13952	PSA 2:3	Diet tange, “Dahat gi rapat se ira udir winwisaan, ma dahat na lapus ise ira udir kuun, dahat naga langalanga.”
13955	PSA 2:6	“Iau te hatur no nugu king aram Saion, no nugu halhaliana uladih.”
13956	PSA 2:7	No King i hinawas tano dadas na nianga tano Watong. Ga tange tagu, “Augu no Natigu. Katin iau te hanuat no raam Sus.
13958	PSA 2:9	Nu kure diet ma tiga dadas na kinkinis na harkurai, nu parok gisiane diet hoing ra gingop di gil ma ra dadas na pikaia.”
13964	PSA 3:3	Haleng diet tangtange utagu hoken, “God pa na halon ie.”
13977	PSA 4:7	Haleng diet tirtiri bia, “Sige i tale bia na hamines ta bilbilai ta dahat?” Waak tar no murarang tano num matmataan na bulo sare het, Watong.
14058	PSA 10:6	I la tangtange tana iaat, “Taie tiga linge pa na gune iau. Iau ni guama hathatikai ma pa ni haan tupas ta saksakena.”
14063	PSA 10:11	I la tangtange tana iaat, “God i te luban. I te suhe no uno matmataan ma pana le naanaas.”
14065	PSA 10:13	Wara biha ira ut na sakena diet gi tange hagahe God? Wara biha gi tange tana iaat, “Pana le tataau iau bia ni tur ra harkurai”?
14071	PSA 11:1	Aram narakoman tano Watong iau kis barahit taar. Hobibih balik bia i tale ugu bia nu tange tagu bia, “Pupungo laah hoing tiga maan uram tano num uladih.”
14082	PSA 12:5	ing diet la tangtange bia, “Mehet na petlaar ma ira karame mehet. Mehet at, mehet kure ira palabulu mehet. Taie tikai i tale bia na tikal mehet.”
14083	PSA 12:6	No Watong i tange hoken, “I taar burena ta ira magingin na haragahai taar ta ing taie ta harharahut ta diet ma ira sunuah na marmaris ta ira maris, iau ni taman tut um kaiken. Iau ni balaure bat diet sukun sige diet ing diet tange hagahe diet.”
14091	PSA 13:5	No nugu ebar na tange, “Iau te petlaar ie,” ma ing diet malentakuane iau diet na guama bia iau puko.
14093	PSA 14:1	No ulba i tange narako tano kaatine, “Taie ta God.” Ira udiet nilon i mapus sakasaka ma da miliguruane ira udiet tintalen. Taie tikai i gil no tahut.
14106	PSA 16:2	Iau ga tange tano Watong, “Augu no nugu Tamat. Iau pai kap tiga bilai na linge sen bia mekaia ho augu sen mon.”
14229	PSA 22:9	“I te so nurnur tano Watong. Waak tar at no Watong na harahut ie. Waak tar at no Watong na halon ie, tako no Watong i kanakana at tana.”
14310	PSA 27:8	No kaatigu i tange utaam, “Silihe no uno matmataan!” Watong, iau ni silihe no num matmataan.
14334	PSA 29:9	No ingana no Watong i la hurhurusane ira dadasina daha, ma i la ramas sare ira malit. Ma narako tano uno hala na lotu diet bakut diet kakonga bia, “A pirhakasing tupas ie!”
14343	PSA 30:7	Ing iau ga balaraan, iau ga tange, “Taie tiga linge pa na gune iau.”
14346	PSA 30:10	“Asa naga taam ing bia ni hiruo na minaat, bia ni hansur tano lulur? I haruat be kaabus na pirlat ugu? No kaabus na hinawas palai bia u la gilgil haruat ma ira num nianga?
14347	PSA 30:11	Hadade, Watong, ma nu marse iau. Watong, harahut iau.”
14364	PSA 31:15	Iesen iau nurnur taam, Watong. Iau tange, “Augu no nugu God.”
14372	PSA 31:23	Ing iau ga kalar, iau ga tange hoken: “Iau te takutus talur no matmataan taam.” Iesen u ga hadade no nugu tintaau wara gaiena harmarsai ing iau ga tataau ugu wara harharahut.
14379	PSA 32:5	Io kaik um, iau ga hapuasne ira nugu magingin sakena taar taam ma iau pa ga kasar bus ira nugu nironga. Iau ga tange, “Iau ni hinawas palai ta ira nugu magingin na laka harkurai taar tano Watong,” ma u ga lik luban iau tano saksakena ta ira nugu nironga.
14433	PSA 35:3	Tatik no kusur ma no haasok wara harsomane diet ing diet paspasak hani iau. Tange tagu, “Iau no num harhalon.”
14440	PSA 35:10	No nugu kidilona nilon na tange, “Watong, sige i haruat ma ugu? U la harharahut leh ira maris sukun diet ing diet manga dadas. U la kapkap pukus ira maris ma ira malahahin sukun diet ira ut na kikinau.”
14451	PSA 35:21	Diet kukutur tagu ma diet tange, “Het te nes tupas um ing u gilgil ma ira mata het.”
14455	PSA 35:25	Waak u bale bia diet na lik, “Bilai! Ing at mon dahat sipsip!” Waak u bale bia diet na tange, “Dahat te kanam bakut leh ie!”
