269	GEN 11:2	Ne zutun te kedhalinhalin te menge etew pehendiyà te zapit te edsilaan, neehè dan is meluag he menge suǥud diyà te Shinar, ne zutun dan med-ubpà.
298	GEN 11:31	Ne midumahan ni Tera is anak din he si Abram, is ambey zin he si Sarai, wey is apù din he si Lot he anak ni Haran, ne mid-awè dan diyà te Ur he sakup te inged te menge Kildiyanhen su edhendiyè dan pezem te Canaan. Piru hein nekeuma zan diyà te inged he Haran, diyè dan dà med-ubpà.
378	GEN 15:17	Ne midsanlep en is andew ne mibmerusirem en, ne zuen migkivelat he naahà ni Abram he iring te kuzen he ed-evel wey egkeregreg he ziyà mebayà te pid-elangan dutun te mibaas he imped-aatbang.
383	GEN 16:1	Ne si Sarai, sikan is esawa ni Abram, kenà ed-anak. Duen uripen din he Ehiptohanen he egngezanan ki Hagar.
587	GEN 23:15	“Datù, pemineǥa a zep-a. Is bali zuen te tanà, ne 400 he vuuk he pelata, piru kenà haazà ebpekesamuk kenita te teleemiǥu. Kuwaa nu en is tanà ne igkeleveng nu zutun is esawa nu.”
608	GEN 24:16	Utew mekempet he raǥa si Rebeka ne wazè pa sikandin meuvayi te maama. Mibpenaug sikandin dutun te kalut ne midteǥuan din is umuy zin te wahig. Ne hein nekepasad ne migaun sikandin dutun ne mid-ulì.
710	GEN 26:17	Umbe mid-awè en dutun si Isaac, ne ziyà medhalin te zal-ug te Gerar ne midtutulda sikandin ne ziyà med-ubpà.
714	GEN 26:21	Ne mid-uman mebangbang is menge suluǥuen din te selakew en he kalut, piru midtebekaayan dan ded haazà te menge tig-Gerar. Umbe migngezanan ni Isaac haazà he kelut te Sitna, he ke và dà egkeǥiya, “Tebekaayaan.”
753	GEN 27:25	Migkaǥi zutun si Isaac te, “Na, uwita nu en kayi heeyan is midhilutù nu he netuǥesan nu, ne emun ebpekekaan ad ne epenubtuvazan ku sikew.” Ne zutun imbeǥey ni Jacob haazà is egkeenen wey vinu, ne migkaan sikandin wey mid-inum.
775	GEN 28:1	Ne mid-umew zutun ni Isaac si Jacob, ne mibpenubtuvazan din, wey migkeǥiyan din te, “Kenè ka limbe pengesawa te vahi he tig-Canaan.
780	GEN 28:6	Netuenan ni Esau he mibpenubtuvazan ni Isaac si Jacob wey impehendiyè din te Padan Aram su wey ziyà sikandin mekepengesawa. Ne nezineg din daan he zutun te kebpenuvadtuvad ni Isaac intelaan din ki Jacob he kenà sikandin mebpengesawa te vahi he tig-Canaan.
782	GEN 28:8	Ne human dutun mesavut ni Esau he kenè bes iyan egkesuatan te amey zin he si Isaac sikan is menge vahi he tig-Canaan.
831	GEN 29:35	Mibmeǥingey med-uman si Lea ne mid-anak sikandin te sevaha pa he maama. Migkaǥi sikandin te, “Edeliǥen ku is Nengazen.” Umbe migngezanan din haazà is batà te Juda. Puun dutun, wazè en sikandin med-anak.
870	GEN 30:39	Dutun te egkesineruwan te subpang ebpepenpeniwelayà haazà is menge kambing emun edhendutun dan is ed-inum. Emun ed-anak dan, ne kevengan is anak dan.
913	GEN 31:39	Wazè ku en uwita ziyan te kenikew is menge uyaǥen nu he midhimetayan te menge zumezaas he menge langgam; segugunè ku heini ed-ilisi. Mibpeveyazan nu zaan kedì is menge uyaǥen nu he midtakew te timpu te maandew wey te mezukilem.
