1	GEN 1:1	Ke srøtø chigucha chigaaben, Tiusbe srømbalameranba, pirøwanba marig køn.
2	GEN 1:2	Pirøbe mumay kuinguen asamgaig chiguchagaig pasrøben, pimerabe purø trømbø løstiig pinøgasraig pasrabig køn. Inchen Tiuswei Espíritube pi palawan llirabig køn.
3	GEN 1:3	Tiusbe trenchibig køn: “Tør kønrrain” cha. Inchen tørbe misrøbig køn.
4	GEN 1:4	Incha Tiusbe tørwane tab kui asha, tørwane løstøyugurri nuingui mendamarøbig køn.
5	GEN 1:5	Tiusbe tørwane “kwaløm” cha wamappe, løstiigwane “yem” cha wamabig køn. Inchen maabenba løtsøba købig køn, tru srøsrø kwaløm.
6	GEN 1:6	Katø Tiusbe trenchibig køn: “Larrø lendiig chiguchagaig kønrrain cha, tru pimeran nuingui, nuingui tarømartrabig tøbøtag pasrønrrai.”
7	GEN 1:7	Incha Tiusbe tru larrø lendiig chiguchagaigwan marøbig køn, tru pimeran tarømarøbigwan. Tru pimera pala købelanba, umbu købelanba nuingui tarømarig kørrømisrtrai.
8	GEN 1:8	Incha Tiusbe tru larrø lendiig chiguchagaigwane “srømbala” cha wamabig køn. Inchen maabenba, løtsøba køben, pa kwaløm købig køn.
9	GEN 1:9	Katø Tiusbe trenchibig køn: “Srømbalamerai umbu pimera købeløbe kanbalatø misrtrain cha, pur kenamisrtrai.” Inchen treeg kuig køn.
10	GEN 1:10	Incha purwane Tiusbe “pirø” cha wamappe, pimera kanbalatø misrigwane “marmera” cha wamig køn. Incha Tiusbe tabig kui asig køn.
11	GEN 1:11	Incha Tiusbe trenchibig køn: “Pirøbe misringarubash cha, pilli puzheelø chi kaumera køppe, treeg yellzheelø tøgar, mamig nigab tusrmera, chi tusr køppe, treeg yell truyu tøgar pirau treeg kønrrai. Inchen treeg kuig køn.
12	GEN 1:12	Inchen pirøbe pilli puzheelø chi kaumera køppe, treeg yellzhig nigar, mamig nigab tusrmera yellzheelø truyu nigar misrøbig køn, nø chi tusr køppe, treekke. Inchen Tiusbe tabig kui asig køn.
13	GEN 1:13	Inchen maaben misra, løtsøgualmaben, pøn kwaløm købig køn.
14	GEN 1:14	Tiusbe katø trenchibig køn: “Tru srømbala larrø lendiig chiguchagaigube pilabelø kønrrain cha, kwalømwanba, yemwanba tarømartrabelø, iiløbe chi utømera køben amrrubelan ashib kømig kønrrai, kwalømmerawan, pilamerawan.”
15	GEN 1:15	Incha truiløbe srømbalasrø larrø lendiig chiguchagaigu pilabelø kønrrain cha, pirøwan pilønrrabelø.” Inchen treeg kuig køn.
16	GEN 1:16	Tiusbe pagatø pilabelø nørreelan marig køn: tru pilabig larrø tøriibe kwaløm piløben, pilabig tre tør kømíibe yem piløben inchai, katø nøbe kønchabiimeragucha marig køn.
17	GEN 1:17	Tiusbe tru srømbalamera larrø lendiig chiguchagaigu iilan pønsrøppe, pirøwan pilønrrai pønsraig køn.
18	GEN 1:18	Kwalømwan lata, yemwan lata pilamburab pilabeløbe nøm pønrrønrrai marig køn, tørwanba, løstiigwanba tarømartrabelø. Incha Tiusbe tabig kui asig køn.
19	GEN 1:19	Inchen maaben misra, løtsøgualmaben pib kwaløm købig køn.
20	GEN 1:20	Incha Tiusbe trenchibig køn: “Pimerabe chigurrimbunø øsiguelø tøgagøbash cha, katø illimera tru pirøbalawan llirabeløgucha kønrrain cha, tru larrø lendiig chiguchagaigu srømbalamerawan amøñibelø.”