14457	PSA 35:27	Sige diet kanakana ing i hanuat puasa bia iau pai gil ta nironga, bale diet bia diet na kup ma ra gungunuama ma ra larlaro. I tahut bia diet na tange hatikane bia, “Da hatamat no Watong, nong i la kankanakana tano bilai na kinkinis tano uno tultulai.”
14528	PSA 38:17	Iau te tange, “Waak u bale diet bia diet na latlaat tano nugu tinirih, ma bia diet na hatamat habaling diet taar tagu ing no kakigu i malmalagir.”
14536	PSA 39:2	Iau ga tange bia, “Iau ni nes mur ira nugu hinahaan, iau kabi gil ta magingin sakena ma no karamegu. Iau ni palakus no hagu ing bia ira ut na sakena diet kis tika taar ma iau.”
14539	PSA 39:5	“Watong, hamines no hauhawatine no nugu nilon tagu, ma aise ira nugu bung na nilon. Hapuasne tagu bia a kumkumine mon no nugu nilon.
14542	PSA 39:8	“Iesen kaiken um, Watong, asa kaik iau nanaas ine? Iau kis nanaho taam.
14547	PSA 39:13	“Watong, taram no nugu sinasaring. Hadade no nugu tintaau wara harharahut. Waak bia u hadade kapis ira nugu sunsunuah, kanong iau lon tika ma ugu hoing tiga se taman. Iau hoing tiga wasire taam hoing ira hintubugu bakut diet ga ngan huo.
14548	PSA 39:14	Nanaas laah mekai ho iau waing iau nigi guama baling, iau kabi maat laah ma pa da nas habaling iau.”
14556	PSA 40:8	Io, ma iau ga tange bia, “Iau um ken. Iau te hanuat. Di ga pakat hokaiken utagu narako tano num pakpakat.
14557	PSA 40:9	Iau kanan taar bia ni gil haruatne no num sinisip, nugu God. Ira num harkurai ken narako tano kaatigu.”
14565	PSA 40:17	Iesen diet bakut ing diet silsilihe ugu, i tahut bia diet na guama ma diet na laro taam. Diet ing diet kalak no num harhalon, i tahut bia diet na tangtange hatikane bia, “Da bul haut no Watong.”
14571	PSA 41:5	Iau ga tange, “Watong, nu marse iau. Halangalanga iau, kanong iau ga gil ra sakena taar taam.”
14572	PSA 41:6	Ira nugu ebar diet tange hagahe iau hoken: “Na maat hunanges, ma hunanges mah no hinsana na pataam hatika?”
14575	PSA 41:9	“Tiga sakana minaset i te kap tar ie. Pa na taman tut laah tano sibaan i noh taar kaia.”
14584	PSA 42:4	Ira polo na matagu i ngan bia agu nian ra kasakes ma ra bung, ma kana ira tunotuno diet tangtange tagu tano kudulena bung, “Ie he um no num God?”
14586	PSA 42:6	Iau haianga habaling iau, “Wara bih no balagu i hung ma ra tapunuk? Wara bih no nugu lilik pai sangeh? Kis nanahai ta God, kanong iau ni pirlat at baak ie, no nugu Ut na Harhalon ma no
14587	PSA 42:7	nugu God.” No balagu i tapunuk, io kaik, iau nigi lik leh ugu, merau Ioridaan, meram hono uluno no uladih Hermon ma mekaia hono uladih Misar.
14590	PSA 42:10	Iau tange ta God no nugu Haatkis, “Warah u gom luban iau? Warah kaik iau nigi tur na sunuah ta ira ngunngutaan diet ing diet malok tagu diet ga ubal iau me?”
14591	PSA 42:11	Ira surugu i kilingane ra tamat na ngunngutaan saakit ing diet ing diet malentakuane iau, diet tangtange haliare iau. Diet tangtange tagu tano kudulena bung bakut bia, “Ie he um no num God?
14592	PSA 42:12	Iau haianga habaling iau, “Wara bih no balagu i hung ma ra tapunuk? Wara bih no nugu lilik pai sangeh? Kis nanahai ta God, kanong iau ni pirlat at baak ie, no nugu Ut na Harhalon ma no nugu God.”
14597	PSA 43:5	Iau haianga habaling iau, “Wara bih no balagu i hung ma ra tapunuk? Wara bih no nugu lilik pai sangeh? Kis nanahai ta God tano uno bilai na harharahut, kanong iau ni pirlat at baak ie, no nugu Ut na Harhalon ma no nugu God.”
14653	PSA 46:11	“Kis matien ma nu nunure bia iau God. Da hatamat iau nalamin ta ira kantri. Da hatamat iau kai tano ula hanuo.”
14705	PSA 50:5	“Lamus hulungen ukai ho iau ira nugu tunotuno ing diet te tar tutun ira udiet nilon tagu, diet ing diet ga gil tiga kunubus tika ma iau ma ra hartabar.”
14707	PSA 50:7	“Ira nugu tunotuno, muat hadoda, ma iau ni ianga. Iau ni hinawas palai ta ira num saksakena, Israel. Iau God, no numuat God.
14715	PSA 50:15	Ma nu tataau tupas iau tano pakana bung na harangunngutaan. Iau ni halon ugu, ma nu pirlat iau.”
14716	PSA 50:16	Iesen ta ira ut na sakena, God i tange, “Wara biha nu tange mur ira nugu harkurai ma nu tange mah bia nu gil haruatne no nugu kunubus?
