1	GEN 1:1	Dameŋ fufuŋkenao Anutuzi sambâŋ â mâreŋ bâfuac‐jofawec.
12	GEN 1:12	Mâreŋzi âke sueme nânâ monʒaŋ ʒariŋ wiac fuŋne fuŋne, ukic‐jeŋichec sasawa wefumbiŋ, â jâc fuŋne fuŋne fârihec â fârimaŋko ukic‐jeŋichec sasawa. Eme Anutuzi honeme biaŋkewec.
14	GEN 1:14	Tarame Anutuzi ʒiŋuc muwec: “Sambâŋko ʒoctamac fua raniŋ. Jaŋe hâcne ʒoaŋ â ŋafe bâtâc bacjofanʒepieŋ, ehuc hoemaŋ â sâko ʒoaŋ, gie bapa â jara irec dameŋ mufua‐nârehuc doma ranʒepieŋ!
16	GEN 1:16	Anutuzi iŋuc ehuc ʒoctamac sâko jajahec bâfuac‐jofawec, kâcɋene moc e ʒoaŋko micne barâ juocte â kâkâcɋene moc e ŋafeo micne barâ juocte. Erâ wâc bâpiŋ mâmâc bâfuac‐jopawec.
17	GEN 1:17	Jaŋe mâreŋ âke tamaeniŋte â ŋafe ʒoaŋ soŋaŋ‐jofahuc dapâc â tatamac bâtâc bacjofaniŋte Anutuzi sambâŋko hâcne râec‐jopawec.
21	GEN 1:21	Anutuzi hâwec qowi sâko mako mecne â wiac jujune fuŋne fuŋne opâmaŋko qiriŋhec foŋgopieŋ, â wipe fakechec fuŋne fuŋne, iŋuc bâfuac‐joparâ honeme biaŋkewec.
22	GEN 1:22	Eme Anutuzi ʒiŋuc muhuc jambuŋ‐jopawec: “Ŋoŋe ukichec erâ sawe mâririackehuc opâ hâwec sâcke‐fârenʒepieŋ â wipe jaŋe mâreŋ faio sawenʒepieŋ!”
25	GEN 1:25	Anutuzi hae qowi fuŋne fuŋne â kâte qowi fuŋne fuŋne erâ homa gisic wiac fuŋne fuŋne iŋuc hâcne bâfuac‐joparâ honeme biaŋkewec.
26	GEN 1:26	Eme Anutuzi ʒiŋuc muwec: “Ajoc! Nâŋâc nâŋâcne hawarire sâcko ŋic bâfuac‐jopanaŋ! Jaŋe hâwec qowi â sawa wipe â hae qowi â kâte qowi sasawa erâ homa gisic wiac mâreŋko babarâ jueŋgopieŋ jaŋe ŋicwofuŋ ejarenʒepieŋ!”
27	GEN 1:27	Eme Anutu e hawari‐ticnere sâcko ŋic bâfuawec hâcne. Ŋic â ŋokac bâfuac‐jofawec.
28	GEN 1:28	Erâ jambuŋ‐jofahuc ʒiŋuc jasawec: “Ɋârichec ehuc fua sawec erâ mâreŋ ŋefusucmahuc ruckenʒepieŋ. Ehuc hâwec qowi â sawa wipe â mâreŋ qowi gisic wiac sasawa ŋicwofuŋ ejarenʒepieŋ!”
29	GEN 1:29	Anutuzi iŋuc murâ ʒiŋuc jasawec: “No monʒaŋ wiac ukic‐ticne tie raekac â jâcfâri nânâne ukic‐ticnehec ʒi râe‐ŋactekopac, izi nânâ‐ŋekic ezejec.
30	GEN 1:30	Â mâreŋ qowi â sawa wipe â homa gisic wiac nokafehec bâfuac‐jopakicne, jaŋere nânâ ine sopâc hofâ qinʒiŋ wiac râekopac.” Eme iŋuc fuawec hâcne.
