3	GEN 1:3	Minikagi se Timanem, “Megkedoen den kelowahan.” Penga niyan, doen kelowahan.
4	GEN 1:4	Kinità te Timanem te mèpiya se kelowahan, aw tinani din se kelowahan aw kengitngitan.
5	GEN 1:5	Se kelowahan, yan se iningedanan din aldaw. Se kengitngitan, yan se iningedanan din delem. Migkemeapon aw migkeiselem, aw yan nepenga se tagnà aldaw.
15	GEN 1:15	Yan heman se somenang doton te langit amon melowa se tanà.” Neinang iyan.
16	GEN 1:16	Dowa se dakel lowa ininang te Timanem. Se aldaw, yan se egsenang dalem te aldaw. Se bolan, yan se egsenang dalem te delem. Ininang din heman se menge bitoen.
18	GEN 1:18	Yan se egsenang te aldaw aw delem, amon doen elet diyà te kelowahan aw kengitngitan. Kinità te Timanem te mèpiya iyan.
22	GEN 1:22	Mèpiya se imbegay te Timanem diyà te kedita niyan, aw migpunù sikandin diyà te kedita eg-ogpà doton te wayeg aw dagat, “Pegbatà kaw, aw pegkedita kaw amon melegeb se dagat kenyo.” Migpunù heman sikandin diyà te menge manok, “Pegkedita kaw doton te tanà.”
29	GEN 1:29	Minikagi heman se Timanem, “Ibegay ko diyà kenyo se kedita te tinemunun doen benì dini te tanà aw kedita te kayo doen pongo amon doen kànen niyo.
30	GEN 1:30	Ibegay ko heman se kedita te mèpiya tinemunun diyà te menge ayam-ayam, manok, aw menenanap, amon doen kànen te kedita eg-ogpà dini lanto te tanà.” Neinang iyan.
36	GEN 2:5	wedad pa tinemunun dini te tanà, aw wedad heman timobò, so wedà pa peodani te Timanem se tanà, aw wedad pa otaw migpawà.
40	GEN 2:9	Impetilles te Timanem se medita kemolò te kayo kidoen. Mèpiya iyan tengtengen, aw mèpiya heman se pongo niyan. Dowa se kayo intanem din diyà te tengà-tengà te kekeyowan, aw yan se kayo egpemegay te pedowan wedad temanan aw kayo egpemegay te kebiyasa tepad te mèpiya aw medaet.
41	GEN 2:10	Doen heman wayeg kidoen te Eden gayed eg-elem te tanà te kekeyowan. Doton dibabà te Eden, migsoway-soway se wayeg sìyan, aw neinang iyan olo te epat dakel wayeg.
43	GEN 2:12	Mèpiya se bolawan egketelaan kidoen, aw doen heman litek te kayo metinadeg aw menge bato meelagà kidoen.
44	GEN 2:13	Gihon se ngadan te ikedowa te wayeg, aw minokit iyan te tanà iningedanan Cus.
46	GEN 2:15	Impeogpà te Timanem se otaw doton te kekeyowan te Eden amon meg-obong sikandin kenyan aw megtonggò heman kenyan.
49	GEN 2:18	Minikagi heman se Timanem, “Kenà mèpiya aw sebad olò se otaw. Yan meg-inang a te doma din meketepad kandin amon doen megtelaban kandin.”
61	GEN 3:5	Minikagi se Timanem kenyan so netegahan din aw komaen kaw kenyan, megkebiyasa kaw, aw meinang kaw iling kandin, so metaga-taga kaw heman aw eden se mèpiya aw eden se medaet.”
62	GEN 3:6	Penga niyan, kimità se bayi te mèpiya kànen se pongo te kayo sìyan, aw mèpiya se bawa niyan, aw mig-aneng-aneng sikandin te mèpiya aw megkebiyasa sikandin. Yan se doun te inabat din se pongo niyan aw kinaen din iyan. Doen heman imbegay din diyà te esawa din, aw kinaen din heman iyan.