14723	PSA 50:23	Nong i tar ra hartabar na tanga tahut, i ru iau, ma i tagure no ngaas waing iau nigi hamines no harhalon ta God.”
14753	PSA 52:9	“Iakaiken um no tunotuno nong pai nes bia God aie no auno dadas na barbarahit, iesen ga so nurnuruan ta ira uno tamat na kinewa ma ga hatamat no uno kinkinis na watong ing git halhaliare ira mes!”
14757	PSA 53:2	No ulba i tange narako tano kaatine, “Taie ta God.” Ira udiet nilon i mapus sakasaka ma da miliguruane ira udiet tintalen. Taie tikai i gil no tahut.
14778	PSA 55:7	Iau ga tange bia, “Awai! Ing bia gor mon babagu hoing ra bun, iau gor pupungo laah ma nigi sangeh.
14780	PSA 55:9	Iau gor habir ukatiga tiga subaan na barbarahit, tapaka tano morohiluo ma no baiangin.”
14833	PSA 58:12	Ira tunotuno diet na tange, “Tutun! A mon kunkulaan audiet ira ut na takodas. Tutun! Tiga God kana nong i kure no ula hanuo.”
14841	PSA 59:8	Nes asa diet maruane se ta ira ha diet. A mon sakana nianga ta ira palabulu diet ho ira wise na hinarubu, ma diet tange bia, “Sige tikai i tale bia na hadade dahat?”
14859	PSA 60:8	God i te ianga meram tano uno halhaliana subaan hoken: “Iau te kap taman taar, kaik iau ni palau ira nugu matanaiabar ma no taman Sekem ma ni hapupuo tar no salil Sukot ma ni tar ie ta diet.
14861	PSA 60:10	Moab aie no nugu tultulai wara gisgis ira kakigu. Iau te se tar ira nugu pala lamaas na pinpaas ta Edom wara hamines bia iau te hahirhir ie. Iau te barangang ing iau petlaar Pilistia.”
14905	PSA 64:6	Diet haragat harbasiane diet ta ira udiet lilik wara gil sakena. Diet iangianga wara suhsuhe ira udiet kuun, ma diet tange bia, “Sige i tale bia na nes leh kaike ra kuun?”
14906	PSA 64:7	Diet pingit ira linge ing pai takodas ma diet tange, “Mehet te tagure tar tiga lilik ing i manga tale bia mehet na petlaar ie.” A tutun bia ira lilik ma ira bala diet ira tunotuno i manga kangkonga.
14927	PSA 66:3	Tange ta God, “Pai a malmaliana ira num gingilaan! I manga tamat no num dadas, kaik ira num ebar diet rurungo pas ugu.
14928	PSA 66:4	Ira tunotuno bakut diet la singsinga bukunkek taar taam. Diet inge ra pirharlat ukatiga ho ugu. Diet inge ra pirharlat ukatiga hono hinsaam.”
14965	PSA 68:13	“Ira king ma ira udiet umri diet hilau raurawaan, ma ira hahin kaia na taman diet palau harbasiane diet ma ira linge ira matana ubane diet ga haan talur.
14966	PSA 68:14	Ma diet mah ing diet ga mona taar, diet ga kap ira bun di pulus ira baba diet ma ra siliwa ma ing ira hi diet i pilpilakas ma ra gol.”
14975	PSA 68:23	No Watong i tange, “Iau ni lamus diet maram Basan. Iau ni lamus diet mekaia tano tingena no tes,
14976	PSA 68:24	waing muat ira nugu matanaiabar, muat naga singe ira kaki muat narako ta ira de diet ira numuat ebar, ma ira karamena ira numuat paap diet na mom tumtubungur.”
15030	PSA 70:5	Iesen diet bakut ing diet silsilihe ugu, i tahut bia diet na guama ma diet na laro taam. Diet ing diet kalak no num harhalon, i tahut bia diet na tangtange hatikane bia, “Da bul haut God!”
15042	PSA 71:11	Diet tange, “God i te haan talur ie. Da hilau mur ie ma da palim kahei, kanong taie tikai na harahut ie.”
15086	PSA 73:11	Diet tange, “God pai tale bia na nunure leh ira udahat gingilaan. Aie Nong i Naliu Harsakit, pa na nes tupas leh.”
15111	PSA 74:8	Narako ta ira bala diet, diet ga tange bia, “Mehet na bu hasur hatikane diet.” Diet ga tun bakut ira katon tano numehet hanuo ing het git haarso ma God kaia.
15129	PSA 75:3	U tange bia, “Iau puo ira pakana bung ing ira linge na hanuat. Iau at nong iau la kurkure ira matanaiabar ma ra taktakodas.
15131	PSA 75:5	Iau tange tar ta ira ut na latlaat, ‘Waak muat ra latlaat,’ ma ta ira ut na sakena, ‘Waak muat hamines ira amuat baso.
15132	PSA 75:6	Waak muat hamines ira amuat baso uram ra ula mawe. Waak muat sa butbut huo.’”
15158	PSA 77:8	“Hohe, no Watong na malok se hatikane iau? Pa na hamines ta bilbilai baling at um?
15160	PSA 77:10	Hohe, God i te lik luban se no uno harmarsai? Ma tano uno ngalngaluan, na rahi pukus no uno marmaris?”
15161	PSA 77:11	Io, iau ga tange, “No nugu lon i tirih hoken: iau pai nes habaling um no dadas ta Nong i Naliu Harsakit hoing nalua.”
