23230	MAT 1:17	Yeisuw delen, tasilamaw Ebelam waseg, tavin Ebelam, tayuwein Ebelam natun, tatounun Ebelam tabun, tavasin Ebelam tabun natun, beibus ee... tutan Deibid waseg, babiweis sinawatan teivas. Tasilamaw Deibid waseg, tavin Deibid son natun, tatounun Deibid tabun, tavasin Deibid tabun natun, beibus ee... tutan min-Babilon ikawes inawes wasiven, babiweis sinawatan teivas. Tasilamaw tutan ineis Babilon tavin ee... tutan Kelis waseg, babiweis sinawatan teivas.
23238	MAT 1:25	Ta-imasis son; tana̱ban ises ee... mo ikop natun, taman mo idok natun yagan Yeisuw.
23239	MAT 2:1	Tutan inan nikop Yeisuw ven Betelem waseg, wawnuwan ven Yudiy, ven babaw siking Elod. Tassinaps mwasanin siven wanuvid mo imeis Yelusalem, ilansa, “Yakamiy min-Yudiy miking kweivaw, avanuy mikopweyas? Peinan nakakin anwutun kweivaw neipel, mwana nakam kid bakakulul wamatan.”
23245	MAT 2:7	Wankuyeim Elod mo idawes bimeis tassinaps, tasiyas mwana nimeis; siney tasiyas illivans, ikatugan, ilana, “Wutun towen nukukines, avei-yam waseg neipel?”
23253	MAT 2:15	Elod gog bikayyamat tasiyas tassinaps, ikayyamata ee... nag; nanon ilana, “O bo ikatidavigs.” Kapasal nuwan, ikayabes nagamag, beiweiys kid a̱pwaw tasiyas tawaw Betelem o walasin ven wasigeis, ilana, “Tasiyas asibweilim katanok o akweiy kuwaweiysa beikous.” Peinan nikatugwan tassinaps wasigeis avei-tut nikop gwad towen. Idok kid Yeisuw bikatimet, tage Yowbad anilivan kweiboug napalopit Yelemay nilivnek mamagina: “Ven Lem waseg mo biliganes va̱lam avakaein. Lakel o vinay-nen Yisleil biva̱lams nitsiyas pines. Ta-ma̱wan bivkakes beitout ninous, peinan nitsiyas bo imtakous.” Yelemay anilivan kweiboug, bo ikamat tut towen waseg. E, Yosep siney angamag Yidipt waseg isesus ee... ikanig Elod. Peinan kweiboug napalopit nilivnek mamagina: “Natug waYidipt mo adouw im.”
23266	MAT 3:5	Mo inounas inekes Yon, min-Yelusalem sisiyas Yudiy gimgilis, sisiyas wunsiyas ven wadadan lay yagan Yoldan, ika̱mats asisinap kalbaleb, Yon mo ibapta̱yses tasiyas lay Yoldan waseg.
23280	MAT 4:2	Ipos sinawavas yam; ta-kweitan kan ikam yam waseg o boug waseg, nag. Ikous, mo ivag anamoun.
23292	MAT 4:14	Palopit kweiboug Isaya nilivnek mamagina: “Seblon son Naptal siven, palata-dadan Yoldan, yol niweiw, ven towen Galiliy nimeim; tasiyas igaw dadub misikes. Kweiboug dadub, kamnat avakaein mo ikines. Kweiboug ven kanig-nen misikes, kamnat mo isap wasigeis.” Kweiboug palopit nilivnek, tut towen bo ikamat.
23302	MAT 4:24	Tasiyas min-Siliy mo iliganes butun Yeisuw, imeyes takatouns, askatoun kweitan kweitan, ivag mo ibweins, tasiyas igidaged wous, tasiyas bwagaw neiweiys, takabalamats, tayda̱gwegs, ivag mo ibweins asibabaw.
