1	GEN 1:1	Waatʋ wei Ɩsɔ caala ɩsɔtɔnʋɣʋ na tɛtʋ kɛ lapʋ tǝcǝcɩ tɔ.
2	GEN 1:2	Tɛtʋ ntɩ tɩɩ wɛ kpɛtɛ kɛ́ tǝ fɛɩ tapʋɣʋ tǝ fɛɩ nɔɣɔ, na teŋku lumaŋ nyǝŋ waasa pǝ tɔɔ na sǝkpɛtʋɣʋ nyalaa, na pǝ́ kaasɩ na Ɩsɔ heelim náá makɩ lʋm tɔɔ.
3	GEN 1:3	Ntɛna Ɩsɔ tɔ́ sɩ: Pǝ́ naakɩ, ɩlɛna pǝ́ sʋʋ naʋ.
4	GEN 1:4	Ɩsɔ laŋlɛ hɛɛna pǝ naakʋɣʋ mpʋ tɔ, ɩlɛna ɩ́ faɣa-wɩ na sǝkpɛtʋɣʋ.
5	GEN 1:5	Mpʋɣʋlɛ Ɩsɔ ha pǝ naakʋɣʋ mpʋ tɔɣɔ hǝtɛ sɩ ilim taa, na ɩ́ ha sǝkpɛtʋɣʋ sɩ ahoo. Pǝ kpaɣa tanaŋ na pǝ́ sɩɩna taanaɣa, na pǝ́ kpaɣa ahoo na pǝ́ nyaalɩ tɔ, pǝ kpɛnta kʋyakʋ kancaalaɣa nyǝŋkʋ.
6	GEN 1:6	Ɩlɛna Ɩsɔ tɔ́ sɩ: Patǝma ɩ́ wɛɛ ɩsɔtaa, ɩlɛna pǝ́ faɣa ɩsɔtɔnʋɣʋ taa lʋm na atɛ nyǝm.
7	GEN 1:7	Ɩlɛna pǝ́ lá mpʋ.
8	GEN 1:8	Ntɛna ɩ́ ha patǝma ɩnǝɣɩ hǝtɛ sɩ ɩsɔtɔnʋɣʋ. Pǝ kpaɣa tanaŋ na pǝ́ sɩɩna taanaɣa, na pǝ́ kpaɣa ahoo na pǝ́ nyaalɩ tɔ, pǝ kpɛnta kʋyakʋ naalɛ nyǝŋkʋ.
9	GEN 1:9	Ḿpʋ́ɣʋ́ Ɩsɔ tɔma sɩ: Atɛ lʋm ɩ́ kpɛntɩ lona paɣalɛ taa na pǝ́ yele puɣulaɣa tɛtʋ. Ɩlɛna pǝ́ lá mpʋ.
10	GEN 1:10	Kɛlɛna Ɩsɔ ha-tǝɣɩ hǝtɛ sɩ tɛtʋ, na ɩ́ yaa lʋmnaa mpɛ sɩ teŋkunaa, na ɩ laŋlɛ hɛɛ.
11	GEN 1:11	Ntɛna Ɩsɔ tɔ́ sɩ: Tɛtʋ ɩ́ lʋlǝsɩ kʋnyɔnyɔm mpi pǝ wɛ tǝlɛkʋlɛkʋ tɔɣɔ waanɩ waanɩ ɩsɩɩ tɩɩŋ na nyɩɩtʋ na pǝ́ lʋlǝɣɩ pǝ pee na á wɛ nyɔʋ. Ɩlɛna pǝ́ lá mpʋ.
12	GEN 1:12	Ḿpʋ́ɣʋ́ tɛtʋ lʋlǝsa-wǝɣɩ waanɩ waanɩ, na Ɩsɔ laŋlɛ hɛɛ.
13	GEN 1:13	Pǝ kpaɣa tanaŋ na pǝ́ sɩɩna taanaɣa, na pǝ́ kpaɣa ahoo na pǝ́ nyaalɩ tɔ, pǝ kpɛnta kʋyakʋ tooso nyǝŋkʋ.
15	GEN 1:15	na sɩ́ naakɩ tɛtʋ, ɩlɛna pǝ́ lá mpʋ.
16	GEN 1:16	Kɔkɔsɩ sɔsɔɔnsɩ naalɛɣɛ ɩ lapa, na kʋkǝlaɣa tɔ́kɩ kawulaɣa kɛ ilim na naalɛ nyǝŋka kɛ ahoo. Na ɩ́ la ɩsɔtʋlʋŋasɩ tɔtɔ.
