23214	MAT 1:1	Iesu Keriso vouḡa nizeꞌe ꞌahi eꞌe. Aniꞌe kini Davida mariga ebu zuni Aberahamo mariga.
23215	MAT 1:2	Aberahamoꞌe Isako moga, Isakoꞌe Iakobo moga, Iakoboꞌe Iuda zu ane negoḡa duḡuru moze.
23216	MAT 1:3	Iudaꞌe Feresi zu Zera moze ebu Tamaraꞌe zeḡe vize. Feresiꞌe Esiromo moga, Esiromoꞌe Ramo moga.
23217	MAT 1:4	Ramoꞌe Aminadabo moga, Aminadaboꞌe Nasona moga, Nasonaꞌe Salemona moga.
23218	MAT 1:5	Salemonaꞌe Boaza moga ebu Rahaboꞌe Boaza viꞌa. Boazaꞌe Obedi moga ebu Rutaꞌe Obedi viꞌa. Obediꞌe Iese moga.
23219	MAT 1:6	Ieseꞌe kini Davida moga. Davidaꞌe Solomona moga ebu Basebaꞌe Solomona viꞌa. Basebaꞌe ibite Urea inuga.
23220	MAT 1:7	Solomonaꞌe Rehoboamo moga, Rehoboamoꞌe Abia moga, Abiaꞌe Asa moga.
23221	MAT 1:8	Asaꞌe Iehosafate moga, Iehosafateꞌe Ioramo moga, Ioramoꞌe Uzia moga.
23222	MAT 1:9	Uziaꞌe Iotamo moga, Iotamoꞌe Ahaza moga, Ahazaꞌe Hezekia moga.
23223	MAT 1:10	Hezekiaꞌe Manase moga, Manaseꞌe Amono moga, Amonoꞌe Iosia moga.
23224	MAT 1:11	Iosiaꞌe Iekonia zu ani negoḡa duḡuru moze. Eꞌe madaḡano Babilonia azaḡaniꞌa Isaraela azaḡa teite utitaduni, Isaraela azaḡa Babilonia habaꞌa tutuze onamiro.
23225	MAT 1:12	Babilonia habaꞌa tutuze onamiroteꞌe ḡarugano, Iekoniaꞌe Sealatiela moga, Salatielaꞌe Zerubabela moga.
23226	MAT 1:13	Zerubabelaꞌe Abiuda moga, Abiudaꞌe Eliakima moga, Eliakimaꞌe Azora moga.
23227	MAT 1:14	Azoraꞌe Zadoka moga, Zadokaꞌe Akima moga, Akimaꞌe Eluida moga.
23228	MAT 1:15	Eliudaꞌe Eleazara moga, Eleazaraꞌe Matana moga, Matanaꞌe Iakobo moga.
23229	MAT 1:16	Iakoboꞌe Iosefa moga ebu Iosefa inugaꞌe Maria. Mariaꞌa Keriso rae huniroteꞌe vazeḡa, Iesu fureniro.
23230	MAT 1:17	Eꞌanoꞌo Aberahamoꞌonoꞌo onao Davida madaḡano, zeḡe ega niduꞌaꞌe 14, Davidaꞌonoꞌo onao Isaraela azaḡa Babilonia habaꞌa tutuze onamiroteꞌe madaḡano zeḡe ega niduꞌaꞌe 14 ebu Babilonia habaꞌa tutuze onamiroteꞌe madaḡanonoꞌo onao Keriso madaḡano zeḡe ega niduꞌaꞌe 14.
23231	MAT 1:18	Iesu Kerisoꞌe ꞌahige fureraro. Ani viꞌa Mariaꞌe Iosefa iraꞌauḡa. Anianine izema hahurogano, Vine Zaḡoḡaonoꞌo Mariaꞌe ahiꞌeta reiro.
23232	MAT 1:19	Maria iꞌa, Iosefaꞌe haḡai duduḡa vazeḡa, eꞌanoꞌo hunihunio Maria mene mazagaronihi radu ani sifu tuḡune modiꞌuma rae zamariro.
23233	MAT 1:20	Ani ꞌouge rae zamarirotene, Zuhiꞌa Boro tuḡure viga ꞌahoganiꞌa iḡunao fureraro. Ebu raenaꞌa, “Iosefa, Davida mariga! Maria teite hahuroga ago rihanoꞌi. Mazaḡa Mariaꞌe Vine Zaḡoḡaonoꞌo ene teha.