63	GEN 3:7	Pegpengaen dan kenyan, migkebiyasa dan aw netegahan dan te migpetabeg-tabeg dan. Yan tinebil dan se dawen te kayo igira amon doen isampeng te sinelowan dan.
72	GEN 3:16	Minikagi se Timanem diyà te bayi, “Ontò ko dogangan se kelimahan te pegbatà nikaw. Aw tebawan ka, elegen ka. Meneng ontò ka meibeg te kamno esawa, aw mengolo sikandin diyà kamno.”
73	GEN 3:17	Minikagi se Timanem diyà te meama, “Nenenalan ka diyà te esawa nikaw, aw kimaen ka te pongo te kayo impunù ko kamno. Tandà te salà no sìyan, inangen ko heman medaet se tanà. Keilangan gayed ka megterbaho taman te pegkematay nikaw, amon botong se kànen nikaw.
74	GEN 3:18	Gayed tomilles se sagbet aw tigis kidoen te tanà, aw keilangan mahà ka heman te kànen egtobò doton te kebenesan tandà te kelimahan nikaw.
75	GEN 3:19	Keilangan gayed ka megterbaho lamig peg-etingan ka amon doen tomilles kidoen te tanà lamig molì ka doton te tanà, so yan se linekatan nikaw. Ininang ka lekat te tanà, aw todà ka heman meinang tanà.”
78	GEN 3:22	Nayan, minikagi se Timanem, “Neinang den se otaw iling kenitadon, so netegahan den dan aw eden se mèpiya aw eden se medaet. Eked den kepakay aw mengabat dan te pongo lekat te kayo mekebegay te pedowan wedad temanan, so aw komaen dan kenyan, eked dan palos kematay te wedad temanan.”
80	GEN 3:24	Penga te pegkesayo te otaw lekat te Eden, insogò te Timanem se iling te anghil iningedanan kirobim lenged te eglibtakan te kekeyowan, aw insawol din se sondang eglegdeg aw gayed egkebiling, amon wedad otaw mekepedapag diyà te kayo egpemegay te pedowan wedad temanan.
97	GEN 4:17	Nayan, migpeleyokay si Cain aw esawa din, aw doen batà dan timebaw si Enok. Dalem niyan, mig-inang si Cain te lonsod, aw yan heman se iningedanan din Enok, onawa te ngadan te batà din.
98	GEN 4:18	Si Enok se amay i Irad. Si Irad se amay i Mehujael. Si Mehujael se amay i Metusael. Si Metusael se amay i Lamek.
102	GEN 4:22	Si Sela se inay i Tubal Cain, aw sikandin se menenayab te tebaga aw kinis. Doen heman etebay i Tubal Cain si Naama.
118	GEN 5:12	Peg-apet te kepitowan se omay i Cainan, timebaw se batà din meama si Mahalaleel.
121	GEN 5:15	Peg-apet te keneman teg lima se omay i Mahalaleel, timebaw se batà din meama si Jared.
122	GEN 5:16	Penga niyan, walo gatos ketlowan se omay minokit te wedà pa kematay si Mahalaleel. Dalem niyan, doen pa menge doma batà din timebaw.
123	GEN 5:17	Walo gatos kesyaman teg lima se omay i Mahalaleel te pegkematay din.
135	GEN 5:29	Iningedanan din se batà din ki Noe (kelebadan niyan, peg-etod), so minikagi sikandin, “Seini se otaw megpeetod kenitadon lekat te kelimahan te terbaho tadon dini te tanà seini ininang te Timanem medaet.”
139	GEN 6:1	Nayan, pegkedita-dita te menge otaw dini lanto te tanà, aw pegkedita heman te bayi timebaw,
149	GEN 6:11	Netegahan te Timanem te medaet se kedita te doma otaw dini lanto te tanà, aw doen samok doton te kedita te ogpeanan.
157	GEN 6:19	Pengibing ka heman te meama aw bayi lekat te tegsebad-sebad kemolò te ayam-ayam, menenanap, aw manok amon eked iyan kegelà.
