1	GEN 1:1	Matamana negana ai na Dirava ese guba bona tanobada e karadia.
2	GEN 1:2	Tanobada na asi oromana bona asi anina; dibura danu gadobada vada e gorua ahu. Bena Dirava laumana na gado kopina ai e loava.
3	GEN 1:3	Dirava eto, Diari aine vara. Bena diari na e vara.
4	GEN 1:4	Dirava ese diari e itaia, vada e namo; bena Dirava ese diari bona dibura e haridia.
5	GEN 1:5	Dirava ese diari ladana e hatoa Dina; dibura ladana e hatoa Boi. Ado e rahi daba e rere, dina gini-gunana.
6	GEN 1:6	Dirava ma eto, Ḡau ta aine vara gadobada daenai, ranu baine haridia.
7	GEN 1:7	Bena Dirava ese ḡau ta e karaia, henu ranudia bona atai ranudia ihididia. Bena unu e vara toma.
8	GEN 1:8	Dirava ese una ḡau ladana e hatoa Guba. Ado e rahi, daba e rere, dina iharuana.
9	GEN 1:9	Dirava ma eto, Guba henunai e miamu ranudia na ae hahebou, gabu tamona ai, tano kaukauna baine hedinarai. Bena unu e vara toma.
10	GEN 1:10	Dirava ese tano kaukauna ladana e hatoa Tanobada; bona ranu na edia gabu ai e hahebou ladadia e hato Davara. Dirava ese e itaia, vada e namo.
11	GEN 1:11	Dirava ma eto, Tanobada ai rei aine vara, bona ava idau-idau mai nadinadidia, bona huahua audia danu mai huahuadia, huahua idau-idaudia mai nadinadidia. Bena unu e vara toma:
12	GEN 1:12	rei e vara tanobada ai, bona ava idau-idau mai nadinadidia, bona huahua audia mai huahuadia, huahua idau-idaudia mai nadinadidia. Dirava ese e itaia, vada e namo.
14	GEN 1:14	Dirava ma eto, Diari ae vara guba ai, dina bona hanuaboi bae haridia, bona toa ai baela, guitau bona lahara toadia, bona dina toadia, bona laḡani toadia.
16	GEN 1:16	Dirava ese diari badadia rua e kara: badana ese dina baine lohiaia, bona maraḡina ese hanuaboi baine lohiaia eto. Hisiu danu e kara.
17	GEN 1:17	Dirava ese guba ai e atodia, tanobada bae hadiaria totona;
18	GEN 1:18	dina bona hanuaboi bae lohiadia bona diari bona dibura bae hididia totona. Dirava ese e itaia, vada e namo.
20	GEN 1:20	Dirava ma eto, Mauri ḡaudia momo davara ai ae vara, bona manu tanobada daenai ae roho guba henunai.
21	GEN 1:21	Bena Dirava ese lakara-donodono bona rui bona davara ai e maurimu bona e reremu ḡaudia iboudiai e karadia, bona roho manudia iboudiai danu. Dirava ese e itaia, vada e namo.
22	GEN 1:22	Bena Dirava ese e hanamodia, eto, Besemui ba havaradia, ba hutuma, davara idoidiai bae honu honu dae; manu danu bae vara rohoroho tanobada ai.
24	GEN 1:24	Dirava ma eto, Tanobada ese mauri ḡaudia idau-idau baine havaradia, boromakau, bona tano ai e raumu ḡaudia, bona tanobada boromadia idau-idau ta ta ena bese ai. Bena unu e vara toma.
25	GEN 1:25	Bena Dirava ese tanobada boromadia idau-idau bona boromakau bona tano ai e raumu ḡaudia iboudiai e karadia, ta ta ena bese ena bese ai. Dirava ese e itaia, vada e namo.
26	GEN 1:26	Bena Dirava ma eto, Taunimanima aina karaia, lau laulaugu bona lau heida-idagu; davara gwarumedia bona atai manudia bona boromakau bona tanobada idoinai tano ai e raumu ḡaudia iboudiai ia ese baine biagudia.
27	GEN 1:27	Bena Dirava ese taunimanima e karaia, ia heida-idana, Dirava ida-idana e karaia: maruane bona hahine e karadia.
28	GEN 1:28	Bena Dirava ese e hanamodia, eto, Besemui ba havaradia, ba hutuma; tanobada ba hahonua bona ba biagua; davara gwarumedia bona atai manudia bona mauri ḡaudia tanobada ai e loamu iboudiai ba biagudia.
