6	GEN 1:6	Eeꞌnoko Kumponinge napoꞌ karoma aaꞌpuuꞌ, “Meerooꞌnavaro doona otoai tankaampuresi pirung boonaruꞌ eeꞌnoko ntong kamoꞌkoong.”
11	GEN 1:11	Eeꞌnoko Kumponinge napoꞌ karoma aaꞌpuuꞌ, “Kansiꞌkoo baaꞌ eeꞌnoko koiꞌnanka amutemuriiꞌ dupuai, aaꞌnoko keenavaang, eeꞌnoko poraꞌkooning, eeꞌnoko sinampuai ookara muuꞌ amutemuriiꞌ kantenaꞌ.” Eeꞌnoko teeꞌ eeꞌnaꞌ nkoaruꞌ.
15	GEN 1:15	Eeꞌnoko teke meerooꞌnavaro-koo paning-koo arakavariri otoromaatoai teketa kansiꞌaape araka poꞌantavaamaatoai.” Eeꞌnoko teeꞌ eeꞌnaꞌ nkoaruꞌ.
20	GEN 1:20	Eeꞌnoko Kumponinge napoꞌ karoma aaꞌpuuꞌ, “Ntong eeꞌnoko pirung ookarai kapooꞌnanka amutemuriiꞌ domantooꞌnankai maantoꞌaavai. Eeꞌnoko barennankai porora meerooꞌnavaro aꞌdeiꞌ auviꞌau puraanaama maantoꞌaavai.”
22	GEN 1:22	Eeꞌnoko Kumponinge ookara biraankevuruꞌ aaꞌpuma, “Ookara kapooꞌnanka pirung-kooning parerima berentarima pirung maantoꞌeriai, eeꞌnoko ookara barennanka teeꞌke, parerima berentariai kansiꞌkoo.”
24	GEN 1:24	Teketa napoꞌ Kumponinge aaꞌpuuꞌ, “Enang kansiꞌkoo kapooꞌnanka amutemuriiꞌ domantooꞌnanka tavoꞌdariai: ookara kauꞌkarenaumo bauꞌnaananka, eeꞌnoko biikoori, eeꞌnoko ookara kapooꞌ kansiꞌkoo daue nanaamaing.” Eeꞌnoko teeꞌ eeꞌnaꞌ nkoaruꞌ.
26	GEN 1:26	Teketa napoꞌ Kumponinge aaꞌpuuꞌ, “Aiaꞌ, naning-namuuꞌ nantoong niiꞌ pinaꞌ oroꞌnuka nkoarampiai, niikaang oroꞌoroꞌnooꞌ siompuioꞌ, eeꞌnoko teinge ookara kapooꞌnanka tanatavaariai, aaꞌning: taviꞌ pirung-koonanka, barenanka auviꞌau-kooning, kauꞌkarenaumo datauraaꞌnanka, eeꞌnoko poraꞌkoonanka, eeꞌnoko napoꞌ teing ookara kapooꞌnanka kansiꞌkoo daue nanaamaing.”
28	GEN 1:28	Eeꞌnoko Kumponinge biraankevurema aaꞌpuretuꞌ, “Deeꞌ parerema berentareai eeꞌnoko deurukaaꞌke ookara kansiꞌ maantoꞌaara ookara kapooꞌnanka tanatavaariai tenairu-koo. Eeꞌnoko deeꞌke tee aaꞌnoaing ookara taviꞌ pirung-kooning tanataverereriai, barenanka auviꞌau-kooning eeꞌnoko ookara kapooꞌnanka kansiꞌkoo daue nanaamaing.”
30	GEN 1:30	Eeꞌnoko ookara kauꞌkarenaumo-nanka kansiꞌkooning, napoꞌ barennanka auviꞌau-kooning eeꞌnoko ookara kapooꞌnanka kansiꞌkoo daue nanaamaing, eeꞌnoko ookara kapooꞌ domantooꞌnanka, ninge teing ookara kapooꞌ dupumaung maaꞌkoo avoronsing.” Eeꞌnoko teeꞌ eeꞌnaꞌ nkoaruꞌ.
48	GEN 2:17	“Ookara koiꞌkoong sinananka mintoong-koo otoining-koong tamung naroꞌketa maaꞌemaatoaing, teka tevari koiꞌnavari noruꞌanta nka-navari teing aaꞌning-koo tampara eeꞌnoko orara dake maaꞌeaukaꞌ tee sinang tevari-koong, aiꞌ teꞌmung daꞌ tevari-koo sinang maaꞌeainaꞌmung daꞌ tee dooaing.”
