23214	MAT 1:1	ᤕᤧᤛᤢ ᤂᤪᤡᤛ᤻ᤋᤧᤴ ᤀᤒᤪᤠᤜᤠᤔᤖᤧ ᤁᤢᤛ᤻ᤛᤠ᤺ ᤜᤧᤰᤁᤩᤠᤱ ᤍᤠᤀᤢᤍ ᤜᤠᤱᤅᤡᤸᤗᤧ ᤁᤢᤛ᤻ᤛᤠ᤺ ᤘᤕᤧᤖᤥ॥ ᤁᤱᤃ ᤂᤢᤏᤧ᤹ ᤁᤢᤎᤠ᤺ᤰᤜᤠ᤹ᤖᤧ ᤂᤢᤏᤡ᤹ ᤔᤡᤱᤛᤪᤠᤖᤥ–
23231	MAT 1:18	ᤀᤠᤸᤗ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤛᤠᤘᤠ᤺ᤴᤇᤡᤱᤔᤠᤴ ᤀᤰᤂᤣᤗ᤹ᤖᤡᤰ ᤐᤥ᤺ᤰᤂᤧᤖᤥ–ᤁᤢᤶᤔᤠ ᤔᤖᤡᤕᤔᤖᤧ ᤁᤢᤔᤣ᤺ᤰᤂᤡᤶ ᤐᤥ᤺ᤱᤔᤠ ᤐᤠ᤺ᤴᤏᤡᤴ ᤕᤢᤛᤢᤑᤧᤴᤏᤢ ᤐᤢ᤹ᤖᤧᤀᤠᤱ ᤘᤕᤧ. ᤁᤖ ᤂᤢᤴᤇᤡ᤹ ᤔᤣ᤺ᤰᤂᤡᤶ ᤐᤥ᤺ᤱᤔᤠᤏᤢ᤺ᤸᤗᤧ ᤋᤃᤡᤀᤣ ᤂᤢᤏᤧ᤹ ᤛᤣᤛᤣᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶᤗᤠᤶ ᤔᤧᤴᤇᤢᤰᤔᤠ ᤐᤥ᤺ᤰᤂᤧᤖᤥ॥
23233	MAT 1:20	ᤁᤖ ᤜᤧᤰᤁᤣ ᤀᤡ᤺ᤳᤋᤢᤖ ᤘᤕᤧᤸᤗᤧ ᤛᤧᤵᤔᤠᤱᤔᤥ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤔᤠᤱᤗᤠᤀᤡᤱᤒᤠᤴ ᤀᤥᤛᤣ᤺ᤴᤎᤠᤰᤛᤡᤱᤅᤠᤱ ᤀᤰᤂᤣ ᤔᤧᤳᤋᤢᤖᤥ. “ᤍᤠᤀᤢᤍᤖᤧ ᤁᤢᤔᤢ᤹ᤀᤡᤍᤠᤱᤛᤠ ᤕᤢᤛᤢᤵᤑᤣ. ᤂᤧᤏᤧ᤹ ᤔᤖᤡᤕᤶᤔᤡᤴ ᤔᤣ᤺ᤰᤂᤡᤶ ᤆᤥ᤺ᤰᤔᤠᤀᤠᤱ ᤜᤡᤶᤔᤥ ᤋᤠ᤺ᤵᤔᤠ ᤔᤧᤃᤡᤛᤧᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤀᤥᤒᤠ ᤀᤅᤧ᤺ᤰᤘᤠ᤺ᤴ ᤛᤣᤛᤣᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶᤗᤠᤶᤒᤠ ᤜᤠᤱᤛᤡᤱᤒᤠᤖᤥ॥
23234	MAT 1:21	ᤂᤢᤏᤧ᤹ ᤕᤧᤶᤒᤡᤳᤇᤠ᤹ᤛᤠ᤺ᤎᤡᤰ ᤁᤳᤋᤢ᤹. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤔᤡᤱᤅᤡᤴ ᤕᤧᤛᤢ ᤘᤠ᤺ᤳᤋᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤁᤢᤔᤏᤠᤜᤠ᤹ ᤂᤢᤏᤡ᤹ ᤗᤠᤕᤥᤗᤠᤶ ᤋᤠᤱᤛᤧ᤺ᤵᤋᤢᤛᤡ᤹ᤖᤥ॥”
23235	MAT 1:22	ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤗᤠᤶ ᤕᤜᤘᤣ ᤍᤠᤱᤒᤠᤸᤗᤧ ᤀᤢᤴᤇᤣ᤺ᤴ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢᤀᤠᤱ ᤘᤕᤧᤒᤠ ᤐᤠ᤺ᤴᤏᤡᤴ ᤁᤧᤳᤗ ᤑᤠ᤹ᤀᤠᤱ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤐᤥ᤺ᤰᤂᤧᤒᤠᤖᤥ–
23236	MAT 1:23	“ᤛᤡᤛᤠᤍᤡᤱ ᤔᤧᤴᤇᤡᤕᤠ᤹ᤀᤡᤴ ᤔᤧᤴᤇᤢᤰᤔᤠ ᤐᤥ᤺ᤱᤅᤠᤱ ᤕᤧᤶᤒᤡᤳᤇᤠ᤹ᤛᤠ᤺ᤎᤡᤰ ᤁᤳᤋᤢ᤹. ᤜᤧᤰᤁᤩᤠᤱ ᤂᤧᤴ ᤀᤡᤶᤔᤠᤏᤢᤀᤣᤗ ᤔᤧᤔᤧᤳᤋᤢ᤹ᤖᤥ॥ ‘ᤀᤡᤶᤔᤠᤏᤢᤀᤣᤗ’ ᤑᤠ᤹ᤀᤡᤱᤃ ‘ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤏᤡ᤹ᤏᤢ ᤘᤠ᤹’ ᤐᤥ᤺ᤱᤗᤥ॥”
23240	MAT 2:2	ᤀᤰᤂᤣᤗ᤹ᤖᤡᤰ ᤐᤠ᤺ᤴ ᤛᤣ᤺ᤴᤔᤧᤍᤥᤛᤢ. “ᤕᤜᤢᤍᤡᤜᤠ᤹ᤖᤧ ᤂᤢᤏᤡ᤹ ᤜᤠᤱ ᤁᤧᤒᤥ᤺ᤱᤒᤠᤀᤠᤱ ᤛᤠᤃᤧᤘᤠ᤺ᤴᤇᤡᤱᤒᤠᤴ ᤀᤠᤳᤋᤥ ᤘᤠ᤹ᤒᤣ᥅ ᤀᤠᤏᤡᤃᤧ ᤏᤠᤶᤃᤧᤴ ᤐᤡᤛᤠᤱ ᤁᤢᤛᤠᤘᤠ᤺ᤴᤇᤡᤱᤔᤠᤸᤗᤧᤴ ᤔᤡᤰᤛᤣ᤺ᤴ ᤁᤧᤒᤡᤒᤠ ᤂᤣ᤺ᤶᤛᤡᤰᤁᤡᤴ ᤏᤡ᤺ᤛᤢᤶᤒᤧᤀᤠᤱ ᤂᤢᤏᤧ᤹ ᤁᤢᤛᤣᤘᤠ ᤆᤥ᤺ᤰᤛᤧ ᤋᤩᤧ᤹ᤀᤡᤃᤧᤒᤠᤖᤥ॥”
23243	MAT 2:5	ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤕᤜᤢᤍᤡᤕᤠ ᤌᤢᤶᤔᤥᤒᤠ ᤒᤧᤌᤗᤣᤜᤧᤶᤔᤥ ᤂᤢᤏᤧ᤹ ᤛᤠᤘᤠ᤺ᤴᤇᤡᤱᤔᤠ ᤁᤧᤒᤥ᤺ᤱᤒᤠ ᤘᤠ᤹ᤖᤥ॥ ᤌᤣᤀᤠᤱᤓᤧᤸᤗᤧ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤸᤗᤧ ᤀᤰᤂᤣᤗ᤹ᤖᤡᤰ ᤛᤠᤵᤋᤢᤀᤠᤱ ᤐᤳ­ –
23244	MAT 2:6	‘ᤕᤜᤢᤍᤡᤕᤠ ᤌᤢᤶᤔᤥᤒᤠ ᤒᤧᤌᤗᤣᤜᤧᤶᤔᤣ. ᤂᤧᤏᤧ᤹ᤃ ᤕᤜᤢᤍᤡᤕᤠᤒᤠ ᤐᤠᤱᤈᤢᤶᤜᤠ᤹ᤀᤥ ᤛᤠ᤹ᤖᤡᤰ ᤁᤧᤕᤧᤰᤐᤠ ᤁᤧᤈᤥ᤺ᤰᤗᤥ. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤁᤧᤒᤠᤱᤈᤢᤶᤗᤠᤶ ᤜᤠᤱᤕᤢᤰᤐᤠᤎᤡᤰ ᤋᤠ᤺ᤖᤥ. ᤂᤢᤏᤧ᤹ᤃ ᤔᤧᤸᤗᤢᤰᤁᤶᤒᤠ ᤁᤢᤀᤡᤛᤡ᤺ᤰ ᤐᤥ᤺ᤱᤅᤠᤱ ᤀᤠᤔᤏᤠ ᤀᤡᤛᤪᤠᤀᤡᤗᤡᤜᤠ᤹ ᤁᤶᤒᤪᤠᤱ ᤁᤧᤔᤧᤵᤐᤠ ᤐᤥ᤺ᤱᤗᤥ॥’”
23246	MAT 2:8	ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤰᤂᤣ ᤔᤧᤳᤋᤢᤛᤡᤖ ᤒᤧᤌᤗᤣᤜᤧᤶᤔᤥ ᤐᤠᤱᤄᤢᤍᤣ᤺ᤛᤢᤛᤡ. “ᤐᤣᤃᤧᤶᤔᤧ᤹ᤀᤠᤱ ᤀᤅᤧ᤺ᤰᤘᤠ᤺ᤴ ᤁᤥ᤺ᤳᤋᤧᤶᤔᤧ᤹॥ ᤂᤧᤴ ᤀᤅᤧ᤺ᤰᤘᤠ᤺ᤴ ᤁᤧᤄᤥ᤺ᤛᤢᤶᤏᤧ ᤑᤠ᤹ᤃᤪ ᤑᤧᤖᤧᤶᤔᤧ᤹ᤀᤠᤱ ᤀᤡᤱᤃᤠ᤹ ᤀᤠᤔᤧᤳᤋᤧᤶᤔᤧ᤹ᤀᤥ॥ ᤀᤡᤱᤃᤠ᤹ᤀᤠᤱ ᤂᤢᤏᤧ᤹ ᤛᤣᤘᤠ ᤔᤧᤳᤋᤢᤱᤗᤥ॥”
23251	MAT 2:13	ᤂᤧᤴ ᤛᤡᤰᤁᤢᤶᤏᤡᤒᤠ ᤂᤠᤃᤧᤀᤡᤰᤐᤠᤜᤠ᤹ ᤔᤧᤒᤣ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤔᤠᤱᤗᤠᤀᤡᤱᤒᤠᤎᤡᤰ ᤕᤢᤛᤢᤑᤖᤧ ᤁᤢᤛᤧᤵᤔᤠᤱᤔᤥ ᤌᤠ᤺ᤴᤇᤡᤱᤅᤠᤱ ᤀᤰᤂᤣ ᤔᤧᤳᤋᤢ. “ᤐᤥᤃᤧ᤹ᤀᤠᤱ ᤀᤅᤧ᤺ᤰᤘᤠ᤺ᤴ ᤏᤢ ᤁᤢᤶᤔᤠ᤺ᤴ ᤋᤣ᤹ᤖᤧᤛᤧ᤹ᤀᤠᤱ ᤔᤡᤛᤪ ᤗᤠᤈᤣ᤹ᤀᤥ ᤂᤧᤳᤇᤡᤱ ᤐᤣᤃᤧ᤹. ᤜᤧᤰᤁᤩᤠᤱ ᤀᤡᤱᤃᤠ᤹ ᤔᤧᤶᤔᤧᤳᤋᤣ ᤌᤠᤖᤡᤰ ᤂᤧᤏᤧ᤹ ᤂᤧᤵᤔᤥᤀᤣ ᤘᤕᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤜᤧᤖᤥᤍ ᤜᤠᤱᤅᤡᤸᤗᤧ ᤀᤅᤧ᤺ᤰᤘᤠ᤺ᤴ ᤛᤧᤵᤔᤠ ᤑᤠ᤹ᤀᤠᤱ ᤁᤥ᤺ᤳᤋᤢᤖ ᤘᤠ᤹ᤖᤥ॥”
23255	MAT 2:17	ᤂᤧᤱᤃ ᤕᤷᤔᤡᤕᤠ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤸᤗᤧ ᤀᤰᤂᤣᤗ᤹ᤖᤡᤰ ᤀᤢᤴᤇᤣ᤺ᤴ ᤐᤠ᤺ᤳᤋᤢᤒᤠ ᤔᤠᤱᤏᤡᤱᤘᤠ᤹ᤐᤠ᤺ᤴᤏᤡᤴ ᤁᤧᤖᤧᤒᤠᤖᤥ–
23256	MAT 2:18	“ᤁᤧᤜᤠ᤺ᤵᤔᤠ ᤁᤧᤓᤡ᤺ᤰᤔᤠ ᤏᤢ ᤔᤣᤖᤡᤱ ᤁᤧᤎᤰᤔᤠ ᤕᤶᤒᤠ ᤀᤡᤰᤗᤠ᤺ᤴ ᤖᤠᤔᤠ ᤐᤠᤱᤈᤢᤶᤔᤥ ᤂᤧᤶᤍᤧᤳᤗᤥ. ᤖᤠᤜᤧᤗᤖᤧ ᤁᤢᤛ᤻ᤛᤠ᤺ᤜᤠ᤹ ᤜᤠ᤺ᤵᤋᤢᤛᤡ᤹ᤖᤥ॥ ᤂᤧᤱᤃ ᤜᤠᤱᤜᤠᤱ ᤔᤧᤳᤇᤡᤱᤔᤠ ᤔᤧᤍᤧᤴᤏᤧᤴᤗᤥ. ᤌᤣᤀᤠᤱᤓᤧᤸᤗᤧ ᤁᤢᤛ᤻ᤛᤠ᤺ᤜᤠ᤹ ᤁᤧᤖᤧᤰ ᤔᤧᤛᤩᤧᤖᤥ॥”
23258	MAT 2:20	ᤔᤧᤳᤋᤢ. “ᤐᤥᤃᤧ᤹ᤀᤠᤱ ᤀᤅᤧ᤺ᤰᤘᤠ᤺ᤴ ᤏᤢ ᤁᤢᤶᤔᤠ᤺ᤴ ᤀᤡᤛᤪᤠᤀᤡᤗ ᤗᤠᤈᤣ᤹ᤀᤥ ᤋᤣ᤹ᤖᤧᤛᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤀᤅᤧ᤺ᤰᤘᤠ᤺ᤴ ᤛᤧᤵᤔᤠ ᤁᤧᤃᤥ᤺ᤵᤐᤧᤴ ᤛᤩᤧᤀᤠᤱ ᤜᤥ᤺ᤵᤗᤥ॥”
23261	MAT 2:23	ᤏᤠᤛᤖᤋ ᤐᤠᤱᤈᤢᤶᤔᤥ ᤘᤠ᤹ᤔᤠ ᤜᤣ᤺ᤰᤋᤧᤖᤥ॥ ᤁᤱᤃ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ᤖᤧ “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤌᤢᤰᤋᤢᤒᤠᤱᤃ ᤏᤠᤛᤖᤡ ᤔᤧᤔᤧᤳᤋᤢ” ᤗ᤹ᤖᤡᤰ ᤔᤧᤒᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤁᤧᤖᤧᤒᤠᤖᤥ॥
23263	MAT 3:2	“ᤂᤡᤏᤡ᤹ ᤗᤠᤕᤥᤗᤠᤶ ᤜᤡᤴᤍᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤡᤴ ᤏᤡ᤺ᤳᤋᤠᤱᤅᤣ ᤋᤩᤧᤀᤠᤱ ᤘᤠ᤹ᤖᤥ॥”
23264	MAT 3:3	ᤂᤢᤏᤧ᤹ ᤁᤢᤕᤠ᤺ᤶᤒᤣᤀᤥ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤕᤛᤤᤕᤠ᤺ᤸᤗᤧ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢᤀᤠᤱ ᤘᤠ᤹ᤖᤥ. “ᤂᤢᤏᤧ᤹ ᤀᤣ᤺ᤰᤛᤠᤍᤧᤴᤏᤥ ᤀᤰᤂᤣᤗ᤹ᤖᤡᤰ ᤁᤧᤀ᤺ᤰᤐᤠ ᤀᤡᤰᤗᤠᤖᤥ. ‘ᤍᤠᤱᤒᤠᤸᤗᤧ ᤁᤢᤔᤠᤖᤠᤶᤔᤡᤴ ᤕᤠᤖᤡᤵ ᤆᤥᤃᤧᤶᤔᤧ᤹ᤀᤠᤱ ᤁᤢᤗᤠᤶᤜᤠ᤹ ᤋᤥ᤺ᤴᤍᤥ᤺ᤴ ᤆᤥᤃᤧᤶᤔᤧ᤹᥄’”
23268	MAT 3:7	ᤁᤖ ᤕᤖᤡᤰ ᤑᤖᤡᤛᤡᤜᤠ᤹ ᤏᤢ ᤛᤍᤢᤁᤡᤜᤠ᤹ ᤒᤵᤋᤡᤛ᤻ᤔᤠ ᤐᤥ᤺ᤱᤛᤧ ᤂᤢᤏᤧ᤹ᤀᤥ ᤔᤧᤍᤩᤧᤖ ᤔᤧᤒᤳᤇᤧᤒᤠ ᤏᤡ᤺ᤛᤢᤛᤡᤀᤠᤱ ᤀᤰᤂᤣ ᤔᤧᤳᤋᤢᤛᤡᤖ ᤑᤧ᤺ᤰᤋᤢᤛᤡ. “ᤀᤛᤣ᤺ᤰᤛᤠᤛᤣ. ᤂᤡᤏᤡ᤹ ᤁᤴ ᤁᤧᤍᤠ᤺ᤒᤠᤖ ᤁᤧᤒᤵᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤄᤢᤶᤍᤡᤱᤗᤠᤶ ᤂᤧᤳᤇᤡᤱᤅᤧᤶᤔᤧ᤹ ᤑᤠ᤹ᤀᤠᤱ ᤜᤠ᤺ᤳᤗᤧ ᤁᤧᤔᤧᤳᤋᤡᤒᤣ᥅
23273	MAT 3:12	ᤁᤢᤓ᤹ᤀᤣ᤺ᤳᤋᤡᤸᤗᤧ ᤛᤡ᤺ᤴ ᤀᤠ᤺ᤶᤔᤠ ᤑᤠ᤹ᤀᤠᤱ ᤂᤢᤏᤧ᤹ ᤕᤠᤖᤡᤵ ᤘᤠ᤹. ᤜᤧᤰᤁᤩᤠᤱ ᤂᤢᤏᤧ᤹ ᤋᤢᤃᤢᤖ ᤛᤢᤵᤛᤢᤀᤠᤱ ᤛᤡ᤺ᤴ ᤆᤠᤎᤥ᤺ᤰᤗᤠᤀᤥ ᤆᤡᤰᤂᤢ᤹ ᤜᤧᤰᤁᤩᤠᤱ ᤁᤢᤜᤰᤜᤠ᤹ ᤀᤠᤵᤑᤠᤸᤗᤧᤀᤠᤱ ᤔᤧᤴᤇᤡ᤺ᤔᤏᤠᤒᤠ ᤔᤡᤀᤥ ᤜᤠ᤺ᤴᤍᤢᤍᤣ᤺ᤛᤢ᤹ᤖᤥ॥”
23275	MAT 3:14	ᤁᤖ ᤕᤢᤜᤢᤴᤏᤠᤖᤧ ᤀᤳᤋᤢᤖ ᤂᤢᤏᤧ᤹ ᤀᤰᤂᤣ ᤔᤧᤳᤋᤢ. “ᤀᤡᤱᤃᤠ᤹ᤏᤧ ᤂᤧᤏᤧ᤹ᤏᤢ ᤒᤵᤋᤡᤛ᤻ᤔᤠ ᤐᤥ᤺ᤱᤔᤠ ᤁᤧᤒᤥ᤺ᤱᤒᤠ. ᤀᤠᤰᤂᤣᤗ᤹ᤖᤡᤰ ᤂᤧᤏᤧ᤹ ᤀᤡᤱᤃᤠ᤹ᤀᤥ ᤁᤧᤍᤩᤧᤒᤠᤒᤣ᥅”
23276	MAT 3:15	ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤀᤠᤸᤗᤥᤖᤧ ᤗᤠᤃᤡ ᤀᤰᤂᤣᤀᤣ ᤐᤥ᤺ᤱᤗᤖᤥ. ᤀᤰᤂᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤖᤧᤰ ᤏᤡᤱᤘᤠ᤹ ᤆᤥᤃᤢᤒᤠ ᤐᤠ᤺ᤴᤏᤡᤴ ᤁᤧᤳᤗᤖᤥ॥” ᤜᤧᤰᤁᤩᤠᤱ ᤕᤢᤜᤢᤴᤏᤠ᤺ᤴ ᤋᤧᤴᤍᤧᤀᤠᤱ ᤂᤢᤏᤧ᤹ ᤒᤵᤋᤡᤛ᤻ᤔᤠ ᤐᤡᤖᤢᤖᤥ॥
23278	MAT 3:17	ᤜᤧᤰᤁᤩᤠᤱ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤀᤰᤂᤣᤗ᤹ᤖᤡᤰ ᤀᤡᤰᤗᤠᤎᤡᤰ ᤋᤩᤧ. “ᤁᤴ ᤀᤠᤔᤡ᤺ᤶ ᤀᤠᤛ᤻ᤛᤠ᤺ᤖᤥ. ᤀᤡᤱᤃᤠ᤹ ᤂᤢᤏᤧ᤹ᤏᤢ ᤛᤠ᤹ᤖᤡᤰ ᤛ᤺ᤳᤋᤠᤱᤅᤠᤱ ᤘᤠ᤹ᤀᤠᤖᤥ॥”
23281	MAT 4:3	ᤜᤧᤰᤁᤩᤠᤱ ᤔᤠᤑᤧᤴᤛᤠᤶᤔᤡᤴ ᤂᤧᤵᤔᤥ ᤋᤩᤧᤀᤠᤱ ᤂᤢᤏᤧ᤹ ᤀᤰᤂᤣ ᤔᤧᤳᤋᤢᤖ ᤁᤢᤏᤡᤱᤘᤠ᤹ ᤛᤠ᤹ᤖᤢ. “ᤂᤧᤏᤧ᤹ ᤏᤡᤱᤘᤠ᤹ᤑᤢᤛᤠ᤺ᤏᤧ ᤑᤠ᤹ᤃᤪ ᤁᤴ ᤗᤢᤱᤜᤠ᤹ ᤂᤖᤧ᤺ᤱ ᤐᤥ᤺ᤰᤂᤧ᤹ ᤑᤠ᤹ᤀᤠᤱ ᤔᤧᤳᤋᤧ᤹॥”
23282	MAT 4:4	ᤁᤖ ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤜᤧᤰᤁᤣ ᤔᤧᤈᤥ᤺ᤰᤁᤠᤴ. ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤛᤠᤵᤗᤠᤀᤥ ᤔᤥᤛᤠᤖᤧ ᤀᤰᤂᤣᤗ᤹ᤖᤡᤰ ᤛᤠᤵᤋᤢᤀᤠᤱ ᤐᤳ. ‘ᤔᤧᤴᤇᤠᤶ ᤕᤠᤵᤔᤡ᤺ᤱᤃ ᤁᤢᤈᤠ᤺ᤸᤗᤧᤖᤰ ᤔᤧᤜᤡᤱᤏᤧᤴ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠ᤺ᤳᤋᤢᤒᤠ ᤁᤧᤖᤧᤰ ᤐᤠ᤺ᤴᤏᤡᤸᤗᤧ ᤜᤡᤱ॥’”
23284	MAT 4:6	“ᤂᤧᤏᤧ᤹ ᤛᤧᤰᤂᤠᤀᤣ ᤏᤡᤱᤘᤠ᤹ᤑᤢᤛᤠ᤺ᤏᤧ ᤑᤠ᤹ᤃᤪ ᤐᤡᤴᤍᤧ ᤌᤩᤧ᤹. ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ. ‘ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤗᤠᤀᤡᤱᤒᤠᤜᤠ᤹ ᤂᤧᤏᤧ᤹ ᤁᤧᤗᤠᤃᤡ ᤀᤡᤱᤈᤠ᤺ᤱ ᤐᤡᤖᤢᤛᤡᤀᤠᤱ ᤂᤧᤏᤧ᤹ ᤌᤠ᤺ᤱᤎᤠ᤺ᤱᤅᤣ ᤂᤢᤏᤡ᤹ ᤜᤢᤰᤁᤥ ᤁᤧᤶᤍᤠ᤺ᤰᤁᤠᤱ ᤁᤧᤗᤠᤱᤅᤡᤴ ᤗᤢᤱᤅᤥ ᤔᤧᤎᤠᤶᤛᤡᤱᤅᤡᤴᤗᤥ॥’”
23285	MAT 4:7	ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤁᤖ ᤛᤠᤶᤕᤥᤛᤠᤵᤗᤠᤀᤥ ᤕᤠᤶᤔᤥ ᤀᤰᤂᤣᤗ᤹ᤖᤡᤰᤁᤠᤱ ᤛᤠᤵᤋᤧᤀᤠᤱ ᤐᤳ. ‘ᤍᤠᤱᤒᤠ ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤔᤧᤛᤠ᤹ᤖᤧᤴᤏᤧ᤹॥’”
23287	MAT 4:9	ᤔᤧᤳᤋᤢ. “ᤂᤧᤏᤧ᤹ ᤛᤠᤶᤒᤥ᤺ᤴ ᤁᤧᤓᤴᤇᤡᤱᤅᤠᤱ ᤀᤡᤱᤃᤠ᤹ ᤛᤣᤘᤠ ᤁᤧᤔᤧᤳᤋᤠᤏᤧ ᤑᤠ᤹ᤃᤪ ᤁᤱᤜᤠ᤹ ᤁᤧᤖᤧᤰ ᤐᤡᤏᤧ᤹॥”
23288	MAT 4:10	ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤛᤤᤋᤠᤏᤣ. ᤁᤵᤔᤥᤗᤠᤶ ᤐᤣᤃᤧ᤹. ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ. ‘ᤂᤧᤏᤧ᤹ ᤍᤠᤱᤒᤠ ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤴᤗᤰ ᤛᤣᤘᤠ ᤔᤧᤳᤋᤧ᤹ ᤜᤧᤰᤁᤩᤠᤱ ᤂᤢᤏᤧ᤹ᤀᤡᤴᤗᤰ ᤁᤢᤛᤣᤘᤠ ᤆᤥᤃᤧ᤹ᤀᤥ॥’”
23292	MAT 4:14	ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤕᤛᤤᤕᤠ᤺ᤸᤗᤧ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤁᤧᤖᤧᤒᤠᤖᤥ–
23293	MAT 4:15	“ᤕᤷᤍᤏ ᤕᤱᤄᤱᤅᤡᤸᤗᤧ ᤏᤠᤎᤠ᤺ᤶᤒᤡᤒᤠ ᤃᤠᤗᤡᤗ ᤘᤖᤰᤁᤡᤸᤗᤧ ᤁᤢᤒᤣᤛᤠᤱᤒᤠ ᤏᤠᤵᤋᤠᤗᤡ ᤏᤢ ᤈᤒᤢᤗᤢᤏ ᤁᤧᤕᤢᤱᤒᤠ ᤕᤠᤵᤔᤡᤛᤣ. ᤃᤠᤗᤡᤗ ᤌᤢᤶᤔᤥ ᤁᤧᤘᤠ᤹ᤒᤠ ᤌᤡᤶᤔᤧᤴᤍᤱ ᤛᤢᤘᤠᤱᤛᤣ.