159	GEN 6:21	Peglolan ka heman te medita kemolò te kànen amon doen kànen te kedita niyo.”
171	GEN 7:11	Peg-apet te enem gatos se omay i Noe, te pitsa sempolò teg pito te ikedowa te bolan te omay sìyan, neowang se kedita te selep doton didalem te dagat, aw neowang heman se kedita te linekatan te odan doton te langit.
174	GEN 7:14	Minawop heman se kedita te kemolò te menge ayam-ayam aw menenanap, dakel aw deitek, aw kedita te kemolò te manok.
192	GEN 8:8	Pegkenamay-namay, binoloyan heman i Noe se sebad selepati, amon ketegahan din aw migkepangkag se tanà.
195	GEN 8:11	Pegkemeapon niyan, limikò iyan doton ki Noe, aw doen tobed te kayo olibo inibing diyà te toktokay din. Doun niyan, netegahan i Noe te tabag minuyud se wayeg diyà te tanà.
201	GEN 8:17	Pelowai heman se kedita te manok, ayam-ayam, aw menenanap, amon megbowad-bowad dan aw megkedita dan dini lanto te tanà.”
203	GEN 8:19	Limowà heman se menge ayam-ayam, menenanap, aw manok te tegsebad-sebad kemolò niyan.
205	GEN 8:21	Peg-adek te Timanem te nadeg niyan, neluba sikandin, aw minikagi sikandin diyà te pedowan din, “Eked a todà pegpelumun te tanà tandà te medaet inang te otaw, so netegahan ko te gayed medaet se ibeg te pedowan te otaw lekat te pegtebaw dan. Eked a todà peg-igelà te kedita te otaw aw menenanap iling te ininang ko den.
209	GEN 9:3	Mepakay den kànen niyo se kedita te ayam-ayam aw menenanap. Tapay ko impekaen kenyo se menge tinemunun, meneng mepakay den heman se pegpengaen niyo te menenanap aw ayam-ayam.
211	GEN 9:5	“Aw memonò se otaw, keilangan ipelumun sikandin. Aw mengimatay se ayam-ayam aw menenanap te otaw, keilangan imetayan heman iyan.
218	GEN 9:12	Doen pengilala inangen ko amon ketegahan niyo te gayed ko tomanen se pakang ko kenyo aw kedita doen pedowan dini te keneyonan te wedad temanan.
240	GEN 10:5	Sikandan se menge kemonaan te kedita te otaw eg-ogpà medapag te dagat aw doton te menge polò. Yan se menge bowad-bowad i Japet. Mig-ogpà se tegsebad-sebad pongan doton te kandan ogpeanan, aw doen heman kagi te tegsebad-sebad pongan.
241	GEN 10:6	Se menge batà meama i Ham, yan si Cus, si Ehipto, si Put, aw si Canaan.
246	GEN 10:11	Lekat kidoen, dimoton sikandin te Asirya, aw mig-inang sikandin te menge lonsod te Niniba, Rehobot-Ir, Cala,
248	GEN 10:13	Si Ehipto se kemonaan te kedita te otaw mig-ogpà doton te Lud, Anam, Laab, Neftu,
251	GEN 10:16	Si Canaan heman se kemonaan te menge pongan te otaw iningedanan Jebusi, Amori, Girgasi,
254	GEN 10:19	lamig nesakop dan se kebelad te tanà lekat te lonsod te Sidon taman te lonsod te Gerara medapag te Gasa, aw nesakop heman se menge lonsod te Sodoma, Gomora, Adma, aw Seboim medapag te Lasa.
255	GEN 10:20	Yan se menge bowad-bowad i Ham. Mig-ogpà se tegsebad-sebad pongan dan doton te kandan ogpeanan, aw doen heman kagi te tegsebad-sebad pongan.
257	GEN 10:22	Se menge batà i Sem, yan si Elam, si Asur, si Arfacsad, si Lud, aw si Aram, aw yan heman se ngadan te menge bowad-bowad dan.
266	GEN 10:31	Yan se menge bowad-bowad i Sem. Mig-ogpà se tegsebad-sebad pongan dan doton te kandan ogpeanan, aw doen heman kagi te tegsebad-sebad pongan.
