23256	MAT 2:18	“ẽmã tỹ Ramá tá ẽg tóg vẽnh kygfỹ mẽnh mũ, vẽsỹrénh mág ke gé. Raquel fi krẽ ag vỹ tũ' he kãn, hã kỹ fi tóg vẽsỹrénh mũ,” he ja tóg nĩ.
23302	MAT 4:24	Hã kỹ ti kãme tóg vẽnh kar kri rũm mũ sir, ga tỹ Síria tá ke kar kri. Kỹ ag tóg sir ũn kagyga ag tatĩ kãmũ mũ, ti to, vẽnh kaga vẽnh mỹ han mũ ag mré hã, kỹ tóg ag tỹ há' he kãn mũ sir. Vẽjagrẽ kórég ag pan kãn tóg mũ gé. Ũ ter tĩ han tĩ ag tỹ tóg há' he mũ gé, ũn kãnhgrĩn kỹ nỹtĩ ag tỹ ke gé, fag kar tỹ ke gé.
23307	MAT 5:4	“Topẽ vỹ ãjag ve há han mũ, ãjag fỹn kỹ. Kỹ tóg ãjag fỹ ẽn tỹ tũ' henh ke mũ,” he tóg.
23312	MAT 5:9	“Topẽ vỹ ãjag ve há han mũ, ãjag tỹ jagnẽ krĩ tỹ kãnhvy' hen kỹ. Kỹ Topẽ tóg ãjag to: “inh krẽ ag vẽ,” henh ke mũ,” he tóg.
23316	MAT 5:13	“Sa ri ke ãjag nỹtĩ, ãjag tỹ ga kri mũn kỹ. Sa kãhór nĩn kỹ ẽg tóg tỹ sa há han mãn ki kagtĩg nỹtĩ. Kórég ti nĩgtĩ, ti kãhór nĩn kỹ. Kỹ ẽg tóg ti vãm tĩ sir, kỹ tóg tũ' he tĩ sir,” he tóg, Jesus ti.
23320	MAT 5:17	“Ãjag hỹn iso: “Moisés tỹ ẽg mỹ nén tó ja ẽn tỹ tóg, tũ' he sór mũ',” he mũ. “Hã tũ vẽ. Sỹ ki króm kãn sór vẽ,” he tóg.
23321	MAT 5:18	“Topẽ vỹ, ti jykre ẽn tỹ tũ' henh ke tũ nĩ, ga tỹ ver tũ' he tũ nĩn kỹ. Sỹ ki króm kãn ke vẽ, kỹ tóg ki krov kãn kỹ nỹnh mũ, mỹr, ha mẽ,” he tóg.
23322	MAT 5:19	“Kỹ ãjag tỹ ti vĩ pir tỹ tũ' hen kỹ tóg kórég nĩ. Vẽnh kar krẽm ke vỹ tỹ ãjag nỹtĩnh mũ, gen kỹ. Ãjag tỹ hã ra han kãn kỹ ãjag tóg tỹ, ũn mág nỹtĩnh mũ,” he tóg.
23364	MAT 6:13	Kỹ ẽg tỹ ã vĩ mranh sór kỹ ẽg kren han nĩ, ẽg tỹ mranh tũ nĩ jé. Nén-Kórég jo ẽg vem nĩ. Ã hã ne tóg tar nĩ'. Ã hã ne tóg mág nĩ inhhã'. Ã jykre tóg tũ' henh ke tũ nĩ,” hem nĩ, Topẽ mỹ,” he tóg.
23391	MAT 7:6	“Hã ra kasor jykre ri ke ag mỹ Topẽ jykre sĩnvĩ ẽn tó tũg nĩ. Porko jykre ri ke ẽn ag mỹ ke gé, fag mỹ ke gé. Jykre kavéj ag nỹtĩ, hã kỹ ag tóg, Topẽ jykre to é henh ke mũ. Tỹ tũ' he sór ag tóg tĩ, ti sãn kỹ, kar kỹ ag tóg sir, ã to jũ sór mũ gé, ha vem nĩ, ã tỹ ag mỹ Topẽ jykre sĩnvĩ tó ja hã ra,” he tóg, Jesus ti.
23416	MAT 8:2	Kỹ vãhã ũ tóg ti tá jun mũ. Vẽnh kaga kren vãnh han kỹ tóg nĩ, vẽnh kaga tỹ lepra he mũ ẽn. Kỹ tóg ti krẽm grĩnh ke kỹ ti mỹ: “Senhor,” he mũ. “Ã mỹ isỹ há' he sór tũ'? Ã hã tóg isỹ há henh ke mũ, ã tỹ isỹ há' he sór kỹ,” he tóg ti mỹ.