23303	MAT 4:25	Gamag babaw mo ikikuns waseg, tasiyas min-Galiliy, min-Dikapolis, min-Yelusalem, min-Yudiy, sisiyas tasiyas palata-dadan Yoldan, ikikuns waseg Yeisuw.
23316	MAT 5:13	“Yakamiy mamagina sol silma̱nin ven babaw sabal-nen yakamiy. Kukin sol sabal-nen bigeg, ta-ma̱wan bitavkek bisabal vayuwein. Peinan bo igeg, misinaka bitalev bein watoulan, gamag mo bivva̱nis.
23329	MAT 5:26	“Mounid adibakeimiy, bukusesus wa̱deil ee... bukupa̱yin soum beikous, mo bispuyeim bukun wamnat. Kukin gog nag, bukusesun-wan wa̱deil.
23337	MAT 5:34	Tage yey gunakaleiwag mamagina: ‘Awoum kutatabdabod, misinaka amlivan mounid kusek. Awoum kutabudabod liba̱lab waseg, peinan Yowbad a̱ban. Awoum kutabudabod ven watinow waseg, peinan Yowbad nakabva̱wot kaken. Awoum kutabudabod Yelusalem waseg, peinan daGuyaws inaven. Awoum kutabudabod kunum waseg, peinan ta-ma̱wan bukuvkek bipwapwa̱kaw o bigunugoun walitanok kunum, nag.’
23342	MAT 5:39	Tage yey gunakaleiwag mamagina: ‘Awoum kwatimop soum peinan ansinap kalbaleb. Kukin binep silapam wamkwa̱tay, bweina kutouvin binep paliyuwein silapam. Kukin soum biyateleim bikow amukweim, bweina kusek-vak musag. Kukin soum bikaleiwag, bilana, “Kwanag kukow katanok veit,” bweina kutam, mo kukow kwayuwein veit.’
23352	MAT 6:1	“Kukin bukumulouls wasigeis tasiyas tasimavs, awoum gamag babaw bikakins, mo bilansa, ‘Singay tasiwa̱youbs tasiyas’; awoum! Magat amisinap ma̱wan, ta-kweitan maysamiy bukuba̱nes waseg Tamads, walba̱lab nises.
23360	MAT 6:9	“Kadiloka kunitougs mamagina: ‘Timem walba̱lab, Yagam bakagoul, Mukwaleiwag beim. Aveiyag aw-nanoum sivinam ven watinow bakavag, ma̱wan ivva̱ges walba̱lab. Kaem bukusekem nagein. Kunumlev makalbaleb ma̱wan kanumlev gamag sikalbaleb wasigeis yakamey. Awoum bukusenam abiyokon waseg. Igaw kalbaleb waseg kwatinabwem.’
23371	MAT 6:20	“Tage liba̱lab wuliyougwan bukwatinakus, nag beipoup, man nag beikoums, ta-kal biven; bwein-wan.
23373	MAT 6:22	“Woun kamnat-nen matad. Kukin matam inakaleiwag bwein, woum mo bikamnat.
23375	MAT 6:24	“Ta-ma̱wan gamag anmwa̱net bikanow ages natuwa̱veks asteiy; adok bikamliw natovek teitan, tayuwein gog bisiwyoub; adok bikanaway aygan teitan, tayuwein gog bipiyev. E, ta-ma̱wan gamag bikanow ages takaleiwags asteiy, teitan Yowbad, tayuwein money. Misinaka anmwa̱net aygan bikanow.
23376	MAT 6:25	“Mapun adibakeimiy, awoum bikubukub nuwamiy silma̱nin kaemiy va̱gan biyamoveimiy, o silma̱nin amikweim va̱gan bukusikams. Peinan kan na-ikadilok bigimwel mwamovads, o kweim na-ikadilok bigimwel kaleivids, nag.
23377	MAT 6:26	“Kukines mansiyas man iyoyows wanakaew, ta-isapwes kan, ta-ita̱yoys, ta-isenas waseigous; nag. Tamads wanakaew ituyay mansiyas man, mounid mo bitutuyeimiy yakamiy.
