23214	MAT 1:1	Dimii nyaanzei Jesu Kirisi ŋa wee. Jesu Kirisii í jɛ tɔkui Davidi, nɔ Davidi mɔ wa jɛ tɔkui Aburahamu.
23224	MAT 1:11	Zoziasi mɔ í bí Zekonia do ifɔɛ ŋa si waati iyi ilaalui Babilɔni, ilu nlau, í jɛ inɛi Izirɛli ŋa iɡũ í nɛò ŋa si ilɛɛ.
23230	MAT 1:17	Bɛɛbɛi si dimi nŋau hai waatii Aburahamu wa hee ku naa si waatii Davidi, tɔku ikã ikã maatɛ̃ɛi í wɛɛ. Hai bi Davidi má ku naa si waati iyi à bɔò ŋa Babilɔni tɔku ikã ikã maatɛ̃ɛi í wɛɛ. Si anyiɛ, hai waati iyi à bɔò ŋa Babilɔniu ku naa si waati iyi à bí Jesu iyi à ya kpe Kirisi tɔku ikã ikã maatɛ̃ɛi í wɛɛ má.
23231	MAT 1:18	Yaase bɛi à bíò Jesu Kirisi wee. Hai waati iyi Maari í wɛɛ mudɛ̃ɛi à mua Zozɛfu. Amma hee a maa tɔtɔɔ sɛ̃ɛ Maari í nɛ asĩ do ɡbuɡbãi Hundei Ilaaɔ̃.
23232	MAT 1:19	Zozɛfu mɔkɔɛu wee inɛ dee deei. Kù bi nŋu ku dasi Maari anyɔ si bantuma. Na ŋɔi í ce í dasi idɔ nŋu ku kɔsiɛ si asii.
23233	MAT 1:20	Si bɛi wa lasabu bɛɛbɛ ŋɔi amalekai Aɔ̃ Lafɛ̃ɛ í naa í sɔ̃ɔ si ala í ni, Zozɛfu, awɔ tɔkui Davidi ilaaluu, maà ce njoi i so Maari, mudɛ̃ɛ iyi à muɛu. Dasiɛ kpasɛ̃. Asĩ iyi í nɛu bɛ, do ɡbuɡbãi Hundei Ilaaɔ̃i.
23235	MAT 1:22	Mii ŋau ihɛ̃ fei í cei ku ba ide iyi Aɔ̃ Lafɛ̃ɛ í tako í sɔ̃ walii Ezai ku sisia inɛ ŋau ku kɔ̃,
23236	MAT 1:23	iyi í ni, Mudɛ̃ɛ ɡɔ iyi kù mà mɔkɔ á na ku nɛ asĩ. Á bí ama inɛmɔkɔ, Nɔ a kpoo Emanuɛli. Yaasei iriui í jɛ Ilaaɔ̃ í wɛɛ do awa.
23239	MAT 2:1	À bí Jesui Betelehɛmu si ilɛi Zudee si waatii amanlu Herodu. Si anyii kubíɛ woo mà yaasei andaiya ɡɔ ŋa à naa Zeruzalɛmu hai nunui daakɔ,
23240	MAT 2:2	nɔ à bee à ni, iwoi ilaalui Zuifu ŋa iyi à bí nsɛiu í wa. Hai nunui daakɔi à yɛ andaiyaɛ í fita, ŋɔi à naa ku tɔɔɛ.
23242	MAT 2:4	Ŋɔi í tɔtɔɔ inɛ nɡboi woo weei Ilaaɔ̃ ŋa do woo kɔ inɛ ŋa si wooda ŋa fei nɔ í bee ŋa tenɡi bii à ni aa bí Inɛ iyi Ilaaɔ̃ í cicau.
23243	MAT 2:5	Ŋɔi à jɛaa à ni, Betelehɛmui si ilɛi Zudee domi bɛɛbɛi walii Misee í tako í kɔɔ wo,
23245	MAT 2:7	Ŋɔi Herodu í jɔ̀ à kpe woo mà ŋau do asii, í bee ŋa si waati iyi andaiyau í fita dee dee. Nɔ à sɔ̃ɔ.
23246	MAT 2:8	Iyi í ɡbɔ bɛɛbɛ nɔ í sɔ̃ ŋa í ni a bɔ Betelehɛmu a koo a bee yaasei amau wa sãa sãa. Bii à yɔɔ nɔ a nyi wa a naa a sɔ̃ nŋu ku ba nŋu mɔ nŋu koo ɡulɛa.