15190	PSA 78:19	Diet ga ngurungur taar ta God, diet gaam tange, “I tale bia God na bul hawaat ta nian kai ra hanuo bia?
15191	PSA 78:20	Ing ga lawat no haat, no taah ga raronga suur, hoing ira laman taah di hasapang. Iesen i tale bia na tabar mah dahat ma ra nian? I tale bia na tar ginama mah ta ira uno matanaiabar?”
15253	PSA 79:10	Wara bih bia ira hunhuntunaan ta ira mes na hanuo diet na tange, “Ie he no udiet God?” Mehet sip bia het na nes ing nu balu kaike ira kantri uta ira de diet ira num tultulai ing ga saal.
15283	PSA 81:7	“Iau ga kap se no tinirih ta ira kalkale diet. Iau ga lapus ise ira lima diet ta ira udiet tirihuana kinakap mah.
15293	PSA 81:17	Iesen iau gor tabar muat ma no bilai na wit saakit, ma muat gor hahos mah ma ra tiri na imara mekaia hono haatkis.”
15295	PSA 82:2	Ma i tange, “Na haruat hunanges ing muat na hok diet ing diet pai gil ira takodasuana magingin, ma haruat um hunanges bia muat na tur taar tano palpal ta ira ut na sakena?
15299	PSA 82:6	Iau ga tange, ‘A god muat.’ Muat ira natine Nong i Naliu Harsakit.
15300	PSA 82:7	Iesen muat na maat hoing ira tunotuno mon. Muat na puko suur hoing ira kaba lualua bakut.”
15306	PSA 83:5	Diet tange, “Mai, dahat gi haliare diet no kidilona huntunaan Israel, waing daga lik luban hatikane no hinsang Israel.”
15314	PSA 83:13	ing dal ga tange, “Dahat gi kap leh no bilai na pise tane God wara udahat.”
15368	PSA 87:4	God i tange, “Iau ni was halaka Isip ma Babilon nalamin ta diet ing diet nunure iau. Ma uta ira matanaiabar meras Pilistia ma Taia ma Itiopia mah, iau ni tange bia, ‘I hoing bia diet ira so taman me Ierusalem.’”
15369	PSA 87:5	Io, da tange hoken uta Ierusalem: “Iakanin ma iakan, diet ira huntunaan bakut ira uno, ma Nong i Naliu Harsakit, aie at na hatur hadadas ie.”
15370	PSA 87:6	Ing no Watong na pakat kahe ira hinsa diet ira huntunaan, na tange bia, “Diet bakut ira so taman me Ierusalem.”
15371	PSA 87:7	Tano pakana bung bia diet inge ma diet mangata, diet na tange bia, “Ierusalem, augu no burena ta ira nugu bilai na linge bakut.”
15394	PSA 89:4	U ga tange bia, “Iau te gil tiga kunubus tika ma nong iau te gilamis leh ie. Iau te kubus nianga taar ma Devit no nugu tultulai, iau gaam tange hoken:
15395	PSA 89:5	‘Iau ni hakisi hatikane tar no num huntunaan, ma iau ni hatur hadadas no num kinkinis na king ma pana le pataam.’”
15410	PSA 89:20	Tiga pakaan u ga ianga narako tiga barbarien, u ga tange hoken ta diet ing diet la murmur ugu: “Iau te tar baso ta tiga umri. Iau te raun haut tiga marawaan mekaia nalamin ta ira matanaiabar.
15417	PSA 89:27	Na tataau ukai ho iau, ‘Augu no ragu Sus, no nugu God, ma no nugu Haatkis nong i halon iau.’
15421	PSA 89:31	“Ing bia ira natine, diet na waak kapis ira nugu harausur ma diet pa na mur ira nugu harkurai,
15428	PSA 89:38	Na tur hatika taar hoing no teka, nong i la kiskis aram ra mawe wara hamines bia iakan i tutun.”
15446	PSA 90:3	U kios ira tunotuno, diet gi hanuat kaabus baling, ma u tange bia, “Muat na tapukus baal taar ra kaabus, muat ing muat ira tunotuno mon.”
15462	PSA 91:2	Iau ni tange tano Watong, “Augu no nugu subaan na munmun ma no nugu ut na harbalaurai. Augu no nugu God. Iau so no nugu nurnuruan taam.”
15469	PSA 91:9	Ing bia u kilam no Watong Nong i Naliu Harsakit bia, “No nugu subaan na munmun,” ma bia i te hanuat no num katon na barbarahit,
15474	PSA 91:14	No Watong i tange, “Iau ni halon ie kanong i kalak iau. Iau ni balaure bat ie kanong i nes kilam no hinsagu.
15476	PSA 91:16	Iau ni haguama ie kanong ni halawaas no uno nilon. Ma ni hamines no nugu harhalon tana.”
15492	PSA 92:16	Io kaik, diet na tangtange bia, “No Watong i takodas. Aie no nugu Haatkis, ma taie tiga saksakena tana.”
15504	PSA 94:7	Diet tange bia, “No Watong pai la nes tar. No God ta Iakop pai nuang leh.”
15515	PSA 94:18	Ing iau tange bia, “No kakigu i malmalagir,” Watong, no num harmarsai i sukal haut tar iau.
15530	PSA 95:10	Ga haruat ma ra ihat na sangahul na tinahon iau ga ngalngaluan taar ta kaike ra matanaiabar. Ma iau ga tange bia, “Ira bala diet iakanong ra matanaiabar i la hanhan talur iau, ma diet pai palai tano mangana ngaas iau sip bia diet na mur.”