929	GEN 32:1	Ne hein nepawà, midhezekan ni Laban is menge apù din wey menge anak din he esawa ni Jacob ne mibpenubtuvazan din. Ne zutun migenat su ed-ulì.
988	GEN 34:7	Ne hein netudtulan is menge anak ni Jacob he menge maama zutun te neulaula, segugunè dan mid-ulì. Utew mibmezaat is gehinawa zan ne utew zan egkepeuki si Shekem tenged te mid-ulaula zin he kenà meupiya he vaal, he nekeveǥey te keelezan te pemilya ni Jacob.
1028	GEN 35:16	Ne mid-awà ensi Jacob dutun te Betel duma is pemilya zin. Meǥaan dutun ed-anak si Raquel. Ne te wazè dan pa mekeuma ziyà te inged he Efrat ne ebeliliten en si Raquel su ed-anak. Ne utew sikandin midlised.
1043	GEN 36:2	Nengesawa si Esau te menge vahi he tig-Canaan. Iyan sikandan si Ada he anak ni Elon te Hitihanen, si Oholibama he anak ni Ana wey apù ni Zibeon te Hivihanen,
1074	GEN 36:33	Hein minatey sikandin, iyan mid-ilis kandin si Jobab he anak ni Zera te tig-Bozra.
1075	GEN 36:34	Hein minatey si Jobab, iyan mid-ilis kandin si Husham he tig-Teman.
1077	GEN 36:36	Hein minatey si Hadad, iyan mid-ilis kandin si Samla he tig-Masreka.
1080	GEN 36:39	Hein minatey si Baal Hanan, iyan mid-ilis kandin si Hadar he tig-Pau. Iyan esawa zin si Mehetabel he anak ni Matred wey apù ni Mezahab.
1121	GEN 38:1	Dutun he timpu, midsuwey si Juda te menge suled din ne ziyà sikandin med-ubpà te ed-ubpaan ni Hira he tig-Adulam.
1132	GEN 38:12	Ne hein neuǥet en minatey is esawa ni Juda. Ne hein netapus is timpu te kedlalew zin, ne midhendiyà sikandin te menge peraalut te menge kerehidu zin diyà te Timnah. Duma zin te midhendutun is emiǥu zin he si Hira he tig-Adulam.
1323	GEN 43:32	Impedsisivey zan is egkeenan: is egkeenan ni Jose, is egkeenan te menge suled din, wey is egkeenan te menge etew zutun he tig-Ehipto. Su is menge tig-Ehipto kenè dan ebpekidtuǥen te menge Hebriyuhanen su utew haazà supak te menge vetasan dan.
1364	GEN 45:5	Kenè kew meseeng, ne kenè kew mebasul te ingkevelegyà a keniyu kayi, su paaǥi heini te Megbevayà is impehuna a kayi para meluwas kew te mereǥen he ked-ubpà.
1397	GEN 46:10	Is menge anak he maama ni Simeon iyan ensi Jemuel, si Jamin, si Ohad, si Jakin, si Zohar, wey si Shaul ne iyan heini anak ni Simeon pinaaǥi te vahi he tig-Canaan.
1436	GEN 47:15	Ne hein naamin en is selapì te menge tig-Ehipto wey menge tig-Canaan, midhendiyà te ki Jose is langun he menge tig-Ehipto. Ke sikandan te, “Wazè dey en selapì. Beǥayi key te keuyaǥan su henduen be te ebpatey key en te kegkevitil.”
1545	EXO 1:12	Iyan, dutun te utew sikandan edèdaaǥa, nasì en sikandan mebmahabet ne mid-iseg en mebmeluag is egkeubpaan dan, ne tenged kayi egkahandek kandan is menge tig-Ehipto.
1570	EXO 2:15	Hein nezineg te hadì te Ehipto haazà is mibeelan ni Moises, ebpen-ahaan din te paaǥi he mepatey zin si Moises, piru mibpelaǥuy si Moises diyà te Midian ne zutun med-ubpà. Ne zutun te kebpekeuma zin, mibpinuu sikandin diyà te uvey te kalut.