18	GEN 1:18	na sɩ́ tɔkɩ kawulaɣa kɛ ilim na ahoo, na sɩ́ faɣa ilim na sǝkpɛtʋɣʋ.
19	GEN 1:19	Pǝ kpaɣa tanaŋ na pǝ́ sɩɩna taanaɣa, na pǝ́ kpaɣa ahoo na pǝ́ nyaalɩ tɔ, pǝ kpɛnta kʋyakʋ liɣiti nyǝŋkʋ.
20	GEN 1:20	Ḿpʋ́ɣʋ́ Ɩsɔ tɔma sɩ: Weesuɣu nyǝm ɩ́ sú lʋmnaa taa na sumasɩ náá kʋlǝɣɩ ɩsɔtaa.
22	GEN 1:22	na ɩ́ kooli-tǝɣɩ kʋpantʋ na ɩ́ tɔ́ sɩ: Ɩ́ lʋlɩ na ɩ́ huki na ɩ́ sú teŋkunaa, na sumasɩ náá huki tɛtʋ tɔɔ.
23	GEN 1:23	Pǝ kpaɣa tanaŋ na pǝ́ sɩɩna taanaɣa, na pǝ́ kpaɣa ahoo na pǝ́ nyaalɩ tɔ, pǝ kpɛnta kʋyakʋ kakpasɩ nyǝŋkʋ.
24	GEN 1:24	Ḿpʋ́ɣʋ́ Ɩsɔ tɔma sɩ: Tɛtʋ ɩ́ lʋlǝsɩ weesuɣu nyǝm tǝnaɣa waanɩ waanɩ ɩsɩɩ tɔla na taalɛ wontu na atɛ nyamanyamanaa tǝna, ɩlɛna pǝ́ lá mpʋ.
25	GEN 1:25	Wontunaa mpɛ pa tǝnaɣa ɩ lapa, paa tɔla paa taalɛ wontu paa atɛ nyamanyamanaa, na ɩ laŋlɛ hɛɛ.
26	GEN 1:26	Ḿpʋ́ɣʋ́ Ɩsɔ tɔma sɩ: Tǝ́ ŋmá yʋlʋ na ɩ́ wɛɛ ɩsɩɩ tá tǝtɛŋɛlɛŋ na ɩ́ tɔɣɔ kawulaɣa kɛ wontu tǝna tɔɔ, paa tiina paa sumasɩ paa nti.
27	GEN 1:27	Kɛlɛna ɩ́ ŋmá yʋlʋ ɩsɩɩ ɩ maɣamaɣa ɩ wɛɛ tɔ. Apalʋ na alʋ kɛ ɩ ŋmá-wɛ ɩsɩɩ ɩ wɛʋ tɔ
28	GEN 1:28	na ɩ́ kooli-wɛɣɛ kʋpantʋ. Ɩlɛna ɩ́ heeli-wɛ sɩ: Ɩ́ lʋlɩ na ɩ́ huki na ɩ́ sú tɛtʋ na ɩ́ pǝsɩ-tɩ na ɩ́ tɔɣɔ kawulaɣa kɛ tiina na sumasɩ na atɛ wontu tǝna tɔɔ na ɩ́ paasǝna-tɩ.
29	GEN 1:29	Mǝ tɔɣɔnaɣa ntɛ́ kʋnyɔnyɔm na tɩɩŋ tǝna pee.
30	GEN 1:30	Wontu na sumasɩ na weesuɣu nyǝm tǝna tɔɣɔnaɣa ntɛ́ nyɩɩtʋ kʋlɛkǝlɛkǝtʋ tǝna. Ɩlɛna pǝ́ lá mpʋ.
31	GEN 1:31	Mpʋɣʋlɛ Ɩsɔ nyǝnaa na ɩ laŋlɛ hɛɛ sɔsɔm. Pǝ kpaɣa tanaŋ na pǝ́ sɩɩna taanaɣa, na pǝ́ kpaɣa ahoo na pǝ́ nyaalɩ tɔ, pǝ kpɛnta kʋyakʋ naatoso nyǝŋkʋ.
