294	GEN 11:27	Teranya mandipae palu dokaita. Baame wane ane mandeamoli pyoo kenge dutupa: Abrame, Neo, Aranepi. Araneme Lote mandea.
295	GEN 11:28	Tera baa saka kateamopa, yuu andake Kalidia taono Uru, baa mandeamino yuu dokonya Arane kumia.
296	GEN 11:29	Kumateamopa, Abrame, Neopa lapota enda nyiambi. Abrameme Sarai nyia. Neome Arane wanenge Milika nyia. Milika baa Isika kakingi.
297	GEN 11:30	Sarai baa ingi kyeto jia dokonya, wane namandea.
298	GEN 11:31	Terame baanya ikiningi Abrame, Arane ikiningi Lote, aeyange Saraipi, dupa pitaka lanyoo, yuu andake Kalidia taono Uru yakinao, yuu Kenane paanya peami. Pao taono Arane pyakamatala, dokonya kateami.
299	GEN 11:32	Kateaminopa, Tera baa ee kana 205 leamopa, taono Arane dokonya kumia.
300	GEN 12:1	Tera kumateamopa, Kamongome Abrame lamaiyoo, “Embanya yuupi, embanya tatapi, embanya takangenya puupi, dupa yakinao, nambame emba yuu mende laitaka pitu dokonya pupi.
301	GEN 12:2	Nambame emba minao, akali tata andake jetala, auu pisoto. Nambame embanya kenge doko minao, andake jotopa, endakali dupa pitaka nisepae nyetami.
303	GEN 12:4	Abrame baa ee kana 75 leamopa, Kamongome lamaiyamoliaka pyoo, Abrame, Lotepi, taono Arane doko yakineambi.
304	GEN 12:5	Baanya etanenge Saraipi, kaimininginya ikiningi Lotepi, pinju setao kateamino dupapi, Arane tange kendemane nyiamo dupa pitaka lanyoo, Kenane yuu dokonya paanya pea.
305	GEN 12:6	Peamo doko pao, yuu Kenane dokonya lepa ita andake katenge, yuu More dokonya pyakamea. More yuu doko taono Sekeme dokonya singi. Gii dokopa, endakali Kenane tange dupa yuu dokonya paleamiaka.
306	GEN 12:7	Kamongo doko Abrame kateamo dokonya ipupala lamaiyoo, “Embanya mandipaenya mandipae dupa yuu dake maituna” lea. Kamongo ipao paneamo yuu dokonya Abrameme kana toko mende petala, Kamongo doko kenge lea.
307	GEN 12:8	Dokonya katao baa taono Betele makisa yuu manda niki pyakaenge dokaita pea. Pupala taono Betelepi, taono Aiipi, lenge dolaponya kaina dokonya baanya sele anda pia. Abrameme yuu dokonya kana toko mende petala, Kamongo kenge lao mambo pia.
308	GEN 12:9	Gii mendatupa pateamopa, Abrameme baanya oapipi, endakalipi, dupa lanyoo yuu Negepe-kaita pea.
309	GEN 12:10	Pupala kateamo yuu dokonya lopo yale mende siamosa, baa Injipi yuu dokonya gii mendatupa kalyanya pea.
310	GEN 12:11	Pao Injipi tengesa pyakamao pituu, etanenge Sarai lamaiyoo, “Emba enda eteteaka malyame dokonya,
311	GEN 12:12	Injipi tange dupame emba kandatala, enda dake baanya etanenge-lamona latala, namba pyao kumasetala, emba pilyale kaeyalamino.
312	GEN 12:13	Dopana, embame namba pimalengena lape. Dopa latenopa, emba mambele namba pyala naenya nisalaminona” lea.
313	GEN 12:14	Dokopa, Abrame pao Injipi pyakameamopa, Injipi tange dupame enda doko kandeaminopa, etete malyame jia.
314	GEN 12:15	Paraonya kalai akali dupame enda doko kandatala, Parao lamaiyoo, “Enda doko etete malya paka-lamona” lamaiyami. Lamaitala, enda doko Paraonya andaka lanyoo peami.
