2	GEN 1:2	Dèè ı̨łaà deghàà dèè k'ę̀ę̀ wègaat'ı̨-le xè wek'e t'asìı gǫ̀hłı̨-le ı̨lè. Tıcho wete hazǫǫ̀ ts'ǫ̀ togoòtł'ò zǫ ı̨lè. Ekò k'e sìı Nǫ̀htsı̨ wets'ǫ Inì tı te wek'eèhoowo.
7	GEN 1:7	Eyıt'à Nǫ̀htsı̨ dèè k'e tı eyıts'ǫ ı̨dòo yat'a tı į̀łak'aà ayį̀į̀là. Eyıt'à hanì hòɂǫǫ̀ agòjà.
9	GEN 1:9	Eyıts'ǫ Nǫ̀htsı̨ hadı, “Tı dèè k'e whetł'ıı sìı ełets'ǫ̀ awede, eyıts'ǫ dèè whegǫǫ wègaat'ı̨į̀ awede,” hadı. Eyıt'à hagòjà.
14	GEN 1:14	Eyıts'ǫ Nǫ̀htsı̨ hadı, “Įdòo yat'a t'asìı wet'à dzęh nı̨ı̨dı̨ı̨ gǫ̀hłı̨ ha, wet'à dzę agǫht'e ha eyıts'ǫ to agǫht'e ha, weghàà dzędeè k'èhoedzǫ ha, eyıts'ǫ weghàà ı̨bèe, xat'ǫ̀, xok'e, edaèk'ǫ wek'èhoedzǫ ha,
20	GEN 1:20	Eyıts'ǫ Nǫ̀htsı̨ hadı, “Tı yìı nàdèe sìı hazǫǫ̀ xàɂaa gǫ̀hłı̨į̀ awede, eyıts'ǫ yat'a k'edèe sìı dèè gote hazǫǫ̀ ts'ǫ̀ k'et'aà awede,” hadı.
21	GEN 1:21	Eyıt'à Nǫ̀htsı̨ tıts'aàdìıcho tı yìı nàdèe sìı whehtsı̨. Tı yìı godìı elı̨ı̨ sìı hazǫǫ̀ ełek'ę̀ę̀ xàɂaa whehtsı̨, eyıts'ǫ yat'a k'edèe hazǫǫ̀ xàɂaa whehtsı̨. Nǫ̀htsı̨ yeghàeda, wegha nezı̨.
24	GEN 1:24	Eyıts'ǫ Nǫ̀htsı̨ hadı, “Dıı nèk'e t'asìı hazǫǫ̀ godìı xàɂaa gǫ̀hłı̨į̀ awede: tıts'aàdìı gık'èhodìı, tıts'aàdìı whatsǫǫ̀ edeedaa, dèè k'e k'eɂàa lanıı, hazǫǫ̀ ełek'ę̀ę̀ gıgǫ̀hłı̨į̀ awede,” hadı, eyıt'à hagòjà.
25	GEN 1:25	Eyıt'à Nǫ̀htsı̨, tıts'aàdìı whatsǫǫ̀ nàdèe hazǫǫ̀ xàɂaa whehtsı̨, tıts'aàdìı gık'èhodìı, dèè k'e k'eɂàa lanıı, hazǫǫ̀ ełek'ę̀ę̀ xàɂaa gǫ̀hłı̨į̀ agǫ̀ǫ̀là. Nǫ̀htsı̨ yeghàeda, wegha nezı̨.
26	GEN 1:26	Eyı tł'axǫǫ̀ Nǫ̀htsı̨ hadı, “Gok'ę̀ę̀ dǫ ts'ııhtsı̨, goxèht'e ha. Tıcho yìı nàdèe hazǫǫ̀, yat'a k'edèe hazǫǫ̀, tıts'aàdìı wek'èhodìı hazǫǫ̀, hǫt'ıì dèè k'e eyıts'ǫ t'asìı hazǫǫ̀ dèè k'e k'eɂàa sìı ts'ǫ̀ k'àowo ha,” hadı.
