1	GEN 1:1	Waatʋ wei Ɩsɔ caala ɩsɔtɔnʋɣʋ na tɛtʋ kɛ lapʋ tǝcǝcɩ tɔ.
2	GEN 1:2	Tɛtʋ ntɩ tɩɩ wɛ kpɛtɛ kɛ́ tǝ fɛɩ tapʋɣʋ tǝ fɛɩ nɔɣɔ, na teŋku lumaŋ nyǝŋ waasa pǝ tɔɔ na sǝkpɛtʋɣʋ nyalaa, na pǝ́ kaasɩ na Ɩsɔ heelim náá makɩ lʋm tɔɔ.
4	GEN 1:4	Ɩsɔ laŋlɛ hɛɛna pǝ naakʋɣʋ mpʋ tɔ, ɩlɛna ɩ́ faɣa-wɩ na sǝkpɛtʋɣʋ.
6	GEN 1:6	Ɩlɛna Ɩsɔ tɔ́ sɩ: Patǝma ɩ́ wɛɛ ɩsɔtaa, ɩlɛna pǝ́ faɣa ɩsɔtɔnʋɣʋ taa lʋm na atɛ nyǝm.
11	GEN 1:11	Ntɛna Ɩsɔ tɔ́ sɩ: Tɛtʋ ɩ́ lʋlǝsɩ kʋnyɔnyɔm mpi pǝ wɛ tǝlɛkʋlɛkʋ tɔɣɔ waanɩ waanɩ ɩsɩɩ tɩɩŋ na nyɩɩtʋ na pǝ́ lʋlǝɣɩ pǝ pee na á wɛ nyɔʋ. Ɩlɛna pǝ́ lá mpʋ.
12	GEN 1:12	Ḿpʋ́ɣʋ́ tɛtʋ lʋlǝsa-wǝɣɩ waanɩ waanɩ, na Ɩsɔ laŋlɛ hɛɛ.
14	GEN 1:14	Mpʋɣʋlɛ Ɩsɔ tɔma sɩ: Kɔkɔsɩ ɩ́ wɛɛ ɩsɔtaa na sɩ́ faɣa ilim na ahoo, na kʋyɛɛŋ na pɩɩsɩ na lʋŋlɛ na yoluma,
16	GEN 1:16	Kɔkɔsɩ sɔsɔɔnsɩ naalɛɣɛ ɩ lapa, na kʋkǝlaɣa tɔ́kɩ kawulaɣa kɛ ilim na naalɛ nyǝŋka kɛ ahoo. Na ɩ́ la ɩsɔtʋlʋŋasɩ tɔtɔ.
18	GEN 1:18	na sɩ́ tɔkɩ kawulaɣa kɛ ilim na ahoo, na sɩ́ faɣa ilim na sǝkpɛtʋɣʋ.
21	GEN 1:21	Ɩlɛna Ɩsɔ lá lʋm taa tɔɣɔlǝŋ na pǝ taa weesuɣu nyǝmnaa kɛ waanɩ waanɩ, na sumasɩ tǝna, na ɩ laŋlɛ hɛɛ,
24	GEN 1:24	Ḿpʋ́ɣʋ́ Ɩsɔ tɔma sɩ: Tɛtʋ ɩ́ lʋlǝsɩ weesuɣu nyǝm tǝnaɣa waanɩ waanɩ ɩsɩɩ tɔla na taalɛ wontu na atɛ nyamanyamanaa tǝna, ɩlɛna pǝ́ lá mpʋ.
25	GEN 1:25	Wontunaa mpɛ pa tǝnaɣa ɩ lapa, paa tɔla paa taalɛ wontu paa atɛ nyamanyamanaa, na ɩ laŋlɛ hɛɛ.
26	GEN 1:26	Ḿpʋ́ɣʋ́ Ɩsɔ tɔma sɩ: Tǝ́ ŋmá yʋlʋ na ɩ́ wɛɛ ɩsɩɩ tá tǝtɛŋɛlɛŋ na ɩ́ tɔɣɔ kawulaɣa kɛ wontu tǝna tɔɔ, paa tiina paa sumasɩ paa nti.