29	GEN 1:29	Dirava ma eto. A itaia, mai nadinadidia avadia bona mai huahuadia audia vada na henimui, amui aniani;
31	GEN 1:31	Dirava ese e kara ḡaudia iboudiai e itadia, nanamo heherea. Ado e rahi, daba e rere, dina ihatauratoina.
33	GEN 2:2	Dina ihahituna ai, Dirava ese ena ḡaukara idoidiai e hadokodia: dina ihahituna ai ia ese ena ḡaukara iboudiai e ato diho, e laḡa ani.
34	GEN 2:3	Bena Dirava ese dina ihahituna e hanamoa bona e hahelaḡaia: badina be una dina ai ena ḡaukara iboudiai e ato diho, e laḡa ani.
35	GEN 2:4	Guba bona ikaradia herevadia bini: ihavaradia negana ai Dirava Iehova ese tanobada bona guba e karava dinana ai,
36	GEN 2:5	uda audia ta be tanobada ai do we miava, aniani avadia ta do se vara; badina be Dirava Iehova ese medu tanobada ai do se hadihoa, asi tauna danu tano ibiru-henina.
38	GEN 2:7	Bena Dirava Iehova ese taunimanima tano ḡahuna amo e karaia, mauri laḡana ia uduna matudia ai e hahoho dobi, taunimanima na mauri tauna ai e halaoa.
39	GEN 2:8	Dirava Iehova ese imea ta e karaia, ladana Eden, mairiveina kahana ai, bena vada e karaia tauna unuseni ai e atoa, baine noho.
40	GEN 2:9	Dirava Iehova ese au danu tano ai e havaradia, ita-itadia bona ianidia nanamo audia iboudiai; mauri auna danu imea bogaraginai, namo bona dika idibaladia auna danu.
46	GEN 2:15	Dirava Iehova ese hari tau e abia, Eden imeana ai e atoa, ia ese baine biru henis bona baine reḡua.
47	GEN 2:16	Dirava Iehova ese hari tau e haduaia, eto, Imea audia iboudiai huahuadia bavani, emu ura heḡereḡerena;
49	GEN 2:18	Dirava Iehova ma eto, Hari tau na sibona baine noho na dia namo; lau ese ia bamona aina karaia.
50	GEN 2:19	Bena Dirava Iehova ese tano amo tanobada boromadia iboudiai e karadia, bona atai manudia iboudiai danu. Bena ia ese hari tau, Adam, vairanai e hakaudia, baine diba ia ese ladadia ede baine hato toma: mauri ḡaudia iboudiai ta ta Adam ese ladadia e hato.
52	GEN 2:21	Bena Dirava Iehova ese Adam e hamahutaia hedavauhe. Bena ruduna turiana ta e abia lasi, turia gabuna be hidio ai e daia ahu.
53	GEN 2:22	Bena Dirava Iehova ese Adam ena amo e abia lasi turiana na hahine ta e karalaia, Adam dekena e laohaia.
57	GEN 3:1	Gaigai ena aonega ese Dirava Iehova e kara boromadia iboudiai edia aonega e hereadia. Ia ese hahine e nanadaia, eto, Momokani Dirava eto umui na imea audia ta huahuana basio ani a?
59	GEN 3:3	to Dirava eto “Imea bogaraginai e ginimu auna huahuana basio ania bona basio daua toho, ba mase na garina”.
61	GEN 3:5	Dirava vada dibana raruosi bavania dinana ai na matamui bae papa, bena Dirava ida ba heḡereḡere, namo bona dika ba diba.
64	GEN 3:8	Bena raruosi ese Dirava Iehova gadona e kamonai, ia na dina kerumana ai imea lalonai e loava; bena Adam mai adavana ida Dirava Iehova vairana amo e komu, imea audia muridiai.
65	GEN 3:9	Bena Dirava Iehova ese Adam e boi henia, eto, Oi na edeseni ai?
67	GEN 3:11	Dirava Iehova eto, Daika ese e hamaorumu oi na ḡaḡaemu mo noho? Lau na haduamu basio ania nato huahuana vada o ania a?
69	GEN 3:13	Bena Dirava Iehova ese hahine e gwau henia, eto, Ina na dahaka vada o karaia? Hahine na eto, Gaigai ese e koigu, bena na ania.
70	GEN 3:14	Bena Dirava Iehova ese gaigai e gwau henia, eto, Unu vada o kara toma dainai, emu dika davana be boromakau iboudiai bona uda boromadia iboudiai edia dika davadia baine hereadia: kopamu ai do ba rau, tano ḡahuna bavania, emu mauri dinadia iboudiai.