23394	MAT 7:9	“Adok ta-kal yak, kukin natum binitoug kan mo bukusek dakul; adok nag.
23395	MAT 7:10	“Adok ta-kal yak, kukin natum binitoug in mo bukusek mwatet; adok nag.
23398	MAT 7:13	“Kusiws koukwed kabkakit waseg, peinan diginasim kidenen avakaein, awkwedan baba̱yay, gamag babaw isowsiws, inounas waseg; tage mwamov kidenen kabkakit, awkwedan kabkakit, gamag na-ibabaws bisousiws makadewen ked.
23403	MAT 7:18	“Ta-ma̱wan kay bwanabwein beivag anagin kalbaleb, nag. Ta-ma̱wan kay kalbaleb beivag anagin bwein, nag.
23419	MAT 8:5	Yeisuw inoun in Kapaneyum, siyas Lom takanaviys sitakalikay mo inek Yeisuw, initoug waseg, ilana, “Guntovek yak, guntouwat ikatoun avakaein, nimmasis wabunatum, ta-ma̱wan bininoun, singaya igidaged won.”
23424	MAT 8:10	Yeisuw iligen, bo isom nanon, itouvin idibakes tasiyas tabkunins, ilana, “Guma-Lom towen singay inamis va̱gan baleb! Ta-aban gum-Yisleil teitan inasimounid ma̱wana taw towen. Mounid adibakeimiy ven babaw gimgilis beisiws Yowbad nakabkaleiwag waseg, peinan gamag tasiyas wanuvid sisiyas tasiyas wayavat bo beisiws bikaypuls Yowbad wanakabkaleiwag waseg, sisiyas tamumwey tasiyas Ebelam, Aysak, Yekob. Tage Ebelam tibun mwasanin Yowbad bilev, bineis watoulan, dadub waseg, bivva̱lams o bikakikilis kumtus, peinan igeg abes tasiyas.”
23434	MAT 8:20	Iwa̱ge Yeisuw, ilana, “Awuk bulawud sikabmasis sam wanuwan leg, o mansiyas man iyoyows sibunatum nises wakamweilok; tage Gimgilitoun yey ta-ivag gunakabmasis.”
23448	MAT 8:34	Misikena gimgilis asibabaw-wan mo isaps, imekes Yeisuw, initougs waseg, ilansa, “Kadiloka kunoun kulisawem.”
23450	MAT 9:2	Gamag mwasanin mo imeyes taw teitan ankatoun avakaein, immasis wakaban, ta-ma̱wan binoun. Yeisuw ikakina tasiyas inamis va̱gan bileb, mapuna idibek takatoun towen, ilana, “Kalin nuwag ya̱koum; amsinap kalbaleb bo awid.”
23452	MAT 9:4	Tage Yeisuw ikakin ninous, mapuna idibakes, ilana, “Aveiyag wawun ninoumiy kalbaleb? Bweina balivan, balana, ‘Bawid amsinap kalbaleb beikous,’ o bweina balivan-vak balana, ‘Kutamanaw kunoun.’ Wotet akweiy gagab waseg yey.
23463	MAT 9:15	Yeisuw ankabebay isekes, ilana, “Kukin kal beivays son nakwav, o taliven bineis biva̱ges kan silma̱nin inakamkwam; bimwa̱saws-wan; ta-ma̱wan biva̱lams, nag. Tage tutan anadouw waseg, taw towen binoun, mo biva̱lams taliven, beipos.”
23464	MAT 9:16	Ankabebay kweitan isen mamagina, “Kweim sigsa̱gob ta-ma̱wan bitabweil waseg kweim kweivaw; bitabweil bo bitadud avakaein.”
23480	MAT 9:32	Yeisuw siney navamul inounas ineis, gamag mwasanin mo imeyes taw teitan takakon, bwagaw neiweiy anilivan wadadan. Bwagaw towen Yeisuw ikayeb mo ikilev, gamag towen mo ilivan bwein. Gamag babaw ikines, bo isom ninous, ilansa, “Sinap kweitan-wan. Kweiboug nag takines wadavanuys, min-Yisleil ya̱kids, peinan kweivaw sinap towen, tawtoun.”