27	GEN 1:27	Kɛlɛna ɩ́ ŋmá yʋlʋ ɩsɩɩ ɩ maɣamaɣa ɩ wɛɛ tɔ. Apalʋ na alʋ kɛ ɩ ŋmá-wɛ ɩsɩɩ ɩ wɛʋ tɔ
28	GEN 1:28	na ɩ́ kooli-wɛɣɛ kʋpantʋ. Ɩlɛna ɩ́ heeli-wɛ sɩ: Ɩ́ lʋlɩ na ɩ́ huki na ɩ́ sú tɛtʋ na ɩ́ pǝsɩ-tɩ na ɩ́ tɔɣɔ kawulaɣa kɛ tiina na sumasɩ na atɛ wontu tǝna tɔɔ na ɩ́ paasǝna-tɩ.
30	GEN 1:30	Wontu na sumasɩ na weesuɣu nyǝm tǝna tɔɣɔnaɣa ntɛ́ nyɩɩtʋ kʋlɛkǝlɛkǝtʋ tǝna. Ɩlɛna pǝ́ lá mpʋ.
32	GEN 2:1	Ɩsǝna Ɩsɔ lapa ɩsɔtaa na atɛ na pǝ taa weesuɣu nyǝmnaa tǝna tɔɣɔlɛ.
33	GEN 2:2	Kʋyakʋ naatoso nyǝŋkʋ wule kɛ Ɩsɔ tɛɛsa ɩ tǝma, ɩlɛna ɩ́ hɛɛsɩ naatosompɔɣɔlaɣa nyǝŋkʋ wule.
35	GEN 2:4	Ɩsǝna Ɩsɔ lapa ɩsɔtɔnʋɣʋ na atɛ tɔɣɔlɛ. Waatʋ wei Tacaa Ɩsɔ lapa atɛ na ɩsɔtɔnʋɣʋ tɔ,
38	GEN 2:7	Ḿpʋ́ɣʋ́ Tacaa Ɩsɔ kpaɣa tɛtʋ na ɩ́ lá yʋlʋ, ɩlɛna ɩ́ woso yʋlʋ mɩɩna tɛɛ kɛ́ weesuɣu heelim. Tǝnaɣalɛ yʋlʋ sʋʋ feesuɣu.
40	GEN 2:9	Ntɛna Tacaa Ɩsɔ yele na tɩɩŋ kʋpaŋ nyɔ Ɩteni taa tǝnaɣa waanɩ waanɩ na ɩ pee tɔɣɔʋ na leleŋ. Na tʋɣʋ ŋku kʋ pee haakɩ weesuɣu tɔ, na kʋpantʋ na ɩsaɣatʋ pǝ cɛkǝnaʋ nyǝŋkʋ ka sǝŋa hɛkʋ taa.
41	GEN 2:10	Na pɔɣɔ nakǝlɩ kɛlɛ ká faɣa Ɩteni taa na ká niɣitiɣi tɩɩŋ taalɛ na ká hɛla pusi liɣiti kɛ Ɩteni waalɩ.
42	GEN 2:11	Kancaalaɣa nyǝŋka hǝtɛ ntɛ́ Pisɔŋ, kɛlɛ ka cɔɔna Hafila tɛtʋ nti tǝ taa wʋla kʋpaŋ na tulaalʋ kʋpaŋ na liɣitee pǝlɛ kʋkpɛɛtǝlɛ pǝ wɛɛ tɔ.
49	GEN 2:18	Tɛtʋ kɛ Tacaa Ɩsɔ ka lapa taalɛ wontu tǝna, na sumasɩ tǝna, na ɩ́ lá na tǝ́ polo yʋlʋ kiŋ sɩ ɩ́ nyɩ hǝla nna ɩ ká ha-tɩ tɔ, na anǝɣɩ pa yaakɩ-tɩ. Ḿpʋ́ɣʋ́ yʋlʋ hawa tɔla tǝnaɣa hǝla, na taalɛ wontu na sumasɩ tǝna. Ama ɩ ta hiki sǝnlʋ wei ɩ mʋna-ɩ tɔ. Ḿpʋ́ɣʋ́ ɩ tɔma sɩ: Pǝ fɛɩ sɩ yʋlʋ ɩ́ caɣa ɩ tike kɛ mpʋ.
52	GEN 2:21	Ɩlɛna Tacaa Ɩsɔ lá na tom kpa yʋlʋ na ɩ́ too ɩsɩɩ ɩ́ sǝpa, na ɩ́ lǝsɩ ɩ sǝntaaɣa lɛŋka na ɩ́ waasɩ nantʋ kɛ ka lonte.