49	GEN 2:18	Teketa Ovoringe Kumponinge aaꞌpuuꞌ, “Aung naning baka otoꞌkoo tampaꞌ deeaꞌ. Ninge bakaang pakupakunung tee-koo makosi nkoevompaing.”
54	GEN 2:23	Teketa Aadamai aaꞌpuuꞌ, “Emuꞌ ani eeꞌnani mmaikoꞌ masikani. Bakaang kooꞌ tee ning-koong-eta kooꞌketaing eeꞌnoko bakaang bioꞌ tee ning-koong-eta bioꞌketaing. Ani donkaani-koong-eta kooꞌketa nkoniiꞌnani naning-eta-nani, teꞌkoo manikuma tampampaing.”
61	GEN 3:5	Deeꞌke tee sinang teuꞌkoong maaꞌereta deekoꞌ deeꞌ tee noruꞌ daateꞌdareeꞌnaang kapooꞌ tampara eeꞌnoko kapooꞌ orara noruꞌkoo, eeꞌnoko deeꞌ tee Kumponing-pinaꞌ nariꞌ otoreeꞌnaang. Kumponinge teeꞌ noruꞌui deeꞌ teeꞌ orokoruresing.”
66	GEN 3:10	Eeꞌnoko teie aaꞌpuuꞌ, “Ninge daꞌkoong aurong mintoonge naniko taararamira amoromira simpenoiꞌ deemarama oomeꞌneeng-koo bakuꞌmaring.”
68	GEN 3:12	Eeꞌnoko teie aaꞌpuuꞌ, “Tenie anie manikumai dake niꞌninka nariꞌ oꞌnoreeꞌnaang ameuꞌnanie tee-koo koiꞌkoong-koo sinang-koo amuioꞌ maaꞌkansing.”
69	GEN 3:13	Teketa teie Ovoringe Kumponinge teni manikuma aaꞌpuuꞌ, “Dake tee aming-koo teeꞌ nkoveing?” Eeꞌnoko tenie manikumai aaꞌpuuꞌ, “Boruꞌke tosimuioꞌ teeꞌ ninge maaꞌansing.”
71	GEN 3:15	Eeꞌnoko ninge tee deeꞌnaanka daꞌ eeꞌnoko ani manikuma karenaanka deeng-antarampeaing eeꞌnoko napoꞌ teing deeꞌke deurukaaꞌ teeꞌke kare-nupoong otoromaatoaing. Teni baurukaaꞌkoo narunge daꞌ boreꞌkoo puuturuaing eeꞌnoko dake tee kankoꞌbo-koo kakieai.”
72	GEN 3:16	Napoꞌ teni manikuma aaꞌpuuꞌ Kumponinge, “Ninge tee daꞌ pankaing sisikeera arompaing tenang parema mantompemaatoaing. Sisikeera ninka parematoaing. Nka tee, daꞌung-koo pia otoi otoaing, eeꞌnoko bakaang pia siompemaatoai.”
75	GEN 3:19	Eeꞌnoko iontakaanang mintoontarama taamanimatoai, bera doora kansiꞌkoo tororaravainooꞌke basi, teꞌ eeꞌnooꞌ daꞌ nkorantuꞌnooꞌ, aiꞌ daꞌ tee daꞌmong, napoꞌ daꞌmong-koo doonko tororaravaing.”
78	GEN 3:22	Teketa Kumponinge Ovoringe aaꞌpuuꞌ, “Aung tee naning niiꞌpinaꞌ oroꞌparing aaꞌnoing kapooꞌ tampara eeꞌnoko orara noruꞌui. Emuꞌ tee koiꞌ domang isikung avuꞌnavari-koo dueꞌ beꞌkoo tauraꞌpampiaukaꞌ, tevari-koong sinang maaꞌura napoꞌ domampari otoꞌneenga.”
81	GEN 4:1	Enang tee Aadama Iivi-ninka baꞌaang ninka otoresi teni kempoꞌkuuꞌ. Teketa tootoꞌ narung donkaani paravuuꞌ tenie, miring Keiniꞌ. Eeꞌnoko aaꞌpuuꞌ tenie, “Ninge narung donkaani paravansing Ovoringe pakumuioꞌ.”
87	GEN 4:7	Daꞌ tampaꞌ boontunantaravaing deekoꞌ ning daꞌkoo dotumaravaing, apeꞌ aung? Teka tee dake kapooꞌ orara nkoveko deekoꞌ tee orara aarumo maamuari otong daꞌ kurumaaꞌkoo. Nka dake purintarara puruꞌeaing tee.”
