| 23214 | MAT 1:1 | य़ेसु ख्रिस्त़ेन् अब्राहामऱे कुस्साः ह़ेक्क्याङ् दाउद हाङ्ङिल्ल़े कुस्साः वय़ेरो॥ कङ्ग खुऩेॽ कुधाःक्हाॽऱे खुनिॽ मिङ्स्रारो– |
| 23216 | MAT 1:3 | ह़ेक्क्याङ् यहुदाःल्ल़े कुस्साःहाॽ पेरेज नु जिराह वय़ेत्छि (ख़ेङ्हाॽऱे खुन्छिॽ माःल्ल़े कुमिङ् तामार वय़े), फाऱेसऱे कुस्साः ह़ेस्रोन वय़े, ह़ेस्रोनऱे कुस्साः आराम वय़ेरो॥ |
| 23219 | MAT 1:6 | ह़ेक्क्याङ् यिसैऱे कुस्साः दाउद हाङ्ङिन्वय़े॥ दाउद हाङ्ङिल्ल़े कुस्साः सोलोमन वय़े (सोलोमनऱे कुम्मा बेत्सेबाःन् उरियाहऱे कुमेःत् वय़ेरो॥) |
| 23224 | MAT 1:11 | ह़ेक्क्याङ् योसियाहऱे कुस्साःहाॽ यकोनियास नु कुन्साॽसि म़ेवय़ेरो (ख़ेङ्हाॽग इस्राइलिहाॽ ब़ेबिलोन लाजेॽओ म़ेद़ेम्सु म़ेदेॽरुसिआङ् म़ेगत्तुसिबा य़ेम्मो साम़ेवाःन्छिङ्ङाङ्म़ेवय़ेरो)॥ |
| 23225 | MAT 1:12 | ब़ेबिलोःन्नो म़ेदेॽरुसिआङ् याङ्सि यकोनियासऱे कुस्साः सालतिएल वय़े, ह़ेक्क्याङ् सालतिएलऱे कुस्साः यरुबाबेल वय़ेरो॥ |
| 23229 | MAT 1:16 | ह़ेक्क्याङ् याकुबऱे कुस्साः युसुफ वय़े॥ युसुफ़ेन् मरियमऱे कुय़ेम्बाॽ वय़े, ह़ेक्क्याङ् हाबा कन् मरियम्मिन्लाम् निङ्वाॽफुमाङ्ङिल्ल़े सेःन्दुबा ख्रिस्त म़ेप्मनाबा य़ेसुःन् सावाःन्छिङ्लो॥ |
| 23230 | MAT 1:17 | अक्खेलॽरिक् अब्राहामलाम् दाउद हाङ् थारिक् थिक्-लि (१४) थाःक् म़ेवय़े, ह़ेक्क्याङ् दाउद हाङ्लाम् ब़ेबिलोन लाजेॽओ म़ेद़ेम्सु म़ेदेॽरुसिआङ् म़ेगत्तुसिबा य़ेम् थारिक् थिक्-लि (१४) थाःक् म़ेवय़े, ह़ेक्क्याङ् ब़ेबिलोःन्नो पुङ्लाधाबा म़ेजोगुसिआङ् म़ेदेॽरुसिबा य़ेम्माङ्धो निङ्वाॽफुमाङ्ङिल्ल़े सेःन्दुबा ख्रिस्त़ेन्सावाःन्छिङ्बा य़ेम् थारिक् थिक्-लि (१४) थाःक् म़ेवय़ेरो॥ |
| 23231 | MAT 1:18 | आल्ल य़ेसु ख्रिस्तऱे कुसावाःन्छिङ्मान् अक्खेलॽरिक् पोःक्ख़ेरो–कुम्मा मरियमऱे कुमेःक्खिम् पोःङ्मा पाःन्निन् युसुफ़ेन्नु पुॽऱेआङ् वय़े, कर खुन्छिॽ मेःक्खिम् पोःङ्मानुःल्ल़े तगिए खुऩेॽ सेसेमाङ्ङिल्ल़े कुमुक्साम्लाम् म़ेन्छुक्मा पोःक्ख़ेरो॥ |
| 23232 | MAT 1:19 | खुऩेॽनु कुमेःक्खिम् पाःन् क़ेबुॽबा युसुफ़ेङ्ग साम्योनिबा मना वय़ेबाल्ल़े चोगुल्ल़े कुजाःत्थि म़ेबेःक्ऩेन्ल फाॽआङ् ख़ेल्ल़े स्वाःत्ताङ् नाॽमा निङ्वाॽ चोगुरो॥ |
| 23233 | MAT 1:20 | कर ह़ेक्के इःत्तुर वय़ेल्ल़े स़ेप्माङ्मो यहवे दाङ्बाल्ल़े कुमाङ्लाइङ्बान् ओसेःन्धाक्सिङ्ङाङ्अक्खे म़ेत्तुरो, “दाउदऱे कुमुॽइदाङ्सा युसुप्फे, ख़ेऩेॽ मरियम्मिन् मेःक्खिम् चोःक्माआङ् हिम्मो ताःप्मा म़ेगिस़ेन्ऩेॽओ, थेआङ्भ़ेल्ल़े खुऩेॽओबा अङ़ेःक्वाःन् सेसेमाङ्ङिल्ल़े कुमुक्साम्लाम्बा हाङ्सिङ्बारो॥ |
| 23234 | MAT 1:21 | खुऩेॽ य़ेम्बित्छाॽसाःधिक् कत्तुॽ, ह़ेक्क्याङ् ख़ेल्ल़े कुमिङ्ङिन् य़ेसु वाःत्त़ेॽओ, थेआङ्भ़ेल्ल़े ख़ेल्ल़े कुमनाहाॽ खुनिॽ लायोलाम् ताङ्स़ेःप्तुसिॽरो॥” |