32	GEN 2:1	Ɩsǝna Ɩsɔ lapa ɩsɔtaa na atɛ na pǝ taa weesuɣu nyǝmnaa tǝna tɔɣɔlɛ.
33	GEN 2:2	Kʋyakʋ naatoso nyǝŋkʋ wule kɛ Ɩsɔ tɛɛsa ɩ tǝma, ɩlɛna ɩ́ hɛɛsɩ naatosompɔɣɔlaɣa nyǝŋkʋ wule.
34	GEN 2:3	Pǝ tɔɔ kɛ́ Ɩsɔ koola-kʋɣʋ kʋpantʋ na ɩ́ faɣasɩ-kʋ na kʋ mpaa sɩ kʋ kɛ́ ɩ nyǝŋkʋ.
35	GEN 2:4	Ɩsǝna Ɩsɔ lapa ɩsɔtɔnʋɣʋ na atɛ tɔɣɔlɛ. Waatʋ wei Tacaa Ɩsɔ lapa atɛ na ɩsɔtɔnʋɣʋ tɔ,
36	GEN 2:5	nyɩɩtʋ taa tiika nakǝlɩ ka taa fɛɩ tɛtʋ tɔɔ, pǝ́cɔ́ nyiilaɣa nakǝlɩ ka taa nyɔɔkɩ. Mpi tɔ, Tacaa Ɩsɔ táá yelǝta sɩ tɛʋ ɩ́ nɩɩ. Pǝyele yʋlʋ nɔɣɔlʋ ɩ taa fɛɩ sɩ ɩ́ hala tɛtʋ.
37	GEN 2:6	Ama nikaɣa kpaakaɣana na pǝ́ niɣitiɣi tɛtʋ tǝna.
38	GEN 2:7	Ḿpʋ́ɣʋ́ Tacaa Ɩsɔ kpaɣa tɛtʋ na ɩ́ lá yʋlʋ, ɩlɛna ɩ́ woso yʋlʋ mɩɩna tɛɛ kɛ́ weesuɣu heelim. Tǝnaɣalɛ yʋlʋ sʋʋ feesuɣu.
39	GEN 2:8	Ɩlɛna ɩ́ lá tɩɩŋ taalɛ kɛ Ɩteni taa kɛ́ ilim tǝlɩɩlɛ tɔɔ, na ɩ́ sɩɩ yʋlʋ ɩnǝɣɩ tǝ taa.
40	GEN 2:9	Ntɛna Tacaa Ɩsɔ yele na tɩɩŋ kʋpaŋ nyɔ Ɩteni taa tǝnaɣa waanɩ waanɩ na ɩ pee tɔɣɔʋ na leleŋ. Na tʋɣʋ ŋku kʋ pee haakɩ weesuɣu tɔ, na kʋpantʋ na ɩsaɣatʋ pǝ cɛkǝnaʋ nyǝŋkʋ ka sǝŋa hɛkʋ taa.
41	GEN 2:10	Na pɔɣɔ nakǝlɩ kɛlɛ ká faɣa Ɩteni taa na ká niɣitiɣi tɩɩŋ taalɛ na ká hɛla pusi liɣiti kɛ Ɩteni waalɩ.
42	GEN 2:11	Kancaalaɣa nyǝŋka hǝtɛ ntɛ́ Pisɔŋ, kɛlɛ ka cɔɔna Hafila tɛtʋ nti tǝ taa wʋla kʋpaŋ na tulaalʋ kʋpaŋ na liɣitee pǝlɛ kʋkpɛɛtǝlɛ pǝ wɛɛ tɔ.
44	GEN 2:13	Pɔɣɔ naalɛ nyǝŋka hǝtɛ ntɛ́ Kihɔŋ na kɛlɛ ka cɔɔna Kusi tɛtʋ tǝna.
45	GEN 2:14	Na tooso nyǝŋka hǝtɛ ntɛ́ Tikili, kɛlɛ ka kpeŋna na ilim tǝlɩɩlɛ tɔɔ kɛ́ Asilii tɛtʋ taa. Pɔɣɔ liɣiti nyǝŋka hǝtɛ ntɛ́ Ɩfǝlatɩ.