23234	MAT 1:21	Aniꞌe ubuga ꞌahoga furenoꞌidene, ani niḡaꞌe Iesu rae turahoꞌi. Mazaḡa aniꞌe ane vaze sauꞌazenonoꞌo ḡaboziꞌuma.
23236	MAT 1:23	'Ḡianoꞌi! Ohoze teite ize mene hidiroteꞌe nogobaḡa ꞌahoganiꞌa ahiꞌeta reꞌuma, ebu ubuga ꞌahoga fureniꞌuma. Vazeꞌa ubugaꞌe Emanuela rae huniꞌuma. Eꞌe huganiꞌe, “Badiꞌaꞌe emeḡe teite” raꞌohe.'”
23237	MAT 1:24	Iosefaꞌa bazunanoꞌo evatirotene, Zuhiꞌa Boro tuḡure vigaꞌa ḡoere niroteꞌe idunaḡano haḡaadu inuga Maria zamaharo.
23238	MAT 1:25	Rehano Iosefaꞌa Maria teite tibano mene bazido, onamo ubuga fureniro. Ebu ubuga niḡaꞌe Iesu rae turahiro.
23239	MAT 2:1	Herodaꞌe Iudea habaꞌa kiniḡa madaḡano Iesuꞌe Iudea habaꞌano ne ꞌahoga Betelehemao fureraro. Eꞌe madaḡano, edeḡa azaḡa nuꞌa madaꞌa iteꞌeteꞌe moneonoꞌo Ierusalema feuri onairo. Zeꞌe buzuva moneo edeḡa boro azaḡa. Ebu ze vaze ḡadiziro, raenaꞌa,
23240	MAT 2:2	“Iuda azaḡa kini raꞌeteꞌe vazeḡaꞌe mouma fureraneha? Mazaḡa eme madaꞌa iteꞌeteꞌe moneḡa habaꞌano buzuva ꞌahoga horoniro. Aꞌe kiniḡaniꞌa fureranateꞌe tahiḡa radu ani mazao kuranoga veize areha.”
23241	MAT 2:3	kini Herodaꞌa ḡoere eꞌe igirotene, zamaḡaniꞌa adudaro. Ebu Ierusalema azaḡa niduꞌa zuni zamazeꞌa adudaro.
23243	MAT 2:5	Zeḡeꞌa naenaeninaꞌa, “Aniꞌe Iudea habaꞌano Betelehema neḡano fureraꞌuma. Mazaḡa peroveta vazeḡaꞌe ꞌahige mirihiro, raenaꞌa,
23244	MAT 2:6	'O Iudea habaꞌano Betelehema neḡa, ḡaꞌe Iudea neḡa boroboro zamaḡano mene zuhuꞌa. Mazaḡa ḡaeꞌonoꞌo ibitoziniꞌeteꞌe vazeḡa ꞌahoganiꞌa onaiꞌuma. Aniꞌe, mamoe taufeꞌeteꞌe teige, Isaraela azaḡa, Badiꞌa vaze ibitoziniꞌuma zu taufiꞌuma.'”
23245	MAT 2:7	Ebu Herodaꞌa edeḡa azaḡa sifu huzadu noꞌe madaḡa huneo buzuvaꞌa fureraroteꞌe ederiro.
23246	MAT 2:8	Ebu edeḡa azaḡa Betelehema neḡano tuḡuzeꞌenaꞌa, ziro, raenaꞌa, “Onamadu tahiꞌa komeꞌa eꞌe faine vaḡoꞌi. Horonoꞌidene, eḡe zuni onamadu ani mazao kurafine, ihohoꞌi.”
23247	MAT 2:9	Ze Heroda ḡoere igi hauḡirotene, ibio onamiro. Ze ibio onameꞌenogano, ibite madaꞌa iteꞌeteꞌe moneḡa habaꞌano horonirotaꞌaꞌe, eꞌe buzuvaḡaniꞌa bare fureraro. Zeḡeꞌa horonadu matuꞌe rudaro. Ebu buzuva eꞌeꞌa ze ibitozenadu tahiꞌa komeꞌaꞌa radiuꞌeteꞌe habaꞌa ragano tue radiro.
