20	GEN 1:20	Eyıts'ǫ Nǫ̀htsı̨ hadı, “Tı yìı nàdèe sìı hazǫǫ̀ xàɂaa gǫ̀hłı̨į̀ awede, eyıts'ǫ yat'a k'edèe sìı dèè gote hazǫǫ̀ ts'ǫ̀ k'et'aà awede,” hadı.
40	GEN 2:9	Gots'ǫ̀ K'àowo Nǫ̀htsı̨ sìı dechı̨ hazǫǫ̀ xàɂaa dèè k'e dehsheè ayį̀į̀là. Ts'ı wèdaat'ı̨ı̨ xè wets'ǫ jìecho ts'edè gha nezı̨ı̨ sìı dehsheè ayį̀į̀là. Eyı dèè-goehshee-k'è tanı ts'ı wet'à ts'eedaa nàı̨ɂa, eyıts'ǫ ts'ı wet'à nàowo nezı̨ı̨ eyıts'ǫ nàowo nezı̨-le k'èhots'eezǫǫ nàı̨ɂa.
48	GEN 2:17	hanìkò ts'ı wet'à nàowo nezı̨ı̨ eyıts'ǫ nàowo nezı̨-le k'èhots'eezǫǫ sìı wets'ǫ shènetı̨ ha-le. Eyı ts'ı wets'ǫ shènetı̨ nı̨dè ełaı̨wı ha hǫt'e,” yèhdı.
70	GEN 3:14	Eyıt'à Nǫ̀htsı̨ gòocho ts'ǫ̀ hadı, “Hanì ts'èko ts'ǫ̀ eghàlaneedà ts'ıhɂǫ̀ tıts'aàdìı gık'èhodìı eyıts'ǫ whatsǫǫ̀ edegeedaa sìı gınahk'e nexè gots'eèdı ha hǫt'e. Dèè k'e nebò t'à k'enets'ì ha, eyıts'ǫ t'aats'ǫǫ̀ ı̨da gots'ǫ̀ ehtł'è nedè ha.
71	GEN 3:15	“Nı̨ eyıts'ǫ ts'èko ełek'èch'a aaht'eè anaxehłe ha, ts'èko weza eyıts'ǫ nı̨ neza ełets'ǫ̀ xànègı̨ı̨ɂa ha. Ts'èko weza sìı nekwì k'ètsǫètà ha, eyıts'ǫ nı̨ wekehtà nàı̨ht'ı ha,” Nǫ̀htsı̨ gòocho ts'ǫ̀ hadı.
73	GEN 3:17	Nǫ̀htsı̨ Adam ts'ǫ̀ dıı hadı, “Eyı ts'ı wets'ǫ jìecho neɂà-le nèehsı̨ kò nets'èkeè wek'èanet'e t'à jìecho neeɂà. Nı̨ nets'ıhɂǫ̀ dıı dèè k'e gots'eèdı hòɂǫ ha. T'aats'ǫǫ̀ ı̨da gots'ǫ̀ la nàtsoo ghàlaı̨da zǫ t'à shènetı̨ ha.
80	GEN 3:24	Nǫ̀htsı̨ dǫ xàdeèzhì tł'axǫǫ̀ Eden nèk'e dèè-goehshee-k'è sa kàɂàa ts'ǫnèe yak'eet'ı̨į̀ nàłegeewoò ayį̀į̀là. Behcho dèk'ǫ̀ǫ į̀hnǫǫ̀nageetı̨ t'à ts'ı wet'à ts'eedaa wets'ǫ̀ goòɂàa sìı yexogııhdı.
84	GEN 4:4	Hanìkò Abel wets'ǫ sahzǫ̀ą t'akwełǫ̀ǫ̀ gıgǫ̀hłı̨ı̨ xè łegek'àa sìı gıkwǫ̀ mǫ̀hdaa Nǫ̀htsı̨ ts'ǫ̀ yek'eehk'ǫ̀. Gots'ǫ̀ K'àowo Abel ghǫ, eyıts'ǫ sahzǫ̀ą-kwǫ̀ yets'ǫ̀ yek'eehk'ǫ̀ǫ sìı ghǫ sìghà nıwǫ.
85	GEN 4:5	Hanìkò Caın ghǫ, eyıts'ǫ ayìı yets'ǫ̀ yek'eehk'ǫ̀ǫ sìı ghǫ sìghà nıwǫ-le. Eyıt'à Caın sıì ìch'è, wek'èch'a k'ę̀ę̀ wègoèht'į̀.
86	GEN 4:6	Eyıt'à gots'ǫ̀ K'àowo Caın ts'ǫ̀ hadı, “Dànìghǫ į̀į̀ch'è? Dànìghǫ nek'èch'a k'ę̀ę̀ nègaat'ı̨?
88	GEN 4:8	Hagòjà tł'axǫǫ̀ Caın edechı ts'ǫ̀ hadı, “Dèè k'e t'asį̀ı̨ k'ełıìtło,” yèhdı. Dèè k'e k'eget'à ekò Caın hǫtsaa edechı Abel gà nàatła t'à ełaàyį̀ı̨hwho.