| 23235 | MAT 1:22 | माङ्निङ्वाॽपाःन् क़ेबाःप्पालाम् यहवे दाङ्बाल्ल़े उन्छेःन् अक्खेलॽरिक् पाःत्तुआङ् वय़ेबा पाःन्निन् क़ेत्ल फाॽआङ् कन् क़ेऱेक् पाःन्हाॽ पोःक्ख़ेबारो– |
| 23236 | MAT 1:23 | “सिसादिङ् म़ेन्छियाॽइन् म़ेन्छुक्मा पोःङ्ङाङ् य़ेम्बित्छाॽसाःधिक् कत्तुॽ, ह़ेक्क्याङ् ख़ेन् इम्मानुएल म़ेम़ेत्तुॽरो॥ ‘इम्मानुएल’ फाॽइङ्ग ‘निङ्वाॽफुमाङ्ङिन् आनिॽनु वाॽ’ पोःङ्लो॥” |
| 23237 | MAT 1:24 | आल्ल युसुफ़ेन् स़ेप्माङ्मोलाम् सोऱेआङ् यहवे दाङ्बाल्ल़े कुमाङ्लाइङ्बाल्ल़े म़ेत्तुबा कुइसिःक्के मरियम्मिन् मेःक्खिम् म़ेत्तु, ह़ेक्क्याङ् कुहिम्मो तारुरो॥ |
| 23238 | MAT 1:25 | कर मरियम्मिन् म़ेन्छुक्मा वय़ेर थारिक् खुन्छिॽ सोरिक् म़ेइप्स़ेत्छिन्लो॥ याङ्सि मरियम्मिल्ल़े साः कत्तुआङ् युसुफऱे ख़ेन् अङ़ेःक्वाःन् य़ेसु मिङ् वाःत्तुरो॥ |
| 23239 | MAT 2:1 | आल्ल य़ेसुःन् यहुदिया थुम्मोबा ब़ेथलेह़ेम पाङ्जुम्मो सावाःन्छिङ्बा य़ेम्मो ह़ेरोद हाङ्ङिल्ल़े ख़ेप्मो हाङ् चोगुर वय़ेरो॥ य़ेसुःन् सावाःन्छिङ्ङाङ् नाम्ग़ेन् पिसाङ्बा लाजेॽलाम् सिक्कुम्निबा खाग़ेइक्पाहाॽ यरुसल़ेम्मो म़ेद्य़े, ह़ेक्क्याङ् |
| 23240 | MAT 2:2 | अक्खेलॽरिक् पाःन् सेःन्म़ेदोसु, “यहुदिहाॽऱे खुनिॽ हाङ् क़ेबोःङ्बाआङ् साग़ेवाःन्छिङ्बान् आत्तो वाॽबे? आनिग़े नाम्ग़ेन् पिसाङ् कुसावाःन्छिङ्माल्ल़ेन् मिक्सेःन् क़ेबिबा खेःम्सिक्किन् निःसुम्ब़ेआङ् खुऩेॽ कुसेवा चोःक्स़े त्य़ेॽइग़ेबारो॥” |
| 23241 | MAT 2:3 | ह़ेरोद हाङ्ङिल्ल़े कन् पाःन्निन् ख़ेप्सुआङ् कुनिङ्वाॽबाल्ल़े साॽरिक् य़ेःक्खु, ह़ेक्केलॽरिक्के खुऩेॽनुए यरुसल़ेम्मोबा क़ेऱेक् मनाहाॽआङ् खुनिॽ निङ्वाॽबाल्ल़े साॽरिक् य़ेःक्खुसिरो॥ |
| 23242 | MAT 2:4 | ह़ेरोद हाङ्ङिल्ल़े क़ेऱेक् तुम्निङ्वाॽफुसाम्बाहाॽ नु साम्योथिम्साम्बाहाॽ उःत्तुसिआङ् कन् निङ्वाॽफुमाङ्ङिल्ल़े सेःन्दुबा ख्रिस्त म़ेप्मनाबान् आत्तो सावाःन्छिङ्मा क़ेबोःङ्बा वाॽबे लॽरिक् सेःन्दोसुसि॥ |
| 23243 | MAT 2:5 | ख़ेङ्हाॽऱे नोगप् म़ेबिरु, “यहुदिया थुम्मोबा ब़ेथलेह़ेम्मो खुऩेॽ सावाःन्छिङ्मा क़ेबोःङ्बा वाॽरो॥ थेआङ्भ़ेल्ल़े माङ्निङ्वाॽपाःन् क़ेबाःप्पाल्ल़े अक्खेलॽरिक् साप्तुआङ् पत्– |
| 23244 | MAT 2:6 | ‘यहुदिया थुम्मोबा ब़ेथलेह़ेम्मे, ख़ेऩेॽग यहुदियाबा पाङ्जुम्हाॽओ साॽरिक् क़ेय़ेक्पा क़ेजोःक्लो, थेआङ्भ़ेल्ल़े ख़ेऩेॽ क़ेबाङ्जुम्लाम् हाङ्युक्पाधिक् ताःरो, खुऩेॽग म़ेल्लुक्कम्बा कुइसिःक् पोःङ्ङाङ् आमना इस्राइलिहाॽ कम्ब्राङ् क़ेम़ेप्पा पोःङ्लो॥’” |
| 23245 | MAT 2:7 | ह़ेरोद हाङ्ङिल्ल़े ख़ेन् सिक्कुम्निबा खाग़ेइक्पाहाॽ स्वाःत्ताङ् उःत्तुसि ह़ेक्क्याङ् ख़ेङ्हाॽलाम् खेःम्सिक्पान् थाःम्सिङ्बा कुज़ेक् य़ेम्मिन् निङ्वाॽ खोःसु॥ |
| 23246 | MAT 2:8 | ह़ेक्क्याङ् ख़ेङ्हाॽ अक्खे म़ेत्तुसिर ब़ेथलेह़ेम्मो पाङ्घुदेःसुसि, “पेग़ेम्म़ेॽआङ् अङ़ेःक्वाःन् कोःत्त़ेम्म़ेॽ॥ ख़ेन् अङ़ेःक्वाःन् क़ेघोःसुम्ऩे फाॽग्र फ़ेऱेम्म़ेॽआङ् इङ्गाॽ आम़ेत्त़ेम्म़ेॽओ॥ इङ्गाॽआङ् खुऩेॽ सेवा म़ेत्तुङ्लो॥” |