21	GEN 1:21	Incha Tiusbe piyu ushamera kwaaramdø nørreelø marig køn. Chigurrimbunø øsiguelø kønab purrønrrabelanba, chitøgucha nøm chimera køppe, treelø kønrrai pimerabe treeg misringaruig køn, katø chigurrimbunø kwaldzariimera tøgargucha nøm chi køppe, treeløtøwein kønrrai. Incha Tiusbe tabig kui asig køn.
22	GEN 1:22	Incha Tiusbe truilane mayanguen tabig kønrrai marabe, trenchibig køn: “Larrø nørrø tøgagøb, larrø nørrø larrøbitchigay cha, marmerayu netsab, katø illimeragucha larrø nørrø larrøbitchigay” cha.
23	GEN 1:23	Inchen maaben misra, løtsøgualmaben, truibe trattrø kwaløm købig køn.
24	GEN 1:24	Incha Tiusbe trenchibig køn: “Pirøbe øsiguelø misringarubash cha, kusreeg ushamera køben, namig ushamera køben, srala ambubelø køben, nøm chimera køppe, treelø kønraingue.” Inchen treeg kuig køn.
25	GEN 1:25	Tiusbe namig ushamera nøm chimera køppe, treelø kønrrai marøb, katø kusreeg ushamera nøm chimera køppe, treelø kønrrai marøb, maya ushamera pirau sralig ambubelø nøm chimera køppe, treelø kønrrai marøbig køn. Incha Tiusbe tabig kui asig køn.
26	GEN 1:26	Incha Tiusbe trenchibig køn: “Møg misag margun cha, nam mailø køben ke tre lataitøwein køb, katø nam lataitøwei isub, marøbelø kønrrai. Incha maryu piyaumeran, srømbala amøñib illimeran, kusreeg ushameran, namig ushameran, pirau sralig ambub ushameran, truilø nun chinchaingaig, nø ashib tøga pasrønrrain” cha.
27	GEN 1:27	Incha Tiusbe møwan marøppe nø maig køben ke tre lataitøwein kønrrai marig køn. Pøs nøbe tre lataitøwein kønrrai marig køn. Møg misag, ishug misag treeg marig køn.
28	GEN 1:28	Incha Tiusbe mayanguen tabig nebuilø kønrrigay chib, trenchibig køn: “Srøig larrøbitchabig yellmera tøgagøb, srøitø srøitø larrø nørrø nemisrtrigay cha. Ñimbe pirøwan netsøgana, pirøwane ñim ashib tøga pønrramisra, chinchaingaig ñim ashib karunrrigay cha, maryu piyaumeran, pala amøñib illimeran, katø maya ushamera pirau srala ambubelan købengue.”
29	GEN 1:29	Incha Tiusbe trenchibig køn: “Asay cha, nabe ñimune pirau mamig nigab kauzheelø yellmera tøgartø kønrrai tranar cha. Katø maya tusrmera mamig nigabelø, yell tøgarmera tranar cha, iibe kerriguba ñim mab kømig kønrrai.”
30	GEN 1:30	Inchen pirau namig ushameranba, pala amøñib illimeranba, katø maya ushamera pirau srala ambubelanba, truilane pilli puzhigwan mab kømig tranar cha. Inchen treeg kuig køn.
31	GEN 1:31	Incha kerrigu Tius nø mariilan ashabe, truba truba tabig kui ashibig køn. Inchen maaben misra, løtsøgualmaben, trattrø y kan kwaløm købig køn.
32	GEN 2:1	Inchen srømbalameranba, pirøwanba truyu kerriguh chi købelanba chab marig kørrømisrig køn.
33	GEN 2:2	Incha Tiusbe kerrigu nui maramigwan yandø patsøga, trattrø y pa kwalømyube isrig køn nø kerrigu chi marigwan.
34	GEN 2:3	Incha Tiusbe tru trattrø y pa kwaløm kønrrabyuigwane mayanguen tabig kønrrai mara, nuyasig kønrrai tarømara pasrøbig køn, kaguende nø chigurrimbunø mara pønsra tru kwalømbe nø isrig kua.
