13945	PSA 1:2	Iesen no uno gungunuama aie wara tartaram ira harkurai tano Watong, ma i la liklik murmur ira uno harkurai ra kasakes ma ra bung.
13946	PSA 1:3	Aie hoing tiga ina daha di soi ra gagen taah, nong i la huhuai ta ira uno pakana bung na hunhuai, ma ira pakana pai la mahmahiawa. Ma bia ing i gil ra linge sa, i la manga petlaar at.
13947	PSA 1:4	Iesen ira ut na sakena diet pai hokaiken. Diet hoing ira pala wit ing di te paas parok sukun ira patine, ma no baiangin i puuh se.
13949	PSA 1:6	Kanong warah, no Watong i la nesnes mur no mangana hinahaan audiet ira ut na takodas, iesen no mangana ngaas na nilon audiet ira ut na sakena na pataam hatika.
13951	PSA 2:2	Ira king tano ula hanuo diet te tur taguro ma ira lualua ta ira pise na hala. Diet te hanuat hurlungen wara hinarubu ma no Watong ma nong mah no Watong gate gilamis ie.
13952	PSA 2:3	Diet tange, “Dahat gi rapat se ira udir winwisaan, ma dahat na lapus ise ira udir kuun, dahat naga langalanga.”
13953	PSA 2:4	Nong i la harkurai taar meram ra mawe i kurus. No Watong i hunane diet.
13956	PSA 2:7	No King i hinawas tano dadas na nianga tano Watong. Ga tange tagu, “Augu no Natigu. Katin iau te hanuat no raam Sus.
13957	PSA 2:8	Saring iau ma iau ni tar ira kantri wara pinlawem ma no ula hanuo bakut wara num.
13961	PSA 2:12	Hanapu augu tano Natine, kabi ngalngaluan ma na gil haliare ugu tano num hinahaan, kanong warah no uno bala mamahien i tale bia na tut hut kaik at mon. A haraidaan na kis ta diet ing diet barahit taar menapu ta God.
13963	PSA 3:2	Watong, haleng saakit um diet malentakuane iau! Haleng mah diet tut hut wara hinarubu ma iau!
13967	PSA 3:6	Iau noh suur ma iau kubaba. Iau tangahun baling kanong warah no Watong i hadadas iau.
13968	PSA 3:7	Iau pa ni burte ira sangahul na arip ing diet hanuat luhutane iau wara suksukuane iau.
13974	PSA 4:4	I tahut bia muat na palai bia no Watong i te bul hasisingen wara uno iat diet ing diet te tar tutun ira udiet nilon tana. No Watong na taram ing iau ni tataau uram ho ie.
13975	PSA 4:5	Ta ira numuat ngalngaluan, waak muat gil ta nironga. Ing muat noh taar ta ira numuat suuh, muat na nes gilgilse ira numuat nilon ma muat na kis kunkun.
13978	PSA 4:8	U te hahungi no kaatigu ma ra gungunuama i tamat saakit ta ira udiet gungunuama pane ira udiet wit ma ira sigar wain ing i tamtamat hanahaan.
13982	PSA 5:3	Hatarame ira nugu tintaau wara harharahut, nugu King ma nugu God, kanong iau sasaring tupas ugu.
13983	PSA 5:4	Watong, u hadade no ingagu ra malaan. Ra malaan iau bul hawaat ira nugu sinasaring tar taam ma iau kis nanaho pane ma ra nurnuruan.
13989	PSA 5:10	Pai tale bia da nurnur ta ira nianga ing i suur ta ira ha diet. Ira kaati diet i hung ma ra harhagawai. Ira ha diet i mapus hoing no hurhuraan meram ta tiga midi di rarik tar ie. Ma diet tange ra bis ma ira karame diet.
13990	PSA 5:11	God, tange bia diet ronga! Bale leh diet bia ira udiet harpingit na burena ta ira udiet punuko. Tule isisai ta diet kanong ira udiet magingin sakena i haleng, kanong warah, diet te tur talur ugu.
13991	PSA 5:12	Iesen bale diet ing diet barahit narakoman taam bia diet na laro. Waak diet na inge hatikai ma ra gungunuama. Hakukuh diet ma no num harbalaurai, waing diet ing diet sip no hinsaam, diet naga pirlat ugu.
