13949	PSA 1:6	Kanong warah, no Watong i la nesnes mur no mangana hinahaan audiet ira ut na takodas, iesen no mangana ngaas na nilon audiet ira ut na sakena na pataam hatika.
13954	PSA 2:5	Kaik gi boor diet ma no uno ngalngaluan, ma i haramramin diet ma no uno nginangar, ma i tangtange,
13956	PSA 2:7	No King i hinawas tano dadas na nianga tano Watong. Ga tange tagu, “Augu no Natigu. Katin iau te hanuat no raam Sus.
13982	PSA 5:3	Hatarame ira nugu tintaau wara harharahut, nugu King ma nugu God, kanong iau sasaring tupas ugu.
14036	PSA 9:5	Kanong warah, u te tur tano nugu palpal ma ira num gil harkurai. U te kis aram tano num kinkinis na harkurai, ma u harkurai ma ra taktakodas.
14067	PSA 10:15	Kutus no dadas tano ut na sakena. Kurei ta ira uno magingin sakena tuk bia pa nu nes leh habaling a mon sakena.
14072	PSA 11:2	Kanong warah, ira ut na sakena diet te taguro taar wara laplapot. Diet te bul tagure ira udiet rumus taar tano hinau na laplapot wara laplapot mekaia ra kankado diet ing ira kaati diet i gamgamatien.
14077	PSA 11:7	Kanong warah, no Watong i takodas. I manga sip ira takodasiana magingin. Ira ut na takodas, diet na nes no matmataan tana.
14115	PSA 16:11	U te hapalaine iau ta ira ngaas na nilon. Kaia ra matmataan taam, nu hahungi iau ma ra gungunuama, ma katiga hono kata na limaam, nu hahungi iau ma ra kanakana nong pana le pataam.
14152	PSA 18:22	Kanong warah, iau te mur ira ngaas tano Watong. Iau pai le gil ta nironga be ni tar tihigu tano nugu God.
14162	PSA 18:32	Kanong warah, no Watong sen mon aie no God. Taie tiga mes. Ma sige mah um no Haatkis? Taie tiga mes. No udahat God sen mon.
14196	PSA 19:15	Iau sip bia ira nianga mekai ra hagu ma ira lilik aram tano balagu na nasnas maririsuan tano num matmataan, Watong, no nugu Haatkis, ma no nugu Ut na Kul Halangalangai.
14203	PSA 20:7	Kaiken um iau nunure be no Watong i halhalon no tunotuno nong i te gilamis tar ie. I taram ie meram hono uno halhaliana sibaan ram ra mawe, ma na halon ie ma no dadas tano kata na limana.
14214	PSA 21:8	Kanong warah, no king i so tar no uno nurnuruan tano Watong. Pa na gunagune kanong no harmarsai ta Nong i Naliu Harsakit pa na pataam.
14219	PSA 21:13	Kanong warah, nu gil diet be diet na talingaan tapukus ing nu tulus diet ma no num laplapot.
14224	PSA 22:4	Iesen di nes kilam ugu bia no udiet King, kanong augu at u halhaal nong ira Israel diet pirpirlat ugu.
14245	PSA 22:25	Kanong warah, pai malentak ma pai tar tihine ta ira ngunngutaan ta diet ing diet kaha tinirih. Pai suhe no matmataan tana ta diet iesen i taram diet ing diet tataau wara harharahut.
14249	PSA 22:29	kanong no Watong, aie no King, ma i kure bakut tar ira kantri.
14256	PSA 23:4	Ing mah bia iau haan narako tano kankado na salil na minaat, iau pa ni burte tiga saksakena. Kanong warah, u sakate iau. No num kapsil ma no num buko na harharahut, dir habalaraan tar iau.
14260	PSA 24:2	Kanong warah, no Watong at ga hakisi no ula hanuo narako ta ira tes, ma ga hatur mah ie naliu ta ira taah.
14265	PSA 24:7	Muat ira matanangaas, tapapos! Muat ira matanangaas menalua saakit, tamapapos, waing no King nong a tamat no minarine na me haan laka.
14266	PSA 24:8	Sige iakan ra King nong i tamat no minarine? No Watong nong a dadasinei ma ana tamat na baso, no Watong nong ana mon tamat na dadas wara hinarubu.
14267	PSA 24:9	Muat ira matanangaas, tapapos! Muat ira matanangaas menalua saakit, tamapapos, waing no King nong i tamat no minarine na me haan laka.
14268	PSA 24:10	Ma sige ie, iakano King nong i tamat no minarine? No Watong Nong i Dadas Harsakit. Aie no King nong i tamat no minarine.