| 23247 | MAT 2:9 | ह़ेरोद हाङ्ङिल्ल़े पाःत्तुबा पाःन्निन् म़ेघ़ेप्सुआङ् ख़ेङ्हाॽ म़ेधासिङ्लो॥ ह़ेक्क्याङ् ख़ेङ्हाॽऱे ख़ेन् खेःम्सिक्पान् याम्मो म़ेनिःसु ह़ेक्क्याङ् खुनिॽ तगि तगि पेआङ् अङ़ेःक्वा वय़ेबा हिम्कुदोःप्मा क़ेऱेआङ् फन्छिङ्लो॥ |
| 23248 | MAT 2:10 | ख़ेङ्हाॽऱे ख़ेन् खेःम्सिक्पान् याम्मो म़ेनिःसुआङ् साॽरिक् म़ेसःत्त़े॥ |
| 23249 | MAT 2:11 | हिम् सिगाङ् म़ेलाःस्स़ेल्ल़े अङ़ेःक्वाःन् नु कुम्मा मरियम्मिन् म़ेनिःसुसिरो॥ ख़ेङ्हाॽऱे साम्बोःन्नाङ् अङ़ेःक्वाःन् सेवा म़ेम़ेत्तु, ह़ेक्क्याङ् सुःक्वाःन्म़ेभाःक्खुआङ् साम्म्याङ्, थिक् परिक्पा इम़ेल्लुङ्बा साङ्सिङ् नु कुनाम् क़ेनुॽबा मुर्रहाॽ म़ेदोःन्दु म़ेबिरुरो॥ |
| 23250 | MAT 2:12 | ह़ेक्क्याङ् स़ेप्माङ्मो माङ्लाइङ्बाल्ल़े ख़ेङ्हाॽ ह़ेरोद हाङ्ङिल्लो म़ेनुःक्ख़ेम् म़ेबेग़ेम्मिन्ऩेॽओ लॽरिक् साम्दिङ् पिरुसिबाल्ल़े ख़ेङ्हाॽ वेॽलाम् आबाङे लाजेॽओ म़ेनुःक्ख़े म़ेबेरो॥ |
| 23251 | MAT 2:13 | ख़ेन् सिक्कुम्निबा खाग़ेइक्पाहाॽ म़ेबे ह़ेक्क्याङ् यहवे दाङ्बाल्ल़े कुमाङ्लाइङ्बाधिक् युसुफऱे कुस़ेप्माङ्मो थाःन्छिङ्ङाङ् अक्खे म़ेत्तु, “पोग़ेॽआङ् अङ़ेःक्वाःन् नु कुम्माःन् तेॽऱेस़ेॽआङ् मिस्र लाजेॽओ ख़ेत्छिङ् पेग़ेॽ, ह़ेक्क्याङ् इङ्गाॽ म़ेम्म़ेत्ते थारिक् ख़ेऩेॽ ख़ेप्मोए वय़ेॽओ, थेआङ्भ़ेल्ल़े ह़ेरोद हाङ्ङिल्ल़े अङ़ेःक्वाःन् स़ेप्मा फाॽआङ् कोःत्तुर वाॽरो॥” |
| 23252 | MAT 2:14 | बा ख़ेन् स़ेन्दिक्सा युसुफऱे अङ़ेःक्वाःन् नु कुम्माःन् तेॽरुसिआङ् मिस्रओ ख़ेत्छिङ् पेरो॥ |
| 23253 | MAT 2:15 | ह़ेरोद हाङ्ङिन् म़ेन्छिःए थारिक् खुऩेॽ ख़ेप्मोए याःक्त़ेरो॥ ह़ेक्केलॽरिक् यहवे दाङ्बाल्ल़े माङ्निङ्वाॽपाःन् क़ेबाःप्पालाम् इङ्गाॽ आस्साःन् मिस्रलाम् लाःक्कात् उःत्तुङ्लो लॽरिक्उन्छेःन् पाःत्तुबान् क़ेऱेरो॥ |
| 23254 | MAT 2:16 | आल्ल ह़ेरोद हाङ्ङिल्ल़े सिक्कुम्निबा खाग़ेइक्पाहाॽऱे ह़ेक्केलॽरिक् खुऩेॽ इङ्म़ेल़ेक्तुआङ् वेॽ लाम् म़ेबेबा निङ्वाॽ खोःसुआङ् साॽरिक् कुसिक् पोग़ेरो॥ ख़ेल्ल़े चोगुल्ल़े थक्सुबाहाॽ पाङ्घुसिआङ् ब़ेथलेह़ेम नु ख़ेन् खिरिबा तङ्बे ऩेत्छिआङ् योबा य़ेम्बित्छाॽ अङ़ेःक्वा साःहाॽ क़ेऱेक् स़ेप्पाङ्घुसिरो॥ थेआङ्भ़ेल्ल़े ख़ेन् सिक्कुम्निबा खाग़ेइक्पाहाॽलाम् खेःम्सिक्पान् तङ्बे ऩेत्छिआङ्धो तगि थाःम्सिङ्बा निङ्वाॽ खोःसुआङ् वय़ेरो॥ |
| 23255 | MAT 2:17 | ख़ेङ्ग यर्मिया माङ्निङ्वाॽपाःन् क़ेबाःप्पाल्ल़े अक्खेलॽरिक् उन्छेःन् पाःत्तुबा माङ्निङ्वाॽपाःन्निन् क़ेऱेबारो– |
| 23256 | MAT 2:18 | “क़ेहाःप्मा क़ेभिःक्मा नु मेरिङ् क़ेधक्मा यम्बा इक्लाःन् रामा पाङ्जुम्मो ख़ेम्द़ेत्लो, राह़ेलऱे कुस्साःहाॽ हाःप्तुसिॽरो॥ ख़ेङ्ग हाङ्हाङ् म़ेत्छिङ्मा म़ेद़ेन्ऩेन्लो, थेआङ्भ़ेल्ल़े कुस्साःहाॽ क़ेऱेक् म़ेस्य़ेरो॥” |