31	GEN 1:31	Eme Anutuzi wiac bâfuawec i hone‐fâreme biaŋne jâmbâŋ ewec. Eme hae mocwâc ŋaferâ fureme ʒoaŋ 6 tarawec.
32	GEN 2:1	Iŋuc hâcne ehuc sambâŋ â mâreŋ jahe kikefuŋ guru sâkofâc‐jekic jaŋehec bâfuac‐jopa‐fârekicne.
33	GEN 2:2	Eme ʒoaŋ 7 ira Anutuzi gie‐ticne batara‐fârehuc gie wiac bawec irec ŋemanaocte hombaŋ ŋewec.
35	GEN 2:4	Kecʒi sambâŋ â mâreŋ kikefuŋfâc‐jekic jaŋehec bâfuac‐jopa wefukicne irec binaŋ. Wofuŋ Anutuzi sambâŋ â mâreŋ bâfuac‐jofawec dameŋ ira jâc me monʒaŋ wiac fuŋne fuŋne mâreŋko mi fua rawec,
36	GEN 2:5	i Wofuŋ Anuture micte hoezi moc mi hewecte, â gie hesarac ee ŋic mi bâfuac‐jopakicnere iŋuc hâcne fowec.
42	GEN 2:11	Moc ʒâŋene Pisoŋ, izi Hawila mâreŋ orâŋke‐fârekac. Ira gol fokac.
44	GEN 2:13	Opâ ombâŋne moc ʒâŋene Gihoŋ. Eki Kusu mâreŋ orâŋke‐fârekac.
45	GEN 2:14	Â ombâŋne moc ʒâŋene Tigirisi, eki Asiria mâreŋ ʒoaŋ wewefu‐ticnao hurakac. Â ombâŋne moc ʒâŋe‐ticne Eufrata.
48	GEN 2:17	Fuŋne mamana jâc mocjaha ere fârine moc mi nâjâmbâŋkezemec! Sifu nâcmuo ine hâmo‐jâmbâŋkecmu.”
49	GEN 2:18	Eme Wofuŋ Anutuzi muwec: “Ŋic e buc jume mi biaŋkekac. Irec no ere sâc jaha âgo babafic‐ticne moc bâfuazepac!”
50	GEN 2:19	Wofuŋ Anutu e hae qowi â kâte qowi sasawa â sawa wipe sasawa mâreŋzi bacjoparâ ŋiczi ʒâŋe‐jeŋic weniŋuc muocmu i hone manac eocte ŋictao amec‐jopa fisiwec. Eme ŋiczi ʒâŋe‐jeŋic mufuahuc muocmu i foocte muwec.
51	GEN 2:20	Eme ŋic e hae qoqi â kâte qowi â sawa wipe sasawa jaŋere ʒâŋe mufârewec. E jahacne sâc âgo babafic‐ticne moc ine mi bâfuawec.
54	GEN 2:23	Jowa rame ŋiczi honerâ muwec: “Keʒi jâmbomac siec‐nane â biuc‐nane! E ŋickonec rokicnere ʒâŋene Ŋokac mucnezo.”
55	GEN 2:24	Irec hâcne ŋiczi neŋgoc mamac jahec‐ticne behec‐jofarâ ŋonâŋ‐ticnerao qohotame jahe maŋ sahac mocjaha erâ junicmu.
57	GEN 3:1	Wofuŋ Anutu e kâtere wiac jujune gâcne bâfuac‐jopawec jaŋere sâc jâuru‐fârehuc homare gibioczi fejâmbâŋkewec. Eme homa e ŋokac ʒiŋuc muhuc wiocnewec: “Jufuo jâc sasawa doma rakac irec fârine mi nânicte Anutuzi muwec me?”
58	GEN 3:2	Eme ŋokaczi homa âzâcnewec: “Nâhe jufuo jâcne jâcne doma rakac irec hândâŋne sâcne nanacte mana‐nâctekicne,
61	GEN 3:5	Anutu e ʒiŋuc manakac: Ŋohe hândâŋ i nâpire ʒâŋe‐ŋekic tâcneme e jahacne iŋucne erâ biaŋne â sâqocne irec fuŋne mana taranicmu.”
62	GEN 3:6	Eme ŋokaczi jâc honerâ ʒiŋuc manawec: Jâchândâŋ i nânâne biaŋ â hawarine hone aŋac eene, erâ wâc mamana bâbâfua‐ticnehec muhuc maname biaŋkewec. Iŋuc eku hândâŋ i batararâ nâwec. Nâhuc ŋowene râcneme nâwec wâc.