77	GEN 3:21	Bena Dirava Iehova ese boromakau kopidia amo hahedoki dabuadia e kara, Adam ena bona adavana Heva ena, raruosi e hadabualaidia.
78	GEN 3:22	Bana Dirava Iehova eto, Taunimanima a itaia, ia na lau heḡereḡeregu ai vada ela, namo bona dika baine diba; readia ia ese imana ma baine toia roro, mauri auna huahuana baine abia, baine ania, bena baine mauri hanai-hanai.
79	GEN 3:23	Taunabunai Dirava Iehova ese Moale imeana lalona amo e lulua lasi, tano amo e vara tanona baine biru henia.
86	GEN 4:6	A Iehova ese Kain e gwau henia, eto, Badina be dahaka o badumu? Dahaka dainai vairamu o huaiamu?
90	GEN 4:10	Iehova ma eto, Dahaka vada o karaia? Tadimu rarana gadona na tano amo vada e tai henigumu.
105	GEN 4:25	Bena Adam na adavana ida ma e eno bou: bena hahine e rogorogo, e mara, mero ta e abia, ladana e hatoa Set: eto, Dirava ese natugu ta vada eme henigu, Abel Kain ese e alaia mase tauna, ibolona.
107	GEN 5:1	Adam besena karoana binai. Dirava ese taunimanima e karaia dinana ai ia ese Dirava ida-idana ai e karaia.
128	GEN 5:22	Metusela e vara murinai Enok na Dirava ida e hebamo heheniva ela bona laḡani sinahu-toi e ore; natuna mamaruanedia bona hahinedia danu e havaradia.
130	GEN 5:24	ia na Dirava ida e hebamo heheniva, murinai tau ta ese se itaia lou, badina be Dirava ese e abia.
140	GEN 6:2	Bena Dirava natuna verina ese taunimanima natudia hahinedia e itadia, i'itadia, nanamo; bena e ura henidia ulatodia na e adavadia.
142	GEN 6:4	Una dinadia ai taunimanima ḡaḡau-babadadia tanobada ai e nohova. Dirava natuna verina ese taunimanima natudia hahinedia e adavadia negadia ai na natudia e havaradia: unu na taunimanima ḡaḡau-babadadia nega gunadia ai e nohova; sivaraidia danu babada.
147	GEN 6:9	Noa sivaraina binai: Noa na kara maoromaoro tauna, ena uru ai e kara namo ḡuḡuruva. Ia na Dirava ida e havamo heheniva.
149	GEN 6:11	Tanobada na dika, Dirava vairanai: tanobada idoinai daḡedaḡe ai e honu honu dae.
150	GEN 6:12	Dirava ese tanobada e itaia, vada e dika rohoroho; badina be taunimanima iboudiai ese edia kara vada e hadika tanobada ai.
151	GEN 6:13	Bena Dirava ese Noa e hereva henia, eto, Mauri ḡaudia iboudiai dokodia be lau vairagu ai vada eme kau; badina be idia daidiai tanobada na daḡedaḡe ai veda eme honu honu dae, taunabunai, lau ese baina habuadia tari tanobada ai.
160	GEN 6:22	Bena Noa na unu e kara toma, Dirava ese e haduaia heḡereḡerena.
169	GEN 7:9	iboudiai na rua rua amo, maruane bona hahine, Noa ida e gui kau lagatoi ai, Dirava ese Noa e haḡania heḡereḡerena.
176	GEN 7:16	maruane hahine ida e gui kau, Dirava ena hahedua heḡereḡerena. Bena Iehova ese lagatoi ai e koudia ahu.
177	GEN 7:17	Dina hari-ahui lalodiai utu-utu na tanobada idoinai e utua daeva, e bada e laova, a lagatoi e keni dae atai ai.
185	GEN 8:1	Dirava ese Noa e laloa tao, bona mauri ḡaudia iboudiai bona boromakau ia ida lagatoi ai e gui danu e lalodia tao. Bena Dirava ese lai ta e siaia tanobada ai; bena ranu na e kororo.
190	GEN 8:6	Dina hari-ahui ma e ore, bena Noa ese lagatoi gaba-mauruna e kehoa, mukou ta e harohoa;
196	GEN 8:12	Dina hitu ma e noho; bena pune ma e harohoa; bena ia na vada se lou lagatoi ai, lasi vaitani.
199	GEN 8:15	Bena Dirava ese Noa e hereva henia, eto,
207	GEN 9:1	Dirava ese Noa mai natuna ida e hanamodia, eto, Besemui ba havaradia, bae vara rohoroho, tanobada bae hahonua.