23484	MAT 9:36	Ikin gamag singay babaw mo inok nuwan, peinan kululuwes isiwsawoul, peinan bo ilassulis ked, ma̱wana sip; o ta-kal bimgwayes. Mapuna idibakes navamul, ilana, “Kan babaw bo imatuw, asteiyuy bitayoys; kunitougs daGuyaws Yowbad va̱gan kid bikayabes tawwotets bilabeids kid mo bitatayawes inabag towen.”
23488	MAT 10:2	Tasiyas sinawatan teiy takaweins liva̱nen Yeisuw yiges mamagina: Saymon, yagan kwayuwein Pita; Saymon bwadan Andiluw; Yemes, mtowen Sebediy natun; Yemes bwadan Yon; Pilip son Batolomiw; Tomas son Matiw, mtowen takawein ta̱kis; Yemes, mtowen Alpiyow natun, son Tadiw; kweitan gum-Kenan yagan Saymon, son Yudas Iskaliyot, mtowen tasikodein Yeisuw.
23501	MAT 10:15	“Kweiboug Yowbad iweiys min-Sodom, min-Gomol peinan asisinap kalbaleb; tage wunsiyas ven ipiyaveimiy asisinap singay kalbaleb. Igaw tutan Yowbad bikatukin, kalamwey-nen beiweiys min-Sodom, min-Gomol, tage singaya-wan beiweiys wunsiyas ven nipiyaveimiy.
23526	MAT 10:40	“Kukin kal beitam waseg yak, mamagina bo itam waseg yey; mo itam-vak waseg Yowbad, peinan Yowbad nikayabeig nam.
23546	MAT 11:18	“Peinan Yon isap, nag ikamkwam; na-imoum wayn, mo kulansa, ‘Takabala̱wein towen, peinan baloum iweiy.’ Gimgilitoun yey mo asap, akamkwam, amwamoum, mogo kulansa, ‘Tagovek towen, o tamwamwein wayn towen, ikaveiyons siney takalba̱lebs o tasiyas takaweins ta̱kis.’ Ga bukukines aw-wotet bwein, mo silawun bukukwakins, sinap tonen.”
23549	MAT 11:21	“Kuva̱lams yakamiy Kolesin o yakamiy Beteseid. Magat kweiboug tasiyas Ta̱yil o tasiyas Sidon bikines mulin naman Yowbad ma̱wana gunawotet nukukines nagein, nuwanaw mo bisimounids, bipiyaves kid asisinap kalbaleb, sona koun sewed biva̱lams-wan peinan asisinap kalbaleb, mo bipiyaves. Yakamiy gog nag. Mounid adibakeimiy igaw tutan Yowbad bimop vena babaw asisinap, tasiyas bilivatus sikalbaleb kakit, yakamiy gog avakaein.
23551	MAT 11:23	“O yakamiy-vak Kapaneyum bukumwens kid wanakaew; nag gog, bukubus watinow, bukuneis wa̱Tum. Magat kweiboug tasiyas Sodom bikines mulin naman Yowbad, ma̱wana gunawotet nukukines, mo biva̱ges asisinap kweitan, Yowbad nag beiweiys tasiyas, bisesus ee... tut towen bisigagas. Mounid adibakeimiy igaw tutan Yowbad bimop vena babaw asisinap, tasiyas Sodom bilivatus sikalbaleb kakit, yakamiy gog avakaein.”
23561	MAT 12:3	Yeisuw ilana, “Adok nag kukwakins liva̱nen Deibid, nises Bukitab wanuwan. Peinan asimoun siney nagamag, isiws Yowbad wanbunatum, ikams bled towen nises Yowbad wamatan. Tanuwgwes lun bo ikatibomes bled towen. Na-ikadilok Deibid beikam; nagamag-vak nag beikams; misinaka tasiyas tanuwgwes lun. Tage tanuwagan lun isek Deibid sen nagamag, mo ikams, peinan singaya asimoun.
