2	GEN 1:2	Dèè ı̨łaà deghàà dèè k'ę̀ę̀ wègaat'ı̨-le xè wek'e t'asìı gǫ̀hłı̨-le ı̨lè. Tıcho wete hazǫǫ̀ ts'ǫ̀ togoòtł'ò zǫ ı̨lè. Ekò k'e sìı Nǫ̀htsı̨ wets'ǫ Inì tı te wek'eèhoowo.
4	GEN 1:4	Nǫ̀htsı̨ dzęh ghàeda wegha nezı̨. Togoòtł'òo eyıts'ǫ dzęh į̀łak'aà ayį̀į̀là.
9	GEN 1:9	Eyıts'ǫ Nǫ̀htsı̨ hadı, “Tı dèè k'e whetł'ıı sìı ełets'ǫ̀ awede, eyıts'ǫ dèè whegǫǫ wègaat'ı̨į̀ awede,” hadı. Eyıt'à hagòjà.
20	GEN 1:20	Eyıts'ǫ Nǫ̀htsı̨ hadı, “Tı yìı nàdèe sìı hazǫǫ̀ xàɂaa gǫ̀hłı̨į̀ awede, eyıts'ǫ yat'a k'edèe sìı dèè gote hazǫǫ̀ ts'ǫ̀ k'et'aà awede,” hadı.
21	GEN 1:21	Eyıt'à Nǫ̀htsı̨ tıts'aàdìıcho tı yìı nàdèe sìı whehtsı̨. Tı yìı godìı elı̨ı̨ sìı hazǫǫ̀ ełek'ę̀ę̀ xàɂaa whehtsı̨, eyıts'ǫ yat'a k'edèe hazǫǫ̀ xàɂaa whehtsı̨. Nǫ̀htsı̨ yeghàeda, wegha nezı̨.
22	GEN 1:22	Nǫ̀htsı̨ eyı hazǫǫ̀ ts'ǫ̀ sìghà xàyaı̨htı, hagòhdı, “Tıcho yìı dàgoòɂǫǫ̀ agode ha t'à deɂǫ̀ǫ̀ łǫǫ̀ aahde, eyıts'ǫ yat'a k'edèe deɂǫ̀ǫ̀ łǫǫ̀ awede,” gòhdı.
26	GEN 1:26	Eyı tł'axǫǫ̀ Nǫ̀htsı̨ hadı, “Gok'ę̀ę̀ dǫ ts'ııhtsı̨, goxèht'e ha. Tıcho yìı nàdèe hazǫǫ̀, yat'a k'edèe hazǫǫ̀, tıts'aàdìı wek'èhodìı hazǫǫ̀, hǫt'ıì dèè k'e eyıts'ǫ t'asìı hazǫǫ̀ dèè k'e k'eɂàa sìı ts'ǫ̀ k'àowo ha,” hadı.
28	GEN 1:28	Nǫ̀htsı̨ gots'ǫ̀ sìghà xàyaı̨htı, hagòhdı, “Dıı nèk'e hazǫǫ̀ ts'ǫ̀ naxıts'ıhɂǫ̀ǫ-dǫǫ̀ łǫǫ̀ awede eyıts'ǫ dèè ts'ǫ̀ k'ahoahdè. Tıcho yìı łıwe, yat'a k'edèe hazǫǫ̀, eyıts'ǫ t'asìı hazǫǫ̀ dèè k'e k'eɂàa sìı ts'ǫ̀ k'ahoahdè,” gòhdı.
40	GEN 2:9	Gots'ǫ̀ K'àowo Nǫ̀htsı̨ sìı dechı̨ hazǫǫ̀ xàɂaa dèè k'e dehsheè ayį̀į̀là. Ts'ı wèdaat'ı̨ı̨ xè wets'ǫ jìecho ts'edè gha nezı̨ı̨ sìı dehsheè ayį̀į̀là. Eyı dèè-goehshee-k'è tanı ts'ı wet'à ts'eedaa nàı̨ɂa, eyıts'ǫ ts'ı wet'à nàowo nezı̨ı̨ eyıts'ǫ nàowo nezı̨-le k'èhots'eezǫǫ nàı̨ɂa.
45	GEN 2:14	Eyıts'ǫ taı t'à dehcho nı̨ı̨lı̨ı̨ sìı Tıgrıs wìyeh. Eyı dehcho kǫ̀godeè Ashur sa kàɂàa ts'ǫnèe wexanı̨ı̨lı̨ hǫt'e. Eyıts'ǫ dı̨ t'à dehcho nı̨ı̨lı̨ı̨ sìı Yufrates wìyeh hǫt'e.