| 23257 | MAT 2:19 | आल्ल ह़ेरोद हाङ्ङिन् स्य़ेआङ् मिस्र लाजेॽओ युसुफ़ेन्नु यहवे दाङ्बाल्ल़े कुमाङ्लाइङ्बान् कुस़ेप्माङ्मो थाःन्छिङ्ङाङ् |
| 23258 | MAT 2:20 | म़ेत्तु, “पोग़ेॽआङ् अङ़ेःक्वाःन् नु कुम्माःन् इस्राइल लाजेॽओ तेॽऱेस़ेॽओ, थेआङ्भ़ेल्ल़े अङ़ेःक्वाःन् स़ेप्मा क़ेगोःप्प़ेन्स्य़ेआङ् होःप्लो॥” |
| 23259 | MAT 2:21 | ख़ेल्ल़े चोगुल्ल़े युसुफऱे अङ़ेःक्वाःन् नु कुम्माःन् इस्राइल लाजेॽओ तेॽरुसि॥ |
| 23260 | MAT 2:22 | कर ह़ेरोद हाङ्ङिन् स्य़ेआङ् खुऩेॽ कुल़ेक्वा कुस्साः अर्खिलाउसऱे यहुदिया थुम्मो हाङ् चोगुर वाॽ क़ेलॽबान् युसुफऱे निङ्वाॽ खोःसुआङ् खुऩेॽ ख़ेप्मो पेःक्मा किःस़े॥ ह़ेक्क्याङ् माङ्लाइङ्बाल्ल़े याम्मो स़ेप्माङ्मो साम्दिङ् पिरुबाल्ल़े चोगुल्ल़े खुऩेॽ गालिल थुम्मो पेआङ् |
| 23261 | MAT 2:23 | नासरत पाङ्जुम्मो वाॽमा हेःक्त़ेरो॥ कङ्ग माङ्निङ्वाॽपाःन् क़ेबाःप्पाहाॽऱे “निङ्वाॽफुमाङ्ङिल्ल़े थुक्तुबाङ्ग नासरि म़ेम़ेत्तु” लॽरिक् म़ेबाःत्तुबा पाःन्निन् क़ेऱेबारो॥ |
| 23262 | MAT 3:1 | ख़ेन् य़ेम्मो बप्तिस्मा क़ेबिबा युहुन्ना म़ेप्मनाबा मनाःन् यहुदिया थुम्मोबा एःक्साद़ेन्नो अक्खेलॽरिक् इङ्भन् चोगुर त्य़े, |
| 23263 | MAT 3:2 | “खिनिॽ लायोलाम् हिन्द़ेम्म़ेॽओ, थेआङ्भ़ेल्ल़े साङ्ग्राम्पेदाङ्बा हाङ्जुम्मिन् निःत्ताङ्ङे त्य़ेआङ् वाॽरो॥” |
| 23264 | MAT 3:3 | खुऩेॽ कुयाःम्बेओ माङ्निङ्वाॽपाःन् क़ेबाःप्पा यसैयाःल्ल़े अक्खेलॽरिक् पाःत्तुआङ् वाॽरो, “खुऩेॽ एःक्साद़ेन्नो अक्खेलॽरिक् क़ेअःक्पा इक्लारो, ‘दाङ्बाल्ल़े कुमाराम्मिन् यारिप् चोग़ेम्म़ेॽआङ् कुलाम्हाॽ तोःन्दोःन्चोग़ेम्म़ेॽ!’” |
| 23265 | MAT 3:4 | आल्ल युहुन्नाःल्ल़े उमेऱे कुमुरिक्लाम् थाक्मनाबा तेःत्तिन् चाक्खुआङ् स़ेहोबा फॽइ युप्सुरो॥ खुऩेॽ कुजामाङ्ग निःङ्घुःक्वा नु ताम्भुङ् सक्वाघु वय़ेरो॥ |
| 23266 | MAT 3:5 | यरुसल़ेम य़ेक्यक्लाम् नु यहुदिया थुम् ह़ेक्क्याङ् यर्दन यङ्घङ् खिरिबा क़ेऱेक् थुम्हाॽओलाम् मनाहाॽ कुदुम्स़े |
| 23267 | MAT 3:6 | म़ेद्य़ेआङ् इङ्गाॽ लायोबाआरो म़ेबाःत्तुर यर्दन यङ्घङ्ङो खुऩेॽलाम् बप्तिस्मा म़ेबोःक्ख़ेरो॥ |
| 23268 | MAT 3:7 | कर यरिक् फरिसिहाॽ नु सदुकिहाॽ बप्तिस्मा पोःङ्स़े खुऩेॽओ म़ेद्य़ेर म़ेबत्छ़ेबा निःसुसिआङ् अक्खे म़ेत्तुसिर फ़ेःक्तुसि, “असेःक्सासे, खिनिॽ कन् क़ेदाःबार क़ेबप्पा निङ्वाॽफुमाङ्ङिल्ल़े कुघुम्दिङ्लाम् ख़ेत्छिङ्ङ़ेम्म़ेॽ फाॽआङ् हाःत्ल़े क़ेम़ेत्तिबे? |
| 23270 | MAT 3:9 | आनिग़ेग अब्राहामऱे कुस्साःसिग़े, ख़ेल्ल़े चोगुल्ल़े खुम्दिङ्लाम् ख़ेत्छिङ्मा सुक्तिग़ेॽ फाॽआङ् निङ्वाॽ म़ेइःत्त़ेम्मिन्ऩेॽओ, थेआङ्भ़ेल्ल़े निङ्वाॽफुमाङ्ङिल्ल़ेग कन् लुङ्हाॽआङ् अब्राहामऱे कुस्साः चोःक्मा सुक्तुसिॽरो॥ |
| 23271 | MAT 3:10 | आल्लोसा निङ्वाॽफुमाङ्ङिल्ल़े कुघास़ेन्निल्ल़े तःन्दिङ्ग सिङ्बुङ्मो खा चुक्मा इःत्त़ेआङ् वाॽ॥ नुःबा सिङ्सेॽ म़ेन्धोःक्मनाबा सिङ्बुङ्हाॽ क़ेऱेक् ताङ्माआङ् मिओ लाप्फुमा पोःङ्लो॥ |
