42	GEN 2:11	Is ngazan te nehuna he wahig ne Pishon. Iyan haazà sikan is wahig he ziyà edtudà te tivuuk he tanà he Havila he zutun duen egkaahà he vulawan.
135	GEN 5:29	Ne migngezanan din ki Noe su ke sikandin te, “Pinaaǥi kayi te vatà malù ebmahagkap is meveǥat he terebahu tew te kebasuk he imbeǥey kenitew tenged te midrewakan dengan te Nengazen is tanà.”
210	GEN 9:4	Piru kenè niw keena is langgam he wazè pa maawà dutun is lengesa zin, he iyan igkeuyag din.
241	GEN 10:6	Is menge anak ni Ham he menge maama: si Cush, Mizraim, Put, wey si Canaan.
249	GEN 10:14	menge Patrusnen, menge Caslunen, wey is menge Caftornen he iyan menge kepuun te menge Filistihanen.
260	GEN 10:25	Dezuwa is menge anak ni Eber. Is sevaha, ne migngezanan ki Peleg, he ke và dà egkeǥiya, “kebpekedsusuwey”, su zutun he timpu nekedsusuwey is menge etew zini te lumpad. Is hazi zin ne migngezanan ki Joktan.
283	GEN 11:16	Hein 34 en is penuiǥen ni Eber ne nevuwad sikandin ki Peleg.
284	GEN 11:17	Ne puun dutun te ked-enaka ki Peleg, 403 pa is keluǥayad te untung ni Eber, ne zuen duma pa he menge anak din he maama wey vahi.
285	GEN 11:18	Hein 30 en is penuiǥen ni Peleg ne nevuwad sikandin ki Reu.
286	GEN 11:19	Ne puun dutun te ked-enaka ki Reu, 209 pa he tuig is keluǥayad te untung ni Peleg, ne zuen duma pa he menge anak din he maama wey vahi.
298	GEN 11:31	Ne midumahan ni Tera is anak din he si Abram, is ambey zin he si Sarai, wey is apù din he si Lot he anak ni Haran, ne mid-awè dan diyà te Ur he sakup te inged te menge Kildiyanhen su edhendiyè dan pezem te Canaan. Piru hein nekeuma zan diyà te inged he Haran, diyè dan dà med-ubpà.
316	GEN 12:17	Piru tenged ki Sarai, he esawa ni Abram, duen utew gerabi wey egkein-inuwan he zaru he imbeǥey te Nengazen diyà te hadì te Ehipto wey te langun he menge etew ziyà te turuǥan din.
326	GEN 13:7	Ne tenged dutun, mibpetebtebekè en is menge bekidu ni Abram wey is menge bekidu ni Lot. (Ne kenà duen dà taman su zuen daan menge tribu he Canaanhen wey menge Pirisihanen he zaan he menge meǥinged dutun.)
328	GEN 13:9	Meupiya pa ke ebpesuwayè ki, su mezakel pa is lugar he egkehelinan, ne pilì ka, ke hendei is egkesuatan nu, emun iyan ebpilien nu is dapit te egkeǥivang ne ziyà a edhalin te zapit te egkekewanan. Piru ke iyan ebpilien nu is dapit he egkekewanan, ne ziyà a te zapit te egkeǥivang.”
333	GEN 13:14	Ne si Abram, hein mid-ewaan en sikandin ni Lot, migkeǥiyan sikandin te Nengazen te, “Pememantew ka puun diyan te edhitindeǥan nu ne ahaa nu is tanà he ziyà te zapit te edsilaan, wey ziyà te zapit te edsenlepan.
343	GEN 14:6	wey is menge Hurhanen diyà te menge vuvungan he Seir taman te inged he El Paran he ziyà te uvey te tanà he sibsivayan.
375	GEN 15:14	Piru haazà is nasyun he ed-uripen kandan, edsilutan ku ne zutun ebpekaawè dan, ne utew mezakel is menge azen dan.
379	GEN 15:18	Ne zutun he andew, midtukud is Nengazen te kebpekid-uyun din ki Abram. Ke sikandin te, “Ibeǥey ku te menge kevuwazan nu heini he tanà. Puun diyà te wahig te Ehipto pehendiyà te zekelà he Wahig he Eufrates.