315	GEN 12:16	Paraome Sarai kandatala, auu kaeyapala, Abrame auu pisoo, bulumakaopi, sipisipipi, dongi ina maipapi, kamelepi, kalai enda akalipi, dupa maiya.
316	GEN 12:17	Maiyamoaka doko, Paraome Abramenya etanenge Sarai nyakamailyamo latala, Kamongome Paraopi, baanya palupi, yaina koo mende maiya.
317	GEN 12:18	Yaina maiyamosa, Paraome Abrame epena latala baa lamaiyoo, “Embame namba aipuma dapa pipi? Enda doko embanya etanengena lao namba aipuma langya naeyapi?
318	GEN 12:19	Embame baa pimalengena leenosa, nambame enda doko nambanya etanenge joo nyio. Enda embanya doko tange nyepala puu” lea.
319	GEN 12:20	Dokopa, Paraonya kalai akali dupame Abrame pena kandena lea. Kandatala akali dokaitame Abrame baanya endapi, palupi, oapipi, dupa pitaka nyoo, pakale pena leami.
320	GEN 13:1	Abrame baanya bulumakao, sipisipi, meme, dongi, silipa, golopi, dupa longo sia. Paraonya kalai akali dupame pena lateaminopa, Abrame baanya etanengepi, Lotepi, pinjupi, dupa pitaka lanyoo Injipi yakinao Negepe yuu dokonya peami.
322	GEN 13:3	Negepe katao, yuu mendenya pata, mendenya pata pyoo, taono Betelepi, taono Aiipi kaina wamba kateamo dokonya pyakameami.
324	GEN 13:5	Lotenya bulumakao, sipisipi, meme, dongi, kalai enda akalipi, baanya enda wanepi, dupa longoaka kateami.
325	GEN 13:6	Kateaminopa, yuu dokonya tata longo doko pitaka tole katapenge nanjia.
326	GEN 13:7	Dopa piamosa, Abrame, Lotepanya kalai akali yangolapo imbu kaeyapae sakatea. Gii dokopa, Kenane tangepi, Peresa tangepi, dupa yuu dokonya paleamiaka.
327	GEN 13:8	Dokonyana, Abrameme Lote lamaiyoo, “Nalimba tange etetena, nalimbanya kainanya imbu kaeyapae nasina, dee embanya kalai akalipi, nambanya kalai akalipi, dupanya kainanya imbu kaeyapae nasinaka.
328	GEN 13:9	Yuu andake waka nasilyape? Nalimba tale pimbana. Emba kingi koeyatena pateno kandao doko, namba kingi tolaetena patoo. Emba kingi tolaetena pateno kandao doko, namba kingi koeyatena patoana” lea.
329	GEN 13:10	Dopa lateamopa, Lote baa kandao aowali latala, Jodane duu taono Soa singi dokaita yuu lama-lama auu petae siamo doko kandea. Kamongome Sodomo Gomora koeyala naeyamopa, yuu doko Kamongonya ee jepae, dee yuu Injipi yale sia.
330	GEN 13:11	Loteme yuu doko nyepala, baa niki pyakaenge dokaita pea. Dopa petala, akali dolapo tale piambi.
331	GEN 13:12	Abrame baa Kenane kateamopa, Lote baa Jodane duu lama-lama taono singi dupanya Sodomo makisa, sele anda petala katea.
332	GEN 13:13	Dokopa, Sodomo tange endakali dupame Kamongonya enombanya mana etete koeyapae dupa minao, baa maka pisiami.
333	GEN 13:14	Lote pateamopa, Kamongome Abrame lamaiyoo, “Emba kalyeno dosa katao, kingi koeyatenapi, tolaetenapi, niki pyakaengesapi, niki pambengesapi, kandao aowali laa.
334	GEN 13:15	Yuu kandeleno dokaita pitaka nambame embapi, embanya mandipaenya mandipae dupa etete ditu.
335	GEN 13:16	Nambame embanya mandipaenya mandipae dupa pitaka yuu dakenya yuu kunuma-pipa kapa pena lasoto. Endakali mendeme yuu dakenya yuu kunuma itaki pingima-tamo doko, embanya mandipaenya mandipae dupa itaki pyatamiaka.