13994	PSA 6:2	Watong, waak u boor iau ma no num ngalngaluan, ma bia nu hapidanau iau ma no num nginangar.
14002	PSA 6:10	No Watong i te taram no nugu tintaau wara gaiena harmarsai. No Watong i te haut leh no nugu sinasaring.
14009	PSA 7:6	io, waak tar no nugu ebar na pasak mur iau ma na papasa tagu. Waak sei na paas hasur no nugu lon taar tano pise, ma na hainoh no palatamaigu tano kaabus.
14010	PSA 7:7	Watong, taman tut ma no num ngalngaluan. Tut hut wara hinarubu ma no nginangar ta ira agu suk. Nugu God, tangahun, ma nu bul harkurai wara harharahut iau.
14016	PSA 7:13	Bia ing tiga nong pa na lilik pukus, God na tes no uno wise na hinarubu, ma na sarat no hinau tano uno laplapot ma na lukun ie.
14017	PSA 7:14	I te tagure ira uno rumus wara hinarubu. I te tagure ira uno lulungo na rumus.
14019	PSA 7:16	Tiga nong i bulbul kuun wara hakuni ira mes, na puko laka baling taar tano tungtung i kilkil ie.
14020	PSA 7:17	No purpuruan i haburen tar ie, na wis habaling ie. Ira uno nginangar na soot habaling no uluno at.
14023	PSA 8:2	Watong, numehet Watong, no hinsaam i manga lua harsakit tano ula hanuo bakut! U te haminas no minamarim aram naliu tano mawe.
14024	PSA 8:3	Mekatiga ta ira palabulu diet ira nat na bulu ma ira bana, u te hatahuat a mon pirhakasing kanong ta ira am suk, wara hamarur ira ut na harhuli ma diet ing diet wara binabalu ma ra sakena.
14025	PSA 8:4	Ing bia iau la nesnes leh no num mawe, ira pinapalim na kaskas na limaam, no teka ma ira tiding ing u gate hakisi diet ta ira udiet subaan,
14036	PSA 9:5	Kanong warah, u te tur tano nugu palpal ma ira num gil harkurai. U te kis aram tano num kinkinis na harkurai, ma u harkurai ma ra taktakodas.
14039	PSA 9:8	No Watong i harkurai hatika. I te hatur hadadas no uno kinkinis na harkurai wara tar harkurai.
14041	PSA 9:10	No Watong aie no barbarahit wara audiet ing di hagahe diet. I la balbalaure hadadas diet ta ira pakana bung na tinirih.
14042	PSA 9:11	Diet ing diet nunure no hinsaam, diet na nurnur taam, kanong warah, Watong, pau la lumluban diet ing diet silsilihe ugu.
14046	PSA 9:15	waing iau nigi hapuasne ira pirhakasing tupas ugu ra matmataan na haruat aram Saion, ma kaia iau ni guama tano num harhalon tupas iau.
14053	PSA 10:1	Watong, wara biha gu tur tapaka sakit? Wara biha gu suhe ugu ta ira sakana pakana bung?
14054	PSA 10:2	No ut na sakena i la palpalim kawase ma ra minok diet ing taie ta harharahut ta diet. Bale diet bia ira udiet harpingit na hakuni habaling diet.
14061	PSA 10:9	I la nohnoh hoing tiga laion ing i susuhai taar. I la palpalim kawase diet ing taie ta harharahut ta diet ma i la rahrahi leh diet ma no uno uben.
14066	PSA 10:14	Iesen augu, God, u la nesnes ira haragahai ma ira tapunuk. U la liklik kaike ra magingin wara balbalu pukus ma no limaam. Nong taie ta harharahut tana, i la tartar ise tar ie ukaia ho ugu. Augu no ut na harharahut ta ira tintana.
14070	PSA 10:18	Nu harahut ira tintana ma diet ing di hagahe diet, waing ira tunotuno mekai ra ula hanuo, diet pa na haburut habaling ira mes.