23417	MAT 8:3	Kỹ Jesus tóg ti mỹ: “he,” he mũ. “Há' he ja há ã tóg nĩ,” he tóg ti mỹ. Kỹ tóg ti kaga kren vãnh ẽn tỹ há' he mũ vẽsỹmér. Jãnhkri' he tóg mũ, ti fár ti.
23418	MAT 8:4	Kỹ Jesus tóg ti mỹ: “ker ũ mỹ tó hẽ',” he mũ. “Ha tĩg. Topẽ tũ ki rĩr tĩ hã mỹ tóm nĩ. Kỹ Topẽ mỹ Moisés tỹ vãsỹ ẽg mỹ nén tó ja ẽn nĩm nĩ. Hã tugrĩn vẽnh kar vỹ ã tỹ há' he mũ tag ki kanhrãn mũ,” he tóg ti mỹ. Kỹ tóg tĩ mũ sir.
23421	MAT 8:7	Kỹ tóg ti mỹ: “kỹ inh hỹn ã mré ti venh tĩg mũ ha, sỹ ã mỹ ti tỹ há' he jé,” he mũ.
23422	MAT 8:8	Hã ra tóg: “ã mỹn hỹn jagy nĩ, ã tỹ inh ĩn kã ki sãn ke ti, isỹ tỹ fóg nĩn kỹ,” he mũ. “Ã vĩ pir ki tóg há' henh mũ. Ã vĩ hã tỹ ã tóg ti tỹ há' henh ke mũ,” he tóg.
23423	MAT 8:9	“Ha vé, tỹ sóg pã'i krẽm ke nĩ gé, kỹ soldado ag tóg tỹ inh krẽm ke nỹtĩ gé. Hã kỹ sóg pã'i jykre ki kanhró nĩ. Isỹ soldado ũ mỹ: kutĩg, hen kỹ tóg tĩ mũ. Sỹ ti mỹ: kunĩg, hen kỹ tóg kãtĩ mũ gé. Isỹ inh camarada mỹ: tag han ra, hen kỹ tóg han tĩ. Inh vĩ tỹ sóg ag jẽgnẽg tĩ. Ã vĩ hã tỹ ã tóg ti tỹ há' henh ke mũ,” he tóg.
23427	MAT 8:13	Kỹ tóg capitão mỹ: “Inh ki rã kỹ ã tóg jẽ nĩ,” he mũ. “Hã kỹ ã tóg venh ke mũ sir. Ã camarada tỹ inh hur há' hé,” he tóg. Kỹ tóg tĩ mũ sir. Jesus tỹ ti mỹ tó mũ ẽn hã kã tóg há' he ja nĩ.
23429	MAT 8:15	Kỹ tóg fi nĩgé mẽg mũ sir. Kỹ fi rỹg ẽn tóg tũ' he mũ sir. Kỹ fi tóg nĩ kỹ ag ki rĩr mũ sir.
23430	MAT 8:16	Kuty ẽn kã ag tóg ũn jagrẽ kórég ag tatĩ kãmũ mũ, ti to. Kỹ tóg ag mỹ vĩ mũ, kỹ ag jagrẽ tóg pa kãn mũ sir. Ũn kagyga ag tỹ há' há' he tóg mũ gé sir, fag ke gé.
23431	MAT 8:17	Hã ra tag tóg rán kỹ nĩ gé. Vãsỹ Topẽ vĩ tó tĩ tỹ Isaías vỹ tag rán ja nĩ, ha mẽ: “ẽg kaga nỹtĩn kỹ tóg ẽg tỹ há' há' he tĩ, ti tỹ ẽg jagfy jagtar tugrĩn,” he ja tóg nĩ.
23440	MAT 8:26	Kỹ tóg ag mỹ: “ãjag tỹ nejé mũmẽgmẽg nẽ? Ãjag mỹ inh ki ge há han tũ'?“ he mũ. Kỹ tóg nĩ mũ sir, jẽgnẽ kỹ tóg goj mỹ vĩ mũ, kóho mỹ. Kỹ tóg tũ' he mũ sir. Katy' he tóg mũ, katy tãvĩ tóg tĩ mỹr, ha mẽ.
23446	MAT 8:32	Kỹ tóg ag mỹ: “he,” he mũ. Kỹ ag tóg porko ag ki ge mũ, Nén-Kórég ag. Kỹ vãhã porko ag tóg, rán ki re kãn mũ sir, goj nig mág ki ag tóg vár mũ. Nãgnãr kãn ag tóg mũ sir, tũ' he ag tóg mũ sir, mỹr, ha mẽ.