336	GEN 13:17	Nambame yuu dokaita pitaka emba dilyona, kandao aowali laa” lea.
337	GEN 13:18	Dopa lateamopa, taono Ibrone dokonya, akali Mamarenya lepa ita balo makisa dokonya, sele anda petala, Kamongonya kenge lao, kana toko mende pia.
338	GEN 14:1	Gii mendepa, Sodomo tange kiŋi Berapi, Gomora tange kiŋi Bisapi, Atama tange kiŋi Sinapapi, Seboma tange kiŋi Semebapi, dutupa Ilama tange kiŋi Kedolama dokome isia. Dee Bela tange kiŋi doko isoaka pia. (Taono Bela dokonya kenge mende doko Soa lenge.) Kedolama dokome ee kana 12 isoo katea. Ee kana 13 leamopa, baanya pii doko tanga leami. Ee kana 14 leamopa, kiŋi Kedolamame kiŋi waka tepoma yanda tole pingi dutupa lanyia. Dutupanya kenge dutupa: yuu Babilonia tange kiŋi Amarapelepi, yuu Elasa tange kiŋi Ariokopi, yuu Goima tange kiŋi Tidalapi, dutupa lanyia. Lanyepala kiŋi kitomende dutupame nyakamanya yanda pingi akali dupa lanyepala, taono Aseroto Kanaimi dokonya, akali Repaimi tata dupa pyao ita miniami. Dee maitapyao, taono Ame dokonya, akali Susa tata dupa pyao ita miniami. Ita minatala, yuu lama-lama taono Kititaimi tengesa dokonya, akali Eme tata dupa pyao ita miniami. Ita minatala, yuu Siya manda dokonya, akali Oro tata dupa, Elaparane yuu sapu dokonya watao pyasiami. Dokonya katao, dee kapilyetala, yuu Kadesa, kenge wambatae doko Ene Misapata lenge, dokonya pao pyakameami. Pyakamatala, akali Ameleke tata dokonya yuu andake dokopi, dee taono Asasone Tama dokonya, akali Amoa tata dupa pyao ita miniamiaka. Yanda doko pyoo ita minatala, Kedolamapi, baanya akali yanda pingi dutupapi pupala, kiŋi Sodomo tangepi, Gomora tangepi, Atama tangepi, Seboma tangepi, Bela tangepi, dutupa yanda pimaiya peami. Peaminopa, 5-pela kiŋi-pipa nyakamanya akali yanda pingi dutupa, yuu Sidimi lama-lama dokonya, yanda pyaanya kambu piami. Kambu pyatala, 5-pela kiŋi dutupame kiŋi kitomende dutupa yanda pimaiyami.
347	GEN 14:10	Yuu Sidimi lama-lama dokonya kolta petenge yuli longo singi. Kiŋi Sodomo tangepi, Gomora tangepi, dupa paka peaminosa, yuli dupanya mangeami. Dee yangi dupa mandale dupanya paka peami.
348	GEN 14:11	Kiŋi kitomende dutupame Sodomo Gomorapi tange dupanya nee pinjupi pitaka minambao, nyepala kaita peami.
349	GEN 14:12	Lote baa Sodomo katenge dokonyana, Lotepi, baanya pinju oapipi, dupa apataka nyoo soo peami.
350	GEN 14:13	Akali paka pea mendeme Ibru akali Abrame doko dopa pyomona lao lamaiya. Abrame baa Mamarenya lepa ita balo singi dosa tengesa paliu katea. Mamare doko baa akali tata Amoa dokonya. Mamarenya kaiminingi dolapo Esekolepi, Aneapi lenge. Mamarepi, Esekolepi, Aneapi, akali tepoma dutupa Abramenya kaita miningi.
351	GEN 14:14	Yandapipili dupame Lote-pipa, baanya pinju dupa nyoo soo, pamino lapae doko Abrameme sia. Sepala baame baanya yanda pingi akali pupu lapae 318 dutupa lanyia. Lanyepala kiŋi kitomende dutupa watao pao, taono Dane dokonya pyakamea.