63	GEN 3:7	Nâpire ʒâŋe‐jekic tâcnewec. Tâcneme biuctac jupic i hone tarapic. Irec qoŋgeŋ rehaczi siŋiŋ furâ jomapic.
64	GEN 3:8	Eme ʒoaŋ otewehuc hae urueme Wofuŋ Anutu e jufuo hata jume fânâŋ‐ticne manapic. Manarâ ŋic â ŋonâŋ‐ticne jahe Wofuŋ Anuture hâwic‐jofame jufuo jâc ŋondeŋko soŋkepic.
67	GEN 3:11	Eki muwec: “Biuctac jukomec i mozi gazajec? Go jâchândâŋ mi nâcmurâ mupaŋke‐garepo i moc nâmec me?”
71	GEN 3:15	Erâ go â ŋokac ŋoherao kikisâ sanaŋ râekopac, izi ɋâricge â ɋâric‐ticne jaherao wâc fozejec. Eme eki qizecge âtenʒaŋneocmu, goki ine kike kiririŋne kinʒaŋnecmu.”
72	GEN 3:16	Ŋokac ine ʒiŋuc âzâcnewec: “Kiwechec juhaŋtec ʒâic bocjaha bâfua‐garepemu, eme gozi kicgukuhame naru motec rocjopazemec. Ŋowegere aŋacguha eki bomboŋ egarezejec.”
73	GEN 3:17	Adam ine ʒiŋuc âzâcnewec: “Go ŋonâŋgere dâŋ reŋkehuc jâchândâŋ mi nâjâmbâŋkecmurâ mupaŋke‐garepo i nâmec, irec gore ehuc mâreŋ sâweckekopac! Go ʒâic gie sâko tatara tâmiric bahuc nânâge bâfuazemec.
76	GEN 3:20	Eme ŋic e ŋonâŋ‐ticnere ʒâŋe Ewa muwec, e mâreŋko ŋic sasawa fuambeŋ nâŋâcne neŋgoc fuŋfuŋ ewec hâcne.
80	GEN 3:24	Wofuŋ Anutuzi ŋic ŋokac iŋuc jâpec‐jofame hurapic. Eme Edeŋ jufu gie ʒoaŋ wewefu‐ticnao bâbâricte ʒocbâruŋ âkendâŋnehuc kerubim jajahec jahe jujujâcte hata âte bâzickenicte soŋaŋ râec‐jofawec.
81	GEN 4:1	Eme ŋic e ŋonâŋ‐ticne Ewa ehec jume motec kiweckerâ Kaiŋ rowec. Rorâ ʒiŋuc muwec: “Anutuzi baficnume ŋokâ moc fua‐narekac.”
84	GEN 4:4	Â Abe e iŋuc jaha lamafâcne mârâc fufua irecnec moc hezurâ wokemaŋne rorâ bâzi rikewec. Eme Wofuŋzi Abe jahacne â bâzi‐ticne hone biaŋkewec.
85	GEN 4:5	Kaiŋ â bâzi‐ticne ine hone takirewec. Iŋuc eme Kaiŋ e mâretec aarickeme ʒâŋe maine enduŋkewec.
87	GEN 4:7	Go biaŋne jutec mana‐garepe sâckeocmu. Biaŋne mi jucmuo ine sâqocnezi motâc râpeo soŋkerâ ruc bagareocmu. E gore hâcne ecnekac, go ine aka hecnezemec.”
92	GEN 4:12	Hesarac gie batec mâreŋzi guec‐ticnere fârine sakare‐garezejec. Eme wise wise juhuc ra ju ware ju ezemec.”
96	GEN 4:16	Eme Kaiŋ e Wofuŋte maionec rarâ mâreŋ moc ʒâŋene Nodi, Edeŋ ʒoaŋ wewefu‐ticnao, ira juwec.
97	GEN 4:17	Eme Kaiŋ e ŋonâŋ‐ticne ehec jume motec kiweckerâ Enoko rowec. Eme Kaiŋ e hae moc barâ ŋokâ‐ticnere wase bahuc ʒâŋene Enoko jaha muwec.
102	GEN 4:22	Zila e iŋuc jaha motec kiweckerâ ŋokâ moc rowec ʒâŋene Tubali‐Kaiŋ, eki aeŋzi wiac fuŋne fuŋne bapa ŋicguru jaŋere fufuŋke ŋic â micne ewec. Tubali‐Kaiŋ seŋticnere ʒâŋe ine Nama.