50	GEN 2:19	Gots'ǫ̀ K'àowo Nǫ̀htsı̨ tıts'aàdìı hazǫǫ̀ eyıts'ǫ t'asìı hazǫǫ̀ yat'a k'edèe sìı dèè gots'ǫ ehtł'è t'à gòèhtsı̨ hǫt'e. Tıts'aàdìı hazǫǫ̀ whehtsı̨ı̨ sìı dǫ dànì goızì yehtsı̨ ha nıwǫ t'à, yets'ǫ̀ nègòı̨wa. Tıts'aàdìı dànì goızıı sìı k'ę̀ę̀ gıızì gǫ̀hłı̨į̀ ajà.
57	GEN 3:1	Gòocho sìı Nǫ̀htsı̨ tıts'aàdìı whatsǫǫ̀ edegeedaa whehtsı̨ı̨ sìı hazǫǫ̀ t'à gonahk'e eghǫyaeɂà gha gǫǫzǫ hǫt'e. Ts'èko ts'ǫ̀ hadı, “Nǫ̀htsı̨, dıı dèè-goehshee-k'è ts'ı t'alàa-sìı wets'ǫ shèahtı̨ ha-le, hadı nì?” yèhdı.
58	GEN 3:2	Ts'èko gòocho ts'ǫ̀ hadı, “Dıı dèè-goehshee-k'è ts'ı hazǫǫ̀ wets'ǫ shèwetı̨ ha dìì-le hǫt'e,
62	GEN 3:6	Ts'èko, eyı ts'ı wejìecho ts'eɂà gha nezı̨ lanì wegha wègaat'ı̨ xè wegha wèdaat'ı̨. Wet'à gohzǫǫ̀ ahde ha nıwǫ t'à jìecho mǫ̀hdaa neyı̨į̀wa gà yı̨ı̨ɂà. Wedǫǫ̀ yegà nàwoo sìı jìecho mǫ̀hdaa yeghàı̨dì. Ededı̨ sı yı̨ı̨ɂà.
68	GEN 3:12	Dǫzhìı hadı, “Ts'èko sexè jǫ whedaà anelàa sìı eyı ts'ı gots'ǫ jìecho sànı̨ı̨dì t'à ııhɂà ı̨lè,” yèhdı.
69	GEN 3:13	Eyıt'à gots'ǫ̀ K'àowo Nǫ̀htsı̨ ts'èko ts'ǫ̀ hadı, “Dànìghǫ hanì eghàlaneedà?” yèhdı. Ts'èko hadı, “Gòocho seghǫyaàɂǫ t'à jìecho ııhɂà,” hadı.
71	GEN 3:15	“Nı̨ eyıts'ǫ ts'èko ełek'èch'a aaht'eè anaxehłe ha, ts'èko weza eyıts'ǫ nı̨ neza ełets'ǫ̀ xànègı̨ı̨ɂa ha. Ts'èko weza sìı nekwì k'ètsǫètà ha, eyıts'ǫ nı̨ wekehtà nàı̨ht'ı ha,” Nǫ̀htsı̨ gòocho ts'ǫ̀ hadı.
73	GEN 3:17	Nǫ̀htsı̨ Adam ts'ǫ̀ dıı hadı, “Eyı ts'ı wets'ǫ jìecho neɂà-le nèehsı̨ kò nets'èkeè wek'èanet'e t'à jìecho neeɂà. Nı̨ nets'ıhɂǫ̀ dıı dèè k'e gots'eèdı hòɂǫ ha. T'aats'ǫǫ̀ ı̨da gots'ǫ̀ la nàtsoo ghàlaı̨da zǫ t'à shènetı̨ ha.
78	GEN 3:22	Eyıts'ǫ gots'ǫ̀ K'àowo Nǫ̀htsı̨ hadı, “Dıı dǫ, nàowo nezı̨ı̨ eyıts'ǫ nàowo nezı̨-le k'èhoezǫ t'à goxèht'eè lajà. Ts'ı wet'à ts'eedaa gots'ǫ jìecho yııɂà sǫ̀ǫ̀, yı̨ı̨ɂà nı̨dè welǫ whìle ts'ǫ̀ eda ha,” hadı.
102	GEN 4:22	Wets'èkeè Zılah ededı̨ sı weza gǫ̀hłı̨, Tubal-Caın wìyeh. Ededı̨ sìı satsǫ̀ dekwoo eyıts'ǫ satsǫ̀ dezhìı t'à wet'à eghàlats'eedaa xàɂaa yàèhtsı̨. Tubal-Caın weba Naamah wìyeh.