14072	PSA 11:2	Kanong warah, ira ut na sakena diet te taguro taar wara laplapot. Diet te bul tagure ira udiet rumus taar tano hinau na laplapot wara laplapot mekaia ra kankado diet ing ira kaati diet i gamgamatien.
14074	PSA 11:4	No Watong ie kenam narakoman tano uno halhaliana hala. No Watong i kis taar kenam tano uno kinkinis na harkurai aram ra mawe. I nes tar ira tunotuno tano ula hanuo. Ira matana i walar diet.
14075	PSA 11:5	No Watong i walar ira ut na takodas, ma i malentakuane ira ut na sakena ma diet ing diet sip ira dadas na magingin na halhaliarai.
14077	PSA 11:7	Kanong warah, no Watong i takodas. I manga sip ira takodasiana magingin. Ira ut na takodas, diet na nes no matmataan tana.
14080	PSA 12:3	Diet bakut diet la habato ira udiet harwis. Ira palabulu diet la harhau ma ra harabota.
14084	PSA 12:7	Ma ira nianga tano Watong i bilai harsakit hoing ira siliwa ing di tun sare leh narako tano tamat na mamahien tano ula iaah wara kapkap se ira bilinge ra liman ma iruo na pakaan.
14094	PSA 14:2	No Watong i nanaas suur meram ra mawe ta diet ing a tunotuno mon diet wara nesnes ing bia tikai i palai ma bia tikai i sisilih uta God.
14095	PSA 14:3	Diet bakut diet te siel wiis laah. Diet tika bakut, diet te hanuat sakena. Taie tikai pai gil no tahut, taie tunat tikai.
14102	PSA 15:3	ma pataie ta nianga na haragahai tano karamena, ma nong pai gil ra sakena tano uno harwis ma pai ianga harakiput utano hinsakana,
14104	PSA 15:5	ma nong mah i la tartar ira uno kinewa ma pai la liklik leh bia na hatamat no uno kinewa ing no tunotuno na balu pukus, ma pai la hauhaut leh tikai bia na kukulei wara gil sakena taar tano ut na takodas. Aie nong i la gilgil kaiken ra linge, pa na tale bia da gunei.
14109	PSA 16:5	Watong, augu at no pinlawegu ma no nugu gingop, ma u te balaure timaan no nugu subaan.
14110	PSA 16:6	U te igah tar no nugu umaan kai ra bilai na katon. Tutun saakit, iau te hatur kawase ra melmel na pinlawegu.
14114	PSA 16:10	kanong pa nu waak se tar iau tano hanuo na minaat. Iau te tar tutun no nugu nilon taam, kaik pa nu tode tar iau bia ni marsang.
14118	PSA 17:3	Ing bia u la nesnes salok no kaatigu ma u la rare timaan iau ra bung, ma ing mah bia u la walwalar iau, pa nu silihe tiga linge. Iau te bul tar no nugu dadas na lilik bia no hagu pa na gil magingin sakena.
14119	PSA 17:4	Iau pai la murmur ira gingilaan ta ira tunotuno mon. Taie. Iesen iau te mur no nianga ta ira palabulum. Huo, iau te haan paas laah tano subaan ta ira ut na haragawai.
14123	PSA 17:8	Balaure iau narako ta ira limaam na harhalon. Gawane leh iau hoing tiga huna kareka i la pabong ira natine.
14124	PSA 17:9	Gawane leh iau huo talur ira ut na sakena ing diet helar tagu, ma diet ira nugu ebar ing diet tur luhut iau wara bubu bing iau.
14126	PSA 17:11	Diet te mur ira pinpaas na kakigu ma diet tur luhutane iau. Diet mate dit iau ma diet taguro wara isise iau ures napu tano pise.
14128	PSA 17:13	Taman tut, Watong! Tur bat diet ma nu me bul hasur diet. Halon iau ma no num wise sukun ira ut na sakena.
14130	PSA 17:15	Ma iau, iau ni nes no num matmataan kanong iau te gil ra takodas. Ing iau ni pada, iau ni guama wara nesnes ugu.