23450	MAT 9:2	Ti tỹ ti jamã tá jun kỹ ag tóg vãhã, ti mỹ ũn kãnhgrĩ vyn kỹ junjun mũ. Kỹmỹ kri tóg nỹ nĩ. Kỹ Jesus tóg, ag tỹ ti ki ge kỹ nỹtĩ vég mũ sir. Hã kỹ tóg ũn kãnhgrĩ ẽn mỹ: “inh kósin',” he mũ. “Ã fe tỹ há' hé. Ã tỹ Topẽ vĩ mranh ja ẽn tỹ tũ' hen hã vẽ ha,” he tóg.
23453	MAT 9:5	“Ũ tĩg vãnh tag mỹ sóg: ã tỹ Topẽ vĩ mranh ja tỹ tũ' hen vẽ ha,” he mũ. “Sỹ ti mỹ: nĩ ra, tĩg ra, henh ke vẽ gé. Hã ran mỹ ãjag mỹ vẽnh mỹ?” he tóg.
23465	MAT 9:17	Kỹ tóg ag mỹ: “kỹ vinho vỹ ge nĩgtĩ gé,” he mũ gé. “Ẽg pijé uva me kajãg mũ tỹ nén ũ fár tỹ sako há si ki kujẽg tĩ'. Ke tũ nĩ mũ ra tóg, kunãnh kỹ jaran kenh mũ. Kỹ vinho ẽn tóg tũ' henh mũ, sako ke gé. Vinho kajãg mũ tỹ nén ũ fár tãg ki kujẽn ke vẽ mỹr',” he tóg. Ti tỹ ti jykre tãg tón hã vẽ gé.
23469	MAT 9:21	Ẽn fi vỹ: “sỹ ti kur mẽ kỹ inh hỹn hẽn ri ke mũn há' henh mũ,” he mũ, to jykrén kỹ. Kỹ fi tóg ti kur tóv mẽg mũ sir.
23470	MAT 9:22	Hã ra Jesus tóg vĩrĩn ke kỹ fi vég mũ. Kỹ tóg fi mỹ: “inh kósin',” he mũ. “Kamẽg tũg nĩ. Ã tỹ inh ki rã kỹ ã tóg há' henh ke mũ,” he tóg. Kỹ fi tóg há' he mũ sir vẽsỹmér, ha mẽ.
23476	MAT 9:28	Kỹ Jesus tóg ĩn ũ kã ra rã mũ sir. Kỹ ũn kyvó ẽn ag tóg ti nón ge mũ gé sir. Kỹ tóg ag mỹ: “inh mỹ ãjag tỹ há' henh mũ'?“ he mũ. Kỹ ag tóg ti mỹ: “hỹ,” he mũ.
23477	MAT 9:29	Kỹ tóg ag kanẽ mẽgmẽg mũ sir, ti nĩgé tỹ. Kỹ tóg ag mỹ: “ãjag tỹ inh ki ge kỹ nỹtĩn kỹ ãjag tóg há' henh mũ,” he mũ.
23478	MAT 9:30	Kỹ ag kanẽ tóg há' he mũ sir. Ẽvãnh há' he ag tóg mũ sir. Kỹ tóg ag mỹ vĩ tar han kỹ: “ker ũ mỹ tó hẽ',” he mũ.
23481	MAT 9:33	Kỹ Jesus tóg, ti jagrẽ kórég kutẽm mũ sir. Kỹ tóg vĩ há' he mũ sir. Kỹ tóg vẽnh kar mỹ e tĩ. “Ge ve ja tũ ẽg tóg nỹtĩ, ẽg povo kar kãmĩ,” he ag tóg mũ.
23494	MAT 10:8	Ũn kaga ag tỹ há' hem nĩ. Ũn kãgter mũ ag rĩnrĩn mãn nĩ gé. Ũn kaga kren vãnh ẽn kren han nĩ. Vẽjagrẽ kórég pan nĩ gé. Ãjag mỹ sóg ge ra inh jykre nĩm mũ, hã kỹ ag mỹ: “inh mỹ kajãm,” he tũg nĩ.
23538	MAT 11:10	Topẽ vỹ ti jẽnẽ, ti tỹ ijo tĩg jé. Hã kỹ tag tóg, ti to rán kỹ nĩ gé: “ha vé, ã jo sóg ũ jẽnẽnh ke mũ, ti tỹ vẽnh kar jykre tỹ há' hen jé, ã tĩg ken jo. Ag jyvẽn jé tóg ke mũ, kỹ tóg ẽpry kure ri ke nĩ,” he ja tóg nĩ, Topẽ ti, João to.
23556	MAT 11:28	“Ãjag tỹ Topẽ vĩ ki króm ki kagtĩg nỹtĩ tugrĩn jagtar nỹtĩn kỹ iso kãmũ jẽg. Nén ũ tỹ ãjag mỹ jagy tĩn kỹ iso kãmũ jẽg. Ãjag krĩ tỹ sóg kãnhvy' henh ke mũ mỹr, ha mẽ,” he tóg.
