23214	MAT 1:1	Buk towen waseg delen Yeisuw Kelis, tabun kweiboug Deibid, kweiboug tonen tabun Ebelam.
23218	MAT 1:5	Salmon natun Bowas. Bowas inan yagan Leyab. Bowas natun Obed. Obed inan yagan Lut. Obed natun Desiy.
23224	MAT 1:11	Yosiyak nitun Yekonay siney budan, tutan ikoulups ineis Babilon.
23225	MAT 1:12	Ineis Babilon ikous, Yekonay natun Salatiyel. Salatiyel natun Delububel.
23230	MAT 1:17	Yeisuw delen, tasilamaw Ebelam waseg, tavin Ebelam, tayuwein Ebelam natun, tatounun Ebelam tabun, tavasin Ebelam tabun natun, beibus ee... tutan Deibid waseg, babiweis sinawatan teivas. Tasilamaw Deibid waseg, tavin Deibid son natun, tatounun Deibid tabun, tavasin Deibid tabun natun, beibus ee... tutan min-Babilon ikawes inawes wasiven, babiweis sinawatan teivas. Tasilamaw tutan ineis Babilon tavin ee... tutan Kelis waseg, babiweis sinawatan teivas.
23239	MAT 2:1	Tutan inan nikop Yeisuw ven Betelem waseg, wawnuwan ven Yudiy, ven babaw siking Elod. Tassinaps mwasanin siven wanuvid mo imeis Yelusalem, ilansa, “Yakamiy min-Yudiy miking kweivaw, avanuy mikopweyas? Peinan nakakin anwutun kweivaw neipel, mwana nakam kid bakakulul wamatan.”
23243	MAT 2:5	Ilansa, “WaBetelem, wawnuwan ven Yudiy; peinan palopit teitan nilel Yowbad anilivan mamagina:
23244	MAT 2:6	‘Ya̱koum ven Betelem wawnuwan ven Yudiy, bo kumug. Nag kukuyeim Yud guyawaw watiblous, nag. Peinan takaleiwag bikamat ven Betelem waseg; mtowen mo bikaleiwag gungamag Yisleil wasigeis.’ Palopit towen anilivan mamagin.”
23246	MAT 2:8	Ilivans ikous, mo ikayabes bineis Betelem, ilana, “Gwad towen kuneves beibwein; kukin bukuba̱nes, kuyums kumeis, kudibakeigs; yey mo ban akulul wamatan.”
23253	MAT 2:15	Elod gog bikayyamat tasiyas tassinaps, ikayyamata ee... nag; nanon ilana, “O bo ikatidavigs.” Kapasal nuwan, ikayabes nagamag, beiweiys kid a̱pwaw tasiyas tawaw Betelem o walasin ven wasigeis, ilana, “Tasiyas asibweilim katanok o akweiy kuwaweiysa beikous.” Peinan nikatugwan tassinaps wasigeis avei-tut nikop gwad towen. Idok kid Yeisuw bikatimet, tage Yowbad anilivan kweiboug napalopit Yelemay nilivnek mamagina: “Ven Lem waseg mo biliganes va̱lam avakaein. Lakel o vinay-nen Yisleil biva̱lams nitsiyas pines. Ta-ma̱wan bivkakes beitout ninous, peinan nitsiyas bo imtakous.” Yelemay anilivan kweiboug, bo ikamat tut towen waseg. E, Yosep siney angamag Yidipt waseg isesus ee... ikanig Elod. Peinan kweiboug napalopit nilivnek mamagina: “Natug waYidipt mo adouw im.”
23260	MAT 2:22	Iligen Elod ikanig, o Elod natun Alkelaw, taman nakaleiwag bo ikow, ikaleiwag ven Yudiy waseg. Yosep anpwa̱yat beiyum ven towen waseg, kweitan sinap ikakin anmikon waseg, mo inoyes kidenen Galiliy, ineis ven Nasalet, isiwas. Mapuna ikamat palopit anilivan mamagina: “Bidokes towen gum-Nasalet.”
23262	MAT 3:1	Igaw nisesus Nasalet mo Yon isilamaw nageiguy ven Yudiy wanawoud, mtowen tabibapta̱ysein gamags, ilana, “Bikanavin ninoumiy, sinap kalbaleb kulavewas, peinan Yowbad kakita bisilamaw nakaleiwag.”