35	GEN 2:4	Srømbalawan køben, pirøwan køben mara pønsrailan øyeeg købig køn cha wamindig iig køn.
36	GEN 2:5	piraube ka nøtø kal-lab tusrmera chigucha kawei, chigucha kaumera kal-laig kawein købig køn, kaguende Jehová Tiusbe piraumay srewan pungarumø srø køben. Inchagucha kwallchabig mu møg mugawein køben.
37	GEN 2:6	Pibe piraugurri webarrub, pirø palawan kerrigu sømarøbig køn.
38	GEN 2:7	Inchen Jehová Tiusbe pirøyu usrøtøga møg misag mara, trugurrimbe øsiguig kønrrai kimyu urrøben, møøbe øsiguig misrig køn.
39	GEN 2:8	Incha Jehová Tiusbe Eden taisrø kan ellmarin tul mara pasrøbig køn, tru pørr neeshibgatømaysrø. Incha tru nø mari møwan truyu kørrømarøbig køn.
40	GEN 2:9	Incha Jehová Tiusbe chi tusrkurrimbunø chull asamdø tab tusrmera pirau kal-langarubig køn, chull mamdø mamiimera nigabelø. Inchen tru tul tøbøtabe tru kwamø øsig køm tusrwanba, katø tru tabigwanba, kaigwanba nebua asam tusrwanba kal-langarubig køn.
41	GEN 2:10	Inchen tru Edenyugurrimbe pi webarrubig køn tru tulwan sømarøb lulrrabig. Incha truyugurrimbe katø pippaløh pirisha webibig køn.
42	GEN 2:11	Tru srøsrø pibe Pisón munchi købig køn, truibe tru Havila pirø muba kuimburab pøtøgatanwan pureb ibig køben, trusrømbe oro tøgaikke.
43	GEN 2:12	(Incha pirø muba kuimburab tru pirau orobe larrø tabig købig køn, katø truyube mayzhig irrabig bedelio køben, ónice køben tøgaikke.)
44	GEN 2:13	Inchen tru wendau pibe Kihón taig, truibe tru Cus pirø muba kuimburab pureb ibig køn.
45	GEN 2:14	Inchen tru pøn kønrrabyu pibe Tigris taig køn, Asiria pirau pørr neeshibgatøwansrø pureb ibig. Inchen tru pib kønrrabyu pibe Eufrates køn.
46	GEN 2:15	Incha Jehová Tiusbe møwan pera arrua, tru Edén ellmarin tulyu kørrømarøbig køn, pirøwan kwallib ashib tsunrrai.
47	GEN 2:16	Incha Jehová Tiusbe tru møwane trencha karua pasrøbig køn: —Tru tulyu chi tusryu mamiimerandøgucha ka manrrig cha.
48	GEN 2:17	Inchendø tru tabigwanba, kaigwanba nebua asamburab asam tusryu mamigwane manrrab kømø cha, kaguende tru tusryuigwan ñi mab kwalømbe isa kømø, ñibe kwanrrabguen— cha.
49	GEN 2:18	Incha trugurrimbe Jehová Tiusbe trenchibig køn: —Møg nøtø unamiibe chi tab kømøn cha, nun purugunrrabig nø maig palain køben, treegwan martrab— cha.
50	GEN 2:19	Incha Jehová Tiusbe maya ushameranba, illimeranba pirøwandøwei mara pønsra, møwei merrab pønsrøbig køn, chi munchi pønsramigwan nø asha pønsrønrrai. Inchen møg tru øsiguelan treeg munchi pønsra wamiiløbe tru munchin tøgar kørrømisrig køn.
51	GEN 2:20	Inchen møøbe maya ushamera namiguelan, pala amøñibelø maya illimeran, katø tru kusreeg ushameran mayamba munchi pønsrøbig køn. Inchen køben møwan nø maig palain køben, treegwan purugunrrabiibe mugaabig køn.
52	GEN 2:21	Inchen Jehová Tiusbe møwan purø mur kingarua, nø kib tsumnebe kan tømbul tsutsigwan wesrawa, tru tsutsig wesrub kurigwane katøle treetøweih kasrøbig køn.