92	GEN 4:12	Dèè k'e eghàlaı̨da nı̨dè negha t'asìı nezı̨ı̨ xàehshe ha nıìle. Dıı nèk'e nexè ts'èwhı̨į̀ hòɂǫ ha nıìle, ekìı t'aats'ǫǫ̀ t'asį̀ı̨ k'ehoı̨hwho ha,” Nǫ̀htsı̨ hayèhdı.
95	GEN 4:15	Hanìkò gots'ǫ̀ K'àowo Caın ts'ǫ̀ hadı, “Hanì ha nıìle! Amìı Caın ełaı̨hwhoo sìı łǫ̀hdı̨ ts'ǫ̀ ek'èt'à weghàhòt'à ha,” Nǫ̀htsı̨ hadı. Amìı yegòhɂǫǫ sìı ełaàyèhwhı ch'à Caın wek'e t'asìı wheɂǫǫ̀ ayį̀į̀là.
101	GEN 4:21	Jabal wechı sìı Jubal wìyeh. Dǫ tł'ık'eetı̨ı̨ lanıı k'ègeezǫǫ eyıts'ǫ dechı̨shì t'à sǫnàgedèe k'ègeezǫǫ sìı gha gocho elı̨.
107	GEN 5:1	Dıı godı sìı Adam eyıts'ǫ wets'ıhɂǫ̀ǫ-dǫǫ̀ gıgǫ̀hłı̨ı̨ sìı gıgodıì dek'eèhtł'è hǫt'e. Nǫ̀htsı̨ dǫ whehtsı̨ ekò edexèht'eè dǫ whehtsı̨ ı̨lè.
110	GEN 5:4	Set wegǫ̀hłı̨ tł'axǫǫ̀ Adam ek'èdı̨akw'eènǫ (800) xo ts'ǫ̀ ı̨ı̨dà. Weza eyıì-le łǫ eyıts'ǫ wetì sı łǫ gòı̨lè.
125	GEN 5:19	Enoch wegǫ̀hłı̨ tł'axǫǫ̀ Jared k'achı̨ ek'èdı̨akw'eènǫ (800) xo ts'ǫ̀ ı̨ı̨dà. Weza eyıì-le łǫ eyıts'ǫ wetì sı łǫ gòı̨lè.
135	GEN 5:29	Noah wìyeh ayį̀į̀là, hadı, “Nǫ̀htsı̨ dèè xè hoìla xàyaı̨htı ı̨lè, eyıt'à hòtł'ò wek'e eghàlats'ı̨ı̨dà, hanìkò dıı chekoa wet'à goxè hok'èts'ǫǫ̀ agode ha,” hadıì xàyaı̨htı.
143	GEN 6:5	Gots'ǫ̀ K'àowo dıı nèk'e dǫ sıì hołı̨ı̨ k'ę̀ę̀ geedaà agejàa, gok'èezǫ. Ekìı t'aats'ǫǫ̀ dedzeè t'à hołı̨ı̨ zǫ ghǫ nànıgedè agejà.
166	GEN 7:6	Noah ek'ètaekw'eènǫ (600) weghoò ekò tı dèè teètł'ı ı̨lè.
171	GEN 7:11	Noah ek'ètaekw'eènǫ (600) weghoò tł'axǫǫ̀ nàke sa xèhǫǫ̀wo t'à hoònǫ-daats'ǫ̀-łǫ̀hdı̨ dzęę̀ k'e dèè goyìı tı-xàewìı-k'è gòlaa sìı hazǫǫ̀ xàdeèhk'è, eyıts'ǫ yat'a gots'ǫ tı łǫ hodàètł'ı.
204	GEN 8:20	Eyı tł'axǫǫ̀ Noah Nǫ̀htsı̨ ts'ǫ̀ t'asìı k'eehk'ǫ̀ gha kwe ełeka nèyı̨ı̨wa t'à kwe-ladà whehtsı̨. Tıts'aàdìı nezı̨ı̨ xàɂaa sìı eyıts'ǫ yat'a k'edèe nezı̨ı̨ xàɂaa sìı mǫ̀hdaa neyı̨į̀wa gà Nǫ̀htsı̨ ts'ǫ̀ yek'eehk'ǫ̀.
205	GEN 8:21	Gots'ǫ̀ K'àowo t'asìı wets'ǫ̀ wek'eek'ǫ̀ǫ sìı wegha nezı̨ t'à edets'ǫ̀ hadı, “Dǫ negechà-lea gots'ǫ t'aats'ǫǫ̀ ededzeè t'à hołı̨ı̨ nàowoò zǫ danıgedè kò, k'achı̨ wı̨ı̨zìı dèè k'e hanì hoìla agohłe ha nıìle. Eyıts'ǫ k'achı̨ wı̨ı̨zìı t'asìı hazǫǫ̀ edaa sìı gıdıhohtsı̨ ha nıìle.
206	GEN 8:22	“Dıı dèè gòɂǫ gots'ǫ̀ dèè k'e t'asìı dehshe ha, eyıts'ǫ t'asìı dehshee sìı dǫ nàgehtsį̀ ha, edzaa eyıts'ǫ edıı sìı t'aats'ǫǫ̀ hagot'ı̨ ha, ı̨mbè eyıts'ǫ xok'e agot'ı̨ ha, eyıts'ǫ t'aats'ǫǫ̀ dzę eyıts'ǫ to agot'ı̨ ha,” Nǫ̀htsı̨ edets'ǫ̀ hadı.
