11	GEN 1:11	Maʌ̃be Ãcõrẽba jarasia: –Egorod̶e ne quĩrãtanoa tununadua; chirua ta zaubari b̶eada idjab̶a nejõ bacuru sid̶a. Jũma maʌ̃ra ta zaud̶ia ara ãdji b̶ea quĩrãca tununamãrẽã.– Ara maʌ̃da egorod̶e ne quĩrãtanoa tunusid̶aa. Jũma chirua ta diabari b̶eara idjab̶a bacuru nejõ zaubari b̶ea sid̶a ãdji ta bara tunusid̶aa ara ãdji b̶ea quĩrãca tununamãrẽã. Maʌ̃ra Ãcõrẽba bia unusia.
39	GEN 2:8	Mãwãnacarea Ãcõrẽba néu ẽjũãda ʌ̃mãdau odjabariare osia. Maʌ̃ néu ẽjũãra Edeʌ̃ abadaa. Ãcõrẽba ẽberã od̶ara néu ẽjũãne b̶ʌsia.
41	GEN 2:10	Edeʌ̃ ẽjũãne doda b̶asia maʌ̃ néu ẽjũãra jũma cũrãsa erob̶amãrẽã. Maʌ̃ dora dji taed̶aa quĩmãrẽ nẽrã b̶asia.
45	GEN 2:14	Maʌ̃arebema dora Tigri abadaa. Maʌ̃ dora Asiria purud̶eba ʌ̃mãdau odjabariare b̶ʌa. Jĩrũarebema dora Euprate abadaa.
46	GEN 2:15	Maʌ̃ne Ãcõrẽba ẽberãra edaped̶a Edeʌ̃ néu ẽjũãne b̶ʌsia acʌ b̶amãrẽã.
52	GEN 2:21	Maʌ̃ carea Ãcõrẽba Adaʌ̃ra bio cãĩbisia. Adaʌ̃ cãĩ b̶ʌd̶e Ãcõrẽba idji orro b̶ʌwʌrʌda ab̶a edasia. Edaped̶a waya dji djarara cara b̶ʌsia.
76	GEN 3:20	Adaʌ̃ba idji wẽrãra trʌ̃ b̶ʌsia Eva, idjira jũma dadji zocai b̶ea papa bẽrã.
79	GEN 3:23	Ara maʌ̃da Ãcõrẽba ẽberãra Edeʌ̃ néu ẽjũãnebemada ãyã jʌretasia ẽjũã o b̶amãrẽã. Ãcõrẽba idjira egorod̶eba osia. Maʌ̃ bẽrã idjira b̶ʌsia egorod̶e ne u b̶amãrẽã.
80	GEN 3:24	Ãcõrẽba ẽberãra ãyã jʌretaped̶a Edeʌ̃ néu ẽjũã ʌ̃mãdau odjabariare bajãnebema nezocarã i bara panʌda b̶ʌsia. Idjab̶a b̶ʌsia djõbada neco urua b̶ʌda, idub̶a pʌrrʌga tucua jira b̶ʌda. Maʌ̃gʌrãba zocai b̶ai diabari nejõra waga panesid̶aa ni ab̶aʌba jõrãmãrẽã.
81	GEN 4:1	Maʌ̃be Adaʌ̃ra dji quima Eva ume cãĩsia. Evara b̶iogoa b̶eped̶a warra tosia. Maʌ̃ne Evaba jarasia: “Mʌ̃a umaquĩrã warrada erob̶esia Ãcõrẽba carebad̶a bẽrã.” Mãwã dji warrara trʌ̃ b̶ʌsia Caiʌ̃.
88	GEN 4:8	Ewari ab̶a Caiʌ̃ba idji djabaa jarasia: “Ãyã pʌrrʌad̶e wãna.” Ara maʌ̃da wãsid̶aa. Néud̶e ãbaa nĩnane Caiʌ̃ba Abelera adua b̶ʌd̶e beatasia.