15531	PSA 95:11	Io kaik, iau ga ngalngaluan, iau gaam hasasalim bia, “Diet pana le tale tunat bia diet na sola tano nugu sinangeh.”
15541	PSA 96:10	I tahut bia muat na hinawas nalamin ta ira kantri bia, “No Watong i kap taman taar.” No ula hanuo i kis dikdikit taar. Pai tale bia na gunagune. No Watong na kure ira matanaiabar bakut ma ra takodasiana harkurai.
15612	PSA 102:25	Io huo, iau tange bia, “Nugu God, waak baak u kutus kotne no nugu nilon. U lon hathatika.
15684	PSA 105:11	gaam tange bia, “Iau ni tar no pise Kenan taam, ma ira num bulumur diet na tinanei.”
15688	PSA 105:15	“Waak muat ra singsigire ira nugu matanaiabar ing iau ga pilak diet, ma waak muat hagahe ira nugu tangesoot.”
15766	PSA 106:48	A pirhakasing tupas no Watong, no God ta Israel, mekatiga laah menalua tano hamhaburen tano ula hanuo tuk taar tano hauhawatine ma pana le pataam. I bilai bia ira matanaiabar bakut diet na tange, “Amen!” Pirlat no Watong.
15817	PSA 108:8	God i te ianga meram tano uno halhaliana subaan hoken: “Iau te kap taman taar, kaik iau ni palau ira nugu matanaiabar ma no taman Sekem ma ni hapupuo no salil Sukot ma ni tar ie ta diet.
15819	PSA 108:10	Moab aie no nugu tultulai wara gisgis ira kakigu. Iau te se tar ira nugu pala lamaas na pinpaas ta Edom wara hamines bia iau te hahirhir ie. Iau te barangang ing iau petlaar Pilistia.”
15855	PSA 110:1	No Watong ga tange ta nagu Watong: “Nu kap no tamat na kinkinis kai tano kata na limagu, tuk iau ni bul hasur ira num hiruo napu, hoing tiga linge na bul kakim!”
15858	PSA 110:4	No Watong i te hasasalim, ma pa na kios no uno lilik, gaam tange hoken: “No num pinapalim na lamus tunotuno tupas iau na tur hatikai, haruat tano pinapalim na lamus tunotuno tupas iau ing Melkisedek ga gilgil.”
15900	PSA 115:2	Wara biha bia ira hunhuntunaan ta ira mes na hanuo diet tange bia, “Ie he no udiet God?”
15920	PSA 116:4	Io, iau ga tataau um tupas no Watong hoken: “Watong, halon iau!”
15926	PSA 116:10	Iau ga nurnur, kaik iau gaam tange, “A tamat na tinirih te ubal tar iau.”
15927	PSA 116:11	Iau ga burut, kaik iau gaam tange bia, “Ira tunotuno bakut, a ut na harabota diet.”
15939	PSA 118:2	I tahut bia Israel na tange bia, “No uno harmarsai i kis hathatika.”
15940	PSA 118:3	I tahut bia no huntunaan ta Aaron na tange bia, “No uno harmarsai i kis hathatika.”
15941	PSA 118:4	I tahut bia diet ing diet burte no Watong diet na tange bia, “No uno harmarsai i kis hathatika.”
16048	PSA 119:82	Ira matagu i te manga tirih wara ninaas bia nu gil haruatne ira num nianga na kunubus. Iau tange hoken, “Hunanges um nu habaraam iau?”
16158	PSA 122:1	Iau ga guama ing di ga tange tagu bia, “Dahat gi haan ukatiga tano hala na lotu tano Watong.”
16163	PSA 122:6	Sasaring utano malum ta Ierusalem hoken: “Sige ing diet kalak ugu, iau sip bia diet na lon timaan.
16164	PSA 122:7	Na tahut bia na mon malum narako ta ira num balo ma ra harbalaurai timaan mah.”
16165	PSA 122:8	Iau ni tange tiga nianga ta Ierusalem wara gaiena ira tasigu ma ira nugu harwis, ma i hoken, “A malum na kis taam.”
16171	PSA 124:1	“Gor ngan hohe ing bia no Watong pa gate tur wara harharahut dahat?” Na tahut bia Israel na tange habaling hoken:
16172	PSA 124:2	“Gor ngan hohe ing bia no Watong pa gate tur wara harharahut dahat tano pakana bung ing ira tunotuno diet ga tut na hinarubu ma dahat?
16175	PSA 124:5	No tektek gor salirane dahat.”
16185	PSA 126:2	Dahat ga manga kurus ma ira ha dahat, ma dahat ga inge ma ra tamat na gungunuama ma ira karame dahat. Io, di ga hinawas harbasia ta ira mes na kantri, “No Watong te gil ra tamat na linge wara udiet.”
16201	PSA 129:1	“Di gate helar tagu ing iau ga marawaan taar tuk taar kaiken.” Na tahut bia Israel na tange habaling hoken:
16202	PSA 129:2	“Di gate helar tagu ing iau ga marawaan taar tuk taar kaiken. Iesen diet pai ga petlaar bia diet na paas hasur iau.