229	GEN 9:23	Hanìkò wı̨ı̨de Shem eyıts'ǫ Jafet edeehgò ts'ǫ gıge ehtł'ı̨ nawhet'ıì agį̀į̀là gà hanì yets'ǫ̀ ek'èt'à łegıatłe, hanì t'aa gıtà ı̨ht'edę whetı̨ı̨ sìı ehtł'ı̨ wek'e nègı̨ı̨ɂa. Gıtà ı̨ht'edę whetı̨ı̨ ghàgeeda ch'à ets'èɂǫ̀ǫ̀ nageɂa.
232	GEN 9:26	Eyıts'ǫ hadı, “Gots'ǫ̀ K'àowo, Shem Wenǫ̀htsı̨ sìı wets'ǫ̀ sìghà welè! Kanan got'ı̨į̀ sìı t'aats'ǫǫ̀ Shem gha eghàlageedaa-dǫǫ̀ gıılè.
233	GEN 9:27	Nǫ̀htsı̨ Jafet wenèè goı̨chà ayııle. Jafet, Shem wenı̨hbàa yìı nàwedè, Kanan got'ı̨į̀ t'aats'ǫǫ̀ yegha eghàlageedaa-dǫǫ̀ gıılè,” Noah hadıì edeza gots'ǫ̀ xàyaı̨htı.
236	GEN 10:1	Dıı godı dek'eèhtł'èe sìı Noah weza Shem, Ham eyıts'ǫ Jafet gıgodıì hǫt'e: Tı dèè goteètł'ı tł'axǫǫ̀ ededı̨ sı gıza łǫ gòı̨lè.
306	GEN 12:7	Ekǫ nèk'e gots'ǫ̀ K'àowo Abram ts'ǫ̀ wègoèht'į̀, hayèhdı, “Jǫ dèè gòɂǫǫ sìı nets'ıhɂǫ̀ǫ-dǫǫ̀ gıghàehɂà ha,” yèhdı. Eyıt'à Abram, eyı nèk'e gots'ǫ̀ K'àowo ts'ǫ̀ t'asìı k'eehk'ǫ̀ gha kwe ełeka nèyı̨ı̨wa t'à kwe-ladà whehtsı̨.
307	GEN 12:8	Ekǫ gots'ǫ kǫ̀ta Bethel wexa sa k'àɂàa ts'ǫnèe shìh xàwheɂaa ts'ǫ̀ nììtła. Ekǫ edenı̨hbàa nàı̨hgè. Kǫ̀ta Bethel dą̀ą ts'ǫ̀ goòɂàa eyıts'ǫ kǫ̀ta Ayı gòyeh sa kàɂàa ts'ǫ̀ goòɂàa, eyı kǫ̀ta nàke wege edenı̨hbàa nàı̨hgè. Ekǫ gots'ǫ̀ K'àowo ts'ǫ̀ t'asìı k'eehk'ǫ̀ gha k'achı̨ kwe-ladà whehtsı̨ eyıts'ǫ gots'ǫ̀ K'àowo ts'ǫ̀ xàyaı̨htı.
327	GEN 13:8	Eyıt'à Abram edesah Lot ts'ǫ̀ hadı, “Ełèot'ı̨ ats'ı̨ı̨t'e t'à ełek'èch'a ats'ııdì-le. Sets'ǫ tıts'aàdìı-k'èdìı-dǫǫ̀, eyıts'ǫ nets'ǫ tıts'aàdìı-k'èdìı-dǫǫ̀ ełek'èch'a hogıhtsį̀-le.
332	GEN 13:13	Dǫzhìı kǫ̀ta Sodom nàgedèe sìı hołı̨ı̨ nàowoò k'ę̀ę̀ geeda, gots'ǫ̀ K'àowo k'èch'a hołı̨ı̨ hogehtsı̨.
337	GEN 13:18	Eyıt'à Abram edenı̨hbàa hazǫǫ̀ nàı̨wa. Hebron nèk'e Amor got'ı̨į̀ Mamer wets'ǫ ts'ı nechàa nàwheɂaa ts'ǫ̀ tàèhtła. Ekǫ gots'ǫ̀ K'àowo ts'ǫ̀ t'asìı k'eehk'ǫ̀ gha kwe ełeka nèyı̨ı̨wa t'à kwe-ladà whehtsı̨.
341	GEN 14:4	Eyı k'àowocho sı̨làı ełets'àgedıı sìı hoònǫ-daats'ǫ̀-nàke xo gots'ǫ̀, k'àowocho Kedorlomer wetł'aà geèhkw'e ı̨lè, hanìkò hoònǫ-daats'ǫ̀-taı xo k'e eyı k'àowocho gık'èı̨t'e ha gı̨ı̨wǫ-le agejà.