23272	MAT 3:11	Yon mo ilivan, ilana, “Yey, bo nabapta̱yseimiy yevagam waseg, peinan bo kulavewas amisinap kalbaleb. Igaw teitan beim, tatawtoun; yey nag kadilok ba̱kew inasandol, peinan guyaw avakaein. Mtowen beim mo bibapta̱yseimiy Kululuwan Bwanabwein waseg, mamagina kov. Mamagina nakaytuk wanaman biwaway anawit, va̱gan bikow anagin bwanabwein binow waseigous, simwan gog bisen bigigob kov tuta babaw.”
23276	MAT 3:15	Iw to Yeisuw, ilana, “Bweina kuvag nagein. Kadiloka sinap babaw bwanabwein bitayakous.” Mo itam.
23282	MAT 4:4	Yeisuw ikatimop aygan, ilana, “Bukitab waseg livan nises mamagina: ‘Kan makaw nag biyamov gamag; nag. Tage Yowbad anilivan kweitan kweitan mo biyamoves gamags.’”
23283	MAT 4:5	Ikous sinap towen, Seitan mo itok Yeisuw inow Yelusalem waseg, itamnow Yowbad nabunatum wakunuwatan, idibek, ilana, “Magat ya̱koum Yowbad Natun yak, kwaspepel kun watinow. Nag aveiyag bivag, peinan livan nises Bukitab waseg mamagina: ‘Bo bisek nataka̱yobs siwotet va̱gan bimtakavateims, binupeims yak; mata ge dakul iweiy kakeim.’”
23288	MAT 4:10	Yeisuw mo ikan Seitan, ilana, “Kusineikik. Bukitab waseg kweitan livan nises mamagina: ‘DaGuyaws Yowbad bukukulul wamatan; Towen anmwa̱net bukutapwa̱loul waseg.’”
23290	MAT 4:12	Wankuyeim kweitan tut gamag mwasanin mo inekes Yeisuw, ilansa, “Bo iyousis Yon inawes wa̱deil.” Yeisuw iligen mo inoun in Galiliy.
23332	MAT 5:29	“Kukin gog matam wamkwa̱tay bikaleiwag mo bukukwalouw, kadiloka kugut kulev bein tana̱ban. Bweina kuyamkwen matam palatanok; mata ge tamkwa̱lan mo son woum bigob wadiginasim.
23333	MAT 5:30	“Kukin mukwa̱tay bikaleiwag va̱gan bukukwalouw, kuboub, kulev bein tana̱ban. Bweina palatanok namam; mata ge bukuyamkwen woum sona tamkwa̱lan wadiginasim.
23336	MAT 5:33	“Kukwakins tammwayas kweitan sikaleiwag kweiboug mamagina: ‘Awoum kutabudabod mav. Bukutabudabod, bweina kuvag ma̱wan, daGuyaws silma̱nin.’
23347	MAT 5:44	Tage yey gunakaleiwag mamagina: ‘Kusiwyoubus tasiyas nikamliweimiy; kunitougs Yowbad waseg va̱gan kid bilabes tasiyas iyagageimiy.’ Bo ma̱wan bukumlavags Tamads nitun yakamiy, peinan mtowen wanakaew nilabes takalba̱lebs sisiyas toubweins, ka̱las ivag ikal yam katanok katanok wasigeis, o kweis isekes asibabaw-wan.
23365	MAT 6:14	“Bukunumlaves o bukuwidis youd babaw wasigeis gamag tasiyas niyagageimiy, igaw gog Tamads mo biwid amisinap kalbaleb yakamiy.
23402	MAT 7:17	“Kukin amweilok bwein, mo beivag anagin bwein; kukin gog kalbaleb, mo kalbaleb anagin. Mapun alana, ‘Bukukines siwotet mo bukukwakins asisinap ama̱wan.’
23417	MAT 8:3	Yeisuw isen naman wa̱won toulepel towen, ilana, “Bo bukubwein,” mo ibwein kaleivin towen.
23427	MAT 8:13	Yeisuw mo idibek takalikay towen, ilana, “Bweina kunoun; musimounid waseg bo bivag mawa̱na nanoum.” E, tut towen waseg, mo ibwein natouwat.