16204	PSA 129:4	Iesen no Watong i takodas. I te kut palas ise iau tano winiwis ta ira ut na sakena.”
16208	PSA 129:8	Ma taie tikai nong na haan saakit na tale bia na tange bia, “No Watong na haidane ugu! Mehet haidane ugu tano hinsana no Watong.”
16222	PSA 132:3	“Iau pa ni laka tano nugu hala bia ni haan taar tano nugu suuh na ninahon,
16224	PSA 132:5	tuk bia ni silihe tar tiga katon bia no Watong, no Dadas na God tane Iakop, i tale bia na kis kaia.”
16226	PSA 132:7	Dahat ga tange bia, “Dahat gi haan uram hono katon i la kiskis kaia. Dahat gi lotu kaia ra pinpaas na kakine.”
16230	PSA 132:11	No Watong ga sasalim taar tane Devit, a tutun na sinsalim ie nong pa na kutus ie, ma i hoken: “Tikai ta ira num bulumur tus iau ni bul ie tano num kinkinis na king.
16231	PSA 132:12	Ing bia ira num bulumur diet na mur haruatne no nugu kunubus ma ira harkurai ing iau ni hausur diet ine, io, ira udiet bulumur diet na kis hathatikai tano num kinkinis na king.”
16233	PSA 132:14	hoing ga tange, “No taman iakan ing iau ni kis hatika tana. Iau ni kis kaiakai kanong iau manga sip huo.
16237	PSA 132:18	Iau ni manga hamalahuan ira uno ebar, iesen no uno kinkinis na king na bilai ma na tur dadas.”
16293	PSA 137:3	kanong diet ing diet ga palim kahe dahat, diet ga tange hadadas bia dahat na inge kaia. Diet ga kukutur ta dahat, diet gaam hatitis dahat bia dahat na inge ira ninge na gungunuama. Diet ga tange bia, “Muat na inge tiga ninge uta Saion ta mehet!”
16297	PSA 137:7	Watong, lik tar asa ing ira Idom diet ga gil tano bung di ga dure hasur Ierusalem. Diet ga kakonga bia, “Dure hasur ie! Dure hasur ie ures muk ta ira burena!”
16318	PSA 139:11	Ing bia iau tange, “Tutun saakit, no kankado na suhe iau ma no madaraas na hanuat kankado tano bung ma na luhutane iau,”
16338	PSA 140:7	Iau tange tano Watong bia, “Augu no nugu God. Watong, hadade no nugu tintaau wara gaiena harmarsai.
16352	PSA 141:7	Diet na tange, “Hoing tikai i rurup ma i rupukane haut ira haat tano pise, huo mah, ira suru dahat i te noh harbasia taar ing pa di ga bus.”
16361	PSA 142:6	Watong, iau suah ukaia ho ugu. Iau tange, “Augu no nugu barbarahit. Augu no pinlawegu kai ra taman audiet ira lilona.
23233	MAT 1:20	Bia Iosep ga lilik ta iakan ra linge, tiga angelo gar tano Watong ga harapuasa taar tana tano uno barbarien, ma ga tange, “Iosep, no bulumur ta Dawit, waak u burut wara lamlamus leh Maria wara num hahin. Warah, iakanong i tianan taar mei, aie makaia tano Halhaliana Tanuo.
23234	MAT 1:21	Ma na kaha tiga bulu na tunaan ma nu pas no hinsana bia Jisas. Ma no kukuraina tano hinsaang Jisas a ut na halon. Kaik na halon ira uno matanaiabar sukun ira udiet magingin sakena.”
23236	MAT 1:23	“Tiga lala na hahin, nong pai noh tika baak ma tiga tunaan, na tianan ma na kaha tiga bulu na tunaan, ma da kilam ie bia ‘Emanuel,’” no kukuraina bia, ‘God i la kis tika taar ma dahat.’
23240	MAT 2:2	Ma dal ga tiri, “Ie he um no bulu nong di te kahai bia na tamat na lualua na gil harkurai gar na Iudeia? Mehet ga nas no uno tiding marau ra kasakes i la hanhanut makaia. Ma mehet hanuat bia mehet na lotu tana.”
23242	MAT 2:4	Io, Herot ga tau hulungan ira tamat na ut na pakila lotu ma ira tena harausur ta ira harkurai tane Moses, gom tiri diet bia, “Da kaha no Krais he?”
23243	MAT 2:5	Diet ga balui, “Arau Betlehem, kai Iudeia. Hokaik no tangesot i te pakat tar huo,
23244	MAT 2:6	‘Betlehem, tano hanuo Iudeia, pau manga hansiksik ta ira bilai na taman ta Iudeia, kanong makaia at ho ugu tiga lualua na hanuat nong na lue ra nugu matanaiabar Israel.’”
23246	MAT 2:8	Ma ga tule se dal urau Betlehem ma ga tange ta dal, “Muat na nanaas timaan tano nat na bulu. Ma bia muat te nas tupas leh ie, muat na hinawase iau. Io kaik, iau mah, nigi haan wara lotu tana.”
23249	MAT 2:11	Ma bia dal ga haan laka tano hala, dal ga nas no nat na bulu dir ma no pawasine, ne Maria. Ma dal ga singa bukunkek ma dal ga lotu tana. Io, namur dal ga papos ira udal bunbulaan ma dal gom tar ira udal hartabar tana—a gol, a mangana kaabus ing ira mis tana i la huhur timaan, ma ra waiwai.