27	GEN 1:27	Eyıt'à Nǫ̀htsı̨ edexèht'eè dǫ whehtsı̨, edek'ę̀ę̀ dǫ whehtsı̨. Dǫzhìı eyıts'ǫ ts'èko whehtsı̨.
29	GEN 1:29	Eyı tł'axǫǫ̀ Nǫ̀htsı̨ hadı, “Dèè k'e t'asìı hazǫǫ̀ dehshee wejìì gǫ̀hłı̨ı̨ sìı eyıts'ǫ ts'ı hazǫǫ̀ wejìecho wejìì gǫ̀hłı̨ı̨ sìı naxıgha hǫt'e. Wets'ǫ shèahzhe gha hǫt'e.
30	GEN 1:30	Eyıts'ǫ dèè k'e tıts'aàdìı hazǫǫ̀, yat'a k'edèe hazǫǫ̀, t'asìı hazǫǫ̀ dèè k'e k'eɂàa sìı, t'asìı hazǫǫ̀ ejìı sìı ı̨t'ǫ̀ gıdıì elı̨ gha gıgha whela hǫt'e,” hadı, eyıt'à hagòjà.
36	GEN 2:5	Ekò k'e sìı dèè k'e dechı̨ wı̨ı̨zìı gǫ̀hłı̨-le, eyıts'ǫ dèè gots'ǫ ı̨t'ǫ̀ ı̨łaà xàehshe-le ı̨lè. Nǫ̀htsı̨ ı̨łaà dèè k'e chǫh ayį̀į̀là-le, eyıts'ǫ dǫ dèè k'e eghàlaeda ha gǫ̀hłı̨-le.
38	GEN 2:7	Eyı tł'axǫǫ̀ gots'ǫ̀ K'àowo Nǫ̀htsı̨ dèè gots'ǫ ehtł'è t'à dǫ whehtsı̨. Dǫ wı̨ı̨ghǫ̀ yìı whehsò t'à edaà ayį̀į̀là, hanì t'aa dǫ edaà ajà.
39	GEN 2:8	Gots'ǫ̀ K'àowo Nǫ̀htsı̨ sìı Eden nèk'e dèè-goehshee-k'è gòhtsı̨. Dǫ whehtsı̨ı̨ sìı ekǫ nèyeèchì.
40	GEN 2:9	Gots'ǫ̀ K'àowo Nǫ̀htsı̨ sìı dechı̨ hazǫǫ̀ xàɂaa dèè k'e dehsheè ayį̀į̀là. Ts'ı wèdaat'ı̨ı̨ xè wets'ǫ jìecho ts'edè gha nezı̨ı̨ sìı dehsheè ayį̀į̀là. Eyı dèè-goehshee-k'è tanı ts'ı wet'à ts'eedaa nàı̨ɂa, eyıts'ǫ ts'ı wet'à nàowo nezı̨ı̨ eyıts'ǫ nàowo nezı̨-le k'èhots'eezǫǫ nàı̨ɂa.
41	GEN 2:10	Eden nèk'e gots'ǫ dehcho nı̨ı̨ɂà, wet'à dèè-goehshee-k'è nagòhtso. Eyı dehcho nı̨ı̨ɂàa gots'ǫ dehcho dı̨ nı̨ı̨lı̨į̀ ajà.
42	GEN 2:11	Dehcho t'akwełǫ̀ǫ̀ sìı Pıshon wìyeh. Eyı dehcho Havılah nèk'e sǫǫ̀mbaekwo gǫ̀hłı̨ı̨ sìı ekǫ nèk'e welǫ ts'ǫ̀ nı̨ı̨lı̨ hǫt'e.