23294	MAT 4:16	ᤂᤠᤍᤠᤶᤔᤥ ᤁᤧᤘᤠ᤹ᤒᤠ ᤔᤏᤠᤜᤠ᤹ᤖᤧ ᤐᤕᤶ ᤕᤶᤒᤠ ᤀᤥ᤺ᤳᤋᤡ᤺ᤴ ᤔᤧᤏᤡ᤺ᤛᤢᤖᤥ॥ ᤛᤡ᤺ᤔᤧᤸᤗᤧᤴ ᤂᤠᤔᤠᤰᤔᤠᤀᤥ ᤁᤧᤘᤠ᤹ᤒᤠᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥ ᤀᤥ᤺ᤳᤋᤡᤎᤡᤰ ᤀᤥ᤺ᤳᤗᤥ॥”
23295	MAT 4:17	ᤂᤧᤴ ᤕᤧᤶᤔᤠᤱᤎᤥ ᤕᤧᤛᤢᤖᤧ ᤀᤰᤂᤣ ᤐᤠ᤺ᤳᤋᤢᤖ ᤀᤡᤱᤓᤥ᤺ᤔᤠ ᤜᤣ᤺ᤰᤋᤢ. “ᤗᤠᤕᤥᤗᤠᤶ ᤜᤡᤴᤍᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤡᤴ ᤏᤡ᤺ᤳᤋᤠᤱᤅᤣ ᤋᤩᤧᤀᤠᤱ ᤘᤠ᤹ᤖᤥ॥”
23297	MAT 4:19	ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤀᤠᤀᤣᤃᤠᤱ ᤌᤠᤏᤧᤳᤇᤧ᤹ᤀᤥ. ᤂᤡᤴᤇᤡ᤹ ᤅᤠ ᤁᤧᤍᤧᤶᤛᤢ ᤁᤧᤍᤠ᤺ᤳᤇᤢᤒᤠ ᤁᤢᤀᤡᤛᤡ᤺ᤰ ᤀᤡᤱᤃᤠ᤹ᤀᤥ ᤔᤏᤠ ᤁᤧᤍᤠ᤺ᤵᤐᤠ ᤆᤥ᤺ᤰᤏᤧᤳᤇᤡᤱᤗᤥ॥”
23305	MAT 5:2	ᤜᤧᤰᤁᤩᤠᤱ ᤂᤢᤏᤧ᤹ ᤀᤰᤂᤣᤗ᤹ᤖᤡᤰ ᤂᤧᤱᤜᤠ᤹ ᤜᤢ᤹ᤔᤠ ᤜᤣ᤺ᤰᤋᤢᤛᤡ –
23306	MAT 5:3	“ᤁᤧᤖᤧᤰ ᤐᤠ᤺ᤴᤏᤥ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤆᤠᤜᤠᤒᤠ ᤁᤧᤈᤥ᤺ᤰᤐᤠᤜᤠ᤹ ᤔᤢ᤹ᤀᤡᤛᤠᤒᤠᤛᤡᤖᤥ. ᤌᤣᤀᤠᤱᤓᤧᤸᤗᤧ ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤡᤴ ᤂᤧᤱᤜᤠ᤹ᤖᤧᤴᤏᤣᤖᤥ॥
23323	MAT 5:20	ᤁᤖ ᤂᤧᤵᤛᤧᤶᤔᤧ᤹ᤀᤥ. ᤑᤖᤡᤛᤡᤜᤠ᤹ ᤜᤧᤰᤁᤩᤠᤱ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ᤏᤢ᤺ᤸᤗᤧᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠ᤺ᤱᤜᤠ᤹ ᤂᤡᤏᤡ᤹ ᤏᤢ᤺ᤖᤡᤰᤁᤠᤱ ᤁᤧᤴᤀᤡ᤺ᤳᤋᤢᤶᤔᤡᤴ ᤁᤧᤴᤏᤠ᤺ᤳᤋᤢᤶᤔᤡᤴᤏᤧ ᤑᤠ᤹ᤃᤪ ᤛᤧᤰᤂᤠᤛᤠᤱ ᤂᤡᤏᤡ᤹ ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤥ ᤁᤧᤴᤗᤠᤛᤡᤴᤗᤥ॥”
23324	MAT 5:21	ᤀᤠᤸᤗ. “ᤀᤢᤴᤇᤣ᤺ᤴ ᤔᤥᤛᤠᤖᤧ ᤁᤢᤛᤠᤶᤕᤥ ᤀᤡᤱᤈᤠ᤺ᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢᤒᤠᤴ ᤂᤡᤏᤡ᤹ ᤁᤧᤄᤧᤵᤛᤢᤶᤔᤠᤱ ᤁᤧᤘᤕᤡ᤹. ‘ᤔᤏᤠ ᤔᤧᤛᤧᤖᤧᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤔᤏᤠ ᤁᤧᤛᤧᤵᤐᤠᤸᤗᤧ ᤂᤢᤶᤍᤡᤱ ᤂᤥ᤺ᤛᤢ᤹ᤖᤥ.’
23325	MAT 5:22	ᤁᤖ ᤀᤡᤱᤃᤠ᤹ ᤔᤧᤳᤏᤡᤱ. ᤜᤠ᤺ᤳ ᤁᤢᤴᤛᤠ᤹ᤀᤡᤴᤏᤢ ᤁᤢᤕᤠ᤺ᤰ ᤗᤧ᤹. ᤂᤧᤸᤗᤧ ᤂᤢᤶᤍᤡᤱ ᤂᤥ᤺ᤛᤢ᤹ᤖᤥ॥ ᤕᤠᤶᤔᤥ ᤜᤠ᤺ᤳᤗᤧ ᤁᤢᤴᤛᤠ᤹ᤀᤡᤴ ‘ᤀᤍᤱ’ ᤔᤧᤳᤋᤢ᤹. ᤂᤧᤱᤃ ᤁᤧᤖᤧᤰᤏᤢ᤺ᤸᤗᤧ ᤕᤶᤒᤠ ᤕᤜᤢᤍᤡ ᤂᤠᤛᤧᤴᤗᤥ᤺ᤶᤒᤠᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤔᤧᤕᤧᤵᤛᤢ᤹. ᤁᤖ ᤜᤠ᤺ᤳᤗᤧ ᤁᤢᤴᤛᤠ᤹ᤀᤡᤴ ᤛᤠᤰᤔᤢᤖᤠ ᤔᤧᤳᤋᤢ᤹. ᤂᤧᤱᤃ ᤂᤧᤔᤠᤕᤱᤛᤱᤅᤥᤒᤠ ᤔᤡᤀᤥ ᤐᤣ᤺ᤰᤔᤠ ᤛᤢᤰᤗᤥ॥
23329	MAT 5:26	ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤧ᤹. ᤂᤧᤵᤔᤥ ᤛᤠᤶᤒᤠ᤺ᤴᤕᤠᤱ ᤁᤧᤖᤧᤰ ᤔᤧᤴᤜᤢᤱᤅᤣ ᤌᤠᤖᤡᤰ ᤂᤧᤵᤔᤥᤀᤣ ᤁᤧᤕᤠᤰᤗᤥ॥”
23330	MAT 5:27	ᤀᤠᤸᤗ. “ᤂᤡᤏᤡ᤹ ᤔᤥᤛᤠᤖᤧ ᤁᤢᤛᤠᤶᤕᤥ ᤀᤡᤱᤈᤠ᤺ᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢᤒᤠ ᤁᤧᤄᤧᤵᤛᤢᤶᤔᤠᤱ ᤁᤧᤘᤕᤡ. ‘ᤂᤧᤏᤧ᤹ ᤆᤠᤖᤠᤶᤔᤠ ᤕᤠ᤺ᤶᤒᤰ ᤔᤧᤈᤥᤃᤧᤴᤏᤧ᤹ᤀᤥ’
23333	MAT 5:30	ᤜᤧᤰᤁᤩᤠᤱ ᤆᤢᤵᤛᤠᤱ ᤜᤢᤰᤁᤡᤸᤗᤧ ᤗᤠᤕᤥ ᤆᤥ᤺ᤰᤔᤠ ᤁᤧᤒᤠᤱᤏᤧ ᤑᤠ᤹ᤃᤪ ᤂᤧᤴᤏᤠᤱ ᤂᤰᤋᤧ᤹ᤀᤠᤱ ᤗᤠᤵᤑᤢ᤺ᤛᤧ᤹ᤀᤥ॥ ᤁᤧᤖᤧᤰ ᤏᤠᤛᤡᤱᤃᤧᤴ ᤌᤰᤁᤡᤴ ᤂᤧᤔᤠᤕᤱᤛᤱᤅᤥ ᤗᤠᤵᤑᤢᤔᤠᤏᤢ᤺ᤸᤗᤧ ᤜᤢᤰᤌᤡᤰ ᤔᤧ᤺ᤴᤏᤣ ᤘᤠ᤹ᤔᤠᤀᤣ ᤏᤢ᤺ᤒᤠᤖᤥ॥”
23334	MAT 5:31	“ᤕᤠᤶᤔᤥ ᤔᤥᤛᤠᤖᤧ ᤁᤢᤛᤠᤶᤕᤥ ᤀᤡᤱᤈᤠ᤺ᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢᤀᤠᤱ ᤘᤠ᤹. ‘ᤀᤠᤳᤋᤡᤸᤗᤧ ᤔᤣᤗᤡᤱᤃᤧᤴ ᤁᤢᤔᤣ᤺ᤳᤋᤡᤴ ᤏᤠ᤹ᤖᤢ. ᤂᤧᤸᤗᤧ ᤏᤠ᤹ᤏᤧᤒᤠᤖᤥ ᤑᤠ᤹ᤀᤠᤱ ᤛᤠᤵᤗᤠ ᤛᤠᤵᤔᤠ ᤐᤡᤔᤠ ᤐᤥ᤺ᤱ॥’
23335	MAT 5:32	ᤁᤖ ᤀᤡᤱᤃᤠ᤹ ᤂᤡᤏᤡ᤹ ᤔᤧᤳᤏᤡᤱ. ᤜᤠ᤺ᤳᤗᤧ ᤘᤣ᤹ᤜᤠ᤹ᤏᤢ ᤆᤠᤖᤠᤶᤔᤠ ᤕᤠ᤺ᤶᤒᤰ ᤔᤧᤴᤈᤥ᤺ᤰᤁᤣ ᤁᤧᤘᤠ᤹ᤔᤠ ᤔᤣᤗᤡᤱᤃᤧᤴ ᤁᤢᤔᤣ᤺ᤳᤋᤡᤴ ᤏᤠ᤹ᤖᤢ᤹ ᤂᤧᤸᤗᤧ ᤂᤧᤴ ᤁᤢᤔᤣ᤺ᤳᤋᤡᤴ ᤆᤠᤖᤠᤶᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤔᤠ ᤆᤥᤃᤢ᤹ᤖᤥ॥ ᤜᤧᤰᤁᤩᤠᤱ ᤀᤠᤳᤋᤡᤸᤗᤧ ᤂᤧᤴ ᤔᤧᤴᤇᤢᤔᤠ᤹ᤀᤡᤴᤏᤢ ᤔᤣ᤺ᤰᤂᤡᤶ ᤆᤥᤃᤢ᤹ ᤂᤧᤸᤗᤧᤀᤠᤱ ᤆᤠᤖᤠᤶᤔᤠ ᤕᤠ᤺ᤶᤒᤰ ᤆᤥᤃᤢ᤹ᤖᤥ॥”
23336	MAT 5:33	“ᤕᤠᤶᤔᤥ ᤂᤡᤏᤡ᤹ ᤔᤥᤛᤠᤖᤧ ᤁᤢᤛᤠᤶᤕᤥ ᤀᤡᤱᤈᤠ᤺ᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢᤒᤠ ᤁᤧᤄᤧᤵᤛᤢᤶᤔᤠᤱ ᤁᤧᤘᤕᤡ᤹. ‘ᤂᤡᤏᤡ᤹ ᤁᤧᤈᤥᤃᤢᤶᤒᤠ ᤔᤠᤱᤜᤧᤰᤁᤡᤴ ᤔᤧᤓᤣ᤺ᤴᤍᤧᤶᤔᤧᤴᤏᤧ᤹. ᤁᤖ ᤕᤜᤘᤣ ᤍᤠᤱᤒᤠᤴᤏᤢ ᤁᤧᤈᤥᤃᤢᤶᤒᤠ ᤔᤠᤱᤜᤧᤰᤁᤡᤴ ᤁᤧᤃᤧᤳᤋᤢᤶᤗᤀᤣ ᤐᤥ᤺ᤱᤗᤥ॥’
23340	MAT 5:37	ᤂᤡᤏᤡ᤹ ᤐᤠ᤺ᤴᤏᤡᤱᤃ ‘ᤀᤥ’ ᤏᤧ ᤑᤠ᤹ᤃᤪ ‘ᤀᤥ’ ᤐᤠ᤺ᤳᤋᤧᤶᤔᤧ᤹. ‘ᤔᤧ᤺ᤴ’ ᤏᤧ ᤑᤠ᤹ᤃᤪ ‘ᤔᤧ᤺ᤴ’ ᤐᤠ᤺ᤳᤋᤧᤶᤔᤧ᤹॥ ᤂᤧᤴᤏᤠᤱᤎᤥᤒᤠᤱᤃ ᤔᤠᤑᤧᤴᤛᤠᤶᤗᤠᤶ ᤁᤧᤍᤠ᤺ᤒᤠᤖᤥ॥”
23341	MAT 5:38	“ᤔᤥᤛᤠᤖᤧ ᤁᤢᤛᤠᤶᤕᤥ ᤀᤡᤱᤈᤠ᤺ᤱᤅᤡᤸᤗᤧ ‘ᤔᤡᤰᤁᤡᤸᤗᤧ ᤁᤢᤗᤧᤰᤘᤠ ᤔᤡᤰ. ᤜᤧᤰᤁᤩᤠᤱ ᤜᤠᤒᤥ᤹ᤒᤠᤸᤗᤧ ᤁᤢᤗᤧᤰᤘᤠ ᤜᤠᤒᤥ᤹ᤒᤠ’ ᤗ᤹ᤖᤡᤰ ᤐᤠ᤺ᤳᤋᤢᤒᤠᤴ ᤁᤧᤄᤧᤵᤛᤢᤶᤔᤠᤱ ᤁᤧᤘᤕᤡ᤹.
23345	MAT 5:42	ᤁᤧᤏᤠ᤺ᤰᤐᤠᤜᤠ᤹ ᤂᤧᤏᤧ᤹ ᤐᤡᤖᤧᤛᤧ᤹. ᤀᤠᤳᤋᤡᤸᤗᤧ ᤌᤧᤳᤗᤠ ᤁᤧᤏᤠ᤺ᤰ ᤂᤧᤴ ᤐᤡᤖᤧ᤹ᤀᤥ॥”
23346	MAT 5:43	“ᤔᤥᤛᤠᤖᤧ ᤁᤢᤛᤠᤶᤕᤥ ᤀᤡᤱᤈᤠ᤺ᤱᤅᤡᤸᤗᤧ ᤁᤧᤒᤠᤱᤓᤣ᤹ᤛᤠᤒᤠᤜᤠ᤹ ᤗᤢᤱᤔᤠ᤹ ᤋᤢᤰᤋᤧᤛᤧ᤹ᤀᤠᤱ ᤁᤧᤏᤡᤱᤔᤡᤜᤠ᤹ ᤆᤡ᤺ᤳᤋᤧᤛᤧ᤹ ᤗ᤹ᤖᤡᤰ ᤐᤠ᤺ᤳᤋᤢᤒᤠ ᤁᤧᤄᤧᤵᤛᤢᤶᤔᤠᤱ ᤁᤧᤘᤕᤡ᤹.