23249	MAT 2:11	Zeḡeꞌa ne zamaḡa diuḡiro ebu tahiꞌa komeꞌaꞌe viꞌa Maria teite radiuꞌeteꞌe horoniro. Edeḡa azaḡaniꞌa ḡuḡuradu Iesu matuꞌo haro. Ebu ꞌumaze ḡau manomanoḡeta fuhiꞌadu ḡahuno nu ani haro. Aꞌe golo, ꞌuvahu hohoḡa manoḡa ebu murava hohoḡa manoḡa.
23250	MAT 2:12	Ebu Badiꞌaꞌa iḡunao edeḡa azaḡa ihoziro, raenaꞌa, “Heroda vaḡe ago bare onamoꞌi.” Eꞌanoꞌo zeꞌe ibi ꞌahoganonoꞌo zeḡe haba bare onamiro.
23251	MAT 2:13	Edeḡa azaḡaniꞌa iḡuniroteꞌe enogano Zuhiꞌa Boro tuḡure viganiꞌa iḡunao Iosefa zamao fureraro, raenaꞌa, “Iḡunoꞌi. Ene komeꞌa viꞌeta zamazadu Izipi habaꞌa ferau onamoꞌi. Ebu eꞌea radoꞌi, onamo eḡeꞌa iḡunoꞌi rae ziꞌuma. Mazaḡa kini Herodaꞌa ane uti azaḡa tuḡuzadu ene komeꞌa manoga veize vaḡiꞌuma.”
23252	MAT 2:14	Eꞌanoꞌo Iosefa ani ene komeꞌa viꞌeta zamazadu ohere zamaḡano Izipi habaꞌa onamiro.
23253	MAT 2:15	Ebu eꞌea radiro, onamo Herodaꞌa rudaro. Aꞌe Zuhiꞌa Boroꞌa ibite peroveta vazeḡa mazao reiroteꞌe ḡoeꞌaniꞌa hudaro, raenaꞌa, “Izipi habaꞌanonoꞌo eḡe ubude hune ariro.”
23254	MAT 2:16	Kini Herodaꞌe edeḡa azaḡaniꞌa soꞌoniroteꞌe vesuꞌu ederirotene, ani maḡune rudaro. Aniꞌe edeḡa azaḡaniꞌa ihoniroteꞌe madaḡa idunaḡano meꞌodadu eneꞌe muri ꞌaheu heuḡa rae zamariro. Eꞌanoꞌo ane uti azaḡa tuḡuzadu Betelehema neḡa zu uhiḡa habaꞌa niduꞌa zamaḡano ohoze komeꞌa muri ꞌaheuonoꞌo oname guraḡa ḡonaga niduꞌa zimi hauḡiro.
23256	MAT 2:18	“Rama neḡano roḡae ꞌahoganiꞌa zamaḡa are rudanadu kuau niaroteꞌe igiro. Rahelaꞌa ubugaubuga rudaroteꞌe uꞌano niaro, ebu ani vazeꞌa naminoga hezahoziniro.”
23258	MAT 2:20	“Iḡunoꞌi. Tahiꞌa komeꞌa viꞌeta Isaraela habaꞌa tutuze onamoꞌi. Mazaḡa tahiꞌa komeꞌa matihi reiroteꞌe azaḡa ꞌai rudau hauḡeha.”
23259	MAT 2:21	Eꞌanoꞌo Iosefaꞌa iḡunadu tahiꞌa komeꞌa viꞌeta Isaraela habaꞌa tutuze onamiro.
23260	MAT 2:22	Rehano Akelaoꞌe moga Heroda iḡuri madu Iudea habaꞌa kiniḡa reiroteꞌe igirotene ani Iudea habaꞌa onamogaꞌe riharo. Eꞌanoꞌo iḡunao niroteꞌe idunaḡano, ze Galilea habaꞌa onamiro.
23261	MAT 2:23	Ze onamadu ne ꞌahoga Nazaretao radiro. Aꞌe peroveta vazeḡaniꞌa Badiꞌa ḡoere reiroteꞌeꞌa hudaro, raenaꞌa, “Iesuꞌe Nazareta vazeḡa rae reꞌuma.”