103	GEN 4:23	Juku Lamec e ŋonâŋ jahec‐ticne hefârec‐jofarâ ʒiŋuc jasawec: “Ada â Zila, ŋohe hazec râerâ dâŋnane mananic! Ŋonâŋ jahec‐nane, ŋohe saoreŋ gae‐nane maŋkenic! Jâmbomac jâmbâŋ, wicte okacne ŋic moc qapo, â ʒâpâ nukicnere ine motec mac moc.
105	GEN 4:25	Adam e ŋonâŋ‐ticnehec mocwâc jume kiwechec erâ motec moc rowec. Eme ʒâŋe‐ticne ʒiŋuc manasuhuc Sete muwec: Kaiŋzi Abe qawecte ere âkehoc Anuturaonec ŋic ukic biaŋ mocwâc fisi‐narekac.
106	GEN 4:26	Eme Sete e iŋuc jaha ŋokâ moc fuacneme ʒâŋene Enosi muwec. Eme dameŋ ira hâcne ŋic jaŋe Wofuŋ ʒâŋe‐ticne bâtirihuc nunumucne gie i fuŋkembiŋ.
108	GEN 5:2	Ŋic â ŋokac bâfuac‐jofarâ ʒâŋe‐jekic ŋic â ŋokac iŋuc mujacterâ jambuŋ‐jofawec.
109	GEN 5:3	Eme ŋic e jara 130 bazuhame ere bifuŋko ŋokâ moc, e jahacne sâc â hawari iŋucne fuawec, eme ʒâŋe‐ticne Sete muwec.
128	GEN 5:22	Enoko e Anutuhec ʒuʒuhuc jâmbâŋ jupic. Enokozi ŋokâ‐ticne Metusela fuawec dameŋ irecnec jara 300 ʒuhuckerâ juhame ere bifuŋko naru motec gâcne fua fembiŋ.
135	GEN 5:29	Fuame ʒiŋuc muhuc ʒâŋene Noa muwec: “Anutuzi mâreŋ sâweckewecte ʒâic busâqoc faio gie sâko bahuc juhapene motec eki bâmiriŋ‐nâpozejec!”
138	GEN 5:32	Noa e jara 500 bazume ere bifuŋko ŋokâ 3 fuambiŋ, ʒâŋe‐jeŋic Sem, Ham â Jafete.
139	GEN 6:1	Ŋiczi mâreŋko sawe mâririackezo ehapie narufâc‐jeŋic wâc bocjaha fuambiŋ,
140	GEN 6:2	dameŋ ira nemu jaŋe ŋic jaŋere narufâc hawari biaŋ honec‐jopambiŋ, erâ honebâc‐jopambiŋ sâc ŋonâŋfâc‐jeŋic bacjopambiŋ.
141	GEN 6:3	Eme Wofuŋzi muwec: “Nore tâpirizi ŋicko mi fofehuc juzejec, ŋic e mâreŋkonec, sahac biuchec, mâreŋko juju‐ticnere jara dameŋ 130 mocwâc mi jâuruzejec.”
144	GEN 6:6	Wofuŋzi i honerâ mâreŋŋic bâfuac‐jopawec irec erâ bunezi hâhâtâwewec.
145	GEN 6:7	Eme Wofuŋzi muwec: “Ŋic bâfuac‐jopapo jaŋe bâsirowec‐jopape mâreŋko omaenʒepieŋ, qowi â gisic wiac â sawa wipe jaŋe mâmâc, jaŋe bâfuac‐jopapore bunane hâhâtâwekac!”
148	GEN 6:10	Ehame ere bifuŋko ŋokâ 3 fuambiŋ, ʒâŋe‐jeŋic Sem, Ham â Jafete. Noare binaŋ iŋuc.
149	GEN 6:11	Â mâreŋŋic gâcne jaŋe ine Anuture maio sâqore‐fârepie sindaŋ hârindaŋzi mâreŋ fusucmawec.
150	GEN 6:12	Eme Anutuzi mâreŋ honeme sâqore‐jâmbâŋkewec, mâreŋŋic juju â eebapa‐jeŋic sifuc safucke‐fârerâ fowec.
151	GEN 6:13	Eme irec Anutuzi Noa ʒiŋuc âzâcnewec: “No mâreŋŋic jaŋere dameŋ taraocte manapaŋkekopac. Jaŋe sindaŋ hârindaŋ‐jeŋiczi mâreŋ fusucmakacte no bâsirowec‐jopapemu.
