꞌʌñob ti guerra tyac.
14653	PSA 46:11	Yom ñʌchꞌʌletla chaꞌan mi laꞌ ñaꞌtyan joñon Dioson. Mi quej i qꞌueloñob ti ñuc añoꞌ bʌ ti pañimil tyac. Mi quej c ñuc isʌntyel ti mulawil, cheꞌen.
14726	PSA 51:3	Dios, pꞌuntyañon chaꞌan cabʌl i yutslel a pusicꞌal. Tic ñusʌbeyet a mandar. Ñusʌbeñon c mul como wen a wujil pꞌuntyaya.
14735	PSA 51:12	Dios, chaꞌ melbeñon c pusicꞌal ti sʌc. Chaꞌ tsijibtisan c chꞌujlel ti tyoj.
14739	PSA 51:16	Dios, ñusʌbeñon c mul como tic chaꞌle tsʌnsa. Dios, cajcotyaya, mi quej cꞌʌybeñet a tyojel.
14740	PSA 51:17	C Yum, jambeñon c tiꞌ Chaꞌan mic sub a ñuclel.
14742	PSA 51:19	Jini muꞌ bʌ a mulan jiñʌch cheꞌ mi lojon c pecꞌ isan lojon c bʌ. I wenta tsʌnsʌbil bʌ a majtyan jini. Dios, machꞌan maꞌ tsꞌaꞌlen jini pecꞌ isʌbilix bʌ i pusicꞌal muꞌ bʌ i cʌy i mul.
15077	PSA 73:2	Pero joñon tij colel cʌyeꞌ c chꞌujbin Cheꞌ bajcheꞌ maꞌix xucꞌul coc, colel i tyʌjtsꞌel.
15087	PSA 73:12	Qꞌuele awilan, jiñʌch jini machꞌʌ baꞌan ochem tiꞌ tꞌan Dios, muꞌ bʌ i wen ocꞌan chʌ bʌ an i chaꞌañob. Maꞌan majch miꞌ ticꞌob.
15093	PSA 73:18	Melel, ñoj bʌbʌqꞌuen mi yajlelob yaꞌ baꞌ waꞌalob. Jatyet, Dios, mi quej a junyajlel jisañob.
15096	PSA 73:21	Cheꞌ ñac tic chꞌʌmbe i sujmlel, ñoj chꞌʌjyem ti cubi. Tic chaꞌle pensal.
15100	PSA 73:25	Machꞌan yambʌ muꞌ bʌ c chꞌujbin yaꞌ ti panchan. Com jatyet jach wʌꞌ ti mulawil, mach com yambʌ.
15444	PSA 90:1	C Yum, lojon c chumlibet cꞌʌlʌ ti oniyi. Cheꞌ ñac max tyo a mele colem wits tyac, Cheꞌ ñac max tyo a mele jini lum yicꞌot mulawil, Diosetyʌch. Cꞌʌlʌ oniyix cꞌʌlʌ ti beleꞌ ora, Dioset.
15446	PSA 90:3	Mi sajtyel quixtyañu, mi sujtyel ti tsꞌubejn cheꞌ maꞌ wʌcꞌ a tꞌan.
15449	PSA 90:6	Lajalobʌch bajcheꞌ jam muꞌ bʌ i pasel cheꞌ mi sʌcꞌan. Cheꞌ mi yicꞌan tsepbilix, tyʌquinix.
15453	PSA 90:10	I ñajtyʌlel lojon c jabilel jiñʌch setenta. Mi pꞌʌtyʌlon lojon, mi lojon c tyaj ochenta jabil. Mi lojon c ñusan tyʌts tyac bʌ troñel yicꞌot wocol. Mi jilel lojon c jabilel ti ora. Mi lojon c sajtyel.
15462	PSA 91:2	Mi quej c sub: Lajalʌch lac Yum bajcheꞌ tsꞌajc muꞌ bʌ i joy mʌc otyot baꞌ mic putsꞌel. C Diosʌch, chʌncol bʌ j chꞌujbin, choꞌon.