23263	MAT 3:2	“Sauꞌanonoꞌo ḡihuroꞌi, mazaḡa Badiꞌaꞌa ibitoziniꞌeteꞌe madaḡa ꞌai haniteha.”
23264	MAT 3:3	Ibite peroveta vazeḡa Isaiaꞌa Ioane Babatiso moneo ꞌahige reiro, raenaꞌa, “Vaze ꞌahoganiꞌa haba bohaꞌano huauꞌohe, raenaꞌa, 'Zuhiꞌa Boroꞌa onaꞌiuma! Ani ibi ruhiboꞌi, zu ani veize ibi mae dudunoꞌi.'”
23265	MAT 3:4	Ioane dabuaꞌe kamelo ogaḡa hina haḡairo zu boromakau ogaḡa miniḡa hina gabaiḡano utiro. Ebu fihore zu Avore godaga aro.
23266	MAT 3:5	Ierusalemaonoꞌo, Iudea habaꞌa niduꞌanonoꞌo zu Ioridana vuḡa ḡenaḡa neḡa niduꞌanonoꞌo vazevazeꞌa Ioane vaḡe onamiro.
23267	MAT 3:6	Ebu zeꞌa sauꞌaze rae furenirotene Ioridana vuḡano bapatizoziro.
23268	MAT 3:7	Farisea azaḡa zu Sadukea azaḡa ḡehaḡaniꞌa bapatizo mouga radu Ioane vaḡe onairo. Ebu aniꞌa ze horozirotene ziro, raenaꞌa, “Zaꞌe Zarama ubugaubuga heuḡa! Vazeꞌa zae mazao, 'Badiꞌaꞌonoꞌo maḡunuꞌa onaine ferau muhinoꞌi,' rae reiro. Rehano feranogaꞌe mene idaraꞌuma.
23269	MAT 3:8	U ibite haḡai sau'aono'o ḡihuriroteꞌe haḡaiḡa furenoꞌi.
23270	MAT 3:9	Ebu ago ꞌahige zamaroꞌi, 'Emeꞌe Aberahamo mariga, eꞌanoꞌo Badiꞌaꞌa mene maḡunofiꞌuma.' Mazaḡa, e ziꞌohe, Badia'a hadi ꞌadi hina Aberahamo mariga haḡaine zuni idaḡa.
23271	MAT 3:10	Izidi Badiꞌaꞌa ḡiro 'ai ire taigano teha. Eꞌanoꞌo huga manoḡa mene iniꞌeteꞌe ireḡa niduꞌa'e udi higonadu ire rogao feuniꞌuma.
23272	MAT 3:11	Zaeꞌa sauꞌanonoꞌo ḡihurine, eꞌe tahiḡa veize, eḡeꞌa vu hina bapatizoziꞌohe. Rehano eḡe ḡaruna onaiteꞌe vazeḡa ani gigiꞌaniꞌe ufeta ḡihiꞌa. Aniꞌe eḡe vitihoga. Eḡe'a ani tamaka odoheꞌeteꞌe tuḡureḡa vazeḡa rae rouga zuni mene idaḡa. Aniꞌe Vine Zaḡoḡa ebu ire roga hina bapatizoziꞌuma.
23273	MAT 3:12	Maho hiriveꞌeteꞌe madaḡano, vazeꞌa kari hina rouḡa tenadu maho huꞌiꞌohe, ebu iguḡa manoneꞌohe zu meba hare deheneꞌohe. Ebu hugaꞌe nuꞌonadu suaba zamaḡano tiꞌohe, rehano iguḡaꞌe mene vidauꞌeteꞌe ire rogaḡano hufi haoneꞌohe. Eꞌe teige, Badiꞌaꞌa vazevaze rovoziꞌuma.”
23274	MAT 3:13	Eꞌe madaḡano Iesuꞌe Ioaneꞌa bapatizonoga radu Galilea habaꞌanonoꞌo Ioane vaḡe Ioridana vuḡa onairo.
23275	MAT 3:14	Rehano Ioaneꞌa Iesu garariro, raenaꞌa, “Ḡaeꞌa eḡe bapatizohifo. Nougaꞌahi ḡaꞌe eḡe vaḡe onaeha?”
23276	MAT 3:15	Iesuꞌa naenaeniro, raenaꞌa, “Izidiꞌe ꞌouge haḡaoꞌi. Eme Badiꞌaꞌa urateꞌeteꞌe haḡaiḡa niduꞌa haḡaifine, ꞌougiꞌuma.” Ebu Ioaneꞌa Iesu ḡoere mae ḡihinadu bapatizoniro.
