1	GEN 1:1	Indeeŋe ta matapopoten kat na, Anutu iur saamba mi toono mi koroŋ ta boozomen.
2	GEN 1:2	Mazwaana tana koroŋ sa ipet zen. Yok men ta imbotmbot. Mi ilala ma imarmar. Mi zugut ta izukkaala. Mi Anutu Bubuŋana tamen ta iwwa se yok tana.
3	GEN 1:3	Mi Anutu iso: “Mat sa be iyaara!” To mat iyaara.
4	GEN 1:4	Mi Anutu ire mat tana ma ndabok, mi iut pa zugut ma imbot ndel.
5	GEN 1:5	Mat tana, ni ipaata be aigule, mi zugut be mbeŋ. Mbeŋ imar ila, mi mankwoono na, iwe aigule mataana kana.
6	GEN 1:6	To Anutu iso: “Koroŋ mbolŋana sa be ipet mi iyembut yok ma iwe ru.”
7	GEN 1:7	Tana iur koroŋ mbolŋana ta ma iyembut yok ta imbot kor na ma imbot ndel pa yok ta imbot meleebe. Tana uraata tana ipet, ito ni kwoono.
8	GEN 1:8	Koroŋ mbolŋana tana, ni ipaata be saamba. Mbeŋ imar ila, mi mankwoono mini na, aigule iwe ru pa.
9	GEN 1:9	Mi Anutu iso: “Yok ta imbot meleebe na, be ilup la lele tamen, bekena lele raraazaŋana ipet.” To uraata tana ipet, ito ni kwoono.
10	GEN 1:10	Lele raraazaŋana tana, ni ipaata be toono. Mi yok ta ilup la mbata na, ni ipaata be tai. Mi Anutu ire ma ndabok.
11	GEN 1:11	Mi Anutu iso: “Zeere, mbutmbuutu, mi ke ŋononŋan matakiŋa be tindom ma tise pa toono, mi tipiyotyooto pwon mi ŋonon.”
12	GEN 1:12	To koroŋ tana tindom ma tise, tito ni kwoono. Mi Anutu ire ma ndabok.
13	GEN 1:13	Mbeŋ imar ila, mi mankwoono mini na, aigule iwe tel pa.
14	GEN 1:14	Mi Anutu iso: “Koroŋ pakan be tipet sala saamba mi tiur mat pa toono, mi tiur mbut pa aigule mi mbeŋ, mi tiur seŋgaaŋa pa aigule, ndaama, mi gorgor pakan tomini.”
16	GEN 1:16	Tana ni iur koroŋ bibip ru raama zin pitik. Koroŋ zazaŋana iyaara pa aigule, mi koroŋ raurauŋana na, iyaara pa mbeŋ.
17	GEN 1:17	Ni iur koroŋ boozomen tana sala saamba, be tiur mat pa toono, mibe tiur mbut pa aigule mi mbeŋ. Mi Anutu ire ma ndabok.
19	GEN 1:19	Mbeŋ imar ila, mi mankwoono mini na, aigule iwe paŋ pa.
20	GEN 1:20	To Anutu iso: “Koroŋ kalaŋan matakiŋa be tipet ma tipepen yok mi tai leleene. Mi man matakiŋa be tipet ma tirie pa maŋaanaŋana.”
21	GEN 1:21	Tana ni iur zin buzur zazaŋan ta timbot tai leleene, ramaki koroŋ matakiŋa ta timbot pa yok mi tai na, mi iur zin man tomini. Mi Anutu ire ma ndabok.
22	GEN 1:22	To ipombol zin mi iso: “Kepeebe mi kamasak ma kepepen tai, yok, mi toono.”
23	GEN 1:23	Mbeŋ imar ila, mi mankwoono mini na, aigule iwe lamata pa.
24	GEN 1:24	To Anutu iso: “Koroŋ kalaŋan matakiŋa be tipet pa toono. Koroŋ ta kembei: Mbili kar kan, mi koroŋ su kan, mi koroŋ boozomen ta tikarra pa toono na.”
25	GEN 1:25	Tana Anutu iur zin koroŋ tana, mi ire ma ndabok.
26	GEN 1:26	Tona Anutu iso: “Iti ko tuur tomtom sa ma kembei ta iti. Ito itundu ruŋgundu. Mi ni ko imboro toono, mi ye, man, mbili, mi koroŋ boozomen ta tikarra pa toono na.”