145	GEN 6:7	Eyıt'à gots'ǫ̀ K'àowo hadı, “Dǫ hazǫǫ̀ whıhtsı̨ı̨ sìı wek'eehłı̨ t'à dıı nèk'e dǫ hazǫǫ̀ gıdıhohtsı̨ ha. T'asìı hazǫǫ̀ dıı nèk'e edaa, tıts'aàdìı dèè k'e k'edèe, dèè k'e k'eɂàa lanıı, eyıts'ǫ yat'a k'edèe sìı hazǫǫ̀ gıdıhohtsı̨ ha,” hadı.
155	GEN 6:17	Dèè wete teetł'ì agohłe ha. T'asìı hazǫǫ̀ yat'a zhıı nàdèe sìı, t'asìı hazǫǫ̀ ejìı sìı wedıhohtsı̨ ha. Dıı nèk'e t'asìı hazǫǫ̀ ełaàde ha.
157	GEN 6:19	T'asìı edaa hazǫǫ̀ xàɂaa sìı wets'ǫ nàke edexè elàcho yìı goyagı̨ı̨wa ha, tıts'aàdìı werezhıì, eyıts'ǫ tıts'aàdìı dets'è, nexè xàgeeda ha t'à.
159	GEN 6:21	T'asìı ts'edèe hazǫǫ̀ xàɂaa edexè anele. Eyı weghǫ shèahzhe eyıts'ǫ tıts'aàdìı sı gıghǫ shèzhe ha edexè wek'èı̨dì,” Nǫ̀htsı̨ hadıì Noah ts'ǫ̀ goı̨de.
162	GEN 7:2	Tıts'aàdìı hazǫǫ̀ xàɂaa segha nezı̨ı̨ sìı werezhıì łǫ̀hdı̨ eyıts'ǫ wedets'è łǫ̀hdı̨ edexè anele, eyıts'ǫ tıts'aàdìı hazǫǫ̀ xàɂaa eyıì-le sìı werezhıì nàke eyıts'ǫ wedets'è nàke edexè anele.
167	GEN 7:7	Noah, weza, wets'èkeè eyıts'ǫ weza gıts'èkeè elàcho yìı gı̨ı̨de. Tı dèè teetł'ì ch'à elàcho yìı gı̨ı̨de.
168	GEN 7:8	Tıts'aàdìı hazǫǫ̀ xàɂaa nezı̨ı̨ wets'ǫ nàke ełexè, tıts'aàdìı hazǫǫ̀ xàɂaa eyıì-le wets'ǫ nàke ełexè, yat'a k'edèe hazǫǫ̀ xàɂaa wets'ǫ nàke ełexè, dèè k'e k'eɂàa hazǫǫ̀ xàɂaa wets'ǫ nàke ełexè,
174	GEN 7:14	Tıts'aàdìı whatsǫǫ̀ edeedaa hazǫǫ̀ xàɂaa, tıts'aàdìı wek'èhodìı hazǫǫ̀ xàɂaa, t'asìı dèè k'e k'eɂàa hazǫǫ̀ xàɂaa, yat'a k'edèe hazǫǫ̀ xàɂaa, eyıts'ǫ t'asìı hazǫǫ̀ wı̨ı̨ts'ǫǫ̀ gǫ̀hłı̨ı̨ sìı edexè elàcho yìı goı̨wa.
175	GEN 7:15	T'asìı hazǫǫ̀ ejìı sìı werezhıì eyıts'ǫ wedets'è Noah ts'ǫ̀ geède, elàcho yìı gı̨ı̨de.
176	GEN 7:16	Tıts'aàdìı elàcho yìı gı̨ı̨dee sìı t'asìı hazǫǫ̀ edaa gots'ǫ werezhıì eyıts'ǫ wedets'è agı̨ı̨t'e. Nǫ̀htsı̨ Noah ts'ǫ̀ dàdı ı̨lèe sìı k'ę̀ę̀ agòjà. Hazǫǫ̀ goyagı̨ı̨de tł'axǫǫ̀ gots'ǫ̀ K'àowo gots'ǫdaànìèchì.