96	GEN 4:16	Ara maʌ̃da Caiʌ̃ra Ãcõrẽ quĩrãpitabemada ãyã wãped̶a Nod druad̶e b̶ad̶e wãsia. Maʌ̃ Nod druara Edeʌ̃neba ʌ̃mãdau odjabariare b̶ʌa.
97	GEN 4:17	Caiʌ̃ra idji quima ume cãĩsia. Dji wẽrãra b̶iogoa b̶eped̶a Enocoda tosia. Maʌ̃ Enoco tosid̶e Caiʌ̃ba puruda o b̶asia. Dji puru trʌ̃ra dji warra trʌ̃ quĩrãca Enoco trʌ̃ b̶ʌsia.
98	GEN 4:18	Enocora Irá zeza basía. Irára Mehujael zeza basía. Mehujaelera Metusael zeza basía. Metusaelera Lame zeza basía.
103	GEN 4:23	Ewari ab̶a Lameba idji quimarã Adáa, Zilaa bid̶a jarasia: Adá, Zila, mʌ̃ bed̶eada ũrĩnadua. Mʌ̃a ẽberã cũdra b̶ʌda beasia idjia mʌ̃ djara tud̶a carea, mʌ̃ puod̶a carea.
106	GEN 4:26	Maʌ̃be Seba warrada unusia. Dji trʌ̃ra b̶ʌsia Enó. Maʌ̃ ewarid̶eba ʌ̃taa ẽberãrãba Ãcõrẽa ewari iwid̶ibʌdad̶e idji trʌ̃ra “Jehová” a panesid̶aa.
112	GEN 5:6	Sera ciento cinco poa b̶asid̶e Enóda unusia.
113	GEN 5:7	Enó ununacarea Sera ochociento siete poa b̶asia. Maʌ̃ne warrarã, wẽrãcaurã sid̶a unusia.
115	GEN 5:9	Enó noventa poa b̶asid̶e idji warra Cainaʌ̃da unusia.
116	GEN 5:10	Cainaʌ̃ ununacarea Enóra ochociento quince poa b̶asia. Maʌ̃ne warrarã, wẽrãcaurã sid̶a unusia.
117	GEN 5:11	Jũma ãbaa Enóba noveciento cinco poa unusia. Mãwã b̶ʌda jaid̶asia.
124	GEN 5:18	Jaré ciento sesenta y dos poa b̶asid̶e idji warra Enocoda unusia.
125	GEN 5:19	Maʌ̃ Enoco ununacarea Jaréra ochociento poa b̶asia. Maʌ̃ne warrarã, wẽrãcaurã sid̶a unusia.
127	GEN 5:21	Enoco sesenta y cinco poa b̶asid̶e idji warra Matusaleʌ̃da unusia.
128	GEN 5:22	Matusaleʌ̃ ununacarea Enocora tresciento poa Ãcõrẽ ume jipa nĩbasia. Maʌ̃ne warrarã, wẽrãcaurã sid̶a unusia.
130	GEN 5:24	Enocora ewariza Ãcõrẽ ume jipa nĩbasia. Mãwã b̶ʌd̶e nẽbasia Ãcõrẽba zocai eded̶a bẽrã.
141	GEN 6:3	Edaped̶ad̶acarea warrarãda yõsid̶aa. Maʌ̃ warrarãra naʌ̃ ẽjũãne drasoa waib̶ʌa warisid̶aa. Ãdjirãra trʌ̃ b̶ʌga b̶easia maʌ̃ drõãenabema ewarid̶e, nocoarebema ewarid̶e bid̶a. Ãdjirã carea Ãcõrẽba jarasia: “Mʌ̃a ẽberãrãa ʌ̃yãba diasia zocai pananamãrẽã baribʌrʌ djara bẽrã beud̶ia. Poa ciento veintebe b̶ead̶ia.”