1663	EXO 6:7	Ed-isipen ku sikiyu he menge etew ku ne iyan a egkehimu he Megbevayè niw. Ne egketuenan niw he siak is Nengazen he Megbevayè niw, iyan a mibpeǥawas keniyu puun te kegkeuripena keniyu te menge tig-Ehipto.
1830	EXO 12:13	Ne haazà is lengesa, ne iyan tuus te menge valey he zutun kew is menge Israilihanen ed-ubpà. Ne emun egkeehè ku haazà is lengesa ne edlevayan ku zà sikiyu. Ne wazà mulà kezeetan he egkehitavù keniyu kayi te kebpigedahi ku te menge Ehiptohanen.
1894	EXO 14:4	Ne edhimuwen ku he mebmezesen is gehinawa te hadì su wey kew zin mezal-as. Piru edèdeetan ku sikandin wey is menge sundaru zin. Ne pinaaǥi kayi egkeveǥayan a te zengeg, ne egketuenan te menge Ehiptohanen he iyan a kes Nengazen.” Umbe, mid-ulaula heini te menge Israilihanen.
1966	EXO 16:18	Ne hein migantang dan heini, is kada sevaha ne neketiǥum te tig senge-ǥantang. Is neketiǥum te zekelà ne wazà medsubra, ne is neketiǥum te zeisey ne wazà megkurang. Netengkaan dà is nekuwa te uman sevaha.
2180	EXO 24:2	Iyan ke zà egkehimu he ed-uvey kediey, ne is menge zuma nu kinahanglan he kenè dan mulà med-uvey. Ne is kezekelan keniyu kinahanglan he wazà edtekezeg kayi te vuntud duma kenikew.”
2237	EXO 26:1	“Ipeveeli nu is Tulda he Ed-ezapan. Is egemiten te kebeeli kayi, ne sepulù he lukut he linu he eburdahan te welin he meitem is kaavuavu, merudtem wey kanggan. Ne pepurungi nu heini peburdahi te zagwey te menge kirubin.
2242	EXO 26:6	Ne mebaal zan te 50 he kaw-it he vulawan su wey mekedliliib sikan is menge mibpen-iring te menge sising duen te zezuwa he impebpikit he menge tila. Pinaaǥi kayi ne egkeveelan is Tulda he Ed-ezapan.
2266	EXO 26:30	“Kinahanglan he edsungkad duen te mudilu he impeehè ku kenikew kayi te vuntud is kedtukuza niw zuen te Tulda he Ed-ezapan.
2271	EXO 26:35	Ne isavuk niw sikan is lemisahan diyà te gawas te kurtina, diyè niw isavuk te zapit te zizaya he zutun te seled te Tulda. Ne id-atbang niw zutun te lemisahan sikan is selevukà te sulù su ziyè niw mulà idsavuk te egkezivavà he vahin dutun te seled te Tulda he Ed-ezapan.
2272	EXO 26:36	“Pevaal ka zaan te sevaha pa he kurtina, he para te ǥemawan dutun te Tulda he Ed-ezapan. Is kurtina kinahanglan he linu he eburdahan te welin he meitem is kaavuavu zin, merudtem wey kanggan. Kinahanglan he meupiya is kegkeburdahi kayi.
2280	EXO 27:7	Ne haazà is menge tival zuen niw idluglug te mibpen-iring te rintì he ziyà te pesikilizà dutun te pemuhatà su iyan haazà idtival zutun te pemuhatà emun ed-uwiten.
2294	EXO 27:21	Is selevukà te sulù, kinahanglan he idsavuk diyà te ǥawas te kurtina he ebpeketambun duen te Kavan te Kebpekid-uyun. Si Aaron wey is menge kevuwazan din iyan ed-etiman duen te menge sulù duen te Tulda he Edtelevukaayan. Ibpesiǥa zan heini ziyà te etuvangan ku meselem wey mezukilem. Heini he menge sulunuzen ereg he edtumanen te menge Israilihanen taman te huziyan he menge lapis te menge kevuwazan dan.
2482	EXO 33:8	Ne emun edhendutun si Moises te Tulda ne ebpemenlawang sikan is menge etew ziyà te menge tulda zan su ebentayan dan si Moises taman te kebpekeseled din dutun te Tulda he ed-ezapan.