23557	MAT 11:29	“Inh mré kãmũ jẽg. Ãjag kanhrãn jé sóg ke mũ. Komẽr hã sóg vĩ tĩ. Inh pijé vẽsỹ ũn mág han tĩ'. Vĩ tar han vãnh sóg nĩ. Ãjag tỹ iso kãmũ kỹ ãjag krĩ vỹ há' henh mũ, ha vem nĩ.
23571	MAT 12:13	Kỹ tóg ũn nĩgé tóg ẽn mỹ: “ã nĩgé tỹ krỹg' hé,” he mũ. Kỹ tóg tỹ krỹg' he kỹ há' he mũ sir.
23573	MAT 12:15	Hã ra tóg ki kanhró nĩ, ag tỹ ti tén sór ẽn ki. Kỹ tóg tá kãkutẽ mũ sir. Ti tĩg kỹ ũn tỹ hẽn ri ke ag tóg, ti nón mũ mũ, ũn kagyga ag ke gé, fag ke gé. Kỹ tóg ag tỹ há' he kãn mũ sir, fag tỹ ke gé.
23574	MAT 12:16	Kỹ tóg ag mỹ: “ker isỹ ãjag tỹ há' he tag kãmén hẽ',” he mũ.
23580	MAT 12:22	Kejẽn ag tóg, Jesus to ũ pére kãmũ mũ, ũn kyvó. Vĩ vãnh tóg nĩ gé. Hã ra tóg jagrẽ kórég nĩ gé. Kỹ Jesus tóg ti tỹ há' he mũ sir. Kỹ tóg vĩ há' he mũ sir. Vãhã tóg ve há han mũ gé sir.
23582	MAT 12:24	Kỹ Pã'i ag tóg mẽg mũ sir, Jesus tỹ ti tỹ há' he ẽn ti. Hã kỹ ag tóg Jesus to: “jagrẽ kórég ti nĩ,” he mũ. “Nén-Kórég ag pã'i tỹ ti jagrẽ nĩ, Belzebu ẽn tỹ. Hã kỹ tóg Nén-Kórég ag pan tĩ,” he ag tóg mũ.
23584	MAT 12:26	Ge ti nĩ gé. Nén-Kórég tỹ Nén-Kórég ũ kutẽm kỹ tóg Nén-Kórég ag tỹ jagnẽ kato tẽgtẽ han mũ sir. Kỹ ag tóg jagnẽ tỹ tũ' henh ke mũ gé, Nén Kórég ag.
23615	MAT 13:7	Ti fy ũ tóg, sónh kã ki krãn kỹ nĩ gé, kỹ sónh tóg ti mré mur mũ, kỹ tóg ti kri rũm ke mũ. Kỹ tóg tũ' he mũ sir.
23620	MAT 13:12	Hã kỹ tóg ge nĩ. Ũ tỹ nén ũ to jykrén há han kỹ tóg ũ to jykrén mãn', ũ to jykrén mãn' he tĩ. Komẽr hã tóg to jykrén kãn ke mũ. Ũ tỹ nén ũ to jykrén tũ nĩn kỹ tóg ti mỹ tũ tĩ, ti tỹ to jykrén sĩ han mũ ra.
23623	MAT 13:15	Povo tag ag vỹ, krĩ tũ nỹtĩ. Nĩgrẽg kutu ag nỹtĩ. Kanẽ kyvó ag nỹtĩ gé, ag tỹ inh ki ge sór tũ nỹtĩn kỹ. Hã kỹ sóg ag tỹ há' henh ke tũ nĩ gé,” he tóg, Topẽ ti, he ja tóg nĩ, Isaías ti, povo tag to,” he tóg.
23627	MAT 13:19	Ũ tóg kejẽn, ón kỹ Topẽ vĩ mẽg mũ. Hã ra tóg to jykrén tũ nĩ. Kỹ Nén-Kórég vỹ, ti mỹ tỹ tũ' he mũ sir, ti tỹ mẽ ja ti tỹ. Kã jatu tóg nĩ sir. Nén fy tỹ ẽmĩn kri kutẽ mũ ẽn hã vẽ.
23630	MAT 13:22	Ti fy ũ tóg sónh kã ki krãn kỹ nĩ. Ũ vẽ gé. Topẽ vĩ mẽg tóg mũ gé. Hã ra tóg ti rãnhrãj hã mĩ ẽkrég mũ sir. Nén kar to én tóg mũ sir. Ón kỹ tóg riko nĩ sór mũ. Hã kỹ tóg Topẽ vĩ kã jatu' he mũ sir. Kỹ tóg kanẽn há han tũ nĩ sir.