179	GEN 7:19	Mãwã b̶ʌd̶e doba naʌ̃ ẽjũãra jũma ũ wãsia. Eya ʌ̃tʌara b̶ea sid̶a jũma ũ wãsia.
180	GEN 7:20	Eyara jũma ũ nũmeped̶a wad̶i braza quĩmãrẽ aud̶u ũ wãsia.
191	GEN 8:7	Ewaped̶a ĩbana ne mĩguia cobarida ẽdrʌbisia egoro põãsada unui cawaya. Maʌ̃ ĩbanara wãped̶a waa zeẽ́ basía, ãtebʌrʌ pʌrrʌa wãb̶ari nĩbabadjia do errubʌrʌmisa.
206	GEN 8:22	Naʌ̃ ẽjũã b̶ʌmisa ẽberãrãra ne u panania, ne ewa panania. Ewari jʌ̃wʌ̃rʌ̃ãra, ewari cũrãsa sid̶a b̶aya. Doid̶aada, poa sid̶a b̶aya. Ãsa, diamasi sid̶a b̶aya.–
222	GEN 9:16	Euma jʌ̃rãrãne jira b̶ʌ unubʌrʌd̶e mʌ̃a quĩrãneba b̶aya jũma naʌ̃ ẽjũãne zocai b̶ea ume bed̶ea b̶ʌd̶ara. Maʌ̃ra jõca baya.
227	GEN 9:21	Ewari ab̶a Noéba uva b̶a aseada do b̶asia. Maʌ̃ba idjira beu b̶esia. Maʌ̃ bẽrã idji dejãne ãcad̶a tab̶asia.
239	GEN 10:4	Jape warra Javaʌ̃neba yõped̶ad̶ara naʌ̃gʌrã basía: Elisá, Tarsi, Quitiʌ̃, Rodaniʌ̃ sid̶a.
245	GEN 10:10	Idji jʌwaed̶a erob̶asia puru dromarãda. Naãrã Sinar druad̶e erob̶asia Babelda, Erecoda, Acada, Calne sid̶a.
257	GEN 10:22	Seʌ̃neba yõped̶ad̶ara naʌ̃gʌrã basía: Elaʌ̃, Asur, Arpaxa, Lud, Araʌ̃ sid̶a.
270	GEN 11:3	Ewari ab̶a ãbaa nãwã bed̶eadruasid̶aa: “Egoroda mõgara quĩrãca od̶aped̶a tʌbʌd̶e bád̶adrʌ de od̶i carea.” Ara maʌ̃da egorora mõgara quĩrãca od̶aped̶a básid̶aa mõgarara neẽ́ bad̶a bẽrã. Maʌ̃be cãdorronada edasid̶aa maʌ̃ mõgara quĩrãca od̶ara carad̶i carea.
300	GEN 12:1	Ewari ab̶a Ãcõrẽba Abraʌ̃a jarasia: –Bʌ druara, bʌ ẽberãra, bʌ zeza ded̶ebemarã sid̶a ameped̶a wãdua. Mʌ̃a druada bʌ́a acʌbiya mamaa wãmãrẽã.
309	GEN 12:10	Maʌ̃ ewarid̶e jũma Canaaʌ̃ druad̶e jarrabada zesia. Maʌ̃ne Abraʌ̃ra Egiptod̶aa b̶ad̶e wãsia cod̶ira ab̶ed̶a neẽ́ bẽrã.
310	GEN 12:11	Egiptod̶e jũẽbod̶od̶e Abraʌ̃ba dji quima Saraia jarasia: –Bʌra wãrãda wẽrã quĩrãwãrẽã b̶ʌa.
311	GEN 12:12	Egiptod̶ebemarãba bʌ unubʌdad̶e jarad̶ia: “Jãʌ̃ra idji quimaa.” Maʌ̃ bẽrã mʌ̃ra bead̶ia. Baribʌrʌ bʌra zocai b̶ʌd̶ia edad̶i carea.