357	GEN 14:20	Nǫ̀htsı̨ Enıìyah Deè elı̨ı̨ sìı weghàsǫts'eedı welè. Dǫ nek'èch'a gı̨ı̨lı̨ı̨ sìı netł'aà nègòı̨la hǫt'e,” Melkızedek Abram ts'ǫ̀ hadı. Eyı tł'axǫǫ̀ Abram ełegegǫ gots'ǫ t'asìı hazǫǫ̀ nèyı̨ı̨waa sìı wets'ǫ hoònǫ-ı̨łè yahtıı Melkızedek ghàyı̨ı̨la.
387	GEN 16:5	Eyıt'à Sarayı ededǫǫ̀ Abram ts'ǫ̀ hadı, “Nı̨ net'àat'à daehɂa hǫt'e. Ts'èko segha eghàlaedaa neghàehtı̨ı̨ sìı hotıeda-le edek'èhoèhzà t'à senèèlı̨-le. Gots'ǫ̀ K'àowo segha nesınìyawehtı,” yèhdı.
389	GEN 16:7	Gots'ǫ̀ K'àowo weyak'eet'ı̨į̀ ekìı-ka nèk'e tı-xàewìı gà yegòhɂǫ. Eyı dèè goyìı tı-xàewìı sìı kǫ̀ta Shur gòyeh ts'ǫ̀ tı̨lı nıɂàa gà hǫt'e.
390	GEN 16:8	Yak'eet'ı̨į̀ yets'ǫ̀ hadı, “Hagar, Sarayı wegha eghàlaı̨daa anet'ee sìı edı̨į̀ gots'ǫ anet'ı̨? Eyıts'ǫ edı̨į̀ ts'ǫ̀ anet'ı̨?” yèhdı. Hagar yets'ǫ̀ hadı, “Sets'ǫ̀ k'àowo Sarayı wech'à kwı̨èhsa,” hadı.
391	GEN 16:9	Yak'eet'ı̨į̀ yets'ǫ̀ hadı, “Nets'ǫ̀ k'àowo wets'ǫ̀ anaąde, eyıts'ǫ wek'èanet'e,” yèhdı.
392	GEN 16:10	Eyıts'ǫ yak'eet'ı̨į̀ hayèhdı, “Nets'ıhɂǫ̀ǫ-dǫǫ̀ łǫ geet'è agehłe ha. Sıì gı̨ı̨tłǫ t'à dǫ wı̨ı̨zìı gogıhtà ha nıìle,” yèhdı.
393	GEN 16:11	Gots'ǫ̀ K'àowo weyak'eet'ı̨į̀ yets'ǫ̀ hanaedı, “Dıì chekoa nets'ǫ sìı dǫzhìa nìı̨htè ha. Dànì nexè hoìla hòɂǫǫ sìı gots'ǫ̀ K'àowo yek'èezǫ t'à, Ishmael wìyeh awı̨ı̨le ha.
394	GEN 16:12	Dǫ wekwì nàtsoo elı̨ ha. Dǫ hazǫǫ̀ k'èch'a eda ha, eyıts'ǫ dǫ hazǫǫ̀ gık'èch'a geeda ha. Eyıts'ǫ edèot'ı̨ hazǫǫ̀ gok'èch'a k'ehoɂa ha,” yak'eet'ı̨į̀ yèhdı.
408	GEN 17:10	Nàowo nàtsoo nı̨ nexè eyıts'ǫ netł'axǫǫ̀ nets'ıhɂǫ̀ǫ-dǫǫ̀ gıxè whehtsı̨ı̨ sìı dıı hanì wek'èaht'e ha: Naxıta dǫzhìı hazǫǫ̀ gıkwǫ̀ nàt'à ha hǫt'e.
427	GEN 18:2	Abraham ı̨daà k'eet'į̀ là dǫ taı nàgeèhza goaɂı̨. Goaɂı̨ ts'ǫ̀et'ıì nıìtła gà ı̨whąą̀ gots'ǫ̀ èhtła, gonadąą̀ dèè k'e ts'ǫ̀ nàgòı̨hgè.
455	GEN 18:30	Abraham k'achı̨ hadı, “Gots'ǫ̀ K'àowo sets'ǫ̀ wek'èch'a welè-le, hanìkò seę̀hkw'ǫ welè. Dǫ ehkw'ı geedaa taènǫ zǫ eyı nàgedè nı̨dè dànì ha?” yèhdı. “Dǫ ehkw'ı geedaa taènǫ zǫ eyı nàgedè nı̨dè t'asagohłe ha-le,” gots'ǫ̀ K'àowo yèhdı.
457	GEN 18:32	K'achı̨ Abraham hanaedı, “Gots'ǫ̀ K'àowo wek'èch'a welè-le, hanìkò k'achı̨ dıì ı̨łàà zǫ xàyahtıì ası̨ı̨le. Ekò dǫ ehkw'ı geedaa hoònǫ zǫ eyı nàgedè nı̨dè dànì ha?” yèhdı. Gots'ǫ̀ K'àowo hadı, “Eyı dǫ hoònǫ gıgha kǫ̀godeè t'asagohłe ha-le,” yèhdı.
459	GEN 19:1	Xèhts'ǫ̀ agòjà ekò yak'eet'ı̨į̀ nàke kǫ̀godeè Sodom nègı̨ı̨de. Ekìıyeè k'e Lot kǫ̀ta goyagoòɂàa k'è wheda ı̨lè. Goaɂı̨ ts'ǫ̀et'ıì nììtła gà gots'ǫ̀ èhtła, wenì dèe xèedìı ts'ǫ̀ gots'ǫ̀ nàgòı̨hgè.