15464	PSA 91:4	Dios mi quej i cʌñʌtyañet ti yebal i wichꞌ yubil, cheꞌ bajcheꞌ juncojt ñaꞌ mut miꞌ lutsꞌ i yal. I xucꞌtyʌlel i pusicꞌal Dios, jiñʌch lac mʌctijib baꞌ mi laj cʌñʌtyʌntyel.
15466	PSA 91:6	Mi jinic wocol bʌ cꞌamꞌan tyac muꞌ bʌ i ñumel ti acꞌbʌlel, mi jinic muꞌ bʌ ti jisaya ti xinqꞌuinil.
15467	PSA 91:7	Aunque ti tsʌnsʌntiyob jumpꞌej mil ti a tꞌejl Yicꞌot diez mil yaꞌ ti ñoj bʌ a cꞌʌb, maꞌan mi quej i tyajet.
15471	PSA 91:11	Como jini Ñoj Nuc Bʌ tsaꞌix i yʌqꞌue ajtroñel i chaꞌan chꞌoyol bʌ ti panchan, chaꞌan i cʌñʌtyañet baꞌical jach maꞌ majlel.
15476	PSA 91:16	Mi quej c tijicñisan ti cabʌl i jabilel. Mi quej j cotyan, cheꞌ mi yʌl Dios.
15521	PSA 95:1	Conla, laꞌ lac chaꞌlen cꞌay tiꞌ tyojlel lac Yum. Laꞌ lac pejcan Dios, tijicña lac pusicꞌal. Jiñʌch cheꞌ bajcheꞌ xajolel baꞌ chꞌujbi lac muc lac bʌ. Mux i cotyañonla.
15525	PSA 95:5	I chaꞌañʌch jini colem jaꞌ, como jini tiꞌ mele. Tiꞌ mele jini lum tiꞌ pꞌʌtyʌlel.
15528	PSA 95:8	Mach tsʌtsꞌac laꞌ pusicꞌal cheꞌ bajcheꞌ yaꞌ ti Meriba yicꞌot yaꞌ ti Masah yaꞌ ti tyʌquin bʌ joch lum. Cheꞌ ñac tsiꞌ subeyob Moisés: Mach wʌꞌic an Dios la quicꞌot ti ili tyʌquin bʌ joch lum, cheꞌob.
15530	PSA 95:10	Cꞌʌlʌ cuarenta jabil cꞌux ti cubi tic pusicꞌal ti caj bajcheꞌ tiꞌ chaꞌleyob. Ti cʌlʌ: Cabʌl miꞌ tyajob i ñajiyel tyac jini quixtyañujob. Mach i cʌñʌyob c bijlel, choꞌon.
15575	PSA 100:1	Quixtyañujob ti pejtyelel mulawil, yom tijicña mi laꞌ chaꞌlen tꞌan cheꞌ mi lac tyaj ti tꞌan lac Yum.
15579	PSA 100:5	Como ñoj wen lac Yum. Mi quej i yajñel i yutslel i pusicꞌal ti pejtyelel ora. Mi quej i pʌsbeñob i xucꞌtyʌlel i pusicꞌal la calobilob, la quijob yicꞌot i yijob la quijob cꞌʌlʌ ti beleꞌ ora.
15589	PSA 102:2	C Yum, ubibeñon coración. Laꞌ cꞌotic c tꞌan yaꞌ baꞌ añet.
15591	PSA 102:4	Tyomocña miꞌ sʌc jilel j qꞌuin tyac cheꞌ bajcheꞌ butsꞌ. Chʌncol i lejmel c bʌquel yubil, cheꞌ bajcheꞌ xutyuntyeꞌ chʌncol bʌ i pulel.
15593	PSA 102:6	Maꞌañix c bʌcꞌtyal. Tyojo bac jachix, ti caj cabʌl c pensal.
15597	PSA 102:10	Chʌncol j cꞌux i tyʌñil cꞌajc yubil, i wenta c waj, Xʌbʌl chʌncol cap yicꞌot i yaꞌlel c wut.
15598	PSA 102:11	Chaꞌan ti caj wen michꞌet, Ti a tyejcheyon, ti a chaꞌ chocoyon jubel.
15599	PSA 102:12	Ora jach mi ñumel j qꞌuin tyac. Mi tyamꞌan axñal tic pusicꞌal yubil, cheꞌ bajcheꞌ mi tyamꞌan ti ochꞌan qꞌuin. Ti tyʌquiyon cheꞌ bajcheꞌ mi tyʌquin jam.