178	GEN 7:18	Tı ı̨dòo at'ı̨ t'à dèè k'e sıì tagoǫhwhàà agòjà, eyıt'à elàcho tı ka daeleè ajà.
180	GEN 7:20	Tı ı̨dòo at'ı̨ t'à shìh danı̨ı̨chàa kò wete ts'ǫ̀ naènǫ gokè ɂǫ̀ǫ tı ajà.
181	GEN 7:21	T'asìı hazǫǫ̀ dèè k'e k'edèe sìı hazǫǫ̀ ełaı̨dè. Yat'a k'edèe, tıts'aàdìı wek'èhodìı, tıts'aàdìı whatsǫǫ̀ edeedaa, dèè k'e k'ełezhee hazǫǫ̀, eyıts'ǫ dǫ hazǫǫ̀ ełaàgı̨ı̨dè.
182	GEN 7:22	T'asìı hazǫǫ̀ dèè k'e gejìı gı̨ı̨lı̨ı̨ sìı hazǫǫ̀ ełaàgı̨ı̨dè.
201	GEN 8:17	Tıts'aàdìı hazǫǫ̀ xàɂaa nexè geedaa sìı, yat'a k'edèe, tıts'aàdìı hazǫǫ̀, dèè k'e k'eɂàa gı̨ı̨lı̨ı̨ sìı hazǫǫ̀ xàgı̨ı̨wa, dıı nèk'e gıza yàgǫ̀hłı̨ı̨ xè gı̨ı̨tłǫǫ̀ agede ha t'à,” Nǫ̀htsı̨ Noah èhdı.
203	GEN 8:19	Tıts'aàdìı hazǫǫ̀, dèè k'e k'eɂàa eyıts'ǫ yat'a k'edèe hazǫǫ̀, ełets'ǫ gı̨ı̨lı̨ı̨ sìı ełek'èdaà xàgeède.
204	GEN 8:20	Eyı tł'axǫǫ̀ Noah Nǫ̀htsı̨ ts'ǫ̀ t'asìı k'eehk'ǫ̀ gha kwe ełeka nèyı̨ı̨wa t'à kwe-ladà whehtsı̨. Tıts'aàdìı nezı̨ı̨ xàɂaa sìı eyıts'ǫ yat'a k'edèe nezı̨ı̨ xàɂaa sìı mǫ̀hdaa neyı̨į̀wa gà Nǫ̀htsı̨ ts'ǫ̀ yek'eehk'ǫ̀.
209	GEN 9:3	T'asìı hazǫǫ̀ edaa xè nàedaa sìı naxıgha weghǫ shèahzhe elı̨ ha. Dèè k'e ı̨t'ǫ̀ dehshee sìı weghǫ shèahzhe ha naxıghàıhła ı̨lè xèht'eè, dıì t'asìı hazǫǫ̀ naxıghàıhła hǫt'e.
211	GEN 9:5	Naxıdoò xàı̨tł'ı t'à ełaànaxìgwo nı̨dè amìı ayį̀į̀làa sìı wesınìyahtı ha hǫt'e. Tıts'aàdìı ayį̀į̀là nı̨dè wesınìyahtı ha, dǫ ayį̀į̀là nı̨dè dǫ ełaı̨hwho k'èxa wesınìyahtı ha.
234	GEN 9:28	Tı dèè goteètł'ı tł'axǫǫ̀ Noah taekw'eènǫ-daats'ǫ̀-sı̨laènǫ (350) xo ts'ǫ̀ ı̨ı̨dà.
236	GEN 10:1	Dıı godı dek'eèhtł'èe sìı Noah weza Shem, Ham eyıts'ǫ Jafet gıgodıì hǫt'e: Tı dèè goteètł'ı tł'axǫǫ̀ ededı̨ sı gıza łǫ gòı̨lè.
237	GEN 10:2	Dıı Jafet weza agı̨ı̨t'e: Gomer, Magog, Madaı, Javan, Tubal, Meshek eyıts'ǫ Tıras.
238	GEN 10:3	Dıı Gomer weza agı̨ı̨t'e: Ashkena, Rıfat eyıts'ǫ Togamah.
239	GEN 10:4	Dıı Javan weza agı̨ı̨t'e: Elısha, Tarshısh, Kıtım eyıts'ǫ Rodanım.
267	GEN 10:32	Eyı hazǫǫ̀ Noah weza gıts'ıhɂǫ̀ǫ-dǫǫ̀ agı̨ı̨t'e. Hazǫǫ̀ gıcho gıızì k'ę̀ę̀ ełek'èdaà gıadè. Tı dèè goteètł'ı tł'axǫǫ̀ eyı dǫ xàgeèɂaa haàtłǫǫ sìı hazǫǫ̀ nèk'e ts'ǫ̀ ehkègı̨ı̨de.