23351	MAT 5:48	ᤂᤧᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤛᤠᤱᤃᤪᤠᤶᤐᤣᤍᤠᤱᤅᤥᤒᤠ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤧᤖᤧᤰ ᤐᤠ᤺ᤴᤏᤥ ᤁᤢᤗᤡᤱᤎᤥ ᤁᤧᤃᤧᤵᤐᤠ ᤆᤥ᤺ᤰᤐᤠ ᤁᤢᤀᤡᤛᤡ᤺ᤰ ᤂᤡᤏᤡ᤹ᤀᤠᤱ ᤜᤧᤰᤋᤱᤒᤠ ᤐᤥ᤺ᤱᤔᤠᤀᤣ ᤐᤥ᤺ᤱᤗᤥ॥”
23352	MAT 6:1	ᤕᤧᤛᤢᤖᤧ ᤕᤠᤶᤔᤥ ᤔᤧᤳᤋᤢᤛᤡ. “ᤛᤡᤱᤛᤡᤱ ᤕᤧᤰᤕᤧᤰ ᤗ᤹ᤖᤧᤶᤔᤧ᤹ᤀᤥ. ᤂᤡᤏᤡ᤹ ᤁᤧᤈᤥᤃᤢᤶᤒᤠ ᤛᤠᤶᤕᤥᤏᤡᤒᤠ ᤕᤠ᤺ᤶᤒᤰᤜᤠ᤹ ᤔᤏᤠᤜᤠ᤹ᤖᤧ ᤔᤧᤏᤡ᤺ᤛᤢᤀᤠᤱ ᤂᤡᤏᤡ᤹ ᤏᤠᤖᤠ ᤔᤧᤓᤥ᤺ᤛᤢᤖ ᤑᤠ᤹ᤀᤠᤱ ᤔᤏᤠ ᤋᤃᤡ ᤔᤧᤈᤥᤃᤧᤶᤔᤡᤴᤏᤧ᤹ᤀᤥ॥ ᤜᤧᤰᤁᤣ ᤁᤧᤈᤥᤃᤢᤶᤏᤧ ᤑᤠ᤹ᤃᤪ ᤛᤠᤱᤃᤪᤠᤶᤐᤣᤍᤠᤱᤅᤥᤒᤠ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤌᤣᤀᤠᤱ ᤁᤧᤱᤄᤥ᤺ᤛᤢᤶᤔᤡᤴᤗᤥ॥
23355	MAT 6:4	ᤜᤧᤰᤁᤣᤗ᤹ᤖᤡᤰ ᤁᤧᤒᤡᤖᤢᤛᤡᤒᤠ ᤐᤠ᤺ᤴᤏᤡᤴ ᤛᤫᤠ᤺ᤳᤋᤠᤱ ᤐᤥ᤺ᤱᤗᤖᤥ॥ ᤜᤧᤰᤁᤩᤠᤱᤗᤰ ᤛᤫᤠ᤺ᤳᤋᤠᤱ ᤁᤧᤈᤥᤃᤢᤒᤠ ᤐᤠ᤺ᤴ ᤁᤧᤏᤡ᤺ᤒᤠ ᤐᤠᤏᤢᤍᤡᤱ ᤁᤧᤶᤒᤠᤖᤧ ᤜᤠᤱᤛᤧᤶ ᤁᤧᤒᤡᤖᤥ॥”
23356	MAT 6:5	“ᤜᤧᤰᤁᤩᤠᤱ ᤂᤡᤏᤡ᤹ ᤋᤢᤘᤠ ᤁᤧᤈᤥᤃᤢᤶᤔᤡᤸᤗᤧ ᤁᤢᤏᤡᤱᤘᤠ᤹ ᤁᤧᤈᤡ᤺ᤵᤐᤠᤜᤠ᤹ ᤁᤢᤀᤡᤛᤡ᤺ᤰ ᤔᤧᤈᤥᤃᤧᤶᤔᤡᤴᤏᤧ᤹ᤀᤥ॥ ᤂᤧᤱᤜᤠ᤹ᤖᤧᤃ ᤔᤏᤠᤜᤠ᤹ᤖᤧ ᤔᤧᤏᤡ᤺ᤛᤢᤖ ᤑᤠ᤹ᤀᤠᤱ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤏᤢ ᤗᤠᤶᤗᤠᤶᤔᤥ ᤕᤧᤵᤔᤠᤀᤠᤱ ᤋᤢᤘᤠ ᤆᤥ᤺ᤰᤔᤠ ᤂᤢᤏᤡ᤹ ᤛᤡᤖᤠ᤹ ᤌᤠᤱᤗᤥ॥ ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤂᤧᤱᤜᤠ᤹ᤖᤧ ᤂᤢᤏᤡ᤹ ᤕᤠ᤺ᤶᤒᤰᤁᤡᤸᤗᤧᤴ ᤜᤠᤱᤛᤧᤶᤔᤡᤴ ᤋᤃᤡᤀᤣ ᤔᤧᤄᤥ᤺ᤛᤢ ᤔᤧᤛᤢᤖᤢᤀᤠᤱ ᤔᤧᤘᤠ᤹ᤖᤥ॥
23359	MAT 6:8	ᤁᤖ ᤂᤡᤏᤡ᤹ ᤂᤧᤱᤜᤠ᤹ ᤜᤧᤰᤁᤣ ᤔᤧᤈᤥᤃᤧᤶᤔᤡᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤏᤠ᤺ᤰᤔᤠᤏᤢ᤺ᤸᤗᤧ ᤋᤃᤡᤀᤣ ᤛᤠᤱᤃᤪᤠᤶᤒᤠ ᤐᤠᤏᤢᤍᤡᤱ ᤂᤡᤏᤡ᤹ ᤐᤠ᤺ᤸᤗᤧ ᤁᤧᤱᤃᤳᤋᤢᤶᤔᤡᤴᤒᤠᤴ ᤏᤡ᤺ᤛᤢ᤹ᤖᤥ॥”
23360	MAT 6:9	“ᤂᤧᤸᤗᤧ ᤆᤥᤃᤢᤸᤗᤧ ᤀᤰᤂᤣᤗ᤹ᤖᤡᤰ ᤋᤢᤘᤠ ᤆᤥᤃᤧᤶᤔᤧ᤹ᤀᤥ– ‘ᤛᤠᤱᤃᤪᤠᤶᤐᤣᤍᤠᤱᤅᤥ ᤁᤧᤘᤠ᤹ᤒᤠ ᤀᤠᤏᤡᤃᤧ ᤐᤠᤏᤢᤍᤡᤱ ᤐᤠᤀᤣ. ᤔᤏᤠᤜᤠ᤹ᤖᤧ ᤁᤧᤔᤡᤱᤅᤡᤴ ᤛᤣᤛᤣ ᤔᤧᤀᤡ᤺ᤳᤋᤢᤖ ᤔᤡᤱᤛᤥ ᤀᤡᤱᤎᤠ᤺ᤱ ᤁᤧᤶᤒᤡᤖᤖᤥ॥
23364	MAT 6:13	ᤜᤱᤛᤠ᤹ᤔᤥ ᤀᤠᤴᤎᤠ᤺ᤛᤧᤴᤏᤧ᤹ᤀᤥ. ᤁᤖ ᤔᤠᤑᤧᤴᤛᤠᤶᤗᤠᤶ ᤀᤠᤛᤧ᤺ᤵᤋᤧ᤹ᤀᤥ॥ ((ᤌᤣᤀᤠᤱᤓᤧᤸᤗᤧ ᤜᤠᤱᤈᤢᤶ. ᤔᤢᤰᤛᤠᤶ ᤏᤢ ᤔᤡᤔᤡᤍᤡᤱᤅᤡᤴ ᤛᤍᤠᤍᤡᤱ ᤂᤧᤏᤧ᤹ᤀᤡᤴᤏᤣᤖᤥ॥))’
23366	MAT 6:15	ᤁᤖ ᤂᤡᤏᤡ᤹ ᤋᤰᤗᤧᤱᤘᤠᤀᤥ ᤗᤠᤕᤥ ᤁᤧᤈᤥ᤺ᤰᤐᤠᤜᤠ᤹ ᤗᤧᤵᤔᤡ ᤁᤧᤶᤒᤡᤖᤢᤶᤛᤡᤶᤔᤡᤴᤏᤧ ᤑᤠ᤹ᤃᤪ ᤂᤡᤏᤡ᤹ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤀᤠᤱ ᤂᤡᤏᤡ᤹ ᤗᤠᤕᤥ᤺ᤴ ᤗᤧᤵᤔᤡ ᤁᤧᤶᤒᤡᤖᤡᤴᤗᤥ॥”
23367	MAT 6:16	“ᤜᤧᤰᤁᤩᤠᤱ ᤂᤡᤏᤡ᤹ ᤆᤠ᤺ᤏᤧᤳ ᤁᤧᤕᤢᤱᤅᤡᤸᤗᤧ ᤏᤡᤱᤘᤠ᤹ ᤁᤧᤈᤡ᤺ᤵᤐᤠᤜᤠ᤹ ᤁᤢᤀᤡᤛᤡ᤺ᤰ ᤂᤡᤏᤡ᤹ ᤏᤠ ᤔᤧᤔᤠᤰᤋᤧᤶᤔᤡᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤆᤠ᤺ᤏᤧᤳ ᤔᤧᤕᤢᤱᤅᤡᤸᤗᤧ ᤘᤣ᤹ ᤔᤏᤠᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥ᤺ᤛᤢᤖ ᤑᤠ᤹ᤀᤠᤱ ᤂᤢᤏᤡ᤹ ᤏᤠᤖᤠ᤺ᤴ ᤔᤧᤃᤡ᤺ᤴᤍᤢᤖ ᤔᤧᤕᤢᤱᤗᤥ॥ ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤂᤧᤱᤜᤠ᤹ᤖᤧᤃ ᤂᤢᤏᤡ᤹ ᤜᤠᤱᤛᤧᤶᤔᤡᤴ ᤁᤧᤖᤧᤰ ᤔᤧᤄᤥ᤺ᤛᤢ ᤔᤧᤛᤢᤖᤢᤀᤠᤱ ᤔᤧᤘᤠ᤹ᤖᤥ॥
23369	MAT 6:18	ᤜᤧᤰᤁᤣᤗ᤹ᤖᤡᤰ ᤂᤧᤏᤧ᤹ ᤆᤠ᤺ᤏᤧᤳ ᤁᤧᤕᤢᤱᤒᤠᤴ ᤘᤣ᤹ ᤔᤏᤠᤜᤠ᤹ᤖᤧ ᤏᤡᤱᤘᤠ᤹ ᤔᤧᤱᤄᤥ᤺ᤛᤢᤴᤗᤖᤥ. ᤁᤖ ᤏᤡ᤺ᤔᤧᤴᤍᤧᤵᤔᤏᤠᤒᤠ ᤐᤠᤏᤢᤍᤡᤱ ᤁᤧᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤖᤰ ᤏᤡ᤺ᤛᤢᤖᤖᤥ॥ ᤜᤧᤰᤁᤣ ᤁᤧᤈᤥᤃᤢᤸᤗᤧ ᤛᤫᤠ᤺ᤳᤋᤠᤱ ᤆᤥ᤺ᤰᤔᤏᤠᤒᤠ ᤁᤧᤏᤡ᤺ᤒᤠ ᤐᤠᤏᤢᤍᤡᤱ ᤁᤧᤶᤒᤠᤖᤧ ᤜᤠᤱᤛᤧᤶ ᤁᤧᤒᤡ᤹ᤖᤥ॥”
23370	MAT 6:19	“ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤕᤠᤱᤛᤠᤁᤢᤴᤎᤣ ᤔᤧᤗᤢᤵᤛᤧᤴᤏᤧ᤹ᤀᤥ॥ ᤂᤧᤵᤔᤥᤃ ᤌᤰᤐᤠᤜᤠ᤹ᤖᤧ ᤔᤧᤈ᤹᤺. ᤜᤡᤱᤎᤥ᤺ᤰᤁᤡᤸᤗᤧ ᤕ᤺ᤴᤍᤢ᤹. ᤜᤧᤰᤁᤩᤠᤱ ᤂᤢ᤺ᤴᤍᤪᤡᤰᤐᤠᤜᤠ᤹ᤖᤧ ᤔᤧᤄᤢ᤺ᤳᤋᤢ᤹ᤖᤥ॥
23375	MAT 6:24	ᤀᤠᤳᤋᤡᤸᤗᤧᤀᤠᤱ ᤏᤧᤵᤑᤢ ᤍᤠᤱᤒᤠᤜᤠ᤹ ᤛᤣᤘᤠ ᤆᤥ᤺ᤰᤔᤠᤛᤡ ᤔᤧᤛᤢᤰᤋᤢᤴᤛᤡᤴᤗᤥ॥ ᤂᤧᤸᤗᤧ ᤌᤡᤰᤁᤡᤴ ᤏᤢ᤺ᤖᤡᤰ ᤔᤧᤳᤋᤢ᤹ᤀᤠᤱ ᤘᤣ᤹ᤛ᤻ᤔᤠᤴ ᤆᤡ᤺ᤳᤋᤢ᤹ᤖᤥ. ᤔᤧ᤺ᤱᤃᤪ ᤌᤡᤰᤁᤡᤴ ᤀᤡᤱᤎᤠ᤺ᤱ ᤐᤡᤖᤢᤀᤠᤱ ᤘᤣ᤹ᤛ᤻ᤔᤠᤴ ᤀᤡᤱᤎᤠ᤺ᤱ ᤔᤧᤒᤡᤖᤢᤴᤗᤥ॥ ᤂᤧᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤢ ᤕᤠᤱᤛᤠᤁᤢᤴᤎᤣ᤺ᤴ ᤛᤥᤛᤥᤖᤡᤰ ᤛᤣᤘᤠ ᤆᤥ᤺ᤰᤔᤠ ᤁᤧᤴᤇᤢᤰᤋᤢᤴᤗᤥ॥”
23376	MAT 6:25	“ᤂᤧᤸᤗᤧ ᤆᤥᤃᤢᤸᤗᤧ ᤀᤡᤱᤃᤠ᤹ ᤂᤡᤏᤡ᤹ ᤔᤧᤳᤏᤡᤱ. ᤁᤴ ᤏᤧᤳᤋᤡᤃᤧᤴ ᤜᤡᤱᤔᤴᤏᤥ ᤌᤣ᤺ᤴ ᤆᤠᤔᤠ ᤌᤢᤱᤔᤠᤒᤣ ᤑᤠ᤹ᤀᤠᤱ ᤏᤡᤱᤘᤠ᤹ ᤀᤡ᤺ᤳᤇᤡᤱᤔᤥ ᤔᤧᤎᤩᤧᤶᤔᤡᤴᤏᤧ᤹ᤀᤥ. ᤜᤧᤰᤁᤣᤗ᤹ᤖᤡᤰᤁᤣ ᤁᤴ ᤏᤠᤛᤡᤱᤃᤧᤴ ᤌᤰᤁᤥᤀᤠᤱ ᤌᤣ᤺ᤴ ᤆᤠᤱᤔᤠ ᤘᤠ᤺ᤵᤔᤠᤒᤣ ᤑᤠ᤹ᤀᤠᤱ ᤏᤡᤱᤘᤠ᤹ ᤀᤡ᤺ᤳᤇᤡᤱᤔᤥ ᤔᤧᤎᤩᤧᤶᤔᤡᤴᤏᤧ᤹ᤀᤥ॥ ᤏᤧᤳᤋᤡᤃᤧᤴ ᤜᤡᤱᤔᤴᤏᤡᤴ ᤆᤠᤔᤠ ᤌᤢᤱᤔᤠᤏᤢ᤺ᤸᤗᤧ ᤜᤧᤰᤁᤩᤠᤱ ᤏᤠᤛᤡᤱᤃᤧᤴ ᤌᤰᤁᤡᤴ ᤆᤠᤱᤔᤠ ᤘᤠ᤺ᤵᤔᤠᤏᤢ᤺ᤸᤗᤧ ᤏᤢ᤺ᤒᤠ ᤔᤧᤈᤥ᤺ᤰᤏᤧᤴᤒᤡ᥅
23385	MAT 6:34	ᤂᤧᤸᤗᤧ ᤆᤥᤃᤢᤸᤗᤧ ᤋᤠ᤺ᤴᤍᤡᤰ ᤌᤣ ᤐᤥ᤺ᤱ ᤑᤠ᤹ᤀᤠᤱ ᤏᤡᤱᤘᤠ᤹ ᤀᤡ᤺ᤳᤇᤡᤱᤔᤥ ᤔᤧᤎᤩᤧᤶᤔᤡᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤋᤠ᤺ᤴᤍᤡᤰᤐᤠ ᤋᤢᤰᤂᤣ᤺ᤴ ᤋᤠ᤺ᤴᤍᤡᤰᤁᤣ ᤐᤥ᤺ᤱ. ᤜᤧᤰᤁᤩᤠᤱ ᤀᤠᤀᤡᤴᤒᤠ ᤋᤢᤰᤂᤣ᤺ᤴ ᤀᤠᤀᤡᤴᤇᤠ ᤕᤖᤡᤰ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥”
23386	MAT 7:1	ᤕᤧᤛᤢᤖᤧ ᤕᤠᤶᤔᤥ ᤐᤠ᤺ᤳᤋᤢ. “ᤔᤏᤠᤜᤠ᤹ ᤐᤠ᤺ᤴ ᤔᤧᤎᤡᤰᤋᤧᤶᤛᤡᤶᤔᤧᤴᤏᤧ᤹. ᤜᤧᤰᤁᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ᤀᤠᤱ ᤐᤠ᤺ᤴ ᤁᤧᤴᤎᤡᤰᤋᤡᤴᤗᤥ॥
23391	MAT 7:6	ᤛᤣᤛᤣ ᤆᤡᤃ᤺ᤰᤘᤠ᤺ᤴ ᤂᤩᤠᤒᤠᤜᤠ᤹ ᤔᤧᤒᤡᤖᤧᤶᤛᤡᤶᤔᤡᤴᤏᤧ᤹. ᤔᤧ᤺ᤴᤏᤧ ᤑᤠ᤹ᤃᤪ ᤂᤧᤱᤜᤠ᤹ ᤜᤡᤸᤗᤡᤰ ᤔᤧᤜᤡᤛᤡᤱ ᤜᤧᤰᤁᤩᤠᤱ ᤁᤧᤶᤓᤳᤋᤡ᤹ᤀᤠᤱ ᤁᤧᤶᤜᤠ᤹ᤖᤡᤖᤥ॥ ᤜᤧᤰᤁᤩᤠᤱ ᤑᤠᤰᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤋᤧᤰᤛᤣ᤺ᤰᤁᤡᤴ ᤔᤧᤛᤧᤛᤧᤶᤔᤡᤴᤏᤧ᤹ᤀᤥ. ᤂᤧᤱᤜᤠ᤹ᤖᤧ ᤔᤧᤍᤥ᤹ᤖᤢ ᤔᤧᤗᤠ᤺ᤰᤋᤢ᤹ᤖᤥ॥”
23392	MAT 7:7	“ᤏᤠ᤺ᤰᤋᤧᤶᤔᤧ᤹. ᤜᤧᤰᤁᤩᤠᤱ ᤂᤡᤏᤡ᤹ ᤁᤧᤶᤒᤡᤖᤡ᤹॥ ᤁᤥ᤺ᤳᤋᤧᤶᤔᤧ᤹. ᤜᤧᤰᤁᤩᤠᤱ ᤂᤡᤏᤡ᤹ ᤁᤧᤄᤥ᤺ᤛᤢᤶ॥ ᤗᤠᤶᤎᤣ᤺ᤵᤐᤥ ᤐᤣᤃᤧᤶᤔᤧ᤹ᤀᤠᤱ ᤂᤰ ᤂᤰ ᤔᤧᤳᤋᤧᤶᤔᤧ᤹ ᤜᤧᤰᤁᤩᤠᤱ ᤂᤡᤏᤡ᤹ ᤗᤠᤃᤡ ᤜᤴᤗᤥ॥
23396	MAT 7:11	ᤂᤡᤏᤡ᤹ ᤏᤡᤱᤘᤠ᤹ ᤁᤧᤓᤧ᤹ᤒᤠ ᤁᤧᤈᤥᤃᤡᤛᤠᤱ ᤂᤡᤏᤡ᤹ ᤛᤠ᤺ᤜᤠ᤹ᤖᤧ ᤔᤧᤏᤠ᤺ᤰᤋᤢᤸᤗᤧ ᤏᤢ᤺ᤒᤠ ᤐᤠ᤺ᤴᤜᤠ᤹ ᤐᤡᤔᤠ ᤁᤧᤗᤧᤛ᤻ᤛᤢᤶᤏᤧ ᤑᤠ᤹ᤃᤪ. ᤂᤧᤴᤏᤢ᤺ᤸᤗᤧᤀᤠᤱ ᤕᤖᤡᤰ ᤂᤡᤏᤡ᤹ ᤛᤠᤱᤃᤪᤠᤶᤐᤣᤍᤠᤱᤅᤥᤒᤠ ᤐᤠᤏᤢᤍᤡᤱ ᤐᤠ᤺ᤸᤗᤧ ᤂᤢᤏᤧ᤹ ᤁᤧᤏᤠ᤺ᤰᤐᤠᤜᤠ᤹ ᤏᤢ᤺ᤒᤠ ᤐᤠ᤺ᤴᤜᤠ᤹ ᤐᤡᤖᤢᤛᤡ᤹ᤖᤥ॥”
23397	MAT 7:12	“ᤁᤧᤖᤧᤰ ᤐᤠ᤺ᤴᤏᤥ ᤔᤏᤠᤜᤠ᤹ᤖᤧ ᤀᤠᤰᤂᤣᤗ᤹ᤖᤡᤰ ᤂᤡᤏᤡ᤹ ᤁᤧᤶᤔᤧᤳᤋᤡ ᤁᤧᤶᤀᤡ᤺ᤳᤋᤡᤒᤠ ᤏᤡᤱᤘᤠ᤹ ᤁᤧᤈᤥᤃᤢᤶ. ᤜᤧᤰᤁᤣᤗ᤹ᤖᤡᤰᤁᤣ ᤂᤡᤏᤡ᤹ᤀᤠᤱ ᤂᤧᤱᤜᤠ᤹ ᤀᤡ᤺ᤳᤋᤧᤶᤛᤡᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤁᤴ ᤌᤡᤶᤔᤥ ᤔᤥᤛᤠᤖᤧ ᤛᤠᤵᤋᤢᤒᤠ ᤛᤠᤶᤕᤥᤌᤡᤶ ᤏᤢ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤔᤧᤒᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤁᤧᤳᤗᤥ॥”
23398	MAT 7:13	“ᤆᤡᤓᤡ᤺ᤵᤑᤡ᤺ᤵᤐᤠ ᤗᤠ᤺ᤵᤔᤠᤍᤧᤴᤏᤥᤗᤠᤶ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤥ ᤗᤠ᤺ᤛᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤕᤶᤒᤠ ᤗᤠ᤺ᤵᤔᤠᤍᤧᤴ ᤏᤢ ᤋᤠᤶᤍᤠᤶᤒᤠ ᤗᤠᤶᤔᤡᤸᤗᤧᤃ ᤔᤧᤰᤔᤠᤀᤥ ᤁᤧᤍᤣ᤹ᤖᤡ᤹ᤖᤥ॥ ᤂᤧᤴᤗᤠᤶᤒᤠ ᤕᤖᤡᤰ ᤔᤏᤠᤜᤠ᤹ ᤔᤧᤗᤠ᤺ᤳᤗᤥ॥
23399	MAT 7:14	ᤁᤖ ᤆᤢᤰᤛᤠ ᤗᤠ᤺ᤵᤔᤠᤍᤧᤴ ᤏᤢ ᤆᤡᤓᤡ᤺ᤵᤑᤡ᤺ᤵᤐᤠ ᤗᤠᤶᤔᤡᤸᤗᤧᤃ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴᤏᤥ ᤁᤧᤍᤣ᤹ᤖᤡ᤹ᤖᤥ॥ ᤂᤧᤴ ᤁᤧᤄᤥ᤺ᤒᤠᤜᤠ᤹ᤃ ᤔᤡᤛᤠᤰᤗᤰ ᤔᤧᤒᤥ᤺ᤱᤗᤥ॥”
23400	MAT 7:15	“ᤀᤡᤱᤗᤧᤰᤐᤠ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ᤏᤢ ᤛᤡᤱᤛᤡᤱ ᤕᤧᤰᤕᤧᤰ ᤗ᤹ᤖᤧᤶᤔᤧ᤹ᤀᤥ. ᤂᤧᤱᤜᤠ᤹ᤃ ᤗᤠ᤺ᤰᤁᤠᤳᤗᤠᤶ ᤔᤧᤸᤗᤢᤰ ᤁᤢᤀᤡᤛᤡ᤺ᤰ ᤔᤧᤗᤧᤱᤛᤡᤱᤅᤠᤱ ᤂᤡᤏᤡ᤹ᤀᤥ ᤔᤧᤍᤠᤖᤥ. ᤁᤖ ᤛᤡᤃᤠᤱᤃ ᤂᤧᤱᤜᤠ᤹ ᤁᤡᤵᤔᤠ ᤁᤧᤄᤢ᤺ᤒᤠ ᤐᤖᤠᤒᤠᤛᤡᤖᤥ॥