463	GEN 19:5	Lot ts'ǫ̀ yagìzeh hagedı, “Dıı toò eyı dǫ nets'ǫ̀ nègı̨ı̨dee sìı gılaedì? Gots'ǫ̀ xàgııdè agı̨ı̨le, gık'alats'edè ha t'à,” hagedı.
473	GEN 19:15	Èhkǫ agodaade ekò yak'eet'ı̨į̀ Lot ts'ǫ̀ hagedı, “Nets'èkeè eyıts'ǫ netì jǫ geèhkw'ee sìı ı̨whąą̀ xàgı̨ı̨wa. Haahjà-le-ı̨dè Nǫ̀htsı̨ kǫ̀godeè nàgòı̨hkwa nı̨dè naxı̨ sı ełaahde ha hǫt'e,” gıìhdı.
475	GEN 19:17	Xàgogeèwa ts'ǫ̀et'ıì eyı dǫ ı̨łè hagòhdı, “Jǫ gots'ǫǫ̀ kwı̨ahdè, edaxàahdè! Ek'èt'à k'eaht'į̀-le eyıts'ǫ dèè goı̨tłoa k'e nìahdè-le! Yeè shìh ta ts'ǫ̀ kwı̨ahdè, hanì-le-ı̨dè ełaahde ha!” gòhdı.
484	GEN 19:26	Hanìkò ekìıyeè k'e Lot wets'èkeè ek'èt'à k'eet'į̀ t'à dewakweè nàı̨ɂaa whelı̨.
486	GEN 19:28	Kǫ̀godeè Sodom eyıts'ǫ Gomorah, eyıts'ǫ dèe goı̨tłoa hazǫǫ̀ ts'ǫ̀ k'eet'į̀ là, dèè gots'ǫ ło dezǫǫ ı̨dòo deekw'e, kǫ̀ nàtsoo gots'ǫ ło deekw'e lanì wègaat'ı̨.
502	GEN 20:6	Eyıt'à Nǫ̀htsı̨ dıı hayèhdı ghǫ nàwhetı̨, “Hęɂę, wek'èı̨zǫ-le t'à hanì eghàlaneedà wek'èehsǫ, eyıt'à sek'èch'a hołı̨ı̨ hoı̨htsı̨ ch'à anèhłà hǫt'e. Eyı ts'ıhɂǫ̀ t'asaweęlà-le anèhłà.
509	GEN 20:13	Nǫ̀htsı̨ setà wets'ǫǫ̀ nats'eèhdeè agǫ̀ǫ̀là ekò Sarah dıı hawèehsı̨ ı̨lè, ‘Seghǫneę̀tǫ nı̨dè t'aa ts'ǫ̀ k'ets'edèe sìı nı̨ı̨de aht'e sį̀ı̨dı ha,’ wèehsı̨ ı̨lè,” Abraham yèhdı.
513	GEN 20:17	Eyı tł'axǫǫ̀ Abraham yegha Nǫ̀htsı̨ ts'ǫ̀ yaı̨htı t'à Abımelek, wets'èkeè eyıts'ǫ ts'èko gıgha eghàlageedaa sìı chekoa nègele gha k'aàt'ıì anagejà.
528	GEN 21:14	K'omǫǫ̀dǫǫ̀ ts'ǫ̀et'ıì Abraham weghǫ shèts'ezhee deyèyı̨ı̨wa eyıts'ǫ tıwò yìı tı yı̨ı̨htł'ı, Hagar nayage gha yek'e nèyı̨ı̨wa, hanì dǫzhìa xè xàyeèhɂà. Ekìı-ka nèk'e Bersheba gòyeh ekǫ hok'èezǫ-le k'etło.
531	GEN 21:17	Hanìkò Nǫ̀htsı̨ eyı dǫzhìa etse yeèhkw'ǫ. Nǫ̀htsı̨ wets'ǫ yak'eet'ı̨į̀ yak'e gots'ǫ Hagar ts'ǫ̀ gode, hayèhdı, “Hagar nexè dàgòjà? Dı̨ı̨jı̨-le, dǫzhìa eyı whetı̨ı̨ xè etsee sìı Nǫ̀htsı̨ yeèhkw'ǫ hǫt'e.
532	GEN 21:18	Dǫzhìa nıìtłaà awı̨ı̨le gà k'egòwı̨ı̨dı, wets'ıhɂǫ̀ǫ-dǫǫ̀ łǫ gǫ̀hłı̨ ha ne t'à,” yak'eet'ı̨į̀ yèhdı.
540	GEN 21:26	Hanìkò Abımelek yets'ǫ̀ hadı, “Amìı ayį̀į̀làa sìı wek'èehsǫ nıìle. Sets'ǫ̀ haı̨dı-le ts'ıhɂǫ̀ dıı dzęę̀ k'e k'ǫąt'a wek'èhoèhzà,” yèhdı.