277	GEN 11:10	Dıı sìı Shem wegodıì hǫt'e: Tı dèè goteètł'ı gots'ǫ nàke xo k'ehǫǫwo eyıts'ǫ Shem ı̨łèakw'eènǫ weghoò ekò weza Arfakad wegǫ̀hłı̨.
291	GEN 11:24	Nahor naènǫ-daats'ǫ̀-łǫǫ̀tǫ (29) weghoò ekò wezaa Terah wegǫ̀hłı̨.
292	GEN 11:25	Wezaa Terah wegǫ̀hłı̨ tł'axǫǫ̀ Nahor ı̨łèakw'eènǫ-daats'ǫ̀-hoònǫ-daats'ǫ̀-łǫǫ̀tǫ (119) weghoò ts'ǫ̀ ı̨dà. Weza eyıì-le łǫ gòı̨lè eyıts'ǫ wetì sı łǫ gòı̨lè.
293	GEN 11:26	Terah łǫ̀hdı̨ènǫ weghoò tł'axǫǫ̀ weza taı gòı̨lè; Abram, Nahor eyıts'ǫ Haran gıgǫ̀hłı̨.
294	GEN 11:27	Dıı sìı Terah wegodıì hǫt'e: Terah weza taı gǫ̀hłı̨, Abram, Nahor eyıts'ǫ Haran gìyeh. Haran ededı̨ sìı Lot wetà hǫt'e.
295	GEN 11:28	Haran wetà Terah ı̨łaà eda et'ıì Haran kǫ̀godeè Ur gòyeh ełaı̨wo. Ekǫ Kaldea got'ı̨į̀ gınèk'e wegǫ̀hłı̨ ı̨lè.
298	GEN 11:31	Terah edeza Abram, eyıts'ǫ edekwı Lot (Haran weza) eyıts'ǫ weza ts'èkeè Sarayı edexè goòwa. Kanan nèk'e ts'ǫ̀ agede ha gı̨ı̨wǫ t'à Kaldea got'ı̨į̀ gınèk'e kǫ̀godeè Ur gòyeh gots'ǫǫ̀ xàgeède. Hanìkò kǫ̀godeè Haran gòyeh ts'ǫ̀ nègı̨ı̨de ekò ekǫ nàgedè agejà.
299	GEN 11:32	Terah nàkeakw'eènǫ-daats'ǫ̀-sı̨làı (205) weghoò ts'ǫ̀ ı̨dà, eyı tł'axǫǫ̀ kǫ̀godeè Haran ekǫ ełaı̨wo.
338	GEN 14:1	Ekìıyeè k'e kǫ̀ta Shınar gots'ǫ k'àowocho Amafel, kǫ̀ta Elasa gots'ǫ k'àowocho Arok, kǫ̀ta Elam gots'ǫ k'àowocho Kedorlomer, eyıts'ǫ kǫ̀ta Goyım gots'ǫ k'àowocho Tıdal hazǫǫ̀ ełegegǫ gha geède.
344	GEN 14:7	Eyı tł'axǫǫ̀ ets'ageède t'à En-Mıshpat (dıì Kadesh gòyeh) ts'ǫ̀ agejà. Ekǫ Amalek got'ı̨į̀, eyıts'ǫ Amor got'ı̨į̀ kǫ̀ta Hazazon-Tamar nàgedèe sìı goghǫ geèhnǫ t'à gıdèè hazǫǫ̀ goghǫ gį̀į̀hchì.
346	GEN 14:9	Kǫ̀ta Elam gots'ǫ k'àowocho Kedorlomer, kǫ̀ta Goyım gots'ǫ k'àowocho Tıdal, kǫ̀ta Shınar gots'ǫ k'àowocho Amrafel, eyıts'ǫ kǫ̀ta Elasa gots'ǫ k'àowocho Arok ts'ǫ̀ ełegegǫ gha sınìgı̨ı̨de. Eyı k'àowocho dı̨ nǫǫde sìı k'àowocho sı̨làı ts'ǫ̀ ełegegǫ ha.
353	GEN 14:16	K'àowocho dı̨ t'asìı hazǫǫ̀ negı̨į̀waa sìı hazǫǫ̀ nayį̀ı̨wa. Wesah Lot t'asìı hazǫǫ̀ wets'ǫ xè nayį̀ı̨htı̨. Ts'èko hazǫǫ̀, eyıts'ǫ dǫ hazǫǫ̀ goxè negogı̨į̀waa sìı hazǫǫ̀ nagǫ̀ǫwa.