46	GEN 2:15	Ḿpʋ́ɣʋ́ Tacaa Ɩsɔ sɩɩ yʋlʋ kɛ Ɩteni taalɛ ńtɛ́ tǝ taa sɩ ɩ́ hala na ɩ́ paasǝɣǝna-tɛ́.
47	GEN 2:16	Kɛlɛna ɩ́ tɔ́ yʋlʋ sɩ: N pǝsǝɣɩ na ń tɔɣɔ taalɛ tɩɩŋ tǝna pee.
48	GEN 2:17	Ama kʋpantʋ na ɩsaɣatʋ pǝ cɛkǝnaʋ tʋɣʋ pee paasi kɛ́ n kaa tǝŋ. Pɔpɔtʋ fɛɩ leleŋ, kʋyaŋku ń tɔɣɔ-yɛ ɩsɩɩ n sǝpa.
49	GEN 2:18	Tɛtʋ kɛ Tacaa Ɩsɔ ka lapa taalɛ wontu tǝna, na sumasɩ tǝna, na ɩ́ lá na tǝ́ polo yʋlʋ kiŋ sɩ ɩ́ nyɩ hǝla nna ɩ ká ha-tɩ tɔ, na anǝɣɩ pa yaakɩ-tɩ. Ḿpʋ́ɣʋ́ yʋlʋ hawa tɔla tǝnaɣa hǝla, na taalɛ wontu na sumasɩ tǝna. Ama ɩ ta hiki sǝnlʋ wei ɩ mʋna-ɩ tɔ. Ḿpʋ́ɣʋ́ ɩ tɔma sɩ: Pǝ fɛɩ sɩ yʋlʋ ɩ́ caɣa ɩ tike kɛ mpʋ.
52	GEN 2:21	Ɩlɛna Tacaa Ɩsɔ lá na tom kpa yʋlʋ na ɩ́ too ɩsɩɩ ɩ́ sǝpa, na ɩ́ lǝsɩ ɩ sǝntaaɣa lɛŋka na ɩ́ waasɩ nantʋ kɛ ka lonte.
53	GEN 2:22	Ntɛna ɩ́ mǝŋna sǝntaaɣa ŋka ɩ ka lǝsa apalʋ taa tɔ na ɩ́ ŋmana alʋ na ɩ́ cɛla-ɩ.
54	GEN 2:23	Tǝnaɣalɛ yʋlʋ tɔma sɩ: Aŋhaa, má na ɩnɛ tǝ kaana nantʋ na mʋwa. Mpi tɔ, ma taa kɛ́ pa lǝsa-ɩ, ɩ́lɛ́ ɩ hǝtɛ ntɛ́ alʋ.
55	GEN 2:24	Pǝ tɔɔ kɛ́ apalʋ ka yele ɩ caa na ɩ too na ɩ́ na ɩ alʋ pá caɣa na pá pǝsɩ yʋlʋ kʋlʋm.
56	GEN 2:25	Yʋlʋ na ɩ alʋ pa tɔŋaɣa kpɛla kɛ pa naalɛɣɛ, pǝ́cɔ́ fɛɛlɛ natǝlɩ tǝ fɛɩ-wɛ.
57	GEN 3:1	Taalɛ wontu nti tǝ tǝna Tacaa Ɩsɔ lapa mpʋ tɔ, tʋm kǝlǝna tǝ tǝnaɣa acilaɣatʋ. Mpʋɣʋlɛ kʋyakʋ nakǝlɩ tʋm pɔɔsa alʋ sɩ: Ɩlɛ tampana Ɩsɔ yɔɣɔtaa sɩ ɩ́ taa tɔɣɔ taalɛ tɩɩŋ tǝna pee yaa?
58	GEN 3:2	Kɛlɛna alʋ náá cɔ sɩ: Aaɩ, tǝ tɔ́kɩ halǝm tɩɩŋ tǝna pee kɛ́.
59	GEN 3:3	Ama pǝ kaasʋɣʋ tʋɣʋ ŋku kʋ wɛ halǝm hɛkʋ taa tɔ kʋ pee tɔ, Ɩsɔ tɔma sɩ: Ɩ́ taa tǝŋ-yɛ, pǝ́cɔ́ ɩ́ taa tokina-yɛ́ɣɛ́ tokinaʋ maɣamaɣa, pǝ́ taa kɔɔ na ɩ́ sɩ́.