53	GEN 2:22	Inchen Jehová Tiusbe tru tømbul tsutsig wesraigwane ishug misag mara, møweimay pera arrubig køn.
54	GEN 2:23	Inchen møøbe trenchibig køn: —Iibe sí, nain tsutsigugurrin tsutsig køb, katø nai asryugurri asr køb indan cha. “Ishug misag” cha wamig kønrrun chibig køn, kaguende nøbe møweinukkurri wesraig køn— cha.
55	GEN 2:24	Treekkurri møøbe møskawan, usran tarømisra, sraimba kandø misra, kan asrtø kønrrun.
56	GEN 2:25	Møøba, ishuubabe pailøba køsaateelø købig køn. Inchendø chi kørig kui inchimeeløgue.
57	GEN 3:1	Inchen tru ulbe maya ushamera lataguen kømø, chigøben maramigwane purø may isua marøbig købig køn, Jehová Tius nø mariiløyu. Incha tru ulbe ishuwane trenchibig køn: —¿Kabe Tiusbe ñimungan tru ellmarin tulyuigwan ni mø tusryuigwanguen kerriguwan mamønrrain taig kuitarru?— cha.
58	GEN 3:2	Inchen ishuube ulwane trenchibig køn: —“Tulyu pønrrab tusryu mamiimerane ka manrrigay” taig køn cha.
59	GEN 3:3	Inchendø tru ellmarin tul tøbøtag pasrab tusryu mamigwane Tiusbe øyeeg taig køn cha: “Mamønrrigay cha, ni katøramøwei inchigay taig køn cha, kwamig kømønrrai”.—
60	GEN 3:4	Inchene ulbe ishuwane trenchibig køn: —Ñimbe kwamønrrabguen cha.
61	GEN 3:5	Tiusbe asha køn cha, ñim tru tusryuigwan mab kwalømbe, ¡katø! chinetø nebua asamigwan ñimui isubig kuren, ñimbe Tius lataitøwein kønrrabguen cha, kaigwanba, tabigwanba nebua ashibelø.—
62	GEN 3:6	Inchen ishuube tru tusryuigwan larrø chull mamdiig kui ashib, trurrigu tru tusryu mamiibe larrø mayzhig kønraptiig kui ashib, katø chiwandøgucha larrø kusrebig kuinrrabna isumig purø chull kønrraptø tusr kui ashib inchibig køn. Incha tru tusryu mamigwan nemørøb, maptinchibig køn. Inchabe kewangucha srørren, truikkucha mabig køn.
63	GEN 3:7	Inchen møimbe tru pailanba, ¡katø! chinetø nebua asamigwan nømui isubiibe kurøptinchen, nømbe køsaateelø købrain kui wetøgørra, nømbe higuera ishiimeran tsusha, søtøgasrailø marøbelø køn.
64	GEN 3:8	Inchen yandø mawab misrøb pishi isig ichibig webarruben, tru ellmarin tulyu Jehová Tiusbe llirab arri møra, møøbe nui sraimba tusr utumerawansrø trubabelø køn Tius nø pasrainukkurri.
66	GEN 3:10	Inchene møøbe trenchibig køn: —Tru ellmarin tulyu ñi llirab arri nabe mørøptindinaben, nane truba kørig køtan cha, kaguende nabe køsaatiig købrain købtinchen, treekkurri nabe trubar— cha.
67	GEN 3:11	Inchene Tiusbe trencha payibig køn: —¿Ñune køsaatiig køn chabe, mu eshkata? cha. ¿Na mamønrrain taig tusryu mamigwan ñibe mappeendi?— cha.
68	GEN 3:12	Inchen møøbe trenchibig køn: —Tru ñi nan lincha pera uñchai trani ishug tru tusryu mamigwan nan srørren, nabe mar— cha.
69	GEN 3:13	Inchene Jehová Tiusbe ishuwane trenchibig køn: —¿Øyeebe chi margu?— cha —Tru ul nan purø may wamincha isøben, nabe mar cha— trenchibig køn.
70	GEN 3:14	Inchen Jehová Tiusbe tru ulwane trenchibig køn: —Ñi øyeeg marikkurrindø maya ushamerai utu ñibe larrø trømbøig nebuig kønrrig cha, kusreeg ushamerai utu lata, namig ushamerai utu lata. Patsøtøgatø sraløb uña, ñi chugatig øsig tsuingatiibe pirøyu usrøwan manrrig cha.