270	GEN 11:3	Migpeikegihay dan, “Ayas kaw den. Loteken tadon den se pasak aw delapen tadon iyan lamig megkagsen, amon doen inangen tadon balay.” Yan linotek dan se pasak inangen dan bato, aw inimon dan se apog ibolit kenyan amon meg-inang dan te balay.
289	GEN 11:22	Peg-apet te ketlowan se omay i Serug, timebaw se batà din meama si Nahor.
291	GEN 11:24	Peg-apet te kelowan teg siyam se omay i Nahor, timebaw se batà din meama si Tera.
292	GEN 11:25	Penga niyan, sebad gatos sempolò teg siyam se omay minokit te wedà pa kematay si Nahor. Dalem niyan, doen pa menge doma batà din timebaw.
293	GEN 11:26	Peg-apet te kepitowan se omay i Tera, timebaw se menge batà din meama si Abram, si Nahor, aw si Haran.
294	GEN 11:27	Seini se ngadan te menge bowad-bowad i Tera. Si Tera se amay i Abram, si Nahor, aw si Haran. Si Haran se amay i Lot.
296	GEN 11:29	Nengognan si Abram ki Sarai, aw nengognan si Nahor ki Melca, batà bayi te kedowa din nematay si Haran. Doen heman doma batà i Haran si Isca.
300	GEN 12:1	Nayan, minikagi se Timanem diyà ki Abram, “Tanan ka den te tanà inogpaan no seini. Tanan ka den heman te menge kedomaan nikaw aw pamilya te amay nikaw. Doton ka den te ogpeanan tedoan ko kamno.
301	GEN 12:2	Medita se bowad-bowad ibegay ko diyà kamno, aw meinang dan dakel pongan. Mèpiya se ibegay ko diyà kamno, aw inangen ko medengeg se ngadan nikaw. Mèpiya heman se ibegay ko diyà te menge doma otaw pineokit kamno.
307	GEN 12:8	Penga niyan, dimeleg sikandin pesalo doton te menge bontod lenged te eglibtakan te lonsod te Betel. Mig-ogpà sikandin diyà te tengà-tengà te lonsod te Betel aw Ai. Lenged te egsellepan se lonsod te Betel, aw lenged te eglibtakan se lonsod te Ai. Mig-inang heman sikandin te sonoganan te ayam-ayam kidoen, aw migsimba sikandin te Timanem.
309	GEN 12:10	Nayan, doen bitil doton te Canaan, aw dimeleg si Abram doton te Ehipto amon meg-ogpà dan doton te menamay-namay, so ontò dan nebitilan.
310	GEN 12:11	Pegkedapag dan doton te Ehipto, minikagi si Abram diyà te esawa din si Sarai, “Mèpiya ka bayi tengtengen.
311	GEN 12:12	Yan aw komità se menge tege Ehipto kamno, meg-aneng-aneng dan te teleesawa ki, aw yan mengimatay dan kanak amon egawen ka dan.
313	GEN 12:14	Pegdateng dan doton te Ehipto, kinità te menge otaw kidoen te mèpiya bayi tengtengen se esawa din.
320	GEN 13:1	Nesayo si Abram lekat te Ehipto aw limikò sikandin doton te Negeb sakop te Canaan sipat te esawa din aw kedakel te kedònan din. Timaking heman si Lot kandin.
321	GEN 13:2	Ontò meyaman si Abram, so medita se karniro din, kambing, aw baka, aw dakel heman se selapì aw bolawan din.
323	GEN 13:4	Yan heman se tapay din ininangan te sonoganan te ayam-ayam. Todà sikandin migsimba te Timanem kidoen.
324	GEN 13:5	Nayan, timaking heman si Lot ki Abram, aw doen heman menge pamilya din, aw sineligan din, aw menge karniro, kambing, aw baka din.
326	GEN 13:7	Yan se doun te migbolaw se menge telediyaga i Abram aw menge telediyaga i Lot. (Doen heman menge tege Canaan aw tege Perisi mig-ogpà pa kidoen.)