| 23272 | MAT 3:11 | लायोलाम् क़ेहिन्दिआङ् इङ्गाॽग च्वाःत्तिल्ल़े बप्तिस्मा पिनिङ्लो, कर आएगाङ् क़ेदाःब़ेङ्ग इङ्गाॽनुःल्ल़ेआङ् मुक्साम्साबा चोःक्लो॥ खुऩेॽ कुलाङ्सुःप्हाॽ इङ्गाॽ योःक् कुइसिःक् पङ्माआङ् म़ेलाॽआन्लो॥ खुऩेॽ सेसेमाङ् नु मिःल्ल़े बप्तिस्मा क़ेबिरिॽरो॥ |
| 23273 | MAT 3:12 | कुभॽएःत्तिल्ल़े सिःन् आःम्मा फाॽआङ् खुऩेॽ यारिप् वाॽ, ह़ेक्क्याङ् खुऩेॽ तुगुर सुप्सुआङ्सिःन् चाधोःक्लाओ चिक्खुॽ ह़ेक्क्याङ् कुहक्हाॽ आप्फाल्ल़ेआङ् म़ेन्छिःमनाबा मिओ हाःन्दुदेःसुॽरो॥” |
| 23274 | MAT 3:13 | ख़ेन् य़ेम्मो य़ेसुःन् गालिल थुम्मोलाम् यर्दन यङ्घङ्ङो बप्तिस्मा पोःङ्स़े युहुन्नारो त्य़ेरो, |
| 23275 | MAT 3:14 | कर युहुन्नाऱे अत्तुर खुऩेॽ अक्खे म़ेत्तु, “इङ्गाॽऩे ख़ेऩेॽनु बप्तिस्मा पोःङ्मा क़ेबोःङ्बा, आक्खेलॽरिक् ख़ेऩेॽ इङ्गाॽओ क़ेद्य़ेबाबे?” |
| 23276 | MAT 3:15 | य़ेसुऱे नोगप् पिरु, “आल्लोऱे लागि अक्खेए पोःङ्लरो, अक्खेलॽरिक् निङ्वाॽफुमाङ्ङिल्ल़े क़ेऱेक् निङ्वाॽ चोगुबा पाःन्निन् क़ेत्लरो॥” ह़ेक्क्याङ् युहुन्नाःन् त़ेन्द़ेआङ् खुऩेॽ बप्तिस्मा पिरुरो॥ |
| 23277 | MAT 3:16 | य़ेसुःन् बप्तिस्मा पोःक्ख़ेआङ् च्वाःत्तोलाम् लाःक्कात् लःन्द़ेनुम़ेःन्ने ताङ्साक्प़ेन्हऱेआङ् निङ्वाॽफुमाङ्ङिल्ल़े कुसेसेमाङ्ङिन् पुत्तुःक्के ह़ेक्के खुऩेॽ कुसम्दाङ् य़ेःर पत्छ़ेबा निःसुरो॥ |
| 23278 | MAT 3:17 | ह़ेक्क्याङ् साङ्ग्राम्पेदाङ्लाम् अक्खेलॽरिक् इक्लाधिक् त्य़े, “कन् आमिःम् आस्साःरो, इङ्गाॽ खुऩेॽनु साॽरिक् सःत्ताङ्ङाङ् वाॽआरो॥” |
| 23279 | MAT 4:1 | ह़ेक्क्याङ् सेसेमाङ्ङिल्ल़े य़ेसुःन् माफ़ेन्साम्लाम् कुनिङ्वाॽ साॽस़े एःक्साद़ेन्नो तेॽरुरो॥ |
| 23280 | MAT 4:2 | ख़ेप्मो खुऩेॽ लिबोःङ्(४०) स़ेन्दिक् नु ल़ेन्दिक् थारिक् थेआङ् म़ेजऩेन्नाङ् साॽरिक् कुस़ेत्लाःक्त़ेरो॥ |
| 23281 | MAT 4:3 | ह़ेक्क्याङ् माफ़ेन्साम्मिन् ख़ेप्मो त्य़ेआङ् खुऩेॽ अक्खे म़ेत्तुर कुनिङ्वाॽ साॽरु, “ख़ेऩेॽ निङ्वाॽफुसाःऩे फाॽग्र कन् लुङ्हाॽ खऱेःङ् पोःक्ख़ेॽ फाॽआङ् म़ेत्त़ेॽ॥” |
| 23282 | MAT 4:4 | कर य़ेसुऱे नोगप् पिरु, “ह़ेक्के म़ेजोःक्कान्, थेआङ्भ़ेल्ल़े साम्योसाप्लाओ मोसाऱे अक्खेलॽरिक् साप्तुआङ् पत्, ‘म़ेन्छाम् याप्मिःङ्ग कुजाःल्ल़ेरक् म़ेहिङ्ऩेन्, कर निङ्वाॽफुमाङ्ङिल्ल़े पाःत्तुबा क़ेऱेक् पाःन्निल्ल़े हिङ्॥’” |
| 23283 | MAT 4:5 | ह़ेक्क्याङ् माफ़ेन्साम्मिल्ल़े खुऩेॽ यरुसल़ेम्मो तेॽरुआङ् माङ्हिम्मोबा क़ेऱेक्नुःल्ल़े केःम्बा चम्जम्बा त़ेन्नो य़ेप्सुआङ् म़ेत्तु |
| 23284 | MAT 4:6 | “ख़ेऩेॽ स़ेक्खाए निङ्वाॽफुसाःऩे फाॽग्र पिन्द़े थ्य़ेॽ, थेआङ्भ़ेल्ल़े साम्योसाप्लाओ अक्खेलॽरिक् साप्त़ेआङ् पत्, ‘निङ्वाॽफुमाङ्ङिल्ल़े कुमाङ्लाइङ्बाहाॽ ख़ेऩेॽ क़ेलागि इङ्जाःङ् पिरुसिआङ् ख़ेऩेॽ थाःङ्धाःङ्ङे खुनिॽ हुक्को क़ेम्दाःक्काङ् क़ेलाङ्ङिन् लुङ्ङो म़ेधाम्सिङ्ङिन्लो॥’” |