88	GEN 4:8	Teketa Keiniꞌke tee baaraꞌmaꞌnung Eebeloꞌ bokuvuma aaꞌpuuꞌ, “Poai ioꞌ tokoi poraꞌke korokoromareai.” Eeꞌnoko tenang poraꞌ bereta Keiniꞌ tee-koo baaraꞌmaꞌnung-koo Eebeloꞌkoo dau kokoroarara teka tavuma dupisiꞌuuꞌ tee.
92	GEN 4:12	Daꞌ tee poreꞌdoma kansiꞌkoo keempeko taamang tampaꞌ nkoaravaukaꞌnung eeꞌnoko tokoo dakanooꞌ masipoꞌ otoꞌderuaukaꞌ, tamung kansiꞌkoo kororaramatoaing.”
94	GEN 4:14	Dake tee ning eꞌmung bataꞌmeing anketa kansiꞌketa, eeꞌnoko dakaang biraanke-ita bakuꞌmeinge. Eeꞌnoko tokoo nkanooꞌ otoꞌmemuaukaꞌ; tamung kansiꞌkoo koromaramaꞌnoaing. Naninge tokoa oomura deekoꞌ tamung anutua dupisiꞌmuaing makosie.”
95	GEN 4:15	Teka Kumponinge aaꞌpuuꞌ tee, “A, teeꞌ deeaꞌ. Niiꞌnung naninge daꞌ taruma dupisiꞌduaing deekoꞌ, tee naning tee ninge aaꞌnaꞌ dau basinooꞌ kiimata avompaing.” Eeꞌnoko Ovoringe Keiniꞌkoo taaꞌniꞌanta sipuuꞌ naninge tokoa oovura tavuꞌneeng-koo tee.
105	GEN 4:25	Damaꞌke napoꞌ Aadama ninka otoresi baꞌaange tootoꞌ narung donkaani napoꞌ paravuuꞌ miring Set, eeꞌnoko tenie aaꞌpuuꞌ, “Kumponinge tootoꞌ narung napoꞌ amuing Eebeloꞌ pariꞌantanung tee Keiniꞌke dupisiꞌuuꞌnung.”
135	GEN 5:29	Eeꞌnoko miring Nooaꞌ tampuuꞌ, aaꞌpuma, “Aung tee niiꞌ unaa-antamuriaing teieta iriꞌoꞌketa aung kansiꞌ mintoompampima kompampimaung-eta Kumponinge barakosiꞌuuꞌnung.”
23234	MAT 1:21	Tenie tee tootoꞌ donkaani paravuaing, eeꞌnoko dake tee miring Jiisuuꞌ tampeaing, aiꞌ teie tee bakaning nantoong biikaning orara aarumonanka-ita mooꞌuriaing.”
23240	MAT 2:2	“Daurarong Juꞌnupoong biikaang pontoꞌaruꞌnung arerai? Niiꞌke bakaang beentoꞌ taꞌdaꞌpuioꞌ ooampira nanampikotaaꞌ enang moring tee-koo dootuuꞌmariiꞌnaang.”
23246	MAT 2:8	Teketa botovurima teꞌ Beeteleemaꞌaape aaꞌpuruꞌ, “Berira tampaꞌ besiꞌeriai tee tootoꞌ, eeꞌnoko ooverira namuꞌke ning naumeriai, meraiꞌnang tee-koo dootuuꞌmaravainaꞌ.”
23251	MAT 2:13	Teing beroioꞌ napoꞌ tee koosinung Ovoring bakaang Josepaꞌankoi oroꞌparuꞌ noone-koo, teketa aaꞌpuuꞌ, “Daaꞌdaravai. Tee tootoꞌ eeꞌnoko bauko bokuereta Iisipiꞌaape mmaririra bera teke otoriko ninge nauranko deekoꞌ tororariai, aiꞌ Eerotiꞌke tee besiꞌuuꞌnaang tee tootoꞌ dupisiꞌuuꞌnaang.”
23253	MAT 2:15	Bera teke otorouꞌ Eerotiꞌ booꞌparuꞌnooꞌke basi. Teeꞌ nkoarioꞌ tee kara Ovoring bakaang makotuuꞌ nakaronara˜ karantavuma˜ aaꞌpuuꞌnaare: “Ninge bokuantuꞌ tee nnuring Iisipiꞌketa.”
