3	GEN 1:3	Geb degine, Bab-Dummad sogded: “Neg-meegwad nagu.” Agi, neg-meegwad nagunonikid.
6	GEN 1:6	Geb degine, Bab-Dummad sogdebalid: “Neg-ollor-dummad nagu, adi, diimar bachikii naguegar.”
9	GEN 1:9	Geb degine, Bab-Dummad sogdebalid: “Dii-mogir-arad-urba-naid bachiki nagu, adi, neg-dinnagwad naguegar.” Deyob gunonikid.
11	GEN 1:11	Agi, Bab-Dummad sogdebalid: “Bela ibmar-durbamar napagi nagu: Gaganmar-gwag-nikad ambikumar, degine, akar-akar sapi-sunna-sanmakmalad, e-sangi gwag-nika gusun. Ibmar-durbamar akar-akar bela na egad-egad-balibimaladba ambikumarsun.” Deyob gunonikid.
12	GEN 1:12	Geb napagi ibmar-durbamar nagunonikid: Gaganmar-gwag-nikamalad bela na akar-akar egad-egad-balibimaladba, degi, sapimar-e-sangi-gwag-nikumalad bela akar-akar na egad-egad-balibimaladba ambikunonimalad. Bab-Dummad dakdebalid, we-ibmar bela nueganbi.
14	GEN 1:14	Geb degi, Bab-Dummad sogdebalid: “Nibneggi gwallumar nagu, adi, neg-mutikid, neg-ibgined-ebo bachikii guegar. Adi, ibagan-nagumaid, yolamar-nagumaid, birgamar-nagumaid magar daklegegar.
16	GEN 1:16	Bab-Dummad gwallu-dummagan gwabo obinyenonikid: Gwallu-dummad, neg-ibginedgi negdaknai guegar. Gwallu-senigwaddi, neg-mutik negdaknai guegar. Degine, niisgwamar obinnisbalid.
20	GEN 1:20	Geb degi, Bab-Dummad sogdebalid: “Diigi ibmar-dulamar bela akar-akar ambikumar, degine, nuumar ambikumar, we-napneggi nabir niba gukudii gumalagar.”
22	GEN 1:22	Bab-Dummad a-ibmar-durgangi ise-nued-binsaedgi amarga sogded: “Bemar dula-mergumai gumarsun. Demargi bukidar-dula-mergumai gumarsun. Degine, nuumar, bemar we-napneggi bukidar-dula-mergumai gumarmosun.”
24	GEN 1:24	Geb degi, Bab-Dummad sogdebalid: “Napagi bela ibmar-durgan na egad-egad-balibimaladba ambikumar: Ibmar-durgan-sunna-akwilemalad, ibmar-durgan-napagi-garmakdimalad, ibmar-durgan-sapurbarmalad, bela na egad-egad-balibimaladba ambikumar.” Deyob gunonikid.
26	GEN 1:26	Geb degi, Bab-Dummad sogdebalid: “Emisgindi, anmar, dule-obinyesun, anmar-sunnague anmar imakoed. Dulede, we-ibmar-durganmargi gangued-nika guoed: Uamargi, nuumargi, ibmar-durgan-sunna-akwilemaladgi, ibmar-durgan-sapurbarmaladgi, ibmar-durgan-napagi-garmakdimaladgi, bela we-ibmarmargi we-napneggi gangued-nika guoed.”
28	GEN 1:28	Bab-Dummad we-dulemargi ise-nued-binsasadba, ega sogded: “Bemar mimmigan-bukidar nikumar. We-napneggi dula-bukidar urbemar, degi, bela we-napneg-ugakaase ambikumar. Bemar we-napneggi be gangued-nikadba bela we-ibdurganmargi be obindii gumarsun: Uamargi, nuumargi, degi, ibmar-durgan-napagi-garmakdimaladgi.”
29	GEN 1:29	Geb degi, Bab-Dummad dulega sogdebalid: “We-napneggi bela gagan-nabir-gwag-nikumalad, degi, bela sapimar-e-sangi-gwag-nikumalad, an bemarga uked. A-ibmar-durba bela bemar-masga guoed.”
30	GEN 1:30	Bab-Dummad we-napneggi bela we-ibmar-durganga sogdebalid: “Bela ibdula-unimaladga, bela nuumarga, bela ibdurgan-napagi-garmakdimaladga, bela gagan-ara-aramalad e-masga-guega an ega uked.” Deyob gunonikid.
