23214	MAT 1:1	Nonei teka u tubur e Iesu Kristo. E Iesu e tubunen e Devit, na e Devit a hatutubunei tere Abraham.
23215	MAT 1:2	E Abraham e hatuhanei e Aisak. Ne Aisak e hatuhanei e Jekop. E Jekop e hatuhaner ere Juda mera u toulanen.
23217	MAT 1:4	Ne Ram e hatuhanei e Aminadap. Ne Aminadap e hatuhanei e Nason. Ne Nason e hatuhanei e Salmon.
23220	MAT 1:7	Ne Solomon e hatuhanei e Rehaboam. Ne Rehaboam e hatuhanei e Abitsa. Ne Abitsa e hatuhanei e Asa.
23221	MAT 1:8	Ne Asa e hatuhanei e Jihosapat. Ne Jihosapat e hatuhanei e Joram. Ne Joram e hatuhanei e Usaia.
23222	MAT 1:9	Ne Usaia e hatuhanei e Jotam. Ne Jotam e hatuhanei e Ahas. Ne Ahas e hatuhanei e Hesekia.
23223	MAT 1:10	Ne Hesekia e hatuhanei e Manase. Ne Manase e hatuhanei e Amon. Ne Amon e hatuhanei e Josaia.
23226	MAT 1:13	Be Serubabel e hatuhanena e Abiut. Be Abiut e hatuhanena e Eliakim. Be Eliakim e hatuhanena e Asor.
23227	MAT 1:14	Be Asor e hatuhanena e Sedok. Be Sedok e hatuhanena e Akim. Be Akim e hatuhanena e Eliut.
23230	MAT 1:17	E markato uana teka, a man mun tamana hoboto ti taniama tere Abraham batemi noa ria tere Devit, nori i antunaia turu töa u maloto na tohats tara man mun tamana. Ba man mun tamana te taniama tere Devit batemi noana tara pöata ti lu mera leien i Babilon, u töa u maloto na tohats u mun tamana noahas. Na man mun tamana te taniama tara pöata ti lu mera leien i Babilon batemi noana tara pöata te butuia e Mesaia, nori u töa u maloto na tohats noahas u mun tamana.
23234	MAT 1:21	Nonei e pose nou a pien tson, balö te ngöe moien e Iesu, e mar mouna uana teka, A Katuun a Hihitaguhu. Nonei e taguhu ranou u katuun i tanen bate luba nanou a man markato a man omi i taren.”
23235	MAT 1:22	A mamanaka hoboto teka e butu sil korueiena tega kato hamana menaien u raranga te ranga naia a Tsunono tara töa propet i manasa. A propet e mar ranga uu teka: “Hengoiam! A tahol a kukubei tema soho gono noa menei ta tson e pika nou. Ba nonei te pose nou a pien tson, ba nori te ngöe roi a solonen e Emanuel.” A solo e Emanuel e mar mouna uana teka, “E Sunahan e ka gono mera noura.”
23239	MAT 2:1	E Iesu i poseia i Betlehem i Judia tara pöata te king ia e Herot. Na tara pöata ti posa hakapeia e Iesu, ba palair u tson atei tara pala te butu nama a pitala e la uarima i Jerusalem memi rangatar, “Ime te kana a pien ti posa sile ii ega kingir u Jiu? Alam u tarema a pitopito i tanen tara makum te roron butu nama a pitala, ba lam e la sile muma tegomi hatsunono uu lam i tanen.”
23244	MAT 2:6	‘Alimiou u katunura i Betlehem, turu tsiktsikina i Judia, alimiou e ka tala memou a solo a kapan i gusuna a pal tsunono i Judia. Taraha, a töa tsunono pan e butuna romana i Betlehem, ba nonei te tarakap ranou u katuun i tar a tei Israel.’”
23251	MAT 2:13	Pöata ti la hakapaia u tson atei, ba töa angelo tara Tsunono e butuna turu sinasoho tere Josep me poeiena i tanen, “Alö go takei ba lö te lu rem u mun tsinana, ba limiou te bus uamiou tara han i Itsip. Ba limiou tena ka möa i Itsip e antunana tara pöata te ranga lel goa lia i tamölö. Taraha, e King Herot e sake la nanou a pien bate atung hamatie nouen.”
23253	MAT 2:15	Ba nori ena ka ria i Itsip e antunaia tara pöata tega mateia e Herot. A ka teka e butu sil tego kato hamana menaien u raranga te ranga naia a Tsunono tara propet i manasa: “Alia u ngö ba namei a pien tson i tar a han i Itsip.”
23256	MAT 2:18	Nonei e mar ranga uu teka, “A nitaatagi pan e butuna tara han i Rama. U katuun e ku hapan koru mer te tabe hataatagi uaren. E Retsel e tabe hataatagi sil koru reiena a galapien i tanen. Na nonei ema ngilenei tegi hasokolei menaien. Taraha, a galapien i tanen i mate hakapa nitöa.”