381	GEN 15:20	menge Hitihanen, menge Pirisihanen, menge Ripanhen,
410	GEN 17:12	Puun guntaan taman te peleebuten he lapis te kevuwazan, kinahanglan he sirkunsidara niw is menge vatà he menge maama zutun te ikewalu he andew puun te ked-enaka kandin. Sirkunsidara niw zaan is menge uripen niw he maama he neetew ziyà te valey niw ragkes is nengepemasa niw he ziyà ebpuun te zuma he menge inged. Heeyan he tuus te lawa niw, iyan tistiǥus he tutuu is kebpekid-uyun ku keniyu, ne kenà heini egkahanew taman te taman.
419	GEN 17:21	Piru haazà is kebpekid-uyun ku kenikew, ibpelaus ku zaan diyà te anak nu he si Isaac he id-anak ni Sara seled te senge tuig pa ǥuntaan.”
443	GEN 18:18	Su kepuun si Abraham te utew zekelà wey mekeǥeǥehem he nasyun wey is kevuwazan din te peleebuten. Pinaaǥi kandin edtuvazan ku is langun he menge nasyun dini te kelibutan.
444	GEN 18:19	Mibpilì ku si Abraham su wey zin ikepenurù diyà te menge anak din wey menge kevuwazan din he med-ikul zan te ibayè ku te Nengazen pinaaǥi te ked-ul-ulaha zan te metazeng wey hustu. Pinaaǥi kayi, egketuman is menge pesarig ku kandin.”
449	GEN 18:24	Penenglitan ke zuen 50 he menge metazeng he etew ziyà te inged, tutuu ve he edlimasen nu? Ne kenè nu egkehizuwan haazà is menge meǥinged minsan pa te zuen 50 he menge metazeng dutun?
452	GEN 18:27	Ne mid-uman dutun si Abraham megkaǥi te, “Peseyluwa a, su ǥeina te mibpekevurut a he egkaǥi ziyan te kenikew te Nengazen, ibpelaus ku pa is egkeǥiyen ku, minsan pa te kayi te etuvangan nu iring a te eliyavuk dà wey igmuk su utew minus is pid-etawan ku.
453	GEN 18:28	Penenglitan, ke wazà 50 he menge metazeng dutun te inged su 45, edlimasen nu zed be haazà is inged su egkurang te lelima he menge metazeng?” Ne midtavak is Nengazen te, “Emun duen egkeehè ku he 45, ne kenè ku en edlimasen.”
455	GEN 18:30	Ne migkaǥi en maan si Abraham te, “Pekelalaglalag ka, Nengazen, ne kenà a kenikew mepeuki su ebpenginginsè e pa. Penenglitan ke zuen egkeehè nu he 30 he menge metazeng?” Ne midtavak is Nengazen te, “Emun duen egkeehè ku he 30 ne kenè ku zaan edlimasen.”
457	GEN 18:32	Ne migkaǥi pa maan si Abraham te, “Nengazen, Kenà a kenikew mepeuki, ketepusan en heini he id-insè ku. Penenglitan ke zuen 10 he menge metazeng he egkeehè nu zutun?” Ne midtavak is Nengazen te, “Ke zuen egkeehè ku ziyà he minsan 10 dà he menge metazeng, ne kenè kud edlimasen.”
460	GEN 19:2	“Edhengyuan ku sikiyu, menge zatù, tuluy kew pa ziyà te valey ku te suluǥuen niw. Penlùlui niw is menge paa niw wey hulavung kew pa. Keeselem kew en laus te hipenawan niw.” Ne midtavak sikandan te, “Maambe en su zini key zà edhulavung te pelasa.”
461	GEN 19:3	Piru midteǥel sikandan ni Lot, umbe miduma zan diyà te valey zin. Ne mid-andam si Lot te menge inumen wey egkeenen dan, ne mibpevaal zaan sikandin te supas he wazè din tapey, ne midlavung sikandan.
467	GEN 19:9	Piru nasì dan medtavak te, “Lumelengyawè ke zà dini, hentei ka is uvag en ebpelavetlavet kenami. Awè ka keniyan! Kela ke tuwas pa he mezaat is ed-ul-ulahan dey kenikew kenà kandan.” Ne zutun insinumag dan si Lot, ne ed-uvey zan en pezem duen te ǥemawan su egkebrahan dan is lekeb kayi.
468	GEN 19:10	Piru haazà is dezuwa he maama he ziyà te seled, mibpuwasan dan is gemawan ne midsengguyud dan si Lot ne inseled dan dutun te valey ne midlelekeb dan.