27	GEN 1:27	Tana Anutu iur tomtom ma kembei itunu ruŋguunu. Ni iuri ma irao kat itunu ruŋguunu. Iur tomooto mi moori.
28	GEN 1:28	Mi Anutu ipombol zin ma iso: “Kepeebe ma kamasak, mi karao pa toono ta boozomen. Mi komboro ye, man, mi koroŋ kalaŋan boozomen ta timbotmbot pa toono na, mi motoyom pa.
29	GEN 1:29	Mi keleŋ, nio aŋur zeere, kini, mi mba ta boozomen piom be kakan.
30	GEN 1:30	Mi koroŋ kalaŋan matakiŋa boozomen ta timbotmbot pa toono na, ina nio aŋur mbutmbuutu mi ke runrun pizin be tikan.” Anutu iso ta kembei, mi uraata tana ipet, ito ni kwoono.
31	GEN 1:31	Anutu ire koroŋ boozomen ta iur zin na mi iso: “Wai! Iŋgi ambai komboono.” Mbeŋ imar ila, mi mankwoono mini na, aigule iwe lamata mi ta.
32	GEN 2:1	Ina zaala ta saamba, toono, mi koroŋ ta boozomen tipet.
33	GEN 2:2	Indeeŋe aigule iwe lamata mi ru pa na, Anutu keteene su pa uraata kini. Pa uraata kini ta boozomen, ta ni iposop ma imap kek.
34	GEN 2:3	Mi iur kampeŋana kini pa aigule tana, mi ipakur ma iwe potomŋana. Paso, indeeŋe aigule tana, ni keteene su pa uraata kini tau iur saamba mi toono na.
35	GEN 2:4	Ina mbol ta iso pa zaala ta saamba mi toono tipet.
36	GEN 2:5	Indeeŋe Merere Anutu iur saamba mi toono matapopoten na, kosa sa indom ma ise pa toono zen. Ke som, mbutmbuutu som. Paso, ni ikam yaŋ ma isu pa toono zen, mi tomtom sa imbot be ikam uraata pa toono zen.
37	GEN 2:6	Tamen yok izze pa meleebe, mi ipembesmbeeze toono.
38	GEN 2:7	Mi Merere Anutu ikam toono, mi imbuuzu ma iwe tomtom, to iwi bubuŋana mata yaryaaraŋana ilela pa kuzuunu, mi tomtom tana imaŋga ma mataana iyaryaara.
39	GEN 2:8	Lele ta, ta imbotmbot la ki zoŋ uunu, zaana Eden. Lele tana Merere Anutu iur ma iwe mokleene. To iur tomtom ta itunu iuri na ma ila imbot pa.
40	GEN 2:9	Mi Merere Anutu ikam ma ke ndabokbokŋan matakiŋa tindomdom pa mokleene tana. Ke tana ambai be tere mibe takan. Mi mokleene lukutuunu na, ke ru timendernder. Ta na, ke ki mbotŋana mata yaryaaraŋana. Mi toro na, irao be ikam ma tikilaala ŋgar sananŋana mi ŋgar ambaiŋana.
41	GEN 2:10	Mi yok ta, ta irereere ma ipet pa mokleene tana mi ipembesmbeeze toono. Yok tana ipet mat pa mokleene, to ibogboogo ma iwe namannaman paŋ.
42	GEN 2:11	Namaana ta, zaana Pison. Ina ireere ma ila pa toono Abila. Toono Abila tina na, gol ambaiŋana mi pat ndabokbokŋan pakan timbotmbot pa.
44	GEN 2:13	Mi yok namaana toro ta iwe ru pa, zaana Gion. Ina ireere ma ila pa toono Kus.
45	GEN 2:14	Mi namaana toro ta iwe tel pa, zaana Tigris. Ina ireere ma ila pa lele pakaana ki Asiria ta zoŋ ise pa i. Mi namaana ta iwe paŋ pa na, zaana Euprates.
46	GEN 2:15	Tana Merere Anutu ikam tomtom ta imbuuzi na, mi ila iuri su mokleene Eden, be ikam uraata mi mataana pa.
47	GEN 2:16	Mi iur sua pini ta kembei: “Ke ŋonon boozomen ta timbotmbot pa mokleene ti, ina nu irao kan. Mi ke ta irao ikamu ma kilaala ŋgar sananŋana mi ŋgar ambaiŋana na, ke tana, nu kan pepe. Pa aigule ta sombe kan, na kola meete.”
49	GEN 2:18	To Merere Anutu ikam ŋgar ta kembei: “Tomtom itutamenŋana ta kembei na, ambai som. Kenako aŋur le gaabaŋana sa ta irao be iuuli.”