313	GEN 12:14	Abraʌ̃ jũẽnacarea Egiptod̶ebemarãba unusid̶aa idji quima Saraira quĩrãwãrẽã b̶ʌda.
314	GEN 12:15	Dji dromarã bid̶a unusid̶aa Saraira wãrãda bio quĩrãwãrẽã b̶ʌda. Maʌ̃ bẽrã ãdjia Egiptod̶ebema boroa Saraid̶ebemada bia jarasid̶aa. Ara maʌ̃da ãdji boroba Saraira idji ded̶aa edebisia.
315	GEN 12:16	Sarai carea Egiptod̶ebema boroba Abraʌ̃ra bia osia. Abraʌ̃a diacuasia ovejada, pacada, burroda, nezoca umaquĩrãda, nezoca wẽrãda, cameyo sid̶a.
317	GEN 12:18	Maʌ̃neba dji boroba cawasia Saraira Abraʌ̃ quimada. Maʌ̃ bẽrã Abraʌ̃ra trʌ̃biped̶a jarasia: –¿Cãrẽ cãrẽã mʌ̃́a jaraẽ́ basi Saraira bʌ quimada? ¿Cãrẽ cãrẽã bʌ djabawẽrãana asi? Mʌ̃a bʌ quimara berara edasia. ¿Cãrẽ cãrẽã mʌ̃ra jãwã osi? Za b̶ʌa bʌ quimara. Edaped̶a isabe wãdua.–
320	GEN 13:1	Mãwãnacarea Abraʌ̃ra dji quima ume Egiptod̶eba jẽda wãsia Negue ẽjũãnaa. Jũma idjia erob̶ʌra edesia. Idji tẽãbea Lo sid̶a idji ume wãsia.
329	GEN 13:10	Maʌ̃ne Loba Jordaʌ̃ do jewed̶ada jũma unusia ab̶a Zoar purud̶aa. Maʌ̃ jewed̶ad̶e dji ẽjũãra bia b̶asia Ãcõrẽ néu b̶ad̶a quĩrãca idjab̶a Egipto drua quĩrãca. Maʌ̃ jewed̶ara mãwã b̶asia Ãcõrẽba Sodoma puruda Gomorra puru sid̶a babuei naẽna.
335	GEN 13:16	Mʌ̃a bʌ warrarãra zocãrã yõbiya. Egoro pora poya juachad̶aca quĩrãca bʌ warrarã sid̶a poya juachad̶aca baya.
338	GEN 14:1	Maʌ̃ ewarid̶e Quedorlaóme abadada Elaʌ̃ druad̶ebema boro basía. Idjiare naʌ̃ bororãda panasid̶aa: Amrapel, Sinar ẽjũãnebemada; Ario, Elasar purud̶ebemada; idjab̶a Tidale, Goiʌ̃ druad̶ebemada.
344	GEN 14:7	Jẽda zebʌdad̶e En-mispat purud̶e jũẽsid̶aa. Maʌ̃ purura idjab̶a Cadé abadaa. Mama amalecitarãda poyad̶aped̶a jũma ãdjia eropanʌra ãrĩsid̶aa. Amorreorãda ara maʌ̃ quĩrãca osid̶aa Hazezon-tamar purud̶e.
345	GEN 14:8	Quedorlaómeare panʌba maʌ̃ puru b̶eara jũma poyad̶aped̶a Sidim jewed̶ad̶aa wãsid̶aa. Mama Sodomanebema boroare panʌra ãbaa dji jʌre panasid̶aa ãdjirã ume djõni carea. Sodomanebema boroare panʌra naʌ̃gʌrã basía: Gomorrad̶ebema boroda, Admánebema boroda, Zeboiʌ̃nebema boroda, idjab̶a Belad̶ebema boro sid̶a. Bela purura Zoar abadaa. Maʌ̃ bororãra juesuma panasid̶aa. Maʌ̃ne Elaʌ̃nebema boro Quedorlaómeare panʌra naʌ̃gʌrã basía: Goiʌ̃nebema boro Tidaleda, Sinard̶ebema boro Amrapelda, Elasard̶ebema boro Ario sid̶a. Ãdjira quĩmãrẽ panasid̶aa.