550	GEN 22:2	Nǫ̀htsı̨ hayèhdı, “Neza ı̨łàet'ee Isaac weghǫneę̀tǫǫ sìı yeè Morayah nèk'e ts'ǫ̀ edexè awı̨ı̨le. Ekǫ shìh ı̨łè nets'ǫ̀ haehsı̨ ha sìı weka neza ełaı̨whı gà sets'ǫ̀ wek'eı̨hk'ǫ̀ ha,” yèhdı.
551	GEN 22:3	Eyıt'à k'omǫǫ̀dǫǫ̀ et'ıì Abraham nıìtła gà edetłı̨tsoa k'e nèɂı̨ı̨wa. Wecheekeè nàke eyıts'ǫ weza Isaac edexè agǫ̀ǫ̀là. Nǫ̀htsı̨ ts'ǫ̀ t'asìı k'egeehk'ǫ̀ gha tso agı̨į̀là tł'axǫǫ̀, Nǫ̀htsı̨ edı̨į̀ ts'ǫ̀ aąde ha yèhdıı sìı ts'ǫ̀ agejà.
552	GEN 22:4	Taı dzęę̀ k'e Abraham ı̨daà k'eet'į̀ là yahdaà nıwà shìh wègaat'ı̨.
555	GEN 22:7	Isaac edetà ts'ǫ̀ hadı, “Età.” “Seza, ayìı?” Abraham yèhdı. “Kǫ̀kwıì eyıts'ǫ tso k'ets'ele hanìkò Nǫ̀htsı̨ ts'ǫ̀ sahzǫ̀ązaa k'ets'eehk'ǫ̀ ha sìı welaedì?” edetà èhdı.
559	GEN 22:11	Hanìkò gots'ǫ̀ K'àowo weyak'eet'ı̨į̀ yak'e gots'ǫ yets'ǫ̀ whezeh, “Abraham! Abraham!” yèhdı hǫt'e. “Hęɂę, neèhkw'ǫ,” Abraham yèhdı.
560	GEN 22:12	“Dǫzhìa ełaı̨hwhı-le,” yèhdı. “T'asawı̨ı̨le-le. Neza ı̨łàet'ea nets'ǫ sìı sech'à wek'ènedì-le t'à sıì Nǫ̀htsı̨ k'èanet'e nǫǫ̀!” yak'eet'ı̨į̀ yèhdı.
561	GEN 22:13	Abraham ı̨daà k'eet'į̀ là sahzǫ̀ą werezhıì wedè gogho ta eht'èèko yaɂı̨. Yets'ǫ̀ ehtła gà sahzǫ̀ą nıìchì. Ełaàyį̀ı̨hwho gà kǫ̀-dèk'ǫ̀ǫ k'e edeza tł'axǫǫ̀ Nǫ̀htsı̨ ts'ǫ̀ yek'enı̨hk'ǫ.
563	GEN 22:15	K'achı̨ gots'ǫ̀ K'àowo weyak'eet'ı̨į̀ yak'e gots'ǫ Abraham ts'ǫ̀ ezeè hǫt'e,
566	GEN 22:18	Sek'èanet'e k'èxa nets'ıhɂǫ̀ǫ-dǫǫ̀ gıts'ıhɂǫ̀ dıı nèk'e dǫ hazǫǫ̀ xàɂaa xè sìghà hòɂǫ ha,” yak'eet'ı̨į̀ yèhdı.
599	GEN 24:7	“Gots'ǫ̀ K'àowo, yak'e gots'ǫ Nǫ̀htsı̨, setà wekǫ̀ gots'ǫ eyıts'ǫ senèè gots'ǫ xàseèhchìı sìı dıı hanì yatı nàtsoo sexè whehtsı̨ ı̨lè: ‘Nets'ıhɂǫ̀ǫ-dǫǫ̀ sìı dıı dèè gıghàehɂà ha,’ sèhdıı sìı, edeyak'eet'ı̨į̀ nenakweè sıìgogeleè ayele ha. Hanì-ı̨dè ekǫ gots'ǫ seza wegha ts'èko gǫ̀hɂà ha.
600	GEN 24:8	Eyı t'eeko nexè anade ha nıwǫ-le nı̨dè dıı yatı nàtsoo sexè wheęhtsı̨ı̨ sìı t'à nek'enìdahoet'à ha-le. Hanìkò seza ekǫ nawı̨ı̨chì ha nıìle,” yèhdı.
619	GEN 24:27	hadı, “Gots'ǫ̀ K'àowo, sets'ǫ̀ k'àowo Abraham Wenǫ̀htsı̨ weghàsǫhoedı welè. T'aats'ǫǫ̀ k'àowo Abraham ts'ǫ̀ wedzeè eteèɂı̨ xè t'aats'ǫǫ̀ yets'ǫ̀ ehkw'ı eghàlaeda hǫt'e. Ekò sı̨ sìı gots'ǫ̀ K'àowo, Abraham wèot'ı̨ gıkǫ̀ ts'ǫ̀ segha ehkw'ı goòɂà ayį̀į̀là,” hadıì yaı̨htı.
622	GEN 24:30	Goı̨ghǫ̀-lamǫ̀ǫ eyıts'ǫ wedè welachı̨į̀ k'e whelaa yaɂı̨ ts'ǫ̀et'ıì eyıts'ǫ eyı dǫ dàyèhdıı yıìkw'o ts'ǫ̀et'ıì yets'ǫ̀ xàèhtła. Abraham wecheekeè tık'è ts'ǫ̀ nıwà-lea tıts'aàdìıcho gà nàwo yaɂı̨.