23564	MAT 12:6	“Gunakaleiwag towen kweivaw imug-wan Yowbad nabunatum waseg.
23580	MAT 12:22	Wankuyeim itokes teitan gamag, baloum neiweiy, imeyes Yeisuw waseg, ankatoun mamagina ikaw matan, o wadon ikapet; ta-ma̱wan bikapwageg bilivan. Inekes Yeisuw, ivag mo ikilev, bo ibwein gamag towen, ikin, ilivan bwanabwein.
23587	MAT 12:29	“Kweitan sinap kuninuways: Ta-ma̱wan bitasiw tawtoun gamag wanabunatum mo bitaven navavag. Deisa bitayous taw towen, tayawen naman, kaken, va̱gan nag binoun, mo bitaven navavag, tayakousis.
23592	MAT 12:34	“Yakamiy takalbalebs magina mwatet yakamiy, ta-ma̱wan bukulivans bwein, peinan ninoumiy kalbaleba singay; mapun amilivan kalbaleb.
23611	MAT 13:3	Tage ansinap babaw-wan livan kabebay waseg isekes gamag tasiyas, ilana, “Teitan taw in wa̱bag ilivelov veitun.
23619	MAT 13:11	Yeisuw ikatimop ages, ilana, “Yowbad itam, sinapun liba̱lab kaleiwag-nen isekeimiy; tasiyas gog nag.
23639	MAT 13:31	Kwatounun kabebay isekes, ilana, “Bakabebay mo bukukwakins Yowbad nakaleiwag; peinan ma̱wana veitun kay yagan tipol, gamag isop wanabag, veitun gog singay kekel, tage isob kay kaywen, mo ivakaein, man iyoyows imeis iwlules sibunatum wayayagein, kay-nen avakaein.”
23657	MAT 13:49	“Tut nakabiyokous waseg bo ma̱wan, bakayeb min-liba̱lab bikawes takalba̱lebs bilaves bineis kov avakaein waseg, toubweins gog bisesus. Tasiyas takalba̱lebs mo biva̱lams avakaein, peinan singaya abes bigeg.”
23666	MAT 13:58	Yeisuw nawotet tawtoun na-ibabaw wanven tatonen, peinan taginvens nag isimounids waseg.
23690	MAT 14:24	Tasiyas gog wa̱wag kadiveiyov-o wabwanit ikalla̱vis, bo ikala̱lav nimes, peinan yag meinoy neim wamtes.
23701	MAT 14:35	Min-Genesalet iwtusis Yeisuw, ikayabes sisiyas, ineis vena babaw, idibakes takatouns, ilansa, “Kwatuyouns kunekes Yeisuw.” Inekes, initougs waseg, sivines kid misinaka bikabkwanes matan anakweim. Itam, ikabkwanes, mo ibweins.
23718	MAT 15:16	Yeisuw ilana, “Adok yakamiy-vak igaw tatagouwaws yakamiy. Tabta kukwakins avei-kan beikoum gamag, kan towen bein watoubun, bininoun ee... igaw simwan mo bisap bein wamnat? Tage aw-sinap gamag binuway wananon, igaw mo bilivan, anilivan towen bisap wawadon mo biyageg gamag kululuwan.
23733	MAT 15:31	Gamag babaw ikines tasiyas takakons, ivag mo ilivans bwein; tasiyas ipam kikeis o nimes ivag mo idamoms; takagayals ivag mo inounas; toukwaws ivag mo ikins bwein; isom ninous, iya̱kawns waseg min-Yisleil siYowbad.
23767	MAT 16:26	“Youd babaw bitayous ven watinow, tage mwamovads bigeg, bo bigak! Peinan ta-ma̱wan gamag bivkek bisen mwamovan sivyuwein.