23436	MAT 8:22	Yeisuw ilana, “Awoum. Tut towen kubwa̱kun waseg yey. Bweina takanigs tatineis bidibwanis.”
23444	MAT 8:30	Ikines kadiveiyov bwaloud babaw ikamkwams awuyow. Yeiluw tasiyas igilagels, initougs Yeisuw waseg, ilansa, “Bweina kwayabem bakan baka̱siw mansiyas bwaloud wasigeis, ke?”
23452	MAT 9:4	Tage Yeisuw ikakin ninous, mapuna idibakes, ilana, “Aveiyag wawun ninoumiy kalbaleb? Bweina balivan, balana, ‘Bawid amsinap kalbaleb beikous,’ o bweina balivan-vak balana, ‘Kutamanaw kunoun.’ Wotet akweiy gagab waseg yey.
23459	MAT 9:11	Tasiyas Palisiy ikines, idibakes navamul, ilansa, “Aveiyag wawun mitovek ikamkwam siney takalbalebs sisiyas tasiyas takaweins ta̱kis? Bo igak!”
23468	MAT 9:20	Igaw inounas, vin na̱tan isap watibwelon, buya̱vin iwta̱wout yam babaw, bweilim sinawatan akweiy nag beibwein. Nanon ilana, “Bo bakabkwen Yeisuw anakweim, mo ba̱bwein;” mapuna watibwelon Yeisuw ikabikon anakweim matan.
23474	MAT 9:26	Butun inawotet towen inganegs ven towen avakaein waseg.
23480	MAT 9:32	Yeisuw siney navamul inounas ineis, gamag mwasanin mo imeyes taw teitan takakon, bwagaw neiweiy anilivan wadadan. Bwagaw towen Yeisuw ikayeb mo ikilev, gamag towen mo ilivan bwein. Gamag babaw ikines, bo isom ninous, ilansa, “Sinap kweitan-wan. Kweiboug nag takines wadavanuys, min-Yisleil ya̱kids, peinan kweivaw sinap towen, tawtoun.”
23488	MAT 10:2	Tasiyas sinawatan teiy takaweins liva̱nen Yeisuw yiges mamagina: Saymon, yagan kwayuwein Pita; Saymon bwadan Andiluw; Yemes, mtowen Sebediy natun; Yemes bwadan Yon; Pilip son Batolomiw; Tomas son Matiw, mtowen takawein ta̱kis; Yemes, mtowen Alpiyow natun, son Tadiw; kweitan gum-Kenan yagan Saymon, son Yudas Iskaliyot, mtowen tasikodein Yeisuw.
23510	MAT 10:24	“Navamul awoum bimgwey natakatimlakay waseg; natouwat awoum bikaleiwag natovek waseg. Tage gunavamul yakamiy ma̱wana mitakatimlakay yey, o guntouwat yakamiy ma̱wan mitovek yey. Bo idokeigs baloum yey, singay bo bitawyageimiy, peinan gungamag yakamiy.
23535	MAT 11:7	Iyums tasiyas, Yeisuw mo ikatiga̱nes gamag babaw peinan Yon, ilana, “Kweiboug kuneis wanawoud, aveiyag silma̱nin bukukines? Bukukines kay iguwen yag, ne?
23538	MAT 11:10	“Peinan liva̱nen Yon nises, magina Yowbad anilivan nidibek Mesay, palopit mo ilel Bukitab waseg mamagina: ‘Akayeb guntouwat bimgwayeim, bikidumwal muked beibwein.’”
23549	MAT 11:21	“Kuva̱lams yakamiy Kolesin o yakamiy Beteseid. Magat kweiboug tasiyas Ta̱yil o tasiyas Sidon bikines mulin naman Yowbad ma̱wana gunawotet nukukines nagein, nuwanaw mo bisimounids, bipiyaves kid asisinap kalbaleb, sona koun sewed biva̱lams-wan peinan asisinap kalbaleb, mo bipiyaves. Yakamiy gog nag. Mounid adibakeimiy igaw tutan Yowbad bimop vena babaw asisinap, tasiyas bilivatus sikalbaleb kakit, yakamiy gog avakaein.