43	GEN 2:12	(Ekǫ sǫǫ̀mbaekwo nezı̨ı̨ gǫ̀hłı̨. Dzèh-łekǫǫ dèk'ǫ̀ǫ eyıts'ǫ kwe wèdaat'ı̨ı̨ sı gǫ̀hłı̨ hǫt'e.)
44	GEN 2:13	Dehcho nàke t'à nı̨ı̨lı̨ı̨ sìı Gıhon wìyeh. Eyı dehcho Kush nèk'e hazǫǫ̀ ts'ǫ̀ nı̨ı̨ɂà.
45	GEN 2:14	Eyıts'ǫ taı t'à dehcho nı̨ı̨lı̨ı̨ sìı Tıgrıs wìyeh. Eyı dehcho kǫ̀godeè Ashur sa kàɂàa ts'ǫnèe wexanı̨ı̨lı̨ hǫt'e. Eyıts'ǫ dı̨ t'à dehcho nı̨ı̨lı̨ı̨ sìı Yufrates wìyeh hǫt'e.
46	GEN 2:15	Nǫ̀htsı̨ dǫ whehtsı̨ı̨ sìı dèè-goehshee-k'è Eden gòyeh ekǫ nèyı̨ı̨htı̨. Dèè k'e eghàlaeda ha eyıts'ǫ dèè k'èdì ha ayį̀į̀là.
48	GEN 2:17	hanìkò ts'ı wet'à nàowo nezı̨ı̨ eyıts'ǫ nàowo nezı̨-le k'èhots'eezǫǫ sìı wets'ǫ shènetı̨ ha-le. Eyı ts'ı wets'ǫ shènetı̨ nı̨dè ełaı̨wı ha hǫt'e,” yèhdı.
49	GEN 2:18	Eyı tł'axǫǫ̀ Nǫ̀htsı̨ hadı, “Dǫ whatsǫǫ̀ nàdèe sìı nezı̨ nıìle. Yets'àdıı wexıìzǫǫ sìı wegha ehtsı̨ ha,” hadı.
51	GEN 2:20	Eyıt'à eyı dǫ sìı tıts'aàdìı wek'èhodìı hazǫǫ̀ goızì whehtsı̨, yat'a k'edèe hazǫǫ̀, eyıts'ǫ tıts'aàdìı whatsǫǫ̀ edeedaa sìı hazǫǫ̀ goızì whehtsı̨. Hanìkò Adam ts'àdı ha wexıìzǫǫ sìı gǫ̀hłı̨-le.
52	GEN 2:21	Eyıt'à gots'ǫ̀ K'àowo Nǫ̀htsı̨ Adam be nàtsoo t'à dètı̨į̀ ayį̀į̀là. Dǫ whetı̨ wets'ǫ Nǫ̀htsı̨ yechǫǫ̀ ı̨łè xàechì gà wekwǫ̀ ełets'ǫ̀ anayį̀į̀là.
53	GEN 2:22	Gots'ǫ̀ K'àowo Nǫ̀htsı̨ dǫ wechǫǫ̀ xàechìı sìı yet'à ts'èko whehtsı̨. Eyı ts'èko sìı dǫzhìı gà nèyeèchì.
55	GEN 2:24	Eyı ts'ıhɂǫ̀ dǫzhìı sìı edetà eyıts'ǫ edemǫ gots'ǫǫ̀ xàetła ha; edets'èkeè xè dǫ ı̨łè lagede ha, gızhį̀į̀ ı̨łè zǫ lade ha.
60	GEN 3:4	Gòocho ts'èko ts'ǫ̀ hadı, “Ełaı̨wı ha nıìle.
62	GEN 3:6	Ts'èko, eyı ts'ı wejìecho ts'eɂà gha nezı̨ lanì wegha wègaat'ı̨ xè wegha wèdaat'ı̨. Wet'à gohzǫǫ̀ ahde ha nıwǫ t'à jìecho mǫ̀hdaa neyı̨į̀wa gà yı̨ı̨ɂà. Wedǫǫ̀ yegà nàwoo sìı jìecho mǫ̀hdaa yeghàı̨dì. Ededı̨ sı yı̨ı̨ɂà.
63	GEN 3:7	Jìecho gı̨ı̨ɂà tł'axǫǫ̀ į̀łah t'asìı łǫ gıgha wègaat'ı̨į̀ agòjà, ı̨ht'edę geèhkw'e nǫǫ̀ gık'èhoèhzà. Eyıt'à ı̨t'ǫ̀ą nechàa ełexègeèlı gà goht'ǫ lanì edek'e nègı̨ı̨wa.