23247	MAT 2:9	Iyi à ɡbɔ ideɛu à tã, ŋɔi à dasi kpãa. Nɔ andaiya iyi à tako à yɛ hai nunui daakɔu í nyi í cua nŋa má hee tenɡi bii amau í wa, í bɛi í leekĩ lele bɛ cau.
23249	MAT 2:11	Nɔ à lɔ ile bɛ ŋɔi à yɛ amau do Maari iyeɛ. Nɔ à ɡulɛ à tɔɔɛ. Nɔ à fũ bɔɡɔi amani nŋa à nya wura à muaa, do tulare iyi à ya jo do ikpo ku dɔ̃ inunu iyi à ya kpe miru.
23251	MAT 2:13	Iyi woo mà ŋau à to anyi à nɛ, nɔ amalekai Aɔ̃ Lafɛ̃ɛ í naa bi Zozɛfu si ala í ni, dede i so amau do iyeɛ i sa i nɛò ŋa ilɛi Ezibiti, domi Herodu á dɛ amau ku kpa. I koo i buba bɛ titã hee ajɔ iyi an na n ni i nyi wa má ŋa.
23253	MAT 2:15	Bɛi à buba hee Herodu í koo í ku. Iyi bɛ í cei ku ba ide iyi Aɔ̃ Lafɛ̃ɛ í sɔ̃ waliiɛ ku sisia inɛ ŋau ku kɔ̃, si bɛi í ni, hai Ezibitii ǹ kpe amam wa.
23254	MAT 2:16	Ŋɔi amanlu Herodu í yɛ iyi woo mà andaiya ŋau à lɛlɛ nŋui, ŋɔi idɔɛ í kɔ̃ jiida jiida. Ŋɔi í ce dooi waati iyi woo mà ŋau à yɛ andaiyau í fita, ŋɔi í jɔ̀ à koo à kpa ama inɛmɔkɔ kpɔtɔɔ ŋa hee ku koo si do amai adɔ̃ minji ŋa fei si ilui Betelehɛmu do ilɛɛkoɛ ŋa fei.
23255	MAT 2:17	Bɛɛbɛi ide iyi walii Zeremi í fɔu í ce. Í ni,
23256	MAT 2:18	À ɡbɔ anu ku dɔ̃ si ilui Rama. À ɡbɔ inɛ ŋa à kpata, À waa cã buubuu. Asee, Rasɛlii wa kpata na irii amaɛ ŋa. Nɔ à bɔ ku lɛlɛɛ, Amma í kɔ ku ɡbɔ kulɛlɛu Si na iyi í jɔ̀ amaɛ ŋa a kù wɛɛ má.
23258	MAT 2:20	í ni, dede i so amau do iyeɛ i nyiò ŋa ilɛi Izirɛli. Inɛ ŋa iyi à waa dɛ amau ku kpa à ku.
23260	MAT 2:22	Amma í ɡbɔ iyi Aakelausii í jɛ bommai baaɛ Herodu si ilɛi Zudeeu, ŋɔi wa ce njoi ku bɔ ku buba bɛ. Nɔ Ilaaɔ̃ í sɔ̃ɔ si ala má í ni ku bɔ ilɛi Galilee. Ŋɔi í tekĩ í bɔ Galilee si bɛi Ilaaɔ̃ í sɔ̃ɔ.
23261	MAT 2:23	Nɔ í koo í buba Nazarɛti. Bɛɛbɛi idei walii ŋau í kɔ̃, si bɛi à ni aa kpoo inɛi Nazarɛti.
23262	MAT 3:1	Waati bɛɛbɛi, Zãa woo dasi inyi í naa wa ce waazo si ɡbabuai Zudee.
23263	MAT 3:2	Í ni, i kpaasi idɔ nŋɛ ŋa domi waati í maai iyi Ilaaɔ̃ á na ku jɛ bommaɛ.
23264	MAT 3:3	Idei Zãaui walii Ezai í fɔ wo, si waati iyi í ni, À ɡbɔ imui inɛ ɡɔ wa dɔ̃ anu si ɡbabua wa ni, I teese kpãai Lafɛ̃ɛ ku tɛ ŋa.