152	GEN 6:14	Irec go marojâc herâ izi woke moc bazemec. Erâ âke tâcnetec maŋne maŋne fua‐fâreme maŋne â sahacne sâfâzi ʒimickezemec.
153	GEN 6:15	Woke sâcticne kecʒiŋuc bazemec: Ʒoricne‐ticne kubi 300, otecne‐ticne kubi 50 â hâŋne‐ticne kubi 30.
154	GEN 6:16	Erâ bupune bâbâzickehuc sâcmutâcte sâcko faic motâc piticne moc bazemec â motâc jâmbâŋ‐ticne ine neŋgocnaopec râezemec. Maŋnao feŋgaŋne jahec â moc fuanʒepieŋ.
155	GEN 6:17	Manakic, no mâreŋko ŋic juŋgopieŋ jaŋe bâsirowec‐jopa‐fârepemurâ rumi sâko bâfuape mâreŋko wiac jujune forakac i omae‐fâreocmu.
157	GEN 6:19	Â wipe qowi jaŋe sipiricke‐fârenʒipiŋte jaŋeraonec jajahec jajahec, ŋicne ŋokacne iŋuc aŋa sâsâc rocjopatec gohec mâmâc wokeo fenʒepieŋ.
160	GEN 6:22	Eme Noa e Anutuzi muwec sâc micdâŋ‐ticne reŋke‐fârerâ ejâmbâŋkewec. Noa e iŋuc hâcne ewec.
162	GEN 7:2	Irec go qowi nânâne jaŋeraonec 7, 7, ŋicne â ŋokacne aŋa sâsâc â qowi mi nânâne jaŋeraonec jajahec jajahec rowosâec‐jopac.
164	GEN 7:4	Eme no ʒoaŋ 7 tarame mupe hoe micsâko mâreŋko hehuc domahame ŋafe ʒoaŋ 40 taraocmu. Iŋuc ehuc wiac jujune bâfuapo i mâmâc sasawa mâreŋkonec bâsirowe‐fârepemu.”
167	GEN 7:7	Fisizo ehame Noa e jahacne â ŋonâŋ‐ticne erâ ŋokâ joŋaofâcne jaŋe mâmâc wokeo fefârembiŋ.
171	GEN 7:11	Noare jara dameŋ 600 irec mosa 2‐re ʒoaŋ gie bapa 17 ira opâ â hâwec ʒâkâŋ neŋgocne juwicnec soka siwiŋ ewefuhapie sawaonec opâ motâc aŋkeme
173	GEN 7:13	Eme ʒoaŋ ijaha Noa â ŋonâŋ‐ticne erâ ŋokâfâcne Sem, Ham â Jafete â ŋonâŋfâc‐jeŋic, jaŋe mâmâc wokeo fefârembiŋ.
179	GEN 7:19	Eme opâ jaŋe mâreŋ faio mocwâc âke sue feku tiki ʒora doma raŋgopieŋ i mâmâc sasawa qâuruc‐jopa‐fârembiŋ.
180	GEN 7:20	Opâzi tiki botâŋ‐jeŋic sirickewec ine kubi 15 irec sâc.
181	GEN 7:21	Iŋuc eme mâreŋ faio wiac jujune omaewec, wipe mecne, hae qowi mecne, kâte qowi mecne, â homa gisic wiac mecne, mâreŋko babarâ jueŋgopieŋ, erâ wâc mâreŋŋic mâmâc, jaŋe sipiricke‐fârembiŋ.
182	GEN 7:22	Mâreŋko wiac jujune, nokafehec, jaŋe hâmo‐fârembiŋ.
183	GEN 7:23	Iŋuc ehuc Anutuzi mâreŋko wiac jujune sasawa, ŋic me qowi me gisic wiac, me wipe, i jaŋe bâsirowec‐jopa‐fârewec. Noa â ehec woke maŋnao jumbiŋ, jaŋe sawa akic‐jopawec.