23769	MAT 16:28	“Mounid adibakeimiy mwasanin yakamiya-nan nag bukulivatus kanig ee... mo bukukineigs Gimgilitoun yey igaw bam, gunakaleiwag mo bisilamaw ven watinow.”
23782	MAT 17:13	Navamul mo idumwal ninous, peinan ikakins-wan tabibapta̱ysein gamags towen Yon mamagina Ilaytiy.
23804	MAT 18:8	“Kukin namam o kakeim bikaleiwag amsinap kalbaleb, kubob kulev. Bweina biyamkwen namam o kakeim, igaw mwamovam bukuban; awoum kid namam paleyun-wan o kakeim paleyun-wan igaw bilaveim bukun wanuwan kov towen nakagdaged nag beikous.
23805	MAT 18:9	“Ma̱wan-vak matam. Kukin matam bikaleiwag amsinap kalbaleb, kugut kulev. Bweina biyamkwen matam palatanok, igaw mwamovam bukuban; awoum kid paleyun-wan igaw bilaveim bukun wadiginasim, kov nigidaged waseg.
23814	MAT 18:18	“Mounid adibakeimiy tayakelesiys yakamiy, aveiyag bukuyawanis ven watinow waseg, Yowbad mo biyawen walba̱lab. Aw-kaleiwag bukulikus ven watinow, Yowbad mo bilik walba̱lab.
23815	MAT 18:19	“Vayuwein adibakeimiy, kukin amiteiy ven watinow kusesus, igaw bukutams aw-youd bukunitougs waseg Tamag walba̱lab Tamag mo beitam, bisekeimiy youd towen.
23831	MAT 18:35	“Tamag walba̱lab ansinap ma̱wan. Kal yak wananoum ta-bukuwid simwey sikalbaleb waseg yak, Yowbad bo bimop amsinap kalbakeb ya̱koum.”
23832	MAT 19:1	Anilivan tasiyas ikous, Yeisuw ilisow Galiliy, inoun in min-Yudiy siven palata-dadan lay yagan Yoldan.
23841	MAT 19:10	Navamul ilansa, “Magat veivay kaleiwag-nen bo ma̱wan, adok awoum bitaveivays.”
23842	MAT 19:11	Yeisuw ilana. “Gamag babaw nag bikakins kaleiwag towen. Misinaka Yowbad ansinap bisekes gamag mwasanin, mo bikakins. Peinan tawaw mwasanin tutan insiyas nikopwes-yay powes nag, o tawaw mwasanin powes nag peinan gamag ikablaves, o gamag mwasanin ikablaves powes tatineis va̱gan bikanawes Yowbad nakaleiwag. Kal yak bukukwakin sinap towen, bweina kuligen.”
23847	MAT 19:16	Teitan gamag inek Yeisuw ilana, “Tamwey, aw-wotet bwanabwein bawtel mo baban mwamovag nag beikous?”
23859	MAT 19:28	Yeisuw ilana, “Mounid adibakeimiy, yakamiy nukubkunigs yey, igaw tut wanakougwaw, Gimgilitoun yey basin a̱bag bwanabwein waseg, yakamiy bukusinis wakabamiy sinawatan akweiy bukwaleiwags wasigeis min-Yisleil adakums sinawatan akweiy.
23868	MAT 20:7	“Iweis tasiyas, ilansa, ‘Peinan ta-kal bisekem mawotet.’ Ilana, ‘Yakamiy-vak kuneis, kuwotets gunabag.’
23874	MAT 20:13	“Tamwey ikatimop aygan teitan, ilana, ‘Gwa, nag ayagageim, nag. Ga̱boug agulivan bo kutams: Katanok yam katanok kina. Mukina towen-an kukow kunow. Sivinag basekes kweivaw gamag siyas ma̱wana yakamiy. Kadilok yey bakaleiwag gunavavag waseg. Awoum bimouvit dabam peinan agusinap bwein.’
