26	GEN 1:26	Bena Dirava ma eto, Taunimanima aina karaia, lau laulaugu bona lau heida-idagu; davara gwarumedia bona atai manudia bona boromakau bona tanobada idoinai tano ai e raumu ḡaudia iboudiai ia ese baine biagudia.
28	GEN 1:28	Bena Dirava ese e hanamodia, eto, Besemui ba havaradia, ba hutuma; tanobada ba hahonua bona ba biagua; davara gwarumedia bona atai manudia bona mauri ḡaudia tanobada ai e loamu iboudiai ba biagudia.
36	GEN 2:5	uda audia ta be tanobada ai do we miava, aniani avadia ta do se vara; badina be Dirava Iehova ese medu tanobada ai do se hadihoa, asi tauna danu tano ibiru-henina.
69	GEN 3:13	Bena Dirava Iehova ese hahine e gwau henia, eto, Ina na dahaka vada o karaia? Hahine na eto, Gaigai ese e koigu, bena na ania.
70	GEN 3:14	Bena Dirava Iehova ese gaigai e gwau henia, eto, Unu vada o kara toma dainai, emu dika davana be boromakau iboudiai bona uda boromadia iboudiai edia dika davadia baine hereadia: kopamu ai do ba rau, tano ḡahuna bavania, emu mauri dinadia iboudiai.
71	GEN 3:15	Lau ese oi bona hahine baina haheinai hehenimui, oi garamu bona ia garana danu baina haheinai hehenidia. Ia ese oi kwaramu baine huaria, bona oi ese ia aena geduna ba tutua.
72	GEN 3:16	Hahine danu e gwau henia, eto, Emu rogorogo hisina lau ese baina habadaia; hisihisi ai ba mara, to adavamu ba ura henia, ia ese biagumu ai bainela.
73	GEN 3:17	Adam danu e gwau henia, eto, Adavamu erena o kamonai, bena na haduamu basio ania nato huahuana vada o ania, una dainai tano vada baine dika oi bagumu ai. Tano anina bavania mai hekwarahimu ida emu mauri dinadia iboudiai.
86	GEN 4:6	A Iehova ese Kain e gwau henia, eto, Badina be dahaka o badumu? Dahaka dainai vairamu o huaiamu?
114	GEN 5:8	Set ena mauri laḡanidia iboudiai na sinahu-taurahani-ta gwautarua: bena e mase.
116	GEN 5:10	bena Kenan e vara murinai Enos na laḡani sinahu-taurahani gwauta-ima e mauri nohova, natuna mamaruanedia bona hahinedia e havaradia.
120	GEN 5:14	Kenan ena mauri laḡanidia iboudiai na sinahu-taurahani-ta bona gwauta: bena e mase.
135	GEN 5:29	ladana e hatoa Noa. Ia eto, Iehova ese vada e hadikaia tanona amo ina mero ese baine harohoda mauri, imada ḡaukaradia bona eda hekwarahi amo baita laḡa ani.
153	GEN 6:15	Ini ba karaia toma: latana na roha hitu-ahui ima; lababana roha gwauta-rua mai kahana; bona harana ena lata na roha hitu mai kahana.
171	GEN 7:11	Noa ena mauri laḡanina ihasinahu-tauratoina, hua iharuana, hua dinana ihagwauta-hituna, abata bada-hereana e lasi bona medu bada-hereana e diho matama.
188	GEN 8:4	ela bona hua ihahituna ena dina ihagwauta-hituna ai lagatoi e kuia kau Ararat ororona ai.
189	GEN 8:5	Ranu ma e maraḡi e laova, ela bona hua ihagwautana ena dina gini-gunana ai ororo doridia e hedinarai.
208	GEN 9:2	Tanobada boromadia iboudiai bona atai manudia iboudiai bona tano ai e raumu ḡaudia iboudiai bona davara gwarumedia iboudiai ese garimui bae gari; umui ese danu ba biagudia.
292	GEN 11:25	Tera e vara murinai, Nahoro na laḡani sinahu-ta gwauta taurahani-ta e mauri nohova, natuna mamaruanedia bona hahinedia e havaradia.