23680	MAT 14:14	Kỹ Jesus tóg kafã ũ tá vag ke mũ, kỹ tóg tá ũn e ẽn ag vég mũ sir, ti nón kãmũ mũ ẽn ag. Kỹ ag tóg ti mỹ jagtar nỹtĩ. Ag jagãgtãn kỹ tóg, ag kã mĩ ũn kagyga ag tỹ há' he mũ sir.
23698	MAT 14:32	Kỹ ag tóg canoa kã ki ge mũ sir. Kỹ kãka ẽn tóg tũ' he mũ sir, vẽsỹmér.
23702	MAT 14:36	Kỹ ag tóg Jesus mỹ to vĩ mũ, ag tỹ ti kur tóv mẽ jé. Kỹ ũ tỹ ti kur mẽg mũ ag tóg há' he kãn mũ sir.
23708	MAT 15:6	Hã kỹ ãjag tóg Topẽ vĩ tỹ tũ' he tĩ, ãjag tỹ ãjag jykre si hã han kỹ,” he tóg.
23726	MAT 15:24	Hã ra tóg ag mỹ: “hỹ,” he mũ. “Topẽ vỹ inh jẽnẽ, sỹ Israel ag hã tỹ há' he jé, ũ tỹ Israel kã mĩ Topẽ vĩ mranh mũ ag tỹ,” he tóg. Hã ra fi tóg tỹ fóg nĩ, hã kỹ Jesus tóg fi ve sór tũ nĩ.
23729	MAT 15:27	Kỹ fi tóg: “hỹ, hã ra kasor sĩ tóg ẽmĩ vár ko tĩ,” he mũ. “Hã kỹ inh mỹ ẽmĩ vár nĩm, hã vỹ: inh kósin fi tỹ há' henh ke, he mũ,” he fi tóg.
23730	MAT 15:28	Kỹ tóg fi mỹ: “ã hã ne tóg inh ki rã há han'. Hã kỹ sóg ã mỹ han mũ,” he mũ. Ti tỹ tag tó kỹ fi kósin fi tóg há' he mũ, óra ẽn hã kã.
23732	MAT 15:30	Kỹ ũn tỹ hẽn ri ke ag vỹ tá junjun mũ, ũn kagyga ag ke gé, ũn kãnhgrĩ ag ke gé, fag mré hã. Ti ki ag tóg junjun mũ, kỹ tóg ag tỹ há' he kãn mũ.
23759	MAT 16:18	“Ha mẽ, tỹ ã Pedro nĩ, hã vỹ: pó, he mũ. Pó tag kri sóg isũ han mũ, tỹ ĩn ri ke ẽn, hã vỹ: “ã tỹ ag mỹ inh vĩ tó tugrĩn ag tóg inh ki genh ke mũ,” he mũ. Kỹ ũ tỹ inh ki ge kỹ nỹtĩ ag vỹ tỹ Topẽ ĩn ri ke nỹtĩ. Ag fár tỹ tũ' he mũ ra ag tóg rĩnrĩr mãn ke mũ. Tũ' henh ke tũ ag tóg nĩ.
23785	MAT 17:16	Kỹ sóg ã mré mũ tĩ ag mỹ ti ven ja nĩgtĩ, ag tỹ ti tỹ há' he jé, hã ra ag tóg ti tỹ hẽ ri ke ja tũ nĩ,” he tóg.
23787	MAT 17:18	Ag tỹ ti mré kãmũ kỹ Jesus tóg ti jagrẽ mỹ vĩ jũ han mũ sir, ti tỹ ti tovãnh jé. Kỹ tóg vẽsỹmér ti ki kãkutẽ mũ sir, kỹ tóg há' he mũ vãhã, kyrũ ti.
23823	MAT 18:27	Kỹ ti patrão tóg ti jagãgtãn mũ sir, kỹ tóg ti tovãnh mũ. Ti mỹ tóg ti név tỹ tũ' he mũ. “Ha tĩg, jatun mỹ,” he tóg mũ sir.
23828	MAT 18:32	Kỹ ti patrão tóg ti jé prẽr mũ sir. Kỹ tóg ti to jũ mũ. “Vẽjykre kórég pẽ han ã. Ã név mág tỹ sóg tũ' he vẽ, ã tỹ inh mỹ to vĩn kỹ.
23892	MAT 20:31	Kỹ ag tóg ag to jũgjũ mũ, ti nón mũ ũ ag. “Mẽ kã nỹtĩ,” he ag tóg mũ. Hã ra ag tóg prẽr mãn', prẽr mãn' he mũ, jamã há ra. “!..Senhor, Davi krẽ'krẽ', ẽg jagãgtãn ra..!“ he ag tóg mũ.