15600	PSA 102:13	Jatyet, c Yum, maꞌan baꞌ bʌ ora mi quejel a jilel. Mi quejel i bej sujbel a ñuclel ti pejtyelel ora.
15601	PSA 102:14	Mi quejel a tyʌlel a pꞌuntyan Sión, jini chꞌujul bʌ lum. Come jiñʌch i yorojlel ti a wʌ yajcʌ a pʌsꞌeñob a wutslel.
15603	PSA 102:16	Ti caj maꞌ pꞌuntyan Sión, jini mach bʌ i chaꞌañobic Dios mi quejel i bʌcꞌñañob i cꞌabaꞌ lac Yum. Ti pejtyelel jini yumʌlob ti mulawil mi quej i bʌcꞌñañetyob chaꞌan ti caj a ñuclel.
15605	PSA 102:18	Miꞌ jacꞌbeñob i yoración jini pꞌumpꞌuñoꞌ bʌ, Maꞌan miꞌ pꞌajbeñob i tꞌan.
15606	PSA 102:19	Laꞌ tsꞌijbuntic ti jun bajcheꞌ miꞌ chaꞌlen lac Yum chaꞌan miꞌ qꞌuelob la calobilob, la quijob yicꞌot i yijob la quijob cꞌʌlʌ ti beleꞌ ora. Jini max tyo bʌ baꞌan tiꞌ chꞌocʌyob mi quej i subob i ñuclel lac Yum.
15608	PSA 102:21	Tsaꞌix yubibeyob i ʌjʌcñiyel jini cʌchʌloꞌ bʌ yubil, Tsaꞌix i ñaꞌtyʌ i yʌcꞌob ti libre jini chʌncol bʌ i sajtyelob.
15610	PSA 102:23	Cheꞌ yaꞌ muchꞌquibilob tyʌlel, jini loqꞌuemoꞌ bʌ ti cabʌl lum tyac Chaꞌan i chꞌujutisañob lac Yum.
15611	PSA 102:24	Lac Yum tiꞌ jisʌ c pꞌʌtyʌlel ti xin bij yubil, Tiꞌ comꞌisʌbeyon j qꞌuin tyac.
15612	PSA 102:25	Tic sube: C Dios, mach a pʌyon majlel cheꞌ max tyo ñoxoñix. Cuxulet ti pejtyelel ora. Junlajalet tiꞌ tyojlel calobilob, quijob yicꞌot i yijob quijob cꞌʌlʌ ti beleꞌ ora.
15614	PSA 102:27	Mi quej i jilel majlel, pero bej cuxulet. Mi quej i luꞌ tsuculiyel cheꞌ bajcheꞌ bujcʌl. Mi quej i qꞌuextiyel cheꞌ bajcheꞌ mi laj qꞌuextyan lac bujc. Mi quej i yʌjñel.
15615	PSA 102:28	Pero mach cheꞌiquet, mach a wujil ñoxꞌan. Mach jilet ti pejtyelel ora.
15616	PSA 102:29	Xucꞌul mi quejel i bej ajñelob ti yij ti yij, i jiñʌjlelob jini ajtroñelob a chaꞌan. Mi quej a cotyañob.
15624	PSA 103:8	Lac yum miꞌ chaꞌlen pꞌuntyaya, uts i pusicꞌal. Jal mi michꞌan. Cabʌl miꞌ pꞌuntyañonla.
15628	PSA 103:12	Cheꞌ bajcheꞌ i ñajtlel mulawil cꞌʌlʌl ti pasoꞌ qꞌuin cꞌʌlʌl ti pꞌʌjquib qꞌuin, Chʌꞌʌch i ñajtlel tiꞌ chocbeyonla majlel lac mul.
15629	PSA 103:13	Cheꞌ bajcheꞌ tyatyʌlob miꞌ pꞌuntyan i yalobilob, Cheꞌ jeꞌel lac Yum miꞌ pꞌuntyan jini muꞌ bʌ i bʌcꞌñañob.
15630	PSA 103:14	Como yujil cꞌuñonla, yujil melbilonla ti tsꞌubejn.