472	GEN 19:14	Ne zutun mibeyaan ni Lot is menge maama he nekekaǥun te menge anak din, ke sikandin te, “Kuwa kew en su ebpelaǥuy kiw kayi su edlimasen en te Nengazen heini is inged tew.” Piru wazè dan mebpemineg su kunaan dan ke suyat dà haazà ni Lot.
475	GEN 19:17	Ne hein diyè dan en te ǥawas, migkaǥi is sevaha he velinsuǥuen diyà te ki Lot te, “Pelaǥuy kew en! Kenè kew lilingey wey kenè kew teren kayi te menge suǥud. Diyè kew petandang te menge vuvungan para kenè kew meragkes mepatey.”
476	GEN 19:18	Piru midtavak si Lot te, “Egalen ku, kenè ad kenikew epepelaǥuy diyà te vuntud.
483	GEN 19:25	Pinaaǥi zutun midlimas te Nengazen haazà is dezuwa he inged wey sikan is tivuuk he suǥud. Neǥerà is langun he menge meǥinged dutun wey nezeetan is langun he edtuvù dutun.
484	GEN 19:26	Piru midlilingey sikan is esawa ni Lot su ed-ahaan din is neewaan dan, ne mibaluy sikandin he timus he iring te tukud.
500	GEN 20:4	Piru wazè pa uvayi ni Abimelec si Sara, ne tenged dutun migkaǥi sikandin te, “Nengazen, maan is edhimetayan nu is menge etew ku? Wazà a mekesalà?
503	GEN 20:7	Kinahanglan he ilikù nu sikandin diyà te ki Abraham, su ebpeneuven sikandin, ne id-ampù ke zin su wey ka kenà mebpatey. Piru emun kenè nu id-ulì, ebpetizeenan ku sikew he kenè en ebperis ne ebpatey ke en iyan ragkes is langun he menge sakup nu.”
509	GEN 20:13	Hein migkeǥiyan a te Nengazen he med-awà a ziyà te inged te amey ku, migkeǥiyan ku si Sara he ipekilala zin he telesuled key minsan hendei key mekepevayà. Pinaaǥi kayi igkepeehè din is dekelà he gaǥew zin kedì.”
521	GEN 21:7	Hentei vuwa is ebpekekaǥi ki Abraham he ebpekepesusu e pa te vatà? Piru nekaanak e pa minsan meǥurang en sikandin.”
526	GEN 21:12	Piru migkaǥi is Megbevayà diyà te ki Abraham te, “Kenè nu ikeseeng si Ishmael wey si Hagar. Tumana nu is egkeǥiyen ni Sara, su pinaaǥi ki Isaac is ebpuunan te menge kevuwazan nu he insaad ku.
527	GEN 21:13	Piru edhimuwen ku zaan he utew zekelà he nasyun is menge kevuwazan ni Ishmael, su anak nu man daan sikandin.”
531	GEN 21:17	Piru nezineg te Megbevayà is ked-erang te vatà. Umbe migkaǥi is belinsuǥuen te Megbevayà diyà te langit te, “Hagar, hengkey is idsineǥew nu? Kenè ka mahandek! Nezineg te Megbevayà is ked-erang keniyan te anak nu.
534	GEN 21:20	Ne midtuvazan te Megbevayà haazà is batà ne midekelà, ne ziyà med-ubpà te sibsivayan te Paran. Nehimu sikandin he mememanà. Ne zutun impeesawa sikandin te iney zin te vahi he Ehiptohanen.
539	GEN 21:25	Piru zuen riklamu ni Abraham diyà te ki Abimelec mehitenged te kalut he mid-aǥew te menge sakup din.
570	GEN 22:22	si Kesed, si Hazo, si Pildash, si Jidlaf, wey si Betuel.
585	GEN 23:13	ne migkaǥi sikandin diyà te ki Efron he nezineg te langun te, “Pemineǥa a. Egkesuatan ku he ebeyazan ku haazà is bevesukà. Dewata nu en is ibayad ku, su wey zutun ku en ikeleveng is esawa ku.”
597	GEN 24:5	Piru mid-insaan dutun si Abraham te suluǥuen din te, “Na, hengkey ve is ed-ul-ulahan ku emun kenà egkesuat is bahi he eduma kediey ke ed-ulì a zini? Egkesuatan nu ve he edumahan ku ziyà is anak nu?”