23405	MAT 7:20	ᤂᤧᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤂᤢᤏᤡ᤹ ᤕᤠ᤺ᤶᤒᤰᤁᤥᤗᤠᤶ ᤀᤡᤱᤗᤧᤰᤐᤠ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤛᤡᤶᤗᤥ॥”
23406	MAT 7:21	ᤀᤠᤸᤗ “‘ᤀᤠᤍᤠᤱᤒᤣ. ᤀᤠᤍᤠᤱᤒᤣ’. ᤗ᤹ᤖᤡᤰ ᤕᤠᤵᤔᤡ ᤁᤧᤔᤧᤵᤐᤠᤜᤠ᤹ ᤁᤧᤖᤧᤰ ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤥ ᤔᤧᤴᤗᤠ᤺ᤳᤏᤧᤴᤗᤥ. ᤁᤖ ᤛᤠᤱᤃᤪᤠᤶᤐᤣᤍᤠᤱᤅᤥ ᤁᤧᤘᤠ᤹ᤒᤠ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤁᤢᤏᤡᤱᤘᤠ᤹ ᤜᤧᤰᤁᤣ ᤁᤧᤈᤥ᤺ᤰᤐᤠᤜᤠ᤹ᤖᤰ ᤔᤧᤗᤠ᤺ᤳᤗᤥ॥
23407	MAT 7:22	ᤂᤠᤛᤧᤴ ᤕᤧᤴᤏᤥ ᤕᤖᤡᤰ ᤔᤏᤠᤜᤠ᤹ ᤔᤧᤍᤠᤀᤠᤱ ᤀᤰᤂᤣ ᤔᤧᤔᤧᤳᤋᤠᤖᤥ. ‘ᤀᤠᤍᤠᤱᤒᤣ. ᤀᤠᤍᤠᤱᤒᤣ. ᤂᤧᤏᤧ᤹ ᤁᤧᤔᤡᤱᤅᤥ ᤔᤠᤱᤏᤡᤱᤘᤠ᤹ᤐᤠ᤺ᤴ ᤐᤠᤖᤡᤃᤧᤖᤥ. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤔᤡᤱᤅᤥ ᤑᤧᤴᤛᤠᤶᤜᤠ᤹ ᤏᤠ᤺ᤳᤋᤢᤶ ᤗ᤺ᤳᤋᤢᤶᤛᤡᤶᤒᤧᤀᤠᤱ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤆᤥᤃᤢᤶᤒᤧᤖᤥ॥’
23408	MAT 7:23	ᤁᤖ ᤂᤧᤴ ᤕᤧᤶᤔᤥ ᤂᤧᤱᤜᤠ᤹ ᤀᤡᤱᤃᤠ᤹ ᤀᤰᤂᤣ ᤔᤧᤳᤋᤢᤱᤛᤡᤱ. ‘ᤂᤡᤏᤡ᤹ᤃ ᤀᤠᤵᤑᤠᤸᤗᤧᤀᤠᤱ ᤁᤢᤛᤡᤱ ᤏᤡ᤺ᤳᤏᤡᤱᤒᤠ ᤜᤥ᤺ᤵᤗᤥ॥ ᤂᤡᤏᤡ᤹ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤁᤢᤏᤡᤱᤘᤠ᤹ ᤜᤧᤰᤁᤣ ᤔᤧᤴᤈᤥ᤺ᤰᤁᤣ ᤑᤧᤴ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤛᤣ. ᤁᤵᤔᤥᤗᤠᤶ ᤐᤣᤃᤧᤶᤔᤧ᤹᥄’”
23409	MAT 7:24	ᤀᤠᤸᤗ “ᤂᤧᤸᤗᤧ ᤆᤥᤃᤢᤸᤗᤧ ᤐᤣᤗᤡᤃᤧᤴ ᤀᤠᤒᤠ᤺ᤴᤈᤠᤰ ᤁᤧᤄᤧᤶᤒᤠᤀᤠᤱ ᤜᤧᤰᤁᤣ ᤁᤧᤈᤥ᤺ᤰᤐᤧᤱᤃ ᤐᤕᤶ ᤕᤶᤒᤠ ᤗᤢᤱᤛᤶᤍᤠᤱ ᤜᤡᤶᤐᤠᤱᤕᤰ ᤁᤧᤏᤧᤒᤠᤀᤠᤱ ᤜᤡᤶ ᤁᤧᤈᤥ᤺ᤰᤐᤠ ᤛᤡᤰᤁᤢᤶᤒᤠ ᤔᤏᤠ ᤁᤢᤀᤡᤛᤡ᤺ᤰ ᤆᤥ᤺ᤰᤗᤥ॥
23412	MAT 7:27	ᤐᤠᤱᤃᤧᤴᤍᤡᤱ ᤘᤠᤜᤡᤳ ᤌᤩᤧᤀᤠᤱ. ᤕᤱᤄᤱᤅᤡᤴ ᤁᤢᤰᤂᤧ ᤕᤧ. ᤜᤧᤰᤁᤩᤠᤱ ᤁᤡᤵᤔᤠ ᤁᤧᤄᤢ᤺ᤒᤠ ᤛᤢᤖᤡᤳ ᤁᤣᤈᤱ ᤜᤢ᤺ᤖᤧᤀᤠᤱ ᤂᤧᤴ ᤜᤡᤶᤔᤡᤴ ᤜᤡᤵᤋᤢᤸᤗᤧ ᤕᤖᤧᤒᤣᤖᤥ॥”
23416	MAT 8:2	ᤜᤰᤆᤄᤳ ᤂᤧᤵᤔᤥ ᤗᤥᤃᤣ᤹ ᤋᤢᤰᤔᤠᤸᤗᤧ ᤋᤖᤢᤒᤠ ᤔᤏᤠᤎᤡᤰ ᤁᤢᤍᤃᤡ ᤌᤢᤱᤒᤥᤜᤈ᤹ ᤕᤢᤱᤛᤡᤱᤅᤠᤱ ᤂᤧᤸᤗᤧ ᤀᤰᤂᤣ ᤔᤧᤳᤋᤢ. “ᤀᤠᤍᤠᤱᤒᤣ. ᤂᤧᤏᤧ᤹ ᤏᤡᤱᤘᤠ᤹ ᤁᤧᤈᤥᤃᤢᤏᤧ ᤑᤠ᤹ᤃᤪ ᤀᤡᤱᤃᤠ᤹ ᤘᤣ᤺ᤶᤔᤠ ᤁᤧᤛᤢᤰᤁᤠᤖᤥ॥”
23417	MAT 8:3	ᤕᤧᤛᤢᤖᤧ ᤁᤢᤜᤢᤰᤁᤡᤴ ᤛᤴᤇᤢᤖ ᤂᤧᤴ ᤔᤏᤠ᤺ᤴ ᤛᤢ᤺ᤛᤢᤀᤠᤱ ᤀᤰᤂᤣ ᤔᤧᤳᤋᤢ. “ᤀᤡᤱᤃᤠ᤹ ᤏᤡᤱᤘᤠ᤹ ᤆᤥᤃᤢᤱᤗᤥ॥ ᤂᤧᤏᤧ᤹ ᤏᤢᤖᤧ᤹ᤀᤥ᥄” ᤂᤡᤔᤥ ᤂᤧᤴ ᤔᤏᤠ᤺ᤴ ᤗᤥᤃᤣ᤹ ᤋᤢᤰᤔᤠᤗᤠᤶ ᤏᤢ᤺ᤖᤧᤖᤥ॥
23418	MAT 8:4	ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤀᤠᤳᤋᤡᤴ ᤔᤏᤠ᤺ᤴᤏᤠᤱ ᤁᤴ ᤐᤠ᤺ᤴᤏᤡᤴ ᤔᤧᤔᤧᤳᤋᤧᤴᤏᤧ᤹ᤀᤥ. ᤁᤖ ᤔᤠᤱᤜᤡᤶᤔᤥ ᤐᤣᤃᤧ᤹ᤀᤠᤱ ᤏᤢ᤺ᤖᤠᤱᤗᤥ ᤑᤠ᤹ᤀᤠᤱ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤥ ᤀᤥᤛᤣ᤺ᤴᤎᤠᤰᤛᤡᤱᤅᤧ᤹ᤀᤥ. ᤜᤧᤰᤁᤩᤠᤱ ᤔᤥᤛᤠᤖᤧ ᤁᤢᤛᤠᤶᤕᤥᤌᤡᤶᤔᤥ ᤛᤠᤵᤋᤧᤒᤠ ᤁᤢᤀᤡᤛᤡ᤺ᤰ ᤛᤡᤍᤢᤱᤈᤓᤠ ᤆᤥᤃᤧ᤹ᤀᤥ॥ ᤜᤧᤰᤁᤣᤗ᤹ᤖᤡᤰ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤧᤏᤧ᤹ ᤁᤧᤏᤢᤖᤧᤒᤠᤴ ᤔᤧᤏᤡ᤺ᤛᤢᤖᤖᤥ॥”
23420	MAT 8:6	“ᤍᤠᤱᤒᤣ. ᤀᤡᤱᤃᤠ᤹ ᤀᤠᤛᤣᤘᤠᤖᤥᤒᤠᤴ ᤜᤡᤶᤔᤥ ᤐᤥ᤺ᤰᤔᤠ ᤕᤢᤱᤔᤠ ᤔᤧᤴᤇᤢᤰᤁᤣ ᤌᤠᤖᤡᤰ ᤋᤢᤰᤁᤠᤱ ᤏᤧᤖᤥ॥”
23421	MAT 8:7	ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤀᤡᤱᤃᤠ᤹ ᤐᤣ᤺ᤰᤁᤠᤀᤠᤱ ᤏᤢᤛᤢᤱᤗᤥ॥”
23422	MAT 8:8	ᤁᤖ ᤌᤰᤋᤢᤶᤒᤠᤸᤗᤧ ᤏᤥᤃᤵ ᤐᤡᤖᤢ “ᤍᤠᤱᤒᤣ. ᤂᤧᤏᤧ᤹ ᤀᤠᤜᤡᤶᤔᤥ ᤗᤠᤱᤍᤠ᤺ᤰᤔᤠ ᤀᤡᤱᤃᤠ᤹ ᤔᤧᤗᤠ᤹ᤀᤠᤴᤗᤥ॥ ᤂᤧᤏᤧ᤹ ᤏᤢ᤹ᤖ ᤑᤠ᤹ᤀᤠᤱ ᤁᤧᤒᤠ᤺ᤳᤋᤢᤛᤠᤱ ᤀᤠᤛᤣᤘᤠᤖᤥᤒᤠᤴ ᤏᤢ᤹ᤖᤥ॥
23423	MAT 8:9	ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ᤀᤠᤱ ᤀᤠᤎᤢᤱᤎᤥᤒᤠ ᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤂᤢᤏᤡ᤹ ᤕᤢᤰᤁᤥ ᤁᤧᤘᤠ᤹ᤒᤠ ᤔᤏᤠᤀᤠᤖᤥ. ᤜᤧᤰᤁᤩᤠᤱ ᤀᤡᤱᤃᤠ᤹ᤀᤠᤱ ᤀᤠᤕᤢᤰᤁᤥ ᤌᤰᤛᤢᤒᤠᤜᤠ᤹ ᤔᤧᤘᤠ᤹ᤖᤥ॥ ᤀᤡᤱᤃᤠ᤹ ᤌᤰᤛᤢᤒᤠᤴ ‘ᤐᤣᤃᤧ᤹’ ᤔᤧᤳᤋᤢᤱᤅᤡᤸᤗᤧ ᤐᤣ᤺ᤰ. ᤘᤣ᤹ᤛ᤻ᤔᤠᤴ ‘ᤑᤧᤖᤧ᤹’ ᤔᤧᤳᤋᤢᤱᤅᤡᤸᤗᤧ ᤑᤧᤴ. ᤜᤧᤰᤁᤩᤠᤱ ᤀᤠᤛᤣᤘᤠᤖᤥᤒᤠᤴ ‘ᤂᤧᤴ ᤆᤥᤃᤧ᤹’ ᤔᤧᤳᤋᤢᤱᤅᤡᤸᤗᤧ ᤂᤧᤸᤗᤧ ᤆᤥᤃᤢ᤹ᤖᤥ॥”
23424	MAT 8:10	ᤕᤧᤛᤢᤖᤧ ᤁᤴ ᤂᤧᤵᤛᤢᤸᤗᤧ ᤁᤢᤏᤡᤱᤘᤠ᤹ ᤔᤕᤧᤖ ᤂᤢᤏᤧ᤹ ᤁᤢᤀᤣᤃᤠᤱ ᤁᤢᤀᤣᤃᤠᤱ ᤁᤧᤍᤡᤶᤒᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤀᤰᤋᤱᤒᤠ ᤕᤶᤒᤠ ᤏᤛᤠ᤺ᤴ ᤁᤧᤃᤵᤐᤠ ᤔᤏᤠ᤺ᤱᤃ ᤀᤡᤛᤪᤠᤀᤡᤗᤥᤀᤠᤱ ᤀᤡᤱᤃᤠ᤹ ᤔᤧᤱᤄᤥᤀᤣ ᤘᤠ᤹ᤀᤠᤖᤥ᥄
23426	MAT 8:12	ᤁᤖ ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤥ ᤘᤠ᤹ᤔᤠ ᤑᤠ᤹ᤀᤠᤱ ᤔᤧᤛᤣᤃᤧᤒᤠ ᤀᤡᤛᤪᤠᤀᤡᤗᤡᤜᤠ᤹ᤃ ᤂᤧᤵᤔᤥᤗᤠᤶ ᤗᤠ᤺ᤰᤁᤠᤳ ᤂᤠᤔᤠᤰ ᤗᤢᤶᤒᤠ᤺ᤳᤋᤥ ᤗᤠᤵᤔᤧᤓᤢ᤹ᤖᤥ॥ ᤂᤧᤵᤔᤥᤃ ᤜᤠ᤺ᤵᤔᤠ ᤏᤢ ᤜᤠᤒᤥ᤹ ᤕᤧ᤺ᤱᤔᤠᤴᤗᤰ ᤐᤥ᤺ᤱᤗᤥ॥”
23427	MAT 8:13	ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤴ ᤌᤰᤋᤢᤶᤒᤧᤴ ᤔᤧᤳᤋᤢ. “ᤐᤣᤃᤧ᤹ᤀᤥ. ᤏᤛᤠ᤺ᤴ ᤁᤧᤈᤥᤃᤢᤒᤠ ᤜᤧᤰᤁᤣᤀᤣ ᤐᤥ᤺ᤱᤗᤥ॥” ᤜᤧᤰᤁᤩᤠᤱ ᤂᤧᤴ ᤁᤢᤛᤣᤘᤠᤖᤥᤒᤠᤴ ᤒᤠ ᤂᤧᤴ ᤕᤧᤶᤔᤥᤀᤣ ᤏᤢ᤺ᤖᤧᤖᤥ॥
23431	MAT 8:17	ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤕᤛᤤᤕᤠ᤺ᤸᤗᤧ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢᤒᤠᤴ ᤁᤧᤳᤗ ᤑᤠ᤹ᤀᤠᤱ ᤀᤰᤂᤣ ᤐᤥ᤺ᤰᤂᤧᤒᤠᤖᤥ– “ᤂᤢᤏᤧ᤹ ᤀᤠᤒᤠᤅᤣ ᤀᤠᤏᤡ᤹ ᤋᤢᤰᤂᤣᤜᤠ᤹ ᤕᤠᤱᤛᤡᤱᤗᤥ. ᤜᤧᤰᤁᤩᤠᤱ ᤀᤠᤏᤡ᤹ ᤋᤢᤰᤔᤠ ᤕ᤹ᤔᤠᤜᤠ᤹ ᤁᤢᤕᤢ ᤋᤣ᤹ᤖᤢᤖᤥ॥”
23433	MAT 8:19	ᤂᤧᤱᤜᤠ᤹ᤖᤧ ᤐᤣ᤺ᤰᤔᤠ ᤕᤠᤖᤡᤵ ᤔᤧᤈᤥᤃᤢᤖ ᤔᤧᤕᤠᤃᤧᤸᤗᤧ ᤛᤠᤶᤕᤥᤌᤡᤶᤛᤠᤶᤒᤠᤎᤡᤰ ᤑᤧᤖᤧᤀᤠᤱ ᤔᤧᤳᤋᤢ. “ᤛᤡᤰᤛᤠᤶᤒᤣ. ᤂᤧᤏᤧ᤹ ᤀᤠᤳᤋᤡ ᤁᤧᤒᤣ᤺ᤰᤛᤠᤱ ᤂᤧᤏᤧ᤹ᤏᤢ ᤐᤣ᤺ᤰᤁᤠᤖᤥ॥”
23434	MAT 8:20	ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤁᤡᤎᤡᤒᤠᤜᤠ᤹ᤖᤧ ᤗᤢᤱᤄᤢᤖᤡ ᤔᤧᤃᤳᤋᤢ᤹. ᤐᤢᤛᤠᤜᤠ᤹ᤖᤧ ᤜᤠᤵ ᤔᤧᤃᤳᤋᤢ᤹. ᤁᤖ ᤀᤡᤱᤃᤠ᤹ ᤔᤧᤴᤇᤠᤶᤛᤠ᤺ᤸᤗᤧᤃ ᤌᤧᤃᤣ᤺ᤰ ᤏᤠ᤺ᤶᤔᤠ ᤋᤧᤴᤏᤠᤱ ᤔᤧᤃᤳᤋᤠᤴᤗᤥ॥”
23435	MAT 8:21	ᤘᤣ᤹ᤛ᤻ᤔᤠ ᤜᤢ᤹ᤛᤠᤶᤒᤠᤎᤡᤰᤗᤧ ᤂᤢᤏᤧ᤹ ᤔᤧᤳᤋᤢ. “ᤀᤠᤍᤠᤱᤒᤣ. ᤋᤃᤡ ᤀᤡᤱᤃᤠ᤹ ᤁᤧᤛᤡ᤺ᤒᤠ ᤀᤠᤶᤒᤠ᤺ᤴ ᤀᤡᤵᤐᤢᤱᤅᤥ ᤆᤡᤱᤛᤧ ᤐᤣ᤺ᤰᤔᤠ ᤐᤠᤱᤄᤠᤱᤅᤧ᤹ᤀᤥ॥”
23436	MAT 8:22	ᤁᤖ ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤀᤡᤱᤃᤠ᤹ ᤋᤡᤶᤍᤠᤱᤅᤧ᤹ᤀᤥ. ᤜᤧᤰᤁᤩᤠᤱ ᤜᤠᤖᤠ᤹ ᤕᤠᤶᤛᤠᤶᤔᤥ ᤁᤧᤛᤡ᤺ᤒᤠ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤀᤠᤒᤠᤅᤣ ᤆᤣᤜᤠ᤹ ᤀᤡᤵᤐᤢᤱᤅᤥ ᤔᤧᤈᤡᤰᤂᤢᤛᤡᤖᤖᤥ॥”
23439	MAT 8:25	ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤒᤣᤀᤠᤱ ᤂᤢᤏᤧ᤹ ᤀᤰᤂᤣ ᤔᤧᤔᤧᤳᤋᤢᤖ ᤔᤧᤓᤥ᤺ᤰᤂᤢ. “ᤀᤠᤍᤠᤱᤒᤣ. ᤕᤠᤵᤔᤡ ᤋᤠᤱᤛᤧ᤺ᤵᤋᤧ᤹ᤀᤥ᥄ ᤀᤠᤏᤡᤃᤧᤃ ᤜᤢᤶᤔᤠ ᤛᤡ᤺ᤔᤠ ᤀᤡ᤺ᤳᤋᤡᤃᤧᤖᤥ᥄”
23440	MAT 8:26	ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤏᤛᤠ᤺ᤴ ᤁᤧᤛᤢ᤺ᤶᤒᤠᤛᤣ. ᤌᤣᤀᤠᤱ ᤀᤰᤂᤣᤗ᤹ᤖᤡᤰ ᤁᤧᤃᤡ᤺ᤛᤡᤒᤠᤒᤣ᥅” ᤜᤧᤰᤁᤩᤠᤱ ᤂᤢᤏᤧ᤹ ᤐᤥᤃᤧᤀᤠᤱ ᤛᤢᤖᤡᤳ ᤁᤣᤈᤱᤅᤡᤴ ᤏᤢ ᤘᤠᤓᤧᤸᤗᤧᤱᤅᤡᤴ ᤑᤧ᤺ᤰᤋᤢ. ᤜᤧᤰᤁᤩᤠᤱ ᤁᤧᤖᤧᤰ ᤆᤡᤈᤡ ᤕᤧᤶᤕᤧᤶ ᤐᤥ᤺ᤰᤂᤧᤖᤥ॥
23441	MAT 8:27	ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖ ᤛᤣ᤺ᤴᤔᤧᤍᤥ᤺ᤛᤡᤱ “ᤂᤢᤏᤧ᤹ᤃ ᤀᤠᤰᤋᤱᤒᤠ ᤔᤏᤠ᤺ᤴᤒᤣ᥅ ᤂᤢᤏᤧ᤹ ᤁᤢᤀᤡᤱᤈᤠ᤺ᤱᤅᤡᤴ ᤘᤠᤓᤣᤸᤗᤧᤱ ᤏᤢ ᤛᤢᤖᤡᤳ ᤁᤣᤈᤱᤅᤡᤸᤗᤧᤀᤠᤱ ᤂᤧᤵᤛᤢᤱᤃ᥄”
23443	MAT 8:29	ᤂᤧᤱᤜᤠ᤹ ᤀᤰᤂᤣᤗ᤹ᤖᤡᤰ ᤀ᤺ᤰᤋᤧᤳᤇᤡ. “ᤏᤡᤱᤘᤠ᤹ᤑᤢᤛᤠ᤺ᤀᤣ. ᤂᤧᤏᤧ᤹ ᤀᤠᤴᤇᤡᤃᤧᤏᤢ ᤌᤣ ᤁᤧᤃᤥ᤺ᤳᤋᤢᤒᤠᤒᤣ᥅ ᤂᤠᤛᤧᤴ ᤕᤧᤶᤔᤡᤴᤏᤣ ᤔᤧᤴᤍᤠᤀᤣ ᤀᤠᤴᤇᤡᤃᤧ ᤋᤢᤰᤂᤣ ᤆᤠ᤺ᤳᤇᤧ ᤁᤵᤔᤥ ᤁᤧᤍᤩᤧᤒᤠᤒᤡ᥅”
23446	MAT 8:32	ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤐᤣᤃᤧᤶᤔᤧ᤹᥄” ᤂᤧᤸᤗᤧ ᤆᤥᤃᤢᤸᤗᤧ ᤂᤧᤴ ᤏᤧᤵᤑᤢ ᤔᤏᤠᤜᤠ᤹ᤗᤠᤶ ᤂᤧᤱᤜᤠ᤹ ᤔᤧᤗ᤺ᤴᤍᤧ ᤔᤧᤒᤣᤀᤠᤱ ᤑᤠᤰᤜᤠ᤹ᤀᤥ ᤔᤧᤗᤠ᤺ᤛᤧ॥ ᤜᤧᤰᤁᤩᤠᤱ ᤂᤧᤴ ᤑᤠᤰᤜᤠ᤹ ᤛᤱᤔᤠᤱᤅᤣ ᤛᤱᤔᤠᤱ ᤔᤧᤗᤥ᤺ᤰᤋᤧᤖ ᤕᤠᤰᤐᤧᤀᤥᤏᤢ ᤔᤰᤔᤧᤎᤩᤧᤀᤠᤱ ᤘᤖᤰᤁᤥ ᤔᤧᤜᤢᤔᤧ ᤔᤧᤛᤩᤧᤖᤥ॥