23258	MAT 2:20	Ba nonei e poeiena, “Alö go takei, ba lö te lu rem u mun tsinana, ba limiou te la pouts miou tara han i Israel. A katuun te katsin atung hamati a pien e mate hakapa.”
23260	MAT 2:22	Kaba e Josep e hengoen te lu menai e Akelaus a makum tere tamanen e Herot, me king nena a provins i Judia. Be Josep e matout koruna. Na turu tana u sinasoho e Sunahan e hateien nonei goma la uai i Judia, ba nonei e la uana tara provins i Galili.
23261	MAT 2:23	Ba nonei ena kana tara töa taun te ngöeri i Nasaret. A ka teka e butu sil hasi tego hatara hamana menaien u raranga ti habulunganein u propet. Nori i mar ranga uu teka, “Nonei e ngöe roi a toun Nasaret.”
23263	MAT 3:2	Ba nonei e poeiena, “Alimiou go palis ba naiam a man markato a man omi. A Nipepeito tere Sunahan e sukusuku hakapa.”
23264	MAT 3:3	E Jon nonei a katuun te rangein e Aisaia a propet i manasa. Ba nonei e poeiena, “A töa katuun ena ku hapan noa romana tara makum a palaka bate poeiena, ‘Kato hamatsköeiam a maroro, a Tsunono e ngilin sila nama romana tara maroro a matskö.’”
23268	MAT 3:7	Be Jon e tara rena u Parasi na u Sadiusi u parpara koru i la silema tegimi habaptais uen, ba nonei e poeiena i taren, “Alimiou u katunura tara kökötsi a omi, alimiou u katuun u gamogamo! Alimiou ema antunan bus ba namoi a raharaha tere Sunahan te butu nou!
23270	MAT 3:9	Alimiou goma tatei mar hakats uami teka, ‘Alam e kamem e Abraham e tubumulam.’ Alia e hatei ragou limiou, e Sunahan e antunan katoe nei u hatu teka a hun haposa tere Abraham. E Sunahan ema antunan ngil pinopinoe nei a katuun te pala uana tere Abraham. E möa. E ngileiena a katuun te kato hanigana.
23271	MAT 3:10	A nikö e ka hakapaia i mouna u ruei. A man ruei tema hua haniga ri e ngats ba rariou bate lapo ba raroa turu tula.
23272	MAT 3:11	“Alia e baptais ragi limiou u ramun tuun, e hatara nena alimiou u habirits ba hakapa naiam a man markato a man omi i tamilimiou. Kaba a katuun te la hamurimuri nama romana i tar e pan bala koru nanou lia. Nonei a tsunono pan, na lia a katuun papala koru ema antunan söata nagi u sendol i tanen. Nonei te baptais ranoui limiou u Namnamei u Göagono na u tula.
23275	MAT 3:14	Kaba e Jon e torohanan katoeien ego palis u hakats i tanen me poeiena, “Alia ego habaptaisia i tamölö, kaba lö e la noa has uamuma i tar? Alö e pan bala koru namou lia.”
23278	MAT 3:17	Ba u töa u raranga e butu nama i Kolö me poeiena, “Nonei a Pien Tson koru i tar. Alia e ngil korue gen, na lia e sasaala koru has megen.”
23282	MAT 4:4	Kaba e Iesu e ranga palis uu i tanen me poeiena, “Turu Buku u Göagono tere Sunahan i koloto hasiin, ‘A beret peisa ema antunan hala nanei a nitöatöa tara katuun. E möa. A katuun te kukutiena a man raranga tere Sunahan nonei e luenou a nitöatöa.’”
23285	MAT 4:7	Be Iesu e ranga menen me poeiena, “Turu Buku u Göagono i koloto hasiin, ‘Alö goma torohanei a Tsunono. Nonei e Sunahan i tamölö.’”
23288	MAT 4:10	Be Iesu e ranga menen me poeiena, “Satan, alö go laba naiou lia! Turu Buku u Göagono i koloto hasiin, ‘Alö go hatsunono uu tere Sunahan. Nonei puku a töa a Tsunono i tamölö tego kukuti lö.’”
23292	MAT 4:14	A ka teka e butu sil tega kato hamana menaien u raranga te ranga naia e Sunahan tere propet Aisaia i manasa.
23295	MAT 4:17	Nonei tara pöata teka, e Iesu e tanian habulunganein a man raranga i tanen ba e poeiena, “Alimiou go palis ba naiam a man markato a man omi! Taraha, a Nipepeito tere Sunahan e sukusuku hakapa.”
23304	MAT 5:1	A pöata te tareia e Iesu u katuun u parpara koru i gonoma, ba nonei e sei uana iasa turu pokus, me gumuna ba u katunun tsitsilo i tanen e larima, ba nonei e tanian hihatutsna i taren.