2575	EXO 36:8	Is langun he memetau he ebpemenerebahu, ne iyan impevaal zan duen te Tulda he Ed-ezapan. Iyan migamit dan te kebaal zan dutun is sepulù he lukut he linu he miburdahan te welin he meiten is kaavuavu zin, merudtem wey kanggan. Ne nepurungan meburdahi heini te zagwey te menge kirubin.
2580	EXO 36:13	Ne mibaal zan te 50 he kaw-it he vulawan su wey mekedliliib sikan is menge mibpen-iring te menge sising duen te zezuwa he impebpikit he menge tila. Pinaaǥi kayi ne neveelan is Tulda he Ed-ezapan.
2603	EXO 36:36	Ne ziyè dan haazà ipikit te mibeelan dan he heepat he menge tukud he ekasya he mibpen-epizan te vulawan wey midteuzan daan te vulawan he menge kaw-it. Ne ziyà haazà ipehulma is menge tukud te menge peuntuzà he pelata.
2654	EXO 38:20	Lunsey he brunsi is menge palpal te menge vanting dutun te Tulda he Ed-ezapan.
2713	EXO 40:5	Isavuk niw sikan is pemuhatà he vulawan he edtutungan te veyewà diyà te etuvangan duen te Kavan te Kebpekid-uyun, ne itaud niw is kurtina ziyà te gemawan duen te Tulda he Ed-ezapan.
2729	EXO 40:21	Ne inseled din sikan is Kavan duen te Tulda he Ed-ezapan, ne intaud din sikan is kurtina su wey mezilungi haazà is Kavan te Kebpekid-uyun.
2796	LEV 3:17	Kenè kew kaan te tavà etawa lengesa. Kinahanglan he heini he velaud edtumanen niw taman te huziyan he lapis te menge kevuwazan, minsan hendei kew ed-ubpà.
2862	LEV 6:5	Kinahanglan he kenà ed-ewaan te hapuy haazà is pemuhata; kenà heini ed-evukan. Kada meselem ne edtevunan heini te memumuhat, ne ibpurung din idsavuk dutun te hapuy is pemuhat he edtutungen. Iragkes din daan te edtutung is menge tavà te uyaǥen he pemuhat he para te meupiya he kedepità.
2863	LEV 6:6	Kinahanglan he kenà ed-ewaan te hapuy haazà is pemuhatà; kenà heini ed-evukan.
3007	LEV 11:9	Egkehimu he egkeenen niw is minsan hengkey he neuyag diyà te wahig he zuen din kapey wey hun-ap. Piru kenè niw keena is wazè din kapey wey hun-ap, wey kenè niw zaan gewezi is minatey kandan. Isipa niw he meremerik heini.
3052	LEV 12:7	Ibpemuhat heini te memumuhat diyà te etuvangan te Nengazen para maawà is keremerik dutun te vahi puun te kedlengesahi kandin, ne egkehimu en sikandin he lumpiyu. Emun kenà sikandin ebpekeveleveg he ebeǥey te kerehidu med-uwit dà sikandin te zezuwa he merepatik etawa zezuwa he limuken. Is sevaha, pemuhat he edtutungen ne is sevaha pa, pemuhat he para idlumpiyu. Pinaaǥi kayi te ebeelan te memumuhat, egkaawà is kegkehimuwa kandin he meremerik ne egkehimu en sikandin he lumpiyu. Iyan heini menge sulunuzen mehitenged te vahi he ed-anak.
3104	LEV 13:51	Dutun te ikepitu he andew ed-umanan heini edsusiya te memumuhat. Ne emun midelandap haazà is hab-ung ne ed-isipen heini he meremerik, ne kinahanglan he ebinsulan heini su ed-iseg pa haazà is hab-ung.
3108	LEV 13:55	Ne kegketapus dutun ne ed-umanan heini edsusiya te memumuhat. Ne emun wazà medheva haazà is hab-ung, ed-isipen heini he meremerik minsan wazà medelandap haazà is hab-ung. Umbe kinahanglan he ebinsulan heini minsan divaluy zà is midhab-ung.
3112	LEV 13:59	Iyan heini menge sulunuzen para metueni ke lumpiyu etawa meremerik is midhab-ung he manggad he welin etawa linu etawa minsan hengkey he azen he lundis is mibeelan he midhab-ung.