23561	MAT 12:3	Yeisuw ilana, “Adok nag kukwakins liva̱nen Deibid, nises Bukitab wanuwan. Peinan asimoun siney nagamag, isiws Yowbad wanbunatum, ikams bled towen nises Yowbad wamatan. Tanuwgwes lun bo ikatibomes bled towen. Na-ikadilok Deibid beikam; nagamag-vak nag beikams; misinaka tasiyas tanuwgwes lun. Tage tanuwagan lun isek Deibid sen nagamag, mo ikams, peinan singaya asimoun.
23565	MAT 12:7	“Livan nises Bukitab waseg, ‘Makava lun apiyev; sivinag kid siwa̱youb.’ Magat bukukwakins Yowbad anilivan towen, adok nag bukuygages tasiyas toubweins.
23575	MAT 12:17	Mo ikamat Yowbad anilivan palopit towen Isaya nilivnek mamagina: ‘Kukines guntouwat, bo adouw silma̱nin gunawotet. Singay ikalin nuwag mtowen. Basek kululuwag, mo bisek nakaleiwag didumwal, ven babaw wasigeis.
23590	MAT 12:32	“Kukin bukutawyageig Gimgilitoun yey, Yowbad biwid amsinap towen; tage bukutawyeg Yowbad Kululuwan Bwanabwein, Yowbad nag biwid, tut towen nag, o tut wanakougwaw nag.
23601	MAT 12:43	“Magat yeiluw bikilev gamag, mo bita̱vin ven babaw, binineiv nakabiyeiwas. Binineiv nag, bilivan bilana, ‘Ba̱yum ban wagunbunatum to nalisow.’ “Beiyum biban nabunatum makaw, bo itaneivis, youd babaw bo ilivkases bwein; bikalin nuwan, bein ikin siney teinim teiy asisinap singaya kalbaleb, tasiyas asibabaw mo beisiws wabunatum, bisesus bisigagas. Kweiboug gamag towen nakalbaleb peinan yeiluw neisiw, tage nakabiyokous waseg singaya kalbaleb. Gudwouvaws yakamiy mikalbaleb bukulivatus ma̱wan.”
23610	MAT 13:2	Gamag singay babaw inekes, mapuna itouw wa̱wag, isin. Babaw gamag itamanaws itowas wakawalaw. Yeisuw itouvin, ikines gamag babaw, mo ilivan.
23622	MAT 13:14	“Kweiboug palopit Isaya anilivan bo ikons tasiyas; anilivan ma̱wan: ‘Bukuliganes tage nag bukukwakins. E, bukukines tage nag bukuwtusis.
23632	MAT 13:24	Vayuwein Yeisuw ikabebay, idibakes, ilana, “Bakabebay mo bukukwakins Yowbad nakaleiwag; peinan ma̱wana gamag isop veitun bwanabwein wanabag.
23637	MAT 13:29	“Ilana, ‘Nag. Adok bukugutes mwasanin kan sona bukugutes sisiyas awuyow. Babaw bisesus, bimatuw kan, mo badibek tasiyas tatayaweins kan, balana: Wanmugwana awuyow kugutes kwatikunakus, kusinaves, kukwawes, kunawes, kugabus; ikous; mo kan kuta̱yoys, kwatikunakus kunawes wagunseigous.’”
23639	MAT 13:31	Kwatounun kabebay isekes, ilana, “Bakabebay mo bukukwakins Yowbad nakaleiwag; peinan ma̱wana veitun kay yagan tipol, gamag isop wanabag, veitun gog singay kekel, tage isob kay kaywen, mo ivakaein, man iyoyows imeis iwlules sibunatum wayayagein, kay-nen avakaein.”
23641	MAT 13:33	Kwavasin kabebay isekes, ilana, “Bakabebay mo bukukwakins Yowbad nakaleiwag; peinan ma̱wana yist, na̱tan vin ikow yist kakit, isen wanuwan pwalaw kwavitoun, tamkwa̱lan mo ilol.”
23652	MAT 13:44	Yeisuw mo ilana, “Bakabebay mo bukukwakins Yowbad nakaleiwag; peinan ma̱wana money singay babaw teitan gog gamag bisown wanabag, bises ee... mo bikanig. Igaw gog kweitan gamag mo biban money towen, bisowm vayuwein, biyamiyis navavag babaw, maysan bikow, bigimwel pwepway towen, singay bikalin nuwan peinan namoney singay babaw pwepway towen waseg.