23256	MAT 2:18	Aaꞌpuuꞌ, “Narung aurong teka Raama-nairu-koo taaravansing, aaꞌnaꞌ orarunsiari uiarama biromparako, teni Reesiel baurukaaꞌkoo biromparako, dunsirunsi-antavaako˜ piavoaruuꞌ baurukaaꞌ oparirioꞌ.”
23258	MAT 2:20	Eeꞌnoko aaꞌpuuꞌ, “Tanterarara tee tootoꞌ eeꞌnoko bauko bokuereta teꞌ Isireeli-nameensiꞌaape beriai, aiꞌ teing tee tootoꞌ dupisiꞌkoo piavorokoꞌning teing booꞌpariruꞌning.”
23261	MAT 2:23	Eeꞌnoko berora narung osi miring Nasaretiꞌnamono-koo otorouꞌ. Teeꞌ nkoarako tee kara nakaronara karantavuma Ovoringe minkuvuuꞌnung masikaꞌparuꞌ, aaꞌpuuꞌnung, “Nasaretiꞌnung tampaamaatoaing.”
23263	MAT 3:2	Aaꞌpuma daankiaruꞌ, “Bereꞌdariai paninung muuꞌkoo tuntariainaꞌ, aiꞌ tee muuꞌ tee enang dueꞌ poing.”
23276	MAT 3:15	Teka Jiisuuꞌke makuꞌuma aaꞌpuuꞌ, “Emuꞌ nkomeaing. Makosi neeꞌke teeꞌ nkoampema dupe-antavampeaing ookara aarumo koontoꞌnanka.” Tenang teeꞌ minkuvuioꞌ Joonie arooꞌuuꞌ.
23278	MAT 3:17	Eeꞌnoko kara auromparuꞌ paning-eta aaꞌpuma, “Aung tee nnuring ninge piaavamaung. Ning aung-koo aaꞌnaꞌ dotumaramaung.”
23281	MAT 4:3	Eeꞌnoko teie dauaꞌbaukoi pora aaꞌpuuꞌ tee Jiisuuꞌ, “Daꞌ Kumponing Bauring deekoꞌ aing kapananka naueriko taamananka deempariaing.”
23287	MAT 4:9	Eeꞌnoko Sietaniꞌke aaꞌpuuꞌ, “Aing ookara ninge oko-antarampeuꞌ daꞌ ning-koo miinge keentarara dootuuꞌmei dei.”
23294	MAT 4:16	Teing eeꞌning teꞌ booꞌke anivumanameng-koo otoromaing arakai taneꞌpuriaing.”
23295	MAT 4:17	Eeꞌnoko tenang-eta deto Jiisuuꞌke daankinang tutumpuuꞌ aaꞌpuma, “Bereꞌdariai paninung muuꞌkoo tuntariainaꞌ, aiꞌ tee muuꞌ tee enang dueꞌ poing.”
23315	MAT 5:12	Doturarima doꞌderoꞌdeꞌdariai eeꞌ noruꞌerima, ‘Niikaang mooꞌ pankaing otong teke paning-koo.’ Aiꞌ tee teeꞌ nariꞌ nantoonge teing nakaro-nupoong tee diiꞌpinaꞌ nariꞌ mankiꞌantavaarikoꞌ, diiꞌkoo uroꞌnupoong.”
23319	MAT 5:16	Teeꞌ nariꞌ diikaang araka araka-antaveriaing nantoong-koo uroꞌkanooꞌke diikaang nko-nko tampara ooaara Diuma tee paning-koong daangampaavainaꞌ.”
23323	MAT 5:20	Aiꞌ ninge diiꞌ eeꞌ naurampimang, diikaang aarumo tamparai teꞌ kuung masipoꞌ teing boto keperuuꞌnavitu tamparimaing eeꞌnoko boto naunuka biikaang puruꞌuaukaꞌnung deekoꞌ diiꞌ muuꞌ paninung-koo bakei tuntariaukaꞌnung.”
23329	MAT 5:26	Masikaꞌ naurampimang, diiꞌ kiimatanavaꞌketa tenkeniriarupeuꞌ mooniꞌkoo asiꞌnu duaꞌkiriaꞌ deekoꞌ tuutunang mooꞌkoo.”
23335	MAT 5:32	Teka ninge aaꞌdampimang, baa tee naning baꞌaange tutung kaukauro nkovuaruko bataꞌura deekoꞌ teie tee teni tuuꞌumaang niiꞌnarai nampuko nampeesi orarivuuꞌnaang. Eeꞌnoko baa tee naning teni bataꞌniiꞌ nampuaing teie tee nampeesi orarivuing.”