71	GEN 3:15	Incha ishuuba ñibabe larrø ashig kømuindiyabelø kønrrai maramønrrun cha, ñuinukkurri amrrubeløba, katø ishuweinukkurri amrrubeløba. Incha tru ishug misagweinukkurri srøig srøig kurrab arrubiguig ñune turwan pusøbunøben, ñibe nune talunyu tsatchun— cha.
72	GEN 3:16	Incha ishuwane trenchibig køn: —Ñune unø tøgamisrøbyu pusrkwabigwan masken trømbøig pusrkwanrrai nemaramønrrun cha. Purø trømbøig pusrkwai incha, ñui ureemeran tøgamisrtrabguen cha. Inchen ñi ureg tøgagukkøb chull isuibe ñui kewein køben, ñui keebe ñune nø karub nø ashchabig køn— cha.
73	GEN 3:17	Incha møwane trenchibig køn: —Ñi ñui srawei wamwan manchitanmaptø mørøb pasrøwa, na mamønrrig tain tusryu mamigwan ñibe main køn cha. Ñigurrindø pirøbe larrø trømbøig nebuig pasrønrrun cha. Ñi chugatig øsig tsumnegatiibe ñibe ¡katø! isua møra marøb megawabe, truyugurri manrrabguen cha.
74	GEN 3:18	Inchen pirøbe tsøshambah, kaldusrmerabatø misren, mappe, kau umbu tusrmerandø manrrigay cha.
75	GEN 3:19	Ñibe pøsra, pøsra mara mamig tøgagønrrig cha, ñi katøle pirøtøwei misramnegatikke, kaguendø ñibe pirøtøga mara pasrig køn cha. Ñibe pirø usrø kuig køppe, katø ñibe usrøtøwei misrtrabig køn— cha.
76	GEN 3:20	Inchen Adánbe nui srawane Eva munchi pasrøbig køn, kaguende Evabe maya misagwei usrin kønrrabig kuimba.
77	GEN 3:21	Jehová Tiusbe møweimba, nui sraweimba kemelø ushamerai kalusmeran mara, kennøbig køn.
78	GEN 3:22	Incha Jehová Tiusbe trenchibig køn: “Møøbe møimbe kan møig køben nam lataitøwei misra pasramisrin køn cha, tabigwanba, kaigwanba nebua ashibig. Pøs, nui tasigwan larrøbitchain kømøn, chibig køn, tru øsig køm tusryu mamigwangucha nemøra, truigwan ma, managatig øsig kønrrab.”
79	GEN 3:23	Incha Jehovábe tru Edén tulyugurri nømun webusrøbig køn. Incha pirøwan kwallchain pasrig køn, tru nun mara pasrin pirøwan.
80	GEN 3:24	Incha møwan wambig wegucha, Edén tru tulyu pørr kal labgatømay querubinmera pønsra, katø kan espada naarabig amburab, iburab llirabig pasrøbig køn, managatig tru øsig køm tusryumay ambam maywan pumønrrai martrab.
81	GEN 4:1	Adanbe nui srai Evaba unø tøgagønrrab pailø waramisrøbelø køn. Incha Evabe kwanrriig kørrømisra, Cain kal labene, trenchibig køn: “Na unø tøgagømig Jehová treeg kønrrain køben, kan møg-unø tøgaguinatan” cha.
82	GEN 4:2	Incha katø wendøbe Cainwei nuneg Abelwan tøgamisrig køn. Abelbe ubisha ashibig køben, Cainbe pirøwan kwallibig kuig køn.
83	GEN 4:3	Inchen kan maya yana køsrøn puraiben, Cainbe Jehováwan ketamig nui kwaliiløyugurri srua arrubig køn.
84	GEN 4:4	Inchen Abelgucha nui ubishamera ke srøsrø lluilan srua arrubig køn, sebowanba. Inchen Jehovábe Abelwanba tru nui kettrab srua arrigwanba truba tab kui ashibig køn.
85	GEN 4:5	Trune Cainwane tab kui ashmuig køn, tru nø keta tranigwan chigucha. Inchen Cainbe truba trømbøig namuben, nui maløbe ke minchiptinchibig køn.