23895	MAT 20:34	Kỹ Jesus tóg ag jagãgtãn kỹ ag kanẽ mẽgmẽg mũ sir. Kỹ ag tóg ẽvãnh há' he mũ sir. Ti nón ag tóg mũ mũ sir.
23909	MAT 21:14	Kỹ ũn kyvó ag tóg ti tá junjun mũ sir, ũn kãnhgrĩ ag ke gé, ti tỹ Topẽ ĩn krẽm jẽ ra. Kỹ tóg ag tỹ há' he kãn mũ sir.
23910	MAT 21:15	Hã ra Topẽ tũ ki rĩr tĩ ag tóg tá nỹtĩ, Topẽ vĩ to ẽg kanhrãn tĩ ag ke gé. Ti tỹ ag tỹ há' he vég ag tóg mũ. Gĩr ag vĩ mẽg ag tóg mũ gé. Topẽ ĩn krẽm ag tóg nỹtĩ, gĩr ag, kỹ ag tóg Jesus mỹ prẽnprẽr mũ. “!..Viva, Davi krẽ'krẽ..!“ he ag tóg mũ, prẽnprẽr kỹ. Kỹ pã'i ag tóg ti to jũgjũ mũ.
23939	MAT 21:44	“Ũ tỹ hẽn ri ke ag vỹ pó tag kri vár ke mũ, kỹ ag tóg tũ' henh ke mũ. Kỹ pó tag vỹ ũ tỹ hẽn ri ke ag kri kutẽnh ke mũ gé, kỹ tóg ag tỹ tũ' he kãn mũ,” he tóg, Jesus ti. Ti tỹ ẽg tỹ ti ki rã tũ tugrĩn nũgme ki vár ke tón hã vẽ.
24033	MAT 24:7	Nação ag tỹ jagnẽ kato tẽgtẽnh ke vẽ, pã'i ag ke gé. Ũ tỹ hẽn ri ke ag tỹ, jagnẽ to jũnh ke vẽ gé. Ga tỹ ragra ke tỹ hẽn ri ke han ke vẽ, ẽmã tỹ hẽn ri ke mĩ. Vẽjẽn tỹ tũ' henh ke vẽ gé.
24061	MAT 24:35	Kanhkã vỹ tũ' henh ke mũ, ga ti ke gé. Jãvo inh vĩ vỹ tũ' henh ke tũ nĩ,” he tóg.
24106	MAT 25:29	“Ũn tũ mág vỹ ũ mãn mãn ke mũ, kỹ tóg ti mỹ tũ' henh ke tũ pẽ nĩ. Jo ũn tũ sĩ ẽn tóg ti tũ kren kãn ke mũ,” he tóg.
24113	MAT 25:36	Inh kur tũ nĩn kỹ ãjag tóg inh mỹ kur vin. Inh kaga nĩn kỹ ãjag tóg inh ki rĩr' he ja nĩgtĩ. Ise kỹ jẽ kỹ ãjag tóg inh venh mũ' he ja nĩgtĩ gé, he jé sóg ke mũ ag mỹ,” he tóg.
24120	MAT 25:43	Isỹ ãjag ĩn tá jun mũ ra ãjag pijé, inh mỹ: kãrã ra, he ja nĩgtĩ'. Isỹ kur tũ ra ãjag pijé, inh mỹ ũ vin'. Inh kaga nỹ ra, ise kỹ jẽ ra ãjag pijé, inh venh mũ' he ja nĩgtĩ', he jé sóg ke mũ,” he tóg.
24123	MAT 25:46	Kỹ ag tóg jagtar ke mũ, hã ra tóg tũ' henh ke tũ nĩ, ag jagtar ke ti. Ag jãvo ũn jykre há ag vỹ rĩr krỹg ja tũ ẽn venh ke mũ,” he tóg, Jesus ti.
24162	MAT 26:39	Kỹ tóg tĩg sĩ han kỹ mũg ke mũ sir, ga kri tóg nỹ mũ. Topẽ mré tóg vĩ mũ. “Panh',” he tóg. “Mỹ ã tỹ inh jagtar ke tag tỹ tũ' he jãvãnh?“ he tóg. “Hã ra isỹ ã mỹ nén to vĩ mũ tag han tũg nĩ. Ã tỹ nén han ke mũ ẽn hã han nĩ,” he tóg.
24165	MAT 26:42	Kỹ tóg tĩg mãn mũ sir, kỹ tóg Topẽ mré vĩ mãn mũ. Kỹ tóg: “panh',” he mãn mũ. “Ã tỹ inh jagtar ke tag tỹ tũ' he jãvãnh tĩn kỹ sóg jagtar ke mũ. Ã tỹ isỹ nén han ke mũ ẽn han nĩ,” he tóg.