212	GEN 9:6	Taunimanina baine alaia mase tauna na taunimanima ese bae alaia mase; badina be Dirava ese taunimanima e karadia, ia ida-idana.
214	GEN 9:8	Bena Dirava ese Noa mai natuna ida ma e hereva henidia, eto,
218	GEN 9:12	Dirava ma eto, Egu taravatu na henimuimu, lauegu bona umui emui danu, mauri ḡaudia umui ida nonoho iboudiai edia danu, ela bona uru iboudiai, toana binai:
222	GEN 9:16	Kevau na dagadaga ai baine hedinarai, bena baina itaia negana ai, hari mia-hanaihanai taravatuna, lau Dirava bona tanobada ena mauri ḡaudia iboudiai padadai, baina laloa tao.
223	GEN 9:17	Dirava ese Noa ma e hamaoroa, eto, Lauegu ai bona mauri ḡaudia iboudiai ediai na atuamu taravatuna toana binai.
232	GEN 9:26	Ma eto, Iehova, Sem ena Dirava, aita imodaia; Kanaan ese ia isiaina baine lao heni.
233	GEN 9:27	Dirava ese Iafet baine hanamoa, Sem ena dabua kalagadia ai baine noho, Kanaan ese ia isiaina baine lao heni.
239	GEN 10:4	Iavan natuna bini: Elisa bona Tarasisi; bona Kitim besena bona Dodanim besena danu ia ese e havaradia.
242	GEN 10:7	Kusu natuna bini: Seba bona Havila bona Sabata bona Raama bona Sabateka. Raama natuna bini: Seba bona Dedan.
262	GEN 10:27	bona Hadoram bona Usala bona Dikila
317	GEN 12:18	Bena Farao ese Abram e boiria, e gwau henia, eto, Ede vada o karagu toma? Dahaka dainai oi so hamaorogu ia na oi adavamu?
322	GEN 13:3	Diho kahana amo e laolao ela, Betele ai e kau, ena taruha gabuna gunana ai ma e taruha, Betele bona Ai padadiai;
351	GEN 14:14	Abram na e kamonai, vavana vada e abia mauri, bena ia ese ena hesiai taudia, ena taruha ai e nohova taudia, e haboudia, tuari ḡaudia e henidia, una tuari oreana muridia amo e hakaudia lao, ela bona Dan.
352	GEN 14:15	Hanuaboi ai ena orea e hapararaia, kahana kahana amo e tuari henidia, e hadareredia, e hahavadia ela bona Hoba, Damasko mirigini kahana ai.
355	GEN 14:18	Bena Melkisedek, Salem pavapavana, Dirava Herea Mikamika ena hahelaḡa tauna, ese flaoa bona vine ranuna e laohai, e dabara.
356	GEN 14:19	Ia ese Abram e hanamoa, eto, Dirava Herea Mikamika, guba bona tanobada ikaradia Diravana, ena hahenamo be Abram latanai baine mia;
357	GEN 14:20	Dirava Herea Mikamika danu aita imodaia, badina be ia ese oi inaimu na imamu ai vada e atodia kau. Bena Abram ese e abi kohudia iboudiai e karoadia, karoa gwauta; bena karoa ta Melkisedek e henia.
359	GEN 14:22	A Abram ese Sodoma pavapavana e haere henia, eto, Lau ese Iehova, Herea Mikamika Diravana, guba bona tanobada ikaradia Diravana, vada na gwvau henia hamata,
363	GEN 15:2	Bena Abram eto, Ḡaubada Iehova e, dahaka ba henigu? Lau na asi natugu; dihigu be hari Eliesere, Damasko tauna.
373	GEN 15:12	Dina e diho, bena Abram matana e mahuta, bona gari bada ese e butua tao.
378	GEN 15:17	Dina e kerekere, hanua e boi; bena Abram ese lahi mai kwalahuna e itaia, e kara kede na heto, unu vamu ahu rua padadiai.
384	GEN 16:2	Bena Sarai ese Abram e hamaoroa eto, Dibamu Iehova ese natumu ta se henigu; na noimumu, egu hesiai hahinena avabia; readia natugu ta iena amo baina abia. Bena Abram ese Sarai ena hereva e abia dae.