14293	PSA 26:3	Kanong warah no num harmarsai i la kis hatika taar menalua tagu, ma iau la lalon ta ira num ngaas i tutun.
14301	PSA 26:11	Iesen iau, iau mur ira takodasiana ngaas. Kul halangalanga iau ma nu marse iau.
14316	PSA 27:14	Kis kawase no Watong. Nu dadas ma nu balaraan taar. Masa, nu kis kawase no Watong.
14333	PSA 29:8	No ingana no Watong i la gungune no hanuo bia. No Watong i gune Kades, no tamat na hanuo bia.
14342	PSA 30:6	Kanong warah no uno ngalngaluan i la kiskis dahin mon, iesen no uno bala malum i la kis hatika taar tano num kudulena nilon bakut. A sunuah i haruat be na kis mon ma tiga bung ra bung, iesen no gungunuama i la hananuat ra malaan.
14355	PSA 31:6	Iau tar se no tanuagu ukatiga tano limaam. Kul halangalanga iau, Watong, augu no God ta ira tutun.
14365	PSA 31:16	Ira nugu pakana bung na nilon ke ta ira limaam. Kap sare iau ta ira nugu ebar, diet ing diet paspasak iau.
14378	PSA 32:4	Kanong warah, ra bung ma ra kasakes no limaam ga tirih naliu tagu. Ira nugu dadas ga pataam hanahaan hoing i ngan huo tagu ing no mamahien na kasakes i rang iau.
14389	PSA 33:4	Kanong warah, no nianga tano Watong i takodas ma i tutun. Ira linge bakut i gil, i tale bia da nurnur ine.
14432	PSA 35:2	Kap leh no bahbahit ma ira linge na hinarubu. Taman tut ma nu hanuat wara harharahut iau.
14439	PSA 35:9	Kaik um, no tanuagu na guama tano Watong, ma iau ni kanakana tano uno harhalon.
14461	PSA 36:3	Kanong warah, i nes hatamat ie ma ira iruo matana tus, kaik, pa na nes kilam ma pa na malentakuane ira uno sakana magingin.
14463	PSA 36:5	Kaia mah tano suhuno i la pingpingit sakena. I la tartar habaling tar ie ra sakana ngaas, ma pai la malmalok se asa ing pai takodas.
14468	PSA 36:10	Kanong warah, ie ke ho ugu no puat na nilon. Tano num lulungo het nes ra madaraas.
14480	PSA 37:9	Kanong warah, sige ing diet kis nanaho tano Watong, diet na tinane leh no pise hoing ra pinlawe diet, iesen no Watong na pasak hasur ira ut na sakena.
14488	PSA 37:17	Kanong warah, no dadas tano ut na sakena na pataam, iesen no Watong na hatur hadadas no ut na takodas.
14498	PSA 37:27	Tahurus talur ra sakena ma nu gil ra bilai. Kaik, nugu lon hatika tano uno taman.
14499	PSA 37:28	Kanong warah, no Watong i sip ira ut na takodas, ma pa na haan sukun diet ing diet te tar tutun ira udiet nilon tana. No Watong na balaure bat hatikane diet, iesen na pasak hasur se ira nati diet ira ut na sakena.
14505	PSA 37:34	Kis kawase no Watong, ma nu mur no uno ngaas. Na raun haut ugu wara tintinane leh no pise. Nu nes ma ira mataam ing no Watong na pasak hasur ira ut na sakena.
14529	PSA 38:18	Kanong warah, i hutet bia ni puko, ma no nugu ngunngutaan i la kis hatika taar ma iau.
14538	PSA 39:4	Aram narako tagu no balagu ga mamahien. Ma ing iau ga kis matien taar ma ra lilik, no iaah ga iaiaan. Kaik um, iau gaam ianga ma no hagu hoken:
14545	PSA 39:11	Kap se no num harpidanau tagu. No harpasar tano limaam i te ubu hasur iau.
14561	PSA 40:13	Kanong warah, a saksakena ing i kalkalala bia da was, i luhutane iau. Ira nugu magingin sakena i te burung iau ma pai tale iau bia ni nanaas. Diet manga haleng saakit ta ira higu tano ulugu. Ma no kaatigu i te rurungo aram narako tagu.
14586	PSA 42:6	Iau haianga habaling iau, “Wara bih no balagu i hung ma ra tapunuk? Wara bih no nugu lilik pai sangeh? Kis nanahai ta God, kanong iau ni pirlat at baak ie, no nugu Ut na Harhalon ma no
14592	PSA 42:12	Iau haianga habaling iau, “Wara bih no balagu i hung ma ra tapunuk? Wara bih no nugu lilik pai sangeh? Kis nanahai ta God, kanong iau ni pirlat at baak ie, no nugu Ut na Harhalon ma no nugu God.”