24188	MAT 26:65	Kỹ pã'i mág tóg, jũ kỹ ti kur tỹ jaran' ke mũ sir. Kỹ tóg: “Topẽ kato vĩ kónãn ti huri,” he mũ. “Mẽ kãn ẽg tóg, kỹ ẽg tóg ũ tỹ ti jykre kórég tónh ke mũ ũ jãvãnh mãn ke tũ nĩ ha.
24243	MAT 27:45	Rã tỹ ẽg nĩno kã sa ra tóg kuty' he mũ sir, ga kar mĩ hã. Kuty ẽn tóg óra tãgtũ han mũ.
24246	MAT 27:48	Kỹ ũ tóg vẽnhvãg mũ, kỹ tóg esponja mrãn mũ sir, vinho kaja pir tỹ. Ka jurỹn kỹ tóg, tỹ kusón kỹ ti mỹ ven mũ sir, ti tỹ ki ũnh' ũnh' he jé.
24294	MRK 1:10	Ti tỹ goj kãtá kãkutẽ kỹ kanhkã vỹ nor' he mũ sir vẽsỹmér. Kỹ Jesus tóg Topẽ kuprĩg vég mũ. Sórãg ri ke tóg kãtére mũ. Kỹ tóg Jesus kri góm ke mũ sir.
24315	MRK 1:31	Kỹ tóg fi nĩgé kãgmĩ kỹ fi nĩm mũ. Kỹ fi rỹ ẽn tóg tũ' he mũ sir. Ag ki fi tóg rĩr mũ sir, Pedro má fi.
24318	MRK 1:34	Kỹ Jesus tóg ag tỹ há' há' he kãn mũ sir, fag tỹ ke gé. Vẽjagrẽ kórég pan kãn tóg mũ gé. Kỹ vẽjagrẽ kórég ag tóg ti mỹ vĩ sór mũ, ag tỹ ti ki kanhró nỹtĩn kỹ. Hã ra tóg ag mỹ: “vĩ tũg ra!“ he mũ.
24324	MRK 1:40	Kỹ kejẽn ũn kaga kren vãnh vỹ ti to kãtĩ mũ, vẽnh kaga tỹ lepra han kỹ nĩ ũ. Kỹ tóg ti mỹ: “ã mỹ isỹ há' he sór tũ'?“ he mũ. “Ã hã tóg inh mỹ isỹ há' henh ke nĩ,” he tóg.
24325	MRK 1:41	Kỹ tóg Jesus mỹ jagtar nĩ. Kỹ tóg ti nĩgé tỹ ti mẽ kỹ ti mỹ: “hej, há' he jé ã tóg ke mũ,” he mũ.
24326	MRK 1:42	Kỹ ti kaga kren vãnh ẽn tóg tũ' he mũ vẽsỹmér. Kỹ tóg jãnhkri nĩ sir, ti fár ti.
24328	MRK 1:44	“ker ũ mỹ tó hẽ'. Topẽ tũ ki rĩr tĩ hã mỹ tóm nĩ, kỹ Topẽ mỹ Moisés tỹ vãsỹ ẽg mỹ nén tó ja ẽn nĩm nĩ. Hã tugrĩn vẽnh kar vỹ ã tỹ há' he mũ tag ki kanhrãn mũ,” he tóg.
24329	MRK 1:45	Ge ra ũn kaga ja ẽn tóg vẽnh kar mỹ Jesus tỹ ti tỹ há' he tó mũ sir. Kỹ ti kãme ẽn vỹ vẽnh kar kri rũm mũ. Hã kỹ Jesus tóg ẽmã ũ ki vẽnh ven tũ nĩgtĩ. Ẽmã tũ mĩ tóg tĩgtĩ, hã ra ag tóg ẽmã kar tá ti to kãmũ tĩ.
24336	MRK 2:7	“ti tỹ ne tó nẽ? “ he mũ, jagnẽ mỹ, komẽr hã. “Topẽ to vĩ kónãn vẽ. Topẽ hã ne ti pin kỹ ẽg tỹ Topẽ vĩ mranh tỹ tũ' he há nĩnh mũ. Ti tỹ vẽsỹ Topẽ han vẽ,” he ag tóg mũ.
24351	MRK 2:22	“Kỹ vinho vỹ ge nĩgtĩ gé,” he tóg mũ gé. “Ẽg pijé vinho kajã tỹ ti fár si tỹ sako ki kujẽg tĩ mỹr'. Ke tũ nĩ mũ ra tóg kunãnh kỹ jarn kenh mũ. Kỹ vinho tóg tũ' henh mũ, sako ti ke gé. Vinho kajã tỹ ti fár tãg ki kujẽn ke vẽ mỹr,” he tóg, ti jykre tãg to.