3154	LEV 14:42	Ne ebpekuwa sikandin te para idliwan dutun te elavat he mibpen-awà.
3160	LEV 14:48	Iyan, emun egkesusi zuen te memumuhat he wazè en umana heb-unga haazà is baley hein neliwanan en te elavat sikan is midhab-ung he elavat, ne ebpesayud haazà is memumuhat he lumpiyu haazà he valey su wazè en heb-unga.
3255	LEV 18:3	Kinahanglan he kenè niw veeli is menge ebeelan te menge etew ziyà te Ehipto he zutun kew med-ubpà dengan, wey is menge ebeelan te menge etew ziyà te Canaan, he zutun ku sikiyu ed-uwita.
3256	LEV 18:4	Kinahanglan he edtumanen niw is menge suǥù ku wey menge sulunuzen su is etew he edtuman kayi ebpekaangken te meupiya he ked-ubpà. Siak is Nengazen he Megbevayè niw, midsuǥù ku sikiyu.
3286	LEV 19:4	Kenè kew med-azap te zuma he menge ed-ezapen wey kenè kew mebaal te ledawan te zuma he ed-ezapen. Iyan a kes Nengazen he Megbevayè niw.
3312	LEV 19:30	Tumana niw is ebpeveelan ku keniyu zutun te Andew te Kedhimeley, ne tehuza niw is lugar he zutun a keniyu ed-ezapa. Iyan a kes Nengazen.
3417	LEV 23:14	Emun wazè niw pa heini ikepemuhat, ne kenè kew pa megkaan te minsan hengkey he kelasi te keenen he zuma te beǥu he midraǥun niw, mehilew man heini etawa sinandag etawa midlutù he supas. Heini he sulunuzen, kinahanglan he tumana niw taman te huziyan he lapis te menge kevuwazan niw, minsan hendei kew ed-ubpà.
3424	LEV 23:21	Dutun he andew kenè kew medterebahu, kekenà, tiǥum kew te ked-azap te Nengazen. Heini he sulunuzen, ne kinahanglan he tumana niw taman te huziyan he lapis te menge kevuwazan niw, minsan hendei kew ed-ubpà.
3434	LEV 23:31	Umbe, himeley kew wey puasa kew puun te kedsanlep te andew te ikesiyew he andew te haazà he vulan taman te sunud he kedsanlep te andew. Kinahanglan he tumana niw heini he sulunuzen taman te huziyan he lapis te peleebuten he menge kevuwazan niw, minsan hendei kew ed-ubpà.
3498	LEV 25:28	Iyan, emun kenè pa ereg is idlekat din, ne kenè din pa haazà egkekuwa puun te nemasa taman te kegkeuma te Tuig te Kebeǥey te Bayàbayà wey Ked-ulì. Dutun he tuig egkahawì din en is tanè din he wazà bayad.
3500	LEV 25:30	Piru emun kenè din heini egkelekat seled te senge-tuig, ne haazà he valey egkehimu en he ǥaked te nekepemasa zuen wey te menge kevuwazan din taman te taman. Kenè en heini egkahawì te teǥiǥaked dutun te Tuig te Kebeǥey te Bayàbayà wey Ked-ulì.
3501	LEV 25:31	Piru is menge valey ziyà te zezeisey he menge inged he wazè din berengbeng iring heini te vevesukà, he egkehimu he edlekaten wey egkahawì dutun te tuig te Kebeǥey te Bayàbayà wey Ked-ulì.
3503	LEV 25:33	Emun kenè dan heini egkelekat, id-ulì heini ziyà te kandan dutun te Tuig te Kebeǥey te Bayàbayà wey Ked-ulì. Su is baley ziyà te menge inged dan kandan he vahin puun te zuma zan he menge Israilihanen.
3506	LEV 25:36	Ipesambey niw sikandin te selapì he kenà ibpetuvù, wey velegyai niw te keenen he kenè kew en egenansya, su wey sikandin meuyag-uyag. Beeli niw heeyan he paaǥi te kebpekilala te kedtehuza niw kedì te Megbevayè niw.