23314	MAT 5:11	“Alimiou te ka uamiou tara pala i tar, ba nori te ranga hohomi rariou limiou, bate kato hohomi rariou limiou, bate saka rari limiou u mamana u mar ranga u gamo, alimiou e tatei sasaala noahas miou.
23315	MAT 5:12	Alimiou go sasaala koruiam, taraha alimiou ena lue mou u hamatana pan koru i Kolö. Nonei ti markato hohomi has merai u propet ti ka i manasa.”
23316	MAT 5:13	E Iesu e ranga lel me poeiena, “Alimiou e here rami u soluna i puta. Kaba te tia banena u sol a nimal i tanen, e möa len ta maroro tegi markato menaien bate mal poutsina. E gi ba lasiin ba u katuun te tötö ria i oulunen.
23317	MAT 5:14	“Alimiou e here hasemi u ualesala tara mamana makum. Na taun te kana i ouluna u pokus ema antunan hamous nari.
23320	MAT 5:17	E Iesu e ranga me poeiena, “Alimiou goma poeiemi alia u la silema tegomi luba menai a man Lo tere Mosis na u raranga turu propet. E möa. Alia u la silema tegomi kato hamouna koru menaien.
23323	MAT 5:20	Alia e hatei ragou limiou, te ngilin tasu mia limiou tara Nipepeito tere Sunahan, alimiou ego kukute hanigeiam u raranga i tanen, kaba te kukute mia limiou a markato turu tson hihatuts tara Lo na turu Parasi, alimiou ema antunan tasu moi tara Nipepeito tere Sunahan.”
23324	MAT 5:21	Be Iesu e ranga lenina me poeiena, “Alimiou u hengo hakapa naiam u raranga ti hengoen u tuburara i manasa te poeiena, ‘Alö goma hihipuli ii. A katuun te hihipulina e la uanou turu kout.’
23330	MAT 5:27	Be Iesu e ranga lenina me poeiena, “Alimiou u hengo hakapa naiam u raranga te poeiena, ‘Alimiou goma tsikolomi.’
23334	MAT 5:31	Be Iesu e ranga lenina me poeiena, “Alimiou u hengo hakapa naiam u raranga te poeiena, ‘A tson te laba nena a tahol i tanen ego haleien u pepa te hatei nena a hitöl e kapana.’
23336	MAT 5:33	Be Iesu e ranga lenina me poeiena, “Alimiou u hengo has naiam u raranga ti hengoen u tuburara i manasa te poeiena, ‘Alö goma gamo ii te hamana uamölö iasa, kaba lö go kato hamani a ka te hamana sile mölö i matana a Tsunono.’
23340	MAT 5:37	Alimiou go poe tuun laseiam, ‘Aa’ tsi ‘E möa.’ Ta saha ta ka te ranga lel namou limiou e la hamanasa tala nama tere Satan.”
23341	MAT 5:38	“Alimiou u hengo naiam u raranga te poeiena, ‘Tego kato homiea a katuun a matamölö, balö te kato homi hasem a matanen, na tego kato homi haseien a lihomölö balö te kato homi hasem a lihonen.’
23346	MAT 5:43	Be Iesu e ranga lenina me poeiena, “Alimiou u hengo hakapa naiam u raranga te poeiena, ‘Alö go ngilir a man hahikapien i tamölö balö te pakö rem u katuun te paköe riou lö.’
23349	MAT 5:46	Aha te hala sile noi e Sunahan u hamatana i tamilimiou, te ngil puku merami limiou u katuun te ngil rariou limiou? U katuun te lulu takisir e markato has uar iesana.
23351	MAT 5:48	A markato i tamilimiou ega matskö nitöa, te markato has uana e Tamamilimiou i Kolö a markato i tanen e matskö nitöana.”
23356	MAT 6:5	“Na tara pöata te singo mia limiou, alimiou goma hererami u katuun u gamogamo. Te ngiler u katuun egi tara raien tara pöata te singo rien tara man luman lotu na tara man la hagiono i maroro. Alia e hatei hamana nitöa ragou limiou, nori i lu hakapi u hamatana i taren.
23359	MAT 6:8	Alö goma here raien, taraha e Tamamölö e Sunahan e solon atei sil hakapa noa haselala aha te ngilin rangate mien lö.
23360	MAT 6:9	“Alimiou go mar singo uaiam teka: ‘O Tamamulam alö e kamia i Kolö, alam e hagöagonem a solomölö.
23361	MAT 6:10	Alö gomi tsunone rilam. Alam go maniata uu i tamölö i puta te maniata has uar i tamölö i Kolö.
23362	MAT 6:11	Alö go hala rameilam a kannou na i romana.
23363	MAT 6:12	Alö go hapolasema u kato homi i tamulam te hapolasa has menamilam u kato homi ti katoeia u katuun i tamulam.