| 23285 | MAT 4:7 | य़ेसुऱे नोगप् पिरु, “कर साम्योसाप्लाओ याम्मो अक्खेलॽरिक्काङ् साप्त़ेआङ् पत्, ‘दाङ्बा क़ेनिङ्वाॽफुमाङ्ङिल्ल़े कुनिङ्वाॽ म़ेसाॽऱेन्ऩेॽ॥’” |
| 23286 | MAT 4:8 | ह़ेक्क्याङ् माफ़ेन्साम्मिल्ल़े खुऩेॽ साॽरिक् चम्जम्बा कोःक्माओ तेॽरुआङ् इक्सादिङ् खाम्बेःक्मोबा क़ेऱेक् हाङ्जुम्हाॽ ह़ेक्क्याङ् ख़ेप्मोबा पयम्यम्बा नु नुःब्नुःबा पाःन्हाॽ ओसेःन्धाक्तुआङ् |
| 23287 | MAT 4:9 | म़ेत्तु, “ख़ेऩेॽ साम्बोःन् क़ेभन्छिङ्ङाङ् इङ्गाॽ सेवा क़ेम़ेत्ताऩे फाॽग्र कङ्हाॽ क़ेऱेक् पिऩेॽ॥” |
| 23288 | MAT 4:10 | य़ेसुऱे ख़ेन् म़ेत्तु, “सैताने, कप्मोलाम् पेग़ेॽ, थेआङ्भ़ेल्ल़े साम्योसाप्लाओ अक्खेलॽरिक् साप्त़ेआङ् पत्, ‘ख़ेऩेॽ दाङ्बा क़ेनिङ्वाॽफुमाङ्ङिन्लक् सेवा म़ेत्त़ेॽ ह़ेक्क्याङ् खुऩेॽइन्लक् कुसेवा चोग़ेॽओ॥’” |
| 23289 | MAT 4:11 | ह़ेक्क्याङ् माफ़ेन्साम्मिल्ल़े य़ेसुःन् ल़ेरुधआङ्माङ्लाइङ्बाहाॽ म़ेद्य़े ह़ेक्क्याङ् खुऩेॽ कम्ब्राङ् म़ेम़ेत्तु॥ |
| 23290 | MAT 4:12 | आल्ल य़ेसुऱे युहुन्नाःन् पुङ्लाहिम्मो म़ेसाक्तुआङ् याक्क़ेलॽबा ख़ेप्सुआङ् खुऩेॽ गालिल थुम्मो नुःक्ख़े पे॥ |
| 23291 | MAT 4:13 | खुऩेॽ नासरत पाङ्जुम्मिन् ल़ेरुआङ् कपर्नहुम पाङ्जुम्मो वाॽस़े पेरो॥ ख़ेङ्ग गालिल वरक्किल्ल़े कुबेसाङ् नाप्तालि नु जबुलुन थुम्मो ऩेरो॥ |
| 23292 | MAT 4:14 | माङ्निङ्वाॽपाःन् क़ेबाःप्पा यसैयाःल्ल़े अक्खेलॽरिक् पाःत्तुबा पाःन्निन् क़ेऱेबारो– |
| 23293 | MAT 4:15 | “यर्दन यङ्घङ्ङिल्ल़े नाधाःम्बिबा गालिल वरक्किल्ल़े कुबेसाङ्बा नाप्तालि नु जबुलुन क़ेयुङ्बा याप्मिसे, गालिल थुम्मो क़ेवाॽबा थिम्म़ेन्दङ् सुवाङ्से, |
| 23295 | MAT 4:17 | ख़ेन् य़ेम्माङ्धो य़ेसुऱे अक्खे पाःत्तुर इङ्भोःमा हेःक्तु, “लायोलाम् हिन्द़ेम्म़ेॽओ, थेआङ्भ़ेल्ल़े साङ्ग्राम्पेदाङ्बा हाङ्जुम्मिन् निःत्ताङ्ङे त्य़ेआङ् वाॽरो॥” |
| 23296 | MAT 4:18 | थिक् य़ेन् य़ेसुःन् गालिल वरक्किल्ल़े कुयाओ लाङ्घेग़ेर वय़ेल्ल़े पत्रुस म़ेप्मनाबा सिमोऩेन् नु कुन्साॽ आन्द्रियास़ेन् निःसुसि॥ ख़ेङ्हाॽ वरक्को योःङ् ल़ेप्त़ेत्छुर याग़ेत्छि, थेआङ्भ़ेल्ल़े ख़ेङ्हाॽ योःङ् क़ेल़ेप्पा वय़ेत्छिरो॥ |
| 23297 | MAT 4:19 | य़ेसुऱे ख़ेङ्हाॽ म़ेत्तुसि, “इङ्गाॽ आएगाङ् थाऩेत्छ़ेॽओ, खिन्छिॽ ङा क़ेद़ेम्सु क़ेदाःत्छुबा कुइसिःक् इङ्गाॽओ मना क़ेदाःप्पा चोःक्ऩेत्छिङ्लो॥” |
| 23298 | MAT 4:20 | खिमो ख़ेङ्हाॽऱे खुन्छिॽ योःङ्ङिन् ऩेस्स़ेत्छु थ्य़ेस़ेत्छुआङ् खुऩेॽनु पेसि॥ |
| 23299 | MAT 4:21 | ख़ेप्मोलाम् मिसाक् नानाक् पेःल्ल़े य़ेसुऱे जब्दियाऱे कुस्साः याकुब नु ख़ेल्ल़े कुन्साॽ युहुन्नाःन् निःसुसि॥ ख़ेङ्हाॽ खुन्छिॽ पाःन्नु खःङ्बेओ योःङ् ल़ेम्द़ेत्छुर याग़ेत्छि॥ य़ेसुऱे ख़ेङ्हाॽ उःत्तुसिनुम़ेःन्ने |
