23214	MAT 1:1	य़ेसु ख्रिस्‍त़ेन्‌ अब्राहामऱे कुस्‍साः ह़ेक्‍क्‍याङ् दाउद हाङ्‌ङिल्‍ल़े कुस्‍साः वय़ेरो॥ कङ्‌ग खुऩेॽ कुधाःक्‍हाॽऱे खुनिॽ मिङ्‌स्रारो–
23215	MAT 1:2	अब्राहामऱे कुस्‍साः इसहाक वय़े, इसहाकऱे कुस्‍साः याकुब वय़े, याकुबऱे कुस्‍साःहाॽ यहुदा ह़ेक्‍क्‍याङ् खुऩेॽ कुम्‍भुॽ कुन्‍साॽसि म़ेवय़ेरो॥
23216	MAT 1:3	ह़ेक्‍क्‍याङ् यहुदाःल्‍ल़े कुस्‍साःहाॽ पेरेज नु जिराह वय़ेत्‍छि (ख़ेङ्‌हाॽऱे खुन्‍छिॽ माःल्‍ल़े कुमिङ् तामार वय़े), फाऱेसऱे कुस्‍साः ह़ेस्रोन वय़े, ह़ेस्रोनऱे कुस्‍साः आराम वय़ेरो॥
23217	MAT 1:4	ह़ेक्‍क्‍याङ् आरामऱे कुस्‍साः अम्‍मिनादाब वय़े, अम्‍मिनादाबऱे कुस्‍साः नहसोन वय़े, नहसोनऱे कुस्‍साः सल्‍मोन वय़ेरो॥
23218	MAT 1:5	ह़ेक्‍क्‍याङ् सल्‍मोनऱे कुस्‍साः बोअज वय़े (बोअजऱे कुम्‍माऱे कुमिङ् राहाब वय़े), बोअजऱे कुस्‍साः ओबेद वय़े (ख़ेल्‍ल़े कुम्‍माऱे कुमिङ् रुथ वय़े), ओबेदऱे कुस्‍साः यिसै वय़े॥
23219	MAT 1:6	ह़ेक्‍क्‍याङ् यिसैऱे कुस्‍साः दाउद हाङ्‌ङिन्‌वय़े॥ दाउद हाङ्‌ङिल्‍ल़े कुस्‍साः सोलोमन वय़े (सोलोमनऱे कुम्‍मा बेत्सेबाःन् उरियाहऱे कुमेःत् वय़ेरो॥)
23220	MAT 1:7	ह़ेक्‍क्‍याङ् सोलोमनऱे कुस्‍साः रहोबाम वय़े, रहोबामऱे कुस्‍साः अबिया वय़े, अबियाऱे कुस्‍साः आसा वय़ेरो॥
23221	MAT 1:8	ह़ेक्‍क्‍याङ् आसाऱे कुस्‍साः यहोसापात वय़े, यहोसापातऱे कुस्‍साः यहोराम वय़े, यहोरामऱे कुस्‍साः उज्‍जियाह वय़ेरो॥
23222	MAT 1:9	ह़ेक्‍क्‍याङ् उज्‍जियाहऱे कुस्‍साः योताम वय़े, योतामऱे कुस्‍साः आहाज वय़े, आहाजऱे कुस्‍साः हिजकिया वय़ेरो॥
23223	MAT 1:10	ह़ेक्‍क्‍याङ् हिजकियाऱे कुस्‍साः मनस्‍से वय़े, मनस्‍सेऱे कुस्‍साः अम्‍मोन वय़े, अम्‍मोनऱे कुस्‍साः योसियाह वय़ेरो॥
23224	MAT 1:11	ह़ेक्‍क्‍याङ् योसियाहऱे कुस्‍साःहाॽ यकोनियास नु कुन्‍साॽसि म़ेवय़ेरो (ख़ेङ्‌हाॽग इस्राइलिहाॽ ब़ेबिलोन लाजेॽओ म़ेद़ेम्‍सु म़ेदेॽरुसिआङ् म़ेगत्तुसिबा य़ेम्‍मो साम़ेवाःन्‍छिङ्‌ङाङ्‌म़ेवय़ेरो)॥
23225	MAT 1:12	ब़ेबिलोःन्‍नो म़ेदेॽरुसिआङ् याङ्‌सि यकोनियासऱे कुस्‍साः सालतिएल वय़े, ह़ेक्‍क्‍याङ् सालतिएलऱे कुस्‍साः यरुबाबेल वय़ेरो॥
23226	MAT 1:13	ह़ेक्‍क्‍याङ् यरुबाब़ेलऱे कुस्‍साः अबिउद वय़े, अबिउदऱे कुस्‍साः एलियाकिम वय़े, एलियाकिमऱे कुस्‍साः आजोर वय़ेरो॥