14597	PSA 43:5	Iau haianga habaling iau, “Wara bih no balagu i hung ma ra tapunuk? Wara bih no nugu lilik pai sangeh? Kis nanahai ta God tano uno bilai na harharahut, kanong iau ni pirlat at baak ie, no nugu Ut na Harhalon ma no nugu God.”
14602	PSA 44:5	Augu no nugu King ma no nugu God, nong i kure bia no huntunaan ta Iakop na petlaar ira hinarabu ma ira nuhet ebar.
14615	PSA 44:18	Kaiken bakut ga hanuat taar ta het, iesen mehet pai ga luban ugu, ma het pai lake no num kunubus.
14653	PSA 46:11	“Kis matien ma nu nunure bia iau God. Da hatamat iau nalamin ta ira kantri. Da hatamat iau kai tano ula hanuo.”
14657	PSA 47:3	No Watong Nong i Naliu Harsakit i haruat bia da rui, aie no tamat na King tano ula hanuo bakut!
14661	PSA 47:7	Inge pirharlat tupas God, inge pirharlat. Inge pirharlat tupas no udahat King, inge pirharlat.
14662	PSA 47:8	Kanong warah, God aie no tamat na King tano ula hanuo bakut. Inge tupas ie ma tiga ninge na pirharlat.
14667	PSA 48:3	No uladih Saion i manga tamat ma i nanaas timaan, ma no ula hanuo bakut i guama tana. Hoing no uluno no tamat na uladih Zapon, huo mah no uladih Saion, no pise na hala tano Tamat na King.
14671	PSA 48:7	Kaik at mon diet ga dedar kaia ma ra ngunngutaan hoing tiga hahin a bulu i la papaas ie.
14677	PSA 48:13	Kaia, muat na haan luhutane Saion. Muat na lik murmur timaan ira uno taltalona balo. Muat na nes ma muat na was ira katon na barbarahit aram naliu ine, naga tale bia muat na hinawase diet ing diet na lon tano pakana bung namur.
14679	PSA 48:15	Kanong iakan ra God aie no nudahat God hathatika. Aie na lue dahat kaiken ma ukaia mah hono haphapataam.
14721	PSA 50:21	Kaiken ra linge u te pakile, ma iau kis kunkun taar. U lik bia iau at mon hoing augu. Iesen iau ni boor ugu ma ni tung ugu ra matmataan taam.
14732	PSA 51:9	Kapal sare iau ta ira nugu magingin sakena, ma iau nigi nanaas nunuhuan. Gis iau, ma iau nigi manga ponpon saakit ta ira sinow.
14738	PSA 51:15	Kaik, diet ing diet pai mur harkurai, iau ni hausur diet uta ira num ngaas, ma ira ut na sakena diet na tapukus taar taam.
14744	PSA 51:21	Kaik naga mon takodasiana hartabar, ma a mon hartabar ing di la tuntun hakidilon wara haguama ugu. Kaik daga hartabar ma ra tumatena bulumakau tano num suuh na hartabar.
14771	PSA 54:9	Kanong warah, u te halangalanga iau sukun ira nugu tinirih bakut, ma ira matagu i te nes ira nugu ebar ing di bu bing diet.
14809	PSA 56:14	Kanong warah, u ga kap pukus leh iau ing iau ga wara minaat, ma ing iau ga harsomane iakano tinirih, waing nigi lon ra matmataan taam kai tano madaraas nong i bulo sare ira nilon.
14854	PSA 60:3	God, u te malok se het ma u te bul hasur het. U gate ngalngaluan. Kaiken um, kap pukus habaling leh mehet ukatiga ho ugu!
14863	PSA 60:12	Kanong warah, God, augu at u te malok se tar het, ma pau hanahaan tika ma ira nuhet umri.
14871	PSA 61:6	Kanong warah, u te hadade ira nugu kunubus, God, ma u te hatinaan iau ma ira linge i haruat ma diet ing diet burte ugu.
14904	PSA 64:5	Diet laplapot mekaia ta ira katon na munmunua taar tano tunotuno pai gil ta nironga. Kaik at mon diet laplapot ukaia ho ie ma taie ta bunurut ta diet.
14907	PSA 64:8	Iesen God na lapot diet ma ra rumus. Kaik at mon God na bul hasur diet.
14930	PSA 66:6	Ga pukusane no tes i hanuat mamasina katon na pise. Diet ga haan balos no tes. Kaia, dahat na guama ta God.