14135	PSA 18:5	Iau te wiwis taar um tano winwisaan na minaat. No dadas na tektek na halhaliarai i te kap iau.
14136	PSA 18:6	No winwisaan tano midi ga wiwisane iau. No kuun na minaat ga tur mamate iau.
14137	PSA 18:7	Tano nugu tapunuk iau ga tataau uram tano Watong. Iau ga suah uram hono nugu God wara harharahut. Meram tano uno hala na lotu ga hadade no ingagu. No nugu sunuah ga haan tupas ie ma ga hadade.
14138	PSA 18:8	No ula hanuo ga dedar, gaam kunakunar, ma ira burena ira uladih ga gunagune. Diet ga dedar kanong warah God ga ngalngaluan.
14140	PSA 18:10	I ga harbasiane no mawe ma gaam hansur. Ga papaas kora ta ira bungbungana bahuto.
14141	PSA 18:11	I ga kawas hut ta ira kerubim ma gaam pupungo. Ga beel laah ta ira babana no baiangin.
14142	PSA 18:12	I ga gil no kankado bia uno hanuo na munmun, ma uno pupulus wara hakukuh bus ie ma ra bungbungana bahuto na bata tano mawe.
14144	PSA 18:14	No Watong ga ianga parpar meram ra mawe. No ingana Nong i Naliu Harsakit ga kakel hoing ra taram karot.
14152	PSA 18:22	Kanong warah, iau te mur ira ngaas tano Watong. Iau pai le gil ta nironga be ni tar tihigu tano nugu God.
14159	PSA 18:29	Watong, u la halulungo tar at no nugu laam. Nugu God, u la pukpukusane no nugu kankado wara madaraas.
14160	PSA 18:30	Ing nu harharahut iau, ni petlaar bia ni harsomane timaan tiga matana ubane. Ing no nugu God i tika ma iau, iau ni kawe tiga tamat na balo.
14162	PSA 18:32	Kanong warah, no Watong sen mon aie no God. Taie tiga mes. Ma sige mah um no Haatkis? Taie tiga mes. No udahat God sen mon.
14164	PSA 18:34	I la gilgil ira kakigu hoing ira kakina dia. I la harharahut iau waing nigi tur aram naliu ra uladih.
14165	PSA 18:35	I la tangtagure ira iruo limagu wara hinarubu, waing ni haruat bia ni lukun tiga dadas na laplapot saakit.
14166	PSA 18:36	U tar tagu no num bahbahit na papaas hasur ira ebar. Ma no kata na limaam i la hadadas iau. U la tudu suur wara hatamat iau.
14167	PSA 18:37	U la gilgil hatapegas no ngaas napu tagu, waing ira kakigu pa na surmalagir.
14170	PSA 18:40	U ga hapapalim iau ma ra dadas wara hinarubu. U ga gil ira nugu ebar bia diet na singa bukunkek ra matmataan tagu.
14172	PSA 18:42	Diet ga suah wara harharahut, iesen ga taie tikai wara halhalon diet. Diet ga suah uram hono Watong, iesen pa ga babalu.
14175	PSA 18:45	Ing at mon diet hadade iau, diet taram iau. Ira wasire ing pai Israel diet, diet ruruo menalua tagu.
14178	PSA 18:48	Aie no God nong i la turtur wara utagu, nong i paas hasur ira hunhuntunaan ta ira mes na hanuo, ma i bul diet napu ra nugu harkurai,
14181	PSA 18:51	I te tar tano uno king no dadas wara papaas hasur ira ebar. I haminas ra harmarsai nong pai la patpataam taar ta nong ga gilamis ie. I haminas ie taar tane Devit ma ira uno bulumur, ma pana le pataam.
14183	PSA 19:2	No mawe na hapuasne no minamarine God. No mauho na hapalaine ira pinapalim ta ira iruo limana.
14184	PSA 19:3	Ta ira kaba bung no mawe i la hurhurange hawaat ra nianga. Ta ira bung ra bung bakut i la bulbul hapalaine ra minmintot.
14186	PSA 19:5	No ingana no mawe i la hanahaan harbasia tano ula hanuo bakut. Ira katona nianga i haan taar ta ira hauhawatine no ula hanuo. Aram ra mawe God i te hatur tiga palpalih wara utano kasakes,