23277	MAT 3:16	Iesu bapatizoniroteꞌe enogano ani vuonoꞌo gaba tire onamiro. Tire onamirotene, adureꞌa bohatanadu Iesuꞌa Badiꞌa Viganiꞌa Tubugo niniḡa teige ane vaḡe ovairoteꞌe horoniro.
23278	MAT 3:17	Ebu ago ꞌahoganiꞌa adureꞌono'o ḡoeriro, raenaꞌa, “ꞌAdiꞌe eḡe ubude. Eḡeꞌa zamare borofeꞌohe. E ani mazao matu'e rudau'ohe.”
23279	MAT 4:1	Eꞌe ḡarugano, Diaboloꞌa Iesu tuhune nuroga veize, Vine Zaḡoḡaniꞌa Iesu haba bohaꞌa tutune onamiro.
23280	MAT 4:2	Iesuꞌe eꞌea mada 40 zamaḡano ohere zu madai niduꞌa ogomu mene aro. Eꞌanoꞌo aniꞌe vinine runiro.
23281	MAT 4:3	Ebu Diavoloꞌa tuhunoga radu ani vaḡe onairo, ninaꞌa, “Ḡaꞌe Badiꞌa Ubuga roꞌidene, hadi ꞌadi ninaꞌa, 'Beredio ḡihunoꞌi,' rae noꞌi.”
23282	MAT 4:4	Rehano Iesuꞌa naenaeniro, raenaꞌa, “Mene! Buka Zaḡoḡano ꞌahige mirihiro, raenaꞌa, 'Vaze'e beredio da'o mene ḡabode radi'uma, rehano Badiꞌa hebeꞌonoꞌo buauꞌeteꞌe ḡoeꞌa niduꞌao ḡabode radiꞌuma.'”
23283	MAT 4:5	Ebu Diaboloꞌa Iesu Ierusalema neḡa boro zaḡoḡa tutune onamadu kuru neḡa hitaga huneno ohoniro.
23284	MAT 4:6	Ebu aniꞌa niro, raenaꞌa, “Ḡaꞌe Badiꞌa Ubuga roꞌidene, rafatoꞌi! Mazaḡa Buka Zaḡoḡano ꞌahige mirihiro, raenaꞌa, 'Badi'aꞌa dana'oga veize ane tuḡure viga ḡae vaḡe tuḡuziꞌuma. Ze'a ꞌevoreze hina mae ḡihi'i'uma ꞌahine, ḡae odaꞌe hadio mene tutuhaꞌuma.'”
23285	MAT 4:7	Iesu'a naenaeninaꞌa, “Mene! Buka Zaḡoḡano ꞌahige mirihiro, raenaꞌa, 'Zuhiꞌa Boro ḡae Badi'a ago tuhuno'i.'”
23286	MAT 4:8	Ebu Diaboloꞌa Iesu maḡa hitaga hune tutune itadu kini'a ibitohauꞌeteꞌe haba'a boroboro niduꞌa zu zeḡe ḡau manomano niduꞌa ihoniro.
23287	MAT 4:9	Ebu ninaꞌa, “Ḡaeꞌa eḡe zamao ḡuḡuradu kuraune, deꞌe niduꞌa ḡae ḡaniꞌuma.”
23288	MAT 4:10	Iesuꞌa ninaꞌa, “Mene! Eḡe mazaonoꞌo vaḡinoꞌi! Buka Zaḡoḡano ꞌahige mirihiro, raenaꞌa, 'Zuhiꞌa Boro ḡae Badi'a mazao da'o kuranohano'i, zu ane veize daꞌo gauoꞌi.'”
23289	MAT 4:11	ꞌOugadu Diaboloꞌa Iesu mazaonoꞌo vaḡine onamiro. Ebu tuḡure viganiꞌa onaadu dananiro.
23290	MAT 4:12	Iesuꞌa Ioane Babatiso ḡuꞌa neḡano ohoniroteꞌe egadu Iudea habaꞌaonoꞌo Galilea habaꞌa bare onamiro.
23291	MAT 4:13	Galilea habaꞌano ani Nazareta neḡano radiro. Ebu neḡa eꞌe modadu Kaperanauma neḡa boro onamirotene eꞌea radiunu. Kaperanauma neḡa boroꞌe Zebuloni zu Nafatali habaꞌano ebu Galilea duꞌura genaḡano.