86	GEN 4:6	Treenchene, Cainwane Jehovábe trenchibig køn: —¿Chindimbarre namøgu? cha. ¿Chindimbarre ñui maløbe ke peg misrøptinnda? cha.
87	GEN 4:7	Ñi sølwan isua marig kuimbe, ñibe utsøbasrmø kurraasha pasrabsruinrrun cha. Inchendø ñi sølwan isua marmuikkurrimbeh, kaigwan matrai inchabiibe ñun megambunrrab ¡katø! muniitø pasran cha. Inchen køben ñibe tru kaig marmumigwane ñi kananrrabguen— cha.
88	GEN 4:8	Cainbe nui nuneg Abelwane trenchibig køn: —Chugøben lliranrrab amun— cha. Indig yandø tru llirab amønaisrømbe Cainbe nui nuneg Abelwan namappe, kweechibig køn.
89	GEN 4:9	Inchene Jehovábe Cainwane trencha payibig køn: —¿Ñui nuneg Abelbe chu unah?— cha. Inchen nøbe trencha løtabig køn: —Chindindøbeh cha. ¿Nagan nai nunewan ke tru ashib wendautø pasrabig kuitarru?— cha.
90	GEN 4:10	Inchene Jehovábe trenchibig køn: —¿Chi margu? cha. Ñui nunewei animbe piraugurri trashib nan wamøtan cha.
91	GEN 4:11	Ñibe larrø trømbøig nebuinanrrabig kørrømisrøb, tru ñui nuneg Abelwan ñi kweechen ani lusigwan muchib piraugurri ñune webya inrrai wegutsig kørrømisrøb inchabguen cha.
92	GEN 4:12	Pirøwan kwallib megaingucha, yandø mamig misrmønrrabig køn cha. Inchen ñibe piraube punø panrrø, punø panrrø ka lliraitø, lliraitø chuguen tsub tsumibe chigaig kønrrabguen— cha.
93	GEN 4:13	Inchene Cainbe Jehováwan trenchibig køn: —Nan øyeeg møra pasrønrrai mariibe purø nuig køtan cha, pasramguengaikke.
94	GEN 4:14	Møi na tsuinukkurri yandø nan weguchen; ñui merrabgurrimbe møimbe trubatø unamønrrun cha, pirø muba kuimburab lliraitø, lliraitø chuguen tsub tsumig chigaikke. Inchen mugøben nan ashibiibe nane kwetchautan— cha.
95	GEN 4:15	Inchene Jehovábe trenchibig køn: —Møikkøben Cainwan kweechibiibe siete pijisken purab trømbøig nebuin pasrønrrun— cha. Incha Jehovábe Cainwane kan siñal asamdiig tøgaig kønrrai marøbig køn, mugøben ashagucha, nune kweechimønrrai.
96	GEN 4:16	Incha Cainbe Jehováwei merrabgurri yandø tarømisra ya, Nod tain pirau Edén pørr kalabgatømaysrø tsubig køn.
97	GEN 4:17	Cainbe nui sraimba unø tøgagønrrab pailøba waramisrøbelø køn. Inchen sraimbe kwanrriig kørrømisra, unø tøgamisrig køn, tru Enocwan. Incha Cainbe kan ciuda mara pasrabe, truigwane tru nui nusrkai Enocwei munchin pasrøbig køn.
98	GEN 4:18	Incha Enocbe kan nusrkai Irad taig tøgaguig køn. Inchen tru Iradbe Mehujaelwei møskain køben, Mehujaelbe Metusaelwei møskain køben, Metusaelbe Lamecwei møskain kuig køn.
99	GEN 4:19	Incha Lamecbe nuyasig pagatø ishumburmera tøgaguig køn. Kan ishuwei munchibe Ada købene, katøgan ishuwei munchibe Zila købig køn.
100	GEN 4:20	Adabe kan unø tøgamisrig køn, tru Jabalwan. Tru merrabsrø kølli misag Jabalweinukkurri pølbasra amrrub mendig kuig køn, carpa lasrua pønsraiIøyu warab, katø nømbe ushamera karrøgøb inchibelø.
101	GEN 4:21	Jabalbe kan nuneg Jubal taig tøgaig køben, tru merrabsrø kølli misag Jubalweinukkurri pølbasra amrrub mendig kuig køn, mayeelø arpa kønabeløba, lus urrabeløba.