23655	MAT 13:47	“Sivtounun bakabebay mo bukukwakins Yowbad nakaleiwag; peinan ma̱wana wot ilaves wa̱yol, ikwanes in kweitan magin kweitan magin. Bo ika̱lawt wot; ibiteilis, in wanakaew, mo bikatukins, in bwana̱bweins bidagis bein wanuwan abmavin, siyas gog kalba̱lebs, yegay, ikawes, ilaves.
23665	MAT 13:57	Bo igeg ninous, magina ipiyaves kid Yeisuw. Yeisuw gog mo ikatimop asilivan, ilana, “Vena babaw ivna̱ses palopits, tage wasiven tatineis bo nag; wasibunatum tatineis bo nag.”
23674	MAT 14:8	Na̱wen in ikatugwan inan waseg, ilana, “Inag, aveiyag banitoug?” Inan ilana, “Kunitoug busbwesan Yon bisekeim.” Inek Elod, ilana, “Kusekeig busbwesan tabibapta̱ysein gamags, towen Yon. Bibwabwes kayon, busbwesan bisenas wanuwan abmavin, mo kusekeig.”
23681	MAT 14:15	Iwwotet ee... kwayav; navamul inekes, ilansa, “Bo ikwayav, kwayabes gamag babaw bineis waven mwasanin biyamiyises kaeis, peinan nawoud towen nag kweitan ven nises.”
23689	MAT 14:23	Ikayabes ikous, ikatulag in wa̱koy, anmwa̱net binitoug Yowbad waseg. Bo iboug anmwa̱neta ises.
23693	MAT 14:27	Yeisuw ilana, “Bwein-wan! Awoum beivag amipwa̱yat. Yey nases.”
23743	MAT 16:2	Ikatimop asilivan, ilana, “Kwayav waseg kulansa, ‘Liba̱lab ikayibwel, ka̱las bo beikal,’ o ga̱boug waseg kulansa, ‘Bwaw beim peinan lov magin ma̱wana musewun kov.’ Yowbad naman mulin tasiyas kuwtusis; tage tut towen waseg Yowbad naman mulin nag kuwtusis.
23786	MAT 17:17	Yeisuw idibakes tasiyas, ilana, “Takakons yakamiy, minamis nag. Bo akawgwes amisinap kakon. Kumey gwad towen.”
23804	MAT 18:8	“Kukin namam o kakeim bikaleiwag amsinap kalbaleb, kubob kulev. Bweina biyamkwen namam o kakeim, igaw mwamovam bukuban; awoum kid namam paleyun-wan o kakeim paleyun-wan igaw bilaveim bukun wanuwan kov towen nakagdaged nag beikous.
23805	MAT 18:9	“Ma̱wan-vak matam. Kukin matam bikaleiwag amsinap kalbaleb, kugut kulev. Bweina biyamkwen matam palatanok, igaw mwamovam bukuban; awoum kid paleyun-wan igaw bilaveim bukun wadiginasim, kov nigidaged waseg.
23822	MAT 18:26	“Taw towen mo ikulul igilagel, ilana, ‘Binok nuwam yey, igaw mo bamop gunakawlavag babaw, beikous.’
23823	MAT 18:27	“Iyaka̱lin guyaw towen, ilik nagamag, iwid nakawlavag ikous, ilana, ‘Deisa kunoun. Bo awid mukwawlavag.’
23825	MAT 18:29	“Son mo igilagel, ilana, ‘Binok nuwam yey, igaw mo bamop gunakawlavag babaw, beikous.’
23828	MAT 18:32	“Sitovek idouw mtowen beim. Im, natovek ilivan, ‘Singay takalbaleb ya̱koum. Nukugilagel to nawid mukwawlavag meivek-wan. Inok nuwag yak, tage nag inok nuwam soum. Bo igak!’
23844	MAT 19:13	Mo imeyes gamagal, sivines Yeisuw bituwanis wanaman, mo binitoug pines. Navamul bikayabes kid, Yeisuw ikayuses, ilana, “Awoum kwayabes. Bweina bimeis waseg yey, peinan Yowbad nakabkaleiwag wanuwan tasiyas babaw asisinap ma̱wana gamagal.”