23251	MAT 2:13	Io, manamur bia dal gate haan, tiga angelo gar tano Watong ga hanuat gaam habarbarien ne Iosep, gaam tange, “Nu tut ma nu lamus no bulu ma no pawasine, ma mutal na hilau urau Isip kanong Herot na sisilih tano nat na bulu wara bubu bing ie. Ma mutal na kis kaia tuk iau ni hinawase ugu wara minaren.”
23253	MAT 2:15	Ma dal ga kis kaia tuk Herot ga maat. Ga ngan huo wara pakpakile haruatne hoing no Watong ga tange tano tangesot hoken: “Iau ga tau leh no natigu tunaan me Isip.”
23256	MAT 2:18	“Dahat te hadade a ingana tiga nong aram Rama hutet Betlehem. A sunuah ma a tamat na tapunuk. Ira hatatnaan na Israel diet susuah pane ira nati diet, ma i malok bia da haiau ie, kanong diet te maat bakut.”
23258	MAT 2:20	Ma ga tange, “Nu tut ma nu lamus leh no nat na bulu ma no pawasine, ma mutal na tapukus uram Iudeia kanong ing diet ga walar bia diet na bu bing no nat na bulu, diet te maat.”
23261	MAT 2:23	Ma ga kis tano taman di la kilkilam ie bia Nasaret. Ga ngan huo wara pakpakile haruatne hoing God ga tange ta ira tangesot hoken, “Da kilam bia a lup Nasaret ie.”
23263	MAT 3:2	Ma ga harpir kaia, “Muat na lilik pukus se ira numuat magingin sakena kanong no pakana bung tano kinkinis na harkurai ma ra harbalaurai ta God i te hutet.”
23264	MAT 3:3	Ma ne Jon no tunotuno nong no tangesot Aisaia ga iangianga utana hoken, “Meram ra hanuo bia a ingana tiga nong i taatau, ‘Tagure no ngaas tano Watong, Gil hatakodas ie wara uno hinanhuat.’”
23268	MAT 3:7	Ma bia Jon ga nes a haleng na Parisi ma Sadiusi diet ga hanhanuat ukaia ho ie wara kap baptais, ga tange ta diet, “A sakana ut na harabota muat! Sige ga hakatom muat bia muat na hilau sukun no harpidanau nong God i hutet bia na tar ie?
23272	MAT 3:11	“Io, tikai na hanuat namur tagu ma i tamat tagu. Iau pai haruat bia ni kap ira pupunaak na kakine. Iau baptais muat tano taah wara hapuasne bia muat te lilik pukus. Aie na baptais muat ma no Halhaliana Tanuo, ma ra iaah mah.
23273	MAT 3:12	Ma i palim tar no uno sawol wara sese haut ira wit tano dadaip nong na puh se ira suruno ma ira parahona. Iesen ira tahut na pat na wit ing diet tirih ma diet puko suur, na reng hulungen ukai hora uno suuh na masur. Ma na se tar ira suruno ma ira parahona tano iaah kis.”
23275	MAT 3:14	Iesen Jon ga walar bia na tigal ie, gaam tange, “I takodas bia augu, nu baptais iau. Ho bibih u hanuat bia ni baptais ugu?”
23276	MAT 3:15	Ma Jisas ga balui, “Nu haut leh mon baak iakan kaiken. I tahut bia dar na gil haruatne ira linge ing God i te bul bia i takodas.” Io, Jon um gaam haut.
23278	MAT 3:17	Ma di ga hadade a ingana tiga nong ga ianga suur meram ra ula mawe gaam tange, “Iakanin no Natigu, nong iau manga sip ie ma iau kanakana sakit tana.”
23281	MAT 4:3	Ma Sataan, no ut na harwalaam, ga hanuat gaam tange ta Jisas, “Kaia, ing bia a Nati God ugu, nu tange ta ke ra haat bia diet naga taar nian.”
23282	MAT 4:4	Iesen Jisas ga balui, “Tiga harkurai gar ta God di ga pakat ie wara gaie mehet ira matanaiabar i tange bia, ‘Ira tunotuno diet pa na lon tano nian sen mon. Diet lon ta ira nianga i hanan suur tano hane God.’”
23284	MAT 4:6	Sataan gom tange tana, “Bia ing a Nati God ugu, kaia, nu karwas suur, kanong ira nianga tane God ing di ga pakat ie i tange hoken, ‘God na tule ira uno angelo wara utaam, diet na palim hatur ugu ma ira lima diet, waing pa nu sage ira kakim ra ula haat.’”
23285	MAT 4:7	Jisas ga balui, “Tiga harkurai gar ta God di ga pakat ie wara gaie mehet ira matanaiabar i tange bia, ‘Waak muat walar no Watong, no numuat God.’”
23287	MAT 4:9	Ma Sataan ga tange tane Jisas, “Kaike bakut iau ni tar se taam ing bia nu singa bukunkek ma nu lotu tupas iau.”
23288	MAT 4:10	Jisas ga tange tana, “Sataan, haan laah! Tiga harkurai gar ta God di ga pakat ie wara gaie mehet ira matanaiabar i tange mah hoken, ‘Muat na lotu tupas no Watong no numuat God, ma aie sen mon muat na hanapu muat tana.’”
