24	GEN 1:24	Maabaho Mulungu kalonga, “Leka isi ilave chila modeli mbasakanyo ya vilumbe vili na ugima, wanyama wowofugigwa na wang'onyo wotambala na wanyama wa kumbago,” ilawilila ivo.
25	GEN 1:25	Mulungu kausa chila modeli mbasakanyo ya wanyama wa kumbago na chila modeli ya wanyama wowofugigwa na chila modeli ya wang'onyo wotambala. Mulungu kawona vinoga.
26	GEN 1:26	Maabaho Mulungu kalonga, “Lelo chimulumbe munhu yalingile fana cheye. Yatawale somba wa mwiibahali na ndege woguluka na wanyama wowofugigwa na isi yose na wang'onyo wose wowotambala.”
27	GEN 1:27	Ivo Mulungu kalumba munhu, yalingile fana yeye mwenyewo. Kawalumba mulume na muke.
40	GEN 2:9	Mndewa Mulungu koteza mibiki kulawa muna iisi, chila modeli ya mibiki yoinogeza na yoikwima matunda yofaya kwa ndiya. Hana uludonho lwa mgunda uwo kukala na mbiki woulava ugima na mbiki wa kuwatendeza wanhu wayamanye yanogile na yehile.
45	GEN 2:14	Zina da lwanda lweketatu ni Tigili, ulo lokulumila banzi ya ulawilo wa zua wa isi ya Ashulu. Zina da lwanda lwekane ni Efulati.
49	GEN 2:18	Maabaho Mndewa Mulungu kalonga, “Havinogile bule munhu kukala yaidumwe. Nizamuusila mtazi yomfaya.”
51	GEN 2:20	Ivo mulume iyo kaweng'ha mazina wanyama wofugigwa na ndege woguluka na wanyama wa kumbago, mbali habule hata imwe yoyofaya kumtaza.
57	GEN 3:1	Lelo zoka dikala vwizi kufosa wanyama wose wa kumbago wowalumbigwe na Mndewa Mulungu. Zoka dimuuza imuke, “Vino Mulungu kawalongela kuwa sekemuje tunda da mbiki wowose muna umgunda?”
61	GEN 3:5	Mana Mulungu kavimanya kuwa muhaja matunda yayo meso yenu yezagubuligwa na mwizakuwa fana yeye na mwizamanya yanogile na yehile.
64	GEN 3:8	Ichigulogulo mbeho viziholile, mulume na muke wake wamuhulika Mndewa Mulungu kogenda muna umgunda, ivo waifisa hagati ya mibiki muladi sekeyawawone.
66	GEN 3:10	Nayo kamwidika, “Nikuhulika muna umgunda, nidumba kwaviya naukengele. Ivo niifisa.”
70	GEN 3:14	Mndewa Mulungu kadilongela dizoka, “Kwaviya kuyatenda yano, weye kuduwiligwa kufosa wanyama wose. Kwizatambala na kwizakuja timbwisi siku zose za ugima wako.
73	GEN 3:17	Na kamulongela imulume, “Kumtegeleza muke wako na kuja tunda dinikulongele sekeuje. Kwa chiya chiutendile, isi iduwiligwa. Kwizatenda sang'hano ndala siku zose za ugima wako muladi kupata ndiya ifaya.
78	GEN 3:22	Maabaho Mndewa Mulungu kalonga, “Lelo munhu iyo kawa fana imwe wetu, kayamanya yanogile na yehile. Mbali yolondeka kumgomesa kuja diya ditunda da mbiki wa ugima, mana yahadija kezakala siku zose.”
86	GEN 4:6	Maabaho Mndewa Mulungu kamuuza Kaini, “Habali kuna ludoko fana ivo? Habali kukwesa ng'hombali?
90	GEN 4:10	Maabaho Mndewa Mulungu kauza, “Kutenda choni? Damu ya mdodo wako ilinga fana dizi donililila kulawa muna uulongo.
100	GEN 4:20	Ada kamweleka Yabali, yakalile tata wa wafugaji wokala muna yamahema.
107	GEN 5:1	Uno uwo ludongo lwa welesi wa Adamu. Kwandusila Mulungu viyamulumbile munhu, kamulumba fana yeye mwenyewo,
109	GEN 5:3	Adamu viyakalile na miyaka gana na malongo matatu, kapata mwana yoyalingile yeye, yeli na chihanga fana chake mwenyewo na kamtanga zina jake Seti.