47	GEN 2:16	Agine, Bab-Dummad-Jehová dulega igar-uksad: “We-nainu-nuedgi sapimar-bukwad-e-sanmar sunna bela be gunned.
49	GEN 2:18	Geb degine, Bab-Dummad-Jehová sogded: “Dule wargwen-gudiir, akuu dakleged. Degisoggu, dulega e-abirgined an imakoed, adi, e-bendaked-nuedga guegar.”
51	GEN 2:20	Weyobi dule bela we-ibmar-durgan: Ibmar-durgan-sunna-akwilemaladga, bela nuumarga, bela ibmar-durgan-sapurbarmaladga, nug amisad. Degi-inigwele, Adánʼgardi e-bendaked sate gusad.
54	GEN 2:23	Adán ome-dakdegu, sogded: “Ar wedi an-galado, ar ade, an-gargi obinnilealedid. Wedi an-sanado, ar ade, an-sangi obinnilealedid. Ar Bab-Dummad we-ome macheredgi obinnisad. We nugguodo, Omeye.”
57	GEN 3:1	Bab-Dummad-Jehová we-napneggi bela ibmar-durgan obinnisad. Amar-abargi, naibedi ibmar-durgan-baiganba dule-binsaed-gaedgi bur buledid. Naibe omega sogded: —¿Etto, Bab-Dummad bemarga sogsa: ‘We-nainu-nuedgi sapimar-gwichid-e-san melle bipisaale gunmaloye?’
58	GEN 3:2	Ome naibe-abin sogded: —Ar igid-sapi-e-san anmar we-nainu-nuedgi gunbimala, sunna bela anmar gunmalad.
59	GEN 3:3	Unnila nainu-nued-abargi sapi-wargwen-gwichid-e-sanbi geg anmar gunned. Bab-Dummad anmarga sogsado: ‘Melle a-sapi-e-sandi be gunmaloye, degine, melle be ebumarbaloye. Ar bemar guchale, bemar burgwemaloye.’
60	GEN 3:4	Ar naibedi omega sogded: —Suli, degisuli. Bemar gwen burgosuli.
65	GEN 3:9	Bab-Dummad-Jehováʼdi macheredse goted, ega sogded: —¿Bia be gudii?
66	GEN 3:10	Dule abin-sogded: —An be-itosad, nainu-nued-imbaba be gudii. Ar an uka-swili-gudisoggu, an be-dobee itoged. A-ular, an be-idu dukusad.
67	GEN 3:11	Geb degine, Bab-Dummad macheredse egichialid: —¿Ar doa bega sogsa, be uka-swilii gudiiye? An bega sogsad: ‘Sapi-wargwen-e-san mer be gunnoye.’ ¿A-sapi-e-sande be guchasi?
68	GEN 3:12	Dule Bab-Dummad-abin sogded: —Ome-anbo-garmakdiguega be anga-uksadi, a, anga sapi-e-san uksad. Geb an guchasunnad.
69	GEN 3:13	Geb degine, Bab-Dummad-Jehová omese egichided: —¿Ibiga deyob be imaksa? Ome abin-sogded: —Ar naibe an-yardaksad. A-ular, sapi-e-san an guchad.
70	GEN 3:14	Geb degine, Bab-Dummad-Jehová naibega sogded: “Ar weyob be imaksasoggu, ibmar-durgan-akwilemaladba, degi, ibmar-durgan-sapurbarmalad-baiganba, bedi bur bule be ukabsalesun. Emi-iba-onodedgi, be napagi unimakdii gusun, degine, be-burgwedse, napa-madii be gusun.
72	GEN 3:16	Bab-Dummad omega sogded: “Be sikwi-bakalile, nunmaked-dummad an bega ukoed, nunmakedgi be ugakguoed. Be-suibina be sogdii guoed. Be-sui be-iduedga guoed.”
73	GEN 3:17	Bab-Dummad macheredga sogdemogad: “Ar be-ome-sogedba, sapi-e-san-mer-gunnoye an bega sogsadi, be guchasoggu: Deyob be imaksad-ular, we-napa iwiles nagusun. Be burgwedse ise-arbaar-alamakdiidgi, be masgunned-amidii gusun.