23340	MAT 5:37	Teka ‘Eeꞌ’ miruꞌema ‘Eeꞌ’ narung tampeai. ‘A’ miruꞌema, ‘A’ narung tampeai. Aing-koo taapoꞌning, teing masikaꞌ deto dovang, kara teieta naning orara-ita pomaing.”
23345	MAT 5:42	Naninge eentaruko kapooꞌ aveai eeꞌnoko dakaang kapooꞌ kong-koo niaꞌduko orokoveaukaꞌ.”
23351	MAT 5:48	Teeꞌkoo tampaꞌ nariꞌ nkoverimatoaing teeꞌ Diuma paning-koong tampaꞌ nariꞌ otomanaꞌ.”
23385	MAT 6:34	Teeꞌkoo taneꞌnung doong-koo noruꞌ mankiꞌdoriaukaꞌ. Taneꞌ teꞌmung baka noruꞌaravainaꞌmung. Aiꞌ ookara mankiꞌnanka naꞌmung doong-koo makosinaꞌ bireꞌari otong.”
23390	MAT 7:5	Daꞌ ampirinung˜, iroꞌ tutung daka-koo mooꞌdaravaing tee konking duta-koo eeꞌnoko tenang daaraꞌmaꞌnung-koo sirakaꞌpei oovera mooꞌeai tee nankiꞌ daaraꞌmaꞌnung-koo duta-koo otoing.”
23391	MAT 7:6	Eeꞌnoko Jiisuuꞌke mirumiruꞌ nauvurima aaꞌpuuꞌ, “Kapooꞌ meekung mosiꞌnanka averereriaꞌ otoai bereꞌarima okiꞌnooꞌnaꞌ tairaarima busivusiriraariꞌneenga. Eeꞌnoko napoꞌ diikaang dukuꞌ pooroꞌanko duaꞌeriaꞌ otoai. Teeꞌ nkoveriko metoꞌ ninka nariꞌ meeꞌaama moreꞌaaꞌneenga.”
23397	MAT 7:12	Teeꞌ nantoonge diiꞌ tampaꞌ nkoraariiꞌnaang piarorimanaꞌ teeꞌ nariꞌ nkovererimaatoaing teing diiꞌke, aiꞌ teie aunge aarumoi tee boto Moosesi-nung eeꞌnoko nakaro-nupoong urikupoong biikaang naroꞌka dupeantavuri otong.”
23399	MAT 7:14	Teka tevarong ito-navarong kaponavunge danto tee domaang isikung-anta-aape bei otong, eeꞌnoko mmauꞌ nantoonge dekopiꞌaamaung tevung.”
23412	MAT 7:27	Eeꞌnoko tenang teing aing aaꞌning pora apoꞌ duaꞌaruꞌ, doua tuuvuuꞌ, eeꞌnoko dovinge aaꞌnaꞌ duparara dankampuuꞌ tee pava, eeꞌnoko bakei pesiꞌarara tuung tanuuꞌ tee pava.”
23416	MAT 8:2	Eeꞌnoko narung oramuuꞌpoꞌnung pora Jiisuuꞌkoo uroꞌkanooꞌ kinkinui eentavarama aaꞌpuuꞌ, “Ovoring, daꞌ piarora deekoꞌ dake ning aung oramuuꞌ kuimepeuꞌnung.”
23418	MAT 8:4	Teketa Jiisuuꞌke aaꞌpuuꞌ tee, “Tarerari naning naueaukaꞌ, teka namuꞌke Moosesi bakaang boto siompei piristiꞌkoo siraꞌantararavai, eeꞌnoko tampaꞌ ooruko Kumponing-koo boontunang nkoveai nantoonge tee taaꞌniꞌanta ooaara daꞌ teing ninka nariꞌ otoꞌkoo tauraꞌniiꞌ tasiꞌdaavainaꞌ, teeꞌ Moosesi bakaang botoi minkuvumanaꞌ.”
23421	MAT 8:7	Teketa Jiisuuꞌke aaꞌpuuꞌ tee, “Meraiꞌnang taare-antavamaꞌnaang tee.”
23423	MAT 8:9	Ninge daꞌ pankaing tasiꞌdamira teeꞌ minkuamaang, aiꞌ ning tee napoꞌ niiꞌnooꞌ basi-koo iriꞌkoo kuung oꞌnong piatooronuka tare-koong-koo. Eeꞌnoko niiꞌnung aaꞌpanko dei, ‘Beai,’ tee bepeuꞌ. Eeꞌnoko niiꞌnung aaꞌpanko dei, ‘Poai,’ tee popeuꞌ. Eeꞌnoko nkaang bautara aaꞌpanko, ‘Aung nkoveai,’ teie nkovupeuꞌ tee. Teeꞌkoo dake tamung karai minkueko nkaang botovotonaaꞌ taarevoaing.”