64	GEN 3:8	Eyı tł'axǫǫ̀ xèhts'ǫ̀ gòk'òo ekìıyeè k'e dǫzhìı eyıts'ǫ wets'èkeè gots'ǫ̀ K'àowo Nǫ̀htsı̨ dèè-goehshee-k'è k'eda hǫt'e gıìkw'o. Eyıt'à ts'ı nàèhzhaa nı gots'ǫ̀ K'àowo Nǫ̀htsı̨ ts'àdegeeɂį̀.
65	GEN 3:9	Gots'ǫ̀ K'àowo Nǫ̀htsı̨ dǫzhìı ts'ǫ̀ gode, “Edı̨į̀ ts'ǫ̀ neelı̨?” yèhdı.
67	GEN 3:11	Nǫ̀htsı̨ hadı, “Amìı ı̨ht'edę wheęda nèhdı? Eyı ts'ı wets'ǫ shènetı̨ ha-le nèehsı̨ı̨ sìı wets'ǫ shènetı̨ nì?” yèhdı.
69	GEN 3:13	Eyıt'à gots'ǫ̀ K'àowo Nǫ̀htsı̨ ts'èko ts'ǫ̀ hadı, “Dànìghǫ hanì eghàlaneedà?” yèhdı. Ts'èko hadı, “Gòocho seghǫyaàɂǫ t'à jìecho ııhɂà,” hadı.
70	GEN 3:14	Eyıt'à Nǫ̀htsı̨ gòocho ts'ǫ̀ hadı, “Hanì ts'èko ts'ǫ̀ eghàlaneedà ts'ıhɂǫ̀ tıts'aàdìı gık'èhodìı eyıts'ǫ whatsǫǫ̀ edegeedaa sìı gınahk'e nexè gots'eèdı ha hǫt'e. Dèè k'e nebò t'à k'enets'ì ha, eyıts'ǫ t'aats'ǫǫ̀ ı̨da gots'ǫ̀ ehtł'è nedè ha.
73	GEN 3:17	Nǫ̀htsı̨ Adam ts'ǫ̀ dıı hadı, “Eyı ts'ı wets'ǫ jìecho neɂà-le nèehsı̨ kò nets'èkeè wek'èanet'e t'à jìecho neeɂà. Nı̨ nets'ıhɂǫ̀ dıı dèè k'e gots'eèdı hòɂǫ ha. T'aats'ǫǫ̀ ı̨da gots'ǫ̀ la nàtsoo ghàlaı̨da zǫ t'à shènetı̨ ha.
75	GEN 3:19	“Ehtł'è nanedlı̨ gots'ǫ̀ nınììtì xè la nàtsoo ghàlaı̨da zǫ t'à shènetı̨ ha. Ehtł'è gots'ǫ nehòlı̨ t'à ehtł'è anet'e, eyıts'ǫ ehtł'è nanedlı̨ ha,” Nǫ̀htsı̨ Adam ts'ǫ̀ hadı.
76	GEN 3:20	Adam edets'èkeè wıızì whehtsı̨. Dǫ hazǫǫ̀ eda gha gomǫ elı̨ ha t'à Eve yèhdıì yıızì whehtsı̨.
78	GEN 3:22	Eyıts'ǫ gots'ǫ̀ K'àowo Nǫ̀htsı̨ hadı, “Dıı dǫ, nàowo nezı̨ı̨ eyıts'ǫ nàowo nezı̨-le k'èhoezǫ t'à goxèht'eè lajà. Ts'ı wet'à ts'eedaa gots'ǫ jìecho yııɂà sǫ̀ǫ̀, yı̨ı̨ɂà nı̨dè welǫ whìle ts'ǫ̀ eda ha,” hadı.
79	GEN 3:23	Eyıt'à Nǫ̀htsı̨ Eden nèk'e dèè-goehshee-k'è gots'ǫ xàyeèhɂà. Dèè gots'ǫ wehòèlı̨ı̨ sìı yek'e eghàlaedaà ayį̀į̀là.