360	GEN 14:23	T'asìı wı̨ı̨zìı nets'ǫ sìı neèhchı ha nıìle wèehsı̨. Negoht'ǫǫ̀ gots'ǫ ehtł'ı̨kw'ee, nekechı̨į̀tł'ıì kò wı̨ı̨zìı neèhchı ha nıìle. Hanì-ı̨dè seghǫ dıı haı̨dı ha-le, ‘Abram dǫ ahxee whelı̨į̀ awèhłà,’ nı̨ı̨dı hǫı̨lı̨ ha-le.
361	GEN 14:24	T'asìı wı̨ı̨zìı edegha neèhchı ha-le, sets'ǫ dǫ ayìı gıghǫ shèzhee, eyıts'ǫ dǫ sexè agejàa sìı Aner, Eshkol eyıts'ǫ Mamer, t'asìı edegha gìhchìı sìı eyı zǫ,” Abram yèhdı.
363	GEN 15:2	Hanìkò Abram hadı, “Sets'ǫ̀ K'àowo Nǫ̀htsı̨, chekoa sets'ǫ-le t'à ayìı seghàneeɂǫ lì? T'asìı hazǫǫ̀ sets'ǫ sìı Damaskus got'ı̨į̀ Elıyezer weghaelı̨į̀ ade ha hǫt'e,” hadı.
365	GEN 15:4	Gots'ǫ̀ K'àowo Abram ghàyatıı̨ɂǫ, hayèhdı, “T'asìı hazǫǫ̀ nets'ǫ sìı eyı dǫ wets'ǫ̀ ade ha nıìle, hanìkò xàè nezhį̀į̀ gots'ǫ neza gǫ̀hłı̨ ha sìı t'asìı hazǫǫ̀ weghaelı̨į̀ ade ha,” yèhdı.
371	GEN 15:10	Abram eyı hazǫǫ̀ yets'ǫ̀ nèyı̨ı̨wa. Tıts'aàdìı hazǫǫ̀ tanı ts'ǫ̀ tàyı̨ı̨hwho gà tıts'aàdìı wekwǫ̀ ełeghǫhk'è nèyı̨ı̨wa. Hanìkò k'àba eyıts'ǫ k'àbazaa sìı tàyı̨ı̨hwho-le.
387	GEN 16:5	Eyıt'à Sarayı ededǫǫ̀ Abram ts'ǫ̀ hadı, “Nı̨ net'àat'à daehɂa hǫt'e. Ts'èko segha eghàlaedaa neghàehtı̨ı̨ sìı hotıeda-le edek'èhoèhzà t'à senèèlı̨-le. Gots'ǫ̀ K'àowo segha nesınìyawehtı,” yèhdı.
388	GEN 16:6	Abram yets'ǫ̀ hadı, “Ts'èko negha eghàlaedaa sìı nı̨ wets'ǫ̀ k'àı̨wo hǫt'e. Dàwı̨ı̨le ha newǫǫ sìı hawı̨ı̨le,” yèhdı. Eyıt'à Sarayı Hagar tsį̀ı̨hɂa t'à eyı ts'èko yech'à kwı̨èhsa.
429	GEN 18:4	Tı łǫ-lea naxıgha ts'ìhchı. Wet'à naxıkè k'enaahtse gà jǫ łatsaa ts'ı wezhıı nahoahzì.
479	GEN 19:21	Dǫ ı̨łè yets'ǫ̀ hadı, “Tł'anǫǫ̀ ayìı sı̨ı̨kèe sìı negha hahłe ha. Kǫ̀ta weghǫ aı̨dıı sìı wedıhohtsı̨ ha-le.
508	GEN 20:12	Sarah xàè sedè hǫt'e. Setà wetì hǫt'e, hanìkò semǫ wetì nıìle. Ts'eèzhǫ tł'axǫǫ̀ sets'èkeè whelı̨.
529	GEN 21:15	Tı whìle agòjà ekò Hagar edeza gogho tł'a whetı̨į̀ ayį̀į̀là.
552	GEN 22:4	Taı dzęę̀ k'e Abraham ı̨daà k'eet'į̀ là yahdaà nıwà shìh wègaat'ı̨.
560	GEN 22:12	“Dǫzhìa ełaı̨hwhı-le,” yèhdı. “T'asawı̨ı̨le-le. Neza ı̨łàet'ea nets'ǫ sìı sech'à wek'ènedì-le t'à sıì Nǫ̀htsı̨ k'èanet'e nǫǫ̀!” yak'eet'ı̨į̀ yèhdı.