60	GEN 3:4	Mpʋɣʋlɛ tʋm nɔɣɔ tǝkpaʋ sɩ: Ɩɩ sǝkɩ se.
61	GEN 3:5	Ama Ɩsɔ nyǝ́má sɩ kʋyakʋ ŋku ɩ́ tǝŋa-yɛ, mǝ ɩsɛ kuliɣi kɛ́ ɩsɩɩ ɩnɩ ɩ wɛʋ tɔ, na ɩ́ nyǝ́má kʋpantʋ na ɩsaɣatʋ.
62	GEN 3:6	Alʋ nawa sɩ tʋɣʋ ŋkʋ kʋ nyǝnʋɣʋ wɛ teu, pǝ́cɔ́ kʋ pee wɛ ɩsɛsɛɛmlɛ na a kuliɣi yǝlaa ɩsɛ. Ntɛna ɩ́ kooli-kʋ́ na ɩ́ tɔɣɔ, na ɩ́ kaasɩ na ɩ́ cɛla ɩ paalʋ na ɩ́lɛ́ ɩ́ tɔɣɔ tɔtɔ.
63	GEN 3:7	Tǝnaɣalɛ pǝ kula pa naalɛɣɛ mpʋ pa ɩsɛ na pá cɛkǝna sɩ pa wɛ tapakpɛla. Ɩlɛna pá caa hatʋ kʋwalǝtʋ natǝlɩ na pá tɔɣɔlɩ.
64	GEN 3:8	Pǝ kɛɛsa taanaɣa ɩlɛ Ɩsɔ Tacaa pola ɩ taalɛ tɔɔ kɛ́ cɔɔʋ ntɛ́ na pá nɩɩ ɩ nɔɣɔ. Ɩlɛna yʋlʋ na ɩ alʋ pá sé na pá ŋmɛlɩ taalɛ tɩɩŋ hɛkʋ taa.
66	GEN 3:10	Ḿpʋ́ɣʋ́ ɩ cɔwa sɩ: Ma nɩɩ nyá nɔɣɔ kɛ taalɛ taa ɩlɛna sɔɣɔntʋ kpa-m na má sé na má ŋmɛlɩ. Mpi tɔ, ma wɛ tapakpɛtɛ.
68	GEN 3:12	Kɛlɛna yʋlʋ sɩ: Ma tɔɣaa yáá, ɩlɛ alʋ wei ɩnɩ n ha-m tɔ ɩnɩ ɩ cɛlǝna-m na má tɔɣɔ.
69	GEN 3:13	Ntɛna Ɩsɔ Tacaa pɔɔsɩ alʋ sɩ: Pepe tɔɔ kɛ́ nyá lapa mpʋ? Alʋ nɔɣɔ tǝkpaʋ sɩ: Tʋm tʋsǝna-m na má tɔɣɔ.
70	GEN 3:14	Ḿpʋ́ɣʋ́ Tacaa tɔma tʋm sɩ: Timpi n lapa mpʋ tɔ, pɩɩ kpatɩ nyá yule tɔɔ kɛ́ kpaakpaalɛ na pǝ́ kǝlɩ wontu tǝna, nyá lotu tɔɔ kɛ́ n ká tuuki nɔɔnɔɔ na ń tɔ́kɩ tɛtʋ, halǝna nyá sǝm.
71	GEN 3:15	Maa tʋ́ patɩɩlɛ kɛ nyá na alʋ mǝ hɛkʋ, na nyá lʋlʋɣʋ nyǝ́ma na ɩ lʋlʋɣʋ nyǝ́ma pa hɛkʋ, paa naŋtɩ nyá nyʋɣʋ na nyáá ló pɛlɛ pa nɔɔkikite.