80	GEN 3:24	Nǫ̀htsı̨ dǫ xàdeèzhì tł'axǫǫ̀ Eden nèk'e dèè-goehshee-k'è sa kàɂàa ts'ǫnèe yak'eet'ı̨į̀ nàłegeewoò ayį̀į̀là. Behcho dèk'ǫ̀ǫ į̀hnǫǫ̀nageetı̨ t'à ts'ı wet'à ts'eedaa wets'ǫ̀ goòɂàa sìı yexogııhdı.
81	GEN 4:1	Adam edets'èkeè Eve xè dètı̨ t'à wets'èkeè chekoa wets'ǫ ajà, dǫzhìa Caın wìyeh nìı̨htı̨. Wets'èkeè hadı, “Nǫ̀htsı̨ sets'àı̨dì t'à dǫzhìa nìıhtı̨,” hadı.
82	GEN 4:2	Eyı tł'axǫǫ̀ Caın wechı Abel wegǫ̀hłı̨. Negechà agejà tł'axǫǫ̀ Abel sahzǫ̀ą-k'èdìı whelı̨, eyıts'ǫ wı̨ı̨de Caın dèè k'e t'asìı dehshee dǫǫ̀ whelı̨.
85	GEN 4:5	Hanìkò Caın ghǫ, eyıts'ǫ ayìı yets'ǫ̀ yek'eehk'ǫ̀ǫ sìı ghǫ sìghà nıwǫ-le. Eyıt'à Caın sıì ìch'è, wek'èch'a k'ę̀ę̀ wègoèht'į̀.
86	GEN 4:6	Eyıt'à gots'ǫ̀ K'àowo Caın ts'ǫ̀ hadı, “Dànìghǫ į̀į̀ch'è? Dànìghǫ nek'èch'a k'ę̀ę̀ nègaat'ı̨?
87	GEN 4:7	Ehkw'ı k'ehoı̨ɂa nı̨dè neghǫ sìghà dehwhǫ ha-le nì? Hanìkò ehkw'ı k'ehoı̨ɂa-le nı̨dè hołı̨ı̨ negà nìdaı̨hɂa hǫt'e. Nets'ǫ̀ k'ahowo ha nıwǫ, hanìkò nı̨ sìı wets'ǫ̀ k'àı̨wo ha hǫt'e,” Nǫ̀htsı̨ yèhdı.
89	GEN 4:9	Eyıt'à gots'ǫ̀ K'àowo Caın ts'ǫ̀ hadı, “Nechı Abel welaedì?” yèhdı. “Wek'èehsǫ-le. Sechı wek'èhdìı aht'e nıìle,” Caın hadı.
96	GEN 4:16	Eyıt'à Caın Nǫ̀htsı̨ ts'ǫǫ̀ naèhtła. Eden nèk'e sa kàɂàa ts'ǫnèe, Nod gòyeh ekǫ nàı̨dè.
97	GEN 4:17	Caın edets'èkeè t'àı̨tè t'à wets'èkeè chekoa wets'ǫ ajà, eyıts'ǫ bebìa nìı̨htı̨, Enoch wìyeh. Ekò k'e Caın kǫ̀godeè gòhtsı̨, weza wıızì k'ę̀ę̀ Enoch gòyeh ayį̀į̀là.
98	GEN 4:18	Enoch weza Irad wegǫ̀hłı̨, Irad, Mehujel wetà hǫt'e, Mehujel, Metushel wetà hǫt'e, eyıts'ǫ Metushel, Lamek wetà hǫt'e.
102	GEN 4:22	Wets'èkeè Zılah ededı̨ sı weza gǫ̀hłı̨, Tubal-Caın wìyeh. Ededı̨ sìı satsǫ̀ dekwoo eyıts'ǫ satsǫ̀ dezhìı t'à wet'à eghàlats'eedaa xàɂaa yàèhtsı̨. Tubal-Caın weba Naamah wìyeh.