23364	MAT 6:13	Alö goma hala merai lam tara tou hiamus, kaba lö go luba nema a man niomi i tamulam. U mana.’
23367	MAT 6:16	“Na pöata te agono mialö, alö goma mataloho ii. Te kato uar u katuun u gamogamo te matalohor bate kato siler u katuun egi tari te agono uaren. Alia e hatei hamana nitöa ragou limiou, nori i lu hakapa ban töani u hamatana i taren.
23370	MAT 6:19	“Alimiou goma kui hatagala silemi a manka a man nigana i puta. U numa e kato homieriou a manka teka, na u kopkop e hela has riou bate kopur.
23371	MAT 6:20	Kaba limiou go kui hatagala sileiam a mankana i Kolö tema antunan omiri. Be Sunahan te hala ranoui limiou u hamatana pan i Kolö. A numa ema antunan kato homi nanei a manka teka, na u kopkop has ema antunan helari bate kopur.
23375	MAT 6:24	“A katuun ema antunan kui neia tara huol a tsunono. Taraha, nonei e rama nanou a töa bate ngilena a tabi. Alö ema antunan kui hoboto bemi e Sunahan na moni.
23376	MAT 6:25	“Nonei te hatei sila ragia lia limiou: alimiou goma hakats silemi a nitöatöa i tamilimiou bate poe miou, ‘A saha ka te noue riou? Na saha ka te ue riou?’ Na limiou goma hakats silemi u tuenrei i tamilimiou, na tu hasobö tegi hasogi. A nitöatöa e pan bala nena a kannou, na u tuenrei e pan bala nena u hasobu.
23377	MAT 6:26	Alimiou go taraiam turu apenar iasa. Nori ema leberi ta kannou na nori ema hagala haseri ta kannou batemi hakeria tara luman haputu. E möa. Kaba e Tamamilimiou i Kolö e hanou noa las ranen. Na limiou e niga bala ramiou u apena.
23379	MAT 6:28	“Na saha ka te hakats sil me milimiou u hasobö? Alimiou go rötoiam turu palaua u hie temar pusuku uaren. Nori ema katoeri a peisaren bate tara hanigar. E möa.
23382	MAT 6:31	Alimiou goma hakats balami bate peimiou, ‘Aha te noue rou ra? Na ha te ue rou ra na te hasoge rou ra?’
23383	MAT 6:32	A mamanaka teka te kato siler u tematan egi lueien. E Tamamilimiou i Kolö e atei silena te ngil mena milimiou a manka teka.
23388	MAT 7:3	Aha te tara sile milö a tsi bita i matana e toulamölö, ba lö tema taremi a makumun palang i matamölö pouts?
23390	MAT 7:5	Alö a katuun a gamogamo, alö go luba mamin a makumun palang i matamölö pouts, ba lö te töan tara haniga mou bate luba nem a tsi köahu i matana e toulamölö.
23396	MAT 7:11	Alimiou e ka memiou a markato a omi, kaba limiou e hala noa has namiou a manka man niga tara galapien i tamilimiou. Na e Tamamilimiou i Kolö e hala has ranoui limiou a manka a man niga te singo uamia limiou i tanen.
23398	MAT 7:13	“Alimiou go tasu mia tara tamana a tekteki. A tamana a pannen e la uana tara han a omi, na a parpara koru a katuun te tasu ria tara tamana teka.
23401	MAT 7:16	Alimiou e tatei tara marei sila ramoien tara man hua i taren. E hana, u katuun e antunan patsiki hase ria a huana u grep tara latu a hihitoka? Na a huana u fik tara latu a kits?
23402	MAT 7:17	A man ruei a man niga e hua haniga hasir, na man ruei a man omi e hua homi hasir.
23407	MAT 7:22	Nonei turu Lan teka, a parpara a katuun e poeiena romana i tar, ‘O Tsunono, o Tsunono. Alam u hihatuts silaia tara solomölö na lam u tsuga ba has raia u liliahanei u omi tara solomölö, na lam u kato sila has naia a man hiharöto tara solomölö.’
23408	MAT 7:23	Ba lia te ranga meragouen bate poeiegu, ‘Alia ema atei sil ragi limiou. La ba namou lia! Alimiou u katuun u omi.’”
23409	MAT 7:24	Be Iesu e ranga lenina me poeiena, “A katuun te hengoena u raranga i tar, bate kukutie nen e here nei a katuun a atei te hatakeia a luma i tanen ieluna u lapo.
23417	MAT 8:3	Be Iesu e hasoa nena a limanen ba nonei e sebele nen. Me poeiena, “Alia e ngilegu. Alö go gogoso!” Ema mala pinatöai ba toba i tanen te taiana.