72	GEN 3:16	Ɩlɛna Ɩsɔ tɔ́ alʋ sɩ: Maa sɔɔsɩ-ŋ wʋsasɩ kɛ nyá ahontotʋ waatʋ, na nsǝɣɩ n ká lʋlǝna, na n ká nyɩɩlǝɣɩ nyá paalʋ kɛ́ teu. Ama ɩ́lɛ́ ɩ ká la nyá sɔsɔ.
73	GEN 3:17	Ɩlɛna ɩ́ pǝsǝna apalʋ tɔɔ sɩ: Timpi n nɩɩna nyá alʋ na ń tɔɣɔ tʋɣʋ ŋku maa kisina-ŋ tɔ. Ma tǝŋsǝɣɩ tɛtʋ kɛ mpusi kɛ́ nyá maɣamaɣa nyá tɔɔ. Wahala na wahala kɛ́ na pǝ́cɔ́ ń hiki nyá tɔɣɔnaɣa halǝna nyá sǝm.
74	GEN 3:18	Nyɩɩtʋ ɩsaɣatʋ kɛ n ká hala na pǝ́cɔ́ ń hiki nyá hatǝmʋtʋ.
75	GEN 3:19	Ye haŋaɣa ta sɔ-ŋ, n kaa hiki ɩcaʋtɛ na ń mʋlɩ. Halǝna kʋyakʋ ŋku paa pi-ŋ tɛtʋ nti paa ŋmana-ŋ tɔ tǝ taa tɔ. Mpi tɔ, n kɛ́ tɛtʋ kɛ́, pǝ́cɔ́ n ká taɣanɩ kʋlʋmtʋ ntǝɣɩ pǝsʋɣʋ tɔtɔ.
76	GEN 3:20	Mpʋɣʋlɛ Atam ha ɩ alʋ sɩ Ɩfa. Mpi tɔ, ɩnǝɣǝlɛ yǝlaa tǝna too.
77	GEN 3:21	Ɩlɛna Ɩsɔ Tacaa kʋ wontu natǝlɩ na ɩ́ liti-tɩ na ɩ́ tɔɣɔlɩ Atam na ɩ alʋ.
78	GEN 3:22	Tǝnaɣa Ɩsɔ Tacaa yɔɣɔtaa sɩ: Nɔɔnɔɔ yʋlʋ pǝsa ɩsɩɩ tá taa nɔɣɔlʋɣʋlɛ kʋpantʋ na ɩsaɣatʋ pǝ nyǝm tɔm taa. Pǝ tɔɔ tɔ, tǝ́ taa yele na ɩ́ tɔɣɔ weesuɣu tʋɣʋ pǝle na ɩ́ wɛɛna weesuɣu kɛ tam tɔɔ.
79	GEN 3:23	Ɩlɛna Ɩsɔ tɔɣɔnɩ-ɩ Ɩteni taalɛ taa sɩ ɩ́ sʋʋ halǝm kɛ tɛtʋ nti pa ŋmana-ɩ tɔ.
80	GEN 3:24	Mpʋ pǝ lapǝna na ɩ́ tɔɣɔnɩ Atam na ɩ́ sɩɩ ɩsɔtaa taŋlaa na pá taŋ taalɛ mpaaʋ na pá ŋmɛlǝsǝɣɩ pa laɣalɛɛ na á mʋɣʋ kɔkɔsɩ kɛ ŋmɛlɛʋ ŋmɛlɛʋ sɩ nɔɣɔlʋ ɩ́ taa kpǝtǝna weesuɣu tʋɣʋ.
81	GEN 4:1	Ḿpʋ́ɣʋ́ Atam nyǝmá ɩ alʋ Ɩfa na ɩ́lɛ́ ɩ́ lá teu na ɩ́ lʋlɩ Kayini. Ɩlɛna ɩ́ tɔ́ sɩ: Ma hika apalʋpǝyaɣa na Tacaa toŋ.
82	GEN 4:2	Pǝlɛ pǝ waalɩ kɛ́ ɩ lʋla ɩ neu Apɛɛlɩ. Apɛɛlɩ ka kɛ́ tiikilu na Kayini kɛ hátʋ́.
83	GEN 4:3	Ḿpʋ́ɣʋ́ kʋyakʋ nakʋlɩ taalʋ lǝsa ɩ hatǝmʋtʋ taa na ɩ́ lá Tacaa kɛ kɔtaɣa.
84	GEN 4:4	Ɩlɛna neu náá kpa ɩ heeŋ taa kɛ́ kancaalaɣa kʋlʋlǝŋ nim nyǝŋ na ɩ́ lá kɔtaɣa tɔtɔ. Ɩlɛna Tacaa nyǝnɩ Apɛɛlɩ kɔtaɣa na pǝ́ kɛɛsǝna-ɩ.