600	GEN 24:8	Piru emun kenà eduma haazà is bahi kenikew, wazè nu en televaken te heini he penangdù nu kediey. Piru kenè nu ziyà dumaha is anak ku.”
606	GEN 24:14	Emun ebuyù a te wahig duen te umuy te raǥa, ne emun ebpemineg sikandin he ibpeinum a ragkes is menge kemilyu ku, berakat he iyan sikandin kes mibpilì nu he egkehimu he esawa te suluǥuen nu he si Isaac. Pinaaǥi kayi egketuenan ku he impeehè nu is gaǥew nu te egalen ku he si Abraham.”
630	GEN 24:38	Pehendiyè ka te pemilya te amey ku, ne ziyè ka pen-ahà te vahi he kezuzumahi ku he ibpeesawa nu te anak ku.’
631	GEN 24:39	Piru nenginginsà a, ‘Na, hengkey is ed-ul-ulahan ku emun kenà eduma haazà is bahi kedì?’
648	GEN 24:56	Piru migkaǥi haazà is suluǥuen te, “Kenà a keniyu senggena. Midhimu en te Nengazen he metuman is tuyù ku kayi, umbe ipeulì e en keniyu ziyà te egalen ku.”
665	GEN 25:6	Piru te wazè pa mebpatey si Abraham, duen daan impemeǥey zin diyà te menge anak din he maama he anak te zuma he menge esawa zin, ne ziyè din sikandan ipeubpà te tanà he zapit te edsilaan, he meziyù te anak din si Isaac.
679	GEN 25:20	Menge 40 en is penuiǥen ni Isaac dutun te kebpekeesawa zin ki Rebeka he anak ni Betuel he Aramihanen he tig-Padan Aram. Etevey si Rebeka ni Laban he Aramihanen daan.
687	GEN 25:28	Pelanggà ni Isaac si Esau su egkesuat layun sikandin he egkaan te egkengepenganup ni Esau, piru si Jacob ne iyan mulà pinelanggà ni Rebeka.
692	GEN 25:33	Piru midtavak si Jacob te, “Penangdù ka zèpa kedì.” Ne zutun nenangdù si Esau he ibeǥey zin en ki Jacob is ketenged din te kegkekakey.
703	GEN 26:10	Ne migkaǥi si Abimelec te, “Kenà meupiya is mibeelan nu kenami. Penenglitan ke zuen kayi te menge sakup ku midhulid kandin, iyan ka pezem egkevasul te egkehimu he salè dey.”
713	GEN 26:20	Piru mibpekidtebek is menge bekidu he tig-Gerar te menge bekidu ni Isaac su kandan kun haazà he kalut. Umbe migngezanan haazà ni Isaac he kalut te Esek, he ke và dà egkeǥiya, “Tebek,” tenged te mibpekidtebek is menge tig-Gerar kandin.
719	GEN 26:26	Midhendiyà si Hadì Abimelec he ebpuun te Gerar ne miduma zin is sumesambag din he si Ahuzat wey sikan is egalen te menge sundaru zin he si Picol.
721	GEN 26:28	Ne midtavak dan te, “Nesavut dey he is Nengazen eduma kenikew, umbe neisip dey he kinanahanglan he edhimu kiw te kebpekid-uyun duma zutun is penangdù. Penaad ka kenami
735	GEN 27:7	‘Penuǥesi a ne hilutui a te utew ku egkesuati he linutuan. Su ebpenubtuvazan ku sikew kayi te etuvangan te Nengazen te kenè e pa ebpatey.’
766	GEN 27:38	Ne mibpehizuhizu pa utew si Esau te amey zin te, “Amà, wazè en be iyan minsan sevaha zà he igkepenuvadtuvad nu? Penubtuvazi a zaan.” Ne zutun midsineǥew en maan sikandin.
768	GEN 27:40	Pinaaǥi zà te kebpekidtebek egkekuwa nu is igkeuyag nu, ne egkehimu ka he suluǥuen te hazi nu. Piru emun ed-atu ka kandin, ebpekeǥawas ka te kegkeveyveyai zin kenikew.”
770	GEN 27:42	Piru netudtulan si Rebeka te egkeisip ni Esau, umbe mid-umew zin si Jacob ne migkeǥiyan din te, “Is kakey nu he si Esau, iyan ebpekepayùpayù te ǥehinawa zin is egkeisip din he edhimetayan ke zin.