187	GEN 8:3	Eme mâreŋ faio opâ jaŋe fofo‐jeŋickoa risiehuc qâzucke‐fârepie opâ sâko fâre wahawec. Ʒoaŋ 150 irec faicnao hâcne fuŋkehuc fâre wahawec.
189	GEN 8:5	Juku opâ e fâre wahakume mosa 10 irec ʒoaŋ gie bapa 1 ira tiki botâŋ‐jeŋic tâtâc fua rawec.
192	GEN 8:8	Eme jurâ jurâ Noazi hapâ moc soreme rawec, mâreŋko opâ fâre wahawec me mâcne, irec fuŋne mana‐hâmoocte.
197	GEN 8:13	Noare jara dameŋ 601 irec mosa wâŋte ʒoaŋ gie bapa 1 ira opâ sâko mâreŋ faio fowec i kereŋke‐fârewec. Eme Noazi wokere bupu bâropierâ honewec: Mâreŋ faio opâ ʒickewec hâcne.
201	GEN 8:17	Erâ qowi mecne, wipe homa gisic wiac mecne, gohec wokeo juŋgopieŋ jaŋe ejaretec waha‐fârerâ fua sawec ehuc mâreŋ sâcke‐fârenʒepieŋ.”
202	GEN 8:18	Iŋuc mume Noa â ŋonâŋ‐ticne â ŋokâ joŋaofâc‐ticne,
203	GEN 8:19	erâ qowi sasawa â wipe â homa gisic sasawa, hawari‐jeŋic sâc wokeonec wahambiŋ.
204	GEN 8:20	Waha‐fârepie Noazi Wofuŋte alata moc barâ qowi â wipe nânâne jaŋeraonec moc moc iŋuc rocjopaku Anuture bâzi rikec‐jopawec.
207	GEN 9:1	Eme Anutuzi Noa â ŋokâfâcne ʒiŋuc muhuc jambuŋ‐jopawec: “Ŋoŋe fua sawec ehuc mâreŋ ŋefusucmanʒepieŋ.
208	GEN 9:2	Erâ kâte qowi â sawa wipe jaŋe ŋoŋere hâhâwic bahuc wise wise junʒepieŋ. Homa gisic wiac mâreŋko foforâ juekac â hâwec qowi jaŋe mâmâc ŋoŋere meo râec‐jopa‐fârekopac.
209	GEN 9:3	Erâ monʒaŋ wiac ŋarekopac i â wiac jujune qiriŋ‐ticnehec i nânâ‐ŋeŋic efârezejec.
211	GEN 9:5	Socŋeŋicte okacne i noni batarapemu. Ŋicjuju irec okacne qowi jaŋerao, me ŋic jaŋerao, me âgo soctofa jaŋerao i nonizia batara‐jâmbâŋkepemu.
215	GEN 9:9	“No ʒi ŋoŋe â ɋâricfâc‐ŋeŋic ŋoŋehec ʒâʒâfic sanaŋ ekopac,
217	GEN 9:11	ŋoŋehec mâmâc ʒâʒâfic sanaŋ ekopac, irec rumi sâko mocwâc fisirâ mâreŋte wiac jujune â mâreŋ e jahacne mi imac‐ŋopa‐fârezejec!”
219	GEN 9:13	Irec maqâreŋ‐nane huriri keci sawao râekopac, izi ʒâʒâfic‐nâŋecte ma ezejec.
227	GEN 9:21	Juku waiŋ opâne barâ nâku maŋne bibiriwame qoruc boze‐ticnao waha iŋke aŋke ehuc fowec.
228	GEN 9:22	Eme Ham, Kanaaŋte mamac hâcne, e mamac‐ticne Noa ere fuŋne honehuc hahac jahec‐ticne mâreŋko hu dâŋ binaŋ ejactewec.
229	GEN 9:23	Eme Sem â Jafete jahe ŋaqi moc rorâ ɋawe‐jekicko râehuc rârâpe bozeo raʒirâ mamac‐jekic biuctac fohame mi honehuc qofackepic.
230	GEN 9:24	Eme Noa e waiŋzi qame guŋ sanaŋ foweckonec ɋârerâ motec‐ticnezi wiac kosa ecnewec irec dâŋ manarâ ʒiŋuc muwec:
231	GEN 9:25	“Sâweczi Kanaaŋ ere faio fezejec, e hahac jahec‐ticne jahere kiŋaŋ motec wawahane juzejec!”