350	GEN 14:13	Mãwãnacarea mĩrũ wãna ab̶aʌba Abraʌ̃a jũma nẽbʌrʌsia. Maʌ̃ ewarid̶e Abraʌ̃ “hebreo” abadara bacuruid̶a b̶ʌ ẽjũãne b̶abadjia. Maʌ̃ ẽjũãra Mamre abadjid̶aa Mamrera djibari bẽrã. Idji djabarãra Escol idjab̶a Aner basía. Maʌ̃gʌ amorreorãra Abraʌ̃are panasid̶aa.
359	GEN 14:22	Maʌ̃ne Abraʌ̃ba Sodomanebema boroa jarasia: –Edaẽ́a. Mʌ̃a wãrã arada Ãcõrẽ dji Dromaara b̶ʌ, naʌ̃ ẽjũã idjab̶a bajã od̶a ume nãwã bed̶ea b̶ʌsia: mʌ̃a bʌrera edaẽ́a. Ni maãrĩara quiru sid̶a edaẽ́a. Bʌ jĩrũne jʌ̃bari jʌ̃cara sid̶a edaẽ́a. Mãwã edaẽ́a bʌa jararãmãrẽã mʌ̃ra ne bara b̶ʌsida.
361	GEN 14:24	Mʌ̃ nezocarãba coped̶ad̶a awara mʌ̃a waa quĩrĩãẽ́a. Baribʌrʌ mʌ̃are djõ panana Anerba, Escolba, Mamre bid̶a ara ãdjia quĩrĩãbʌdada edad̶ia.–
363	GEN 15:2	Maʌ̃ne Abraʌ̃ba jarasia: –Ay, Ãcõrẽ, ¿cãrẽ cãrẽã mʌ̃ra ne bara b̶ʌi? Mʌ̃ra warra sid̶a neẽ́ b̶ʌa. Mʌ̃ beud̶acarea mʌ̃a erob̶ʌra mʌ̃ nezoca Elieze Damasco purud̶ebemaba jũma edaya.–
365	GEN 15:4	Maʌ̃ne Ãcõrẽba Abraʌ̃a jarasia: –Eliezeba bʌa erob̶ʌra edaẽ́a, ãtebʌrʌ bʌ warra araba edaya.–
371	GEN 15:10	Ara maʌ̃da Abraʌ̃ba maʌ̃ animarã b̶eara jũma enesia. Eneped̶a, beaped̶a, ẽsidra drapetaped̶a, orro ab̶a dewara orro ume quĩrã djica cob̶ʌsia. Ĩbanara drapetaẽ́ basía.
379	GEN 15:18	Ara maʌ̃ba Ãcõrẽba Abraʌ̃ ume nãwã bed̶ea b̶ʌsia: –Wãrãda mʌ̃a bʌd̶eba yõi purua naʌ̃gʌ ẽjũãra diaya Egipto quĩrãpe b̶ʌ dod̶eba ab̶a do waib̶ʌa Euprate abadad̶aa.
383	GEN 16:1	Abraʌ̃ quima Saraira warra toca basía, baribʌrʌ Saraiba Egiptod̶ebema nezocawẽrãda erob̶asia. Maʌ̃ nezocawẽrã trʌ̃ra Agara abadjid̶aa.
384	GEN 16:2	Ewari ab̶a Saraiba Abraʌ̃a jarasia: –Mʌ̃ra Ãcõrẽba warra toca wẽrãda b̶ʌd̶a bẽrã, mʌ̃a bʌ́a bed̶ea djuburiaya mʌ̃ nezocawẽrã ume cãĩmãrẽã. Ãĩbẽrã mʌ̃a warrada idjid̶eba erob̶aisicada.– Saraiba jarad̶ara Abraʌ̃ba ĩjãsia.