24359	MRK 3:2	Kỹ ag tóg ti tugnỹm mũ sir. “Kema ti tỹ vẽnhkán ke kurã ki ti tỹ há' he ve jé,” he ag tóg mũ. Ag tỹ pã'i ag mỹ ti tó sór vẽ, ti tỹ vẽnhkán ke kurã ki Topẽ vĩ mranh kỹ.
24362	MRK 3:5	Kỹ tóg jũ mũ sir. Fe kaj tóg nĩ sir, ag krĩ tũ nỹtĩn kỹ. “Ã nĩgé tỹ krỹg' hé,” he tóg ti mỹ. Kỹ tóg há' he mũ sir, vãhã.
24367	MRK 3:10	Ũ tỹ hẽn ri ke tỹ tóg há' he ja nĩ. Hã kỹ ũn kagyga tỹ hẽn ri ke ag tóg ti pénĩn nỹtĩ. Ag tỹ ag nĩgé tỹ ti mẽ sór vẽ, fag ke gé.
24383	MRK 3:26	Satanás krẽm ke ag tỹ jagnẽ kato tẽ kỹ ag tóg jagnẽ tỹ tũ' henh ke mũ gé, kỹ tóg tũ' he mũ sir, Satanás ti.
24407	MRK 4:15	“Ti fy ũ vỹ ẽmĩn kri kutẽ mũ. Topẽ vĩ mẽg mũ ũ ag vẽ. Ag tỹ mẽg mũ ra Satanás tóg ag mỹ tỹ tũ' he mũ, vẽsỹmér. Kỹ ag tóg ki kagtĩg nỹtĩ ha. Ẽpry kri kutẽ mũ ri ke ag hã vẽ sir.
24411	MRK 4:19	Hã ra ag tóg, ag rãnhrãj hã mĩ ẽkrég mũ, ón kỹ riko nĩ sór kỹ. Nén ũ kar to ag tóg én tĩ, hã kỹ Topẽ vĩ tóg, ag mỹ tũ' he mũ sir. Kỹ ag tóg kanẽn há han tũ nĩ.
24417	MRK 4:25	“Ũ tỹ ti vĩ to jykrén há han mũ ẽn tar han jé tóg ke mũ. Jãvo tóg ũ tỹ nén ũ to jykrén há han tũ nĩn kỹ tóg ti mỹ tũ' he mũ sir, ti tỹ nén ũ to jykrén sĩ han mũ ra,” he tóg.
24421	MRK 4:29	Ti tỹ tóg' he kỹ tóg krég mũ sir, ke tũ nĩ kỹ tóg fãg mũ sir,” he tóg.
24431	MRK 4:39	Kỹ tóg rĩr mũ sir, kỹ tóg kóho mỹ vĩ tar han mũ, ti mỹ: “krỹg he ra,” hen kỹ. Kỹ tóg tũ' he mũ. Katy' he tóg mũ.
24452	MRK 5:19	Hã ra tóg ti mỹ: “nejé. Ha tĩg, ã ĩn ra, ã tỹ ã mré ke ag mré nĩ jé,” he mũ. “Ag mỹ kãmén nĩ, ẽg jóg mág tỹ ã tỹ há' he mũ ti, ti tỹ ã jagãgtãn mũ ti,” he tóg.
24453	MRK 5:20	Kỹ tóg tĩ mũ. Ẽmã tỹ Decápolis tá tóg Jesus tỹ ti tỹ há' he ẽn kãmén mũ. Kỹ tóg vẽnh kar mỹ e tĩ sir.
24456	MRK 5:23	Ti mỹ tóg: “inh kósin fi vỹ tũg sór mũ. Kunĩg, ã tỹ ã nĩgé tỹ fi mẽ jé, fi tỹ há' he jé, fi kren jé,” he mũ.
24459	MRK 5:26	Médico ag mỹ fi tóg vẽnh ven tỹ hẽn ri ke han, to fi tóg fi tỹ nén vãm kãn, hã ra fi tóg há' he tũ nĩ, ke han han fi tóg.
24461	MRK 5:28	Kỹ fi tóg: “sỹ hẽn ri ke mũn ti kur mẽg kỹ sóg há' henh mũ,” he mũ. Kỹ fi tóg vẽnh e kã mĩ tĩg kỹ ti nón ti kur mẽg mũ sir.
24462	MRK 5:29	Kỹ vãhã fi kyvénh tóg gám ke mũ sir, kỹ fi tóg ki kanhró nĩ, fi kaga tỹ há' he ẽn ti.