23426	MAT 8:12	Teka teing muuꞌkoo temuꞌ miruꞌniiꞌnuka teing aꞌdang damaꞌdu duaꞌuriaining mutaananooꞌ, teꞌ eeꞌnooꞌ nantoong biromparima siꞌdaꞌ dovang kakirinkuarimatoainooꞌ sisikeera-koo otoroi.”
23427	MAT 8:13	Teketa Jiisuuꞌke tee piatooronuka daakuꞌ tarenara aaꞌpuuꞌ, “Naniai. Tee tee teeꞌ nariꞌ dake masikaꞌantaveinaꞌ nkoaravaing.” Eeꞌnoko tee bakaang bautara tee tenang tee-koo batei-koo taarevouꞌ.
23431	MAT 8:17	Jiisuuꞌke teeꞌ nkovuma tee kara dupe-antavuuꞌ teie Aisaiaꞌke nakaronunge urikunge minkuvuuꞌnung Daari Meekung-koo aaꞌpuuꞌnooꞌka, “Teie niikaning siipananka eeꞌnoko aruaruꞌnanka nkamemurira duaꞌuaing.”
23433	MAT 8:19	Teketa narunge boto naunuka-koonge tee-anko pora aaꞌpuuꞌ, “Pankaing ee, ninge tee daꞌ siontampaing areꞌ tokoo daꞌ beainooꞌ.”
23434	MAT 8:20	Teketa Jiisuuꞌke makuꞌuma aaꞌpuuꞌ tee, “Nkaunanka biikaning kumpenanka otoꞌevoromaung, eeꞌnoko barennanka auviꞌau-kooning biikaning bitonanka, teka ning Tee Naning-naumpoꞌ Paning-etaing˜ tokoo boreꞌ patuꞌmaravainooꞌ otoꞌmemuaꞌ.”
23435	MAT 8:21	Teketa napoꞌ teing siompaakoꞌning-koong narung pora aaꞌpuuꞌ, “Ovoring, ioꞌ tauraꞌmeko mmaꞌ dakoꞌampainooꞌ basinooꞌ mmaꞌ ninka oꞌnoreaing, eeꞌnoko mmaꞌ dakoꞌamiraiꞌnange daꞌ siontampai.”
23436	MAT 8:22	Teka Jiisuuꞌke aaꞌpuuꞌ tee, “Siperiko booꞌnukai biiꞌka booꞌnuka dakoꞌaariaing, teka daꞌ aaꞌdamaang: Bera daankieaing tee Kumponing bakaang muuꞌ.”
23445	MAT 8:31	Eeꞌnoko teinge maꞌnari orenge eentavarima Jiisuuꞌ aaꞌpauꞌ, “Dake bataꞌmerima deekoꞌ pooroꞌnavontu-koo kuung tung-koo tauraꞌmeriai.”
23450	MAT 9:2	Teka niiꞌninge nantoonge naning doota tee-anko tavoꞌauꞌ batanang-koo bemparioꞌ. Eeꞌnoko tenang Jiisuuꞌke teing tee tavoꞌauꞌning biikaang baito oovura aaꞌpuuꞌ tee naning doota, “Domang mankiꞌdoaukaꞌ, ee aung, dakaning orarananka tontaꞌderonsing.”
23451	MAT 9:3	Teeꞌ nkovuko ooaara niiꞌninge boto naunukai biiꞌka kareaama aaꞌpaakoꞌ, “Aunge bakei naninge Kumponing bauvaupaaꞌumaang.”
23457	MAT 9:9	Eeꞌnoko teketa Jiisuuꞌke nanuma narung naning oovuuꞌ miring Maatiuꞌ, taakisi nkavaakoꞌnava-koo baꞌnanuioꞌ bakanavaro-koo. Teketa Jiisuuꞌke aaꞌpuuꞌ, “Ning siomeai.” Eeꞌnoko Maatiuꞌke deto donkonura tenang-eta deto tee siompui nanuuꞌnung.
23461	MAT 9:13	Berira ioꞌ tee kara daari meekung-koong-koo tampaꞌ barerariaing aaꞌpumanaare, ‘Ninge tee aarumo piaa unaa-anta-poꞌnung piamoi oꞌnong, tee boontunang deeaꞌ.’ Aiꞌ ning nantoong tampenanka-anko moaꞌ. Ning orenanka-koo mouꞌnung nauaranko bereꞌariaꞌnaang.”