85	GEN 4:5	Ama ɩ kisa Kayini nyǝŋka. Tǝnaɣalɛ pǝ haŋa-ɩ teu ɩsɩɩ nɔɔhǝlɛ taa kɔkɔ, na ɩ ɩsɛntaa sɔŋ.
87	GEN 4:7	Ye kʋpantʋ kɛ n lakɩ, nyá ɩsɛntaa ɩ́ hɛtɩ. Ama ye ɩsaɣatʋ kɛ n lakɩ, kʋlʋmtʋ ntɩ tǝ papǝna ntɛɣɛ nyá nɔnɔɣɔ tɛɛ ɩsɩɩ tɔɣɔlʋɣʋ na tǝ́ taŋa-ŋ, na tǝ́ caa-ŋ kǝlʋɣʋ. Ama pǝsɩ-tɩ na ń kǝlɩ-tɩ.
88	GEN 4:8	Tǝnaɣa Kayini tɔma ɩ neu sɩ: Tǝ́ kpa taalɛ, ɩlɛna Kayini kʋlɩ ɩ tɔɔ kɛ́ tǝna na ɩ́ kʋ-ɩ.
90	GEN 4:10	Ɩlɛna Tacaa pɔɔsɩ-ɩ sɩ: Pepe lapa mpʋ? Ma nawa nyá neu calǝm kɛ atɛ, na pǝ wɛɛ sɩ má lɛɛtɩ-ŋ.
91	GEN 4:11	Nɔɔnɔɔ tɛtʋ ká tǝŋsɩ-ŋ mpusi kɛ́ timpi n yelaa na tǝ́ haa nɔɣɔ na tǝ́ li nyá neu calǝm kɛ nyá niŋ taa tɔ.
92	GEN 4:12	Paa n ká hala-tǝɣɩ ɩsǝna, n kaa waa pʋlʋ. N ká la yem cɔɔlʋ, n kaa wɛɛna tǝyaɣa.
93	GEN 4:13	Mpʋɣʋlɛ Kayini cɔwa Tacaa sɩ: Ma salǝka kǝla-m.
94	GEN 4:14	Nyǝnɩ, saŋa ń tɔɣɔnǝɣɩ-m tɛtʋ kʋpantʋ tǝnɛ tǝ taa kɛlɛ, ma kaa tasa nyá ɩsǝpǝle taa kɛ́ loosuɣu. Maa pǝsɩ yem cɔɔlʋ, ma kaa wɛɛna tǝyaɣa, na wei ɩ́ hika-m ɩ kʋ-m.
95	GEN 4:15	Tǝnaɣalɛ Tacaa nɔɣɔ tǝkpaʋ sɩ: Aaɩ, ye wei ɩ́ kʋwa Kayini, ɩsɩɩ ma fɛla pʋntʋ kɛ pǝ tɔm naatosompɔɣɔlaɣa. Ɩlɛna Tacaa yʋsɩ Kayini sɩ ye wei ɩ́ na-ɩ ɩ́ taa kʋ-ɩ.
96	GEN 4:16	Ntɛna ɩ́ se Tacaa na ɩ́ polo ɩ caɣa timpi pa yaa sɩ Yemcɔɔlaatɛ tɔɣɔ Ɩteni ilim tǝlɩɩlɛ tɔɔ.
97	GEN 4:17	Ḿpʋ́ɣʋ́ Kayini nyǝmá ɩ alʋ na ɩ́ lá teu na ɩ́ lʋlɩ Henɔkɩ. Ɩlɛna ɩ́ ŋmá ɩcatɛ na ɩ́ ha-tɛɣɛ ɩ pǝyalʋ hǝtɛ.
98	GEN 4:18	Ḿpʋ́ɣʋ́ Henɔkɩ lʋla Ɩlaatɩ na Ɩlaatɩ lʋlɩ Mehuyayɛɛlɩ na Mehuyayɛɛlɩ lʋlɩ Metusayɛɛlɩ, ɩlɛna Metusayɛɛlɩ lʋlɩ Lemɛkɩ.