317	GEN 12:18	Bena Farao ese Abram e boiria, e gwau henia, eto, Ede vada o karagu toma? Dahaka dainai oi so hamaorogu ia na oi adavamu?
341	GEN 14:4	Laḡani gwauta-rua idia ese Kedoralaomere isiaina e lao heniava, a laḡani ihagwauta-toina ai idia na e gwau edeede.
342	GEN 14:5	Bena laḡani ihagwauta-hanina ai Kedoralaomere bona ia e duruava lohiadia na e tore isi, Refaim taudia na Astaroto-karanaimi ai e hadareredia, bona Susim taudia na Ham ai e hadareredia, bona Emim taudia na Savekiriataimi ai e hadareredia,
357	GEN 14:20	Dirava Herea Mikamika danu aita imodaia, badina be ia ese oi inaimu na imamu ai vada e atodia kau. Bena Abram ese e abi kohudia iboudiai e karoadia, karoa gwauta; bena karoa ta Melkisedek e henia.
359	GEN 14:22	A Abram ese Sodoma pavapavana e haere henia, eto, Lau ese Iehova, Herea Mikamika Diravana, guba bona tanobada ikaradia Diravana, vada na gwvau henia hamata,
367	GEN 15:6	Bena Abram ese Iehova e abidadama henia; una dainai maorona e gwauraia.
378	GEN 15:17	Dina e kerekere, hanua e boi; bena Abram ese lahi mai kwalahuna e itaia, e kara kede na heto, unu vamu ahu rua padadiai.
379	GEN 15:18	Una dina ai Iehova ese Abram e gwau henia hamata, eto, Lau ese ina tano na oi garamu vada na henidia, Aigupto sinavaina amo ela bona sinavai badana, ladana na Eufrate:
385	GEN 16:3	Taunabunai, Abram na laḡani gwauta Kanaan tanona ai vada e noho negana ai, Sarai ese ena hesiai hahinena Hagara, hane Aigupto, e abia, adavana Abram e henia, baine adavaia.
387	GEN 16:5	Bena Sarai ese Abram e gwau henia, eto, Oiemu kerere ese vada e hadikagu; egu hesiai hahinena na henimu, bavadavaia, a dibana vada e rogorogo dainai ia na se matauraigumu: Iehova ese ita raruosi baine hahemaoro henida.
418	GEN 17:20	A Ismael ome gwauraia herevana vada na kamonai; benaini, vada na hanamoamu, ia besena baine vara, garana bae hutuma; lohia gwauta-rarua ia ese baine havaradia, bese badana ai baina halaoa.
423	GEN 17:25	Natuna Ismael ena mauri laḡanidia na gwauta toi, e peritomea negana ai.
439	GEN 18:14	Be, hoa karana ta mia Iehova basine karaia diba, a? Laḡani vairai, vada na gwauraia hamata negana ai, do baina lou henimu, bena Sara ese natuna baine abia.
444	GEN 18:19	Badina be vada na abia hidi, ia ese natuna bona garana do baine reḡudia, idia na Iehova ena dala ai bae raka, bona kara namodia bona maoromaorodia bae kara, Iehova ese ena gwauhamata Abraham enai baine hamomokania helaoreana.
457	GEN 18:32	Ma eto, Ḡaubada e, basio badu, ina nega tamona mo ma baina noinoi: gwauta hona bema noho, ede bema heto? Iehova eto, Gwauta daidiai baina bogaia hisi.
486	GEN 19:28	e roha lao, Sodoma bona Gomora bona taora idoinai e ita, una tano idoinai ai kwalahu e daeva, amu kwalahuna na heto.
505	GEN 20:9	Bena Abimelek ese Abraham e boiria, eto, Ede vada o karamai toma? Ede na hadikamu toma dainai lau bona egu basileia ini vada o hakereremai toma? Hegwau-tao karana ta vada o kara henigu.
512	GEN 20:16	Ia ese Sara danu e hamaoroa, eto, A itaia, silver monidia daha-ta oi taihumu vada na henia, emu hemarai iabi-ohona taunimanima iboudiai vairadiai; iboudiai vairadiai bae gwauraimu maoro.