23450	MAT 9:2	ᤂᤧᤵᤔᤥ ᤁᤢᤓᤠ ᤔᤏᤠᤜᤠ᤹ᤖᤧ ᤗᤱᤗᤧ᤺ᤱᤘᤠ ᤔᤏᤠᤎᤡᤰ ᤁᤢᤏᤧᤳᤏᤠ᤺ᤴᤏᤢᤀᤣ ᤂᤢᤏᤧ᤹ᤀᤥ ᤔᤧᤍᤠᤖᤢᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤧᤴ ᤗᤱᤗᤧ᤺ᤱᤘᤠ᤺ᤴ ᤘᤣ᤺ᤵᤔᤠ ᤛᤢᤰ ᤁᤧᤗ᤹ᤒᤠ ᤏᤛᤠ᤺ᤴ ᤔᤧᤃᤳᤋᤢᤒᤠ ᤕᤧᤛᤢᤖᤧ ᤏᤡ᤺ᤛᤢᤀᤠᤱ ᤔᤧᤳᤋᤢ. “ᤀᤠᤛ᤻ᤛᤠ᤺ᤀᤣ. ᤜᤠᤱᤜᤠᤱ ᤗ᤹ᤖᤧ᤹ᤀᤥ. ᤂᤧᤏᤧ᤹ ᤁᤧᤗᤠᤕᤥᤜᤠ᤹ ᤗᤧᤵᤔᤡ ᤐᤥ᤺ᤰᤂᤧᤖᤥ॥”
23451	MAT 9:3	ᤜᤧᤰᤁᤣ᤺ᤸᤗᤧ ᤂᤧᤵᤔᤥ ᤁᤧᤘᤠ᤹ᤒᤠ ᤁᤢᤓᤠ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤀᤰᤂᤣ ᤔᤧᤔᤧᤳᤇᤡᤱ. “ᤁᤴ ᤔᤏᤠ᤺ᤸᤗᤧᤃ ᤏᤡᤱᤘᤠ᤹ᤑᤢᤔᤠᤱ ᤁᤢᤀᤡᤛᤡ᤺ᤰ ᤗᤠᤕᤥ ᤗᤧᤵᤔᤡ ᤁᤧᤒᤡᤒᤠ ᤗᤧᤱᤛᤡᤱᤅᤠᤱ ᤔᤠᤱᤆᤧ᤹ᤕᤠ ᤐᤠ᤺ᤴᤏᤡᤴᤏᤧ ᤐᤠ᤺ᤳᤋᤢᤖ ᤐᤳᤗᤥ᥄”
23452	MAT 9:4	ᤕᤧᤛᤢᤖᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤀᤡᤴ ᤏᤡ᤺ᤛᤢᤀᤠᤱ ᤀᤰᤂᤣ ᤔᤧᤳᤋᤢᤛᤡ. “ᤌᤣᤀᤠᤱ ᤜᤧᤰᤁᤣᤗ᤹ᤖᤡᤰ ᤑᤧᤴ ᤏᤡᤱᤘᤠ᤹ ᤁᤧᤀᤡ᤺ᤳᤋᤢᤶᤒᤠᤒᤣ᥅
23453	MAT 9:5	‘ᤁᤧᤗᤠᤕᤥᤜᤠ᤹ ᤗᤧᤵᤔᤡ ᤐᤥ᤺ᤰᤂᤧ’. ᤔᤧᤵᤔᤠ ᤀᤢᤛᤢᤖᤢ ᤆᤥ᤺ᤰᤐᤡ. ᤀᤡ ‘ᤐᤥᤃᤧ᤹ᤀᤠᤱ ᤌᤠᤛᤡᤱᤅᤧ᤹’ ᤔᤧᤵᤔᤠ ᤀᤢᤛᤢᤖᤢ ᤆᤥ᤺ᤰᤐᤡ᥅
23454	MAT 9:6	ᤀᤡᤱᤃᤠ᤹ ᤔᤧᤴᤇᤠᤶᤛᤠ᤺ᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤗᤠᤕᤥᤜᤠ᤹ ᤗᤧᤵᤔᤡ ᤐᤡᤔᤠ ᤕᤢᤰ ᤁᤳᤋᤢᤱ ᤗ᤹ᤖᤡᤰ ᤀᤥᤛᤣ᤺ᤴᤎᤠᤰᤏᤡᤱᤗᤥ॥” ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤂᤧᤴ ᤗᤱᤗᤧ᤺ᤱᤘᤠ᤺ᤴ ᤔᤧᤳᤋᤢ. “ᤐᤥᤃᤧ᤹. ᤁᤧᤏᤧᤳᤏᤠ᤺ᤴ ᤕᤠᤱᤛᤡᤱᤅᤧ᤹ᤀᤠᤱ ᤁᤧᤜᤡᤶᤔᤥ ᤌᤠᤛᤡᤱᤅᤧ᤹॥”
23457	MAT 9:9	ᤕᤧᤛᤢ᤺ᤴ ᤂᤧᤵᤔᤥᤗᤠᤶ ᤐᤣᤖ ᤐᤳᤇᤧᤸᤗᤧ ᤔᤳᤋᤡ ᤔᤧᤵᤔᤏᤠᤒᤠ ᤔᤏᤠ᤺ᤴ ᤀᤣ᤺ᤱᤕᤠᤱ ᤑᤥ᤺ᤱᤔᤠ ᤋᤧᤴᤏᤥ ᤕᤢᤅᤧᤒᤠ ᤏᤡ᤺ᤛᤢᤀᤠᤱ ᤔᤧᤳᤋᤢ. “ᤀᤡᤱᤃᤠ᤹ ᤋᤡᤶᤍᤠᤱᤅᤧ᤹ᤀᤥ॥” ᤂᤧᤴ ᤔᤢᤳᤌᤪᤡᤰ ᤐᤥᤃᤧᤀᤠᤱ ᤂᤢᤏᤧ᤹ᤏᤢ ᤌᤠᤛᤡᤱᤗᤥ॥
23458	MAT 9:10	ᤂᤧᤴ ᤕᤢ᤺ᤴᤇᤡᤰ ᤕᤧᤛᤢ᤺ᤴ ᤏᤢ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤳᤋᤡᤖᤧ ᤁᤢᤜᤡᤶᤔᤥ ᤆᤠᤈᤠᤛᤧ ᤔᤧᤕᤢᤱᤛᤡᤱᤅᤡᤸᤗᤧ ᤀᤣ᤺ᤱᤕᤠᤱ ᤁᤧᤓᤥ᤺ᤱᤒᤠ ᤕᤖᤡᤰ ᤔᤏᤠᤜᤠ᤹ ᤏᤢ ᤘᤣ᤹ “ᤗᤠᤕᤥᤒᤠᤜᤠ᤹” ᤔᤧᤍᤩᤧᤀᤠᤱ ᤂᤧᤱᤜᤠ᤹ᤏᤢ ᤛᤥᤖᤡᤰ ᤆᤠᤈᤠᤛᤧ ᤔᤧᤕᤢᤱᤛᤡᤱ॥
23459	MAT 9:11	ᤜᤧᤰᤁᤣ᤺ᤸᤗᤧ ᤁᤢᤓᤠ ᤑᤖᤡᤛᤡᤜᤠ᤹ᤖᤧ ᤂᤧᤴ ᤔᤧᤏᤡ᤺ᤛᤢᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤔᤧᤳᤋᤢᤛᤡ. “ᤌᤣᤀᤠᤱ ᤂᤡᤏᤡ᤹ ᤛᤡᤰᤛᤠᤶᤒᤠᤴ ᤀᤣ᤺ᤱᤕᤠᤱ ᤁᤧᤓᤥ᤺ᤱᤒᤠᤜᤠ᤹ ᤜᤧᤰᤁᤩᤠᤱ ᤘᤣ᤹ ᤗᤠᤕᤥᤒᤠᤜᤠ᤹ᤏᤢ ᤛᤥᤖᤡᤰ ᤆᤠᤈᤠᤒᤠᤒᤣ᥅”
23460	MAT 9:12	ᤕᤧᤛᤢᤖᤧ ᤁᤴ ᤂᤧᤵᤛᤢᤀᤠᤱ ᤔᤧᤳᤋᤢᤛᤡ. “ᤛᤡᤍᤠ᤹ᤛᤠᤶᤒᤧᤱᤃ ᤔᤧᤴᤍᤢᤰᤔᤏᤠᤜᤠ᤹ᤖᤧ ᤗᤠᤃᤡ ᤔᤧ᤺ᤴ. ᤁᤖ ᤁᤧᤍᤢᤰᤐᤠᤜᤠ᤹ᤖᤧ ᤗᤠᤃᤡᤖᤥ॥
23461	MAT 9:13	ᤛᤠᤶᤕᤥᤛᤠᤵᤗᤠᤀᤥ ᤕᤜᤘᤣ ᤍᤠᤱᤒᤠᤸᤗᤧ ᤀᤡᤱᤃᤠ᤹ᤃ ᤛᤡᤍᤢᤱᤈᤓᤠ ᤆᤠᤜᤠᤒᤠ ᤔᤧᤈᤥ᤺ᤰᤁᤠᤴ. ᤁᤖ ᤘᤣ᤹ᤜᤠ᤹ ᤗᤢᤱᤔᤠ᤹ ᤋᤢᤰᤋᤧᤶᤛᤡᤶᤔᤧ᤹ ᤁᤧᤗ᤹ᤒᤠ ᤏᤡᤱᤘᤠ᤹ ᤁᤳᤋᤢᤱᤗᤥ. ᤗ᤹ᤖᤡᤰ ᤐᤠ᤺ᤳᤋᤢᤒᤠ ᤁᤴ ᤐᤠ᤺ᤴᤏᤡᤸᤗᤧ ᤁᤢᤒᤣ᤺ᤴ ᤜᤢ᤹ᤀᤠᤛᤡᤶᤔᤧ᤹ᤀᤥ॥ ᤀᤡᤱᤃᤠ᤹ᤃ ᤛᤠᤶᤕᤥᤏᤡᤒᤠᤜᤠ᤹ᤖᤧ ᤗᤠᤃᤡ ᤔᤧ᤺ᤴ. ᤁᤖ ᤗᤠᤕᤥᤒᤠᤜᤠ᤹ ᤗᤠᤕᤥᤗᤠᤶ ᤔᤧᤏᤢ᤺ᤱᤅᤠᤱ ᤋᤠᤱᤔᤧᤛᤧ᤺ᤵᤗ ᤑᤠ᤹ᤀᤠᤱ ᤋᤩᤠᤱᤒᤠᤖᤥ॥”
23462	MAT 9:14	ᤜᤧᤰᤁᤩᤠᤱ ᤌᤡᤰᤗᤧᤱ ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤍᤩᤧᤀᤠᤱ ᤕᤧᤛᤢ᤺ᤴ ᤛᤣ᤺ᤴᤔᤧᤍᤥᤛᤢ. “ᤀᤠᤏᤡᤃᤧ ᤏᤢ ᤑᤖᤡᤛᤡᤜᤠ᤹ ᤆᤠ᤺ᤏᤧᤳᤋᤥ ᤀᤧᤳᤗᤧᤱ ᤕᤢᤅᤡᤃᤧ᤹ ᤁᤖ ᤌᤣᤀᤠᤱ ᤁᤧᤜᤢ᤹ᤛᤠᤶᤒᤠᤜᤠ᤹ ᤆᤠ᤺ᤏᤧᤳᤋᤥ ᤔᤧᤴᤕᤢᤱᤏᤧᤴᤒᤠᤒᤣ᥅”
23463	MAT 9:15	ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤔᤣ᤺ᤰᤂᤡᤶᤛᤠᤒᤧᤴ ᤁᤢᤴᤈᤢᤶᤜᤠ᤹ᤏᤢ ᤘᤠ᤹ᤖ ᤌᤠᤖᤡᤰ ᤂᤢᤏᤧ᤹ ᤁᤢᤴᤈᤢᤶᤜᤠ᤹ ᤆᤠ᤺ᤏᤧᤳᤋᤥ ᤔᤧᤕᤢᤱᤅᤠᤱ ᤔᤣᤖᤡᤱ ᤔᤧᤎᤰᤐᤡ᥅ ᤁᤖ ᤂᤧᤱᤜᤠ᤹ᤗᤠᤶ ᤔᤣ᤺ᤰᤂᤡᤶᤛᤠᤒᤧᤴ ᤛᤠᤰᤁᤧᤸᤗᤧᤰ ᤔᤧᤍᤧᤶᤛᤢᤀᤠᤱ ᤔᤧᤍᤣ᤹ᤖᤢᤸᤗᤧᤖᤰ ᤂᤧᤱᤜᤠ᤹ ᤆᤠ᤺ᤏᤧᤳᤋᤥ ᤔᤧᤕᤢᤱᤗᤥ॥
23465	MAT 9:17	ᤀᤠᤳᤋᤡᤸᤗᤧᤀᤠᤱ ᤁᤢᤛᤱ ᤆᤧᤸᤗᤧᤰᤛᤣ᤹ ᤌᤡ᤺ᤴ ᤁᤢᤍᤪᤧᤰ ᤛᤧᤜᤥᤒᤠ ᤛᤢ᤺ᤰᤘᤠᤀᤥ ᤔᤧᤕᤢᤰᤂᤢᤴ. ᤁᤖ ᤕᤢᤰᤂᤢᤏᤧ ᤑᤠ᤹ᤃᤪ ᤁᤢᤛᤱ ᤆᤧᤸᤗᤧᤰᤛᤣ᤹ ᤌᤡ᤺ᤸᤗᤧ ᤁᤢᤍᤪᤧᤰ ᤛᤧᤜᤥᤒᤠ ᤛᤢ᤺ᤰᤘᤠ᤺ᤴ ᤌᤧ᤺ᤰᤂᤢᤍᤣ᤺ᤛᤢ᤹ᤖᤥ. ᤜᤧᤰᤁᤩᤠᤱ ᤌᤡ᤺ᤴ ᤘᤧᤳ ᤐᤣ᤺ᤰᤁᤠᤱ ᤆᤠᤛᤥ᤺ᤰᤗᤥ॥ ᤁᤖ ᤁᤢᤛᤱ ᤆᤧᤸᤗᤧᤰᤛᤣ᤹ ᤌᤡ᤺ᤴ ᤁᤢᤛᤱ ᤛᤧᤜᤥᤒᤠ ᤛᤢ᤺ᤰᤘᤠᤀᤥ ᤕᤠᤰᤔᤠ ᤐᤥ᤺ᤱ. ᤜᤧᤰᤁᤣ᤺ᤸᤗᤧ ᤆᤧᤸᤗᤧᤰᤛᤣ᤹ ᤌᤡ᤺ᤴ ᤏᤢ ᤛᤧᤜᤥᤒᤠ ᤛᤢ᤺ᤰᤘᤠ᤺ᤴ ᤏᤧᤵᤔᤠᤱ ᤋᤠᤱᤗᤥ॥”
23466	MAT 9:18	ᤕᤧᤛᤢᤖᤧ ᤜᤧᤰᤁᤣ ᤐᤠ᤺ᤳᤋᤢᤖ ᤐᤳᤇᤧᤸᤗᤧ ᤛᤢᤜᤠᤱᤕᤢᤰᤐᤠᤎᤡᤰ ᤁᤢᤍᤃᤡ ᤌᤢᤱᤒᤥᤜᤈ᤹ ᤕᤢᤱᤛᤡᤱᤗ ᤀᤰᤂᤣ ᤐᤠ᤺ᤳᤋᤢ. “ᤀᤠᤍᤠᤱᤒᤣ. ᤀᤠᤛ᤻ᤛᤠ᤺ ᤆᤢᤰᤔᤧᤴ ᤂᤠᤖᤰ ᤛᤩᤧᤖᤥ. ᤁᤖ ᤂᤧᤏᤧ᤹ ᤑᤧᤖᤧ᤹ᤀᤠᤱ ᤁᤢᤛᤶᤍᤠᤱ ᤁᤧᤜᤢᤰᤁᤡᤴ ᤏᤧᤛ᤻ᤛᤧ ᤐᤡᤖᤧ᤹. ᤜᤧᤰᤁᤩᤠᤱ ᤂᤧᤴ ᤜᤡᤱᤗᤥ॥”
23470	MAT 9:22	ᤕᤧᤛᤢ᤺ᤴ ᤜᤡᤸᤗᤡᤰ ᤜᤡᤛᤡᤱᤅᤡᤸᤗᤧ ᤂᤧᤴ ᤔᤧᤴᤇᤢᤔᤠ᤹ᤀᤡᤴ ᤏᤡ᤺ᤛᤢᤀᤠᤱ ᤔᤧᤳᤋᤢ. “ᤔᤠᤔᤢᤀᤣ. ᤜᤠᤱᤜᤠᤱ ᤗ᤹ᤖᤧ᤹ᤀᤥ. ᤏᤛᤠ᤺ᤴ ᤁᤧᤈᤥᤃᤢᤒᤠᤸᤗᤧ ᤆᤥᤃᤢᤸᤗᤧ ᤂᤧᤏᤧ᤹ ᤁᤧᤘᤣ᤺ᤳᤋᤧᤖᤥ॥” ᤜᤧᤰᤁᤩᤠᤱ ᤂᤧᤴ ᤔᤧᤴᤇᤢᤔᤠ᤹ᤀᤡᤴ ᤜᤠᤒᤠ ᤂᤧᤴ ᤕᤧᤶᤔᤥ ᤘᤣ᤺ᤳᤋᤧᤖᤥ॥
23472	MAT 9:24	ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤐᤣᤃᤧᤶᤔᤧ᤹ᤀᤥ. ᤁᤴ ᤆᤢᤰᤔᤧᤱᤃ ᤔᤧᤴᤇᤡ᤺ᤀᤣ ᤘᤠ᤹ ᤀᤡᤵᤛᤧᤀᤠᤱᤗᤰ ᤏᤧᤖᤥ”. ᤁᤖ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤀᤣ᤺ᤳᤋᤢᤖᤥ॥
23475	MAT 9:27	ᤕᤧᤛᤢ᤺ᤴ ᤂᤧᤵᤔᤥᤗᤠᤶ ᤐᤣᤖ ᤐᤳᤇᤧᤸᤗᤧ ᤏᤧᤵᤑᤢ ᤔᤡᤰᤑ᤺ᤶᤒᤠᤜᤠ᤹ᤖᤧ ᤂᤢᤏᤧ᤹ ᤁᤢᤀᤣᤃᤠᤱ ᤁᤢᤀᤣᤃᤠᤱ ᤋᤡᤶᤍᤧᤳᤇᤢᤖ ᤀᤰᤂᤣᤗ᤹ᤖᤡᤰ ᤀ᤺ᤰᤋᤧᤳᤇᤡ. “ᤍᤠᤀᤢᤍᤖᤧ ᤁᤢᤛ᤻ᤛᤠ᤺ᤀᤣ. ᤀᤠᤴᤇᤡᤃᤧ ᤗᤢᤱᤔᤠ᤹ ᤀᤠᤍᤢᤰᤋᤧ᤹ᤀᤥ॥”
23476	MAT 9:28	ᤜᤧᤰᤁᤩᤠᤱ ᤕᤧᤛᤢ᤺ᤴ ᤗᤠ᤺ᤛᤧᤒᤠ ᤜᤡᤶᤔᤥ ᤐᤣᤛᤡᤸᤗᤧ ᤕᤧᤛᤢᤖᤧ ᤂᤧᤱᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤂᤡᤴᤇᤡ᤹ ᤔᤡᤰ ᤏᤡ᤺ᤔᤠ ᤁᤧᤛᤢᤰᤛᤢᤖ ᤆᤥ᤺ᤰᤔᤠ ᤛᤢᤰᤋᤢᤱ ᤑᤠ᤹ᤀᤠᤱ ᤏᤛᤠ᤺ᤴ ᤁᤧᤈᤥ᤺ᤰᤛᤢᤒᤡ᥅” ᤆᤥ᤺ᤰᤛᤢᤃᤧ᤹ᤖᤥ. ᤀᤠᤍᤠᤱᤒᤣ ᤑᤠ᤹ᤀᤠᤱ ᤏᤥᤃᤵ ᤐᤡᤖᤧᤳᤇᤢ॥
23477	MAT 9:29	ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤡᤰᤜᤠ᤹ ᤛᤢ᤺ᤛᤢ ᤐᤡᤖᤢᤛᤡᤖ ᤔᤧᤳᤋᤢᤛᤡ. “ᤂᤡᤴᤇᤡ᤹ ᤏᤛᤠ᤺ᤴ ᤁᤧᤈᤥᤃᤧᤳᤇᤢᤒᤠ ᤁᤢᤀᤡᤛᤡ᤺ᤰᤁᤣ ᤐᤥ᤺ᤱᤗᤖᤥ॥”
23478	MAT 9:30	ᤂᤧᤱᤜᤠ᤹ ᤔᤡᤰ ᤏᤡ᤺ᤔᤠ ᤁᤧᤛᤢᤰᤐᤠ ᤐᤥ᤺ᤰᤂᤧᤳᤇᤡ॥ ᤕᤧᤛᤢᤖᤧ ᤂᤧᤱᤜᤠ᤹ “ᤁᤴ ᤐᤠ᤺ᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤀᤠᤳᤋᤡᤸᤗᤧᤀᤠᤱ ᤏᤡᤱᤘᤠ᤹ ᤔᤧᤄᤥ᤺ᤛᤢᤴᤗᤖᤥ” ᤔᤧᤳᤋᤢᤛᤡ॥
23481	MAT 9:33	ᤜᤧᤰᤁᤩᤠᤱ ᤂᤧᤴ ᤑᤧᤴᤛᤠᤶᤔᤡᤴ ᤕᤧᤛᤢᤖᤧ ᤏᤠ᤺ᤳᤋᤢ ᤗ᤺ᤳᤋᤢ ᤜᤧᤰᤁᤩᤠᤱ ᤂᤧᤴ ᤔᤏᤠ᤺ᤴ ᤐᤠ᤺ᤵᤔᤠ ᤜᤣ᤺ᤰᤋᤧᤖᤥ॥ ᤂᤧᤴ ᤔᤧᤏᤡ᤺ᤛᤢᤀᤠᤱ ᤂᤧᤴ ᤔᤏᤠᤜᤠ᤹ᤖᤧ ᤛᤠ᤹ᤖᤡᤰ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖ ᤀᤰᤂᤣ ᤔᤧᤒᤠ᤺ᤳᤋᤢ. “ᤀᤡᤛᤪᤠᤀᤡᤗ ᤗᤠᤈᤣ᤹ ᤂᤠᤖᤠᤰ ᤀᤰᤋᤱᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤐᤠ᤺ᤱᤃ ᤀᤠᤵᤑᤠᤸᤗᤧᤀᤠᤱ ᤔᤧᤴᤏᤡᤀᤣ ᤘᤕᤡᤃᤧᤖᤥ॥”
23482	MAT 9:34	ᤁᤖ ᤑᤖᤡᤛᤡᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤁᤴ ᤔᤏᤠ᤺ᤸᤗᤧᤃ ᤑᤧᤴᤛᤠᤶᤜᤠ᤹ᤖᤧ ᤂᤢᤏᤡ᤹ ᤜᤠᤱᤅᤡᤸᤗᤧ ᤁᤢᤔᤢᤰᤛᤠᤶᤗᤠᤶ ᤑᤧᤴᤛᤠᤶᤜᤠ᤹ ᤏᤠ᤺ᤳᤋᤢ ᤗ᤺ᤳᤋᤢᤛᤡ᤹ᤖᤥ॥”
23485	MAT 9:37	ᤜᤧᤰᤁᤩᤠᤱ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤳᤋᤢᤛᤡ. “ᤛᤢᤶᤔᤠ ᤁᤧᤒᤥ᤺ᤱᤒᤠ ᤆᤠ᤺ᤴ ᤕᤖᤡᤰ ᤏᤧ᤹᤺. ᤁᤖ ᤆᤠ ᤁᤧᤛᤢᤶᤒᤠ ᤕᤠ᤺ᤗᤡᤰᤜᤠ᤹ ᤔᤧᤛᤢ᤺ᤴᤗᤥ॥
23486	MAT 9:38	ᤜᤧᤰᤁᤣ᤺ᤸᤗᤧ ᤛᤢᤶᤔᤠ ᤁᤧᤒᤥ᤺ᤱᤒᤠ ᤆᤠ᤺ᤸᤗᤧ ᤁᤢᤴᤍᤠᤱᤒᤠᤴ ᤕᤖᤡᤰ ᤕᤠ᤺ᤗᤡᤰᤜᤠ᤹ ᤆᤠ ᤛᤢᤶᤛᤧ ᤐᤠᤱᤄᤢᤛᤡᤖ ᤑᤠ᤹ᤀᤠᤱ ᤂᤡᤏᤡ᤹ ᤋᤢᤘᤠ ᤆᤥᤃᤧᤶᤔᤧ᤹ᤀᤥ॥”
23488	MAT 10:2	ᤂᤧᤴ ᤌᤡᤰ-ᤏᤧᤳ ᤛᤣ᤺ᤰᤕᤢᤰᤔᤡᤒᤠᤜᤠ᤹ᤖᤧ ᤂᤢᤏᤡ᤹ ᤔᤡᤱᤃ ᤀᤰᤋᤱᤒᤠ ᤆᤥ᤺ᤰ – ᤛᤡᤔᤥᤏ (ᤂᤢᤏᤧ᤹ ᤐᤋᤪᤢᤛᤀᤠᤱ ᤔᤧᤔᤧᤳᤋᤢ). ᤀᤠᤴᤍᤪᤡᤕᤠᤛ (ᤐᤋᤪᤢᤛᤖᤧ ᤁᤢᤴᤛᤠ᤹). ᤕᤠᤁᤢᤒ (ᤈᤒ᤻ᤍᤡᤕᤠᤖᤧ ᤁᤢᤛ᤻ᤛᤠ᤺). ᤕᤢᤜᤢᤴᤏᤠ (ᤕᤠᤁᤢᤒᤖᤧ ᤁᤢᤴᤛᤠ᤹).