327	GEN 13:8	Yan minikagi si Abram diyà ki Lot, “Eked a keibeg aw megbolaw ki aw megbolaw heman se menge telediyaga ta, so anak ko sikona.
329	GEN 13:10	Migpeatap-atap si Lot, aw kinità din te mèpiya se kebelad te tanà medapag te wayeg te Jordan taman te lonsod te Soar, so dakel se wayeg kidoen iling te kekeyowan intanem te Timanem, aw iling te Ehipto. (Neinang iyan te wedà pa bàti te Timanem se lonsod te Sodoma aw Gomora kidoen medapag te wayeg te Jordan.)
338	GEN 14:1	Nayan, si Amrafel se selotan doton te Sinar, si Arioc se selotan doton te Elasar, si Cadorlahomor se selotan doton te Elam, aw si Tadal se selotan doton te Goyim. Dalem te pegkeselotan dan, migsebad se epat dan migbolaw diyà te doma lima selotan seini, si Bara selotan te Sodoma, si Birsa selotan te Gomora, si Sinab selotan te Adma, si Semeber selotan te Seboyim, aw sìyan selotan te Bela doma ngadan niyan Soar.
341	GEN 14:4	Tapay sinakop i Cadorlahomor se lima selotan sìyan dalem te sempolò teg dowa se omay. Meneng pegdateng te ikesempolò teg telo te omay, minato dan kandin.
342	GEN 14:5	Pegdateng te ikesempolò teg epat te omay, limompak si Cadorlahomor aw menge doma selotan migsebad diyà kandin. Dinaeg dan se kedita te tege Repai doton te Astarot-carnaim. Dinaeg dan heman se menge tege Susi doton te Ham, aw menge tege Emi doton te kepetagan te Kiriataim.
343	GEN 14:6	Dinaeg dan heman se kedita te menge tege Hori doton te bontod inogpaan dan doton te Seir, aw pig-alaw dan taman te lonsod te Elparan medapag te kebigtilan.
344	GEN 14:7	Penga niyan, limikò dan doton te lonsod te Cades (Enmispat se doma ngadan niyan). Dinaeg dan heman se kedita te otaw mig-ogpà doton te tanà te menge Amalek, aw dinaeg dan se menge Amori mig-ogpà doton te Hasason Tamar.
346	GEN 14:9	te menge sondalo te epat selotan kidoen, si Cadorlahomor selotan te Elam, si Tadal selotan te Goyim, si Amrafel selotan te Sinar, aw si Arioc selotan te Elasar. Lima se selotan migbolaw te epat selotan.
349	GEN 14:12	Dinakep dan heman se anak i Abram si Lot, aw inagaw dan se kedònan din, so mig-ogpà sikandin doton te Sodoma.
353	GEN 14:16	Neabat i Abram se kedakel te kedònan neagaw dan. Impelowà din heman se anak din si Lot, aw in-olì din diyà ki Lot se kedakel te kedònan neagaw lekat kandin. Impelowà din heman se kedita te bayi aw menge doma otaw nedakep.
354	GEN 14:17	Peg-olì i Abram lekat te pegdaeg din ki Cadorlahomor aw menge doma selotan, simongon se selotan te Sodoma kandin doton te Baog te Sabec (iningedanan heman iyan Baog te Selotan).
355	GEN 14:18	Penga niyan, sinongon heman si Abram te selotan te Salem si Melkisedec. Sikandin heman se telekagon te Timanem Melangkaw. Inibing din se pan aw bino doton ki Abram.
361	GEN 14:24	Wedad palos ebaten ko, meneng se kinaen te menge sineligan ko, yan olò se eked ko olii. Keilangan doen heman talad te menge otaw dimapit kanak, si Aner, si Escol, aw si Mamre.”
368	GEN 15:7	Minikagi heman se Timanem, “Siaken se Timanem nengibing kamno lekat te Ur te Caldea. Tod ko ibegay ko diyà kamno se tanà seini, amon tig-epoen no iyan.”