78	GEN 3:22	Geb degine, Bab-Dummad-Jehová sogded: “Emigindi, dule anmar-sunnaa gunonimogad. Dulemarde ibmar-nued-wisi, degine, ibmar-isgana-wisi gunonikid. Ar dule sapi-e-san-dula-dule-imaked-guchale, degisadegu dula-gudii guoed. Degisoggu, melle dulemar we-sapi-e-san gwanegala, degi, melle gunnegala, dulemar-nainu-nuedgi-gudiid, an onogoed.”
81	GEN 4:1	Adán e-ome-Evaʼse-gochagu, Eva gurgin-nika gunonikid. Evaʼga susugwa uklenonikid, Caínʼye onugsasad. Ar Eva sogded: “Bab-Jehová na e-sogedba susugwa anga uksad.”
86	GEN 4:6	Geb degine, Bab-Jehová Caínʼga sogded: “¿Ibiga sae be itoge? ¿Ibiga be-wagar urwakwaa daklege?
89	GEN 4:9	Geb degine, Bab-Jehová Caínʼse egichided: —¿Bia be-urba-Abel nade? Caín, Bab-Jehová-abin sogded: —An wissuli. ¿Ar ande an-urba-edarbedsi?
90	GEN 4:10	Bab-Jehová Caínʼga sogded: —Ar wede, ¿ibi be imaksa? Be-urba-ablis be eosad. Emide, a anga sogeyob an itoged: ‘Anga be igar-naboye.’
93	GEN 4:13	Geb degine, Caín, Bab-Jehová-abin sogded: —Weyob sabsur be an-odurdakele, gwen guo an itosulid.
95	GEN 4:15	Bab-Jehová Caín-abin sogded: —Suli, deyob guosuli. Ar dule be-oburgwele, we-dule-be-oburgwisad ilagugle (7) bur bule sabsur-odurdaklegoed. Geb degine, Bab-Jehová Caínʼgi wilub nasiksad, adi, dule-gwensak Caín-dakalile, melle oburgwegar.
99	GEN 4:19	Lamecʼdi ome-warbo-nikusad: Wargwen Adaʼye nugad, baiddi Zilaʼye nugad.
103	GEN 4:23	Ibagwengi, Lamec e-omemarga sokalid: “Ada, Zila, an bemarga ibmar-sogoedi, nue be an-itomalo: Dule naibi-an-imaksad-ular, an oburgwisad. Machigwa an-sarsosad-ular, an oburgwisad.
105	GEN 4:25	Adán e-omese gochabargu, Eva susugwa-nikunonikid. Geb Eva sogded: “Caín, e-urba-Abel-oburgwissoggu, Bab-Dummad susugwa anga Abel-anar uknonikid.” A-ular, Eva a-susugwa Setʼye onugsasad.
108	GEN 5:2	Bab-Dummad machered ome-ebogwa obinnisad. Wemargi ise-nued binsasad. Bab-Dummad dulemar-obinnisgua, amarga sogsad: “Bemar, duleye nugguoye.”
135	GEN 5:29	Noéʼye e-machi-onugsasad. Ar ade, sogded: “Bab-Jehová we-napa-ukabsassoggu, a-ular, anmar ise-alamaknai arbaergebed. Ar emigindi, we-machigwa anmarga obunnoged ukoed.”
138	GEN 5:32	Noé, bato birga-dulataled-ilatar (500) nikagua, e-masmala gwalulenonikid: Sem, Cam, degi, Jafet.
141	GEN 6:3	Agi, Bab-Jehová sokalid: “Ar dulemar unnila dule-gumarsoggu, An-Burba dule-dula-imaked degisadegu eba gudii guosulid. Degisoggu, dulemar burgoed. A-ular, unnila birga-dulanergwa (120) dula-bukwa gumaloed.”
144	GEN 6:6	Degisoggu, Bab-Jehová ulubgi nue bukib-binsaedba, sogded: “Dulemar an we-napneggi urbissulina, bur nabirinad.”
145	GEN 6:7	A-ular, Bab-Jehová sogded: “An dule-obinnisad we-napneggi an obelogodo. Degine, bela ibmar-durgan, bela ibmar-durgan-napagi-garmakdimalad, degi, nuumar an obelobalodo. An we-ibmarmar-obinnisadgi, nue-nunmak an itoged.”
147	GEN 6:9	Noé-igar weyob maid: Noé ibmar-inniki-imaked-duled. A-ibagangine, dule Noéʼgi akar-ibmar-soged sated. Noé Bab-Dummad-walikaa nanadii gusad.