23846	MAT 19:15	Bo ituwanis ikous, mo inoun.
23867	MAT 20:6	“Babaw gamag iwwotets ee... kakita beiboug, tamwey towen in waven, iban gamag mwasanin, ilana, ‘Aveiyag wawun makava kusesusa bo iboug?’
23878	MAT 20:17	Ikous, mo inounas, bikatulags kid bineis Yelusalem. Wa̱ked Yeisuw idibakes tasiyas navamul, ilana, “Bo bitakatulags taneis Yelusalem, teitan gamag mo bisilkodeig Gimgilitoun yey, mo biyousigs tasiyas tanuwgwes lun situwa̱vek sisiyas takatimlakeins kaleiwag, biyateleigs va̱gan bikatimateigs, igaw mo bita̱meigs wasigeis tobwag ven gimgilis Yelusalem nisesus; tasiyas bisiba̱weigs, biwaweigs, bikatkaviteigs waklos. Yam kweitoun mo batamanaw vayuwein.”
23883	MAT 20:22	Yeisuw ikatimop asilivan, ilana, “Nag kukwakins mikanitoug towen. Tab kadiloka bukumoums agukwa̱vig to ba̱moum?” Ilansa, “Bo kadilokem.”
23896	MAT 21:1	Inounas ee... kadiykusan-o Yelusalem, koy towen kay siyas oliv nitatos, ven yagan Betepeig; mo ikayeb navamul asteiy, ilana, “Kuneis ven towen palatan, mo bukuba̱nes donkiy nises, anvatul iyawanis wakayon, son natun nisesus; kulikus, kutokes kumeyes.
23908	MAT 21:13	Idibakes, ilana, “Bukitab waseg liva̱nen Yowbad nabunatum nises mamagina: ‘Gunbunatum bikayuses silma̱nin nitoug;’ tage nukuva̱ges buntuman veinaw.”
23911	MAT 21:16	Ikawkunes, ilansa, “Bo kuligen ages, siyas gamagal?” Yeisuw itam, ilana, “Oo!” Ilana, “Adok nag kukwakins liva̱nen Yowbad, Bukitab waseg, mamagina: ‘Ninous bo kusekes gamagal sisiyas a̱pwaw, mo iya̱kawns bwein.’”
23912	MAT 21:17	Mo ilisawes inoun, ilisow ven towen avakaein, inoun in wunkakit, imasis ven towen Betaniy.
23920	MAT 21:25	E, Yeisuw mo ikatiga̱nes, ilana, “Kal isek Yon nakaleiwag mo ibapta̱yses gamags? Yowbad? o nag? adok gamag mwasanin?” Bo ibol ninous tasiyas, illivans sisiyas, ilansa, “Kukin bitalivans ‘Yowbad,’ towen gog mo bilivan ‘Aveiyag wawun nukupiyaves aygan?’ Kukin gog bitalivans ‘Gamag mwasanin,’ bo biyagageids gamag babaw, peinan idokes palopit teitan mtowen Yon.”
23925	MAT 21:30	“Tamwey towen mo inek tawa̱nay, ilana, ‘Kun kuwotet.’ “Tawa̱nay ilana, ‘Oo! Bo ban awotet.’ Nag gog, ipiyev wotet, isinal.”
23936	MAT 21:41	Iweis tasiyas, ilansa, “Biyagagesa singay, bikatimates, siwotet gog mo bisekes gamag mwasanin asisinap bwein, tasiyas mo beitams anagin bisekes tamwey bweilim katanok katanok waseg.”
23937	MAT 21:42	Yeisuw ilana, “Adok nag kuvinis Bukitab liva̱neig, mamagina: ‘Wululay towen tawteleins bunatum nipiyaves, Tage bo imlavag anmwamwan bunatum. DaGuyaws nawotet towen, bo isom nanouds.’”
23942	MAT 22:1	Vayuwein Yeisuw ikabebay liva̱nen Yowbad nakaleiwag. Ilana, “Yowbad nakaleiwag ma̱wana guyaw teitan inasagal. Bo isagal peinan natun teitan beivay.
23970	MAT 22:29	Yeisuw gog ikatimop asilivan, ilana, “Ibol ninoumiy, peinan nag kukwakins Bukitab, o peinan nag kukwakins Yowbad natawtoun. Igaw tut wanakougwaw gamag beikits kanig waseg, mo beikous veivay, peinan gamag bimlavags mamagina Yowbad nataka̱yob nisesus walba̱lab.