23462	MAT 9:14	Napoꞌ Jooni bakaninge barevare-nupoonge porora Jiisuuꞌ niaꞌaama aaꞌpauꞌ, “Daꞌ dakaning daꞌ ninka nanirimaing arekeeꞌkoo dootuuꞌkoong aarumo siompai unkumuariaung? Eeꞌnoko niiꞌ Boto Keperuuꞌnavitu ninka unkumumarikooꞌ.”
23465	MAT 9:17	Napoꞌ nantoonge nerakaruꞌ uaininaruꞌ urikaroꞌkoo pareꞌaavarupeuꞌ. Teeꞌ nkoaako deekoꞌ tee, teroꞌ nakaꞌarako teruꞌ uaininaruꞌ dakoarapeuꞌ eeꞌnoko teroꞌ tenang oraruꞌkupeuꞌ. Teruꞌ nerakaruꞌ uaininaruꞌ nerakaroꞌkoo deekoꞌ pareꞌkoo makosi, teeꞌkoo ookeng tampaꞌ otorepeuꞌ.”
23466	MAT 9:18	Tenang teeꞌ minkuvuma teke otoko narung pava dootuuꞌnava tanatanuka-koong narung tavoꞌarara tee-koo uroꞌkanooꞌ kinkinui eentavarama aaꞌpuuꞌ, “Nnorang bakei enang okiꞌnaruuꞌkuing. Poraiꞌnange teni-koo bireng panteꞌeko teni domamparavai.”
23468	MAT 9:20	Teketa tenang niiꞌnani naning manikuma kivora-ita kemareꞌka-koo tarumatearakoꞌnani tee-koo damaꞌdu pora bakaang mononopaꞌkoo kainuꞌ kompuuꞌ, eeꞌ noruꞌarara, “Bane okiꞌnooꞌ kompamira bakaang mononopaꞌkoo, ning teni taaremoainani.”
23470	MAT 9:22	Teketa Jiisuuꞌke bereꞌarara teni oovura aaꞌpuuꞌ, “Ani ee, daꞌ doturaravaing. Dakaang baitoi taareroinani.” Eeꞌnoko teni manikuma tenang eeꞌnang taarevouꞌ.
23472	MAT 9:24	Eeꞌnoko teie aaꞌpuruꞌ teing, “Oko sirariai, ani neraiꞌnaꞌ booaꞌ, teka tamung aatumaang.” Eeꞌnoko teinge benkempauꞌ tee.
23476	MAT 9:28	Eeꞌnoko teketa niiꞌnava-koo tumparako tenaanka kaputuꞌka tee-anko poretuꞌ, eeꞌnoko Jiisuuꞌke niaꞌurema aaꞌpuretuꞌ tenaanka, “Deeꞌke ee ning makosi masikaꞌantameresi otong ninge piaroresinaꞌ nkorampeeꞌnaang?” Makuꞌurema aaꞌpuretuꞌ, “Eeꞌ, Ovoring.”
23477	MAT 9:29	Eeꞌnoko tenang teie beekaang duta kompurema aaꞌpuretuꞌ, “Deekaang baito-koo makosinaꞌ nkoaravaing deeꞌkoo.”
23478	MAT 9:30	Eeꞌnoko beekaang duta tenang bantouꞌ. Eeꞌnoko aaꞌnaꞌ orokovuretuꞌ aaꞌpurema, “Teka aung naninge noruꞌuaukaꞌ, makempereaing.”
23481	MAT 9:33	Eeꞌnoko tenang tee maꞌnaang bataꞌuioꞌ tee karoarukoꞌnung karouꞌ, eeꞌnoko nantoong karingai ooaara taꞌninaara aaꞌpauꞌ, “Kapooꞌ eeꞌ oroꞌ ooampiaruuꞌnung teroita niiꞌkoo Isireeli-nupoong-koo meuꞌka.”
23482	MAT 9:34	Teka teinge boto keperuuꞌnavitue aaꞌpauꞌ, “Tee aaꞌ maꞌnari biikaang pankaing bakaang iriꞌke teeꞌ bataꞌurimang maꞌnari.”
23501	MAT 10:15	Masikaꞌ naurampimang ninge, teꞌmung simpeꞌ nkonaꞌmung kiimata temono-nupoong biikaang koontoꞌ bakei dau basi deemparavaing teing-koo temuꞌnupoong oreng-koo biikaang osi Kumponinge paroꞌuuꞌning-koo, aaꞌnoko Sodom eeꞌnoko Komoraꞌ.”