148	GEN 6:10	Noé machimala-walapaa nikusad: Sem, Cam, Jafet.
151	GEN 6:13	A-ulale, Bab-Dummad Noéʼga sogded: “Bela dulemar an osulosokalid. Dulemar galagwensulidaed, muchub-muchub sabsur-imakmaladi yaisulid. A-ulale, dulemar an obelogoed, degine, we-napneg-naid an obelobaloed.”
152	GEN 6:14	Bab-Dummad sogdebalid: “Noé, ur-dummad na be sobo. Suar-goferʼye-nugad-e-urgomar be ebugoed. Ur-soboedgi gwardumar be sioed. Ur-dummad-be-soboeddi magaba, degine, yaba baryagi bela be magoed.
153	GEN 6:15	Weyob ur-dungu be soboed: E-sugued, dali-dulapaa-gakambe-gakatar (75) be imako. E-matardungueddi, daliambe-gakabo-abala (12½) be imako. E-nibgued, daligugle-abala (7½) be imakbalo.
156	GEN 6:18	”An bebo igar-meso. We-ur-dummadyaba be dogo: Be, be-ome, be-masmala, degi, be-balamar.
158	GEN 6:20	Bela ibmar-dula na egad-egad balibimaladba, abin-abin war-warbo ur-dummadyaba beba ubomogo: Bela nuumar, bela ibmar-durgan, bela ibmar-durgan-napagi-garmakdimalad, adi, bela amar durgumarmogagar.
161	GEN 7:1	Geb a-sorba, Bab-Jehová Noéʼga sogded: “Emi-ibagangi, dulemar-bukwad-abargi, unnila bebi an-asabin inniki nanadiid. Degisoggu, be, be-gwenadganmala ur-dummadyaba be doge.
162	GEN 7:2	Geb bela ibmar-durgan-swilidikmalad: Machered-walagugle (7), ome-walagugle, ur-dummadyaba be oubogo. Ibmar-durgan-swilidiksurmaladdi unnila machered-wargwen, ome-wargwen be oubogo.
163	GEN 7:3	Nuumala amba deyob be imakbaloed: Nuumar-swilidik-akar-akar-nikadi, gwagugle-gwagugle (7-7), abirgunagwar-abirgunagwar ur-dummadyaba be oubogo. Adi, we-napneggi bela ibmar-durgan, nuumarse-bakar, egad-egad balibimalad mer e-dula berguegar.
167	GEN 7:7	Noé-ur-dummad-sobsadyaba-dogsamaladi, wemalad: Noé, e-ome, e-masmala, degi, e-balamar, adi, muusailaba melle burgwemalagar.
173	GEN 7:13	Noé, ur-dummadyaba-dogsad-ibagi, wemar eba dogsamarmogad: E-ome, e-machi-Sem, e-machi-Cam, e-machi-Jafet, degi, e-masmala-omegan. We-dulemarbi ur-dummadyaba dogsamalad.
174	GEN 7:14	Wemarba bela ibmar-durgan-na-egad-egad-balibimalad dogsamarbalid. A-ibdurgan wemalad: Ibmar-durgan-sapurbarmalad, ibmar-durgan-sunna-akwilemalad, ibmar-durgan-napagi-garmakdimalad, nuumar, degi, bela ibmar-sakan-nikamalad. We-ibmar-durgan, Noéʼba ur-dummadgi dogsamarmogad.
181	GEN 7:21	Weyob bela ibmar-durgan-we-napneggi-bukwad burgwisad: Nuumar, ibmar-durgan-sunna-akwilemalad, ibmar-durgan-sapurbarmalad, ibmar-durgan-unimalad, degi, bela dulemar burgwismarmogad.
183	GEN 7:23	Weyob bela we-napneggi we-ibmarmar obelolesad: Dulemar, ibmar-durgan, ibmar-durgan-napagi-garmakdimalad, degi, nuumar, amar bela burgwismalad.
199	GEN 8:15	Geb degi, Bab-Dummad Noéʼga sogded:
201	GEN 8:17	Ibmar-dula-gudidimalad ur-dummadyaba-bukwad bela be onobalo: Nuumar, ibmar-durgan, degi, ibmar-durgan-napagi-garmakdimalad, adi, amar bela we-napneg-naid-ugakaase mimilemalagar. Deginbali, dula ichesur mergumalaga, we-napneg-naidgi bela ambikumalagar.”