105	GEN 4:25	Adam k'achı̨ edets'èkeè t'àı̨tè t'à wets'èkeè Eve k'achı̨ dǫzhìa nìı̨htı̨, Set wìyeh ayį̀į̀là. Eve hadı, “Caın, Abel ełaı̨hwho t'à wetł'axǫǫ̀ Nǫ̀htsı̨ k'achı̨ chekoa saı̨htı̨,” hadı.
106	GEN 4:26	Set ededı̨ sı weza gǫ̀hłı̨, Enosh wìyeh ayį̀į̀là. Ekìıyeè k'e sìı dǫ gots'ǫ̀ K'àowo ts'ǫ̀ yagehtıì agejà.
112	GEN 5:6	Set ı̨łèakw'eènǫ-daats'ǫ̀-sı̨làı (105) weghoò ekò wezaa Enosh wegǫ̀hłı̨.
113	GEN 5:7	Enosh wegǫ̀hłı̨ tł'axǫǫ̀ Set k'achı̨ ek'èdı̨akw'eènǫ-daats'ǫ̀-łǫ̀hdı̨ (807) xo ts'ǫ̀ ı̨ı̨dà. Weza eyıì-le łǫ eyıts'ǫ wetì sı łǫ gòı̨lè.
115	GEN 5:9	Enosh łǫǫ̀tǫènǫ weghoò ekò wezaa Kenan wegǫ̀hłı̨.
116	GEN 5:10	Kenan wegǫ̀hłı̨ tł'axǫǫ̀ Enosh k'achı̨ ek'èdı̨akw'eènǫ-daats'ǫ̀-hoònǫ-daats'ǫ̀-sı̨làı (815) xo ts'ǫ̀ ı̨ı̨dà. Weza eyıì-le łǫ eyıts'ǫ wetì sı łǫ gòı̨lè
117	GEN 5:11	Hazǫǫ̀ t'à Enosh łǫǫ̀tǫakw'eènǫ-daats'ǫ̀-sı̨làı (905) xo ts'ǫ̀ ı̨ı̨dà, eyı tł'axǫǫ̀ ełaı̨wo.
124	GEN 5:18	Jared ı̨łèakw'eènǫ-daats'ǫ̀-ek'ètaènǫ-daats'ǫ̀-nàke (162) weghoò ekò wezaa Enoch wegǫ̀hłı̨.
125	GEN 5:19	Enoch wegǫ̀hłı̨ tł'axǫǫ̀ Jared k'achı̨ ek'èdı̨akw'eènǫ (800) xo ts'ǫ̀ ı̨ı̨dà. Weza eyıì-le łǫ eyıts'ǫ wetì sı łǫ gòı̨lè.
127	GEN 5:21	Enoch ek'ètaènǫ-daats'ǫ̀-sı̨làı (65) weghoò ekò wezaa Metuselah wegǫ̀hłı̨.
128	GEN 5:22	Metuselah wegǫ̀hłı̨ tł'axǫǫ̀ Enoch taekw'eènǫ (300) xo ts'ǫ̀ Nǫ̀htsı̨ xè aet'į̀. Weza eyıì-le łǫ eyıts'ǫ wetì sı łǫ gòı̨lè.
129	GEN 5:23	Hazǫǫ̀ t'à Enoch taekw'eènǫ-daats'ǫ̀-ek'ètaènǫ-daats'ǫ̀-sı̨làı (365) xo ts'ǫ̀ ı̨ı̨dà.
130	GEN 5:24	Enoch Nǫ̀htsı̨ xè aet'į̀. Eyı tł'axǫǫ̀ Nǫ̀htsı̨ nayìchı t'à wènagoèht'į̀-le.
141	GEN 6:3	Eyıt'à gots'ǫ̀ K'àowo hadı, “Dǫ hołı̨ı̨ hogehtsı̨ı̨ agı̨ı̨t'e t'à, sets'ǫ Įnì welǫ whìle ts'ǫ̀ gıxè wheɂǫ ha-le. Įłèakw'eènǫ-daats'ǫ̀-naènǫ (120) xo ts'ǫ̀ geeda ha,” hadı.