23490	MAT 10:4	ᤛᤡᤔᤥᤏ (ᤂᤢᤏᤧ᤹ “ᤜᤠᤱᤒᤡᤑᤩᤢᤱ ᤁᤧᤈᤥ᤺ᤰᤐᤠ” ᤔᤧᤔᤧᤳᤋᤢ॥ ᤂᤧᤴ ᤑᤠ᤹ᤀᤡᤴ ᤜᤠᤱᤒᤡᤑᤩᤢᤱ ᤁᤧᤈᤥ᤺ᤰᤐᤠ ᤘᤕᤧ). ᤜᤧᤰᤁᤩᤠᤱ ᤕᤜᤢᤍᤠ ᤀᤡᤛ᤻ᤁᤖᤡᤕᤥᤋ (ᤂᤢᤏᤧ᤹ ᤕᤧᤛᤢᤖᤧ ᤁᤢᤏᤛᤠ᤺ᤴ ᤁᤧᤗᤧᤱᤒᤠ ᤐᤥ᤺ᤰᤂᤧᤖᤥ)॥
23491	MAT 10:5	ᤕᤧᤛᤢᤖᤧ ᤁᤴ ᤌᤡᤰ-ᤏᤧᤳ ᤛᤣ᤺ᤰᤕᤢᤰᤔᤡᤒᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡᤖ ᤐᤠᤱᤄᤢᤛᤡᤖᤥ– “ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤥ ᤔᤧᤒᤣᤃᤧᤶᤔᤡᤴᤏᤧ᤹ᤀᤥ. ᤜᤧᤰᤁᤩᤠᤱ ᤛᤠᤔᤖᤡᤜᤠ᤹ᤖᤧ ᤂᤢᤏᤡ᤹ ᤐᤠᤱᤈᤢᤶᤜᤠ᤹ᤀᤥ ᤔᤧᤒᤣᤃᤧᤶᤔᤡᤴᤏᤧ᤹ᤀᤥ.
23493	MAT 10:7	ᤂᤡᤏᤡ᤹ ᤁᤧᤒᤣᤃᤡᤸᤗᤧ ᤁᤴ ᤛᤢᤏᤠᤀᤡᤱᤅᤡᤴ ᤛᤧ᤺ᤛᤧᤶᤔᤧ᤹ᤀᤥ–‘ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤡᤴ ᤏᤡ᤺ᤳᤋᤠᤱᤅᤣ ᤘᤠ᤹॥’
23498	MAT 10:12	ᤂᤧᤴ ᤜᤡᤶᤔᤥ ᤁᤧᤗᤠ᤺ᤛ᤻ᤛᤡᤸᤗᤧ ᤔᤏᤠᤜᤠ᤹ᤏᤢ ‘ᤛᤏᤠᤖᤢᤱ ᤁᤧᤄᤥ᤺ᤛᤢᤶᤏᤡᤖᤥ’ ᤗ᤹ᤖᤡᤰ ᤛᤣᤘᤠ ᤔᤕᤧᤶᤔᤧ᤹ᤀᤥ॥
23501	MAT 10:15	ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱᤗᤥ. ᤋᤠ᤺ᤴᤍᤡ ᤂᤠᤛᤧᤴ ᤕᤧᤴᤏᤥᤃ ᤂᤧᤴ ᤐᤠᤱᤈᤢᤶᤔᤡᤸᤗᤧ ᤁᤢᤍᤢᤰᤂᤣ᤺ᤴᤏᤢ᤺ᤸᤗᤧ ᤛᤍᤥᤔ ᤏᤢ ᤃᤔᤥᤖᤠᤒᤠ ᤐᤠᤱᤈᤢᤶᤜᤠ᤹ᤀᤥ ᤁᤧᤍᤠ᤺ᤒᤠ ᤋᤢᤰᤂᤣ᤺ᤴ ᤌᤶᤔᤠ ᤛᤢᤰᤁᤧᤍᤧᤵᤐᤠ ᤐᤥ᤺ᤱᤗᤥ॥”
23502	MAT 10:16	“ᤂᤧᤵᤛᤧᤶᤔᤧ᤹ᤀᤥ᥄ ᤔᤧᤸᤗᤢᤰᤜᤠ᤹ ᤐᤖᤠᤒᤠᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥ ᤐᤠᤱᤔᤏᤠᤒᤠ ᤁᤢᤀᤡᤛᤡ᤺ᤰ ᤐᤠᤱᤏᤡᤱᤗᤥ॥ ᤜᤧᤰᤁᤣ᤺ᤸᤗᤧ ᤂᤡᤏᤡ᤹ ᤀᤛᤣ᤺ᤰᤐᤠ ᤜᤧᤰᤁᤣ ᤆᤠᤆᤠ᤺ᤵᤐᤠ ᤏᤢ ᤐᤢᤳᤋᤢ᤺ᤰᤁᤣ ᤜᤧᤰᤁᤣ ᤁᤢᤍᤥ᤺ᤵᤔᤠ ᤐᤥ᤺ᤰᤂᤧᤶᤔᤧ᤹ᤀᤥ॥
23519	MAT 10:33	ᤜᤠ᤺ᤳᤗᤧ ᤀᤡᤱᤃᤠ᤹ ᤔᤏᤠ ᤋᤃᤡ ᤏᤠ᤹ᤀᤠ. ᤛᤠᤱᤃᤪᤠᤶᤐᤣᤍᤠᤱᤅᤥ ᤁᤧᤘᤠ᤹ᤒᤠ ᤀᤠᤶᤒᤠᤖᤧ ᤁᤢᤍᤃᤡ ᤀᤡᤱᤃᤠ᤹ᤀᤠᤱ ᤂᤧᤴ ᤏᤠ᤹ᤖᤢᤱᤗᤥ॥”
23520	MAT 10:34	“ᤀᤡᤱᤃᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤛᤏᤠᤖᤢᤱ ᤋᤠ᤺ᤳᤇᤧ ᤋᤩᤠᤱᤒᤠ ᤑᤠ᤹ᤀᤠᤱ ᤔᤧᤀᤡ᤺ᤳᤋᤧᤶᤔᤡᤴᤏᤧ᤹॥ ᤀᤡᤱᤃᤠ᤹ ᤛᤏᤠᤖᤢᤱ ᤋᤠ᤺ᤳᤇᤧᤃ ᤔᤧ᤺ᤴ. ᤁᤖ ᤋᤢᤰᤂᤣ ᤋᤠ᤺ᤳᤇᤧ ᤋᤩᤠᤱᤒᤠᤖᤥ॥
23525	MAT 10:39	ᤀᤠᤳᤋᤡᤸᤗᤧ ᤏᤧᤳᤋᤡᤃᤧᤴ ᤁᤢᤜᤡᤱᤔᤴᤏᤡᤴ ᤀᤠᤒᤠᤅᤣ ᤜᤡᤱᤔᤠ ᤁᤥ᤺ᤳᤋᤢ᤹ ᤂᤧᤸᤗᤧ ᤂᤧᤴ ᤔᤠᤛᤢ᤹ᤖᤥ. ᤁᤖ ᤀᤠᤳᤋᤡᤸᤗᤧ ᤏᤧᤳᤋᤡᤃᤧᤴ ᤁᤢᤜᤡᤱᤔᤴᤏᤡᤴ ᤀᤠᤗᤠᤃᤡ ᤔᤠᤛᤢ᤹. ᤂᤧᤸᤗᤧ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤂᤥ᤺ᤛᤢ᤹ᤖᤥ॥”
23526	MAT 10:40	“ᤀᤠᤳᤋᤡᤸᤗᤧ ᤂᤡᤏᤡ᤹ ᤗᤠᤱᤃᤧᤍᤠ᤺ᤰᤋᤡ᤹. ᤂᤧᤸᤗᤧ ᤀᤡᤱᤃᤠ᤹ᤀᤠᤱ ᤗᤠᤱᤍᤠ᤺ᤰᤁᤠᤖᤥ. ᤜᤧᤰᤁᤩᤠᤱ ᤀᤠᤳᤋᤡᤸᤗᤧ ᤀᤡᤱᤃᤠ᤹ ᤗᤠᤱᤍᤠ᤺ᤰᤁᤠ. ᤂᤧᤸᤗᤧ ᤀᤡᤱᤃᤠ᤹ ᤕᤠᤵᤔᤡ ᤁᤧᤒᤠᤱᤒᤧᤴᤏᤠᤱ ᤗᤠᤱᤍᤠ᤺ᤰᤋᤢ᤹ᤖᤥ॥
23528	MAT 10:42	ᤀᤠᤳᤋᤡᤸᤗᤧ ᤀᤡᤱᤃᤠ᤹ᤀᤥ ᤏᤛᤠ᤺ᤴ ᤁᤧᤈᤥ᤺ᤰᤐᤠᤜᤠ᤹ᤀᤥ ᤁᤧᤖᤧᤰᤏᤢ᤺ᤸᤗᤧ ᤆᤢᤰᤛᤠᤎᤡᤰᤁᤡᤴ ᤀᤠᤜᤢ᤹ᤛᤠᤶᤒᤠ ᤑᤠ᤹ᤀᤠᤱ ᤑᤱᤏᤠᤎᤡᤰ ᤆᤫᤠ᤺ᤳ ᤐᤡᤖᤢ᤹. ᤂᤧᤸᤗᤧ ᤛᤧᤰᤂᤠᤀᤣ ᤌᤢᤶᤄᤥ᤺ᤴ ᤂᤥ᤺ᤛᤢ᤹ᤖᤥ॥”
23531	MAT 11:3	ᤂᤧᤱᤜᤠ᤹ ᤔᤧᤒᤣᤀᤠᤱ ᤕᤧᤛᤢ᤺ᤴ ᤛᤣ᤺ᤴᤔᤧᤍᤥᤛᤢ. “ᤁᤧᤍᤠ᤺ᤒᤠᤖ ᤁᤧᤒᤵᤐᤠ ᤂᤪᤡᤛ᤻ᤋᤧᤴ ᤒᤠ ᤂᤧᤏᤧ᤹ᤀᤣᤏᤧᤒᤡ. ᤀᤡ ᤘᤣ᤹ᤛ᤻ᤔᤠᤴ ᤜᤠᤱᤄᤢᤶᤒᤧᤒᤠᤒᤡ᥅”
23532	MAT 11:4	ᤕᤧᤛᤢᤖᤧ ᤏᤥᤃᤵ ᤐᤡᤖᤢᤛᤡ. “ᤏᤢ᤺ᤰᤂᤧᤶ ᤐᤣᤃᤧᤶᤔᤧ᤹ᤀᤠᤱ ᤁᤧᤏᤡ᤺ᤛᤢᤶᤒᤠ ᤏᤢ ᤁᤧᤄᤧᤵᤛᤢᤶᤒᤠ ᤐᤠ᤺ᤴᤜᤠ᤹ ᤕᤢᤜᤢᤴᤏᤠ᤺ᤴ ᤔᤧᤳᤋᤧᤶᤔᤧ᤹ᤀᤥ–
23534	MAT 11:6	ᤀᤡᤱᤃᤠ᤹ ᤕᤠᤵᤔᤡ ᤆᤵᤆᤡ ᤔᤧᤴᤈᤥ᤺ᤰᤔᤏᤠ ᤔᤏᤠ᤺ᤴ ᤔᤢ᤹ᤀᤡᤛᤠᤒᤠᤖᤥ॥”
23535	MAT 11:7	ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠ᤺ᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤒᤣᤖ ᤔᤧᤒᤳᤇᤧᤸᤗᤧ ᤕᤧᤛᤢᤖᤧ ᤂᤧᤵᤔᤥ ᤁᤧᤘᤠ᤹ᤒᤠ ᤔᤏᤠᤜᤠ᤹ ᤕᤢᤜᤢᤴᤏᤠᤖᤧ ᤁᤢᤕᤠ᤺ᤶᤒᤣᤀᤥ ᤀᤰᤂᤣ ᤔᤧᤳᤋᤢᤛᤡ. “ᤕᤧ᤺ᤱᤄᤠᤍᤧᤴᤏᤥ ᤌᤣ᤺ᤴ ᤀᤥᤔᤳᤇᤧ ᤁᤧᤒᤣᤃᤡᤒᤠᤒᤣ᥅ ᤛᤢᤖᤡᤳ ᤁᤣᤈᤱᤅᤡᤸᤗᤧ ᤘᤠ᤺ᤴᤈᤥ-ᤘᤠ᤺ᤴᤈᤥ ᤗ᤹ᤖᤡᤰ ᤘᤠ᤺ᤴᤍᤢᤒᤠ ᤌᤡᤱᤏᤧᤳ ᤜᤧᤰᤋᤱᤒᤠ ᤔᤏᤠ᤺ᤴᤒᤡ᥅
23538	MAT 11:10	ᤛᤠᤶᤕᤥᤛᤠᤵᤗᤠᤀᤥ ᤕᤢᤜᤢᤴᤏᤠᤖᤧ ᤁᤢᤕᤠ᤺ᤶᤒᤣᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢᤀᤠᤱ ᤐᤳ. ‘ᤀᤡᤱᤃᤠ᤹ ᤀᤠᤀᤡᤱᤛᤠᤒᤠᤴ ᤁᤧᤗᤠᤶᤔᤡᤴ ᤕᤠᤖᤡᤵ ᤆᤥ᤺ᤰᤛᤧ ᤂᤧᤏᤧ᤹ᤏᤢ᤺ᤸᤗᤧ ᤋᤃᤡ ᤐᤠᤱᤄᤢᤱᤗᤥ॥’
23545	MAT 11:17	‘ᤂᤡᤏᤡ᤹ ᤗᤠᤃᤡ ᤀᤠᤏᤡᤃᤧ ᤁᤣ ᤜᤡᤵᤔᤏᤠ. ᤁᤖ ᤂᤡᤏᤡ᤹ ᤁᤧᤴᤗᤠ᤺ᤰᤂᤡᤴ. ᤜᤧᤰᤁᤩᤠᤱ ᤀᤠᤏᤡᤃᤧ ᤔᤣᤖᤡᤱ ᤌᤰᤔᤏᤠ. ᤁᤖ ᤂᤡᤏᤡ᤹ ᤁᤧᤴᤜᤠᤒᤡᤴ॥’
23547	MAT 11:19	ᤀᤡᤱᤃᤠ᤹ ᤔᤧᤴᤇᤠᤶᤛᤠ᤺ᤱᤃ ᤆᤠᤱᤗ ᤌᤢᤅᤢᤱᤗ ᤋᤩᤠᤱ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢ. ‘ᤂᤧᤱᤃ ᤋ᤺ᤰ ᤌᤧ᤺ᤰᤁᤣ ᤏᤢ ᤌᤡ᤺ᤔᤛᤠᤱᤗᤥ. ᤀᤣ᤺ᤱᤕᤠᤱ ᤁᤧᤓᤥ᤺ᤱᤒᤠᤜᤠ᤹ ᤏᤢ ᤗᤠᤕᤥᤒᤠᤜᤠ᤹ᤖᤧ ᤂᤢᤏᤡ᤹ ᤆᤢᤶᤗᤥ॥’ ᤁᤖ ᤏᤡᤱᤘᤠ᤹ᤑᤢ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤀᤡᤱᤃ ᤁᤢᤕᤠ᤺ᤶᤒᤰᤁᤥᤗᤠᤶ ᤂᤧᤴ ᤏᤡᤛ᤻ᤛᤣ ᤆᤥ᤺ᤰ ᤑᤠ᤹ᤀᤠᤱ ᤏᤡ᤺ᤍᤧᤳᤗᤥ॥”
23549	MAT 11:21	“ᤂᤥᤖᤠᤈᤡᤏ ᤏᤢ ᤒᤧᤌᤛᤣᤍᤠ ᤐᤠᤱᤈᤢᤶᤔᤥᤒᤠ ᤔᤏᤠᤛᤣ. ᤆᤡ᤺ᤳᤋᤧᤀᤠᤱᤗᤰ ᤛᤩᤧᤖᤥ᥄ ᤂᤡᤏᤡ᤹ ᤐᤠᤱᤈᤢᤶᤔᤥ ᤐᤥ᤺ᤰᤂᤧᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤂᤢᤏᤡ᤹ ᤕᤧᤰᤕᤰ ᤋᤠᤕᤖ ᤏᤢ ᤛᤡᤍᤥᤴᤏᤥ ᤐᤥ᤺ᤰᤂᤧᤀᤠᤱ ᤘᤕᤧᤸᤗᤧᤃ ᤀᤢᤴᤇᤥ᤺ᤴᤇᤠ ᤂᤧᤵᤔᤥᤒᤠ ᤔᤏᤠᤜᤠ᤹ ᤗᤠᤕᤥᤗᤠᤶ ᤔᤧᤜᤡᤴᤍᤧᤒᤠᤖᤥ ᤑᤠ᤹ᤀᤠᤱ ᤛᤃᤡᤋᤣ᤺ᤳ ᤔᤧᤈᤠᤰᤛᤡᤱᤅᤠᤱ ᤂᤠᤵᤐᤢ ᤔᤧᤈᤢ᤺ᤳᤇᤡᤱᤒᤠᤔᤧᤴ॥
23552	MAT 11:24	ᤁᤖ ᤀᤡᤱᤃᤠ᤹ ᤔᤧᤳᤏᤡᤱ. ᤂᤠᤛᤧᤴᤏᤡᤸᤗᤧ ᤕᤧᤴᤏᤥᤃ ᤂᤧᤏᤧ᤹ᤏᤢ᤺ᤸᤗᤧ ᤛᤠᤍᤥᤔᤖᤧ ᤁᤢᤍᤢᤰᤂᤣ᤺ᤴ ᤌᤶᤔᤠ ᤛᤢᤰᤁᤧᤍᤧᤵᤐᤠ ᤐᤥ᤺ᤱᤗᤥ॥”
23553	MAT 11:25	ᤂᤧᤴ ᤕᤧᤶᤔᤥ ᤕᤧᤛᤢᤖᤧ ᤋᤢᤘᤠ ᤆᤥᤃᤢ. “ᤀᤠᤶᤒᤣ. ᤛᤠᤱᤃᤪᤠᤶᤐᤣᤍᤠᤱ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤍᤠᤱᤒᤠᤀᤣ. ᤀᤡᤱᤃᤠ᤹ ᤏᤥᤃᤧᤴ ᤐᤡᤏᤧ. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ᤃ ᤛᤡᤰᤁᤢᤶᤛᤠᤒᤠᤜᤠ᤹ ᤜᤧᤰᤁᤩᤠᤱ ᤆᤠ᤺ᤵᤐᤠᤜᤠ᤹ᤏᤢ ᤁᤧᤔᤠ᤹ᤖᤢᤒᤠ ᤐᤠ᤺ᤴᤏᤡᤴ ᤜᤡᤴᤈᤠ᤹ ᤜᤧᤰᤋᤱᤒᤠᤜᤠ᤹ ᤀᤥᤛᤣ᤺ᤴᤃᤧᤎᤠᤰᤋᤢᤛᤡᤖᤥ॥
23554	MAT 11:26	ᤀᤠᤶᤒᤣ. ᤒᤠ ᤀᤰᤂᤣ ᤆᤥ᤺ᤰᤔᤠᤀᤣ ᤂᤧᤏᤧ᤹ ᤁᤧᤛᤡᤖᤠ᤹ ᤌᤠᤅᤧᤖᤥ॥”
23555	MAT 11:27	ᤜᤧᤰᤁᤩᤠᤱ ᤕᤧᤛᤢᤖᤧ ᤔᤏᤠᤜᤠ᤹ ᤔᤧᤳᤋᤢᤛᤡ. “ᤀᤠᤶᤒᤠᤖᤧ ᤁᤧᤖᤧᤰ ᤐᤠ᤺ᤴᤜᤠ᤹ ᤐᤡᤖᤠᤱᤅᤠᤱ ᤘᤠ᤹ᤖᤥ॥ ᤁᤢᤛ᤻ᤛᤠ᤺ᤴ ᤁᤢᤶᤒᤠᤖᤧᤖᤰ ᤁᤢᤛᤡᤱ ᤏᤡ᤺ᤳᤋᤢ᤹. ᤘᤣ᤹ᤜᤠ᤹ᤖᤧ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴᤗᤥ॥ ᤜᤧᤰᤁᤩᤠᤱ ᤐᤠᤏᤢᤍᤡᤱ ᤐᤠ᤺ᤴ ᤁᤢᤛᤡᤱ ᤔᤧᤏᤡ᤺ᤳᤋᤢᤖ ᤑᤠ᤹ᤀᤠᤱ ᤁᤢᤛ᤻ᤛᤠ᤺ᤸᤗᤧ ᤀᤥᤛᤣ᤺ᤴᤎᤠᤰᤋᤢᤛᤡᤒᤠ ᤔᤏᤠᤜᤠ᤹ᤖᤧᤖᤰ ᤁᤢᤛᤡᤱ ᤔᤧᤏᤡ᤺ᤳᤋᤢ᤹ᤖᤥ॥
23558	MAT 11:30	ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤀᤠᤈᤡᤄᤧ᤺ᤵᤐᤡᤴ ᤀᤢᤛᤢᤖᤢᤒᤠ ᤏᤢ ᤁᤢ᤺ᤔᤠ ᤐᤠᤱᤏᤡᤱᤒᤠ ᤀᤠᤃᤰᤁᤡᤴ ᤕᤠᤱᤕᤠᤱᤒᤠ ᤆᤥ᤺ᤰᤗᤥ॥”
23560	MAT 12:2	ᤁᤢᤓᤠ ᤑᤖᤡᤛᤡᤜᤠ᤹ᤖᤧ ᤂᤧᤴ ᤔᤧᤏᤡ᤺ᤛᤢᤀᤠᤱ ᤕᤧᤛᤢ᤺ᤴ ᤔᤧᤔᤧᤳᤋᤢ. “ᤀᤥᤔᤧᤳᤋᤧ᤹. ᤏᤠ᤺ᤶᤛᤡᤱ ᤕᤧᤴᤏᤥ ᤕᤠ᤺ᤶᤒᤰ ᤆᤥ᤺ᤰᤔᤠ ᤔᤧᤏᤢ᤹ᤏᤧᤴ. ᤁᤖ ᤁᤧᤜᤢ᤹ᤛᤠᤶᤒᤠᤜᤠ᤹ᤖᤧᤃ ᤔᤧᤈᤥᤃᤢᤱᤃ᥄”
23561	MAT 12:3	ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤔᤧ᤺ᤶᤒᤧ᥄ ᤍᤠᤀᤢᤍ ᤜᤠᤱᤅᤡᤴ ᤏᤢ ᤁᤢᤔᤏᤠᤜᤠ᤹ᤖᤧ ᤂᤢᤏᤡ᤹ ᤛᤧᤳᤗᤠ᤺ᤰᤋᤧᤸᤗᤧ ᤔᤧᤈᤥᤃᤢᤒᤠ ᤐᤠ᤺ᤴᤏᤡᤴ ᤛᤠᤶᤕᤥᤛᤠᤵᤗᤠᤀᤥ ᤔᤧᤴᤏᤡ᤺ᤳᤋᤣ ᤁᤧᤘᤕᤡ᤹ᤒᤡ᥅
23566	MAT 12:8	ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤔᤧᤴᤇᤠᤶᤛᤠ᤺ᤱᤃ ᤏᤠ᤺ᤶᤛᤡᤱ ᤕᤧᤴᤏᤡᤸᤗᤧᤴᤏᤠᤱ ᤁᤢᤴᤍᤠᤱᤒᤠᤀᤠᤖᤥ॥”
23568	MAT 12:10	ᤂᤧᤵᤔᤥ ᤁᤢᤜᤢᤰ ᤁᤧᤛᤶᤒᤠ ᤔᤏᤠᤎᤡᤰ ᤘᤕᤧ॥ ᤜᤧᤰᤁᤩᤠᤱ ᤂᤧᤵᤔᤥ ᤁᤢᤓᤠ ᤕᤜᤢᤍᤡᤜᤠ᤹ᤖᤧ ᤕᤧᤛᤢ᤺ᤴ ᤀᤠᤵᤋᤡᤰ ᤁᤢ᤺ᤵᤔᤠ ᤑᤠ᤹ᤀᤠᤱ ᤔᤧᤛᤢᤃᤢᤖ ᤔᤧᤘᤕᤧᤀᤠᤱ ᤛᤣ᤺ᤴᤔᤧᤍᤥᤛᤢ. “ᤏᤠ᤺ᤶᤛᤡᤱ ᤕᤧᤴᤏᤥ ᤔᤏᤠᤜᤠ᤹ ᤘᤣ᤺ᤶᤔᤠᤛᤡ ᤛᤠᤶᤕᤥᤌᤡᤶᤔᤡᤸᤗᤧ ᤀᤠᤒᤡ᤹ᤒᤡ ᤔᤧ᤺ᤶᤒᤡ᥅”
23569	MAT 12:11	ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤂᤡᤏᤡ᤹ ᤔᤧᤸᤗᤢᤰᤁᤡᤴ ᤏᤠ᤺ᤶᤛᤡᤱ ᤕᤧᤴᤏᤥ ᤁᤣ᤺ᤶᤒᤠ ᤗᤢᤶᤒᤠ᤺ᤳᤋᤥ ᤔᤰᤌᤠ᤺ᤸᤗᤧ ᤁᤧᤴᤀᤢ᤺ᤰᤂᤢᤶ ᤁᤧᤴᤗ᤺ᤳᤋᤢᤶᤔᤡᤴᤒᤡ᥅