23227	MAT 1:14	ह़ेक्‍क्‍याङ् आजोरऱे कुस्‍साः सादोक वय़े, सादोकऱे कुस्‍साः आखिम वय़े, आखिमऱे कुस्‍साः एलिउद वय़ेरो॥
23228	MAT 1:15	ह़ेक्‍क्‍याङ् एलिउदऱे कुस्‍साः एलाजार वय़े, एलाजारऱे कुस्‍साः मत्तान वय़े, मत्तानऱे कुस्‍साः याकुब वय़ेरो॥
23229	MAT 1:16	ह़ेक्‍क्‍याङ् याकुबऱे कुस्‍साः युसुफ वय़े॥ युसुफ़ेन् मरियमऱे कुय़ेम्‍बाॽ वय़े, ह़ेक्‍क्‍याङ् हाबा कन् मरियम्‍मिन्‍लाम् निङ्‌वाॽफुमाङ्‌ङिल्‍ल़े सेःन्‍दुबा ख्रिस्‍त म़ेप्‍मनाबा य़ेसुःन् सावाःन्‍छिङ्‌लो॥
23230	MAT 1:17	अक्‍खेलॽरिक् अब्राहामलाम् दाउद हाङ् थारिक् थिक्-लि (१४) थाःक् म़ेवय़े, ह़ेक्‍क्‍याङ् दाउद हाङ्‌लाम् ब़ेबिलोन लाजेॽओ म़ेद़ेम्‍सु म़ेदेॽरुसिआङ् म़ेगत्तुसिबा य़ेम् थारिक् थिक्-लि (१४) थाःक् म़ेवय़े, ह़ेक्‍क्‍याङ् ब़ेबिलोःन्‍नो पुङ्‌लाधाबा म़ेजोगुसिआङ् म़ेदेॽरुसिबा य़ेम्‍माङ्‌धो निङ्‌वाॽफुमाङ्‌ङिल्‍ल़े सेःन्‍दुबा ख्रिस्‍त़ेन्‌सावाःन्‍छिङ्‌बा य़ेम् थारिक् थिक्-लि (१४) थाःक् म़ेवय़ेरो॥
23233	MAT 1:20	कर ह़ेक्‍के इःत्तुर वय़ेल्‍ल़े स़ेप्‍माङ्‌मो यहवे दाङ्‌बाल्‍ल़े कुमाङ्‌लाइङ्‌बान् ओसेःन्‍धाक्‍सिङ्‌ङाङ्‌अक्‍खे म़ेत्तुरो, “दाउदऱे कुमुॽइदाङ्‌सा युसुप्‍फे, ख़ेऩेॽ मरियम्‍मिन् मेःक्‍खिम् चोःक्‍माआङ् हिम्‍मो ताःप्‍मा म़ेगिस़ेन्‍ऩेॽओ, थेआङ्‌भ़ेल्‍ल़े खुऩेॽओबा अङ़ेःक्‌वाःन् सेसेमाङ्‌ङिल्‍ल़े कुमुक्‍साम्‍लाम्‍बा हाङ्‌सिङ्‌बारो॥
23234	MAT 1:21	खुऩेॽ य़ेम्‍बित्‍छाॽसाःधिक् कत्तुॽ, ह़ेक्‍क्‍याङ् ख़ेल्‍ल़े कुमिङ्‌ङिन् य़ेसु वाःत्त़ेॽओ, थेआङ्‌भ़ेल्‍ल़े ख़ेल्‍ल़े कुमनाहाॽ खुनिॽ लायोलाम् ताङ्‌स़ेःप्‍तुसिॽरो॥”
23235	MAT 1:22	माङ्‌निङ्‌वाॽपाःन् क़ेबाःप्‍पालाम् यहवे दाङ्‌बाल्‍ल़े उन्‍छेःन् अक्‍खेलॽरिक् पाःत्तुआङ् वय़ेबा पाःन्‍निन् क़ेत्‍ल फाॽआङ् कन् क़ेऱेक् पाःन्‍हाॽ पोःक्‍ख़ेबारो–
23236	MAT 1:23	“सिसादिङ् म़ेन्‍छियाॽइन् म़ेन्‍छुक्‍मा पोःङ्‌ङाङ् य़ेम्‍बित्‍छाॽसाःधिक् कत्तुॽ, ह़ेक्‍क्‍याङ् ख़ेन् इम्‍मानुएल म़ेम़ेत्तुॽरो॥ ‘इम्‍मानुएल’ फाॽइङ्‌ग ‘निङ्‌वाॽफुमाङ्‌ङिन् आनिॽनु वाॽ’ पोःङ्‌लो॥”
23237	MAT 1:24	आल्‍ल युसुफ़ेन् स़ेप्‍माङ्‌मोलाम् सोऱेआङ् यहवे दाङ्‌बाल्‍ल़े कुमाङ्‌लाइङ्‌बाल्‍ल़े म़ेत्तुबा कुइसिःक्‍के मरियम्‍मिन् मेःक्‍खिम् म़ेत्तु, ह़ेक्‍क्‍याङ् कुहिम्‍मो तारुरो॥