23987	MAT 22:46	Bo ika̱pays tasiyas. Ta-kal bikatimop aygan. Bo iyakous sikatugan waseg Yeisuw. Wankuyeim mo igoulus; nag teitan ikatugan waseg, nag.
23992	MAT 23:5	“Siwotet iwteles va̱gan gamag babaw bikines mo bikavasis. Bukitab yageivein mwasanin iyawanis ikaygwagwes wawous va̱gan gamag bikines, o kweiman tapwa̱loul issikams va̱gan gamag babaw bikines.
24003	MAT 23:16	“Takatimlakeins gamag yakamiy, bo ibol ninoumiy, singay kalbaleb bukulivatus. Kulivans, ‘Bweina bitatabudabod Yowbad nabunatum waseg, adilivan yaweid, tage bitatabudabod waseg goul towen nises Yowbad wanbunatum, awoum bitayaweid.’
24004	MAT 23:17	“Bo ibol ninoumiy, amisinap nag. Aveiyag imug? Goul towen imug? O Yowbad nabunatum imug? Mounid Yowbad nabunatum imug, peinan goul nises wanuwan.
24005	MAT 23:18	“Kulivans-vak, ‘Bweina bitatabudabod abeilun waseg, adilivan yaweid, tage bitatabudabod waseg lun to nises wakunuwatan, awoun bitayaweid.’
24006	MAT 23:19	“Bo ibol ninoumiy, amisinap nag. Aveiyag imug? lun towen? o dakabeiluns Yowbad wanbunatum, inalun nises wakunuwatan?
24009	MAT 23:22	“E, bukutabudabod liba̱lab waseg, bo kutabudabod waseg Yowbad a̱ban son mtowen-vak nissin waseg. Bo ibol ninoumiy yakamiy.
24013	MAT 23:26	“Matam nag, Palisiy yak. Bweina beivag amsinap bwein, waseg bukuban kam, mo bukusen wamkwabmavin o amkwa̱vig waseg; babaw mo beibwein watoulan o wanuwan.
24022	MAT 23:35	“Amisinap mapun mo bukulivatus son mapun asisinap tasiyas kweiboug neiweiys palopits. Ven watinow gimgilis yakamiy nukuweiys tasiyas tadidumwals, nukusilamaws waseg tadidumwal towen Eibel; mo nukuwaweiys tasiyas palopits oko Balakiy natun Sekaliy nukuweiys Yowbad wanbunatum, abeilun palatan, Yowbad nabunatum palakakit palatan.
24041	MAT 24:15	“Kweiboug palopit Daniyel nilivnek teitan nawotet igaw biyableb Yowbad navavag, youd singay kalbaleb waseg. E, igaw yakamiy bukukines towen Yowbad wanbunatum. (Bukuvinis livan towen kadiloka bukukwakins). E, igaw bukukines sinap towen, bukusesus Yudiy, kadiloka kusawls kuneis wa̱koy.
24051	MAT 24:25	“Bo akatiboug nuwamiy sinap towen.
24057	MAT 24:31	“Bwa̱gig biyik avakaein va̱gan guntaka̱yobs bineis bikatiyounis gungamag wanuvid, wa̱yals, wayavat, wabomat, bilisawes vena babaw wadaban pwepway, mo bimekeigs yey.
24058	MAT 24:32	“Kabebay nises yaveinun waseg. Kadiloka kuliganes sinapun yaveinun. Bukukin biya̱sus yageivein kweivaw mo bukukwakins wuwal bisilamaw.
24098	MAT 25:21	“Iw natovek, ilana, ‘Bwein! Guntouwat bwanabwein ya̱koum. Peinan bo kutoukum wotet kakit, mapuna basekeim avakaein. Kusiw kum, gunakabmwa̱saw waseg.’
24100	MAT 25:23	“Iw natovek, ilana, ‘Bwein! Guntouwat bwanabwein ya̱koum. Peinan bo kutoukum wotet kakit, mapuna basekeim avakaein. Kusiw kum, gunakabmwa̱saw waseg.’
24129	MAT 26:6	Yeisuw nises Betaniy, Saymon wanbunatum, mtowen toulepel.