385	GEN 16:3	Ara maʌ̃da Saraiba idji Egiptod̶ebema nezocawẽrãra Abraʌ̃a quima quĩrãca diasia warrada to diamãrẽã. Mãwã osia ãdji Canaaʌ̃ne die poa panasid̶ad̶e.
489	GEN 19:31	Ewari ab̶a dji cau nabemaba dji tẽãbemaa jarasia: –Dadji zezara drõãda quirua. Maʌ̃ awara nama naʌ̃ ẽjũãne ni ab̶aʌ umaquĩrãda neẽ́a dadji edad̶amãrẽã jũmarãda quima edabada quĩrãca.
523	GEN 21:9	Mama b̶asia Ismael, Egiptod̶ebema nezocawẽrã Agara warrada. Mãwã b̶ʌd̶e Saraba unusia Ismaelba idji warra Isara biẽ́ ipid̶a jara b̶ʌda.
535	GEN 21:21	Maʌ̃ ẽjũãra Paraʌ̃ abadjid̶aa. Mãwã b̶ʌd̶e dji papaba Egiptod̶ebema wẽrãda diasia idji quima bamãrẽã.
552	GEN 22:4	Ewari ũbea babʌrʌd̶e Abrahaʌ̃ba dji eyara tʌmʌba unusia.
580	GEN 23:8	Maʌ̃be jarasia: –Bãrãmaa mʌ̃ quimara nama tʌb̶arida wãrãda bia b̶ʌbʌrʌ, mʌ̃ djuburia Zohar warra Eproʌ̃ ume bed̶ead̶adua.
582	GEN 23:10	Maʌ̃ Eproʌ̃ra hitita basía. Idjira arima chũmasia. Maʌ̃ne idji ẽberãrã quĩrãpita, purud̶e ed̶a wãbʌdarã quĩrãpita bid̶a idjia Abrahaʌ̃a nãwã jĩgua jarasia:
585	GEN 23:13	B̸arruped̶a jũmarã quĩrãpita Eproʌ̃a nãwã jĩgua jarasia: –Mʌ̃ quĩrã djuburia waya ũrĩdua. Dji ẽjũãbari bʌa parata iwid̶ibʌrʌ quĩrãca mʌ̃a diaya. Mʌ̃a jara b̶ʌra ĩjãdua. Mãwãbʌrʌ mʌ̃ quimara maʌ̃ ẽjũãne tʌb̶ariya.–
586	GEN 23:14	Eproʌ̃ba panusia:
588	GEN 23:16	Eproʌ̃ba jarad̶ara Abrahaʌ̃ba bia ũrĩsia. Ara maʌ̃da hititarã quĩrãpita cuatrociento parata torroda juachaped̶a Eproʌ̃a jũma daucha diasia.
589	GEN 23:17	Maʌ̃ juachad̶ara hititarãba, purud̶e ed̶a wãbʌdarã bid̶a unusid̶aa. Mãwã cawasid̶aa Abrahaʌ̃ba Eproʌ̃ ẽjũã Macpela abadara nẽdosida. Maʌ̃ ẽjũãra Mamred̶eba ʌ̃mãdau odjabariare b̶ʌa. Abrahaʌ̃ba nẽdosia dji ẽjũãra, dji joubada uriara, bacuru dji ẽjũãne b̶ea sid̶a.
594	GEN 24:2	Ewari ab̶a Abrahaʌ̃ba idji nezoca dji dromada trʌ̃sia. Abrahaʌ̃ba ne erob̶ʌra maʌ̃ nezocaba jũma wagabadjia. Abrahaʌ̃ba idjía jarasia: –Bʌ jʌwara mʌ̃ b̶acara edre b̶ʌdua mʌ̃́a wãrãneba jarai carea.