99	GEN 4:19	Alaa naalɛ kɛ Lemɛkɩ kpaɣaa, kancaalaɣa nyǝŋ hǝtɛ ntɛ́ Ata, naalɛ nyǝŋ sɩ Sila.
100	GEN 4:20	Ḿpʋ́ɣʋ́ Ata lʋla Yapaalɩ. Yapaalɩ ɩnɩ ɩ́lɛ́ ɩ piitim ntɛ́ mpa pa tiikiɣi kalǝkǝŋ na pá sʋʋkɩ coka taa tɔ.
101	GEN 4:21	Ɩ́lɛ́ ɩ neu hǝtɛ ntɛ́ Yupaalɩ. Yupaalɩ ɩnɩ ɩ piitim ntɛ́ mpa pa makɩ saŋkʋnaa na pá hʋlǝɣɩ hǝsɩ tɔ.
102	GEN 4:22	Sila ɩ́lɛ́ ɩ lʋlǝna ntɛɣɛ Tupaalɩ-Kayini, wei ɩ luki nyǝɣǝlʋɣʋ kʋsɛɛmʋɣʋ na nyǝɣǝlʋɣʋ maɣamaɣa wontu tɔ. Ɩ neu kɛ pa yaakaɣa sɩ Naama.
103	GEN 4:23	Ḿpʋ́ɣʋ́ Lemɛkɩ tɔma ɩ alaa Ata na Sila sɩ: Ma alaa mɛ, ɩ́ nɩɩ ma tɔm yoo. Mǝ taa lɛlʋ paalʋ cǝtǝla-m kɛ́ na má kʋ-ɩ.
104	GEN 4:24	Tɔm naatosompɔɣɔlaɣa kɛ paa lɛɛtɩ Kayini kʋlʋ. Ɩlɛna pá lɛɛtɩ ma kʋlʋ kɛ tɔm nɩɩtoso na naanʋwa na naatosompɔɣɔlaɣa.
105	GEN 4:25	Atam pa tasa apalʋpǝyaɣa kɛ lʋlʋɣʋ ɩlɛna Ɩfa ha-kɛɣɛ hǝtɛ sɩ Sɛɛtɩ, sɩ Tacaa ha ɩnǝɣɩ apalʋpǝyaɣa lɛŋka kɛ Apɛɛlɩ wei Kayini kʋwa tɔ ɩ lonte.
106	GEN 4:26	Sɛɛtɩ ná lapa yʋlʋ na ɩ́ lʋlɩ apalʋpǝyaɣa na ɩ́ ha-kɛ sɩ Ɩnɔɔsɩ. Waatʋ ɩnǝɣɩ yǝlaa caala Ɩsɔ kɛ́ sɛɛʋ sɩ Tacaa.
107	GEN 5:1	Atam lʋlʋɣʋ nyǝ́ma hǝla ntɔ cǝnɛ. Waatʋ wei Ɩsɔ ŋmá yʋlʋ tɔ, ɩ ŋma-ɩ kɛ́ ɩsɩɩ ɩ wɛɛ tɔ.
108	GEN 5:2	Apalʋ na alʋ kɛ ɩ ŋmawa na ɩ́ ha-wɛ sɩ yǝlaa na ɩ́ kooli-wɛɣɛ kʋpantʋ.
109	GEN 5:3	Atam pɩɩsɩ lapa nɩɩnʋwa na hiu na naanʋwa (130) kɛ́ ɩlɛna ɩ́ lʋlɩ pǝyaɣa na ká kpaɣa-ɩ tǝtɛŋɛlɛŋ na ɩ́ ha-kɛɣɛ hǝtɛ sɩ Sɛɛtɩ.
110	GEN 5:4	Sɛɛtɩ lʋlʋɣʋ waalɩ Atam tɔɣɔ pɩɩsɩ nasǝnaasa (800) na sɩ taa kɛ́ ɩ tasa apalʋpiya na alʋpiya kɛ lʋlʋɣʋ.