202	GEN 8:18	Geb degine, ur-dummadyaba-bukwadgi nosmarsunnad: Noé, e-ome, e-masmala, degi, e-balamar.
203	GEN 8:19	Bela ibmar-durgan ur-dummadyaba-bukmaladi na-egad-egad-balibimaladba, ainismarmogad: Bela ibmar-sapurbarmalad, degi, bela ibmar-durgan-akwilemalad, bela ibmar-durgan-napagi-garmakdimalad, bela nuumar, ur-dummadgi ainismalad.
205	GEN 8:21	Ibmar-ogumakaled-yeer-yapanned Bab-Jehováʼse-mosgu, Bab-Jehová sogded: “We-napneg dulemar-isgued-ular, bar an ukabsaosulid. Ar dulemar gusgu na sapingwagwad-akar e-gwagegi unnila isguedginbi binsadimalad. Degine, an emi-imaksadyob, muusailaba bela ibmar-dula-gudidiid bar an ogilogosulid.
207	GEN 9:1	Bab-Dummad Noéʼgi, degi, e-masmalagi ise-nued binsasad. Weyob ega sogsad: “Mimmigan-bukidar be nikumar, we-napneggi dula be omelomar, bela we-napneg-ugakaase ambikumar.
208	GEN 9:2	Bela we-napneggi ibmar-dula-gudidimalad be-dobedba bemar-asabin gwakidmaloed: Bela ibmar-durgan-gukumalad, bela ibmar-durgan-napaginmalad, bela ibmar-durgan-napagi-garmakdimalad, bela ibmar-durgan demarginmalad. Bela-a-ibmar-durgangi be obine gumaloed.
214	GEN 9:8	Bab-Dummad Noéʼga, degi, e-masmalaga sogdebalid:
216	GEN 9:10	Degine, bela ibmar-dulamalad bemarba ur-dummadyagi-bukwa-ainisad: Nuumar, ibmar-durgan-sunna-akwilemalad, ibmar-durgan-sapurbarmalad. ”Bela we-ibmar-durgan-we-napneggi-bukmaladbo an igar mesoed.
217	GEN 9:11	An-bemar-ebo-igar-mesoedi gwen gwagosulid: Bela dulemar, degine, bela ibmar-durgan muusailagi bar an ogilogosulid. We-napneg obelogega bar muusaila murosulid.
218	GEN 9:12	”An bemar-ebo, degine, an bela ibmar-durganbo-igar-mesnaidi, degisadegu maiguoed. A-e-wilubgan weyob maiguoed: Sue maiguoed.
224	GEN 9:18	Noé-machimala ur-dummadyaba-nosmaladi, wemardo: Sem, Cam, Jafet. Camʼde, Canaán-e-babad.
230	GEN 9:24	Noé nue-wibamasgu, atakalid. E-machi-bipigwad igi e-imaksa deyob, wisgusgu sogded:
232	GEN 9:26	Geb degi, Noé sogdebalid: “Sem-e-Bab-Dummad-Jehová, a-e-nug odummolesun. Sem-maiga Canaán gudii gusun.
236	GEN 10:1	Noé-masmala, wemalad: Sem, Cam, Jafet. Wemarde muusaila-mulusad-sorba, na mimmigan nikusmalad. Noé-masmala-e-wagan ambikusmalad, wemalad:
237	GEN 10:2	Jafet-masmala, wemalad: Gomer, Magog, Madai, Javán, Tubal, Mesec, degi, Tiras.
238	GEN 10:3	Gomer-masmaladi, wemalad: Askenaz, Rifat, Togarma.
239	GEN 10:4	Javán-masmaladi, wemalad: Elisa, Tarsis, Quitim, degi, Dodanim.
241	GEN 10:6	Cam-masmala, wemalad: Cus, Mizraim, Fut, degi, Canaán.
242	GEN 10:7	Cus-masmaladi, wemalad: Seba, Havila, Sabta, Raama, degi, Sabteca. Raama-masmaladi, wemalad: Seba, Dedán.
244	GEN 10:9	Nimrod, Bab-Jehová-nabir-egi-binsasadba sapurba ibmar-maked-dule gusad. A-ulale, weyob-sogleged: “Dule-Nimrodʼyob ibmar-maked-duleye.”
245	GEN 10:10	Nimrod, we-neggweburmargi negsemai gusad: Babelʼgi, Erecʼgi, Acadʼgi, degi, Calneʼgi. We-neggweburmar, Sinar-yargi bukwagusad.