23882	MAT 20:21	Yeisuw ilana, “Aveiyag sivinam?” Iw mana̱wen ilana, “Kukwaleiwag va̱gan kid igaw bukuguyaw, nitug siyas-nan bisinis wadadam, teitan wamkwa̱tay, teitan wamkimaw.”
23884	MAT 20:23	Idibakes, “Mounid bukumoums agukwa̱vig, tage na-ikadilokeig bakaleiwag kavel bisin wagunka̱tay o wagunkimaw, nag. Tamag gog bo ikatineg abes tasiyas bisinis wagunka̱tay o wagunkimaw, mtowen takaleiwag.”
23896	MAT 21:1	Inounas ee... kadiykusan-o Yelusalem, koy towen kay siyas oliv nitatos, ven yagan Betepeig; mo ikayeb navamul asteiy, ilana, “Kuneis ven towen palatan, mo bukuba̱nes donkiy nises, anvatul iyawanis wakayon, son natun nisesus; kulikus, kutokes kumeyes.
23906	MAT 21:11	Tasiyas sisiy Yeisuw ilansa, “Mtowen palopit yagan Yeisuw, gum-Nasalet teitan, inaven wawnuwan Galiliy.”
23913	MAT 21:18	Iyam-nen ga̱boug iyum in silma̱nin wunovek, ivag anamoun.
23915	MAT 21:20	Navamul ikines, isom ninous, ilansa, “Nuwanaw bo ikaleyag yaveinun makaywen! Aw-sinap towen?”
23952	MAT 22:11	“Tamwey towen im bikin gamag babaw-wan, iban teitan ta-isikam sagal kweiman, idibek, ilana, ‘Gwa, ama̱wan nukum, ta-ivag amkweim sagal kweiman?’ Towen isesuna ikika̱pay.
23955	MAT 22:14	“Yowbad bo idawes gamag babaw; teyuy-e beisiws bimeis.”
23975	MAT 22:34	Tasiyas Palisiy iliganes Yeisuw nikatimop asilivan Sadusiy, nika̱pays, mo ikatuyouns tasiyas Palisiy, imeis. Palisiy teitan ikatigan Yeisuw, mtowen ya̱tal sinapun ikakin; ikatugan va̱gan kid biyakwen Yeisuw, ilana, “Dakaleiwags waseg, aw-kaleiwag imug?”
23987	MAT 22:46	Bo ika̱pays tasiyas. Ta-kal bikatimop aygan. Bo iyakous sikatugan waseg Yeisuw. Wankuyeim mo igoulus; nag teitan ikatugan waseg, nag.
24009	MAT 23:22	“E, bukutabudabod liba̱lab waseg, bo kutabudabod waseg Yowbad a̱ban son mtowen-vak nissin waseg. Bo ibol ninoumiy yakamiy.
24020	MAT 23:33	“Mwatet nitun yakamiy, Yowbad bikaleiwag bilaveimiy bukuneis wadiginasim. Ta-ma̱wan bukusawls bukuneis.
24029	MAT 24:3	Inounas ineis koy towen bigulen oliv nises, isin; tasiyas navamul inekes, ilansa, “Kudibakem asinavin bigulekwes bunatum bunawen bunavakaein; ama̱wan bakakakin avei-tut bukuyum bukum mo beikous ven watinow?”
24055	MAT 24:29	“Moumouvit anatut beikous, ka̱las mo bidadub, tibukon-vak bikanig mititeilin, siyas wutun walba̱lab bikalka̱louws, youd siyas wanakaew bo beigwey.
24062	MAT 24:36	“Ta-kal ikakin avei-yam o avei-tut, nag; min-liba̱lab na-ikakins; yey nag bakakin; misinaka Tamag ikakin.
24064	MAT 24:38	“Peinan kweiboug anatut yevagam na-ipop ven, gamag ikamkwams, imwamoums, iveivays, Now mo itouw wa̱wag.
24065	MAT 24:39	“Yam towen na-ikakins ee... kweis mo isap iyagages tasiyas. Ma̱wan magin Gimgilitoun yey ba̱yum bam, gamag nag bikakins avei-tut.