352	GEN 14:15	Dokonya katao, Abrameme baanya yanda pingi akali dutupa kambu lapo pia. Dopa petala, kiŋi kitomende dutupanya yanda pingi akali dutupa kuakama yanda pimaitala, pyao ita miniami. Dokaita watao pyao, taono Damaskesa dokonya pyakamatala, eteteaka watao pyao, taono Oba peami.
353	GEN 14:16	Patala, Lotenyapi, Sodomo Gomora tangemanya pinju pyao nyiamino dupapi, baanya endakali dupapi, endakali wakapi, lanyoo peamino dupa lanyoo pilyiami.
354	GEN 14:17	Kiŋi Kedolama tata dupa Abrameme yanda pyoo ita minatala pilyiamopa, Sodomo tange kiŋi dokome, yuu lama-lama kenge Sape dokonya, baa kanja epea. (Sape dokonya kenge mende doko kiŋinya yuu lama-lama.)
355	GEN 14:18	Melekisedeke baa taono Saleme dokonya kiŋi, dee baa Ketae Kaitinya Gote dokonya pitisa, dokome betesa waenepi minao, Abrame maiya epea.
356	GEN 14:19	Melekisedekeme Abrame Gotenya kyeto doko dapa lao maiya: “Ketae Kaitinya Gote, yuu kaitipi wasingi dokome, emba minao etete auu pisina.
357	GEN 14:20	Embame yandapipili dupa yanda pimaipinopa, Ketae Kaitinya Gote dokome yanda doko pyoo ita minatale lao, emba nisipya. Dokonya, naimame baanya kenge doko minalyamana” lea. Dopa lateamopa, Abrameme baanya oapi dupa aopa lao, malu 10 mokosoo setapala, malu mendai Melekisedeke maiya.
358	GEN 14:21	Dokopa, Sodomo tange kiŋi dokome Abrame lamaiyoo, “Embame yanda petala nyipino, dupa pitaka emba ketae sina. Nambanya endakali dupa epekena lakape” lea.
359	GEN 14:22	Dopa leamopa, Abrameme baa lamaiyoo, “Kamongo, Ketae Kaitinya Gote, yuu kaitipi wasingi dokonya kengenya nambanya kingi minalyetala, nambame eteteaka kyeto joo, kiningi etete lelyo. Embame namba minao, kamongosiona latena, nambame embanya latae mende nanyotoo. Yakane tiki, setesa oapi tambuingipi, suu kendepi, mende nanyakalapo.
361	GEN 14:24	Namba tata dupame nee nyoo napimi-lamo, dupa namba ketae sina, namba mende nanyotoo. Nambanya kaita miningi akali Aneapi, Esekolepi, Mamarepi, dutupanya nyepenge dupa tange nyinana” lea.
362	GEN 15:1	Gii mendatupa pateamopa, Kamongome Abrame lee mane-maneme pii lamaiyoo, “Abrame, namba embanya konambi, embanya nisingi akali andake joo kalyona, emba paka nakaeyape” lea.
363	GEN 15:2	Dopa leamopa, Abrameme pii yanu pyao, “Emba Dupa Pitakanya Kamongo, namba wane namandelyo dokonya, nambanya moeya dupa Eliesa Damaskesa tange dokome nyeta-lamona, embame namba aki mende ditipi?” lea.
364	GEN 15:3	Latala deaka Abrameme lao pituu, “Embame namba wane mende nandipi, dokonya nambanya kalai akali dokome moeya dupa nyeta-lamona” lea.
365	GEN 15:4	Dokopa Kamongome Abrame lamaiyoo, “Embanya panda doko Eliesame nanyeta. Embanya manditi mendeme embanya panda doko nyetana” lea.
366	GEN 15:5	Dopa latala, baa lanyoo kamaka kolalyetala, “Kaitinya bui dupa itaki pyao kanda. Tenda embanya mandipaenya mandipae dupa dopa pitana” lea.