54	GEN 2:23	Tǝnaɣalɛ yʋlʋ tɔma sɩ: Aŋhaa, má na ɩnɛ tǝ kaana nantʋ na mʋwa. Mpi tɔ, ma taa kɛ́ pa lǝsa-ɩ, ɩ́lɛ́ ɩ hǝtɛ ntɛ́ alʋ.
56	GEN 2:25	Yʋlʋ na ɩ alʋ pa tɔŋaɣa kpɛla kɛ pa naalɛɣɛ, pǝ́cɔ́ fɛɛlɛ natǝlɩ tǝ fɛɩ-wɛ.
57	GEN 3:1	Taalɛ wontu nti tǝ tǝna Tacaa Ɩsɔ lapa mpʋ tɔ, tʋm kǝlǝna tǝ tǝnaɣa acilaɣatʋ. Mpʋɣʋlɛ kʋyakʋ nakǝlɩ tʋm pɔɔsa alʋ sɩ: Ɩlɛ tampana Ɩsɔ yɔɣɔtaa sɩ ɩ́ taa tɔɣɔ taalɛ tɩɩŋ tǝna pee yaa?
59	GEN 3:3	Ama pǝ kaasʋɣʋ tʋɣʋ ŋku kʋ wɛ halǝm hɛkʋ taa tɔ kʋ pee tɔ, Ɩsɔ tɔma sɩ: Ɩ́ taa tǝŋ-yɛ, pǝ́cɔ́ ɩ́ taa tokina-yɛ́ɣɛ́ tokinaʋ maɣamaɣa, pǝ́ taa kɔɔ na ɩ́ sɩ́.
61	GEN 3:5	Ama Ɩsɔ nyǝ́má sɩ kʋyakʋ ŋku ɩ́ tǝŋa-yɛ, mǝ ɩsɛ kuliɣi kɛ́ ɩsɩɩ ɩnɩ ɩ wɛʋ tɔ, na ɩ́ nyǝ́má kʋpantʋ na ɩsaɣatʋ.
62	GEN 3:6	Alʋ nawa sɩ tʋɣʋ ŋkʋ kʋ nyǝnʋɣʋ wɛ teu, pǝ́cɔ́ kʋ pee wɛ ɩsɛsɛɛmlɛ na a kuliɣi yǝlaa ɩsɛ. Ntɛna ɩ́ kooli-kʋ́ na ɩ́ tɔɣɔ, na ɩ́ kaasɩ na ɩ́ cɛla ɩ paalʋ na ɩ́lɛ́ ɩ́ tɔɣɔ tɔtɔ.
63	GEN 3:7	Tǝnaɣalɛ pǝ kula pa naalɛɣɛ mpʋ pa ɩsɛ na pá cɛkǝna sɩ pa wɛ tapakpɛla. Ɩlɛna pá caa hatʋ kʋwalǝtʋ natǝlɩ na pá tɔɣɔlɩ.
65	GEN 3:9	Ama Ɩsɔ Tacaa yáá yʋlʋ sɩ: Leɣe n wɛna ye?
66	GEN 3:10	Ḿpʋ́ɣʋ́ ɩ cɔwa sɩ: Ma nɩɩ nyá nɔɣɔ kɛ taalɛ taa ɩlɛna sɔɣɔntʋ kpa-m na má sé na má ŋmɛlɩ. Mpi tɔ, ma wɛ tapakpɛtɛ.
67	GEN 3:11	Tǝnaɣalɛ Ɩsɔ Tacaa nɔɣɔ tǝkpaʋ sɩ: Awe heelina-ŋ sɩ n wɛ kpɛtɛ? N tɔɣɔ tʋɣʋ ŋku ɩnɩ maa kisina-ŋ tɔɣɔ?
68	GEN 3:12	Kɛlɛna yʋlʋ sɩ: Ma tɔɣaa yáá, ɩlɛ alʋ wei ɩnɩ n ha-m tɔ ɩnɩ ɩ cɛlǝna-m na má tɔɣɔ.
70	GEN 3:14	Ḿpʋ́ɣʋ́ Tacaa tɔma tʋm sɩ: Timpi n lapa mpʋ tɔ, pɩɩ kpatɩ nyá yule tɔɔ kɛ́ kpaakpaalɛ na pǝ́ kǝlɩ wontu tǝna, nyá lotu tɔɔ kɛ́ n ká tuuki nɔɔnɔɔ na ń tɔ́kɩ tɛtʋ, halǝna nyá sǝm.