24068	MAT 24:42	“Kadiloka kumtakavateimiy, peinan nag kukwakins avei-tut miGuyaw yey mo bam.
24090	MAT 25:13	Yeisuw ilana, “Kadiloka kutoukums, kumtakavateimiy, peinan nag kukwakins avei-tut o avei-yam mo bam.
24103	MAT 25:26	“Iw natovek, idibek, ilana, ‘Singay tougwey, guntouwat kalbaleb ya̱koum. Kukwakin-wan agusinap keikay, anagin gamag siwotet akokew ven babaw; kadilok-wan bukusen gunmoney wanuwan benk, bikatimweis bibabaw; ga ba̱yum bam mo bakow siyas gunmoney babaw.’
24105	MAT 25:28	“Natovek mo idibek natouwat teitan, ilana, ‘Kukow inamoney katanok tawsan kina, kusek mtowen tatawtoun, bikatimweis inamoney, bimlavag singay babaw, sinawatan katanok tawsan kina.’ Kukin kal navavag sam, igaw mo bikow bikatimweis, bibabaw. Kukin gog kal ta-ivag navavag, teitan mo bikow aveiyag nises; mounida beidev mtowen.
24108	MAT 25:31	“Igaw bam, Gimgilitoun yey, soug yakawanag, o sigwey min-liba̱lab asibabaw, mo basin a̱bag bwanabwein waseg.
24119	MAT 25:42	“‘Peinan agumoun, ta-kweitan kag kusekeigs; agudak, ta-kweitan soup kusekeigs; agtowous nag, ta-kulabeigs; sona mwadoyag, ta-kweitan kweim kusekeigs; akatoun, ta-kuvna̱seigs; ases wa̱deil, ta-kulakwaneigs. Takalbaleb yakamiy!’
24133	MAT 26:10	Yeisuw gog bo itilikwen asilivan, ikatimop, ilana, “Awoum kulivans, ivag geg anmwasin. Inawotet bwanabwein waseg yey. Tut babaw tasiyas tasimavs simiyas nukusesus; yey gog kweitan, igaw mo balisaweimiy. Bo iptum woug silma̱nin anatut bidibwanigs. Mounid adibakeimiy, ampalawen ven watinow igaw bikawes liva̱neig, o liva̱nen-vak mana̱wen vin bikawes binawes, gamag babaw biliganes, mo bininuways inawotet towen.”
24139	MAT 26:16	Wankuyeim Yudas inineiv amata-ked bwein waseg mo bisilkod Yeisuw.
24154	MAT 26:31	Ineis koy towen, Yeisuw idibakes, ilana, “Boug towen bukupiyaveigs amibabaw-wan yakamiy, liva̱nen nises Bukitab waseg, mamagina: ‘Ba̱weiy tamtakavatein mansiyas sip, mo bikatigayes alen.’
24175	MAT 26:52	Iw to Yeisuw, ilana, “Kuyamen mupulut, bein wakaban. Tasiyas gog tawayins gamag pulut waseg, igaw bikanka̱nigs pulut waseg. Adok nag kukwakins gunanitoug waseg Tamag, nuwanaw mo beitam min-liba̱lab bilabeigs, singay babaw tawsans. Nag gog. Kukin nag biyousigs, ta-ma̱wan bikamat liva̱neig Bukitab nilivnek.”
24193	MAT 26:70	Ikayan mtowen, ilana, “Nag. Ta-akakin aveiyag nukulivan.” Babaw gamag ikatiliganes anilivan towen.
24194	MAT 26:71	Isineikik in wadunan ked waseg, nayuwein vin ikin, idibakes siney, ilana, “Taw towen veiyon gum-Nasalet towen Yeisuw.”
24196	MAT 26:73	Igaw kakit, tasiyas nitomos wadadan ven iwekes Pita, ilansa, “Adok mounid ya̱koum veiyon gum-Galiliy ya̱koum, ne? Peinan aygam ma̱wana aga-Galiliy.”