23570	MAT 12:12	ᤔᤧᤴᤇᤠᤶ ᤕᤠᤵᤔᤡ᤺ᤱᤃ ᤔᤧᤸᤗᤢᤰᤁᤡᤴᤏᤢ᤺ᤸᤗᤧ ᤀᤡᤔᤧᤸᤗᤢᤱᤒᤠ ᤔᤧᤈᤥ᤺ᤰᤏᤧᤴᤒᤡ᥅ ᤏᤠ᤺ᤶᤛᤡᤱ ᤕᤧᤴᤏᤥ ᤏᤢ᤺ᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤛᤠᤶᤕᤥᤌᤡᤶᤔᤡᤸᤗᤧ ᤀᤠᤒᤡ᤹ᤖᤥ॥”
23571	MAT 12:13	ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤴ ᤔᤏᤠ᤺ᤴ ᤔᤧᤳᤋᤢ. “ᤁᤧᤜᤢᤰᤁᤡᤴ ᤛᤴᤇᤧ᤹॥” ᤂᤧᤸᤗᤧ ᤁᤢᤜᤢᤰᤁᤡᤴ ᤛᤴᤇᤢᤸᤗᤧ ᤂᤡᤔᤥ ᤘᤣ᤺ᤳᤋᤧᤀᤠᤱ ᤘᤣ᤹ᤛ᤻ᤔᤠ ᤁᤢᤜᤢᤰᤁᤡᤴ ᤜᤧᤰᤁᤣᤀᤣ ᤏᤢ᤺ᤒᤠ ᤐᤥ᤺ᤰᤂᤧᤖᤥ॥
23575	MAT 12:17	ᤁᤱᤃ ᤕᤧᤛᤢᤖᤧ ᤁᤢᤕᤠ᤺ᤶᤒᤣᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤒᤠ᤺ᤴᤏᤡᤴ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤕᤛᤤᤕᤠ᤺ᤸᤗᤧ ᤀᤰᤂᤣᤗ᤹ᤖᤡᤰ ᤛᤠᤵᤋᤢᤒᤠᤴ ᤁᤧᤖᤧᤒᤠᤖᤥ–
23576	MAT 12:18	“ᤀᤡᤱᤃᤠ᤹ ᤛᤣᤃᤢᤱᤒᤠ ᤏᤢ ᤗᤢᤱᤔᤠ᤹ ᤋᤢᤰᤋᤢᤱᤒᤠ ᤀᤠᤛᤣᤘᤠᤖᤥᤒᤠᤴ ᤁᤵᤔᤥ ᤘᤠ᤹ᤖᤥ॥ ᤂᤢᤏᤧ᤹ᤏᤢ ᤀᤡᤱᤃᤠ᤹ ᤛ᤺ᤳᤋᤠᤱᤅᤠᤱ ᤘᤠ᤹ᤀᤠᤖᤥ॥ ᤁᤢᤛᤶᤍᤠᤱ ᤀᤠᤛᤣᤛᤣᤔᤠᤱᤅᤡᤴ ᤏᤧᤛ᤻ᤛᤢᤱᤐᤡᤖᤢᤱ ᤜᤧᤰᤁᤩᤠᤱ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤂᤠᤛᤧᤴᤖᤧᤴ ᤀᤡᤱᤓᤴ ᤆᤥᤃᤢᤛᤡ᤹ᤖᤥ॥
23579	MAT 12:21	ᤂᤢᤏᤧ᤹ ᤁᤢᤔᤡᤱᤅᤥ ᤁᤧᤖᤧᤰ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤏᤡᤱᤛᤠᤱ ᤔᤧᤈᤥᤃᤢ᤹ᤖᤥ॥”
23581	MAT 12:23	ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖ ᤔᤧᤒᤠ᤺ᤳᤋᤢ. “ᤁᤱᤃ ᤁᤧᤍᤠ᤺ᤒᤠᤖ ᤁᤧᤒᤵᤐᤠ ᤍᤠᤀᤢᤍ ᤜᤠᤱᤅᤡᤸᤗᤧ ᤁᤢᤛ᤻ᤛᤠ᤺ ᤛᤧᤴᤗᤵ ᤁᤧᤒᤡᤒᤠ ᤜᤠᤱᤅᤡᤴ ᤔᤧ᤺ᤶᤒᤡ᥅”
23582	MAT 12:24	ᤁᤖ ᤑᤖᤡᤛᤡᤜᤠ᤹ᤖᤧ ᤂᤧᤴ ᤔᤧᤄᤧᤵᤛᤢᤸᤗᤧ ᤀᤰᤂᤣ ᤔᤧᤒᤠ᤺ᤳᤋᤢ. “ᤑᤧᤴᤛᤠᤶᤜᤠ᤹ᤖᤧ ᤂᤢᤏᤡ᤹ ᤜᤠᤱ ᤒᤠᤗᤈᤡᤒᤢᤗᤖᤧ ᤁᤢᤔᤢᤰᤛᤠᤶᤗᤠᤶᤖᤰ ᤁᤴ ᤔᤏᤠ᤺ᤸᤗᤧ ᤑᤧᤴᤛᤠᤶᤜᤠ᤹ ᤏᤠ᤺ᤳᤋᤢ ᤗ᤺ᤳᤋᤢᤛᤡᤒᤠᤖᤥ॥”
23583	MAT 12:25	ᤕᤧᤛᤢᤖᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤀᤡᤴ ᤏᤡ᤺ᤛᤢᤀᤠᤱ ᤀᤰᤂᤣ ᤔᤧᤳᤋᤢᤛᤡ. “ᤀᤠᤵᤑᤣ᤺ᤰ ᤗᤢᤶᤔᤥ ᤁᤧᤄᤣᤒᤠ ᤁᤧᤎᤰᤐᤠᤀᤠᤱ ᤁᤧᤛᤧᤶᤒᤠ ᤁᤧᤖᤧᤰ ᤜᤠᤱᤈᤢᤶᤜᤠ᤹ ᤔᤧᤔᤧᤰᤗᤥ॥ ᤜᤧᤰᤁᤩᤠᤱ ᤀᤠᤵᤑᤣ᤺ᤰ ᤗᤢᤶᤔᤥ ᤁᤧᤄᤣᤒᤠ ᤁᤧᤎᤰᤐᤠᤀᤠᤱ ᤁᤧᤛᤧᤶᤒᤠ ᤕᤧᤰᤕᤰ ᤏᤢ ᤜᤡᤶᤛᤕᤱᤜᤠ᤹ᤖᤧ ᤔᤧᤴᤎ᤺ᤳᤋᤢᤴᤗᤥ॥
23586	MAT 12:28	ᤁᤖ ᤀᤡᤱᤃᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤛᤣᤔᤠᤱᤗᤠᤶ ᤑᤧᤴᤛᤠᤶᤜᤠ᤹ ᤏᤠ᤺ᤳᤋᤢᤱ ᤗ᤺ᤳᤋᤢᤱᤛᤡᤱᤗᤥ. ᤂᤧᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤴ ᤂᤡᤏᤡ᤹ ᤗᤢᤶᤔᤥ ᤋᤩᤧ ᤆᤢᤖᤧᤀᤠᤱ ᤘᤠ᤹ ᤑᤠ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ॥”
23587	MAT 12:29	“ᤕᤠᤶᤔᤥ ᤂᤧᤵᤛᤧᤶᤔᤧ᤹ᤀᤥ. ᤁᤧᤎᤢᤶᤒᤠ ᤔᤏᤠ᤺ᤸᤗᤧ ᤁᤢᤜᤡᤶᤔᤥ ᤗᤠ᤺ᤵᤔᤠᤀᤠᤱ ᤂᤧᤸᤗᤧ ᤁᤢᤈᤡᤃ᤺ᤰᤘᤠᤜᤠ᤹ ᤏᤠᤵᤔᤠᤍᤣ᤹ᤔᤠᤏᤢ᤺ᤸᤗᤧ ᤋᤃᤡ ᤂᤧᤴ ᤁᤧᤎᤢᤶᤒᤠ ᤔᤏᤠ᤺ᤴ ᤀᤡᤄᤣ᤺ᤱᤔᤠᤀᤣ ᤐᤥ᤺ᤱᤗᤥ॥ ᤜᤧᤰᤁᤩᤠᤱᤗᤰ ᤁᤢᤜᤡᤶᤔᤥ ᤗᤠ᤺ᤵᤔᤠᤀᤠᤱ ᤆᤡᤃ᤺ᤰᤘᤠᤜᤠ᤹ ᤗ᤺ᤵᤔᤠᤍᤣ᤹ᤔᤠ ᤛᤢᤰᤋᤧᤳᤗᤥ॥”
23588	MAT 12:30	“ᤀᤠᤳᤋᤡᤴ ᤀᤡᤱᤃᤠ᤹ᤏᤢ ᤌᤡᤰᤜᤢᤵᤐᤥ ᤜᤥ᤺ᤵ ᤂᤧᤴ ᤀᤠᤍᤰᤗᤧᤱᤘᤠᤀᤥ ᤘᤠ᤹. ᤜᤠ᤺ᤳᤗᤧ ᤀᤡᤱᤃᤠ᤹ᤏᤢ ᤔᤧᤛᤢᤵᤛᤢᤴ ᤂᤧᤸᤗᤧ ᤛᤧ᤺ᤛᤢᤖᤥ॥”
23589	MAT 12:31	“ᤂᤧᤸᤗᤧ ᤆᤥᤃᤢᤸᤗᤧ ᤀᤡᤱᤃᤠ᤹ ᤂᤡᤏᤡ᤹ ᤔᤧᤳᤏᤡᤱ. ᤔᤧᤴᤇᤠᤶ ᤕᤠᤵᤔᤡᤖᤧ ᤆᤥ᤺ᤰᤔᤏᤠᤒᤠ ᤁᤧᤖᤧᤰ ᤗᤠᤕᤥ ᤏᤢ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤐᤠ᤺ᤵᤔᤏᤠᤒᤠ ᤔᤠᤱᤆᤧ᤹ᤕᤠ ᤐᤠ᤺ᤴᤏᤡᤸᤗᤧᤴ ᤗᤧᤵᤔᤡ ᤂᤥ᤺ᤔᤠ ᤛᤢᤰᤋᤧᤳ. ᤁᤖ ᤛᤣᤛᤣᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤐᤠ᤺ᤵᤔᤏᤠᤒᤠ ᤔᤠᤱᤆᤧ᤹ᤕᤠ ᤐᤠ᤺ᤴᤏᤡᤸᤗᤧᤴ ᤗᤧᤵᤔᤡ ᤀᤠᤵᤑᤠᤸᤗᤧᤀᤠᤱ ᤂᤥᤔᤧᤍᤧᤳᤏᤧᤴᤗᤥ॥
23590	MAT 12:32	ᤀᤠᤳᤋᤡᤴ ᤔᤏᤠ᤺ᤸᤗᤧ ᤔᤧᤴᤇᤠᤶᤛᤠ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ ᤐᤠ᤺ᤳᤋᤢ᤹. ᤂᤧᤸᤗᤧ ᤗᤧᤵᤔᤡ ᤂᤥ᤺ᤛᤢ᤹. ᤁᤖ ᤛᤣᤛᤣᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤁᤧᤒᤠ᤺ᤵᤐᤠᤸᤗᤧ ᤁᤴ ᤕᤧᤶᤔᤥ ᤜᤧᤰᤁᤩᤠᤱ ᤁᤧᤍᤠ᤺ᤒᤠ ᤕᤧᤶᤔᤥᤀᤠᤱ ᤗᤧᤵᤔᤡ ᤔᤧᤄᤥ᤺ᤛᤢᤴᤗᤥ॥”
23596	MAT 12:38	ᤜᤧᤰᤁᤩᤠᤱ ᤁᤢᤓᤠ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤏᤢ ᤑᤖᤡᤛᤡᤜᤠ᤹ ᤔᤧᤍᤱᤛᤡᤱ ᤜᤧᤰᤁᤩᤠᤱ ᤕᤧᤛᤢᤖᤥ ᤔᤧᤍᤩᤧᤀᤠᤱ ᤔᤧᤔᤧᤳᤋᤢ. “ᤛᤡᤰᤛᤠᤶᤒᤣ. ᤂᤧᤏᤧ᤹ ᤁᤧᤈᤥᤃᤢᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤔᤡᤰᤛᤣ᤺ᤴᤎᤡᤰ ᤀᤠᤏᤡᤃᤧ ᤀᤥᤔᤧᤵᤔᤠ ᤏᤡᤱᤘᤠ᤹ ᤆᤥᤃᤢᤶᤒᤧᤀᤠᤱ ᤘᤠ᤹ᤖᤥ॥”
23597	MAT 12:39	ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤁᤴ ᤕᤧᤶᤔᤥᤒᤠ ᤁᤢ᤹ᤀᤡᤃᤧᤓᤧ᤹ᤒᤠ ᤏᤢ ᤗᤠᤕᤥᤒᤠ ᤔᤏᤠᤜᤠ᤹ᤖᤧ ᤏᤡᤱᤘᤠ᤹ ᤁᤧᤔᤠᤒᤠ ᤔᤡᤰᤛᤣ᤺ᤴᤜᤠ᤹ ᤀᤥᤔᤧᤵᤔᤠ ᤔᤧᤃᤥ᤺ᤳᤋᤢ᤹. ᤁᤖ ᤂᤧᤱᤜᤠ᤹ᤖᤧᤃ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤕᤥᤏᤠᤖᤧ ᤁᤢᤔᤡᤰᤛᤣ᤺ᤴᤏᤠᤱᤎᤥ ᤘᤣ᤹ ᤔᤡᤰᤛᤣ᤺ᤴ ᤌᤣᤀᤠᤱ ᤀᤥᤔᤧᤵᤔᤠ ᤔᤧᤱᤄᤥ᤺ᤛᤢᤴᤗᤥ॥
23600	MAT 12:42	ᤗᤠᤱᤃᤧᤳ ᤐᤡᤛᤠᤱᤒᤠ ᤛᤡᤘᤠ ᤗᤠᤈᤣ᤹ᤛ᤻ᤔᤠ ᤜᤠᤱᤔᤠᤴ ᤂᤠᤛᤧᤴ ᤕᤧᤴᤏᤥ ᤕᤧᤶᤛᤡᤱᤅᤠᤱ ᤁᤴ ᤕᤧᤶᤒᤠ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤋᤰᤗᤧᤱᤘᤠᤀᤥ ᤐᤥ᤺ᤰᤁᤠᤱ ᤐᤠ᤺ᤴᤎᤡᤰᤋᤢᤛᤡ᤹ᤖᤥ॥ ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤛᤥᤗᤥᤔᤏ ᤜᤠᤱᤅᤡᤸᤗᤧᤴ ᤛᤡᤰᤁᤢᤶᤍᤡᤱ ᤂᤠᤜᤢᤴ ᤂᤧᤶᤛᤧ ᤛᤠ᤹ᤖᤡᤰ ᤔᤠ᤺ᤱᤄᤠᤒᤠ ᤗᤠᤈᤣ᤹ᤗᤠᤶ ᤋᤩᤧᤀᤠᤱ ᤘᤕᤧᤖᤥ॥ ᤁᤵᤔᤥ ᤛᤥᤗᤥᤔᤏ ᤜᤠᤱᤅᤡᤴᤏᤢ᤺ᤸᤗᤧ ᤕᤶᤒᤠᤴ ᤘᤠ᤹ᤛᤠᤱ ᤁᤧᤴᤄᤧᤵᤛᤢᤶᤔᤡᤴᤗᤥ॥”
23601	MAT 12:43	“ᤑᤧᤴᤛᤠᤶᤔᤡᤴ ᤔᤏᤠᤀᤥᤗᤠᤶ ᤗ᤺ᤴ ᤐᤣ᤺ᤰᤁᤡᤸᤗᤧ ᤏᤠ᤺ᤶᤛᤡᤱ ᤋᤧᤴ ᤁᤥ᤺ᤳᤇᤧ ᤛᤧᤱᤛᤧᤱᤒᤠ ᤋᤧᤴ ᤜᤧᤱᤄᤠ᤺ᤳᤋᤡ ᤐᤣ᤺ᤰᤗᤥ. ᤁᤖ ᤂᤧᤸᤗᤧ ᤀᤠᤳᤋᤠᤴᤏᤠᤱ ᤔᤧᤄᤥ᤺ᤛᤢᤴᤏᤠᤱ
23602	MAT 12:44	ᤀᤰᤂᤣ ᤔᤧᤳᤇᤡᤱᤗᤥ. ‘ᤀᤡᤱᤃᤠ᤹ ᤗᤧᤖᤢᤱᤒᤠ ᤔᤏᤠ᤺ᤸᤗᤥᤀᤣ ᤏᤢ᤺ᤱᤅᤠ ᤐᤣ᤺ᤰᤁᤠᤖᤥ॥’ ᤜᤧᤰᤁᤩᤠᤱ ᤂᤧᤴ ᤂᤧᤵᤔᤥ ᤏᤢ᤺ᤱ ᤋᤠ᤺ᤸᤗᤧ ᤋᤃᤡ ᤕᤠᤃᤧᤒᤠ ᤋᤧᤴᤏᤡᤴ ᤁᤢᤄᤠᤗᤧᤶ. ᤔᤧᤍᤢᤃᤢᤒᤠ ᤏᤢ ᤏᤢ᤺ᤒᤠ ᤔᤧᤈᤥᤃᤢᤒᤠ ᤏᤡ᤺ᤛᤢ᤹॥
23603	MAT 12:45	ᤜᤧᤰᤁᤩᤠᤱ ᤂᤧᤴ ᤐᤣ᤺ᤰᤁᤠᤱ ᤀᤠᤵᤑᤣ᤺ᤰᤏᤢ᤺ᤸᤗᤧᤀᤠᤱ ᤛᤠ᤹ᤖᤡᤰ ᤁᤢ᤹ᤀᤡ ᤁᤧᤓᤧ᤹ᤒᤠ ᤘᤣ᤹ ᤏᤢᤛᤡ ᤑᤧᤴᤛᤠᤶᤜᤠ᤹ ᤋᤠᤖᤢᤛᤡᤀᤠᤱ ᤂᤧᤱᤜᤠ᤹ ᤛᤡᤃᤠᤱ ᤔᤧᤗᤠ᤺ᤳᤋᤠᤱ ᤔᤧᤕᤢᤱᤛᤡᤱᤗᤥ॥ ᤂᤧᤴ ᤔᤏᤠ᤺ᤸᤗᤧ ᤁᤢᤕᤠᤰᤏᤠᤶᤔᤡᤴ ᤋᤃᤡᤒᤠᤏᤢ᤺ᤸᤗᤧᤀᤠᤱ ᤋᤠᤵᤑᤧ᤺ᤶᤒᤠ ᤐᤥ᤺ᤱᤗᤥ॥ ᤁᤴ ᤕᤧᤶᤔᤥᤒᤠ ᤁᤢ᤹ᤀᤡ ᤁᤧᤓᤧ᤹ᤒᤠ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤕᤠᤰᤏᤠᤶᤔᤡᤴᤏᤠᤱ ᤒᤠ ᤜᤧᤰᤋᤱᤒᤠᤀᤣ ᤐᤥ᤺ᤱᤗᤥ॥”
23605	MAT 12:47	ᤔᤏᤠᤎᤡᤰ ᤐᤣᤀᤠᤱ ᤂᤢᤏᤧ᤹ ᤔᤧᤳᤋᤢ. “ᤀᤠᤍᤠᤱᤒᤣ. ᤁᤧᤶᤔᤠ ᤏᤢ ᤁᤧᤴᤛᤠ᤹ᤛᤡ ᤂᤧᤏᤧ᤹ᤏᤢ ᤋᤠ᤹ᤈᤧᤱᤔᤠ ᤑᤠ᤹ᤀᤠᤱ ᤗᤠ᤺ᤰᤁᤠᤳ ᤁᤧᤶᤜᤠᤱᤗ ᤔᤧᤕᤧᤵᤗᤥ॥”
23606	MAT 12:48	ᤕᤧᤛᤢᤖᤧ ᤂᤧᤴ ᤏᤥᤃᤵ ᤐᤡᤖᤢ. “ᤀᤠᤶᤔᤠ ᤏᤢ ᤀᤠᤴᤛᤠ᤹ᤛᤡ ᤜᤠ᤺ᤳᤇᤡᤒᤣ᥅”
23607	MAT 12:49	ᤁᤢᤜᤢ᤹ᤛᤠᤶᤒᤠᤜᤠ᤹ ᤛᤥ᤺ᤰᤋᤢᤛᤡᤖ ᤂᤧᤴ ᤔᤏᤠ᤺ᤴ ᤔᤧᤳᤋᤢ. “ᤀᤥᤔᤧᤳᤋᤧᤛᤧ᤹. ᤁᤵᤔᤥ ᤀᤠᤶᤔᤠ ᤏᤢ ᤀᤠᤴᤛᤠ᤹ᤛᤡ ᤔᤧᤕᤢᤱᤗᤥ॥
23608	MAT 12:50	ᤌᤣᤀᤠᤱᤓᤧᤸᤗᤧ ᤀᤠᤳᤋᤡᤴᤜᤠ᤹ᤖᤧ ᤛᤠᤱᤃᤪᤠᤶᤐᤣᤍᤠᤱᤒᤠ ᤀᤠᤶᤒᤠᤖᤧ ᤁᤢᤏᤡᤱᤘᤠ᤹ ᤜᤧᤰᤁᤣ ᤔᤧᤈᤥᤃᤢ᤹. ᤂᤧᤱᤜᤠ᤹ᤀᤣ ᤀᤠᤶᤔᤠ ᤏᤢ ᤀᤠᤴᤛᤠ᤹ᤛᤡᤖᤥ॥”
23611	MAT 13:3	ᤜᤧᤰᤁᤩᤠᤱ ᤕᤧᤛᤢᤖᤧ ᤀᤰᤂᤣᤗ᤹ᤖᤡᤰ ᤕᤖᤡᤰ ᤐᤠ᤺ᤴᤜᤠ᤹ ᤂᤧᤍᤠ᤹ᤀᤥ ᤔᤧᤳᤋᤢᤛᤡ. “ᤗᤳᤇᤠ ᤕᤠ᤺ᤴᤁᤧᤔ᤺ᤒᤠᤎᤡᤰ ᤕᤠ᤹ᤖᤡ᤺ᤶᤒᤠ ᤗᤧᤵᤛᤧ ᤐᤣᤖᤥ॥
23617	MAT 13:9	ᤂᤧᤶᤔᤠ ᤏᤧᤰᤂᤥ᤹ ᤁᤧᤃᤵᤐᤠᤜᤠ᤹ᤖᤧ ᤁᤴ ᤐᤠ᤺ᤴᤏᤡᤴ ᤏᤢ᤺ᤖᤡᤰ ᤂᤧᤵᤛᤧᤶᤔᤧ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ᥄”
23618	MAT 13:10	ᤜᤧᤰᤁᤩᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤍᤩᤧᤀᤠᤱ ᤕᤧᤛᤢ᤺ᤴ ᤛᤣ᤺ᤴᤔᤧᤍᤥᤛᤢ. “ᤀᤠᤍᤠᤱᤒᤣ. ᤌᤣᤀᤠᤱ ᤁᤴᤜᤠ᤹ᤏᤢ ᤂᤧᤍᤠ᤹ᤀᤥᤖᤰ ᤁᤧᤒᤠ᤺ᤵᤐᤠᤒᤣ᥅”
23619	MAT 13:11	ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤌᤣᤀᤠᤱᤓᤧᤸᤗᤧ ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤡᤸᤗᤧᤴ ᤛᤡᤃᤠᤱᤒᤠ ᤐᤠ᤺ᤴᤜᤠ᤹ ᤂᤡᤏᤡ᤹ᤖᤰ ᤁᤢᤛᤡᤱ ᤏᤡ᤺ᤵᤔᤠ ᤁᤧᤄᤥ᤺ᤛᤢᤶᤔᤠᤱ ᤁᤧᤘᤕᤡ᤹ᤖᤥ. ᤁᤖ ᤂᤧᤱᤜᤠ᤹ᤖᤧᤃ ᤔᤧᤱᤄᤥᤀᤣ ᤔᤧᤘᤠ᤹ᤖᤥ॥