632	GEN 24:40	“Eyıt'à dıı hasèhdı, ‘Gots'ǫ̀ K'àowo wenàowoò k'ę̀ę̀ ehdaa sìı edets'ǫ yak'eet'ı̨į̀ nexè ayele ha, eyıts'ǫ ayìı gha ekǫ naątła ha sìı nets'ǫ̀ hoedıì ayele ha. Hanì-ı̨dè setà wèot'ı̨ gots'ǫ seza wegha ts'èko į̀hchı ha.
633	GEN 24:41	Sèot'ı̨ gıts'àwheętła kò ts'èko neghàgıhtè-le nı̨dè yatı nàtsoo sexè wheęhtsı̨ı̨ sìı t'à nek'enìdahoet'à ha-le,’ sèhdı ı̨lè.
655	GEN 24:63	Įłàà xèhts'ǫ̀ whatsǫǫ̀ dèè k'e k'eda, ı̨daà k'eet'į̀ là tıts'aàdìıcho nagıadè goghàeda.
656	GEN 24:64	Rebekah ededı̨ sı ı̨daà k'eet'į̀ là Isaac eɂı̨. Tıts'aàdìıcho k'e gots'ǫ hodàèhtła,
682	GEN 25:23	Gots'ǫ̀ K'àowo yets'ǫ̀ hadı, “Ełèchǫekèa chǫ wheke. Eyı dǫ nàke xàɂaa gı̨ı̨lı̨ ha sìı ełek'èch'a agı̨ı̨t'e ha. Įłè gonahk'e elı̨ ha, eyıts'ǫ ǫhdah sìı edechı gha eghàlaeda ha,” yèhdı.
698	GEN 26:5	Abraham sek'èɂaı̨t'è t'à; seyatıì eyıts'ǫ senàowoò k'èdì hǫt'e,” Nǫ̀htsı̨ Isaac ts'ǫ̀ hadı.
701	GEN 26:8	Isaac whaà hoògǫ eyı nàı̨dè ekò k'àowocho Abımelek, Fılıstea got'ı̨į̀ gha k'àowo elı̨ı̨ sìı dahkǫ̀ gots'ǫ ı̨zhıì k'eet'į̀ là Isaac edets'èkeè Rebekah k'onadıìde yaɂı̨.
703	GEN 26:10	Abımelek hadı, “Dànì ghǫ gots'ǫ̀ hǫı̨ts'ì nǫǫ̀? Dǫ ı̨łè nets'èkeè t'àı̨tè nı̨dè net'àat'à hołı̨ı̨ gok'e ade ha ı̨lè,” yèhdı.
718	GEN 26:25	Isaac eyı dèè k'e Nǫ̀htsı̨ ts'ǫ̀ t'asìı k'eehk'ǫ̀ gha kwe ełeka nèyı̨ı̨wa t'à kwe-ladà whehtsı̨, eyıts'ǫ Nǫ̀htsı̨ ts'ǫ̀ yaı̨htı. Ekǫ edenı̨hbàa nàı̨hgè eyıts'ǫ wecheekeè tık'è gogehtsı̨ ha dèè xàgı̨ı̨hgè.
722	GEN 26:29	Hanì-ı̨dè nets'ǫ̀ hoìla eghàlats'eeda-le k'ę̀ę̀ nı̨ sı gots'ǫ̀ hoìla eghàlaı̨da ha-le. T'aats'ǫǫ̀ nets'ǫ̀ nezı̨į̀ nats'eɂa xè ts'èwhı̨į̀ nanets'eèhɂà ı̨lè. Ekò dıì sìı gots'ǫ̀ K'àowo nexè sìghà hòɂǫǫ̀ ayį̀į̀là hǫt'e,” gıìhdı.
758	GEN 27:30	Isaac nezı̨į̀ yek'eèyaı̨htı tł'axǫǫ̀ Jacob xàèhtła. Edetà ts'ǫǫ̀ xàèhtła ts'ǫ̀et'ıì wı̨ı̨de Esau nàzèe gots'ǫ goyaèhtła.
781	GEN 28:7	Jacob edetà eyıts'ǫ edemǫ k'èı̨t'e t'à Padan-Aram nèk'e ts'ǫ̀ ajà, eyı sı yeghǫ ıìkw'o.
786	GEN 28:12	Eyı toò nàwhetı̨. Dèè gots'ǫ yak'e ts'ǫ̀ dechı̨ehka dekı̨ı̨ɂà ghǫ nàwhetı̨. Gots'ǫ̀ K'àowo weyak'eet'ı̨į̀ dechı̨ehka k'e ı̨dòo dekegı̨į̀de eyıts'ǫ ı̨zhıì hodàgeède.
809	GEN 29:13	Laban, Rebekah weza Jacob ghǫ godı ıìkw'o ts'ǫ̀et'ıì yets'ǫ̀ èhtła. Sıì wınà t'à edeyàdo gà yek'èts'adlı̨. Edekǫ̀ ts'ǫ̀ ayį̀į̀là tł'axǫǫ̀ Jacob wexè dàgòjàa sìı hazǫǫ̀ edeɂeh ts'ǫ̀ hadı.