3510	LEV 25:40	Isipa niw sikandin he sevaha he sinuhulan he terebahanti etawa meǥeliyug he mid-ubpè dà duma keniyu. Edterebahu sikandin diyà te keniyu taman te egkeuma is Tuig te Kebeǥey te Bayàbayà wey Ked-ulì.
3524	LEV 25:54	Emun kenà sikandin egkelekat te iring kayi he paaǥi, egkelibri ǥihapun sikandin wey is menge anak din dutun te Tuig te Kebeǥey te Bayàbayà wey Ked-ulì.
3527	LEV 26:2	Tumana niw is ebpeveelan ku keniyu zutun te Andew te Kedhimeley wey tehuza niw is lugar he zutun a keniyu ed-ezapa. Iyan a kes Nengazen.
3559	LEV 26:34	Dutun te menge vihag kew ziyà te lugar te menge kuntada niw ne egkevengkag is lugar niw, ne ebpekehimeley is tanè niw. Su zutun te ed-ubpè kew pa zutun te tanè niw ne wazè niw heini ipehimeley minsan dutun te tuig te kebpehimelaya te tanà. Piru zutun he timpu human en heini ebpekehimeley zutun te wazè en kayi ed-ubpa.
3589	LEV 27:18	Iyan emun neuǥet en is kegkeliwas dutun he tuig ne human din heini ihalad, ebeliyan heini te memumuhat te vali he mevavà dutun, sumalà te kahabet te menge tuig he nesamà he egkeume en maan is Tuig te Kebeǥey te Bayàbayà wey Ked-ulì.
3594	LEV 27:23	ne ebeliyan heini te memumuhat te vali he ibasi ziyà te kahabet te menge tuig he human egkeuma is Tuig te Kebeǥey te Bayàbayà wey Ked-ulì. Kinahanglan he segugunà heini edlekata. Is bayad he idlekat din kayi gaked en te Nengazen.
3749	NUM 4:5	Emun ed-awè kew zutun te kampu niw, kinahanglan he edseled si Aaron wey is menge anak din duen te Tulda ne egkuwaan dan is kurtina ziyà te seled, ne idtambun dan heini zuen te Kavan te Kebpekid-uyun.
3810	NUM 5:17	Ne ed-itis te wahig he mid-isip he segradu ziyà te ziniyun haazà is memumuhat, ne edsevukan din haazà te eliyavuk he ebpuun diyà te saag duen te Tulda he Ed-ezapan.
3854	NUM 7:3	Mid-uwit dan diyà te etuvangan te Nengazen te heenem he kerumata wey 12 he vaka, sevaha he kerumata is mid-uwit te kada zezuwa he pengulu, ne sevaha he vaka is mid-uwit te kada sevaha kandan. Mid-uwit dan haazà diyà te egkesineruwan duen te Tulda he Ed-ezapan.
3940	NUM 7:89	Emun edseled si Moises duen te Tulda he Edtelevukaayan su ebpekidlalag te Nengazen, egkezineg din is laǥeng he ebpekidlalag kandin puun duen te mid-elangan te zezuwa he ledawan te kirubin, he zuen te zivavew te tambun te Kavan te Kebpekid-uyun. Dutun ebpekidlalag is Nengazen ki Moises.
3981	NUM 9:15	Hein andew te kebenguna zuen te Tulda he Ed-ezapan he zutun itaǥù sikan is Kesuǥuan, neliǥuy heini te ǥapun. Puun te mezukilem taman te meselem, heini he ǥapun henduen be te hapuy he ed-anlag.
4010	NUM 10:21	Ne midtinundug kandan is menge kevuwazan ni Kohat he ed-uwit te segradu he menge gelemiten duen te Tulda he Ed-ezapan. Kinahanglan he igkepelastar en sikan is Tulda te kenè pa sikandan ebpekeuma ziyà te lugar he egkempuwan dan.
4050	NUM 11:25	Ne mibulus is Nengazen pinaaǥi te ǥapun ne nekidlalag ki Moises. Ne imbeǥey zin duen te 70 he menge perezumala is duma he keǥehem. Ne hein diyè en haazà te kandan ne nenagnà sikandan, piru wazè en haazà meuman-uman.