| 23300 | MAT 4:22 | खःङ्बेन् नु खुन्छिॽ पाःन् ल़ेऱेत्छु थ्य़ेस़ेत्छुआङ् य़ेसुःन्नु पेसिरो॥ |
| 23301 | MAT 4:23 | य़ेसुऱे यहुदि चुम्लुङ्हिम्हाॽओ निसाम् हुॽरुसिर निङ्वाॽफुहाङ्जुम्मिल्ल़े कुयाःम्बेओ सुनाइङ् स़ेःसु, ह़ेक्क्याङ् क़ेऱेक् परिक्ल़ेन् तुक्मा यॽमालाम् क़ेदुक्पाहाॽ वेःन्दुसिर गालिल थुम्मो खाराक् ताक्कन्द़ेरो॥ |
| 23302 | MAT 4:24 | य़ेसुऱे कुयाःम्बेओ इङ्घङ्ङिन् सिरिया लाजेॽ खाराक् स़ेःऱे, ह़ेक्क्याङ् यरिक् परिक्ल़ेन् तुक्माल्ल़े तरुसिबा मनाहाॽ, क़ेदुक्पाहाॽ, फ़ेन्साम्मिल्ल़े याङ्घुसिबाहाॽ, ह़ेक्क्याङ् थप्मा क़ेमःबाहाॽ नु क़ेदुक्पा क़ेयॽबाहाॽ खुऩेॽओ म़ेदारुसिआङ् ख़ेङ्हाॽ क़ेऱेक् नुसुसिरो॥ |
| 23303 | MAT 4:25 | ह़ेक्क्याङ् गालिल थुम्, थिबोःङ् पाङ्जुम्मिल्ल़ेन्थुम्, यरुसल़ेम, यहुदिया नु यर्दन यङ्घङ् नाधाःम्बिबा थुम्मोलाम् क़ेदाःबा यरिक् मनाहाॽऱे खुऩेॽ म़ेदिम्दुरो॥ |
| 23304 | MAT 5:1 | आल्ल य़ेसुऱे यरिक् मनाहाॽ निःसुसिआङ् कोःक्माओ थाःङ् पेआङ् युङ्सिङ्, ह़ेक्क्याङ् कुहुॽसाम्बाहाॽआङ् ख़ेत्थो म़ेबेआङ् कुघिरि म़ेयुङ्सिङ्॥ |
| 23305 | MAT 5:2 | ह़ेक्क्याङ् खुऩेॽ अक्खेलॽरिक् ख़ेङ्हाॽ हुॽमा हेःक्तुसि– |
| 23306 | MAT 5:3 | “क़ेऱेक् पाःन्नो निङ्वाॽफुमाङ्ङिन् चाहाबा क़ेजोःक्पाहाॽ मुॽइसाबासिरो, थेआङ्भ़ेल्ल़े साङ्ग्राम्पेदाङ्बा हाङ्जुम्मिन् ख़ेङ्हाॽऱेन्नेरो॥ |
| 23307 | MAT 5:4 | मेरिङ् क़ेधक्पाहाॽ मुॽइसाबासिरो, थेआङ्भ़ेल्ल़े ख़ेङ्हाॽऱे हाङ्हाङ् म़ेत्छिङ्मान् म़ेघोःसुॽरो॥ |
| 23308 | MAT 5:5 | चुङ्जिग़ेन् नःम्नःम्बा मनाहाॽ मुॽइसाबासिरो, थेआङ्भ़ेल्ल़े इक्सादिङ् खाम्बेःक्मान् ख़ेङ्हाॽऱेन्नेरो॥ |
| 23309 | MAT 5:6 | ह़ेक्क्याङ् साम्योनिबा याःम्बक् चोःक्माओ स्याङ्म़ेन्दाङ् क़ेबप्पाहाॽ मुॽइसाबासिरो, थेआङ्भ़ेल्ल़े निङ्वाॽफुमाङ्ङिल्ल़े कुनिङ्वाॽ ह़ेक्के चोःक्मा ख़ेङ्हाॽ फाॽरुसिॽरो॥ |
| 23310 | MAT 5:7 | वेॽ मनाहाॽ लुङ्माॽ क़ेदुक्पाहाॽ मुॽइसाबासिरो, थेआङ्भ़ेल्ल़े ख़ेङ्हाॽ लुङ्माॽ म़ेदुक्तुसिॽरो॥ |
| 23311 | MAT 5:8 | सिक्लुङ्मो सेसे क़ेवाॽबाहाॽ मुॽइसाबासिरो, थेआङ्भ़ेल्ल़े ख़ेङ्हाॽऱे निङ्वाॽफुमाङ्ङिन् म़ेनिःसुॽरो॥ |
| 23312 | MAT 5:9 | नादङ् क़ेजोःक्पाहाॽ मुॽइसाबासिरो, थेआङ्भ़ेल्ल़े ख़ेङ्हाॽग निङ्वाॽफुसाः म़ेबोःङ्लो॥ |
| 23313 | MAT 5:10 | साम्योनिबा याःम्बक् म़ेजोगुल्ल़े मनाहाॽऱे तुक्खे म़ेजाःत्तुसिबाहाॽ मुॽइसाबासिरो, थेआङ्भ़ेल्ल़े साङ्ग्राम्पेदाङ्बा हाङ्जुम्मिङ्ग ख़ेङ्हाॽऱेन्नेरो॥ |
| 23314 | MAT 5:11 | इङ्गाॽ चोगुङ्ङिल्ल़े मनाहाॽऱे खिनिॽ किनाःन्दि क़ेम्बिरिॽ, तुक्खे क़ेम्जाःत्तिआङ् खिनिॽ तक्ल़ेङ्वाओ फोत्याबा फ़ेन् पाःन्हाॽ म़ेबाःत्तुल्ल़े मुॽइसाबा क़ेबोःक्खिरो॥ |
| 23315 | MAT 5:12 | ख़ेन् य़ेम्मो पसःत् सःत्त़ेम्म़ेॽओ, थेआङ्भ़ेल्ल़े साङ्ग्राम्पेदाङ्ङो खिनिॽ थुम्घोःन् यम्बा चोःक्लो॥ उन्छेःन्स्मा माङ्निङ्वाॽपाःन् क़ेबाःप्पाहाॽआङ् मनाहाॽऱे बा ह़ेक्केए म़ेम़ेत्तुसिरो॥ |