142	GEN 6:4	Ekìıyeè k'e, eyıts'ǫ ekò gots'ǫ whaà-le, dıı nèk'e godęę̀ gǫ̀hłı̨ ı̨lè. Ekò k'e Nǫ̀htsı̨ weza dǫ gıtì ts'ǫ̀ agejà, gıxè gıza gǫ̀hłı̨į̀ agòjà. Eyı gıza sìı ı̨nę̀ę gots'ǫ dǫ deè gı̨ı̨lè t'à gıgodıì gǫ̀hłı̨.
143	GEN 6:5	Gots'ǫ̀ K'àowo dıı nèk'e dǫ sıì hołı̨ı̨ k'ę̀ę̀ geedaà agejàa, gok'èezǫ. Ekìı t'aats'ǫǫ̀ dedzeè t'à hołı̨ı̨ zǫ ghǫ nànıgedè agejà.
144	GEN 6:6	Gots'ǫ̀ K'àowo dıı nèk'e dǫ whehtsı̨ı̨ sìı yek'eelı̨. Eyı ghǫ wedzeè nànııtì.
145	GEN 6:7	Eyıt'à gots'ǫ̀ K'àowo hadı, “Dǫ hazǫǫ̀ whıhtsı̨ı̨ sìı wek'eehłı̨ t'à dıı nèk'e dǫ hazǫǫ̀ gıdıhohtsı̨ ha. T'asìı hazǫǫ̀ dıı nèk'e edaa, tıts'aàdìı dèè k'e k'edèe, dèè k'e k'eɂàa lanıı, eyıts'ǫ yat'a k'edèe sìı hazǫǫ̀ gıdıhohtsı̨ ha,” hadı.
147	GEN 6:9	Dıı Noah wegodıì hǫt'e: Ekìıyeè k'e Noah dǫ ehkw'ı eda ı̨lè. Dǫ gota nàı̨dèe sìı goxèht'eè ı̨ı̨dà-le, Nǫ̀htsı̨ k'ę̀ę̀ ı̨ı̨dà ı̨lè.
149	GEN 6:11	Ekìıyeè k'e Nǫ̀htsı̨ wegha dıı nèk'e dǫ sıì hołı̨ı̨ k'ę̀ę̀ geedaà agejà. Dǫ hazǫǫ̀ ełets'ǫ̀ sıì yıdagı̨ı̨t'e xè nàowojıı k'ę̀ę̀ geedaà agejà.
151	GEN 6:13	Eyıt'à Nǫ̀htsı̨ Noah ts'ǫ̀ hadı, “Dıı nèk'e dǫ gıxè hołı̨ı̨ nàowoò nàtsoò agòjà t'à dǫ hazǫǫ̀ gıdıhohtsı̨ ha eyıts'ǫ dıı dèè sı wedıhohtsı̨ ha.
152	GEN 6:14	Eyıt'à dechı̨ dezhìı t'à edegha elàcho nehtsı̨, weyìı łataèhtsò anele. Weyìı eyıts'ǫ wemǫǫ̀ dechı̨dzèh t'à wek'eèhdì anele.
153	GEN 6:15	Dıı hanì elàcho nehtsı̨: Elàcho sìı daàts'ǫ̀, dı̨akw'eènǫ-daats'ǫ̀-sı̨laènǫ (450) gokè haı̨hdo ha, nǫ̀ts'ǫ̀, łǫ̀hdı̨ènǫ-daats'ǫ̀-sı̨làı (75) gokè hanìı̨hkò ha, eyıts'ǫ dı̨ènǫ-daats'ǫ̀-sı̨làı (45) gokè hadagǫǫwa ha.
154	GEN 6:16	Weka dahmò nehtsı̨, wezhıı hoònǫ-daats'ǫ̀-ek'èdı̨ golahchì wemǫǫ̀ xàgǫǫɂà anele. Elàcho weghǫhk'eè enìı̨tǫ whetǫ anele, eyıts'ǫ weyìı taı dahkǫ̀ goı̨htsı̨.