367	GEN 15:6	Kamongome kiningi lelyamo lao Abrameme masoo miniamo dokonya, baa tolataena lea.
368	GEN 15:7	Kamongome dee Abrame lamaiyoo, “Namba Kamongo dokome, Kenane yuu dake emba etete ditu latala, yuu andake Kalidia taono Uru dokonya katao lanyoo epeona” lea.
369	GEN 15:8	Dopa leamopa, Abrameme tipa pyoo, “Dupa Pitakanya Kamongo, nambame aipa petala yuu dake nambanya-lamo lao masotope?” lea.
370	GEN 15:9	Dokopa Kamongome baa lamaiyoo, “Embame bulumakao ina ee kana tepoma patae mendepi, meme ina ee kana tepoma patae mendepi, sipisipi maipa ee kana tepoma patae mendepi, yaka maiyolee lapoma-pipa minao namba dyaa ipupi” lea.
371	GEN 15:10	Oo yongama, Goteme leamoli pyoo, Abrameme dutupa nyoo ipupala, pyao kainanya sapya pyaloo petala, mokosoo malu laponya setea. Setapala yaka dolapo itata malu dolaponya talipi setea.
372	GEN 15:11	Dokopa, yaka lakepame mendapuame ipao yaka akipi pyapae siamo dupa nalanya piaminopa, Abrameme pyao watea.
373	GEN 15:12	Niki pambeamopa, Abrame baa luu nakandao paleamopa, iminjetae paka pipae mendeme baa sanga pyambea.
374	GEN 15:13	Dokopa Kamongome Abrame lamaiyoo, “Emba auu pyoo gii londe katapala kumatenopa, nyoo malu pitami. Gii mendatupa patatamopa, embanya mandipaenya mandipae dupa, yuu wakamanya dupanya, tisa kendemane kalai pyoo, ee kana 400 katatami. Katataminopa, yuu tange dupame nyakama minao koeyasetami. Dopaka doko, nyakama koeyasetami dupa nambame tanda maitu. Gii dokopa, akali Amoa tata dupame luiyao koo pitamino dupa andake jetamopa, embanya mandipaenya mandipae dupa pinju longo-pipa auu pyoo pilyina latona, embame masepe” lea.
378	GEN 15:17	Lateamopa, yuu kuiya. Dokopa iminjetae dokonya itate taputa pengenya palipae mendepa, kinduli taputa mendepa, dolapo bulumakao yakapi, konjepae siamo kaina dokonya ipao pea.
379	GEN 15:18	Peamo dokome, Kamongome Abrame-kisa pii yaki piamo doko dapa lao pia: “Embanya mandipaenya mandipae dupa endaki Naele matesa katao ipao, endaki Yupretisa tuu lao nambame maitu.
380	GEN 15:19	Yuu doko akali tata Kene, Kenesa, Kadamona,
381	GEN 15:20	Itai, Peresa, Repaimi,
382	GEN 15:21	Amoa, Kenane, Gigasa, Jebusapi, dupanyana” lea.
383	GEN 16:1	Abrame etanenge Sarai baa wane manja naeyao enda wambake jiamopa, baanya Injipi tange kalai enda Eka lenge mende apata peteambi.
384	GEN 16:2	Sarai baame Abrame lamaiyoo, “Kamongome namba wane mandipenge ingi kyeto jia-lamona, nambanya kalai enda doko ketae wane mandyuu nyotoo, emba baa-pipa palyepa” lea. Dokopa Abrameme baanya pii doko yakana lea.
385	GEN 16:3	Gii dokopa, Abrame Kenane yuu dokonya ee kana 10 katapeamopa, Sarainya kalai enda Eka Injipi tange dokopa, Abramepa, enda akalipa joo petena lao, nyoo maiya.
386	GEN 16:4	Abrame Ekapa tole pyateambinopa, Eka baa wane peteamo kandatala, baanya isingi enda Sarai minao imbu pisia.
387	GEN 16:5	Dokopa Saraimi Abrame lamaiyoo, “Naimanya mana singili pyoo, nambanya kalai enda Eka embanya kinginya yakineo. Embame Eka mana nalapinosa, namba tanda nyilyo. Dokonya Kamongome embapa nambapa minao tolasinana” lea.