| 23316 | MAT 5:13 | खिनिॽग इक्सादिङ् खाम्बेःक्माओबा युम्निङ्लो, कर युम्मिल्ल़े कुलिम्म़ेन् माःबेःक्ऩे फाॽग्र याम्मो क़ेलिम्बा चोःक्मा सुक्म़ेद़ेत्ऩेन्लो॥ ख़ेल्ल़े कुयाःम्बक् थेआङ् होःप्लो, कर ख़ेङ्ग लाप्फुमा पोःङ्ङाङ् मनाहाॽऱे म़ेदोॽरुरो॥ |
| 23317 | MAT 5:14 | खिनिॽग इक्सादिङ् खाम्बेःक्मोबा ओःत्तिनिङ्लो॥ कोःक्माओबा य़ेक्यक्किन् थेःल्ल़ेआङ् इःप्मा म़ेसुक्तुन्॥ |
| 23318 | MAT 5:15 | आत्तिल्ल़ेआङ् सेमिःन् हाःन्दुआङ् नइमाल्ल़े म़ेसुःप्तुन्, कर हिम् सिगाङ्बा क़ेऱेक् मनाहाॽ खानिःमा म़ेसुक्ल फाॽआङ् थो सेमि युङ्द़ेन्नो युक्खुॽरो॥ |
| 23319 | MAT 5:16 | ह़ेक्केलॽरिक् सेमिःन् ओःप्पा ह़ेक्केए खिनिॽ क़ेजोगुम्बा सुयाःम्बक्हाॽ मनाहाॽ ओसेःन्धाक्त़ेम्सिम्म़ेॽओ, ह़ेक्क्याङ् साङ्ग्राम्पेदाङ्बा खिनिॽ निङ्वाॽफुपाःल्ल़े कुनारा म़ेभोःसुॽरो॥ |
| 23320 | MAT 5:17 | इङ्गाॽ निङ्वाॽफुमाङ्ङिल्ल़े मोसाःन् पिरुबा साम्योथिम्मिन् नु माङ्निङ्वाॽपाःन् क़ेबाःप्पाहाॽऱे म़ेबाःत्तुबा पाःन्निन् कुसुम् म़ेन्दम्नाबा चोःक्स़े त्याङ्बा फाॽआङ् म़ेइःत्त़ेम्मिन्ऩेॽओ॥ इङ्गाॽग कुसुम्म़ेन्दम्नाबा चोःक्स़े म़ेःन्, कर ख़ेङ्हाॽ कुलिङ्धो क़ेत्छ़ेऩे त्याङ्बारो॥ |
| 23321 | MAT 5:18 | स़ेक्खाए इङ्गाॽ म़ेत्निङ्, इक्सादिङ् खाम्बेःक्मान् नु ताङ्साक्प़ेन्माःमा पेःक्मानुःल्ल़े तगि साम्योथिम्मो क़ेबप्पा क़ेऱेक् पाःन्निन् म़ेङ्ग़ेत्ते थारिक् ख़ेप्मोबा क़ेऱेक्नुःल्ल़े चुक्सा पाःन्धिक्काङ् म़ेमाःऩेन्लो॥ |
| 23322 | MAT 5:19 | हाःत्ल़े कन् इङ्जाःङ्हाॽओबा चुक्सा पाःन्धिक् फेःन्दुआङ् वेहाॽ बा ह़ेक्के चोःक्मा हुॽरुसिॽ साङ्ग्राम्पेदाङ्बा हाङ्जुम्मो ख़ेन् चुक्सा पोःङ्लो, कर हाःत्ल़े कन् इङ्जाःङ्हाॽ इःत्तु-नाःत्तुआङ् वेॽहाॽ ह़ेक्के चोःक्मा हुॽरुसिॽ साङ्ग्राम्पेदाङ्बा हाङ्जुम्मो ख़ेन् पयम् यम्बा पोःङ्लो॥ |
| 23323 | MAT 5:20 | कर ख़ेप्स़ेम्म़ेॽओ, फरिसिहाॽ ह़ेक्क्याङ्साम्योथिम्साम्बाहाॽनुःल्ल़ेआङ् निङ्वाॽफुमाङ्ङिल्ल़े कुइङ्जाःङ्हाॽ खिनिॽ नुःरिक्काङ् क़ेन्इःत्तुम्मिन् क़ेन्नाःत्तुम्मिन्ऩे फाॽग्र स़ेक्खासाङ् खिनिॽ साङ्ग्राम्पेदाङ्बा हाङ्जुम्मो क़ेन्लासिन्लो॥” |
| 23324 | MAT 5:21 | आल्ल, “उन्छेःन् मोसाऱे कुसाम्यो इङ्जाःङ्ङिल्ल़े अक्खे पाःत्तुबान् खिनिॽ क़ेघ़ेप्सुम्माङ् क़ेवयिॽ, ‘मना म़ेस़ेऱेन्ऩेॽओ, थेआङ्भ़ेल्ल़े मना क़ेस़ेप्पाल्ल़े खुम्दिङ् खोःसुॽरो,’ |
| 23325 | MAT 5:22 | कर इङ्गाॽ म़ेत्निङ्, हाःत् कुन्साॽइन्नु कुयाःक् ल़ेॽ, ख़ेल्ल़े खुम्दिङ् खोःसुॽरो॥ याम्मो हाःत्ल़े कुन्साॽइन् ‘अदङ्’ म़ेत्तुॽ, ख़ेङ्ग क़ेऱेक्नुःल्ल़े यम्बा यहुदि खास़ेन्लोःम्बाहाॽऱे खुनिॽ तगि म़ेय़ेप्सुॽ, कर हाःत्ल़े कुन्साॽइन् साक्मुरा म़ेत्तुॽ, ख़ेङ्ग ख़ेमायङ्सङ्ङोबा मिओ पेःक्मा सुक्लो॥ |