159	GEN 6:21	T'asìı ts'edèe hazǫǫ̀ xàɂaa edexè anele. Eyı weghǫ shèahzhe eyıts'ǫ tıts'aàdìı sı gıghǫ shèzhe ha edexè wek'èı̨dì,” Nǫ̀htsı̨ hadıì Noah ts'ǫ̀ goı̨de.
161	GEN 7:1	Eyı tł'axǫǫ̀ Nǫ̀htsı̨ Noah ts'ǫ̀ hadı, “Nı̨ eyıts'ǫ nèot'ı̨ hazǫǫ̀ elàcho yìahdè. Dıì dǫ geedaa gıta nàahdèe sìı naxı̨ zǫ segha ehkw'ı aahda hǫt'e.
163	GEN 7:3	Eyıts'ǫ yat'a k'edèe hazǫǫ̀ xàɂaa sìı werezhıì łǫ̀hdı̨ eyıts'ǫ wedets'è łǫ̀hdı̨ edexè anele. Eyı hazǫǫ̀ xàɂaa ı̨daà gogha dıı nèk'e xàgeeda ha ne t'à, edexè anele.
165	GEN 7:5	Eyıt'à Noah, Nǫ̀htsı̨ t'ayèhdıı sìı hazǫǫ̀ hayį̀į̀là.
192	GEN 8:8	Eyı tł'axǫǫ̀ asį̀į̀ dèè k'e tı whìle ajàa lì nıwǫ t'à k'àba lanıı xàèht'oò ayį̀į̀là.
195	GEN 8:11	Xèhts'ǫ̀ k'àba yets'ǫ̀ nǫ̀ǫt'o ekò ts'ı “olıve” wìyeh wets'ǫ ı̨t'ǫ̀ą xàyı̨ı̨hdlaa sìı weèdà yìchı̨ı̨ɂa nǫǫ̀! Eyı weghàà Noah dèè k'e tı whìle agòjà yek'èhoèhzà.
199	GEN 8:15	Eyıt'à Nǫ̀htsı̨ Noah ts'ǫ̀ hadı,
202	GEN 8:18	Eyıt'à Noah edeza, edets'èkeè eyıts'ǫ weza gıts'èkeè xè elàcho yìı gots'ǫ xàgı̨ı̨de.
204	GEN 8:20	Eyı tł'axǫǫ̀ Noah Nǫ̀htsı̨ ts'ǫ̀ t'asìı k'eehk'ǫ̀ gha kwe ełeka nèyı̨ı̨wa t'à kwe-ladà whehtsı̨. Tıts'aàdìı nezı̨ı̨ xàɂaa sìı eyıts'ǫ yat'a k'edèe nezı̨ı̨ xàɂaa sìı mǫ̀hdaa neyı̨į̀wa gà Nǫ̀htsı̨ ts'ǫ̀ yek'eehk'ǫ̀.
205	GEN 8:21	Gots'ǫ̀ K'àowo t'asìı wets'ǫ̀ wek'eek'ǫ̀ǫ sìı wegha nezı̨ t'à edets'ǫ̀ hadı, “Dǫ negechà-lea gots'ǫ t'aats'ǫǫ̀ ededzeè t'à hołı̨ı̨ nàowoò zǫ danıgedè kò, k'achı̨ wı̨ı̨zìı dèè k'e hanì hoìla agohłe ha nıìle. Eyıts'ǫ k'achı̨ wı̨ı̨zìı t'asìı hazǫǫ̀ edaa sìı gıdıhohtsı̨ ha nıìle.
214	GEN 9:8	Eyı tł'axǫǫ̀ Nǫ̀htsı̨, Noah eyıts'ǫ weza gots'ǫ̀ hadı:
218	GEN 9:12	Eyıts'ǫ Nǫ̀htsı̨ hadı, “Dıı naxıgha wègaat'ı̨į̀ ahłe ha, weghàà naxıxè nakenahòdlı̨ı̨ eyıts'ǫ t'asìı hazǫǫ̀ naxıxè geedaa gıxè nakenahòdlı̨ı̨ wek'èhoedzǫ ha. Įdaà dǫ hazǫǫ̀ ełetł'axǫǫ̀ geeda ha sìı gıgha hòèlı̨ hǫt'e: