300	GEN 12:1	Tera kumateamopa, Kamongome Abrame lamaiyoo, “Embanya yuupi, embanya tatapi, embanya takangenya puupi, dupa yakinao, nambame emba yuu mende laitaka pitu dokonya pupi.
302	GEN 12:3	Emba auu pisetami endakali dupa nambame auwaka pisoto. Emba koeyasetamino endakali dupa nambame koeyasotoaka. Tenda yuunya endakali palitamino dupa pitaka emba-kisa nisepae nyetamina” lea.
306	GEN 12:7	Kamongo doko Abrame kateamo dokonya ipupala lamaiyoo, “Embanya mandipaenya mandipae dupa yuu dake maituna” lea. Kamongo ipao paneamo yuu dokonya Abrameme kana toko mende petala, Kamongo doko kenge lea.
310	GEN 12:11	Pao Injipi tengesa pyakamao pituu, etanenge Sarai lamaiyoo, “Emba enda eteteaka malyame dokonya,
312	GEN 12:13	Dopana, embame namba pimalengena lape. Dopa latenopa, emba mambele namba pyala naenya nisalaminona” lea.
314	GEN 12:15	Paraonya kalai akali dupame enda doko kandatala, Parao lamaiyoo, “Enda doko etete malya paka-lamona” lamaiyami. Lamaitala, enda doko Paraonya andaka lanyoo peami.
317	GEN 12:18	Yaina maiyamosa, Paraome Abrame epena latala baa lamaiyoo, “Embame namba aipuma dapa pipi? Enda doko embanya etanengena lao namba aipuma langya naeyapi?
318	GEN 12:19	Embame baa pimalengena leenosa, nambame enda doko nambanya etanenge joo nyio. Enda embanya doko tange nyepala puu” lea.
327	GEN 13:8	Dokonyana, Abrameme Lote lamaiyoo, “Nalimba tange etetena, nalimbanya kainanya imbu kaeyapae nasina, dee embanya kalai akalipi, nambanya kalai akalipi, dupanya kainanya imbu kaeyapae nasinaka.
328	GEN 13:9	Yuu andake waka nasilyape? Nalimba tale pimbana. Emba kingi koeyatena pateno kandao doko, namba kingi tolaetena patoo. Emba kingi tolaetena pateno kandao doko, namba kingi koeyatena patoana” lea.
333	GEN 13:14	Lote pateamopa, Kamongome Abrame lamaiyoo, “Emba kalyeno dosa katao, kingi koeyatenapi, tolaetenapi, niki pyakaengesapi, niki pambengesapi, kandao aowali laa.
336	GEN 13:17	Nambame yuu dokaita pitaka emba dilyona, kandao aowali laa” lea.
356	GEN 14:19	Melekisedekeme Abrame Gotenya kyeto doko dapa lao maiya: “Ketae Kaitinya Gote, yuu kaitipi wasingi dokome, emba minao etete auu pisina.
357	GEN 14:20	Embame yandapipili dupa yanda pimaipinopa, Ketae Kaitinya Gote dokome yanda doko pyoo ita minatale lao, emba nisipya. Dokonya, naimame baanya kenge doko minalyamana” lea. Dopa lateamopa, Abrameme baanya oapi dupa aopa lao, malu 10 mokosoo setapala, malu mendai Melekisedeke maiya.
358	GEN 14:21	Dokopa, Sodomo tange kiŋi dokome Abrame lamaiyoo, “Embame yanda petala nyipino, dupa pitaka emba ketae sina. Nambanya endakali dupa epekena lakape” lea.
359	GEN 14:22	Dopa leamopa, Abrameme baa lamaiyoo, “Kamongo, Ketae Kaitinya Gote, yuu kaitipi wasingi dokonya kengenya nambanya kingi minalyetala, nambame eteteaka kyeto joo, kiningi etete lelyo. Embame namba minao, kamongosiona latena, nambame embanya latae mende nanyotoo. Yakane tiki, setesa oapi tambuingipi, suu kendepi, mende nanyakalapo.
361	GEN 14:24	Namba tata dupame nee nyoo napimi-lamo, dupa namba ketae sina, namba mende nanyotoo. Nambanya kaita miningi akali Aneapi, Esekolepi, Mamarepi, dutupanya nyepenge dupa tange nyinana” lea.
362	GEN 15:1	Gii mendatupa pateamopa, Kamongome Abrame lee mane-maneme pii lamaiyoo, “Abrame, namba embanya konambi, embanya nisingi akali andake joo kalyona, emba paka nakaeyape” lea.
363	GEN 15:2	Dopa leamopa, Abrameme pii yanu pyao, “Emba Dupa Pitakanya Kamongo, namba wane namandelyo dokonya, nambanya moeya dupa Eliesa Damaskesa tange dokome nyeta-lamona, embame namba aki mende ditipi?” lea.
364	GEN 15:3	Latala deaka Abrameme lao pituu, “Embame namba wane mende nandipi, dokonya nambanya kalai akali dokome moeya dupa nyeta-lamona” lea.
365	GEN 15:4	Dokopa Kamongome Abrame lamaiyoo, “Embanya panda doko Eliesame nanyeta. Embanya manditi mendeme embanya panda doko nyetana” lea.
366	GEN 15:5	Dopa latala, baa lanyoo kamaka kolalyetala, “Kaitinya bui dupa itaki pyao kanda. Tenda embanya mandipaenya mandipae dupa dopa pitana” lea.
368	GEN 15:7	Kamongome dee Abrame lamaiyoo, “Namba Kamongo dokome, Kenane yuu dake emba etete ditu latala, yuu andake Kalidia taono Uru dokonya katao lanyoo epeona” lea.
369	GEN 15:8	Dopa leamopa, Abrameme tipa pyoo, “Dupa Pitakanya Kamongo, nambame aipa petala yuu dake nambanya-lamo lao masotope?” lea.
370	GEN 15:9	Dokopa Kamongome baa lamaiyoo, “Embame bulumakao ina ee kana tepoma patae mendepi, meme ina ee kana tepoma patae mendepi, sipisipi maipa ee kana tepoma patae mendepi, yaka maiyolee lapoma-pipa minao namba dyaa ipupi” lea.
374	GEN 15:13	Dokopa Kamongome Abrame lamaiyoo, “Emba auu pyoo gii londe katapala kumatenopa, nyoo malu pitami. Gii mendatupa patatamopa, embanya mandipaenya mandipae dupa, yuu wakamanya dupanya, tisa kendemane kalai pyoo, ee kana 400 katatami. Katataminopa, yuu tange dupame nyakama minao koeyasetami. Dopaka doko, nyakama koeyasetami dupa nambame tanda maitu. Gii dokopa, akali Amoa tata dupame luiyao koo pitamino dupa andake jetamopa, embanya mandipaenya mandipae dupa pinju longo-pipa auu pyoo pilyina latona, embame masepe” lea.
379	GEN 15:18	Peamo dokome, Kamongome Abrame-kisa pii yaki piamo doko dapa lao pia: “Embanya mandipaenya mandipae dupa endaki Naele matesa katao ipao, endaki Yupretisa tuu lao nambame maitu.
382	GEN 15:21	Amoa, Kenane, Gigasa, Jebusapi, dupanyana” lea.
384	GEN 16:2	Sarai baame Abrame lamaiyoo, “Kamongome namba wane mandipenge ingi kyeto jia-lamona, nambanya kalai enda doko ketae wane mandyuu nyotoo, emba baa-pipa palyepa” lea. Dokopa Abrameme baanya pii doko yakana lea.
387	GEN 16:5	Dokopa Saraimi Abrame lamaiyoo, “Naimanya mana singili pyoo, nambanya kalai enda Eka embanya kinginya yakineo. Embame Eka mana nalapinosa, namba tanda nyilyo. Dokonya Kamongome embapa nambapa minao tolasinana” lea.
388	GEN 16:6	Dopa leamopa, Abrameme Sarai lamaiyoo, “Eka doko embanya kalai enda embanya kinginya yakinelyo. Embame pitu lao masetali pipi” lea. Dokopa, Saraimi Eka minao koeyasiamosa, paka pea.
390	GEN 16:8	Ipupala baa tipa pyoo, “Eka, Sarainya kalai enda, emba anja pituu, anja paanya epelepe?” lea. Dopa leamopa, baame yanu pyao, “Nambanya isingi enda Sarai yakinatala, paka paanya epelyona” lea.
391	GEN 16:9	Dopa leamopa, Kamongonya enjele dokome baa lamaiyoo, “Emba Sarai pitatasa pilyoo pupala, baanya pii watao minao pitipi.
394	GEN 16:12	Baa dongi kapu joo, tuu-tuu pyoo katao, baanya tata dupapi, endakali waka dupa-pipa yandapipili joo katatana” lea.
395	GEN 16:13	Dokopa Ekame, Goteme pii kiningi langipumupa, kanjo lao masetala, baame kenge doko, “Goteme namba kandenge” lea.
399	GEN 17:1	Abrame ee kana 99 leamopa, Kamongo doko ipupala, “Namba Gote etete pupu lapae doko. Emba nambanya enombanya auu pyoo tolao katape.
400	GEN 17:2	Nambame emba-kisa pii yaki pio doko dee kyeto jotoo. Tenda emba tata dupa nambame minao andake jotona” lea.
402	GEN 17:4	“Nambame emba-kisa pii yaki pio doko masetala, kiningi etete lelyo. Endakali tata longo dupanya tenda emba yumbange jete.
406	GEN 17:8	Yuu Kenane dakenya emba epapu tisa kalyeno. Dopaka doko, tanga yuu dake pitaka embapa, embanya mandipaenya mandipae dupa etete ditu. Ditala, namba nyakamanya Gote doko katatona” lea.
407	GEN 17:9	Dopa latala, dee Goteme Abrakame lamaiyoo, “Embapi, embanya mandipaenya mandipae palitamino dupame nambanya pii nyakama-kisa yaki pilyo dake watao minaowaka katatami.
412	GEN 17:14	Akali mende namba tatana lao yanu kepala naeyatamo, doko nambanya pii nepatamosana, watao pyalapape” lea.
413	GEN 17:15	Dopa latala dee Goteme Abrakame lamaiyoo, “Embanya etanenge kenge Sarai lenge doko kaeyapala, indupa pituu Sara lape.
414	GEN 17:16	Nambame baa minao auu pisotopa, embanya wane ane mende manjakata. Tenda baanya aputingi tata longo palitamino dupanya mendapu kiŋi katatamina” lea.
415	GEN 17:17	Dokopa, Abrakameme baa mambo pyao luma lakapala, langalu yuunya sia. Soo pituu, “Namba ee kana 100 lapumupa, Sara baa ee kana 90 lelyamo dokonya, nalimbame wane mende kapa mandipengepe” lao masetala, baanya mona andaka gii kaeya.
416	GEN 17:18	Gii kaeyapala, baame Gote lamaiyoo, “Isamale auu pyoo katena, baa nisepe” lea.
417	GEN 17:19	Dokopa Goteme lao pituu, “Isamaleme embanya panda doko nanyeta. Embanya enda Sarame wane ane mende manditana, dokonya kenge doko Aisake lape. Nambame baapa, baanya mandipae dupa-kisa pii lao yaki pitu, doko tanga tangapi sulu seta.
419	GEN 17:21	Kana kalyamano dakenyaka, ee kana mende omonya, Sarame wane Aisake mandita, doko-kisa nambame tenda pii lao yaki pituna” lea.
428	GEN 18:3	Sakatatala nyakama lamaiyoo, “Nambanya akali andake, namba embanya kalai akali dake yakinatala napaale.
430	GEN 18:5	Koto nyetaminopa, nyakamanya kalai akali namba katapu dokonya ipamini-lamo dokonya, nambame nee mendatupa nyepakatopa, nyakama napala, kyeto nyepala, nyakamanya patami dupanya pupale” lea. Dopa leamopa, nyakamame baa lamaiyoo, “Etete auu pyoo leeno, dopa pii” leami.
431	GEN 18:6	Dokopa, Abrakame alo pyao, sele andaka kolandatala, Sara lamaiyoo, “Embame palao epe longo nyepala, yapa betesa wasoo yangakamai!” lea.
434	GEN 18:9	Nyakama nee napala, Abrakame tipa pyoo, “Embanya etanenge Sara doko anja pilyape?” leami. Dopa leaminopa, Abrakameme pii yanu pyao, “Baa sele andaka pilyamona” lea.
435	GEN 18:10	Dokopa, akali aiyomba joo epeamo dokome baa lamaiyoo, “Kana kalyamano dakenyaka, ee kana mende omonya, embanya etanenge Sara wane ane mende mandyuu setao, pititamopa ipatona” lea. Pii leambino dupa Sarame andaka kambusa pituu sia.
436	GEN 18:11	Pii sepala, baame masoo pituu, “Namba enda wambake joo etapae. Nambanya akali andake doko lyanga joo etapaeyaka. Nambame dee auu kaeyao akalingipa tole pyapengepe?” lao masetala, baanya mona andaka gii kaeya.
438	GEN 18:13	Gii kaeyamo kandatala, akali aiyomba joo epeamo dokome Abrakame lamaiyoo, “Sarame aipuma gii kaeyao, 'Namba enda wambake dakeme kapa wane manditupi' lelyape?
439	GEN 18:14	Namba Kamongo dokome dopale mende pyaanya nongo pingipi? Nambame gii setelyo dokonya, ee kana omonya, wane ane mende mandipatamopa, ipatona” lea.
440	GEN 18:15	Dokopa, Sara baa paka kaeyapala, yapae pyoo, “Nambame gii nakaeyalona” lea. Dopa leamoaka doko, Kamongome, “Kiningi, embame gii kaeyalenona” lea.
442	GEN 18:17	Dokopa, Kamongome masoo pituu, “Nambame mende Abrakame-kisa pituna leo doko pitoo lao masilyo. Baanya wanepi, palupi, dupame nambanya pii sepala, watao minao tolao katapenge. Baame nyakama mana lamaina lao, nambame baa yapao nyio. Baa tata dupa andake jetala, pupu lapae joo palitaminopa, yuunya endakali palitamino dupa pitaka nyakama-kisa nisepae nyetami. Nambame mende Sodomo-kisa pyaanya pelyo doko, Abrakameme sina lamaitoo” lao masia.
445	GEN 18:20	Dopa lao masetala Kamongome Abrakame lamaiyoo, “Taono Sodomo Gomorapi tange dupame koo pilyamino lapae sipu
446	GEN 18:21	dokonya, nambame kiningipi lao kanja pelyona” lea.
448	GEN 18:23	Pateambinopa, Kamongonya enomba dokonya Abrakame katapala, baa tipa pyoo, “Embame endakali koo pingi dupa etasoo pyateno dokopa, tolatae katatamino dupa apata pyatepe?
450	GEN 18:25	Embame endakali koo pingi dupa etasoo pyateno dokopa, endakali tolatae dupa apata pyateno doko, mana epe daa. Endakali koo pingipi, tolataepi, lapota makande mendai dokoaka minateno doko, auu napita-lumu. Endakali koo pingipi, tolataepi, dupa pyasoo pyala naeyape. Yuu dakenya emba jasa dokome mana tolatae dokonya pyaapenona” lea.
451	GEN 18:26	Dokopa Kamongome baa lamaiyoo, “Sodomo tange endakali 50 tolatae katatamino kandato doko, dutupa masetala, nambame yuu doko mende napitoana” lea.
452	GEN 18:27	Dokopa Abrakameme pii yanu pyao, “Namba koo kenge nasingi dokome, Akali Andake, emba pii langitoo.
453	GEN 18:28	Embame endakali 45 tolatae katatamino kandao doko, pyatepe?” “Nambame endakali 45 tolatae katatamino kandato doko, pyala naeyato.”
454	GEN 18:29	“Endakali 40 tolatae katatamino kandao doko, pyatepe?” “Nambame endakali 40 tolatae katatamino kandato doko, pyala naeyatona” lea.
455	GEN 18:30	Dopa leamopa, deaka Abrakameme Kamongo lamaiyoo, “Akali Andake, embame namba imbu nakaeyape. Embame endakali 30 tolatae katatamino kandao doko, pyatepe?” “Nambame endakali 30 tolatae katatamino kandato doko, pyala naeyatona” lea.
456	GEN 18:31	Dopa leamopa, Abrakameme lao pituu, “Akali Andake, nambame deaka tipa pitoo, maka nakaeyape. Embame endakali 20 tolatae katatamino kandao doko, pyatepe?” “Nambame endakali 20 tolatae katatamino kandato doko, pyala naeyatona” lea.
457	GEN 18:32	Dopa leamopa, Abrakameme lao pituu, “Akali Andake, embame imbu kaeyapengeaka doko, mendai dake etao tipa pilyo: Embame kandatenopa, endakali 10 tolatae katatamino kandao doko, pyatepe?” “Nambame endakali 10 tolatae katatamino kandato doko, pyala naeyatona” lea.
460	GEN 19:2	Dopa petala, baame lao pituu, “Nambanya akali andake dolapo, namba nyakambanya kalai akali dakenya andaka nyakambanya moko wasa pyapala, luu palipala, yongama wamba paanya ipambino dokonya patambina, nambanya andaka mona ipupa” lea. Dopa leamopa, akali dolapome pii yanu pyao, “Nalimba endakali kambu pingi panda dokonya palimbanana” daa leambi.
463	GEN 19:5	Kakopatae katao dokaitame Lote lao wii lao, “Akali lapoma embanya andaka ipambino dolapo anja pilyambipi? Naimame dolapo elya pingi pimana, laminao kamaka pyakalya” leami.
465	GEN 19:7	Paii lanyetala dokaita lamaiyoo, “Kaimia paluma, mana kopeta dopale dupa kaeyalapa.
466	GEN 19:8	Nambanya wanenge mapukae dolapo nyakama masetamili pyepale ditoo. Akali dolapo nambanya andaka ipambino dokonya, nyakamame mende pyaa naeyapengena” lea.
467	GEN 19:9	Dopa leamopa, Sodomo tange dupame, “Lote embame kaita lyokala naeya!” leami. Dee nyakamalapo laloo pyoo, “Akali tata waka dakeme naima mana lelyape?” leami. Dopa latala, Lote lamaiyoo, “Naimame emba minao etete koeyasalamanona” leami. Dopa latala, Lote puu lao, tuu lanya nepatala, anda kaita doko kalunya pyandalanya piami.
470	GEN 19:12	Dokopa enjele dolapome Lote lamaiyoo, “Taono dakenya mana koo tata longo pilyamino lapae Kamongome sepala, nalimbame taono dake koeyasala pupa laamo. Dokonya nalimbame yuu dake koeyasalanya pilyambano. Dopana, embanya enda wanepi, wanengenya lakuingipi, dupa lanyoo, yuu dake yakinao, paka puu” leambi.
472	GEN 19:14	Dopa lateambinopa, Lote kamaka pyakalyetala, baanya wanenge dolaponya lakuingi dolapo lamaiyoo, “Kamongome taono dake koeyasotoo lelyamona, nyakamba taono dake yapa yakinao, paka pupa!” lea. Pii leamo doko, male pyoo lelyamo lao masiambi.
473	GEN 19:15	Yuu yongalanya piamopa, enjele dolapome Lote lamaiyoo, “Embanya enda dokopi, wanenge dolapopi, yapa lanyoo puu. Endakali waka dupa koeyatami kainanya nyakama koeyala naeyalapalena” leambi.
475	GEN 19:17	Dopa petala, enjele dokonya mendeme lamaiyoo, “Nyakama tatamina, yuu manda silyamo omonya yapa pupa. Pao pituu, maitakaita kandapilyala naeyalapape. Yuu lama-lama dupanya mendasa nembo tao napilyapape” lea.
476	GEN 19:18	Dokopa Loteme lao pituu, “Akali andake, embame namba kondo kaeyao niseteleno. Yuu manda omo londati waka-lamona, ene patopa, taono koeyasete dokonya apata koeyalapu-lumu.
478	GEN 19:20	Namba taono yakane mende tengesa joo silyamo dokonya puu lateno doko, namba yaka kalyapona” lea.
479	GEN 19:21	Dopa leamopa, enjele dokome baa lamaiyoo, “Doko yakalumuna, nambame taono yakane doko koeyasala naeyatoo, emba dokonya puu.
480	GEN 19:22	Nyakama kaitinisa pao katataminopa, nambame mende napitoana, nyakama yapa patae katao pupa” lea. Loteme taono doko yakanena leamo dokonya, kenge Soa maiyami.
489	GEN 19:31	Dokonya kateaminopa, Lote wanenge mupa dokome kakingi kole doko lamaiyoo, “Nalimbanya takange lyanga jetelyamo. Akali mendeme nalimba lanyepala, wane mandyuu dita mende yuu dakenya nakalyamo.
490	GEN 19:32	Dopana, nalimbanya takange waene longo nena maitala, baa masala naeyatamopa, palimaitala, baa-kisa wane mandyuu nyembana. Nyetambano dokome, naima tata doko paliuwaka patana” lea.
492	GEN 19:34	Yuu gii mende dokonya wanaku mupa dokome kakingi kole doko lamaiyoo, “Kuakama nambapa tole palyambanona, indupa kuakama embapa tole palyepale, deaka waene longo nena maimbana. Dopa pitambano dokome, naima tata doko etala naeyao paliuwaka patamina” lea.
499	GEN 20:3	Lanyiamoaka doko, kuakama Goteme kombeame Abimeleke lamaiyoo, “Embame enda akali katenge nyipi-lamo dokonya, emba kumalapenona” lea.
500	GEN 20:4	Dopa leamopa, Abimelekeme baa lamaiyoo, “Nambame enda doko yonge tole napyapu. Akali Andake, embame naima endakali tenge nakatenge dupa mee pyao kumasetepe?
501	GEN 20:5	Abrakameme Sara baanya pimalengena lea. Sarame Abrakame baanya pimalengeakana lea. Dopa leambino dokonya, nambame Sara nambanya enda joo lanyio. Dopana, namba ketae tenge mende nakalyamona” lea.
502	GEN 20:6	Dopa leamopa, Goteme, “Kiningi leeno. Embame nambanya enombanya koo napyaale lao, kaita lyokapu. Dopa pipu dokonya, embame enda doko yonge tole napyapi.
503	GEN 20:7	Enepapu enda doko tange maiyakamai. Akalingi doko propeta mendena, dokome embanya loma sakatamopa, emba kumala naeyalapeno. Enda doko pilyina laa naeyateno kandao doko, kiningi embapi, embanya palupi, dupa pitaka kumalaminona” lea.
505	GEN 20:9	Dokopa Abimelekeme Abrakame epena latala, baa lamaiyoo, “Embame naima aipuma minao koeyasipipi? Embame nambapi, nambanya endakalipi, dupa aipuma elya andake nyoo dipipi? Embame naima-kisa nalapenge mende lapi-lamona” lea.
506	GEN 20:10	Dopa latala Abimelekeme Abrakame tipa pyoo, “Embame aipa lao masetala, pii doko lapipi?” lea.
507	GEN 20:11	Dopa leamopa, Abrakameme pii yanu pyao, “Nambame masio doko, 'Yuu dakenya Gote paka kaenge mende nakatengema dokonya, nyakamame nambanya enda doko kanju katao, namba pyatamina' latala leo.
509	GEN 20:13	Dokopa nambanya takange yakinatala, Goteme puu leamo dokopa, nambame Sara lamaiyoo, “Embame namba auu kaeyateno doko, nalimba patamba yuu dupanya pao pituu, namba embanya pimalengena lape' lao lamaiyona” Abrakameme lea.
511	GEN 20:15	Dopa petala Abimelekeme baa lamaiyoo, “Yuu doko pitaka nambanyana, embanya auu kaengeme katatoo lao masete dosa katape” lea.
512	GEN 20:16	Dopa latala Abimelekeme Sara lamaiyoo, “Nambame embanya pimalenge doko silipa muni 1,000 mailyo dokome, embanya tata dokaitame emba koo mende napipi-lamo lao, kandena lao pilyona” lea.
520	GEN 21:6	Dokopa Sarame lao pituu, “Goteme namba-kisa mana etete auu pipae minalame-lamo dokonya, nambame auu kaeyao, gii kaelyo. Pii dake setamino dupa pitakame auu kaeyapae nyetamina” lea.
521	GEN 21:7	Deaka Sarame lao pituu, “Namba wambakesa wane mende kopyoo andu maiyapeno lao masala naengemaka doko, indupa nambame wane ane dake Abrakame wambakesa manjakamaipuna” lea.
524	GEN 21:10	Kandatala Abrakame lamaiyoo, “Embanya moeya dupa pitaka nambanya ikiningi Aisakenya ikina, embanya kalai enda Eka ikiningi dokome embanya moeya dupanya mende nanyinana, lapota watao pyaa” lea.
526	GEN 21:12	Dopaka doko, Goteme Abrakame lamaiyoo, “Embame kalai enda Ekapa, ikiningipa lao mona tanda nakaeyape. Saranya pii latamo doko sepe. Aisakenya puu dokonya, tenda emba tata doko andake joo, palita.
527	GEN 21:13	Embanya kalai enda dokonya ikiningi doko embanya ikiningiaka. Dokonya tenda baanya mandipaenya mandipae dupa minao, tata andake jotoakana” lea.
531	GEN 21:17	Goteme wane dokonya ee leamo doko sia. Sepala Gotenya enjele mendeme kaiti-kisa katao, wii lao, “Eka, emba aipa pyape? Goteme wane dokonya ee doko salamona, emba paka nakaeyape. Tenda baanya mandipaenya mandipae palitamino dupa, nambame minao andake jotona, emba pupala, wane doko kinginya minao toeya katasa!” lea.
536	GEN 21:22	Gii mendepa, Abimelekepa, baanya yanda singi akali mupa Pikolapa, Abrakame kateasa peambi. Pupala, Abimelekeme Abrakame lamaiyoo, “Embanya kalai dupa pitakanya Goteme auu pisoo katenge.
537	GEN 21:23	Epapu embame nambapi, nambanya mandipaenya mandipae palitamino dupa minakasala naeyatona lao, Gotenya kengenya namba langi. Nambame emba auu pisipuli pyoo, embame nambapi, nambanya tatapi, tisa joo kalyeno yuu dakepi, dutupa auu pisakape” lea.
538	GEN 21:24	Dopa leamopa, Abrakameme baa lamaiyoo, “Embame leenoli pituna lao, kiningi etete lelyona” lea.
539	GEN 21:25	Dokopa, Abrakameme Abimeleke pyalanya lao, “Wamba embanya kalai akali dupame nambanya endaki pete tombapae doko nyiamina” lea.
540	GEN 21:26	Dopa leamopa, Abimelekeme Abrakame lamaiyoo, “Embame namba langya naeyapino dokonya, apimi pipyape lao nambame nakandapu. Enepapuaka nambame silyo dakena” lea.
543	GEN 21:29	Dokopa, Abimelekeme Abrakame tipa pyoo, “Embame sipisipi ina 7-pela nyepala, waka mendasa palyipi-lamo doko, aipuma pipipi?” lea.
544	GEN 21:30	Dokopa Abrakameme pii yanu pyao, “Sipisipi yakane 7-pela datupa emba ditoo lao pipu. Embame nyeteno dokome, endaki pete nambame tombeo dake, nambanya-lamo lao panena” lea.
549	GEN 22:1	Gii mendatupa pateamopa, Goteme Abrakame minao makande pia. Goteme lao pituu, “Abrakame!” lea. Dopa leamopa baame, “Namba ae kalyo dake” lea.
550	GEN 22:2	Dokopa Goteme Abrakame lamaiyoo, “Embanya ikiningi mendai iki Aisake, embanya auu kaenge doko lanyoo, Moraiya yuu dokonya pupi. Pupala manda mende nambame laitaka pitu dokonya, baa kundi joo, tao mulyina yangape” lea.
553	GEN 22:5	Siamo kandatala, baanya kalai akali dolapo lamaiyoo, “Namba wane kole dakepa omosa loma soo kundi yangala pelyambano. Yangatala dee ae pilyambanana, nyakamba dongi dake-pipa asa kalyepape” lea.
555	GEN 22:7	Peambinopa, Aisakeme, “Apane” leamopa, Abrakameme, “Apea laa” lea. Dopa leamopa, Aisakeme takange tipa pyoo, “Nalimba ita kaiyepaepi, ita waiyepaepi, dupa salambane-lamo doko, sipisipi yakane yangapenge doko anja kalyape?” lea.
556	GEN 22:8	Abrakameme pii yanu pyao, “Gote tangeme sipisipi yakane dita mende yangambanana” lea. Dopa latala, nyakamba peambino doko pao,
559	GEN 22:11	kaiti-kisa katao, Kamongonya enjele mendeme, “Abrakame! Abrakame!” lao wii lea. Dopa leamopa, Abrakameme, “Namba ae kalyo dake” lea.
560	GEN 22:12	Dokopa Kamongonya enjele dokome Abrakame lamaiyoo, “Wane doko koeyasala kaeya. Embanya wane mendai iki doko, namba nanditu latala kaeyala naeyaleno dokonya, embame Gote paka kaeyalene-lamo lao kandelyona” lea.
562	GEN 22:14	Kamongome sipisipi maiyamo doko masetala, Abrakameme yuu manda doko kenge, “Kamongo dokome dita” lea. Epapupi, “Kamongonya manda dokonya, baame ditana” lengema.
564	GEN 22:16	“Namba Kamongo dokome nambanya kenge dokonya etete kyeto joo kiningi etete lelyo: Embame nambanya pii nepatala, embanya wane mendai iki doko namba nanditu latala, kaeyala naeyalene-lamo dokonya, nambame emba minao auu pisoto. Embanya mandipaenya mandipae palitamino dupa kaitinya bui-pipa, endaki lembasa kea-pipa, kapa pena lasoto. Embanya mandipae dupame nyakamanya yandapipi dupa pyao ita minatala, yuu dupa nyakama nyetami.
566	GEN 22:18	Embame nambanya pii watalene-lamo dokonya, embanya mandipaenya mandipae mendeme endakali yuunya palitamino dupa pitaka auu pisetana” lea.
568	GEN 22:20	Dokonya kateamopa, endakali mendeme Abrakame lamaiyoo, “Embanya kaiminingi Neo etanenge Milikame wane ane 8-pela mandeana” lea.
576	GEN 23:4	“Namba nyakamanya kainanya tisa kalyo. Nambanya enda malu pitoo, yuu mendatupa nyakama-kisa sambatoana” lea.
578	GEN 23:6	“Akali andake, emba naima-pipa auu pyoo katamano dokonya, naima-kisa pii mende nasilyamo. Malu pipenge panda auu petae silyamo dupanya, mendenya embanya enda doko malu pyaalena” leami.
580	GEN 23:8	Mambo pyao pituu, “Nambanya enda malu pyaale lao, yuu laitaka petelyamino dokonya, nyakamame Soa ikiningi Eprone lamaiyoo,
581	GEN 23:9	yuu Makapela dokonya, baanya yuu dupanya lemba mendasa kananda mende sambao nyotoo lamaiyepa. Nyakamame kandataminopa, muni pupenge dutupa etao maitoana” lea.
583	GEN 23:11	“Akali andake, namba tata datupanya enombanya, kananda dokopi, yuu makisa silyamo dupanya malu pyaale ditoana” lea.
585	GEN 23:13	Dopa petala, Abrakameme endakali peteamino dupanya lengelyapinya Eprone lamaiyoo, “Embame yuu dake namba ditoo leeno doko kapana, pii dalapo etete sepe. Nambame kananda katapae yuu makisa dutupa apata etasoo sambapala, nambanya enda doko malu pitoana” lea.
587	GEN 23:15	“Akali andake, yuu dakenya silipa muni 400 pupenge. Dopaka doko, muni kuli dutupa nalimba yale daa. Nalimba akali andake daape. Embame enda doko nyoo malu pyaa puu” lea.
594	GEN 24:2	Gii mendepa, Abrakameme baanya kalai akali isingi mupa doko lamaiyoo, “Embame nambanya ikiningi Aisakenya ae Kenane tange enda mende lanyakamaiya naeyape. Emba nambanya takangenya yuu dokonya patala, enda namba tata mende Aisakenya enda joo lanyakamaipi. Yuu kaitipinya Kamongo Gote dokonya kenge doko latala, embame nambanya paingi koko kingi pyandatala, nambanya pii nepala naeyatona lao, kyeto joo langi” lea.
597	GEN 24:5	Dokopa kalai akali dokome baa lamaiyoo, “Emba tata enda mende nambame lamaitupa, daa latamo dokopa, nambame embanya ikiningi doko lanyoo patopa, baa tange enda mende kandao nyetamo doko, kapape?” lea.
598	GEN 24:6	Dokopa Abrakameme pii yanu pyao, “Nambanya ikiningi doko lanyoo, dee nambanya yuu dokonya napupi, etete daa.
600	GEN 24:8	Enda dokome daa latamo doko, emba nambanya pii lelyo dakeme, emba ketae tenge naipata. Dopana, nambanya ikiningi doko yuu dokonya lanyoo napupi, daa lelyona” lea.
601	GEN 24:9	Dopa lateamopa, kalai akali dokome Abrakamenya paingi koko kingi pyandatala, baa lamaiyoo, “Embame pii lelenoli pituna” lao etete kyeto jia.
604	GEN 24:12	Dokopa baame loma soo pituu, “Kamongo, nambanya akali andake Abrakamenya Gote, embame nambanya akali andake doko kondo latala, nambanya kalai pilyo dake angi jina lape.
606	GEN 24:14	Ipatamino dokopa, nambame wanaku mapukae dupanya mende lamaiyoo, 'Embanya penge dokonya namba endaki natoo dii' latopa, namba ditala, kamele dupa apata maiyakatoo latamo doko, embanya kalai akali Aisakenya enda lanyakamaipenge doko-lamo lao kandatoo” lao loma sia.
609	GEN 24:17	Epeamopa, kalai akali dokome alo pyao pupala, lamaiyoo, “Endaki mendalapo natoo ditipi?” lea.
610	GEN 24:18	Dopa lateamopa, wanaku dokome endaki penge latainya siamo doko isa minanatae katao, “Nambanya akali andake, yapa naa” lea.
611	GEN 24:19	Endaki napeamopa, wanaku dokome baa lamaiyoo, “Embanya kamele dupa apata endaki nao tiaka kaena maiyakatoana” lea.
615	GEN 24:23	Maitala, baame Rebeka lamaiyoo, “Embanya takange doko naima langipoko. Naima kuka gii doko iki palimana, embanya takangenya andaka panda silyape?” lea.
616	GEN 24:24	Dopa leamopa, Rebekame pii yanu pyao, “Nambanya takange doko, Neo, Milikapanya ikiningi Betuele lenge.
617	GEN 24:25	Kamele palipenge pandapi, nee napengepi, dupa singi. Dee endakali palipenge panda singiakana” lea.
619	GEN 24:27	“Kamongo, nambanya akali andake Abrakamenya Gote dokome, wamba Abrakame-kisa pii yaki piino doko masetala, nambanya akali andake doko auu pisoo, namba lanyoo baanya tata etete dokonya epene-lamo dokonya, yaka pilinona” lea.
623	GEN 24:31	Kandatala lao pituu, “Nyakama Kamongome auu pyoo laminao ipame-lamona, asa kamaka nakalyepale, andaka mona ipupa. Nambame nyakama palipengepi, kamele dupa palipengepi, panda depa latakalona” lea.
625	GEN 24:33	Maitala nee nena lao maitiaminopa, kalai akali dokome dokaita lamaiyoo, “Tanga nee namana, nambame pii mende laa epo doko latatoalena” lea. Lateamopa, Labaneme, “Yakalumuna naima langi” lea.
626	GEN 24:34	Dokopa kalai akali dokome dokaita lamaiyoo, “Namba Abrakamenya kalai akali.
634	GEN 24:42	“Namba ipao endaki pete tombapae dokonya pyakaetala loma soo pituu, 'Nambanya akali andake Abrakamenya Kamongo Gote, nambame kalai pyaa epo doko angi jina lape.
641	GEN 24:49	Dopana, nyakambame nambanya akali andake doko kondo kaeyapala, baanya pii doko yakinala naeyatambino kandao doko, namba tolao langyepa. Naimanya mana singili pyoo, wanaku dake nambanya akali andake dokonya ikininginya lanyoo pakamaitoo, dyepa. Daa-tamo doko, namba kaitini waka mende kutatoana” lea.
642	GEN 24:50	Dopa lateamopa, Labane Betuelepame yanu pyao, “Doko Kamongome pyome-lumuna, nalimbame dee aki lambanape?
643	GEN 24:51	Kamongome kaitini setalame-lumuna, embanya akali andakenya ikiningi dokonya wanaku Rebeka lanyakamaiyoo, paale” leambi.
646	GEN 24:54	Maitala, Abrakamenya kalai akali dokonya endakali tole epeamino dupa-pipa nee endakipi neami. Napala kuka gii doko paleami. Yongama sakatatala, kalai akali dokome dokaita lamaiyoo, “Nambanya akali andake Abrakame kalyamo dokonya patoo, nyakamame namba yakinalapa” lea.
647	GEN 24:55	Dopa leamopa, Rebekanya endangi pimalengepame pii yanu pyao, “Wanaku doko yuu gii 10-pela naima-pipa pitimana kaeya. Pitipala baa nyakama-pipa patamina” leambi.
648	GEN 24:56	Dopa lateambinopa, Abrakamenya kalai akali dokome dolapo lamaiyoo, “Namba kalai pyaa ipupu doko Kamongome auu petelyamona, patoo nyakambame minala naeyalapa” lea.
649	GEN 24:57	Dokopa, “Wanaku dokome aipa lelyape lao kandambana epena” leambi.
650	GEN 24:58	Dokopa baa ipateamopa, nyakambame tipa pyoo, “Emba akali dakepa patambipi?” leambinopa, wanaku dokome yanu pyao, “Namba patoana” lea.
652	GEN 24:60	Leambinopa, baanya palu dupame lamaiyoo, “Pakae, emba endakali tausene tausene dupanya endangi pititi. Embanya mandipaenya mandipae dupame nyakamanya yandapipili dupa pyao ita minaowaka katatamina” lao, Rebeka pii kyeto epe dupa lamaiyami.
657	GEN 24:65	Pyakanatala, Abrakamenya kalai akali doko tipa pyoo, “Akali laeyao epelyamo omo apipi?” lea. Dopa leamopa, kalai akali dokome yanu pyao, “Baa nambanya akali andake dokona” lea. Dokopa Rebeka aiyombanya yaki pingi lapalapa doko nyepala, baanya lengelyapi yame pia.
23233	MAT 1:20	Dopa lao masoo kateamopa, Kamongonya enjele mendeme kombeame baa lamaiyoo, “Dapiti yumbange Josepe, Marianya inginya wane pilyamo doko, Oli Spiritame maipyana, embame baa enda joo lanyalanya paka nakaeyape.
23234	MAT 1:21	Baame wane ane mende manditamo dokome, baanya endakali dupanya koo dupa kunao nepakamaitala pyoo nyetana, baanya kenge doko Jisasa lape” lea.
23235	MAT 1:22	Dopa pitana lao wamba Kamongome propeta mende-kisa pii leamo dake angi jia: “Enda mapukae, akali tole napingi mendeme wane ane mende manditamo, dokonya kenge doko Emanyuele latami.” (Emanyuele dokonya tenge doko, “Gote naima-pipa tole katenge.”)
23240	MAT 2:2	endakali kateamino dupa lamaiyoo, “Naimame Judamanya kiŋi katapengena latae, wane ŋaŋa dokonya bui doko niki pyakaengesa-kaita, katamo kandatala, baa mambo pyala epelyamanona, anja mandipae silyape?” leami.
23242	MAT 2:4	Eroteme pitisa mupapi, Mosesanya loo mana nyepae akalipi, dupa pitaka epena lao nyoo elyambu pia. Elyambu petala dokaita tipa pyoo, “Kraisa doko yuu andukunya mandipengepe?” lea.
23243	MAT 2:5	Dopa leamopa, dokaitame pii yanu pyao, “Goteme propeta mende-kisa lamaiyamo doko, dapa lao pepa pyapae silyamo: 'Nyakama Beteleme tange dupa, nyakamanya yuu taono doko taono waka Judia silyamo, dupanya pundi-pundi naseta. Nyakamanya mandipaenya mandipae, dupanya isingi akali mende pyakalyetamo dokome, nambanya Israele tange endakali dupa setao katakatana' lao pepa pyapae silyamo. Dopa lapae silyamo dokonya, Kraisa doko yuu andake Judia dokonya taono yakane Beteleme mandipengena” leami.
23246	MAT 2:8	Dopa petala dokaita lamaiyoo, “Nyakama Beteleme pupala, wane doko kutakondape pyoo kutalapape. Kutao kandatala dokopa, nambame apata mambo pyala patoana, langya ipupape” lea.
23251	MAT 2:13	Akali dokaita pateaminopa, kuka Kamongonya enjele mendeme, kombeame Josepe lamaiyoo, “Eroteme wane doko kutao pyao kumasalanya pilyamona, emba sakatatala, wane dokopa endangipa lanyoo, paka Isipi puu. Pupala katatenopa, nambame emba pilya lato gii dokopa pilyetena, emba dokonya mee katapena” lea.
23253	MAT 2:15	Pupala Josepe Isipiaka katao, Erote kumiamo gii dokonya tuu lea. Dopa piamo dokome, wamba Kamongome propeta mende-kisa, “Nambanya ikiningi doko Isipi yuu doko yakinatala, nambame epena latona,” leamo doko angi jia.
23255	MAT 2:17	Dopa piamo dokome, “Taono Rama dokonya, Resolonya wanenge dupanya, wane dupa lao yamataka lao, ee leaminopa, endakali mendeme dupanya mona minao taiyu lasakamaipenge nanjiana” lao, wamba propeta Jeremaeyame leamo doko angi jia.
23258	MAT 2:20	lamaiyoo, “Wane doko pyalanya piamo akali doko kumatelyamona, embame wane dokopa endangipa lanyoo, Israele pilya” lea.
23261	MAT 2:23	Pupala taono Nasarete lenge dokonya katea. Dopa piamo dokome, wamba propeta dupame, “Baa Nasarete tangena latamina” leamo pii doko angi jia.
23263	MAT 3:2	Lamaiyoo pituu, “Gotenya isingi mate doko tengesa ipatelyamona, mona kapilyalapa” lea.
23264	MAT 3:3	Wamba propeta Aisaiyame Jone kaimbu pingi doko kandao, “Endakali napalenge yuu mendasa akali mendeme katapala wii lao, 'Kamongonya kaitini doko depa lakamaiyepape. Kaitini koeyapae dupa tolasakamaiyepape' lao katatana” lea.
23268	MAT 3:7	Dokopa Parasaipi, Sadyusiapi longo mendapu kaimbu pyekena lao epeamino kandatala, baame dokaita lamaiyoo, “Nyakama koo kanopatonya mandipae dupa! Gotenya imbu kaeyapae ipatamo doko, apimi langimusa, paka epelyamipi?
23272	MAT 3:11	“Akali maitapyao epelyamo dokonya, pupu lapae dokome namba ita minao. Nambame baanya moko pee dolapo, nyoo minakamaiyanya, namba epe daa. Nambame kaimbu pyekelyo dake, mona kapilyingi doko pyekelyona, baame Oli Spiritapa, itate kaiyepaepame nyakamanya kaimbu pyakata.
23273	MAT 3:12	Wita angi imbupi pyasoo silyamopa, baame yapenge sapolo doko nyepala, ketae pyasingi. Dopa pingisa, poome imbu umbisa soo kambu pilyamopa, angi isa lapalapa kuiyetaenya ipao singi. Ipao silyamo dupa nyoo baanya nee setenge anda dokonya setapala, imbu dupa ita konjala naenge dokonya soo yangatana” lea.
23275	MAT 3:14	Pao pyakameamopa, Joneme Jisasa lamaiyoo, “Embame nambanya kaimbu pyakapenge doko, aipuma nambame embanya kaimbu pyakatale lao epelepe?” lea.
23276	MAT 3:15	Dopa leamopa, Jisasame baanya pii yanu pyakamaiyoo, “Nalimbame pyepale lao Goteme masilyamo, dupa apata pimbana pii” lea. Dopa leanya, Joneme baanya pii doko watao minatala, kaimbu pyakamaiya.
23278	MAT 3:17	Dokopa kaiti-kisa katao, pii mende lea dokome lao pituu, “Doo kalyamo doko nambanya Ikiningi, mona setenge doko. Nambame baa etete auu kaengena” lea.
23281	MAT 4:3	Dokopa makande pingi akali dokome, baa kateasa ipupala lao pituu, “Emba kini Gote Ikiningi-tamo doko, kana silyamo datupa betesa jina laa” lea.