515	GEN 21:1	Bena Iehova ese Sara e vadivadi henia bona ena gwau-hamata heḡereḡerena e kara henia.
516	GEN 21:2	Bena Sara e rogorogo, e mara, mero ta e abia Abraham ena, edia ḡauka negana ai, Dirava ese e gwauraia guna heḡereḡerena.
528	GEN 21:14	Daba matana ai Abraham na e tore isi, lagwa e abia, bona ranu danu nani kopina ai, Hagara e henia; ia na paḡana ai e atoa, bona mero danu; bena e siaia lao. Bena hahine na vada ela, Bere-sieba tano ḡaḡaena ai ehaloa.
537	GEN 21:23	Taunabunai, Dirava ladana ai ba gwau henigu hamata, oi na basio koigu, bona natugu bona tubugu basio koidia; a lau ese vada na kara namo henimu heḡereḡerena oi danu lau ba kara namo henigu bona ina o noholaiamu tanona danu ba kara namo henia.
538	GEN 21:24	Bena Abraham eto, Vada baina gwau hamata.
539	GEN 21:25	A Abraham ese Abimelek e gwau henia, Abimelek ena hesiai taudia ese ranu gurina ta e abia havara dainai.
545	GEN 21:31	Bena una gabu ladana e hatoa Bere-sieba, badina be raruosi unuseni ai e gwau hamata heheni.
551	GEN 22:3	Daba matana ai, Abraham na e tore isi, ena doniki e abia, ena hesiai memerodia rarua bona natuna Isaak danu e abidia. Boubou lahina audia e siri vaitani, bena e tore isi, Dirava ese e gwauraia gabuna ela.
557	GEN 22:9	Raruosi na Dirava ese e gwauraia gabuna ai e kau: unuseni ai Abraham ese boubou patana e larebaia, au pata latanai e lakwaia; bena natuna Isaak e hiria, boubou patana ai e atoa kau, au latadiai.
562	GEN 22:14	Bena Abraham ese una gabu ladana e hatoa Iehova-ire; bena unu e gwauraia toma ema bonaharihari e tomu, Ororo dorina ai Iehova ese baine haḡeregu.
564	GEN 22:16	eto, Iehova na e tomu: sibogu ladagu ai vada na gwau hamata, ini vada o kara toma dainai, natumu vara-edeana, o lalokau heniamu merona, egu ai so rua dainai,
588	GEN 23:16	Abraham ese Efron ena hereva e kamonai, Hiti taudia vairadiai tano davana unu e gwauraia toma, bena silver sekele dia sinahu-hani, idia edia sekeleheḡereḡeredia, e henia.
595	GEN 24:3	Iehova, guba Diravana bona tanobada Diravana, ladana ai ba gwau hamata, natugu Isaak adavana na ini Kanaan taudia, bogaragidiai na noho hedoamu taudia, natudia ulatodia ta basio abia;
599	GEN 24:7	Iehova, guba Diravana, ese tamagu ena ruma amo e abigu oho, egu tano korikori amo e hakaugu lasi, bona e gwau henigu hamata, eto “Ina tano na oi garamu baina henidia”; bena ia ese ena aneru oi vairamu ai baine siaia, bena natugu adavana una tano ai do bavabia.
600	GEN 24:8	A hane-ulato bema gwau edeede, basinema bamomu, emu gwau-hamata bema heruha. Ḡau tamona, natugu na basio laohaia, unu basiola.
601	GEN 24:9	Bena hesiai tauna ese imana na Abraham mamuna ai e atoa kau, e gwau henia hamata, unu baine kara toma eto.
602	GEN 24:10	Bena una hesiai tauna na biaguna ena kamelo gwauta e abidia, bona kohu namodia haida danu, biaguna ena, e abi. Bena e tore isi, eha laolao, Mesopotamia tanona ela, hanua ta ladana Nahoro ai eha kau.
614	GEN 24:22	Bena ena kamelo na ranu e inu vaitani murinai, ia ese gold gadeina ta, metauna na sekele kahana, bona gold vaḡivaḡidia rua, metaudia na sekele gwauta, e vai.