14973	PSA 68:21	No nudahat God a God na harhalon ie. No ngaas wara pas minaat i hanuat meram hono Watong Kiskis.
14977	PSA 68:25	God, di te nes um ira tunotuno ing u lamlamus hani diet, diet ing no nugu God, no nugu King, i lamus hani diet uram narako tano uno halhaliana katon na lotu.
14996	PSA 69:8	Kanong warah, iau kahe ira sakana kukutur wara gaiem, ma ra hirhir i te pulus no nugu matmataan.
15003	PSA 69:15	Kap pukus iau ta ira pesa, ma waak u bale tar iau bia ni ruh suur. Halangalanga iau sukun diet ing diet malentakuane iau, hoing u gor soh leh iau mekaia ra lamlamana taah.
15007	PSA 69:19	Hanuat hutet ma nu halon iau. Kap pukus iau sukun ira nugu ebar.
15015	PSA 69:27	Kanong warah, diet la helar ta diet ing u hangungutaan diet, ma diet la iangianga ta ira ngunngutaan audiet ing u hagahe diet.
15022	PSA 69:34	Kanong warah, no Watong i la tartaram ira sinasaring ta ira malahahin, ma pai la malmalentakuane ira uno matanaiabar di ga kubus tar diet ma ra winiwis.
15024	PSA 69:36	Kanong warah, God na halon Ierusalem ma na hatur habaling ira pise na hala gar na Iudeia. Io, ira tunotuno diet na kis kaia ma diet na tinane leh ie.
15033	PSA 71:2	Kap pukus iau ma nu halangalanga iau haruat ma no num magingin takodas. Sa talingaam ukai ho iau ma nu halon iau.
15036	PSA 71:5	Watong Kiskis, iau la kis nanaho ma ra nurnuruan taam. Iau te balaraan taam mekatiga laah ing iau ga marawaan taar.
15047	PSA 71:16	Watong Kiskis, iau ni hanuat ma ni tange hapuasne ira num dadas na gingilaan. Iau ni tange hapuasne ira num magingin takodas sen mon, ma pataie bia tano taktakodas gar ta tiga mes.
15081	PSA 73:6	Kaik huo, diet ruane ra latlaat hoing tiga biar, ma no magingin na harhagawai i sigam diet.
15085	PSA 73:10	Kaik huo, ira matanaiabar diet mur diet, ma diet kanam bakut leh ira udiet nianga.
15103	PSA 73:28	Iesen utagu, i bilai bia iau tur hutet ta God. Iau te nes kilam no Watong Kiskis bia aie no nugu barbarahit. Iau ni hinawas ta ira num gingilaan bakut.
15115	PSA 74:12	Iesen, augu God, no nugu King menalua at. U kap hawaat ra harhalon tano ula hanuo.
15141	PSA 76:4	Kaia ga warat ira lulungo na rumus ing di lalapot me, ira bahbahit ma ira wise, ma ira linge na hinarubu.
15203	PSA 78:32	Ga gil kaiken ra linge bakut, iesen kana at diet ga gilgil ira sakana magingin. Kaiken ra dadas na gingilaan na kinarup ga hanuat, iesen diet pa gale nurnur tana.
15206	PSA 78:35	Diet ga lik habaling leh bia God, aie no udiet Haatkis, ma bia ne God Nong i Naliu Harsakit, aie Nong i Kul Halangalanga diet.
15236	PSA 78:65	Kaik um, no Watong ga tangahun hoing tikai i kubaba taar, hoing tiga dadas na tunotuno i mama wain taar ma i malurau baling um.
15250	PSA 79:7	Kanong diet te kanam kidilon se Israel ma diet te hagahe se mah no numehet taman tus.
15252	PSA 79:9	God, a numehet Ut na Harhalon, harahut mehet, waing daga urur taam. Kap leh mehet sukun diet ing diet haliare mehet, ma lik luban se ira numehet magingin sakena, wara utano hinsaam.
15311	PSA 83:10	Gil ta diet hoing u ga gil ta ira Midian, ma hoing u ga gil tane Sisera ma Jabin kaia tano taah Kison,
15324	PSA 84:4	Watong, Nong u Dadas Harsakit, nugu King ma nugu God, no maankapa balik i te silihe auno tiga hala, ma no saliuliu mah i te gil no posine waing naga pabang kaia hutet tano num suuh na tun hartabar.
15375	PSA 88:4	Kanong warah, no nugu nilon i hung ma ra tinirih ma hutet iau ni maat laah.
15397	PSA 89:7	Kanong sige tikai aram ra mawe da hapupuo tikanei ma no Watong? Sige tikai nalamin ta ira angelo bakut ing i haruat hoing no Watong?