4292	NUM 19:2	“Heini pa is sulunuzen he egkesuatan ku he tumana niw: Keǥiyi niw is menge Israilihanen he uwiti kew zan te sevaha he behiyan he vaka he meriǥà he wazè din sazir he wazè pa keenu meǥamit te ked-eradu.
4474	NUM 25:2	Heini is menge vahi mid-iniyat kandan te kedtampu te kebpemuhata zan te menge ed-ezapen dan, ne migkaan haazà is menge maama te impemuhat ne mid-azap dan haazà is menge ed-ezapen.
4760	NUM 32:40	Umbe, imbeǥey ni Moises is Gilead diyà te menge kevuwazan ni Makir, he menge kevuwazan daan ni Manase ne zutun dan en med-ubpà.
4872	NUM 35:25	Emun egkesusi he tutuu iyan he wazè din tivevaa is kedhimatey, kinahanglan he edipinsahan te kezekelan haazà is etew he nekepatey, para kenà mevelesi te ebales kandin, ne idlikù sikandin diyà te inged he eputà he zutun sikandin med-aput. Ne kinahanglan he kenà sikandin ed-awà dutun taman te ebpatey is lavew he memumuhat he impehinungud para te kebpenilbi.
4963	DEU 2:23	Ne iring ded daan keniyan is nehitavù hein midsurung te menge tig-Caftor is menge tig-Avim he menge meǥinged diyà te inged he Gaza. Midezeetan dan is menge tig-Avim ne mid-ubpaan dan haazà is tanà te menge tig-Avim.
5117	DEU 7:4	su ebpekepekeziyù diyà te Nengazen is menge anak niw su ziyè dan man ibpepenilbi te zuma he menge ed-ezapen. Ne emun egkehitavù heeyan ne ibpeǥezaman keniyu te Nengazen is pauk din ne egkengezeetan kew.
5153	DEU 8:14	mebpekevantey kew he kenè kew mekepahambug wey kenè niw melipati is Nengazen he Megbevayè niw he mibpeǥawas keniyu puun te Ehipto he zutun kew pen-uripena.
5195	DEU 10:7	Ne ebpuun dutun midhendiyà sikandan te Gudgoda wey ziyà te Jotbata, ne heini he lugar zuen menge zal-ug.
5221	DEU 11:11	Piru zuen te tanà he ed-engkenen niw, zuen kayi menge vuvungan wey menge suǥud he layun ed-uzani.
5279	DEU 13:6	Kinahanglan he edhimetayan haazà is ebpeneuven etawa pereseysey te kehuluǥan te teǥeinep, su ebpenuruen kew zin te kedribildi ziyà te Nengazen he Megbevayè niw he mibpeǥawas keniyu ziyà te Ehipto wey midlibri keniyu te kegkeuripen. Heeyan he etew, iyan tuyù din is para mekepekeziyù kew ziyà te menge paaǥi he inmandù keniyu te Nengazen he Megbevayè niw he sunuza niw. Mezaat heeyan ne ereg he id-awà.
5284	DEU 13:11	Ebpenulengen sikandin te vatu taman te kebpatey zin su geina te edtinguhà sikandin ebpekeziyù kenikew puun te Nengazen he Megbevayè nu, he mibpeǥawas kenikew ziyà te Ehipto he zutun kew pen-uripena.
5301	DEU 14:9	“Egkehimu he egkeenen niw is minsan hengkey he egkeuyag diyà te wahig he zuen dan kapey wey hun-ap.
5302	DEU 14:10	Piru kenè niw keena is wazè din kapey wey hun-ap. Isipa niw heini he meremerik.
5460	DEU 21:11	Ne penenglitan duen sevaha keniyu he nekaahà te mezagwey he vahi zuen te menge vihag ne nesuatan din haazà umbe egkesuatan din te ed-esawa.
5462	DEU 21:13	wey ilisi zin is imbivisti zutun te vahi hein nevihag sikandin. Kinahanglan he ibpeubpè din haazà is bahi ziyà te valey zin seled te senge vulan mintras idlalew zin is menge kepuun din. Ne emun egketapus en haazà, ne egkehimu en sikandin he ed-esewaan.