72	GEN 3:16	Ɩlɛna Ɩsɔ tɔ́ alʋ sɩ: Maa sɔɔsɩ-ŋ wʋsasɩ kɛ nyá ahontotʋ waatʋ, na nsǝɣɩ n ká lʋlǝna, na n ká nyɩɩlǝɣɩ nyá paalʋ kɛ́ teu. Ama ɩ́lɛ́ ɩ ká la nyá sɔsɔ.
73	GEN 3:17	Ɩlɛna ɩ́ pǝsǝna apalʋ tɔɔ sɩ: Timpi n nɩɩna nyá alʋ na ń tɔɣɔ tʋɣʋ ŋku maa kisina-ŋ tɔ. Ma tǝŋsǝɣɩ tɛtʋ kɛ mpusi kɛ́ nyá maɣamaɣa nyá tɔɔ. Wahala na wahala kɛ́ na pǝ́cɔ́ ń hiki nyá tɔɣɔnaɣa halǝna nyá sǝm.
77	GEN 3:21	Ɩlɛna Ɩsɔ Tacaa kʋ wontu natǝlɩ na ɩ́ liti-tɩ na ɩ́ tɔɣɔlɩ Atam na ɩ alʋ.
78	GEN 3:22	Tǝnaɣa Ɩsɔ Tacaa yɔɣɔtaa sɩ: Nɔɔnɔɔ yʋlʋ pǝsa ɩsɩɩ tá taa nɔɣɔlʋɣʋlɛ kʋpantʋ na ɩsaɣatʋ pǝ nyǝm tɔm taa. Pǝ tɔɔ tɔ, tǝ́ taa yele na ɩ́ tɔɣɔ weesuɣu tʋɣʋ pǝle na ɩ́ wɛɛna weesuɣu kɛ tam tɔɔ.
80	GEN 3:24	Mpʋ pǝ lapǝna na ɩ́ tɔɣɔnɩ Atam na ɩ́ sɩɩ ɩsɔtaa taŋlaa na pá taŋ taalɛ mpaaʋ na pá ŋmɛlǝsǝɣɩ pa laɣalɛɛ na á mʋɣʋ kɔkɔsɩ kɛ ŋmɛlɛʋ ŋmɛlɛʋ sɩ nɔɣɔlʋ ɩ́ taa kpǝtǝna weesuɣu tʋɣʋ.
82	GEN 4:2	Pǝlɛ pǝ waalɩ kɛ́ ɩ lʋla ɩ neu Apɛɛlɩ. Apɛɛlɩ ka kɛ́ tiikilu na Kayini kɛ hátʋ́.
89	GEN 4:9	Mpʋɣʋlɛ Tacaa pɔɔsa Kayini sɩ: Nyá neu Apɛɛlɩ wele? Ɩlɛna ɩ́ cɔ sɩ: Ma nyǝmá timpi ɩ wɛɛ tɔ? Ma kɛ́ ma neu taŋlʋ na?
90	GEN 4:10	Ɩlɛna Tacaa pɔɔsɩ-ɩ sɩ: Pepe lapa mpʋ? Ma nawa nyá neu calǝm kɛ atɛ, na pǝ wɛɛ sɩ má lɛɛtɩ-ŋ.
92	GEN 4:12	Paa n ká hala-tǝɣɩ ɩsǝna, n kaa waa pʋlʋ. N ká la yem cɔɔlʋ, n kaa wɛɛna tǝyaɣa.
93	GEN 4:13	Mpʋɣʋlɛ Kayini cɔwa Tacaa sɩ: Ma salǝka kǝla-m.
94	GEN 4:14	Nyǝnɩ, saŋa ń tɔɣɔnǝɣɩ-m tɛtʋ kʋpantʋ tǝnɛ tǝ taa kɛlɛ, ma kaa tasa nyá ɩsǝpǝle taa kɛ́ loosuɣu. Maa pǝsɩ yem cɔɔlʋ, ma kaa wɛɛna tǝyaɣa, na wei ɩ́ hika-m ɩ kʋ-m.