771	GEN 27:43	Umbe, mama, pemineǥa nu is egkeǥiyen ku: Pelaǥuy ka ziyà te Haran, diyà te meemahan ku he si Laban.
776	GEN 28:2	Penines ka, ne pehendiyè ka te Padan Aram, diyà te apù nu he si Betuel he amey te iney nu. Diyè ka pengesawa te sevaha te menge raǥa he anak ni Laban te meemahan te iney nu.
779	GEN 28:5	Ne impehipanew ni Isaac si Jacob pehendiyà Padan Aram, diyà te lugar ni Laban he anak ni Betuel he Aramihanen. Si Laban meemahan ni Rebeka he iney ni Jacob wey ni Esau.
780	GEN 28:6	Netuenan ni Esau he mibpenubtuvazan ni Isaac si Jacob wey impehendiyè din te Padan Aram su wey ziyà sikandin mekepengesawa. Ne nezineg din daan he zutun te kebpenuvadtuvad ni Isaac intelaan din ki Jacob he kenà sikandin mebpengesawa te vahi he tig-Canaan.
781	GEN 28:7	Ne netuenan din daan he mibpemineg si Jacob te suǥù te amey zin wey iney zin su migenat en pehendiyà te Padan Aram.
788	GEN 28:14	Is menge kevuwazan nu egkehimu he iring kezakel te eliyavuk te tanà. Pinaaǥi kenikew wey te menge kevuwazan nu, edtuvazan ku is langun he menge etew kayi te kelibutan.
793	GEN 28:19	Migngezanan haazà ni Jacob he lugar te Betel, he ke và dà egkeǥiya, “Baley te Megbevayà.” Piru is inged dutun dengan migngezanan te Luz.
819	GEN 29:23	Piru hein mezukilem en, iyan miduma ni Laban si Lea ziyà ki Jacob, he si Raquel man pezem. Ne mibpehulizà si Jacob wey si Lea.
831	GEN 29:35	Mibmeǥingey med-uman si Lea ne mid-anak sikandin te sevaha pa he maama. Migkaǥi sikandin te, “Edeliǥen ku is Nengazen.” Umbe migngezanan din haazà is batà te Juda. Puun dutun, wazè en sikandin med-anak.
866	GEN 30:35	Piru te haazà he andew, insivey ni Laban is kevangan he kambing, meemahan wey vehiyan, ragkes is meitem he menge kerehidu. Mibpeelimahan din heini te anak din he maama.
868	GEN 30:37	Ne zutun, migkuwa si Jacob te menge subpang te kayu he alamu, ebilyanu wey platanu ne mibpenluk-itan din. Piru wazè din emini penluk-iti, umbe mibpemelvel-etan din te wazà luk-iti su wey mebeverekà he ed-ehaan haazà is subpang.
871	GEN 30:40	Piru is ki Jacob he mibeelan te menge kerehidu: Zutun te kemulu en ebpepenpeniwelayà haazà is menge uyaǥen, ibpesinaru zin sikandan duen te kevangan he kambing wey zuen te menge meitem he kambing ni Laban. Ne pinaaǥi zutun te paaǥi ni Jacob, mibmezakel is kandin he menge uyaǥen, ne insivey zin te menge uyaǥen ni Laban.
874	GEN 30:43	Pinaaǥi kayi, midsepian utew si Jacob. Ne utew midmezakel is menge uyaǥen din ragkes is menge kemilyu wey menge asnu. Mezakel zaan is menge suluǥuen din he menge maama wey vahi.
879	GEN 31:5	Migkeǥiyan din sikandan te, “Neǥezam ku he nahalin en is gehinawa zin kedì guntaan kenà te nehuna. Piru is Megbevayà te amey ku iyan edtavang kedì.
881	GEN 31:7	piru midterteruan e zin pa. Kesepulù din en helina is paaǥi zin te kedsuhuli kedì. Piru wazà ituǥut te Nengazen he mezaagdaag e zin.
882	GEN 31:8	Piru emun egkaǥi sikandin te, ‘Iyan suhul ku kenikew is menge uyaǥen he beverekà,’ ne beverekà is langun he anak te menge uyaǥen.
891	GEN 31:17	Ne zutun, mibpenines si Jacob su ed-ulì diyà te Canaan, kes lugar te amey zin he si Isaac. Impeuntud din is menge esawa zin wey menge anak din te kemilyu. Mid-uwit din is menge uyaǥen wey is langun he menge azen he netiǥum din diyà te Padan Aram. Neserengà haazà duen te kegenat ni Laban hein mibpen-elutan din is menge kerehidu zin, ne zutun te wazè pa sikandin mekeulì, migkuwa ni Raquel kes ed-ezapen te amey zin.