23239	MAT 2:1	आल्‍ल य़ेसुःन् यहुदिया थुम्‍मोबा ब़ेथलेह़ेम पाङ्‌जुम्‍मो सावाःन्‍छिङ्‌बा य़ेम्‍मो ह़ेरोद हाङ्‌ङिल्‍ल़े ख़ेप्‍मो हाङ् चोगुर वय़ेरो॥ य़ेसुःन् सावाःन्‍छिङ्‌ङाङ् नाम्‍ग़ेन् पिसाङ्‌बा लाजेॽलाम् सिक्‍कुम्‍निबा खाग़ेइक्‍पाहाॽ यरुसल़ेम्‍मो म़ेद्‌य़े, ह़ेक्‍क्‍याङ्
23240	MAT 2:2	अक्‍खेलॽरिक् पाःन् सेःन्‍म़ेदोसु, “यहुदिहाॽऱे खुनिॽ हाङ् क़ेबोःङ्‌बाआङ् साग़ेवाःन्‍छिङ्‌बान् आत्तो वाॽबे? आनिग़े नाम्‍ग़ेन् पिसाङ् कुसावाःन्‍छिङ्‌माल्‍ल़ेन् मिक्‍सेःन् क़ेबिबा खेःम्‍सिक्‍किन् निःसुम्‍ब़ेआङ् खुऩेॽ कुसेवा चोःक्‍स़े त्‍य़ेॽइग़ेबारो॥”
23241	MAT 2:3	ह़ेरोद हाङ्‌ङिल्‍ल़े कन् पाःन्‍निन् ख़ेप्‍सुआङ् कुनिङ्‌वाॽबाल्‍ल़े साॽरिक् य़ेःक्‍खु, ह़ेक्‍केलॽरिक्‍के खुऩेॽनुए यरुसल़ेम्‍मोबा क़ेऱेक् मनाहाॽआङ् खुनिॽ निङ्‌वाॽबाल्‍ल़े साॽरिक् य़ेःक्‍खुसिरो॥
23242	MAT 2:4	ह़ेरोद हाङ्‌ङिल्‍ल़े क़ेऱेक् तुम्निङ्‌वाॽफुसाम्‍बाहाॽ नु साम्‌योथिम्‍साम्‍बाहाॽ उःत्तुसिआङ् कन् निङ्‌वाॽफुमाङ्‌ङिल्‍ल़े सेःन्‍दुबा ख्रिस्‍त म़ेप्‍मनाबान् आत्तो सावाःन्‍छिङ्‌मा क़ेबोःङ्‌बा वाॽबे लॽरिक् सेःन्‍दोसुसि॥
23243	MAT 2:5	ख़ेङ्‌हाॽऱे नोगप् म़ेबिरु, “यहुदिया थुम्‍मोबा ब़ेथलेह़ेम्‍मो खुऩेॽ सावाःन्‍छिङ्‌मा क़ेबोःङ्‌बा वाॽरो॥ थेआङ्‌भ़ेल्‍ल़े माङ्‌निङ्‌वाॽपाःन् क़ेबाःप्‍पाल्‍ल़े अक्‍खेलॽरिक् साप्‍तुआङ् पत्–
23244	MAT 2:6	‘यहुदिया थुम्‍मोबा ब़ेथलेह़ेम्‍मे, ख़ेऩेॽग यहुदियाबा पाङ्‌जुम्‍हाॽओ साॽरिक् क़ेय़ेक्‍पा क़ेजोःक्‍लो, थेआङ्‌भ़ेल्‍ल़े ख़ेऩेॽ क़ेबाङ्‌जुम्‍लाम् हाङ्‌युक्‍पाधिक् ताःरो, खुऩेॽग म़ेल्‍लुक्‍कम्‍बा कुइसिःक् पोःङ्‌ङाङ् आमना इस्राइलिहाॽ कम्‍ब्राङ् क़ेम़ेप्‍पा पोःङ्‌लो॥’”
23245	MAT 2:7	ह़ेरोद हाङ्‌ङिल्‍ल़े ख़ेन् सिक्‍कुम्‍निबा खाग़ेइक्‍पाहाॽ स्‍वाःत्ताङ् उःत्तुसि ह़ेक्‍क्‍याङ् ख़ेङ्‌हाॽलाम् खेःम्‍सिक्‍पान् थाःम्‍सिङ्‌बा कुज़ेक् य़ेम्‍मिन् निङ्‌वाॽ खोःसु॥
23246	MAT 2:8	ह़ेक्‍क्‍याङ् ख़ेङ्‌हाॽ अक्‍खे म़ेत्तुसिर ब़ेथलेह़ेम्‍मो पाङ्‌घुदेःसुसि, “पेग़ेम्‍म़ेॽआङ् अङ़ेःक्‌वाःन् कोःत्त़ेम्‍म़ेॽ॥ ख़ेन् अङ़ेःक्‌वाःन् क़ेघोःसुम्‍ऩे फाॽग्र फ़ेऱेम्‍म़ेॽआङ् इङ्‌गाॽ आम़ेत्त़ेम्‍म़ेॽओ॥ इङ्‌गाॽआङ् खुऩेॽ सेवा म़ेत्तुङ्‌लो॥”