23265	MAT 3:4	Zãa wa dasi ibɔi ntoi kpookpo, nɔ wa dĩ santikii bata. Kɛtɛnɡbo do nyikɔ̃i sakoi í jɛ ijɛɛ.
23266	MAT 3:5	Nɔ inɛ ŋa à naa bi tɛɛ hai Zeruzalɛmu do hai ilɛi Zudee fei do hai ilu ŋa iyi à wa cinɡaai idoi Zuudɛ̃ɛu fei.
23268	MAT 3:7	Farisi do Sadusi ŋa mɔ à waa naa bi tɛɛ aŋa nkpɔ nkpɔ ku ba ku dasi ŋa inyi. Iyi Zãa í yɛ ŋa ŋɔi í sɔ̃ ŋa í ni, iŋɛ inɛ buu ŋa bɛi njo wukuku, yooi í sɔ̃ ŋɛ í ni i saa idɔɔkɔ̃i Ilaaɔ̃ iyi í maai wa.
23271	MAT 3:10	Wee daɡba wa kãsi tã mɔm a daò icui jĩi. Na nŋu, jĩi iyi kù waa so iso jiida fei aa daa a dasi ina.
23272	MAT 3:11	Amu inyii ǹ wa n dasi ŋɛ ku ba ku jɛ sɛɛdai idɔ ku kpaasi nŋɛ, amma inɛ ɡɔ á na ku naa si anyim. Í rem do ɡbuɡbã ntɔ ntɔ, n kù to baa ǹ bɔ baataɛ. Nŋui á da nŋɛ si Hundei Ilaaɔ̃ do ina.
23273	MAT 3:12	Wa mu mii ku fɛ bileeɛ si awɔ, nɔ ku kpã bileeu bii à kpokpoɛ, nɔ ku ko yɔyɔɔu ku dasi aka, sakou mɔ ku dasi ina iyi ci ya ku.
23275	MAT 3:14	Iyi í to wa í ni Zãa ku dasi nŋu inyi, ŋɔi Zãa wa bi ku kɔ, í ni, awɔi ì nɛ kpãa i dasim inyi, nɔ bɛirei í ce ì waa naa bi tom.
23277	MAT 3:16	Iyi í dasi Jesu inyi í tã, bɛ ɡbakã Jesu í fita wa hai si inɔ inyiu. Ŋɔi lelei Aɔ̃ í cĩ nɔ Zãa í yɛ Hundei Ilaaɔ̃ wa de siɛ wa bɛi ankasiidi.
23278	MAT 3:17	Nɔ à ɡbɔ ide ku fɔ ɡɔ wa hai lele í ni, inɛ ihɛ̃i í jɛ Amam. Ǹ buu jiida jiida, siɛi inɔ didɔ̃m fei í ya wa.
23280	MAT 4:2	Ŋɔi Jesu í ce anu ku dĩ dasã ciiji do idũ ciiji, si anyiɛ nɔ ari wa kpaa.
23281	MAT 4:3	Ŋɔi Seetam woo lɛlɛu, í naa siɛ í ni, bii awɔu Amai Ilaaɔ̃i do ntɔ, jɔ̀ kuta ŋau ihɛ̃ a kpɔò pɛ̃ɛ.
23282	MAT 4:4	Ŋɔi Jesu í jɛaa í ni, kukɔi idei Ilaaɔ̃ í ni, amanɛ ci ya wɛɛ na ijɛ nŋu akã, amma á maa wɛɛi na ide iyi Ilaaɔ̃ wa fɔ fei.
23284	MAT 4:6	Ŋɔi í ni má, bii awɔu Amai Ilaaɔ̃i, fo i dinɡaa ilɛ, domi kukɔi idei Ilaaɔ̃ í ni, Ilaaɔ̃ á na amalekaɛ ŋa wooda na iriɛ a maa deɡbeɛ, Nɔ a maa muɛ si awɔ Ku ba i maà ti i koosɛ si kuta.