138	GEN 5:32	Nuhu viyawile na miyaka magana matano, kaweleka wana watatu, Shemu na Hamu na Yafesi.
140	GEN 6:2	wasenga wa Mulungu wawawona wandele wa wanhu kuwa lumondo, na wawasola kuwa wake zawo fana viwalondile.
141	GEN 6:3	Maabaho Mndewa Mulungu kalonga, “Muhe wangu hawizakala kwa wanhu siku zose, kwaviya wawo ni lukuli. Kwandusila sambi na kugendelela, hawezakala miyaka kufosa miyaka gana na malongo maidi.”
142	GEN 6:4	Lusita ulo na kugendelela, kukala na Wanefili mwiisi, wawo wakala welesi wa wana wa Mulungu na wandele wa wanhu. Wawo niiyo wanhu wakalile magalu, wamanyike ng'hani baho umwaka.
147	GEN 6:9	Zino ni mbuli za ugima wa Nuhu yoyakalile yotenda yanogile haulongozi wa Mulungu, mkamilifu muna uwelesi wake. Nuhu kakala kwa kumnogeza Mulungu.
148	GEN 6:10	Nuhu kaweleka wana watatu wa chilume, wowatangigwe Shemu na Hamu na Yafesi.
152	GEN 6:14	Zenga safina kwa mabanzi ya mibiki midala. Gola viheleto na uhake tulasi kunze na mgati.
154	GEN 6:16	Utende chisuwili na chiwe mkono umwe hagati wa digulu maabaho ika lwivi ubanzi umwe, safina iwe na golofa nhatu.
156	GEN 6:18	Mbali nizatenda lagano na weye. Kwizakwingila muna isafina na muke wako, wanago na wake zawo.
157	GEN 6:19	Wagale mwiisafina chila modeli ya viumbe vili na ugima vidi, va chilume na va chike, na uvilolese vikale.
160	GEN 6:22	Nuhu kasang'hana chila chinhu fana viyalagilizigwe na Mulungu.
161	GEN 7:1	Maabaho Mndewa Mulungu kamulongela Nuhu, “Ingila mwiisafina weye na wanago wose, kwaviya nikuwona weye muhala kunoga haulongozi wangu mwa iwanhu wa isi yose.
164	GEN 7:4	Zihafosa siku saba kwandusila sambi nizagala mvula yondaitonye kwa siku malongo mane, imisi na ichilo, muladi kuvibanaga viumbe vigima vose vonivilumbile.”
167	GEN 7:7	Nuhu na muke wake na wanage wa chilume na wake zawo, wengila muna isafina muladi kugomboka na digombo.
169	GEN 7:9	wengila mwiisafina waidi waidi, muke na mulume hamwe na Nuhu, fana Nuhu viyalagilizigwe na Mulungu.
170	GEN 7:10	Vizifosile siku saba gombo diza.
173	GEN 7:13	Siku iyo iyo Nuhu na muke wake wengila muna isafina hamwe na wanawe watatu, Shemu na Hamu na Yafesi na wake zawo.
174	GEN 7:14	Wahita hamwe na chila modeli ya wanyama wa kumbago na chila modeli ya wanyama wofugigwa na chila modeli ya wang'onyo wotambala na chila modeli ya ndege na chila chiumbe chili na mabawa.
175	GEN 7:15	Chila viumbe waidi waidi walume na wake, chila chilumbe chili na ugima chingila muna isafina hamwe na Nuhu,
176	GEN 7:16	fana Mulungu viyamulagilize. Maabaho Mndewa Mulungu kahinda ulwivi hachisogo cha Nuhu.
177	GEN 7:17	Gombo digendelela kwa siku malongo mane, na yamazi yamema mbaka safina iyengeluka uchanyha ya mazi.
178	GEN 7:18	Mazi yawa na china chitali na safina iyengeluka muna yamazi.
181	GEN 7:21	Vilumbe vose vili na ugima muna iisi vidanganika, ndege wose na wanyama wose wofugigwa na wanyama wose wa kumbago na wang'onyo wose wotambala na wanhu wose.
183	GEN 7:23	Mndewa Mulungu kavinanga viumbe vose vigima mwiisi, wanhu na wanyama wang'onyo wotambala na ndege woguluka. Kasigala Nuhu muhala na waja wowakalile hamwe nayo muna isafina.