572	GEN 22:24	Nahor wets'èkeè dek'aɂį̀ whedaa sìı Reyumah wìyeh. Ededı̨ sı weza gǫ̀hłı̨: Tabah, Gaham, Tahash, eyıts'ǫ Makah gìyeh.
606	GEN 24:14	T'eeko ı̨łè wets'ǫ̀ dıı haehsı̨ı̨ sìı, ‘Netıtǫǫ̀ gots'ǫ tı wehts'è,’ wèehsı̨ nı̨dè, ‘Hęɂę, tı nets'è,’ sèhdı xè, ‘Nets'ǫ tıts'aàdìıcho hazǫǫ̀ tı gıghàehdı ha,’ hadıı sìı eyı t'eeko, Isaac wegha ts'èko neehchì hǫt'e welè. Eyı weghàà sets'ǫ̀ k'àowo etewenèeɂı̨ wek'èehsǫ ha,” hadıì yaı̨htı.
608	GEN 24:16	T'eeko sıì wèdaat'ı̨ xè t'eekogòò hǫt'e, dǫzhìı yet'àı̨tè whìle. Tık'è gòɂǫǫ ts'ǫ̀ èhtła, edetıtǫǫ̀ dàgoòɂǫǫ̀ ayį̀į̀là tł'axǫǫ̀ naetła ha ı̨lè.
611	GEN 24:19	Tı yeghàı̨dì tł'axǫǫ̀, t'eeko hadı, “Nets'ǫ tıts'aàdìıcho sı gıgha hòt'a ts'ǫ̀ tı gıghàehdı ha,” yèhdı.
612	GEN 24:20	Eyıt'à edetıtǫǫ̀ yìı gots'ǫ tıts'aàdìı tı-gedǫǫ-k'è ı̨whąą̀ tı deyìı̨htł'ı gà k'achı̨ tı ìhchı gha tık'è ts'ǫ̀ tı̨mǫèhza. Tıts'aàdìıcho hazǫǫ̀ gıgha hòt'a ts'ǫ̀ gogha tı eghǫèla.
614	GEN 24:22	Tıts'aàdìıcho hòt'a tı gıadǫ tł'axǫǫ̀, Abraham wecheekeè goı̨ghǫ̀-lamǫ̀ǫ eyıts'ǫ golachı̨į̀ k'e whelaa nedà xè sǫǫ̀mbaekwo dètìı t'à hòèlı̨ı̨ yeghàı̨la.
616	GEN 24:24	T'eeko yets'ǫ̀ hadı, “Betuyel wetì aht'e, setà wemǫ Mılkah wìyeh, eyıts'ǫ wetà Nahor wìyeh,” yèhdı.
617	GEN 24:25	Eyıts'ǫ hanaedı, “Tıts'aàdìıcho gıgha tł'oh eyıts'ǫ gıghǫ shèzhee łǫ gots'ǫ ne, eyıts'ǫ gogà daahtè ha naxıgha gòɂǫ ne,” yèhdı.
618	GEN 24:26	T'eeko hadı t'à Abraham wecheekeè nàgòı̨hgè xè Nǫ̀htsı̨ ts'ǫ̀ yahtı,
619	GEN 24:27	hadı, “Gots'ǫ̀ K'àowo, sets'ǫ̀ k'àowo Abraham Wenǫ̀htsı̨ weghàsǫhoedı welè. T'aats'ǫǫ̀ k'àowo Abraham ts'ǫ̀ wedzeè eteèɂı̨ xè t'aats'ǫǫ̀ yets'ǫ̀ ehkw'ı eghàlaeda hǫt'e. Ekò sı̨ sìı gots'ǫ̀ K'àowo, Abraham wèot'ı̨ gıkǫ̀ ts'ǫ̀ segha ehkw'ı goòɂà ayį̀į̀là,” hadıì yaı̨htı.
620	GEN 24:28	T'eeko edemǫ kǫ̀ ts'ǫ̀ tı̨mǫèhza gà eyı dàgòjàa sìı gots'ǫ̀ hadı.
621	GEN 24:29	T'eeko Rebekah wı̨ı̨de Laban wìyeh ı̨whąą̀ Abraham wecheekeè tık'è gà nàwo ts'ǫ̀ xàèhtła.
624	GEN 24:32	Eyıt'à Abraham wecheekeè eyı kǫ̀ ts'ǫ̀ ajà, tıts'aàdìıcho k'e xàɂı̨ı̨wa. Tł'oh tıts'aàdìı gha nègı̨ı̨wa eyıts'ǫ gıghǫ shèzhee tıts'aàdìı ghàgı̨ı̨dì, eyıts'ǫ edekè k'enagehtse gha tı goghàgı̨ı̨dì.