23513	MAT 10:27	Kapooꞌ ninge mutaananooꞌke naurampimaing doonaaꞌ nau-antavereriaing. Kapooꞌ iaantampiko taaraverira deto karerima daankieriaing.”
23528	MAT 10:42	Eeꞌnoko ninge masikaꞌ naurampimang, baa tee naning aing okiꞌnarekaꞌkoo narung ntonaruꞌ avuaing kaꞌmatonaruꞌ tee eeꞌnung nkaang barevare-nung deemparako teie tee koontoꞌ divuꞌuaukaꞌ tee bakaang mooꞌ; nkavuaing.”
23534	MAT 11:6	Eeꞌnoko biraankearavaing tee naning ning-koo dateꞌpari baitoaravaing, eeꞌnoko nkaang nko-nko akoveeꞌ mareꞌuaukaꞌ.”
23547	MAT 11:19	Eeꞌnoko ning Tee Naning-naumpoꞌ Paning-etaing mora taamanama tuaamarako napoꞌ konterorima aaꞌmerimaung, ‘Aung ooveriai taamang eeꞌnoko uaini nai bauko, taakisi nkanuka eeꞌnoko niiꞌning orenge biiꞌmaikoꞌke!’ Teka Kumponinge avutevuꞌmuresi botomuresinaꞌ sinampuko diiꞌke bakaang matau tasiꞌperiaing.”
23554	MAT 11:26	Teing nantoong piaaveri piarouꞌnaꞌ teeꞌ. Eeꞌ, Mmaꞌ.”
23558	MAT 11:30	Ninge tare-koo diiꞌ arooꞌdariri dei mankiꞌdoriaꞌ kuaaꞌdoripeuꞌ ning siomeritaaꞌ.”
23571	MAT 12:13	Teketa Jiisuuꞌke aaꞌpuuꞌ tee naning, “Bireng tovoroꞌdaravai.” Eeꞌnoko tovoroꞌarara koontoꞌ bakei tamparuꞌkuuꞌ niiꞌnaang-pinaꞌ baꞌmaikoꞌnaang-pinaꞌ nariꞌ.
23579	MAT 12:21	Eeꞌnoko tee-koo bakaang miring-koo ookara nantoonge noruꞌ sipaavai.”
23581	MAT 12:23	Eeꞌnoko ookara nantoonge taꞌninaara aaꞌpauꞌ, “Aung pa tee Deevitaꞌ bauring, Kumponinge Pakoꞌpariꞌniiꞌ.”
23582	MAT 12:24	Teka tenang teinge Boto Keperuuꞌnavitue teeꞌ taaravaara aaꞌpauꞌ, “Tee aaꞌ Kopeu bakaang purintoꞌke maꞌnari bataꞌurimaung, tee maꞌnari biikaang pankaing.”
23595	MAT 12:37	Teie eeꞌnunge diikaang karanankai simpeꞌduriaining diiꞌ koontoꞌnuka niiꞌnooꞌ koontoꞌnuka deeaing tanturiaing deekoꞌ.”
23596	MAT 12:38	Teketa tenang teinge Boto Keperuuꞌnavitue eeꞌnoko napoꞌ teing boto nau-antanukai aaꞌpauꞌ tee, “Nau-anta, niiꞌ taaꞌniꞌanta dake nkoveko oo-koo piamorimang.”
23600	MAT 12:42	Napoꞌ teꞌmung simpeꞌ nkonaꞌmung teni ovorinaang amenteiꞌketa depeto pouꞌnanie nariꞌ diiꞌ emuꞌnavarang ninka daaꞌarara diiꞌ kiimata-koo makosinuka tanturiaing, teni kansiꞌkoo basi-aapeita pouꞌnani deemparama Solomoniꞌ bakaang norukasiꞌkoo baroromparaaꞌnaang, eeꞌnoko ee aing Solomoniꞌkoo dau basi aung anke otoko oomeri barorontariaꞌ otong.”
23605	MAT 12:47	Teketa naninge narunge Jiisuuꞌ nauvuma aaꞌpuuꞌ, “Daaraꞌmainkaang eeꞌnoko dauko damaꞌdue donkonai otorong, daꞌ kara-koo piavoromang.”
23608	MAT 12:50	Aiꞌ baata teing Mmaꞌ paning-koong bakaang pia siompaamaing teing teing eeꞌning ninge aaꞌning makosinuka: ntaraꞌmainkaang, mmarikaampi eeꞌnoko nkoꞌdovo.”