625	GEN 24:33	Bena aniani e dabaraia ia vairanai; to ia eto, Basina aniani ela bona egu laolao badina aina gwauraia guna. Idia eto, A hereva.
629	GEN 24:37	Bena biagugu ese e haduagu baina gwau hamata; eto “Natugu adavana na Kanaan taudia, bogaragidiai na noho hedoamu taudia, natudia ulatodia ta basio abia,
633	GEN 24:41	Unu amo emu gwauhamata baine heruha, varavaragu dekediai ba kau negana ai; a idia na hane-ulato bema rua basiema henimu negana ai danu emu gwauhamata bema heruha”.
647	GEN 24:55	A hane-ulato taihuna bona sinana eto, Hane-ulato na mani dekemai ai baine noho pura ta eiava dina gwauta, bena bainela.
675	GEN 25:16	Ismael natudia bunu: ladadia bunu edia hanua bona edia taruha ladadia e hato; idia gwautararuosi na hanua ta ta e halohiadia.
692	GEN 25:33	Iakob eto, A gwau hamata guna. Bena Esau e gwau hamata, roboa ahuna Iakob e henia, aniani davana.
696	GEN 26:3	Ina tano ai ba noho, bena lau baina bamomu bona baina hanamomu; badina be ini tano idoidiai oi baina henimu bona oi garamu baina henidia, oi tamamu Abraham na gwau henia hamata heḡereḡerena.
702	GEN 26:9	Bena ia ese Isaak e gwau henia, eto, Lalogu vada eme parara, hahine na oi adavamu. Dahaka dainai oi oto “Ia na taihugu”. Isaak e haere henia, eto, Badina be na gari, haida ese ia dainai bae alagu mase na garina.
721	GEN 26:28	Idia eto, Lalomai vada e parara Iehova ese vada e bamomu, taunabunai ai na a tomu: baita herohemaino bona baita gwau hamata heheni,
724	GEN 26:31	Daba ai e gwau hamata heheni. Bena Isaak ese e siaidia lao, mai mainodia ida ela.
728	GEN 26:35	A Isaak bona Rebeka lalodia na e hekwarahi unu hahine daidiai.
765	GEN 27:37	Isaak ese Esau e haere henia, eto, Inai! Oi biagumu ai vada na halaoa, bona tadikakana iboudiai vada na henia, ena hesiai taudia ai baela; uit bona vine ranuna danu vada na gwaurai iena. Natugu e, dahaka baina karaia oiemu ai?
785	GEN 28:11	Bena gabu ta ai e kau, unuseni ai baine noho rani eto, badina be dina vada e diho. Bena una gabu nadidia ta e abia, ena ikwina; bena e hekure diho, e mahuta.
792	GEN 28:18	Daba matana ai Iakob e tore isi, ena hekwina nadina e haginia, pupuna ai e halaoa, latanai dehoro e seia.
794	GEN 28:20	Bena Iakob e gwau hamata, eto, Bema Dirava ese baine bamogu, ina na rakalaiamu dalana ai baine gimagu, aniani baine henigu bona dabua danu,
796	GEN 28:22	ina nadi pupuna danu hari name haginia na Dirava ena ruma ai bainela. Ba henigu ḡaudia idoidiai danu baina karoa, karoa gwauta, karoa ta oi baina henimu.
821	GEN 29:25	Daba e rere, bena Iakob ese hahine na e itaia, Lea mo. Bena ia ese Laban e gwau henia, eto, Ede vada o karagu toma? Isiaimu asina lao heni Rahela iabina totona a? Dahaka dainai o koigu?
832	GEN 30:1	Rahela na gabani, una dainai ia ese kakana e mama henia. Bena ia ese Iakob e gwau henia, eto, Natugu basio henigu vada baina mase.
839	GEN 30:8	Bena Rahela eto, Kakagu ida a hedaverai, vada na kwalimu. Bena mero ladana e hatoa Napatali.
846	GEN 30:15	A Lea ese e gwau henia, eto, Adavagu o henaoa na ḡau pipikina a? Matona natugu ena dudai ba dadi o tomu. Bena Rahela eto, Natumu ena dudai ba henigu, bena hari hanuaboi adavada ida ba eno bou.