625	GEN 24:33	Eyı tł'axǫǫ̀ weghǫ shèts'ezhee dǫ gha nègı̨ı̨la, hanìkò Abraham wecheekeè hadı, “Shèhtı̨ ha-le. Ayìı dàehsı̨ ha sìı naxıts'ǫ̀ haehsı̨ tł'axǫǫ̀ nı̨dè zǫ shèhtı̨ ha,” gòhdı. “Tł'anǫǫ̀ goı̨de,” Laban yèhdı.
635	GEN 24:43	Jǫ tık'è gà nàhwho. T'eeko ı̨łè tı ìhchı ha jǫ nììtła nı̨dè dıı hawèehsı̨ ha, “Netıtǫǫ̀ ts'ǫ tı sàı̨dı,” wèehsı̨ t'à,
636	GEN 24:44	“Tı nedǫ, nets'ǫ tıts'aàdìıcho sı tı gıghàehdı ha,” sèhdı nı̨dè gots'ǫ̀ K'àowo sets'ǫ̀ k'àowo weza gha eyı t'eeko yį̀į̀hchì hǫt'e welè,’ dehsı̨į̀ xàyaehtı ı̨lè.
637	GEN 24:45	“Sedzeè t'à yaehtı ghǫ naht'e-le et'ıì t'eeko Rebekah edeehgò ka tıtǫǫ̀ dayèhtǫ xè eyı nììtła. Tık'è ts'ǫ̀ ı̨zhıì hodàèhtła gà tı ı̨į̀xè ekò wets'ǫ̀ dıı haehsı̨, ‘Tı sàı̨dı,’ wèehsı̨.
638	GEN 24:46	“Ekò et'ıì edetıtǫǫ̀ sets'ǫ̀ hodàyı̨į̀xè, hadı, ‘Tı nedǫ, eyıts'ǫ nets'ǫ tıts'aàdìıcho sı tı gıghàehdı ha,’ hadı. Eyıt'à tı ehts'e, ededı̨ t'aa tıts'aàdìıcho ghàtını̨ı̨dì.
647	GEN 24:55	Hanìkò Rebekah wı̨ı̨de eyıts'ǫ wemǫ hagedı, “T'eeko łatsaa gogà wedà, eyı tł'axǫǫ̀-ı̨dè naahdè ha dìì-le,” gıìhdı.
649	GEN 24:57	Eyıt'à hagedı, “T'eeko wets'ǫ̀ gots'ııde gà dawets'ııhke,” gedı.
651	GEN 24:59	Eyıt'à ededè Rebekah goxè naèhtłaà agı̨į̀là. Ts'èko yek'èdìı elı̨ı̨ sı yexè ajà.
656	GEN 24:64	Rebekah ededı̨ sı ı̨daà k'eet'į̀ là Isaac eɂı̨. Tıts'aàdìıcho k'e gots'ǫ hodàèhtła,
674	GEN 25:15	Hadad, Tema, Jetur, Nafısh, eyıts'ǫ Kedemah.
684	GEN 25:25	T'akwełǫ̀ǫ̀ wegǫ̀hłı̨ı̨ sìı wekwǫ̀ ekìı dek'o lanì. Hazǫǫ̀ ts'ǫ̀ wezhį̀į̀ k'e weghàà dehshoa lanì, eyıt'à Esau wìyeh agı̨į̀là.
692	GEN 25:33	Jacob yets'ǫ̀ hadı, “T'akwełǫ̀ǫ̀ yatı nàtsoo seghàı̨ɂà,” yèhdı. Eyıt'à Esau yets'ǫ̀ yatı nàtsoo whehtsı̨ t'à goza ǫhdaà k'ę̀ę̀ t'asìı wets'ǫ̀ ade ha ı̨lèe sìı wechı ts'ǫ̀ weghǫ nàèdì.
722	GEN 26:29	Hanì-ı̨dè nets'ǫ̀ hoìla eghàlats'eeda-le k'ę̀ę̀ nı̨ sı gots'ǫ̀ hoìla eghàlaı̨da ha-le. T'aats'ǫǫ̀ nets'ǫ̀ nezı̨į̀ nats'eɂa xè ts'èwhı̨į̀ nanets'eèhɂà ı̨lè. Ekò dıì sìı gots'ǫ̀ K'àowo nexè sìghà hòɂǫǫ̀ ayį̀į̀là hǫt'e,” gıìhdı.