830	GEN 29:34	Leah k'achı̨ hotıeda-le ajà t'à k'achı̨ dǫzhìa nìı̨htı̨, hadı, “Weza taı nìıhła t'à k'ǫǫ̀t'a sedǫǫ̀ sexè at'ı̨į̀ ade ha,” hadı. Eyıt'à dǫzhìa Levı wìyeh ayį̀į̀là.
858	GEN 30:27	Hanìkò Laban yets'ǫ̀ hadı, “Etesenèeɂı̨ nı̨dè ı̨łaà goxè nàądè. Sìdìı k'èhokw'o weghàà, nı̨ nets'ıhɂǫ̀ gots'ǫ̀ K'àowo sexè sìghà hòɂǫǫ̀ ayį̀į̀là wek'èehsǫ asììdlà hǫt'e,” yèhdı.
868	GEN 30:37	Jacob, ts'ı taı xàɂaa gots'ǫ dechı̨ łǫ xàı̨ht'a gà wet'ıì mǫ̀hdaa yek'et'ıę̀hdla t'à dechı̨ wek'e nawhet'ıì ayį̀į̀là. Hanì dechı̨ wetǫǫ̀ degoo wek'e wègaat'ı̨į̀ ayį̀į̀là.
881	GEN 31:7	hanìkò t'aats'ǫǫ̀ seghǫyaeɂà eyıts'ǫ sets'àɂeedìı sìı dek'aɂį̀ ayehɂı̨. Hanìkò naxıtà sets'ǫ̀ hoìla eghàlaeda ch'à Nǫ̀htsı̨ ayį̀į̀hwhǫ.
884	GEN 31:10	“Įłàà tıts'aàdìı ełek'aàdèe ekò k'e nàwhıhtı̨ ı̨lè. K'eeht'į̀ là ejıetsoa werezhıì hazǫǫ̀ dezǫ gık'e nawhet'ıı eyıts'ǫ gıta goèhzǫǫ sìı ejıetsoa xè ełek'aàgedè ghǫ nàwhıhtı̨ ı̨lè.
885	GEN 31:11	Nǫ̀htsı̨ weyak'eet'ı̨į̀ sets'ǫ̀ gode hǫt'e, ‘Jacob,’ sèhdı. ‘Hęɂę, neèhkw'ǫ,’ dehsı̨.
894	GEN 31:20	Eyıts'ǫ Jacob, Aram got'ı̨į̀ Laban naàhtǫ naèhtła t'à yetł'ahk'e hòèhtsı̨.
901	GEN 31:27	Dànìghǫ senaàhtǫ kwı̨èhsa xè sets'ǫ̀ ekǫ-le eghàlaneedà? Sets'ǫ̀ haı̨dı nı̨dè naı̨tła kwe negha goınà xè eyeh eyıts'ǫ tł'ık'eetı̨ı̨ t'à negha sǫnàts'edè ha ı̨lè.
905	GEN 31:31	Jacob, Laban ts'ǫ̀ hadı, “Dehjı̨ ts'ıhɂǫ̀ hanì nenaàhtǫ nats'eède ı̨lè. Sets'ǫ̀ nek'èch'a xè netì seghǫ nagı̨ı̨wa ha sǫnı dehwhǫ ı̨lè.
909	GEN 31:35	Rachel edetà ts'ǫ̀ hadı, “Età sets'ǫ̀ nek'èch'a welè-le. Ts'èko ehłı̨ t'à nenadąą̀ nàhwho ha dìì,” edetà èhdı. Laban t'asìı hazǫǫ̀ ta k'eeta kò edenǫ̀htsı̨ą gòhɂǫ-le.
910	GEN 31:36	Eyıt'à Jacob, Laban ts'ǫ̀ wınì-le, hayèhdı, “Hot'eè, ayìı sek'enìdahoǫɂà ha? Nek'èch'a ayìı hòwhıhtsı̨ t'à hanì k'esı̨ı̨zo nǫǫ̀?
929	GEN 32:1	Satsǫ k'omǫǫ̀dǫǫ̀ et'ıì Laban naetła kwe edekwı eyıts'ǫ edetì gok'èts'adlı̨ eyıts'ǫ yatı nezı̨ı̨ t'à gok'eèyaı̨htı. Eyı tł'axǫǫ̀ edenèk'e ts'ǫ̀ anajà.
930	GEN 32:2	Jacob ededı̨ sı edenèk'e ts'ǫ̀ naèhtła. Naèhtła ekò Nǫ̀htsı̨ weyak'eet'ı̨į̀ gıghàı̨de.
962	GEN 33:1	Jacob ı̨daà k'eet'į̀ là wı̨ı̨de Esau naetłe yaɂı̨, dǫ dı̨akw'eènǫ (400) yexè at'ı̨. Eyıt'à weza gımǫ xè taı ts'ǫ̀ łats'ıgǫǫwa, edets'èkeè Leah, Rachel eyıts'ǫ ts'èko nàke gogha eghàlageedaa xè łats'ıgǫǫwa.