50	GEN 2:19	Tana Merere Anutu ikam toono, mi imbuuzu ma iwe koroŋ ta tiwwa pa toono na, mi man ta tirie pa maŋaanaŋana na, mi ikokor zin ma tila ki tomtom, bekena ire: Ko tomtom ipaata zin be parei. Mi tomtom ipaata koroŋ tana zanzan ma timap.
51	GEN 2:20	Ta kembena ta tomtom iur zan ma ikot zin mbili kar kan, mi koroŋ su kan, mi man ma timap. Mi ni itunu na, le gaabaŋana sa ta irao be iuuli na som.
52	GEN 2:21	To Merere Anutu ipametmeete tomtom ma ikeene ma izemke i, mi ipas ka siel ta ma ipet, mi ipasirimkaala pa mazaana.
53	GEN 2:22	To ikam ka siel tana, mi iurpe ma iwe moori, mi ikam moori tina mi iuri ma ila ki tomooto.
54	GEN 2:23	Beso tomooto ire i na iso: “Aa buri. Tiroono kembei ta nio tiroŋ, mi mazaana kembei ta nio mozoŋ. Iŋgi Adam ri. Tana nio ko aŋpaati be waeŋ. Paso, ni iyooto pa ituŋ.”
55	GEN 2:24	Uunu tina ta tomooto sa, sombe iwoolo, na bela izem tamaana mi naana, mi ziru kusiini tiparlup zin ma tiwe tamen.
56	GEN 2:25	Indeeŋe mazwaana tana na, tomooto ziru waene len mburu sa be ipakaala zin som. Tamen kan miaŋ som.
57	GEN 3:1	Mooto, ni tomini imbotmbot mokleene. Mi ni le ŋgar biibi kat pa pakaamŋana ma ilip pa koroŋ boozomen ta Merere Anutu iur zin na. Aigule ta na, ni imaŋga mi iwi moori. Iso: “Parei, Anutu iŋgalsek pa niomru be kakan ke ŋonoono sa ta imbot mokleene tiŋgi pepe? Ina ŋonoono?”
58	GEN 3:2	Mi moori ipekel sua kini ma iso: “Soom, ke ta boozomen ti, niamru irao amkan ŋonon makiŋ.
59	GEN 3:3	Tamen ke ta imender la mokleene lukutuunu na, Anutu iso yam pa ta kembei: ‘Kakan pepe, keteege pepe. Kokena kemeete.’”
60	GEN 3:4	To mooto iso pa moori mini: “Soom, niomru ko irao kemeete na som. Anutu, ni iute: Sombe kakan, inako motoyom ikam pak, mi ŋgar tiom ipet ma kembei ta ni itunu, mi kikilaala ŋgar ambaiŋana mi ŋgar sananŋana.”
62	GEN 3:6	Moori ire ke tana ŋonoono na, kembei ambai pa kanŋana. Tabe mata berber pa. Mi isombe ke tana ŋonoono ko ikam le ŋgar. Tana ikam mi ikan. Mi ikam waene ta ziru timbotmbot na kana ma ikan tomini.
63	GEN 3:7	Ziru tikan makiŋ, to matan ikam pak mi tikilaala zitun kembei timbot sorok. Tabe tila ma tikam ke runrun mi timbat, bekena tipakaala zin pa.
64	GEN 3:8	Rorou, ma lele iluumu, to Merere Anutu isu mi iwwa pa mokleene. Mi ziru tikanamaali, to tiko ma tila tike lela ke lene.
66	GEN 3:10	Mi ni ipekel sua kini ma iso: “Nu wa pa mokleene mi nio aŋkanamaalu, tabe aŋmoto mi aŋmar aŋke i. Pa iŋgi aŋbot sorok.”
68	GEN 3:12	Tomooto iso: “Nio som. Moori ta nu uri pio ta ikam ma aŋkan.”
69	GEN 3:13	Tona Merere Anutu iso la pa moori: “Wai, nu kam mbulu taiŋgi paso?” Mi moori iso: “Nio som. Mooto ipakaam yo, tabe aŋkan.”
70	GEN 3:14	To Merere Anutu iso la pa mooto ta kembei: “Nu kam mbulu sananŋana kat, tana kadoono tabe aŋkam pu i ko biibi ma ilip. Mbotŋana ku ko ipa ndel pa zin mbili ma koroŋ su kan ta boozomen. Ketem ruunu ko iwe kumbum keteene, mi pa pa. Mi kom kini na, musmuuzu ki toono. Mi ko mbotmbot ta kembena ma irao swom.