185	GEN 8:1	Mbali Mulungu kamkumbuka Nuhu na wanyama wose wa kumbago na wanyama wose wofugigwa wowakalile hamwe nayo muna isafina. Ivo Mulungu kahembelula beho muna iisi na mazi yandusa kuhunguka.
187	GEN 8:3	Mazi yagendelela kuhunguka ugalugagaluga muna iisi. Viifikile siku gana na malongo matano, mazi yahunguka ng'hani.
188	GEN 8:4	Muna isiku ya longo na saba ya mwezi wa saba, safina ifika muna imilima ya Alalati na ikala baho.
190	GEN 8:6	Vizimalile siku malongo mane, Nuhu kavugula zonzo da isafina yoyaitendile,
193	GEN 8:9	Mbali kwaviya mazi yakala yang'hali yaigubika isi yose, nziwa hapatile hanhu ha kwima bule. Kabwela kwa Nuhu kuna isafina, Nuhu kaugolosa mkono wake kamsola na kumbweleza muna isafina.
197	GEN 8:13	Nuhu viyakalile na miyaka magana sita na umwe, siku ya mwanduso ya mwezi mosi, kawona mazi yakala yanyala muna iisi. Nuhu kagubula chigubiko cha safina, kalola na kuwona isi ikala inyala.
200	GEN 8:16	“Lawa mwiisafina weye na muke wako na wanago na wake zawo.
202	GEN 8:18	Nuhu kalawa kunze muna isafina hamwe na muke wake na wanage na wake zawo.
203	GEN 8:19	Wanyama wose na vilumbe weli na ugima viya vitambala muiisi na chila modeli wa ndege walawa muna isafina, kwa kusondelela modeli wawo.
205	GEN 8:21	Mnung'ho unogile wa nhosa iyo umnogeza Mndewa Mulungu, nayo kalonga muna umoyo wake, “Sizaiduwila kaidi isi kwa ichimu cha wanhu. Kwaviya magesa ya wanhu yeha kwandusila kuudodo wawo. Ivo sizainanga kaidi isi fana vinitendile.
212	GEN 9:6	“Munhu yoyose yondayamkome miyage, iviya nayo kezakomigwa na munhu, Mana munhu kalumbigwa yalingile fana Mulungu mwenyewo.
216	GEN 9:10	na vilumbe vili na ugima vose vili na weye, ndege na wanyama wofugigwa na chila mnyama wa kumbago yoyalawile muna isafina hamwe na weye.
224	GEN 9:18	Wanage Nuhu wowalawile muna isafina wakala Shemu na Hamu na Yafesi. Hamu kakala niiyo tata wa Kanani.
225	GEN 9:19	Kufosela wanhu wawo watatu wa Nuhu, wanhu wenela muiisi yose.
229	GEN 9:23	Maabaho Shemu na Yafesi wasola walo na waigeleka mmayega yawo na wahita chisengelenyuma na kuugubika ukengele wa tati yawo. Walola mumgwazo na hawauwonile bule ukengele wa tati yawo.
233	GEN 9:27	Mulungu yamwing'he wana wengi Yafesi, yakale hamwe na Shemu na Kanani yawe mtumwa wake.”
236	GEN 10:1	Uno niuwo welesi wa wana wa Nuhu, Shemu na Hamu na Yafesi. Wano watatu weleka wana vidimalile digombo.
237	GEN 10:2	Wana wa Yafesi wakala Gomeli na Magogu na Madayi na Yavani na Tubali na Mesheki na Tilasi.
238	GEN 10:3	Wana wa Gomeli wakala Ashikenazi na Lifazi na Togoma.
240	GEN 10:5	Kufosela wawo wanhu wa mhwani wapwililika muna izisi zawo hamwe na ulonzi wawo na ng'holo zawo na makabila yawo.
244	GEN 10:9	Kakala galu wa kusaka wanyama haulongozi ha Mndewa Mulungu, lekamana wanhu wolonga, “Uwe fana Nimulodi yakalile galu wa kusaka haulongozi ha Mndewa Mulungu.”