95	GEN 4:15	Tǝnaɣalɛ Tacaa nɔɣɔ tǝkpaʋ sɩ: Aaɩ, ye wei ɩ́ kʋwa Kayini, ɩsɩɩ ma fɛla pʋntʋ kɛ pǝ tɔm naatosompɔɣɔlaɣa. Ɩlɛna Tacaa yʋsɩ Kayini sɩ ye wei ɩ́ na-ɩ ɩ́ taa kʋ-ɩ.
102	GEN 4:22	Sila ɩ́lɛ́ ɩ lʋlǝna ntɛɣɛ Tupaalɩ-Kayini, wei ɩ luki nyǝɣǝlʋɣʋ kʋsɛɛmʋɣʋ na nyǝɣǝlʋɣʋ maɣamaɣa wontu tɔ. Ɩ neu kɛ pa yaakaɣa sɩ Naama.
104	GEN 4:24	Tɔm naatosompɔɣɔlaɣa kɛ paa lɛɛtɩ Kayini kʋlʋ. Ɩlɛna pá lɛɛtɩ ma kʋlʋ kɛ tɔm nɩɩtoso na naanʋwa na naatosompɔɣɔlaɣa.
105	GEN 4:25	Atam pa tasa apalʋpǝyaɣa kɛ lʋlʋɣʋ ɩlɛna Ɩfa ha-kɛɣɛ hǝtɛ sɩ Sɛɛtɩ, sɩ Tacaa ha ɩnǝɣɩ apalʋpǝyaɣa lɛŋka kɛ Apɛɛlɩ wei Kayini kʋwa tɔ ɩ lonte.
107	GEN 5:1	Atam lʋlʋɣʋ nyǝ́ma hǝla ntɔ cǝnɛ. Waatʋ wei Ɩsɔ ŋmá yʋlʋ tɔ, ɩ ŋma-ɩ kɛ́ ɩsɩɩ ɩ wɛɛ tɔ.
108	GEN 5:2	Apalʋ na alʋ kɛ ɩ ŋmawa na ɩ́ ha-wɛ sɩ yǝlaa na ɩ́ kooli-wɛɣɛ kʋpantʋ.
109	GEN 5:3	Atam pɩɩsɩ lapa nɩɩnʋwa na hiu na naanʋwa (130) kɛ́ ɩlɛna ɩ́ lʋlɩ pǝyaɣa na ká kpaɣa-ɩ tǝtɛŋɛlɛŋ na ɩ́ ha-kɛɣɛ hǝtɛ sɩ Sɛɛtɩ.
110	GEN 5:4	Sɛɛtɩ lʋlʋɣʋ waalɩ Atam tɔɣɔ pɩɩsɩ nasǝnaasa (800) na sɩ taa kɛ́ ɩ tasa apalʋpiya na alʋpiya kɛ lʋlʋɣʋ.
111	GEN 5:5	Atam pɩɩsɩ tǝna yoosa nasǝnaasa na nɩɩnʋwa na hiu na naanʋwa (930) ɩlɛna ɩ́ sɩ́.
112	GEN 5:6	Sɛɛtɩ pɩɩsɩ lapa nɩɩnʋwa na kakpasɩ (105) ɩlɛna ɩ́ lʋlɩ Ɩnɔɔsɩ.
113	GEN 5:7	Ɩnɔɔsɩ lʋlʋɣʋ waalɩ Sɛɛtɩ tɔɣɔ pɩɩsɩ nasǝnaasa na naatosompɔɣɔlaɣa (807) na sɩ taa kɛ́ ɩ tasa apalʋpiya na alʋpiya kɛ lʋlʋɣʋ.
114	GEN 5:8	Sɛɛtɩ pɩɩsɩ tǝna yoosa nasǝnaasa na nɩɩnʋwa na naanʋwa na naalɛ (912) ɩlɛna ɩ́ sɩ́.
115	GEN 5:9	Ɩnɔɔsɩ pɩɩsɩ lapa nɩɩnaasa na naanʋwa ɩlɛna ɩ́ lʋlɩ Kenaŋ.
116	GEN 5:10	Kenaŋ lʋlʋɣʋ waalɩ Ɩnɔɔsɩ tɔɣɔ pɩɩsɩ nasǝnaasa na naanʋwa na kakpasɩ (815) na sɩ taa kɛ́ ɩ tasa apalʋpiya na alʋpiya kɛ lʋlʋɣʋ.