71	GEN 3:15	Mi nio ko aŋkam ma niomru moori kaparwe koyom koi. Mi popoŋana ku mi popoŋana kini ko tiparwe kan koi tomini. Popoŋana kini sa ko ipapaala utem, mi nu ŋase pa kumbu dibiini.”
72	GEN 3:16	Mi moori na, Anutu iso pini ta kembei: “Nu sombe kopom, nako pataŋana ikamu. Mi sombe kam tomtom, na nio ko aŋkam ma re yoyouŋana biibi kat. Tamen ŋgar ku ko iko pa waem na som. Mi nu ko mbot la ni kopo mbarmaana mi ni imboro u.”
73	GEN 3:17	Mi Adam na, Anutu iso pini ta kembei: “Nu leŋ la waem kalŋaana, mi kan ke ŋonoono ta aŋur ŋgalseki pa na. Uunu ku tana, ta ikam ma iŋgi be aŋpasaana toono i. Mazwaana ta so nu mbotmbot su toono, nako kam uraata ma biibi, to ndeeŋe kom kini.
74	GEN 3:18	Toono ko ipiyotyooto ro sananŋan mi worwooro matanmatanŋan pu. Mi nu ko kan zeere ma kini ta izze pa toono tana.
75	GEN 3:19	Tana ko mbel uraata ma kom uze ipet, tona ndeeŋe kom kini. Mi ko tekteegi ta kembena ma irao meete mi sula mini toono. Pa nu tina, nio aŋbuuzu u pa toono. Tana ko miili mini pa toono. Pa nu sa toono na.”
76	GEN 3:20	Tomooto na, ni ipaata kusiini zaana be Eba. Paso, ni iwe tomtom ta boozomen nan.
77	GEN 3:21	Mi Merere Anutu iurpe len mburu pa mbili kulin, mi ipakaala zin pa.
78	GEN 3:22	To Merere Anutu iso: “Wai! Iŋgi tomtom le ŋgar kembei ta iti. Pa iute ŋgar ambaiŋana mi ŋgar sananŋana kek. Kokena isemboron namaana pa ke ki mbotŋana mata yaryaaraŋana tomini ma ikan sorok, to imbotmbot ta kembei ma alok.”
79	GEN 3:23	Tana Merere Anutu iziiri zin pa mokleene Eden, bekena tila tikam uraata pa toono ta ni iur zin ma tipet pa na.
80	GEN 3:24	Iziiri zin ma tipet, to iur aŋela mbolŋan ma timbot la mokleene Eden zilŋaana ta imbot la ki zoŋ uunu na, ramaki buza ta you ikanan la mi itortoori, bekena tipakaala zaala ta ila pa ke ki mbotŋana mata yaryaaraŋana.
81	GEN 4:1	Tona Adam ziru kusiini Eba tikeene. Mi Eba kopoono, to ipeebe pikin tomooto ta, zaana Kain. Pikin isu, mi Eba iso: “Merere iuulu yo, tana aŋkam pikin tomooto ti.”
82	GEN 4:2	Kaimer to Eba ikam pikin tomooto toro, zaana Abel. Ni ziru toono Kain timbot ma tiwe tomtom, to Abel imborro zin mbili mi Kain ikamam uraata pa mokleene.
83	GEN 4:3	Aigule ta na, Kain ikam kini pakan ma ila be ipatoron Merere pa.
84	GEN 4:4	Mi Abel, ni ikam sipsip kini muŋgamuŋga ta ndekndekŋan, mi ipun zin ma ikam mazan mi mbuyen be ipatoron Merere pa. Mi Merere leleene pa Abel mi patoronŋana kini.
85	GEN 4:5	Tamen Kain mi patoronŋana kini na, Merere leleene pa som. Tabe Kain keteene malmal kat, mi mataana isukuundu.
87	GEN 4:7	Sombe kam kat mbulu, inako nio leleŋ pu mi irao nim ise mini. Nu tina, kozo re u. Pa sanaana izaŋzaaŋu su kataama kwoono. Tana gabiizi itum, mi koto ŋgar sananŋana tana.”
88	GEN 4:8	Tona Kain isu mi iso pa tiziini Abel. Iso: “A barau, mar na ituru tala tawwa lende ri.” Ziru tipa ma tilae ri, to Kain burup mi ipun tiziini Abel ma imeete.
90	GEN 4:10	Tona Merere iso pini ta kembei: “Wai, nu kam mbulu sananŋana taiŋgi paso? Tizim siŋiini ta ireere su toono ta iboboobo se pio be aŋpokot.