23293	MAT 4:15	“Zebuloni zu Nafatali habaꞌaꞌe Galilea duꞌura genaḡano zu Ioridana vuḡa moneafao. Aꞌe Galilea habaꞌa raꞌohe, ebu eꞌe habaꞌano Iuda mene azaḡaniꞌa zuni radiuꞌohe.
23294	MAT 4:16	Uzabo zamaḡano radiuꞌeteꞌe azaḡaniꞌa agaḡa boro horoneha. Rune zauhaḡa habaꞌano radiuꞌeteꞌe azaḡa rana agaḡaniꞌa agazeha.”
23295	MAT 4:17	Eꞌe madaḡanonoꞌo Iesuꞌa haramoḡa ḡadaheniro, raenaꞌa, “Sauꞌanonoꞌo ḡihuroꞌi, mazaḡa Badiꞌaꞌa ibitohauꞌeteꞌe madaḡa ꞌai haniteha.”
23296	MAT 4:18	Mada ꞌahogano Iesuꞌa Galilea duꞌuraḡa genaḡano onameꞌenogano, vaze ꞌaheu horoziro. Zeꞌe ḡozone mauꞌeteꞌe azaḡa. Vaze tibaꞌe Simona, niḡa ꞌahogaꞌe Petero, ebu negoḡa Anderea. Ze duꞌurao reꞌeva feune radiunu.
23297	MAT 4:19	Ebu Iesuꞌa ziro, raenaꞌa, “Eḡe ḡaruna hegotoꞌi. Vaze reꞌevaziꞌeteꞌe vazeḡa rouga veize ihoziꞌuma.”
23298	MAT 4:20	ꞌOugirotene zeꞌe zogone reꞌeva modadu ane hegote onamiro.
23299	MAT 4:21	Iesuꞌa Galilea duꞌura genaḡano bare onamiro ebu vaze ꞌaheu negoḡeta horoziro. Anianineꞌe Zebedeo ubuga, Iakobo zu Ioane. Zeꞌe moze teite ḡasi zamaḡano reꞌeva zigoga faine radiunu. Ebu Iesuꞌa zeḡe ꞌaheu huziro. “Eḡe hegotoꞌi.”
23300	MAT 4:22	ꞌOugirotene zeꞌe zogone ḡasize zu moze modadu ane hegote onamiro.
23301	MAT 4:23	Iesuꞌa Galilea habaꞌa niduꞌa zamaḡano ragaveꞌenaꞌa, Iuda azaḡa zeḡe nuꞌonuꞌo neḡano ihoziro zu Badiꞌaꞌa ibitoziniꞌeteꞌe moneo hari manoḡa haramiro. Ebu ugi nunu niduꞌa faiziro.
23302	MAT 4:24	Ebu Iesu hariḡaniꞌa bororanadu Siria habaꞌa niduꞌa igiro. Zeꞌa ugi azaḡa niduꞌa tutuze ani vaḡe ariro. Ugi nunu uꞌano ahirizeꞌa gigize ruzeꞌeteꞌe azaḡa, vine sauꞌaniꞌa ragano reiroteꞌe azaḡa, ketoketeꞌeteꞌe azaḡa zu ahirize haganoga mene idaḡa azaḡa tutuze onairotene, Iesuꞌa ze faiziro.
23303	MAT 4:25	Galilea habaꞌa, Dekapolisi neḡa boro, Iudea habaꞌa, Ierusalema zu Ioridana vuḡa moneafa habaꞌanonoꞌo vaze ḡuḡuvaḡaniꞌa onaadu Iesu hegotiro.
23304	MAT 5:1	Iesuꞌa vaze ḡuḡuvaḡa horozirotene, ani maḡa ꞌahoga itadu eꞌea ehoriro. Ebu ane tahiꞌatahiꞌaniꞌa ane vaḡe onairo.