246	GEN 10:11	Geb Nimrod Sinar-yargi-nodegusgu, Asiria-yarse nadegusad. Agi, we-neggweburmar urbidapid: Nínive, Rehobot, Cala, degi, Resén.
248	GEN 10:13	Mizraim-wagan, wemalad: Ludim, Anamim, Lehabim, Naftuhim,
251	GEN 10:16	Canaán-wagan, wemalad: Jebuseo-dulemar, Amorreo-dulemar, Gergeseo-dulemar,
254	GEN 10:19	Canaán-dulemar e-yar-gasadi, wemalad: Sidón-neggweburgi onoded, Gerar-yalasik, Gaza-neggweburse warmaksad. We-yar-e-neggweburmarde, wemalad: Sodoma, Gomorra, Adma, degine, Zeboimʼsik, Lasa-neggweburse.
257	GEN 10:22	Sem-masmala, wemalad: Elam, Asur, Arfaxad, Lud, degi, Aram.
258	GEN 10:23	Aram-masmaladi, wemalad: Uz, Hul, Geter, Mas.
260	GEN 10:25	Heber machimala-warbo nikusmogad: Machi-sailagined Pelegʼye nugad. Ar ade, a-ibagangi dulemar aisakided. Peleg-e-urba, Joctánʼye nugad.
261	GEN 10:26	Joctán-masmala, wemalad: Almodad, Selef, Hazarmavet, Jera,
270	GEN 11:3	Ibagwengi, na ga muchub-muchub sokarmalad: “Anmar dakebinne, anmar napa-ginnid akwayob dutusuli sobe, geb degine, anmar soogine ogumakar imakoed.” Weyob akwa-anar napa-ginnid-akwayob-dutusuli-sobaled ebusmalad, degine, barya ebusmarbalid, ebo acha-acha imakegar.
271	GEN 11:4	Geb a-sorba, sogdemarbalid: “Anmar dakebinne, anmar neggwebur-dummad sobmala. Geb neg-matusulid nibnegse-warmakedse, anmar sobbaloed. Anmar deyob imakele, bela anmar nug-nika gumaloed, dule-dummaganga anmar gumaloed, degine, adi, mer anmar we-napneggi aisakimalagar.”
273	GEN 11:6	Geb Bab-Jehová binsaded: “Wemar, unnila dulemar-soggwenna gued, unnila gaya-soggwenna sunmakmalad. We-arbaedgebe-imaklenaid-obelosmalale, sogdamarbaloed, arbaed-baid anmar imakmarbarye. Degisoggu, bar galegosurmalad.
277	GEN 11:10	Wemar, Sem-e-wagan gumalad: Birgabogus muusaila-nasad-sorba, Sem-machi-Arfaxad gwalulesad. Deunni, Sem birga-dulatar (100) nikad.
294	GEN 11:27	We, Taré-e-igar: Taré, Abram-e-babad. Nacor, degi, Harán amba Taré-masmalamogad. Haránʼde, Lot-e-babad.
298	GEN 11:31	Taré Canaán-yarse-naega Caldea-dulemar-yargi Ur-neggweburgi noar gusad. Taré na eba wemar sear gusad: E-machi-Abram, e-wagwa-Lot Harán-machi, degine, e-bala-Sarai e-machi-Abram-ome. Degi-inigwele, Taré, Harán-neggweburse-mosgu, agi megidapmalad.
300	GEN 12:1	Ibagwengi, Bab-Jehová Abramʼse gornonikid, ega sognonikid: “Be-neggweburgi be noe, be-gwenadgangi be bangu, be-bab-neggi-be-gudiid be nae. An bega neg-oyogoedse be nae.
304	GEN 12:5	Abram Canaán-yalase-argua, wemar eba sealigusad: E-ome-Sarai, e-niga-Lot, e-maimar-Haránʼgi-amisad. Degine, na ibmar-nikad bela sealigusbalid. Abram, degi, eba-nadapmalad Canaán-yarse modapmarsunnad.
306	GEN 12:7	Agine, Bab-Jehová Abramʼse magarosad, ega sogded: “We-yar an be-waganga ukoed.” Agine, Abram Bab-Jehováʼga-ibmar-ogumakar-ukleged-aila sobsad, ar ade, Abram soged, Bab-Jehová wegi anse magarosaddeeye.