857	GEN 30:26	Adavagu bona natugu ba henigu, badina be idia daidiai oi isiaimu vada na lao heni. A kahugu nege; egu hekwarahi emu hesiai ilao-henina ai vada dibamu.
859	GEN 30:28	Davamu a gwauraia, bena baina henimu.
860	GEN 30:29	Iakob ese e haere henia, eto, Ede na hekwarahi tomava emu hesiai ilao-henina ai vada o itaia; dibamu danu emu seri vada e hutuma lau imagu ai.
864	GEN 30:33	Nega gabedia ai vada ba dibagu, maoro eiava kerere: egu seri ai nani haida asi toutoudia asi revarevadia eiava mamoe kurokurodia ba davaridia, henao taugu ba gwauraigu.
881	GEN 31:7	Tamamui ese vada e koigu, nega gwauta davagu vada e ha-idaua, a Dirava ese e laoa ahu dainai ia ese se hadikagu.
887	GEN 31:13	Lau binai, Betele Diravana: unuseni ai oi ese boubou nadina dehoro o horolaia, bona o gwau henigu hamata. Benaini, a tore isi, ina tano amo ba raka lasi, o vara gabuna ba lou henia.”
900	GEN 31:26	Bena Laban ese Iakob e gwau henia, eto, Badina be dahaka o heau hehuni, natugu hahinedia danu abimauri hahinedia na heheto o heaulaidia?
910	GEN 31:36	Bena Iakob ese Laban e badu henia, e gwau henia, eto, Egu kerere be dahaka, egu dika be dahaka, bena oi ese daidiai o havagu mai badumu ida?
913	GEN 31:39	Uda boromadia ese e habero ḡaudia danu asina vasilai; sibogu ibolodia na heni. Henao taudia ese dina ai e henao eiava hanuaboi ai e henao ḡaudia danu davadia lauegu amo o gwaurai.
915	GEN 31:41	Laḡani ruahui emu ruma ai na nohova: laḡani gwauta-hani isiaimu na lao heni, natumu raruosi davadia, ma laḡani tauratoi emu seri davadia. Nega gwauta davagu o ha-idaua.
916	GEN 31:42	Tamagu ena Dirava, Abraham ena Dirava, Isaak ese e gari heniamu Diravana, basinema bamogu, oi na harihari ima-kavakava boma lulugu. A Dirava ese egu hekwarahi vada e itaia bona imagu ḡaukaradia vada e nene, bena boi hanuaboi e gwaumu tubu.
927	GEN 31:53	Abraham ena Dirava, Nahoro ena Dirava, tamadia ena Dirava danu, ia ese baine hahemaoro henida. Bena Iakob na ia tamana Isaak ese e gari henia Diravana ladana ai e gwau hamata.
939	GEN 32:11	Emu hebogahisi karadia iboudiai emu hesiai tauna egu ai o kara, bona emu gwau-hamata herevadia emu hesiai tauna egu ai o hamomokani, lau na dia heḡereḡere; badina be imagu mai itotohina mo ina Ioridane sinavaina na hanai nala, a harihari mai orea rua ida vada na lou mai.
944	GEN 32:16	kamelo toi-ahui mai natudia ida; boromakau hahinedia hari-ahui; boromakau mamaruanedia gwauta; doniki ruahui; bona doniki natudia gwauta.
951	GEN 32:23	Malokihi ai e tore isi, adavana raruosi bona ena hesiai hahinedia raruosi bona natuna mamaruanedia gwauta-ta-osi e abidia, sinavai maraḡina ladana Iabok bae turu hanai.
954	GEN 32:26	Hari tau na dibana ia na basine kwalimu diba, bena ia ese Iakob mamuna varovarona e daua toho; taunabunai Iakob aena e heride, ia na hari tau ida e hedaverai negana ai.
957	GEN 32:29	Hari tau ma eto, Harihari ela oi ladamu na dia Iakob; oi ladamu na Israel, badina be Dirava ida vada o goada helulu bona taunimanima ida danu, bona vada o kwalimu.