23306	MAT 5:3	“Zamaze zaharaḡa azaḡaꞌe Badiꞌa manohugazeta, mazaḡa Badiꞌaꞌa ibitoziniꞌohe.
23307	MAT 5:4	Zamaze areꞌenaꞌa, niauꞌeteꞌe azaḡaꞌe Badiꞌa manohugazeta, mazaḡa zeꞌe Badiꞌaꞌa namiziꞌuma.
23308	MAT 5:5	Zamaze roḡeḡa azaḡaꞌe Badiꞌa manohugazeta, mazaḡa zeḡe ꞌevorao haba riꞌiniꞌuma.
23309	MAT 5:6	Badiꞌaꞌa urateꞌetaꞌaꞌe haḡaihi rae inareꞌeteꞌe azaḡaꞌe Badiꞌa manohugazeta, mazaḡa Badiꞌaꞌa danazadu zeꞌa ꞌouge haḡaiꞌuma.
23310	MAT 5:7	Vaze vetuḡaziꞌeteꞌe azaḡaꞌe Badiꞌa manohugazeta, mazaḡa Badiꞌaꞌa ze vetuḡaziꞌuma.
23311	MAT 5:8	Zamaze deheḡa azaḡaꞌe Badiꞌa manohugazeta, mazaḡa zeꞌe Badiꞌa horoniꞌuma.
23312	MAT 5:9	Vazevaze uniho mae manofeꞌeteꞌe azaḡaꞌe Badiꞌa manohugazeta, mazaḡa Badiꞌaꞌa zeꞌe ane ubuga rae huziꞌuma.
23313	MAT 5:10	Badiꞌa ura haḡaeꞌeteꞌe uꞌano, vazeꞌa sausauziꞌeteꞌe azaḡaꞌe Badiꞌa manohugazeta, mazaḡa zeꞌe Badiꞌaꞌa ibitoziniꞌohe.
23314	MAT 5:11	Zaꞌe eḡe hegoteꞌeteꞌe uꞌano, vazeꞌa rae sausauzine, agirezinine ga ḡurireꞌenaꞌa ḡoere sauꞌa nunu niduꞌa zae rana tine, Badiꞌa manohuga hideꞌohe.
23315	MAT 5:12	Za, matuꞌe rudanoꞌi, mazaḡa Badiꞌaꞌa adureo naeḡaꞌe boro bagaḡa ziniꞌuma. Vouḡazeꞌa peroveta ibiꞌa azaḡa zuni deꞌuge sausauzido.
23316	MAT 5:13	Damaꞌe ḡau manoḡa raꞌeteꞌe teige, zaꞌe, eḡe hegoteꞌeteꞌe azaḡa, raha ꞌadao dama heuḡa. Rehano dama iniganiꞌa dauḡine, iniga bare furenoga mene idaḡa. Ḡau ꞌahoga veize mene manoḡa. Aꞌe mae modadu vazeꞌa edene oname onaeꞌohe.
23317	MAT 5:14	Zaꞌe, eḡe hegoteꞌeteꞌe azaḡa, raha ꞌada aganeꞌeteꞌe ihure agaḡa heuḡa. Maḡa hitagano radiuꞌeteꞌe neḡa boroꞌe ꞌuꞌuranoga mene idaḡa.
23318	MAT 5:15	Vazeꞌa ihure hofadu siuva ꞌuꞌuḡano mene teꞌohe, rehano ihure tiꞌeteꞌe habaꞌano teadu ne zamaḡano radiuꞌeteꞌe azaḡa niduꞌa agazeꞌohe.
23319	MAT 5:16	Ihure agaḡaniꞌa vaze niduꞌa agazeꞌeteꞌe teige, zae haḡai manoḡa vaze mazao ago uꞌure toꞌi, rehano furenoꞌi. ꞌOugine, vazeꞌa zae haḡai manoḡa horonadu Moze adureo niguniꞌuma.
23320	MAT 5:17	Zaꞌe, eḡeꞌa Mose goro ḡoeꞌa zu peroveta azaḡa ḡoere fahoga radu onairo rae ago zamaroꞌi. Eꞌe zeḡe ḡoereꞌa hudanoga veize onairo.
23321	MAT 5:18	E hube hune ziꞌohe, adure zu raha izema dauḡogano Mose goro ḡoeꞌa mirihoḡa komeꞌa fase zuni mene dauḡiꞌuma, rehano goro ḡoeꞌa niduꞌaꞌe hudaꞌuma.