388	GEN 16:6	Dopa leamopa, Abrameme Sarai lamaiyoo, “Eka doko embanya kalai enda embanya kinginya yakinelyo. Embame pitu lao masetali pipi” lea. Dokopa, Saraimi Eka minao koeyasiamosa, paka pea.
389	GEN 16:7	Paka pao yuu sapu Sua kaitinisa, endaki pete tombapae singi mendasa peteamopa, Kamongonya enjele mende epea.
390	GEN 16:8	Ipupala baa tipa pyoo, “Eka, Sarainya kalai enda, emba anja pituu, anja paanya epelepe?” lea. Dopa leamopa, baame yanu pyao, “Nambanya isingi enda Sarai yakinatala, paka paanya epelyona” lea.
391	GEN 16:9	Dopa leamopa, Kamongonya enjele dokome baa lamaiyoo, “Emba Sarai pitatasa pilyoo pupala, baanya pii watao minao pitipi.
392	GEN 16:10	Nambame embanya mandipaenya mandipae dupa longo jotopa, kapa pao itaki napyatami.
393	GEN 16:11	Emba wane ane mende manjapeno. Nambame embanya ee lapino tenge doko sepelyo dokonya, baanya kenge doko Isamale lape.
394	GEN 16:12	Baa dongi kapu joo, tuu-tuu pyoo katao, baanya tata dupapi, endakali waka dupa-pipa yandapipili joo katatana” lea.
395	GEN 16:13	Dokopa Ekame, Goteme pii kiningi langipumupa, kanjo lao masetala, baame kenge doko, “Goteme namba kandenge” lea.
396	GEN 16:14	Ekame kenge leamo doko masetala, endakali dupame endaki pete tombapae Kadesapa, Beretapanya kainanya singi doko kenge Bilaro lengema.
397	GEN 16:15	Abrame ee kana 86 leamopa, Ekame wane ane mende mandea. Mandipiamopa, Abrameme kenge doko Isamale lea.
399	GEN 17:1	Abrame ee kana 99 leamopa, Kamongo doko ipupala, “Namba Gote etete pupu lapae doko. Emba nambanya enombanya auu pyoo tolao katape.
401	GEN 17:3	Dokopa Abrameme Gote mambo pyao luma lakapala, langalu yuunya siamopa, Goteme baa lamaiyoo,
402	GEN 17:4	“Nambame emba-kisa pii yaki pio doko masetala, kiningi etete lelyo. Endakali tata longo dupanya tenda emba yumbange jete.
403	GEN 17:5	Tenge dokonya, embanya kenge Abrame yakinatala, Abrakame lelyo.
404	GEN 17:6	Nambame emba tata dupa minao andake jotopa, dupanya mandipae mendapu kiŋi katatami.
405	GEN 17:7	Emba-kisa pii yaki pio doko tanga tangapi sulu seta. Embapa, embanya mandipaenya mandipae palitamino dupanya namba Gote doko katato.
406	GEN 17:8	Yuu Kenane dakenya emba epapu tisa kalyeno. Dopaka doko, tanga yuu dake pitaka embapa, embanya mandipaenya mandipae dupa etete ditu. Ditala, namba nyakamanya Gote doko katatona” lea.
407	GEN 17:9	Dopa latala, dee Goteme Abrakame lamaiyoo, “Embapi, embanya mandipaenya mandipae palitamino dupame nambanya pii nyakama-kisa yaki pilyo dake watao minaowaka katatami.
408	GEN 17:10	Embapi, embanya mandipaenya mandipae dupanya ane pitakanya namba tatana lao yanu kepalapape.
409	GEN 17:11	Kepatami dokome, nambame nyakama-kisa pii yaki pilyo dake petae katata.
410	GEN 17:12	Nyakamanya mandipaepi, mee kalai akalipi, kalai akali sambao nyepaepi, dupanya wane ane manditamino dupa yuu gii 8-pela latamopa, namba tatana lao yanu kepalapape.