23282	MAT 4:4	Dopa leamopa, Jisasame baanya pii yanu pyakamaiyoo, “'Endakalimi betesa iki nenge dokonya-kaita, saka nakatenge. Goteme pii lelyamo dokonya-kaita, endakali saka katengena,' dopa lao pepa pyapae silyamona” lea.
23284	MAT 4:6	Dopa latala baame Jisasa lamaiyoo, “Gotenya pii dapa lao pepa pyapae silyamo: 'Goteme emba masetala, kaname embanya mokopi mende, koeyatame latala, enjele dupame emba nisoo kopyoo nyina latana' latae silyamo. Dopana, emba kini Gote Ikiningi-tamo doko, ketae dakenya katao isa mangau laa” lea.
23285	MAT 4:7	Dopa leamopa, Jisasame baa lamaiyoo, “'Embame embanya Kamongo Gote doko minao makande napipi' lao pepa pyapae silyamona” lea.
23287	MAT 4:9	Dopa latala, baame Jisasa lamaiyoo, “Embame namba lao luma lakapala, mambo pyateno doko, silyamo dupa pitaka nambame emba ditoana” lea.
23288	MAT 4:10	Dopa leamopa, Jisasame baa lamaiyoo, “'Embame embanya Kamongo Gote doko mambo pyao, baanya iki kalai pyakamaiyoo katape' lao pepa pyapae silyamona, Satane, emba puu” lea.
23293	MAT 4:15	“Endakali Napatalaipa, Sebyulanepa, dupanya yuu Jodane omotenapa, Galilea lembasapa, dupanya tii pipae andake mende ipatamopa, endakali kamalya katenge dupa-kisa tapyatamo kandatami. Kamalya katenge dupa, yuu iminjetaenya kumapae joo katangema dupa-kisa, tii pipae dokome tii pisetana” lea.
23295	MAT 4:17	Gii dokopa pituu, Jisasame endakali dupa pii tee pyao lamaiyoo, “Gotenya isingi mate doko tengesa ipatelyamona, nyakama mona kapilyalapa” lea.
23297	MAT 4:19	Jisasame dolapo lamaiyoo, “Nyakambame pisa nyingimbali pyoo, endakali nyalapale mana langitoo, namba watao ipupa” lea.
23306	MAT 5:3	“Endakali imambunya tipya joo katao, Goteme nisipya laka lao masingima dupa, Goteme minao auu pisingi. Auu pisetae dupa Gotenya isingi mate dokonya katatami.
23307	MAT 5:4	“Endakali ee lao katengema dupa, Goteme minao auu pisingi. Auu pisetae dupa mona yaepao katatami.
23308	MAT 5:5	“Endakali anasale joo katengema dupa, Goteme minao auu pisingi. Auu pisetae dupa Goteme yuu maituna leamo doko, nyakama nyetami.
23309	MAT 5:6	“Lopo pilyamopapi, endaki nanu pilyamopapi, napu laka lao putiti kaengeli pyoo, mana tolatae dupa nyepala, watao minapu laka lao putiti kaeyao katenge endakali dupa, Goteme minao auu pisingi. Auu pisetae dupa Goteme maitamopa, nyakama etete yaka jeta.
23310	MAT 5:7	“Endakali yango kondo kaenge dupa, Goteme minao auu pisingi. Auu pisetae dupa Goteme kondo kaeyata.
23311	MAT 5:8	“Endakali Gote-kisa iki mona setenge dupa, Goteme minao auu pisingi. Auu pisetae dupame Gote kandatami.
23312	MAT 5:9	“Endakali mona mendai paliu katamana lao, kyeto joo akema lengema dupa, Goteme minao auu pisingi. Auu pisetae dupa Goteme baanya ikiningina lata.
23313	MAT 5:10	“Endakali Gotenya mana tolatae minilyamino latala, waka dupame tanda maitaminopa, tanda nenge dupa Goteme minao auu pisingi. Auu pisetae dupa Gotenya isingi mate dokonya katatami.
23314	MAT 5:11	“Nyakamame namba watao minilyaminosa, endakali dupame nyakama kandao pii koo lao, sambo pii koo longo dupa lao, nyakama minao koeyasilyaminopa, Goteme nyakama auu pisingi.
23315	MAT 5:12	Wamba propeta kateamino dupa, endakali dupame minao koeyasiamiakana, nyakama minao koeyasetamino dokopa, nyakama walu nalalapape. Yole etete andake doko kaitinya setekelyamona, nyakama eteke kaeyao, mona epe palyoo kalyepape,” Jisasame lea.
23316	MAT 5:13	Jisasame dee mende lao pituu, “Nyakama yuu dakenya sole jepae kalyamino. Sole tende patamo doko, nyakamame aipa petala dee tende pisetamipi? Sole tende patae dokome mende napingi. Doko soo yakinatala moko katao nepenge.
23317	MAT 5:14	“Nyakama yuu dakenya tii pipae joo kalyamino. Yuu taono mende manda mendenya silyamo doko, yalo pyoo nasingi. Dopaleaka joo, nyakama-kisa tii pipae doko yalo napipenge.
23319	MAT 5:16	Dopaleaka joo, nyakama-kisa tii pipae silyamo doko, endakali waka dupame kandena lao kalyepape. Dopa pitaminopa, dupame nyakamanya kalai epe pitamino dupa kandatala, nyakamanya Takange kaitinya katenge doko lao mambo pyatamina” lea.
23320	MAT 5:17	Jisasame dee mende lao pituu, “Mosesame loo seteamo dupapi, propeta dupame mana leamino, dupa nambame nyoo nepalanya epeepe lao masala naeyalapape. Dupa nambame nyoo nepalanya naepeo. Dupa angi jisalanya epeo.
23323	MAT 5:20	Nambame nyakama langilyo: Mosesanya loo mana nyepae akalipi, Parasaipi, dupa ita minao nyakamame mana tolatae minala naeyatamino doko, Gotenya isingi mate dokonya napatamina” lea.
23324	MAT 5:21	Jisasame dee mende lao pituu, “'Embame endakali yango mende tuu pyoo pyao kumasala naeyape. Pyao kumasetamo endakali doko, laminao kote laa pupengena' lao, wamba nyakamanya yumbange dupa lamaiyamino doko, nyakamame siami.
23328	MAT 5:25	“Dee endakali mendeme emba-pipa kote laanya pia kandeno dokopa, kaitinisa kote laa pao pituu, embame kote langitamo endakali doko mona auu pisakamaipi. Dopa napitino doko, endakali dokome emba laminao pao jasa doko maitamopa, dokome yanda singi dupa maita. Dokopa dupame emba anjinya palyetami.