23622	MAT 13:14	ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤕᤛᤤᤕᤠ᤺ᤸᤗᤧ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢᤒᤠᤴ ᤁᤴ ᤔᤏᤠᤜᤠ᤹ᤀᤥ ᤁᤧᤖᤧᤒᤠᤖᤥ– ‘ᤂᤡᤏᤡ᤹ ᤁᤧᤄᤧᤵᤛᤢᤶᤛᤠᤱ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤶᤔᤡᤴ. ᤀᤥᤃᤧᤔᤧᤳᤋᤢᤶᤛᤠᤱ ᤁᤧᤴᤏᤡ᤺ᤛᤢᤶᤔᤡᤴᤗᤥ॥
23623	MAT 13:15	ᤌᤣᤀᤠᤱᤓᤧᤸᤗᤧ ᤁᤴ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤂᤠᤛᤡᤱᤅᤡᤴ ᤁᤧᤎᤢᤱᤒᤠ ᤐᤥ᤺ᤰᤂᤧᤀᤠᤱ ᤘᤠ᤹॥ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤧᤰᤂᤥ᤹ᤒᤠᤴ ᤌᤠᤰᤋᤧᤀᤠᤱ ᤘᤠ᤹. ᤜᤧᤰᤁᤩᤠᤱ ᤂᤢᤏᤡ᤹ ᤔᤡᤰᤁᤡᤴ ᤀᤡᤶ ᤔᤧᤔᤧᤳᤋᤢᤀᤠᤱ ᤘᤠ᤹॥ ᤔᤧ᤺ᤴᤏᤧ ᤑᤠ᤹ᤃᤪ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤧᤰᤂᤥ᤹ᤒᤠᤸᤗᤧ ᤔᤧᤄᤧᤵᤛᤢᤒᤠ ᤏᤢ ᤔᤡᤰᤁᤡᤸᤗᤧ ᤔᤧᤏᤡ᤺ᤛᤢᤒᤠᤔᤧᤴ. ᤜᤧᤰᤁᤩᤠᤱ ᤂᤢᤏᤡ᤹ ᤛᤡᤰᤗᤢᤱᤔᤠᤀᤥ ᤁᤢᤛᤡᤱ ᤔᤧᤏᤡ᤺ᤳᤋᤢᤀᤠᤱ ᤀᤡᤱᤃᤠ᤹ ᤗᤧᤵᤔᤠᤱ ᤔᤧᤏᤢ᤺ᤰᤂᤧᤒᤠᤔᤧᤴ. ᤜᤧᤰᤁᤩᤠᤱ ᤀᤡᤱᤃᤠ᤹ ᤂᤧᤱᤜᤠ᤹ ᤘᤣ᤺ᤴᤍᤢᤱᤛᤡᤱᤔᤧᤴ ᤑᤠ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠ᤺ᤳᤋᤢᤖᤥ॥’
23625	MAT 13:17	ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤕᤖᤡᤰ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ ᤏᤢ ᤛᤠᤶᤕᤥᤏᤡᤒᤠ ᤔᤏᤠᤜᤠ᤹ᤖᤧ ᤂᤡᤏᤡ᤹ ᤁᤧᤏᤡ᤺ᤛᤢᤶᤒᤠ ᤁᤧᤄᤧᤵᤛᤢᤶᤒᤠ ᤐᤠ᤺ᤴᤜᤠ᤹ ᤏᤡ᤺ᤔᤠ ᤏᤢ ᤂᤧᤶᤔᤠ ᤛᤠ᤹ᤖᤡᤰ ᤏᤡᤱᤘᤠ᤹ ᤔᤧᤈᤥᤃᤢᤀᤠᤱ ᤘᤕᤧ. ᤁᤖ ᤏᤡ᤺ᤔᤠ ᤏᤢ ᤂᤧᤶᤔᤠ ᤔᤧᤱᤄᤥ᤺ᤛᤢᤴᤗᤥ॥”
23626	MAT 13:18	“ᤀᤠᤸᤗ ᤕᤠ᤹ᤖᤡ᤺ᤶᤒᤠ ᤁᤧᤗᤧᤵᤐᤠᤸᤗᤧᤴ ᤂᤧᤍᤠ᤹ᤀᤡᤸᤗᤧ ᤁᤢᤒᤣ᤺ᤴ ᤂᤧᤵᤛᤧᤶᤔᤧ᤹ᤀᤥ
23631	MAT 13:23	ᤜᤧᤰᤁᤩᤠᤱ ᤏᤢ᤺ᤒᤠ ᤂᤠᤶᤔᤥ ᤁᤧᤈᤢᤰᤐᤠ ᤕᤠ᤹ᤖᤡ᤺ᤶᤒᤧᤱᤃ ᤐᤠ᤺ᤴᤈᤠᤰᤁᤡᤴ ᤁᤧᤄᤧᤶᤒᤠᤀᤠᤱ ᤁᤢᤛᤡᤱ ᤁᤧᤏᤡ᤺ᤵᤐᤠ ᤔᤏᤠ ᤁᤢᤀᤡᤛᤡ᤺ᤰ ᤆᤥ᤺ᤰᤗᤥ. ᤜᤧᤰᤁᤩᤠᤱ ᤂᤧᤸᤗᤧ ᤁᤡᤵᤌᤡᤰ. ᤋᤢᤰᤐᤥ᤺ᤱ ᤏᤢ ᤛᤢᤶᤒᤥ᤺ᤱ ᤗᤧᤱ ᤌᤠᤖᤡᤰ ᤁᤢᤈᤠ᤹ ᤑᤳᤇᤢᤖᤥ॥”
23632	MAT 13:24	ᤕᤧᤛᤢᤖᤧ ᤘᤣ᤹ᤛ᤻ᤔᤠ ᤂᤧᤍᤠ᤹ᤀᤡᤴ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤡᤱᤃ ᤀᤰᤋᤱᤒᤠ ᤆᤥ᤺ᤰᤗᤥ–ᤗᤳᤇᤠ ᤔᤏᤠᤎᤡᤰᤗᤧ ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤐᤥ ᤏᤢ᤺ᤒᤠ ᤕᤠ᤹ᤖᤡ᤺ᤶᤒᤠᤴ ᤗᤧᤵᤋᤢ.
23635	MAT 13:27	ᤜᤧᤰᤁᤩᤠᤱ ᤛᤣᤘᤠᤖᤥᤒᤠᤜᤠ᤹ ᤗᤠᤈᤣ᤹ ᤍᤠᤱᤒᤠᤸᤗᤥ ᤔᤧᤍᤩᤧᤀᤠᤱ ᤛᤣ᤺ᤴᤔᤧᤍᤥᤛᤢ. ‘ᤀᤠᤍᤠᤱᤒᤣ. ᤂᤧᤏᤧ᤹ᤃ ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤐᤥ ᤔᤠᤛᤡ ᤕᤠ᤹ᤖᤡ᤺ᤶᤒᤠᤖᤰ ᤁᤧᤗᤧᤵᤋᤢᤀᤠᤱ ᤏᤧᤛ᤻ᤛᤧ ᤔᤧ᤺ᤶᤒᤡ. ᤁᤖ ᤀᤠᤰᤂᤣᤀᤠᤱ ᤔᤠᤗᤧ᤺ᤴᤍᤥ᤺ᤴᤏᤠᤱ ᤗᤡᤅᤧᤒᤣ᥅’
23636	MAT 13:28	ᤂᤢᤏᤧ᤹ ᤏᤥᤃᤵ ᤐᤡᤖᤢᤛᤡ. ‘ᤂᤧᤱᤃ ᤏᤡᤱᤔᤡ᤺ᤸᤗᤧ ᤜᤧᤰᤁᤣ ᤆᤥᤃᤢᤒᤠᤖᤥ॥’ ᤛᤣᤘᤠᤖᤥᤒᤠᤜᤠ᤹ᤖᤧ ᤂᤢᤏᤧ᤹ ᤕᤠᤶᤔᤥ ᤛᤣ᤺ᤴᤔᤧᤍᤥᤛᤢ. ‘ᤂᤧᤴ ᤔᤠᤗᤧ᤺ᤴᤍᤥᤜᤠ᤹ ᤀᤠ᤺ᤰᤂᤢᤶᤍᤣ᤺ᤛᤢᤶᤒᤧ ᤗ᤹ᤖᤡᤰ ᤏᤡᤱᤘᤠ᤹ ᤁᤧᤀᤡ᤺ᤳᤋᤢᤒᤡ᥅’
23637	MAT 13:29	ᤗᤠᤈᤣ᤹ ᤍᤠᤱᤒᤠᤸᤗᤧ ᤔᤧᤳᤋᤢᤛᤡ. ‘ᤜᤧᤰᤁᤣ ᤔᤧᤈᤥᤃᤧᤶᤔᤡᤴᤏᤧ᤹ᤀᤥ. ᤔᤠᤗᤧ᤺ᤴᤍᤥ᤺ᤴ ᤁᤧᤀᤠ᤺ᤰᤂᤢᤶᤔᤡᤸᤗᤧ ᤔᤠᤛᤡ᤺ᤴᤏᤠᤱ ᤁᤧᤀᤠ᤺ᤰᤂᤢᤶ ᤁᤧᤛᤧᤖᤢᤶᤗᤥ॥
23638	MAT 13:30	ᤆᤠᤛᤢᤶᤔᤠ ᤕᤧᤶ ᤌᤠᤖᤡᤰ ᤏᤧᤵᤔᤠᤱ ᤛᤥᤛᤥᤖᤡᤰ ᤐᤥᤛᤡᤖ॥ ᤜᤧᤰᤁᤩᤠᤱ ᤂᤧᤴ ᤕᤧᤶᤔᤥ ᤆᤠᤃᤧᤛᤢᤶᤒᤠᤜᤠ᤹ ᤁᤧᤖᤧᤰᤏᤢ ᤋᤃᤡ ᤔᤠᤗᤧ᤺ᤴᤍᤥᤜᤠ᤹ ᤀᤠ᤺ᤰᤂᤧᤶᤔᤧ᤹ᤀᤠᤱ ᤀᤡᤓᤢᤳᤋᤧᤶᤔᤧ᤹ ᤜᤧᤰᤁᤩᤠᤱ ᤔᤡᤀᤥ ᤗᤠᤵᤑᤢ᤺ᤛᤧᤶᤔᤧ᤹ ᤜᤧᤰᤁᤩᤠᤱ ᤔᤠᤛᤡ᤺ᤴ ᤛᤢᤵᤛᤧᤶᤔᤧ᤹ᤀᤠᤱ ᤆᤠᤕᤠᤱᤔᤠᤀᤥ ᤕᤠ᤺ᤰᤋᤧᤶᤔᤧ᤹ ᤑᤠ᤹ᤀᤠᤱ ᤀᤡᤱᤈᤠ᤺ᤱ ᤐᤡᤖᤢᤱᤛᤡᤱᤗᤥ॥’”
23639	MAT 13:31	ᤜᤧᤰᤁᤩᤠᤱ ᤕᤧᤛᤢᤖᤧ ᤕᤠᤶᤔᤥ ᤘᤣ᤹ ᤂᤧᤍᤠ᤹ᤎᤡᤰ ᤔᤧᤳᤋᤢᤛᤡ. “ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤡᤱᤃ ᤕ᤺ᤱᤃᤣ᤹ ᤕᤠ᤹ᤖᤡ᤺ᤶᤒᤠᤴ ᤁᤢᤀᤡᤛᤡ᤺ᤰ ᤆᤥ᤺ᤰᤗᤥ॥ ᤔᤏᤠᤎᤡᤰᤗᤧ ᤂᤧᤴ ᤕ᤺ᤱᤃᤣ᤹ ᤕᤠ᤹ᤖᤡ᤺ᤶᤒᤠᤴ ᤋᤣ᤹ᤖᤢᤀᤠᤱ ᤀᤡᤰᤋᤠᤵᤐᤥ ᤗᤧᤵᤋᤢ॥
23640	MAT 13:32	ᤁᤧᤖᤧᤰ ᤕᤠ᤹ᤖᤡ᤺ᤶᤒᤠᤀᤥ ᤁᤧᤖᤧᤰᤏᤢ᤺ᤸᤗᤧ ᤆᤢᤰᤛᤠ ᤆᤥ᤺ᤰᤛᤠᤱ ᤂᤧᤴ ᤐᤥ᤺ᤀᤠᤱ ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤐᤥᤒᤠ ᤘᤣ᤹ ᤏᤢᤎᤡ-ᤛᤠᤰᤆᤡ᤹ᤏᤢ᤺ᤸᤗᤧ ᤕᤶᤒᤠ ᤁᤢᤒᤢᤱ ᤐᤥ᤺ᤱᤗᤥ॥ ᤜᤧᤰᤁᤩᤠᤱ ᤐᤢᤛᤠᤜᤠ᤹ ᤔᤧᤍᤠᤀᤠᤱ ᤁᤢᤒᤥᤖᤠ᤺ᤰᤁᤥ ᤜᤠᤵ ᤔᤧᤈᤥᤃᤢᤖᤥ॥”
23641	MAT 13:33	ᤕᤧᤛᤢᤖᤧ ᤀᤠᤸᤗᤛᤠᤱ ᤘᤣ᤹ᤛ᤻ᤔᤠ ᤂᤧᤍᤠ᤹ᤀᤡᤴ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤡᤱᤃ ᤑᤧ᤹ᤖᤢᤶᤔᤥ ᤕᤠᤰᤔᤏᤠᤒᤠ ᤂᤖᤧ᤺ᤱ ᤁᤧᤓᤱᤒᤠ ᤛᤡᤍᤠ᤹ᤀᤡᤴ ᤜᤧᤰᤋᤱᤒᤠ ᤆᤥ᤺ᤰᤗᤥ॥ ᤌᤡᤰ ᤔᤧᤴᤇᤢᤔᤠ᤹ᤀᤡᤸᤗᤧ ᤂᤵᤐᤩᤠᤀᤥ ᤕᤖᤡᤰ ᤑᤧ᤹ᤖᤢᤶᤔᤥ ᤔᤡᤛᤠᤰ ᤛᤡᤍᤠ᤹ᤀᤡᤴ ᤕᤠᤰᤋᤢ. ᤜᤧᤰᤁᤩᤠᤱ ᤛ᤹ᤖᤢ ᤕᤢᤰᤂᤢᤀᤠᤱ ᤔᤧᤴᤕᤢᤵᤐᤣ ᤌᤠᤖᤡᤰ ᤛᤢ᤺ᤵᤋᤢ ᤕᤢᤰᤂᤢᤖᤥ॥”
23643	MAT 13:35	ᤜᤧᤰᤁᤣ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤒᤠ᤺ᤴᤏᤡᤴ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤸᤗᤧ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢᤒᤠᤴ ᤁᤧᤖᤧᤒᤠᤖᤥ– “ᤀᤡᤱᤃᤠ᤹ ᤂᤧᤍᤠ᤹ᤀᤥᤖᤰ ᤐᤠ᤺ᤳᤋᤠᤖᤥ. ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧᤴ ᤏᤠᤘᤠᤃᤧᤴ ᤆᤀᤡ᤺ᤳ ᤏᤧᤛ᤻ᤛᤧᤀᤠᤱᤎᤥᤒᤠ ᤛᤡᤒᤡ᤹ ᤐᤠ᤺ᤴᤜᤠ᤹ ᤐᤠ᤺ᤳᤋᤢᤱᤗᤥ॥”
23644	MAT 13:36	ᤜᤧᤰᤁᤩᤠᤱ ᤂᤧᤴ ᤔᤏᤠᤜᤠ᤹ ᤗᤧᤖᤢᤎᤛᤡᤀᤠᤱ ᤕᤧᤛᤢ᤺ᤴ ᤜᤡᤶᤔᤥ ᤐᤣ॥ ᤁᤢᤜᤢ᤹ᤛᤠᤶᤒᤠᤜᤠ᤹ ᤂᤢᤏᤧ᤹ᤀᤥ ᤔᤧᤍᤩᤧᤀᤠᤱ “ᤐᤩᤠᤱᤛᤡᤀᤥᤒᤠ ᤔᤠᤗᤧ᤺ᤴᤍᤥᤖᤧᤴ ᤂᤧᤍᤠ᤹ᤀᤡᤸᤗᤧ ᤁᤢᤒᤣ᤺ᤴ ᤐᤥᤀᤠᤎᤰᤋᤧ᤹” ᤑᤠ᤹ᤀᤠᤱ ᤔᤧᤔᤧᤳᤋᤢ॥
23645	MAT 13:37	ᤕᤧᤛᤢᤖᤧ ᤏᤥᤃᤵ ᤐᤡᤖᤢᤛᤡ. “ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤐᤥ ᤏᤢ᤺ᤒᤠ ᤕᤠ᤹ᤖᤡ᤺ᤶᤒᤠ ᤁᤧᤗᤧᤵᤐᤠᤱᤃ ᤀᤡᤱᤃᤠ᤹ ᤔᤧᤴᤇᤠᤶᤛᤠ᤺ᤀᤠᤖᤥ॥
23647	MAT 13:39	ᤜᤧᤰᤁᤩᤠᤱ ᤔᤠᤗᤧ᤺ᤴᤍᤥ ᤕᤠ᤹ᤖᤡ᤺ᤶᤒᤠ ᤁᤧᤗᤧᤵᤐᤠ ᤏᤡᤱᤔᤡ᤺ᤱᤃ ᤔᤠᤑᤧᤴᤛᤠᤶᤔᤡᤴᤗᤥ॥ ᤆᤠᤛᤢᤶᤔᤠ ᤕᤧᤶᤔᤡᤱᤃ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤁᤢᤏᤢᤵᤔᤠᤴᤗᤥ. ᤜᤧᤰᤁᤩᤠᤱ ᤆᤠᤃᤧᤛᤢᤶᤒᤠᤜᤠ᤹ᤃ ᤔᤠᤱᤗᤠᤀᤡᤱᤒᤠᤛᤡᤖᤥ॥”
23648	MAT 13:40	“ᤜᤧᤰᤁᤩᤠᤱ ᤂᤧᤴ ᤔᤠᤗᤧ᤺ᤴᤍᤥᤜᤠ᤹ ᤔᤧᤛᤢᤵᤛᤢᤀᤠᤱ ᤔᤡᤀᤥ ᤗᤠᤵᤔᤧᤓᤢᤛᤢᤒᤠ ᤁᤢᤀᤡᤛᤡ᤺ᤰᤁᤣ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤁᤢᤏᤢᤵᤔᤠᤴ ᤐᤥ᤺ᤱᤗᤥ॥
23651	MAT 13:43	ᤜᤧᤰᤁᤩᤠᤱ ᤛᤠᤶᤕᤥᤏᤡᤒᤠᤜᤠ᤹ ᤂᤢᤏᤡ᤹ ᤏᤡᤱᤘᤠ᤹ᤑᤢᤐᤠ᤺ᤸᤗᤧ ᤁᤢᤜᤠᤱᤈᤢᤶᤔᤥ ᤏᤠᤶ ᤁᤢᤀᤡᤛᤡ᤺ᤰ ᤔᤧᤗᤧᤰᤗᤥ॥ ᤏᤢ᤺ᤖᤡᤰᤁᤠᤱ ᤂᤧᤵᤛᤧᤶᤔᤧ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ॥”
23652	MAT 13:44	ᤕᤠᤶᤔᤥ “ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤡᤱᤃ ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤐᤥ ᤆᤡᤱᤔᤏᤠᤒᤠ ᤕᤖᤡᤰ ᤕᤠᤱᤓᤢ᤺ᤴ ᤁᤢᤀᤡᤛᤡ᤺ᤰ ᤆᤥ᤺ᤰᤗᤥ॥ ᤔᤏᤠᤎᤡᤰᤗᤧ ᤂᤧᤴ ᤕᤠᤱᤓᤢ᤺ᤴ ᤂᤥ᤺ᤛᤢᤀᤠᤱ ᤕᤠᤶᤔᤥ ᤆᤡᤰᤂᤢᤖᤥ. ᤜᤧᤰᤁᤩᤠᤱ ᤂᤧᤴ ᤛ᤺ᤳᤗ ᤐᤣ᤺ᤰᤁᤠᤱ ᤂᤢᤏᤧ᤹ ᤁᤳᤋᤢᤒᤠ ᤁᤧᤖᤧᤰ ᤆᤡᤃ᤺ᤰᤘᤠᤜᤠ᤹ ᤛᤱᤄᤢᤀᤠᤱ ᤂᤧᤴ ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤐᤡᤴ ᤀᤡᤅᤢᤖᤥ॥”
23653	MAT 13:45	“ᤕᤠᤶᤔᤥ ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤡᤱᤃ ᤀᤰᤋᤱᤒᤠ ᤆᤥ᤺ᤰ–ᤗᤳᤇᤠ ᤏᤢ᤺ᤒ᤻ ᤏᤢ᤺ᤒᤠ ᤋᤧᤰᤛᤣ᤺ᤰ ᤁᤧᤃᤥ᤺ᤵᤐᤠ ᤗᤧᤱᤜᤱᤒᤠᤸᤗᤧ
23654	MAT 13:46	ᤛᤠ᤹ᤖᤡᤰ ᤀᤡᤔᤧᤸᤗᤢᤱᤒᤠ ᤋᤧᤰᤛᤣ᤺ᤰᤁᤡᤴ ᤂᤥ᤺ᤛᤢ. ᤜᤧᤰᤁᤩᤠᤱ ᤐᤣᤀᤠᤱ ᤂᤧᤸᤗᤧ ᤁᤳᤋᤢᤒᤠ ᤁᤧᤖᤧᤰ ᤁᤢᤈᤡᤃ᤺ᤰᤘᤠᤜᤠ᤹ ᤛᤱᤄᤢᤀᤠᤱ ᤂᤧᤴ ᤋᤧᤰᤛᤣ᤺ᤰᤁᤡᤴ ᤀᤡᤅᤢᤖᤥ॥”
23655	MAT 13:47	“ᤕᤠᤶᤔᤥ. ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤡᤴ ᤕᤶᤒᤠ ᤕᤥ᤺ᤱ ᤁᤢᤀᤡᤛᤡ᤺ᤰ ᤆᤥ᤺ᤰᤗᤥ॥ ᤂᤧᤴ ᤕᤥ᤺ᤱᤅᤡᤴ ᤘᤖᤰᤁᤥ ᤔᤧᤗᤧᤵᤋᤢᤸᤗᤧ ᤂᤧᤵᤔᤥ ᤁᤧᤖᤧᤰ ᤐᤖᤡᤰᤗᤧᤴ ᤅᤠᤜᤠ᤹ ᤔᤧᤎᤠ᤺ᤖᤥ॥