643	GEN 24:51	Rebecara nama bʌ quĩrãpita b̶ʌa. Ededua idjira bʌ boro warra quima bamãrẽã Ãcõrẽba jarad̶a quĩrãca.–
655	GEN 24:63	Ewari ab̶a quewara babʌrʌd̶e idjira drua pʌrrʌa nĩbasia. Maʌ̃ne cameyoda zesebʌdada unusia.
663	GEN 25:4	Madiaʌ̃ warrarãra naʌ̃gʌrã basía: Epá, Eper, Hanoc, Abidá, Eldá sid̶a. Jũma maʌ̃gʌrãda Queturád̶eba yõsid̶aa.
668	GEN 25:9	Dji warrarã Isaba, Ismael bid̶a idjira tʌb̶arisid̶aa bẽwãrã joubada uria Macpela abadad̶e Sara tʌb̶ariped̶ad̶ama. Maʌ̃ uriara Mamre ẽjũãneba ʌ̃mãdau odjabariare b̶ʌa. Dji ẽjũãra Abrahaʌ̃ba hitita Zohar warra Eproʌ̃neda nẽdosia.
671	GEN 25:12	Nama b̶ʌ́ b̶ʌa Ismaeld̶eba yõped̶ad̶ad̶ebemada. Maʌ̃ Ismaelera Abrahaʌ̃ba unusia Agarad̶eba. Agarara Sara nezocawẽrã Egiptod̶ebema basía.
677	GEN 25:18	Idji warrarãba birasid̶aa Sur ẽjũãneba ab̶a Havila ẽjũãnaa. Sur ẽjũãra Egipto drua caita b̶ʌa. Havilara Asiria druad̶aa wãbada od̶e b̶ʌa. Ãdji ẽberãrãnebemada jĩga panabadjid̶aa.
684	GEN 25:25	Dji nabemara bio caraid̶a b̶asia. Idjira cara purea b̶asia. Maʌ̃ carea dji trʌ̃ra b̶ʌsid̶aa Esaú.
685	GEN 25:26	Esaú tobʌrʌd̶e dji tẽãbemaba idji jĩrũgarronane jida to b̶aesia. Maʌ̃ carea idjira trʌ̃ b̶ʌsid̶aa Jacobo. Rebeca warra tosid̶e Isara sesenta poa b̶asia.
686	GEN 25:27	Maʌ̃ warrarãra warisid̶aa. Esaúra mẽã wã cawa b̶asia. Baribʌrʌ Jacobora diguid̶a necai b̶abadjia.
687	GEN 25:28	Esaúba animarã beaped̶a dji zezaa cobibadjia. Maʌ̃ bẽrã Isaba Esaúra bio quĩrĩã b̶asia. Maʌ̃ne Rebecaba biara Jacoboda quĩrĩã b̶asia.
688	GEN 25:29	Ewari ab̶a Jacobora ne dju b̶asia. Maʌ̃ne Esaúra mẽã nĩbad̶ada jarra jũẽsia.
689	GEN 25:30	Esaúba jarasia: –Mʌ̃ djuburia, bʌa lenteja purea dju b̶ʌda mʌ̃́a cobidua. Mʌ̃ra cacua ʌb̶ʌaẽ́ b̶ʌa, ne coẽ́ b̶ʌ bẽrã.– Lenteja purea b̶ʌ carea Esaúra idjab̶a trʌ̃ b̶ʌsid̶aa “Edoʌ̃.”
691	GEN 25:32	Esaúba jarasia: –Mʌ̃ra jarrababa beubod̶oa. Mʌ̃da beuibʌrʌ, dadji zezad̶e edaida b̶ʌra ¿sãwã edai?–
692	GEN 25:33	Maʌ̃ne Jacoboba jarasia: –Naãrã wãrãneba jaradua bʌa dadji zezad̶e edaida b̶ʌra mʌ̃́a diaida.– Ara maʌ̃da Esaúba wãrãneba jarasia. Mãwã dji warra iwinaba edaida b̶ʌra Esaúba Jacoboa nẽdobuesia.