23293	MAT 4:15	“Muat tano hanuo Zebulon ma Napitali, muat tano ngasur ures ra tamat na taah kom, ma muat kaia ra gagena taah Ioridaan, ma muat mah tano hanuo Galili uta diet pai Iudeia,
23294	MAT 4:16	muat ira matanaiabar ing muat la kiskis ra kankado, muat te nas a tamat na lulungo; ma muat ing muat la kis taar tano hanuo tano henai na minaat, tiga lulungo te hapalai muat.”
23295	MAT 4:17	Tur leh ta iakano pakana bung Jisas ga harharpir hoken: “Muat na lilik pukus se ira numuat magingin sakena kanong no pakana bung tano kinkinis na harkurai ma ra harbalaurai ta God iakanik.”
23297	MAT 4:19	Ma Jisas ga tange ta dir, “Bia mur na mur iau ma ni hausur mur wara soh tunotuno.”
23306	MAT 5:3	“Diet daan ing diet nunure bia diet manga supi ira linge meram ho God, kanong diet na sola tano kinkinis na harkurai ma ra harbalaurai ta God.
23316	MAT 5:13	“Muat hoing ira sol uta ira tunotuno. Sen bia ing i pataam ira dadas wara harahut tano sol, no uno dadas na hanuat balin hohe? Pai tale. I te linge bia um. I tale bia da sei ma da papasuane um ie.
23317	MAT 5:14	“Muat hoira lulungo uta ira tunotuno. Io, tiga pise na hala aram ra uladih pai tale bia na mun.
23320	MAT 5:17	“Pai tahut bia muat na lik bia iau te hanuat wara kapkap se ira harkurai tane Moses ma ira harausur ta ira tangesot. Iau pai hanuat bia ni kap se, sen bia iau te hanuat bia ni hatutun diet.
23324	MAT 5:21	“Muat gate hadade nong no harkurai tane Moses ga tange ta ira hintubu muat. Ga tange bia, ‘Muat pa na bu bing bia tiga tunotuno.’ Ma di ga tange mah, ‘Tiga nong i bu bing bia tiga tunotuno i tale mah bia da bul ie ra harkurai.’
23325	MAT 5:22	Sen iau at, iau tange ta muat bia sige tikai i ngalngaluan taar ta tiga hinsakana, i tale bia da lamus tar ie ra harkurai tano komiti. Ma bia sige tikai ing na tange taar tano hinsakana bia, ‘Ba ugu!’, io, i tale bia da lam tar ie tano harkurai tano kaunsil. Ma sige tikai ing na kilam no hinsakana bia, ‘A ba sokopi ugu!’ na tale mah bia na haan taar tano ula iaah.
23326	MAT 5:23	“Io kaik, ing bia u wara tartar no num hartabar tane God aram tano suuh na bul hartabar, ma u lik leh ira bala ngungut ing no hinsakaam ga gil taam, nu waak ta baak no num hartabar, nu tapukus balin, mur naga haratakodas ma no hinsakaam. Namur um, nu tapukus ma nu tar no num hartabar tane God.
23328	MAT 5:25	“Bia no hinsakaam i wara kapkap tar ugu ra harkurai, mur na haratakodas gasien mei ing bia mur hanahaan baak na ngaas. No hinsakaam kabi tar ugu tano ut na harkurai, ma no ut na harkurai na tar ugu ta nong i la balaure tar diet ing di ga wis kawase diet narako tano hala na harpidanau, ma aie na bul halaka ugu ra hala na harpidanau.
23330	MAT 5:27	“Muat gate hadade mah nong no harkurai tane Moses i tange bia, ‘Waak u noh tika ma tikai pai a num ie.’
23332	MAT 5:29	“Kap se ira lilik ing na harango no num nilon. Tiga malalar hoken. Bia tiga mataam i harongane ugu, nu luar sei. I tahut dahin bia tiga subaan tano tamaim na panim laah. Sen bia pai manga tahut bia da ise no tamaim bakut tano ula iaah.
23333	MAT 5:30	“Tiga malalar mah hoken. Bia no kata na limaam i harango ugu, nu kato kutus isei. I tahut dahin bia tiga subaan tano tamaim na panim laah. Sen bia pai manga tahut bia no tamaim bakut na haan taar tano ula iaah.
23334	MAT 5:31	“Muat gate hadade mah no harkurai tane Moses i tange bia, ‘Bia sige tikai i se no uno hahin, na pakat ta nianga palai utano udir palas tinolen ma na tar ie tano uno hahin.’
23336	MAT 5:33	“Muat gate hadade mah nong no harkurai tane Moses ga tange ta ira tubu muat. Ga tange bia, ‘Waak u sasalim harabota. Nu hatutun ira num sinsalim uram hone God.’
23341	MAT 5:38	“Muat gate hadade nong no harkurai tane Moses i tange bia, ‘Ing bia u tut luar se no kalora matana tikai, da tut luar se mah tiga kalora mataam. Ma ing bia u tut dik se tiga pat na ngisena tikai, da tut dik se mah tiga pat na ngisem.’
23346	MAT 5:43	“Muat gate hadade mah no harkurai tane Moses i tange bia, ‘Nu marse tikai.’ Ma di ga tange mah bia, ‘Malentakuane ira am suk.’
23352	MAT 6:1	“Muat na harbalaurai bia waak muat pakile ira numuat tahut na tintalen tupas ne God taar ra matmataan ta ira matanaiabar waing diet na nas muat. Io, bia muat na gil huo, na pataie ta hunena ira numuat mangason ing na hanuat meram ra amuat Sus aram ra mawe.