91	GEN 4:11	Nu pun tizim ma siŋiini ireere, mi toono kwoono ikaaga mi iwin kek. Tana iŋgi aŋur lem kadoono ta kembei: Nu ko irao mbot toono tiŋgi mini na som.
92	GEN 4:12	Mi sombe kam uraata pa toono mi paaza kom kini pa, nako ise som. Tana ko zirri u mi wwa pa toono. Mi ko lem kar sa be mbot pa na som.”
93	GEN 4:13	Kain ileŋ sua tana, to iso pa Merere ma isombe: “Kadoono ta ur pio na, biibi mete. Irao be aŋbaada na som.
94	GEN 4:14	Pa iŋgi be nu ser yo pa toono tiŋgi ma aŋla leŋ kat pa nu motom i. Mi ko leŋ kar sa be aŋbot pa na som. Tana ko aŋwwa leŋ sorok, mi sombe tomtom sa indeeŋe yo, nako ipun yo ma aŋmeete.”
95	GEN 4:15	Tamen Merere iso: “Na som. Tomtom sa isombe ipunu, nako nio aŋpokot pa lamata mi ru.” To iur kilalan ta ise ki Kain, beso tomtom tire i, na irao tipuni som.
96	GEN 4:16	Tona Kain izem Merere, mi ila imbot su toono pakaana ta zaana Nod. Toono tana imbot la lele pakaana ki mokleene Eden ta zoŋ izze pa i.
97	GEN 4:17	Kaimer to Kain ziru kusiini tikeene. Mi moori kopoono, to ikam pikin tomooto ta, zaana Enok. Timbotmbot ma kaimer tona Kain iur kar biibi ta, mi ipaata lutuunu Enok zaana pa.
98	GEN 4:18	Timbot ma Enok iwoolo, to ipeebe Irad. Irad imbot ma iwoolo, to ipeebe Meuyael. Meuyael imbot ma iwoolo, to ipeebe Metusael. Mi Metusael, ni ipeebe Lamek.
99	GEN 4:19	Lamek, ni iwoolo moori ru. Ta zaana Ada, mi toro zaana Zila.
100	GEN 4:20	Ada, ni ipeebe Yabal. Yabal popoŋana kini timbotmbot la beeze men mi timborro mbili.
101	GEN 4:21	Yabal tiziini zaana Yubal. Yubal, ni ikam maata pa gita punŋana, mi mamaaza wiŋana.
102	GEN 4:22	Lamek kusiini Zila ipeebe Tubal-Kain. Tubal-Kain, ni ikam maata pa mburu uraata kana matakiŋa ta tiurpe pa baras mi ain na. Mi Tubal-Kain lunuri zaana Naama.
103	GEN 4:23	Lamek, ni iso pa kusiini bizin ru ta kembei: “Ada niomru Zila, kuŋgun talŋoyom pio. Kusiŋ bizin ru, keleŋ sua tio ti. Tomtom tasa isombe ipun yo, nako aŋpuni ma imeete. Mi sombe naŋgaŋ tasa ipeeze poŋoŋ, na ni tomini, ko aŋpuni ma imeete.
104	GEN 4:24	Tomtom tasa isombe ipun Kain ma imeete, nako tipokot pa lamata mi ru. Tamen nio na, tomtom tasa isombe ipun yo ma aŋmeete, nako tipokot pa tomto tel laamuru mata mi ru (77).”
105	GEN 4:25	To Adam ziru kusiini Eba tipeebe pikin tomooto toro, mi Eba iso: “Kain ipun Abel ma imeete kek, tanata Anutu ikam leŋ pikin toro ti, be ikam Abel muriini.” Tana Eba ipaata pikin tana zaana be Set.
106	GEN 4:26	Kaimer to, Set ipeebe pikin tomooto ta, mi ipaata zaana be Enos. Indeeŋe gorgor tana na, zin tomtom timaŋga be tikam suŋŋana pa Merere mi tipakur zaana.
107	GEN 5:1	Iŋgi Adam popoŋana kini tipet ta kembei: Indeeŋe Anutu iur zin tomtom na, iur zin kembei ta itunu ruŋguunu.
108	GEN 5:2	Iur tomooto mi moori. Iur zin makiŋ, to ipombol zin mi ipaata zin be ‘tomtom.’
109	GEN 5:3	Adam ndaama kini irao kembei 130, to ipeebe pikin tomooto ta ma kembei ta itunu ruŋguunu, mi ipaata zaana be Set.