245	GEN 10:10	Mwanduso wa ufalume wake ukala Babeli na Eleki na Akadi na Kalinehi muna iisi ya Shinali.
248	GEN 10:13	Welesi wa Misili ukala Waludima na Wanami na Walehabi na Wanafutuhima
249	GEN 10:14	na Wapatilusi na Wakashuhi na Wakafitoli, Wafilisiti niiyo mwanduso wa Wakashuhi.
254	GEN 10:19	Hanhu ha Wakanaani handusila Sidoni kuhita Gelali mbaka kufika Gaza na nzila ya kuhita Sodoma na Gomola na Adima na Seboimu mbaka Lasha.
256	GEN 10:21	Nayo Shemu niiyo sekulu wa Yafesi, na kakala wasaho wa wana wose wa Ebeli.
257	GEN 10:22	Wana wa Shemu wakala Elamu na Ashulu na Alifakisadi na Ludi na Alamu.
259	GEN 10:24	Alifakisadi kamweleka Shela, na Shela kamweleka Ebeli.
261	GEN 10:26	Yokitani kakala tata wa Alimodadi na Shelefu na Hasalimaweti na Yela,
264	GEN 10:29	na Ofili na Havila na Yobabu. Wawo wose wakala welesi wa Yokitani.
265	GEN 10:30	Isi yowakalile yenela kulawa Mesha mbaka Sifali kuna mulima wa isi ya ulawilo wa zua.
269	GEN 11:2	Wanhu viwagendile kulawa ulawilo wa zua, wafika bawe da Shinali, wakala.
270	GEN 11:3	Wailongela, “Izoni! Chitende matafali chiyasome moto vinogile.” Wakala na matafali badala ya mabwe, na tulasi badala ya ulongo.
271	GEN 11:4	Maabaho walonga, “Lelo chiizengele bululu jetu na lingo dizafika mbaka kuulanga, muladi zina jetu dimanyike ng'hani na sekechiimwage muna iisi.”
277	GEN 11:10	Uno uwo ludongo lwa welesi wa Shemu. Shemu viyakalile na miyaka gana kamweleka Alifakisadi, iyo ikala miyaka midi vidimalile digombo.
278	GEN 11:11	Shemu viyamweleke Alifakisadi kakala miyaka magana matano, na keleka wana wamwenga wa chilume na wa chike.
279	GEN 11:12	Alifakisadi viyakalile na miyaka malongo matatu na mitano, kamweleka Shela.
280	GEN 11:13	Alifakisadi viyamweleke Shela, kakala miyaka magana mane na mitatu, na keleka wana wamwenga wa chilume na wa chike.
298	GEN 11:31	Tela kamsola Abulamu mwanage, na Lutu mzukulu wake yoyelekigwe mwanage Halani, na Salayi muke wake Abulamu, na wasegela wose hamwe kulawa Ulu, bululu da Wakalidayo, kuhita kuna iisi ya Kanaani. Viwafikile Halani wakala uko.
302	GEN 12:3	Nizawatemela mate wose wowokutemela mate weye, Mbali yoyose yokuduwila, nizamduwila, na ng'holo zose muna iisi zizatemeligwa mate kufosela weye.”
303	GEN 12:4	Abulamu viyasegele Halani kakala na miyaka malongo saba na tano, fana Mndewa Mulungu viyamulongele kutenda. Na Lutu kahita hamwe nayo.
304	GEN 12:5	Abulamu kamsola Salayi muke wake, na mwihwage Lutu na vinhu vake vose na wanhu wose wowawapatile uko Halani. Wasegela kuhita isi ya Kanaani. Viwafikile muna iisi ya Kanani,
305	GEN 12:6	Abulamu kafosa muna iisi ya Shekemu, hanhu heli na mbiki mkulu uko Mole. Lusita ulo Wakanaani wakala wokala muna iisi iyo.
307	GEN 12:8	Viyafosile yayo, kasegela mbaka kuna mulima uli ubanzi wa ulawilo wa zua wa Beseli, kasimika hema jake hagati ya Beseli ubanzi wa uswelo wa zua na bululu da Ayi ubanzi wa ulawilo wa zua. Baho iviya kamzengela Mndewa Mulungu lupango na kamtambikila.
309	GEN 12:10	Kuna iisi ya Kanani kukala na nzala. Ivo Abulamu kahita Misili kukala uko fana mgeni, kwaviya nzala ikala ng'hulu muna iisi.
310	GEN 12:11	Viyakalile habehi kufika Misili, kamulongela Salayi muke wake, “Novimanya kuwa weye kwa muke lumondo.