904	GEN 31:30	Netuenan ku he utew ka ebulunga ziyà te keniyu, umbe egkesuatan nu en he mekeulì ka. Piru maan is midtakew nu is menge ed-ezapen ku?”
906	GEN 31:32	Piru emun mehitenged te ed-ezapen nu he netazin, emun egkehè nu heini kayi te minsan hentei kayi te kenami, ne siluti nu sikandin te kemetayen. Kayi te etuvangan te menge kezuzumahi ku he iyan ebpemekepenistiǥus, ahaa nu emun duen egkeehè nu he menge azen nu kayi te kenami, emun duen ne kuwaa nu.” Wazà metueni ni Jacob he si Raquel ves is migkuwa zuen te menge ed-ezapen ni Laban.
907	GEN 31:33	Ne zutun, mibpen-ahà ni Laban haazà is menge ed-ezapen din dutun te tulda ni Jacob, diyà te ki Lea ragkes is menge tulda zuen te zezuwa he menge uripen he vahi te menge esawa ni Jacob. Piru wazè din maahà haazà is ed-ezapen din. Dutun te kedliǥawang din duen te tulda ni Lea, midseled sikandin daan diyà te tulda ni Raquel.
908	GEN 31:34	Piru ingke-eles-en ni Raquel ziyà te bulsavulsa zuen te silya te kemilyu zin, ne mibpinuuwan din heini. Ne midsusi ni Laban is langun he menge taǥù dutun te tulda ne wazè din maahà.
915	GEN 31:41	Menge 20 en he tuig is ked-ubpè ku ziyan te keniyu, 14 he tuig is kebpenilbi ku kenikew para kayi te zezuwa he anak nu he menge vahi. Ne mid-uman e pa medterebahu te heenem he tuig te kebekidu te menge uyaǥen nu. Piru hengkey heini is mibeelan nu? Ne kesepulù nu en helhelina is suhul ku.
916	GEN 31:42	Emun buwa wazà a tevangi te Megbevayà te amey ku he si Isaac, kes Megbevayà ni Abraham, kela ke midsegseg e en kenikew he wazà uwiten he minsan hengkey. Piru naahà te Megbevayà is kedhaǥù ku wey kedterebahu ku, umbe midawey ke zin geina he mezukilem.”
917	GEN 31:43	Midtavak si Laban te, “Heini is menge vahi he esawa nu ne menge anak ku, is menge anak dan ne menge apù ku. Heeyan is menge uyaǥen nu ne kediey zaan. Langun he egkeehè nu kayi ne kediey. Piru ǥuntaan, kenè ku en egkahawì is menge anak ku wey menge apù ku?
921	GEN 31:47	Migngezanan haazà ni Laban is intambù he menge vatu te Jegar Sahaduta. Piru migngezanan heini ni Jacob te Galeed. Diyà te Hebreo, he ke và dà egkeǥiya, “Intambù he Ebpeketistiǥus.”
941	GEN 32:13	Piru mibpesarig ka kedì he edtuvazan a kenikew ne edhimuwen nu is menge kevuwazan ku he iring kezakel te pantad diyà te veyvey te zaǥat su kenè en egkengevilang.”
957	GEN 32:29	Ne migkaǥi haaza is etew te, “Puun guntaan kenè en maan Jacob is igngazan kenikew, kekenà, Israel en tenged te nekibuteng ka te Megbevayà wey te etew, ne nekezaag ka.”
959	GEN 32:31	Migngezanan haazà ni Jacob he tanà te Peniel, he ke và dà egkeǥiya, “Neehè ku is dagwey te Megbevayà piru uuyag e zed.”
960	GEN 32:32	Ne hein midsilà is andew mid-awà si Jacob diyà te Peniel. Ebpiangpiang sikandin tenged te kegkekiluwi te midsuuran te tulan te seǥang din.
971	GEN 33:10	Piru midteǥel ni Jacob, ke sikandin te, “Sigi en, dewata nud haazà. Su emun tutuu he igkeǥaǥew a kenikew dewata nu en is gasa ku kenikew. Su hein kedtengtengi ku te zagwey nu ne henduen be te zagwey te Megbevayà. Ne ǥuntaan te midawat a kenikew,