23288	MAT 4:10	Nɔ Jesu í jɛaa í ni, sɛkɛɛ bɛ Seetam. Kukɔi idei Ilaaɔ̃ í ni, Aɔ̃ Lafɛ̃ɛɛi aa tɔɔ, nɔ i wɛɛ na irii nŋu akã.
23291	MAT 4:13	Amma iyi í to Nazarɛti, kù buba bɛ, Kapɛranumui í koo í buba, ilu iyi í wa kɔkɔi tenku iyi à ya kpe Galilee, si ilɛi Zabulɔ̃ɔ do Nɛfitali.
23292	MAT 4:14	Iyi bɛ í cei ku ba ide iyi walii Ezai í tako í fɔu ku kɔ̃ waati iyi í ni,
23293	MAT 4:15	Inɛi Zabulɔ̃ɔ do inɛi Nɛfitali ŋa, Aŋa iyi à wa kɔkɔi kpãa iyi wa bɔ Tenku, Aŋa iyi à wa ikpa icei idoi Zuudɛ̃ɛu, Aŋa iyi à wa ilɛi Galilee bii dimi mmu ŋa à wa,
23294	MAT 4:16	Aŋa iyi à wa si ilu kuku wo, Aŋai à yɛ inya kumá nla nla. Aŋa iyi à wa si ilɛ bii iku do ilu kuku í wa, Aŋai inya kumá í naa si.
23295	MAT 4:17	Hai waati bɛɛbɛi Jesu í sinti ku waazo, í ni, i kpaasi idɔ nŋɛ si na iyi í jɔ̀ waati í maai wa iyi Ilaaɔ̃ á jɛ bommaɛ.
23296	MAT 4:18	Ajɔ nŋu ɡɔ Jesu wa nɛ si itĩi tenku iyi à ya kpe Galilee, ŋɔi í yɛ sɔɔkɔ minji ɡɔ ŋa, Simɔɔ iyi à ya kpe Piɛɛ do ifɔɛ Anderee, à waa le taao si inɔ tenkuu.
23297	MAT 4:19	Nɔ í sɔ̃ ŋa í ni, i toom wa ŋa, nɔ an ce ŋɛ woo dɛdɛ inɛ ŋa iyi aa jɛ ti Ilaaɔ̃.
23299	MAT 4:21	Iyi í to waju nɔ í yɛ inɛ minji ɡɔ ŋa má, Zaaki do Zãa ifɔɛ, amai Zebedee ŋa. Inɛ ŋau à wa si akɔi inyi ɡɔ do baa nŋa, à waa teese taao nŋa ŋa. Nɔ Jesu í kpe ŋa.
23300	MAT 4:22	Bɛ ɡbakã aŋa mɔ à jɔ̀ akɔu do baa nŋa à waa tooɛ.
23301	MAT 4:23	Nɔ Jesu í dabii si ilɛi Galilee fei wa kɔ inɛ ŋa si cio ile bii Zuifu ŋa à ya ce kutɔtɔɔ nŋa ŋa, wa sisi nŋa laabaau jiida si bɛi Ilaaɔ̃ wa ce sɔɔlu ku na ku jɛ bommaɛ, nɔ í jɔ̀ inɛ ŋa à waa ba iri si bɔ̃ɔ dimi ikã ikã nŋa ŋa fei.
23302	MAT 4:24	Nɔ baauɛ í fanɡaa bii fei si ilɛi Siri fei, hee inɛ ŋa à wasi ku naaò bɔ̃ɔ nŋa ŋa wa bi tɛɛ. Inɛ ŋa iyi à nɛ dimii bɔ̃ɔ ikã ikã fei do inɛ ŋa iyi à nɛ wahalai ara kuro nkpɔ do inɛ ŋa iyi inɛi inɔɔko ŋa à mu, do inɛ ŋa iyi à waa ce bɔ̃ɔi cukuuna do wɛɛɡɛ ŋa, à naaò aŋa fei wa bi tɛɛ, nɔ í jɔ̀ aŋa fei à ba iri.
23303	MAT 4:25	Nɔ zamaa nkpɔ ɡɔ í too fitiɛ wa hai ilɛi Galilee do hai ilui Zeruzalɛmu do ilɛi Zudee hee do icei idoi Zuudɛ̃ɛu bii Ilu Mɛɛwa ŋau à wa fei.